\id 1TH Kharam: Bible Translation 1st Edition
\ide UTF-8
\ide Unicode (UTF8)
\h 1 Thessalonia
\toc1 THESSALONIA Mi-ngaidiang Paul Inkhat Changna Chemajia
\toc2 1 Thessalonia
\toc3 1 Thes
\mt1 THESSALONIA
\mt2 Mi-ngaidiang Paul Inkhat Changna Chemajia
\imt1 Chonglamsaat
\ip \bk Mansakhet Thessalonia mi ngai diangnga chemajia hi\bk* Tirton Paul imajia eii (1:1). Hiwahi Paul in imajia Bible suungnga larik inkhat hongka-eii mansakhet chemajia lei-echa halli hiwahi Christa inneisuo kum 51 pheiwei khanna imajia eii. Ama'n hiwa amajiapha Corinthia-ah aleiom. Hiwa chemajia hi Paul in woinihuuina Pathian chuon sina ah ikeithei Thessalonica ah kaom koisuok sik-ah eii (Chuon 17:1-10). Chuontho larik khan hintia aril khachu koisuok hi Jihudi lekkhat li Greek katamkhat in ibool eii.
\ip Paul in koisuok keithei suonuk Thessalonica ah kasoot ah leiom matormak khawajarra ama'n hiwa chemajia hi nuk-ah khanna kaom kangamna ngai malung masoknasik ama'n imasuo eii. Hiwa chemajia hin chongmun katamtak khat-um Christian ringkhuo jarra mipui minchuna katamtak incheel. Paul in Christa woini huuina ajuonasik jarra lekkhat enna iril ang. Thessalonia koisuok ah kaom kangamna ngai'n hiwa chongmuntak hin malungkaluut lei-ete. Paul in Christa woini huuina ajuosik hi Pathian malung kamintai ringkhuo ah ringnasik masokna inkhat angnga aleineiman (5:6-8).
\iot Asuungnga kaom Chong
\io1 1. Paul in hiwa chemajia hi koisuok don li inmanisik Pathian minpaak ah aphut \ior (1:1-10) \ior*
\io1 2. Halli ama'n ama chuon jarra khat-um Timothy in iheichoi chong ngai jarra arilcheen \ior (2:1–3:13) \ior*
\io1 3. Anuoiya Christian ringkhuo warra ringnasik ah Jisu woini huuina ajuonasik jarra minchuna anei \ior (4:1–5:15) \ior*
\io1 4. Paul in woikhat koisuok kha minpaak-ah halli koisuok rakip in chemajia hi teelnasik ah inmanidiang nina aneiya aminhek \ior (5:16-28) \ior*
\c 1
\p
\v 1 Paul le Silas khat-um Timothy in,
\p Pa Pathian khat-um Pumi Jisu Christa ta ka-eii Thessalonia koisuok mi ngaidiang:
\p Riangwai khat-um malungkadai kha ningta erase. \rq Chuon 17:1\rq*
\s1 Thessalonia ngai Ngamna Khat-um Inringkhuo
\p
\v 2 Keini'n Pathian kinnina rakip-ah nangni kinnangaidon, halli pha rakip ah nangni ngai rakipsik Pathian kinminpaak. 
\v 3 Ajarchu eini Pathian khat-um Nipa maikuungnga nangni inngamna kha chuonna ningtho, nangni minriangna khan chuon ranak-ah ningtho, halli Nipumi Jisu Christa diang ningngamna kacheet kha keini'n kinngaidon. 
\v 4 Ulenai ngai, nangni Pathian in naminriangnga ama sik-ah nangni inakadang kha keini'n kinjet. 
\v 5 Ajarchu keini'n nangnidiang Chong Kahoi kinheichoi kha, chongbit emak, takkha ranakle inruoiya Ratha Inthiang khat-um khawa akadik puikatung malungthuulna kha-um eii. Keini'n nangnile niom suomlai khan nangni thanasik, angtho thoa kin-omme tikha nangni'n ningjet.
\p
\v 6 Nangni'n Poongna akatamtak ningdei innum, Ratha Inthiangnga inphut roknachong akajuo kha ningmujei: nangni'n keini khat-um Pumi omchan kha ningjuijei. \rq Chuon 17:5-9\rq*
\p
\v 7 Khawa jarra nangni'n Macedonia khat-um Achaia ah kaom akangamna rakipdiang minkhina inkhat kha ning-ejei. 
