\id MRK  
\h Markus 
\toc1 Markus 
\toc2 Markus 
\toc3 Mrk. 
\mt1 Markus 
\is1 Horok Lirna La'an 
\ip Ri Kristen man minle nonolu enihe ra'aheni ri ma naran Markus man hi'i horok eniyeni. Markus eni lernohi Petrus lere Petrus laliwewer loikaru Makromod Lalap Lirna Wawa'an. Markus horok inhawa lira an derne nano Petrus. 
\ip Lolo horok eni, Markus konohi Yesus Nin hini'i wenewhe noro Nin wanakuku man Ai nala Nin man lernohi pakunohi enihe. Yesus loikaru Lirna Wawa'an ma nahenia lere Makromod Lalap nodi molollo ri morimori noho wawan maiyedi me'e (1:14-15). Yesus nodi molollo hi'i wa'an ri ma nakni'ir la rohiyedi hayakyak man huhu'urle ri raram. 
\ip Yahudi rir man panulu ra'okuledi Ai la lawuku panaeku leke resne (3:6). Ai nauroin rir panaeku, de kukunohi nahenia ka nalo'ol hir resne Ai (8:31, 9:31, 10:33-34). Kade Ai nauroin rir panaeku onne, maa An laa Yerusalem mamani, ono Nin panaeku nala kemen hi resne leke huri we'er ri morimori nano rir dohohala nin hunukum makmaki (10:45). Hi resne Ai, maa An mori wali'ur. 
\ip Markus hi'i horok eni leke ik kauroin namlolo kokkoo nahenia Yesus eni Makromod Lalap Ananne, la Makromod Lalap kikan Ai namwali Rai laa ewi-ewi (1:1, 11, 24; 3:11; 5:7; 8:29; 9:7; 14:61-62; 15:39). Markus nin panaeku na'alap ik akin leke ik kamkene lernohi Yesus mamani (8:34-38; 10:29-31). 
\ie  
\is1 Horok Ihin 
\io1 1. Yesus hi'i Nin honowok man dedesne (1:1-13). 
\io1 2. Yesus wakuku la kukul Nin ke'eke'el an'anha lolo noho Galilea hehen nanumene Yahudi rir man panulu paeku resne Ai (1:14-3:6). 
\io1 3. Yesus wakuku la ilitolle ri mamani lolo noho Galilea (3:7-6:13). 
\io1 4. Yesus wakuku ri la kukul Nin ke'eke'el an'anha lolo kota-kota man aile noho Galilea (6:14-8:30). 
\io1 5. Yesus nala'a nano Galilea laa kota Yerusalem leke nala kemen maki (8:31-10:52). 
\io1 6. Yesus wakuku la ilitolle ri lolo kota Yerusalem (pnk. 11-13). 
\io1 7. Hir kele Yesus la wairesne (pnk. 14-15). 
\io1 8. Yesus mori wali'ur (pnk. 16). 
\c 1  
\s1 Yohanis man ulutade ri lolo oir wauwau Yordan 
\r (Mat. 3:1-12; Luk. 3:1-18; Yoh. 1:19-28) 
\p  
\v 1 Horok eniyeni Lira Wawa'an ma na'ono Yesus Kristus, Makromod Lalap Anan.  
\v 2 Hari Lira Wawa'an eniyeni namnenehe nabi Yesaya nin horok ma na'ahenia, 
\q1 “Makromod Lalap na'aheni, ‘Ya'u hopon Ainu'u ma nodi lira na'ahari kalla nolu mai leke hari kalla ki O. \x * \xo 1:2 \xt Mal. 3:1\x* 
\q1  
\v 3 Ri ida aile lolo noho mamun ma napro'uk wakaukau na'ahenia: 
\q2 Ma'ahari kalla la ma'anehe, leke Makromod lole.’ ” \x * \xo 1:3 \xt Yes. 40:3\x* 
\m  
\v 4 Enpenia Yohanis ma nodi oir ulutada ri min lolo noho mamun ma napro'uk. Lolo onne an loikaru lir ri na'akeme na'ahenia, “Herredi minim morimori ma ka namlolo eni, mai derne makani Makromod Lalap, la mala mi kemmu ulutade leke namwali tanada nahenia Makromod Lalap na'ohu nahaledi minim dohohala me'e.”  
\v 5 Ende ri nammori rano Yudea ulla ki'il lolo waliwali noro kota Yerusalem ne'en raram na'akeme maiwuku, derne Yohanis. Hi meririi werre akin kukunohi rira dohohale nanumene Yohanis norhe laa oir wauwau Yordan raram ulutade. 
\p  
\v 6 Yohanis nair nainair rodi unte wulu hi'ie noro kali ehe rodi ha mormori ulikne hi'ie, la nina nana'an nonomun poreke noro wani oir.  
\v 7 Yohanis konohiyedi ri na'ahenia, “Yo oluwedi Ri ma nodi molollo narehi ya'u mai. Ainina pakpak ei nin kali me'ene kan wa'an ya'u we'er.  
\v 8 Yo odi oir ulutada mi, maa An ulutada mi nodi Roh Kudus.” 
\s1 Yohanis nodi oir ulutada Yesus 
\r (Mat. 3:13-17; Luk. 3:21-22) 
\p  
\v 9 Lere onneni Yesus mai oir wauwau Yordan nano Nin leke Nazaret lolo noho Galilea, de Yohanis ulutada Ai lolo oir onne.  
\v 10 Yesus namharedi oir eni ne, An po'on laa wawan, a'am nahinariyedi, la Roh Kudus molmolo merpati ida kopur mai Ai wawan.\fig Ulutade Yesus horu, Roh Kudus kopur mai Yesus wawan naisa manu merpati ida|src="CN01656b.tif" size="span" ref="Mrk. 1:10" \fig* 
\v 11 Onne horu, derne lira ida namhara a'am raram na'ahenia, “Ya An'u O! Ya amre'e amharu O. Om hi'i Ya akin nahuwa'an rehi!” 
\s1 Hayakyak Makromon ken patal Yesus 
\r (Mat. 4:1-11; Luk. 4:1-13) 
\p  
\v 12 Lere onne me'ede, Roh Kudus norkaru Yesus laa noho mamun ma napro'uk.  
\v 13 An min lolo onne alam weli'akka la Hayakyak Makromon mai kene patal Ai. Lolo onne ha mormori merwui naworo nawa'aha noro Ai, la hophopon a'am raram mai wayahu wadane. 
\s1 Yesus rakan noho Galilea napolu Nina man lernohi pakunohi dedesne 
\r (Mat. 4:12-22; Luk. 4:14-15, 5:1-11) 
\p  
\v 14 Kele Yohanis rala laedi bui raram ne, Yesus laa noho Galilea loikaru Makromod Lalap Lirna Wawa'an eni.  
\v 15 Ai na'aheni, “Lere Makromod Lalap nodi molollo ri mormori na'uraniyedi me'e. Herredi minim morimori ma ka namlolo eni, la derne makani Makromod Lalap Lirna Wawa'an eni.” 
\p  
\v 16 Ai nala'ala'a lolo oir lap Galilea arkanne, An do'on ma nohu meki woro'o, Simon noro mo'oniwalla Andreas mahar sopol diyale.  
\v 17 Yesus naka'uk hi na'ahenia, “Mam lernohi Ya'u leke Ya'u wakuku mi manoin ri mormori naise manoin i'in.”  
\v 18 Idewe hir hoikaruwedi rir diyaleni, laa lernohi Ai me'e. 
\p  
\v 19 Hi rala'a laa kalari tarana, Yesus do'on Yakobus noro mo'oniwalla Yohanis noro aman Zebedeus mahar tapil dari aile korkore wawan.\fig Yesus holikuku Yakobus noro Yohanis noro aman mahar tapil darie|src="CN01682B.tif" size="span" ref="Mrk. 1:19" \fig* 
\p  
\v 20 Ai napoluwedi hi, idewe hir hoikaruwedi aman noro nina man howok enihe, laa lernohi Ai me'e. 
\s1 Yesus nohi hayakyaka man huhu'urle ri ida raram 
\r (Luk. 4:31-37) 
\p  
\v 21 Yesus noro Nina man lernohi pakunohi rakan kota Kapernaum nediyale Yahudi nina Alam Renren Warwarna, de Yesus laa Yahudi nina kerei raram wakuku.  
\v 22 An wakuku ne, heri mehe nanana mouwedi la aki'aki uluwakun derne Nina wanakukue, ono Ai kan wakuku naise hirira meser Horok Lap enihe, maa An wakuku naise ma nodi molollo. 
\p  
\v 23 Ai mahan wakuku, ri ida mai kerei raram, hayakyaka hu'uhu'ur raramne. Maiyedi kerei raram ne, an wakau Yesus na'ahenia,  
\v 24 “Oih! Yesus! Nazaret O. Onuma inhawa panaeku noro mayai? O mam mesne mayai? Ya auroinedi O me'e. O penia Makromod Lalap Nin Hophopon mememen man moumou dewdewe.” 
\p  
\v 25 Yesus dadiyale, “Karkaramedi! Mamharedi ai raram here!”  
\v 26 Hayakyaka onne do'odewe ri onne me'ede, kais makin la namhara. 
\p  
\v 27 Idewe na'akeme polletilu. Ida ma na'ukani ida na'ahenia, “Eih! Ha eni inhawpe? Ma namwali eni lo'o wanakuku worworu. Ai nodi molollo hayakyaka enihe penia hir derne rakani Aie!”  
\v 28 Enime'ede lira ma na'ono Yesus Nin hini'i eni pelek raderre radaul lolo Galilea ne'en raram na'akeme. 
\s1 Yesus hi'i wa'an ri nammori 
\r (Mat. 8:14-17; Luk. 4:38-41) 
\p  
\v 29 Kerei namharedi ne, Yesus, Yakobus noro Yohanis ra'alono laa Simon noro Andreas rira nakar.  
\v 30 Lere onne Simon paninne maeke nakni'ir rinna manha, de namkukuru lolo nakar. Hir rakan nakar, manin nakar konohi Yesus na'ahenia, “Pape, mama ornakar nakni'ir rinna manha.”  
\v 31 Enine An laa roulle liman namake. Ideweni ne, nin kini'ir wa'anedi. Horu ne, ai na'akene hanana'an hi ra'an. 
\p  
\v 32 Lere helemedi ri nodi ma nakni'ir noro man hayakyaka huhu'ur raram na'akeme mai Yesus me'e.  
\v 33 Ri nammori man holi kota onneni mai nakar onne.  
\v 34 Enime'ede An hi'i wa'an apinha rahu eni, la nohi hayakyaka man hu'uhu'ur ri raram enihe. Enimaa, Yesus ka nala leken hayakyaka wakunu, ono hi rauroinedi me'e Ai onne Makromod Lalap Anan. 
\s1 Yesus wakuku leke-leke namehin lolo Galilea 
\r (Luk. 4:42-44) 
\p  
\v 35 Rakan noho roropo Ai namaka laa paharne. Ai namhara leke laa onno ma namlina namkai hi'i lir napanak,  
\v 36 maa Simon noro nina mukue laa ranoin Yesus.  
\v 37 Pakromedi ne, hi ra'aheni, “Eih! Pape, ri nammori maha ranoin Papa!” 
\p  
\v 38 Enine Ai na'aheni, “Mai kala'a leke-leke ma na'uranrani eni leke Ya'u loikaru Lira Wawa'an lolo enne haenhi. Onne penia Ainu'u panaeku mai noho wawan eni.” 
\p  
\v 39 Enime'ede An laliwewer Galilea raramne laa Yahudi rira kerei-kerei loikaru Lira Wawa'an onne, la nohi hayakyaka man aile ri raramne. 
\s1 Yesus hi'i wa'an ri man ulik yaka hi'ie 
\r (Mat. 8:1-4; Luk. 5:12-16) 
\p  
\v 40 Ler ida mo'oni ida man ulik yak hi'ie mai Yesus kadi ein korno kalarna na'aheni, “Papa ne'e harome hi'i wa'anedi ainu'u apinha ke'e.”  
\v 41 Enime'ede Yesus naramyakale, de kemenala liman laa ri onneni na'aheni, “Ye e'e! Wa'anedi here!”  
\v 42 Me'e'eni me'ede nina ulik yake moluwedi, de wa'anedi. 
\p  
\v 43 Horue ne, Yesus hopon ai na'ahenia,  
\v 44 “Yom konohi ri ha ma namwali o kemmu eniyeni, maa mala'a laa imam nanu leke an po'onala o kemmu, nauroin nahenia om wa'anedi me'e, la modi onum honoi kanani\f + \fr 1:44 \ft Po'onala Im. 14:2-32. Honoi kanani onne namwali manu woro'o naisa orpopo'o.\f* mala ai leke lernohi agame nina holoor halauk eni. Hi'i onne leke namwali tanada nahenia om wa'anedi kokkoo me'e.” 
\p  
\v 45 Enimaa, ri onne nala'a ka nodi nou onneni, ono an wakunu laliwewer panaeku ma namwali kemen eni. Enpenia ka namwali Yesus laa leke-leke nin leke raram, de minle leke paharne lolo onno ma namlina namkai. Min lolo onne maa, ri nammori lolo waliwali mai leke dernale. 
\c 2  
\s1 Yesus hi'i wa'an mo'oni ida ma naplu'uk nap'eker 
\r (Mat. 9:1-8; Luk. 5:17-26) 
\p  
\v 1 Nakawedi alam ida woro'o ne, Yesus nala'a Kapernaum wali'ur. Enpenia raderre radauledi nahenia An minle nakar ida.  
\v 2 Enime'ede heri maiwuku ho'o me'e, hir penuwuku lolo onne penia onno kan nokor. Nika makan penpenu ri mormori. Enine Yesus loikaru Makromod Lalap Lirna Wawan ri onnenihe.  
\v 3 An wakunkunu ne, ri wo'akka rodi ma naplu'uk nap'eker ida mai Yesus.  
\v 4 Ri nammori rehi, de leken kaale laa wakurani Yesus miminlole. Ende hir raiye'er nakar wawan nanumene hi rala kopur ri onne noro nin namkuru onno laa Yesus kalarna.\fig Raiye'er nakar wawan leke rala kopur ma naplu'uk nap'eker|src="CN01686B.tif" size="span" ref="Mrk. 2:4" \fig* 
\p  
\v 5 Yesus po'on nauroin nahenia ri onnenihe akin naili'il kokkoo, de ne'el man apinha onne na'ahenia, “Pa'e, Ya a'ohu ahaledi onuma dohohale me'e.” 
\p  
\v 6 Maa, meser Horok Lape woro'o wokelu raikokoro aile lolo onne roro akin wakunu na'ahenia,  
\v 7 “Alhi'ihepenia ri eni wakunu heheni? Ai na'ihoru na'idaruwedi Makromod Lalap me'e. Inhoi nodi molollo na'ohu nahala dohohala? Makromod Lalap mehe!” 
\p  
\v 8 Yesus nauroinedi hi honorok akin me'e, de na'ukani hi na'ahenia, “Hi'ihepeni mim kikan panaeku eni mi raramne?  
\v 9 Ewi man sus rehi? Ya aheni ma naplu'uk nap'eker eniyeni Ya a'ohu ahaledi nin dohohala, ee Ya'u hopon ai namakedi, la kikan nina namkuru onno, wali laa nin nakar here!  
\v 10 Ya'u hi'i wa'an ri eni leke mi mauroin mouropo nahenia Ya'u eni ma namwali Ri Mormori Anan, la Yo odi molollo lolo noho wawan a'ohu ahala ri nina dohohala!” Enime'ede Yesus hopon ri ma naplu'uk nap'eker onne,  
\v 11 “Mamakedi! Modi num namkuru onno, wali laa num nakar here!” 
\p  
\v 12 Ai namriri, kikan nina namkuru onno, nodie namhara. Heri man po'on mo'oni man wa'anedi onne na'akeme polletilu. Hi ra'uli rasa'a Makromod Lalap ra'aheni, “Makromod Lalap Ma Narehi Ma Nalewen! Ai kam do'onala ha nais eni makun.” 
\s1 Yesus napolu Lewi 
\r (Mat. 9:9-13; Luk. 5:27-32) 
\p  
\v 13 Yesus wali wali'ur laa oir lap Galilea, la ri nammori mai de Yesus wakuku hi.  
\v 14 Hi rala'ala'a ne, An do'on Alfeus anan Lewi naikokoro lolo onno rodi ra'uk paipair. Yesus na'aheni, “Mam lernohi Ya'u.” Enime'ede Lewi namriri lernohi Yesus. 
\p  
\v 15 Ka nalo'ol Lewi lariyala Yesus noro Nin man lernohi pakunohi rala'a nina nakar, ra'ak. Man ra'uk paipairi noro ‘man hi'i dohohala’ nammori raikoro wuku roro Yesus noro Nin man lernohi pakunohi, la ra'ak wewerre ono ri nammori lernohiyedi Yesus me'e.  
\v 16 Meser Horok Lap nano muku Parisi ida woro'o mai do'on Yesus na'akwuku noro man ra'uk paipair noro ‘man hi'i dohohala’ enihe. Hi ra'ukani Yesus Nina man lernohi pakunohi enihe ra'aheni, “Hi'ihepenia minim Meser eni ra'ak wewerre noro man ra'uk paipair roro man hi'i dohohala enihe?” 
\p  
\v 17 Yesus dederne rira na'ukankani onneni, de An walha na'ahenia, “Ma kan apinha ka nanoin ma na'inapin. Man apinha mehe nanoin ma na'inapin. Ka'u mai apolu ri man hi'i ha ma namlolo mamani, maa Ya'u mai apolu ri man hi'i dohohala.” 
\s1 Ri na'ukani Yesus alhi'ihepenia ka na'aluli kemen ka na'ak nomun? 
\r (Mat. 9:14-17; Luk. 5:33-39) 
\p  
\v 18 Ler ida Yohanis man ulutada ri nin man lernohi ida woro'o roro Parisi enihe mahanoro ra'aluli kemen ka ra'ak romun. Ende rin mai na'ukani Yesus, “Hi'ihepenia Yohanis nina man lernohi enihe roro Parisi enihe lernohi Yahudi nina holoor halauk, de ka ra'ak romun, maa Onuma man lernohi enihe kae?” 
\p  
\v 19 Yesus walha na'ahenia, “Ik min hohoo, popolu lalariyala enihe ka ra'ak romun? Ka! Mo'oni man ho eni nornore makun, hi ra'ak romun mamani!  
\v 20 Enimaa rakan orekiyedi ri namehin mai rala man ho eni nano hi leken kalarne nanumene hi ra'aluli kemen ka ra'ak. 
\p  
\v 21 Ri kan tapil nainair lo'olo'ol nodi tapi a'un worworu, kalo'o tapi a'un rodi tatapil onne hi'i riki nainair onne eren lalapa.  
\v 22 Namnenehe onne ri ka nadedem nala anggur worworu halle sak ulik lo'olo'ole, kalo'o anggur worworu eni hi'i sak ulik lo'olo'ole napriki de anggur noro sak ulik yakedi, kar nair me'e. Maa ri nadedem nala anggur worworu halle sak ulik worworu.” 
\p (Ai nodi wanakunu naho'ok eniyeni leke nounaku hi yono lernohi wanakuku nonolu eni, maa lernohi Makromod Lalap Nina wanakuku worworu eni.) 
\s1 Yesus nodi molollo Yahudi nina Lere Alam Renren Warwarna 
\r (Mat. 12:1-8; Luk. 6:1-5) 
\p  
\v 23 Ler ida, Yahudi nin Alam Renren Warwarna, Yesus noro Nin man lernohi pakunohi enihe rala'a lolo gandum kirna ida. Maie ne, man lernohi pakunohi enihe reku gandum.\fig Gandum wurna|src="HK00099b.tif" size="col" ref="Mrk. 2:23 " \fig* 
\p  
\v 24 Ri Parisi ida woro'o ma aile lolo onne do'odo'on, de ra'ukaniyale, “Hi'ihepenia Onuma man lernohi pakunohi enihe larlewenedi iknik agame nina holoor halauk me'e?” Hi ra'ukani heheni ono hir pene'ek reku gandum onne namwali honowok man luli hi'i lolo Alam Renren Warwarna. 
\p  
\v 25-26 Yesus walhe na'ahenia, “Lo'o mi kam lesala inhawa ik upud Daud hihi'i lere ai noro nina kalla wali ra'alehe hanana'an de ramlara me'e! Lere onne Abyatar namwali Makromod Lalap Nina imam man kulu narehi. Daud laa Tenda ma namwali Makromod Lalap Nin miminlole raram na'an roti man luli ra'an ono rodi hoikani Makromod Lalap. Makromod Lalap Nin holoor halauk hurinohi imam mehe ra'an roti onne, ri namehin ka. Maa Daud nala roti ha'ar nina muku ra'an haenhi, ono Daud nauroin nahenia Makromod Lalap naramyaka ri mormori narehi Ai naramyaka Nina holoor halauk onneni.  
\v 27 Alam Renren Warwarna nin holoor halauk eni peni ra'akene leke paku ri mormori, ka nahenia hi'i ri mormoriyana leke derne rakani Alam Renren Warwarna nin holoor halauk eni.  
