\id TIT Kasua 
\h Taitase 
\toc2 Taitase 
\toc1 Taitase 
\mt1 Taitase  
\is1 Solo Puwano Matanema:na:wa Wekeye  
\ip Sawi weyamowa Poleyewi Taitasema momate tiye selawapokeye. Taitase ewa Kiliki sena ela: eyawa Polewa seselakeye. Poleyewi Taitasema Kote sowa selapita: Taitaseyewi topukeye. Aputa: Polewa makene hanose Yelusaleme sitiwemi hapa ikila emiwa, Taitasewala siliye hapakeye. Aputa: ikila elipeiwemi Taitaseyewi Polewa sesema:na: Kolini taunewemi hapakeye. Ikila nowemi Poleyeliye Taitase a:ko: Kiliti hano olo:luwemi hanapola:, Kiliti sena kesaleyawa Yesuwa matanemita: se tiye mikeye. Se Tiye kinapola: kolotea elapepela: Poleyewi hano olo:lu amowa iya:pela: ha:na:na:nase Taitasema selese, “Kelesowemi pala sena kesale weyemi sita:newa, Keyewi pota: elatipa:,” au seyakeye. Alake sikape Taitaseyewi sena kesale amowa seli pota: epesita: Poleyewi Taitasewa seselese puka weyamowa momate tiye selawapokeye.  
\ip Yesuwa kuluwa tesile hanose hepene falemi hapawemi, yapene talo usulupe elipei itapa tepela:, Poleyewi puka we momateyakeye. Polewa Kolini taunewemi ela:, puka weyamowa Taitasema momate tiye selawapokeye.  
\iot Taitase Puka Weyamowa Takayawa Mouwa Wekeye  
\io1 1:1-4 Solo ma:ta: tiye momateyakeye.  
\io1 1:5-9 Koteyewi sena kesale amowa potapola: sita: tesene sena ta:pele tima:na:pela: iyewi alusewa potapola:, napolo takalese ta:peletiya:pa:.  
\io1 1:10-16 Mokopo walosene sena tepela: selesene senawa hekepa:.  
\io1 2:1-10 Kelesowemi pala sena tililayawala, kesale tililayawala, salayawala matane timita: Poleyewi se tiye mikeye.  
\io1 2:11-15 Koteyawa niwa seselanase niwa napolo sita:pesita: Koteyewi alusene amoke walosekeye.  
\io1 3:1-8 Seli sita:pesa:na: sowa wekeye.  
\io1 3:9-11 Kiyawa Kote sowa iya:pita: sena nokamoke sukulu tiye selapitekiwa kiyawa kapa:.  
\io1 3:12-15 Epama esa: momateyakeye.  
\c 1  
\s1 Poleyewi Taitasema Sawi Momate Tiye Selawapowa Wekeye  
\p
\v 1 Newa Poleyewi sawi weyamowa momate tiye selawatakeye. Neyawa Koteyewi tima:na: tisewa timita: newa ta:peyakeye. Yesuyewi alusewa walomita: newa apasolo walosene sena ta:peyakeye. Koteyewi ta:peya sena kesaleyawa Kotewalapulu hekeya matanemita: newa ta:pelepita: Neyewi kiwa seselese walokeye. Koteyewi heneye sowa iyewi sopoke matanemita: neyewi se tiye kinakeye. Heneye sowa ta:tapola: Koteyewi alusewa kulu hamonite neyewi kiwa seselese walokeye.  
\v 2 Alake Koteyewi se tiye miwa ta: tisene sena kesaleyawa matanese, “Niwa Kotewalapulu kao sita:pesena:keye,” aluse matanesekeye. Koteyewi Ene mokopo eta: selesemakeye. Puwano fa:nemi peleya: weyala meiki falala a timinima:na:no Kote Ene Ewemi pala sena kesalewa Ewalapulu kao sitalaposakeye. Aluse heneye seyakeye.  
\v 3 Selapola: apola: Ene matana emi ela: Eyewi ta:peya ikila emiwa, sowa Koteyewi Ene tima:na: tisene senama hokato waiyakeye. Waiyawa sena kesaleyawa ta:pita: tima:na: tisene sena kiyewi se tiye kina:pa:, au seyakeye. Aluse Ene sowa sena kesalema semita: newana ta:peyakeye. Newa ta:peya Kote amokiwa niwa heleye tisekeye.   