\v 8 Ajarchu nangni diangnga inphut ah Pumi jarra chong kha Macedonia le Achaia rampumpui inthangbit emak, takkha Pathian ningngamna jar kha-um amun rakip atungjei. Khawa jarra khawa kheella eini'n rilsik arei iteii ommakjei. 
\v 9 Nangnidiang kinhonglai ningnaleidon, halli akatuun le akaringchak Pathian sepa thonasik ah, kutbool pathian ngai ningmathaanna jar, 
\v 10 halli akajuosik Pathian lunghongna ah inphut nakasanpa, Pathian in kathiya inphut iminring Asapa Jisu kha marwaanna inphut akajuosik ningngaak kha mi rakip in inriljei.
\c 2
\s1 Thessalonia ah Paul Chuontho
\p
\v 1 Ulenai ngai, keini'n nangnidiang kinhong kha anemna kaboi emak tikha nangnitak in ningjet.
\p
\v 2 Thessalonica ah nangnidiang kinhongma Philippi ah kasetak le jakna kaomtak ah keini innatho kha nangni'n ningjet. Khawa khan naka-en zootmak khatuk intam innum, Pathian diangnga inphut Chong Kahoi nangni diangnga karilsik ah eini Pathian in malung ngarna analeipeii. \rq Chuon 16:19-24; 17:1-9\rq*
\p
\v 3 Ajarchu keini'n nangnidiang kinril chonghi akadikmak, emakli inthiangmak malungroonna, tu-inkhat diang um palaak kintho emak. 
\v 4 Khawa rathuulla, Pathian in keinidiang inamintho zootkha apha rakip ah keini'n kinril, ajarchu ama'n keini chong natansuoa Chong Kahoi karil sik-ah rahoikasuok anamin-ejei. Keini'n miring malung mintainasik ratokmung, takkha kinmalung ka-ensui Pathian malung tainasik kha kinril kha eii. 
\v 5 Keini'n minpaak inleem chongril le inruoiya, emakli phamraikase chong ngai kamakhu keini nangnidiang kinhong emak tihi nangni'n katha ah ningjet, Pathian in keini sakhi eii! 
\v 6 Nangni chungnga keini Christa tirton kin-ena ranak kinnei innum, tu-inkhat diangnga inphut, nangni diangnga inphut emakli aleiilak diangnga inphut innaminpaak nasik ratokmung, 
\v 7 keini'n Christa tirton ngai kin-eya nangnidiang chong kinnapemator takkha nu inkhat in asa ngai imarit angnga, keini'n ningkarra kinomlai khannum malung inniam kha kinlei eii. 
\v 8 Ajarchu nangni kinnaminriang jarra Pathian diangnga inphut Chong Kahoi khabit eleiya, keini ringkhuo hi-um napesik kin-insuuk eii, ajarchu nangni kha keini maritkhet ngaikha ninghong ejei. 
\v 9 Ulenai ngai, nangni'n keini angtho thoa chuon kintho halli poongna kindei kha inthiangnga leingaidon ningte! Keini'n Pathian Chong Kahoi kha nangnidiang kinrilpha nangni tu-inkhat um naminpoong maknasik ah suun li zaan chuon kinleitho.
\p
\v 10 Kangamna nangni ngaidiang keini omchan kha inthiang, atuun halli kachok ommak tihi nangni'n keini sakhi ning-eii, halli Pathian um eii. 
\v 11 Pa ngai'n insa ngaidiang omchan kathatak intho kha angnga keini'n nangni rakip diangnga omchan katha kintho kha nangni'n ningjet. 
\v 12 Anakakoipa Pathian ama rengram le alurna tum kha munasik ah, halli Pathian malung taina khawa ka-ang ringkhuo khan ningring nasik ah, keini'n nangni kinnamasok, kinnamatheemtai halli nathopiru tia nina kinnanei.
\p
\v 13 Hanna hiwa aleiilak jarra hin, keini'n apha rakip ah Pathian kha kinminpaak chak. Tichu keini'n Pathian chong kinheichoi hi nangni'n ningjet li chonghi miring ngai diangnga inphut emak takkha Pathian chongtak eii tia nangni'n ningleiralaang, khawakha akatuuntak kha eii. Akangamna nangni karra Pathian in chuon kha itho eii.
