\id 2TI Kharam: Bible Translation 1st Edition
\ide UTF-8
\ide Unicode (UTF8)
\h 2 Timothy
\toc1 TIMOTHY Diang Paul Inni Huuina Chemajia
\toc2 2 Timothy
\toc3 2 Tim
\mt1 TIMOTHY
\mt2 Diang Paul Inni Huuina Chemajia
\imt1 Chonglamsaat
\ip \bk Hiwa 2 Timothy larik hi\bk* Tirton Paul in ama siamruoi Timothy diangnga woini huuina chemajia eii. 2 Timothy hi Paul ringkhuo juohek sik tiangnga imajia eii. Hiwa phatak hin ama kha Rome mikhumna khan aleiom (2 Tim 1:16). Paul Timothy le innaitheiya inlei-inlop halli apha rakip-ah ama kha asapa angnga aleilei (Phil 2:22, 1 Tim 1:2, 1:18).
\ip Hiwahi Paul in koisuok rathuulla miring inkhat diangnga imajia chemajia mili karra inkhat kha eii. Khawa chemajia aleiilak inthum ngai khachu 1 Timothy, Titus, halli Philemon hi eii.
\ip 2 Timothy hi amajia pha Rome Reng in Christian ngaikha inleiminpoong. Hiwahin ajar eya Paul hi mikhumna ah ileiom lei-echa halli Timothy diang kapoong-karaal deinasik aleiminchu. 1 Timothy angnga Paul in Timothy diang akatuunmak ocha ngai jarra chong katamtak aleipeii (1 Tim 1:16-18). Halli ama innum Timothy diang nahong-intongpui sik intakthei pha ngaikha alaheiwasik eii tia aleirilpi (3:1).
\iot Asuungnga kaom Chong
\io1 1. Paul in Timothy minpaak-ah chemajia phutna anei \ior (1:1-2)\ior*
\io1 2. Halli ama malung leimasokpi. \ior (1:3-18)\ior*
\io1 3. Ama'n Timothy diang deiraat nasik amasok. \ior (2:1-13)\ior*
\io1 4. Ama'n Timothy diang arei ka-e minchuna lekkhat aleipeii. \ior (2:14-26)\ior*
\io1 5. Ama'n nuktiangnga kasuoksik jar halli katuun lamma masangnasik amadiang chong leipeii. \ior (3:1–4:8)\ior*
\io1 6. Paul apumtak in Timothy jarra lekkhat arilli aminhek. \ior (4:9-22)\ior*
\c 1
\p
\v 1 Pathian lungdou dungjuiya Christa Jisu tirton Paul in Christa Jisu le inruoiya inchunna suungnga eini'n nimu ringna chong-inkhitna kha rilthang nasik,
\p
\v 2 Minriang kaom kasapa Timothy nang nadiang kiheimathuon eii:
\p Pa Pathian le eini Pumi Christa Jisu khan riangwai, minriang khat-um akadai kha nape rase. \rq Chuon 16:1\rq*
\s1 Minpaakna le Masokna
\p
\v 3 Kapi kapu ngai'n inleitho angnga, inthiangnga kase katha jetnale inruoiya kei'n asepa kitho Pathian kha kaminpaak. Halli suun li zaanna kei'n Pathian kanina rakip ah nang kanangaidonna ama kha kei'n kaminpaak. 
\v 4 Namit rathi suok ka-ngaidonna, kei karokna pui tungtheinasik, nangkha kana-inmupuizoot.
\p
\v 5 Napi Lois li nanu Eunice innum inngamna innei angnga na-inngamna inthiang ka-ngaidonna. Khawa kha nang nadiang-um aom ti kei'n ka-inngamna. \rq Chuon 16:1\rq*
\p
\v 6 Hiwa sik-ah nachungnga kei'n kakut kadapha Pathian nape kutchoi kha karingnga nada theinasik kei'n nangkha kanamin-ngaidon eii. 
\v 7 Ajarchu Pathian in einidiang akachi Ratha kha napemak; khawa rathuulla ama Ratha khan eini nasip-ah ranak, minriang khat-um nipum-insurtheina kha anapejei.
