\id EPH -Kube NT with Psalms [kgf] -Papua New Guinea 2012 (web 2017)
\ide UTF-8
\h Efeso
\toc1 Efeso
\toc2 Efeso
\toc3 Efs
\mt1 Efeso
\c 1
\s1 Yaiʒézé ac.
\p
\v 1 Anutuac ewa siŋiguc Kristo Yesuac Méliméli ic wawaŋa ni Paulonéŋ Efeso ama areŋa yandaiguc kecanʒu ic embac téréya ini ʒéma Kristo Yesuac qeriaiguc ic héla wamma ninʒéŋgéma kecanʒu onac muru kiwi yomi oénécmizua. 
\v 2 Anutu Maŋgocnina ʒéma Miŋ Kewunina Yesu Kristo iorac murunec ewa hia ʒéma luaenéŋ onac muru hemac.
\s1 Qeri uŋawac mozocya.
\p
\v 3 Mepé qepési wammini! Miŋ Kewunina Yesu Kristoac Maŋgocya Anutunéŋ Kristoac qeriaiguc qeri uŋawac mozoc kurumeŋ igucnec hahaya hénia hénia mozocgé nénécmiyec. 
\v 4 Waŋu eŋeya kiwaiguc ʒéma eŋeya ala siŋiguc, neŋaŋ téréyanec ʒéma solaŋanec kecbiŋ niŋac, baec kurumeŋ ménda ʒéyu hicŋiyecnec, Kristoac qeriaiguc gési nénécmiyec. 
\v 5 Gési nénécmima ewa hia nimma eŋeya ewa siŋiguc becaru niŋareŋgéyu heyec séc, Yesu Kristonéŋnec neŋaŋ eŋeya nambérac héra buŋa qenénécmiyec. 
\v 6 Imi mia siŋa nimmianʒac Yesu iwac qeriaiguc, iwac ewa hia edamuyaguc imi neŋaŋ muru boŋtegic eŋ nénécmiyec imi mepésimiwiŋ niŋac, imuhuc waŋ nénécmiyec. 
\v 7 Kristo iwac qeriaiguc mia, ewa hiaya kuaya qeqeya imuac séhaiguc, sacyanéŋ boŋ héré menénécmima képésicnina wai nénécmiyec. 
\v 8 Imi mia inéŋ niŋtegic qiŋtegic ʒéma niŋ asac asaria mocʒoŋnec neŋaŋ muru mesécgé nénécmiyec. 
\v 9 Imuhuc wamma ewa siŋa sasaŋgia, eŋeya ewa qeriaiguc niŋareŋgéyu heyec imuac séciguc, ewa hiawac ʒéau nénécmiyu qerininanéŋ ninʒiŋ. 
\v 10 Imi mia nalé niŋec imi ducŋiyu, iwawai kurumeŋiguc kekera ʒéma iwawai baeciguc kekera imi mocʒoŋ Kristoac qeriaiguc areŋhéra tuŋ momacguc wammac niŋac imuhuc waŋ nénécmiyec. 
\v 11 Iwawai mocʒoŋ ewa siŋa hezac séc waŋanʒac Anutu iwac ewa siŋ méndacma bec ʒétecgéyu heyec séciguc Kristoac qeriaiguc gési nénécmiyu iwac mératécac buŋa wamma kecanʒiŋ. 
\v 12 Imi mia Kristoac qeriaiguc walac walac mambéc keriŋac kecanʒiŋ neneŋ imi kecma tetecgiaiguc iwac edamuyawac mepé qepési héra wambiŋ niŋac imuhuc waŋ nénécmiyec. 
\v 13 Ini acguc iwac qeriaiguc ac héla, képésic igucnec aŋgéŋ titiac buŋa suruc hiabia imi nimma ninʒéŋgégic sisipac acwac Uŋa téréyanéŋnec eŋeya buŋawac asé kiwi meénécmiyec. 
\v 14 Waŋu Uŋa Téréya iminéŋ mia kurumeŋac mératécnina imuac sisipac acwac asé kiwiya wanʒac. Waŋu ic embac eliŋgé nénécmimia imi boŋ hérénina menénécmiyu eŋeya edamuya mepésimiwiŋ niŋac imuhuc waŋ nénécmiyec.
\s1 Pauloac ʒéwelec ac.
\p
\v 15 Hénia imuac niŋac ini Miŋ Kewunina Yesuac qeriaiguc ninʒéŋ ninʒéŋgina késakecʒu imuac suruc ʒéma ala siŋgina ic embac téréya ionac waŋ énécmianʒu imuac suruc imi ni acguc ʒégic nindari. 
\v 16 Imuac mia onac niŋ wamma ménda misimanec ewa hia ac ézéma ʒéwelecanʒua séc onac qacgina imi ʒéhicŋi mianʒua. 
\v 17 Miŋnina Yesu Kristoac Anutu, maŋgocnina edamuyaguc inéŋ mia niŋtegic qiŋtegic ʒéma ackuaʒéc ʒéauauya imuac qeri uŋa imi énécmiyu Anutuac hénia séha nintegicmu niŋac ʒéwelec waŋanʒua. 
