\id 2TI – Koya
\ide UTF-8
\h ୨ ତୀମତି
\toc3 ୨ ତୀମତି
\toc2 ୨ ତୀମତି
\toc1 ତୀମତିନ୍‌ ଗାର୍ରେ ପାଉଲ୍‌ତେ ଦ୍ୱିତୀୟ ଚିଟି
\mt2 ତିମତିଙ୍କ୍ ନିକଟକୁ ପାଉଲଙ୍କ ଦ୍ୱିତୀୟ ପତ୍ର
\mt1 ତୀମତିନ୍‌ ଗାର୍ରେ ପାଉଲ୍‌ତେ ଦ୍ୱିତୀୟ ଚିଟି
\imt ତୀମତି ବଇ ବିଷୟ୍‍ତେ ଅଣ୍ଡୟ୍‌‍ ପଦ୍‍
\ip ୨ ତୀମତି ବଇ ପାଉଲ୍‍ତାଗାଙ୍କ୍‍ ତାନ୍‍ ଶିଷ୍ୟ ତୀମତିନ୍‍ ଗାରେ ଲେକା ଆତ୍‍ତେ ଚିଟି । ୨ ତୀମତି ପାଉଲ୍‍ତେ ଜିୱୁଣ୍ଡ୍‍ତାଗ୍‍ ମାଡ଼େଙ୍ଗ୍‍ ଲେକା ଆତ୍‍ତେ ଚିଟି । ଇଦ୍‍ ସମୟତେ ଅଣ୍ଡ୍‌‍ ରୋମ୍‍ତାଗ୍‍ ବନ୍ଦି ମାତ୍‍ତଣ୍ଡ୍‍ \xt ୧:୧୬\xt* ପାଉଲନ୍‍ ତଡ଼୍‍ ତୀମତିନ୍‍ ଗାଟି ସମ୍ପର୍କ ମାତ୍‍ତେ ମେଣ୍ଡେ ସାର୍ରେଦାମ୍‍ ଅଂକିଙ୍କ୍‌ ମାର୍‍ ଇନା ଲେକ୍‍ତଣ୍ଡ୍‍ \xt ଫିଲିପିୟ ୨:୨୨; ୧ ତୀମତି ୧:୨; ୧:୧୮\xt* ଇଦ୍‍ ପାଉଲ୍‍ତେ ନାଲୁ ଚିଟି ଲୋପେଙ୍କ୍‍ ଅଣ୍ଡୟ୍‌‍ ବେଗେ ମଣ୍ଡଲିତିଙ୍କ୍‍ ୱେରଣ୍ଡ୍‍ ନାରୁଣ୍ଡ୍‍ ଲେକ୍‍ତଣ୍ଡ୍‍ । ମେଣ୍ଡେ ମୁଣ୍ଡ୍‍ ଚିଟି ସାର୍ରେ ଆଦୁତେ ୧ ତୀମତି, ତୀତସ୍‍ ନୁ ଫିଲିମନ୍‍ । ଦ୍ୱିତୀୟ ଚିଟି ଲେକା ଆଦାନ୍‍ ୱେଲେ ରୋମୀୟ ସାମ୍ରାଜ୍ୟତାଗ୍‍ ତାଡ଼ନା ମାଡ଼ମାତ୍‍ତଡ଼୍‍ । ସମ୍ବାବନା ଇଦ୍‍ କାରନ୍‍ ମାନ୍ଦାନ୍‍ ମାୟ୍‍ଦିଙ୍କ୍‍ ପାଉଲ୍‍ ବନ୍ଦି ମାତ୍‍ତଣ୍ଡ୍‍ ନୁ ତୀମତିଙ୍କ୍‍ କଷ୍ଟ ସୟେମ୍‍ ମାଡ଼ାନଙ୍କ୍‍ ନିର୍ଦ୍ଦେଶ୍‍ ଇସମାତ୍‍ତଡ଼୍‍ । ୧ ତୀମତି ଲେକାମ୍‌ ପାଉଲ୍‍ ତୀମତିଙ୍କ୍‍ ମିଚ୍‍ ଗୁରୁଡ଼୍‍ ବିଷୟ୍‍ତେ ନାର୍ଗେ ସତର୍କ ସୁଚନା ଇଦ୍‍ତଣ୍ଡ୍‍ । \xt ୧ ତୀମତି ୧:୧୬-୧୮\xt* ପାଉଲ୍‍ ତୀମତିଙ୍କ୍‍ କେତିତଣ୍ଡ୍‍ ଯେ, ବବିଷ୍ୟତେ ନାର୍ଗେ କଷ୍ଟତାୱୁ ସମୟ୍‍ ମିନ୍ଦେ \xt ୩:୧\xt* ।
\iot ବଇତ୍‍ ଲୋପେ ମାନ୍ଦାନ୍‍ ମୁକ୍ୟ ବିଷୟ୍‍
\io1 ୧. ପାଉଲ୍‍ ତୀମତିଙ୍କ୍‍ ନମସ୍କାର୍‍ କେତିତଣ୍ଡ୍‍ ନୁ ଅଂକିଙ୍କ୍‌ ସାହାସ୍‍ ଇଦ୍‍ତଣ୍ଡ୍‍ । \ior ୧:୧-୧୮\ior*
\io1 ୨. ତୀମତିଙ୍କ୍‍ ଗାଡ଼୍‍ସ୍‍ ପ୍ରମାନ୍‍ ମାଡ଼ି ତଅତାନ୍‍ ସେଙ୍ଗେ ପାଉଲ୍‍ ସାହାସ୍‍ ଇଦ୍‍ତଣ୍ଡ୍‍ । \ior ୨:୧-୧୩ \ior*
\io1 ୩. ପେର୍କେ ପାଉଲ୍‍ ବେସ୍‍କେ ସାଦାରନ୍‍ ପରାମର୍ଶ୍ ଇଦ୍‍ତଣ୍ଡ୍‍ । \ior ୨:୧୪-୨୬ \ior*
\io1 ୪. ବବିଷ୍ୟତ୍‍ ଗଟନା ବିଷୟ୍‍ତେ ସତର୍କ ମାନ୍ଦାନାଦ୍‍ ନୁ ନିଜାତ୍‍ ଆର୍‍ ଏଞ୍ଚାନ୍‍ ସେଙ୍ଗେ ସତର୍କ ମାଡ଼ିତଣ୍ଡ୍‍ । \ior ୩:୧–୪:୮ \ior*
\io1 ୫. ପାଉଲ୍‍ ତୀମତିଙ୍କ୍‍ ବେସ୍‍କେ ନିଜର୍‍ ବିଷୟ୍‍ତେ କେସ୍‍ ଲେକା ତେର୍‍ସ୍ପିତଣ୍ଡ୍‍ । \ior ୪:୯-୨୨ \ior*
\c 1
\p
\v 1 ନାନ୍‍ ପାଉଲ୍, କ୍ରିଷ୍ଟ ଜିସୁନ୍‍ନାଗେ ମାନ୍ଦାନ୍ ଜିୱେ ସମ୍ବଦୀୟ ପ୍ରତିଜ୍ଞା, ଲେକାମ୍ ଇଶ୍ୱର୍‌ତେ ଇଚ୍ଛା ତଡ଼୍ କ୍ରିଷ୍ଟ ଜିସୁନାଗେ ନାନେ ୱେରନ୍ ପ୍ରେରିତ ।
\p
\v 2 \x + \xo ୧:୨ \xo*\xt ପ୍ରେରିତ ୧୬:୧.\xt*\x*ନା ପ୍ରିୟ ମାର୍‍ ତୀମତିଙ୍କ୍ ନାନେ ଇଦ୍ ଚିଟି ଲେକ୍‍ତାନ୍ । ବାବାଲ୍ ଇଶ୍ୱର୍‍ ନୁ ପ୍ରବୁ ଜିସୁ କ୍ରିଷ୍ଟ ନିକିଙ୍କ୍ ଅନୁଗ୍ରହ, କୃପା ନୁ ଶାନ୍ତି ରହସିୱିନ୍ ।
