\id EPH Kharam: Bible Translation 1st Edition.
\ide UTF-8
\ide Unicode (UTF8)
\h Ephesia
\toc1 EPHESIA Mi-ngaidiang Paul Chemajia
\toc2 Ephesia
\toc3 Eph
\mt1 EPHESIA
\mt2 Mi-ngaidiang Paul Chemajia
\imt1 Chonglamsaat
\ip \bk Ephesia mi-ngaidiang Paul chemajia hi \bk* Colossia mi ngaidiang chemajia khale apha in-angrip-ah Jisu Christa inneisuo kum soomruk thengnga Paul in ileimajia eii. Kamajiapa hi Paul kei ka-eii tiya amalar (1:1). Colossia larik ah Paul apumtak in donna chong imajia ngaikha Ephesia larik hin insam om-innum kasing kathei katam in Paul imajia eii tiya inzootna innei. Paul imajia larik ejarra Ephesia ramsuungnga kaom koisuok katamlangdiang hiwa larik mintungsik hi ajar eii. Hiwa larik majia laikhan Paul hi mikhumna ah kaom tiya aril (3:1, 4:1, 6:20). Paul in hiwa larik hi Tychicus diang Ephesus koisuok kapha sik-ah ajuona lamma ajuominchoi (6:21-22).
\ip \bk Ephesus\bk* hi kalokthei khuopui kha alei-eii halli Asia Minor ramsuungnga kaom Rome ngai khuopuilai kha-um alei-eii. Ephesus hi Greek ngai Pathian juornu Artemis biak-inn omjarra araming kasi khuopui kha alei-eii (Chuon 13:23-31). Ephesus koisuok hi inphutna achu arajung kacheet koisuok kha inlei-eii takkha ahekna achu in-or koisuok kha injuo-eii (Chonglar 2:1-7).
\ip Hiwa larik inphutna makheiya alai katunghin, Pathian in ama mi ngaihi angtho tholi Jisu Christa diang sanminringna apeme tijarra Paul in inthiarra rilcheenna anei. Paul in koisuok hi taksa pum eii halli Christa hi taksa lu kha eii khat-um koisuok hi inhongsak inn kha eii halli Christa hi lukchi miliya inhongsak inn kasur lungpui kha eii tiya minkhina anei. Larik lai makheiya ahekna katung khan Paul in christian ringkhuo khat-um nunchan jarra minchuna anei.
\iot Asuungnga kaom Chong
\io1 1. Paul in apumtak jarra inrilsuok le inruoiya Ephesia mi ngaikha donna anei \ior (1:1-2)\ior*
\io1 2. Hiwa thengnga Paul in koisuok hi Christa le injom eti jarra aril \ior (1:3–3:21)\ior*
\io1 3. Hiwa thengnga paul in christian ringkhuo jarra aril \ior (4:1–6:20)\ior*
\io1 4. Insuona chong \ior (6:21-24)\ior*
\c 1
\p
\v 1 Pathian lungdou nuoiya Christa Jisu tirton ka eii Paul kei'n,
\p Ephesia ah\f + \fr 1:1. \fr*\ft Manuscript lekkhat achu \ft*\fq Ephesia ah \fq*\ft itihi majiamu.\ft*\f* kaom inthiang Pathian mi ngai khat-um Christa Jisu diang huoikajou ah akaom ngaidiang: \rq Chuon 18:19-21; 19:1\rq*
\p
\v 2 Nipa Pathian khat-um Pumi Jisu Christa diangnga inphut riangwai khat-um akahoi kadai kha nangnidiang omrase.
\s1 Christa diangnga inphut Ratha lamtiang Rawaan
\p
\v 3 Pathian khat-um eini Pumi Jisu Christa Pa ka eii, marwaanna inphut ratha lamma angrakip Christa diangnga inphut rawaan kanapeii ama kha minpaakrui. 
\v 4 Ajarchu ama'n manmasituol aboolmaklai amadiang inthiang khat-um kachok omlekleiya ama maikuungnga ami ka-esik ah eini inakadang kha ni-ejei.
\p Minriang jarra 
\v 5 Pathian in ama imanuom khat-um alungdou nuoiya, Jisu Christa diangnga inphut ama sangai enasik-ah, eini inakadang kha ni-ejei. 
