\id 2CO - Koya
\ide UTF-8
\h ୨ କରନ୍ତିୟ
\toc3 ୨ କରନ୍ତିୟ
\toc2 ୨ କରନ୍ତିୟ
\toc1 କରନ୍ତିୟ ବିଶ୍ୱାସୀଡ଼୍ ଗାର୍ରେ ପାଉଲ୍‌ତେ ଦ୍ୱିତିୟ ଚିଟି
\mt2 କରନ୍ତିୟ ବିଶ୍ୱାସୀମାନଙ୍କ ନିକଟକୁ ପାଉଲଙ୍କ ଦ୍ୱିତୀୟ ପତ୍ର
\mt1 କରନ୍ତିୟ ବିଶ୍ୱାସୀଡ଼୍ ଗାର୍ରେ ପାଉଲ୍‌ତେ ଦ୍ୱିତିୟ ଚିଟି
\imt ୨ କରନ୍ତିୟ ବଇ ବିଷୟ୍‍ତେ ଅଣ୍ଡୟ୍‌‍ ପଦ୍‍
\ip ଦ୍ୱିତୀୟ୍‍ କରନ୍ତି ପ୍ରେରିତ୍ ପାଉଲ୍‍ତଡ଼୍ ଆଦ୍‍ପାର୍‍ତେ ଜିସୁ କ୍ରିଷ୍ଟନ୍ ଜନମ୍‍ତେ ସାରେ ୫୫-୫୬ ଏଣ୍ଡ୍‍ ପେର୍‍କେ ଲେକ୍‍ତାଦ୍ ଆସ୍‍ମାତ୍‍ତେ । \xt ୧–୧\xt* ମାନ୍‍ ପାକ୍ ମାନ୍ଦାନ୍ କରନ୍ତିୟ ମଣ୍ଡଲିତିଙ୍କ୍ ଲେକ୍‍ତାଦ୍ ଆସ୍‍ମାତ୍‍ତେ ଚିଟି ଲୋପେଙ୍କ୍ ଇଦ୍ ଆଦୁତ୍‍ତେ ପାଉଲ୍‍ତେ ଦ୍ୱିତୀୟ୍‍ ଚିଟି । ପଣ୍ଡିତିଡ଼୍ ବିଶ୍ୱାସ୍ ମାଡ଼ିତଡ଼୍ ଯେ, ଇଦିନ୍ ମୁନେଙ୍କ୍ ପାଉଲ୍ କରନ୍ତିୟ ମଣ୍ଡଲି ଗାର୍‍ରେ ଅଣ୍ଡୟ୍‌ ଆଣ୍ଟ୍‍ ଚିଟି ଲେକିମାତ୍‍ତଣ୍ଡ୍ \xt ୨:୩-୪\xt* ପଦତାଗ୍ ଅଣ୍ଡ୍‌ ବାତ୍ ଗଟ୍ ଇଦ୍‍ତଣ୍ଡ୍, ଆଦିନ୍ ବାତ୍‍ବା ନକଲ ମାୟାଗ୍‌ ଇଲ୍‍ଲେ । ଆଦ୍‍ପାର୍‍ତେ ପାଉଲ୍ ମାକିଦୋନିଆତାଗ୍ ମାନ୍ଦାନ୍ ୱେଲେ ଦ୍ୱିତିୟ କରନ୍ତିୟ ଲେକିମାତ୍‍ତଣ୍ଡ୍ \xt ୨:୧୩\xt* ।
\ip ଦ୍ୱିତିୟ କରନ୍ତି ଆଦୁତ୍‍ତେ ମେଣ୍ଡେନଣ୍ଡ୍ ଅଦ୍ୱିତିୟ କରନ୍ତି ଇଲ୍‍ଲେ, ଆଦ୍ ଗାଟି ନିଜେତାଦ୍ ନୁ ଆଲ୍‍ସାନ୍‍ ଲେକେତାଦ୍ । କରନ୍ତିୟତାଗ୍ ମାନ୍ଦାନ୍ ମଣ୍ଡଲି ବିଷୟ୍‍ତେ ତୀତସ ତାଗାଙ୍କ୍ ସାୟେତ୍ କାବୁର୍ ପାଏମ୍‍ଆସ୍ ପାଉଲ୍ ୱେଡ଼୍‍କ୍‍ତଣ୍ଡ୍ । ଇଦ୍ ଚିଟିତାଗ୍ ପୁନାଦ୍ ନିୟମ୍‍ତାଦ୍ ଦାନ ବିଷୟ୍‍ତେ ଶିକ୍ଷା ପାଏମ୍ ଆଦ୍‍ତାଡ଼୍ । ଇଦ୍ ଲେକ୍‌ତାଗ୍, ବେଗେ ପାଉଲ୍ ଜିରୁଶାଲେମ୍‍ତେ ବିଶ୍ୱାସୀଡ଼୍‍କିଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ଡାବ୍‍କ୍ ତାଲ୍‍କାନଙ୍କ୍ ନିର୍ଦେଶ୍ ଇଦ୍‍ତଣ୍ଡ୍ \xt ୮–୯\xt* । ଇଦ୍ ପୁନ୍ଦାନଙ୍କ୍ ଆଦୁତ୍‍ତେ ଯେ, ମଣ୍ଡଲି ବାୟିଦେ କନ୍‍ସ୍ ବେସ୍‍କ୍‍ତୁଡ଼୍‍ ମିଚ୍ ପ୍ରେରିତିଡ଼୍, ଅଡ଼୍‌ ନିଜେତିଙ୍କ୍ ପଦ ଉନ୍ନତି ମାଡ଼ାନଙ୍କ୍ ପାଉଲ୍‍ତେ ବିରୁଦ୍‍ତେ ମଣ୍ଡଲିତେ ବେସ୍‍କ୍‍ତୁଡ଼୍‍ ନିର୍ଦ୍ଦିଷ୍ଟ ନାରୁଡ଼୍‍କିଂଙ୍କ୍ ଇଂସା ବ୍ୟବହାର୍‌ ମାଡ଼ୁତଡ଼୍ । ଅଡ଼୍‌ ପାଉଲ୍‍ତେ ଅଦିକାର୍‌‍ଦିଙ୍କ୍ ନାକିଂଙ୍କ୍ ହେର୍କା ମାଡ଼ୁତଡ଼୍ । ବେଲାନ୍‍କି ଦ୍ୱିତିୟ କରନ୍ତି ମାଡ଼େଙ୍କ୍‌ତେ ୱେଲେ ଅଣ୍ଡ୍‌ ୱେରଣ୍ଡ୍ ଜିସୁ କ୍ରିଷ୍ଟନ୍ ଅଦିକାର୍‌‍ତେ ୱେରଣ୍ଡ୍ ପ୍ରେରିତ୍ ଇଞ୍ଜ ଗାଡ଼୍‍ସ୍‍ ତଡ଼୍ ପ୍ରାମାନ୍ ମାଡ଼ୁତଣ୍ଡ୍ ।
\iot ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
\io1 ୧. ପାଉଲ୍ ଚିଟିତ୍ ଆରାମ୍‍ତେ ୱେଲେ ନମସ୍କାର୍ ମାଡ଼ୁତଣ୍ଡ୍ । \ior ୧:୧-୭\ior*
\io1 ୨. ପାଉଲ୍ ତାନ୍ ଆଦାଙ୍କ୍‍ ତିୟାର୍‌ ଆତ୍‌ତାଗ୍ ବାଦ୍‍ଲେମ୍ ନୁ ଅଡ଼୍‌ ବିଷୟ୍‍ତେ ଦର୍‍କିମାନ୍ଦାନ୍ ତଥ୍ୟ ନୁ ତାନ୍ ଚିଟି ବିଷୟ୍‍ତେ ଅଡ଼ାଦ୍‌ ଜବାବ୍ । \ior ୧:୮–୭:୧୬\ior*
\io1 ୩. ପାଉଲ୍ ଜିରୁଶାଲେମ୍‍ତେ ବିଶ୍ୱାସୀଡ଼୍ ମାୟ୍‍ଦିଙ୍କ୍ ଦାନ ଆଦାୟ୍‍ ମାଡ଼ାନ୍ ବିଷୟ୍‍ତେ ନିର୍ଦେଶ୍ ଇଦ୍‍ତଣ୍ଡ୍ । \ior ୮:୧–୯:୧୫\ior*
\io1 ୪. ମାଡ଼େଙ୍ଗ୍ ପାଉଲ୍ ତାନ୍ ପ୍ରେରିତ୍ ପଦ ସୁରକ୍ଷା ମାଡ଼ିତନ୍ ନୁ ମେଣ୍ଡେ ଆଦାନ୍ ସେଙ୍ଗେ ସତର୍କ ମାଡ଼ିତନ୍ । \ior ୧୦:୧–୧୩:୧୦ \ior*
\c 1
\p
\v 1 \x + \xo ୧:୧ \xo*\xt ପ୍ରେରିତ ୧୮:୧.\xt*\x*ନାନ୍ ପାଉଲ୍, ଇଶ୍ୱର୍‌ତେ ଇଚ୍ଛା ଲେକାମ୍ ଜିସୁ କ୍ରିଷ୍ଟନ୍ ପ୍ରେରିତ୍ ନୁ ମାନ୍‍ ଦାଦାଲ୍‌ ତୀମତି, କରିନ୍ଥ ମଣ୍ଡଲିତାଗ୍ ଲେକୁତାନ୍ ନୁ ଆଖାୟା ଦେଶ୍‍ତେ ସାରେ ବିଶ୍ୱାସୀ ପାକେ ଇଦ୍ ଚିଟି ଲେକମିନ୍ତେନ୍ ।
\p
\v 2 ମାନ୍‍ ବାବାଲ୍ ଇଶ୍ୱର୍‌ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
\s ପାଉଲ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇତ୍‍ତନ୍
\p
\v 3 ୱାଡ଼ାଟ୍, ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଦନ୍ୟ ନାରୁଣ୍ଡ୍‌, ଦୟାକାରି ନୁ ସାରେତଡ଼୍ ସାହାଯ୍ୟତେ ଉତ୍ସ, ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦିକାଡ଼୍ । 
\v 4 ମାନ୍‍ ଦୁଃକାମ୍ କଷ୍ଟ ୱେଲେ ଇଶ୍ୱର୍‌ ମାନ୍‍ ବେନ୍ ସାନ୍ୱନା ଇଦ୍‍ତନ୍, ଆଦ୍ ସାନ୍ୱନା ତଡ଼୍ ମାନାଡ଼୍ ଦୁଃକାମ୍ କଷ୍ଟ ମାଡ଼ମାନ୍ତାନ୍ ବାଗାତଡ଼୍‍କ୍ ସାନ୍ୱନା ଇଦ୍‍ଦେ ପାର୍ଦତାଡ଼୍ । 
\v 5 ମାନାଡ଼୍ କ୍ରିଷ୍ଟନ୍ ଗାଟି ଦୁଃକାମ୍ କଷ୍ଟତାଗ୍ ‍କାଇଲ୍‍ତାଙ୍କ୍ କ୍ରିଷ୍ଟନ୍ ତଡ଼୍ ଇଶ୍ୱର୍‌ତେ ମହାସାନ୍ତନାତେ ମିକା ତଡ଼୍ ଆଦେ ପାର୍ଦତାଡ଼୍ । 
\v 6 ମାନାଡ଼୍ ଯଦି ଦୁଃକାମ୍ କଷ୍ଟ ମାଡ଼ିତାଡ଼୍, ଆଦ୍ ମିକିଂଙ୍କ୍ ଉପକାର୍ ନୁ ପରିତ୍ରାଣ ସେଙ୍ଗେ । ମାନ୍‍ ସାନ୍ୱନା ଦର୍କେ, ମିଡ଼୍ ମିକା ଆଦେଲେକାମ୍ ଗାଡ଼୍‍ସ୍‍ତେ ଦୁଃକାମ୍ କଷ୍ଟ ମାଡ଼ାନ୍ ସେଙ୍ଗେ ସାନ୍ୱନା ନୁ ଶକ୍ତି ଦର୍‍କିତ୍ । 
\v 7 ମିୟାଗ୍ ମାୱାଦ୍ ଆଶେ ମିନ୍ତେ । ମାମ୍‍ମେ ପୁତ୍‍ତମ୍, ମିଡ଼୍ ମାୟାଦ୍‌ ଦୁଃକାମ୍ ତିପାଲ୍‍ତେ ବେଲାନ୍ ତଡ଼୍ ଆସ୍‍ମିନ୍ତେମ୍, ଆଦ୍‍ଲେକାମ୍ ମା ସାନ୍ତ୍ୱନାତାଗ୍ ମିକା ତଡ଼୍ ଆଦ୍‍ତିଡ଼୍ ।
\p
\v 8 \x + \xo ୧:୮ \xo*\xt ୧ କରନ୍ତିୟ ୧୫:3୨.\xt*\x*ହୋ ଦାଦାଲଡ଼ି ନୁ ଏଲାସ୍କ୍, ମାମ୍‍ମେ ଏସିଆ ପ୍ରଦେଶ୍‍ତେ ମା ପରୁ ଗଟେମ୍ ଆସ୍‍ମାନ୍ଦାନ୍ କଷ୍ଟ ବିଷୟ ମିକିଂଙ୍କ୍ କେତାନଙ୍କ୍ ଇଚ୍ଛା ମାଡ଼ୁତମ୍ । ଆଦ୍ କଷ୍ଟ ସହେମ୍‍ ଆଦେପାର୍ନାଙ୍କ୍ ମାମ୍‍ମେ ଜୀୱୁନ୍‌ତେ ଆଶେ ୱିଡ଼୍‍ସିତ୍‍ତମ୍ । 
\v 9 ମାକିଂଙ୍କ୍ ଡଲାନ୍ ଗଟ୍‌ ଇସ୍‍ମିନ୍ତେଡ଼୍ ଇଞ୍ଜ ଆଲ୍‍ସମାତ୍‍ତମ୍ । ବାତେଙ୍କ୍ ଇତ୍‍କେ ଇଦ୍ ଗଟେମ୍ ଆତ୍‍ତେ, ଆଦିଙ୍କ୍ ନିଜେତ୍ ପରୁ ଆଶେ ମାଡ଼କଟ୍ ଡଲାନଙ୍କ୍ ଜୀୱୁନ୍‌ ଇସ୍‍ମାନ୍ଦାନ୍ ଇଶ୍ୱର୍‌ତେ ପରୁ ଆଶେ ୱାଟ୍‍ତମ୍ । 
\v 10 ଅଣ୍ଡ୍‌ ମାକିଂଙ୍କ୍ ବୟାନକ୍ ଡଲ୍‍ତାଗାଙ୍କ୍ ଉଦ୍ଦାର୍ ମାଡ଼୍‍ତଣ୍ଡ୍ ନୁ ଉଦ୍ଦାର୍ ମାଡ଼ିତନ୍, ମେଣ୍ଡେ ଅଣ୍ଡ୍‌ ଯେ ବବିଷ୍ୟତ୍‍ତେ ମିକା ଉଦ୍ଦାର୍ ମାଡ଼ିତନ୍, ଅନାଗେ ମାୟାଦ୍‌ ଇଦ୍ ଆଶେ ମିନ୍ଦେ । 
\v 11 ମିଡ଼୍ ପ୍ରାର୍ତନା ତଡ଼୍ ମାକିଂଙ୍କ୍ ସାହାଯ୍ୟ ମାଡ଼ାଟ୍ । ଆଲାକେ, ମା ସେଙ୍ଗେ ମାଡ଼ମାନ୍ଦାନ୍ ନାର୍‍ଗେ ପ୍ରାର୍ତନାତାଦ୍‍ ଉତ୍ତର୍ ଦର୍‍କିତ୍ ନୁ ଇଶ୍ୱର୍ ମାକିଂଙ୍କ୍ ଆର୍ଶିବାଦ୍ ମାଡ଼ିତନ୍ । ମା ସେଙ୍ଗେ ନାର୍‍ଗେ ନାରୁଡ଼୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦ୍‍ତଡ଼୍ ।
\s ପାଉଲ୍‍ତେ ଯୋଜନାତାଗ୍ ବାଦ୍‍ଲେମ୍
\p
\v 12 ଜଗତ୍‌ତେ ଜିୱୁନ୍ ନୁ ବିଶେସ୍‍ତେ ମିଇ ତଡ଼୍ ମାୟାଦ୍‌ ସମ୍ପର୍କ ଇଶ୍ୱର୍‌ତେ ପବିତ୍ରତା ନୁ ବିଶ୍ୱସ୍ତତା ତଡ଼୍ ପରିଚାଲିତ୍‍ ଇଞ୍ଜ ମାନ୍‍ ମୋନ୍‍ତାଦ୍‍ ସାକ୍ଷ୍ୟ । ଇଦିନ୍ ସେଙ୍ଗେ ମାନ୍‍ ମନ୍‍ତାଗ୍ ଗର୍ବ ଆଦ୍‍ତେ । ମାନବିକ୍‍ ବୁଦ୍‍ତେ ଆୟ୍‍ୟ, ମାତର୍ ଇଶ୍ୱର୍‌ତେ ଅନୁଗ୍ରହ୍‍ତଡ଼୍ ଆଦ୍ ମାଡ଼ାନଙ୍କ୍ ମାମ୍‍ମେ ତିଆର୍ ଆସ୍‍ମିନ୍ଦେମ୍ । 
\v 13 ବାତ୍ କାର୍‍ସ୍ ମିଡ଼୍ ବୁଜେମ୍ ଆଦ୍‍ତିଡ଼୍, ମୀଇପାକେ ମାମ୍‍ମେ ମାତର୍ ଆସରେ ଲେକୁତମ୍ । 
\v 14 ନାନ୍ ଆଶେ ମାଡ଼ୁତାନ୍, ଇଞ୍ଜେ ବାତ୍ ଇସୁର୍ ବୁଜେମ୍ ଆଦୁତିଡ଼୍, ଆଦ୍ ଆସୁଟେ ପ୍ରବୁ ଜିସୁନ୍ ୱାଦାନ୍ ଦିନାମ୍‍ତେ ସାରେ ବୁଜେମ୍ ଆଦ୍‍ତିଡ଼୍ । ଆଲେକେ, ମିଡ଼୍ ମା ସେଙ୍ଗେ ଗର୍ବ ମାଡ଼ିତିଡ଼୍ ନୁ ମାମ୍‍ମେ ମିକା ମିଇ ସେଙ୍ଗେ ଗର୍ବ ମାଡ଼ିତମ୍ ।
\p
\v 15 ଇଦ୍ ବିଷୟ୍‍ତେ ନାନ୍ ନିଜାମ୍ ଲେକାମ୍ ପୁଞ୍ଜ୍‍ମାତ୍‍ତାଙ୍କ୍ ମୁନେନ୍ ମିଇ ଗାର୍ରେ ଆଦ୍‍ଦାନ୍ ସେଙ୍ଗେ ନାୟାଦ୍ ଇଚ୍ଛା ମାତ୍‍ତେ । ଆଲେକେ, ମିଡ଼୍ ରେଣ୍ଡ୍‍ଦାମ୍ ନାକିଂଙ୍କ୍ ଉଡ଼ି ୱେଡ଼୍‍କ୍‍ ମାଡ଼େ ପାର୍‍ୱେଡ଼ି । 
\v 16 \x + \xo ୧:୧୬ \xo*\xt ପ୍ରେରିତ ୧୯:୨୧.\xt*\x*ମାସିଦୋନିଆ ଆଦାନ୍ ୱେଲେ ନୁ ଆଗାଙ୍କ୍ ମାଲ୍‍ଦାନ୍ ୱେଲେ ମିଇ ପାକେ ବସ୍‍ ଦିନା ମାନ୍ଦାନ୍‍ଙ୍କ୍ ନାୟାଦ୍ ଇଚ୍ଛା ମାତ୍‍ତେ, ବାତେଙ୍କ୍ ଇତ୍‍କେ ଯିହୁଦା ପ୍ରଦେଶ୍‍ତାଗ୍ ଆଦାନ୍ ସେଙ୍ଗେ ନାନ୍ ମିୟାଦ୍ ସାଆଯ୍ୟ ଦର୍‍କାର୍ ମାତ୍‍ତେ । 
\v 17 ନାନ୍ ବାତ୍ ନିଜାମ୍ ଆୟ୍‍ୱେକଟେ ଇଦ୍ ପାଡ଼୍‍ୟି ତାଲିକା ତିଆର୍ ମାଡ଼ିମାତ୍‍ତାନ୍ ? ବେନଡ଼୍ ଅଣ୍ଡୟ୍‌ ତଡ଼େକ୍ “ଅଁ, ନୁ ଇଲ୍‍ଲେ, ଇଲ୍‍ଲେ,” ମାଡ଼ିତଡ଼୍, ଅଡ଼୍‌‍ଲେକାମ୍ ବାତେଏ ନାନ୍ ଜିନେତ୍ ସ୍ୱାର୍ତସିଦ୍ଦି ସେଙ୍ଗେ ନାୟାଦ୍ ପାଡ଼୍‍ୟି ମାଡ଼ିତାନ୍ ? 