\s ଦନ୍ୟବାଦ୍ ନୁ ୱେଡ଼୍‍କେତାଦ୍‍ ଗଟ୍
\p
\v 3 ନା ଆନିଦାଦିଡ଼୍ ଲେକାମ୍ ନାନେ ବେନ୍ ଇଶ୍ୱର୍‌ତିଙ୍ଗ୍ ଲେକାତ୍ ହୃଦୟତେ ସେବା ମାଡ଼ ୱାସମିନ୍ଦେନ୍, ଅଙ୍କ୍‌ ଦନ୍ୟବାଦ୍ ଇସ୍ କେତୁତାନ୍ । ନାୟାଦ୍ ପ୍ରାର୍ତନା ତାଗ୍ ସାରେଦିନା ନାର୍କେପାୟାଲ୍‍ ନିକିଙ୍କ୍ ହେର୍କା ମାଡ଼ାନ୍ ୱେଲେ ନାନେ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦ୍‍ତାନ୍ । 
\v 4 ନାନେ ବେଦ୍‍ଲେକାମ୍ ୱେଡ଼୍‍କେତେ ପରିପୂର୍ଣ୍ଣ ଆଦ୍‍ତାନ୍, ହିଦିନ୍ ସେଙ୍ଗେ ମିୟାଦ୍ କାଣ୍ଡେଡ଼୍‍ ନାକିଙ୍କ୍ ହେର୍କା ମାଡ଼ି ମିକିଙ୍କ୍ ଉଡ଼ାନ୍ ସେଙ୍ଗେ ଅଣ୍ଡୟ୍‌‍ ଦାମ୍ ଇଚ୍ଛା ମାଡ଼ୁତାନ୍ । 
\v 5 \x + \xo ୧:୫ \xo*\xt ପ୍ରେରିତ ୧୬:୧.\xt*\x*ମିୟାଦ୍ କାକବାୟି ଲୋୟୀ ନୁ ମାତ୍‍ତା ଇଉନିସୀ ବେଦ୍‍ଲେକାମ୍ ବିଶ୍ୱାସ୍‍ ମାଡ଼ମାତ୍‍ତେ, ମିୟାଦ୍ ମିକା ଆ ହୃଦୟତେ ବିଶ୍ୱାସ୍‍ ମିନ୍ଦେ । ଇଦ୍ ଗଟ୍‍ ନାନେ ହେର୍କା ମାଡ଼ୁତାନ୍ । ମିୟାଦ୍ ଆଦ୍‍ ବିଶ୍ୱାସ୍‍ ମିନ୍ଦେ ଇଞ୍ଜ ନିଜାମ୍ ନାନେ ପୁତ୍‍ତାନ୍ । 
\v 6 ନାନେ ନି ପରୁ କାୟ୍‍ ୱାଟ୍‍ଟେ ପେର୍କେ ମିଡ଼୍ ଇଶ୍ୱର୍‌ତାଗାଙ୍କ୍ ବେନ୍ ଶକ୍ତି ଦର୍‍ସ୍କି ମାତ୍‍ତିଡ଼୍, ଆଦିଙ୍କ୍ ଜିୱେ ମାଡ଼ି ନେହେତାନ୍ ସେଙ୍ଗେ ନାନେ ମିକିଙ୍କ୍ ହେର୍କା ୱାଟିସ ମାନ୍ତାନ୍ । 
\v 7 ବାତେଙ୍କ୍‍ଇତ୍କେ ଇଶ୍ୱର୍‍ ମାନାଙ୍କ୍ ବିରୁତେ ଆତ୍ମା ଇୱଣ୍ଡ୍‍, ମାତର୍ ଶକ୍ତି, ପ୍ରେମ ନୁ ବୁଦ୍‌ ଇଲ୍‍ୱେ ଆତ୍ମା ଇସ୍‌‍ମିନ୍ଦେଣ୍ଡ୍ ।
\p
\v 8 ଆଦିଙ୍କ୍ ପ୍ରବୁ ଜିସୁନ୍ ବିଷୟତେ ଶାକ୍ଷ୍ୟ ଇଦାଙ୍କ୍ ସିଗ୍ ଆୟ୍‍ମାଟ୍; ଅନ୍‌ ସେଙ୍ଗେ ନାନେ ବନ୍ଦି ନା ସେଙ୍ଗେ ମିକା ସିଗ୍ ଆୟ୍‍ମାଟ୍ । ମାତର୍ ଇଶ୍ୱର୍‍ ଇସ୍‍ମାନ୍ଦାନ୍ ଶକ୍ତି ଲେକାମ୍ ମୀଇ କ୍ରିଷ୍ଟ ଜିସୁନ୍ ସୁସମାଚାର୍ ସେଙ୍ଗେ ଦୁଃକା‍ମ୍ ମାଡ଼ାଙ୍କ୍ ତିଆର୍ ଆୟ୍‍ମୁଟ୍ । 
\v 9 ଅଣ୍ଡ୍‌ ମାନ୍‍ ସତ୍ କାମ୍‍ଦେ ପୁରସ୍କାର୍ ଲେକାମ୍ ଅଣ୍ଡ୍‌ ମାନାଙ୍କ୍ ଆହ୍ୱାନ୍ ମାଡ଼ଣ୍ଡ୍ ମାତର୍ ଅନ୍‌ ଅନୁଗ୍ରହତେ ଅନ୍‌ ହେର୍କେତେ ତିଆର୍‌ ମାଡ଼ାଙ୍କ୍‌ ମାନାଙ୍କ୍ ତାନ୍ ପ୍ରିୟଦାସ ଆଦାନ୍ ସେଙ୍ଗେ ହେଞ୍ଚିମିନ୍ଦେନ୍ । କ୍ରିଷ୍ଟ ଜିସୁନ୍ ଶାସନ୍‍ ନାର୍ଗ ୱାଡ଼୍‍ଷାତାଗାଙ୍କ୍ ଇଶ୍ୱର୍ ମାନାଙ୍କ୍ ଇଦ୍ ଅନୁଗ୍ରହତେ ପାତ୍ର ଇନା ମାଡ଼ି ନେହେସ୍‍ମିନ୍ଦେନ୍; 
\v 10 ଇଞ୍ଜେ ଇଦ୍ ଦାରାଦାମତେ ତଅନ୍‌ଦି ଆସ୍ ତ୍ରାଣକର୍ତ୍ତାଲ୍ କ୍ରିଷ୍ଟ ଜିସୁ ଇଦ୍ ସାରେ ବିଷୟତିଙ୍କ୍ କେସ୍‍ ମାଡ଼ିମିନ୍ଦେନ୍ । ଅଣ୍ଡ୍‌ ଡଲାନ୍ ଶକ୍ତିତିଙ୍କ୍ ମାପିତ୍‍ତନ୍ ନୁ ଅନ୍‌ ସୁସମାଚାର୍ ତୋଡ଼୍ ଅନନ୍ତ ଜିୱେତ୍ ଆର୍ ତିଆର୍ ମାଡ଼୍‍ତନ୍ ।
\p
\v 11 \x + \xo ୧:୧୧ \xo*\xt ୧ ତୀମତି ୨:୭.\xt*\x*ଇଦ୍ ସୁସମାଚାର୍ ତେ ନାନେ ୱେରନ୍ ପ୍ରଚାର୍‍ତନ୍, ପ୍ରେରିତ ଶିଷ୍ୟ ନୁ ମେସ୍ତେରିନ୍ ଲେକାମ୍ ନିଯୁକ୍ତି ମାଡ଼ିମିନ୍ଦେନ୍ । 
