\id 2TI -Kube NT with Psalms [kgf] -Papua New Guinea 2012 (web 2017)
\ide UTF-8
\h 2 Timoteo
\toc1 2 Timoteo
\toc2 2 Timoteo
\toc3 2Ti
\mt1 2 Timoteo
\c 1
\s1 Yaiʒézé ac.
\p
\v 1 Anutuac ewa siŋ niŋac Kristo Yesuac qeriaiguc kekecac sisipac ac hezac imi méndacma Kristo Yesuac Méliméli ic waŋi Paulo neŋ mia 
\v 2 naŋ sorocna Timoteo guac muru kiwi yomi ogénʒua. Maŋgocnina Anutu ʒéma miŋ kewunina Kristo Yesu iorarunec ewa hia ʒéma wésé niniŋ ʒéma luaenéŋ hegémmac.
\s1 Miŋ kewuac gamuga ménda nimmu.
\p
\v 3 Ni siŋi kaiwe séc ʒéwelecma imuac suraiguc ménda misimanec niŋgéŋanʒua séc yanda hécna ionac murunec hénima hama deguc ewa qerinina lalacnec mepésimianʒiŋ Anutu iwac mia ewa hia ac ézéanʒua. 
\v 4 Waŋu ewa hia kuneŋ yanda nimmaŋ niŋac guac kic masiga niŋɋelima kic tanecga hémmaŋ niŋac waŋanʒua. 
\v 5 Imi mia guac ewa qerigaiguc ninʒéŋ ninʒéŋ solaŋa hezac imi niŋɋelima imuhuc waŋanʒua. Ninʒéŋ ninʒéŋ imi mia walac awuga Loisi ʒéma neŋgocga Yunike iorac ewa qerigiraiguc heyec imuhucyanéŋ guaru acguc momacnec hezac imi ninʒéŋgézua. 
\v 6 Imuac ni mérana orucgaiguc haiwa Anutunéŋ ai memeac sese géŋec imi héiososoc mena geric bélaŋaguc wammac ʒénimma gi imuac nimbésémaŋ niŋac wamma ac yomi gézézua. 
\v 7 Uŋa Anutunéŋ nénécmiyec imi bac yandi yandiac uŋa qahac, néŋ kuc ʒéma goi héihéi ʒéma niŋgésigési galeŋ meamuwiŋac uŋa wanʒac. 
\v 8 Imuac gi imi miŋ kewuninawac héipuc ac imuac ʒéma miŋ kewuninawac wamma hésa ic kecʒua nuac momacnec gamuga ménda nimbésémaŋ, néŋ Anutuac kuhanéŋ buŋa suruc hiabiawac ʒéra béraiguc toroqe némbésémaŋ. 
\v 9 Anutunéŋ mehiaru nénécmima ac téréyanéŋ héihéré nénécmiyec. Waŋu imi mia wawaŋ memenina niŋac qahac, néŋ eŋeya ewa siŋ ʒéma nalé ménda hénima heyecnec becaru Kristo Yesuac wamma hemiyec ewa hiaya imuac mia wamma imuhuc waŋ nénécmiyec. 
\v 10 Waŋu imuac héla imi nalé yomuaru aŋgéŋ titi miŋina Kristo Yesunéŋ mayu hicŋitegirec. Inéŋ mia humuc néhélima kekec ʒéma haka hehe selia imi buŋa suruc hiabiaiguc meau nénémiyec. 
\v 11 Waŋu ni imi buŋa suruc hiabia imuac wamma ʒézé ic ʒéma Yesuac Méliméli ic ʒéma kiwi ic kecmaŋ niŋac kumunéŋec. 
\v 12 Waŋu ni ninʒéŋgé mima kecʒua iwac hénia niŋasarizua. Imuac mocʒoŋ yanda mériaiguc haiwa hezac imi inéŋ kuhanéŋ hiabianec galeŋ gémanec keru nalé yanda ducŋimac imi niŋhumuzua. Hénia imuac niŋac ni ʒéra waiya qahaiguc kecma gamuna ménda ninʒua. 