\p
\v 8 Eini Nipumi jarra sakhi kapesik injak mui; halli Christa sik surra innada keisik um injak maru. Khawa neek-ah Chong Kathasik jarra ranak ngarna Pathian in inape angnga poongna suungkhan tum kha leiru. 
\v 9 Eini ngai'n akatha nitho jarra emak. Takkha amatak lungdou khat-um minriangna jarra, ami naminchang nasik-ah, Christa Jisu diang nuoipil inbool makma anakoiya anasanring jei. 
\v 10 Takkha tuunchu eini Kanasanring Christa Jisu ajuo jarra einidiang namalarpijei. Ama'n thina ranak aminmangnga, halli chongkahoi jarra akathi kaommak ringkhuo kha amalarjei
\p
\v 11 Chong Katha karil inthangsik, tirton khat-um ocha inkhat angnga Pathian in kei anakadangjei, \rq 1 Tim 2:7\rq*
\p
\v 12 hiwa ngaisik jarra kei'n poongraal kidei eii. Takkha hiwa sik-ah kei injakmong, ajarchu ki-ngamna ama kha kei'n kajet; halli ama'n kei diangnga inape nikhuo aheitung maklaiseng ama'n keihi karingnga nada matorte ti kei'n katha tak-ah kajet. 
\v 13 Christa Jisu le inruoiya eini ni-inchunna ka-e inngamna khat-um inriangna khan om chak-ah juinasik, nang sik-ah minkhina kei'n kinaminchu akatuun chong ngaikha kacheet ah mahuumro. 
\v 14 Nang nadiangnga inapeii akatha ngaikha eini suungnga karingnga kaom Ratha Inthiang ranak jarra indatharo.
\p
\v 15 Phygelus li Hermogenes inchella, Asia ramma kaom mi rakip kei innamathaan jei, tikha nangni'n ningjet. 
\v 16 Onesiphorus innsuungnga Pumi riangwai kha omrase, Ajarchu ama'n apha angjet malung hoina anapeya kei mikhumna ah kiom kha ama lei-injakmak, 
\v 17 takkha ama Rome heitungli heitungmak anamu maklaiseng anaheiratok. 
\v 18 Pumi'n ariangwai kha ama chungnga khawa Nikhuo khan perase! Halli Ephesus ah ama'n keisik angtuk katam ithome tikha nang in katha tak-ah najet.
\c 2
\s1 Jisu Christa sik-ah Raalmi Katuun Inkhat
\p
\v 1 Kasapa, nang sik-ah Christa Jisu le ni-inchunna suungnga riangwai jarkhan kangar kha ero. 
\v 2 Sakhi katamtak ngai maikuungnga kei diangnga ningjet kanaminchuna ngaikha lei-inlang rilpiro, halli ngamna kaom mi, mileiilak ngai kaminchu mator ngaidiang um pero.
\p
\v 3 Christa Jisu chongkajui raalmi inkhat angnga Poongraalna kha deiro. 
\v 4 Raalmi eya kaom miringkhan ama lamkakeipa malung mintai sik amanuom khawa jarra micham ngai ringkhuo chuon khale achuon minchunmak. 
\v 5 Ruolsiak taanna-ah kataan inkhat in juisik dan kha ajuimak inchu ataanman kha ralaang matornuni. 
\v 6 Chuon kangarra katho leimi ama khan leirakhool mansakhet tum kha amusik eii. 
\v 7 Pumi'n nangdiang angrakip jetna anapesik ejarra, angme kei'n kirilhi ngaidonro.
\p
\v 8 Kei'n kiril Chong Katha suungnga kinaminchu angnga, kathiya inphut akaring David phungrui inkhat ka-e Jisu Christa ama kha ngaidon chakro. 
\v 9 Kei'n Chong Katha kha karil jarra dan kamakoi mi inkhat angnga thirruiya innakhit-ah kapoong kaleidei. Takkha Pathian chong khachu leikhit matormu, 
\v 10 khawa jarra Pathian ikadang mi ngai innum Jisu Christa sanminringna jarra akajuo hektik-kaboi lurna kha inmuthei nasik, inmani jarra angrakip kei'n kidei eii. 