\v 6 Iminriangkhet Asapa diangnga inphut alurna riangwai kha aman kaboiya einidiang anapeii jarra, eini'n Pathian kha minpaakrui.
\p
\v 7 Ajarchu Christa thisen khan\f + \fr 1:7. \fr*\fq Christa thisen khan; \fq*\ft emakli \ft*\fqa Christa in inphanna ithi khan.\fqa*\f* eini inakatan kha eii khachu, eini manu ngaikha inara-ngaidam kha eii. Pathian riangwai kha angtuk akalokme, \rq Col 1:14\rq*
\p
\v 8 ama'n einidiang hituk kalok ah inapehi.
\p Ama lungsing lungwar khat-um ajetna pumpuiya 
\v 9 inphuumma kaom ama lungdoukha Christa diang i-ngaidon dungjuiya einidiang anaminjetjei. 
\v 10 Apha kha huui hongtung nikhan Pathian in amintungsik khachu, marwaan khat-um nuoipilla kaom ang rakip ngaihi Christa nuoiya inomwiaksik eii.
\p
\v 11 Ang rakip Pathian i-ngaidon khat-um lungdou nuoiya kasuok kha eii; ama lungdou dungjuiya Christa diang ami enasik-ah Pathian in eini nakadangjei, hiwahi inphutna makheiya ama imanuom dungjuiya eii. 
\v 12 Christa diang ngamna kaneimasa eini ngaihi ama lurna lianna minpaakrui.
\p
\v 13 Chong kadik khat-um sanminringna chongpui kajetjei, halli amadiang ngamna kaneijei nangni-um amadiang chong inkhitna kha Ratha Inthiang diang jetnabi inadeeng kha ning-ejei. 
\v 14 Eini in nichangsik kasuok kha nichangmak laiseng Ratha Inthiang khan sakhi eya na-ngirpi, khawa jarra ama lurna lianna kha minpaakrui.
\s1 Minpaakna khat-um Pathian diang Nina
\p
\v 15 Nangni in Pumi Jisu ningngamna khat-um Pathian kajet mi rakip ngaikha ningminriang itihi kajetniya inphut, hiwa jarra, 
\v 16 kei'n nangni sik-ah inchat lekleiya Pathian kaminpaak khat-um Pathian diang kananipi. 
\v 17 Ajarchu nangni'n ama kha kheella ningjet nasik-ah, Pumi Jisu Christa Pathian ka eii, kalurkhet Pa Pathian in lungsing lungwaar khat-um kamalar mator ratha kha nangnidiang napenasik kei'n inchat lekleiya Pathian diang kani. 
\v 18 Ningmalungnga inthiangnga ama'n nangni anakoina jarkha ningjet matornasik, khat-um Pathian kajet ngai changsik hi hituk kalok eii itihi munasik a-um kei'n Pathian diang kani, 
\v 19 halli ama ka-ngamnajei eini chungnga ama chuonthohi angtuk kalokme. Khawa ranak kha
\p
\v 20 inliingna ah Christa kha akathi makheiya aminring khat-um marwaanna akut changtiang amin-ong. \rq Minpkla 110:1\rq*
\p
\v 21 Christa in marwaan na kaom waikaroon ngai, chuon karoon ngai, ranak ngai, reng ngai chungnga wai aroonjei, halli tuunna khangnga bit emak-ah akahongsik khangnga raming inthang rakip chungnga ama raming in wai roonjei.
\p
\v 22 Halli Pathian in ang rakip ngaihi Christa kenuoiya adajei halli koisuok sik-ah ama kha ang rakip ngai chungnga wai aminroonjei. \rq Minpkla 8:6; Col 1:18\rq*
\p
\v 23 Koisuok hi Christa taksapum eii, ang rakip chungnga apum tak-in asipna ama puitungna kha eii.\f + \fr 1:23. \fr*\fq ang rakip chungnga apum tak-in asipna; \fq*\ft emakli \ft*\fqa ama chungnga Pathian puitungna khan asip.\fqa*\f*
\c 2
\s1 Christa diang Ringna
\p
\v 1 Apha matiangchu nangni chong ningjuimak khat-um ningmanu jarra ratha lamtiang ningleithi kha eii. 