\v 12 ଅଦିନ୍‌ ସେଙ୍ଗେ ନାନେ ଇଉସାରେ ଦୁଃକାମ୍ ମାଡ଼ୁତାନ୍ । ବେନଙ୍କ୍ ନାନେ ବିଶ୍ୱାସ୍ ମାଡ଼ୁତାନ୍, ନାନେ ଅନ୍‌ ସୁଦୁଟ୍ ପରିସୟ ଦର୍ସକ୍‍ତାନ୍ ନୁ ଅଣ୍ଡ୍‌ ନାକିଙ୍କ୍ ବେନ୍ ଦାୟିତ୍ୱ ଇସ୍‍ମିନ୍ତେଣ୍ଡ୍, ଆଦ୍ ମାଡ଼ାଙ୍କ୍ ସାରେ ଦିନ୍ ଯାକ ଅଣ୍ଡ୍‌ ନାକିଙ୍କ୍ ସିମ୍ ଚାମ୍ ତାଗ୍ ନେହେତିତନ୍, ଆଦ୍ ନିଜାମ୍‍ତେ ପୁଞ୍ଜ୍ ନାନେ ଇଞ୍ଜେକ୍‍ ଯାକ ପୁରାପୁରି ଆଶେତନ୍ ଆସ୍‍ମିନ୍ତେନ୍ । 
\v 13 ନାୟାଗାଙ୍କ୍ ବେନ୍‍ସାରେ ବାକ୍ୟ କେଞ୍ଜିମିନ୍ଦେଡ଼ି, କ୍ରିଷ୍ଟ ଜିସୁନ୍ ମୁନେଙ୍କ୍ ବିଶ୍ୱାସ୍‍ତେ ବା ପ୍ରେମତେ ଆଦ୍ ଆଦର୍ଶଲେକାମ୍ ପଇସ୍‍ ମାନୁଟ୍ । 
\v 14 ମୀଇ କାଇଦେ ବାତେ ସମପ୍ତିତ୍ ବେନ୍ ସାୟେ ବିଷୟ, ଆଦ୍ ମିୟାଗ୍ ମାନ୍ତାନ୍ ପବିତ୍ର ଆତ୍ମାତେ ଲେକେତ୍‍ ନେହେସ୍‍ ମାନୁଟ୍ ।
\p
\v 15 ମିଡ଼୍ ପୁତ୍‍ତିଡ଼୍ ଫୁଗେଲ୍ ନୁ ହର୍ମଗେନା ତଡ଼୍ ମୁନେ ଏସିଆ ପ୍ରଦେଶ୍‍ତେ ସାରେତଡ଼୍ ନାକିଙ୍କ୍ ୱିଡ଼୍‍ସି ମିନ୍ଦେଡ଼୍‍ । 
\v 16 ଅନିସ୍‌ଫରତେ ପରିବାର୍ତିଙ୍କ୍ ପ୍ରବୁ ଦୟା ମାଡ଼ିଣ୍ଡ୍, ବାତେଙ୍କ୍‍ଇତ୍କେ ଅଣ୍ଡ୍‌ ବାରମ୍ବାର୍ ନାକିଙ୍କ୍ ସ୍ୱାନ୍ତନା ମାଡ଼ିମିନ୍ଦେନ୍, ମେଣ୍ଡେ ନାନେ ବନ୍ଦି ଇଞ୍ଜ ଅଣ୍ଡ୍‌ ସିଗ୍ ଆୟଣ୍ଡ୍‍ । 
\v 17 ରୋମ୍ ନଗର୍‍ତାଗ୍ ହେୱଦାନ୍ ସାଙ୍ଗେ ସାଙ୍ଗେ ଅଣ୍ଡ୍‌ ନାକିଙ୍କ୍ ମେହେକୁଡ଼ି ମିକା ନା ପାକେ ୱାସ୍‍ମାତ୍‍ତନ୍ । 
\v 18 ମହାବିଚାର୍ ଦିନେତ୍‍ତେ ପ୍ରବୁ ଅନ୍‌ ସେଙ୍ଗେ ଦୟା ଆଇଣ୍ଡ୍ । ଏପିସୀତାଗ୍ ଅଣ୍ଡ୍‌ ନାକିଙ୍କ୍ ବେସର୍ ସେବା ମାଡ଼ିମାତ୍‍ତନ୍, ମିଡ଼୍ ଆୱୁ ସାରେ ଗଟ ପୁତ୍‍ତିଡ଼୍ ।
\c 2
\s କ୍ରିଷ୍ଟ ଜିସୁନ୍ ବିଶ୍ୱାସ୍‍ତେ ସୌନିକ୍
\p
\v 1 ନା ପ୍ରିୟ ମାର୍‍, କ୍ରିଷ୍ଟ ଜିସୁନ୍ ତୋଡ଼ କାୟ୍‍ଲାନ୍ ସେଙ୍ଗେ ଅନୁଗ୍ରମାମେ ଅନ୍‌ୟାୟ ବେନ୍ ଶକ୍ତି ଦରକିତ୍, ଆଗାଙ୍କ୍ ମିଡ଼୍ ଡାଟାମ୍‍ ଆୟମୁଟ୍ । 
\v 2 ନାର୍ଗେ ସାକ୍ଷିଙ୍କ୍ ନାଗାଙ୍କ୍ ନାନେ ପ୍ରଚାର୍ ମାଡ଼ିମାନ୍ଦାନ୍ ବିଷୟତିଙ୍କ୍ ମିଡ଼୍ କେଞ୍ଜ୍‍ତିଡ଼୍ । ବାଗାତଡ଼କ୍ ଶିକ୍ଷା ହିଦାନ୍ ସେଙ୍ଗେ ପାର୍‍ଦାନ୍‍ ବିଷୟ୍‍ ନୁ ବିଶ୍ୱାସ୍‍ସେଙ୍ଗେ ନାରିକିଙ୍କ୍ ଇଉ ସାରେ ବିଷୟ ପାଲନ୍ ମାଡ଼ାଟ୍ ।
\p
\v 3 କ୍ରିଷ୍ଟ ଜିସୁନ୍ ୱେରଣ୍ଡ୍ ବିଶ୍ୱସ୍ତ ସୌନିକ୍ ଲେକାମ୍ ମିଡ଼୍ ଅନ୍‌‍ ସେଙ୍ଗେ ଦୁଃକା‍ମ୍ ମାଡ଼ାଟ୍ । 
\v 4 ଯୁଦ୍‌ତାଗ୍‍ କାଇଲି ମାନ୍ଦାନ୍ ୱେଲେ ସୌନିକ୍ ମାତର୍ ତାନ୍ ସେନାପତିଡ଼୍‍କ୍ ସନ୍ତୁଷ୍ଟ ମାଡ଼ାନ୍ ସେଙ୍ଗେ ଆଗ୍ରହ ମାନ୍‍ନ୍ତେ । ଆସୁଙ୍ଗ୍ ଅଣ୍ଡ୍‌ ବାତେଆଇ ଯୁଦ୍‍ ପାଡ଼୍‍ୟି ୱିଡ଼୍‍ସି ମେଣ୍ଡେଅଣ୍ଡ୍‌‍ କାମ୍‍ତାଗ୍ ମନ୍ ଇୱନ୍ । 
\v 5 ମିରାନ୍ ପ୍ରତିଯଗିତାଗ୍ କାଇଲିମାନ୍ଦାନ୍ କାର୍‍ସାନଡ଼୍ ପ୍ରତିଯଗିତାଗ୍ ନିୟମ୍‍ ଲେକାମ୍ ପାଲନ୍ ମାଡ଼୍‍ୱେ ମାତ୍‍କେ, ଆଗାଙ୍ଗ୍ ଅଣ୍ଡ୍‌ ଜିଡ଼୍‍ତେ କାମ୍ ଦାଗ୍ ପୁରସ୍କାର୍ ଲାବ୍ ମାଡ଼େପାର୍‍ୱନ୍ । 
\v 6 ଗାଟି କଷ୍ଟ ମାଡ଼ି ଚାଷି ପାଣ୍ଡ୍‌ସ୍ପିମାନ୍ଦାନ୍ ଫସଲ୍‍ତେ ସାରେଦିନାତ୍‌ ତିପାଲ୍‌ ଦର୍‌କାନ୍ ଉଚିତ୍ । 