\v 28 Ya'u, ma namwali Ri Mormori Anan, odi molollo hopon rin hi'i ha wo'ira Alam Renren Warwarna.” 
\c 3  
\s1 Yesus hi'i wa'an mo'oni ida Alam Renren Warwarna 
\r (Mat. 12:9-14; Luk. 6:6-11) 
\p  
\v 1 Lere namehin Yesus wali wali'ur laa Yahudi nina kerei raram. Lae ne, holikuku mo'oni ida liman wali makiyedi.  
\v 2 Lere onne Parisi ida woro'o aile lolo onne maha ranoin Yesus Nina sale, leke hir kele la kalake. Hir kokolole ke'ede, lo'o An hi'i wa'an mo'oni man liman wali maki eni Alam Renren Warwarneni, ee ka.  
\v 3 Yesus ne'el mo'oni man liman maki onne na'ahenia, “Mai mamririyedi heri kalarna.” 
\p  
\v 4 An maiyedi kalarie ne, Yesus na'ukani Parisi man aile lolo onnenihe na'ahenia, “Iknik holoor halauk hurinohi ika hi'i inhawa Alam Renren Warwarna? Hi'i ha wawa'an, ee hi'i ha yakyake? Hi'i ri man apinha wa'an, ee reden ri?” 
\p Maa, hi na'akeme ka ra'oho ono ka rauroin walha me'e.  
\v 5 Yesus nodi oi mahu po'on waliwali la na'ahan haenhi ono Ai nauroin ri enihe ra'uluwaku kekerhe la honorok akin kiki'il. Enime'ede Ai ne'el ri man liman maki eni na'ahenia, “Ma'aloledi o limmu.” Ri onne na'aloledi liman, idewe liman wa'anedie.  
\v 6 Ende me'e'eni me'ede, ri Parisi enihe ramhara kerei korowuku ra'ukwuku roro ri woro'o wokelu man kuku leu Herodes leke ranoin kalla man wa'an resne Yesus. 
\s1 Yesus hi'i wa'an ri nammori oir lap Galilea arkan 
\p  
\v 7 Enime'ede Yesus noro Nina man lernohi pakunohi ramhara leke onne laa oir lap Galilea. Lere onne ri nammori nano Galilea lernohi haenhi.  
\v 8 Yesus naran pe'eredi me'e, de rin maiyedi nano kota Yerusalem wali karanna, Yudea, noro Idumea. Heruwali mai nano oir wauwau Yordan wali kimur, la heruwali mai nano Tirus noro Sidon wali ra'i. Hi na'akeme mai Yesus ono hir dernedi Ainina hini'i rahu me'e. 
\p  
\v 9 Ri nammori rehi mai lupurale, de Yesus hopon Nin man lernohi pakunohi enihe ra'akene korkoro ida leke yon heri rahu onne rokul Ai laa oir lap raram. Heri onne luplupurale ono  
\v 10 An hi'i wa'anedi ri nammori me'e. Lolo heri onne raram ri man apinha noro ma nakni'ir nammori hi ida ma nokul ida laa kalari leke tukulala Nin rain. 
\p  
\v 11 Lere onne lo'o hayakyaka man huhu'urle ri raramne enihe do'on Yesus, ri onnenihe ne'e namhene laa Yesus kalarna awikorno wakau na'ahenia, “O penia Makromod Lalap Ananne.” 
\p  
\v 12 Maa An kawala hayakyak onnenihe na'aheni, “Yono konohi ri Ya'u eni inhoi.” 
\s1 Yesus nili ri idaweli woro'o leke lernohi Ai 
\r (Mat. 10:1-4; Luk. 6:12-16) 
\p  
\v 13 Yesus namhara oir lapa arkanne wakiha'a wo'or ida napolu ri man Ai raram nodie. Ri onnenihe mai ne,  
\v 14 An kikan ri idaweli woro'o nano hi ramwali Nin hophopon ma nodi Lirna Wawa'an enihe. Ai na'ahenia, “Ya'u nili mi leke lernohi Ya'u, leke mi maderre madaul I Lir'u laa ri mormori,  
\v 15 la Ya ala molollo mi mohi hayakyaka.” 
\p  
\v 16 Ri idaweli woro'o enihe naran me'eni: 
\li1 Simon (Yesus waki naran Petrus haenhi), 
\li1  
\v 17 Yakobus noro mo'oniwalla Yohanis, Zebedeus ananhe. (Yesus waki hi naran ‘Boanerges’ haenhi. Naran onne napa'ahne, ‘rir morimori naisa ilak waslene’.) 
\li1  
\v 18 Andreas, 
\li1 Pilipus, 
\li1 Bartolomeus, 
\li1 Matius, 
\li1 Tomas, 
\li1 Yakobus (Alfeus anan), 
\li1 Tadeus, 
\li1 Simon (nano muku Zelot),\f + \fr 3:18 \ft Muku Zelot onne ramhene noho Roma nodi molollo Israel.\f* 
\li1  
\v 19 la Yudas (ma na'olu Yesus). 
\s1 Meser Horok Lape ra'aheni Hayakyak Makromon huhu'urle Yesus raramne 
\r (Mat. 12:22-32; Luk. 11:14-23, 12:10) 
\p  
\v 20 Horu ne, An wali laa nakar miminle, la ri nammori mai wali'ur penia Ai noro Nina man lernohi pakunohi ra'alehe leken ra'ak romun.  
\v 21 Ainina nakar raram derne lira anna na'ahenia, “Yesus ka na'ak, de lo'o Ai honorok akin ka namlolo me'e,” penia walinhe lar polu. 
\p  
\v 22 Meser Horok Lap enihe rano Yerusalem mai ra'aheni, “Beelzebul ma namwali Hayakyak Makromon eni hu'uredi raramne me'e, de nala molollo Ai nohi hayayaka nano ri raramne.” 
\p  
\v 23 Enpenia Yesus napolu heri mai mene nala wanakunu naho'ok ida woro'o. Ai na'ukaniyala hi na'ahenia, “Hi'ihehewi hayakyak ida nohi hayakyaka namehin?  
\v 24 Lo'o hair ida napye'er namwali muku ida woro'o, la ida ma kan derne ida, hair onne lo'o keperedi.  
\v 25 Lo'o meheromo ida man holi iw'iwar wo'owo'or noro ida ka namwali haida, maa keperedi.  
\v 26 Namnenehe Hayakyak Makromon nina ma nodi molollo. Lo'o ida ma na'okul ida, molollo onne lo'o moluloinedi.  
\v 27 Lo'o rin paeku laa ornakar ma naruri ida nina nakar namna'a hahaa, maa ai kan kele wuku ma naruri onne makun, ka namwali nala nin hahaa. 
\p  
\v 28 Loi honorok wawa'an Ainu'u panaeku ma na'ono eniyeni: Makromod Lalap na'ohu nahala ri nin dohohale noro wanakunu ma na'ihoru na'idaru na'akeme,\f + \fr 3:28 \ft Ee, wanakunu na'akeme ‘ma na'ihoru na'idaru Makromod Lalap’.\f* 
\v 29 maa inhoi ma na'ihoru na'idaru Roh Kudus, Makromod Lalap ka na'ohu nahala nin dohohala onne laa ewi-ewi.”  
\v 30 Yesus na'aheni heheni ono ri na'ahenia, “Hayakyaka hu'ur Ai raramne.” 
\s1 Yesus inna noro walinhe 
\r (Mat. 12:46-50; Luk. 8:19-21) 
\p  
\v 31 Ende Yesus inna noro mo'oniwalinhe mai. Hir lapan paharne, la hopon ri lan polu Yesus.  
\v 32 Lere onne ri nammori raikoro lolowewer Yesus. Hir konohie ra'aheni, “Papee, O inum noro mo'oniwallumhe aile paharne. Hir maha ranoin Papa.” 
\p  
\v 33 Enine An walha na'ahenia, “Yi in'u inhoi? I mo'oniwal'uhe inhoi?”  
\v 34 Enime'ede An po'onala ma naikoro lolo herne waliwali na'aheni, “E'eni penia Yi in'u la I mo'oniwal'uhe.  
\v 35 Ri man derne rakani Makromod Lalap Nina panaeku, onne penia Yi In'u, I nar'u, la I mo'onwal'u.” 
\c 4  
\s1 Yesus loikaru wanakunu naho'ok man pekir ariyono 
\r (Mat. 13:1-17; Luk. 8:4-10) 
\p  
\v 1 Ler ida Yesus wakuku wali'ur lolo oir lap Galilea arkan. Ri nammori mai lupurale, de An ha'a korkoro ida man palpali lolo onne, naikoro wawanne mene wakuku heri lape man aile lolo onne.  
\v 2 Ai nodi wanakunu naho'ok leke wakuku panaeku nammori heri onne, la lolo Nin wanakuku Ai na'aheni,  
\v 3 “Makaniyala! Ler ida ri man howok kirna nodi wini hawonne lan wahaire.\fig Rin mahan wahair wini hawonno|src="LB00094b.tif" size="span" ref="Mrk. 4:1-19" \fig* 
\v 4 An wahair ne, wini heruwali nadiyaur kalla wawan. Ende manu liwliwar mai na'an moumouwedi.  
\v 5 Heruwali nadiyaur elimo'o wakwaku. Memen pelek mori ono elimo'o tarana mehe,  
\v 6 maa rakan lere ulu, lupun napro'ukedi ono ka na'a'ar.  
\v 7 Wini namehin nadiyaur ruri roke raram, mori maa ruri roke eren lolode, elewesnedi de ka na'ihi.  
\v 8 Wini ma nadiyaur elimo'o man meur onne mori wawa'anedi. Ende dipi woi nammori, de lernala rewen welikelu, welineme, rakan rahu rehi.” 
\p  
\v 9 An loikaru panaeku onne horu, Ai na'aheni, “Lo'o mi kilinum aile, makaniyala wawa'an!” 
\p  
\v 10 Yesus memehedi onnida ne, ri man dernedi Ainin wanakuku eni roro ri idaweli woro'o man lernohi pakunohi enihe mai ra'ukani Ai na'ahenia, “Wanakunu naho'ok man Papa loikaruwedi me'eni nin panaeku inhawe?”  
\v 11 An konohi hi na'ahenia, “Makromod Lalap nala woroin mi leke mauroin hi'ihehewi Ai nodi molollo ri mormori, maa rakan lere eniyeni mene ri mormori nauroin panaeku onne. Enimaa Yo odi wanakunu naho'ok wakuku ri ma kan peinohi Makromod Lalap Nin wanakuku wanayo'o leke, 
\q1  
\v 12 ‘Hir do'odo'on, maa ka rauroin inhawa namwali. Hi rakani mamani, maa ka rauroin panaeku ida. Eni namwali leke yon hir wali wali'ur mai Makromod Lalap de Ai na'ohu nahala hirira dohohale.’ ” \x * \xo 4:12 \xt Yes. 6:9-10\x* 
\s1 Yesus napa'aha wanakunu ma na'ono ri man wahair wini hawono 
\r (Mat. 13:18-23; Luk. 8:11-15) 
\p  
\v 13 Enine Ai na'aheni, “Lo'o mi ka mauroin wanakunu naho'ok eniyeni, hi'ihehewi leke mauroin wanakunu naho'ok namehin?  
\v 14 Man wahair wini hawonne onneni naise ri ma naderre nadaul Makromod Lalap Lirna Wawan.  
\v 15 Wini ma nadiyaur kalle molmolo ri mormori man akin naise elimo'o kekerhe, de lere hir derne Makromod Lalap Lirna Wawan eni, Hayakyak Makromon mai naledi nano hi akin.  
\v 16 Wini ma nadiyaur elimo'o wakwaku eni, naise ri man derne Makromod Lalap Lirna Wawan, la kokale noro wawa'an,  
\v 17 maa lirna onne ka na'a'ar hi akin, de ka nalo'ol moluwedi. Lere hir nehule ew'ewek kawkawe ono derne rakani Lirna onne, hir waliyedi kili'urnne.  
\v 18 Wini ma nadiyaur ruri roko raram naisa ri man dernedi Makromod Lalap Lirna Wawan eni,  
\v 19 maa pelek akin tana, la akin ni'ik kanaru noho wawan mamani. Akin ma ni'ik mouwedi noho wawan nin ha rahu eni penia namwali ruri roko man ewek kawala Lirneni. Ende wini onne kan woi.  
\v 20 Enimaa, wini ma nadiyaur elimo'o man meur na'ono ri man derne Makromod Lalap Lirna Wawan la kokala wawa'an, penia na'ili nadai ihin ennen nammori, de heruwali lernala rewen welikelu, heruwali lernala rewen welineme, la heruwali lernala rewen rahu.” 
\s1 Inhoi ma nauroin Makromod Lalap Lirna La'an, yono suwarale akin 
\r (Luk. 8:16-18) 
\p  
\v 21 Onne horu Yesus na'ukani wali'ur, “Nadedem ri lokon wadu nodi ra'u lapa honow, ee nala loile leu leherne? Ka menee! Lo'o rala loile wadu onno man kulu leke ropo waliwali.  
\v 22 Inhawe man suwsuwar lere eniyeni, hari mouwedi lere man mai.  
\v 23 Ende mi kilinum aile, derne makaniyala!” 
\p  
\v 24 An wakunu wali'ur na'ahenia, “Loi honorok wawa'an inhawa man mim dederne eniyeni! Hono'ok mim nanair modi ho'ok kail ri namehin, Makromod Lalap lo'o nairre nodi ho'ok kail mi wali'ur, la lo'o narehi makun.  
\v 25 Ri ma nauroin Ainu'u wanakuku wa'an tarana me'e, lo'o ra'uwali woroin narehi nalewen makun, maa ri ma kan peinohi Ainu'u wanakuku, nina woroin tarana man aile lo'o rala wali'uredi.” 
\s1 Ik ka kauroin hi'ihewi Makromod Lalap nodi molollo, maa Nin molollo onne aile kokkoo 
\r (Mat. 13:31-34; Luk. 13:18-19) 
\p  
\v 26 Yesus na'ikar na'uwali Nina panaeku wali'ur, “Lere Makromod Lalap nodi molollo ri mormori naho'ok naise ri man pekir ariyono wini hawonne.  
\v 27 A'alam ai namkuru, lelere namaka, ka nauroin nahenia wini hawonne mori eren lalapa. Wini mormorna, ai me'e ne ka nauroin.  
\v 28 Elimo'o mehen hi'i wini hawonne mori, dedesne lollo, horu kaki, horu woi la na'ihi hehen nanumene napro'uk.  
\v 29 Woin onne napro'ukedi ne, ai nodi kuri rosu, ono rakanedi lere alam ra'ili radai me'e.”\f + \fr 4:29 \ft Lolo noho Israel man howok kirna radedem rosu gandum me aliwerhe lollo nanumene reku woin.\f* 
\s1 Makromod Lalap Nin molollo naho'ok noro au manu waku ida man mori eren lalapa narehiyedi au or'oriyana namehin 
\r (Mat. 13:31-34; Luk. 13:18-19) 
\p  
\v 30 Yesus na'ukani wali'ur, “I kodi inhawa wanakunu leke ka'amou ka'arope hi'ihewi Makromod Lalap nodi molollo ri mormori?  
\v 31 Nina molollo eni molmolo wini man tutusiyana wake'e naise wini au manu waku ida ri nala loile elimo'o eni. Kade wini onne tutusiyana,  
\v 32 maa moriyedi eren lalapa narehi au or'oriyana man minwuku lolo onneni. Hinan hanan nammori, de manu merwui mai kaile, hi'i rira wonne nahirei kakan.” 
\p  
\v 33 Ende Yesus loikaru Horok Lap Lirna La'an ri nodi wanakunu naho'ok naise onneni namnenehe rira woroin.  
\v 34 Yesus nodi wanakunu naho'ok mamani leke wakuku heri onneni. Maa, Ai noro Nina man lernohi pakunohi enihe mehe minwuku nanumene Ai na'amou na'aropedi Nina wanakunu eni. 
\s1 Yesus na'alina kahi anna 
\r (Mat. 8:23-27; Luk. 8:22-25) 
\p  
\v 35 Lere onne, lere helem me'e, de Yesus naka'uk Nina man lernohi pakunohi na'ahenia, “Mai ika ha'a korkore hopol laa oir lapa wali enne.”  
\v 36 Enime'ede hir hoikaruwedi heri rahu onnenihe la ha'a rir korkoro, la roro korkoro namehin ra'alono hopol me'e.  
\v 37-38 Hopol ne, Yesus nodi luni, de namkuru mahal lolo korkoro li'ur. Rakan heleken hir lernala kahi anna lapa. Eih! Kili'uru kalari wawarhe mamani! Man lernohi Yesus lari laa ramaka Ai, “Papa Meser, mamakedi nanu, kalo'o ika keper lolo eni me'e.” 
\p  
\v 39 Kame'ede Yesus namaka komdere na'ahenia, “Kahi anna o, mamlinedi here.” Idewe kahi anna namlina namkaiyedi.  
\v 40 Enine Ai na'ukaniyalahe na'ahenia, “Alhi'ihepenia mi akim tana rehie? Mi akim ka naili'il Maya'u makune?” 
\p  
\v 41 Enime'ede hi eren ramkaka'uk, ida ma na'ukani ida na'ahenia, “Leher eni inhoi, penia kahi anna lapa derne nakani Aie?” 
\c 5  
\s1 Yesus nohiyedi hayakyak man minle ri raram 
\r (Mat. 8:28-34; Luk. 8:26-39) 
\p  
\v 1-3 Yesus noro man lernohi pakunohi enihe rakanedi oir lap Galilea wali enne lolo leke Gerasa ne, hi pakromnala mo'oni ida man hayakyaka huhu'urle raram. Ai nadedem holi ku'il-ku'il man aile makileke. Ai onne naruri rehi, de ri nodi rantan wuku me'ene, kan yadi.  
\v 4 Lere romromo hi rodi rantan wuku liman ein, maa ma na'iseri eni hi'i rohuwedi, ri kan rehinale wake'e.  
\v 5 Lelere a'alam an wakaukau mamani, nala waku nodi kuku tehtehe kemen. 
\p  
\v 6 An po'on Yesus lolo ko'u makun, an larlari la awikorno Yesus kalarna, ono hayakyaka man huhu'ur raramne nauroinedi Yesus me'e.  
\v 7-8 Yesus hopon hayakyak onne na'ahenia, “Hayakyak o, mamharedi ri eni raram here!” 
\p Hayakyak onneni wakau naruri na'ahenia, “Yesus, Makromod Lalap Ma Narehi Ma Nalewen Anan O! Num panaeku inhawa noro maya'u? Yon hi'i apinpinha maya'u.” 
\p  
\v 9 Yesus na'ukaniyale, “O naram inhoi?” 
\p An walhe na'ahenia, “I naran ‘Legiun,’ ono mayai eniyenihe riwriwan rahrahu.”  
\v 10 Hi rapanak Yesus rewen wo'irha ra'aheni, “Yono mohi yai mamhara leke eniyeni.” 
\p  
\v 11 Lere onne me'ede, wawi ukun aile maha ranoin ya'an lolo wo'or leren kan ko'uwala.  
\v 12 Hayakyak onnenihe rapanak Ai na'ahenia, “Hopon mayai laa hu'urle wawi onnenihe raramne.”  
\v 13 Yesus hurinohi hi rala'a. Idewe ne, hayakyak onnenihe lar hu'urle wawi onne raram. Oih! Wawi lo'o riwan woro'o rapaililili lolo wo'or leren idewe laa oir lap Galilea raram, de maki mouwedi. 
\p  
\v 14 Enime'ede man wa'an wawi onnenihe wali lari laa leke raram raderre radaul Yesus Nin hini'i eni, penia ri na'akeme lari lar do'on inhawa ma namwaliyedi eni.  
\v 15-17 Hir lae ne, lupurala Yesus noro mo'oni man wa'anedi me'e onne. Hir po'one, mo'oni onne naikokoro, ka na'oho, naspolo rainedi me'e. Enla ri man idedi do'on Yesus, mahanoro konohi heri onnenihe na'ahenia, “Idedi ai lam po'on Yesus nohiyedi hayakyaka manin mo'oni onne raramne. Enla hayakyaka onnenihe lar hu'ur wawi ma aile wo'or leren raramne. Idewe ne, wawi onnenihe lari laa oir lapa raram, de maki mouwedi.” Ende na'akeme ramka'uk, rapanakala Yesus na'ahenia, “Pape, wa'an rehi Papa laa onno namehin here!” 
\p  
\v 18 Kame'ede An ha'a laa korkoro wawan wali'ur, mo'oni man idedi hayakyaka huhu'urle raramneni mai napanak Yesus, “Pape, ya'u lernohi haenhi.” 
\p  
\v 19 Enimaa, Yesus namhene. Ai na'ahenia, “O mala'a here! Lam do'on o wallumhe konohi hi na'ahenia, ‘Makromod naramyaka ya'u, de hi'i wa'anedi ya'u me'e.’ ”  
\v 20 Ende mo'oni onne kuli kuli leke idaweli lolo noho ma naran Dekapolis kukunohi inhawa man Yesus hi'i ai kemen. Enpenia na'akeme man derne polletilu. 