\v 11 Hiwahi akadik chongril kha eii:
\q1 “Eini amale nithisuom inchu,
\q2 amale eini um niringsuom sik eii.
\q1
\v 12 Eini'n nideichei inchu,
\q2 amale eini um wai niroon suomsik eii.
\q1 Eini'n ama nizootmak inchu,
\q2 ama innum eini nazoot nuni. \rq Matt 10:33; Luk 12:9\rq*
\q1
\v 13 Eini ngamna kacha ni-emak innum,
\q2 amachu ngamna kacha echei,
\q2 ajarchu ama atheinuo-ah maleisei inthotheimak.” 
\s1 Inthiang Chuonkatho Malarna
\p
\v 14 Hiwa chong ngai chungnga nami ngai'n insuol-inseiimak nasik Pathian maikuungnga kana tak-ah chong pe-inlang minngaidonro. Hiwahi akatha emak, takkha akarangai mi ngaibit mangnasik eii. 
\v 15 Akatuun Pathian chongkha katuunna kaminchu inkhat e-inlang, ama chuonna injak kaneimak chuonmi angnga, Pathian mitmuwa puikatungnga malarnasik nimatorseng kha thoro. 
\v 16 Inthiangmak khat-um kamo inseiina ah inphut looiru, hiwa ngaihin mi ngaikha Pathian diangnga inphut kalaak-ah aruoisik eii. 
\v 17 Khawa ka-ang minchuna khachu akapaan mason-masonna taksa kabaksuo ka-ang kha eii. Khawa ngai kaminchu miring inni khachu, Hymenaeus li Philetus in-eii. 
\v 18 Inmani'n akatuun lamkha inmathaanna, eini ringnookna kha ahekjei tia kangamna angjet ngai ngamna kha inminmang.
\p
\v 19 Takkha Pathian innmundeeng kacheet khachu, kanikphuk mator enuni; khawa chungnga chongkha hinthoa injia om, “Pumi'n ami ngaiseng kha ajet” halli “Tu ka-ang in inmani Pumi ta kin-eii katingai khachu inthosialna-ah inphut inheikir cheisik eii,” ati. \rq Teelna 16:5\rq*
\p
\v 20 Innkalok inkhat suungnga bukheeng khat-um ankheeng aphung rakip aom: lekkhat in soonna li dangka ah inbool, aleiilak ngaikhan thingnga khat-um neipilla inbool um aom: lekkhat khachu kapoi chuonna inneiman nasik, halli aleiilak ngai khachu kachamma inneiman angnga inneiman nasik eii. 
\v 21 Tu ka-ang in hiwa akathamak ngai rakip-ah inphut intheinuo ah ininthiang inchu, kapoidom jarra inneimansik eii, ajarchu inmani kha inmani Karu'n neiman sik-ah inpesuok chuon katha rakip sik-ah ininsuuk eii. 
\v 22 Khangdoong laiya taksa manuom ngaikha mathaanro, halli malung inthiang tak-ah Pumi'n asan nasik ah kakoi ngaile inruoiya akatuun tiang, inngamna tiang, minriangna tiang halli akadai kha katha ah juiro. 
\v 23 Takkha akamo li chongkajuimak ngai murruolsiak ah inphut taanro; khawa khachu ahekna-ah insuolna eii, itikha nang-in najet. 
\v 24 Pumi suok inkhat sik-ah, nang mi le insuol emaro. Nangchu mi rakip diang riangwai kanei, akatha, kadeiraat ocha inkhat kha na-esik eii. 
\v 25 Ni-inhalpui ngaikha malung kadaiya namintuunsik eii, ajarchu Pathian in inmani diang malung thuulnasik aphakacha apesik eii halli akatuun kha inhongjetsik eii. 
\v 26 Halli ama'n alungdou minjui sik tia isur ngaikhan inlungsing hongsuokta Seitan chaangnga inphut inheisuoksik eii.
\c 3
\s1 Ajuohekna Nikhuo ngai
\p
\v 1 Ajuohekna sik nikhuo ngai khanchu intakthei pha la-esik eii tihi ngaidonro. 