\p
\v 4 Taitase, kema neyewi sawi weyamowa momatekeye. Koteyewi se tiye miwa neyewi ta: ti epapuluse keyawala ta: tinase kewa neyewi sala epapulakeye. Kotewa niyewi Ni Atakeye. Aputa: Yesu Kelesowa niwamo mene silisene senakeye. A:tewi kewa mokopo seselesewana, kewa hopola epesita:, aumita: neyewi kulukulula:la:keye.   
\s1 Potapola: Sita: Tesene Senayewi Alusewa Wekeye  
\p
\v 5 Taitase, neyewi kewa Kiliti hano olo:luwemi iya:pela: newa ha:na:na:nase neyewi kema selese, “Na:tewi tima:na: tiwa eta: titimakeye. Alake kewa kemi ela: titiya:pa:. Koamesa: sopowemi Yesu Kelesowemi pala sena kesale pota: sita:pesa:na: senawa \f + \fr 1:5 \ft Pote sita: tesene senawa paseta sena akeye. \f* ta:pele tiya:pa:.” Aluse neyewi kema selapola: apola: newa minakeye.  
\v 6 Sena tilila piseiki ta:pele tima:na:wa weyamu sita:newa ta:pele tiya:pa:. Ketea sopowa potapola: takalepela: aluse ta:pele tiya:pa:. Sena kesale sikapo mane olokeyatela matiminisaleke ewa sena nowamoke eta: wepi selesemakeye. Aputa: ene kesalewa semetei tiyapola: ela:, ene kesale amowa matanepela: tesekeye. Aputa: ene salayawala Yesu sowa ta: tiyapola: sita:la:, apula: ene e sa:yawana kesale akoma:na: eta: selesema, apula: ene e la:wala sena eta: setelesema, apula: ene salawa sena kesale nowamoke eta: wepi selesema, apula: sala amokiwa eta: tikape telamake seli sita: tesene, sala amo inawa ta:pele tiya:pa:.   
\p
\v 7 Apula: sena tilila piseiki senayewi Kelesopela: Kelesowemi pala sena kesalewa pota: sita: tesekeye. \f + \fr 1:7 \ft Potapola: sita: tesene sena pawaya amunawa tikone senayewi alusewa akeye. \f* Tilila piseiki senayewi olokeyale matiminisaleke ewa eta: wepi selesemakeye. Alanase tilila piseiki sena aluse sita:la: sena ta:pelekamakiwa ililakeye. Eyewi ene ewa tiye eta: putamake sena nokamoke matanawana ta:tapola:, apula: ene kipila konomonamake, apula: ene hano olokeyatela nase eta: tesema, apula: sena nowa kipila eta: sanosema, apula: moweni sosolo tima:na:pela: eta: matanamake sita: tesene senawa ta:pele tiya:pa:.  
\v 8 Aputa: sena makene inapitekiwa nekanese siliyapola:, apula: nano ketea napolo sopolo matanese sita:la:, apula: seli matanepela: tima:na: tiya:sela: sita:la:, apula: mane olokeyatelawa takala:pela: Kotema matana semetei matanesewa tiye putupela: sita:la:, apula: tomayewi matanawa tiye sikapetapo himuyewi napolo matanesewa tiye putupela: sita:la:, epapuluse sita: tesene senawa ta:pele tiya:pa:.  
\v 9 Heneye sowa puwano ema se tiye miwa, ta: tiyapola: ela:, eyawa sena kesale nokamawa solo hekeyawa se tiye kinapola:, apula: tikape tesene sena kesalemawana hekeya:sela: se tiye kinapola:, aluse timinisene senawa ta:pelekamakiwa ililakeye.   
\p
\v 10 Koiyawemiye, sena kesale mutayewi heneye sowa tikapeye tipela:, iyewi ipitane mokopo sowa kele tiye mokopo selesekeye. Solo kele tiye apola: sena nokama sutuse selesekeye. Iyawa solo elewa “Kaka hekelesa: nana:pa:,” aluse solo elewa kulu hanose sena noka sukulu tiye selapitekiwa tikili tesekeye.  
