\id 1PE Kharam: Bible Translation 1st Edition.
\ide UTF-8
\ide Unicode (UTF8)
\h 1 Peter
\toc1 PETER Inkhat Changna Chemajia
\toc2 1 Peter
\toc3 1 Pet
\mt1 Peter
\mt2 Inkhat Changna Chemajia
\imt1 Chonglamsaat
\ip 1 Peter chemajia hi tirton Peter in ileimajia eii. Inphutna-ah Peter in hiwa chemajia ah ama hi tu ka-eme khat-um atu diang kimajiame tijarra amalar. Ama'n “Manmasituolla kaom mi rakip diang hiwa chemajia hin aril” (1 Peter 1:1-17), halli (1 Peter 2:11). Ama'n hiwa chemajia kateel ngaidiang hinthoa woi angjet aminkhi, ajarchu inmani rakip kha ram angjet-ah inlei inchekchai jarra eii. Halli hiwa chemajiahi Paul in Ephesian ngaidiang imajia chemajia chongramol lekkhatle inpuoruoi, mi angjet in 1 Peter hi Ephesia larik amajia suoli Christa innei suonuk kum 65 phaiwaiya inmajia lei ete tia ingamna. Peter in hiwa chemajiahi Babylon tia inkoi Rome makheiya iheimajia eii (1 Peter 5:13).
\ip Peter in hinthoa aril, hiwa chemajia amajiana ajarchu, “Hiwahi kadik Pathian riangwai eii tia masoknale rilmalar nasik-ah imajia eii” (1 Pet 5:12). 1 Peter 2:11–3:7, Ephesia 5:18–6:9, khat-um Colossia 3:18–4:6 hi in-angna angjet om. Hiwa larik inthum ngai arup ngaihi insuungkhur innaitheina khat-um ranak kaneingai juisik minchuna jarra anapeii. Halli ama'n Christian ngaidiang aleimasok, kapoong karaal om kaalkhan kadei karaat eru ajarchu aphakha aheknasik naijei (1 Peter 4:1).
\iot Asuungnga kaom Chong
\io1 1. Peter in apumtak inrilsuok halli ama larik kateel ngai kha-um amalar \ior (1:1-2)\ior*
\io1 2. Inmani'n inringkhuo sik-ah sanminringnahi inkhatli inkhat diang inmalarra inomkha Peter in Pathian kha aleiminpaak \ior (1:3–2:10)\ior*
\io1 3. Halli kangamna ngaikha manmasituolla katha-ah ringnasik khat-um anumeili aruothar halli suokli karu ngai'n innaiya omnasik jarra angjet aminchu \ior (2:11–4:11)\ior*
\io1 4. Peter in kapoong karaal suok phakhan kadei karaat enasik ah aleimasok \ior (4:12–5:11)\ior*
\io1 5. Insuona Chong \ior (5:12-14)\ior*
\c 1
\p
\v 1 Jisu Christa suok, Peter makheiya,
\p Pathian ikadang mi ngai Pontus, Galatia, Cappadocia, Asia khat-um Bithynia ramsuung rakip ah innlei kaboi mi angnga inchekchaiya kaom 
\v 2 nangnikha Jisu Christa juinasik khat-um ama thisenkhan insuthiangnasik Nipa Pathian in ileijetmasa lungsing dungjuiya inakadang khat-um ama Ratha khan inthiang tia inabool mikha ning ejei.
\p Riangwai khat-um kadai kha nangnidiang kasip erase.
\s1 Ringnasik Ngamna
\p
\v 3 Pathian khat-um eini Nipa Pumi Jisu Christa Pa ka-eii kha niraya-ah minpaakrui! ajarchu ama'n Jisu Christa kha kathi makheiya minringnook ah eini ngai rakip hi aminriang loknakhan kathar ringkhuo napejei. Hiwa'n einidiang ringnasik inngamna anaminsipjei. 
\v 4 Halli ama'n einisik-ah inadapi katamtak rawaan kha changthei nasik-ah matiang nisongnga niom. Ama'n marwaan ramma inadapi karei rakipkha nangni sik a-eii halli hiwahi inmani'n minmang theinunu, emakli minsetheinunu, khat-um chuoinunijei. 
\v 5 Hiwarakip ngaihi nangnisik eii, inngamna dungjuiya sanminring nasik beiya Pathian ranak in katha tak-ah ida kha, ahekna nikhuoni khan malarnasik beiya insuukchak-ah omjei.
