\id 3JN - Kalo NT (dialect of Keapara) [khz] -Papua New Guinea 2005 (DBL 2014) 
\h 3 IOANE 
\toc1 Ioane gena talotalo vega-toitoina 
\toc2 3 Ioane 
\toc3 3Ioa 
\mt1 IOANE GENA TALOTALO VEGA-TOITOINA  
\imt1 3 Ioane vega-matagaina kilara  
\ip Ioane na epepa vega-toitoina ekalesia matiligana ta arana Gaius gena etaloato.  
\ip Epepa rigolo 85 e 100 vekarawarai Ioane na etaloato, Iesu ekwaregato mulinai.  
\ip Golea kamuna golea 5.  
\ip Ioane na epepa etaloato gena ririwa:  
\io1 1) Gaius pene vega-nagia, vowalakava reketa egapi-ragerato pakurai;  
\io1 2) Gaius pene vega-ripaa, vokaroverave talimana arana Dioterefe Ioane matotauna pene ago pene vepaku-koekoea netiwato;  
\io1 3) Demetrio gena kala namara pene gitara netiwato.  
\iot Ioane na epepa eveitaina enavugaato:  
\io1 1. Gaius evega-nagiato \ior (golea 1-8)\ior*  
\io1 2. Dioterefe ekilagi-rakavaato \ior (golea 9-11)\ior*  
\io1 3. Demetrio evega-rageato \ior (golea 12-14)\ior*  
\c 1  
\p
\v 1 Au, ekalesia kuneagina tauku, na gataku namana Gaius atalo-venimuna. Goi aulamagimuna maaoku maparana na.   
\p
\v 2 Gataku namamu, Palagu anogiana gau maparara okalarana nama pia vega-walara ulanana, e goi maki ragai vagi pene kala-nakulanakulamu, kwalana au ripaku goi palagumu nama, pe nama e verere aimo pono talu.  
\v 3 Walakava reketa gevogomaito, ne goi kila taunatauna raka okwalana-tiwaato e gemu veraramani gema varakuto. Voira akamonagirato aonai, au averere-rakavato.  
\v 4 Akamonagina, au natuku kila taunatauna gekwalanarana gaura, geku veagi e verere gekamu-rakavana. Gau reketa vererera okalana maki evangirana.   
\s1 Gaius gena inagulu gevega-rageato  
\p
\v 5 Gataku namamu, goi magemu veraramani einagulu okalaana aonai, kwalana walakava reketa geria lakalakai ogapi-ragerana, lewana ati ripamu talimara.  
\v 6 Ira na ekalesia wailarai goi gemu ulamagi gema kilagi-matagairato. Gemu kala mapono veakavara, pe geria lakalaka pia ago-venia Palagu gena ririwa rauparana gelegelenai.  
\v 7 Kwalana Keriso arana pakunai gelaka-piatito, e geria lakalakai ati ekalesia talimara geriana gau kwauta ati gegapi-rageato.  
\v 8 Ita na vovetaina talimara pita veakavara, kwalana vovetaina voo kila taunatauna valipiana pakunai pita inagulu-koukou.   
\s1 Dioterefe gena kala rakava  
\p
\v 9 Pepa kupana ta ekalesia goleana atalo-veniato, na Dioterefe pene vekuneagi netiwato talimana au rakagau akilagirana ati egapi-rageana.  
\v 10 Gaura pakurai au pana wati, ia na rakagau ekalarana kalara maparara pana wati kilagi-matagaira, kila rakavara ai gemai ekilagirana kilara e opakau kilara! Ati vokalamo, na walakava reketa gema wariwarina maki ati eririwana pene gapi-ragera. Vowariwari pene gapi-ragera netina ekalesiara maki evega-wairana e ekalesia na etao-piatirana.   
\s1 Demetrio gena kala nama  
\p
\v 11 Gataku namamu, rakava gekalana talimara ragai pono kala-tovotovora, na kala namaramo. Kala namara ekalana talimana Palagu gena talima, a kala rakavara ekalana talimana Palagu ati egitaato.   
\p
\v 12 Taunilimalima maparara gekilana, Demetrio talima namana negetina; Palagu gena kila taunatauna na maki evega-matagaiana talima namana. Ai na maki ia vovetaina gakilagiana, e goi ripamu, ai gema kila taunatauna.   
\s1 Kila ikara  
\p
\v 13 Au aririwana kila vogo para talo-venimi, na ati aririwana pepai pana talora.  
\v 14 Au geku tugamagi pana wati, pe taura ruala patara talu-vewaila vou patara kilakila.   
\p
\v 15 Maino gemu ai pene mia. Gatara eirana gevega-namamuna. Gatara kwapurakwapura nenai geku vevega-nama pono venira.