\id 2TI  
\h 2 Timotius 
\toc1 2 Timotius 
\toc2 2 Timotius 
\toc3 2Tim. 
\mt1 2 Timotius 
\is1 Horok Lirna La'an 
\ip Nano Paulus nin horok lolo Horok Lapeni na'akeme, an hi'i horok eniyeni kauli'ur wake'e. An hi'i horok eni lere min bui raram lolo kota Roma (1:8; 16-18; 2:9). Ai nauroin nahenia lo'o ka nalo'olala hir hukumesne ai (4:6), de an hi'ie aku laa Timotius. Timotius eni ma na'ikaka ma namwali Paulus nin man howok walie. Ainin honowok namwali man leluwai makrana lolo kerei raramne ma aile kota Epesus. 
\ip Lolo horok eniyeni Paulus nala nin napanak man horu laa Timotius. Ai napanak Timotius pelekleke mai ka'ar ai (4:9, 21), ono an horokedi ai me'e (1:3-5). Paulus na'alap ai akin leke an hi'i wewhe Makromod Nin honowok nodi aki man mou (1:6-7), leke an wakuku hi wanakuku ma namlolo (1:13; 2:2; 3:14), la dadiyala ri ma nodi wanakuku ma ka namlolo (2:14, 16-18). Ai na'alap ai akin leke nampe'el naderre nadaul Yesus Lirna Wawa'an, la hi'i wewhe Makromod Nin honowok na'akeme haenhi (4:1-2). 
\ip Lolo horok enie, Paulus wekel ri woro'o man rodi wanakuku ma ka namlolo. Rir wanakuku na'ahenia, “Lere ri na'akeme man makiyedi la mori wali'ur onne namwaliyedi me'e,” (2:17-18). Rir panaeku heheni: Makromod Lalap nala or'ori dardari worworu huri ika raram lere ik holi mai noho wawan eni mehe, maa Ai ka na'amori ika wali'ur lere ik maki. Paulus na'okul hi na'aheni rir wanakuku onne ka namlolo. Lere man mai, Makromod na'amori wali'ur ri na'akeme nano makimaki enie. (Po'on 1Kor. 15:12, 19-23; 1Tes. 4:16-17 haenhi.) 
\is1 Horok Ihin 
\io1 1. Paulus nala wanakunu man hari horok (1:1-2). 
\io1 2. Paulus napanak trimkasi laa Makromod Lalap ono Timotius akin naili'il wawa'an Yesus (1:3-5). 
\io1 3. Ai na'alapa ai akin leke howok wawa'an Makromod Nin honowok (1:6-4:8). 
\io1 4. Ai napanak Timotius pelek mai ka'ar ai (4:9-15). 
\io1 5. Kade Paulus min bui raram la ka nalo'olala lo'o hukumesne, maa ai nauroin Makromod Lalap kan huri we'er ai (4:16-18). 
\io1 6. Paulus nala nin tape masi (4:19-22). 
\c 1  
\s1 Paulus nala nin hiyene arore 
\p  
\v 1-2 Konohiyala Timotius! Ya'u, Paulus hi'i horok eni aku ki o ma namwali ya an'u man ya aramyaka rehi. Makromod Lalap Nin raram nodi kikan ya amwali Nin hophopon ma nodi Yesus Kristus Lirna Wawa'an eni leke loikaru Nina nou ma na'ono. Nano nou onneni ik kauroin ik lernala or'ori dardari ma kan horu ono Yesus Kristus du'ul kaliyedi ik koro Ai me'e. 
\p Timotius! Ya apanak ik Amad Makromod Lalap, noro ik Makromod Yesus Kristus rala rere'e haharu, ampun, noro wawa'an rara'e ki o. 
\s1 Paulus na'alapa Timotius akin leke namkene naili'il Yesus 
\p  
\v 3 Ya apanak trimkasi laa Makromod Lalap man ya a'uli ya asa'a odi honorok aki man mou, naise yu up'u ya a'uhe ra'uli rasa'e nonolu eni. Ya apanak trimkasi laa Makromod Lalap mamani, la ka'u hamlinu wekel o naran lelere a'alam lolo ainu'u lir napanak onne.  
\v 4 Ya'u ka'u hamlinu num mak'oir man dupue, de ya'u raram nodi rehi ik pakromo wali'ur leke ya akin nahuwa'anala. 
