\id COL Kharam: Bible Translation 1st Edition.
\ide UTF-8
\ide Unicode (UTF8)
\h Colossia
\toc1 COLOSSIA Mi-ngaidiang Paul Chemajia
\toc2 Colossia
\toc3 Col
\mt1 COLOSSIA
\mt2 Mi-ngaidiang Paul Chemajia
\imt1 Chonglamsaat
\ip \bk Colossia koisuok diang chemajia hi tirton Paul imajia eii (Col. 1:1)\bk* Hiwa Colossia koisuok diangnga chemajia hi Christa inneisuo kum soomruk thengnga Paul in Rome mikhumna suungnga omlai khanna mikhumna makheiya imajia eii. Colossia, Ephesia khat-um Philemon hiwa larik inthumhi mikhumna larik tia injetna ajarchu Paul in mikhumna makheiya imajia larik ejarra eii. Hiwa larik hi Colossia khuopuiya kaom koisuok diang Paul in imajia eii. Colossia koisuok hi Paul apum tak-in iphun emak tia aril (2:1), takkha ma-um arei om tiya ngaidon, Colossia koisuok hi Epaphras iphun ete tia inlei ajarchu Epaphras hi Colossae makheiya eii.
\ip Colossia koisuok suungnga akadikmak ocha lekkhat inom jarra Paul in amalung poongna anei. Hiwa ngai jarra larik hin Paul in katam khat pha aleiya tam amajia. Colossia koisuok suungnga Jihudi Christian rahooi ngai'n Inzootna Maruo (OT) suungnga injia Jihudi ngai sinadan kha Christian leiilaak ngaidiang juimak chamak intiya inminchu, sinadan ngai karra aru etheiya wuntan jarra hi eii. Paul in Christian eini chu Pathian izoot mi enasik Christa elekleiya tuteii um emakli eteii nijuisik arei ommak tiya imajia eii (Col 1:15-20). Paul in manmasi ngai ngaidon dungjuiya minchuna ngaihi nemna kaboi eii tiya amajia (Col 2:8).
\iot Asuungnga kaom Chong
\io1 1. Paul in Colossia koisuok diang donnachong ma minsa-ah phutna anei \ior (1:1,2)\ior*
\io1 2. Hiwa thengli akadikmak ocha ngai rakook-ah Christa lokna jarra Paul in amajia \ior (1:3–3:4)\ior*
\io1 3. Paul larik rakip ah imajia angnga minchu mindikna khat-um akatha Christian ringkhuo khan inring chaknasik jarra hiwa larik heksiktiang amajia \ior (3:5–4:6)\ior*
\io1 4. Paul in chemajia larik hi Colossia khat-um leiilaak koisuok ngaikhan inringnga teelru tiya minpaak nale inruoiya minhekna anei \ior (4:7-18)\ior*
\c 1
\p
\v 1 Paul, Pathian lungdou nuoiya Christa Jisu tirton ka-eii, khat-um einile unai ka-eii Timothy in—
\p
\v 2 Colossae ah kaom Pathian mi ngai khat-um Christa diang ngamna kaom ule nai ngaidiang:
\p Pa Pathian riangwai khat-um kadai kha nangni chungnga omrase.
\s1 Pathian Minpaaknale Nina
\p
\v 3 Keini'n nangni sik-ah Pathian kinni phakhan, eini Pumi Jisu Christa Pa Pathian kha inchatlekleiya kinminpaak. 
\v 4 Ajarchu Christa Jisu diang ningngamna khat-um Pathian ka-ngamna miring rakip diang ningminriang kha keini'n kinjet. 
\v 5 Nangni sik-ah marwaanna kaomjei ngamna jarra, hiwa ngamna hi matiang akadik chongkhan ningleijetjei. Chongkahoi kha nangnidiang aheitungjei. 
\v 6 Nangni'n Pathian riangwai kha ningjet khat-um inthiangnga ningkeiluut niya inphut nangni karra akasuok kha angnga hiwa Pathian chonghi manmasituol pumpuiya inthangnga akarajei.
