\id PHP PHP, 11 PHP, PHILIPPIANS, Kiriwina Bible, PNG, May 2010 8/11 
\h PILIPAI 
\mt1 Paulo La Ginigini Baisa  //  MINA PILIPAI 
\is1 Kabovitouula 
\ip Paulo eigini miyana Paulo La Ginigini Baisa Mina Pilipai kidamwa bikalawasi tomotala mapilana valu Pilipai olumoulela mapilana Masedonia. Baisa mina Roum eiyosisi ivigakaisi si valu. Paulo igini miyana tuta matutona isisu wa bwala katupipi. Paulo nanola imayuyu paila mimilisi towotetila Keriso isisilibodaisi matauna e deli mimilisi iuvitulokisi totapwaroru mapilana Pilipai, mitaga si vituloki gala duwosisia. Mokwita miyana ivituloki Paulo la ninamwau, mitaga gagabila bitagisi tuvaila la mwasawa deli kidamwa gala ininayuwa, e uula wala Paulo idubumi peula matauna Yesu Keriso. 
\ip Paulo magila bigini bigasi nokagutoki matausina totapwaroru mapilana Pilipai, paila makateki leikougugulasi si semakavi mani eiwitalaisi mwada bipilasaisi Paulo ola tuta mwau. E tuta matutona Paulo inokagutoki, tuvaila ikatululuti matausina, kidamwa bituvaluwasi e gala bininayuwasi paila Paulo la tuta mwau e deli osi tuta mwau titoulesi. Paulo inakaigali matausina kidamwa bimanumsi taitala baisa taitala, makawala Keriso Yesu la bubunela, e taga bivagaisi avaka metoya osi kayapila kaina paila ninasi walakaiwa. Paulo ikatululuwai mina Pilipai paila Keriso la vasosu, kidamwa bikatetasi uulela, baisa Yaubada eisemakavi la mitakwai e ikauwaisi paila uula si dubumi baisa Keriso, gala goli paila bikabikaulasi mina Yudia si Karaiwaga. E Paulo igini paila talaguva lula deli mwasawa avaka Yaubada isisaiki matausina availa availa eivasosusi deli Keriso. 
\ip Miyana leta gagabila bitagisi mimilakatila ammakawala totapwaroru si bubunela “biuwa vavagi makwaisina bwainawokuva wala avaka Yesu Keriso kalamwaleta gagabila bimai” (Pl 1.11). Makawala mwasawa, yebwaili, nona ninitinidesi, bubunela manum, e gala avai kaboninayuwa. Tuvaila gagabila bitagisi ammakawala Paulo saina iyebwaili toekalesia mapilana Pilipai. 
\iot Buki kala katumimisa 
\io1 Kala vitouula 1.1-11 
\io1 Paulo ikamituli titoulela 1.12-26 
\io1 Sibwabwaila paila Keriso la vasosu 1.27—2.18 
\io1 Timoti sola Epapiradaito 2.19-30 
\io1 Katululuwai paila tilaula deli kabosilagi 3.1—4.9 
\io1 Paulo deli sala mina Pilipai 4.10-20 
\io1 Kala vigimkovila 4.21-23 
\c 1  
\p  
\v 1 Yeigu Paulo sogu Timoti\f a \ft Matauna taitala Paulo sola deli kala topilasi eititavina deli matauna; kugisi VA 16.1-3.\f* yakama la towotetila Keriso Yesu. \x - \xo 1.1 \xt VA 16.12\x* 
\p E lakagini mi leta yokomi komwaidomi Yaubada la tomota mina Pilipai, yokomi kala todubumi Keriso Yesu, deli tokugwala ekalesia,\f b \ft Matausina si wotetila biyamataisi boda, makawala toyamata sipi biyamataisi mayuwona (kugisi VA 20.28; 1 Pt 2.25).\f* deli goli yokomi si towotetila.\f c \ft Matausina biwotitalaisi tokugwala ekalesia, kaina goli matausina si wotetila biyamataisi guguwa deli mani (kugisi VA 6.3; Rm 16.1; 1 Tm 3.8,12).\f* 
\p  
\v 2 Ma nigada baisa Yaubada Tamadasi deli da Guyausi Yesu Keriso kidamwa bimitukwaiyaimi e bitalaguva lupomi. 