\v 18 Waŋu ewa qeriginawac kiwa measari énécmiyu héniya némac niŋac unuruyu mambéc kecʒu imi ʒéma ic embac téréya sucginaiguc mératéc edamuyaguc dimuhucya kuaya qeqeya késa kecʒu imi niŋyacgému. 
\v 19 Waŋu iwac kuc yandaya ogicqogira ninʒéŋ ninʒéŋ ic neŋaŋ muru ai meanʒac iminéŋ kukuc duruc durucya eŋeŋa wanʒac imi niŋtegicmu niŋac ʒéwelecanʒua. 
\v 20 Waŋu Anutuac kuc yanda iminéŋ Yesu humuc igucnec meɋeliyec. Meɋelima wagicma kurumeŋiguc emma eŋeya méra héiyaiguc oporec. 
\v 21 Opocma qara imi meyaru ic kewuya kewuya ʒéma qac buŋa ʒéma kuc buŋa ʒéma galeŋ buŋa ʒéma qacgina hénia hénia baec yomuac naléiguc hezac imi sac qahac, néŋ ama baec hahaya hémbénaŋaiguc hezac imi mocʒoŋ onogicdarec. 
\v 22 Waŋu iwawai mocʒoŋ imi héna duandiaiguc haiyec. Haima Yesu imi iwawai mocʒoŋ onogicma hénaoriŋ neŋaŋ orucnina wammac niŋac oporec. 
\v 23 Waŋu hénaoriŋ neŋaŋ imi iwac héna méria\f + \fr 1:23 \fr*\ft Girik aciguc; Soma, neŋaŋ neŋaŋ aciguc séwiya.\ft*\f* wamma kecʒiŋ. Waŋu hénaoriŋ imi mia iwawai mocʒoŋ imuac qeriaiguc iwawai mocʒoŋ sécgé énécmianʒac iwac howiacnec wanʒiŋ.
\c 2
\s1 Humuc igucnec kekeciguc.
\p
\v 1 Waŋu ini wawaŋ meme biria ʒéma képésicgina imuac qeriaiguc humugic meɋeli énécmiyec. 
\v 2 Becnec imi ini haka biria imuhucyawac qeriaiguc tacyac wamma baec yomuac haka silic ʒéma Biria miŋina kurumeŋ bawa sawawac galeŋ memeac kuha késa kecʒac imi méndacma kecaŋgic. Waŋu deguc ac qeqe ic ionac sucginaiguc ai meanʒac uŋa biria iminéŋ mia Biria miŋina wanʒac. 
\v 3 Becnec imi neŋaŋ imuhucyanec sucginaiguc kecma séwininawac siŋ tohoma kecma séwinina ʒéma ewaninawac siŋanéŋ waŋ nénécmiyec séc waŋiŋ. Imuac ic tosara iniguc hénianina momacguc waŋu qeri biriawac buŋawac nambérac héra keriŋ. 
\v 4 Anutu wésé niniŋ kuneŋ yanda hemiyu neŋaŋ ala siŋ waŋ nénécmima ala siŋ yanda imuac niŋac wamma 
\v 5 képésic nina niŋac humuyiŋ neŋaŋ imi Kristo Yesuac qeriaiguc meɋeli nénécmiyec. (Ini imi ewa hiaya niŋac aŋgéŋnina tinénécmiyec.) 
\v 6 Neŋaŋ Yesuguc momacnec meɋeli nénécmima Kristo Yesuac qeriaiguc kurumeŋac kekeciguc i guc momacnec tacbiŋ niŋac nonoporec. 
\v 7 Imi mia Kristo Yesuac qeriaiguc wésé niniŋ waŋ nénécmima iwac ewa hiaya ogicqogira imi baec yomuac naléya hama emmac séc nénézéyu hémbiŋ niŋac imuhuc waŋ nénécmiyec. 
\v 8 Ini imi ninʒéŋgégic ewa hiaya niŋac aŋgéŋgina tiénécmiyec. Imuac niŋac imi mia onac murunec qahac, néŋ sese Anutuac murunec hahaya wanʒac. 
\v 9 Imi mia wawaŋ memenina igucnec qahac, imuac ic embac méŋnéŋ méŋ séwi eŋeŋ hia ménda wammac. 
\v 10 Neŋaŋ imi Kristo Yesuac qeriaiguc ai solaŋa mewiŋ niŋac Anutunéŋ menénécmiyec. Waŋu ai imuhuc geŋnec tima kembiŋ niŋac Anutunéŋ becnec niŋu heyec.
\s1 Kristoac qeriaiguc ewa momac wamma kecbiŋ.
\p
\v 11 Imuac niŋac ini yomuhuc niŋɋelimu; Becnec ini séwi tasé herichericgina qahac ic enia kecaŋgic. Imuac niŋac ic embac méraginanéŋ séwi taségina hericma séwi tasé hericheric ginaguc ʒéénéc mimiawac kecaŋgic ieneŋ onac niŋ séwi tasé herichericgina qahac ʒéénéc miaŋgic. 
