\id TIT Kharam: Bible Translation 1st Edition.
\ide UTF-8
\ide Unicode (UTF8)
\h Titus
\toc1 TITUS Diang Paul Chemajia
\toc2 Titus
\toc3 Tit
\mt1 TITUS
\mt2 Diang Paul Chemajia
\imt1 Chonglamsaat
\ip Titus chemajia hi Paul in koisuok diang ka-emak miring diang imajia chemajia mili ngai karra chemajia inkhat kha eii. Chemajia inthum ngai khachu 1 Timothy, 2 Timothy khat-um Philemon kha in-eii. Hiwa Chemajia hi Titus diang imajia eii takkha mipui diang-um inringnga teelro tia majiana anei. Hiwa Chemajia hin Paul hi tirton eii tiya Titus in leijetjeite. Hiwa chemajia hi Paul in Jisu Christa inneisuo thengnga kum soomruk leithum li soomruk leira-nga kongkarra imajia eii.
\ip Paul in Titus diang tuiramma kaom Crete ramsuungnga kaom koisuok ngaikha katha-ah keiruoiro tiya minchu mindikna anei. Paul in Titus diang chemajia hi amajiana jarchu Titus in koisuok karoonsik ngaikha katha-ah akadang li aminchunasik jarra eii. Hiwale in-ang minchu mindikna ngaihi Paul in Timothy diang imajia chemajia khannum amajia. Paul in hiwa chemajia hin koisuok karoon ngaikha pham kalok in-eii tia amajia. Tuun tuunna koisuok khat-um koisuok karoon ngai-um hiwa chemajia hinna injia inmani thosik chuon khat-um nunchan ngaihi katha-ah injetsik arei eii tiya majiana anei.
\iot Asuungnga kaom Chong
\io1 1. Paul in Titus diang koisuok karoonsik ngaikha Pathian kajet mi kadangro tia minchu mindikna anei \ior (1:1-16)\ior*
\io1 2. Hiwa thengnga Paul in Titus diang mi ngai kha-um Pathian jetnasik jarra katha-ah minchu mindikro tia majiana anei \ior (2:1–3:11)\ior*
\io1 3. Paul Chongminsuona \ior (3:12-15)\ior*
\c 1
\p
\v 1 Paul, Pathian suok ka-eii khat-um Jisu Christa tirton um ka-eii.
\p Pathian ikadang mi ngai ngamna kha kasansik khat-um eini biaklam in iminchu akadik khan inmani kakeiruoi sik-ah kei hi inakadang khat-um inatir kha eii. 
\v 2 Khawa khachu hektik kaboi ngamna ringkhuo jarra eii. Maleisei karilmak Pathian khan hiwa ringkhuo hi kanapesik eii tia manmasituol abool ma-ah chong inkhitna aneijei, 
\v 3 halli tuun ama'n imadan apha takkha heitung dungjuiya ama chongkha amalarra kei kutchungnga anapeii, halli eini Nakatanpa Pathian chongpeii nuoiya kei'n karil.
\p
\v 4 Eini le ngamna in-ang kasapa tak ka-eii Titus diang kei'n kimajia eii.
\p Pa Pathian khat-um eini Nakatanpa Christa Jisu in riangwai khat-um kadai kha innapeii erase. \rq 2 Cor 8:23; Gal 2:3; 2 Tim 4:10\rq*
\s1 Crete tuiramma Titus Chuontho
\p
\v 5 Kei'n nang kha tuiramma kaom Crete ah kanada, kanadana jarchu thosik kalaom chuon ngaikha amason kaomma naminhek nasik khat-um khuopui rakip-ah koisuok karoonsik upa ngaikha nabeii nasik kinada eii. Kei chongpeii ngaikha ngaidonro.
\p
\v 6 Koisuok karoonsik upa kha noonkuung kaboi mi esik eii; numei inkhatbit kanei mi esik eii,\f + \fr 1:6. \fr*\fq numei inkhatbit kanei; \fq*\ft emakli \ft*\fqa inn woikhatbit kanei.\fqa*\f* halli ama sangai kha Pathian kajet in-esik eii, lamkathuoi khat-um chongkajuimak sangai in-eii tia inril mi khan etheinuni. \rq 1 Tim 3:2-7\rq*
\p
\v 7 Koisuok karoon upa kha Pathian chuon kathosik mi ejarra, ama kha noonkuung kaboi mi esik eii. Ama kha in-or emakli karaang innot echamak, ju inrui emakli miringkhat chungnga kut kamachun emakli sial kamanuom mi etheinuni. 