\v 2 Khawa laikhan nangni'n manmasituol kadikmak lamkha ningleijui khat-um lairalak rengramma waikaroonpa, Pathian kajuimakngai chungnga chuonkatho ratha nukkha ningjui 
\v 3 Hiwangai karra eini rakip-um nipum khat-um nimalung imanuomkha nijuiya taksa lamma niringnga nileiom, khawa jarra eini um mi rakip le in-angnga, Pathian raangna nuoiya kaom sangai nilei eii.
\p
\v 4 Takkha minriang kalok Pathian in, ama minriangna kha eini chungnga alok jarra, 
\v 5 eini'n nimanu roonna nileithiya nileiom innum, ama'n Christa le inruoiya anaminring. Riangwai jarra nangni ringna ningmu kha eii. \rq Col 2:13\rq*
\p
\v 6 Halli Pathian in Christa le inruoiya eini anaminring khat-um Christa Jisu diang niomjarra ama'n marwaan ramma amale inruoiya wai naminroon, 
\v 7 hiwahi akahongsik pha rakip-ah minkhidan kaboi ama minriangna riangwai kha Christa diang anaminmu nasik eii. 
\v 8 Ajarchu riangwai jarra ngamna khan nangni ringna ningmu kha eii; halli hiwahi nangni ithokha emak, takkha Pathian kutchoi kha eii, 
\v 9 tuteii innum in-or ommak nasik, chuontho jarra emak. 
\v 10 Ajarchu eini ngaihi ama kutbool ni eii, Pathian in eini thosik-ah ileibool suojei chuon katha kathosik-ah Christa Jisu diangnga inabool kha ni eii.
\s1 Christa diang Inkhatbit ni eii
\p
\v 11 Inpum tak-in wunkatan kin-eii kati (taksa-ah wun intan) inmani'n nangni naneiya inphut wunkatanmak Zaatlop ning eii natikha ngaidonru. 
\v 12 Khawa phakhan Christa diang leiom makchu, Pathian ikadang mi ngai lei-emak chu, Pathian le inzootna khan ram leiilaak mi ning-eii, manmasituolla ngamna khat-um Pathian kajetmak ninglei eii itikha ngaidonru. 
\v 13 Takkha apha khat-ah kalaak-ah kaleiom nangni ngaikha tuunchu Christa Jisu thisen khan Christa diang kanaiya inaheiruoi kha ning ejei.\f + \fr 2:13. \fr*\fq Christa Jisu thisen khan; \fq*\ft emakli \ft*\fqa Christa in inphanna inathipi khan.\fqa*\f* 
\v 14 Inni kaminhalla kaom bangkha makoiya khat-um inni kha inkhatbit kanamin eii, Ama apumtak kha eini sik-ah akadai kha eii.
\p
\v 15 Ama'n inni kalei eii kha akathar miring inkhat amadiang min enasik-ah ama'n Jihudi ngai chongpe ngaili sinadan ngaikha aminmangnga kahoi kadai inzootna kha abool. \rq Col 2:14\rq*
\p
\v 16 Cross-ah ithi khan inmani inhalna kha Christa in aminmang, Cross jarra taksa inni kalei ekha taksa inkhatbit amin eya Pathian le aminjomjei. \rq Col 1:20\rq*
\p
\v 17 Halli ama'n aheiwa-ah akahoi akadai kha Pathian diang kalaak-ah akaom inmani diang khat-um kanaiya akaom nangnidiang aril. \rq Isa 57:19\rq*
\p
\v 18 Ajarchu Christa diangnga inphut Jihudi khat-um Zaatlop eini in Ratha inkhatbit ah Pa Pathian maikuungnga niheiwa mator.
\p
\v 19 Khawa jarra nangni chu woikhat inlet-ah khuolmi khat-um zaatlop kha emakchujei, takkha Pathian mi ngai khale inruoiya nirammi khat-um Pathian innsuungkhur mi ning ejei. 
\v 20 Tirton ngaili Pathian chongkachoi ngai'n innmun inleideeng halli inleideeng innmun chungnga insak inn kha nangni ning eii halli akil miliya in-ong lungpui kha Christa Jisu kha eii. 