\p
\v 14 Ulenai ngai, Judea ah kaom Pathian koisuok ngaidiang, Christa Jisu mi ka-e ngai diangnga omchan kasuok khale in-ang rip-ah nangnidiang um akasuok eii. Tichu inmani'n Jihudi ngai diangnga inphut poongraalna inmu angnga, nangni um ningrammi ngaidiangnga inphut poongraalna in-angrip kha ningmu eii. \rq Chuon 17:5\rq*
\p
\v 15 Pumi Jisu li ama chongkachoi ngai kaleithat Jihudi mi ngaikhan keini um innaminpoong. Inmani'n angtuk mi rakip kha inlei-inhalpuime! Pathian malungkha angtuk inleiminhoipi makme! \rq Chuon 9:23,29; 13:45,50; 14:2,5,19; 17:5,13; 18:12\rq*
\p
\v 16 Zaatlop ngaidiang sanminringna heikachoi sik chong kinwarilsik kha-um inmani'n leizootmu. Inmani'n apha rakip ah intho manu ngaikha hin-inthoa pui-inmintungjei. Halli tuunchu ahekna ah Pathian raangna kha inchungnga ajuotungjei.
\s Paul in Inmani inlet-ah phasik Imanuom
\p
\v 17 Ulenai ngai, keinisik achu, nangni diangnga inphut phabong khat ni-inthenpha, keini malungngaidon nachu ka-emak, takkha taksa bit-ah keini'n nangni kha angtuk kinnamu zootme halli woikhat namunasik angtuk ranak kinsongme! 
\v 18 Nangnidiang hongkir nooksik hi keini'n kinmanuom. Kei kapumtak in inlet inlet-ah hongsik kalei-insuuk, takkha Seitan in kinlam analeikhanjei. 
\v 19 Nipumi Jisu ajuopha ama maikuungnga, kinraal matorna jarra kin in-orna, kinrokna khat-um kin-inngamna kha nangni jarra eii, nangni hi aleiilak ngaineek ah akatasam emakchu. 
\v 20 Inthiangtak-ah, keini in-orna li roknachu nangni ning eii.
\c 3
\p
\v 1 Ajarchu ajuohekna-ah, keini'n kasoot deimator khaimungnga, keini innibit Athenna omsik hi kinminthajei. \rq Chuon 17:15\rq*
\p
\v 2 Halli Christa jarra Chong Kahoi kinrilla keinile Pathian sik-ah kinchuon thopui eini ulenai Timothy kha kinheitirjei. Ama hi nangni inngamna tiang kanaminngarsik khat-um anakasansik kinheitir eii, 
\v 3 Kha e-inchu hiwa poongraalna hin ajar eya nangni tuteii in nuktiang kirnutunjei. Hiwa ka-ang poongraal deisik hi einisik ah Pathian lungdou eii ti ningtheinuoa ningjet. 
\v 4 Keini'n phabong khat kinnaleiompui laikhan, eini innaminpoongsik eii tia apha matiang kinnaleirilpi kha, nangni'n kathatak-ah ningjet khawatak kha juokasuok ejei. 
\v 5 Khawa jarra kei'n kasoottak deimator khaimongnga, Timothy kha kei'n kaheitir ejei. Seitan in nangni kha naleimatheem jeite, halli nichuontho kha-um anemna kaboi esikbe tia kachi jarra kei'n nangni inngamna jetnasik ah ama hi kaheitirjei!
\p
\v 6 Tuunchu Timothy aheikirjei, nangni ning-inngamna li ning-inriangna jarra chongkahoi ngaikha keinidiang aheichoijei. keini'n nangni kinnamuzoot angnga nangni'n um keini naleimuzoot ningte apha rakip khan katha ah ningnangaidon tia keinidiang um ajuoriljei. \rq Chuon 18:5\rq*
\p
\v 7 Khawa jarra ulenai ngai, keini poongna le raalna rakip khan nangni jarra kinmalungnga ratharokna kinnei. Kinratha roknahi ning-inngamna jarra eii. 
\v 8 Ajarchu nangni'n ningringkhuo ah Pumi le inchunna kacheet-ah ningngir jarra keini tuun inthiangnga kinlaring. 
\v 9 Khawa jarra tuunchu keini'n nangni jarra eini Pathian kha minpaak matorna kinneijei. Nangni jarra Pathian maikuungnga rokna kinnei jarra ama kinminpaak. 
\v 10 Keini'n nangni kha ningpumtak ah inmupui nasik khat-um angme nangni ngamna khan arei kaom rakip kinnape matornasik, suun li zaan amadiang kinmalung pumpuiya kinnichak-ah kinleiom.
\p
\v 11 Keini'n nangnidiang kinhongnasik lamkha, eini Pumi Jisu khat-um eini Pathian le Nipa amatak in naboolpi kha etarase. 
\v 12 Keini'n nangni kinnaminriang angnga, nangni khat li khat sik halli mi rakipsik ningminriangna kha kheel kheella insoonnasik Pumi'n inaboolpi erase. 