\v 7 ନାନେ ବାତ୍‍ କେତୁତାନ୍, ମନ୍ଇସ୍ ଚିନ୍ତା ମାଡ଼ାଟ୍; ଆଲେକ୍ ହିଉସାରେ ବିଷୟତେ ଅର୍ତ ବୁଜେମ୍‍ ଆଦାଙ୍କ୍ ପ୍ରବୁ ମିକିଙ୍କ୍ ଶକ୍ତି ହିଦ୍‍ତନ୍ ।
\p
\v 8 ନାନେ ପ୍ରଚାର୍ ମାଡ଼ମାନ୍ଦାନ୍ ସୁସମାଚାର୍ ଲେକାମ୍ ବେନ୍ ଡଲିମାନ୍ଦାନ୍ ଜିସୁ କ୍ରିଷ୍ଟ ଦାଉଦ୍‍ ରାଜାନ୍ ବଂଶତେ, ଅଙ୍କ୍‌ ହେର୍କା ମାଡ଼ାଟ୍ । 
\v 9 ହିଦ୍ ସୁସମାଚାର୍ ପ୍ରଚାର୍ ମାଡ଼୍‍ନାଙ୍କ୍ ନାନେ ଅପରାଦି ଲେକାମ୍ ଶୃଙ୍ଖଲାବଦ୍ଦ ଆସ୍ କଷ୍ଟ ବଗେମ୍ ଆଦୁତାନ୍ । କିନ୍ତୁ ଇଶ୍ୱର୍‌ତେ ବାଣୀତିଙ୍କ୍ ବେନ ବନ୍ଦି ମାଡ଼େପାର୍‍ୱଡ଼୍ । 
\v 10 ଇଶ୍ୱର୍‌ତେ ହେଞ୍ଚିମାନ୍ଦାନ୍ ନାରିଡ଼୍ କ୍ରିଷ୍ଟ ଜିସୁନାଗେ ନାର୍ଗେ ପରିତ୍ରାଣ ନୁ ଅନନ୍ତ ଗୌରବ୍ ଲାବ୍ ମାଡ଼ାଟ୍, ଇଦ୍ ଲେକାମ୍ ନାନେ ସାରେ କଷ୍ଟ ମାଡ଼ୁତାନ୍ । 
\v 11 ହିଦ୍ ଗଟ୍ ଅଣ୍ଡ୍‌ ନିଜାମ୍ ସତ୍, “ଅନ୍‌ ତଡ଼୍ ମାମେ ଯଦି ଡଲ୍‍ତମ୍, ଅନ୍‌‍ ତଡ଼୍ ମିକା ଜିୱେ ଆସ୍ ମାନ୍ଦତମ୍ । 
\v 12 \x + \xo ୨:୧୨ \xo*\xt ମାତିଉ ୧୦:33; ଲୁକ ୧୨:୯.\xt*\x*ଯଦି ମାନାଡ଼୍ ଦର୍ଯ୍ୟପଇସ୍ ମାନ୍ତାଡ଼୍, ଆଲେକ୍ ଅନ୍‌‍ତଡ଼୍ ରାଜ୍‍ ମାଡ଼ିକାଡ଼୍; ଯଦି ମାନାଡ଼୍ ଅଙ୍କ୍‌ ଅସ୍ୱିକାର୍ ମାଡ଼୍‍ୱାଲ୍, ଆଲେକ୍ ଅଣ୍ଡ୍‌ ମିକା ମାନାଙ୍କ୍ ଅସ୍ୱିକାର୍ ମାଡ଼ଣ୍ଡ୍; 
\v 13 କିନ୍ତୁ ଅନ୍‌ ସେଙ୍ଗେ ମାନାଡ଼୍, ଅବିଶ୍ୱସ୍ତ ଆତ୍‍କେ ମିକା, ଅଣ୍ଡ୍‌ ସାରେଦାମ୍ ବିଶ୍ୱସ୍ତ ମାନ୍‍ତନ୍, ବାତେଙ୍କ୍‍ଇତ୍କେ ଅଣ୍ଡ୍‌ ନିଜର୍ ବିରୁଦ୍ଦତେ କାରାପ୍‍ ବ୍ୟବହାର୍‌ ମାଡ଼େ ପାର୍‍ୱନ୍ ।”
\s ବିଶ୍ୱସ୍ତତେ ଦାସ
\p
\v 14 ଇୱୁସାରେ ଗଟି ହେର୍କା ମାଡ଼ି ନାରିଡ଼୍‍କ୍‍ କାରାପ୍‍ ନୁ ଦସ୍‍ ଇଲ୍‍ୱେ ଗଲ୍‍କ୍‍ ମାଡ଼ାନଙ୍କ୍ ଅଡ଼୍‌‍କିଂଙ୍କ୍ ପ୍ରବୁନାଦ୍ ଲେକାଆତ୍‍ତେ ସାକ୍ଷ୍ୟ ଇମୁଟ୍ । 
\v 15 ମିଡ଼୍ ସିଗ୍‍ ଆୟକଟ୍ ନିର୍ବୁଲ୍‍ ଲେକାତ୍ ଇଶ୍ୱର୍‌ତେ ସତ୍ ବାକ୍ୟ କେଲାଟ୍; ଆଲେକେ, ୱେରନ୍ ବିଶ୍ୱାସ୍ତେ ନାରୁନ୍‍ ଲେକାମ୍ ନିମେ ଇଶ୍ୱର୍‌ତେ ସାରେ ଶକ୍ତି ଲାବ୍ ମାଡ଼ିତିନ୍ । 
\v 16 ବେନ୍ ଦର୍ମବାବଶୂନ୍ୟ ମଣ୍ଡି ବାକ୍ୟକେତାନ୍ ନାରିଙ୍କ୍ ଇଶ୍ୱର୍‌ତାଗାଙ୍କ୍ ହେକାମ୍ ମାଡ଼ିତ୍, ଅଣ୍ଡ୍‌ ସାରେତାଗାଙ୍କ୍ ମିଡ଼୍ ଯେକା ମାନୁଟ୍ । 
\v 17 ବେନଡ଼୍ ଇଦ୍‍ଲେକାମ୍ ବାକ୍ୟ କେତିତଡ଼୍‍, ଅଡ଼୍‌ ଶିକ୍ଷା କାଡ଼୍‍ୟ ଆଦାନ୍ ପୁଣ୍ଡ୍ ଲେକାମ୍ ତେରାନଡ଼୍‍ ଅଡ଼୍‌ ଆଗାଙ୍କ୍ ମିନ୍ଦେଡ଼୍‍ ହୁମନାୟ ନୁ ଫିଲିତ । 
\v 18 ଅଡ଼ାଦ୍‌ ପୁନରୁତ୍‍ତାନ୍ ଆତ୍‍ତେ ଇଞ୍ଜ କେସ୍ ସତ୍‍ ଆର୍‍ତାଗାଙ୍କ୍‍ ଜେକେ ଅଦୁତଡ଼୍, ମେଣ୍ଡେ ବେସ୍କ୍‌ତୁଡ଼ାଦ୍ ବିଶ୍ୱାସ୍ ୱୁଲ୍‍ଟା ମାଡ଼ିଇଦୁତଡ଼୍ । 
\v 19 କିନ୍ତୁ ଇଶ୍ୱର୍ ବେନ୍ ଡୁଟାଙ୍ଗ୍‍ତେ ବିତ୍ତିବୂମି ମାଡ଼ିସ୍‍ ମିନ୍ତେନ୍, ଆଦିଙ୍କ୍ ବେନ ଉୱୁତେ ପାର୍‍ୱଡ଼୍ । ଆଦ୍ ବିତ୍ତିପ୍ରସ୍ତର ପରୁ ଲେକା ଆତ୍‍ତେ; “ଇଶ୍ୱର୍ ତାନ୍ ନିଜେତ୍ ନାରିଡ଼୍‍ ପୁନ୍ତନ୍ ବେନ ନିଜେତିଙ୍କ୍ ଇଶ୍ୱର୍‌ତେ ନାରୁନ୍ ଇନା ପରିଚୟ ଇଦ୍‍ତନ୍, ଅଣ୍ଡ୍‌ ସାରେ ଦୁଷ୍କର୍ମତାଗାଙ୍କ୍ ୱେରେ ଆଇନ୍ ।”
\p