\s1 Yesus hi'i wa'an maeke ida nina apinha la na'amori Yairus anan maekana 
\r (Mat. 9:18-26; Luk. 8:40-56) 
\p  
\v 21 Yesus hopol wali'ur laa oir lap Galilea wali. An rakan ne, ri nammori mai lupurale lolo oir lap arkanne.  
\v 22 Kan maha ne, uluwakun Yahudi rir kerei ida naran Yairus mai oir lapa arkan onneni. An do'onedi Yesus ne, lan awikorno Yesus kalarna.  
\v 23 Ai napanak an'anhedi na'ahenia, “Papee, ya an'u maekane nin kini'ir werek wake'e, na'akeki maki me'e. Papa laa roulale leke wa'an. Alkalo'o ka noro ika me'e.”  
\v 24 Enime'ede Yesus noro Yairus ra'alono rala'a. 
\p Ri nammori lernohi la lupurale lolo waliwali.  
\v 25 Maeke ida man lernohi nina apinha rare wau anna idaweli woro'o me'e.  
\v 26 Ainin apinha werek wake'e penia ai na'ahoruwedi kupan rahu ono nale ma na'inapin nammori me'e, maa nin apinhe kan wa'ane, eren wewerek.  
\v 27-28 An derne Yesus eni penia hi'i wa'anedi ri nammori me'e, de ai nahehe na'urani lolo Yesus kili'urne, ono ainina panaeku nahenia lo'o tukulala Yesus Nina rain ke'e de nin apinha wa'anedi me'e.  
\v 29 Ende an tukuledi Yesus Nina raine eni ne, idewe ai nauroin nina apinha wa'anedi me'e. 
\p  
\v 30 An tukuledi Nina raine me'e ne, Yesus nauroin nahenia Nina ke'eke'el an'anhe tarana namharedi raramne me'e, de An wali kili'urne na'ukani, “Inhoi man tukul Ainu'u raine?” 
\p  
\v 31 Enine man lernohi pakunohi ra'aheni, “Eih! Papa mehen do'on ri rahu eni, rasessese, de ai kam do'on inhoi man tukul Pape.”  
\v 32 Enimaa Yesus koklolo waliwali nanoin inhoi man tukule.  
\v 33 Ri maeke onneni nauroin ha ma namwali kemen eni, de nodi kemen ma narururu mai nalwali yawa Yesus kalarna konohi inhawa ma namwali ai kemen eni.  
\v 34 Horu ne, Yesus na'aheni, “Ya an'u, o akin naili'il Maya'u, de num apinha wa'anedi me'e, mala'a wawa'anedi.” 
\p  
\v 35 Yesus wakunkunu ne, hophopon wahwahan nano uluwakun kerei Yairus nina nakar mai konohi Yairus na'ahenia, “Pape, tatana maekane aran horuwedi me'e, de yono ma'o'o Pap Meser me'e.” 
\p  
\v 36 Enimaa Yesus kan peinohi rira wanakunu onne, de Ai ne'el Yairus na'ahenia, “Yono mamka'uk, maa akim naili'il Maya'u mehe!” 
\p  
\v 37 Ende Yesus nala'a me'e, la namhene rin lernohie kokoko Petrus, Yakobus noro mo'oniwalla Yohanis.  
\v 38 Hir rakanedi Yairus nina nakar ne, Yesus do'on heri rusu arra wake'e la derne kananhi dududum.  
\v 39 An laa romleher na'ukani hi na'ahenia, “Alhi'ihepenia mim arra la mahere? Tataneni kan maki, maa namkukuru.”  
\v 40 Man penpenu onne ralau Yesus. 
\p Enime'ede An hopon heri onne laa mouwedi paharne. Enla Ai noro tatana onne inna aman noro ri wokelu man lernohi pakunohi laa tatana onne nina kamar.  
\v 41 An roulle tatana liman na'aheni, “\it Talita kum!\it*” Napa'ahne, “Inaye, mamakedi!”  
\v 42 Idewe inai onne namaka, nala'ala'a. Nina anna idaweli woro'o me'e. Ri man aile kamar onne do'on ha ma namwali eni polletilu. 
\p  
\v 43 Enla Yesus nala konomdere hi na'ahenia, “Yono wakunu ha eniyeni ri.” Enla An hopon inna aman na'ahenia, “Mala hanana'an tarana na'an.” 
\c 6  
\s1 Manin Nazaret ra'okuledi Yesus 
\r (Mat. 13:53-58; Luk. 4:16-30) 
\p  
\v 1 Yesus noro Nina man lernohi pakunohi enihe ramhara lolo onne (Kapernaum) wali wali'ur laa Nina leke Nazaret.  
\v 2 Enla rakan Yahudi nina Alam Renren Warwarna, An laa rira kerei wakuku. 
\p Ri nammori derne Nina wanakuku eni polletilu, ra'aheni, “Ri eni lernala panaeku na'akemeni nano ewi? An lernala woroin eni nano ewi penia Ai nauroin hi'i tanada ri kan dodo'onnala makun?”  
\v 3 Ida ma na'ukani ida, “Namlolo, ka? Ai onne namwali tukan aue? Inna Maria, la mo'oniwalinhe Yakobus, Yoses, Yudas, noro Simon? Narnhe aile mai eni, haenhi.” Enpenia hi ramhene derne rakani Ai. 
\p  
\v 4 Enine Yesus na'aheni, “Nadedem rin horhawa nabi lolo ewi-ewi, maa mai lolo nina lekloi ai lodon walinhe noro nakar raram memen ka rahiyene arore.”  
\v 5 Ende lolo onne Ai kan hi'i ha man ri kan do'onala makun nammori, kokoko roulle ri ida woro'o liman hi'i wa'an.  
\v 6 An hehel rehi hi akin ka naili'ile. 
\s1 Yesus hopon Nin ri idaweli woro'o laa loikaru Lirna Wawa'an ri 
\r (Mat. 10:5-15; Luk. 9:1-6) 
\p Ai namhara nano Nazaret laa wakuku ri ma aile leke-leke lolo onne.  
\v 7 Enla Ai napolu Nin ri idaweli woro'o man lernohi pakunohi enihe, hopon hi wororo'o laa leke-leke lolo onne, la Ai nala molollo hi rohi hayakyaka.  
\v 8 An nou hi na'ahenia, “Mala'a, maa yono modi haida-haida, oir wa'alehere, kupan, me rou soke.  
\v 9 Modi au ke'ke'en, pakpak ei, maa yon modi nainair herherre.  
\v 10 Mim laa onnida, nakar ida kokaledi mi, mamkene lolo onne hehen nanumene mi mamhara leke onne.  
\v 11 Enimaa, mim laa onno namehin lo'o ri namhene kokala mi, mamharedi lolo onne. Mamharedi ne, disnedi elimo'o hapu man aile mi eium raram, leke namwali tanada hi nahenia mi ka modi yodiwara ida hi me'e.” 
\p  
\v 12 An wakunu horu ne, hir laa loikaru Makromod Lirna ri, leke herredi rir morimori ma ka namlolo eni, la derne rakani Makromod Lalap Lirna Wawan eni.  
\v 13 Hi rohi hayakyaka nammori nano ri raram, rala wuru sapu ma nakni'ir, la hi'i wa'anedie. 
\s1 Ri nesne Yohanis man ulutada eni 
\r (Mat. 14:1-12; Luk. 9:7-9) 
\p  
\v 14 Enime'ede rai Herodes dernedi wanakunu ma na'ono Yesus Nina hini'i wenewheni, ono Yesus naran pe'er wake'edi me'e. Ri heruwali ra'aheni Ai onne Yohanis ma nodi oir ulutada ri, mori wali'uredi me'e, penia Nina molollo aile hi'i tanada ri kan do'onala makun,  
\v 15 maa ri namehin ra'aheni Ai onne, Elia. Ri namehin ra'aheni wali'ur Ai onne nabi ma nodi Makromod Lalap Lirna Wawan nonolu eni. 
\p  
\v 16 Ende Herodes derne panaeku onneni an kernala na'ahenia, “Ka! E'eni, Yohanis man nonolu ya'u hopon peku uluwakun eni. Ai peni mori wali'uredi me'e.” 
\p  
\v 17 An wakunu heheni ono lere nonolu an hopon ri lan kele Yohanis rodi laa bui raram. Yohanis eni tumdesne mamani ono an ho'edi noro mo'oniwalla Pilipus hono naran Herodias.  
\v 18 Ler onne Yohanis ne'el Herodes na'ahenia, “Om larlewenedi Makromod Lalap Nina keneri hono'ok me'e, ono o moro mo'oniwallum hono Herodias ho.” 
\p  
\v 19 Enpenia Herodias nala panaeku wo'ira loiyedi akin, de nahehe nanoin kalla nesne Yohanis.  
\v 20 Maa, rai Herodes kawkawala hono leke yono nesne Yohanis, ono ai nauroin Yohanis ri man akin moumou dewdewe, la namwali ri molololo Makromod Lalap kalarna haenhi, de horhawe. Herodes hopon ri lan kele Yohanis wuku rodi laa bui raram, la radiyaka wawa'an leke yono rin hi'i suse. Lere romromo ne, rai Herodes hopon rala Yohanis mai paharne, leke woro'ohe wakunu ono Herodes nina suk nakanie, kade nin wanakunu onne hi'i Herodes akin ka namkene. 
\p  
\v 21 Kame'ede rakan Herodes nin lere alam momori mene Herodias lernala leken pahaharin nesne Yohanis. Lere onne rai Herodes hi'i yapi lapa. Lariyala nina muku uluwakun ma nodi molollo noro uluwakun-uluwakun ke'urauk, roro leleher lapa Galilea mai.  
\v 22-23 Enpenia lere onne Herodias nahehe paipudi hono lolo yapi, de hopon anan maekane lan waur heri onne kalarna. An waur ma'aruru, de rai Herodes nala lira nahenia turanne, “O mapanak inhawa, ya ala ki o, kade leke a'un wali ya ala ki o.” 
\p  
\v 24 Enime'ede an laa na'ukani inna na'ahenia, “Mame, ya apanak inhawa?” 
\p Inna walhe na'ahenia, “Laa mapanak Yohanis uluwakun.” 
\p  
\v 25 Idewe ne, an laa napanak na'ahenia, “Pape, ya apanak lere eni me'ede, mala Yohanis uluwakun loile ra'u lape mala maya'u.” 
\p  
\v 26 Herodes derne napanak onneni akin woiredi. Enimaa na'okul hehewi ho'o, ono an loiyedi lira hopo popolu lalariyala enihe kalarna me'e.  
\v 27 Ende ne'e namhene hopon nin ri laa bui raram peku Yohanis uluwakun nodi mai. An peku Yohanis uluwakun horu,  
\v 28 nodi mai nala kani maekana onneni. Horue ne, nodi laa inna. 
\p  
\v 29 Kame'ede Yohanis nina man lernohi pakunohi derne ha onne, hir laa rala Yohanis ihin kemen rodi loile ku'il ida ma namwali lunne raram. 
\s1 Yesus nala hanana'an ri riwan wolima ra'an 
\r (Mat. 14:13-21; Luk. 9:10-17; Yoh. 6:1-13) 
\p  
\v 30 Yesus Nina hophopon man laa raderre radauledi Lirna Wawa'an enihe wali mai roro Yesus pakromo wuku wali'ur, leke loikaru rira nala'la'a lirna la'an.  
\v 31 Hir waliyedi ne, ri nammori mai mamani, de kar lernala leken ra'ak romun. Ende Yesus naka'uk hi, “Pap mie, mai kala'a onno ma namlina namkai, warnala tarana.” 
\p  
\v 32 Ende hir ha'a laa korkoro wawan hopol laa onnida man ri kan holie.  
\v 33 Enimaa ri nammori po'on hi rala'a. Enime'ede ida man konohi ida na'ahenia, “Yesus hopoledi me'e. Mai ik lolo kalla ro kala'a halhala leke ik koluwedi Yesus la onno man hir lalaa eni.”  
\v 34 Yesus rakanedi ro, An do'on heri rahu onneni ne, Ai raram penu rehi ono hi raisa pipduma ma na'alehe man hurie. Ende An min lolo onne, An wakuku Makromod Lalap Lirna Wawan nammori hi. 
\p  
\v 35 Rakan lere na'akeki helem me'e, Yesus Nina man lernohi pakunohi mai ra'ahenia, “Pape, lere helem me'e. Mai eni noho mamun,  
\v 36 de wa'an rehi hopon heri rala'a here, leke lar weli hanana'an leke-leke man ranrani eni, ra'an.” 
\p  
\v 37 Enimaa Yesus na'aheni, “Mi mehe mala hanana'an, hi ra'ane.” 
\p Hir polletilu ra'ahenia, “Idei! Ainim kupan kan nokor lam weli roti hi na'akeme ra'an! Lo'o ik na'akeme howok rakan wollo ida mene ik lernala kupan\f + \fr 6:37 \ft Wanakunu Yunani na'ahenia, “pere rahu woro'o”. Kupan onne namnenehe ri ida nina naiwe'el anna ida.\f* man nokor laa weli roti heri rahu eni ra'ane.” 
\p  
\v 38 Ai na'ukani hi na'ahenia, “Roti aile, ka? Mim lam tolle ke'e.” 
\p Ende hi lar tolle, wali mai konohi Yesus, “Roti kem wolima noro i'in kem woro'o mehe.” 
\p  
\v 39 Kame'ede Yesus hopon heri onnenihe raikoro penek wawanne, hi'i lopun-lopun.  
\v 40 Lopun heruwali muku ri wellima, lopun heruwali ri rahu ida.  
\v 41 Enime'ede Yesus nala roti kem wolima noro i'in kem woro'o onne, niliha'a laa wawan napanak trimkasi Makromod Lalap. Horu, An a'un roti nala kanile Nin man lernohi pakunohi enihe leke ha'ar heri ra'an. An uku i'in kem woro'o heri na'akeme ra'an haenhi.  
\v 42 Ende heri na'akeme ra'an hehen nanumene pehur mouwedi. 
\p  
\v 43 Horu ne, man lernohi pakunohi ra'ukwuku roti noro i'in ma narehi lunu idaweli woro'o penpenu.  
\v 44 Lere onne aki mo'oni ma na'ak enihe mehe riwan wolima (maeke noro tatan'ukun kar aki makun). 
\s1 Yesus nala'ala'a lolo oir ulikn 
\r (Mat. 14:22-33; Yoh. 6:16-21) 
\p  
\v 45 Hi ra'ak horu ne, An hopon Nin man lernohi pakunohi ha'a laa korkore hopol rolu laa leke Betsaida ma aile oir lapa wali. Enla An hopon heri onneni wali wali'ur laa rir lekloie.  
\v 46 Hi rala'edi mene Yesus wakiha'a laa wo'or ida leke hi'i lir napanak Makromod Lalap. 
\p  
\v 47 Alamedi me'e, korkoro man lernohi pakunohi haha'ale aiyedi oir lapa toro me'e, la Yesus memehedi lolo ro makun.  
\v 48 An po'onala hi kar wainnala korkoro me'e onno kahi anne nammori rehi kukuwala hi. Ende rakan noho roropeni, Yesus nala'ala'a lolo oir ulikne mai wakuraniyedi rir korkoro eni me'e.  
\v 49-50 Ai na'akeki lewenedi rir korkoro mene hir do'on Ai nala'ala'a lolo oir ulikne. Hir do'on ne, hi ramka'uk rehi ono hir pene'ek hir do'on maki hamarane. 
\p Ai ne'el hi, “Karkaramedi! E'eni Maya'u. Yono mamka'uk!”  
\v 51 An ha'a laa korkoro wawan, ideweni kahi anne namlinedi. Hir polletilu ra'aheni, “E'eni inhoi pe?” 
\p  
\v 52 Kade eni nanumene hir do'on Yesus nala roti tarana hi'i namwali nammori, maa hi ka rahinoroknala panaeku onne wake'e ono hi akin kerhe. 
\s1 Yesus rakan Genasaret hi'i wa'an man apinha 
\r (Mat. 14:34-36) 
\p  
\v 53 Rakanedi oir lap Galilea wali ne, hir pali lolo her Genasaret.  
\v 54 Paliyedi ne, hir kopur laa ro, la ri man aile lolo onne rahiyennaledi Yesus me'e, de  
\v 55 hir lari laa leke-leke ma aile waliwali onnenihe wakau na'ahenia, “Yesus maiyedi me'e. Modi ma nakni'ir laa here!” Enime'ede hi rodi ma nakni'ir rala loile piki, rodi laa Yesus. 
\p  
\v 56 Ende An laa ewi-ewi rin lernonohie, laa leke-leke, laa wo'or-wo'or, ri nodi ma nakni'ir mai pasar leke rapanak An hi'i wa'ane. Ende hi rapanak rehrehi lewlewen leke Yesus hurinohi ma nakni'ir enihe tukulala Nin rain eni, kade rain honon me'e wa'an. Enla man tukul rainne na'akeme wa'an mouwedi. 
\c 7  
\s1 Panaeku ma namhara ri akin nodi mo'mo'ol mermeru 
\r (Mat. 15:1-9) 
\p  
\v 1 Ler ida ri Parisi enihe roro meser Horok Lape ida woro'o rano Yerusalem mai pakromo noro Yesus.  
\v 2 Hir do'on Nina man lernohi pakunohi enihe kar lernohi agame Yahudi nina holoor halauk man hopon ri nawanedi liman, mene na'ak.  
\v 3 Ri Parisi roro Yahudi namehin na'akeme rasala kerkerhe upun a'anhe rira noho honolla ma na'ono rawana liman mouwedi mene ra'ak.  
\v 4 Enla inhawa hir weli pasar hi radedem rodi oir wuriyedi mene ra'an.\f + \fr 7:4 \ft Ee, ‘Enla lo'o hir laa pasar weli hanana'an wali mai nakar, hi radedem lernohi noho honolla ma na'ono rawana liman mene ra'an.’\f* Onne kan mehe, maa hi rasala kerkerhe rira holoor halauk ma na'ono rawana ra'u noro ha man rodi hi'i ya'an yomun. 
\p  
\v 5 Enpenia ri Parisi roro meser Horok Lape enihe ra'ukani Yesus, “Alhi'ihepenia Numa man lernohi pakunohi kar lernohi ik upud a'ad rira holoor halauk de rawanedi liman mene ra'ake?” 
\p  
\v 6 Enine Yesus walhe na'ahenia, “Eih! Mi ri man kokme'e ramwali ri molololo mie! Nonolu eni Yesaya wakunu namlolo kokkoo, lere an wekel mi na'ahenia, 
\q1 ‘Makromod Lalap na'aheni heheni, 
\q1 Ri onnenihe horhawa Ya'u rodi lirna mehe, maa akinhe ko'u wake'e Maya'u. 
\q1  
\v 7 Hirira honoi kanani Maya'u kan min haida, 
\q2 ono hir nair ri mormori nina holoor halauk mehe la ra'aheni onne Ainu'u, maa ka namlolo.’ \x * \xo 7:7 \xt Yes. 29:13\x* 
\m  
\v 8 Mim kemenedi Makromod Lalap Nina keneri hono'ok la masala kerkerhe ri mormori nina.  
\v 9 Mi mauroin wawa'an ma'okul Makromod Lalap Nina keneri hono'ok leke mi masala ri mormori nina. 
\p  
\v 10 Musa loikaruwedi honopon me'e na'ahenia, ‘Horhawe mi inum ammu.’ Enla, ‘Inhoi warei yakyaka inna-aman, hukumesnedie.’ \x * \xo 7:10 \xt Kel. 20:12, 21:17, Im. 20:9, Ul. 5:16\x* 
\v 11-12 Maa mim wakuku nahenia kan hi'i haida rin wakunu noro inna aman na'ahenia, ‘Yono ya ala haida paku mi leke mim mori wawa'an, maa lo'o wa'an rehi ya ala hahaa rodi paku mi onne, odi laa hoikani Makromod Lalap.’  
\v 13 Ende mi ma'okuledi la larlewenedi Makromod Lalap Nina keneri hono'ok me'e, leke masala kerkerhe mi upun a'anhe rira noho honolla. Onne kan mehe, maa mim hi'i yaksala namehin nammori haenhi.” 
\s1 Ha man hi'i rin morso 
\r (Mat. 15:10-20) 
\p  
\v 14 Horu, Yesus napolu wali'ur heri rahu onneni na'ahenia, “Derne makaniyala leke mauroin Ainu'u panaeku eniyeni:  
\v 15 Ha man laa ri raram kan hi'i rin morso, maa ha ma namhara nano ri akin penia hi'i rin morso. [  
\v 16 Ende mi kilinum aile dernala.]”\f + \fr 7:16 \ft Horok man aile lolo tanada [ ] raram, kaale lolo horok Yunani dedesne heruwali.\f* 
\p  
\v 17 An wakuku horu ne, Ai noro Nina man lernohi pakunohi hoikaruwedi heri onne rala'a romleher me'e. Hi ra'ukanie, “Wanakunu naho'ok idedi eni nina panaeku inhawe?” 