\v 21 Inn pumpui khan amadiang inchun halli Pumi diang inthiang biak-inn ka-esik ah insak eii. 
\v 22 Halli nangni um Pathian in Ratha-ah i-om Christa diangnga insaksuom inn kha ning ejei.
\c 3
\s1 Zaatlop ngaidiang Paul Chuontho
\p
\v 1 Hiwa jarra, zaatlop nangni rathuulla Christa Jisu sik-ah mikhumna ah kaom Paul kei'n Pathian diang kani. 
\v 2 Hiwa Pathian riangwai nangni sik-ah thosik chuon keidiang inape kha nangni'n ningjetjei tia kei ka-ngamnajei. 
\v 3 Khachu imphuumma kaom Pathian lungdou kha malarra keidiang anaminjetjei, halli kei'n kabongnga kimajia kha ejei.
\p
\v 4 Hiwahi ningteel phakhan kei'n Christa diangnga inphuumma kaom kajet nakha nangni'n jetningte. 
\v 5 Apha matiangchu hiwa inphuumma kaomhi manmasi ngaidiang ileiminjet emak, takkha tuunchu Ratha-ah Pathian in ama tirton khat-um Pathian chongkachoi ngaidiang iminjetkha ejei. 
\v 6 Inphuumma kaom khachu chongkahoi khan ajar eya Zaatlop ngaikha Israel ngaile bateii in-esuom, khat-um Pathian in Christa Jisu diangnga chong inkhitna kha inchansuomma taksa inkhatbit insuungkhur in ejei. \rq Col 1:26,27\rq*
\p
\v 7 Ama ranakli chuontho nuoiya Pathian riangwai jarra inapeii kutchoi dungjuiya hiwa chongkahoi sik-ah kei suok ka-inchang. 
\v 8 Pathian ikadang mirakip karra aheknakhet ka-e innum, minkhidan kaboi inchongkhet Christa jarra zaatlop ngaidiang chongkaril sik-ah riangwai hichu keidiang inape kha eii, 
\v 9 Halli angrakip akabool Pathian diang akatheng khang rakip-ah alei inphuumma alei kaom, hiwa jarra mirakip diang inphuumma kaom kha angme tikha kaminthiar sik-um eii. 
\v 10 Ama imanuom khachu tuun koisuok diangnga inphut Pathian lungsing lungwar intei angjet kha marwaan ramma chuonkaroon waikaroon ngaidiang minjetnasik hi eii. 
\v 11 Hiwahi eini Pumi Christa Jisu diangnga inphut imintung hektik kaboi ama i-ngaidon dungjuiya itho kha eii. 
\v 12 Ama diangnga inphut khat-um amadiang ngamna jarra eini'n Pathian diang ngamna khat-um nilungdouwa luutmatorna nimu kha eii. 
\v 13 Kei'n nangni sikbit-ah kanapoongpi jarra nangni'n ningmalung minpoong maru; ajarchu nangni lurna sik eii.
\s1 Christa Naminriangna
\p
\v 14 Hiwa jarra kei'n Pa Pathian maikuungnga kemurkhup thep-ah chubei katho. 
\v 15 Ama makheiya marwaan khat-um nuoipil chungnga kaom insuungkhur rakip in inraming inroon. 
\v 16 Ama hektik kaboi lurna dungjuiya ama Ratha ah nangni suungnga ningratha ngarnasik kei'n Pathian diang kani. 
\v 17 Halli ngamna le inruoiya Christa in nangni malung suungnga omnasik khat-um inriang lamma arajung kasi khat-um kacheet-ah ningngir nasik-ah kei'n Pathian diang kananipi, 
\v 18 khachu Pathian mi ngai rakiple inruoiya nangni'n Christa minriangna kha adung akhang, insaang inthuuk jetnasik-ah ranak ningnei nasik, 
\v 19 khat-um jetna rakip neek-ah kakheel Christa minriangna kha ningjetnasik tichu Pathian sipna kha minkhidan omlekleiya nangni'n ningsipnasik kha eii.
