\id 1TI Kharam: Bible Translation 1st Edition.
\ide UTF-8
\ide Unicode (UTF8)
\h 1 Timothy
\toc1 TIMOTHY Diang Paul Inkhat Changna Chemajia
\toc2 1 Timothy
\toc3 1 Tim
\mt1 TIMOTHY
\mt2 Diang Paul Inkhat Changna Chemajia
\imt1 Chonglamsaat
\ip 1 Timothy larik hi tirton Paul makheiya ama nuk kajui Timothy diang ileimajia chemajiakha eii. 1 Timothy hi Christa innei suonuuk 62-64 kum suungnga inleimajia echa. Hiwahi Paul ringkhuo ajuoheksitiang lei-echa. Paul in Timothy le innaitheiya inlei-inlop halli amun angjet a-um amahi asapa angnga aleingaidon (Phil 2:22, 1 Tim 1:2, 1:18).
\ip Hiwahi mili suungnga inkhat changna chemajia kha eii, Paul in koisuok rathuulla miring khatdiang iril. Aleiilak chemajia inthumngai khachu 2 Timothy, Titus, Philemon kha eii. 1 Timothy ah Koisuok in chubei thosikjarra (2:1-15) Koisuok lamkakeingai in e-sikdan jarra (3:1-13) halli kathamak kaminchu ngaidiang inhalpuina chongmakaina (1:3-11, 4:1-5, 6:2-5) Hiwa'n anaminmu, Paul in Timothy hi Koisuok ngai karra angthothoa lamkakeithei a-esikme tia aminchu amindik tihi nimu. 1 Timothy ah juisikdan angjet inchel, khawa khachu atuunlaiya koisuok lamkakei ngai'n khuosuungnga kaom koisuok ngaidiang kathatak-ah lamkei matornasik-ah anamindik.
\iot Asuungnga kaom Chong
\io1 1. Paul in Timothy aminpaak masa-ah aphut \ior (1:1-2)\ior*
\io1 2. Paul in Timothy diang kadikmak kaminchu ngaidiang zootmaknasik chongmakaina aleipeii \ior (1:3-11)\ior*
\io1 3. Paul in Jisu Christa hi angtuk rokpui kaomme tijarra amasonna aleirilpi \ior (1:12-19)\ior*
\io1 4. Amasonna ama'n Timothy diang Pathian chubei khat-um Koisuok lamkakeingai jarra aleiminchu \ior (2–3)\ior*
\io1 5. Paul in Timothy diang ahekna minchunnakha leipeya ama chemajiahi aleiminhek \ior (4–6)\ior*
\c 1
\p
\v 1 Eini Kanakatanpa Pathian khat-um eini inngamna ka eii Christa Jisu chongpeii dungjuiya Christa Jisu tirton Paul makheiya eii.
\p
\v 2 Inngamna jarra inthiang kei kasapa Timothy diang um:
\p Pa Pathian khat-um Christa Jisu eini Pumi'n riangwai, minriang, khat-um kadaikha naparase.
\s1 Kathamak Kaminchu ngaidiang Chongmakaina
\p
\v 3 Kei'n Macedonia kasina lamma nangnadiang kinamasokzoot khachu, nang in Ephesus khan omro khawakha e-inchu miring lekkhatkha kathamak kaminchu ngaikha daru tia chong napesik eii. 
\v 4 Tiallaiya thurchi khat-um hekdan kaommak nipi nipu ngai khangjarra murruolsiak bit thonasik ka-ekha mathaan nasik tipiru, ajarchu inngamna ah nijet Pathian ingaidon kha inmani'n sepa thomujei. 
\v 5 Hiwa chongpeii jarra thosik arei khachu inthiang malungsuung makheiya kahongsuok minriang, kase katha jetna malung, khat-um inthiangnga inngamna kanei enasik eii. 
\v 6 Mi lekkhat in hiwa ngairakip inmathaanna, aka-am ngai inbiakna tiang inletjei. 
\v 7 Inmani'n Pathian Dan karu inlei ezoot, takkha inmani'n inpumtak ah chongngai emakli inngamnatheiya inril chong rakip kha um leijetmatormu.
\p
\v 8 Tichu eini'n nijet Danhi inliingnasik munna inliingna inchu katha eii. 