\v 18 ନିଜାମ୍ ଇଶ୍ୱର୍‌ ବିଶ୍ୱାସ୍‌ତେ ତଣ୍ଡ୍, ବେନ୍ କବର୍ ନାନ୍ ଇଦ୍‍ତାନ୍ ଆଦ୍ “ଅଁ ବା ନା,” ଆୟ୍‍ୟ । 
\v 19 \x + \xo ୧:୧୯ \xo*\xt ପ୍ରେରିତ ୧୮:୫.\xt*\x*ସିଲେ, ତୀମତି ନୁ ନାନ୍ ମିଇ ଗାର୍ରେ ପ୍ରଚାର୍ ମାଡ଼ମାନ୍ଦାନ୍ ଇଶ୍ୱର୍‌ତେ ମାର୍‍ ଜିସୁ କ୍ରିଷ୍ଟ, ବେସୁଙ୍କ୍‍ ୱେରଡ଼୍ ତଡ଼େକ୍ “ଅଁ ନୁ ଇଲ୍‌ଲେ,” କେଲଣ୍ଡ୍ । ମେଣ୍ଡେଅଣ୍ଡ୍‌ ରକମ୍, ଅଣ୍ଡ୍‌ ଆଦୁତନ୍ ଇଶ୍ୱର୍‌ତେ “ଅଁ ।” 
\v 20 ଆଦିଙ୍କ୍ ଇଶ୍ୱର୍‌ତେ ସାର୍‍ରେ ପ୍ରତିଜ୍ଞା ସାରେ ସତ୍‍ ଆତ୍‍ତେ, ଆୱୁ ସାରେ ଅଁ ଅଡ଼ାଗେ ମିନ୍ଦେ; ଇଦିନ୍ ସେଙ୍ଗେ ଜିସୁ କ୍ରିଷ୍ଟନ୍‍ ତଡ଼୍ ଇଶ୍ୱର୍‌ତେ ଗୌରବ୍ ସେଙ୍ଗେ ମାମ୍ ଆମେନ୍ ମାଡ଼ିତମ୍ । 
\v 21 ଇଗେ ନିଜେ ଇଶ୍ୱର୍‌ ଜିସୁ କ୍ରିଷ୍ଟନାଗ୍ ମିୟାଦ୍ ନୁ ମାନ୍‍ ଜିୱୁଣ୍ଡ୍‍ତିଙ୍କ୍ ଅଣ୍ଡୟ୍‌ ମାଡ଼ି ସୁରକ୍ଷା ମାଡ଼୍‍ତଣ୍ଡ୍ । 
\v 22 ଅଣ୍ଡ୍‌ ମାନ୍‍ ୱେରେ ମାଡ଼ି ମିନ୍ଦେନ୍ ନୁ ମାନ୍‍ ହୃଦୟତାଗ୍ ତାନ୍ ପବିତ୍ର ଆତ୍ମାତିଙ୍କ୍ ନେଃଏତାଙ୍କ୍ ମାନ୍‍ ପରୁ ମାଲିକ୍ ଆତ୍‍ତଣ୍ଡ୍ । ପବିତ୍ର ଆତ୍ମା ଆଦୁତ୍‍ତେ, ମାନ୍‍ ପରୁ ଇଶ୍ୱର୍‌ତେ ଅଦିକାର୍‌‍ତେ ଚିଃଏନେ ନୁ ବବିଷ୍ୟତ୍‍ତେ ମାନ୍‍ ବାତ୍ ଦର୍‍କିତ୍, ଆଦିନ୍ ଗେରେଣ୍ଟି ଲେକାମ୍ ।
\p
\v 23 ଇଶ୍ୱର୍‌ ଆଦୁତନ୍ ନା ସାକି । ଅଣ୍ଡ୍‌ ନା ଜିୱୁଣ୍ଡ୍‍ତିଙ୍କ୍ ପୁତ୍‍ତଣ୍ଡ୍ । ମିକିଂଙ୍କ୍ ନାନ୍‍ନେ ମେଣ୍ଡେ ବେଲାନ୍ ତିପାଲ୍ ଇୱନ୍, ଆଦିନ୍‌ସେଙ୍ଗେ ନାନ୍ କରିନ୍ଥ ଆଦାନଙ୍କ୍ ମାନ୍‍ ମାଡ଼ନ୍ । 
\v 24 ମିଡ଼୍ ବେନ୍ ଗଟ୍‍ତିଙ୍ଗ୍ ବିଶ୍ୱାସ୍‌ ମାଡ଼ିତିଡ଼୍, ଇଦ୍ ବିଷୟ୍‍ତେ ମିଇ ପରୁ ଶାସନ୍‍ ମାଡ଼ାନଙ୍କ୍ ମାମ୍‍ମେ ଆଲ୍‍ସି ମାଡ଼ମ୍, ବାତେଙ୍କ୍ ଇତ୍‍କେ ମିଡ଼୍ ବିଶ୍ୱାସ୍‍ତାଗ୍ ଲେକାମ୍ ଗାଡ଼୍‍ସ୍ ମିନ୍ଦେଡ଼ି । ଇତ୍‍କେ ମିଇକିଂଙ୍କ୍ ମାତର୍ ୱେଡ଼୍‍କ୍‍ ମାଡ଼ାନ୍ ସେଙ୍ଗେ ମିଇ ତଡ଼୍ ଅଣ୍ଡୟାଗ୍‍ କାଇଲି ମାମ୍‍ମେ ପାଡ଼୍‍ୟି ମାଡ଼ୁତମ୍ ।
\c 2
\p
\v 1 ଯଦି ନାୟାଦ୍ ମିଇ ବକେତ୍ ଆଦାନାଦ୍ ମିଇ ସେଙ୍ଗେ ଦୁଃକାମ୍‍ ଆଦ୍‍ତେ, ମିଇ ପାକେ ମେଣ୍ଡେ ବେସୁଙ୍କ୍‍ ଆନନ୍ ଇଞ୍ଜ ନାନ୍ ମାନ୍‍ ମାଡ଼୍‍ତାନ୍ । 
\v 2 ମିକିଂଙ୍କ୍ ଦୁଃକାମ୍ ଇତ୍‍କେ, ନାକିଂଙ୍କ୍ ବେନ ୱେଡ଼୍‍କ୍‍ ଇଦ୍‍ତନ୍ ? ମିକିଂଙ୍କ୍ ୱିଡ଼୍‍ସ୍‍କେ ମେଣ୍ଡେ ବେନ ଆଦ୍‍ଲେକାମ୍ ଇଲାଣ୍ଡ୍ । 
\v 3 ଆଦିନ୍ ସେଙ୍ଗେ ନାନ୍ ମିକିଂଙ୍କ୍ ଚିଟି ଲେକ୍‍ତାନ୍, ନାନ୍ ଆଗେ ଆତ୍‍କେ; ବେନଡ଼୍ ସେଙ୍ଗେ ନାୟାଦ୍ ୱେଡ଼୍‍କ୍‍ ଆୟେଡ଼୍, ଅଡ଼୍‌ ତଡ଼୍ ବେଲାନ୍ ନାନ୍ ଦୁଃକାମ୍ ଆୟନ୍ । ନିଜାମ୍ ନାୟାଦ୍ ଗାଡ଼୍‍ସ୍ ବିଶ୍ୱାସ୍ ଯେ, ନାୟାଦ୍ ୱେଡ଼୍‍କେତାଗ୍ ମିୟାଦ୍ ୱେଡ଼୍‍କ୍‍ । 
\v 4 ଗାଟି ଦୁଃକାମ୍ ନୁ କଷ୍ଟ ଜିୱୁଣ୍ଡ୍‍ତେ କେୟି କେୟି ନାନ୍ ବେନ୍ ଚିଟି ଲେକିମାତ୍‍ତାନ୍, ମିକିଂଙ୍କ୍ ଦୁଃକାମ୍ ଇଦାଙ୍କ୍ ଆୟ୍‍ୟ, ମାତର୍ ମିକିଂଙ୍କ୍ ନାନ୍ ବେସର୍ ପ୍ରେମ ମାଡ଼ୁତାନ୍, ଇଦ୍ କେତାନାଦ୍ ମାତ୍‍ତେ ଆଦ୍ ଚିଟିତେ ଲେକାମ୍‌ ।
\s ଦୋଷୀଙ୍କ୍ କ୍ଷମା ମାଡ଼ାଟ୍
\p
\v 5 ଯଦି ବେନ ବେନଙ୍କ୍ ଦୁଃକାମ୍ ଇସ୍‍ମାନ୍‍ତନ୍, ଅଣ୍ଡ୍‌ ମାତର୍ ନା ମୋନ୍‍ତାଗ୍ ଦୁଃକାମ୍ ଇୱଣ୍ଡ୍, ଇସୁର୍ ବା ନାର୍‍ଗେ ମିକିଂଙ୍କ୍ ଆନ୍‌‍ତେ ଦୁଃକା‍ମ୍ ଇତ୍‍ତନ୍ । ଇଦ୍ ବିଷୟ୍‍ତେ ନାନ୍ ଅଦିକ୍‌ ତିପାଲ୍ ପାଡ଼୍‍ୟି ଇଦାନ୍ ସେଙ୍ଗେ ଇଚ୍ଛା ମାଡ଼ନ୍ । 
\v 6 ମିଇ ଲୋପେଙ୍କ୍ ନାର୍‍ଗେ ମତ ଇସାବ୍‍ତେ ଆଦ୍ ନାରୁଙ୍କ୍ ବେନ୍ ଦଣ୍ଡ୍ ଇତ୍‍ତଡ଼୍, ଆଦ୍ ଅନ୍‌ ମାୟ୍‍ଦିଙ୍କ୍ ନାର୍‍ଗେ । 
\v 7 ଆଦିଙ୍କ୍ ଅଣ୍ଡ୍‌ ବେଲା ପିନା ଦୁଃକାମ୍‍ ଆୟ୍‍ୟଣ୍ଡ୍, ଆଦିନ୍‌ସେଙ୍ଗେ ମିଡ଼୍ ଅଂକିଙ୍କ୍‌ ଇଞ୍ଜେ କ୍ଷମା ମାଡ଼ାଟ୍ ନୁ ସ୍ୱାନ୍ତନା ଇମୁଟ୍ । 
\v 8 ମିକିଂଙ୍କ୍ ନାୟାଦ୍ ଅନୁରୋଦ୍, ମିଡ଼୍ ଅଂକିଙ୍କ୍‌ ପ୍ରେମ ନୁ ସାର୍‍ଦେ ମାଡ଼ୁତିଡ଼୍ ଇଞ୍ଜ କେସିମୁଟ୍ । 
\v 9 ମିଡ଼୍ ସାର୍ରେୱେଲେ ନାୟାଦ୍ ନିର୍ଦ୍ଦେଶ୍ ନୁ ଶିକ୍ଷା ପାଲନ୍ ମାଡ଼ାନଙ୍କ୍ ପୁନ୍ଦାନ୍ ସେଙ୍ଗେ ନାନ୍ ଆଦ୍ ଚିଟି ଲେକିମାତ୍‍ତାନ୍ । 
\v 10 ବେସୁଟ୍‌ ଅଡ଼୍‌‍କିଂଙ୍କ୍ କ୍ଷମା ମାଡ଼ିତିଡ଼୍, ନାନ୍ ମିକା ଅଂକିଙ୍କ୍‌ କ୍ଷମା ମାଡ଼ିତାନ୍ । ନାନ୍ ଯଦି ବାତେବା ବିଷୟ୍‍ତେ ଅଂକିଙ୍କ୍‌ କ୍ଷମା ମାଡ଼ିମାନ୍ତାନ୍, ଆଦ୍ କ୍ରିଷ୍ଟଙ୍କ୍‌ କାଇଲି ମିଇ ସେଙ୍ଗେ ମାଡ଼ିମାନ୍ତେ । 
\v 11 ଆଦିଙ୍କ୍ ଶୟ୍‍ତାନ୍‍ତିଙ୍କ୍ ମାନ୍‍ ବିରୁଦ୍ଦ୍‍ତେ ବାତେବା ପାଡ଼୍‍ୟି ମାଡ଼ାନଙ୍କ୍ ସୁଯଗ୍ ଦର୍କ; ତାନ୍ ସାର୍‍ରେ ଯୋଜନା ମାନାଡ଼୍ ପୁତ୍‍ତାଡ଼୍ ।
\p
\v 12 \x + \xo ୨:୧୨ \xo*\xt ପ୍ରେରିତ ୨୦:୧.\xt*\x*କ୍ରିଷ୍ଟନ୍ ସୁସମାଚାର୍‌ ପ୍ରଚାର୍ ମାଡ଼ାନଙ୍କ୍ ତ୍ରୋୟା ଦୀପ୍‍ତାଗ୍ ହେଉସ୍ ନାନ୍ ଉଡ଼୍‍ତାନ୍, ଇଦ୍ ପାଡ଼ିୟିଦେ ସେଙ୍ଗେ ପ୍ରବୁ ଆର୍ ଟେଣ୍ଡିତ୍‍ତନ୍ । 
\v 13 ବାତେଙ୍କଇତ୍କେ ମାନ୍‍ ଦାଦାଲ୍ ତୀତସ୍‍ତିଙ୍କ୍ ଆଗେ ଉଡ଼କଟ୍ ନାନ୍ ଦାନ୍ଦେ ଆତ୍‍ତାନ୍ । ଆଦିଙ୍କ୍ ଆଗେ ନାରିଡ଼ାଗାଙ୍କ୍‍ ଆଞ୍ଜ୍ ନାନ୍ ମାସିଦୋନିଆତା ଆତ୍‍ତାନ୍ ।
\s କ୍ରିଷ୍ଟନ୍ ତଡ଼୍ ଜିଡ଼ାନାଦ୍
\p
\v 14 ଇଶ୍ୱର୍‌ତେ ଦନ୍ୟବାଦ୍ ଆୟି । ବାତେଙ୍କ୍ ଇତ୍‍କେ ଅଣ୍ଡ୍‌ ଜିସୁ କ୍ରିଷ୍ଟନ୍ ତଡ଼୍ ସାରେଦାମ୍ ମାକିଂଙ୍କ୍ ଜିଡ଼ାନ୍ ଆର୍‍ଦାଗ୍ ମୁନ୍‍ନେ ଆଦ୍‍ତନ୍ । ମେଣ୍ଡେ ଲେକେତ୍‍ ଗାବ୍‍ ଚାରେପାକ୍ ଲିକ୍‍ତେ ଲେକାମ୍ କ୍ରିଷ୍ଟନ୍ ବୁଦ୍‍ତେ ବାଗାତଡ଼୍‍କ୍ ଇଦାନଙ୍କ୍ ଇଶ୍ୱର୍‍ ମାକିଙ୍କ୍ ବ୍ୟବହାର୍‌ ମାଡ଼ିତନ୍ । 
\v 15 ମାନାଡ଼୍ ଆଦୁତାଡ଼୍ ଇଶ୍ୱର୍‌ତେ ଗଟ୍‍ତେ ନିବେଦିତ କ୍ରିଷ୍ଟନ୍ ସାୟେ ଗାବ୍‍ତେ ଦୁପାମ୍ ଲେକାମ୍ । ବାତ୍ ବେନଡ଼୍ ପରିତ୍ରାନ୍ ପାଏମ୍ ଆଦ୍‍ତଡ଼୍ ନୁ ବେନଡ଼୍ ନଷ୍ଟ ଆର୍‍ଦେ ନାରୁଡ଼୍, ଅଡ଼୍‌ ବକେତ୍ ନିସ୍ତାର୍ ଲାଭ୍‍ତଡ଼୍ । 
\v 16 ବେନଡ଼୍ ଡଲାନ୍ ଆର୍‍ଦାଗ୍ ଆଦ୍‍ତନ୍; ଅଡ଼୍‌ ସେଙ୍ଗେ ଇଦ୍ ଡଲ୍‍ନାଦ୍ ଲେକାମ୍, ବେନଡ଼୍ ପରିତ୍ରାନ୍ ପାଏମ୍ ଆତ୍‍ତଣ୍ଡ୍, ଅଡ଼୍‌ ସେଙ୍ଗେ ଇଦ୍ ସାରେଦିନାତ୍ ଜିୱେମାନ୍ଦାନାଦ୍ । ବାତେଙ୍କ୍‌ଇତ୍କେ ଇତ୍‍କେ ଇଦ୍ ପାଡ଼୍‍ୟି ମାଡ଼ାନ୍ ସେଙ୍ଗେ ବେନ ପାର୍‍ଦ୍‍ତଣ୍ଡ୍ ? 