\s1 Paulo inigada paila matausina 
\p  
\v 3 Avai tuta aluluwaimi anokagutoki baisa ulo Yaubada paila yokomi,  
\v 4 e avai tuta anigada baisa Yaubada paila komwaidomi anigada goli deli ulo mwasawa.  
\v 5 E uula goli yokomi okupilasaigusi paila la wotetila Bulogala Bwaina metoya okala vitouula e lagaila.  
\v 6 E baisa anikoli mokwita, Yaubada ivitouli ivagi baisa vavagi bwaina baisa olumoulemi, e bisaitaula bikatumkulovi igau okala vigimkovila ola Yam\f d \ft Tuta matutona Yaubada deli Keriso biyakali komwaidosi mina watanawa.\f* Keriso Yesu.  
\v 7 Tuta komwaidona asaiki bobonagu baisa yokomi. E mapaila baisa agu lumkola paila yokomi ibodi wala. Paila yokomi deli yeigu tapataisi wotetila makwaina saina walakaiwa, avaka Yaubada isakaigu. E isakaigu kidamwa bawotetila makawala baisa tuta ogu sisu wa bwala katupipi, makawala goli tuta matutona omitibogwa gala abani agu kwatupipi. Paila itagwala yeigu bakamitilaki matausina availa availa mwada biyogagaisi Bulogala Bwaina, kidamwa bidubumaisi mokwita e Bulogala Bwaina biyosikikitaisi oninasi.  
\v 8 E baisa agu lumkola saina yuviyavi paila yokomi baisa goli avaka Keriso Yesu titoulela ilumkoli paila yokomi. Yaubada inikoli akakamokwita. 
\p  
\v 9 E baisa makawala anigada baisa Yaubada paila yokomi. Anigada kidamwa mi yebwaili bisiniveka e deli goli kala katumkovila, kidamwa bukuyebwailisi metoya omi nikoli mokwita, deli mi naga biduwosisia.  
\v 10 Mapaila gagabila bukunagaisi makwaisina vavagi avaka saina bwainigaga. E ola Yam Keriso bukutotusi migileuwokuva e gala avaka isim kami pakula.  
\v 11 E yokomi mi bubunela duwosisia biuwa vavagi makwaisina bwainawokuva wala avaka Yesu Keriso kalamwaleta gagabila bimai. Kidamwa goli yokomi bukuvigakaimi kala katububula deli kala yakaula Yaubada. 
\s1 Paulo la momova uulela Keriso 
\p  
\v 12 E segwaia magigu bukunikolaisi avai vavagi isunapula baisa yeigu baisa tadokaisi gaga mitaga bogwa ipilasi Bulogala Bwaina kala siniveka.  
\v 13 E mapaila mina Roum si giyouveka kala toyausa\f e \ft Mabudona tokwabilia ola bwala mina Roum si giyouveka kasi karaiwaga biyamataisi guyau deli availa availa ola bwala katupipi (kugisi tuvaila Pl 4.22).\f* komwaidosi, deli komwaidosi tosisu mapilana valu bogwa iligimlilaisi kidamwa labani agu kwatupipi uula wala awotitali Keriso. \x - \xo 1.13 \xt VA 28.30\x* 
\v 14 E yeigu ulo sisu wa bwala katupipi baisa bogwa eivigaki bidubadu sedaiasi si kawopeula paila Guyau bisiniveka. E mapaila yam yam si tuvaluwa isisiniveka bikamitulaisi Bulogala Bwaina gala deli kokola. 
\p  
\v 15 Mokwita wala, mimilisi ikamitulaisi Keriso paila uula si pugipogi kaina si uvatai. Mitaga mimilisi ikamitulaisi Keriso paila uula si ninabwaila;  
\v 16 matausina si kamatula uulela yebwaili, paila inikolaisi kidamwa Yaubada bogwa isakaigu ulo wotetila lakamitilaki matausina mwada biyogagaisi Bulogala Bwaina.  