\p  
\v 18 Enine An walhe, “Alhi'ihepenia mi ka mauroin wanakunu onne makun? Hanana'an man ri na'an laa ri raram mehe, la kan hi'i rin morso.  
\v 19 Hanana'an man laa ri raram onne penia kan laa ri akin, maa lolo ri konoin mene namhara mai paharne.” (Ende Yesus na'aheni hanana'an na'akeme wa'an, kan hi'i rin morso.) 
\p  
\v 20 Enine Yesus na'uwali wali'ur na'ahenia, “Ik honorok akin penia ma na'amo'ol na'ameru iknik mormori,  
\v 21 ono nano ri akin penia namhara panaeku yaka noro ha ma ka namlolo naise: lerpi'u lerwa'u, ramna'a, resne ri,  
\v 22 rakmanna ri nina hahaa, ka rauroin honoli, wukupoho ri, hi'i ha ma kan lolo ri honorok akin, kunu kehen ri, wakunu nano'onyak ri, holi kukulu lalapa, noro hi'i ha ma naploo naplakar.  
\v 23 Panaeku wo'ira ma namhara ri irhun raramne eni penia hi'i rin morso.” 
\s1 Maeke ma ka namwali Yahudi ida akin naili'il Yesus 
\r (Mat. 15:21-28) 
\p  
\v 24 Horu, Yesus lolo Galilea laa onnida na'uranrani Tirus. An rakan nakar ida, Ai namhene ri nauroin nahenia An min lolo onne, maa Nina maimai onne ka nasinuwar, de ri nammori mai. 
\p  
\v 25-26 Maeke ida derne Yesus aile ne, an mai wali kemen yawa Yesus kalarna na'aheni, “Ya apanak Papa hi'i wa'an ya an'u maekana, ono hayakyaka hu'uhu'ur raramne.” Maeke onne ka namwali ri Yahudi, maa namhara leke Penisia, lolo noho Siria. 
\p  
\v 27 Enpenia Yesus na'aheni, “Ka nadedem rala tatan'ukun nin hanana'an sopol laa ahu, maa rala tatan'ukun ra'an nolu.”\f + \fr 7:27 \ft Wanakunu lirna ‘tatan'ukun’ wekel ri Yahudi, la wanakunu lirna ‘ahue’ naho'ok ri ma ka namwali Yahudi enihe.\f* 
\p  
\v 28 An walhe na'ahenia, “Kokkoo Makrom'u, maa ahu enihe peni ra'an tatan'ukun rir ha mo'o ma nadiyaur mei leherne haenhi.” 
\p  
\v 29 Enime'ede Yesus na'aheni ai, “Onuma wanalhe ma'aruru, de mala'a wawa'anedi. Hayakyaka namharedi anum raram me'e.”  
\v 30 An wali laa nakar po'onala ananne aile leu wawan namkuru karkaramedi la hayakyak onne kaale me'e. 
\s1 Yesus hi'i wa'an ri man roho la hakuku 
\p  
\v 31 Yesus namhara nano onno ma na'urani Tirus nala'a laa ra'i lolala kota Sidon mene wali wali'ur laa karanna lolo Dekapolis (leke Idaweli) mai oir lap Galilea.  
\v 32 An rakan lolo onne, ri ida woro'o rodi mo'oni ida roho hakukuwedi mai rapanak Yesus loiyala liman leke wa'anedi. 
\p  
\v 33 Enime'ede Yesus ni'ik ri onne nahaledi heri eni. Hir memehedi nanumene nala liman ra'an loile ri onne kilinna ku'il woro'o enihe, mene saprui aparne liman ra'ane nodi patal ri onne namalle,  
\v 34 la Yesus niliha'a laa wawan, warnedi enu, la na'aheni, “\it Epata\it*”. Napa'ahne, ‘Mahinari here.’  
\v 35 Idewe kilinna nahinariyedi, namal mamaledi, la an derne wakunu wawa'anedi me'e. 
\p  
\v 36 Enla Yesus nouwala hi na'akeme na'ahenia, “Yono konohi ri ha ma namwali eniyeni.” Yesus eren nonou hi, maa hir eren wakukunu laliwewer.  
\v 37 Ende man derne na'akeme polletilu, ra'aheni, “Ainin hini'i wenewhe na'akeme ha wawa'an mamani. Man roho derne, man hakuku wakunu.” 
\c 8  
\s1 Yesus nala hanana'an ri riwan wo'akka ra'an 
\r (Mat. 15:32-39) 
\p  
\v 1 Nakawedi lere ida woro'edi ri nammori mai Yesus ho'o me'e. Maa, rira oir wa'aleher horu penia Yesus napolu Nina man lernohi pakunohi na'ahenia,  
\v 2 “Ya'u raram penu heri eniyeni. Hir lernohi Ya'u lere wokelu me'e, la rira hanana'an horuwedi me'e.  
\v 3 Lo'o Ya'u hopon heri eni ramlarlara rala'a lo'o hir uma lolo kalla, ono heruwali ho'o ne holi ko'uwedi.” 
\p  
\v 4 Man lernohi pakunohi ra'ahenia, “Meneni ika mai noho kili'urne, de lernala hanana'an ewi heri rahu eni ra'ane?” 
\p  
\v 5 Yesus na'ukani, “Mi modi roti kem wo'ira?” 
\p Hir walhe, “Keme wo'ikku.” 
\p  
\v 6 Kame'ede Yesus hopon heri rahu onne raikoredi nanumene nala roti onneni napanak trimkasi Makromod Lalap. Horu An a'un roti nala kani Nin man lernohi pakunohi leke ha'are, na'akeme ra'an.  
\v 7 Enla hirira i'in kemana ida woro'o aile haenhi. Ai napanak trimkasi Makromod Lalap la kani Nina man lernohi pakunohi leke ha'are ho'o, de  
\v 8 heri onne na'akeme ra'an pehur. Ra'ak horu, Nin ri enihe ra'ukwuku hanana'an rehin na'akeme lunu wo'ikku.  
\v 9 Ma na'ak mo'oni riwan wo'akka. Enla An hopon hi na'akeme wali laa nakar,  
\v 10 nanumene Ai noro Nina man lernohi pakunohi ha'a laa korkoro wawan hopol laa Dalmanuta. 
\s1 Parisi enihe rapanak Yesus hi'i tanada man ri kan dodo'onnala makun 
\r (Mat. 16:1-12) 
\p  
\v 11 Ri Parisi ida woro'o mai leke rawalha lira noro Yesus. Hirira panaeku ken Ai de rapanak An hi'i tanadida nodi kunukunohi nahenia An mai nano a'am raram.  
\v 12 Yesus heheledi la na'aheni, “Alhi'ihepenia ri ku eniyeni rapanak ya'u hi'i ha ri kan dodo'onale? Loi honorok wawa'an Ainu'u panaeku ma na'ono eniyeni: Ka'u hi'i haida-haida ri eniyeni do'on.” 
\p  
\v 13 Horu ne, Yesus hoikaruwedi heri onne, la ha'a laa korkoro wawan hopol laa oir lapa wali. 
\p  
\v 14 Hir hopol ne, man lernohi pakunohi enihe hamlinuwedi rodi oir wa'aleher, la roti kem ida mehe aile korkoro wawan.  
\v 15 Yesus konohie na'ahenia, “Nakinemen ki mi! Herodes noro ri Parisi enihe rira wanakuku naise ragi rodi ralha'a taponne.” 
\p  
\v 16 Enpenia man lernohi pakunohi ida ma na'ukani ida ra'aheni, “Alhi'ihepenia An wakunu heheni? Lo'o An wakunu heheni ono ika hamlinuwedi kodi roti harome.” 
\p  
\v 17 Enine Yesus nauroinnaledi rira wanakunu me'e, de Ai na'ukani hi, “Hi'ihepenia mawalha lira ma'aheni, ‘Ik hamlinuwedi kodi rotie?’ Ya'u hehel rehi! Alhi'ihepenia mi honorok akim makiyedi?  
\v 18 Hi'ihepenia mi makum aile, maa mi kam do'on, mi kilinum aile, maa mi kam derne? Lo'o mim hamlinuwedi ha ma namwali  
\v 19 lere Yo odi roti keme wolima ha'ar leke ri riwan wolima ra'ane? Emene rehin mim loiwuku lunu penpenu wo'ire?” 
\p Hir walha, “Lunu idaweli woro'o, Pape.” 
\p  
\v 20 Yesus na'ukani hi wali'ur, “Lo'o mim hamlinuwedi lere Yo odi roti keme wo'ikku ala ri riwan wo'akka leke ra'ane? Emene rehin mim loiwuku lunu lapa wo'ira?” 
\p Hir walha ra'ahenia, “Lunu lapa wo'ikku, Pape.” 
\p  
\v 21 Yesus na'ukani hi wali'ur na'ahenia, “Hi'ihepenia mi ka mauroin makun?” 
\s1 Yesus hi'i wa'an ri ma makan tokedi 
\p  
\v 22 Yesus noro Nina man lernohi pakunohi rakan Betsaida, ri nodi mo'oni ida man makan tokedi mai Yesus. Man makan toko onne napanak Ai, “Papee, ya apanak Papa rouwalle i mak'u leke hi'i wa'anedi ke'e.” 
\p  
\v 23 Enine Yesus nasala liman nodi laa leke paharne mene An saprui ri onne makan. Horu kemenala liman ri onneni makan la na'ukani na'ahenia, “Om do'on haida me'e, kaunu?” 
\p  
\v 24 Enine ri onne po'onala Yesus na'aheni, “Ya'u do'on ri, maa kan mouropo makun. Ya'u po'on ri naise au'ono ma nala'ala'a.” 
\p  
\v 25 Enime'ede Yesus nodi liman kemenala ri onne makan wali'ur. Idewe an do'on ha wo'ira na'akeme mouwedi me'e.  
\v 26 Horu Yesus hopon ai na'ahenia, “Wali laa nakar here! Yom lolo leke onne me'e.” 
\s1 Petrus nauroin Yesus eni Makromod Lalap kikanedi namwali Rai laa ewi-ewi 
\r (Mat. 16:13-20; Luk. 9:18-21) 
\p  
\v 27 Enla Yesus noro Nina man lernohi pakunohi laa leke-leke man aile na'uranrani kota Kaisaria Pilipi. Rakan kalla toro ne, Ai na'ukanihe, “Ri na'aheni Ya'u eni inhoi?” 
\p  
\v 28 Hir walha, “Heruwali ra'aheni Yohanis ma nodi oir ulutade (man makiyedi me'eni), heruwali ra'aheni Elia, heruwali ra'aheni nabi.” 
\p  
\v 29 Horu ne, Ai na'ukani hi wali'ur, “Emene lernohi minim panaeku, Ya'u eni inhoi?” 
\p Petrus walhe, “Papa eni penia Kristus man Makromod Lalap kikan namwali Rai laa ewi-ewi.”  
\v 30 Enla Yesus hopon hi yono konohi ri Ai onne inhoi. 
\s1 Yesus konohi Nina makmaki Nin man lernohi pakunohi enihe 
\r (Mat. 16:21-28; Luk. 9:22-27) 
\p  
\v 31 Onne horu Yesus wakukuwala Nina man lernohi pakunohi enihe na'ahenia, “Ya'u, ma namwali Ri Mormori Anan, lernala wewerek pananaka rahu. Enla Yahudi rir leleher lalapa, imam lalapa, roro meser Horok Lap enihe kar kokala Ya'u, de resnedi Ya'u. Enimaa rakan lere wokelu Ya'u mori wali'ur.”  
\v 32 An wakuku hi nodi wanakunu man mouropo. 
\p Enimaa Petrus ni'ik Yesus laa herne dadiyale na'ahenia, “Papa, yono wakunu heheni.” 
\p  
\v 33 Enine Yesus nadiwali po'onala man lernohi pakunohi enihe mene dadiyala Petrus na'ahenia, “Hayakyak Makromon o! Mala'edi here! Onuma panaeku onne ri mormori nine, Makromod Lalap, ka.” 
\p  
\v 34 Kame'ede Yesus napolu Nina man lernohi pakunohi noro ri nammori man aile lolo onneni mai, leke wakuku hi na'ahenia, “Ri man raram nodi lernohi Ya'u, yon nodi nina raram nodi aimehi, maa na'uwara nina au kekiyowok la lernohi Ya'u.\f + \fr 8:34 \ft Wanakunu ‘na'uwara nin au kekiyowok la lernohi Ya'u’ napa'ahne, ‘namkene lernala apinpinha la maki leke lernohi Ya'u.\f* 
\v 35 Ya a'aheni eniyeni ono inhoi namka'uk ihin kemen maki, de namhene huri nin morimori lolo noho wawan eni, ai onne kan lernala or'ori dardari ma namlolo. Maa ri man huriyedi nin morimori lolo noho wawan eni leke lernohi Ya'u noro Makromod Lalap Lirna Wawa'an eni, ai onne lernala or'ori dardari ma namlolo ma kan horu.  
\v 36 Lo'o ri ida manarna noho wawan nin ha wo'ira na'akeme, maa kan lernala or'ori dardari ma kan horu, nin panaeku onne kan min haida.  
\v 37 Ai lo'o nala inhawe leke lernala or'ori dardari ma kan horu?  
\v 38 Ri mormori lere alam eniyeni kar derne rakani Makromod Lalap Nina nounaku, maa hir derne rakani ri namehin la hi'i dohohala mamani. Horhorok! Inhoi nawawa Maya'u de namhene konohi ri man ailanna onne na'ahenia, ‘Ya'u lernohi Yesus noro Nina wanakuku eni,’ na'amoli Ya awawa nala ai haenhi. Lere Yo odi Ya Am'u Nina ke'eke'el an'anhe ma narehi nalewen oro hophopon a'am raram man moumou dewdewe kopur mai noho wawan, Ya awawa nala ai haenhi.” 
\c 9  
\p  
\v 1 Horu ne, Yesus na'aheni, “Horhorok Ainu'u nou ma na'ono eniyeni: Nano mi man min lolo eni heruwali kam maki makun, mim do'on mauroin hi'ihewi Makromod Lalap nodi molollo mai noho wawan eni noro idewe Nina ke'eke'el an'anhe.” 
\s1 Makromod Lalap na'akulu na'alapa Yesus 
\r (Mat. 17:1-13; Luk. 9:28-36) 
\p  
\v 2-3 Nakawedi lere woneme ne, Yesus, Petrus, Yakobus noro mo'oniwalla Yohanis ra'alono wakiha'a wo'or kukulu ida. Hir mehe min lolo onne. 
\p Hi ramririri ra'uranrani Yesus, idewe Yesus kemen namehiyedi la oin makan noro Nina rain siksika lerlere, la Nina rain wawarha narehiyedi ha wawarha na'akeme noho wawan.  
\v 4 Horu ne, hi ramlilinnohi do'on Yesus wakunkunu noro Elia noro Musa. 
\p  
\v 5 Enine Petrus na'ukani Ai na'ahenia, “Hi'ihewi Pap Meser, ika min mai eni ma'aruru rehi, de lo'o wa'an rehi ai ma'ariri heuheu wokelu lolo eni, ida Makrom'u nine, ida Musa nine, la ida Elia nine.”  
\v 6 Petrus na'ukani heheni ono ai noro walin ramka'uk rehi. 
\p  
\v 7 Enime'ede kakam ida mai pupinala hi, derne lira ida aile kakam raram na'ahenia, “E'eni Ya An'u, Ya amre'e Ya amharue, de mim derne makanie.” 
\p  
\v 8 Horu, hir po'on waliwali kar do'on ri woro'o onne me'e, do'on Yesus mehe. 
\p  
\v 9 Hir kopkopur lolo wo'or laa yawa An nou hi na'ahenia, “Yom konohi ri inhawa man mim dodo'on lolo wo'or eni, hehen nanumene Ya'u ma namwali Ri Mormori Anan, maki la mori wali'ur.”  
\v 10 Ende hir lernohi Yesus Nina nou eni, maa ida ma na'ukani ida na'ahenia, “Ainin panaeku inhawa na'aheni An maki, maa mori wali'ur?” 
\p  
\v 11 Enine hi ra'ukani Ai na'ahenia, “Alhi'ihepenia meser Horok Lape enihe ra'aheni Elia mai noho wawan nolu mene ri ma namwali Ri Mormori Anan maie?” 
\p  
\v 12 Yesus walhe, “Hir wakunu namlolo, Elia nolu mai na'akene ha wo'ira namkene. Enimaa hi'ihehewi noro Ya'u ma namwali Ri Mormori Anan onne!? Yon hamlinu horhorok aile Horok Lape raram ma na'aheni rin hi'i apinpinha la ra'okul Ri Mormori Anan onne!  
\v 13 Enimaa Ya'u konohi mi, Elia maiyedi me'e,\f + \fr 9:13 \ft Mat. 17:13 Elia eni kukul Yohanis man ulutade.\f* la hir lernohi rira suk hi'i apinpinha Elia naise Horok Lape Lirna na'aheniyedi me'e.” 
\s1 Yesus nohi hayakyaka man hu'ur tatana ida raramne 
\r (Mat. 17:14-21; Luk. 9:37-43a) 
\p  
\v 14 Yesus noro wokelu enihe waliyedi nano wo'or rakan yawa ne, hir po'on ri nammori lupurala walinhe ma noro meser Horok Lape enihe rasesesi.  
\v 15 Heri onne do'onedi Yesus ne, hi rahumarnedi, la lar kokale. 
\p  
\v 16 Enine Yesus na'ukani man lernohi pakunohi na'ahenia, “Moro hi masesi inhawa?” 
\p  
\v 17 Ri ida aile heri onne walhe, “Papa Meser, yo odi ya an'u mai Papa ono hayakyaka huhu'urle raram de hakukuwedi.  
\v 18 Lere hayakyak onne hu'ur raramne, nale wali yawa, ukum wukuwedi nihin wawan, aparne nawurwuri, idewe liman ein lapekiredi. Ende ya apanak Papa Nina man lernohi pakunohi enihe rohi hayakyaka man aile raramne, maa kar paekunale.” 
\p  
\v 19 Enine Yesus na'aheni, “Heih! Mi ri ku eniyeni! Mi kam derne makani Ya'u la mi akim ka naili'il kokkoo. Yo oro mi nalo'oledi me'e, maa mi akim ka naili'il Ya'u wawa'an makun! Rakan ma'anana ho'o Ya'u kerhu oro mi mene mi akim naili'il kokkoo? Modi tatana onne mai.” 
\p  
\v 20 Ende hi rodi tatana onne lae ne, hayakyak onne do'on Yesus, an hi'i tatana onne liman ein lapekir, de laedi yawa, idewe napoitititie la aparne nawurwuri. 
\p  
\v 21 Enine Yesus na'ukani tatana aman na'ahenia, “Ma'ananahe me'e an hi'i heheni?” 
\p An walhe na'ahenia, “Nano tatana me'e.  
\v 22 Lere romromo hayakyak onne nahehe nesne de nodi la wakale aiye raram me oire rarame. Enpenia ya apanak Papa naramyakala ke'e. Yonde Papa paekunala haromo, hi'i wa'anedi ya an'u ke'e.” 
\p  
\v 23 Yesus walhe, “Alhi'ihepe O ma'aheni, ‘Yonde Ya'u paekunale haromo?’ Ha wo'ira namwali horo nahenia ri akin naili'il Makromod Lalap.” 
\p  
\v 24 Tatana onne aman wakau na'ahenia, “Makrom'u, ya akin naili'il Makromod Lalap, maa kekekiyana makun. Pakuwala'u leke ya akin naili'il wawa'an.” 
\p  
\v 25 Yesus po'on ri nammori larlari maie ne, An komdere hayakyak onne na'ahenia, “Hayakyaka o! Mamharedi nano tatana eniyeni, la yom kene hu'ur raramne wali'ur.” 
\p  
\v 26 Enime'ede hayakyak onne wakau la hi'i orok ni'ini'ik wake'e mene namhara. Man aile lolo onne do'on tatana onne naise makiyedi me'e, de hi ra'aheni, “Aran horuwedi me'e.”  
\v 27 Enimaa Yesus roulle liman paku leke namriri. Enime'ede tatana onne namririyedi. 
\p  
\v 28 Yesus noro Nina man lernohi pakunohi enihe rakanedi nakar ne, ri ida na'ukani Ai na'ahenia, “Hi'ihepenia ai kam paekunala mohi hayakyak onne?” 
\p  
\v 29 An walhe, “Mi kam paekunala ono hayakyaka naise onneni ka rodi haida-haida rohi, kokoko mim hi'i lir napanak nolu.” 
\s1 Yesus wakunu Nina Makmakie 
\r (Mat. 17:22-23; Luk. 9:43b-45) 
\p  
\v 30 Yesus noro man lernohi pakunohi enihe ramharedi lolo onne ne, hir lolala Galilea rahaledi kemen leke yono ri nauroin hirira miminlole.  
\v 31 An hi'i onne leke nounakuwala Nina man lernohi pakunohi enihe. An nou hi na'ahenia, “Ka nalo'ol me'e ri na'olu Ya'u ma namwali Ri Mormori Ananne, kanile ri mormori liman raram resne, maa alam wokelu Ya'u mori wali'ur.”  