\v 17 ନାର୍‍ଗେ ନିଜେ ଲାବ୍‍ଆଦାନ୍‍ ଆଦାନ୍ ସେଙ୍ଗେ ଇଶ୍ୱର୍‌ତେ ବାକ୍ୟ ବ୍ୟବହାର୍‌ ମାଡ଼ିତଡ଼୍ । ଇତ୍‍କେ ମାନାଡ଼୍ ଆଦ୍‍ଲେକାମ୍ ଆୟ୍‍ୟ । ମାନ୍‍ ଇଶ୍ୱର୍ ରସିସ୍‍ମାନାଙ୍କ୍ ମାନାଡ଼୍ ବିଶ୍ୱାସ୍‍ତେ ତଡ଼୍ ଅନ୍‌ ନିର୍ଦେଶ୍ ପାଲନ୍ ମାଡ଼ୁତାଡ଼୍ ନୁ ଇଶ୍ୱର୍‌ତେ ମୁନ୍‍ନେ କ୍ରିଷ୍ଟନ୍‌ ଦାସ ଲେକାମ୍ ପ୍ରଚାର୍ ମାଡ଼ିକାଡ଼୍ ।
\c 3
\s ପୁନେ ନିୟମ୍‍ତେ ଦାସ
\p
\v 1 ମାନାଡ଼୍ ବାତେଏ ମେଣ୍ଡନ୍ ‍ଦାମ୍ ଆତ୍ମପ୍ରଶଂସା ମାଡ଼ାନଙ୍କ୍ ଆରାମ୍ ମାଡ଼ୁତାଡ଼୍ ? ବା ବେନ୍‍ ବେନଡ଼୍ ଲେକାମ୍ ବାତେଏ ମିଇ ପାକେ ବା ମିଇ ପାକାଙ୍କ୍ ମାୟାଦ୍‌ ପ୍ରସଂଶା ଚିଟି ଦର୍‍କାଡ଼୍ ? 
\v 2 ମିଇଡ଼େକେ ମା ପୁତ୍‍ତେନଡ଼ି ଚିଟି, ମାମ୍‍ମେ ଜିୱୁଣ୍ଡ୍‍ତାଗ୍ କେତ୍‍ତାଦ୍ ଲିପି, ବେଦିଙ୍କ୍ ସାରେତଡ଼୍ ପୁତ୍‍ତଡ଼୍ ନୁ କାର୍‍ତେ ପାର୍‍ତଡ଼୍ । 
\v 3 ଇଦ୍ ପରିଚୟ ଚିଟି କ୍ରିଷ୍ଟନ୍‍ ତଡ଼୍ କେତ୍‍ତାଦ୍ ନୁ ମାନ୍‍ ତଡ଼୍ ଅନାଦ୍‌ ବିଷୟ୍‍ତେ ମାଡ଼୍‍ତାଦ୍ । ଇଦ୍ କାରିଲାଦିନ୍‍ ତଡ଼୍ କେତ୍‍ତାଦ୍ ଆୟ୍‍ୟ, ବାତେଙ୍କ୍ ଇତ୍‍କେ ଜୀୱେମାନ୍ତାନ୍‌ ଇଶ୍ୱର୍‌ତେ ଆତ୍ମା ତଡ଼୍ ନାରିଡ଼୍ ଜିୱୁଣ୍ଡ୍‍ତାଗ୍ ଲେକାତ୍‍ତେ । 
\v 4 କ୍ରିଷ୍ଟନ୍ ଇସ୍ ଇଶ୍ୱର୍‌ତେ ପରୁ ଆଶେ ମାନ୍‍ନାଙ୍କ୍ ମାମ୍‍ମେ ଇୱୁସାରେ ମାଡ଼ୁତମ୍, 
\v 5 ମାମ୍‍ମେ ଯେ ନିଜେତାଦାଙ୍କ୍ ବାତେଏ ଉଦ୍‍ବାବନ୍ ମାଡ଼ାନଙ୍କ୍ ଇଚ୍ଛା, ଇଦ୍‍ଲେକାମ୍ ଆୟ୍‍ୟ, ମାତର୍ ମାୟାଦ୍‌ ଇଚ୍ଛା ଇଶ୍ୱର୍‌ତାଗେ; 
\v 6 ନୂତନ୍ ନିୟମ୍‌ତିଙ୍କ୍ ମେଣ୍ଡେଅଡ଼୍‌‍ତିଡ଼ାଗ୍ ମାନ୍‍ତଡ଼୍ ପ୍ରକାଶ୍ ମାଡ଼ାନ୍ ସେଙ୍ଗେ ଶକ୍ତି ଇତ୍‍ତନ୍ । ଇଦ୍ ନିୟମ୍ କେତ୍‍ତାଦ୍ ଆୟ୍‍ୟ, ମାତର୍ ଆତ୍ମାତଡ଼୍ ଲେକ୍‍ତାଦ୍‍; ବାତେଙ୍କ୍ ଇତ୍‍କେ କେତ୍‍ତାଦ୍ ନିୟମ୍ ଡଲାଙ୍କ୍ ମାଡ଼ିତ୍, ବାତେଙ୍କ୍ ଇତ୍‍କେ ଆତ୍ମାତେ ନିୟମ୍ ଜିୱୁନ୍ ସଂସାର୍‍ ମାଡ଼ିତ୍ ।
\p
\v 7 ମୋଶାନ୍‌ ନିୟମ୍ ସେବା ପାଡ଼୍‍ୟି ଅକର୍‍ତଡ଼୍‍ କାଲ୍‍ଦେ ପରୁ ଲେକ୍‍ତାଦ୍‍ ନିୟମ୍ ତିୟାର୍ ଆତ୍‍ତେୱେଲେ ଇଶ୍ୱର୍‌ତେ ଗୌରବ୍‌ ପେୟ୍‍ସ୍‍ମାତ୍‍ତେ । ଆଦ୍ ଗୌରବ୍‌ ୱେଇସ୍ ଇକାଡ଼୍ ଆସ୍‍ମାତ୍‍କେବା ମୋଶାନ୍‌ ୱେଇସ୍‍ତେ ପାକ୍ ଇସ୍ରାଏଲ୍‌ ନାରୁଡ଼୍ ଆଲ୍‍ସେପାର୍‍ୱେ ମାତ୍‍ତଡ଼୍ । ଡଲ୍‍ନାଦ୍ ନିୟମ୍ ଯଦି ଇଲା ଗୌରବ୍ ପାଏମ୍ ଆତ୍‍ତେ, 
\v 8 ଆଲେକେ ପବିତ୍ର ଆତ୍ମାତେ ପାଡ଼୍‍ୟି ସାର୍‍ରେ ଅନାଗାଙ୍କ୍ ବେସର୍ ଅଦିକ୍‌ ଗୌରବ୍‍ତେ ତିଆର୍ ଆଦ୍‍ତେ ! 
\v 9 ଦଣ୍ଡ୍‌ ଇଦାନ୍‌ ନିୟମ୍‌ ସେବା ପାଡ଼୍‍ୟି ଯଦି ଇସର୍ ଗୌରବ୍ ଆତ୍‍ତେ, ଆଲେକେ ଇଶ୍ୱର୍‌ତେ ପରିତ୍ରାଣ୍ ନିୟମ୍ ପ୍ରତିଷ୍ଠା ମେଣ୍ଡେ ବେସର୍ ଗୌରବ୍ ଆୟ୍‍ୟ ! 
\v 10 ପାଃନ୍ତେ ନିୟମ୍‍ତାଦ୍ ମହିମା ପୁନାଦ୍ ନିୟମ୍‍ତାଗାଙ୍କ୍ ସୁଦୁର୍ ଆତ୍‍ତେ । 
\v 11 ଯଦି ଆଦାନ୍‍ ବିଷୟ ଇସର୍ ଗୌରବ୍ ଆତ୍‍ତେ, ସାରେଦିନାଦ୍ ବିଷୟ ଇଦିନାଗାଙ୍ଗ୍ ବେସର୍ ଗୁନ୍‍ତେ ଗୌରବ୍ କାଇଲି ଆଦ୍‍ତେ !