\p
\v 6 Atuunnum aphakhat sik-ah nangni'n poongle raalna angjet ning-intongpui jarra kahoimak om innum, hiwa sik-ah rokro. 
\v 7 Nangni thosik danchu ingamna hi kadik eii tia minmusik, tichu minmangthei ka-eii soonna hi-um meiya inrouwa in-en inle nangni inngamna kha soonna neek ah kathadoom kha-um madan inta in-ensik eii, khawakha e-inchu nangni ngamna khan deimatorna neiningte. Halli Jisu Christa juoinlarni nangni'n minpaakna, lurlianna khat-um kayana kha muningte. 
\v 8 Pathian kha ningni'n ningmumak innum, ama kha ning minriang, halli tuun nangni'n ama kha ningmumak innum, nangni'n ama kha ningngamna khat-um rildan kaommak hoina lurnakhan nangnidiang asip, 
\v 9 halli nangni'n amadiang ningngamna jarra ningratha sik-ah sanminringna kha ningmujei.
\p
\v 10 Hiwa sanminringna jarra Pathian chong kachoi ngai'n katha tak-ah in-entok in-ensuile inruoiya inmani'n hiwa Pathian napesik kutchoi jarra inleirilsuo ejei. 
\v 11 Inmani'n angkachang pha-ah khat-um angtho thoa ajuosikme tia inlei entok.\f + \fr 1:11: \fr*\fq angkachang pha-ah khat-um angtho thoa ajuosikme; \fq*\ft atu \ft*\fqa miring kha esik me khat-um ama'n angtik ajuosik me.\fqa*\f* Atuunna phahi ejei, halli Christa poongna intongpuinasik jarra khat-um ama lurlian nakhan amusik eii tia Christa Ratha'n inmani diang ileikhiinpi kha, atuunna phahin ejei. 
\v 12 Pathian in hiwa Pathian chongkachoi ngaidiang aleimalar, khachu inmani'n chuon inleitho kha inpumtak nemnasik emak takkha nangni nemnasik eii. Inmani ngai'n hiwa jarra inleiril kha marwaan makheiya kajuo Ratha inthiang ranak-ah taangwa ngai'n chong kahoi inleiril suokkha nangni'n atuun ningjetjei. Hiwa ngaihi eii marwaan tirton ngai innum inleijet zootkha.
\s1 Inthiang Ringnasik ah Ikoi
\p
\v 13 Khawajarra chuontho sik-ah ningmalung insuuktaru, malung insurthei eru, Jisu Christa ajuoni nangnidiang ajuochoisik riangwai kha ningmalungnga inngamna dataru. 
\v 14 Pathian chong kajui eru, halli kamo ringkhuo ah naleiring innum, nangni diangnga kaom kathamak malung khan intormaru. 
\v 15 Takkha nangni kanakoipa Pathian inthiang angnga nangni um ning chuontho rakip ah inthiangnga thoru. 
\v 16 Pathian chong in ati, “Inthiangkha eru ajarchu Keihi inthiang ka-eii.” 
\p
\v 17 Khat-um mirakip kha thenkhoi lekleiya chongkatan ama kha nangni'n Pa tia ningkoi, khawa e-inchu hiwa manmasituol hinnum khuol-injil ang inlang Pathian kachiya ringru. 
\v 18 Tichu nangni'n ningjet ang inme nipi nipu ngai kathamak chuontho makheiya nangnidiang katanna kanapeii. Khachu minmangthei ka-eii soonna dangka ka-ang emak. 
\v 19 Khawa khachu noonkuung kaommak khat-um kapop kaommak keelngamteii angnga aman katam Christa inpesuokna kha eii, 
\v 20 Jisu Christa kha manmasituol aboolma ah ikadang suo ejei, takkha nangni ngai rakip sik-ah atuun apha heksitiang inamimu ejei. 
\v 21 Ama makheiya nangni rakip Pathian kha ningngamna eii, ama kha kathi makheiya aminring khat-um lurna apejei, khawa e-inchu nangni ingamnali rangaituina kha Pathian diang aomjei.