\v 20 ୱେରନ୍ ସାଉକାର୍ ନାରିନ୍ ଲୋନ୍‌ ନାର୍ଗେ ଲେକେତ୍‌ କୁଣ୍ଡା ମାନ୍ତା । ଆଗେଙ୍କ୍ ବେସ୍‌କ୍ ମୂଲ୍ୟବାନ୍ ସୁନା ରୂପାତେ ତିଆର୍; ମେଣ୍ଡେ ବେସ୍‌କ୍ ସାସ୍ତେତେ ଦର୍କତାଉ ମାଣ୍ଡୁଲ୍‍ତେ ବା ୱେର୍‍କ୍‍ତେ ତିଆର୍ । ବେସ୍‌କ୍ ପାତ୍ର ପାଣ୍ଡୁକିନାଗ୍ ଉତ୍ସବ୍‍ତେ ଦର୍‍କାଡ଼୍‍ ଆଦ୍‍ତା; ବାଗାତାୱୁ ଦୈନନ୍ଦିନ କାମ୍‍କିନାଗ୍ ଲାଗେମ୍ ଆଦ୍‍ତା । 
\v 21 ବେନଆଇ ସାରେ ପାପ କାରାପ୍ ତାଗାଙ୍କ୍ ନିଜେତିଙ୍ଗ୍ ଶୁଚି ନେହେତିତନ୍, ଅଣ୍ଡ୍‌ ପ୍ରବୁନ୍ କାମ୍‍ଦାଗ୍ ବ୍ୟବହୃତ୍ ଆଦ୍‍ତେ, ଅଣ୍ଡ୍‌ ପ୍ରବୁନାଗେ ଅନୁରକ୍ତ, ଅନ୍‌ ସେଙ୍ଗେ ଆଦ୍ ଦର୍‍କାର୍ । ବେନ ବାତେଆଇ ଲେକେତ୍‍ କାମ୍‍ତାଗ୍ ବିନିଯୁକ୍ତ ଆଦାନ୍ ଅଣ୍ଡ୍‌ ତିଆର୍‍ । 
\v 22 ବେନଡ଼୍ ନିର୍ମଲ୍ ହୃଦୟତେ ଇଶ୍ୱର୍‌ତିଙ୍କ୍ ସାହାର୍ଯ୍ୟ ପ୍ରାର୍ତନା ମାଡ଼ମାନ୍ତନ୍, ଅଡ଼୍‌‍ ସଂସ୍ପର୍ଶତେ ମାଞ୍ଜ୍ ମିଡ଼୍ ଲେଇୟଡ଼୍‍ ଉତ୍ତେଜନାତିଙ୍କ୍ ଆୟତ୍ ମାଡ଼ିତଡ଼୍ ମେଣ୍ଡେ ଦାର୍ମିକ୍‍ତେ, ବିଶ୍ୱାସ୍ତେ, ପ୍ରେମ ନୁ ଶାନ୍ତି ଇଦାନ୍‍ ସେଙ୍ଗେ କାମ୍ ମାଡ଼ାଟ୍ । 
\v 23 ମୁର୍କ ନୁ ବୁଦ୍‌ଇଲ୍‍ୱେ ଯୁକ୍ତିତର୍କ ନାରୁଡ଼ାଙ୍କ୍‍ ଯେକା ମାନୁଟ୍ । ମିଡ଼୍‍ ପୁତ୍‍ତିଡ଼୍, ଇୱୁସାରେତେ ପରିଣତି ସାରେ ଗଲ୍‍କ୍‍ । 
\v 24 ପ୍ରବୁନ୍ ଦାସ ବିରଦ୍ ମାଡ଼ାନାଦ୍ ସାୟେ ଆୟ, ମାତର୍ ସାରେତଡ଼୍ ସେଙ୍ଗେ ଲେକେତ୍‍, ଶିକ୍ଷା ଇଦାନାଦ୍‍ ଲେକେତ୍‍ । 
\v 25 ଅଙ୍କ୍‌ ବିରଦ୍ ମାଡ଼ମାନ୍ଦାନ୍ ନାରୁଡ଼୍‍କିଙ୍କ୍‍ ଦୋଷତୃଟି ଅଣ୍ଡ୍‌ ମୃଦୁ ଲେକାମ୍ ଦର୍ଶାମାଡ଼ମାନ୍ଦନ୍, ଅନୁତାପ୍ ମାଡ଼ି ସତ୍ ଉପଲବ୍ଦ ମାଡ଼ାନଙ୍କ୍ ଆୟି ତ ଅଣ୍ଡ୍‌‍ଦିନେ ଇଶ୍ୱର୍ ଅଡ଼୍‌‍କିଂଙ୍କ୍ ସୁଜଗ୍‍ ଇଦ୍‍ତନ୍ । 
\v 26 ମେଣ୍ଡେ ବେନ୍ ଶୟତାନ୍ ଅଡ଼୍‌କିଂଙ୍କ୍ ତାନ୍ ଇଚ୍ଛା ସାଦନ୍ ମାଡ଼ାନ୍ ସେଙ୍ଗେ ବନ୍ଦି ମାଡ଼ିମିନ୍ତେ, ସଚେତନ୍ ଆସ୍ ତାନ୍ ଉଡ଼ୀଇ ଦାଗାଙ୍କ୍ ମୁକ୍ତ ଆଦ୍‍ତଡ଼୍ ।
\c 3
\s ମୁନେତ୍‍ କାଲାମ୍
\p
\v 1 ଇଦ୍ ପୁଞ୍ଜ୍‍ମାନୁଟ୍ ଯେ, ଶେଷଦିନାମ୍‍ତେ ବିପଦ୍ ୱାସ୍‍ ହେଉଦ୍‍ତେ । 
\v 2 ନାରିଡ଼୍ ସ୍ୱର୍ତପର୍, ଲୋବି, ଆଂକାରୀ ନୁ ଆତ୍ମାବିମାନୀ ଆଦ୍‍ତଡ଼୍; ଅଡ଼୍‌ ୟାୟ ବାବାଙ୍କ୍ ଅପମାନ୍ ଇଦ୍‍ତଡ଼୍; ଅଡ଼୍‌ ମାନ୍‍ତାଗ୍ କୃତଜ୍ଞତା ନୁ ଅଦର୍ମତେ ମାୟି ଆଦ୍‍ତଡ଼୍, 
\v 3 ଅଡ଼୍‌ ଆଦ୍‍ତଡ଼୍ ନିର୍ଦ୍ଦୟ, ନିନ୍ଦେତଡ଼୍ ଇଂସାତଡ଼୍, ନୁ ବୟଙ୍କାର୍; ସାରେତଡ଼୍ ସାୟେତ୍‍ ବିଷୟତିଙ୍କ୍ ପାସ୍‍କିତଡ଼୍ । 
\v 4 ଅଡ଼୍‌ ଆଶେତେ ସ୍ପୀତ ଆସ୍ ବିଶ୍ୱାସଗାତକ ନୁ ବିଚାର୍‌ ଆଦ୍‍ତଡ଼୍; ଅଡ଼୍‌‍ ଇଶ୍ୱର୍‌ତେ ବକ୍ତିତାଗାଙ୍କ୍ ଆମଦ୍ ପ୍ରମଦ୍‍ତିଙ୍ଗ୍ ସାରେଦାମ୍ ହେର୍କା ମାଡ଼ିତଡ଼୍ । 
\v 5 ଅଡ଼୍‌ ବକ୍ତନଡ଼୍ ବଣ୍ଡ୍‍କ୍‍ତିଙ୍ଗ୍ ପଇଦ୍‍ତଡ଼୍, କିନ୍ତୁ ଆଗେତ୍‍ ଶକ୍ତିତିଙ୍କ୍ ଅସ୍ୱିକାର୍ ମାଡ଼ିତଡ଼୍; ଇଦ୍‍ଲେକାମ୍ ନାରିଡ଼ାଗାଙ୍କ୍ ଯେକା ମାନୁଟ୍ । 