\v 9 Hiwahi jetru, Danhi kadik mi ngaisik ah inbool emak, takkha Dankajui mak li chongkajuimak ngaisik, han Pathian kajetmak ngaisik, manu karoon ngaisik, han Pathain sepa kathomak li Pathian kachimak ngaisik, anu apa kathat ngaisik, khat-um mi kathat ngaisik, 
\v 10 zool-inthai ngaisik, pasalli pasal zool-inthai ngaisik, kathamak ah mi kasur ngaisik, maleisei karil ngaisik, kadikmak sakhi kapei ngaisik emakli katha chongminchu kajuimak ngaisik-ah ibool eii. 
\v 11 Kalurkalian khat-um rawaan katha Pathian makheiya chongkahoi ngaihi chongkahoiya nimu minchuna dungjuiya karilsuok sik-ah kei kadiang anapejei.
\s1 Pathian Minriangna jarra Rokpuina
\p
\v 12 Kachuon thomatornasik ah ranak kanapeii eini Pumi Christa Jisu kha kaminpaak. Ama sepa kathosik rahoi ka-eii tia ana-ngaidon jarra khat-um anakadang jarra kei'n ama kha kaminpaak. 
\v 13 Akatheng pha ah kei'n ama kha kathamak ah kaleiril khat-um kaleirilthai halli kaleirachaak, takkha Pathian in keikadiang anaminriang, ajarchu kei'n inngamnakha leineimong halli kei'n angme kitho kha kaleijetmak jarra eii. \rq Chuon 8:3; 9:4,5 \rq*
\p
\v 14 Eini Pumi riangwai khale inruoiya Christa Jisu diangnga kaom inngamnali minriang nakha ama'n kei kadiang katamma anajuobunthuon pijei. 
\v 15 Hiwahi akadik chongril kha eii, inthiangnga keiluutsik khat-um ngamnasik eii: Christa Jisu'n nuoipilchungnga ijuohi manu karoon ngai sanringnasik eii, inmani ngai karra keihi manu karoonkhet ka-eii. 
\v 16 Takkha Pathian in manu karoonkhet kei kadiang anaminriang jarra Christa Jisu in ama malung dainakha keikadiang naminmute, akahongsik pha-ah amadiang ka-inngamnasik khat-um hektik kaboi ringna kalamusik inmanidiang minkhina inchangnasik eii. 
\v 17 Khale inruoiya hektik kaneimaksik reng, kathi maksik khat-um nimumak Pathian khabit, kayarui khat-um hektik kaboiya minlurrui! Amen.
\p
\v 18 Kasapa Timothy, tiallaiya Pathian chongkachoi ngai'n nang najarra inleiril chongngai kha kei'n nangnadiang hiwa chongpehi kinapeii ejei. Hiwa chong rakip ngaihi raalkha kathatak-ah indeipuinasik-ah raalphurra inliingnaro, 
\v 19 halli inngamna khat-um katha kajet malungkha roonro. Mi lekkhat in inmani malung kha ra-ngai mujei halli inmani inngamna kha inminmangjei. 
\v 20 Inmani ngai karra Hymenaeus khat-um Alexander hium Pathian karilse kada inchunna sik-ah kei'n karachaak ah Seitan kutchungnga kapeluutjei.
\c 2
\s1 Koisuok Chubei
\p
\v 1 Kei'n kanati, mansakhet ah, kanipi, Pathian kani, kabiak, halli minpaakna kamalar hi mirakip sik-ah Pathian diang thopiru; 
\v 2 halli reng rakipsik khat-um aleilaak ranak kanei rakip sik, khawakha e-inchu einirakip in omchan katha khat-um Pathian kachi tak-ah kahoi kadaiya ringna neinite. 
\v 3 Hiwahi akatha eii halli kanakatanpa Pathian izoot kha um eii, 
\v 4 mi rakip ngaihi sanringnasik khat-um akadik minjetsik hi ama inmanuom kha eii. 
\v 5 Khale inruoiya Pathian inkhat bit aom, halli Pathian li miring ngai minchunna sik-ah mi inkhat aom, miringpa khachu Christa Jisu eii, 
\v 6 ama'n miringngai rakip nakatanasik apum takkha inpesuok, khawakha'n mirakip kha Pathian in aphakacha ah sanzootna sakhi eii. 