\v 17 E matausina si kamatula uulela gala bwaina, matausina goli bikamitulaisi Keriso gala metoya oninasi duwosisia, mitaga paila magisi si boda bitomgwagasi. Paila idokaisi biyomwauwaigusi baisa ogu tuta wa bwala katupipi.  
\v 18 E gala wala avaka. Yeigu saina mwamwasila nanogu paila makwaisina vavagi. Paila ikamitulaisi Keriso, e si kamatula uulela kaina doudoga kaina duwosisia. E mauula ammwasawa wala,  
\v 19 paila anikoli kidamwa bitanekwaigusi. E uula goli yokomi mi ninigada, deli pilasi makwaina metoya baisa la Baloma Yesu Keriso.  
\v 20 Paila magigu sainela deli ulo pikwaku mwada gala basaim ulo wotetila, mitaga tuta komwaidona deli goli baisa tuta batuvaluwa mokwita. Mapaila yeigu tomwaidogu bavigakaigu kala kamaiaba Keriso, kaina bamova goli kaina bakaliga.  
\v 21 Paila yeigu ulo momova uulela Keriso. E kidamwa bakaliga babani avaka saina bwainigaga.  
\v 22 Kidamwa basisu tomomova yeigu, kaina gagabila goli bakatumkulovi ulo wotetila bwaina. E kidamwa makawala, gala anikoli mokwita avaka ibodi banagi.  
\v 23 E saina magigu makadasina kadayu wala. Saina ayebwaili sainela kidamwa basilavi valu watanawa e basigaga deli Keriso. Baisa saina bwaina sainela.  
\v 24 Mitaga saina siligaga paila yokomi, kidamwa goli basisu tomomova yeigu.  
\v 25 E gala aninayuwa paila baisa, mapaila anikoli kidamwa basigaga baisa. E yokomi deli bitasisuaisi, kidamwa bakatumkulovi avaka kuuvagaisi paila tapwaroru, e deli bakatumkulovi mi mwasawa paila tapwaroru.  
\v 26 E ka, igau deli bitasisuaisi goli, e mapaila mi kamnomwana paila yeigu bisiniveka wala, paila uula Keriso Yesu la vasosu. 
\p  
\v 27 E baisa bitomgwaga. Ibodi wala mi bubunela bibudoki Bulogala Bwaina paila Keriso. E kaina gagabila bawa agisaimi kaina gala. Gala anikoli. Mitaga ibodi wala balagi kidamwa kutotusi peula ninami ninitinidesi wala, e kidamwa bukukwabiliasi gulitinidesi paila kala dubumi Bulogala Bwaina.  
\v 28 E taga bukukukolaisi kami tilaula. Tuta tuta bukutuvaluwasi, paila metoya baisa bigisaisi kidamwa matausina bimamasi e yokomi bukupeulasi. Paila uula Yaubada ivigakaimi bukutomgwagasi.  
\v 29 Paila yokomi bogwa isakaimi wotetila saina vakaigaga paila Keriso, kidamwa bukudubumaisi matauna, e tuvaila kidamwa bukulumkolaisi mmayuyu paila matauna.  
\v 30 Tuta baisa bukupilasaigusi bitakabiliasi deli. Paila baisa avaka lokugisaisi omitibogwa ulo kabilia, deli baisa avaka lokulagaisi tuta baisa akakabilia, makwaina kabilia kwaitala wala. \x - \xo 1.30 \xt VA 16.19-40\x* 
\c 2  
\s1 Keriso matauna Towalakaiwa, e la bubunela manum 
\p  
\v 1 E kaina Keriso la vasosu ikatupewolaimi? Kaina la yebwaili bivisimolaimi? Ki, bukukwabikuwolaisi deli Baloma Tobumaboma? Ki, bukulumkolaisi mitakwai deli nokapisi paila taitala baisa taitala?  
\v 2 Akatululutaimi paila bukuyomwasalaigusi bukunanamsasi makawala wala, bukuyebwailimi makawala wala, kami lumkola makawala wala, e komwaidomi bukuninitinidesisi goli.  