\v 32 Enimaa hi honorok akin ka nala Nina wanakunu eni, la ramka'uk ra'ukani Ai ono hi rawawa. 
\s1 Inhoi man kulu narehi 
\r (Mat. 18:1-5; Luk. 9:46-48) 
\p  
\v 33 Yesus noro man lernohi pakunohi mai Kapernaum. Rakanedi nakar ne, Ai na'ukani hi, “Idedi mi masesi inhawa lolo kalla?” 
\p  
\v 34 Enimaa, hi ka ra'oho, ono idedi hi rasesi inhoi man kulu narehi. 
\p  
\v 35 Enine Yesus naikoro la napolu ri idaweli woro'o onnenihe mai na'ahenia, “Inhoi raram nodi namwali man kulu narehi, wa'an rehi namwali ri man lolo yawa la ri man lolo honopon heri na'akeme.” 
\p  
\v 36 Enla Yesus napanak tatanida mai namriri hi kalarna mene Ai naurukue. An konohi hi na'ahenia,  
\v 37 “Inhoi kokala tatana naise eniyeni ono hir lernohi Ya'u, kokaledi Ya'u haenhi, la ai kan kokala Ya'u mehe, maa kokala Makromod Lalap man hopon Ya'u mai haenhi.” 
\s1 Inhoi ma ka na'okul ika, onne iknika muku 
\r (Luk. 9:49-50) 
\p  
\v 38 Horu ne, Yohanis konohi Yesus na'ahenia, “Pap Meser, am do'on ri ida nohi hayakyaka nodi Papa naran, maa am kawale ono ri onne iknik ri, ka.” 
\p  
\v 39 Enine Yesus walhe, “Yom kawale! Lo'o ri nodi I naran hi'i tanade man ri kan dodo'onnala makun, kan idewe wakunu warei yakyaka Maya'u,  
\v 40 ono inhoi kan ewek kawala ika, onne iknika muku.  
\v 41 Loi honorok wawa'an Ainu'u panaeku ma na'ono eniyeni: Inhoi paku mi ono mim lernohi Ya'u man Makromod Lalap kikanedi namwali Rai, an kokala nina wanalhane, kade nala oir mi momun mehe.” 
\s1 Ri man hi'i ri namehin nadiyaur dohohala sopoledi kawali pire ai porom raram 
\r (Mat. 18:6-9; Luk. 17:1-2) 
\p  
\v 42 Yesus wakunu wali'ur na'ahenia, “Inhoi hi'i tatana ma akin naili'il Ya'u nadiyaur dohohale, wa'an rehi wairedi waku lapida kelenne, rodi laa auredi heleken.  
\v 43 Enla lo'o limmu hi'i o madiyaur dohohala, heruwedi, kalo'o o limmu woro'o enihe nodi o laa kawali pire ai porom raram. Wa'an rehi o limmu wali kaale, maa mori wewerre noro Makromod Lalap, [  
\v 44 ono lolo kawali pire ai porom onne aiye noro orre kan maki.]\f + \fr 9:44 \ft Horok man aile lolo tanada [ ] raram, kaale lolo horok Yunani dedesne heruwali.\f* 
\v 45 Lo'o o eum hi'i o madiyaur dohohala, heruwedi! Kalo'o o eum woro'o enihe wakal o laa kawali pire ai porom raram. Wa'an rehi o eum wali kaale, maa mori wewerre noro Makromod Lalap, [  
\v 46 ono lolo kawali pire ai porom onne aiye noro orre kan maki.]  
\v 47 Lo'o o makum hi'i o madiyaur dohohala, hiduwedi, kalo'o makum woro'o enihe wakal o laa kawali pire ai porom raram. Wa'an rehi o makum wali kaale, maa om laa onno man Makromod Lalap nodi molollo raram,  
\v 48 ono lolo kawali pire ai porom onne aiye noro orre kan maki. \x * \xo 9:48 \xt Yes. 66:24\x* 
\p  
\v 49 Rodi aiye ra'amou ra'adewe ri mormori na'akeme naise ri nala asir loile mahin leke yon yaka. 
\p  
\v 50 Asir penia wa'an, maa asir ma ka nam'arha me'e, rodi inhawa leke hi'i nam'arha wali'ur? Ende yon mi maise asir ma ka nam'arha de sopoledi me'e, maa wa'an rehi mi mamwali asir ma nam'arha leke mi ida man mori wawa'an noro ida.” 
\c 10  
\s1 Yon ri man hoedi reiha'ar 
\r (Mat. 19:1-12; Luk. 16:18) 
\p  
\v 1 Enla Yesus noro Nina man lernohi pakunohi ramhara Kapernaum laa leke-leke man aile noho Yudea noro leke-leke man aile oir wauwau Yordan wali. Hir lae ne, ri nammori mai lupurale, la An wakuku hi naise nadedem eni. 
\p  
\v 2 Ri Parisi ida woro'o mai leke ken Ai ra'ukani, “Lo'o iknika agame nina holoor halauk hurilira mo'oni reiha'ar noro hono, ee ka?” 
\p  
\v 3 Enine Yesus walhale na'ahenia, “Musa nala inhawa keneri hono'ok ki mi?” 
\p  
\v 4 Hir walhe, “Musa hurinohi mo'oni namhenedi hono, horo nahenia hi'i horok reiha'ar nolu mene hopon hono nala'a.” \x * \xo 10:4 \xt Ul. 24:1-4\x* 
\p  
\v 5 Maa Yesus walhe, “Hi'ihepenia Musa hopon mi hi'i horok reiha'ar onneni? Musa hi'i holoor halauk eniyeni ono mi akim kerhe rehi.  
\v 6 Maa nano dedesneni, ‘Makromod Lalap umupaledi ri mormori, mo'oni noro maeke, \x * \xo 10:6 \xt NN. 1:27, 5:2\x* 
\v 7 penia mo'oni hoikaruwedi inna aman leke noro hono minwuku,  
\v 8-9 de woro'ohe ramwali mahaku.’ Ende inhoi Makromod Lalap kali wukuwedi me'e, yono ri mahaku reiha'ar, ono hi ka ramwali woro'o, maa ramwaliyedi mahaku me'e.” \x * \xo 10:8-9 \xt NN. 2:24\x* 
\p  
\v 10 Hir wali laa nakar ne, Nina man lernohi pakunohi ra'ukani panaeku eni wali'ur. 
\p  
\v 11 Enine An konohi hi na'ahenia, “Inhoi namhene maekleher, lan ho noro maeke namehin, ai onne lerwa'uwedi me'e la hi'i yaksala nin maekleher dedesneni.  
\v 12 Enla lo'o maeke ida namhenedi nin mo'onleher, lan ho noro mo'oni namehin, an lerwa'uwedi me'e la hi'i yaksala nina mo'onleher dedesneni.” 
\s1 Yesus nala rere'e haharu tatan'ukun 
\r (Mat. 19:13-15; Luk. 18:15-17) 
\p  
\v 13 Ri nodi tatan'ukun mai Yesus leke An kemenala liman hi, maa man lernohi pakunohi enihe dadiyala hi. 
\p  
\v 14 Enimaa Yesus do'on rir hini'i eniyeni, na'ahan de na'aheni, “Hurinohi tatana onnenihe mai Maya'u! Yom kawala hi ono Makromod Lalap nodi molollo ri naise tatana eniyenihe.  
\v 15 Loi honorok wawa'an Ainu'u panaeku ma na'ono eniyeni: Inhoi ma akin ka naili'il Makromod Lalap naise tataneni, kan laa onno man Makromod Lalap nodi molollo raram.”  
\v 16 An wakunu horu, Ai naurukuwala tatana onnenihe, la kemenala liman tatana onnenihe dohodoho napanak Makromod Lalap nala Nina rere'e haharu la norle'ule'u norwaliwali hi. 
\s1 Ri orkanarue 
\r (Mat. 19:16-30; Luk. 18:18-30) 
\p  
\v 17 Yesus na'akene nala'a, mo'oni ida lari mai awikorno kalarne na'ukani, “Pap Meser man wa'an, ya'u hi'i inhawa leke lernala or'ori dardari ma kan horue?” 
\p  
\v 18 Enine Yesus na'ukani ai, “Hi'ihepenia o ma'aheni Ya'u wa'anA'u? Ri mahaku kan wa'an! Makromod Lalap mehe man wa'an.  
\v 19 O mauroinedi Makromod Lalap Nina keneri hono'ok ma na'anou na'anaku nahenia: Yono mesne ri, yon lerpi'u lerwa'u, yon mamna'a, la yon modi poho tumdesne ri lolo hono'ok kanail onno, yono paipudi ri namehin, la horhawa o inum, o ammu.” \x * \xo 10:19 \xt Kel. 20:12-16, Ul. 5:16-20\x* 
\p  
\v 20 Ri onne walhe, “Pap Meser, keneri hono'ok onne na'akeme ya'u lernohiyedi nano tatana'u rakan lere eniyeni.” 
\p  
\v 21 Yesus po'one raram penuwale me'e na'aheni, “Enimaa, ha ida o kam hi'i makun. Laa ma'olu onuma hahaa na'akeme, mala kupan ha'ar ri ma na'alehe haida-haida, mene mam lernohi Ya'u, leke om lernala kanaru ma aile a'am raram.” 
\p  
\v 22 An derne Yesus wakunu heheni, akin werek rehi, de nala'a me'e ono ai orkanaru wake'e. 
\p  
\v 23 Enla Yesus po'on waliwali konohi Nina man lernohi pakunohi enihe na'ahenia, “Sus wake'e orkanaru laa onno man Makromod Lalap nodi molollo raram.” 
\p  
\v 24 An wakunu horu, man lernohi pakunohi polletilu. Enimaa Yesus wakunu wali'ur na'ahenia, “Ya an'u mie, sus wake'e rin\f + \fr 10:24 \ft Horok dedesne heruwali ra'aheni ‘rin’ eni wekel ‘ri ma akin ka nahinuri nin linikir kanaru.’\f* laa onno man Makromod Lalap nodi molollo raram.  
\v 25 Sus wake'e unta waku ida lolala wanaka ku'il, maa man sus narehi onne, orkanaru laa onno man Makromod Lalap nodi molollo raram.”\fig Ri ni'ik unta-unta man kono ukun ne'en|src="HK00038b.tif" size="span" ref="near Mrk. 10:25" \fig* 
\p  
\v 26 Enime'ede hir eren polletilu, ida ma na'ukani ida na'ahenia, “Lo'o hi'i heheni ne, inhoi lernala or'ori dardari ma kan horu onne?” 
\p  
\v 27 Yesus po'onalahe na'aheni, “Ri mormori kan paekunala hi'i ha onneni namwali, maa Makromod Lalap mehe paekunala hi'i ha wo'ira na'akeme namwali.” 
\p  
\v 28 Enine Petrus na'aheni, “Emene mayai hi'ihehewi ho'o? Am kemenedi ainim ha wo'ira na'akeme me'e leke lernohi Pape.” 
\p  
\v 29 Yesus walhe, “Loi honorok wawa'an Ainu'u panaeku ma na'ono eniyeni: Ri man hoikaruwedi nina nakar, mo'oniwalla, narna, inna aman, anan, la nina kirna, leke lernohi Ya'u la derne nakani Makromod Lalap Lirna Wawa'an eni,  
\v 30 lere man mai ri onne lernala nakar, mo'oniwalla, narna, inna aman, anan, kirna riwriwan rahrahu. Enimaa an lernala wewerek pananaka haenhi. Enla rakan lere man mai eni, ri onne lernala or'ori dardari ma kan horu.  
\v 31 Enimaa ri nammori ma namwali man panulu lere eniyeni, lere man mai, ramwali ri man lolo yawa. Enla ri nammori man lolo yawa lere eniyeni, lere onne ramwali ri man panulu.” 
\s1 Yesus loikaru Nina makmaki rewkelu nina 
\r (Mat. 20:17-19; Luk. 18:31-34) 
\p  
\v 32 Yesus noro man lernohi pakunohi rala'ala'a laa Yerusalem, la Yesus noluwedi laa kalari tarana. Nin man lernohi pakunohi hehel Nin wanakunu idedi eni,\f + \fr 10:32 \ft hehel, ee rahumarna\f* la ri man lernohi nano kili'urn ramka'uk. Enine Yesus napolu Nina ri idaweli woro'o enihe maiwuku mene An konohi hi wali'ur lo'o inhawe namwali Ai kemen eni.  
\v 33 Ai na'aheni, “Makaniyala! Lere eni ik kala'a mamani laa Yerusalem. Ik rakan enne, Ya'u ma namwali Ri Mormori Anane, rin na'olu, nala kanile imam-imam lalape roro meser Horok Lap enihe. Hir hukumesne Ya'u, la rala Ya'u kanile ri ma ka namwali Yahudi enihe,  
\v 34 la hir ilnohi ralnohi Ya'u, saprui saworno Ya'u, riuk rerhe Ya'u,\f + \fr 10:34 \ft Po'onala catatan kaki ma aile Mat. 20:19.\f* la resne Ya'u haenhi, maa rakan lere wokelu Ya'u mori wali'ur.” 
\s1 Yakobus noro Yohanis rira napanak 
\r (Mat. 20:20-28) 
\p  
\v 35 Zebedeus ananne Yakobus noro Yohanis, laa ra'urani Yesus ra'aheni, “Papa Meser, am mai Papa mapanak ke'e de malala haida mayai.” 
\p  
\v 36 Enine Yesus na'ukani hi, “Mi raram nodi ya ala inhawa ki mi?” 
\p  
\v 37 Hir walhe, “Rakan lere Papa nodi molollo lolo onno man kukulu lalape, ai raram nodi maikoro lolo Papa herne mariri la malanna.” 
\p  
\v 38 Enimaa, Yesus walhe, “Mi mapanak, maa mi ka mauroin minim napanpanak onneni inhawa. Mi lo'o paekunala momun oir man meru nano cawan Yo omun eni, ee ka? Mim paekunala rin ulutada mi noro unulu tanada maki naise hir ulutada Ya'u, ee ka?” 
\p  
\v 39 Hir walhe, “Am paekunala.” 
\p Enine An konohi hi na'ahenia, “Namlolo! Lo'o oreki mi momun oir man meru nano cawan Yo omun eni, la mim lernala apinpinha naise Ya'u haenhi,  
\v 40 maa Ka odi molollo wekel inhoi naikoro Ya'u herne mariri malanna. Makromod Lalap mehen niliyedi ri man Ai raram nodi naikoro lolo onne, la na'akenedi rir onno me'e.” 
\p  
\v 41 Man lernohi pakunohi idaweli namehin derne Yakobus noro Yohanis rira napanak eni ne, hi ra'ahan. 
\p  
\v 42 Ende Yesus napolu hi na'akeme maiwuku, nala wanakunu na'ahenia, “Mi mauroin hair-hair rir rai noro rir uluwakun lalapa ma ka nauroin Makromod Lalap enihe, rodi molollo kerne dalha ri mormoriyaneni,  
\v 43 maa yom hi'i heheni. Inhoi raram nodi namwali man panulu lolo mi, ai namkene ilitolle mi.  
\v 44 Inhoi raram nodi namwali ma nolu, ai onne helkaki namdaru namwali hophopon wahwahan ri na'akeme.  
\v 45 Ya'u ma namwali Ri Mormori Anan penia ka'u mai leke rin ilitolle Maya'u, maa Ya'u mai leke ilitolle ri, la ala I kem'u resne leke huri we'er ri nammori nano rira dohohale.” 
\s1 Yesus hi'i wa'an Bartimeus man makan tokedi 
\r (Mat. 20:29-34; Luk. 18:35-43) 
\p  
\v 46 Yesus noro Nina man lernohi pakunohi roro heri ra'alono lolala kota Yeriko. Ramharedi ne, pakromonala mo'oni ida. Ai onne Timeus anan ma naran Bartimeus, makan tokedi la nadedem naikoro kalla arkan mehe napanpanak.  
\v 47 An derne nano man lolo onnenihe Yesus manin Nazaret eni maiyedi me'e. An wakau na'ahenia, “Yesus, Daud upun anane, maramyakala'u ke'e!” 
\p  
\v 48 Enimaa ri nammori dadiyale, hopon na'ahenia, “Karkaramedi!” 
\p Maa, ai namhene, wakaukau eren naruri na'ahenia, “Daud upun anane maramyakala'u ke'e!” 
\p  
\v 49 Enime'ede Yesus derne namririyala, na'aheni, “Lam polu ri onne more mai.” 
\p Hir laa ra'aheni, “Papee, akim namranedi. Mamririyedi! Leher napolu o.” 
\p  
\v 50 Idewe an ruriyedi nina raine nanaru eni wakaledi lolo onne, la nehu wawan nala'a laa Yesus. 
\p  
\v 51 An lae ne, Yesus na'ukanie, “O raram nodi Ya'u hi'i inhawa ki o?” 
\p Ai na'aheni, “Pap Meser, ya apanak hi'i i mak'u wa'anedi ke'e.” 
\p  
\v 52 Enine Yesus na'aheni, “Mala'a here! O akim naili'il Maya'u, de om wa'anedi me'e.” Idewe ai makan wa'anedi, de lernohi Yesus rala'a. 
\c 11  
\s1 Lere Yesus laa Yerusalem ri nammori ra'uli rasa'e 
\r (Mat. 21:1-11; Luk. 19:28-40; Yoh. 12:12-19) 
\p  
\v 1 Yesus noro Nina man lernohi pakunohi enihe ra'uraniyedi Yerusalem me'e. Na'akeki rakan leke Befage noro leke Betania ma aile wo'or Zaitun leren, An hopon Nin ri woro'o rolu  
\v 2 na'ahenia, “Mala'a laa leke man aile kalari onne. Rakanedi leke raram ne, keledei ida man ri ka naikorala makun na'inonorok aile lolo onne. We'ere, modi mai Ya'u.  
\v 3 Enimaa lo'o ri lolo onne ra'uhoi mi na'ahenia, ‘Hi'ihepenia mim we'er keledei onne,’ konohi hi nahenia Makromod Nina panaeku tarana aile de nairale. Ka nalo'ol ai modi mai wali'ur.” 
\p  
\v 4 Ende woro'ohe lar do'on keledei onne na'inonorok lolo nakar ida nin nika makan ai kalla arkanne. Hi mahar we'er ne,  
\v 5 ri ida woro'o ai lolo onne ra'ukanihe na'ahenia, “Mim hi'i inhawa, pe? Hi'ihepeni mima we'er keledei onne?” 
\p  
\v 6 Enine woro'ohe walha naise Yesus Nina noue, penia hir re'enohi woro'ohe rodi keledei rala'a.  
\v 7 Ende hi rodi keledei onne laa rakan Yesus, la ruri rira rain nanaru rodi pakedi keledei ko'orne mene Yesus naikore.  
\v 8 Enla ri nammori ruri rira rain nanaru werre kalla wawan, la heruwali peku au hana lolo kirna rodi mai wakale kalla wawan leke horhawa Ai. 
\p  
\v 9 Heri man lernohi nano kili'ur na'akeme wakaukau ra'aheni, 
\q1 “Hosana! Ka'uli kasa'a Makromod Lalap! 
\q1 Makromod Lalap namre'e namharu O man mai nodi Ai Oin Naran! \x * \xo 11:9 \xt Mzm. 118:25, 26\x* 
\q1  
\v 10 Na'amoli Makromod Lalap namre'e namharu O lere modi molollo naisa ika upud a'ad Daud nonolu eni. 
\q1 Mai ka'uli kasa'a Makromod Lalap man aile onno man kulu narehi eni.” 
\p  
\v 11 Rakan kota Yerusalem ne, Yesus nala'a laa Makromod Lalap Nina Romleu Lape, lalaa mamai po'onala waliwali ha wo'ira man ai lolo onneni. Enimaa lere na'akeki helem me'e, de noro Nin ri idaweli woro'o enihe wali wali'ur laa leke Betania. 
\s1 Yesus nakineri ara onida 
\r (Mat. 21:18-19) 
\p  
\v 12 Rakan nohoropo Yesus noro Nina man lernohi pakunohi ramhara Betania rala'a rakan kalla toro ne, Yesus namlaredi me'e.  
\v 13 Nano ko'u makun An po'on ara onida,\f + \fr 11:13 \ft Israel nin ara ono woin ri na'an. Po'onala lolo kamus.\f* kawin aile de, Ai lan na'inau ke'e lo'o woin aile, ka. Enimaa rakan ara ono, An po'on woin kaale, kawin mamani, ono kan rakan ara nina lere dipi woi makun.\fig Rin neku ara woin|src="LB00085b.tif" size="span" ref="Mrk. 11:13-14" \fig* 
\p  
\v 14 Enine Yesus nakineri ara ono onne na'ahenia, “Nano lere eniyeni me'ede, ri ka na'an o dipin woin me'e.” Enla Nin man lernohi pakunohi enihe derderne Ai lirna keneri onneni. 