\v 7 Khat-um kei'n maleisei kiril emak, inthiang kha kiril eii, hiwajarra kei'n ingamna khat-um kadik hi rilsuok nasik ah kei'n zaatlop ngai tirton khat-um karu sik-ah innajuotir eii! \rq 2 Tim 1:11\rq*
\p
\v 8 Pasal rakip in biak-inn chubeithona rakip ah Pathian kanihi kei'n kamanuom, halli Pathian diang amalung inpesuok Pasal rakip in inkut thaangnga khat-um karaang li murruolsiak tholekleiya nisik kei'n kamanuom. 
\v 9 Kei'n kamanuom, numeisa ngai'n inpuondiar ngaikha enzootkaom khat-um kathatak ah inluknasik-ah jetrasu, kahurthei samchoi inlak, emakli enzoot omnasik soonna katonhut, emakli aman katam kuorbet, raka kaor emakli puondiar aman katam inluk emaru, \rq 1 Pet 3:3 \rq*
\p
\v 10 takkha akatha chuon katho numeisa in Pathian kajet numeisa eii tia injetna. 
\v 11 Numeisa rakip nunchan inchuol kha omchian inlang inchu rasu. 
\v 12 Halli numeisa ngai'n pasal ngai chungnga minchusik khat-um waikaroon esik hi kei'n zootmong, takkha inmani'n inomchian sik eii. 
\v 13 Tichu Adam kha mansakhet ah abool halli Eve abool. \rq Inphut 2:7; Inphut 2:21,22 \rq*
\p
\v 14 Halli Adam kha emak matheemna ah kaleichul, takkha numeisanu kha eii matheemna ah leichulla halli Pathian Dan kamakoi. \rq Inphut 3:1-6\rq*
\p
\v 15 Takkha \f + \fr 2:15: \fr*\ft nai inneina chungnga sanna aneisik eii \ft*\ft nai kanei makheiya katha tak ah asansik eii.\ft*\f*numeisa ngai'n \f + \fr 2:15: \fr*\ft numeisanu in apong inraal innum; \ft*\ft emakli \ft*\fqa inpoong inraal innum.\fqa*\f*inpoong inraal innnum inngamna, minriang, khat-um nunchan katha kha insongnga inom-inchu inmani kha nai inneichungnga sanna aneisik eii.
\c 3
\s1 Koisuok Lamkakei ngai
\p
\v 1 Hiwahi akadik chongril kha eii, miring inkhat in Koisuok karoon a-ezoot inchu, ama'n akathathei chuon imanuom kha eii. 
\v 2 Kathamak noonkuung kaboi mi'n Koisuok karoon esik eii, ama kha numeisa inkhatbit ruothar esik, inlermak, malung insurthei, \f + \fr 3:2: \fr*\ft numeisa inkhatbit kanei, \ft*\ft woikhatbit inkanei esik eii.\ft*\f*omchan katha, khuolmi kadonthei, halli kaminchuthei ah esik, \rq Tit 1:6-9 \rq*
\p
\v 3 ama kha juinrui emakli karaangraat etheinuni, takkha minriang kanei khat-um malung kadai esik eii, halli sial kamanuom um ethei nuni; 
\v 4 ama'n a-insuungkhur katha tak ah karoon mator halli asa ngai'n amadiang chongkajui tak-ah kayana kaminnei mator esik eii. 
\v 5 Tichu a-insuungkhur katha ah karoon matormak mi'n angtho thoa Pathian koisuok kha karoon mator eniame? 
\v 6 Ama'n ngamna ah kachang inkhat esik eii, kha e-inchu ama in-orna kha honglok nunijei halli Seitan angnga chongtanna mununu jei. 
\v 7 Ama kha koisuok ka-emak mi ngai innum inkaya mi ah esik eii, khawa e-inchu ama kha injakna mununi khat-um Seitan chaangnga inkhit nunijei.
\s1 Biak-inna Deacon ngai
\p
\v 8 Koisuok Deacon ngai'n omchan katha khat-um malung inthiang in esik, halli theibomju kha katamma ka-inmak emakli sialsumma mahaam kalian emaru, 
\v 9 Inmani'n inthuuk tak-ah kadik ka eii innaleimalarpi inngamna kha kase katha jetna malung khan inthiangnga inmahuum sik eii. 