\v 3 Taga kuvagaisi avai vavagi metoya mi kayapila, kaina paila uula magimi bukukwaluvalovasi. Mitaga bukumanumsi taitala baisa taitala, e tuta komwaidona bukudokaisi semia ikalisauwaimi wala.  
\v 4 Deli bukuyamataisi avaka bipilasi taitala baisa taitala semia si kaisisu. Gala goli bukuyamataisi avaka bipilasi mi kaisisu titoulemi wala.  
\v 5 Ibodi bukuyosisi ninami makawala Keriso Yesu nanola. 
\q1  
\v 6 E tuta komwaidona matauna Yesu eikuli Yaubada 
\q2 tomwaidona olumoulela titoulela. 
\q1 Mitaga matauna gala inanamsa biyosikikiti mwada 
\q2 biyovitavatasi sola Yaubada. 
\q1  
\v 7 Kaimapula, iligaiwa la kaisisu walakaiwa, e iligabu titoulela, 
\q2 e matauna imila towotetila. 
\q1 Matauna imila tomota, e ikaloubusi migila makawala tomota. 
\q1  
\v 8 Matauna iyominum titoulela, e ililoula okedala 
\q2 kabikaula makadana bilokaia okaliga, 
\q2 e la kaliga baisa wa korosi. 
\q1  
\v 9 E baisa uula Yaubada ilupi matauna mapilana 
\q2 odabala walakaiwa sainela, 
\q2 e idoki yagala igaveka ikalisuwoli avai yegila tuwoli tuwoli. 
\q1  
\v 10 Kidamwa komwaidosi bikamiabaisi Yesu yagala, 
\q2 komwaidosi mina labuma, deli mina watanawa, 
\q2 deli goli matausina ovalu watanawa osikowala.\f f \ft Baisa si valu tomata.\f* 
\q1 Komwaidosi bikavaginasi, \x - \xo 2.10-11 \xt Ais 45.23\x* 
\q2  
\v 11 deli bikamitulaisi mimilakatila kidamwa Yesu Keriso matauna Guyau, 
\q1 baisa kala yakaula Yaubada Tamadasi. 
\s1 Bukuyuwoulasi oluwalaisi mina watanawa makawala utuyam 
\p  
\v 12 Mapaila segwaia mina mbwailigu yokomi. Tuta komwaidona lokukwabikuwolaigusi tutala tasisuaisi deli. Mitaga baisa tuta goli kala siligaga baisa yokomi kukwabikuwolaigusi tutala asikaduwonaku metoya baisa yokomi. E bukuvigimkulovaisi mi katumova titoulemi, deli kami kokola e mi tatuva.  
\v 13 Paila Yaubada tuta komwaidona ipupaisewa oninami, ivigakaimi totagwala deli tokwabikaula paila avaka magila. 
\p  
\v 14 Bukuvagaisi vavagi komwaidona gala deli tamapu kaina deli kominimani.  
\v 15 Kidamwa yokomi tobumaboma deli tomigileu bukusisuaisi baisa ovalu watanawa, yokomi goli Yaubada litula bwainigaga oluwalaisi toyodoudoga deli tommeikita. E ibodi bukuyuwoulasi\f g \fq \it ibodi bukuyuwoulasi.\it*\ft Gagabila bitagini, “yokomi kuiyuwoulasi”.\f* oluwalaisi matausina makawala utuyam ipipisisi walakaiwa, \x - \xo 2.15 \xt Kak 32.5\x* 
\v 16 e bukutugwalaisi baisa matausina bigala momova. Kidamwa bukuvagaisi makawala, bogwa bisim uula bakamnomwana paila yokomi ola Yam\f h \ft Kugisi Pl 1.6 kala katumiki.\f* Keriso. Paila baisa bikimitali kidamwa komwaidona ulo wotetila deli ulo paisewa gala wala ayomadaigu. 
\p  
\v 17 Kaina makateki goli buyavigu bibusi, e kaina makawala baligabu basemakavi omatala Yaubada, e bakatumkulovi mi dubumi la wotetila baisa matauna. E kidamwa makawala, yeigu bamwasawa e komwaidomi bukulumkolaisi ulo mwasawa.  