\s1 Yesus na'amou na'adewe Makromod Lalap Nina Romleu Lape 
\r (Mat. 21:12-17; Luk. 19:45-48; Yoh. 2:13-22) 
\p  
\v 15 Yesus rakanedi Yerusalem, An laa Makromod Lalap Nina Romleu Lape raram. Rakanedi Romleu onne nin nikoin, Ai nohi ri ma na'iwali lolo waliwali onnenihe. Enla Ai nawali mei rodi heherre kupan la nawali ma na'olu merpati rir awana na'akeme,  
\v 16 la An kawala ri nodi inhawa memehe mai lolo Makromod Lalap Nina Romleu Lapa nin nikoin. 
\p  
\v 17 Horu An konohi hi na'ahenia, “Makromod Lalap Lirna aile ma na'aheni, 
\q1 ‘Ainu'u Romleu Lapeni namwali onno rin lolo noho ulik rai wawan mai leke hi'i lir napanak, maa mim hi'i namwali ri ma namna'a hahaa nin sunuwar onno.’ ” \x * \xo 11:17 \xt Yes. 56:7, Yer. 7:11\x* 
\p  
\v 18 Ende imam-imam lalap noro meser Horok Lap man aile lolo onnenihe dederne wanakunu onne ne, hi ranoin kalla resne Yesus. Maa hir mahini'i la ramka'uk Ai ono heri rahu eni derne Yesus Nina wanakukue de mehe nanana mouwedi. 
\p  
\v 19 Rakan lere helem Yesus noro man lernohi pakunohi ramhara Yerusalem wali'ur. 
\s1 Ara ono ma napro'ukedi 
\r (Mat. 21:20-22) 
\p  
\v 20 Rakan oreki al'alam hir lolala ara ono onne, po'one, napro'uk wake'edi me'e.  
\v 21 Enime'ede Petrus horokale ha ma namwali oirawi eni, an konohi Yesus na'ahenia, “Papa Meser, kene po'onala ara ono man papa nakineneri onne, napro'ukedi me'e.” 
\p  
\v 22 Yesus walhe, “Hi'i mi akim naili'il Makromod Lalap kokkoo!  
\v 23 Loi honorok wawa'an Ainu'u panaeku ma na'ono eniyeni: Inhoi akin naili'il Makromod Lalap kokkoo nin molollo aile hopon wo'or ida na'ahenia, ‘Laedi kahi raram!’ Idewe panaeku onne namwali ki mi horo nahenia yono mi akim towor, maa mi akim naili'il kokkoo inhawa mim wakunu namwali.  
\v 24 Ende Ya a'ori honorok mi nahenia lo'o mi mapanak haida nano Makromod Lalap, mim lernale, horo nahenia mi akim naili'il kokkoo Makromod Lalap, la mi mauroin kokkoo Ai nala ha onne ki mi.  
\v 25 Enla lo'o mim hi'i lir napanak Makromod Lalap, maa mi moro ri namehin ma'ahan, mala ampun ai, leke minim Ame man aile a'am raram nala ampun minim dohohale haenhi. [  
\v 26 Lo'o mi ka mala ampun ri namehin man hi'i dohohale ki mi, minim Ame man aile a'am raram ka nala ampun minim dohohale haenhi.”]\f + \fr 11:26 \ft Horok man aile lolo tanada [ ] raram, kaale lolo horok Yunani dedesne heruwali.\f* 
\s1 Yahudi enihe ra'ukani Yesus Nina ke'eke'el an'anhe 
\r (Mat. 21:23-27; Luk. 20:1-8) 
\p  
\v 27 Yesus noro Nina man lernohi pakunohi rakan Yerusalem wali'ur ne, Ai nala'ala'a lolo nikoin man aile Makromod Lalap Nina Romleu Lapa onno. Enime'ede imam lalapa, meser Horok Lap noro Yahudi rir leleher lalapa lolo onnenihe mai  
\v 28 ra'ukanie, “Inhoi nala molollo ki O, penia mam hi'i ha eniyeni na'akeme?” 
\p  
\v 29 An walhe, “Ya a'ukaniyala mi na'ukankani ida nanu, la lo'o paphe walha Ainu'u na'ukankani eni mene Ya'u walha paphe rir naukankani haenhi.”  
\v 30 Enine Yesus na'ukani hi na'ahenia, “Yohanis ma nodi oir ulutade ri, nodi molollo nano inhoi, Makromod Lalap, ee ri mormori?” 
\p  
\v 31 Kame'ede ida ma nawalha lira noro ida na'ahenia, “Ik ka'aheni nodi Makromod Lalap Nina molollo, enlo'o Ai na'ukani ika, ‘Alhi'ihepe mi akim ka naili'il Yohanis nina wanakunue?’  
\v 32 Maa, lo'o ik ka'aheni Ai nodi molollo nano ri mormori. Lo'o ri nammori rawuhur maika ono hi rauroin Yohanis onneni namwali nabi.”  
\v 33 Ende hir walhe, “Ai ka mauroin.” 
\p Yesus na'aheni, “Ka'u konohi mi inhoi nala molollo Maya'u hi'i ha eniyeni haenhi.” 
\c 12  
\s1 Wanakunu naho'ok ma na'ono man howok kirna 
\r (Mat. 21:33-46; Luk. 20:9-19) 
\p  
\v 1 Yesus nodi wanakunu naho'ok wakunu noro imam-imam, meser-meser agame roro Yahudi rir leleher lalap onnenihe na'ahenia, “Ri ida lan kaman anggur kirna ida. An takin laliweweredi kirna onneni, mene na'ir lo'o rodi ramha anggur woin, la na'ariri heuheu man kulu ida rodi radiyaka kirna. Horu, ai nala nin kirna onne man howok kirna ida woro'o sewe, la nala'a laa onno namehin me'e.  
\v 2 Rakan lere ra'ili radai nin kirna raramne, an hopon nina hophopon ida laa kokala nina hana'are.  
\v 3 Enimaa, man howok kirna onnenihe kele ri onne, nukure, hopon wali nalalaliyedi.  
\v 4 Enime'ede orkirna hopon nin hophopon namehin laa wali'ur, maa man howok onnenihe riuk uluwakun, la warei yakyaka ai.  
\v 5 Orkirna hopon ri namehin laa wali'ur, maa hi resnedi ri onne. Kame'ede an hopon ri nammori laa, maa heruwali hir nukure, la heruwali hir resnedi.\fig Kirna anggur noro anggur woin nin hamhamar onno man rodi waku lukure|src="LB00103b.tif" size="span" ref="Mrk. 12:1-12" \fig* 
\p  
\v 6 Orkirna onne na'alehe ri hophopon me'e, kokoko ri ida mehe aile. Ri onne anan mo'oni mememen man ai naramyaka rehi. Kame'ede an hopon anan laa enne, ono nahinorok nahenia, ‘Lo'o Ya'u hopon ya an'u mememen laa, hir horhawe harome.’ 
\p  
\v 7 Enimaa man howok kirna enihe, ida ma ne'el ida na'ahenia, ‘Lo'o aman makiyedi, ri enie lo'o namwali orkirna. Mai ik kesnedi anan leke ika manarnedi kirna eniyeni.’  
\v 8 Ende hir kele ai, resnedi la sopoledi laa kirna paharne.” 
\p  
\v 9 Yesus na'ukani hi na'ahenia, “Lo'o orkirna derne ha ma namwali onneni, an hi'i inhawe? Memen an mai nesne mouwedi man howok kirna onneni mene nala ri namehin howok wali'ur.  
\v 10 Lo'o mim lesedi wanakunu ida lolo Horok Lape ma na'ahenia, 
\q1 ‘Waku man ma nayapi nakar sopoledi me'eni, 
\q1 Makromod Lalap hi'iyedi namwaliyedi waku na'a'ar ma na'ono. \x * \xo 12:10 \xt Mzm. 118:22-23\x* 
\q1  
\v 11 Makromod Lalap hi'i onne namwali, 
\q1 la ik do'on ma'aruru la wa'an wake'e.’ ” 
\p  
\v 12 Ma nodi molollo Yahudi onnenihe rauroin Nina wanakunu naho'ok onneni nala hi kemenhe de ranoin kalla kele Ai, maa ramka'uk heri enihe de hoikaruwedi Yesus, rala'a me'e. 
\s1 Ri Parisi ra'ukani Yesus panaeku ma na'ono noho nin paipair 
\r (Mat. 22:15-22; Luk. 20:20-26) 
\p  
\v 13 Ka nalo'ol ma nodi molollo Yahudi onnenihe hopon ri Parisi ida woro'o roro Herodes nina ri ida woro'o haenhi rala'a laa Yesus ra'ukani leke kokwudi Ai ranoin Nina sale.  
\v 14 Hir laa ra'aheni, “Pap Meser, ai mauroin Papa akin ma namdudu de wakuku panaeku ma namlolo mamani. Papa namkene mehe derne Makromod Lalap, ri mormori ka, la ka ma'ili maloho ri ono Om horhawa ma na'alehe haida-haida namnenehe noro orkanaru. Enla Papa wakuku hi'ihehewi Makromod Lalap nodi molollo ri mormori lernohi honorok panaeku ma namlolo. Ende lo'o Papa konohiyala ke'e, lernohi iknika agame nina holoor halauk, lo'o wa'an ik pair noho nin paipaire laa Roma nina rai lalap, ee ka?  
\v 15 Ika pair, ee yono me'e?” 
\p Enimaa Yesus nauroinedi hi onne man kokme'e, de An walhe na'ahenia, “Alhi'ihepenia mim ken kokwudi Ya'u? Modi Roma nin kupan pere waku ida mai I po'onale.”  
\v 16 Enine hi rale kupan pere waku ida. Yesus na'ukani hi, “Inhoi oin makan la inhoi naran melle kupan eniyeni?”\fig Roma nin kupan pere waku woro'o|src="HK00166b.tif" size="col" ref="Mrk. 12:14-17" \fig* 
\p Hir walhe, “Kaisar.” 
\p  
\v 17 Ende Yesus na'aheni, “Inhawe man Kaisar nina, mala Kaisar, la inhawe man Makromod Lalap Nina, mala Makromod Lalap.” Hir derne Nina wanakunu eniyeni hir mehe nananedi. 
\s1 Rin maki, maa mori wali'ur 
\r (Mat. 22:23-33; Luk. 20:27-40) 
\p  
\v 18 Lere onne me'ede, ri Saduki ida woro'o mai leke ra'ukani Yesus rir na'ukankani haenhi. Heri Saduki rira honorok panaeku ri man makiyedi kar mori wali'ur.  
\v 19 Hi ra'aheni, “Pap Meser, nonolu Musa horokedi nounaku nahenia lo'o mo'oni ida ho, maa an maki na'alehe tatana, wa'an rehi mo'oniwalin ho wali'ur orno onneni leke lernala tatana nahinerre walla man maki eni. \x * \xo 12:19 \xt Ul. 25:5\x* 
\p  
\v 20 Wanakunu ida aile ma na'ahenia: Ri wo'ikku ra'umo'onwali, anulu ho, maki na'alehe ananne,  
\v 21 de mo'oniwalla man lernohi anulu eni ho noro orno waluwalum eni, maki na'alehe ananne haenhi. Enla mo'oniwalla man lernohi eni ho noro orno waluwalum eni, maki na'alehe ananne haenhi.  
\v 22 Kame'ede mo'oni wo'ikku na'akeme ho noro maeke onneni, la maki mouwedi ra'alehe anane nanumene maeke onne maki haenhi.  
\v 23 Ende rakan lere alam rin mori wali'ur, maeke onne namwali inhoi hono? Mo'oni wo'ikku na'akeme penia hoedi noro ai me'e.” 
\p  
\v 24 Enine Yesus walhe, “Mim saledi me'e ono mi ka mauroin Makromod Lalap Lirna Wawan noro Nina ke'eke'el an'anhe.  
\v 25 Rakan lere ri man makiyedi mori wali'ur, hir mori naise Makromod Lalap Nina hophopon a'am raram, de kar ho me'e. 
\p  
\v 26 Enimaa mi ka mauroin panaeku ma na'ahenia, ‘ri man maki, mori wali'ur,’ ono lo'o mi kam lesala Musa nina horok man konohi inhawe namwali lolo au um'umu man lerlere onne? Horok onne lirna na'ahenia, 
\q1 ‘Makromod Lalap na'aheni Musa: Ya amwali Makromod Lalap man Abraham, Isak, noro Yakup ra'ul'uli rasa'asa'a rakan lere eniyeni.’ \x * \xo 12:26 \xt Kel. 3:6, 15\x* 
\m Ri man makiyedi ka ra'uli rasa'a Makromod Lalap, maa ri man morimori mehe man ra'uli rasa'e!  
\v 27 Makromod Lalap ka namwali ri man makiyedi nin Makromod Lalap, maa Ai namwali ri man mormori rir Makromod Lalap. Mim sala wake'edi me'e ono mi ka mauroin nahenia ri man maki mori wali'ur.” 
\s1 Keneri hono'ok ma na'ono wake'e 
\r (Mat. 22:34-40; Luk. 10:25-28) 
\p  
\v 28 Enime'ede meser Horok Lapida derderne Yesus noro Saduki enihe rawalha lira panaeku onne, la derne Yesus Nina wanalha man wa'an, de na'ukani Yesus na'ahenia, “Pap Meser, lolo Makromod Lalap Nina keneri hono'ok na'akeme, ewi penia ma na'ono narehi?” 
\p  
\v 29 Enine Yesus walhe, “Keneri hono'ok ma na'ono dedesne na'ahenia, 
\q1 ‘Israel ne'en raram, makaniyala! Makromod eniyeni, Makromod Lalap. Makromod eni mahaku mehe. \x * \xo 12:29 \xt Ul. 6:4-5\x* 
\q1  
\v 30 Modi mi honorok akin, mi irhun raramne noro minim ruri pe'el na'akeme maramyaka Makromod Lalap ma namwali Makrommu.’ 
\m  
\v 31 Keneri hono'ok rewro'o nina na'ahenia, 
\q1 ‘Maramyaka minim ri mormori wali naise maramyaka mi kemmu haenhi.’ 
\m Keneri hono'ok woro'o eniyenihe, ma na'ono narehi keneri hono'ok namehin.” \x * \xo 12:31 \xt Im. 19:18\x* 
\p  
\v 32 Enine meser Horok Lape eni walhe, “Pap Meser wakunu namlolo kokkoo ma'aheni: Ik Makromod, Makromod Lalap ida mehe, Makromod Lalap namehin kaale.  
\v 33 Enla lo'o ri nodi honorok akin, irhun raramne noro rir ruri pe'el na'akeme raramyaka Makromod Lalap ma namwali hi Makromon, la lo'o hi raramyaka hirira ri mormori wali naise raramyaka hi kemen aimehi, hir hi'i ha ma na'ono wake'e. Panaeku onne penia ma na'ono narehi nano ri nasala kerkerhe keneri hono'ok man hopon harna honoi kanani nala Makromod Lalap noro ha namehin haenhi.” \x * \xo 12:33 \xt Hos. 6:6\x* 
\p  
\v 34 Yesus derne meser Horok Lap onneni nodi nina woroin wakunu wa'an de Ai na'aheni, “Pap na'akeki namwali ri man Makromod Lalap nodi molollo me'e.” An wakunu horu ne, hi ramka'uk ra'ukani Yesus haida-haida me'e. 
\s1 Yesus na'aheni Kristus man Makromod Lalap kikan namwali Rai laa ewi-ewi (Mesias) namwali Daud upun anan noro idewe Makromon haenhi 
\r (Mat. 22:41-46; Luk. 20:41-44) 
\p  
\v 35 Yesus mahan wakuku lolo Makromod Lalap Nina Romleu Lape, Ai na'ukani hi na'ahenia, “Alhi'ihepenia meser Horok Lape enihe ra'aheni Mesias (Kristus) namwali Daud upun anan?  
\v 36 Enimaa nonolu eni Roh Kudus nodi molollo Daud penia wakunu na'ahenia, 
\q1 ‘Makromod Lalap ne'el i Makrom'u na'ahenia: 
\q2 Maikoro I her'u malanne hehen nanumene 
\q2 Ya'u hi'i Num arwali enihe lolo yawa ki O.’ \x * \xo 12:36 \xt Mzm. 110:1\x* 
\p  
\v 37 Daud mehe napolu Ai, ‘I Makrom'u,’ de hi'ihehewi namwali anan mememen?” 
\p Ri nammori lolo onne akinhe nahuwa'an wake'e derne Nina wanakunu eni. 
\s1 Madiyakyaka mi nano meser-meser Horok Lap 
\r (Mat. 23:1-36; Luk. 20:45-47) 
\p  
\v 38 Enla Yesus wakuku hi na'ahenia, “Madiyakyaka mi nano meser Horok Lap eniyenihe, ono hir suk nair rain nanaru lalaa mamai leke rin po'on de rauroin hi eni man panulu, la hir suk laa pasar raram leke rin horhawe.  
\v 39 Hir laa Yahudi nina kerei raram ne, suk raikoro kalari, la lere hir laa yapi, suk raikoro mei uluwakun haenhi.  
\v 40 Enla hir wukupodo maeke waluwalum, leke rahoro rira nakar, la hir hi'i lir napanak nanaru rodi pupin aduwala rir poheni. Ri eniyenihe lernala hunukum man werek wake'e.” 
\s1 Maeke walwalum nala nina kupan 
\r (Luk. 21:1-4) 
\p  
\v 41 Yesus naikorkoro nohi Romleu Lap nin honoi kanani onno. An po'on heri ma nala kupan loile honoi kanani onno raram. Orkanaru nammori mai rala kupan namansa loile honoi kanani onno eni.  
\v 42 Rakan maeke walwalum ida ma na'alehe haida-haida mai nala kupan pere waku woro'o loile honoi kanani onno eni. 
\p  
\v 43 Enine Yesus napolu Nina man lernohi pakunohi na'ahenia, “Loi honorok wawa'an Ainu'u panaeku ma na'ono eniyeni! Maeke walwalum ma na'alehe haida-haida onne loile kupan nammori narehiyedi ri orkanaru na'akeme,  
\v 44 ono nina kupan nodi mori akilere na'akeme loile honoi kanani onno eni, maa ri namehin rala rira kanaru heruwali mehe loile.” 
\c 13  
\s1 Yesus konohi nahenia lere man mai Makromod Lalap Nina Romleu Lape napye'eredi 
\r (Mat. 24:1-2; Luk. 21:5-6) 
\p  
\v 1 Yesus noro Nina man lernohi pakunohi enihe ramharedi Makromod Lalap Nina Rom Lapeni ne, Nina man lernohi pakunohi ida po'onala waliwali na'aheni, “Pap Meser, ken po'onala rom-rom eniyenihe ma'aruru wake'e. Hi rodi waku lalapa mamani hi'ie.” 
\p  
\v 2 Yesus walhe, “Namlolo, lere eniyeni om po'on ma'aruru, maa lere man mamai eni arwali mai de naiye'er mouwedi Romleu Lap onne nina waku danaran na'akeme de ida ma ka nadinara ida wawan me'e.” 
\s1 Yesus konohi wewerek pananaka dedesne ma namwali lere li'ur 
\r (Mat. 24:3-14; Luk. 21:7-19) 
\p  
\v 3 Horu ne, Yesus noro Nina man lernohi pakunohi enihe rala'a laa wo'or Zaitun raikoro onnida ma nakpali Makromod Lalap Nina Romleu Lape onne. Enine Petrus, Yakobus, Yohanis noro Andreas rodi rira panaeku aimehi laa roro Yesus wakunu ra'aheni,  
\v 4 “Ken Papa konohi yai ke'e ma'anana ha eniyeni namwali? Enla am lernala inhawa tanade leke ai mauroin nina lere alam na'uraniyedi me'e.” 
\p  
\v 5 Enine Yesus walhe na'ahenia, “Nakinemen ki mi, kalo'o rin paipudi mi.  
\v 6 Ri nammori rodi I naran mai ra'aheni, ‘Ya'u eni Kristus!’\f + \fr 13:6 \ft Wanakunu Yunani herre ‘Kristus’ na'aheni ‘Ai’.\f* de hir paipudi ri nammori.  
\v 7 Lo'o mim derne lira are noro lira anna ara lolo waliwali, maa yono mi mamka'uk ono panaeku rahu onne namwali. Yom pene'ek nahenia rakanedi noho nin lere alam man horu me'e.  
\v 8 Noho pa'i'ik rai pakakar lo'o ida ma na'ara noro ida, hair noro hair, la noho wawan lernala rururuwai noro roulara lolo ewi-ewi. Ha wo'ira eniyenihe hi'i noho wawan apinha rehi, naise maeke man apun la rakanedi nin lere alam de apinpinha wake'e. 
\p  
\v 9 Ende nakinemen ki mi, ono na'amoli hir kele mi rodi laa makpali leleher lalapa lolo hono'ok kanail onno. Hir nukur mi lolo Yahudi rir kerei raram, la hi rodi mi laa hair-hair rir ma nodi molollo roro rai-rai ma nodi molollo kalarna, ono mim lernohi Ya'u. Lere onne me'ede, mim lernala leken loikaru I Lir'u hi kalarna.  