\p  
\v 5 Ya'u horhorok o akim ma namkene naili'il kokkoo Makromod Yesus Kristus. O upum Lois, noro o inum Eunike akin naili'il Ai kokkoo haenhi, la ya auroin o akim namkene naili'il Ai naise hi.  
\v 6 Onne penia ya a'ori honorok o, Timotius, ma'alapa o honorok akim leke mampe'el howok honowok modi woroin Makromod Lalap naledi ki o me'e. Ai nala woroin onne ki o lere ya ala i lim'u parhu o uluwakun wawan.  
\v 7 Yono mamkauk hi'i honowok onne ono Makromod Lalap naledi Nin Roh Kudus maika, la kan hi'i ik kamka'uk, maa Ai nala ruri pe'el maika leke ik kampe'el howok, la ik kararamyaka ri namehin, la ik kadiyaka ik kemen yon hi'i ha man yaka. 
\p  
\v 8 Ende yono mawawa konohi ri inhawa ik Makromod hi'iyedi me'e, la yono mawawa maya'u ono ya'u ai bui raram! Ya'u peni min bui raram ono yo odi Makromod Lalap Lirna Wawa'an eni! Ende modi molollo Makromod Lalap nanala ki o, leke o mamkene lernala wewerek pananaka ono loikaru Lirna Wawa'an eni naise maya'u.  
\v 9 An huri we'eredi ika nano dohohala nin molollo la niliyedi ika kamwali Nina ri mememen. Ai kan hi'i onne ono ik hi'i ha man wa'an, maa An hi'i onne lernohi Nin re're'e haharu noro Nin panaeku aimehi. Ai kan hi'i noho wawan makun, An paekuwedi nala leken maika leke koro Yesus kadinu'ul kakinali me'e.  
\v 10 Enla lere eni Ai na'amou na'aropedi Nin panaeku onne lolo ik Makromod Yesus Kristus Nin mamai eni. Kristus eni peni namwali Rai Ma Nala Or'ori Dardari maika, la ma na'ahoruwedi makimaki nina mololle, la lolo Ai Lirna Wawa'an eni Ai nalhari Nin or'ori dardari ma kan horu eni. 
\p  
\v 11 Onne penia Makromod Lalap niliyedi ya amwali Yesus Nin hophopon noro idewe meser leke ya'u loikaru Lirna Wawa'an eni.  
\v 12 Onne penia ya'u lernala apipinha minle bui raram, maa, ka awawa, ono ya auroin Inhoi ya akin naili'il, la ya auroin Ai penia nodi molollo nadiyaka inhawa Ai nanala maya'u\f + \fr 1:12 \ft ‘Nadiyaka inhawa Ai nanala maya'u’, ee ‘Nadiyaka ya'u ono ya ala ainu'u morimori Ai’.\f* hehen nanumene rakan lere alam man horu eni. 
\p  
\v 13 Timotius, masala kerkere wanakuku ya a'ala ki o eni. Ainu'u wanakuku ma namlolo onne namwali panaeku man kuku kalla ki o. Ma'alapa o akin leke namkene naili'il Yesus la maramyaka ri namehin, ono Yesus Kristus du'ul kaliyedi ika leke koro Ai kamwali mahaku me'e.  
\v 14 Modi Roh Kudus Nin molollo man minle ik honorok akin, madiyaka hahaa man Makromod Lalap nanala ki o wawa'an, la yono hurinohi ri namehin herre. 
\p  
\v 15 O mauroinedi me'e nahenia ri man min lolo propinsi Asia na'akeme ramhenedi ya'u me'e, Figelus noro Hermoganes haenhi.  
\v 16-18 Maa, Onesiforus onne, lere romromo an mai na'alapa ya akin lolo bui raram. Ai ka nawawa de man ka'ara'u. An rakan mai Roma, ai nahehe nanoin ya'u hehen nanumene am pakromedi. Enla o, Timotius, mehe mauroinedi me'e nahenia an paku ya'u nammori lere ya'u minle Epesus makun. Ende ya apanak Makromod Lalap nodi nala nina nakar raram na'akeme, la na'amoli An kukul Nin aki man wa'an Onesiforus rakan lere alam An ho'ok kail ri mormori na'akeme. 