\p
\v 22 Atuunchu kadik kha ningjuijarra ningpumtak ning-insuthiangjei, khawajarra nangni'n ning-u ningnai ngai sik-ah kadik minriang nakha ningneijei, khatli inkhat malung inthiangnga inriangru.\f + \fr 1:22: \fr*\fq malung inthiangnga; \fq*\ft larik lekkhat ah \ft*\fqa Namalung pumpuiya. \fqa*\f* 
\v 23 Tichu kathimak sik nulepa sa angnga nangnihi karing khat-um hektik kaneimak Pathian chong jarra ning inneithar ejei. 
\v 24 Khawajarra,
\q1 “Mirakip hi chinthou ka-ang in-eii,
\q2 halli inmani lurnakha leiya reiparngai ka-ang in-eii;
\q1 chinthou kha lacharsik khat-um reiparkha lamangsik eii, \rq Isa 40:6-8\rq*
\q2
\v 25 Takkha Pumi chongkha inmang omnuni.” 
\m Hiwa chongkahoi hi-eii nangnidiang naleiripi.
\c 2
\s1 Akaring Lungpui khat-um Inthiang Phunglezaat
\p
\v 1 Khawajarra, nangni'n kathamak karil, maleisei karil, emakli katha inleem, kara-ot, emakli mikarilse chong kathamak rakip hi mathaanru. 
\v 2 Khat-um inneilim naitedoong ngai ang inlang apharakip ah inthiang ranutui kha rathalam sik-ah karaalchak eru, khawakha e-inchu nangni'n sanminringna ah ning insoonsik eii. 
\v 3 Atuunchu nangni'n Pumi hi angtuk kathame tihi ningjetjei. \rq Minpkla 34:8 \rq*
\p
\v 4 Mi ngai'n innahiaijuon anemna kaboi karing lungpui nangni kha Pumi diang ningheiwa inchu, Pathian in nangni hi kalurtheiya i-nakadang mi ning-ejei. 
\v 5 Nangni'n karing lungpui angnga heiwaru, halli nangni kha rathalamtiang biak-inn saknasik ah na-inliingnasik eii, khawa khan nangni hi Jisu Christa makheiya Pathian izoot rathalamtiang dooiphur ngai kapesik ah inthiang thiampu ngai angnga sepa kathosik ning-eii. 
\v 6 Ajarchu Pathian chong in ati,
\q1 “Enru, kei'n Zion na lung kiphun kha,
\q2 kei'n Zion sik-ah kikadang akilla kaom kalurthei lung kha ejei;
\q2 halli atu ka-ang in ama kha inngamna kanei'n angtik niteii injakna omnunijei.” \rq Isa 28:16 \rq*
\m
\v 7 Han hiwa lung kangamna nangni kha aman katamthei ning eii, takkha aka-ngamnamak inmani diangchu,
\q1 inn kasakpa'n kathamak eii tia ikalekjuon lungkha,
\q2 lung karra kathakhet lungkha aleiminchang jei, \rq Minpkla 118:22 \rq*
\m
\v 8 Khat-um aleiilaak inthiang chong in ati,
\q1 “Hiwa lunghi miringngai kaminsuisik eii,
\q2 halli inmani ngaikha minba nasik lung um a-eii.” 
\m Inmani'n insuina ajarchu inmani'n inthiang chong kha leingamnamu, hiwahi inmani sik ah Pathian lungdou eii. \rq Isa 8:14-15\rq*
\p
\v 9 Takkha nangnichu innakadang mi ngaikha ning ejei, rengphung sik, inthiang zaatsik, Pathian misik, khat-um nangni ngaikha kaziing makheiya ama katha war khan anakoisuok jarra nangni'n Pathian chuontho loknakha karilthang sik-ah inakadang eii. \rq Suok 19:5-6; Isa 9:2; 43:20,21; Innidan 4:20; 7:6; Tit 2:14\rq*
\p
\v 10 Apha khatchu nangni Pathian mi ngai lei-emakchu, atuunchu Pathian mi ning ejei, halli apha khatchu Pathian minriangna kha leimumakchu, takkha atuunchu ama minriangna kha ningmujei. \rq Hos 2:23 \rq*
\s1 Pathian Suok
\p
\v 11 Minriang kaom ulenai ngai, kei'n nangnidiang kanati, khuolmi khat-um innlei kaboi angnga hiwa manmasituol hin! eini taksa ah raal kanatho manu chuonhi katho emui. 