\v 11 Alake iyawa mokopo sowa sema:pekise kiwa pota: sita: tesene senayawa iwa kapa:. Iyawa mokopo sowa se tiye mamiyapekeye. Alawamona mokopo sowa se tiye kinisekeye. Mokopo se tiye kinapita: koane semetei sita:ne sena kesale sala sopoyawa ta:tapola:, heneye sowa iya:tesekeye. Iya:tapita: potapola: moweni sosolo tima:na:pela: matanese mokopo sowa kinisekeye. Moweni sosolo tima:na:pela: mokopo sowa walosene sena tepela: se tiye kinise ewamapetakeye.   
\p
\v 12 Aputa: puwano Kiliti sepatosene sena unuwa sosolo elakamoke selese, “Kiliti senayewi i kene kemi mokopo sela:sela: sita: tesekeye. Ikayewi olokeyatela yekele tesene epapuluse yekele tesa: sita:la:, sena amoke sena nowa alusekeye. Iyawa ma:na: sosolo ma:na:pela: epeya kamona ma:na: nasewa tima:na:pela: iyawa tima:na: eta: tisemakeye. Mokopo tima:na:pela: matanesekeye.” Aluse sepapolakeye.  
\v 13 Ta:ta:pa:. Sena amoke seyawa heneye kalusekeye. Alanase mokopo seyawa Kelesowemi pala sena kesaleyawa ta: tima:pekise, iwa hekeya:sela: penanose walopa:. Kote solo henewa iyewi ta: tiyapola: penanose sita:pesita: keyawa seli walopa:.  
\v 14 Aputa: Yu sena tililayawa puwano fa:nemi aluse napokeye. Aluse solo henema sele minawa \f + \fr 1:14 \ft Puwano fa:nemi tesa:le walosene epapulakeye. \f* ta: tiyapa. Heneye solo tikape tesene sena amokiwa ipitane matana solo ele tuwapowa ta: tiyapa.   
\p
\v 15 Sena kesale seli sita:neyawa matanese ketea nowamokiwalao, ketea nakamokiwalao, nano ketea sopoke napolo sopolo telakeye, iyewi esa: matanesekeye. Alawamona, sena kesale olokeyale sita:neyawa iyewi Yesu Kelesowemi matana semetei eta: matanamake sita:neyawa matanese ketea sopoyawa iwa eta: napola: tesemakeye, aluse matanesekeye. Alake iyewi mane olokeyatelawa wekeye, ketea napowa wekeye, aluse takalese eta: matanesemakeye. Iyawa olokeyale timiya:sela: kemi, iwa eta: ewalosemakeye.  
\v 16 Iyewi selese, “Kotewa niyewi heneye matanekeye,” e seya kamona iyawa kao olokeyale timiya:sela: sita: tesekeye. Aputa: Kote sowa iyewi tikapeye tipela:, Koteyewi mapoya keteawa iyewi tiya:sela: sita: tesekeye. Iyawa napolo tima:na:pela: eta: matanesemakeye. Aluse tikape tesene sena kesaleyewi ketea napowa matanepela: eta: timinima:na: telamanakeye.   
\c 2  
\s1 Kelesowemi Pala Sena Kesale Amowa Weyamu Sita:latipa:  
\p
\v 1 Kiliti senayewi mokopo selapita: kemi, Taitase keyawa heneye sowa se tiye kina:pa:. Se tiye kinise nano ketea napolo tima:na: tisene se tiye kina:pa:.  
\v 2 Sena tililama weyamu se tiye kina:pa:. “Matana nanano tema:pekise hano olokeyatela muta napa. Ke unuwa napokeye, au semita: seli sita:latipa:. Aputa: seli matanepa:. Tomayewi matanawa tiye sikapetapo apola:, himuyewi seli takalese matanesewa tiye puwano apola: aluse sita:latipa:. Heneye sowa ta: tiyapola: matana semetei matanepa:. Kotewalapulu matana iliyewi matanepa:. Nano ketea hilila hetetiyapita: penanose matanepela: Kotewemi matanepa:.” Aluse sena tililama se tiye kina:pa:.   