\v 10 Inmani ngaikha mansakhet ah ni-encheen masasik eii, halli inmani'n rahoi kasuok in-e-inchu deacon chuonkha thorasu. 
\v 11 Han inmani numei ngai\f + \fr 3:11: \fr*\fq Inmani numei ngai; \fq*\ft emakli \ft*\fqa Numei insappui sik.\fqa*\f* kha um akatha khangchan in esik khat-um mi karilthai echa mak; inmani'n angrakip ah malung insurthei khat-um malung inthiang mi in-esik eii. 
\v 12 Koisuok Deacon ngai'n numeisa inkhatbit kanei in-esik,\f + \fr 3:12: \fr*\ft Numei inkhat bit omsik: \ft*\ft woikhatbit innei sik eii.\ft*\f* halli asa ngaili a-inn suungkhur katha ah waikaroon mator in esik eii. 
\v 13 Deacon chuonna katha-ah katho inmanikha mi ngai'n kayana inneisik eii, halli Christa Jisu diang inngamna jarkha inmani'n kachi omleiya inrilsuok mator.
\s1 Kalok Chongthup
\p
\v 14 Hiwa cheiihi nangdiang kimajia le inruoiya kei'n nakoolla innoottheiya heiwali inmuna sik-ah kangaidon. 
\v 15 Takkha kei'n kajuo inmo inchu, Pathian inna angkachang omchanna ningleeng sikme tihi jetnasik-ah hiwa cheii hin kamajia jei, khawa khachu karing Pathian koisuok in-eii, eini sik-ah kachou khat-um kadik kanadeipi sik-ah eii. 
\v 16 Khat-um atuteii in hituk inthuuk eini Pathian sinadan hi zootmak thonunu:
\q1 Ama'n manmasi taksa ah ajuo inlar,
\q2 Ratha innum akadik eii tikha amalar,\f + \fr 3:16: \fr*\ft Ratha in adik eii tia amalar \ft*\ft halli ratha omchanna um kadik eii tia amalar.\ft*\f*
\q2 marwaan tirton ngai innum inmu.
\q1 Ama kha zaat rakipdiang inrilsuok,
\q2 nuoipilchung mi ngai'n inngamna jei,
\q2 halli marwaan tiang inruoijei.
\c 4
\s1 Kadikmak Karu ngai
\p
\v 1 Tichu Ratha'n inthiangnga ati, khawa khachu mi lekkhat in akalahong sik pha ah ngamnahi inlamathaan sik eii, halli inmani'n maleisei ratha ngai halli raikhuo ngai minchuna kha inlajuisik eii. 
\v 2 Thir inling meikasa ikaang angnga ikaangjei kase katha thentheina malung kathi ngai'n hiwa ka-ang kasetheija maleisei karil ngai'n hiwa minchunahi inleirilthang. 
\v 3 Inmani'n inn neisik tihi kathamak eii khat-um saak angjet baksik um kathamak eii tia inleiminchu. Takkha kangamna khat-um kadik kajet ngai'n baksaak rakip sik ah Pathian inminpaakle inruoiya baksaak rakip baksik ah Pathian in ilei-bool kha eii. 
\v 4 Pathian ibool phur rakip atha; iteii hiaisik ommak, takkha angrakip Pathian niminpaak le inruoiya nibaksik eii, 
\v 5 ajarchu Pathian chong khat-um Pathian nini jarra Pathian in anazootpijei.
\s1 Christa Jisu sik-ah Suok Katha
\p
\v 6 Nang in inngamna chongkadik khat-um akadik minchunna nijui khan natheinuo ah ni-inwaisip angnga, nang in hiwa minchunna ngaihi kangamna ngaidiang namindik inchu nang in Christa Jisu sik ah katha suokkha na-esik eii. 
\v 7 Takkha rilsik ka-emak Pathian inchenmak thurchi kha mathaanru, halli natheinuo ah Pathian kajet ringkhuo enasik ah inchuchak inlang omro. 
\v 8 Taksa thanasik insuukna kha anemna lekkhat om, takkha Ratha ngarnasik insuukna anemna khachu atuunna khat-um kahongsik ringkhuo han alam rakip ah anemna om tia chong-inkhitna anei. 