\v 13 Gi imi Kristo Yesuac qeriaiguc ninʒéŋ ninʒéŋ ʒéma goi héihéi késa kecʒaŋ imuaru héima namma ac héla nuac murunec niŋnec imi méndacma wambésémaŋ. 
\v 14 Uŋa téréya qerininaiguc kecanʒac inéŋ naŋgégéŋu ac héla eeyaguc méragaiguc haigéŋi imi galeŋgéwésémaŋ.
\p
\v 15 Asia baeciguc ic embac kecʒu imi mocʒoŋ wainéndacgic imi nindacʒaŋ.\f + \fr 1:15 \fr*\ft Paulonéŋ Roma baeciguc aciguc opocgic eŋec nalé imuaru hénaoriŋ Asia baeciguc kecgic ieneŋ héipuc ménda wammigic imuac niŋac imuhuc ʒézac.\ft*\f* Figelo ʒéma Hemogene imi ereŋ acguc ic imuhucya ionac sucginaiguc kecʒaoc. 
\v 16 Miŋ kewunina imi Onesiforo iwac ama geric momac héra goigina héimac niŋ wanʒua. Inéŋ mia hatac sasala ségiségi mihicŋi némma hésa ic kecba nuac gamuya ménda nimma 
\v 17 Roma hakerec nalé imuaru seliseli wamma hocma mihicŋi néŋec. 
\v 18 (Miŋ kewuninanéŋ nimmiyu nalé yandaiguc miŋ kewuninawac murunec goi héihéi mihicŋimac niŋ wanʒua.) Inéŋ Efeso baeciguc weleŋ qeqe ai réwéria dimuhucya meyec imi gi geŋgaoc ninʒaŋ.
\c 2
\s1 Kristo Yesuac téŋgiŋ ic hiabia.
\p
\v 1 Naŋna, imuac gi Kristo Yesuac qeriaiguc ewa hia hezac imuac qeriaiguc seliseli wamma 
\v 2 neŋ ʒéwa gi héipuc ic sasala ionac kicginaiguc ninnec imi ic tosara keŋhéi hahéi qahac énézéna ieneŋ imuhucyanec ic embac tosara ku énécmimuac séc wammac. 
\v 3 Imuac gi Kristo Yesuac téŋgiŋ ic hiabia ésécnec niguc mena mewa wamma ʒéra waiya qahaiguc seligima kecbésémaŋ. 
\v 4 Téŋgiŋ ic kecma keŋha waŋanʒu imi eneŋ qutulaŋgé énécmima téŋgiŋ ic qac buŋa énécmiyec i ségiségi mihicŋi mimu niŋac eŋaŋ kekecginawac ainéŋ ménda ɋaté énécmiyu kecanʒu. 
\v 5 Méŋ ogicqogic ariac mema héna ʒawéya hezac imi logimaciguc oruhaiguc ic kawaliac opoc méŋ ménda haimimu. 
\v 6 Ai ic méŋ ai geriwaguc meanʒac iminéŋ imuac héla walac memacac hezac. 
\v 7 Ac gézézua imi qeriganéŋ nimbésémaŋ, miŋ kewuninanéŋ ai hénia héniaiguc niŋtegic qiŋtegic haigémmac.
\p
\v 8 Buŋa suruc hiabia gézéwa ninnec séc Dawidiac ɋeli Kristo Yesu humuc igucnec meɋelimiyu yarec i niŋɋeliwésémaŋ. 
\v 9 Buŋa suruc hiabiawac niŋac wamma ni képésic ic ésécnec seŋ hésanéŋ ɋaté némmuac séc ʒéra béra mihicŋi néŋgic, néŋ Anutuac ackuaʒéc imi ɋatémuac séc qahac. 