\p
\v 3 Sena tililama se tiye mini epapuluse kesale tililamawana weyamu kaluse se tiye kina:pa:. Kotema matanepela: seli sitalatipa:. Aluse sita:la: sena kesale nowa wepi selapa. Hano olokeyatela muta kiwa sutapitekiwa, menise matanema:pekise penana:pela: sitalatipa:. Nano ketea napolo sopolo alusewa kiyawa napolo sopolo walose sitalatipa:.  
\v 4 Alake, kesale tilila, kiyawa kesale pola sena ekewa walopa:. Iyawa ili sena hapamawana, salamawana, himu hanose matanemita: se tiye kina:pa:.   
\p
\v 5 Kote sowa sena kesale nowamoke koloteya apoma:pekise kesale sena ekema weyamu se tiye kina:pa:. Tomaye matanawa olokeyale tima:na:pela: matanepitekiwa ta:ta: iya:pela: Kotema semetei matanepela: sitalatipa:. Kine ke senawanapulu kelipe ha:na:pa:. Sena nowanapulu mokopo hanapa. Kesaleyewi tima:na: tisewa mapoya tima:na: tise sitalatepa. Keyawa kine sena hapawala, kine sala amowana, kine koane semetei sita:newana seli matanepela: sesepa:. Ke sena hapayewi sowa tikapeye tiyapa. Aluse, Taitase, keyewi kesale tililama sela:pa:.   
\p
\v 6 Aluse, sena a sala toma matanawa tiye sikapetapo, ketea sopoke seli takalese matanepela: sita:latipa:, aluse se tiye kina:pa:.  
\v 7 Taitase, keyawala seli tipipilise matanepela: tiya:pa:. Keyewi nano ketea sopoke epe tiseya potapola: sena salayawala seli timita: keyawa seli tiya:pa:. Sena kesale nokamawa walose solo olokeyatelawa se tiye kinapa. Keyawa se tiye kinise, heneye sowa hekeya se tiye kina:pa:. Se tiye kina kamunuse kulu hanose tiya:pa:.  
\v 8 Heneye sowa se tiye kinapita: sena nowamoke kewa mawepi selaposakeye. Kewa seli ela: heneye sowa se tiye kinapita:, Kote solo mapoya senayewi niwa wepi selaposakeye elawamona, kewa seli enenase, iwa ilipe matanese hakulapesakeye.   
\p
\v 9 Aputa: keyewi mokopo tima:na: tisene senama weyamu sela:pa:. Kili yesila senayewi epelemita: e sowa ta:tapola: kulu hanose tiya:pa:. Kili yesila senayewi selapitekiwa ta:ta: iya:pela: sowa mene selapa.   
\p
\v 10 Kili yesila sena nano keteawa o:sulu atu tiyapa. Ikila sopoke seli sita:la:, tima:na: tisewa matana semetei tese tiya:sela: sita:latipa:. Toma mapolose tiya:sela: sitalatepa. Seli tiya:sela: sitalapitekiwa, sena nokamoke potose selese, “Mokopo tima:na: tisene senayawa Kote sowa ta: tiyapola: seli tiyatakeye.” Aluse selapita: potapola: niwamo heleye tisene Kotewa iyewi sosolo meapolaposakeye. Aluse mokopo tima:na: tisene senama se tiye kina:pa:.   
\s1 Yesuwa Mene Mina:na:wa Matanepela: Sita:la: Seli Hekeya Sita:latipa:  
\p
\v 11 Koiyawemiye, Koteyewi mokopo seselesewa hokato waiyakeye. Sena kesale sopowa mene silima:na:pela: Koteyewi Ene Yesu Kelesowa peleya: weyemi hamona seyakeye. Hamonapita: Yesuwa inise Koteyewi mokopo seselesewa waiyakeye.  