\v 6 ଇଡ଼ାଗାଙ୍କ୍‍ ବେସ୍‍ତୁଡ଼୍ ଜିଦ୍‍ଲେକାମ୍ ନାରିଡ଼୍ ମିନ୍ଦେଡ଼୍, ବେନଡ଼୍ ଲକ୍ ଲକ୍ ନେଙ୍ଗି ପାପତେ ବାରାକ୍ରାନ୍ତ ନୁ ବାତ୍‍ବାତା କାରାପ୍‍ ଅବ୍ୟାସ୍‍ତେ ଚାଲିତ୍ ମୁର୍କ ନାଟାକିଙ୍କ୍ ନିଜେତ୍ ବଶୀଭୁତ ମାଡ଼ିତଡ଼୍ । 
\v 7 ବେନଡ଼୍ ସାରେଦାମ୍ ସତ୍ ପୁନ୍ଦାନ୍ ସେଙ୍ଗେ ଚେଷ୍ଟା ମାଡ଼ମାନ୍ତନ୍, କିନ୍ତୁ ତାନ୍ ସନ୍ଦାନ୍ ପାହେମ୍ ଆୟନ୍, ଇଦ୍‍ଲେକାମ୍ ନାଟାକିଂଙ୍କ୍ ଆୱୁ ନିଜେତିଙ୍ଗ୍ ବଶୀଭୁତ ମାଡ଼ିତା । 
\v 8 ଯନ୍ନୀସ ନୁ ଯମ୍ୱ୍ରୀସ୍ ବେଲାନ୍ କି ମୋଶାନ୍‌ ବିରୁଦ୍ଦାଚରନ୍ ମାଡ଼ମାତ୍‍ତଡ଼୍, ଆଦେଲେକାମ୍ ମୁନେତ୍‍ ଦିନାମ୍‍ତେ ହି ଦୁରାଚାରୀଡ଼୍ ସତ୍‍ତେ ବିରୋଦ୍ ମାଡ଼ିତଡ଼୍ ଅଡ଼୍‌ ମସ୍ତିଷ୍କ ବିକୃତି ଗଟେମ୍ ଆଦ୍‍ତେ ନୁ ଅଡ଼୍‌ ଦର୍ମବିଶ୍ୱାସ୍ ବିଲପ୍ ଆତ୍‍ତେ । 
\v 9 କିନ୍ତୁ ଅଡ଼୍‌ ଗାଟି ମୁନେ ଆଦେପାର୍‍ୱଡ଼୍ । ଅଣ୍ଡ୍‌‍ଦିନେ ସାରେତଡ଼୍‍ ପୁନ୍ଦ୍‍ତଡ଼୍, ଅଡ଼୍‌ ବେସର୍ ନିର୍ବୋଦ । ଯନ୍ନୀସ ନୁ ଯମ୍ୱ୍ରୀସ୍‍ତେ ଜିୱେତେ ବାତେ ଗଟେମ୍ ଆସ୍‍ମାତେ, ଅଡ଼୍‌ ଜିୱେତେ ମିକା ଆଲେକେ ଆଦ୍‍ତେ ।
\s ଶେଷ ଗଟ୍
\p
\v 10 ମିଡ଼୍ ନା ଶିକ୍ଷା, ନା ଆଚରନ୍ ନୁ ନା ଜିୱେତେ କାମ୍‌ ପେର୍କେ ମାଡ଼୍‍ତିଡ଼୍ । ନାୟାଦ୍ ବିଶ୍ୱାସ୍, ଶକ୍ତି, ପ୍ରେମ, ସହନଶୀଲତା । 
\v 11 \x + \xo 3:୧୧ \xo*\xt ପ୍ରେରିତ ୧3:୧୪-୫୨; \xt*\xt ପ୍ରେରିତ ୧୪:୧-୭; \xt*\xt ପ୍ରେରିତ ୧୪:୮-୨୦.\xt*\x*ନାୟାଦ୍ କଷ୍ଟ ନୁ ଦୁଃକାମ୍ ମିଡ଼୍ ଆଦାଙ୍କ୍‌ ଆଦ୍‌ତିଡ଼୍ ଆଣ୍ଟିୟୋକ୍‌, ଇକନିୟା ନୁ ଲୁସ୍ତ୍ରା ତେ ନା ସେଙ୍ଗେ ଆଦେଲେକାମ୍ ତାଡ଼ନା ଗଟେମ୍ ଆସ୍‍ମାତେ; ନାନେ ଆଦ୍ ସହ୍ୟ ମାଡ଼ିମାତ୍‍ତାନ୍, ମେଣ୍ଡେ ପ୍ରବୁ ନାକିଙ୍କ୍ ଆଉସାରେତାଗାଙ୍କ୍ ଉଦାର୍ ମାଡ଼ିମାତ୍‍ତନ୍ । 
\v 12 ବେନ୍ ସାରେତଡ଼୍ କ୍ରିଷ୍ଟ ଜିସୁନ୍ ତଡ଼୍ ଦର୍ମଜିବନ୍ ଯାପନ୍ ମାଡ଼ାନଙ୍କ୍ ଇଚ୍ଛା ମାଡ଼ିତନ୍, ଅଡ଼୍‌ ତାଡ଼ନାତେ କଷ୍ଟ ଆତ୍‍ତନ୍ । 
\v 13 କିନ୍ତୁ କପଟି ନୁ ପ୍ରବଞ୍ଚକନଡ଼୍ ପେର୍କେ ସର୍ବନାଶ ପାକେ ଅଡ଼୍‌ ବାଗାତଡ଼କ୍ ଟକାମାଡ଼ି ପେର୍କେ ନିଜେ ଟକେମ୍ ଆଦ୍‍ତଡ଼୍ । 
\v 14 କିନ୍ତୁ ବେନ୍‍ ସାରେ ସତ୍‍ ଶିକ୍ଷା ମାଡ଼ି ଡାଟୁମ୍‍ତେ ବିଶ୍ୱାସ୍‍ ମାଡ଼ୁତିଡ଼୍‍, ଆଦ୍ ସାରେତାଗ୍ ମିଡ଼୍ ଡୁଟାଙ୍କ୍ ମାନୁଟ୍ । ମୀଇ ମେସ୍ତେରିଡ଼୍ ବେନଡ଼୍‍, ମିଡ଼୍ ପୁତ୍‍ତିଡ଼୍ । 
\v 15 କ୍ରିଷ୍ଟ ଜିସୁନାଗେ ବିଶ୍ୱାସ୍‍ ମାଡ଼ି ପରିତ୍ରାଣ ଲାବ୍ ମାଡ଼ାନ୍ ବୁଦ୍ ବେନ୍ ପବିତ୍ର ଦର୍ମଶାସ୍ତ୍ରତାଗ୍ ଲେକାଆସ୍‍, ମିଡ଼୍ ପିଲେକଞ୍ଜ୍ ଆୱୁ ସାରେ ଶାସ୍ତ୍ର କାର୍‌ସ୍‌ ବୁଜେମ୍ ଆଦୁତିଡ଼୍ । 
\v 16 ସାରେ ଶାସ୍ତ୍ର ଇଶ୍ୱର୍‍ ବିଦ୍ୟା ଇତ୍‍ତେ ପ୍ରନୀତ ସତ୍‍ ଡିଗିୱାସ୍‌ ନୁ ମିଚ୍‌ତେ ପ୍ରତିରଦ୍ ମାଡ଼ି ନୁ ବ୍ରମ କାଲ୍‍ପି ମାଡ଼ାନ୍ ସେଙ୍ଗେ ପରାମର୍ଶ ଇସ୍, ସତ୍‍ଜିୱୁ ବାଦ୍‍କାନଙ୍କ୍ ଦର୍ମଶାସ୍ତ୍ର ସାହାଯ୍ୟ ମାଡ଼ିତ୍, 
\v 17 ବେଲାନ୍ କି ଇଶ୍ୱର୍‍ ନାରୁଡ଼୍, ସିଦ୍ଦ ଆସ୍ ସାରେତ୍ ସାୟେ କାମ୍ ସେଙ୍ଗେ ତିଆର୍‍ ଆଦ୍‍ତେ ।
\c 4
\p