\p
\v 7 Minriang kaom keini suok inchangpui, keini\f + \fr 1:7. \fr*\fq keini \fq*\ft manuscript lekkhat achu \ft*\fqa nangni tia injia.\fqa*\f* rathuulla Christa sik-ah ngamna kaom chuonkatho Epaphras diangnga inphut nangni'n Pathian riangwai kha ning-inchujei, \rq Col 4:12; Philem 23\rq*
\p
\v 8 halli ama'n Ratha-ah ning-inriang kha keinidiang anarilpi.
\p
\v 9 Hiwa jarra, keini'n nangni jarra kinjetniya inphut, keini'n nangni sik-ah Pathian kani inchatmung. Ratha inapeii lungsing lungwar khat-um jetna theina rakip khan Pathian lungdou kha nangnidiang siprase kintia Pathian diang kinni. 
\v 10 Pathian lungdou katho, Pumi diang ringkhuo kalurra ningomnasik-ah, katha chong rakip-ah akakara, Pathian singna theina-ah insoon ning-enasik Pathian diang kinni. 
\v 11 Ama lurna lianna ranak dungjuiya, kadei karaat, khat-um kadei kangar emator nasik-ah ranak rakip-ah nangni namin-ngar rase, 
\v 12 halli karok-ah inthiang Pathian sangai omnamun war rengram khan nangni-um karei kachangsik-ah rahoi kanamin-eii tum kanapeii Pa Pathian kha minpaakru. 
\v 13 Ama'n akaziing ranak diangnga inphut eini kha anakatan halli iminriang Asapa rengramma anaheiruoi, 
\v 14 amadiang eini manu ngai ngaidamna, nakatanna kha nimu. \rq Eph 1:7\rq*
\s1 Christa khat-um Ama Chuontho
\p
\v 15 Christa hi nimumak Pathian ramil kha eii, kutbool rakip karra salutir kha eii; 
\v 16 ajarchu angrakip ngaihi ama diangnga inphut Pathian ibool eii, marwaanna halli nuoipilla, nimu khat-um nimumak, lairalak-ah rengmun ngai emakli ranak ngai, reng ngai emakli waikaroon ngai; ang rakip ngaihi ama sik-ah Pathian in ibool eii. 
\v 17 Angrakip ngai matiang Christa injirjei, halli ama diangnga inphut angrakip injir.
\p
\v 18 Christa hi koisuok lu kha eii halli koisuok hi ama taksa kha eii, kathi ngai karra karingmasa salutir kha ama eii, ajarchu angrakip chungnga chungkanung khet kha a-enasik eii. \rq Eph 1:22,23\rq*
\p
\v 19 Ajarchu Pathian sipna kha Christa diang omsik hi Pathian lungdou alei eii,
\p
\v 20 halli ama diangnga inphut nuoipilla khat-um marwaanna kaom phur rakip ngaikha cross-ah kasar ama thisen khan inngeina khat-um kadai kha aheichoi. \rq Eph 2:16\rq*
\p
\v 21 Apha khat-ah nangni um Pathian diang leiommakchu halli kathamak chuon ningtho khat-um ningngaidon jarra Pathian le inhalmi ninglei eii. 
\v 22 Takkha tuunchu ama'n taksa ah ithi khan inzootna aheichoijei, khawa khachu nangni kha inthiang, kachok omlekleiya khat-um noonkuung pesik omleiya ama omnakhan anamin-ngir nasik eii. 
\v 23 Ningjetjei Pathian chong-inthiang makheiya ngamna leiilaak thuulmaru, ngamna cheiru, kacheet-ah ngirru, marwaan nuoiya kaom miring rakipdiang inriljei, halli hiwa chongkahoi sik-ah Paul kei-um suok kha ka eii.
\s1 Koisuok sik-ah Paul Chuontho
\p
\v 24 Tuunchu nangni sik-ah kipoong kha kei'n karok, Christa in taksa ah koisuok sik-ah poongna ileidei insam ngaikha mintungnasik kei'n taksa ah kipoong hi'n insam ngaikha kamintungjei. 