\v 2 Mi ngai'n intheinuo sik, saak-inraam, in-or, khat-um atheinuo ah inriltha, miminjakna, nulepa chongkajuimak, thopiman kajetmak, biaklam kajuimak; 
\v 3 inmani mi minriang kajetmak, riangwai kajetmak mikarilse, insuol-inseii halli chikaom in-esik eii; inmani'n akatha kha inmatirsik eii; 
\v 4 kathamak palaak katho, chuon ka-uoimak, halli in-or khan kasip in esik eii; Pathian neek-ah taksa hoina khan kheella kamanuom; 
\v 5 halli tuol tiangnga eini biaklam kajui omchan katho, takkha khawa inthiangtak ranak khachu inmani'n kazootmak inlahong omsik eii. Hiwa ka-ang mi ngaidiangnga inphut taandelro. 
\v 6 Inmani lekkhat in mi ngai inna inluut-ah manuomna rakip in ruoinarei iruoijei halli inleitho manu ngai'n minpoongnga kaom akasuol numeisa ngai insurra inlei-ompui, 
\v 7 numeisa ngai'n akadik kha apha rakip-ah jetnasik inleitho takkha akadik kha supjet leijet matormu.
\p
\v 8 Jannes le Jambres in Moses diang inzoot makthei angnga, malung kaziingjei khat-um ngamna jarra kasuoljei hiwa mi ngai innum akadik kha zootmu, \rq Suok 7:11\rq*
\p
\v 9 Takkha Jannes le Jambres chungnga kasuok angnga, mi rakip in angtuk inmani inmome tikha inlamusik eii. Inmani akalaak simator nunu.
\s1 Ahekna Minchuna ngai
\p
\v 10 Takkha nangchu karingkhuo ah kingaidon, kaomchan, halli kanaminchuna ngaikha naheijuijei; halli ka-inngamna, kakhaang raatna, kaminriangna, kadei raatna, 
\v 11 kei kapoongna khat-um karaalna ngaikha naheimujei. Antioch ah, Iconiumma, Lystra ah chikaom poongna kei'n kiheidei, omchan kasuok rakip nang in najet! Takkha khawa ngai rakip ah inphut Pumi'n kei anasanjei. 
\v 12 Christa Jisu le inruoiya inchunna suungnga pathian ringkhuo ah karing kamanuom mi rakip poongraal inmusik eii. 
\v 13 halli mi kathamak ngaile katha omchan katho ngaikhan inmani maleisei intho inta halli mileiilak ngai kha-um maleisei inminthosik eii, akase in ena-ah inphut kheella kase in esik eii. 
\v 14 Takkha nangsik achu, akatuun kha nalei inchu jei halli na-inngamna khan kacheet-ah omtaro. Ajarchu nakaru ngai kha tu ngai in-eme nang in najetjei; 
\v 15 halli nasiinlaiya inphut singna kanape mator Christa Jisu ngamna jarra sanminringna katung nakaruoi Chong Inthiang nijetjei kha nang in ngaidonro. 
\v 16 Ajarchu Chong inthiang rakip hi Pathian phuuksaan khanna eii, akatuun kha minchunasik, akamasial kha rakooknasik, akatuunmak kha mintuunnasik, halli akadik ringkhuo minchuna jarra nemna kaom kha eii. 
\v 17 Khawajarra Pathian sepa katho mi khan chuon katha rakip thonasik ah rahoi kasuok khat-um puikatung enasik kha eii.
\c 4
\p
\v 1 Akathi le akaring chongkatan sik Christa Jisu le Pathian maikuungnga kei'n nang riangwai tak-ah kinakoi eii: ajarchu ama reng angnga waikaroonsik alajuosik eii, 
\v 2 Apha e-innum emak innum Pathian chongkha rilro, minjetro, ranro, halli malung masokpiro, halli deiraatna rakiple inruoiya minchuro. 
\v 3 Ajarchu mi ngai'n chongkatuun kha inrangai zootmakpha alahongsik eii. Takkha inpumtak in inmanuom kha jui inta halli inmani'n angme inrangaizoot karilpi ocha ngaikha kheel kheella inmanisik bit-ah inlakhoom chunsik eii. 