\v 12 Nangni ngai rakip chuonna kathamak ah kanarilla kaom Pathian kajetmak zaatlop ngaidiang katha omchanna ringru, ajarchu ama juoni nichuontho katha li Pathian niminpaakna ngaihi inmani'n murasu.
\p
\v 13 Khale inruoiya Pumi sikbeiya ranak kanei mirakip diang e-innum, matorna kaneikhet reng diang e-innum, 
\v 14 halli ramkaroon ngaidiang e-innum nangnikha inpeluutru, ajarchu inmani kha kathamak katho ngaidiang poongna kapesik khat-um katha katho ngaidiang kaminpaak sik-ah Pathian in ikadang eii. 
\v 15 Khawajarra kajetmak ngai'n ka-am chongril kha nangni'n katha tho-inlang min-omchianru, khawakha Pathian inmanuom kha eii. 
\v 16 Ninglungdouwa karing mi eru, khat-um nangni lungdou kha kathamak makhu nasik ah inliingna maru. Takkha Pathian suok ang inlang ringru. 
\v 17 Mi rakip kha kayaru, inngamna kanei aleiilaak diang minriangru, Pathian kha kayaru, khat-um reng ngaikha um kayaru.
\s1 Christa Poongna Omchan
\p
\v 18 Suok rakip in ning karu ngaikha kayaru, khat-um nangni ngaidiang katha kanatho inmani khabit emak ning kayasik khat-um akathamak karu diang um ning kayasik eii. 
\v 19 Nangni'n ngamnasik kaommak poongna kha ning intongpui inchu Pathian in rawaan napesik eii, ajarchu nangni'n Pathian lungdou sik-ah ning-ngaidon. 
\v 20 Halli nangni'n kathamak natho jarra ramol nabak inchu angme nanemna kaom, takkha nangni'n kadik ningtholi poongna ningnei inchu Pathian in nangni kha rawaan napesik eii. 
\v 21 Hiwasik-ah Pathian in nangni kha inakoisuok eii, ajarchu Christa in napoong piya omchan kathakha naleidapi, khawajarra ningni'n ama omchan kha ningjuisik eii. 
\v 22 Halli ama'n manu thomak, khat-um ama baisuo makheiya maleisei inkhatbit um iril jetmakmi. \rq Isa 53:9 \rq*
\p
\v 23 Amakha inrilthai kaalkhan, ama'n kase ah masang kirnookmak, ama kha inminpoong kaalkhan, woikhat maleiikirsik thomak, takkha akadik chongtan nikhan Pathian om tia ama inngamna kha ada. \rq Isa 53:7 \rq*
\p
\v 24 Khale inruoiya Christa Jisu apumtak in eini manu rakip cross ah anaroonpi, khawajarra eini'n manu khan thimator nite halli akadiksik um ringmator nite. Ama napoppi nakhan eini nidamjei. \rq Isa 53:5 \rq*
\p
\v 25 Khawajarra nangni'n keelngam inkhat in alam iminchai ka-ang ning eii, takkha atuunchu nangni ngai ratha kanakhaalpi keelngam kakhaalpa diang ning heikirjei. \rq Isa 53:6 \rq*
\c 3
\s1 Inkanei Numeisa ngai khat-um Inkanei Pasal ngai
\p
\v 1 Hiwa angnga numeisa ngai innum ningruothar nuoiya ning omsik eii, itichu atu ka-ang in Pathian chongkha inmani'n inngamnamak innum, numeisa nang naomchan katha'n inmani kha minngamna matorna naneisik eii. Halli chong minchu nasik arei omnunijei. \rq Eph 5:22; Col 3:18 \rq*
\p
\v 2 Ajarchu inmani'n nang inthiangnali kayana omchankha inmusik eii. 
\v 3 Halli nang nathana kha putiangnga min-emaro, nasamchoiya, emakli soonna nabet na-ah, emakli retruo nathona ah, \rq 1 Tim 2:9 \rq*
\p
\v 4 khawaneek achu suungnga namalung katha kha namin esik, Pathian izoot arei kaomkhet chuoitik kaommak katha khat-um malungkadai li nunchan inchuol kha eru. 
\v 5 Khawajarra tiallaiya inthiang numeisa ngai'n Pathian diang inngamna inda-ah inpumkha inruothar diang inpeluut ah inthana inminchang. 