\v 12 Nalé imuaru ini imi Kristo qahac séŋgaŋgeŋ kecaŋgic. Kecma Israelac héŋgaleŋ ama areŋa yanda imuacnec elicgé énécmimia wamma eŋacnec kecaŋgic. Waŋu ʒikiʒiki acwac sisipac ac imuac mia ic embac méréra tanec kecma niŋkinʒéŋgina qahac Anutugina qahac baeciguc kecaŋgic. 
\v 13 Waŋu deguc imi becnec lakec kecaŋgic ini Yesuac qeriaiguc Kristoac sacya niŋac Anutuac muru hosuru énépésima onoporu kecanʒu.
\p
\v 14 Kristo imi luaenina. Inéŋ sucninaiguc demiŋ elic elicgia naŋec imi iwac séwiya aunénécmima héʒéŋgéyu mayu tuŋ éréhécnéŋ momacguc waŋec. 
\v 15 Waŋu tuŋ éréhéc imi eŋeya qeriaiguc séwi momacguc ɋeliawac wamma luaeiguc kecmu niŋac eŋeya séwiya wai nénécmima ʒézé seli ac ʒéma pakeŋ ac ʒéma héna ac hénia hénia imuhucya imi néhélima haʒéc wamma kekec imi audarec. 
\v 16 Waŋu ic héŋgeŋa wéndara iminéŋnec tuŋ éréhéc imi séwi momacguc wamma Anutuguc ewa momac wammu niŋac imuac qahaiguc haʒéc niniŋ imi qeyu humuyec. 
\v 17 Waŋu mama hama lakec kecaŋgic ionac ʒéma hosuru kecaŋiŋ Yuda ic nonac momacnec luaeac buŋa neŋaŋ muru ʒéau nénécmiyec. 
\v 18 Imi mia iwac qeriaiguc ini ʒéma nini neŋawu Uŋa téréyawac qeriaiguc Maŋgocac muru kerembiŋ niŋac imuhuc waŋ nénécmiyec. 
\v 19 Imuac deguc muarunec, ini imi ic méréra me ic kiaŋ qahac, néŋ ic embac météré énécmimia i iniguc séc momac wamma Anutuac areŋhéra ʒéma héŋgaleŋ ama areŋa yanda imuac buŋahéra wamma kecʒu. 
\v 20 Ini imi Yesuac Méliméli ic ʒéma Anutuac tiliŋ tiliŋ ic ionac qambaŋa imuac qahaiguc kumu énécmimia. Kristo Yesu eŋeyaoc imi ama imuac waŋgoŋaiguc hoc qambaŋa waŋecac kecʒac. 
\v 21 Iwac qahaiguc sécna sécga momacnec toroqema enni ama imi mocʒoŋ Miŋ Kewuninawac qeriaiguc ocmuŋ téréya wamma yandima eŋanʒac. 
\v 22 Ini acguc Uŋa téréyawac qeriaiguc ocmuŋ téréya Anutunéŋ tacyac wawaŋa wammac niŋ Yesuac qeriaiguc momacnec toroqe énécmiyu eŋanʒac.
\c 3
\s1 Paulonéŋ ic enia ionac niŋac wamma ai meyec.
\p
\v 1 Waŋu Paulo ni ac ʒéma mazua hénia imuac niŋac ic enia onac niŋac wamma Kristo Yesuac hésa ic wamma kecanʒua. 
\v 2 Waŋu ama imuac weleŋ qeqe ai imi Anutunéŋ onac niŋ wamma goi héihéiyawac niŋac wamma nuac néŋec imi ini hélacnec bec niŋgic gezaŋ. 
\v 3 Waŋu usuya auma ac saŋa imi nézéyu niŋasariyi suruc imuac imi bec ʒékaŋ ʒékaŋ wamma oénécmiyi. 
\v 4 Ini kiwi imi olommuiguc Kristoac hénia saŋa niŋtegiri imi ini acguc niŋtegicmu. 
\v 5 Ac saŋa imi deguc Yesuac méliméli ic téréya ʒéma Anutuac tiliŋ tiliŋ ic ionac muru Uŋa téréyanéŋ ʒéhicŋi énécmiyec ésécnec becaru imi hicŋisai nalé tosaraiguc imi ic onac naŋhéra méŋac méŋ imuhuc ménda ʒéhicŋi énécmiyu niŋgic. 
\v 6 Imi mia ic enia eneŋ buŋa suruc hiabia imuaru toroqema Kristo Yesuac qeriaiguc sisipac acya imi momacnec mératéc mema neŋawu momacnec séwi momacguc wamma kecʒiŋ. 
\v 7 Waŋu Anutuac goi héihéia niŋac ai memeac sese mihicŋi néŋu, imuac kuhanéŋ nuaru ai meanʒac séciguc buŋa suruc hiabia imuac ai icya wamma kecʒua. 