\v 10 Ri nodi Makromod Lalap Lirna Wawa'an eni raderre radaul noho ulikne rai wawan nolu mene ha onne namwali.  
\v 11 Enla lo'o rin kele mi rodi la leleher lalapa ma nasala hono'ok kanail enihe leke ho'ok kail mi, yom mahini'i inhawa mim wakunu lere onne, maa loikaru inhawa wanakunu man Ya ala ki mi. Hi'i heheni leke inhawa mim loloi kakaru eni ka namwali minim wanakunu aimehi, maa Roh Kudus Nina.  
\v 12 Ri mehen kuku sala mo'oniwalla penia ri nesne. Onne namwali papa noro ananne haenhi. Enla tatana lalapana kar derne rakani hi inna aman me'ede nakoke ri nesne.  
\v 13 Ri na'akeme kar suk mi, ono mim lernohi Ya'u. Enimaa inhoi akin namkene naili'il Ya'u rakan nin lere man horue, an lernala or'ori dardari ma kan horu.” 
\s1 Yesus konohi wali'ur apinpinha ma namwali lere man mai 
\r (Mat. 24:15-28; Luk. 21:20-24) 
\p  
\v 14 “Lere man mai mim do'on ‘Ha Man Ailanna ma na'ihoru na'idaru Makromod Lalap mamani’ namririri onno man luli lolo Makromod Lalap Nina Romleu Lapa. Lere onneni inhoi aile Yudea lari mouwedi laa wo'or! (Ri man lese horok eniyeni loi honorok wawa'an wanakunu eni.)  
\v 15 Ri ma aile nakar wuwane kopur pelekleke, maa yon laa romleher nala haida.  
\v 16 Ri ma aile kirna yon wali laa nakar rala rir nainair.  
\v 17 Heih! Lere onne maeke ma nornoro raramne roro man anan huhuhu makun, apinpinha nore!  
\v 18 Hi'i lir napanak leke panaeku onne yono nedile lere alam noho ma'urinrinna leke yono eren apinpinha.  
\v 19 Lere onne, ri mormori lernala wewerek pananaka wake'e. Nano lere Makromod Lalap nakuku naleu noho wawan rakan lere eniyeni ri kan do'onala wewerek pananaka ma naise onneni makun, la ka namwali wali'ur naise onneni.  
\v 20 Lo'o Makromod Lalap ka na'adeul lere alam onneni, ri na'akeme lo'o maki mouwedi. Maa, Ai na'adeul lere alam onne leke ri man Makromod Lalap niliyedi me'e yono lernala wewerek pananaka nammori rehi.  
\v 21 Lere onne lo'o ri ne'el ki mi na'ahenia, ‘Po'onala, Kristus aile mai eni me'e,’ ee ‘Po'onale, aile lolo onne!’ Yono mim derne makani ri onneni.  
\v 22 Rin mai kokwudi mi ra'aheni hi ramwali Kristus, ee nabi namehin, maa ka namlolo. Hir hi'i tanada lewlewen noro ha man ri kan dodo'onnala makun haenhi leke kene paipudi ri nammori. Hir kene paipudi ri man Makromod Lalap niliyedi me'e haenhi, maa lo'o ka namwali.  
\v 23 Ende loi honorok memen! Ya'u konohiyedi mi ha eniyenihe na'akeme nolu mene namwali.” 
\s1 Yesus kukukonohi Nin mamai noho wawan 
\r (Mat. 24:29-36; Luk. 21:25-33) 
\p  
\v 24 “Rakan lere alam wewerek pananake man werek onne horu ne, lere kan hari, wollo kan ropo,  
\v 25 la kaliyore nadiya'ur nahoho'ok la hahaa na'akeme man aile a'am narururu. 
\p  
\v 26 Lere onneni rin do'on Ya'u, ma namwali Ri Mormori Ananne, mai lolo hulik poloi kakam palari. Lere onne Yo odi ke'eke'el an'anhe ma narehi nalewen, la rin po'on Ya'u siksika lerlere. \x * \xo 13:26 \xt Dan. 7:13\x* 
\v 27 Ya'u maie ne, Ya'u hopon Ainu'u hophopon a'am raram laa poluwuku Ainu'u ri man Makromod Lalap niliyedi enihe nano noho huhun wo'akka enihe, la nano noho ulla rakan a'am ki'ilne. 
\p  
\v 28 Loi honorok wawa'an panaeku ida nano ara ono: Rakan lere are napupul naweti lan moko, mi mauroin nahenia ka nalo'ol me'e ara ono onne woi me'e.\f + \fr 13:28 \ft Wanakunu Yunani na'ahenia, “Ara ono napupul naweti lan moko, mi mauroin nahenia lere alam na'urani lere manha me'e,” de ka namnenehe noro noho Yotowawa nin noho kenerne.\f* 
\v 29 Namnenehe noro ara ono onne, lere mim do'on ha onneni namwali mi mauroinedi nahenia Ainu'u lere alam mai wali'ur wakuraniyedi me'e.  
\v 30 Horhorok Ainu'u nou ma na'ono eniyeni: Ha eniyeni na'akeme namwali mouwedi nolu mene kulere eniyeni maki horu.  
\v 31 A'am noro noho moluloin, maa I Lir'u eni kan molu laa ewi-ewi.” 
\s1 Ri mahaku ka nauroin ma'anana Yesus mai wali'ur 
\r (Mat. 24:36-44) 
\p  
\v 32 “Ri mahaku ka nauroin ma'anana lere alam onneni namwali. Maya'u, hophopon a'am raram, la ri mormori na'akeme ka rauroin. Ya Am'u, Makromod Lalap, mehe nauroin.  
\v 33 Ende madiyakyaka mi mamani, ono ka mauroin Ainu'u lere alam mai wali'ur noho wawan.  
\v 34 Eni molmolo ri man hoikaru nina nakar nala'a kalla koko'u. An hopon nina hophopon radiyaka nina nakar eni. Enla an ha'aredi honowok hi dohodoho, la an nou ma nadiyaka nikenihe radiyaka wawa'an.  
\v 35 Ende madiyaka mi memen, ono ka mauroin ma'anana Ya'u ma namwali ornakar eni wali mai, lere helhelem, ee alam tortoro, ee noho roropo, ee al'alam wake'e.  
\v 36 Yon hi'i de mamlilinnohi Ya'u mai holikuku mi mamkukuru makun.  
\v 37 Enpenia Ya'u konohi mi noro ri na'akeme, ‘Madiyakyaka mi mamani.’ ” 
\c 14  
\s1 Yahudi rir man panulu paeku kele Yesus 
\r (Mat. 26:1-5; Luk. 22:1-2; Yoh. 11:45-53) 
\p  
\v 1 Inworo'o mene rakan Lere Alam Lap Paska\f + \fr 14:1 \ft Paska eni po'onala Kel. 12 noro Mrk. 14:12.\f* noro Lere Alam Ra'an Roti Ma Na'alehe Ragi.\f + \fr 14:1 \ft Lere Alam Lapa Ra'an Roti onne hir hi'i yapi lere alam wo'ikku mene horu, la Lere Alam Paska alam ida mehe la nedile alam dedesne Lere Alam Ra'an Roti onne.\f* Enine imam-imam lalap noro meser Horok Lape onnenihe ranoin kalla ma nasinuwar kele Yesus, resne.  
\v 2 Enimaa ida ma ne'el ida, “Yono ik hi'i panaeku eniyeni iknik lere alam lalap, kalo'o nakoko man suk derne Yesus Nin wanakuku hi'i wowo'o ar'arra.” 
\s1 Maeke ida nodi wuru wala'ula'u halle Yesus uluwakun 
\r (Mat. 26:6-13; Yoh. 12:1-8) 
\p  
\v 3 Lere Yesus aile Betania An minle Simon nina nakar. Simon onne, ri napolu ‘Simon man ulik yak hi'ie’ ono nonolu eni an lernala apinha onne, maa ors eni wa'anedi me'e. Yesus nana'ak ne, maeke ida mai nodi wuru wala'ula'u man aile potol ma'aruru ida. Potol onne rodi waku marmer hi'ie. Wuru eni wella ai wawan wake'e. An hi'i yaki potol nurane mene halla wuru Yesus uluwakun. 
\p  
\v 4 Enime'ede ri ida woro'o ai lolo onne ra'ahan maeke onneni, la ida ma ne'el ida, “Alhi'ihepenia wuru wala'ula'u onneni kolo nano'onyake?  
\v 5 Wuru eniyeni ra'olu wella kupan pere rahu wokelu rehi. Wella onne namnenehe noro ri nina naiwe'el annida. Wa'an rehi kupan eni ha'arle ma na'alehe haida-haida.” Enla hi rodi lir apinha dadiyale. 
\p  
\v 6 Enimaa, Yesus na'aheni, “Na'amoli ke'e! Yom dadiyala maeke eniyeni! An hi'i ha man wa'an noro Ya'u menee.  
\v 7 Akilere mim holiwuku noro ma na'alehe haida-haida enihe. Ende ma'anana-ma'anana mi raram nodi paku hi, pakuwala ke'e, maa Ya'u eni ka oro mi nalo'ol.  
\v 8 Maeke eni hi'i ha man wa'an eni leke paku Ya'u, ai ka nauroin hi'i inhawa ikara. An hi'i ha eniyeni leke rakan Ainu'u lere alam I maki, Ya'u ihin kemen ra'akenedi me'e.  
\v 9 Horhorok Ainu'u nou ma na'ono eniyeni: Lolo ewi-ewi Makromod Lalap Lirna Wawa'an raderre radaulle, maeke eni nina hini'i wenewhe onne loikaru haenhi de ri kan hamlinu ai.” 
\s1 Yudas nanoin leken pahaharin na'olu Yesus 
\r (Mat. 26:14-16; Luk. 22:3-6) 
\p  
\v 10 Kame'ede Yudas Iskariot ma namwali ri ida nano man lernohi pakunohi idaweli woro'o onnenihe laa imam lalap leke na'olu Yesus.  
\v 11 Iman lalap onne raram nahuwa'an derne nina panaeku onneni, de hir noue nahenia rala kupan ai. Enpenia Yudas nanoin leken paharin leke kani Yesus hi liman raram. 
\s1 Yesus noro man lernohi pakunohi ra'ak romun Paska 
\r (Mat. 26:17-25; Luk. 22:7-14, 21-23; Yoh. 13:21-30) 
\p  
\v 12 Rakan Lere Alam Lalap ‘Ra'an Roti Ma Na'alehe Ragi’ nin lere dedesne (lere onne Alam Paska de ri Yahudi radedem resne pipdumana leke rodi hoikani Makromod). Yesus Nin man lernohi pakunohi ra'ukanie na'ahenia, “Pap raram nodi am laa ewi ma'akene Paska\f + \fr 14:12 \ft Alam Paska onne ri nadedem resne pipdumana ra'an leke ra'ori honorok Makromod Lalap Nin hini'i lere man laedi me'e. Lere onne An hi'i hi upun a'anhe ramhara nano Mesir. \f* nina ya'an yomun leke Pap na'ane?” 
\p  
\v 13 Enine Yesus hopon man lernohi pakunohi ri woro'o na'ahenia, “Mala'a laa kota Yerusalem raram. Rakanedi ne, mim holikuku mo'oni ida ma na'uwarwara oir e'en de lernohie laa nakar an lalaeni.  
\v 14 Ma'aheni ornakar lolo onne na'ahenia, ‘Pap Meser na'ukani: Lo'o Yo oro Ainu'u man lernohi pakunohi enihe mo'on momun Paska lolo onno ewi?’  
\v 15 Enlo'o ornakar onne kukul onno ma naphari ida ki mi aile danaran wawan man ai na'akenedi me'e, de miro laa ma'akene nana'an nonomun lolo onne.” 
\p  
\v 16 Ende woro'ohe rala'a. Hir rakan kote raram, do'on ha wo'ira na'akeme naise Yesus konohiyedi hi eni. Idewe hi ra'akene hanana'an Paska.  
\v 17 Horu ne hir wali laa Betania. 
\p Rakan lere helemedi Yesus noro Nina man lernohi pakunohi idaweli woro'o ra'alono laa nakar onneni.  
\v 18 Hi raikoro maha ra'ak, Yesus na'ahenia, “Horhorok Ainu'u nou ma na'ono eniyeni: Nano mi ma naikoro wuku mo'on momun eniyeni, ri ida aile ma na'olu Ya'u, kanile ri leke resnA'u.” 
\p  
\v 19 Hir derne Nin wanakunu onneni hi akinhe woiredi, la dohdoho ra'ukani Yesus ra'aheni, “Pape, lo'o maya'u, ka!?” 
\p  
\v 20 Enine An walhe na'ahenia, “Nano mi ri idaweli woro'o eniyenihe ri onne aile, la noro Maya'u remen roti wewerre lolo manuk raram.  
\v 21 Ri Mormori Anan lo'o maki naise horhorok aile Horok Lapeni, maa ri man kani Ai laa arwali onne mayo'edi me'e. Wa'an rehi ri onne inna aman kar morie.” 
\s1 Yesus nala roti noro anggur Nin man lernohi pakunohi ra'an romun 
\r (Mat. 26:26-30; Luk. 22:14-20; 1Kor. 11:23-25) 
\p  
\v 22 Hi ra'ak larlari, Yesus nala roti kem ida, napanak trimkasi Makromod Lalap nanumene a'un, ha'arle Nina ri mememen enihe, na'aheni, “Kokala la mo'on, roti eniyeni Yi ihin kem'u.” 
\p  
\v 23 Horu ne, Ai nala anggur cawan ida, napanak trimkasi nanumene nale hi romun, la na'akeme romun anggur onne. 
\p  
\v 24 Ai na'aheni, “Anggur eniyeni Ya'u rarna man wui man kolo la ma na'ono nawinau Makromod Lalap Nin nou worworu man du'ul kali ri nammori roro Ai laa ewi-ewi.  
\v 25 Horhorok Ainu'u nou ma na'ono eniyeni: Nano lere eni me'ede ka omun anggur eni hehen nanumene rakan lere Yo oro mi komun anggur worworu lolo Makromod Lalap Nina noho worworu.” 
\p  
\v 26 Kame'ede hi rahinara hanara ida, ra'uli rasa'a Makromod Lalap. Horu ne, hi rala'a laa wo'or Zaitun. 
\s1 Yesus konohi Petrus, “Ka nalo'ol me'e ma'okul Ya'u” 
\r (Mat. 26:31-35; Luk. 22:31-34; Yoh. 13:36-38) 
\p  
\v 27 Enine Yesus konohi hi na'ahenia, “Ka nalo'ol mi na'akeme lari hoikaruwedi Maya'u me'e, ono horhorok aile Horok Lape ma na'ahenia, 
\q1 ‘Ye esne man huri onne, la nina pipdum ukun lariye'er rarari.’ \x * \xo 14:27 \xt Zak. 13:7\x* 
\m  
\v 28 Maa lere Makromod Lalap na'amori Ya'u wali'ur nano maki-maki eni, Yo oluwedi mi laa Galilea.” 
\p  
\v 29 Petrus na'aheni, “Lo'o hi na'akeme hoikaruwedi Pape, maa maya'u ka!” 
\p  
\v 30 Enla Yesus na'aheni, “Horhorok Ainu'u nou ma na'ono eniyeni: A'alam eni manu kan kokoroi rewro'o makun, o ma'aheniyedi ka mauroin Ya'u rewkelu me'e.” 
\p  
\v 31 Enimaa Petrus walha naruri na'ahenia, “Kade yo oro Papa maki wewerre, maa ya'u ka a'aheni ka auroin Papa!” Enla man lernohi pakunohi namehin enihe ra'aheni heheni haenhi. 
\s1 Yesus hi'i lir napanak lolo Getsemani 
\r (Mat. 26:36-46; Luk. 22:39-46) 
\p  
\v 32 Hi rala'a laa onnida naran Getsemani. Rakanedi ne, Yesus hopon Nin man lernohi pakunohi na'ahenia, “Maikoro lolo eni, Ya'u laa enne hi'i lir napanak.”  
\v 33 Enine Ai naka'uk Petrus, Yakobus noro mo'oniwalla Yohanis ra'alono laa. Hi rala'a ne, Yesus akin woir la sus rehi.  
\v 34 Enime'ede An konohi wokeluhe na'ahenia, “Ya akin woir rehi naise I maki me'e, de mim min lolo eni la madiyakyaka.” 
\p  
\v 35 Horu ne, Ai nala'a kalari tarana wali kemen yawa nahinononow hi'i lir napanak na'ahenia, “Lo'o wa'an rehi yono Ya a'uwara wewerek pananaka man mai eniyeni.  
\v 36 Papa, Ya Am'u, peni paekunala hi'i ha wo'ira na'akeme de Ya apanak Papa leke yon Ya a'uware wewerek pananaka onneni. Enimaa yono hi'i lernohi Ainu'u honorok panaeku aimehi, maa lernohi Papa Nina honorok panaeku mehe.” 
\p  
\v 37 Horu An wali laa, Nin ri wokelu onne ramkukuru me'e. Enine Ai ne'el Petrus na'ahenia, “Simon, mamkukuru me'e? Kam kerhu madiyakala jam ida?  
\v 38 Madiyaka la hi'i lir napanak leke yono mi madiyaur kenene panatal! Mi honorok akin namrana lernohi Ya'u, maa mi ihin kemen ka naruri.” 
\p  
\v 39 An wali wali'ur lan hi'i lir napanak nodi panaeku mahaku eni.  
\v 40 Horu An wali wali'ur tolle wokeluhe ramkukuru ho'o me'e ono makanhe nasoi rehi. Ai na'ukani hi wali'ur, maa hi ka rauroin walha haida. 
\p  
\v 41 Yesus wali wali'ur rewkelu nina eni, hi ramkukuru wali'ur. Ai na'ukani hi na'ahenia, “Mi mamkukuru makun? Wa'anedi me'e. Rakanedi Ainu'u lere alam me'e. Ya'u, ma namwali Ri Mormori Anan, rala kanile ri man hi'i dohohala liman raram.  
\v 42 Mamakedi! Mai, kala'a here! Po'onala man koklira Maya'u mai me'e.” 
\s1 Yudas noro ri nammori mai kele Yesus 
\r (Mat. 26:47-56; Luk. 22:47-53; Yoh. 18:3-12) 
\p  
\v 43 Yesus wakunkunu makun, Yudas, ri ida nano Nin ri idaweli woro'o onne, noro ri nammori mai rodi ilak raa noro au deul. Imam-imam lalap roro Yahudi rira meser-meser Horok Lap roro rira leleher lalapa enihe hopon hir laa kele Yesus. 
\p  
\v 44 Yesus walin ma na'olu Ai onne, an kukunohiyedi heri onnenihe me'e na'ahenia, “Ya'u nair tanada eni de ri man ya'u masi onne, mim kele here!”  
\v 45 Enime'ede Yudas laa Yesus napolu, “Pap Meser,” nanumene masie.  
\v 46 Idewe ne, heri onne kele Yesus lawukuwedie.  
\v 47 Enimaa ri ida lolo onne lehu nin raa dara imam man kulu narehi nina hophopon ida kilinna me'ede kaprosuwedi. 
\p  
\v 48 Ende Yesus ne'el heri onnenihe na'ahenia, “Enlo'o Ya'u eni ri man ailanna penia modi ilak raa noro au deul mam kele Ya'ue?  
\v 49 Akilere Ya'u wakuku mi lolo Makromod Lalap Nina Romleu Lapa raram, maa mi kam kelA'u. Enimaa eni na'akeme namwali leke na'akuku na'anokor inhawa man horokedi aile Horok Lape raram me'e.” 
\p  
\v 50 Hir keledi Yesus ne, Nina man lernohi pakunohi lari moumouwedi, kokoko ma na'ikaka ida man lernohi lolo kili'ur, la  
\v 51 ri onne sawisawik homnono. Heri onne kene kele  
\v 52 maa, ai nawe'ul la huriyedi nina homnono, de nadlewlewhe lari me'e. 
\s1 Yesus nakpali Yahudi nina muku man ho'ok kail 
\r (Mat. 26:57-68; Luk. 22:54-55, 63-71; Yoh. 18:13-14, 19-24) 
\p  
\v 53 Ende man kele Yesus rodi laa imam man kulu narehi nina rom. Laa enne, imam-imam lalap roro meser-meser Horok Lape roro Yahudi rir leleher lalap onnenihe mahanoro hopun pepen. 
\p  
\v 54 Petrus lernohi hi nano ko'u. Rakan imam man kulu narehi eni nina nikoin, ai naikoro namrinnu ai noro ma nadiyaka enihe. 
\p  
\v 55 Imam lalap enihe roro Yahudi rir muku man ho'ok kail eni rahehe ranoin man kuku maka man wakunu ha man sala leke tumdesne Yesus la hukumesne, maa kar lernala.  
\v 56 Ende polu ri nammori mai rala panaeku leke rodi kuku sala Yesus, ma rira panaeku eni ka namnehe. 