\p
\v 12 ଆଦ୍‍ ଆଶେ ମାନ୍‍ନାଙ୍କ୍ ମାମ୍‍ମେ ଅଦିକ୍‌ ସାହାସ୍ । 
\v 13 ମାମ୍‍ମେ ମୋଶାନ୍ ଲେକାମ୍ ଇଲାମ୍ । ଅଣ୍ଡ୍‌ ତାନ୍ ମକମ୍‍ତିଙ୍କ୍ ମୁସିମାତ୍‍ତନ୍, ବେଲାନ୍ ମୁର୍‍କ୍ ଆସ୍ ରାଲିମାନ୍ଦାନ୍ ଆଦ୍ ୱେସ୍‍ତେ ଅବସାନତେ ଇସ୍ରାଏଲ୍‌ତେ ନାରୁଡ଼୍ ଉଡ଼େ ପାର୍‍ୱଡ଼୍ । 
\v 14 ମୁନେଙ୍କ୍ ଅଡ଼ାଦ୍‌ ଆୱୁକାନ୍‍ ଶକ୍ତି ମାଇମାତ୍‍ତେ । ଇଞ୍ଜେ ମିକା ପାଃନ୍ତେ ନିୟମ୍‌ କାର୍‍ତାନ୍‍ ସମୟ୍‍ତେ ଅଡ଼୍‌‍ମୁନେ ଆଦ୍ ମୁସି ଆସ୍‍ ମାତ୍‍ତେ । ଜିସୁ କ୍ରିଷ୍ଟନ୍ ତଡ଼୍ କାଇଲି ମାନ୍‍ନାଙ୍କ୍ ମାତର୍ ଆଦ୍ ଆବରନ୍ ଉନ୍ମୋଚିତ୍ ଆଦ୍‍ତେ । 
\v 15 ନେଣ୍ଡ୍ ମିକା ମୋଶାନ୍‌ ବ୍ୟବସ୍ଥା କାର୍‍ସମାନ୍ଦାନ୍ ୱେଲେ ଅଡ଼ାଦ୍‌ ମନ୍ ପରୁ ମାନ୍‍ତେ ୱେରଡ଼୍ ଆବରନ୍ । 
\v 16 ବାତେଙ୍କ୍ ଇତ୍‍କେ ଦର୍ମଶାସ୍ତ୍ର କେତିତ୍‍, “ବେନଡ଼୍ ଇଶ୍ୱର୍‌ତେ ପାକେ ମାଲ୍‍ଦ୍‍ତଡ଼୍, ଅଡ଼ାଦ୍‌ ଲେକେତାଦ୍ ସିଲ୍‍ ମୁସିତ୍‌ତାଦ୍ ତନ୍ଦ୍‍ୱେ ପାର୍‍ତେ ।” 
\v 17 ଇଦ୍ ଶାସ୍ତ୍ରାଂଶତାଗ୍ ଲେକାମିନ୍ତେ, “ପ୍ରବୁ,” ଆଦୁତନ୍ “ଆତ୍ମା ।” ବେଗେ ପ୍ରବୁନ୍ ଆତ୍ମା, ଆଗେ ମାନ୍‍ତେ ସ୍ୱାଦିନ୍‍ତା । 
\v 18 ମାନାଡ଼୍ ସାରେତଡ଼୍ ମକମ୍‍ତେ ଦାର୍ପୁନ୍‍ତାଗ୍ ଉଡ଼ାନ୍ ଲେକାମ୍ ପ୍ରବୁନ୍ ଗୌରବ୍ ତଅନ୍‌ଦୁତ୍ ନୁ ପ୍ରବୁନାଗାଙ୍କ୍ ପେୟ୍‍ତାଦ୍ ଆଦ୍ ମାଇମାତେ ତଡ଼୍ ମାନାଡ଼୍ କାମ୍‍କେ ଲେକାମ୍ ଅନ୍‌ ରକମ୍‌ ବାଦ୍‍ଲେମ୍ ଆଦୁତ୍‍ତେ ।
\c 4
\s ସୁସମାଚାର୍‍ତେ ୱେସ୍
\p
\v 1 ଇଶ୍ୱର୍ ଅନୁଗ୍ରହ ମାଡ଼ି ମାନ୍‍ ଇଦ୍ ସେବା ପାଡ଼୍‍ୟି ଇସ୍‍ମାନାଙ୍କ୍ ମାନାଡ଼୍ ଆୟ ୱାଡ଼୍ । 
\v 2 ମାତର୍ ମାମ୍‍ମେ ସିଗ୍‍ଆଦାନାଦ୍ ନୁ ମିଞ୍ଜିମାନ୍ଦାନ୍ ବିଷୟସାରେ ୱିଡ଼୍‍ସ୍‍ତମ୍; ମାମ୍‍ମେ ଚଲନା ମାଡ଼ମ୍ କି ଇଶ୍ୱର୍‌ତେ ବାକ୍ୟତେ ବିକୃତ୍ ଅର୍ତ ମାଡ଼ମ୍ । ବାତେଙ୍କ୍ ଇତ୍‍କେ ସାରେତଡ଼୍ ନିଜମ୍‍ ସତ୍‍ କେଞ୍ଜ୍‍ତେ ଲେକାମ୍ ଇଶ୍ୱର୍‌ତେ ମୁନେ ନାରିଡ଼୍ ମନ୍ ପାକେ ମାମ୍‍ମେ ନିଜେ ନିଜେତେ ଯୋଗ୍ୟତା ପ୍ରନାମ୍ ମାଡ଼ାନ୍ ସେଙ୍ଗେ ଆଲ୍‍ସି ମାଡ଼ୁତମ୍; 
\v 3 ବାତେଙ୍କ୍‍ଇତ୍କେ ମାନ୍‍ ତଡ଼୍ କେସମାନ୍ଦାନ୍ ସୁସମାଚାର୍‌ ଯଦି ରହସ୍ୟାବୃତ, ଆଲେକେ ମାତର୍ ତଡ଼୍ ଆଦାନଡ଼୍‍କ୍ ସେଙ୍ଗେ ଆଦ୍ ରହସ୍ୟାବୃତ । 
\v 4 ଅଡ଼୍‌ ବିଶ୍ୱାସ୍ ମାଡ଼ଡ଼୍‍, ବାତେଙ୍କ୍‍ଇତ୍କେ ଅଡ଼୍‌ ମନ୍‍ତିଙ୍କ୍‌ ଇଦ୍ ଜଗତ୍‌ ନାରୁଡ଼୍‍କିଂଙ୍କ୍ ଶୟ୍‍ତାନ୍‍ କାନାଲ୍‌ ମାଡ଼ିତ୍‍ତେ । ମେଣ୍ଡେ ଇଶ୍ୱର୍‌ତେ ସାରେ ବିଷୟ କ୍ରିଷ୍ଟନ୍ ମାହିମାନିତ ସୁସମାଚାର୍‌ତେ ୱେସ୍ ଅଡ଼୍‌ ପାକ୍ ୱେସ୍ଆୟ । 
\v 5 ମାମ୍‍ମେ ମା ବିଷୟ୍‍ତେ ପ୍ରଚାର୍ ମାଡ଼ମ୍, ବାତେଙ୍କ୍ ଇତ୍‍କେ ମାମ୍‍ମେ ଜିସୁ କ୍ରିଷ୍ଟଙ୍କ୍ ପ୍ରବୁ ଇଞ୍ଜ ପ୍ରଚାର୍ ମାଡ଼ୁତମ୍ ନୁ ଜିସୁନ୍ ସେଙ୍ଗେ ମାମ୍‍ମେ ନି ଦାସ ଆତ୍‍ତମ୍, 
\v 6 ବାତେଙ୍କ୍ ଇତ୍‍କେ ବେନ୍ ଇଶ୍ୱର୍‌ କେସ୍‍ମାତ୍‍ତନ୍, “ଇକାଡ଼୍ ତାଗ୍ ୱେସ୍ ସାରେପାକ୍ ଆୟି,” ଆଦ୍ ଇଶ୍ୱର୍ ଜିସୁନ୍‌ ମକତାଗ୍ ସାରେପାକ୍ ଐଶ୍ୱରିକ୍ ମାହିମା ଉଡ଼ାନ୍ ସେଙ୍ଗେ ମା ହୃଦୟତିଙ୍ଗ୍ ୱେସ୍ ମାଡ଼୍‍ତଣ୍ଡ୍ ।
\p
\v 7 ମାମ୍‍ମେ ମାତର୍ ମାୟାଦ୍‌ ସାଦାରନ୍ ପେଣ୍ଡୁଲ୍ କୁଣ୍ଡେତାଗ୍ ଇଦ୍ ସର୍ଗତେ ସମ୍ପଦ୍ ଦର୍‍କୁତ୍ । ଆଗାଙ୍କ୍ ପ୍ରମାନ୍‍ ଆତ୍‍ତେ ଯେ, ଇଦ୍‍ଲେକାମ୍ ୱେସ୍‍ତେ ଶକ୍ତି ମାୟାଦ୍‌ ଆୟ୍‍ୟ, ମାତର୍ ଇଶ୍ୱର୍‌ତାଦ୍ । 
\v 8 ମାମ୍‍ମେ ସାରେ ଲେକାତ୍ କଷ୍ଟ ପାଏମ୍ ଅଦୁତମ୍, ବାତେଙ୍କ୍ ଇତ୍‍କେ ମୁର୍‍ମୁରା ଆୟମ୍ । ବେସୁଙ୍କ୍‍ ବିଚଲିତ୍ ଅଦୁତମ୍ ବାତେଙ୍କ୍ ଇତ୍‍କେ ମାମେ ଆୟମ୍ । 
\v 9 ମାମ୍‍ମେ ତାଡ଼ନା ପାଏମ୍ ଆତ୍‍ତମ୍, ବାତେଙ୍କ୍ ଇତ୍‍କେ ଇଶ୍ୱର୍ ମାକିଂଙ୍କ୍ ବେସୁଙ୍କ୍‍ ୱିଡ଼୍‍ସଣ୍ଡ୍ । ନାର୍‍ଗେ ଦାମ୍ ମାମ୍‍ମେ ଦେବ୍‍ ତିତ୍‍ତମ୍, ବାତେଙ୍କ୍ ଇତ୍‍କେ ଦ୍ୱଂସ ଆୟମ୍ । 
\v 10 ମାମ୍‍ମେ ସାରେଦାମ୍ ମାନ୍‍ ମେନ୍ଦୁଲ୍‌ତାଗ୍ ଜିସୁନ୍ ଡଲ୍‍ତାଦ୍ ହେର୍କା ମାଡ଼ୁତମ୍ । ଜିସୁନ୍ ଜୀୱୁନ୍‌ ବେଲାନ୍ ମାୟାଗେ ପ୍ରକାଶିତ୍‍ ଆଦ୍‍ତେ, 
\v 11 ଅନ୍‌ ଜୀୱେତିଙ୍ଗ୍ ଇଦ୍ ନାୟାଦ୍ ମେ‍ନ୍ଦୁଲ୍‍ତାଗ୍ ପ୍ରକାଶ୍ ମାଡ଼ାନ୍ ସେଙ୍ଗେ ଜିସୁନ୍‌ ସେଙ୍ଗେ ସାରେ ଜୀୱୁଣ୍ଡ୍‌ ମାମ୍‍ମେ ଡଲ୍‍ତେ ଲେକାମ୍ ଅଦୁତମ୍ । 
\v 12 ଇଦ୍‍ଲେକାମ୍ ମାୟାଗେ ଡଲ୍‍ତାଦ୍ ନୁ ମିଇ ପାକେ ଜିୱୁଣ୍ଡ୍ ପାଡ଼୍‍ୟି ମାଡ଼୍‍ଡ଼ ଆଦୁତ୍‍ତେ ।
\p
\v 13 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ନାନ୍ ବିଶ୍ୱାସ୍‌ ମାଡ଼୍‍ତାଙ୍କ୍ ଗଟି ତିର୍‍ୟୁତାନ୍ ।” ମାମ୍‍ମେ ଆଦ୍ ବିଶ୍ୱାସ୍‌ତେ ଆତ୍ମା ଦର୍‍ସ୍‍ତମ୍ । ମାମ୍‍ମେ ବିଶ୍ୱାସ୍‌ ମାଡ଼ୁତମ୍, ଆଦିଙ୍କ୍ ମାମ୍‍ମେ କେତୁତମ୍ । 
\v 14 ମାମ୍‍ମେ ପୁତ୍‍ତମ୍, ଇଶ୍ୱର୍ ପ୍ରବୁ ଜିସୁଙ୍କ୍ ଡଲ୍‍ତାଗାଙ୍କ୍ ତେସ୍‍ମିନ୍ଦେନ୍ । ଆଦ୍ ଇଶ୍ୱର୍, ଜିସୁନ୍ ତଡ଼୍ ମାକିଂଙ୍କ୍ ମିକା ଜିୱୁନ୍ ମାଡ଼ିତନ୍ ନୁ ମିଇ ତଡ଼୍ ମାକିଂଙ୍କ୍ ତାନ୍ ମୁନେ ନିଲ୍‍ପିତନ୍ । 
\v 15 ମିୟାଦ୍ ସାୟେତ୍ ସେଙ୍ଗେ ଇଦ୍‍ସାରେ ଆଦୁତ୍‍ତେ । ଆଦିଙ୍କ୍ ଇଶ୍ୱର୍‌ତେ ଅନୁଗ୍ରହ ମେଣ୍ଡେ ପେର୍କେତାଗାଙ୍କ୍ ଅଦିକ୍‌ ନାର୍ଗେଆଦାନ୍ ସଙ୍ଗେ ନାରୁଡ଼୍‍କ୍ ଇଟ୍‍ତଣ୍ଡ୍, ମେଣ୍ଡେ ନାର୍‍ଗେ ଦନ୍ୟବାଦ୍ ଲେକାମ୍ ଇଶ୍ୱର୍‌ତେ ଗୌରବ୍ ମାଡ଼ିତଡ଼୍ ।
\s ବିଶ୍ୱାସ୍‍ତେ ଜିୱୁନ୍
\p
\v 16 ଆଦିନ୍ ସେଙ୍ଗେ ମାମ୍‍ମେ ବେସୁଙ୍କ୍‍ ବା ଦୁଃକାମ୍ ଆୟମ୍ । ମାନ୍‍ ମେନ୍ଦୁଲ୍ ଜାମ୍‍ଜାମ୍ ଲପ୍ ଆଦୁତାଡ଼୍ । ବାତେଙ୍କ୍ ଇତ୍‍କେ ମାୟାଦ୍‌ ଲୋପେତ୍ ଆତ୍ମା ଦିନାଲ୍‍ ଦିନାଲ୍ ଲେକାମ୍ ଆଦୁତ୍‍ତେ । 
\v 17 ଇଦ୍ ସାମାନ୍ୟ ନୁ ସେନେକ୍‍ତାଦ୍ ଦୁଃକାମ୍ କଷ୍ଟ ମାନ୍‍ ସେଙ୍ଗେ ତାତୁତ୍ ସାରେଦିନାତାଦ୍ ଗୌରବତାଦ୍ ସମ୍ପତି । 
\v 18 ମାନ୍‍ ଉଡ଼ାନ୍ କଣ୍ଡେତେ ବାତେବା ବସ୍ତୁ ପରୁ ଆୟ୍‍ୟ, ମାତର୍ ସାୟେତ୍‌ ଜିନିଷ୍‌ତେ ପରୁ ମଣ୍ଡି, ବାତେଙ୍କ୍ ଇତ୍‍କେ ଉଡ଼ାନାଉ ସାରେ ବାତା ଦୁଡ଼ା, ବାତେଙ୍କ୍ ଇତ୍‍କେ ବାତ୍ ଉଡ଼ାନାଦ୍, ଆଦ୍ ଚିରସ୍ଥାୟୀ ।
\c 5
\p
\v 1 ମାନାଡ଼୍ ପୁତ୍‍ତାଡ଼୍ ଯେ, ବେନ୍ ପାର୍ତିବ୍ ମେନ୍ଦୁଲ୍ ଲେକାମ୍ ତମ୍ୱୁତେ ମାନାଡ଼୍ ଇଞ୍ଜେ ମିନ୍ଦେ, ଆଦ୍ ଦ୍ୱଂସ ଆତ୍‍କେ, ମାନ୍‍ ଇଶ୍ୱର୍‌ ସ୍ୱର୍ଗତାଗ୍ ୱେରଡ଼୍ ସାରେଦିନାତ୍ ଡ଼ାଦ୍ ଲନ୍‌ ନେହେଚିସ୍ ମିନ୍ଦେନ୍ । 
\v 2 ମାନାଡ଼୍ ପୃତିବିତାଗ୍ ମାଞ୍ଜ୍ ସର୍ଗତାଗ୍ ମାନ୍ଦାନ୍ ଲୋନ୍‌ ଲେକାତ୍ ଚକାସିଲେ କେର୍‍ଦାନଙ୍କ୍ ତିପାଲ୍ ଆଦୁତାଡ଼୍ । 
\v 3 ବାତେଙ୍କ୍ ଇତ୍‍କେ ଆଦ୍ ସ୍ୱର୍ଗତେ ଲୋତ୍‍ତାଗ୍ ନେଙ୍ଗ୍‍କେ, ମାନାଡ଼୍ ବାଣ୍ଡା ତନ୍ଦୱାଡ଼୍ । 
\v 4 ମାନାଡ଼୍ ଇଦ୍ ପୃତିବି କୁଣ୍ଡେତାଗ୍ ମାନ୍ଦାନ୍‍ୱେଲେ ଗାଟି ତିପାଲ୍‍ତେ ଜିୱୁଣ୍ଡ୍‍ତଡ଼୍ କେୟମାତ୍‍ତମ୍ । ପୃତିବି ମେନ୍ଦୁଲ୍ ନିଡ଼୍‍ତାନାଦ୍ ମାନ୍‍ ଇଚ୍ଛା ଆୟ୍‍ୟ, ମାତର୍ ମାନ୍‍ ଆଲ୍‍ସୁତମ୍, ସ୍ୱର୍ଗତାଉ ଚକାସିଲେ କେର୍‍କେ ମାୟାଦ୍‌ ଇଦ୍ ଡଲାନ୍ ମେନ୍ଦୁଲ୍ ବେଲାନ୍ ଅମର୍‌ ଆଦ୍‍ତେ । 
\v 5 ଇଶ୍ୱର୍‌ ମାକିଂଙ୍କ୍ ଇଦ୍ ପରିବର୍ତ୍ତନ୍ ସେଙ୍ଗେ ତିଆର୍ ମାଡ଼୍‍ତଣ୍ଡ୍ । ମେଣ୍ଡେ ଇଦିନ୍ ସାରେ ଲେକାମ୍ ତାନ୍ ପବିତ୍ର ଆତ୍ମାତିଙ୍କ୍ ଅଣ୍ଡ୍‌ ମାନ୍‍ ଦାନ ମାଡ଼୍‍ତଣ୍ଡ୍ ।
\p
\v 6 ଆଦିନ୍ ସେଙ୍ଗେ ମାମ୍‍ମେ ସାରେଦାମ୍ ସାହାସ୍ ପଇତ୍‍ତମ୍ । ମାମ୍‍ମେ ପୁତ୍‍ତମ୍, ବେସ୍ ଦିନା ମାମ୍‍ମେ ଇଦ୍ ମେନ୍ଦୁଲ୍‌ତେ ମାନ୍‍ତମ୍, ଆସର୍ ଦିନା ପ୍ରବୁନାଗେ ଜାକେମାଞ୍ଜ୍ ବାଦ୍‍କ୍‍ତମ୍, 
\v 7 ବାତେଙ୍କ୍‍ଇତ୍କେ ମାନାଡ଼୍ ଉଡ଼ାନ୍ ଲେକାମ୍ ଜିୱୁଣ୍ଡ୍ ବାଦ୍‍କମ୍, ମାତର୍ ବିଶ୍ୱାତଡ଼୍ ଜିୱୁନ୍ ବାଦାକୁତମ୍ । 
\v 8 ଆଦିଙ୍କ୍ ମାମ୍‍ମେ ସାହାସ୍‍ତଡ଼୍‍, ମେଣ୍ଡେ ଇଦ୍ ମେନ୍ଦୁଲ୍‌ ୱିଡ଼୍‍ସି ମିକା ପ୍ରବୁନ୍ ତଡ଼୍ ମାନ୍ଦାନ୍ ସେଙ୍ଗେ ମାମ୍‍ମେ ଅଦିକ୍‌ ସାର୍‍ଦେ । 