\v 6 Sarah in, Abraham chongkha ajui, halli amadiang karu tia akoi, nangni'n akatha kha ningthoa halli iteii kha nangni'n ningchimak inchu ama sanu ngaikha ning ejei. \rq Inphut 18:12 \rq*
\p
\v 7 Hiwa angnga pasal ngai innum ngaidonru, malung inmuwa ning numeile omsuomru, khat-um inmani kha nang neek-ah kasuol mi eii tia kaya inlang sepa thoru halli ningringkhuoa nangnile kaomsik kapoithei kutchoi eii ti-inlang leiru khawakha e-inchu nangni'n Pathian ningni rakip ah kana-ook omnuni. \rq Eph 5:25; Col 3:19 \rq*
\s1 Katha thonasik ah Poongna
\p
\v 8 Hekna-ah nangni ngairakip, khatli inkhat diang ningngaidon khat-um ningmanuom ningmin angripsik eii, inkhatli inkhat inriangru khat-um malung kadai eru halli malung inniam eru. 
\v 9 Halli nangni'n kathamak li kathamak ah emakli khomaak li khomaak ah inleiikir maru, khaneek achu rawaanna inpekirru, ajarchu hiwa thonasik ah inakoisuok eii, khawa e-inchu nangni'n rawaan ningmusik eii. 
\v 10 Chong inthiang in inti angnga,
\q1 “Atu ka-ang in aring khuokha kaminriang
\q2 halli nikhuo katha angjet amuzoot inchu,
\q2 nangni'n kathamak karil
\q2 khat-um maleisei karil ningdasik eii. \rq Minpkla 34:12-16 \rq*
\q1
\v 11 Nangni'n kathamak makkheiya inlet inlang katha thoru,
\q2 nangni'n kadai ning entoksik halli khawakha ningsongsik eii.
\q1
\v 12 Ajarchu Pumi'n kadik mi ngaikha ompuichak
\q2 halli inmani ngai Pathian ninakha arangaipi.
\q2 takkha Pumi'n kathamak katho ngaidiangchu enzootmak.” 
\p
\v 13 Nangni kha katha kathozoot thei ning e-inle tu-in naminse niame? 
\v 14 Takkha nangni katha sikbeiya poongna ningnei inchu nangnikha rawaan katha ning eii! nangni'n tuteii chimaru khat-um malung mindong maru. \rq Matt 5:10; Isa 8:12-13 \rq*
\p
\v 15 Takkha nangni malungnga Christa kha china neiru halli ama kha Pumi eii tia kayaru. Khat-um apha rakip ah nangni inngamna jarra kanarakelsik mirakip diang kamasangsik-ah inringchak in omru, 
\v 16 halli kayale inruoiya malung inniamma thoru, nangni kase katha jetna malungkha inthiangnga daru, khawakha e-inchu nangnidiang innarilse phakhan, nangni'n Christa ningjui jarra katha omchan ningthokha kathamak ah kanarilse inmani'n innarilna jarkhan jakna inmusik eii. 
\v 17 Han kathamak kathosik neek achu, Pathian lungduo e-inchu kathasik beiya kapoong kha atha. 
\v 18 Khawale inruoiya Christa'n manu\f + \fr 3:18: \fr*\ft La­rik katam khat achu ka­poong.\ft*\f* sik-ah woikhatbit nathipijei, Nangnikha Pathian diang nakeiruoi nasik-ah katha mi khan manu karoon ngai rathuulla nathipi halli ama kha taksa ah inleithat han ratha ah aminringjei. 
\v 19 Halli ama ratha kha asiya inkhumma inda ratha ngaidiang chong juorilpi. 
\v 20 Khawa ngai khachu tiallai Noah pha ah ama'n rakuong boollai, Pathian in malung kadaiya i-ngaak chongkajui makngai ratha diang eii. Hiwa rakuong suungnga kaleiom mi chu lekteii in-eii halli miring kariat khabit inlei eii tui makheiya isanring. \rq Inphut 6:1–7:24 \rq*
\p
\v 21 Halli hiwa tui'n injetnachu tuikaluut tina eii, halli atuunchu nangni ringna ningmujei. Hiwahi napumkachok iminthiang chian emak, takkha malung inthiangnga Pathian diang chongkhitna nibool kha eii. Halli Jisu Christa ihongring kha'n nangni kha ningring ejei, 
\v 22 Ama'n marwaan tiang akalla Pathian kutchangtiang aomjei, halli marwaan tirton ngai, matornali ranakngai chungnga ama'n wai roonjei.