\v 10 Imuac ni ic embac Anutunéŋ megési énécmiyec ionac niŋ wamma iwawai mocʒoŋ bisiqatéŋ waŋanʒua. Imi mia ieneŋ acguc Kristo Yesuac qeriaiguc aŋgéŋ titi hakaya hezac imi ʒéma edamuya tetecgia qahac imi momacnec énécmiyu memu niŋac imuhuc waŋanʒua. 
\v 11 Ac yomi hélaguc, nini Miŋ Kewuninaguc momacnec humuziŋiguc imuhucyanec i guc momacnec ɋelima kecbiŋ. 
\v 12 Qenʒeŋ manʒeŋiguc meseliwiŋiguc momacnec ic kewu wamma kecbiŋ. Waŋu miŋ kewunina qaecgé miwiŋiguc i acguc qaecgé nénécmimac. 
\v 13 Nini ménʒé ménʒé wambiŋac séc, néŋ inéŋ eŋeya qaecgé amumacac séc qahac, imuac niŋ nalé séc méŋʒé méŋʒéya qahac kecanʒac.
\s1 Ai ic Anutunéŋ niŋmimia.
\p
\v 14 Eluŋ unuwac niŋac, gi ac imi héiɋeli énécmima acac ʒéeŋ ʒéma ménda wammu niŋac Anutuac\f + \fr 2:14 \fr*\ft Kiwi méraginanéŋ ooya tosaraiguc Miŋ kewu ʒéma Kristo ogic hezac.\ft*\f* kiwaiguc selianec énézéna. Haka imuhucya imi naŋgé énécmimacac séc qahac, néŋ néwécgeŋac ac imuhucya ninʒu i mebiri énécmianʒac. 
\v 15 Gi imi ac héla imi dindiŋanec niŋtegicma ai ic gamu qeqeya qahac ʒéma niŋgémmacac séc, Anutuac wéséyaiguc geŋga mihicŋi amumaŋ ʒé nimma seliseliiguc aiga mewésémaŋ. 
\v 16 Ac biria gorosoŋa ʒégic néŋgacma kecbésémaŋ. Ac imuhuc waŋanʒu imi eneŋ keŋkecma keŋkecma iwawai eeyaguc qahac imuac mia keremmu. 
\v 17 Acginanéŋ wizi selia ésécnec saima kemmac. Ic imuhucya ionac sucginaiguc Humeneo ʒéma Fileto kecʒaoc. 
\v 18 Humuc igucnec yayac imi bec hicŋiyu tecgéyec ʒéma ac héla imi ʒésigima énézéyic ic tosara ionac ninʒéŋ ninʒéŋgina melemma bacgéanʒac. 
\v 19 Néŋ Anutuac séraŋ selia imi asé kiwiya yomuhucyaguc hiŋgac seligima nanʒac. Miŋ kewuninanéŋ eŋeya buŋahéra inic tegicanʒac. Waŋu méŋ yomuhuc; Miŋ kewuninawac qara qacma kecanʒu séc biria héŋacya memu. 
\v 20 Ama kewuyaiguc ʒéic goli ʒéma siliwanéŋ memeya ʒéma ʒéic icnéŋnec memeya ʒéma baecnéŋnec memeya momacnec tacʒac. Taru ʒéic tosara imi ai eeyagucac késaanʒu, néŋ tosara imi ai eŋomiawac késaanʒu. 
\v 21 Imuac méŋnéŋ méŋ haka imuhucya ʒuac amuma lalacnec kecmac imi ʒéic eeyaguc éséc wammac. Imuhuc waŋu miŋ kewuginanéŋ késamacac séc ʒéic téréya wammac. Téréya waŋu ai hiabia hénia héniawac haiyu mambéc kecmac. 
\v 22 Waŋu gi imi sac ɋeliac séwiac siŋ imi qiʒiʒiŋgéma qeri lalacnec miŋ kewuninawac qacmianʒu iniguc momacnec haka solaŋa ʒéma ninʒéŋ ninʒéŋ ʒéma goi héihéi ʒéma luae niŋac méndacma kemmu. 