\v 25 Pathian natirna nuoiya nangni diang rilro tia inapeii, Pathian chong kha huui katungnga karilsik-ah kei suok kha ka eii, 
\v 26 kum khat-um khang angjet-ah inthup-ah kaleiom, takkha tuunchu inthiang Pathian mi ngaidiang amalarjei. 
\v 27 Pathian ama lungdou chu inphuumma kaom ama chong kha ikadang ama mi ngaidiang minjetsik hi eii. Hiwa inphuumma kaom lurna hi zaatlop ngai karra angtuk kalokme, khachu Christa in nangni diang om, khawa tinachu nangni'n Pathian lurna khan tum ningchangsik eii. 
\v 28 Christa kha keini'n miring rakipdiang kinrilthang, lungsing lungwar rakip-ah miring rakip diang kinminchu khat-um chong kinthak, ajarchu miring rakip Christa maikuungnga puikatung mi eya keini'n kinpenasik eii. 
\v 29 Hiwa chuonhi huui tungnasik, Christa inapeii ratha raatna, kasuungnga chuonkatho kha kaneimanna kapoong karaal kadei.
\c 2
\p
\v 1 Nangni khat-um Laodicea ah kaom inmani ngai, halli kei kanalamumak mi rakip sik-ah angtuk kapoong karaalla chuon katho itihi nangni'n ningjet kha kei'n kamanuom. 
\v 2 Kei'n hiwa kathona ajarchu inmani ngai'n inmalungnga insoknasik khat-um inriangnga inchunnasik eii, tichu inmani'n katha-ah angrakip injetnasik halli inmani'n Pathian inthuuk kha injetnasik eii, khachu, Christa apumtak kha eii.\f + \fr 2:2: \fr*\fqa Pathian inthuukna, Christa apumtak; \fqa*\ft manuscript lekkhat achu \ft*\fqa Pathian inthuukna \fqa*\ft leiilaak in \ft*\fqa Christa pa Pathian inthuukna; \fqa*\ft lekkhat ngai'n \ft*\fqa Pathian halli Pa khat-um Christa inthuukna tia injia.\fqa*\f* 
\v 3 Amadiang Pathian lungsing lungwar khat-um singna theina rakip ngaikha inphuumma om.
\p
\v 4 Tuteii innum inmani kha akatha in-ang innum, maleisei chongnga nangni kha lamleiitiang naroimaknasik, kei'n hiwahi nangni diang kanati. 
\v 5 Khachu kei'n kataksa ah nangni makheiya ka-inlaak innum, kei nangnile ratha-ah kaom, Christa diang kacheet-ah ningom halli nangni ngamna kha kamu sik ah kei'n karok.
\s1 Christa diang Ringna
\p
\v 6 Christa Jisu kha Pumi ejei tia ningngamnajei keengnga, amadiang inchatlekleiya omru. 
\v 7 Ningrajung kha ama diang mincheetru halli amadiang moongru, nangni naminchu kha angnga ngamna khan ngir mincheetru, halli kaminpaak khan sipru.
\p
\v 8 Christa dungjuiya ka-emak, miringngai sinadan dungjuiya, manmasituol waikaroon ratha ngai dungjuiya, tuteii innum nangni kha akadongkok manmasi lungsing lungwar khan suok naminchang marasu. 
\v 9 Ajarchu Pathian sipnakha taksa-ah Christa diang om, 
\v 10 halli nangni diang-um akasip ringna kha Christa diang napejei. Ama hi ranak khat-um waikaroon rakip lu kha-eii.
\p
\v 11 Amadiang miring kut-ah intan wuntan ka-emak-ah wun ningtan kha ejei. Christa in wun natan nakhan nangni'n manu taksa kha ningmathaan kha ejei.