\v 12 Koteyewi mapoya keteawa niyewi iya:pita: Koteyewi mokopo seseleseyewi niwa se tiye kinisekeye. Aputa: peleya: weyemi toma matanawana elemita: hekelesekeye. Aputa: seli takalese matanesewa tiye puwano apolose, apula: hekeya tiye hamonite hekelesekeye. Ikila weyemiwa peleya: weyemi sita:la: mane olokeyale matanesewa takala:pela:, Koteyawa epelemita: tima:na: tisewa tiye puwano apolose aluse sita:pesita: hekelesekeye.  
\v 13 Alake Yesuwa mene mina:na:wa matanepela: yesi sita:nenase Koteyewi mokopo seseleseyewi niwa sesekeye. Yesu Kelesowa ho:liyawalapulu mene ina ikila emiwa epelese tima:na:pela: niwa yesi sitalakeye. Niwa heleye tisene sena Yesu Kelesowa nini Kote sosokeye.   
\p
\v 14 Niyewi mane olokeyale timiyawana, wa:ke olokeyale timinima:pekise Yesuyewi niwa mene silikeye. Mene silise, Yesu Ene Ewa niwamopela: kakasilise sana kumita: Ene tomawa mikeye. Eyewi sena kesale sopoke napola:tese, Eyewi Ene sena i amuna tese aluse sita:pesita: niwamopela: kakasilise kulukeye. Niyewi mane olokeyatela sopowa iya:pela:, napolo sopolo matanepela: sita:pesita: kakasilise kulukeye.   
\p
\v 15 Alake, mane napolo alusewa ikila sopoke sena kesalema keyawa se tiye kina:pa:. Solo we iyewi ta: timita: keyawa penanose se tiye kina:pa:. Solo we ta:tapola: tikapeye tipela: sita:ne sena kesalewa hekepa:. Kewa tima:na: timita: Koteyewi apoyanase keyawa sowa sena kesaleyewi tikape tekamakiwa eta: ilimanakeye. Keyewi se tiye epe kiniseya nowamoke kolotea meapolose tikapeye tiyapa. Aluse, Taitase, keyawa penanose se tiye kina:pa:.   
\c 3  
\s1 Koteyawa Kiwa Napola:penase, Kiyawa Sena Kesalewa Sesepa:  
\p
\v 1 Kelesowemi pala sena kesalema keyawa weyamu sela:pa:. Kamani senayewi sowala, kiwa pota: towaya senayewi sowala, kiyawa ta:ta:pa:. Tima:na: tisene napolo sopowa seli tima:na:pela: matanese sita:latipa:.  
\v 2 Sena kesale nowa wepi selapa. Sena kesale nowamoke solo amowa sano tiye toluye tise tafase selapa. Sena kesale sopoma matanese sesepa:. Sena kesale sopoma o:sulu hopola sita:latipa:. Aluse sena kesale sopoma se tiye kina:pa:.  
\v 3 Koiyawemiye, puwano niwa Kelesowemi seta: palama sita:newa kiyawa matanekeye. Puwano mane olokeyale timinisewa nini matanawemi hetetiyapita: niyawa tiye, apula: heneye sowa tikapeye tipela:, apula: sena nowamoke mokopo se tiye kinapita: niyawa topukeye. Aputa: tomayewi matanayawana, peleya: weyamo tima:na: tima:na:pela: epeleseyawana niwa pota: ela:, sena tipolo sela epesita:ya amunuse niwa sita:nekeye. Ikila sopoke niyawa sena nokamawa himu mapolose ikomoma:na:pela: matanepela: sita:nekeye. Aputa: niyewi matanese, “Ewa sosolo tese ela epapuluse newana aluse epesana,” esa: matanakeye. Sena kesale nokamoke niwa popa:na:wa mapolose, niyawana iwa popa:na:wa mapolose, aluse konomonose sita:nekeye.   
\p
\v 4 Puwano niwa epapuluse olokeyale sita:ne kamona niwa heleye tisene Koteyewi niwa hauwekilise, matanese seselese niwa mene silikeye.  
\v 5 Nini mane napolo hekeya timinisewa Eyewi eta: mene silimakeye. Eyewi niwa hauwekilise enenase mene silikeye. Nini olokeyatelawa Ene takalekepilise apola:, selakolosene epapuluse nini olokeyatelawa selakolose, sala kiaiya supeliwatesene epapuluse, niwa Eyewi Ene sena kesale amuna tese hili telakeye. Niwa seli sita:pesita: Ene Ho Napoyewi niwa hili telakeye.  