\v 23 Waŋu ac sicsaocya ʒéma ac qelaŋawac ʒéeŋ ʒéma haka imi waina keŋu. Ac imuhucya igucnec tualefic acnéŋ hicŋianʒac. 
\v 24 Miŋ kewuninawac weleŋ qeqe ic imi, acnéŋ ménda euma, ic embac mocʒoŋ ionac gum bénʒénʒéŋ wamma, hiabianec ku énécmima, haka biria waŋgic kileŋ bisiqatéŋ waŋ énécmianʒac. 
\v 25 Waŋu ic tosara eneŋ ac qeqe waŋgic qeri bénʒéŋiguc pakeŋ ac waŋ énécmina. Anutu eŋeyaoc qerigina meleŋ énécmimaŋ ʒé nimma niŋ énécmimaciguc ac héla niŋtegicmu. 
\v 26 Waŋu qerigina béréŋgéyu Biria miŋinawac ac bétacya ʒéma iwac ewa siŋ ɋaté énécmima hezac imi hetecgé amuma néŋgacmu.
\c 3
\s1 Nalé tetecgiaiguc ic embac ionac kekec tanera imi dimuhuc wammac.
\p
\v 1 Nalé tecgémaŋ ʒé waŋu yéwéri naléya imi hamac. 
\v 2 Ic embac ieneŋ eŋaŋ sac siŋniŋ waŋamuma soukiwawac siŋ yanda nimma séwi eŋeŋ wamma tétéc qeqe wamma ʒébiri qébiri wamma neŋgoc maŋgoc ac qeqe waŋ érécmima, nema nelumma, ee héihéi qahac kecma 
\v 3 goi héihéi qahac kecma képésic ménda wai amuma ac ʒéraguc kuaiguc haihai wamma qeri siŋgina ménda helanʒima tiktuk wamma iwawai hiabiawac méʒétiti wamma 
\v 4 andé qeamuma luaeguc ménda mambéc kecma eŋeya meyacamuma Anutuac siŋ qahac, néŋ néwécgeŋaiguc eŋeya séwiac siŋ niŋac wamma 
\v 5 Anutu ee héihéi wammimia tanec kecma Anutu ee héihéi imuac kuha imi qaecgéma kecanʒu. Waŋu gi imi ic imuhucya héŋacgina mewésémaŋ. 
\v 6 Ic imuhucya sucginaiguc tosara eneŋ amaginaiguc emma embac bobologocya, képésic réwéria serima séwiac siŋ hénia hénianéŋ hérémiyu keŋkeŋa imuhucya héréma énépésianʒu. 
\v 7 Embac imuhucya imi nalé séc niniŋ niŋareŋ wammu, néŋ ac héla niniŋaiguc keremmuac séc qahac wammac. 
\v 8 Becnec Yane ʒéma Yambere\f + \fr 3:8 \fr*\ft Yane ʒéma Yambere; Qac éréhéc yomi sisipac ac wahalaiguc ménda hezac, néŋ sasalanéŋ méra kiwi ic éréhéc Moseguc euma méra kiwi meyoc iorac qacgira ʒéma ninʒéŋgéanʒu. (\ft*\xt Mmh 7:11,22\xt*\ft )\ft*\f* iereŋ Moseac haʒéc wammiyoc ésécnec ieneŋ acguc ac hélawac haʒéc wammianʒu. Waŋu ieneŋ imi ewa qeriginanéŋ houyu ninʒéŋ ninʒéŋac hénaiguc keŋ bipigic. 
\v 9 Waŋu ic éréhéc ioraru hicŋiyec ésécnec ieneŋ acguc horua ménda keŋgicnec hakagina qelaŋa imi wininiyu héndacmu.
\s1 Pauloac pakeŋ ac tetecgia.