\v 1 ଇଶ୍ୱର୍‌ତେ ମୁନେ ନୁ ସାରେତଡ଼୍ ଜିୱେ ଡଲ୍‍ତେ ନାରିଡ଼୍ ବିଚାର୍ ମାଡ଼ାନଙ୍କ୍ ନୁ ରାଜ୍‍ ମାଡ଼ାନଙ୍କ୍ ୱାସମାନ୍ଦାନ୍ କ୍ରିଷ୍ଟ ଜିସୁ ୱାଦାନ୍ ଦିନେ, ତାନ୍ ରାଜ୍ୟତିଙ୍କ୍ ଲେକେତ୍‍ ମାଡ଼ନ୍ ସେଙ୍ଗେ ନାନେ ମିକିଙ୍କ୍ ଇଦ୍ ଦୃଡ଼ ଆହ୍ୱାନ୍ ଇଦୁତାନ୍ । 
\v 2 ସମୟ ବା ଅସମୟ ବିଚାର୍ ମାଡ଼କଟ୍, ମିଡ଼୍ ସାରେଦିନା ଆଦ୍ ବାକ୍ୟ ପରୁ ଗଟି ଇସ୍ ବୁଜାମାଡ଼ିତିଡ଼୍; ଦୌର୍ଯ୍ୟତେ ଶିକ୍ଷା ଇସ୍, ବେସୁଙ୍କ୍‍ ବର୍ତ୍ସନା ମାଡ଼ି, ବେସୁଙ୍କ୍‍ ବା ୱେଡ଼୍‍କେ ଇସ୍ ବାଗାତଡ଼୍‍ ମନ୍‍ତାଗ୍ ଅଦିନ୍‌ ସେଙ୍ଗେ ପ୍ରତ୍ୟୟ ଜନମ୍ ମାଡ଼ିତେ । 
\v 3 ଅନ୍‌‍ଦିନେ ୱାଦ୍‍ତେ, ବେସୁଙ୍କ୍‍ ନାରୁଡ଼୍ ସତ୍‍ ଶିକ୍ଷାତିଙ୍କ୍‍ କେଞ୍ଜକଟ ମାନ୍ତଡ଼୍, ଅଡ଼୍‌ ମାତର୍ ନିଜେ ନିଜେତ୍ ଅବିଲାଷ ଚରିତାର୍ତ ମାଡ଼ାନ୍ ସେଙ୍ଗେ ଦାନ୍ଦେ ଆଦ୍‍ତଡ଼୍ ନୁ ଇ ଯୁଗ୍‍ତେ ଅଡ଼୍‌‍କିଂଙ୍କ୍ ସମର୍ତନ୍ ମାଡ଼ମାନ୍ଦାନ୍ ବଣ୍ଡ ଶିକ୍ଷାନଡ଼୍‍କ୍ ଅଡ଼୍‌ କାର୍ଙ୍ଗିତଡ଼୍ । 
\v 4 ମେଣ୍ଡେ ସତ୍ ବାକ୍ୟତାଗ୍ କେଞ୍ଜକଟ୍ ୱେଷଡ଼ିନାଗ୍ ମନ୍ ଇସ୍ କେଞ୍ଜିତଡ଼୍ । 
\v 5 ମିଡ଼୍ ସାରେତ୍‍ ବିଷୟତାଗାଙ୍କ୍ ସଚେତନ୍ ଆୟମୁଟ୍, କଷ୍ଟତେ ପାଡ଼୍‍ୟି ମାଡ଼ାଟ୍, ସୁସମାଚାର୍ ପ୍ରଚାର୍‍ତଡ଼୍‍କ୍ କାମ୍ ସାରେ ମାଡ଼ାଟ୍, ମୀଇ ସେବାତେ କାମ୍‍ ସାରେ ମାଡ଼ାଟ୍ ।
\p
\v 6 ନା ଜିୱୁନ୍‍ତିଙ୍ଗ୍ ବଲି ମାଡ଼ି ହିଦ୍ ଜଗତ୍‍ତିଙ୍କ୍ ୱିଡ଼୍‍ସି ମାଡ଼ାନ୍ ଦିନାମ୍ ୱାସ୍‍ହେଉତେ । 
\v 7 ନାନେ ସାୟେ ଯୁଦ୍‌ତାଗେ ପ୍ରାଣପନ୍ ମାଡ଼୍‍ତାନ୍ । ଜିୱେତ୍ ମିରାନାଗ୍ ନାନେ ନିରୂପିତ ଆର୍ ଅଦିକ୍‌ ଲେକେତ୍‍ ମାଡ଼ିମିନ୍ଦେନ୍; ନାୟାଦ୍ ବିଶ୍ୱାସ୍‍ତେ ନାନେ ଦୃଡ଼ ମାତ୍‍ତାନ୍ । 
\v 8 ଇଞ୍ଜେ ନାୟାଦ୍ ଦର୍ମପରାୟନ୍‍ତେ ସେଙ୍ଗେ ଜିଡ଼୍‍ତାଦ୍ ପୁରସ୍କାର୍ ନେହେତାଦ୍ ମିନ୍ତେ । ଅଣ୍ଡୟ୍‌ ଦିନେତେ ନ୍ୟାୟବାନ୍ ବିଚାର୍‍ ମାଡ଼ାନଣ୍ଡ୍ ପ୍ରବୁ ନିଜେ ନାକିଂଙ୍କ୍ ଆଦ୍ ପୁରସ୍କାର୍ ହିଦ୍‍ତନ୍ ମାତର୍ ନା ୱେରଙ୍କ୍ ଆୟ; ପ୍ରେମ ବକ୍ତି ତଡ଼୍ ବେନଡ଼୍ ଅନ୍‌ ୱାଦାନ୍‍ ଦିନାତିଙ୍କ୍ କେପିମିନ୍ଦେଡ଼୍, ସାରେତଡ଼୍ ଆଦ୍ ପୁରସ୍କାର୍ ଲାବ୍ ମାଡ଼ିତଡ଼୍ ।
\s ନିଜର୍‍ତାଦ୍‍ ଗଟ୍
\p
\v 9 ନା ପାକେ ୱାଦାନ୍ ସେଙ୍ଗେ ସିଷ୍ଟ୍‍ପାଟ୍ ଚେଷ୍ଟା ମାଡ଼ାଟ୍ । 
\v 10 \x + \xo ୪:୧୦ \xo*\xt କଲସୀୟ ୪:୧୪; ଫିଲିମୋନ୍ ୧:୨୪; \xt*\xt ୨ କରନ୍ତିୟ ୮:୨3; ଗାଲାତୀୟ ୨:3; ତୀତସ୍‌ ୧:୪.\xt*\x*ଦୀମା ସାଂସାର୍‍ ତିଙ୍କ୍ ପ୍ରେମ ମାଡ଼ି ନାକିଂଙ୍କ୍ ୱିଡ଼୍‍ସିତ୍‍ତେ । ଆଦ୍ ଇଞ୍ଜେ ଥେସଲନିକୀତାଗ୍ ଆତ୍‍ତନ୍ । କ୍ରେସ୍‍କେନ୍‍ସ ଗାଲୀତିଆତାଗ୍ ନୁ ତୀତସ୍ ଡଲମାତିଆତାଗ୍ ଆତ୍‍ତଡ଼୍‍ । 
\v 11 \x + \xo ୪:୧୧ \xo*\xt କଲସୀୟ ୪:୧୪; ଫିଲିମୋନ୍ ୧:୨୪; \xt*\xt ପ୍ରେରିତ ୧୨:୧୨,୨୫; ୧3:୧3; ୧୫:3୭-3୯; କଲସୀୟ ୪:୧୦; ଫିଲିମୋନ୍ ୧:୨୪.\xt*\x*ମାତର୍ ଲୁକ ନା ପାକେ ମିନ୍ଦେନ୍ । ନୀଇ ସାଙ୍ଗେତେ ମାର୍କତିଙ୍ଗ୍ ତାତିତିନ୍; ଅଣ୍ଡ୍‌ ନାକିଙ୍କ୍ ନା କାମ୍‍ତାଦ୍ ସାହାଯ୍ୟ ମାଡ଼େପାର୍‍ତନ୍ । 