\c 4
\s1 Pathian sik-ah Karing
\p
\v 1 Khale inruoiya Christa'n einisik-ah apumtak-ah napoongpijei, han nangni-um ama malungroonle in-angrip kinnei tia ngaidon inlang ranak songru, ajarchu atu ka-ang in taksa poongna kanei mikha manu ah poong nunijei. 
\v 2 Halli atuun makheiya nangni'n ninglaringsik ringkhuo hi Pathian lungduo nuoiya ningring sikjei, khat-um manmasi ngai imanuom ringkhuoa ringnutunjei. 
\v 3 Khawale inruoiya nangni'n akatheng ringkhuoa zaatlop ngai'n inthozoot ka-emak omchan, zool-inthai, ju inrui, ka-emak katho, ju inruiya kahoi, khat-um miramil chubei katho ngaihi nangni'n ningthoa aphakha kahunna ningminthengjei. 
\v 4 Halli nangni'n inmani kathamak ringna khat-um chuon ka-uoimak khan ning inchelmak jarra inmani'n ngakna innei, halli inmani'n nangnikha narilthaina innei. 
\v 5 Akaring khat-um akathi chong katansik insuuk-ah kaom amadiang inmani'n intheinuoa inchuon thomankha Pathian diang inpeluutsik eii. 
\v 6 Khawajarra hiwasik bit-ah eii akathiya kaom inmani diang um chongkahoi inleirilpi, han inmani kha mi rakip taksa dungjuiya chong intan angnga inmani um chong intansik eii, takkha inmani'n ratha tiang Pathian angnga inringsik eii.
\s1 Pathian Kutchoi dungjuiya katha silpu
\p
\v 7 Angrakip aheknasik phakha anaijei. Khawajarra malung insurthei khat-um malung inringchak eru khawakha e-inchu nangni'n Pathian kanimator eningte. 
\v 8 Achungnga angrakip ngai neek ah, khatle inkhat malung inthiangnga inriangru, ajarchu minriang in manu angjet amakhu. \rq Chongil 10:12 \rq*
\p
\v 9 Inkhatli inkhat diang inrilse elekleiya indonthei eru. 
\v 10 Pathian silpu katha angnga mi rakip in inlak kutchoi ning imu ngaikha mi ngai sepa katha ah thonasik eii. 
\v 11 Atu ka-ang karil mi khan Pathian chongkha rilrase; halli atu ka-ang sepa katho mi khan Pathian in amadiang ipeii ranak khan sepa kha thorase, khale inruoiya angrakip inpaakna kha Jisu Christa diangnga inphut Pathian diang perasu, ajarchu lurna khat-um ranak hi kumsoot ah amata eii. Amen.
\s1 Christian ni-ejarra Poongna
\p
\v 12 Minriang kaom ulenai ngai, nangni chungnga madanna poongna kanathei ning intongpui kaalkhan hiwahi nangnidiang suoksik ka-emak kasuok ti inlang ngakmaru. 
\v 13 Khawaneek achu Christa poongna kha kindeisuom eii ti-inlang rokna neiru, ama poina juo-inlarni nangnidiang rokna khan asipsik eii. 
\v 14 Nangni kha Christa ramingsik beiya innarilthai inchu, rawaam katha kha ning eii, ajarchu Ratha poinale Pathian ratha kha nangnidiang aom. 
\v 15 Nangni poongna ningnei khachu, mi kathat, emakli inruup, emakli kathamak angjet katho, emakli achuon eleiya mi ngai chuonna inchelraat enasik emak. 
\v 16 Ang ka-ang e-innum, nangni'n Christian ning ejarra ningpoong inchu injakkhai maru, takkha Christa raming ningroon jarra Pathian kha minpaakru.
\p
\v 17 Tichu Pathian kajet insuungkhur rakip diangnga inphut mansakhet chongtan nasik aphakha ajuotung sikjei; halli einidiang inphut masa-inle Pathian chongkahoi hi mi ngaidiang le angkachang omchanna esikme? 