\v 13 Eini Pumi Jisu ami ngai rakiple inruoiya ajuopha, eini Pathian khat-um Nipa maikuungnga nangni inthiang le puikatung enasik hinthoa ama'n nangni naminngarsik eii.
\c 4
\s1 Pathian Malung Kamintai Ringkhuo Inkhat
\p
\v 1 Ajuohekna ah ulenai ngai, nangni'n keini diangnga inphut angtho-thoa Pathian malung kamintai ringkhuo ah ringnasik ah ning-inchu angnga. Adik, hiwahi, nangni'n hiwa ringkhuo lam hin ninglaring, tuunchu nangni'n Pumi Jisu ramingnga kheella thonasik ah keini'n nina khat-um masokna kinnanei. 
\v 2 Ajarchu Pumi Jisu ranak khan nangni kinnaminchuna ngaikha nangni'n ningjet. 
\v 3 Nangni inthiangsik khat-um zool-inthaiya inphut pum-inthiang inthiang sik hi Pathian imanuom kha eii. 
\v 4 Inkanei pasal nangni rakip in ningnumei le inthiang khat-um kaya kaomma karing ning-inchu sik eii, 
\v 5 Pathian kajetmak zaatlop ngai'n taksa imanuom lamma inring kha emaru. 
\v 6 Hiwa jarra, nangni tu inkhat innum Christian inkhat diang akatuunmak thomarasu emakli inmani chungnga nemna leimarasu. Khawa katho ngaikha Pumi'n arachaaksik eii tihi matiang khan keini'n kinleiriljei halli keini'n nangnidiang kanatak-ah chongpena kinaleineijei. 
\v 7 Pathian in eini omchan inthiangmak ah kaom sik-ah inakoi emak, takkha inthiang sik-ah inakoi eii. 
\v 8 Khawa jarra tu e-innum hiwa minchuna kajuimak mi khan miring minchuna ijuimak emak, takkha ama Ratha Inthiang nakapeii Pathian minchuna ijuimak eii.
\p
\v 9 Nangni inkhat li inkhat inriang nasik jarra majiasik arei ommakjei. Ajarchu nangni inkhat li inkhat angtho-thoa inriang sikme tihi nangni ningpumtak diang Pathian in anaminchu suojei. 
\v 10 Macedonia ah kangamna rakip diang nangni'n hika-ang inthiang omchan katha ningthojei. Khawa jarra ulenai ngai kakheel doomma omchan katha ningthosik hi kinamasok eii. 
\v 11 Matiangnga kinnaleirilpi angnga, ringkhuo kahoiya omnasik, ningchuon ningchuon inngaidonru halli ningtheinuoa ringnasik inthoru. 
\v 12 Hinthoa nangni'n akangamna makngai diangnga inphut kayana ningmusik eii khat-um nangnisik ah angme arei kaom kha tu inkhat diang-um inngaimak kha ning esik eii.
\s1 Pumi Juona sik
\p
\v 13 Takkha ulenai ngai inngamna kaneimak ngai angnga ninmalung minpoong maknasik, akathi ngai jarra inthiang kha nangni'n ningjetsik hi keini'n kinmanuom. 
\v 14 Jisu hi athijei halli aringnook jei tihi eini'n ningamna, khawa jarra ama kangamna-ah akathi ngaikha Jisu le inruoiya Pathian in aruoisik eii tihi ningamna eii.
\p
\v 15 Ajarchu tuunna angme keini'n kinnaminchu hi Pumi minchuna kha eii: Pumi ajuoni, aleikaringnga kaom eini'n, aleikathi ngai neek-ah ma-sanumin. \rq 1 Cor 15:51,52\rq*
\p
\v 16 Ajarchu Pumi apumtak Marwaanna inphut oong rasale, marwaan tirton kaliankhetpa rasa khat-um Pathian tampaloi rasale inruoiya ajuochumsik eii. Halli Christa kangamna-ah aleikathi ngaikha ma-insa-ah aminringsik eii, 
\v 17 khawapha takkhan eini aleikaringseng in intuupnita inmanile inruoiya suumphai chungnga Pumi inmupui nasik lairalak ah nikalsik ejei. Halli Pumi le inruoiya hektik neileiya niomsuom sik ejei. 
\v 18 Khawa jarra hiwa chong ngai hin nangni inkhat li inkhat malung insoknaru.