\v 18 E makawala goli yokomi deli, ibodaimi bukumwasawasi, e yeigu balumkoli mi mwasawa. 
\s1 Timoti deli Epapiradaito 
\p  
\v 19 Apikwaku baisa Guyau Yesu kidamwa makateki gagabila bawitali Timoti\f i \ft Kugisi Pl 1.1 kala katumiki.\f* biwokaiami, kidamwa bulogami biyomwasalaigu.  
\v 20 Mesinaku matauna Timoti wala kala lumkola makawala agu lumkola. Matauna wala gagabila binanamsa avaka bibodaimi.  
\v 21 Komwaidosi goli ininanamsasi paila titoulesi avaka iuvagaisi, e gala ininanamsasi paila uvagila Yesu Keriso.  
\v 22 Mapaila yokomi titoulemi kunikolaisi ammakawala mtona eikimitali kala bwaina. Paila matauna deli yeigu, makawala tau sola latula gulitinidesi kawotetila paila wala Bulogala Bwaina bisiniveka.  
\v 23 Mapaila apikwaku makateki bawitali matauna biwokaiami, igau goli avai tuta banikoli avai vavagi yeigu baboda.  
\v 24 Paila adubumi Guyau kidamwa yeigu titoulegu gagabila bananakwa bawokaiami. 
\p  
\v 25 E yeigu ladoki ibodi wala bawitali sodasi Epapiradaito\f j \ft Matauna eikeula semakavi makwaina mina Pilipai eisakaisi Paulo (kugisi Pl 4.18); e wa tuta matutona bikaimilavau mapilana Pilipai bikokeula si leta.\f* biwokaiami. E matauna eiwotetila deli eikabilia otaligu. E yokomi lokuvigakaisi matauna mi touwata e ipilasaigu.  
\v 26 E matauna saina magila bigisaimi komwaidomi e saina inokubukubu paila uula yokomi lokulagaisi kala katoula.  
\v 27 E mokwita eikatoula, e makateki bikaliga. Mitaga Yaubada bogwa inokapisi matauna, e gala inokapisi wala matauna mitaga yeigu tuvaila, mwada gala balumkoli nanogu kala mmayuyu sainela.  
\v 28 E yeigu asalau mwada bawitali matauna biwokaiami, kidamwa yokomi bukumwasawasi tuvaila avai tuta bukugisaisi matauna, e yeigu nanogu kala mmayuyu bitamwau wala.  
\v 29 E bukubodaisi matauna deli mi mwasawa, paila matauna sami metoya ola vasosu Guyau. Availa availa makawala matauna bukukwamiabaisi wala,  
\v 30 uula matauna ikasali titoulela la momova baisa katitaikina bikaliga, paila uula kala wotetila Keriso. Paila matauna magila wala bisakaigu pilasi makwaina avaka gala igagabila yokomi titoulemi bukusakaigusi. \fig Bukubodaisi … paila matauna sami|src="Vallotton 5000229" size="col" copy="receive him as a believer" ref="2.29" \fig* 
\c 3  
\s1 Mitukwaibwaila mokwita 
\p  
\v 1 E segwaia, baisa ulo biga kala vigimkovila. Bukumwasawasi paila uula Guyau. Kidamwa baisa tuta balivilivau avaka laginibogwi, yeigu adoki gala mwau, e biga mabigana bipilasaimi wala.  
\v 2 Bukuyamataimi paila matausina tobubuna gaga, kaina bitadoki minasina kaukwa,\f k \ft Paulo deli la ninamwau ikibuboti matausina tobwakuli Keriso mina Yudia availa availa ninasi mwada bisuninaisi matausina gala mina Yudia metoya osi vituloki doudoga kidamwa ikugwa bibobusi e oluvi gagabila bibokulaisi Keriso.\f* baisa goli matausina magisi wala bibobwaisi woula.  