\p
\v 20 Tuunchu eini nina emakli ni-ngaidon chungtiang ama ranak dungjuiya eini suungnga chuonkatho mator amadiang, 
\v 21 koisuok ah khat-um Christa Jisu diang khang rakip-ah hektik kaboiya kalur kalian kha erase! Amen.
\c 4
\s1 Christa ah Taksa Inchun
\p
\v 1 Pumi sik-ah mikhumna ah kaom kei'n kanamasok, khachu nangni anakoina lamkhan aman kaomma ringru.
\p
\v 2 Kadai khat-um nunchan inchuol kha eru, malung kadai eru, kadei karaat e-inlang inkhatli inkhat inriangru. \rq Col 3:12,13\rq*
\p
\v 3 Ratha in inapeii malung inruolnakha kacheet-ah nida matornasik, katha khetkha tho-inlang kadaiya omsuomru. 
\v 4 Nangni nakoilai Pathian diang ngamna inkhatbit-ah inakoi angnga taksapum inkhat, Ratha inkhat, 
\v 5 Pumi inkhat, ngamna inkhat, baptism inkhat, 
\v 6 Pathian inkhat om halli mi rakipngai pa ka-eii ama'n angrakip chungnga wai aroon, angrakip diang chuon atho, halli angrakip diang om.
\p
\v 7 Takkha kutchoi khachu eini inkhat inkhatdiang Christa imanuom dungjuiya inape kha ejei,
\p
\v 8 khawa jarra hintia injia,
\q1 “Ama'n insaangtiang akal laikhan,
\q2 inkhumma inda ngaikha akatamtak ama'n aruoi;
\q2 halli mi ngaidiang ama'n kutchoi ngai aleipeii.” \rq Minpkla 68:18\rq*
\p
\v 9 “Ama'n akal lai” itihi ama'n nuoipil suungnga-um\f + \fr 4:9: \fr*\ft Nuoipil suungnga tinahi nuoipil tina eii.\ft*\f* ileiluut tina eii khawa elekleiya ang tiname? 
\v 10 Angrakip diang asip nasik, nuoitiang kajuochum ama kha eii marwaan rakip chungtiang akakal kha-um. 
\v 11 Halli ama inapeii kutchoingai khachu, mi lekkhat in tirton, lekkhat in Pathian chongkachoi, lekkhat in Pathian chongkaril (evangelists), lekkhat in Pastor khat-um ocha ngaikha in-eii. 
\v 12 Hiwahi Pathian mi ngaikha christian chuonna Christa taksapum kha minlok nasik-ah itho kha eii. 
\v 13 Pathian sapa nijetna khat-um ningamna khan eini rakip heiwa suomnita inkhatbit nihong esik eii; Christa puitungna kha nitung phakhan eini'n puikatung mi ngai ni-esik eii. 
\v 14 Halli maleisei katho akadikmak chongkha kadik angnga chongriam kaminchu ngai chongril kha'n iwuongpui khat-um choinarei ichoi akadoong naipang kha enominjei. 
\v 15 Khawa rathuulla inriang ratha-ah akadik kha ril-inlang, alu ka-eii Christa diang ang rakip-ah ni-insoonsik eii.
\p
\v 16 Ama diangnga inphut taksa saram rakip kha inchun khat-um injom, taksa saram rakip in inthosik chuonkha intho-ah taksa pumpui kha inriang lamtiang minsoon. \rq Col 2:19\rq*
\s1 Christa diangnga Ringkhuo Kathar
\p
\v 17 Pumi ramingnga kei'n nangni diang ngartheiya chong kanati, khachu nemna kaboi ka-ngaidon zaatlop ngai angnga nangni'n ringkhai maru, 
\v 18 inmani malungchu kaziing in asip, Pathian ipeii ringna khan inchelmu ajarchu inmalung inminngar khat-um kamo kha in-eii. 
\v 19 Inmani diang injak tikha ommakjei, inpum kha taksa lamma inpeya halli kathamak nunchan kaboi chuon ngaikha kachi omlekleiya intho.
\p
\v 20 Christa jarra nangni'n ningjet khachu khawa ngaikha emak! 
\v 21 Nangni'n ama jarra ningjetjei khat-um Jisu diang kaom akadik kha nangnidiang naminchu.