\c 2  
\s1 Lernohi Yesus Nin honoli wenewhe 
\p  
\v 1 Enpenia ya an'u, Timotius, ma'alapa o akim leke mamkene howok num honowok eni, ono Makromod Yesus Kristus nala Nin rere'e haharu ki o.  
\v 2 Nonolu om dernedi ainu'u wanakuku rahu eni lolo ri nammori kalarna me'e. Ende modi wanakuku onne wakuku wawa'an ri man o akin nale, ono mauroin rira woroin noknokor la hi ramkene wakuku ri namehin wali'ur.  
\v 3 Om hi'i wewhe Yesus Kristus Nina honowok naise ke'urauk man wa'an, de moro mayai mamkene kerhu wewerek pananaka.  
\v 4 Nadedem ma nasala ke'urauk tolle mehe ke'urauk nin honowok leke nahuwa'an nin uluwakun akin, ka nodi honowok namehin na'uwali.  
\v 5 Lolo na'aroromo ida, ma na'aromo lernohi na'aroromo onne la'an, kalo'o rakan ra'ohikuli na'aroromo ennen, kar lernala haida-haida.  
\v 6 Enla ri man howok Makromod Nin honowok naho'ok naise man howok kirna ida. Lo'o ai nampe'el howok kirna rakan nina yare, ai peni dedesne man lernala kirne raramne.  
\v 7 Loi honorok wawa'an ainu'u wanakunu eni. Makromod lo'o hari i wal'u honorok akin leke mauroin ha wo'ira enihe. 
\p  
\v 8 Horhorok Yesus Kristus, Daud Upun Anan onne. An makiyedi, maa Makromod Lalap na'amori wali'ur. Panaeku eniyeni namwali Lira Wawa'an ya aderre adaul laa ri.  
\v 9 Onne penia rin kela'u, dasle, rala laa bui raram naise ri man ailanna, maa Makromod Lalap kan huri ri mahaku dasle Lirna Wawan, de raderre radaul mamani.  
\v 10 Enpenia ya amkene a'uwara wewerek pananaka onne na'akeme. Kade rin hi'i susa'u, maa ya aderre adaul Makromod Lirna Wawan eni leke ri man Makromod Lalap niliyedi namwali Nin ri me'e, hir lernala or'ori dardari ma kan horu, la kokala morimori man ma'aruru wake'e ma kan horu, ono hi roro Yesus Kristus radinu'ul rakinaliyedi me'e. 
\p  
\v 11 Wanakunu ma namlolo ida na'aheni, 
\q1 “Lo'o ik koro Ai makiyedi wewerre, 
\q2 ik koro Ai mori wali'ur haenhi. 
\q1  
\v 12 Lo'o ik kamkene ka'uwara wewerek pananaka, 
\q2 ik koro Ai kodi molollo haenhi, 
\q1 maa lo'o ka'aheni ka kauroin Ai, 
\q2 Ai lo'o na'aheni ka nauroin ika haenhi. 
\q1  
\v 13 Kade ik ka kamkene lernohie, 
\q2 maa Ai namkene leluwai makrana ika mamani, 
\q2 ono inhawe man An nou, Ai namkene hi'i lernohi Nin nou.” 
\s1 Kamwali man howok wawa'an 
\p  
\v 14 Timotius, ma'ori honorok hi ha onneni na'akeme, la lolo Makromod Lalap kalarna nounaku hi nahenia yono hi ida ma nasesi noro ida lolo agame lirna la'an, ono panaeku onne kan min haida, la hi'i man derne nakani enihe akin ka namkene naili'il Yesus.  
\v 15 Mahehe leke om loikaru wanakunu ma namlolo modi aki man mou. Howok num honowok wawa'an leke rakan lere makpali Makromod Lalap yon mawawa. Rakan lere onne Ai lo'o na'aheni ki o, “O mamwaliyedi Ainu'u man howok man wa'an me'e.”  
\v 16 Yono derne makani ri ma nodi wanakunu ma kan min haida la kan horhawa Makromod Lalap, ono hirira wanakunu onne hi'i ri eren nako'u Ai.  
\v 17 Hirira wanakuku onne naisa pekpeken yaka man pelek nano'onyaka ri raram. Himeneus noro Piletus rodi wanakuku onne wakuku ri haenhi.  