\v 9 Hiwahi kadik chongril kha eii, hiwarakip hi keiluutsik khat-um ngamnasik eii. 
\v 10 Mi rakip Kanakatanpa halli aru ka-edoomma ngamna kanei ngai kasanring akaring Pathian diang keini'n\f + \fr 4:10: \fr*\ft kasong; \ft*\ft larik lekkhat in\ft*\fqa kathamak theiya karilse.\fqa*\f* ngamna kinda jarra, keini'n chuon ranak kintho ah khat-um kapoongnga kinsongnga kin-om.
\p
\v 11 Hiwa inchuna ngaili indikna ngaihi inmani diang peru. 
\v 12 Nang khangdoong na eii tia tuteii inkhat in enselmusit inthomaro; takkha nachongrilla kangamna ngaisik-ah, naomchana, minriangnga, ingamna ah, inthiangga minkhina katha inchangro. 
\v 13 Kei'n nang nakoolla kaheiwa maklaiseng, mi ngai karra chong inthiang ngaikha karil, kamasok, khat-um kaminchuwa apha kaminluut khat-um malung kaluut ero. 
\v 14 Pathian chong kachoi ngai'n inrilsuokle inruoiya upa ngai'n nang nachungnga kut induong pha ah najuope ratha kutchoi kha i-emak ti-inlang leimaro. 
\v 15 Mi rakip in nachountho insoon kha inmunasik ah hiwa minchu mindikna ngaihi napumtak in huoikajou ah juiro khat-um thoro. 
\v 16 Napum khat-um naminchuna khan insingtheiro, hi ngai rakip hi thochak inlang omro, ajarchu hiwa natho inchu, nang nachong karangai ngaili nang napum takkha sanringnasik eii.
\c 5
\s1 Ka-ngamna ngaidiang Thosikdan
\p
\v 1 Upa kha kese ah ranmaro, khawa rathuulla napa angnga malung masokpiro, halli khangdong ngaikha nanai ngai angnga, 
\v 2 numeisa upa ngaikha nanu ngai angnga, halli khangdoong numeisa ngaikha nasar angnga malung inthiangnga inloppuiro.
\p
\v 3 Sansik ah arei kaom Chuulmei ka-etak ngaikha kayaro. 
\v 4 Takkha chuulmeinu'n asa emakli atu ngai aom inchu, mansakhet ah inmani'n Pathian kajet chuonkha inmani insuungkhur khan thomasarasu, halli hiwa'n innu inpa ngai khat-um inpi inpu ngai chuontho maleiikirna eii, ajarchu hiwahi Pathian malungtaina eii. 
\v 5 Atheinuo ah kaom chuulmei khat-um tuteii sepa inthosik kaneimak ama'n, Pathian khabit ngamna ada ah, suunle zaan inchat omleiya Pathain niya Pathian in juosanna sik-ah aniya aom. 
\v 6 Takkha taksa hoina ah apum inpesuok chuulmeinu kha aring innum kathi a-ejei. 
\v 7 Hiwa indiknahi inmani diang peru, khawa e-inchu tuteii in inmani diang kadikmak noonkuung penunujei. 
\v 8 Takkha atu ka-ang in inmani in-u innai khat-um akathadoomma inmani insuungkhur mi ngaikha inensui theimak inchu, inmani'n inngam nakha inzootmak eii halli inmani ngaikha ka-ngamna makngai neek ah kathamak in eii.
\p
\v 9 Kum soomruk kalakheelmak chuulmei kha chuulmei eii tia leimaru, halli ama kha pasal inkhat diangbit inn kaleinei numeisa esik eii\f + \fr 5:9: \fr*\fq halli ama kha pasal inkhat diangbit inn kaleinei numeisa esik eii, \fq*\ft emakli \ft*\fqa aruothar diang huoikajou.\fqa*\f* 
\v 10 halli ama kha akatha chuon katho sik-ah araming kasi erase, asa ngaikha katha ah kahong keiruoi, khuolmi ngaikha a-inna kadonzoot, aleiilaak Christian ngaidiang sepa katha kathothei, mikapoong ngai kasan, halli ama'n akatha chuon rakip ah apumtak kathozoot erase.
\p
\v 11 Takkha akadoong chuulmei ngaikha chuulmei eii tia leimaru; ajarchu inmani'n inmalungnga inn inhongneizoot phakhan, Christa diang makheiya inletsik eii. 