\p
\v 22 Nangni'n akamaruo mi kha mathaantru, ajarchu khawa akamaruo mi kha maleisei katho taksa manuomna khan minmangjei, \rq Col 3:9\rq*
\p
\v 23 khawa jarra ningmalung ningratha ngaikha minthar inlang,
\p
\v 24 halli inthiang, akadik, nunchan katha khat-um Pathian ramilla inbool akathar mi kha inluktru. \rq Col 3:10; Inphut 1:26\rq*
\p
\v 25 Maleisei rilkhai maru, mi rakip in akadik kha indiang inwaipui ngaidiang rilrasu, ajarchu eini rakip pum inkhat bit-ah kaom saram ngaikha ni-eii. \rq Zech 8:16\rq*
\p
\v 26 Raangru takkha manu thomaru; ningraang kha kani minta maru, \rq Minpkla 4:4\rq*
\p
\v 27 halli Seitan diang mun pemaru. 
\v 28 Inruup khan woikhat inruup thokhai marase, takkha kapoong karaalla kaom mi ngaidiang asan matornasik malung inthiangnga akut-ah chuon thorase. 
\v 29 Mi inmangsik chongkha ningmurra inphut suokmarase takkha insoonna sik arei dungjuiya mi ngai kasansik chongkha ningmur makheiya suokrase, ajarchu kara-ngai rakip in rawaan kamu in enasik eii. 
\v 30 Chongtanna nikhuoni sik-ah Pathian Ratha kha nangni chungnga jetnabi nadeeng kha ejei, khawa jarra Pathian Ratha Inthiang kha minnuor maru. 
\v 31 Chongril kakha, mikathat zoot, karaang, kakheekwou, chongse karil khat-um mi karilse ngaihi mathaanru.
\p
\v 32 Khawa rathuulla inkhatli inkhat insanru khat-um inriangru, Pathian in Christa diang ina-ngaidam angnga inkhatli inkhat inngaidamru. \rq Col 3:13\rq*
\c 5
\s1 Warra Karing
\p
\v 1 Iminriang sangai angnga, Pathian omchan kajui kha eru.
\p
\v 2 Christa in eini inaminriang khat-um eini sik-ah Pathian diang arim kahoi sik-ah apumtak inpesuok-ah nanphalpi angnga, inriang lamma siru. \rq Suok 29:18; Minpkla 40:6\rq*
\p
\v 3 Takkha zool-inthai halli inthiangmak emakli kara-ot iti ngaihi nangni suungnga araming-um rilmarasu, ajarchu inthiang Pathian mi ngaisik akatha kha emak. 
\v 4 Chongkase karil, ka-am chongril, khalook chong apha elekleiya akaril daru, takkha khawa rathuulla Pathian minpaakna chong rilru. 
\v 5 Inthiangnga jetru, zool-inthai, apum inthiangmak emakli mi ngaita kara-ot miring kha (ramil chubei katho mi kha eii) Christa khat-um Pathian rengram kha luuttheinuni.
\p
\v 6 Tuteii inkhat innum nangni kha nemna kaboi chong khan lamleiitiang nakeiruoi marasu, ajarchu hiwa ngai jarra chongkajuimak mi ngaidiang Pathian raangna kha kajuotungsik kha eii. 
\v 7 Khawa jarra inmani ngaile inchun suomma chuon thomaru. 
\v 8 Apha matiang akaziing khan ningleiom, takkha tuunchu Pumi diang warkha ning ejei; war sangai angnga siru, 
\v 9 ajarchu war\f + \fr 5:9: \fr*\fq war; \fq*\ft manuscripts lekkhat achu \ft*\fqa Ratha tia injia.\fqa*\f* kara khachu akatha, katuun khat-um akadik ngaihi in-eii, 
\v 10 halli Pumi malung tainasik ngaikha entokru. 
\v 11 Akara kaboi aziingna munna chuonkatho ngaile inchunmaru, khawa rathuulla inmani ngaikha malarru. 
\v 12 Ajarchu inmani ngai'n aziing na-ah intho chuon ngaikha rilsik um jakna om. 
\v 13 Takkha war khan jowar phakhan angrakip ngaikha inhong inlarjei, halli inmani nunchan ngaikha inthiangnga inlarjei. 