\p
\v 10 Nuac pakeŋ ac ʒéma wawaŋ meme ʒéma ewa siŋna ʒéma ninʒéŋ ninʒéŋ ʒéma luaenéŋ mambéc kekec ʒéma goi héihéi ʒéma nanaŋ seliseli ʒéma 
\v 11 nunesi waŋ nénéŋa ʒéma qenʒeŋ manʒeŋ ʒéma Antiokia ʒéma Ikonion ama areŋa yandaiguc haka biria wannéŋgic imi ʒéma nunesi dimuhucya mihicŋiyi imi geŋ hélacnec héndacma niŋtegicnec ésécnec miŋ kewuninanéŋ haka imuhucya igucnec ni metecgé néŋec. 
\v 12 Waŋu ic méŋnéŋ méŋ Kristo Yesuac qeriaiguc kekec eeyaguc kecbiŋ ʒé wammu ieneŋ acguc ununesi mihicŋimuac hezac. 
\v 13 Ic biria ʒéma ikoc ic ieneŋ muŋguc yanda biri seligima eŋaŋ ikoc waŋ énécmigic imuhucyanec ikoc waŋ énécmima kecmu. 
\v 14 Néŋ gi imi ackuaʒéc héiɋelima ninʒéŋgéanʒaŋ imuac naŋselima kecbésémaŋ. Mérénéŋ kugéŋgic niŋareŋgénec imi geŋgaoc ninʒaŋ. 
\v 15 Waŋu gi komocga igucnec kiwi téréya imi oloŋ niŋ waŋanʒaŋ. Kiwi téréya iminéŋ mia kuhanéŋ niŋtegic qiŋtegic mihicŋi géŋu, Kristo Yesuac qeriaiguc ninʒéŋ ninʒéŋ késa kecʒaŋ, ninʒéŋ ninʒéŋ imuac héima namma aŋgéŋ titi hia mihicŋiwésémaŋ. 
\v 16 Kiwi téréya imi mocʒoŋ Anutunéŋ hinocgé énécmiyu ogic. Imuac iminéŋ méra nénécmiyu pakeŋ ʒéma ʒémindi mindiŋi ʒéma meɋeliɋeli ʒéma kekec solaŋawac qeriaiguc meefiefi ai hia mewiŋ. 
\v 17 Imi mia neŋaŋ Anutuac ichéra séc ai hiabia hénia hénia hia wambiŋac séc solaŋaniwiŋ niŋac imuhuc waŋ nénécmianʒac.
\c 4
\p
\v 1 Ni Anutuac kiwaiguc ʒéma Kristo Yesu kecma kic ɋeli ʒéma humumia momacnec niŋgési nénécmimac iwac hahaya ʒéma iwac héŋgaleŋ amaya niŋac wamma ʒéseligénʒua. 
\v 2 Gi ackuaʒéc téréya imi ʒésai énécmiwésémaŋ. Nalé hia me nalé biriawac séc momacnec seliseli wamma ai imi mewésémaŋ. Waŋu réwéri horugiyu naŋselimanec ackuaʒéc iminéŋ ku énécmima képésicgina ʒéasari énécmima ac ʒéénécmima meseli énécmiwésémaŋ. 
\v 3 Kecma nalé méŋ hayu ic embac ieneŋ pakeŋ ac héla imuac andé unuma kiwi ic ikora tosara gezacgina siŋa méndacma eŋaŋ siŋginawac séc énézégic méndac énécmimu. 
\v 4 Waŋu ac hélawac andé qema nemu surucac gezacgina haimu. 
\v 5 Waŋu gi mia ai imuac me imuac séc mesigi waŋamuma ʒéra waiya seligima buŋa suruc hiabia imuac ai wamma aiga imi séha séc meyacdacna.
\p
\v 6 Ni waiŋ sese\f + \fr 4:6 \fr*\ft Waiŋ sese; Ʒucmanaŋ ai mewiŋ ʒé nalé tosaraiguc doku me waiŋ pocgémiaŋgic.\ft*\f* ésécnec kekecna bec pocgéwa keŋkeŋ naléna imi ducŋima hazac. 