\v 3 Paila matausina omitibogwa ikauwaisi Yaubada la kabutubogwa deli kala kabutuvatusi Bobu. Mitaga yakidasi takauwaisi Yaubada la kabutuvau. Mapaila ibodi bitadokaidasi Yaubada la tomota mina Bobutoula. Paila tatapwarorusi baisa Yaubada metoya baisa la Baloma, e tamwasawasi paila uula Keriso Yesu la vasosu. Yakidasi goli gala tadubumaisi avaka mina watanawa kasi gulogula.  
\v 4 Mitaga yeigu goli ammakawagu? Isim uula paila yeigu badubumi vavagi makwaisina. Kidamwa availa idoki gagabila bibani kala bwaina metoya okasi gulogula mina watanawa, e yeigu goli isim uula bakalisuwoli matauna.  
\v 5 Paila ogu yam kwailima kwaitolula\f l \ft Mina Yudia kasi gulogula pwapwawa bibobusi osi yam kwailima kwaitolula. Kugisi Lk 2.21.\f* ibobwaigusi. Yeigu guma Isireli tatougu metoya odalela Beniamina, e inagu viluwela Iberu tatoula wala. E tuvaila yeigu Parisi,\f m \ft Kugisi makasana Biga Kala Katumiki.\f* paila akabikuwoli mokwita ma Karaiwagasi mina Yudia. \x - \xo 3.5 \xt VA 23.6; 26.5; Rm 11.1\x* 
\v 6 E ka, tuvaila yeigu saina tosalau, paila alamidadi wala ekalesia. Tuvaila yeigu gala avaka pikolela wowogu, paila mina Yudia ma Karaiwagasi abokuli e mapaila idokaigusi toduwosisia wala. \x - \xo 3.6 \xt VA 8.3; 22.4; 26.9-11\x* 
\v 7 Komwaidona vavagi makwaisina omitibogwa adoki saina bipilasi ulo tapwaroru. Mitaga oluvi agisimlili kidamwa gala avaka kasi bwaina makwaisina, paila uula bogwa labani Keriso.  
\v 8 E gala vavagi makwaisina wala. Baisa tuta adoki vavagi komwaidona gala avaka kala bwaina, paila uula kwaitala vavagi wala itomgwaga. Baisa goli kala nikoli Keriso Yesu ulo Guyau. E vavagi komwaidona laligaiwa wala, e uula matauna. Ladoki komwaidona vavagi makwaisina wawa wala, kidamwaga bayosi Keriso,  
\v 9 e basividuli matauna. Gala tuvaila badokaigu tomitukwaibwaila paila uula akabikuwoli ma Karaiwagasi mina Yudia. Mitaga tuta baisa yeigu tomitukwaibwaila paila uula ladubumi Keriso. Mitukwaibwaila makwaina leima metoya baisa Yaubada, e uulela dubumi wala.  
\v 10 Magigu wala banikoli Keriso, deli balumkoli la movavau kwaipeuligaga. E kidamwa deli bakeula agu vilavila kala mmayuyu, mwada bakavisaki matauna, matauna goli leitugwali okaliga.  
\v 11 E yeigu ulo pikwaku kidamwa igau tutala kaliga yeigu baboda movavau. 
\s1 Sakauligigibula kaimatala 
\p  
\v 12 E gala goli mwada bakamituli kidamwa bogwa lapeula paila baisa, kaina bwainigaga wala yeigu. Mitaga apupwaitukula wala bavigikoni mwada bayosivigasi, paila uula Keriso Yesu bogwa iyosivigasaigu.  
\v 13 Mapaila segwaia gala adoki mokwita mwada bogwa lasakaila. Mitaga kwaitala vavagi wala avagi. Bogwa lalumwelavi avaka otuboulogu, e saina apupwaitukula avaka omatagu mwada basakaila.  
\v 14 Mauula baisa, basakauligigibula yeigu kaimatala, e bakau agu mapu, paila goli Yaubada bidouwaigu bala walakaiwa paila uula Keriso Yesu la vasosu. \fig Basakauligigibula e bakau agu mapu|src="Vallotton 5000314" size="col" copy="run towards the goal" ref="3.14" \fig* 
\p  
\v 15 E komwaidodasi yakidasi bwainawokuva oda tapwarorusi ibodi bitananamsasi makawala baisa. Ilagoli, kidamwa mimilimi yokomi tuwoli mi nanamsa, e igau Yaubada bikatumigileu baisa yokomi.  