\v 14 Khawa jarra hin tia aril,
\q1 “Akazaal nangni intheitru,
\q2 khat-um kathi makheiya ringtru
\q1 halli Christa in nangni diang awarsik eii.” 
\p
\v 15 Khawa jarra singtheiya ringru. Ka-am emaru kasing kha eru.
\p
\v 16 Apha kacha ningmuna rakip kasingnga inliing naru, ajarchu aphahi thakhaimakjei. \rq Col 4:5\rq*
\p
\v 17 Khawa jarra amkhai maru, takkha Pumi lungdou kha jettru.
\p
\v 18 Halli ju inruimaru, ajarchu khawa khan napum aminmangsik eii; khawa rathuulla Ratha ah sipru.
\p
\v 19 Ningmalung pumpuiya inpaak, minpaak laa, khat-um ratha laa kha karok-ah Pumi diang sak inlang inkhatli inkhat inkookru.
\p
\v 20 Pumi Jisu Christa ramingnga, ang rakip sik-ah Pa Pathian kha amun rakip-ah minpaakru. \rq Col 3:16,17\rq*
\s1 Ompui Sangram jarra
\p
\v 21 Christa khoya nithole inruoiya inkhat in inkhat nuoiya omru.
\p
\v 22 Numei ngai Pumi nuoiya ningom angnga ningruothar ngai nuoiya omru. \rq Col 3:18; 1 Pet 3:1\rq*
\p
\v 23 Ajarchu Christa in koisuok lu i-eii angnga aruothar khan anumei lu eii; halli Christa apumtak in ama taksa, koisuok kakatanpa eii. 
\v 24 Koisuok khan Christa nuoiya i-om angnga, nupuinu ngai'n ang rakip-ah inruothar nuoiya omrasu.
\p
\v 25 Christa in koisuok kha aminriang jarra aringkhuo ipeii angnga, pakhat ngai ningnumei ngaikha minriangru. \rq Col 3:19; 1 Pet 3:7\rq*
\p
\v 26 Koisuok kha tuiya aminthiang suoli, Pathian diang pesik-ah chongnga ama'n aminthiangsik eii, 
\v 27 khachu koisuok kha kapoiya, abi khat-um kazuur omlekleiya, takkha inthiang khat-um kachok omlekleiya amadiang apenasik eii. 
\v 28 Inruothar ngai'n innumei kha inpumtak inminriang angnga inminriangsik eii. Innumei kaminriang kha inpumtak kaminriang kha eii. 
\v 29 Tuteii um apum kaminriangmak mi ommu, takkha Christa in koisuok sik-ah itho angnga, eini'n nipum niwai khat-um katha-ah nibool, 
\v 30 ajarchu eini ngaihi ama pumma kaom saram ngaikha ni-eii. 
\v 31 “Hiwasik jarra pasal khan anu apa kha mathaanta halli anumei khale inchunsik eii, halli inmani inni kha pum khatbit in esik eii.” 
\v 32 Hiwahi inphumma kaom akadik kha eii, takkha kei'n Christa li Koisuok jarra kiril kha eii. 
\v 33 Khale inruoiya nangni rakip in ningpumtak ningminriang angnga ningnumei kha minriangru, halli anumei khan aruothar kha khoya thorase.
\c 6
\s1 Nuli Pa khat-um Sali Nai
\p
\v 1 Sali nai ngai, Pumi diang ningnu ningpa chongkha juiru, ajarchu hiwahi akadik kha eii. \rq Col 3:20\rq*
\p
\v 2 “Ningnu ningpa kha khoya thoru” hiwahi chong inkhitnale inruoiya mansakhet chongpeii kha eii,
\p
\v 3 hiwahi “Nangni ringkhuo lamma akatha enasik khat-um nuoipil chungnga ringkhuo kasoot-ah ningring nasik eii.” \rq Suok 20:12; Innidan 5:16\rq*
\p
\v 4 Pa ngai ningsa ngai raangnasik chuon kha inmani diang thomaru, khawa rathuulla nunchan katha khat-um Pumi lamma minchu inlang minlokru. \rq Col 3:21\rq*
\s1 Suok li Karu jarra
\p
\v 5 Suokngai nuoipil chuungnga ningkaru ngaikha Christa diang ningjuisik angnga ningmalung inthiangnga khoya ningthole inruoiya chiru.