\v 8 Buŋa suruc hiabia, Kristoac mériaŋ yanda oloŋ oloŋawac séc qahac imi ic enia énézémaŋ niŋac ic embac téréya ionac sucginaiguc maqeqeya téŋgéŋ tosara onogicma mamaya kecanʒua nidac imuhucyawac goi héihéiyawac buŋa qenéŋec. 
\v 9 Imi mia iwawai mocʒoŋ ʒéhicŋiyec Anutu iwac qeriaiguc nalé hénihénia qahac imuarunec musaŋ musaŋgiawac niŋu heyec ai areŋa imuac héla imi dimuhucya wanʒac imi ʒéasari énécmimaŋ niŋac imuhuc wannéŋec. 
\v 10-11 Imi mia nalé hénihénia qahac imuarunec Anutunéŋ Miŋ Kewunina Kristo Yesuac qeriaiguc niŋareŋgéyu heyec imi méndacma degucmi Yesuac hénaoriŋ héra neŋaocnec Anutuac niŋtegic qiŋtegic hénia hénia imi mewininini kurumeŋiguc kua meme uŋa qac buŋaginaguc ʒéma kuc buŋaginaguc ieneŋ hénia imi héŋtegicmu niŋac imuhuc waŋec. 
\v 12 Neŋaŋ imi Yesuac qeriaiguc i ninʒéŋgéma imuacnec mia bac yandi yandi qahac Anutu hosucgé mimiawac héna mihicŋima kecʒiŋ. 
\v 13 Imuac ʒéwelec énécmizua. Onac niŋ wamma qenʒeŋ manʒeŋ hénia hénia mihicŋima kecanʒua imuac mia ewagina ménda mamac, néŋ niŋgic edamuginaguc wammac.
\s1 Kiwi yomi olommu ionac niŋac wamma ʒéwelerec.
\p
\v 14 \vp 14a\vp* Hénia imuac niŋac 
\v 15 baec kurumeŋiguc ic embac hénia hénia kecʒu ionac qacgina mihicŋi énécmiyec.\f + \fr 3:15 \fr*\ft Ac yomuac hénia imi; Inéŋ momac yanda neŋaŋ Maŋgocnina.\ft*\f* \vp 14b\vp* Maŋgocnina iwac muru ni simiŋna héimima yomuhuc ʒéwelec mizua; 
\v 16 Inéŋ waŋu, iwac edamuya kuaya qeqeya séciguc Uŋa téréyanéŋ onac qeri icgina imi kuhanéŋ meseli énécmimac. 
\v 17 Meseliyu ninʒéŋgégic Kristonéŋ onac ewa qeriginaiguc kecénécmiyu eneŋ imi goi héihéi imuac qeriaiguc gété ʒaligina meyu nammu. 
\v 18 Namma seligima météré énécmimia mocʒoŋ yanda iniguc momacnec Kristoac goi héihéiya imuac hilaŋaya ʒéma horuaya ʒéma hiŋgac hiŋgaraya ʒéma eŋeŋaya imi séha niŋtegicmu. 
\v 19 Waŋu Kristoac siŋ sorocya imi baec ic ionac niniŋ ninanéŋ olommuac séc qahac, waŋu ini imi niŋasarimu niŋac ʒéwelecanʒua. Niŋasarigic Anutuaru qeriawac mériaŋ kuaya qeqeya hezac iminéŋ onac muru kuaya qesalecgéma hemac ʒéma ʒéwelecanʒua.
\p
\v 20 Kuha yandanéŋ neŋaŋ muru ai meanʒac imuac séciguc, iwawai hénia hénia welec mianʒiŋ me niŋanʒiŋ imi ogicma emma wandac wandac medac medac miŋina 
\v 21 Anutu iwac muru mia Kristo Yesu ʒéma iwac hénaoriŋ héra ionac sucginaiguc edamuyanéŋ hicŋisaiya hicŋisaiya hema emma hemac, hélacnec!
\c 4
\s1 Kristoac séwi tasia wamma momacnec ai mewiŋ.
\p
\v 1 Imuac mia Miŋ Kewuninawac wamma hésa ic kekera neŋ meme seli ac yomuhuc énézézua; Anutunéŋ unuruyu ini iwac buŋa kecanʒu imuac hakagina imi imuac séha wamma kecmu. 
\v 2 Ewa qerigina memaamuma qeri bénʒéŋiguc ʒérabéraiguc nalé horuacnec naŋselima goi héihéiac qeriaiguc bisiqatéŋ waŋamumu. 
\v 3 Imuhuc wamma Uŋa téréyanéŋ luaeac hésanéŋ dérécgé énécmiyu momacguc waŋgic imi mia seliseli wamma qambaŋtohoya memu. 
\v 4 Séwiya imi momacguc, Uŋa téréya imi acguc momacguc, waŋu ini imi héihéré énécmimac niŋac momacnec niŋkinʒéŋgéma kecgic unuruyec. 