\p
\v 12 Ajarchu baptize ningtho phakhan, nangni Christa le ningthi kha ejei, halli baptism khan akathi makheiya Christa kha kaminring nangni ngamna Pathian ranak khan nangni-um Christa le ningring kha ejei. \rq Rom 6:4\rq*
\p
\v 13 Nangni um apha khatchu ningmanu khat-um sinadan kaommak zaatlop ning-eii jarra ratha lamma akathi kha ninglei-eii. Takkha Pathian khan nangni kha Christa le inruoiya naminring. Pathian in eini manu rakip ngaikha ngaidamjei; \rq Eph 2:1-5\rq*
\p
\v 14 Ama'n eini manu leithona chungnga lei-injia khat-um juimak kathamak sinadan injia ngaikha ama'n cross chungnga nakhaipi wiakjei. \rq Eph 2:15\rq*
\p
\v 15 Waikaroon ngai khat-um kathomator ngai ranak kha akasut-ah ama'n mirakip musik-ah inmani ngaikha cross chungnga minjakna apeya amatorjei.
\p
\v 16 Khantia tuteii inkhat in bak jarra emakli in jarra emakli kahoi emakli Thade kahoi emakli Sabbath nikhuo jarra nangnidiang chong tanmarasu. \rq Rom 14:1-6\rq*
\p
\v 17 Hiwa ngaihi alakahongsik ngai raliim kha eii; takkha ka-etak khachu Christa kha eii. 
\v 18 Kadikmak nunchan inchuol khat-um marwaan tirton ngai chubei katho tuteii inkhat innum nangni chungnga chongtansik rahoi min-ommarasu, khawa ka-ang mi khan inmu-ngai jarra kaseiya inril, takkha iteii arei omlekleiya khawa ka-ang mi khan inmani manmasi i-ngaidon lamma in-or
\p
\v 19 halli inmani ngaikha alu ka-eii Christa khale injommujei. Christa in taksa pumpui kha ru-zaang mindon khat-um minjom, halli taksa kha Pathian imanuom dungjuiya insoon. \rq Eph 4:16\rq*
\s1 Christa le Thina khat-um Ringna
\p
\v 20 Nangni'n Christa le hiwa manmasituol waikaroon ratha ngai diangnga inphut ningthijei keengnga, angjarra halle nangni'n hiwa manmasituol mi ning-angnga ninglaring titme? Angjarra khawa sinadan ngaikha ninglajuime, 
\v 21 “Mahuum khaimaru,” “Mintem khaimaru,” “Katook khaimaru” 
\v 22 Hiwa ngai rakip ni-inliingna-ah kamangsik eii, ajarchu hiwa rakip ngaihi manmasi chongpeii khat-um minchuna kha in-eii. 
\v 23 Khawa juisikdan ngaikha inlungdouwa inminsuuk chubei eii, akadikmak nunchan inchuol khat-um inpum kha intheinuo-ah karachaak lungsing lungwar eii; intaksa manuom insurna khan iteii innemna ommak.
\c 3
\p
\v 1 Christa le inruoiya nangni naminringjei keengnga, chungtiangnga kaom phurngai kha ningmalungnga entokru, khawakhan Christa in Pathian kutchangtiang in-ong. \rq Minpkla 110:1\rq*
\p
\v 2 Chungtiangnga kaom phurngai sik-ah ningmalungnga ngaidonru, nuoipilchungnga kaom phurngai sik-ah ngaidonmaru. 
\v 3 Ajarchu nangni ningthijei, halli nangni ringkhuo kha Christa le Pathian diang om. 
\v 4 Nangni ringkhuo ka-eii, Christa juo-inlar phakhan, nangni um lurna lianna khan amale ning-inlarsik eii.
\s1 Amaruo khat-um Akathar Ringkhuo
\p
\v 5 Zool-inthai, inthiangmak, taksa imanuom, akathamak nimanuom khat-um kara-ot, ramil chubei katho, nuoipilchung nunchan ka-eii rakip ngaikha nangni diang makheiya minthitaru. 
\v 6 Hiwa ngai jarra, Pathian raangna kha ama chongkajuimak mi ngaidiang ajuosik eii.\f + \fr 3:6. \fr*\ft Manuscript lekkhat achu \ft*\fq ama chongkajuimak mi ngaidiang \fq* itihi ommak.\f* 
\v 7 Inmani karra ningleiomlai, nangni um aphakhat achu khawa ringkhuo khan ningleiring.