\v 6 Niwa mene silisene senawa Yesu Keleso Ene ekeye. Yesu Keleso emi tese Koteyewi Ho Napowa semetei semetei esa: niwanapulu epesita: hamona seyakeye. Hamona seyawa inapola: nini suwemi penanose tiya:sela: elakeye.  
\v 7 Koteyawa niwa hauwekilise Ene sikapo hekeya sita:pesita: Eyewi nima mokopo seselese hekeya:sela: apoyakeye. Aputa: Ni Atayewi Ene salawamopela: kokolo kao falelawa timita: epelese elakeye. Epelesa: ela epapuluse niwa Kotewalapulu kokolo kao sita:pesena:wa epelese yesi sitalakeye.  
\v 8 Alake solo weyamowa heneye sokeye. Kotewalapulu matana semetei matanesene sena kesalema solo weyamowa penanose se tiye kina:pa:. Ikila sopoke sena kesale noka mane napolo sopolo penanose timita: keyewi ima solo weyamowa se tiye kina:pa:. Neyewi se tiye miwa solo seli napokeye. Alake solo amoke sena kesalewa sesepesakeye.   
\p
\v 9 Alawamona, senayewi seli eta: matanamake tafase selapitekiwa ta:tapola: etala:pa:. Aputa: Yu senayewi tilila kouwa meiyewi maye mina sena unuwapowa mokopo selapita: ta:tapola: etala:pa:. Aputa: Moseseyewi solo ele sepapoyewi mouwa Yu sena tililayawa tafase kekelese selapitekiwa ta:tapola: hekeya:sela: iya:ta:pa:. Alake tafase konomonose sela emiwa niwa eta: seselamakeye. Sowa ta: tiyapola: niwa seli masitalaposakeye. Alake tafase selesewa iya:ta:pa:, aluse sela:pa:.  
\v 10 Aputa: sena kesaleyewi heneye sowa iya:pita: se tiye kina sena amowa keyawa hekepa:. E solo Keleso sena kesale noka sutiyapita: iyawa kulukulu koane iya:pela: hapakeye. Eyewi solo nowa kaluse se tiye kinisaleke, ikila elipei hekepa:. Hekepikasele eyawa kaluse tikapeye tipela: elaleke sena amowa heneye iya:ta:pa:.  
\v 11 Sena amokiwa heneye sowa fa:se iya: tese kaluse olokeyale se tiye kinise, ene mene isu olokeyatela emi hananakeye. Ene olokeyale timiya kamoke ene ewamona ikomokeye. Amowa keyawa kine matanekeye.   
\s1 Poleyewi Epama E Seyawa Wekeye  
\p
\v 12 Kewa ela Atemasewalao, Tikikasewalao neyewi hamonama:na:keye. Hamona seyawa kewa elakemi inapita: potapola: newa Nikapolosi taune enewemi, Taitase, kewa kipila ina:pa:. Yapene ikila potia tekemi, newa Nikapolosi taunewemi epesena:keye. Alake kewa ina:pa:.  
\v 13 Apolosewala, solo ele mou matanesene sena Sinasewala, a:ko: Kiliti hano olo:lu iya:pela: makene hanapitekiwa, elipei amowa keyawa penanose sesepa:. Makene ha:na:na:nase ketea nowa itapalapita: keyawa seselese kina:pa:.   
\p
\v 14 Aputa: ikila sopoke Kelesowemi pala sena kesaleyawa seli tisewa tiya:pa:, aluse sela:pa:. Sena kesale noka hepe tela sitalapitekiwa, iwa sesepa:, aluse sela:pa:. Kelesowemi pala sena kesale mokopo tekamakiwa eta: ilimanakeye.   
\p
\v 15 Sena sopolo newanapulu ninipe sita:neyawa kewa matanese ka:lo napolo selakeye. Kelesowemi pala sena kesale sopoke nima himu hapawa matanawa amopela: neyewi ima epama selakeye. Koteyewi kiwa sopoke mokopo sesemita: matanekeye.