\v 9 ଆଦିନ୍ ସେଙ୍ଗେ ଇଗେ ନିଜେର୍‍ ଲୋନ୍‌ ମାନିଣ୍ଡ୍ ବା ମେଣ୍ଡନ୍‍ଲନ୍‍ ମାନିଣ୍ଡ୍, ଇଶ୍ୱର୍‌ତିଙ୍କ୍ ଶାନ୍ତି ମାଡ଼ାନାଦ୍ କେ ମାୟାଦ୍‌ ୱେରଡ଼୍ ଇଚ୍ଛା । 
\v 10 \x + \xo ୫:୧୦ \xo*\xt ରୋମୀୟ ୧୪:୧୦.\xt*\x*ବାତେଙ୍କ୍‍ଇତ୍କେ ମାକିଂଙ୍କ୍ ସାରେତଡ଼୍‍କ୍ ଅନ୍‌ ତଡ଼୍ ବିଚାର୍ ଆଦାନ୍ ସେଙ୍ଗେ ନିଜାମ୍ କ୍ରିଷ୍ଟନ୍ ମୁନେ ଉପସ୍ଥିତ୍ ଆଦାନଙ୍କ୍ ୱେଇତିତ୍ । ଆସୁଙ୍କ୍ ଡଲାନ୍ ମେନ୍ଦୁଲ୍‌ ମାନାଡ଼୍ ମାଡ଼ିମାନ୍ଦାନ୍ ସାୟେତାଦ୍‍ ବା ପିନ୍ଦଲାଦ୍ ମେନ୍ଦୁଲ୍‌ତେ, ସାରେ ପାଡ଼ିୟିଦେ ଲେକାତ୍ ମାନାଡ଼୍ କାୟେ ଦର୍ସିକି ଆଦ୍‍ତାଡ଼୍‍ ।
\s କ୍ରିଷ୍ଟନ୍ ତଡ଼୍ ଇଶ୍ୱର୍ ତଡ଼୍ ସାଙ୍ଗ
\p
\v 11 ପ୍ରବୁଙ୍କ୍ ୱେର୍‍ଦାନାଦ୍ ଇତ୍‍କେ ବାତ୍‍ତେ, ମାନାଡ଼୍ ପୁତ୍‍ତାଡ଼୍ ନୁ ଇଦ୍ ମାଡ଼ାନ୍ ସେଙ୍ଗେ ମାନାଡ଼୍ ସାରେତଡ଼କିଂଙ୍କ୍ କେତୁତାଡ଼୍ । ଇଶ୍ୱର୍‌ ମାନ୍‍ ସାରେତଡ଼୍ ଲେକେତ୍‍ତେ ପୁତ୍‍ତଣ୍ଡ୍ । ନାନ୍ ଆଶେ ମାଡ଼ୁତାନ୍, ମିୟାଦ୍‍ ମନ୍‍ତାଗ୍‍ ମିଡ଼୍ ନାକିଂଙ୍କ୍ ଲେକେତ୍‍ତେ ପୁତ୍‍ତିଡ଼୍ । 
\v 12 ମାମ୍‍ମେ ମେଣ୍ଡନ୍ ଦାମ୍ ମିଇପାକେ ଗର୍ବ ମାଡ଼ାନଙ୍କ୍ ଇଚ୍ଛା ମାଡ଼ମ୍ । ଇତ୍‍କେ ମା ବିଷୟ୍‍ତେ ନିଜାତାଦ୍ ଦର୍ପ ମାଡ଼ାନ୍ ସେଙ୍ଗେ ମିକିଂଙ୍କ୍ ସୁଯୋଗ୍ ଇଦାନ୍ ମାୱାଦ୍ ପାଡ଼୍‍ୟି । ଆଲେକେ ଲୋପେତ୍ ଗୁନାମ୍‍ତିଙ୍କ୍ ଉଡ଼କଟ୍ ମାତର୍ ବାଇଦେ ଉଡ଼ିମିକା ବେନଡ଼୍ ଦର୍ପ ମାଡ଼ିତଡ଼୍, ଅଡ଼୍‌‍କିଂଙ୍କ୍ ସାୟେତ୍ ଉତ୍ତର୍ ଇଦାଙ୍କ୍ ପାର୍‍ଦ୍‍ତିନ୍ । 
\v 13 ମାମ୍‍ମେ ମଣ୍ଡିମ୍, ଆଦ୍ ଇଶ୍ୱର୍‌ତେ ସେଙ୍ଗେ; ସସୁବୋଦ, ଆଲେକେ ମିଇ ସେଙ୍ଗେ । 
\v 14 କ୍ରିଷ୍ଟନ୍ ପ୍ରେମ ତଡ଼୍ ମାମ୍‍ମେ ମିନ୍ଦେମ୍ । ମାମ୍‍ମେ ବୁଜେମ୍ ଆତ୍‍ତମ୍ ଯେ, ୱେରଣ୍ଡ୍ ସାରେତଡ଼୍ ସେଙ୍ଗେ ଡଲିମାନ୍‍ନାଙ୍କ୍ ସାରେତଡ଼୍ ଅନାଦ୍‌ ଡଲ୍‍ତାଗ୍ କାଇଲ୍‍ତଡ଼୍ । 
\v 15 ଅଣ୍ଡ୍‌ ସାରେତଡ଼୍ ସେଙ୍ଗେ ଡଲିମାନାଙ୍କ୍ ବେନଡ଼୍ ଜୀୱୁନ୍‌ ମିନ୍ଦେ, ଅଡ଼୍‌ ମେଣ୍ଡେ ନିଜେତ୍ ସେଙ୍ଗେ ଜୀୱୁନ୍‌ ଆୟ୍‍ୱେ ଅନ୍‌ ସେଙ୍ଗେ ଗେଲ୍‍ସିତଡ଼୍, ବାତେଙ୍କ୍‍ଇତ୍କେ ଅଡ଼୍‌ ସେଙ୍ଗେ ଅଣ୍ଡ୍‌ ଡଲି ମେଣ୍ଡେ ଜିୱେ ଆସ୍ ମିନ୍ଦେନ୍‌ ।
\p
\v 16 ମାମ୍‍ମେ ମେଣ୍ଡେ ବେନଙ୍କ୍ ନାରୁଡ଼୍ ଲେକାମ୍ ବିଚାର୍ ମାଡ଼ମ୍ । ଦିନାମ୍ ମାତ୍‍ତେ, ବେସୁଙ୍କ୍‍ ମାମ୍‍ମେ କ୍ରିଷ୍ଟଙ୍କ୍ ମିକା ନାରୁଡ଼୍ ଲେଲାମ୍ ବିଚାର୍ ମାଡ଼ମାତ୍‍ତମ୍ । ବାତେଙ୍କ୍ ଇତ୍‍କେ ଇଞ୍ଜେ ମେଣ୍ଡେ ମାମ୍‍ମେ ଆଲାନ୍ ମାଡ଼ମ୍ । 
\v 17 କ୍ରିଷ୍ଟନ୍‍ ତଡ଼୍ କାଇଲ୍‍କେ, ନାରୁନାଦ୍ ପୁନେ ତିଆର୍ ଆଦ୍‍ତେ । ପାଃନ୍ତେ ବିଷୟସାରେ ମାଇ ଆଦ୍‍ତେ, ପୁନେତାଉ ତିଆର୍ ଆଦ୍‍ତେ । 
\v 18 ଇୱୁସାରେ ଇଶ୍ୱର୍‌ତେ ପାଡ଼୍‍ୟି । ଅଣ୍ଡ୍‌ କ୍ରିଷ୍ଟନ୍‍ ତଡ଼୍ ମାନ୍‍ ଅନ୍‌ ତଡ଼୍ ମେଣ୍ଡନ୍‍ନ୍ଦାମ୍ କାୟ୍‍ଲ୍‍ତମ୍ ନୁ ଅନ୍‌ ତଡ଼୍ ବାଗାତଡ଼୍‍ତ ମେଣ୍ଡନ୍‍ନ୍ଦାମ୍ କାଲ୍‌ପାନ୍‌ ସେଙ୍ଗେ ଅଣ୍ଡ୍‌ ମାକିଂଙ୍କ୍ ମେଣ୍ଡେ ବାଗାତଡ଼୍‍କିଙ୍କ୍ ସାଙ୍ଗ ମାଡ଼ାନଙ୍କ୍ ଦାୟିତ୍ୱ ଇତ୍‍ତନ୍ । 
\v 19 ଆଦିଙ୍କ୍ ମାୟାଦ୍‌ କାବୁର୍ ଆଦୁତ୍‍ତେ, ଇଶ୍ୱର୍‌ କ୍ରିଷ୍ଟନ୍ ତଡ଼୍ ସାରେ ମାନବ୍ ଜାତିତିଙ୍କ୍ ଅନ୍‌ ତଡ଼୍ କାଲ୍‍ପାନଙ୍କ୍ ତିଆର୍ ମାଡ଼ିମିନ୍ଦେଣ୍ଡ୍ । ତାନ୍ ବିରୁଦ୍‌ତେ ଅଡ଼ାଦ୍‌ ଅପରାଦ୍‍ତିଙ୍କ୍ ଅଣ୍ଡ୍‌ ମେଣ୍ଡେ ତାନ୍ ହିସାବ୍‍ତେ ନେୱଣ୍ଡ୍ । ମେଣ୍ଡେ, ଇଦ୍ ମେଣ୍ଡେ କାଇଲାନାଦ୍ କାବୁର୍ କେତାନାଦ୍ ଦାୟିତ୍‌ ମା ପରୁ ଇସ୍ ମିନ୍ଦେଣ୍ଡ୍ ।
\p
\v 20 ମାମ୍‍ମେ କ୍ରିଷ୍ଟନ୍ ପାକେଙ୍କ୍ ଇଦ୍ ଗଟ୍ କେତୁତମ୍ । ସ୍ୱୟଂ ଇଶ୍ୱର୍‌ ମା ତଡ଼୍ ଇଦ୍ ଗଟ୍ ଇତ୍‍ତନ୍ ଇଞ୍ଜ ଏର୍କା ମାଡ଼ଙ୍କ୍ ଆଦ୍‍ତେ । କ୍ରିଷ୍ଟନ୍ ପାକେଙ୍କ୍ ମାମ୍‍ମେ ବିନତି ମାଡ଼ୁତମ୍, ଶତ୍ରୁତାଗାଙ୍କ୍ ସାଙ୍ଗ ଆୟ୍‍ମୁଟ୍ । 
\v 21 ବାତେଙ୍କ୍ ଇତ୍‍କେ ବେନନାଗେ ପାପ୍‌ ଇସୁର୍‍ ମିକା ଇଲ୍‍ୱେ ମାତ୍‍କେ, ଅଂକିଙ୍କ୍‌ ଅଣ୍ଡ୍‌ ମାନ୍‍ ସେଙ୍ଗେ ପାପ୍‌ ବଲି ଲେକାମ୍ ମାଡ଼୍‍ତଣ୍ଡ୍, ବେଲାନ୍ ମାନାଡ଼୍ ଅନ୍‌‍ତଡ଼୍ ଇଶ୍ୱର୍‌ତେ ଦାର୍ମାମ୍ ଲେକାମ୍ ଆଦିକାଡ଼୍‍ ।
\c 6
\p
\v 1 ଇଶ୍ୱର୍‌ତେ ସେଙ୍ଗେ ଅଣ୍ଡୟାଗେ ପାଡ଼୍‍ୟି ମାଡ଼ମାନାଙ୍କ୍ ମାମ୍‍ମେ ମିକିଂଙ୍କ୍ ବିନତି ମାଡ଼ୁତମ୍, ମିଇ ଜିୱୁଣ୍ଡ୍‍ତାଗ୍ ଇଶ୍ୱର୍‌ତେ ଅନୁଗ୍ରହ ଆଙ୍ଗ୍‌ଡ଼ାମ୍ ମାଡ଼୍‍ମାଟ୍ । 
\v 2 ବାତେଙ୍କ୍ ଇତ୍‍କେ ଅଣ୍ଡ୍‌ କେତ୍‍ତାନ୍, “ଇଶ୍ୱର୍ ବାତ୍ କେତିତଣ୍ଡ୍ ଆଦ୍ କେଞ୍ଜାଟ୍, ମାମ୍‍ମେ ଅନୁଗ୍ରହ ସମୟ୍‍ତେ ମିୟାଦ୍ ପ୍ରାର୍ତନା କେଞ୍ଜ୍‍ତମ୍, ମେଣ୍ଡେ ପରିତ୍ରାଣତେ ଦିନାତେ ମାମ୍‍ମେ ମିକିଂଙ୍କ୍ ସାହାଯ୍ୟ ମାଡ଼୍‍ତମ୍ ।” କେଞ୍ଜାଟ୍, ଇଞ୍ଜେ ମହା ଅନୁଗ୍ରହତେ ଦିନାମ୍; କେଞ୍ଜାଟ୍, ଇଞ୍ଜେ ପରିତ୍ରାନ୍‍ତେ ଦିନାମ୍ ।
\p
\v 3 ବେଲାନ୍ ମାନ୍‍ ପାଡ଼୍‍ୟିତାଗ୍ ମେଣ୍ଡେବାଗାତଡ଼୍ ବେନଗାଲା ଦଷି ଆୟ୍‍ମାକିଣ୍ଡ୍, ଆଦିନ୍ ସେଙ୍ଗେ ମାମ୍‍ମେ ବାତେଏ ବିଷୟ୍‍ତେ ବାଦା ଆୟମ୍, 
\v 4 ମାତର୍, ମାମ୍‍ମେ ସାରେ ଦିନାମ୍ ନିଜେତିଙ୍ଗ୍ ଇଶ୍ୱର୍‌ତେ ଦାସ ଲେକାମ୍ କେସମିନ୍ଦେମ୍ । ନାର୍‍ଗେ ଦୈର୍ଯ୍ୟତଡ଼୍ ମାମ୍‍ମେ ସାରେପ୍ରକାର୍ ଦୁଃକାମ୍, ଅବାବ୍ ନୁ ତିପାଲ୍ ସାରେ ମାଡ଼ୁତମ୍; 
\v 5 \x + \xo ୬:୫ \xo*\xt ପ୍ରେରିତ ୧୬:୨3.\xt*\x*ମାମ୍‍ମେ ଦେବ୍‍ ତିତ୍‍ତମ୍, ଜେଲ୍‌ଦଣ୍ଡ ଆତ୍‍ତମ୍, ନାରୁଡ଼୍ ମୁନେ ନିନ୍ଦ୍ ଆତ୍‍ତମ୍; ନାର୍‍କେତ୍ ପାୟାଲ୍ ତିପାଲ୍ ଆତ୍‍ତମ୍, ଉସ୍‍କାଡ଼୍ ଉଞ୍ଜକଟ ମାତ୍‍ତମ୍ ନୁ ଉପାସ୍‌ତେ କାଟେମ୍ ଆତ୍‍ତମ୍ । 
\v 6 ମାୟାଦ୍‌ ପବିତ୍ରତା, ବୁଦ୍‍ତେ, ଗାଡ଼୍‍ସ୍, ଦୟା, ସାୟେତାଦ୍ ପ୍ରେମ ନୁ ସତ୍ୟତେ କାବୁର୍ ସେଙ୍ଗେ ପବିତ୍ର ଇଶ୍ୱର୍‌ତେ ଶକ୍ତି ତଡ଼୍ । ମାମ୍‍ମେ ଇଶ୍ୱର୍‌ତେ ଦାସ ଇଞ୍ଜ ପରିଚୟ ଇତ୍‍ତମ୍, 
\v 7 ଶତ୍ରୁନଡ଼୍ ବିରୁଦ୍ଦ୍‌ତେ ଲଡ଼େମ୍ ଆଦାଙ୍କ୍‍ ନିଜାମ୍‍ ସତ୍‍ ମାୟାଦ୍‌ ବେଡ଼ିୟି ଅସ୍ତ୍ର । 
\v 8 ମାମ୍‍ମେ ସମ୍ମାନିତ୍ ନୁ ଅପମାନିତ୍ ଅଦୁତମ୍, ପ୍ରଶଂସିତ୍ ନୁ ସିଗ୍ ଆତ୍‍ତମ୍, ମାକିଂଙ୍କ୍ ମିଚ୍ ଇଞ୍ଜ କେତ୍‍ତଡ଼୍, ଯଦି ମାନାଡ଼୍ ନିଜାମ୍ କେତୁତଡ଼୍ । 
\v 9 ମାମ୍‍ମେ ପୁତ୍‍ତେନମ୍ ଆତ୍‍କେ ମିକା ପୁନ୍‍ୱେନମ୍, ଜୀୱେମାଞ୍ଜ୍‍ ମିକା, ଡଲ୍‍ତମ୍ ଇଞ୍ଜ୍ କେତିତଡ଼୍‍ । ମାମ୍‍ମେ ଦଣ୍ଡ୍ ଆତ୍‍ତମ୍, ବାତେଙ୍କ୍ ଇତ୍‍କେ ଡଲମ୍ । 
\v 10 ମାମ୍‍ମେ ଦୁଃକାମ୍ ତଡ଼୍ ମାତ୍‍କେ ମିକା ସାରେଦାମ୍ ୱେଡ଼୍‍କିତମ୍ । ମାମ୍‍ମେ ଗରିବ୍‍ ଲେକାମ୍ ତନ୍ଦୁତମ୍, ବାତେଙ୍କ୍ ଇତ୍‍କେ ନାର୍‍ଗେ ନାରୁଡ଼୍‍କ୍ ସାଉକାର୍ ମାଡ଼୍‍ତମ୍ । ମାୟାଦ୍‌ ବାତେଏ ଇଲ୍‍ୱେ ଲେକାମ୍ ଏର୍କେ ଆଦ୍‍ତେ, ବାତେଙ୍କ୍ ଇତ୍‍କେ ବାସ୍ତବତେ ମାମ୍‍ମେ ସାରେତାୱିନ୍ ଅଦିକାରିମ୍ ।
\p
\v 11 ହୋ କରନ୍ତିୟ ସାଙ୍ଗନଡ଼ି, ମାମ୍‍ମେ କପାମ୍ ଇଲ୍‍ୱେ ଲେକାମ୍ ମିକିଂଙ୍କ୍ ସାରେ କେସ୍‍ମିନ୍ଦେମ୍ । ମିଇ ଗାର୍ରେ ମାୟାଦ୍‌ ହୃଦୟ୍ ତେର୍‍ସିତ୍‍ତମ୍ । 
\v 12 ମାମ୍‍ମେ ମିଇ ସେଙ୍ଗେ କଷ୍ଟ ହୃଦୟ୍ ଆୟମ୍, ଇତ୍‍କେ ମିୟାଦ୍ ହୃଦୟ୍ ମା ସେଙ୍ଗେ କଷ୍ଟ ଆତ୍‍ତେ । 
\v 13 ମିକିଂଙ୍କ୍ ନା ପିଲା ଇନା ଏର୍କାମାଡ଼ି ଇୱୁସାରେ କେତୁତାନ୍ । ମାମ୍‍ମେ ଉଦାର୍ ମାଲ୍‍ପିଦାନ୍ ଲେକାମ୍ ମିୟାଦ୍ ହୃଦୟ୍ ତେର୍ସ୍ ଆୟି ।
\s ବିଶ୍ୱାସ୍ ଇଲ୍‍ୱେ ତଡ଼୍ କାଇଲ୍‍ମାଟ୍
\p
\v 14 ବେନଡ଼୍ କ୍ରିଷ୍ଟଙ୍କ୍ ବିଶ୍ୱାସ୍ ମାଡ଼ଡ଼୍‍ ମିଡ଼୍ ତଡ଼୍ କାଇଲି ପାଡ଼୍‍ୟି ମାଡ଼ାନଙ୍କ୍ ଆଲ୍‍ସି ମାଡ଼୍‍ମାଟ୍ । ଇଦ୍ ବେସୁଙ୍କ୍‍ ବା ଆଦେପାର୍ୱ । ସାୟେ ନୁ ଅପରାଦ୍‌ ବେଗେ କାଇଲାନାଦ୍‌ ? ୱେସ୍ ନୁ ଇକାଡ଼୍ ବେଲାନ୍ ଅଣ୍ଡୟାଗେ ମାନ୍‍ନ୍ତା ? 