\v 5 Miŋ Kewunina imi momacguc, waŋu ninʒéŋ ninʒéŋ imi acguc momacguc, waŋu doku naec imi acguc momacguc, 
\v 6 Waŋu Anutu acguc momacguc, waŋu inéŋ mia kekec momac yanda imuac maŋgoc kecʒac. Waŋu kekec momac yanda iminéŋ méra bawu kecgic momacguc wammu niŋac dérécgé énécmima duŋa imuac sucginaiguc kecanʒac.
\p
\v 7 Waŋu icya icya Kristoac sese séha séc méndacma goinina héima nénécmiyec. 
\v 8 Imuac mia ac kiwi méŋ yomuhuc ooyawac hezac; Inéŋ ou eŋec nalé imuaru hésa ic sasala dérécgé énécmima onagicma eŋec. Emma ic embachéra ionac muru sese énécmiyec.\f + \fr 4:8 \fr*\ft Nalé imuaru kawaligina yaréiguc onogicma liliŋgéma hama iwawai onagicgic imi ic embachégina gili énécmiaŋgic. Yesu imi neŋaŋ kawalinina wanʒac imuac haka imuaru ac héima ʒézac.\ft*\f*
\p
\v 9 Ou eŋec ʒéyec imuac hénia imi walac baeciguc emu hiŋgarec imi mia, néŋ hénia méŋ ménda hezac. 
\v 10 Hiŋgarec inéŋ mia kurumeŋa kurumeŋa onogicma eŋec i eŋeyaoc wanʒac. Inéŋ iwawai momac yanda imi sécgé énécmimaŋ ʒé imuhuc waŋec. 
\v 11 Waŋu inéŋ mia tosara Yesuac Méliméli ic, tosara kua meme ic, tosara buŋa suruc hiabia ʒéauau ic, tosara pasto, tosara kiwi ic wammu ʒéma onoporec. 
\v 12 Imi mia ic embachéra téréya mesolaŋani énécmima weleŋ qeqe ai megic toroqe amuma Kristoac séwi ésécnec yacmac niŋac imuhuc ai buŋa qeénécmiyec. 
\v 13 Neŋaŋ imi Anutuac naŋa ninʒéŋgéma hénia niŋasariwiŋ. Imuhuc wanni ninʒéŋ ninʒéŋnina ʒéma niŋ asac asarinina iminéŋ toroqe nénécmiyu séwi momacguc wamma ic yandi tetecgia wambiŋ. Imuhuc wamma Kristoac yandi yandiac séc éréréŋiguc yandiwiŋ. 
\v 14 Imuhuc wamma neŋaŋ imi deguc muacnec nambérac tanec ménda kecbiŋ. Ic diwi qiwiliŋanéŋ ac halécnéŋ ala batuc waŋ énécmigic ninʒéŋ ninʒéŋac ac areŋareŋgia hénia hénia imuac temboŋ temboŋanéŋ qekeŋ qeha waŋ énécmiwac niŋac. 
\v 15 Néŋ goi héihéiya qeriaiguc ac hélawac ʒéma wawaŋ memenina séc orucnina Kristo iwac kekecac séciguc yandiwiŋ. 
\v 16 Iwarunec séwi tasia imi mocʒoŋ toroya toroya toroqe mimia waŋu iwawai hiabia séc qema énécmiyu qéhéréŋgé amuma séwi tasiawac kuha séc ai mema séwi imi meyandima goi héihéi imuac qeriaiguc miyacgé amuanʒac.
\s1 Kekec wahala ʒéma kekec ɋelia.
\p
\v 17 Imuac niŋac ni séwiac hénia imi ʒéma Miŋ Kewunawac qeriaiguc ninʒéŋ ninʒéŋna ʒéau énécmizua; Deguc muacnec imi ic enia eneŋ ewa qeriginanéŋ iwawai héla qahac imuac wamma kecanʒu ésécnec imuhuc ménda wamma kecmu. 
\v 18 Ieneŋ imi niŋasac asari ginanéŋ siŋidéŋgéyu niniŋgina qahac imuac suraiguc ewa qeriginanéŋ seligiyu Anutuac kekec igucnec waima keŋgic. 
\v 19 Ieneŋ niŋtegic qiŋtegicgina qahac tanec wamma séwiac siŋiguc opocamuma haka biria hénia héniawac hémbaoc wamma waŋanʒu. 
\v 20 Ini imi Kristoac hénia imuhuc méŋ ménda kuamugic. 
\v 21 Ac héla imi Yesuac qeriaiguc hezac éséc ini hélacnec iwac murunec ku énécmiyu niŋgiciguc imi 
\v 22 ini ala batucac féŋgéc ic méndacma houma keŋanʒac ic wahala imuac haka imi séwi usugina ésécnec hetecgému. 
\v 23 Ewa qeriginawac uŋa imi meɋeli énécmimia waŋu 
\v 24 Solaŋ dindiŋa ʒéma ac hélanéŋ météré énécmiyu Anutuac tanec ic ɋelia maleku ésécnec héiamuma kecmu.
\s1 Kekecac héna ac.
\p
\v 25 Waŋu neŋaŋ momacnec Yesuac séwi tasia wamma kecʒiŋ imuac niŋac ini ikoc waima ama momac ic iniguc eŋaocnec ac hélacnec ʒému. 