\v 8 Ama kha mi ngai kadonthei khat-um akatha kamanuom mi esik eii. Apum insur mator, kadik katho, inthiang khat-um nunchan katuun mi esik eii. 
\v 9 Ngamna kaom chongpui khat-um Pathian chong le injom chong ngaikha kacheet-ah amahuumsik eii. Hiwa lamma ama khan akadik minchuna khan mi ngaikha masok matorte halli akadik kazootmak mi ngaidiang nangni itho ngaikha dikmak tia minmu matorte.
\p
\v 10 Ajarchu akadik kazootmak mi katamtak inom, khawa ngai khachu aru ekhet-ah Judaism makheiya malung kaheithuul inmani ngai'n aleiilaak mi ngaidiang maleisei khat-um chongriam inril. 
\v 11 Inmani ngaikha chong minril maksik hi arei eii, ajarchu inmani ngai'n minchusik ka-emak ngaikha inminchu halli insuungkhur pumpui kha inminhaang, khawa ngai rakip kha jakna kaom inmani nemnasik sial loutheina kha inmin-eii. 
\v 12 Apumtak Crete mi ka-eii Pathian chongkachoi inkhat in aleiti: “Crete mi ngaihi maleisei kathobit kha in-eii, chikaom ramsa ngaikha in-eii, akatan khat-um mahaam kalian mi ngaikha in eii.” 
\v 13 Hiwa sakhi hi adik, hiwa jarra nang in inmani ngaikha akadik ngamna kha inmunasik-ah kana tak-ah narakooksik eii, 
\v 14 khawa nirakook khan inmani ngaikha Jihudi ngai thiming khat-um akadik kazootmak ngai'n inbool sinadan ngaikha inmathaansik eii. 
\v 15 Inthiang mi ngai diangchu angrakip inthiang; takkha inthiangmak khat-um ngamna kaneimak mi ngai diangchu angrakip achok. Ajarchu inmani kase katha jetna khat-um ngaidonna ngai kha-um achokjei. 
\v 16 Inmani ngai'n Pathian kinjet inti, takkha inchuon thokhan zootmak. Inmani ngaikha matir kaom khat-um chong kajuimak in insip, akatha kathosik-ah iteii rahoi emu.
\c 2
\s1 Akadik Minchuna
\p
\v 1 Takkha nangchu akadik minchuna khale inzootna ngaikha nang in naminchusik kha eii. 
\v 2 Upa ka eii pasal ngai'n inlermaru, khoya kaomtak-ah omru, ningpum insurru; ngamna khan cheetru, minriang kacheet eru khat-um kadei karaat eru ti-inlang minchuro. 
\v 3 In-angrip-ah numeisa upa ngaikha inthiang ringkhuo nunchan kapoiya ringru ti-inlang minchuro. Inmani ngaikha mi karilsemak khat-um theibomju inruimak in-esik eii. Takkha akatha kaminchu kha in-esik eii, 
\v 4 ajarchu numeisa khangdoong ngaidiang inruothar khat-um insa ngaikha minriangru, 
\v 5 inpum insurru khat-um inthiangru, halli inruothar ngai nuoiya kaom nupuinu eru, ti-inlang michuro, khawa e-inchu tuteii inkhat innum Pathian chongkha kathamak-ah rilnunu.
\p
\v 6 In-angrip ah pasal khangdoong ngai-um inpum insurnasik ah masokro. 
\v 7 Ang rakip-ah nangni ningpum tak-in akatha chuon tho-inlang juisik kha eru. Nangni minchuna khan ningmalung minluutru khat-um dingtak min-eru. 
\v 8 Kheetsik kaommak akadik chong ngaikha inliingnaru, ajarchu nangni inhalpui mi ngaikha'n eini jarra akathamak iteii rilsik inmumakli injakkha erasu.
\p
\v 9 Suokngai khan inkaru ngai nuoiya omrasu halli ang rakip-ah inkaru ngai malung mintairasu. Suok ngai'n inkaru ngaidiang chong saanmarusu 
\v 10 emakli inmani diang makheiya maruupmarusu. Khawa rathuulla, ang rakip-ah inmani'n Pathian eini Nakatanpa minchuna kha inminlur nasik-ah, inmani'n apha rakip-ah akatha khat-um ngamna kaom kin-eii tikha minmurusu.
\p
\v 11 Ajarchu Pathian kha'n ama riangwai kha miring rakip sik-ah sanminringna eii tia amalarjei. 