\v 15 କ୍ରିଷ୍ଟ ନୁ ଶୟ୍‍ତାନ୍‍ ବେଲା ୱେରଡ଼୍ ମାନ୍‍ ଆଦ୍‍ତେ ? ବିଶ୍ୱାସୀ ତଡ଼୍ ଅବିଶ୍ୱାସି ବେନ୍ ବିଷୟ୍‍ତେ ୱେରଡ଼୍ ମନ୍ ଆଦ୍‍ଦେ ପାର୍‍ତଡ଼୍ ? 
\v 16 \x + \xo ୬:୧୬ \xo*\xt ୧ କରନ୍ତିୟ 3:୧୬; ୬:୧୯.\xt*\x*ଇଶ୍ୱର୍‌ତେ ମନ୍ଦିର୍‍ତାଗ୍ ବେଲାନ୍ ପୁତ୍‌ଲାମ୍‌ ପ୍ରତିଷ୍ଠା ଆଦ୍‍ଦେ ପାର୍ଦେତେ ? ମାନାଡ଼୍ ତ ଜୀୱେମାନ୍ଦାନ୍‌ ଇଶ୍ୱର୍‌ତେ ମନ୍ଦିର୍, ବାତେଙ୍କ୍ ଇତ୍‍କେ ଇଶ୍ୱର୍ ନିଜେ କେତ୍‍ତାନ୍, “ନା ନାରିଡ଼୍‍ତ ନାନ୍ ବାଦ୍‍କିତାନ୍ ନୁ ଅଡ଼୍‌‍ତଡ଼୍ ଉଡିତାନ୍; ନାନ୍ ଅଡ଼୍‌ ଇଶ୍ୱର୍ ଆଦ୍‍ତନ୍ ନୁ ଅଡ଼୍‌ ନା ନିଜେତ୍ ନାରୁଡ଼୍ ଆଦ୍‍ତଡ଼୍ ।” 
\v 17 ଆଦିଙ୍କ୍ ପ୍ରବୁ କେତିତଣ୍ଡ୍, “ଅଡ଼୍‌ଆଗାଙ୍କ୍‌ ମିଡ଼୍ ପେଇସ୍ ୱାଡ଼ାଟ୍, ଅଡ଼୍‌ଆଗାଙ୍କ୍‌ ମିଡ଼୍ ୱେରେ ଆୟ୍‍ମୁଟ୍ । ଅଶୁଚି ବିଷୟ ତଡ଼୍ ସମ୍ପର୍କ ନେହେମାଟ୍, ଆଲେକେ ନାନ୍ ମିକିଂଙ୍କ୍ ନେଃଏତିତାନ୍, 
\v 18 ନାନ୍ ମିଇ ବାବାନ୍ ଆଦ୍‍ତନ୍, ମେଣ୍ଡେ ମିଡ଼୍ ନା ମାର୍‍କ୍‍ ଆଦ୍‍ତିଡ଼୍ ନୁ ମାୟାସ୍କ୍, ସାରେତିଙ୍କ୍ ଶକ୍ତିନଡ଼୍ ପ୍ରବୁ ଇଦ୍ ଗଟ୍ କେତ୍‍ତଣ୍ଡ୍ ।”
\c 7
\p
\v 1 ପ୍ରିୟ ଦାଦାଲଡ଼ି ନୁ ଏଲାସ୍କ୍‍, ଇୱୁସାରେ ପ୍ରତିଜ୍ଞା ମାନାଡ଼୍ ଇଶ୍ୱର୍‌ତାଗାଙ୍କ୍ ଦର୍‍କ୍‍ତେ । ଆଦିଙ୍କ୍ ୱାଡ଼ାଟ୍, ମେନ୍ଦୁଲ୍ ନୁ ଆତ୍ମାତିଙ୍କ୍ କାରାପ୍ ମାଡ଼ମାନ୍ଦାନ୍ ସାରେ ବିଷୟତାଗାଙ୍କ୍ ନିଜେ ନିଜେତିଙ୍କ୍ ଲେକାମ୍ ମାଡ଼ିକାଡ଼୍ । ମେଣ୍ଡେ ଇଶ୍ୱର୍‌ତିଙ୍ଗ୍ ୱେର୍‍ସ୍ ମିକା ସାରେ ପବିତ୍ରତଡ଼୍ ମାନ୍ଦିକାଡ଼୍ ।
\s ପାଉଲ୍‍ତେ ୱେଡ଼୍‍କ୍‍
\p
\v 2 ମିଇ ହୃଦୟ୍‍ତାଗ୍ ମାକିଂଙ୍କ୍ ପଡ଼ିୟେ ଇମୁଟ୍ । ମାମ୍‍ମେ ବେନଙ୍କ୍ ଅନ୍‌ୟାୟ୍ ମାଡ଼ମ୍, ବେନଙ୍କ୍ ବାତେଏ ଲସ୍‍ ମାଡ଼ମ୍ କି ବେନନାଗାଙ୍କ୍ ବାତ୍‍ତେ ଫାଇଦା ମାଡ଼୍‍ନଙ୍କ୍ ଆଲ୍‍ସି ମାଡ଼ମ୍ । 
\v 3 ମିକିଂଙ୍କ୍ ଦଷ୍ ଇଦାନଙ୍କ୍ ନାନ୍ ଇଦ୍ ଗଟ୍ କେଲନ୍ । ନାନ୍ ମୁନେଙ୍କ୍‍କଞ୍ଜ୍ କେତୁତାନ୍, ମିଡ଼୍ ମା ଇସର୍ ସାୟେ ଯେ, ମାମ୍‍ମେ ମାତ୍‍କେ ଅଣ୍ଡୟାଗେ ମାନ୍ଦିକାଡ଼୍ ନୁ ଡଲ୍‍କେ ଅଣ୍ଡୟାଗେ ଡଲିକାଡ଼୍ । 
\v 4 ମିଇ ପରୁ ନାୟାଦ୍ ଗାଟି ବିଶ୍ୱାସ୍ ମିନ୍ଦେ । ମିଇ ସେଙ୍ଗେ ନାୟାଦ୍ ଗର୍ବ ମିକା ଆଦ୍‍ତେ । ଦୁଃକାମ୍ କଷ୍ଟ ସମୟ୍‍ତେ ନାନ୍ ମୁନେଙ୍କ୍ ତାଦ୍ ଶକ୍ତି ତଅତାନ୍ । ୱେଡ଼୍‍କେତେ ସାର୍‍ଦେ ଆତ୍‍ତାନ୍ ।
\p
\v 5 \x + \xo ୭:୫ \xo*\xt ୨ କରନ୍ତିୟ ୨:୧3.\xt*\x*ଇଦ୍‍ଲେକାମ୍ କି ମାସିଦୋନିଆତାଗ୍ ୱେଉସ୍ ମିକା ମାମ୍‍ମେ ରୱମ୍‍ । ସାରେତାଗେ ଅଶାନ୍ତି ନୁ ଗଲ୍‍କ୍ ଆସ୍‍ସ ମାତ୍‍ତେ, ଆଦିଙ୍କ୍ ମା ଜିୱୁଣ୍ଡ୍‍ତାଗେ ଶାନ୍ତି ଇଲ୍‍ୱେ ମାତ୍‍ତେ । 
\v 6 ବାତେଙ୍କ୍ ଇତ୍‍କେ ଚିନ୍ତାତେ ମାନ୍ଦାନ୍ ନାରୁଡ଼୍‍କ୍ ସାନ୍ୱନା ଇସମାନ୍ଦାନ୍ ଇଶ୍ୱର୍‌ ତିତସ୍‍ତିଙ୍କ୍ ରସ୍ ମାକିଂଙ୍କ୍ ସାର୍‍ଦେ ଇତ୍‍ତନ୍ । 
\v 7 ଅନ୍‌‍ୱାଦ୍ ଆଗମନ୍‍ ଆତ୍‍ତାଙ୍କ୍ ଆୟ୍‍ୟ, ମାତର୍ ଅଣ୍ଡ୍‌ ମିଇ ପାକେ ଆଞ୍ଜ୍ ବେନ୍ ସାର୍‍ଦେ ପାଏମ୍‍ଆତ୍‍ତଣ୍ଡ୍, ଆଦିନ୍‌ସେଙ୍ଗେ ମାମ୍‍ମେ ୱେଡ଼୍‍କ୍‍ ଆତ୍‍ତମ୍ । ନାକିଂଙ୍କ୍ ଉଡ଼ାନଙ୍କ୍ ମିୟାଦ୍ ବେସର୍ ଇଚ୍ଛା, ନା ସେଙ୍ଗେ ମିୟାଦ୍ ବେସର୍ ଦୁଃକାମ୍, ନାକିଂଙ୍କ୍ ସମର୍ତନ୍ ମାଡ଼ାନଙ୍କ୍ ମିଡ଼୍ ବେସର୍ ଇଚ୍ଛା, ଇଦ୍ ସାରେ ବିଷୟ ଅଣ୍ଡ୍‌ ନାକିଂଙ୍କ୍ କେତ୍‍ତାନ୍ । ଆଦିଙ୍କ୍ ନାନ୍ ଗାଟି ୱେଡ଼୍‍କ୍‍ତାନ୍ ।
\p
\v 8 ନାୟଦ୍ ଚିଟି କାର୍‍ସ୍ ମିଡ଼୍ ଦୁଃକାମ୍ ଆତ୍‍କେ ମିକା, ଆଦ୍ ଚିଟି ଲେକିମାନାଙ୍କ୍ ନା ମନ୍‍ତାଗ୍ ବାତେଏ ଦୁଃକାମ୍ ଇଲ୍‍ଲେ । ଚିଟି ମିକିଂଙ୍କ୍ ସେନେକ୍‍ତିଙ୍କ୍‍ ମାଇଦିଙ୍କ୍ ଦୁଃକାମ୍ ଇତ୍‍ତାଙ୍କ୍ ନାନ୍ ଦୁଃକାମ୍‍ ଆସ୍ ମାନେନ୍ । 
\v 9 ବାତେଙ୍କ୍ ଇତ୍‍କେ ମିଇ ମନ୍‍ଦାଗ୍ ଦୁଃକାମ୍ ଇସ୍ ମାନ୍‍ ଆୟ୍‍ୟ, ମାତର୍ ଇଦ୍ ଦୁଃକାମ୍ ମିଇ ଜିୱୁଣ୍ଡ୍‍ତାଦ୍ ଗତିପତ୍‌ ବାଦ୍‍ଲେମ୍‍ ମାଡ଼୍‍ତାଙ୍କ୍ ଇଞ୍ଜେ ନାନ୍ ୱେଡ଼୍‍କ୍‍ ପାଏମ୍‍ଆତ୍‍ତାନ୍ । ଇଶ୍ୱର୍‌ତେ ଇଚ୍ଛା ଲେକାମ୍ ମିଡ଼୍ ଇଦ୍ ଦୁଃକାମ୍ ସାରେ ମାଡ଼୍‍ତିଡ଼୍ । ଆଦିଙ୍କ୍ ମା ତଡ଼୍ ମିଡ଼୍ ବେଦ୍‍ଲେକାମ୍ ମିକା ଲସ୍‍ ଆୟ୍‍ୱିଡ଼୍ । 
\v 10 ବାତେଙ୍କ୍ ଇତ୍‍କେ ଇଦ୍‍ଲେକାତ୍ ଦୁଃକାମ୍ ଇଶ୍ୱର୍‌ତଡ଼୍ ବ୍ୟବହାର୍‌ ଆସ୍ ଅଦିନ୍‌ତଡ଼୍ ହୃଦୟ୍ ବାଦ୍‍ଲେମ୍ ଆତ୍‍କେ ପରିତ୍ରାଣ ଦର୍‍କିତ୍ । ଇଗେ ଅନୁତାପ୍ ଆଦାନାଦ୍ ବାତ୍ ଇଲ୍‍ଲେ । ବାତେଙ୍କ୍ ଇତ୍‍କେ ମାତର୍ ଜଗତ୍‍ତାଦ୍ ଦୁଃକାମ୍ ଡଲ୍‍ନାଦ୍ ଗଟେମ୍‍ମାଡ଼ିତ୍ । 
\v 11 ଉଡ଼ାଟ୍, ଇଶ୍ୱର୍‌ତେ ଲେକାମ୍ ଇଦ୍ ଦୁଃକାମ୍ ମିଇ ମନ୍‍ତାଗ୍ ବେସର୍ ଇଚ୍ଛା, ବେସର୍ ୱେରେ, ବେସର୍ କପାମ୍, ଆତ୍ମସଂଶୋଦନ ସେଙ୍ଗେ ବେସର୍ ୱାଦାନ୍, କାରାପ୍ ପାଡ଼ିୟିଦେ ନାରୁଡ଼୍‍କ୍ ଦଣ୍ଡ ଇଦାନଙ୍କ୍ ବେସର୍ ତର୍ପରତା ସଂଚାରିତ୍ ମାଡ଼୍‍ତେ । ଇଦ୍‍ସାରେ ବିଷୟ୍‍ତେ ମିଡ଼୍ ନିର୍ଦ୍ଦୋଷ ଇଞ୍ଜ ପ୍ରାମାନ୍ ଆଦ୍‍ତିଡ଼୍ ।
\p
\v 12 ଆଦିଙ୍କ୍ ଯଦି ନାନ୍ ମିଇବକେତ୍ ଚିଟି ଲେକିତାନ୍, ଆଗେକ୍ ବା ବେନ ଅନ୍‌ୟାୟ୍ ମାଡ଼୍‍ତଣ୍ଡ୍ ବା ବେନ ଅନ୍‌ୟାୟ୍ ସୟେମ୍‍ ଆତ୍‍ତନ୍, ତାନ୍ ଉଦ୍ଦେଶ୍ୟତେ ଆଦ୍ ଆୟ୍‍ୟ । ଇଶ୍ୱର୍‌ତେ କଣ୍ଡେତେ ମା ସେଙ୍ଗେ ମିୟାଦ୍ ବକ୍ତି ବେସର୍ ଲେକାମ୍ ନୁ 
\v 13 ଆଦିନ୍ ସେଙ୍ଗେ ମାମ୍‍ମେ ବେସର୍ ସାର୍‍ଦେ, ଆଦ୍ କେଞ୍ଜ୍‍ପାଙ୍କ୍ ନାନ୍ ଆଦ୍ ଚିଟି ଲେକ୍‍ତାନ୍ । ମାମ୍‍ମେ ବେସର୍ ସାର୍‍ଦେ ଆୟମ୍ । ମିଇଡ଼୍ ତିତସ୍‍ତିଙ୍କ୍ ସାରେ ଲେକାମ୍ ସାହାଯ୍ୟ ମାଡ଼ି ବେଲାନ୍ ସାର୍‍ଦେ ମାଡ଼୍‍ତିଡ଼୍ । ଆଦ୍ ମାକିଂଙ୍କ୍ ନାର୍‍ଗେ ୱେଡ଼୍‍କ୍‍ ଇତ୍‍ତେ । 
\v 14 ତାମ୍ ପାକେ ମିଇ ସେଙ୍ଗେ ନାନ୍ କେସ୍‍ମିନ୍ଦେନ୍ । ମେଣ୍ଡେ ଆଦିନ୍ ସେଙ୍ଗେ ନା ତାଲେ ମଦଲ୍ ଆୟ୍‍ୟ । ବେଲାନ୍ ମିଇ ପାକେ ମାମ୍‍ମେ ସାରେଦିନା ସତ୍ କେସ ୱାଦୁତମ୍‍, ଆଦେଲେକାମ୍ ତିତସ୍‍ତେ ପାକେ ମାମ୍‍ମେ ମାଡ଼ିମାନ୍ଦାନ୍ ଗର୍ବି, ବୁସା ଇଞ୍ଜ ପ୍ରମାନ୍ ଆୟ୍‍ୟ । 