\v 4 Inmani'n akatuunna inphut inkuor mahei inta halli thiming maruo ngaikhan inmalung inminluutsik eii. 
\v 5 Takkha nangchu ajar rakip ah natheinuoa malung insurro; kapoong khaangro, Pathian suok inkhat na-ena nachuon rakip malarnasik Chong Katha karil inkhat na-ena chuon kha thoro.
\p
\v 6 Keisik achu ka-inpesuok nasik phadan ahongnaijei; hiwa ringkhuo hi kamathaan nasik kei sik-ah apha anaijei. 
\v 7 Kei'n ruolsiak kitaan kha katha-ah kataanjei, kei'n ahekna katung kha kataanjei, halli ngamna kha kaneijei. 
\v 8 Tuunchu matorna chuonthoman akatuun renglukhu kha kei sik-ah anangaak chak-ah omjei; khawa nikhuo khan chongtan katuun Pumi khan anapesik ejei. Khawa kha keisik bit emak, takkha ama juo-inlar nasik kha riangwai tak-ah kangaak rakip diang apesik eii.
\s1 Apumtak Chong ngai
\p
\v 9 Keidiang innot-ah naheiwa nasik nang sik-ah kathakhet kha thoro. 
\v 10 Ajarchu Demas in tuunlaiya nuoipilchung hi aminriangnga kei anamathaanna Thessalonica tiang asijei. Crescens in Galatia tiang asijei, halli Titus in Dalmatia tiang asijei.
\p
\v 11 Luke bitchu keile inruoiya omjei. Nang in Mark kha ratok inlang halli nang in ama kha hongruoiro, ajarchu ama'n kachuon hi anasan mator. \rq Col 4:10,14; Philem 24; Chuon 12:12,25; 13:13; 15:37-39\rq*
\p
\v 12 Tychicus chu kei'n Ephesus tiang katirjei. \rq Chuon 20:4; Eph 6:21,22; Col 4:7,8\rq*
\p
\v 13 Nang in nahongpha Carpus diang Troas ah kida kasongkol kalok khale larik ngai kha-um, halli kapoidoomma sawunna inbool larik ngai kha heichoiro. \rq Chuon 20:6\rq*
\p
\v 14 Alexander thirkasutpa in kei anaminpoong theijei; ama'n angme itho dungjuiya Pumi'n athoman amaleiisik eii. 
\v 15 Ama chungnga nang natheinuoa insingtheiro, ajarchu eini chongril hi zootmak-ah araang theiya om.
\p
\v 16 Mansakhet-ah kei kapumtak ka-inngaak pha, tuteii kei sik-ah nangirpui mu, inraya-ah kei innataandel. Inmani chungnga Pathian in akathamak machulpi marase! 
\v 17 Takkha kei'n chong kha kariltung matornasik halli zaatlop rakip in chong kha injetnasik, Pumi khan kei anaompui halli keidiang ranak anapeya thina sik-ah inphut kei anasanjei. 
\v 18 Halli Pumi khan akathamak rakip ah inphut nasanta ama marwaan Rengramma kei anaruoisik eii, apha rakip ah ama lurna erase! Amen
\s1 Ahekna Minpaak Chong
\p
\v 19 Kei'n Priscilla le Aquila han Onesiphorus innsuung mi ngaidiang minpaak chong kanaheipeii. \rq Chuon 18:2; 2 Tim 1:16,17\rq*
\p
\v 20 Erastus in Corinthia ah aom jei, halli Miletus ah Trophimus ama ana jarra kei'n kaheidajei. \rq Chuon 19:22; 20:4; 21:29; Rom 16:23 \rq*
\p
\v 21 Phalbitha matiang heiwanasik nang ranak-ah thoro.
\p Eubulus, Pudens, Linus, Claudia halli aleiilak Christian rakip ngai'n inmani minpaak chong innaheipeii.
\p
\v 22 Pumi'n naratha kha naompui pichak rase.
\p Pathian riangwai khan nangni rakip diang naompui chak rase.