\v 18 Chong inthiang in iti angnga,
\q1 “Akatha mi ngai sanringnasik-ah intak;
\q2 kha e-inle Pathian kajetmak manu karoon ngai diangleii ang suoksikme?” \rq Chongil 11:31 \rq*
\m
\v 19 Khawakha e-inchu, atu ka-ang Pathian lungdouwa poongna kanei ngaichu huoikajoua inmani kaboolpa Pathian diang inpumkha inpesuoksik eii, halli katha kha-um insong cheiya inom sik eii.
\c 5
\s1 Pathian Keelngam ngai
\p
\v 1 Kei'n koisuok karoon inkhat kachangnga koisuok karoon ngaidiang kanati, khawa khachu keihi Christa poongna raalna jarra sakhi ka-eii halli kei'n akalajuosik lurlian nakha kalachansik eii. Kei'n nangnidiang kanatinook 
\v 2 Pathian in inapeii keelngam rahooingai kakhaalsik chuonkha malung karok ah thoru, Pathian i-naminthozoot dungjuiya thoru khat-um ningthozoot makpumma thomaru. Nangni ningchuon kha sialsum munasik bit-ah thomaru, takkha malung inthiangnga sepa thoru. \rq Jn 21:15-17 \rq*
\p
\v 3 Han nangnidiang keiruoisik ah innapeii mi ngai chungnga wai roonnasik thomaru, takkha keelngam rahooi ngaidiang omchan kathakha inchangru. 
\v 4 Halli akaliankhet keelngam kakhaalpa ajuo kaalkhan nangnidiang kachuoi kaboi lurna renglukhu kha ningmusik eii.
\p
\v 5 Khangdoong ngai hiwa angnga upa ngaidiang ningpum kha peluutru. Nangni rakip ngai'n khatli khatdiang nunchan kaom puondiar kha inlukru, ajarchu, chong inthiang in ati, “Pathian in in-or mi ngaikha zootmak, takkha nunchan inchuol mi ngaidiang riangwai kha apeii.” \rq Chongil 3:34 \rq*
\p
\v 6 Pathian ranak kutnuoiya ningtheinuoa nunchan inchuol eru, khawakha e-inchu ama'n nangni kha apha kachatak ah nakadom saangsik eii. \rq Matt 23:12; Luk 14:11; 18:14 \rq*
\p
\v 7 Nangni malung dongna rakip ah Pathian diang peluutru, ajarchu ama'n nangnikha anaompui.
\p
\v 8 Inringchakru, insingtheiru! nangni kana-inhalpui Seitan kha sabakkai inraam angnga aloonna om, halli miring inkhat einasik-ah a-enna aom. 
\v 9 Nangni inngamnakha micheetru, halli Seitan kha zootmaru, ajarchu manmasituol pumpuiya kaom ning-u ningnai kangamna ngaikha hiwale in-angrip poong nakha indeiya inom. 
\v 10 Khat-um nangni'n aphakhat ningpoong ningraal suoli angrakip ah riangwai kanei Pathian in Christa diang eini ngaihi ama hektik kaboi lurlian nakha munasik ah inakoi ejei, halli ama'n akathakhet namin-esik eii, halli intir lekleiya omnasik, ranak khat-um kadik ah ngirtheina kha anapesik eii. 
\v 11 Amadiang hektik kaboi ranak kha omrase! Amen.
\s1 Ahekna Chongmathaanna
\p
\v 12 Kei'n huoikajuotak Christian ulenai inkhat eii tia kilei Silas in nasan jarra hiwa kabong chemajia hi kimajia mator eii. Kei'n nangnidiang kanamasokzoot khat-um kei karingkhuo thurchi hi kanarilpizoot hiwa ngaihi inthiangnga Pathian riangwai kha eii. Hiwahin nangni'n kacheet-ah ngirru. \rq Chuon 15:22,40 \rq*
\p
\v 13 Nangnile inakadang suom Babylon\f + \fr 5:13 \fr*\fq Babylon\fq*\ft : Chongmalar larik dungjuiya hiwahi Rome diang iminkhi eii.\ft*\f* na kaom koisuok ngai innum nangnidiang inpaakna inheimathuon, halli kei kasapa Mark innum inpaakna anaheipeii. \rq Chuon 12:12,25; 13:13; 15:37-39; Col 4:10; Philem 24 \rq*
\p
\v 14 Khatli inkhat diang Christian inriangna ah inzoop inlang indonru.
\p Christa diangnga kaom nangni ngairakip chungnga kadai kha omrase.