\p
\v 8 Takkha tuunchu, akaraang, mikathatzoot, miringkhat thamaknasik ka-ngaidon, mi karilse khat-um murra inphut chongkathamak karil, hiwa rakip ngaihi mathaanru.
\p
\v 9 Akamaruo mikha anunchan le inruoiya nidajei keengnga, inkhatli inkhatdiang maleisei rilkhaimaru \rq Eph 4:22\rq*
\p
\v 10 halli akaboolpa aramil tak-ah singna theina dungjuiya mintharna akathar mi kha ning-inlukjei. \rq Eph 4:24; Inphut 1:26\rq*
\p
\v 11 Khawa jarra, Greek li Jihudi, wun katan li katanmak, ka-am, kamo, suok li suok ka-emak ommakjei, takkha angrakip-ah Christa om, halli Christa kha angrakip eii.
\p
\v 12 Pathian inakadang inthiang khat-um inaminriang ning-eii jarra, inriang, minriang kajet, nunchan inchuol, malung kadai khat-um kadei karaat hiwa ngaihin ningpum ngaikha insuunru. \rq Eph 4:2\rq*
\p
\v 13 Inkhat li inkhat inzootnaru halli miringkhat chungnga miring inkhat in kahoimak angjet ngaikha in-ngaidamru. Pumi'n nangni ina-ngaidam angnga nangni innum in-ngaidamru. \rq Eph 4:32\rq*
\p
\v 14 Halli hiwa ngai rakip pui katungnga kakhuopchun inriang hi neiru. 
\v 15 Christa diangnga kahoi kadai khan ningmalung ngaikhan wai roonrase, pumkhatbit taksa ngai ning-eii jarra nangni hi kahoi kadai sik-ak inakoi kha ning-eii. Halli nangni'n rokru.
\p
\v 16 Nangni'n lungsing lungwar rakip-ah inkhatli inkhat inchu indikru, nangni minpaak laa, rokpuina laa khat-um ratha laa khan Pathian diang ningmalung karok-ah sakru, Christa chongkha nangni diang insam omlekleiya omrase.
\p
\v 17 Halli ning-itho rakip, chuonna emakli chongnga, angrakip kha ama diangnga inphut Pa Pathian kha minpaak inlang Pumi Jisu ramingnga thoru. \rq Eph 5:19,20\rq*
\s1 Christian Insuungkhur Sisikdan
\p
\v 18 Pumi diang rahoi ka-eii angnga, inkaneijei numeisa ngai ningruothar ngai nuoiya omru. \rq Eph 5:22; 1 Pet 3:1\rq*
\p
\v 19 Pakhat ngai, ningnumei ngai minriangru halli inmani chungnga kese-ah thomaru. \rq Eph 5:25; 1 Pet 3:7\rq*
\p
\v 20 Sangai, ang rakip-ah ningnu ningpa chong juiru, ajarchu hiwahi Pumi imanuon kha eii. \rq Eph 6:1\rq*
\p
\v 21 Nu li pa ngai, ningsa ngai malung kahoimak suokmanasik inmani raangnasik chuon thomaru. \rq Eph 6:4\rq*
\p
\v 22 Suokngai, ningkaru ngai'n na-enphabit khat-um inmani'n naminriangnasik elekleiya; takkha Pumi ningchile inruoiya ningmalung kaluut-ah angrakip-ah nuoipilchungnga kaom ningkaru ngaikha juiru. \rq Eph 6:5-8\rq*
\p
\v 23 Ning-itho rakip-ah, mi sik-ah kitho emak Pumi sik-ah kitho eii ngaidon inlang, ningmalung pumpuiya thoru. 
\v 24 Pumi Christa kha eii sepa nitho. Ama mi ngai sik-ah idajei chuonthoman kha Pumi diangnga inphut ningmusik eii itihi ngaidonru.
\p
\v 25 Akadikmak akatho ama khan adikmakna kha amusik eii, ajarchu khawa khan mimeel mimai ensik ommak. \rq Innidan 10:17; Eph 6:9\rq*
\c 4
\p
\v 1 Karu ngai, katuunna khat-um katha-ah ningsuok ngaikha inliingnaru, ajarchu marwaanna nangni-um Karu om itihi ningjet. \rq Eph 6:9\rq*
\s1 Minchu Mindikna
\p
\v 2 Inchatlekleiya Pathian niru, Pathian minpaakle inruoiya inringchakru. 