\v 26 Ini qeri biric nimmuiguc képésic ménda wammu. Waŋu kaiwe kiwa hiŋgacmac imuac séc qeri biric ménda késama kecmu. 
\v 27 Biria miŋinawac titiŋa méŋ ménda waimigic érémac. 
\v 28 Kowu nenenéŋ muŋguc kowu ménda nemac, néŋ néwéciguc maqeqeya méra mimacac séc iwawai mihicŋimaŋ ʒé eŋeya mérianéŋ ai mema haka hiabia wammac. 
\v 29 Ac biria imi kuagina igucnec ménda waigic mamac, néŋ ac hiabia ic tosara meyac énécmimacac sécya ʒéma acgina ninʒu imi onac goi héihéi mihicŋi énécmimu. 
\v 30 Ini imi Uŋa téréyawac qeriaiguc asé kiwi menénécmiyu aŋgéŋ titiac nalé ducŋimac imuac séc iwac buŋa kecmu, imuac niŋac Ini Anutuac Uŋa Téréya ewa biri ménda mihicŋi mimu. 
\v 31 Ini qeri howuc ʒéma qeri biric ʒéma yoŋkanʒaŋ ʒéma wauŋ silac ʒéma ʒébiri qébiri haka silic imuhucya imi eŋaŋ muru augic qahac wandacmac. 
\v 32 Eŋaocnec goi héihéi waŋamuma wésé niniŋ waŋamuma Anutunéŋ Yesuac qeriaiguc képésicgina wai énécmiyec éséc képésicgina waiamumu.
\c 5
\p
\v 1 Imuac goi héihéi waŋ énécmiyu kecanʒu nambérac imuhucya ésécnec Anutuguc kéréndéŋ wamma kecmu. 
\v 2 Ini imi Kristonéŋ goi héihéi waŋ énécmiyec séciguc eŋaocnec iwawai méŋ wamma mewiŋ ʒé goi héihéiyawac qeriaiguc wammu. Kristo inéŋ neŋaŋ niŋac wamma eŋeya kekecya waima mulu manaŋ héméŋa hiabia ésécnec Anutu héimiyec. 
\v 3 Ini imi sucginaiguc kaisero ʒéma haka biria hénia hénia ʒéma hémbaoc haka imuhucya imuac qara acguc méŋ ménda ʒéhicŋimu. Iminéŋ ic embac météré énécmimia ionac hakagina séha wanʒac. 
\v 4-5 Kaisero ʒéma ic qerigina ʒapi qeqeya ʒéma hémbaoc (baniarawac mepé qepési ai) wammu imi eneŋ mocʒoŋ yanda Kristo ʒéma Anutuac ama yandaiguc mératéc méŋ ménda memu. Imi ini niŋyacgéma nindacʒu imuac niŋac ac ʒapi qeqeya ʒéma ʒéʒoraŋ ac ʒéma lisi ac imi ménda ʒému, néŋ néwéciguc ewa hia ac ézému.
\p
\v 6 Méŋac méŋ ménda wai énécmigic ac gorosoŋa énézéma ikoc waŋ énécmiwu niŋac. Haka imuhucyawac niŋac Anutuac qeri gericnéŋ ac qeqe haka imuac nambérac héra ionac muru maanʒac. 
\v 7 Imuac mia ic imuhucya iniguc késayu késa ménda wammu. 
\v 8 Ini becnec imi siŋi tunumaŋac buŋa kecgic, néŋ deguc imi Miŋ Kewuninawac qeriaiguc asac mararaŋac buŋa kecʒu. Imuac asac mararaŋac nambérac imuac séciguc kecmu. 
\v 9 Asac mararaŋac héla gocmia imi mia haka hiabia, haka solaŋa ʒéma haka héla. 
\v 10 Némacnéŋ Miŋ Kewunina ségiségi mihicŋi mianʒac imi batucgé hémma, 
\v 11 ini imi siŋi panamaŋac ai iwawai héla qahac imuac ménda toroqemu, néŋ énézégic haka biria héŋtegicmu. 
\v 12 Ieneŋ sasaŋgiaguc waŋanʒu imi kuananéŋ ʒémaŋ ʒéwa gamu mamasuŋaguc waŋu réwérizua. \vp 14a\vp* Hémbiŋac séc imi mocʒoŋ asac mararaŋaguc, 
\v 13 hénia imuac niŋac, iwawai mocʒoŋ asac mararaŋ néŋ qetagaliyu wininianʒac imi kicninanéŋ hémbiŋac séc waŋanʒac. 
\v 14 \vp 14b\vp* Imuac ac méŋ yomuhuc ooyawac hezac; Gaugina hekecʒu ini yacgic! ini humuc ic ionac sucgina igucnec yacgic! Kristonéŋ qetagalima asari énécmimac.
\p
\v 15 Imuac ini hakagina dimuhuc wamma kecmu imi niŋtegicmu. Imuhuc wamma ic embac niŋtegic qiŋtegicgina qahac ésécnec qahac, néŋ niŋtegic qiŋtegic ginaguc wamma kecmu. 