\v 18 Woro'ohe kar lolo kalla ma namlolo me'e. Hir wakuku poho ma nahenia lere ri na'akeme man makiyedi la mori wali'ur onne namwaliyedi me'e. Ende hir hi'i ri heruwali mehe kakaiyedi, akinhe ka namkene naili'il Yesus me'e.  
\v 19 Maa Makromod Lalap Nin waku na'a'ar man Ai na'akenedi me'e aile, la waku na'a'ar onne namkene la ka nawollo wake'e. Lolo waku onne horok aile, 
\q1 “Makromod Lalap nauroiroin inhoi ma namwali Nin pipi unulu wawi tanma'a,” 
\m la, 
\q1 “Inhoi na'aheni ai namwali Makromod Nin ri, ai onne namhene hi'i hini'i man yak me'e.” \x * \xo 2:19 \xt Bil. 16:5\x* 
\p  
\v 20 Lolo nakar lapa ida raramne, hahaa warna-warna aile. Hahaa man wa'an aile rodi maha noro pire hi'ie, la hahaa ma nadedem aile rodi au noro elimo'o hi'ie haenhi. Peina'a mai mene hir nair hahaa man wa'an onne, maa hahaa ma nadedem onne hir nair akilere.  
\v 21 Ri ma na'amou honorok akin nano panaeku yakyaka rahu eni namwali naisa hahaa wawa'an onne man Makromod Lalap raram nodi nair hi'i panaeku man wa'an. Enla hi ramkene howok honowok man wa'an na'akeme. 
\p  
\v 22 Ende, Timotius, ya'u nounaku o mahaledi o kemen nano panaeku man morso ma nadedem ri man mamai wawan hi'ie. Mahehe mori lernohi Makromod Lalap Nina panaeku mehe. Ma'alapa o akin leke namkene naili'il Ai, la maramyaka minim ri mormori wali. Holi moiliwi mahuwele moro ri ma nodi akin moumou hi'i lir napanak laa Makromod Lalap. 
\p  
\v 23 Ya aheni wali'ur, yon mawalha lira noro ri man wakuku ha ma kan min haida. Ik peinohi rira panaeku podo onne peni hi'i ik kasesi ka'ara.  
\v 24 Ri ma namwali Makromod Lalap Nin man hopon yono rasesi, yon rodi lir apipinha wakuku ri, maa wakuku ri na'akeme rodi lir mamamal,  
\v 25 la yon rodi lir apipinha wakuku ri ma na'okul o. Enleke lo'o Makromod Lalap raram nodi nala leken hi herre rir honorok panaeku la rauroin wanakuku ma namlolo. 
\p  
\v 26 Hi'i heheni leke hi rahinorok wali'ur, la hi rahinuriyedi nano Hayakyak Makromon nina molollo man kern dalha hi lernohi nin panaeku. 
\c 3  
\s1 Honoli wenewhe ma namwali lere alam man horu 
\p  
\v 1 Horhorok eniyeni: Rakan lere alam man horu lo'o sus nammori aile.  
\v 2 Lere onne ri nammori ilitolle kemen mehe, maki kupan, holi kukulu lalapa, la mehe ra'uli kemen. Hi raram nodi hadwei hadwokor ri, kar horhawa rira ri leleher, ka rauroin rapanak trimkasi, la kar peinohi Makromod Lalap.  
\v 3 Hi lo'o ka rauroin raramyaka rira ri mormori wali, kar suk rala ampun ri, hir wakunu rano'onyaka ri, ka radiyaka kemen de pelek hi'i ha yakyaka, hi raram nodi rodi rurilai hi'i ha man ailanna, la kar suk ha man wa'an.  
\v 4 Hi raram nodi koklira rira ri orwali, hir pelek hi'i haida ka rodi honorok man wa'an, la holi kukulu lalapa rehi. Hi lo'o raram nodi noho wawan nina ha man ma'aruru narehiyedi Makromod Lalap.  
\v 5 Hir kokme'e hi'i ha man wa'an leke rin po'on rauroin hir lernohi Makromod Lalap Nin honorok panaeku, maa hi ra'okuledi Nin molollo man herre ri akin. Ende yon ma'urani ri ma naisa onne.  
\v 6 Hi heruwali laa maeke ma akin ka naili'il wawa'an rir nakar leke wukupoho hi. Maeke onne rira dohohala nammori, la rira monmono kamanne nammori nodi molollo hi, de peleke lernohi rir wanakuku ma ka namlolo.  