\p  
\v 57 Horu ne, ri ida woro'o man aile lolo onne ramriri rala wanakunu poho, tumdesne Yesus ra'aheni,  
\v 58 “Am derne Ai na'ahenia, 
\q1 ‘Ya aye'er Makromod Lalap Nina Romleu Lape man ri mormori hi'i eniyeni, la lere wokelu Ya'u wanna worworu ri mormori kan hi'i.’ ” 
\m  
\v 59 Enimaa rira wanakunue ida ma ka namnenehe noro ida. 
\p  
\v 60 Enime'ede imam man kulu narehi eni namriri hi kalarna na'ukani Yesus na'ahenia, “Man kuku maka eniyenihe wakunu tumdesne O. Alhi'ihepenia O kam walhe?”  
\v 61 Maa, Yesus ka na'oho. 
\p Ende imam onne na'ukani Yesus raram wali'ur, “Namlolo, O eniyeni Kristus, Makromod Lalap Ma Narehi Ma Nalewen Ananne?” 
\p  
\v 62 Yesus walhe na'ahenia, “Ya'u eni Ai, la na'amoli mi na'akeme do'on Ya'u, ma namwali Ri Mormori Anan, aikoro Makromod Lalap Ma Nodi Molollo Narehi Ma Nalewen na'akeme herne malanna. Enla lere man mai mim do'on Ya'u mai wali'ur lolo hulik loiloi kakam larlarie!” \x * \xo 14:62 \xt Mzm. 110:1; Dan. 7:13\x* 
\p  
\v 63 Ideweni ne, imam man kulu narehi onne sirriki nina rain kemen la na'ahenia, “Yono kanoin man kuku maka namehin me'e.  
\v 64 Ende minim panaeku hi'ihehewi? Mim dernedi Ai na'ihoru na'idaru Makromod Lalap me'e, de mala inhawa kenekrohu?” 
\p Hi rala kenekrohu ra'aheni, “An sale wake'e, de hukumesne here.” 
\p  
\v 65 Enime'ede heruwali saprui saworno Ai, hir pasunedi oin makan mene hudi la pahar. Hi ra'aheni, “Heih, kene kukunohi yai inhoi man hudi pahar O.” Horue ne ma nadiyaka lolo onne riuk Ai haenhi. 
\s1 Petrus na'okuledi Yesus 
\r (Mat. 26:69-75; Luk. 22:56-62; Yoh. 18:15-18, 25-27) 
\p  
\v 66-67 Hir maha ra'ukani Yesus romleher ne, Petrus aile nikoine. Enine maeke ida ma namwali man howok lolo imam man kulu narehi onne nina nakar mai do'on Petrus mahan namrinna aiye. Ai nahiyennale Petrus de na'aheni, “O penia nadedem moro Yesus ma nano Nazaret onne.” 
\p  
\v 68 Maa Petrus nawali ekemale la na'aheni, “Ka auroin ri onne inhoi, ka auroin onuma panaeku inhawa.” 
\p Enime'ede Petrus nala'a lolo nika lapa makan, [idewe manu kokoroiyedi.]\f + \fr 14:68 \ft Horok man aile lolo tanada [ ] raram, kaale lolo horok Yunani dedesne heruwali.\f* 
\p  
\v 69 Ka nalo'ol maeke onne do'on Petrus ho'o me'e. Enime'ede an konohi man min lolo onne na'ahenia, “Ri eni peni namwali man lernohi pakunohi ri man ai raram onne.”  
\v 70 Petrus derne, maa ai nawali ekemale wali'ur. 
\p Kan mahala ne, ri man min lolo onne re'el Petrus na'ahenia, “Lo'o namlolo, o mamwali man lernohi hi haenhi ono onum wanakunu lirna mehe nodi kunukunohi nahenia o eni manin Galilea.” 
\p  
\v 71 Enine Petrus nahopo me'e, “Ka auroin ri mim wewekel onneni!” 
\p  
\v 72 Idewe manu kokoroi rewro'o nina. Enime'ede Petrus horoknala Yesus Nina wanakunu: “Manu kan kokoroi rewro'o nina makun, o ma'aheni ka mauroin Ya'u rewkelu me'e.” Idewe ai nahere maheruheru. 
\c 15  
\s1 Rodi Yesus la Pilatus kalarne 
\r (Mat. 27:1-2, 11-31; Luk. 23:1-5, 13-25; Yoh. 18:28—19:16) 
\p  
\v 1 Noho kan ropo wawa'an makun, Yahudi rir imam lalap, leleher lalapa roro meser Horok Lap ma namwali Yahudi rira muku man ho'ok kail agame enihe rala kenekrohu resne Yesus. Raledi kenekrohu resne Yesus ne, hir wukuwedi Yesus rodi laa kanile Pilatus (Roma nina gubernur). 
\p  
\v 2 Yesus rakanedi Pilatus kalarna ne, Pilatus na'ukanie, “O penia ma namwali Rai Yahudie?” 
\p An walha, “Namlolo, naisa ma'aheheni eni.” 
\p  
\v 3 Enime'ede Yahudi rir imam lalap enihe loikaru kalaklaka nammori Ai kemen.  
\v 4 Pilatus na'ukanie wali'ur na'ahenia, “Hi'ihepenia ka ma'ohe. O mehe makani rira kalaklake nahenia Om hi'i yaksala nammori.” 
\p  
\v 5 Maa Yesus kan walha wake'e, de Pilatus hehel rehi. 
\p  
\v 6 Nadedem rakan Yahudi nina Lere Alam Lalape Paska, Yahudi enihe nili ri ida man aile bui raram leke ma nodi molollo Roma huri nano nina hunukum.  
\v 7 Enla ri ida naran Barabas aile bui raram noro ri woro'o wokelu namehin ma namhene derne rakani Roma nina molollo me'e, de resnedi ri lolo rusrusu ar'arra.  
\v 8 Ende ri nammori mai rapanak Pilatus ra'aheni, “Aki anna papa nadedem huri ri ida nano hunukum, de lo'o lere eni papa huri ri, ee ka?” 
\p  
\v 9 Pilatus na'ukani hi na'ahenia, “Minim suk ya'u huriyedi ri ma na'aheni Ai namwali Rai Yahudi eni?”  
\v 10 Ai na'ukani onne ono nauroiroin imam lalap onnenihe kele Yesus rodi mai ono hi kehekehen Ai.  
\v 11 Enimaa man panulu onnenihe rawa'u heri eni leke rapanak Pilatus huriyedi Barabas, maa Yesus ne, yono. 
\p  
\v 12 Enla Pilatus na'ukani hi, “Emene, mi raram nodi ya'u hi'i inhawa noro ri man wewekel Rai Yahudi eniyeni?” 
\p  
\v 13 Idewe ne hir wakau raruri ra'aheni, “Rodi laa wairesne au kekiyowok here!” 
\p  
\v 14 Pilatus na'ukani, “Alhi'ihepe? Nina inhawa sala pe?” 
\p Enimaa hir eren wakaukau raruri ra'aheni, “Wairesnedie lolo au kekiyowok here!” 
\p  
\v 15 Pilatus nin panaeku nahuwa'annala heri akinhe, de an huriyedi Barabas, maa hopon nin ma nasala ke'urauk enihe riuk rerhe Yesus horu mene kanile ke'urauk leke rodi laa roho waire lolo au kekiyowok me'e. 
\p  
\v 16 Enime'ede ma nasala ke'urauk enihe rodi Yesus laa Pilatus nina rom rodi ho'ok kail raram mene rapolu rira ke'urauk na'akeme mai.  
\v 17 Hir maie ne, rodi rai nin nainair nanaru man mere au'au leke Yesus nairi. Enla hir nanau dupal rururi ida nanumene rala loile Yesus uluwakun.  
\v 18 Onne horu, hir kokme'e rala honoor hanawe ra'aheni, “Hiyene arore ki O, Rai Yahudi O!”  
\v 19 Hi rodi our deul ida taka uluwakun mamani, saprui saworno, la hir kadi ein korno yawa, kokme'e rahuwo'ok Ai.  
\v 20 Hadwei hadwokor Yesus horu, hir herre wali'uredi rai nin nainair nanaru onne, la rala Nina nainair wali'ur. Horu ne, hi rodi laa kota paharne leke rohe, wairesne lolo au kekiyowok. 
\s1 Wairesne Yesus lolo au kekiyowok 
\r (Mat. 27:32-44; Luk. 23:26-43; Yoh. 19:17-27) 
\p  
\v 21 Hir laa kota paharne, Yesus noro ma nasala ke'urauk onnenihe holikuku mo'oni ida man eninanu mai nano leke Kirene nala'a Yerusalem. Mo'oni onneni naran Simon, (Aleksander noro Rufus aman). Ma nasala ke'urauk rakerne ai na'uwara au kekiyowok eni.  
\v 22 Ende rodi Yesus la wo'or ida naranne Golgota, napa'ahne, ‘onno ma naisa uluwaku rurna.’  
\v 23 Rakanedi ne, ke'urauk wa'aha anggur noro wuru awa'ar naran mur rale nomun leke yono kemen apinha rehi, maa Ai namhene nomune.  
\v 24 Horu, hir roho, waire lolo au kekiyowok. Horu ne, hir hi'i undi leke kukul inhoi lernala Yesus Nina nainaire. 
\p  
\v 25 Roho wair Yesus au kekiyowok eni ri'uk wohii orereki.  
\v 26 Hir horok Yahudi rira kalaklake lolo au kekiyowok wawan na'ahenia: \sc Eni ri Yahudi rir Rai\sc*.  
\v 27 Lere onne hir roho wair ri woro'o man ailanna lolo au kekiyowok haenhi, ida man minle herne malanna la ida man minle herne mariri. Woro'ohe ramwali ri ma namna'a. \x * \xo 15:27 \xt Yes. 53:12\x* [  
\v 28 Onneni na'akuku na'anokor Horok Lap Lirna ma na'ahenia, “Hi rahinorok Ai nornoro ri man ailanna.”]\f + \fr 15:28 \ft Horok man aile lolo tanada [ ] raram, kaale lolo horok Yunani dedesne heruwali.\f* 
\v 29 Ende heri man laa ki laa mai lolo onne po'one, rado'do'o uluwakun ilnohi ralnohi ra'aheni, “Eih! O peni ma'aheni maiye'er Makromod Lalap Nina Romleu Lape, la lere wokelu raram ma'ariri wali'ur.  
\v 30 Ende mehe mala kopur O kemmu nano au kekiyowok mai yawa ke'e.” 
\p  
\v 31 Enla imam-imam lalap noro meser Horok Lap onnenihe ilnohi ralnohi naise hi, ida ma na'aheni ida, “Eih! Ai onne nauroin na'ohu nahala ri nammori nano rir apinpinha, maa alhi'ihepe kemen mememen ka nauroin na'ohu nahale?  
\v 32 Ai penia na'aheni Ai namwali Kristus man Makromod Lalap kikanedi namwali Israel nin Rai laa ewi-ewi. Ende alhi'ihepe Ai kan kopur nano au kekiyowok eni leke ik po'one la ik akin naili'il Ai.” 
\p Enla ri woro'o man aile herne mariri malanna ilnohi ralnohi Yesus haenhi. 
\s1 Yesus aran horu 
\r (Mat. 27:45-46; Luk. 23:44-49; Yoh. 19:28-30) 
\p  
\v 33 Rakan lere ulu noho onne na'akeme na'umetekedi hehen nanumene riuk wokelu lere mamamal.  
\v 34 Rakanedi lere mamamal eni ne, An wakau naruri na'ahenia, “\it Eloi, Eloi, lama sabaktani?\it*” Napa'ahne: “Makrom'u Lalap, Makrom'u Lalap! Alhi'ihepe hoikaruwedi Ya'ue?” \x * \xo 15:34 \xt Mzm. 22:1\x* 
\p  
\v 35 Ri man aile lolo onne dederne lirna onne ne heruwali ra'aheni, “Makaniyala! Ai maha napolu Elia.” 
\p  
\v 36 Enime'ede ri ida larlari, nala sawar koun anggur ma'alinu mene naloile au ko'oko'ol ida honon, kani laa Yesus nuranne. Enimaa ri ida na'aheni, “Ika lapanala ke'e. Yon hi'i de taikarala Elia mai nalkopur Ai nano au kekiyowok eni harome.” 
\p  
\v 37 Enine Yesus wakau naruri, la aran horuwedi. 
\p  
\v 38 Idewe tapi rodi kawkawa Makromod Lalap Nina Romleu Lap raram eni nahinarukedi nano wawan idewe laa yawa namwali woro'o me'e.\f + \fr 15:38 \ft Po'onala Kel. 26:31-33. Tapi onne ha'ar Makromod Lalap Nina Romleu Lape namwali onno woro'o. Onno man raram wake'e onne Makromod Lalap Nin onno moumou dewdewe wake'e la Yahudi rir imam lalap ida mehe huri laa raram annida raram leke nodi nala ri Israel lolo Makromod Lalap kalarne. Yesus makiyedi nanumene kanawan onne hariyedi de kalla nahinariyedi leke ri idewe laa Makromod Lalap leken kalarne.\f*\fig Tapi rodi kawkawa Makromod Lalap Nin onno man moumou dewdewe nahinarukedi namwali woro'o|src="LB00265b.tif" size="span" ref="Mrk. 15:38" \fig* 
\v 39 Enine ke'urauk ida ma namwali uluwakun ke'urauk rahu ida ma namriri Yesus kalarne po'on hi'ihewi Yesus aran horuwedi, ai na'aheni, “Namlolo kokkoo, ri eniyeni Makromod Lalap Ananne.” 
\p  
\v 40-41 Lolo onne maeke nammori aile mahar popo'on nano ko'uko'u. Maria Magdalena, Salome, noro Maria (ma namwali Yoses noro mo'oniwalla karuri Yakobus inna) aile maeke onnenihe raramne. Maeke onnenihe radedem lernohi Yesus lolo Galilea la ramwali man ilitolle Ai. Hi roro maeke nammori ra'alono roro Yesus laa kota Yerusalem de ramriri ko'uko'u po'one. 
\s1 Ra'akene manaku Yesus ihin kemen 
\r (Mat. 27:57-61; Luk. 23:50-56; Yoh. 19:38-42) 
\p  
\v 42 Lere onne ri Yahudi rira Alam Ra'akekene hanana'an ono oreki Alam Renren Warwarna, la lere na'ikeki helem me'e, de na'uraniyedi Alam Renren Warwarna me'e.  
\v 43 Enpenia Yusup man holi leke Arimatea mai leke na'akene manaku Yesus ihin kemen.\f + \fr 15:43 \ft Yusup mai leke pelek na'akene Yesus ihin kemen ono Yahudi rira noho honolla hopon yono rin karu maki Alam Renren Warwarna.\f* Ai onneni naikorole agame Yahudi nina muku man ho'ok kail, de ri nahiyene arore, la an weilapan lere alam Makromod Lalap nodi molollo haenhi. Ai mehe na'alapa akin leke ka namka'uk nakpali Pilatus napanak nala kopur Yesus ihin kemen nano au kekiyowok eni.  
\v 44 Ai napanakedi ne, Pilatus hehel rehi derne nahenia Yesus lo'o makiyedi me'e. Enime'ede ai napolu nina uluwakun ma nasala ke'urauk ri rahu ida onne na'ukanie, “Yesus makiyedi me'e kokkoo, ee ka?” 
\p  
\v 45 Uluwakun onne konohi Pilatus na'ahenia, “Namlolo kokkoo, pape. Aran horuwedi me'e.” Kame'ede Pilatus ne'enohi Yusup nala kopur Yesus ihin kemen nano au kekiyowok eni. 
\p  
\v 46 Enime'ede ai lan weli tapi lenan mene nala kopur Yesus kemen. Enine ai nodi tapi onne komon Yesus ihin kemen, nodi la wo'or leren karule ku'il ida ma namwali lunne. Karu horue ne, an poi waku lapa ida nodi elekedi ku'il nina nika.  
\v 47 Maria Magdalena noro Maria, Yoses inna do'odo'on hi rala Yesus loile lolo onne. 
\c 16  
\s1 Yesus mori wali'ur 
\r (Mat. 28:1-8; Luk. 24:1-12; Yoh. 20:1-10) 
\p  
\v 1 Ende lewenedi Alam Renren Warwarna, lere helemedi, mene Maria Magdalena, noro Yakobus inna Maria, noro Salome ra'alono laa weli wuru wala'ula'u noro rampa-rampa leke rodi laa ra'akene manaku Yesus ihin kemen. 
\p  
\v 2 Rakan domeku al'alam, lere ha'edi, hi rodi wuru noro rampa-rampeni rala'a Nin ku'il me'e.  
\v 3 Rakan kalla toro, hi ida ma ne'el ida, “Ika rakanedi, inhoi paku ika poi waku rodi el'elek ku'il nina nike?” 
\p  
\v 4 Hir rakanedi ku'il ne, do'on waku onne napoiyedi me'e de polletilu ono waku onne lape rehi. 
\p  
\v 5 Ende hir laa ku'il raram, do'on ma na'ikaka ida rain wawarhe sorsorue naikokoro aile ku'il herne malanna, idewe hi ramka'ukedi. 
\p  
\v 6 Mo'oni onne konohi hi na'ahenia, “Yon mamka'uk, ya auroiroin mi manoin Yesus ri Nazaret man wairesnedi lolo au kekiyowok onne, maa An mori wali'uredi me'e. Po'onala, hir karu lolo eni, maa kaale me'e.  
\v 7 Lere eni me'e de, lam kukunohi Petrus noro Nin man lernohi pakunohi namehin na'ahenia, ‘Yesus noluwedi mi laa Galilea me'e, de mala'a enne leke mim do'on Ai naise Ai na'aheniyedi ki mi me'e.’ ” 
\p  
\v 8 Enime'ede hi rahumarna ramka'ukesne me'e. Hi ramhara ku'il idewe lari nano lolo onne ono ramka'uk de kar wakunu haida-haida noro ri. 
\s1 Yesus mori wali'uredi ne, pakromo noro Nin ri mene nakinikan laa a'am raram 
\r (Mat. 28:9-10, 16-20; Luk. 24:13-53; Yoh. 20:11-23; HN. 1:6-11) 
\p [  
\v 9 Lere Yesus mori wali'ur, domeku al'alam wake'e, An pakromo dedesne noro Maria nano Magdala. Lere man laedi Yesus nohi hayakyaka wo'ikku nano Maria raramne. 
\p  
\v 10 Idewe ai lan konohi ri man lernohi Yesus man mahar sus mak oir enihe na'ahenia, “Yesus mori wali'uredi me'e. Idedi eni yo oro Ai pakromo.”  
\v 11 Maa hi kar derne rakani ai. 
\p  
\v 12 Horu ne mo'oni woro'o ma nadedem derne Yesus Nin wanakuku, wali rano Yerusalem laa rira leke (Emaus). Rakan kalla toro hir pakromo roro Yesus de ra'alono rala'a. Hi kar pelek rahiyennale ono oin makan namehiyedi me'e, maa Yesus nalhari kemen hi. 
\p  
\v 13 Kame'ede hir wali wali'ur la Yerusalem konohi rir mukue ha ma namwali nahenia hi roro Yesus pakromo, maa rira mukue kar derne rakani hi haenhi. 
\p  
\v 14 Lere li'ur ri idaweli ida man lernohi pakunohi maha rara'ak, ramlilinnohi Yesus mai nalhari kemen hi la na'ukani, “Alhi'ihepenia mi akim ho'o ne na'akekeme la mi uluwakum kerhe rehi, penia mi mamhene derne makani ri man do'on Ya'u ra'aheni Ya'u mori wali'uredi me'e?” 
\p  
\v 15 Horu ne, Yesus hopon na'ahenia, “Mi mala'a noho wawan la maderre madaul Makromod Lalap Lirna Wawa'an eni ri mormori na'akeme.  
\v 16 Inhoi ma akin naili'il Ya'u la napanak ri nodi oir ulutade, ai penia nahinuriyedi nano nina hunukum makmaki, maa inhoi akin ka naili'il Ya'u lernala hunukum makmaki laa ewi-ewi. 
\p  
\v 17 Ri ma akin naili'il onne paekunala hi'i tanada naise: rodi I naran rohi hayakyaka, rauroin wanakunu man worworu,  
\v 18 la lo'o rasala haimoke, ee romun awa'ar man merumeru, maa kar maki, la kemenala liman ma nakni'ir, idewe wa'anedi.” 
\p  
\v 19 Makromod Yesus wakunu noro man lernohi pakunohi enihe horu ne, Ai nakinikan laa a'am raram, laa enne naikoro Makromod Lalap herne malanna leke rodi molollo wewerre. 
\p  
\v 20 Enime'ede man lernohi pakunohi enihe laliwewer noho wawan loikaru Makromod Lalap Lirna Wawa'an eni, la Makromod norle'ule'u norwaliwali hi. Ai nala ke'eke'el an'anha hi rodi hi'i tanada nammori leke nodi kunukunohi nahenia Lirna Wawa'an eniyeni namlolo kokkoo.]\f + \fr 16:20 \ft Lisir eniyeni kaale lolo Horok Lape dedesne heruwali. Wanakunu lirna la'an eni ra'ikar ra'uwali lere li'ur.\f*