\v 12 Halli inmani'n mansakhet chonginkhit nakha inmakoi jarra kathamak in-ejei. 
\v 13 Inmani'n akadool inchuwa inn khat makheiya inn khat ah inlonbulla inom, takkha akadoolbit ema ah, rilmaksik chong inrilla inchuon inmin-et ah, mikarilthai khat-um chongriam karil inchuwa inom. 
\v 14 Khawajarra kei'n chuulmei kadoong ngaikha inn neisik hi kei'n kamanuom, sa neirasu, halli in innluo ngaikha boolrasu, khantho inlang eini ni-inhalpui ngai'n kathamak ah naril nasik ah amun pemui. 
\v 15 Tichu chuulmei lekkhat in Seitan nuk juinasik-ah inmalung inmaletsuojei. 
\v 16 Tichu atu ka-ang Christa nukkajui numeisa inna chuulmei inom inchu, ama'n chuulmei ngaikha ensui rase, halli inmani jarra koisuok ngaidiang poongna pemarasu, khawakha e-inchu sansik ah arei kaom chuulmei ngaiseng kha koisuok ngai'n sanna nei inte.
\p
\v 17 Chuonkatha katho upa lam kanakei ngai, khat-um akathadoomma kapoong tak ah Pathian chong karil li kanaminchu ngaikha, chan inni kha pesik ah rahoi kasuok in eii. 
\v 18 Tichu chong inthiang in aril, “Saang narakhool na-ah ni-inliingna saraatchal kha amur khuop maro” halli “Chuon katho ngai kha inchuon thoman nipesik suok.” \rq Innidan 25:4; Matt 10:10; Luk 10:7 \rq*
\p
\v 19 Mi inni emakli inni kheella sakhi narangaimaklai seng, upa inkhat chungnga kathamak inheichoi kha leimaru. 
\v 20 Manu katho mi ngaikha mipui maikuungnga ranru, khawakha e-inchu aleiilaak ngaikhan num china nei-inte.
\p
\v 21 Khawale inruoiya hiwa minchuna ngaihi kei'n nangnadiang Pathian khat-um Christa Jisu khat-um inthiang marwaan tirton ngai maikuungnga tuteii diang nachuonthona rakip ah mimeel mimai enlekleiya khat-um mikarathiat thomaro tia chongpena kananei. 
\v 22 Miring inkhat diang Pumi chuon minthonasik beiya inmani chungnga kutduongnga peluut nasik-ah innot emaro. Halli miring inkhat manu rakip chuonna nang inchelmaro, napumkha inthiangnga daro.
\p
\v 23 Halli tui khabit inkhai maro, ajarchu nang in nanaliip jarra nabak na-in intumnasik ah theibomju lekkhat kha um inro.
\p
\v 24 Mi lekkhat manu ngai khachu musik ah abeitek, halli inmani manu ngaikha inmani neek ah chongtanna munkhan aleitung masajei, takkha mi lekkha manu ngai khachu nuk ah inmusik eii. 
\v 25 Hiwale in-angrip ah akatha chuontho khachu inlarpong, halli inlarmak ah kaom ngaikha um thupthei nunujei.
\c 6
\p
\v 1 Atu ka-ang suok ka eii ngai'n inmani karu ngaikha kaya sik-ah rahoi kasuok innei tia inngaidon sik eii, halli atuteii in Pathian raming khat-um eini minchunna kha kathamak ah rilnunu. 
\v 2 Christian karu ngai suok eya kaom rakip in inmani kha mateek marasu, ajarchu inmani kha-um kangamna ngai in eii, khawa neek achu inmani kha kathadoomma sepa thoru, ajarchu inmani chuonna nemna kapeii ngaikha inmani'n inminriang ka-ngamna ngaikha in eii.
\s1 Kadikmak Kaminchu khat um Kadik Inchongna
\p Hiwa ngaihi minchu inlang rilpiru. 