\v 16 Nalé imi biria yéwériyaguc, imuac niŋac ini nalé imi qaurac ménda qemu. 
\v 17 Imuac bec ini ewa soho ic ménda wammu, néŋ Miŋ Kewuninawac ewa siŋ imi dimuhuc hezac imi nitegicma kecmu. 
\v 18 Waiŋ doku seliaguc ewa soho ménda wammu. Imi mia kekec soho sohoya. Néŋ Uŋa téréyanéŋ sécgé énécmiyu kecmu. 
\v 19 Mepé qepési legic, ʒéma ewa hiawac legic, ʒéma legic téréya eŋaŋ héiamuma ewa qeriginanéŋ Miŋ Kewuninawac muru legic héimima mepésimimu. 
\v 20 Haka hénia hénia hicŋi énécmianʒac séc Miŋ Kewunina Kristo Yesuac qaraiguc nalé séc Anutu maŋgocnina ewa hia ac ézému.
\p
\v 21 Waŋu Kristo ee héihéi wammima eŋaocnec méra bacginu kecamumu. 
\v 22-23 Kristonéŋ hénaoriŋ ionac orucgina wamma eŋeya séwi wamma kecʒu ionac aŋgéŋ titi ic wanʒac ésécnec, embac méŋac euyanéŋ iniŋa iwac oruha wanʒac, imuac niŋac embac ini euhécgina ionac méra bacginu kecma Miŋ Kewuac muru wammianʒu ésécnec waŋ énécmimu. 
\v 24 Néŋ hénaoriŋ eneŋ Kristoac wammianʒu ésécnec embac ini imuhucyanec euhécgina tohotoho waŋ énécmima kecmu. 
\v 25 Ic ini acguc iniŋhécgina ionac goigina héiénécmima Kristonéŋ hénaoriŋ ionac goigina héi énécmima ionac niŋac wamma eŋeya kekecya wai énécmiyec imuac séciguc waŋ énécmimu. 
\v 26 Imi mia dokunéŋ naec énécmima ackuaʒécnéŋ ʒuac énécmima météré énécmiyec. 
\v 27 Imuhuc waŋ énécmima eŋeya kiwaiguc hénaoriŋ téréya kumu énécmima métac métac me kiric misicya qahac téréyanec solaŋanec wammu niŋac imuhuc waŋ nénécmiyec. 
\v 28-30 \vp 30\vp* Neŋaŋ imi Kristoac séwi tasia kecʒiŋ imuac niŋac, \vp 29\vp* Kristonéŋ hénaoriŋ héra galeŋgé nénécmianʒac. Ic méŋnéŋ méŋ eŋeya séwiya niŋac méʒé titi ménda waŋamuma nalé séc nene gumu amuma kecanʒac. \vp 28\vp* Imuac ic ini imuhucyanec eŋaŋ iniŋhécgina imi eŋaŋ séwigina ésécnec goigina héi énécmimu. Ic méŋnéŋ méŋ iniŋa goiya héimianʒac inéŋ imi eŋeya séwiya goiya héiamuanʒac tacnec wanʒac. 
\v 31 Hénia imuac niŋac ic méŋnéŋ neŋgoc maŋgocya wai érécmima kemma eŋeya iniŋaguc toroqema séwi éréhécnéŋ séwi momacguc wammaoc imuhuc ʒéyu ooyawac hezac. 
\v 32 Waŋu imuac hénia saŋa imi qeu hiŋgac hiŋgara. Ni imi Kristo ʒéma Anutuac hénaoriŋ ionac niŋac momacnec imuhuc ʒézua. 
\v 33 Waŋu ini imuhucyanec eŋac eŋac eŋaŋ iniŋhécgina imi eŋaŋ ésécnec goigina héi énécmimu. Waŋu embac ini acguc euhécgina onac eegina héi énécmimu.
\c 6
\s1 Nambérac ʒéma neŋgoc maŋgoc.
\p
\v 1 Nambérac ini Miŋ Kewuninawac qeriaiguc neŋgoc maŋgoc hécgina niŋtoho waŋ énécmimu. Haka iminéŋ haka dindiŋa wanʒac. 
\v 2 Geŋga neŋgoc maŋgocga eegira héi érécmiwésémaŋ iminéŋ mia héna ac walac walac ʒikiʒiki acyaguc wanʒac. 
\v 3 Imuhuc wambésémaŋiguc gi imi baeciguc nalé horua kekecgaguc kecbésémaŋ. 
\v 4 Maŋgoc ini nambérac hécgina qeri geric ménda mihicŋi énécmimu, néŋ Miŋ Kewuninawac pakeŋ ac ʒéma ʒézé seli acnéŋ qegumu énécmimu.
\s1 Weleŋ qeqe ic ʒéma ionac miŋ maŋgocgina.
\p
\v 5 Weleŋ qeqe ini imi bac yandi yandi wamma ʒénéŋgina hiriyu ewa qerigina hélanéŋ séwiginawac miŋ kewu hécgina imi Kristoac muru wammianʒu ésécnec weleŋ qeénécmimu. 