\v 7 Ni yaré hiabiawac qema héna kemmaŋ ʒé ʒénéŋec imi keŋ metecgéma ninʒéŋ ninʒéŋna galeŋgéma kecanʒua. 
\v 8 Imuac biaŋ kecma nuac niŋ wamma haka solaŋawac opoc nuac buŋa haiyu mambécnawac hemac. Imi mia miŋ kewunina ʒégésigési ic solaŋa inéŋ mia nalé niŋu hezac imuaru ni némmac. Waŋu nenanec sac qahac ic embac Miŋ Kewunina muŋguc winini nénécmimac imuac waŋanʒu mocʒoŋ yanda momacnec énécmimac.
\p
\v 9 Gi focdac nuacmuru hawésémaŋ. 
\v 10 Dema imi baecac iwawai niŋac wamma wainémma Tesalonika ama areŋa yandaiguc keŋec. Waŋu Kreske imi Galatiaiguc, Tito imi Dalmatia baeciguc kendaroc. 
\v 11 Luka momacguc sac niguc kecʒac. Hamaŋ ʒé wamma Mareko wagicna momacnec hamaoc. Inéŋ ainawac méra nénéŋawac séc wanʒac. 
\v 12 Tikiko mia méliwa Efeso ama areŋa yandaiguc keŋec. 
\v 13 Waŋu hamaŋ ʒé wamma hénawac malekuna Troa amaiguc Karpo iwac amaiguc hetecgé haiyi imi mema hawésémaŋ. Waŋu kiwina imi kiwi limbi limbiŋa tosara ʒéma kiwi yaŋ séwélanéŋ memeya imi momacnec mema hawésémaŋ. 
\v 14 Aiŋnéŋ iwawai meme ic Aleksande imi biria sasalanec wannéŋec imuac haka waŋec séciguc miŋ kewuninanéŋ tasé kumimac. 
\v 15 Gi acguc iwac mia galeŋ mewésémaŋ. Ic imi acnina selianec qeqetali waŋ nénécmiyec.
\p
\v 16 Ni walac aciguc emma ʒéirecgéyi nalé imuaru ala méŋnéŋ méŋ héipuc ménda wannémma mocʒoŋ wai néndacgic. Néŋ képésic ginaguc ménda ʒé énécmimac niŋ wanʒua. 
\v 17 Neŋ héna ac imi ʒésaiwa keŋu ic enia ieneŋ nindacmu niŋac wamma Miŋ Kewuninanéŋ niguc namma meseli néŋec. Waŋu laion kuagina igucnec metecgé néŋec.\f + \fr 4:17 \fr*\ft Hésa ama igucnec mayec imuac séséc ac imuhuc ʒézac.\ft*\f* 
\v 18 Miŋ kewuninanéŋ neŋ kurumeŋac héŋgaleŋ amayaiguc keremmaŋ niŋac biria imuac me imuacnec metecgé némma aŋgéŋna timac. Imuac iwaru mia edamuya nalé tetecgia qahac hemac. Hélacnec!
\s1 Mozoc ac.
\p
\v 19 Priska ʒéma Akila ʒéma Onesiforo ionac ama geric momachéra yaiʒézéna énézéna. 
\v 20 Erasito imi Korinti ama areŋa yandaiguc waima kerec waŋu Tirofimo imi hafi kiyu Milete ama areŋa yandaiguc waima hayi. 
\v 21 Saŋgeŋa naléya ménda ducŋiyu foc hawésémaŋ. Eubulo, Pude, Lino, Kilaudia ʒéma ala sasala ieneŋ imuhucyanec guac yaiʒézéga ʒézu. 
\v 22 Ni imi Miŋ Kewuninanéŋ guac ewa qerigaiguc momacnec kecmac niŋ wanʒua. Ewa hiayanéŋ iniguc hemac.