\v 16 Desi wala. Ibodaidasi bitasaitaulasi kidamwa bitabokulaisi avaka ivitulokaidasi metoya wa tuta ikugwa e leima lagaila. 
\p  
\v 17 Kukwavisakaigusi yokomi segwaia komwaidomi. Kasailisi kabogigisa bwaina omitami, mapaila yokomi kugisimlilaisi matausina availa availa ibokulaisi makawala. \x - \xo 3.17 \xt 1 Kr 4.16; 11.1\x* 
\v 18 Bogwa lalukibogwaimi baisa, tuta bidubadu, deli tuta baisa lalivilivau wala toyo mitilagigu. Baisa saina bidubadu tomota si bubunela ivigaki matausina kala tilaula Keriso la kaliga wa korosi.  
\v 19 Ilagoli matausina bibodasi wala Eli. Avaka uwosi magisi ivigakaisi si yaubada. Ikamnomwanasi paila vavagi makwaisina avaka ibodi bimmosilasi wala, e inanamsasi wala paila uvagila valu watanawa.  
\v 20 Mitaga yakidasi da valusi labuma, e deli ninadaisi kala salau tatulotulasi paila kada Tokwatumovasi bima metoya wa labuma, matauna Guyau Yesu Keriso.  
\v 21 Bikatumapu woulela valu watanawa bitadavilasi makawala wowola matauna kala guyugwayu metoya ola peula goli. Metoya peula makwaina gagabila wala bikaraiwogi vavagi komwaidona. 
\c 4  
\s1 Paulo iluki matausina mimilisi vavagi 
\p  
\v 1 E segwaia, saina mina mbwailigu yokomi e saina agu mitukuvivia magigu wala bagisaimi. Paila saina kuyomwasalaigusi e akamnomwanaimi sainela. E tombwailigu yokomi, baisa makawala bukutotusi peula paila yokomi Guyau la tomota. 
\p  
\v 2 Vivilʹo! Yuwodia som Sinitiki, amnabaimi bukumwasilasi makawala yokomi kukwalubailasi baisa da Guyausi.  
\v 3 Deli yoku, kalogu, magigu yoku bukupilasi minasina nakukugwa paila tapwaroru. Paila minasina deli kapupaisewasi paila Bulogala Bwaina, deli Kelemeti deli goli komwaidosi matausina deli kapaisewasi, komwaidosi yagasi isisu baisa Yaubada, tommomova osi buki. 
\p  
\v 4 Bukumwasawasi tuta komwaidona paila yokomi Guyau la tomota. E lalivilivau, bukumwasawasi. 
\p  
\v 5 Bukummanumsi baisa komwaidosi. E Guyau iga makateki bima.  
\v 6 Taga bukunokubukubusi paila avai vavagi. Mitaga avai tuta kunigadasi, bukunigadaisi Yaubada paila avaka ibodaimi, e tuta komwaidona bukunigadasi baisa matauna deli mi nokagutoki wala.  
\v 7 Paila Yaubada matauna goli manumtoula, e gala availa towatanawa gagabila bikateta baisa. E metoya ola manum bivigakaimi bitalaguva lupomi deli ninami biyominum, paila uula Keriso Yesu la vasosu. E mapaila gala avaka gagabila biyogagaimi. 
\p  
\v 8 E segwaia, baisa ulo biga kala vigimkovila. Ibodaimi bikau ninami makwaisina vavagi bwaina avaka ibodi bukuyakawolaisi. E vavagi makwaisina uulesi kamokwita, tuvaluwa, duwosisia, migileu, migabwaila e bigabwaila.  
\v 9 Avaka avaka kuligalegasi deli kukwauwaisi metoya ogu vituloki, e avaka avaka kulagaisi deli kugisaisi metoya ogu bubunela, baisa goli bukuvagaisi. E matauna Yaubada iyominum ninami, e bisisu deli yokomi. 