\v 7 Maeke onnenihe raram nodi derne wanakuku worworu mamani, maa hi ka rauroin wanakuku ma namlolo. 
\p  
\v 8 Meser ma napoho onnenihe, rira honorok panaeku yakedi me'e, la hi akin ka naili'il Yesus. Hir kawala wanakuku ma namlolo naise nonolu eni Yanes noro Yambres kawala Musa.  
\v 9 Maa ka nalo'olala ri na'akeme rauroinedi rira poho, de kar lernala leken nalo'ol kawala ri me'e, naisa Yanes noro Yambres\f + \fr 3:9 \ft Nonolu eni Yanes noro Yambres min Mesir la ramwali Firaun nin man howok ma nodi rira sulap na'okul nabi Musa. \f* haenhi. 
\s1 Paulus nounaku Timotius wakuku Horok Lap Lirna La'an leke namkene lernohie 
\p  
\v 10 Maa Timotius, o mauroin kokkoo ainu'u wanakuku, ainu'u morimori, noro ainu'u panaeku. Mehem do'onedi hi'ihehewi ya akin naili'il Makromod Yesus, la ya aramyaka ainu'u ri mormori wali. O mauroin hi'ihehewi ka'u peleke odi lir apipinha la ya akin namkene lolo wewerek pananaka.  
\v 11 Mehem do'onedi hi'ihehewi ya amkene lere i lernala wewerek pananaka rahu lolo Antiokhia, Ikonium noro Listra. Lere onne ya'u sus, maa Makromod huriyedi ya'u nano ha rahu ma namwali onne.  
\v 12 Memen ri ma nadinu'ul nakinaliyedi noro Makromod Yesus Kristus man raram nodi mori moumou dewdewe mamani, hir lernala wewerek pananaka.  
\v 13 Enimaa ri man ailanna noro man wukupoho ri, lo'o eren ailalanna. Hi mahar wukupoho ri namehin, la hi meher wukupohedi hi me'e. 
\p  
\v 14 Maa Timotius, masala kerkerhe wanakuku ma namlolo ya a'aledi ki o me'e. O mauroin wanakuku onne namlolo, ono mauroroin num meser enihe.  
\v 15 Horhorok, nano tatana o me'e de mauroinedi Horok Lap man moumou dewdewe Lirna me'e. Horok Lap onne nin molollo aile hari o honorok akim, leke o akim naili'il Makromod Yesus Kristus la lernala or'ori dardari ma kan horu.  
\v 16 Horok man minle Horok Lap raram na'akeme Makromod Lalap nala leke paku maika. Ik nair Horok Lapeni loikaru wanakuku ma namlolo, ka'okul wanakuku man sala, ka'alolo morimori man yaka, la wakuku ri mormori leke rir honoli wenewhe namdudu.  
\v 17 Horok Lapeni wakuku ik kamwali Makromod Lalap Nin man howok leke kamkene howok ha man wa'an na'akeme. 
\c 4  
\p  
\v 1 Rakan lere Makromod Yesus Kristus wali wali'ur mai noho wawan namwali Rai ma nodi molollo, An ho'ok kail ri man mormori noro man maki na'akeme. Ende ya apanak an'anhedi lolo Makromod Lalap noro Makromod Yesus Kristus kalarna, leke om  
\v 2 loikaru Makromod Lalap Lirna ri. Ma'akenkene o, alam wawa'an me alam yakyaka, loikaru Ai Lirna. Kukunohi hirira sala, la dadiyala hi leke yon hi'i wali'ur. Ma'alapa hi akin haenhi, la wakuku hi wawa'an modi lir mamamal,  
\v 3 ono lere man mai ri lo'o ramhene kokala wanakuku ma namlolo me'e, maa hir lernohi rir suk aimehi mamani, de hi ranoin meser nammori man wakuku wanakuku man hir derne ma'aruru, maa kan min haida.  
\v 4 Hi ramhene rakani panaeku ma namlolo, maa hi rakani koirwakar ma kan min haida.  