\v 3 Atuka-ang in intei ka eii kathamak chong kaminchu khat-um Pumi Jisu Christa kadikchong halli ratha lamtiang minchunna kazootmak mikha, 
\v 4 iteii kajetmak khat-um in-orthei mi kha eii. Halli ama'n chong rakip ah murruolsiak khat-um inseiina thonasik-ah kathamak malung anei, hiwa'n kara-ot, insuol inkhal, mi karilthai, halli mi kaminnuor aheichoi, 
\v 5 halli kathamak malung khat-um kadik hi kaneimak ngai'n mi ngaile apharakip ah murruolsiak inthosik eii. Halli Pathian nukkajuihi inchongna eii tia inmani'n inngaidon.
\p
\v 6 Takkha ni-inei rakip ah nikhopthei inchu, Pathain kajet hi kheella inchongna eii. 
\v 7 Ajarchu manmasituol hin iteii jachoimakmi, halli eini'n manmasituol makheiya iteii nichoitheisik ommak. 
\v 8 Khawajarra, eini'n bak sili retruo ngaihi ninei inchu, eini'n khawa khan nihunsik eii. 
\v 9 Takkha atu ka-ang ka-inchong zoot in matheemna ah inchul halli ka-am angjet li kathamak manuomna chaangnga inkhit, hiwa'n inmanikha minsenali minmangna tiang akeiruoi. 
\v 10 Khawajarra siallesum kamanuom hi kathamak rakip inphutna akuung kha eii, mi lekkhat in siallesum kaneizootthei inom khawajarra inmani ngamna makheiya lamleiitiang insijei halli inmani malung kha kahoimak angjet in amakoijei.
\s1 Atheinuo Ah Minchuna
\p
\v 11 Nang Pathian kajet mi, hiwa ngai rakip hi looiro, halli kadik, Pathain kajet, ngamna, minriang, kadeikaraat, khat-um malung inniam munasik ah kasong ero. 
\v 12 Ngamna sik-ah raal kha katha tak-ah indeipuiro, hektik kaommak ringna kha kacheet ah mahuumro khawa sik-ah nangkha anakoi jei, halli sakhi angjet maikuungnga akatha ngamna kha aril suokjei. 
\v 13 Phurrakip diang ringkhuo kapeii Pathian maikuungnga halli ama inngamna kha Pontius Pilate maikuungnga um kacheet ah ka-ngirra karilsuok jei Christa Jisu maikuungnga um kei'n nangnadiang chongpena kanei, 
\v 14 khawa khachu eini Pumi Jisu Christa ajuo inlarna nikhuo emaklaiseng chongpeii hi kamasial emakli noonkuung kape elekleiya juiro. 
\v 15 Rengngai karra Rengchungnung halli Pumi ngai karra Pumi ka eii halli rawaan kathakhet khat-um kanaroon amabit Pathian in apha kachatak ah Christa kha ajuominlar sik eii. 
\v 16 Amabit eii kathi kaom mak, atu inkhat in intung matormakna war khan aringnga om. Halli atu inkhat innum lamumu khat-um atuteii in mu-um mukhai nunu. Ama diang kayasik khat-um hektik kaboi ranak kha omrase! Amen.
\p
\v 17 Atuunlaiya manmasituolla kainchongnga kaom inmani diang hiwa chongpehi peru, khawa khachu inmani'n in-or marasu, khat-um iteii kaemak inchongna ah inngamnamarasu, takkha angrakip hoina sik-ah katamma kanapeii Karingchak Pathian diang ngamnarusu. 
\v 18 Inmani diang katha chuonna inchongna sik-ah kadik thonasik, halli malung inthiang li karok ah mi ngaidiang kape enasik ah insuuk eru tia inmanidiang chongpeii hi peru. 
\v 19 Khale inruoiya hinthoa inmani'n kalahong apha sik-ah inmani'n akacheet inn mun kadeeng angnga inmani sikbeiya karei inbuk sikjei, hiwa'n inmani ringkhuo ah kadik ringkho inmunasik eii.
\p
\v 20 Timothy, nangnadiang angrakip na-ngamna ah innape kha katha tak ah daro, chong ka-emak karil, kamo murruolsiak katho khat-um hiwahi mi lekkhat in kaemak ah “Jetna” eii tia inkoi, hiwa ngai makheiya taandelro. 
\v 21 Han mi lekkhat in kijetjei tia inrilsuok, khawajarra inmani in inngamna makheiya lamleiitiang insijei.
\p Pathian riangwai kha nangni ngai rakipdiang naompui chakrase.