\c 5
\s1 Pumi Juona sik Inringchak
\p
\v 1 Ulenai ngai, apha khat-um kumli tha ngai jarra angtikme hiwa ngai kasuoksik nangnidiang heimajiasik rangaimakjei.
\p
\v 2 Ajarchu inruup inkhat in zaanna iheiwa angnga Pumi Nikhuo kha ajuotungsik eii tihi nangni'n inthiangnga ningjet. \rq Matt 24:43; Luk 12:39; 2 Pet 3:10\rq*
\p
\v 3 Mi ngai'n, “Angrakip adaijei khat-um chisik ommak jei,” inti pha, jetlei-theileiya inmangna kha inmani chungnga ajuosik eii. Nai kaneisik numeisa inkhat chungnga jetlei-theileiya naiha kana kahong angnga Pumi Nikhuo kha-um ajuosik eii, halli khawa kha inmani'n inlit matornunu. 
\v 4 Takkha ulenai ngai, nangnichu akaziingnga kaom emakchu jei, inruup khan nangni naminlai angnga khawa Nikhuo khan nangni naminlai marase. 
\v 5 Ajarchu nangni rakip suunta ka-eii, war mi ngaikha ning-ejei. Eini zaan mi emakmi emakli akaziingta emakmi. 
\v 6 Khawa jarra, aleiilak ngai angnga zaalkhai mui; eini harchakrui halli inringchakrui. 
\v 7 Zaan phakhan mi ngai'n inzaal; halli ju-inrui mi ngaikhan Zaankhan in-inrui.
\p
\v 8 Takkha eini suun mi ni-eii, halli eini ni-inringchak sik eii. minriang li ingamna hi eini'n phou nimin-esik eii, halli sanminringna inngamna kha raallukhu nimin-esik eii. \rq Isa 59:17; Eph 6:13-17\rq*
\p
\v 9 Pathian in eini hi ama raangna kha kamusik-ah inakadang emak, takkha eini Nipumi Jisu Christa jarra sanminringna kamusik ah inakadang ejei, 
\v 10 Ama ajuopha, eini nileithi emakli nileiring innum, amale inruoiya niring suomnasik ah ama'n einisik anathipi jei. 
\v 11 Khawa jarra nangni'n tuunna ningtho angnga, inkhat li inkhat insanru halli inkhat li inkhat malung insokru.
\s Ahekna Minchuna li Minpaakna chong ngai
\p
\v 12 Ulenai ngai, Christian ringkhuo tiang nangni karra chuon katho ngai, nangni kanaminchu khat-um lamkakei ngaikha akatha ah khoya thoru tia nangnidiang nina kinheinei. 
\v 13 Inmani'n khawa chuon intho jarra minriangna le inruoiya kheella inmani kha khoya thoru. nangni karra akadai omrase.
\p
\v 14 Ulenai ngai, keini'n nangni masokna kinheinei, akadool ngaikha rakookru, akachi ngaikha malung minngarpiru, akasuol ngaikha sanru, mirakip le kadeiraat eru. 
\v 15 Tu inkhat innum akathamak kha akathamak khan mi inkhat diang maletkir marase, takkha apha rakip-ah mi rakip diang halli inkhat li inkhat diang katha thonasik entokru.
\p
\v 16 Apha rakip ah rokru, 
\v 17 inchat omleiya niru, 
\v 18 angrakip-ah minpaakru. Hiwahi Christa Jisu diang nangni sik-ah Pathian lungdou kha eii.
\p
\v 19 Ratha Inthiang kha minnuor maru; 
\v 20 Pathian chongkachoi ngai chong ngaikha ralaangmak thomaru. 
\v 21 Takkha chong rakip ngaikha enminru: akatha kha kacheet-ah mahuumru 
\v 22 halli akathamak rakip ngaikha mathaanru.
\p
\v 23 Kadai kanape Pathian ama khan, nangni kha angrakip-ah naminthiang rase, halli eini Nipumi Jisu Christa ajuopha khan. Ningratha, ningringphuuk, khat-um ningtaksa pumpui kha inthiangnga nadarase, 
\v 24 Nangni kanakoipa kha ngamna kaom ejarra, ama'n khawakha anathopisik eii.
\p
\v 25 Ulenai ngai, keinisik um nanipiru.
\p
\v 26 Inthiang inzoople inruoiya kangamna rakip khoya inthoru.
\p
\v 27 Hiwa chemajia hi kangamna rakip diang teelpinasik kei'n Pumi thomatorna ranak khan nangni masokna kaheinei.
\p
\v 28 Nipumi Jisu Christa riangwai khan nangni kha naompui rase.