\p
\v 6 Inmani ngai'n namu phakhan innaminriang nasik-ah chuon katha-ah nitho elekleiya, takkha Christa suok ngaikha e-inlang Pathian lungdou kha ningmalungnga wonrep inlang thoru. 
\v 7 Manmasi sepa emak, takkha Pumi sepa eii ti-inlang ningmalung pumpuiya thoru,
\p
\v 8 ajarchu suok um suok ka-emak um Pumi'n miring rakip diang intho chuon katha dungjuiya rawaan apesik eii tihi nangni'n ningjet. \rq Col 3:22-25\rq*
\p
\v 9 Karu ngai nasuok ngaikha in-angrip mit-enna en-inlang minchinasik chuonkatho emaru, ajarchu nangni khat-um inmani karu kha marwaanna om tihi nangni'n ningjet, halli ama'n iteii mimeel mimai enmak. \rq Col 4:1; Innidan 10:17; Col 3:25\rq*
\s1 Pathian Raalphur rakip
\p
\v 10 Ahekna-ah, Pumi diang khat-um ama ngarna ranak khan ngirru. 
\v 11 Seitan chuonheitho kathamak kha ningdei matornasik Pathian raalphur puondiar rakip kha inlukru. 
\v 12 Ajarchu eini indeipui hi taksa khat-um thisen kha emak, takkha waikaroon, intor, hiwa akaziing manmasituol ranak khat-um lairalak ah ratha kathamak ngai khale ni-indei kha eii. 
\v 13 Akathamak nikhuo kha heiwa kalla ningngir matornasik-ah, khat-um angrakip ningthosuoli ningngir tit-ah ningom nasik-ah Pathian raalphur puondiar rakip kha inluktru.
\p
\v 14 Akatuun kha kongkhit minchang inlang ngirru halli akadik kha phou minchang inlang inlukru, \rq Isa 11:5; Isa 59:17\rq*
\p
\v 15 kahoi kadai ringna chongkahoi kha rilsik-ah insuukchak kha ningkekok min-eru, \rq Isa 52:7\rq*
\p
\v 16 apha rakip-ah ngamna kha phou min e-inlang choiru, khawa khan Kathamak Mipa meikakaang phelru kha ooksik eii.
\p
\v 17 Sanminringna lukhu kha choiru, halli Ratha chem kha-um choiru, khawa kha Pathian chong kha eii. \rq Isa 59:17\rq*
\p
\v 18 Nisik rakip kha ang rakip-ah Ratha-ah Pathian diang niru, hiwahi ningmalungnga wonrep inlang inringchakru halli Pathian mi ngai rakip sik-ah Pathian nipicheiru. 
\v 19 Kei sik-um Pathian diang niru, khachu karil sik-ah kamur kamalongna rakip-ah kachi omlekleiya inphuumma kaleiom ringna chongkha karil matornasik-ah chongngai kha keidiang najuope kha erase, 
\v 20 ajarchu chongkahoi sik-ah kei inakadang taangwa kha ka eii, tuun mikhum na-ah kaom innum, kathosik ka-ekha kachi omlekleiya katho mator nasik Pathian diang nanipiru.
\s1 Insuona Chong
\p
\v 21 Nisuopui ka eii khat-um Pumi chuon kha huoikajouwa katho Tychicus in kei ang kalachangme emakli angme kitho tikha ningjet nasik-ah angrakip narilpijeite. \rq Chuon 20:4; 2 Tim 4:12\rq*
\p
\v 22 Hiwa sik-ah Tychichus hi eini ang nilachangme khat-um nangni namasok nasik-ah kei'n nangni diang kiheitir kha eii. \rq Col 4:7,8\rq*
\p
\v 23 Kahoi kadai khat-um ngamna le inruoiya minriang kha Pa Pathian khat-um Pumi Jisu Christa diangnga inphut ule nai nangni chuungnga kajuotungkha erase. 
\v 24 Pumi Jisu Christa kha hektik kaboiya kaminriang miring rakip diang riangwai kha kajoutung erase.