\v 3 Halli kei'n mikhumna ah kaomna ajarchu, chongkahoi sik-ah Pathian in lam anamalongpi nasik halli Christa inthuukna kha keini'n kinril matornasik nangni'n Pathian nanipiru. 
\v 4 Kei'n karilsik kasuok kha inthiarra karil nasik-ah Pathian nanipiru.
\p
\v 5 Apha kacha ningmuna rakip-ah Pathian kajetmak mi ngaidiang ningomchan minsingtheiru. \rq Eph 5:16\rq*
\p
\v 6 Mi rakip diang akadik-ah ningmasang theinasik ah, ningchongrilna rakip-ah minhoitheiru khat-um ra-ngaizoot minomcheiru,
\s1 Insuona Chong
\p
\v 7 Minriang kaom nisap Tychicus, huoikajouwa chuonkatho khat-um einile Pumi suok ka-eii ama'n kei jarra angrakip kha nangnidiang narilpite. \rq Chuon 20:4; 2 Tim 4:12; Eph 6:21,22\rq*
\p
\v 8 Keini'n angtho thoa kinlaomme iti ningjetnasik khat-um ningmalung amasoknasik jarra kei'n nangnidiang ama kiheitir eii.
\p
\v 9 Nangni mi ka-ejei, huoikajou khat-um minriang kaom nisuopui Onesimus le inruoiya ama ajuosik eii. Inmani inni'n hiwa hinna akasuok rakip ngai jarra narilpijei inte. \rq Philem 10-12\rq*
\p
\v 10 Keile mikhumna ah kaomsuom Aristarchus in nangnidiang inpaakna chong najuominchoi, Barnabas tupa ka-eii Mark innum inpaakna chong najuominchoi. (Ama jarra nangni'n ningjetjei; ama'n nangnidiang ajuo inchu, ama kha leidonru.) \rq Chuon 19:29; 27:2; Philem 24; Chuon 12:12,25; 13:13; 15:37-39\rq*
\p
\v 11 Justus tia-um inkoi Joshua innum inpaakna chong najuominchoi. Jihudi ngai karra inmani inthumbit in-eii Pathian kajet khat-um keile Pathian rengram sik-ah chuonkatho, inmani'n kei kadiang akalok ah sanna innanei.
\p
\v 12 Nangni mi ka-eii khat-um Christa Jisu suok-um ka-eii Epaphras in anaminpaak. Nangni'n Pathian lungdou khan kacheet-ah ningngirnasik, akachang khat-um kacheet-ah ka-ngamna ning enasik inchatlekleiya Pathian diang ananipi. \rq Col 1:7; Philem 23\rq*
\p
\v 13 Kei'n ama jarra karilmator khachu amahi nangni sik khat-um Laodicea li Hierapolis ah kaom inmani sik-ah ranak-ah chuon atho.
\p
\v 14 Minriang kaom kathiam Luke khat-um Demas inmani inni innum inpaakna chong innajuominchoi. \rq 2 Tim 4:11; Philem 24; 2 Tim 4:10; Philem 24\rq*
\p
\v 15 Kei inpaakna chonghi Laodicea ah akaom ule nai ngaidiang, Nympha diang halli ama inn khan inchun koisuok ngaidiang peru. 
\v 16 Hiwa injia chonghi nangnidiang nateelpisuo thengnga Laodicea koisuok khannum inteel kha erase halli Laodicea makheiya nahongpeii injia chongkha nangni'n teelru. 
\v 17 Halli Archippus kha “Pumi sik-ah thosik inpeii chuon ngaikha huui mintungnasik” tipiru. \rq Philem 2\rq*
\p
\v 18 Hiwa minpaakna hi Paul kei kakut tak-in kimajia eii. Kei thirruiya innakhuop kha ngaidonru.
\p Riangwai kha nangni chungnga omrase.