\v 15 ମିଡ଼୍ ସାରେତଡ଼୍ ବେଲାନ୍ ଅନ୍‌‍ୱାଦ୍ ଗଟ୍‍ତାଗ୍ ମାତ୍‍ତିଡ଼୍ ମେଣ୍ଡେ ୱେରେ ନୁ ଜିୱୁନ୍ ୱାଡ଼୍‍କି ଅଂକିଙ୍କ୍‌ ସ୍ୱାଗତ୍ ମାଡ଼ିମାତ୍‍ତିଡ଼୍‍, ଇଦ୍ ଗଟ୍ ଏର୍କା ମାଡ଼ି ମିଇ ସେଙ୍ଗେ ଅନାଦ୍‌ ପ୍ରେମ ମେଣ୍ଡେ ଅଦିକ୍‌ ନାର୍‍ଗେ ଆସମିନ୍ଦେ । 
\v 16 ନାନ୍ ସାରେ ବିଷୟ୍‍ତେ ମିଇ ପରୁ ସାରେ ବିଶ୍ୱାସ୍ ମାଡ଼୍‍ତାଙ୍କ୍ ନାନ୍ ବେସର୍ ସୁକାମ୍‍ତେ ।
\c 8
\s କ୍ରିଷ୍ଟିୟାନ୍ ଦାନାମ୍
\p
\v 1 \x + \xo ୮:୧ \xo*\xt ରୋମୀୟ ୧୫:୨୬.\xt*\x*ଦାଦାନଡ଼ି ନୁ ଏଲାସ୍କ୍‍, ମାସିଦୋନିଆତେ ମଣ୍ଡଲିକିନାଗ୍ ବେଲାନ୍ ଇଶ୍ୱର୍‌ତେ ଅନୁଗ୍ରହ ଲାବ୍ ମାଡ଼୍‍ତଡ଼୍, ଆଦ୍ ମିକିଂଙ୍କ୍ କେତାନଙ୍କ୍ ଇଚ୍ଛା ମାଡ଼ୁତାନ୍ । 
\v 2 ଅଡ଼୍‌ ଗାଟି ତିପାଲ୍ ଇସ୍ ପରିକ୍ଷିତ୍ ଆଦ୍‍ତଡ଼୍ ନୁ ଅଡ଼୍‌ ଗାଟି ଗରିବ୍ ଆତ୍‍କେ ମିକା, ନାର୍‍ଗେ ଦାନ୍‍ ଇସ୍ ନିଜେର୍‍ ମାନ୍‍ତାଦ୍‍ ୱାସମିନ୍ଦେନ୍ ୱେଡ଼୍‍କ୍‍ କେସ୍ ମିନ୍ଦେ । 
\v 3 ନାନ୍ ନିଜାମ୍‍ତେ କେତୁତାନ୍ ଯେ, ଅଡ଼୍‌ ନିଜେତ୍ ଇଚ୍ଛାତେ ବେସର୍ ପାର୍‍ତ ଆସର୍ ଇତ୍‍ତଡ଼୍ ନୁ ମେଣ୍ଡେ ଅଦିକ୍‌ ମିକା ଦାନ ମାଡ଼ିମିନ୍ଦେଡ଼୍ । 
\v 4 ଯିହୁଦାତାଗ୍ ମାନ୍ଦାନ୍ ଇଶ୍ୱର୍‌ତେ ନାରୁଡ୍‍କିଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ଅଡ଼୍‌‍କିଂଙ୍କ୍ ସୁଯୋଗ୍ ଇୱିଡ଼୍ ଇଞ୍ଜ୍ ଅଡ଼୍‌ ମାକିଂଙ୍କ୍ ଅନୁରୋଦ୍‍ ମାଡ଼ି କେସ୍‍ମାତ୍‍ତଡ଼୍ । 
\v 5 ଅଡ଼୍‌ଆଗାଙ୍କ୍‌ ମାମ୍‍ମେ ଇସର୍ ଆଶେ ମାଡ଼ି ମାନମ୍ । ମୁନେ ଅଡ଼୍‌ ନିଜେ ନିଜେତିଙ୍କ୍ ପ୍ରବୁନ୍ ପାକେ ଉତ୍ସର୍ଗ ମାତ୍‍ତଡ଼୍ ନୁ ପେର୍‍କେ ଇଶ୍ୱର୍‌ତେ ଇଚ୍ଛା ଲେକାମ୍‍ତେ ନିଜେ ନିଜେତିଙ୍କ୍ ମାନ୍‍ ଉଦ୍ଦେଶ୍ୟତେ ଉତ୍ସର୍ଗ ମାଡ଼୍‍ତଡ଼୍ । 
\v 6 ତିତସ୍‍ତଡ଼୍ ଇଦ୍ ପାଡ଼୍‍ୟି ଆରାମ୍ ଆସ୍‍ମାତେ । ଇଦିଙ୍କ୍ ଚାଲାମାଡ଼ି ନେହେତାନ୍ ସେଙ୍ଗେ ନୁ ଇଦ୍ ପ୍ରେମାତାଦ୍‍ ସେବା ପାଡ଼ିୟିଦାଗ୍ ମିକିଂଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ତିତସ୍‍ତିଙ୍କ୍ ଅନୁରଦ୍‌ ମାଡ଼୍‍ତମ୍ । 
\v 7 ମିଡ଼୍ ମିୟାଗ୍ ବାତ୍ ସାର୍‍ରେ ମିନ୍ଦେ ଆଗେ ସାଉକାର୍ ଆଦ୍‍ତିଡ଼୍, ବିଶ୍ୱାସ୍, ସାୟେ ଗଟି କେତାନଡ଼୍, ବୁଦ୍‍ତେ, ସାହାଯ୍ୟ ମାଡ଼ାନଙ୍କ୍ ତିଆର୍ ନୁ ମା ସେଙ୍ଗେ ପ୍ରେମ ତଅତାନଙ୍କ୍ ନାର୍‍ଗେ ପରିଚୟ ଇମୁଟ୍, ଇଦ୍ ନାୟାଦ୍ ଇଚ୍ଛା ।
\p
\v 8 ଇଦ୍ ବିଷୟ୍‍ତେ ମିଇ ସେଙ୍ଗେ ନାନ୍ ବାତେବା ମିଚ୍‌ ତିଆର୍ ମାଡ଼ନ୍ । ମାତର୍ ସେବାକାମ୍‍ଦାଗ୍ ବାଗାତଡ଼୍ ଇଚ୍ଛାତେ ୱେଷଡ଼୍‍ଇସ୍ ମିଇ ପ୍ରେମତେ ପାଡ଼୍‍ୟି ପୁନ୍ଦାନଙ୍କ୍ ନାନ୍ ଆଲ୍‍ସି ମାଡ଼ୁତାନ୍ । 
\v 9 ମୀଡ଼୍ ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ବିଷୟ ପୁନୁଟ୍ । ଅଣ୍ଡ୍‌ ସାଉକାର୍ ଆସ୍‍ମିକା ମିଇ ସେଙ୍ଗେ ଗରିବ୍ ଆତ୍‍ତଣ୍ଡ୍, ଅନ୍‌ ଗରିବ୍ ତଡ଼୍ ମିଡ଼୍ ଗାଲା ବେଲା ସାଉକାର୍ ଆଦ୍ ପାର୍‍ଦ୍‍ତିନ୍ ।
\p
\v 10 ଇଦ୍ ବିଷୟ୍‍ତେ ମିକିଂଙ୍କ୍ ନାୟଦ୍ ଇଦ୍ ଗଟ୍ ଆତ୍‍ତେ ୱେଷଡ଼୍‌ ମିଡ଼୍ ବାତେଏ ଆରାମ୍ ମାଡ଼ି ମାତ୍‍ତିଡ଼୍, ଆଦ୍ ଇଞ୍ଜେ ତେର୍‍ସ୍ପାନାଦ୍ ମିୟାଦ୍ ସାୟେ । ମାତର୍ ପାଡ଼୍‍ୟି ମାଡ଼ାନନ୍ ଆୟ୍‍ୟ, ମାତର୍ ପାଡ଼୍‍ୟି ମାଡ଼ାନଙ୍କ୍ ଯୋଜନା ମାଡ଼ାନାଗ୍ କେତାନାଦ୍ ମିଡ଼୍ ଆଦ୍‍ତିଡ଼୍ ମୁନ୍‍ନେତଡ଼ି । 
\v 11 ଆଦିଙ୍କ୍ ପାଡିୟ୍‌ ମାଡ଼ ମାନୁଟ୍ ନୁ ମିଇ ସୁଯଗ୍‍ତେ ଉଡ଼ି ଆଦ୍ ତେର୍ସ୍ପାଟ୍ । ଯୋଜନା ମାଡ଼ାନ୍ ୱେଲେ ମିୟାଦ୍ ବେନ୍ ଲେକାମ୍ ଇଚ୍ଛା ମାତ୍‍ତେ, ପାଡ଼୍‍ୟି ତେର୍‍ନା ଯାକ ଆଦିଙ୍କ୍ ଲେକେତ୍‌ ଆଦ୍‍ପି ୱାଟାଟ୍ । 
\v 12 ବାତେଙ୍କ୍ ଇତ୍‍କେ ଦାନ ମାଡ଼ାନାଦ୍ ଇଚ୍ଛା ମାତ୍‍ତେ, ନାରୁନ୍ ତାନ୍ ପାର୍‍ତେ ଆସର୍ ବାତ୍ ଦାନ ମାଡ଼ିତନ୍, ଇଶ୍ୱର୍ ଗ୍ରହନ୍ ମାଡ଼ିତନ୍ । ତାନ୍ ସମ୍ପତିତ୍‍ତେ ତାନ୍ ବାଇଦେ ଅଣ୍ଡ୍‌ ବାତେଏ ଇୱିଣ୍ଡ୍ ଇଞ୍ଜ ଇଶ୍ୱର୍ ଇଚ୍ଛା ମାଡ଼ଣ୍ଡ୍ ।
\p
\v 13 ମିଇ ପରୁ ଇଦ୍ ବଜ୍‍ତିଙ୍ଗ୍ ଲଦାମାଡ଼ି ବାଗାତଡ଼୍‍କ୍ ୱେଡ଼୍‍କ୍‍ ଇଦା‍ନ୍‍ ସେଙ୍ଗେ ନାନ୍‍ନେ ଆଲ୍‍ସି ମାଡ଼ନ୍, 
\v 14 ବାତେଙ୍କ୍ ଇତ୍‍କେ ଇଞ୍ଜେ ମିୟାଦ୍ ନାର୍‍ଗେ ମାନ୍‍ନାଙ୍କ୍ ଅବାବ୍‍ତେ ମାନ୍ଦାନ୍ ନାରୁଡ଼୍‍କ୍ ସାହାଯ୍ୟ ମାଡ଼ାନାଦ୍ ମୀୟାଦ୍ ପାଡ଼୍‍ୟି । ଦିନାମ୍ ୱାଦ୍‍ତେ, ମିଡ଼୍ ଅବାବ୍‍ତେ ମାନ୍ଦାନ୍ ୱେଲେ, ଅଡ଼ାଦ୍‌ ସମ୍ପତି ମିୟାଦ୍ ଅବାବ୍ ପୁରନ୍‍ମାଡ଼ାନ୍ ସେଙ୍ଗେ ସାହାଯ୍ୟ ମାଡ଼ିତିଡ଼୍ । ଇଦ୍‍ଲେକାମ୍ ମିଡ଼୍ ଆନ୍‌‍ତେ ସାମାନ୍ ଲେକେମ୍ ଗେଲ୍‍ସାନଙ୍କ୍ ‍ପାର୍‍ଦ୍‍ତିଡ଼୍ । 
\v 15 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ବେନ ନାର୍‍ଗେ ଗୁଡ଼୍‍ପିତଣ୍ଡ୍, ଅନାଦ୍‌ ବାତେଏ ମାୟ୍‍ୟ । ବେନ ସୁକୁକ୍ ଗୁଡ଼୍‍ପିତଣ୍ଡ୍, ଅନାଦ୍‌ ମେଣ୍ଡେ ଅବାବ୍ ଆୟ୍‍ୟ ।”
\s ତୀତସ୍‍ ନୁ ତାନ୍ ସାଙ୍ଗନଡ୍
\p
\v 16 ଇଶ୍ୱର୍‌ତେ ଦନ୍ୟବାଦ୍ ଆୟି । ବାତେଙ୍କ୍ ଇତ୍‍କେ ମାନ୍‍ଲେକାମ୍ ତିତସ୍‍ ମିକା ମିକିଂଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ତିଆର୍ ମିନ୍ତେନ୍ । 
\v 17 ଅଣ୍ଡ୍‌ ମାତର୍ ମାନ୍‍ ଅନୁରଦ୍‌ତିଙ୍କ୍‌ ସ୍ୱାଗତ୍ ମାଡ଼ଡ଼୍‍, ମାତର୍ ମିକିଂଙ୍କ୍ ସାହାଯ୍ୟ ମାଡ଼ାନଙ୍କ୍ ଇସର୍ ତିଆର୍‍ତେ ମିନ୍ଦେନ୍ ଯେ, ନିଜେତ୍ ଇଚ୍ଛାତେ ମୀଇପାକେ ଆଦାନ୍ ସେଙ୍ଗେ ଅନ୍‌ ମାନ୍‍ ମାଡ଼ିମିନ୍ଦେଣ୍ଡ୍ । 
\v 18 ଅନ୍‌ ତଡ଼୍ ମେଣ୍ଡେଅର୍‍ତୁନ୍ ଦାଦାଙ୍କ୍ ରତୁତମ୍ । ସୁସମାଚାର୍‌ ଗଟ୍ ପ୍ରଚାର୍ ମାଡ଼ାନଙ୍କ୍ ସାରେ ମଣ୍ଡଲିନାଗ୍ ଅଣ୍ଡ୍‌ ବିଶେଷ୍ କ୍ୟାତିଲାବ୍ ମାଡ଼୍‍ତଣ୍ଡ୍ । 