\v 12 Khachu riangwai kha'n Pathian kajetmak ringkhuo khat-um manmasituol ringkhuo kha mathaantru, halli ningpum insurru, akatuun khat-um Pathian kajet-ah hiwa manmasituolla karing eru tia anaminchu, 
\v 13 Inthang Pathian, Nakatanpa Jisu Christa kul ra-aangle kajuosik rawaan katha Nikhuo ka-ngaak ngaikha ni eii. \f + \fr 2:13: \fr*\fq Inthang Pathian, Nakatanpa Jisu Christa \fq*\ft emakli \ft*\fqa Inthang Pathian khat-um eini Nakatanpa Jisu Christa.\fqa*\f*
\p
\v 14 Akathamak rakip makheiya eini nakatan nasik halli ama mi khabit ka-eii khat-um akatha kathosik-ah kangaaklan inthiang mi ngai namin enasik-ah ama'n apum takkha eini sik-ah nanphalpi. \rq Minpkla 130:8; Ezek 37:23; Innidan 14:2\rq*
\p
\v 15 Hiwa ngaihi minchuro halli thomatorna ranak kha inliingna inlang masokro khat-um rakookro. Inmani tuteii inkhat innum nang kha kamo eii tia namumarusu.
\c 3
\s1 Christian Nunchan
\p
\v 1 Waikaroon ngaili thomatorna ranak kanei ngai nuoiya omru, inmani ngai itikha juiru halli ang rakip-ah akatha kathosik-ah inringchakru ti-inlang nang mi ngaikha minjettharro. 
\v 2 Tuteii chungnga kathamak rilmaru tipiro, khawa rathuulla mi rakiple inzootnaru khat-um sap eru, halli nunchan kadaikha mi rakip diang minmuru. 
\v 3 Apha inkhat-ah eini ngaihi akamo, chongkajuimak, akadikmak halli taksa hoina li taksa imanuom rakip ngai suok nilei eii. Eini akathamak khat-um kara-ot nilei eii; leiilaak mi ngai'n eini naleimatir halli eini'n inmani nileimatir. 
\v 4 Takkha Pathian eini Nakatanpa minriang khat-um athana kha juo-inlarpha khanchu, 
\v 5 ama'n eini nasanjei, eini'n akatha chuon nileitho jarra emak, takkha ama tak minriang nakhan ama'n eini narasuthiangnga naminneithar khat-um akathar ringkhuo kanapeii Ratha Inthiang diangnga inphut eini anasanjei. 
\v 6 Pathian in Ratha Inthiang kha eini chungnga insam omlekleiya Jisu Christa eini Nakatanpa diangnga inphut anajuobunpi, 
\v 7 ama riangwai jarra Pathian le inzootna khat-um eini'n ningamna kumsoot ringna kha niralaang matornasik eii. 
\v 8 Hiwahi akadik chong kha eii.
\p Hiwa jar ngaihin nangni'n kalurdoomma ningngaidon kha kei'n kamanuom, ajarchu Pathian kangamnajei inmani'n chuonkatha ngaikha inmalung kaluut-ah inthonasik eii. Hiwa ngaihi mi rakip sik-ah akatha khat-um nemna kaomthei kha eii. 
\v 9 Takkha ka-am murruolsiak, pirui purui jarra, inseii khat-um Sinadan jarra insuol emaru, ajarchu khawa ngaikha arei kaboi khat-um nemna kaboi eii. 
\v 10 Inkhoithen kamasuok inmani ngai chungnga chong woikhat woini minchuro, halli aleimak inchu inloppui maro. 
\v 11 Khawa mi ngaikha akadikmak in-eii iti nang in najet, halli inmani itho inmanu khan inmani dikmu itikha inlar.
\s1 Ahekna Minchuna Chong
\p
\v 12 Kei'n nangdiang Artimas emakli Tychicus kaheitir phakhan, nang in Nicopolis ah kei koolla juonger nasik thoro ajarchu phalbi suungseng khawakhan omsik itihi kei'n kangaidon suojei. \rq Chuon 20:4; Eph 6:21,22; Col 4:7,8; 2 Tim 4:12\rq*
\p
\v 13 Nang in nithotheiseng tho-inlang dankathei Zenas khat-um Apollos kha insinasik lamma arei kaom rakip kha penasik thoro. \rq Chuon 18:24; 1 Cor 16:12\rq*
\p
\v 14 Arei ka-eii ngaikha inmunasik halli nemna kaboiya inringmaknasik eini mi ngaikha akatha kathosik-ah inmalung kaluut kha inchurasu.
\p
\v 15 Keile kaomsuom mi rakip ngai'n nangdiang minpaakna chong kinnahong minchoi. Einile ngamna kaneisuom mi rakip diang keini'n minpaakna chong kinhongmalar ti-inlang nang in leitipiro.
\p Pathian riangwai kha nangni rakip chungnga omrase.