\v 12 \x + \xo ୪:୧୨ \xo*\xt ପ୍ରେରିତ ୨୦:୪; ଏଫିସିୟ ୬:୨୧,୨୨; କଲସୀୟ ୪:୭,୮.\xt*\x*ତୁର୍‌କିକଞ୍ଜ୍‌ ନାନେ ଏଫିସସ୍‍ତା ରତ୍‌ତାନ୍‌ । 
\v 13 \x + \xo ୪:୧3 \xo*\xt ପ୍ରେରିତ ୨୦:୬.\xt*\x*ତ୍ରୋୟାତାଗ୍ କାର୍ପନ୍ ପାକେ ନାନେ ବେନ୍ ଚକାସିଲେ ୱିଡ଼୍‍ସି ୱାତ୍‍ତାନ୍, ନିମେ ୱାଦାନ୍ ୱେଲେ ଆଦିଙ୍କ୍ ସାଙ୍ଗେତେ ତାତିତିନ୍ । ନାୟାଉ ବଇ ନୁ ତଲ୍‍କେ ଲେକ୍‍ତାଦ୍‍ ବଇ ମିକା ତାତିତିନ୍ । \fig କାଳିତେ ଲେକ୍‍ତାଦ୍ ତଲ୍‌କେ ଲେକା |alt="Scrolls standing by ink well" src="hk00153c.tif" size="col" copy="Horace Knowles ©" ref="୪:୧୩"\fig*
\p
\v 14 \x + \xo ୪:୧୪ \xo*\xt ୧ ତୀମତି ୧:୨୦; \xt*\xt ରୋମୀୟ ୨:୬.\xt*\x*କଂସାରି ଆଲେକ୍‍ଜାଣ୍ଡାର ନାୟାଦ୍ ନାର୍ଗେ ନଷ୍ଟ ମାଡ଼୍‍ତନ୍; ପ୍ରବୁ ତାନ୍ କାମ୍ ଲେକାମ୍‌ ଅଂକିଙ୍କ୍‌ ସାରେନାଗାଙ୍କ୍ ଦଣ୍ଡ ଇଦ୍‍ତନ୍ । 
\v 15 ଲେକେତ୍‍ ଗଟି ପ୍ରଚାର୍‍ତିଙ୍ଗ୍ ଅଣ୍ଡ୍‌ ଲୋତ୍‍ତେକଞ୍ଜ୍ ବିରଦ୍ ମାଡ଼ମାତ୍‍ତନ୍, ଆଦିଙ୍କ୍ ଅନ୍‌ ପାକେ ନିମେ ସତର୍କତେ ଚଲେମ୍ ଆଦ୍‍ତିନ୍ ।
\p
\v 16 ପ୍ରତମ୍‌ ଦାମ୍ ବେସୁଙ୍କ୍‍ ନାକିଙ୍କ୍ ନିଜେତ୍‍ ପାକେ ସାହାଯ୍ୟ ମାଡ଼ଡ଼୍‍ ଆତ୍‍ତଡ଼୍, ବେନ ନା ପାକେ ମାନ୍‍ୱେ ମାତ୍‍ତଡ଼୍, ସାରେତଡ଼୍ ନାକିଂଙ୍କ୍ ୱିଡ଼୍‍ସି ଆତ୍‍ତଡ଼୍ । ଇଶ୍ୱର୍ ଅଡ଼ାଦ୍‌ ଇଦ୍ ଦୋଷ ପୟ୍‍ମା କି । 
\v 17 ପ୍ରବୁ ନା ପାକେ ଆସ୍ ନାକିଙ୍କ୍ ଶକ୍ତିତନ୍ ମାଡ଼୍‍ତନ୍, ମେଣ୍ଡେ ନାନେ ଗଣ୍ଡ୍ରାସ୍‍ ମକତାଗାଙ୍କ୍ ନାନେ ରକ୍ଷା ଆତ୍‍ତାନ୍, ବେଲାନ୍ ନା ଦ୍ୱାରା ସୁସମାଚାର୍ ସମ୍ପୂର୍ଣ୍ଣତେ ପ୍ରଚାରିତ୍ ଆଦେପାର୍ଦେ ନୁ ଅଣଯିହୁଦୀଡ଼୍‍ ସାରେ ଆଦ୍ ଗ୍ରହନ୍ ମାଡ଼େ ପାର୍‍ତଡ଼୍ । 
\v 18 ପ୍ରବୁ ନାକଂଙ୍କ୍ ସାରେ କାରାପ୍ କାମ୍‍ତାଗାଙ୍କ୍ ରକ୍ଷା ମାଡ଼୍‍ତନ୍ ନୁ ନାକିଂଙ୍କ୍ ରକ୍ଷା ମାଡ଼ି ତାନ୍ ସ୍ୱର୍ଗରାଜ୍ୟତା ଆଦ୍‍ତନ୍; ଯୁଗ୍‍ଯୁଗ୍ ଅନ୍‌ ମହିମା ଆୟି ଆମେନ୍‍ ।
\s ମାଡ଼େଙ୍କ୍‍ତାଦ୍‍ ଶୁବେଚ୍ଛା
\p
\v 19 \x + \xo ୪:୧୯ \xo*\xt ପ୍ରେରିତ ୧୮:୨; \xt*\xt ୨ ତୀମତି ୧:୧୬,୧୭.\xt*\x*ପ୍ରିସ୍କିଲା, ଆକ୍ୱିଲା ନୁ ଅନିସ୍‍ପର୍‍ତେ ପରିବାର୍‍ତିଙ୍କ୍ ନାୟାଦ୍ ନମସ୍କାର୍ କେଞ୍ଜ୍‍ପାଟ୍ । 
\v 20 \x + \xo ୪:୨୦ \xo*\xt ପ୍ରେରିତ ୧୯:୨୨; ରୋମୀୟ ୧୬:୨3; \xt*\xt ପ୍ରେରିତ ୨୦:୪; ୨୧:୨୯.\xt*\x*ଏରାଷ୍ଟ କରିନ୍ଥତତାଗ୍ ମିନ୍ଦେନ୍ । ଟ୍ରୋପିମସ୍‍ତିଙ୍କ୍ ଅଙ୍କ୍‌ ଅସୁସ୍ଥତା ସେଙ୍ଗେ ନାନେ ମିଲୀଟସ୍‍ତାଗ୍ ୱିଡ଼୍‍ସୀ ୱାତ୍‍ତାନ୍ ।
\p
\v 21 ଚାଲ୍ କାଲାମ୍ ତେ ମୁନେଙ୍କ୍ ହିଗେ ୱାଦନ୍ ସେଙ୍ଗେ ଚେଷ୍ଟା ମାଡ଼ାଟ୍ । ଇଉବୁଲସ୍, ପୁଦେନସ୍, ଲିନସ୍, କ୍ଲାଦିଆ ନୁ ଇଗେତ୍ ବାଗାତ୍ ସାରେ କ୍ରିଷ୍ଟବିଶ୍ୱାସି ଦାଦାନଡ଼୍‍ ମିକିଙ୍କ୍ ନମସ୍କାର୍ କେଞ୍ଜ୍‌ପୁତମ୍‌ ।
\p
\v 22 ପ୍ରବୁ ମୀଇ ହୃଦୟତାଗ୍ ସାରେଦାମ୍ ମାନିଣ୍ଡ୍ । ଇଶ୍ୱର୍‌ତେ ଅନୁଗ୍ରହ ମୀଇ ସାରେତଡ଼୍‍ ପରୁ ମାନି ।