\v 5 Enpenia ya'u nounaku o, mahinorok memen lolo ha wo'ira ma namwali o leke hi'i ha man wa'an mamani. Mamkene ma'uwara wewerek pananaka, la maderre madaul Yesus Lirna Wawa'an eni laa ri ma kan derne makun, la ilitolle honowok na'akeme man Makromod Lalap nanala ki o eni. 
\s1 Paulus kukunohi nin makmaki na'uraniyedi me'e 
\p  
\v 6 Ya'u nounaku o heheni ono ka nalo'ol ka'u minle noho wawan me'e. Lere ya'u maki, ya aise honoi kanani rodi hoikani Makromod Lalap.  
\v 7 Ya'u howok Makromod Lalap Nin honowok wawa'anedi naise ma nasala ke'urauk man rehi ara. Ya'u hi'iyedi Ainin honowok na'akeme rakanedi honon me'e, la ya akin ka nado'o rakan lere eniyeni.  
\v 8 Lere eni ainu'u mahmaha kolkoli ihin ennen Makromod na'akenedi aile a'am raram me'e ono ya'u lernohiyedi Nin honorok panaeku. Rakan lere alam horu mene Ai nala ihin ennen onne maya'u. Lere alam onne Ai nodi hono'ok ma namdudu ho'ok kail ri na'akeme. Mahmaha kokoli ihin ennen onne ka nala maya'u mehe, maa nale ri na'akeme ma naramyaka Ai, la man weilapan Nin maimai noho wawan wali'ur. 
\s1 Paulus nin nou man horu laa Timotius 
\p  
\v 9 Timotius, pelek maiyala ya'u nanu.  
\v 10 Demas ka noro ya'u me'e, ono an horok rehi hahaa man aile noho wawan de nala'edi Tesalonika me'e. Kreskus laedi Galatia me'e, la Titus nala'edi Dalmatia.  
\v 11 Lukas mehe noro maya'u min mai eni. Om mai ne, maka'uk Markus moro mai wewerre, ono ai nauroin paku ya'u wawa'an lolo ainu'u honowok.  
\v 12 Ya'u hopon Tikhikus ki Epesus.  
\v 13 Om mai, modiyedi rain lapa nanaru man i hoikaruwedi lolo kota Troas aile Karpus nin nakar. Modi ainu'u horok lunlunne, la yon hamlinu ainu'u horok rodi ha mormori ulikn hihi'ie haenhi. 
\p  
\v 14-15 Timotius, madiyaka wawa'an ono Aleksander ma nauroin kuku pire wawa'an onne na'okul iknika wanakuku mamani. An hi'iyedi ha man ailanna nammori maya'u me'e. Na'amoli Makromod Lalap mehe walha nin hini'i onne. 
\p  
\v 16 Lere ya'u mehe odiyala i kem'u dedesne lolo hono'ok kanail onno, ri mahaku kan paku ya'u. Na'akeme huriyedi ya'u. Ya apanak Makromod Lalap yono nala sala onne hi ra'uwara.  
\v 17 Maa Makromod Yesus kan huri we'era'u. Ai nala ruri pe'el maya'u leke ya aderre adaul Yesus Lirna Wawa'an eni laa ri ma ka namwali Yahudi na'akeme leke hir derne, la An huriyedi ya'u nano ri man ken hukumesna'u.  
\v 18 Ya auroin Makromod Yesus Nin panaeku huri ya'u nano ha yakyaka na'akeme, la nodi ya'u wawa'anedi laa a'am raram, Nin molollo onno. Na'amoli ik ka'uli kasa'a Oin Naran laa ewi-ewi. Amin. 
\s1 Tape Masi 
\p  
\v 19 Mala ainu'u tape masi laa Priskila noro Akwila noro Onesiforus nin nakar raram.  
\v 20 Erastus namkene lolo Korintus, la Trofimus eni, ya'u hoikaruwedi lolo Miletus ono nakni'ir. 
\p  
\v 21 Paeku pelek maiyedi eni mene rakan noho rinrinne nin lere alam. Ebulus, Pudes, Linus noro Klaudia, hir aku tape masi mai ki o, roro ihin walin ma akin naili'il Yesus wewerre enihe na'akeme. 
\p  
\v 22 Na'amoli Makromod Yesus norle'ule'u norwaliwali o, Timotius. Enla na'amoli Ai nala Nin rere'e haharu ki i wal'u na'ahoruwedi. 
\cls Tape masi, 
\cls \sig Paulus\sig*