\s1 Paulo inokagutoki paila si bobwailila 
\p  
\v 10 E yeigu saina amwasawa baisa ulo Guyau. Paila tuta kaduwonaku gala lokuwitalaisi avaka baisa yeigu. Mokwita goli bogwa kunanamsasi paila yeigu tuta kaduwonaku, ilagoli gala kubanaisi avai keda kidamwa bukuvagaisi avaka. Mitaga tuta baisa bogwa kubanaisi ammakawala bukupilasaigusi, kadai!  
\v 11 Gala alivala baisa paila adoki yokomi lokulumwelavaigusi. Paila bogwa ikabitutukwaigu kidamwa avaka asisii bogwa bibodaigu wala.  
\v 12 Bogwa akateta avaka bibodaigu kidamwa banamakava, deli avaka bibodaigu kidamwa bayosi guguwa bidubadu. Bogwa ikabitutukwaigu makwaina vavagi kwekikium, e kaina akomata kaina akamolu, e kaina ayosi bidubadu kaina ayosi pikekita wala, e desi wala, nanogu imwamwasila tuta komwaidona ambaisa ambaisa lasisu.  
\v 13 E yeigu isim ulo peula gagabila baboda vavagi komwaidona, paila uula peula makwaina avaka Keriso isakaigu. 
\p  
\v 14 E saina bwaina lokumitukwaiyaigusi paila lokupilasaigusi ogu tuta mwau.  
\v 15 Ka, kululuwaisi yam makwaisina lakavitouulasi\f n \ft Paulo ikatululuwai mina Pilipai paila tuta matutona eiviloubusibogwa baisa matausina.\f* kamatula Bulogala Bwaina. E tuta matutowena lasilavi Masedonia bogwala kunikolaisi kidamwa yokomi mina Pilipai kamimwaleta lokupilasaigusi e gala avai boda ekalesia tuvaila ivagi makawala. Paila yokomi kamimwaleta deli yeigu leitapaisewasi, paila lokusakaigusi bobwailila e mapaila yeigu lakau agu pilasi wala. \x - \xo 4.15-16 \xt 2 Kr 11.9\x* 
\v 16 E tuvaila avai tuta asisu mapilana Tesalonaika magigu pilasi, yokomi mimilisi tuta lokuwitalaisi avaka eimakaiagu wala. \x - \xo 4.16 \xt VA 17.1\x* 
\v 17 Gala magigu goli bakau semakavi, mitaga magigu uwami kala kwaiveka bikatumkulovi mi tapwaroru.  
\v 18 E yeigu bogwa labani komwaidona avaka ibodaigu metoya baisa yokomi deli goli kala katumkovila. Paila Epapiradaito\f o \ft Kugisi Pl 2.25 kala katumiki.\f* bogwa leimiakaigu komwaidona mi bobwailila, e baisa ibodaigu wala. Paila vavagi makwaisina makawala mi semakavi maiinela saina simasimina baisa Yaubada, kaina makawala mi lula saina ikau nanola deli iyomwasali matauna. \x - \xo 4.18 \xt Sun 29.18\x* 
\v 19 E ulo Yaubada goli bisakaimi komwaidona avaka bibodaimi. Paila matauna la mitakwai saina vakaigaga, paila uula Keriso Yesu.  
\v 20 Baisa da Yaubadasi Tamadasi kala yakaula gala biwokuva e bikanigaga. Emeni. 
\s1 Paulo italoi 
\p  
\v 21 E baisa tuta awitali kami biga bobwailila komwaidomi Yaubada la tomota, baisa yokomi Keriso Yesu la tomota. E tuvaila sedaiasi ogu valu baisa iwitalaisi si biga bobwailila biwokaiami.  
\v 22 E Yaubada la tomota komwaidosi baisa iwitalaisi si biga bobwailila, e deli goli makawala matausina la ula\f p \ft Matausina tokwabilia deli towotetila ola bwala giyouveka; kugisi Pl 1.13 deli kala katumiki.\f* mina Roum si Giyouveka. 
\p  
\v 23 Guyau Yesu Keriso la mitakwai bisikailimi komwaidomi.