\v 6 Ionac kicginaiguc baec ic ionac ewa qerigina mehiaru énécmianʒu éséc qahac, néŋ Kirisistoac weleŋ qeqe ic ésécnec ewa qeriginanéŋ Anutuac ewa siŋ niŋtoho wamma 
\v 7 siŋa nimma weleŋ qeénécmima ic ionac waŋanʒu ésécnec qahac, néŋ Miŋ Kewuninawac wammianʒu ésécnec weleŋ qeénécmimu. 
\v 8 Imi mia icya icya haka hiabia méŋac méŋ wammuiguc weleŋ qeqe me miŋ maŋgoc kekera séc ai imi Miŋ Kewuninanéŋ nénécmiyu meanʒiŋ imuhuc ʒéma nimma imuhuc waŋ énécmimu. 
\v 9 Imuac Galeŋ ini acguc weleŋ qeqe hécgina imuhucyanec waŋ énécmimu, néŋ ménda tericgé énécmimu. Némac niŋ ionac ʒéma onac Miŋ Kewugina imi ou kurumeŋiguc kecanʒac. Waŋu iwac muru imi séwiac hémma niŋgésigési méŋ ménda hezac imuac mia imuhuc wammu.
\s1 Anutuac yaréac maleku selia.
\p
\v 10 Tetecgiaiguc yomuhuc ʒéwa niŋgic; Ini imi Miŋ Kewuninawac qeriaiguc ʒéma iwac kuc buŋawac kuhanéŋ meseli amumu. 
\v 11 Ini imi Biria miŋinawac ikoc imi qewiŋ ʒé Anutuac bunda maleku héigic séwigina mocʒoŋ hoturudacmac. 
\v 12 Neŋaŋ yaré imi ic séwi busuninaguc me sacninaguc qahac, néŋ Biria miŋinawac kewuya kewuya ʒéma kuc buŋa ʒéma baec siŋi tunumaŋaguc imuac galeŋhéra ʒéma sawaiguc uŋa biria iniguc waŋanʒiŋ. 
\v 13 Imuac Anutuac bunda maleku héigic séwigina mocʒoŋ hoturu énécmiyu nalé biriaiguc ini efima yaré qemaguc naŋselimu niŋac imuhuc wammu. 
\v 14 Imuac ini naŋselima ac hélanéŋ rikuŋgina mema ʒikigic haka solaŋanéŋ tétécginaiguc hoturumu. 
\v 15 Waŋu héna usugina luaeac buŋa suruc hiabianéŋ haima ʒéréŋqéréŋ waŋamumu. 
\v 16 Imuac qahaiguc toroqema ninʒéŋ ninʒéŋac saiwa mema iminéŋ ic biriawac ʒakoŋ geric bélaŋaguc imi héʒéŋgéma qéwécgému. 
\v 17 Aŋgéŋ titiac opoc selia ʒéma Uŋa téréyawac sou Anutuac ackuaʒéc imi memu. 
\v 18 Waŋu ʒéwelecgina ʒéma ʒéqaqacgina mocʒoŋ néŋ naléya qahac Uŋa téréyawac qeriaiguc ʒéwelecmu. Imuhuc wambiŋ ʒé ʒenʒeŋ ɋeli ɋeli wamma nalé séc seliseli wamma ʒéwelecmu. Waŋu ic embac téréya ionac niŋ wamma ʒéwelecmu. 
\v 19 Waŋu nuac niŋac momacnec ʒéwelecma nuac muru ackuaʒéc néŋu kuana aŋgéma buŋa suruc hiabia imuac hénia saŋa imi poriŋ qahac ʒéau énécmimaŋ niŋac ʒéwelec wammu. 
\v 20 Neŋ ai imuac mia Yesunéŋ méli néŋu hésa ic wamma kecʒua. Waŋu imi mia neŋ ac ʒémaŋac hezac imi poriŋ qahac selianec énézémaŋ niŋac imuhuc mihicŋi néŋec.
\s1 Mozoc ac.
\p
\v 21 Kekecnawac hénia me némac ai mema kecʒua imi onac momacnec énézéwa nimmu niŋac ninʒéŋ ninʒéŋac dacmuna ʒéma Miŋ Kewuninawac qeriaiguc ai ichéla kecʒac Tikiko inéŋ mia héniana imi mocʒoŋ énézédacmac. 
\v 22 Inéŋ mia nonac kekecninawac hénia énézéma ewa qerigina meefi énécmimac niŋac ni ic imi ai imuac téŋgéŋ méli énécmizua.
\p
\v 23 Anutu maŋgocnina ʒéma Miŋ Kewunina Kristo Yesuac murunec goi héihéiya luaeguc ʒéma ninʒéŋ ninʒéŋaguc iminéŋ dacmuna hécna onac muru hemac. 
\v 24 Miŋ Kewunina Kristo Yesu siŋa ménda humumia nimmianʒu séc ionacmuru ewa hiayanéŋ he énécmimac.