\v 19 ମାତର୍ ଆସର୍ ଆୟ୍‍ୟ, ପ୍ରବୁନ୍ ଗୈରବ୍ ନୁ ମାନାଦ୍‍ ନମସ୍କାର୍ କେତ୍‍ତାନ୍ ସେଙ୍ଗେ ବେନ୍ ସେବା ପାଡ଼୍‍ୟି ମାନାଡ଼୍ ପାଏମ୍ ଆତ୍‍ତାଡ଼୍, ଆଗେ ମାନାଦ୍‍ ସାରେତାଗ୍‍ତଡ଼୍ ଆଦାନ୍ ସେଙ୍ଗେ ବେନାବେନା ମଣ୍ଡଲି ଅଂକିଙ୍କ୍‌ ଏଞ୍ଚି ମିନ୍ତେ ।
\p
\v 20 ଉଦାର୍‍ତେ ଇସ୍‍ମାନ୍ଦାନ୍ ଇଦ୍ ଦାନତିଙ୍କ୍ ଗାଟି ସାବ୍‍ଦାନ୍‍ତେ ମାମ୍‍ମେ ସେବା କାମ୍‍ତାଗ୍‍ ବ୍ୟବହାର୍‌ ମାଡ଼ୁତମ୍, ନେଲାନ୍ ମା ପରୁ ବେନ ଦୋଷ୍‍ମାଡ଼େ ପାର୍‍ୱନ୍ । 
\v 21 ବାତେଙ୍କ୍ ଇତ୍‍କେ ମାତର୍ ପ୍ରବୁନ୍ ସାକ୍ଷାତ୍‍ତେ ଆୟ୍‍ୟ, ମାତର୍ ନାରୁନ୍ ସାକ୍ଷାତ୍ ମିକା ସତ୍ ମାନ୍ଦାନ୍ ମାନାଦ୍‍ ଲକ୍ଷ ।
\p
\v 22 ଆଦିଙ୍କ୍ ଅଡ଼୍‌‍ତଡ଼୍ ଇଣ୍ଡ୍ ଦାଦାଙ୍କ୍ ମାମ୍‍ମେ ରତ୍‍ତମ୍ । ଅଂକିଙ୍କ୍‌ ନାର୍ଗେଦାମ୍ ପରିକ୍ଷା ମାଡ଼ି ଅନ୍‌ ବିଶ୍ୱାସ୍‍ତେ ପରିଚୟ ଦର୍‍ସ୍କ୍‍ତମ୍ । ମିଇ ପରୁ ଅନାଦ୍‌ ଗାଟି ଆଶେ ମାନ୍‍ନାଙ୍କ୍ ଅଣ୍ଡ୍‌ ମିକିଂଙ୍କ୍ ସାହାଯ୍ୟ ମାଡ଼ାଙ୍କ୍ ସେଙ୍ଗେ ଅଦିକ୍‌ ଆଗ୍ରହ ଆତ୍‍ତନ୍ । 
\v 23 ତିତସ୍‍ତେ ପରିଚୟ ଇଦ୍, ଅଣ୍ଡ୍‌ ନା ତଡ଼୍‍ଦେ ନଣ୍ଡ୍ ନୁ ମିକିଂଙ୍କ୍ ସାହାଯ୍ୟ ମାଡ଼୍‍ନାଙ୍କ୍ ନା ତଡ଼୍ ପାଡ଼୍‍ୟି ମାଡ଼ାନଣ୍ଡ୍ । ମେଣ୍ଡେ ଅନ୍‌‍ତଡ଼୍‍ ଆଞ୍ଜମାନ୍ତାନ୍ ବାଗାତଡ଼୍ ପ୍ରେରିତ ବିଶ୍ୱାସୀ ଦାଦାନଡ଼୍ ପରିଚୟ, ଅଡ଼୍‌ ମଣ୍ଡଲି ସାରେତାୱିନ୍ ପ୍ରତିନିଦି ନୁ କ୍ରିଷ୍ଟନ୍‍ ଗୌରବ୍ ଲେକାମ୍ । 
\v 24 ଅଡ଼୍‌‍କିଂଙ୍କ୍ ମିୟାଦ୍ ପ୍ରେମ ତମୁଟ୍ । ଆଲାଆତ୍‍କେ ସାରେ ମଣ୍ଡଲି ଇଦ୍ ବିଷୟ୍‍ତେ ନିଜାମ୍ ଆଦ୍‍ତେ ନୁ ମିଇ ସେଙ୍ଗେ ମାମ୍‍ମେ ମାଡ଼ମାନ୍ଦାନ୍ ଗର୍ବ ସତ୍ ଇଞ୍ଜ ବୁଜେମ୍ ଆଦ୍‍ପାର୍‍ଦ୍‍ତଡ଼୍ ।
\c 9
\s ବାଗାତ୍ ମଣ୍ଡଲିତେ କ୍ରିଷ୍ଟିୟାନ୍‍ ସେଙ୍ଗେ ସାହାଯ୍ୟ
\p
\v 1 ଯିହୁଦାତାଗ୍ ମାନ୍ଦାନ୍ ଇଶ୍ୱର୍‌ତେ ନାରୁଡ଼୍‍ତେ ପାକେ ସାହାଯ୍ୟ ରତାନ୍ ସେଙ୍ଗେ ମିକିଂଙ୍କ୍ ଲେକାନାଲ୍‌ଦ୍ ବାତେଏ ଆବଶ୍ୟକତା ଇଲ୍‍ଲେ । 
\v 2 ନାନ୍ ପୁତ୍‍ତାନ୍, ମୀଇଡ଼୍ ସାରେଦାମ୍ ସାହାଯ୍ୟ ମାଡ଼ାନଙ୍କ୍ ତିଆର୍ ନୁ ମାସିଦୋନିଆତେ ନାରିଡ଼୍ ପାକେ ମିୟାଦ୍ ବିଷୟ୍‍ତେ ନାନ୍ ଗର୍ବ ମାଡ଼୍‍ତାନ୍ । ନାନ୍ କେସ୍‍ମାତ୍‍ତାନ୍, “ଆକାୟାତେ ଦାଦାନଡ଼ି ସାହାଯ୍ୟ ମାଡ଼ାନ୍ ସେଙ୍ଗେ ଆତ୍‍ତେ ୱାଡ଼୍‍ଷା କନ୍‍ସ୍ ତିଆର୍ ଆସ୍ ମିନ୍ଦେ ।” ମିୟାଦ୍ ଆଗ୍ରହ ଅଡ଼୍‌ ତାଗାଙ୍କ୍ ନାର୍‍ଗେ ନାରିଡ଼୍‍କିଙ୍କ୍ ତିଆର୍‍ତେ ମାଡ଼୍‍ତେ । 
\v 3 ଇଞ୍ଜେ ନାନ୍ ଇ ଦାଦାନଡ଼୍‍କ୍ ମିଇ ପାକେ ରହସମିନ୍ଦେନ୍ । ଉଡ଼େ, ଇଦ୍ ସମୟ୍‍ତେ ବେଲାନ୍ ମିୟାଦ୍ ବିଷୟ୍‍ତେ ମାୟାଦ୍‌ ଗର୍ବ ଆଙ୍ଗ୍‍ଡ଼ାମ୍‍ ଆୟ୍‍ମାକି । ନାନ୍‍ନେ କେତ୍‍ତାନ୍ ଲେକାମ୍ ମିଡ଼୍ ଦାନତଡ଼୍ ତିଆର୍ ଆ‍ସ୍‍ ମାନୁଟ୍ । 
\v 4 ମାସିଦୋନିଆତେ ନାରୁଡ଼୍ ନା ତଡ଼୍ ଆଞ୍ଜ୍ ଯଦି ମିକିଂଙ୍କ୍ ତିଆର୍ ଆତ୍‍ତାଦ୍ ଉଡ଼ିତଡ଼୍; ଆଲେକେ ମିଇ ପରୁ ଗାଟି ଆଶେ ମାନ୍‍ ମାମ୍‍ମେ ସିଗ୍ ଆଦ୍‍ତମ୍, ନିଜାମ୍ କେତାନଙ୍କ୍ ଆତ୍‍କେ, ଆଦ୍ ମିଇ ପାକେ ମିକା ସିଗ୍‍ତାଦ୍ ଆଦ୍‍ତେ । 
\v 5 ମିଡ଼୍ ପ୍ରତିଶ୍ରୁତି ଇସ୍ ମାନ୍ଦା‍ନ୍ ଦାନ ନେହେତାନ୍ ସେଙ୍ଗେ ଇ ଦାଦାନଡ଼୍‍କ୍ ନାନ୍ ଆଦାନ୍ ମୁନେଙ୍କ୍ ମିଇ ପାକେ ରଅତାନ୍‍ ସେଙ୍ଗେ ମାନ୍‍ ମାଡ଼୍‍ତାନ୍ । ଆଲେକେ, ନାନ୍ ମିଇ ପାକେ ହେୱୁଦାନ୍ ୱେଲେ ଇଦ୍ ଦାନ ଗୁଡ଼୍‍ପି ନେହେସ୍ ମାନ୍ଦାନ୍ ମିନ୍ଦେ । ଇଦିନ୍‍ତଡ଼୍ ମିଡ଼୍ ବାଦ୍ୟତଡ଼୍ ଇୱେକଟ ନିଜେତ୍ ଇଚ୍ଛାତେ ଇଦୁତିଡ଼୍ ଇଞ୍ଜ ପ୍ରକାଶ୍ ଆଦ୍‍ତେ ।
\p
\v 6 ହେର୍କା ନେହେମୁଟ୍, ବେନ ସୁକୁକ୍ ୱିଜ୍ ୱିତିତନ୍, ଅଣ୍ଡ୍‌ ସୁକୁକ୍ ପାଣ୍ଡ୍‍ପ୍ସିତନ୍; ବେନ ନାର୍‍ଗେ ୱିଜ୍ ୱିତିତନ୍, ଅଣ୍ଡ୍‌ ନାର୍‍ଗେ ପାଣ୍ଡ୍‍ପ୍ସିତନ୍‍ । 
\v 7 ବେନ ବେଲା ନିଜେତ୍ ଜିୱୁଣ୍ଡ୍‍ତାଗ୍ ଆଲ୍‍ସିତିଡ଼୍, ଅଣ୍ଡ୍‌ ଆଲାନ୍ ଦାନ ମାଡ଼ିଣ୍ଡ୍ ନୁ ଆଦ୍ ଦାନ ଦୁଃକାମ୍‌ ଆସ୍ ବା ମାତର୍ ଉର୍‌ଗାଡ଼୍‌ ଆୟ୍‍ମାକି । ବାତେଙ୍କ୍ ଇତ୍‍କେ ୱେଡ଼୍‍କେତେ ଇଦାନଙ୍କ୍ ଇଶ୍ୱର୍‌ ପ୍ରେମ ମାଡ଼ିତନ୍ । 
\v 8 ସାରେଲେକାତ୍ ଦାନ୍‍ତେ ମିକିଂଙ୍କ୍ ଉନ୍ନତି ମାଡ଼ାନ୍ ସେଙ୍ଗେ ଇଶ୍ୱର୍‌ ପାର୍‍ଦ୍‍ତଣ୍ଡ୍; ପେର୍‍କେ ମିଡ଼୍ ସାରେଦାମ୍ ସମ୍ପତିତାଗେ ବାଦ୍‍କେ ପାର୍‍ତିଡ଼୍ ନୁ ସାରେ ଲେକାତ୍ ଲେକେତ୍‍ ପାଡ଼୍‍ୟି ସେଙ୍ଗେ ବେସର୍ ଦର୍‍କାର୍ ଆସର୍ ଦାନ ଇଦ୍‍ଏ ପାର୍‍ତିଡ଼୍ । 
\v 9 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ଅବାବ୍‍ତେ ନାରିଡ଼୍‍କ୍ ଅଣ୍ଡ୍‌ ଉଦାର୍‍ତଡ଼୍ ଦାନ ମାଡ଼ିତନ୍‍; ତାନ୍ କୃପା ସାରେଦିନାତ୍‍ ମାଇଦିଙ୍କ୍ ।”
\p
\v 10 ବେନଡ଼୍ ବାଦ୍‍କାନଡ଼୍‍କ୍ ଇଶ୍ୱର୍ ୱିତାନ୍ ସେଙ୍ଗେ ୱିଜ୍ ନୁ ତିନ୍ଦାନ୍ ସେଙ୍ଗେ କାଦି କେପ୍‌ସିତନ୍, ଅଣ୍ଡ୍‌ ମିୟାଦ୍ କାମ୍‍ମାଡ଼ାନ୍ ଲେକାମ୍‍ତେ ୱିଜ୍ ନେହେଚିଦ୍‍ତନ୍ ନୁ ମିଇୟାଦ୍ ଉଦାର୍‍ତେ କାୟେ ଲେକାମ୍ ମିଡ଼୍ ଆନ୍‌ତେ ନାର୍‍ଗେ ଫସଲ୍ ପାଣ୍ଡ୍‍ସ୍ପିତିଡ଼୍ । 
\v 11 ମିଇଡ଼୍ ସାରେଦାମ୍ ବେଲାନ୍ ଉଦାର୍ ଲେକାମ୍ ଦାନ ମାଡ଼େ ପାର୍‍ତିଡ଼୍, ଇଦିନ୍‍ ସେଙ୍ଗେ ଇଶ୍ୱର୍ ମିକିଂଙ୍କ୍ ସାରେ ବିଷୟ୍‍ତେ ଉନ୍ନତି ମାଡ଼ିତନ୍ ନୁ ମାନ୍‍ ତଡ଼୍ ମିଡ଼୍ ରଅସ୍‍ମାନ୍ଦାନ୍ ଦାନ ସେଙ୍ଗେ ନାର୍‍ଗେ ଇଶ୍ୱର୍‌ତିଙ୍କ୍ ୱେଡ଼୍‌କେତେ ଦନ୍ୟବାଦ୍ ଇଦ୍‍ତଡ଼୍ । 
\v 12 ମିୟାଦ୍ ଦାନ ଲେକ୍‌ତାଦ୍‌ ସେବା ପାଡ଼୍‍ୟିତଡ଼୍ ମାତର୍ ବେନ ଇଶ୍ୱର୍‌ତେ ନାରୁଡ଼୍‍ତେ ଅବାବ୍ ଯେକା ଆଦ୍‍ତେ, ଆଦ୍ ଆୟ୍‍ୟ, ବାତେଙ୍କ୍ ଇତ୍‍କେ ଇଦିନ୍‍ ତଡ଼୍ ଇଶ୍ୱର୍‌ତେ ସେଙ୍ଗେ ନାର୍ଗେ ନାରୁଡ଼୍‍ ହୃଦୟ୍‍ତାଗ୍ କୃତଜ୍ଞତା ମିଡ଼୍‍ ଆଦ୍‍ତେ । 
\v 13 ଇଦ୍‍ ସେବା ପାଡ଼୍‍ୟି ତଡ଼୍ କ୍ରିଷ୍ଟନ୍ ସୁସମାଚାର୍‌ତେ ସେଙ୍ଗେ ମିୟାଦ୍ ବିଶ୍ୱାସ୍ତେ ସେଙ୍ଗେ ନୁ ସାରେତଡ଼୍ ତଡ଼୍ କାଇଲି ମିକା ମିଡ଼୍ ବେନ୍ ପ୍ରସଂଶା ମାଡ଼୍‍ତିଡ଼୍, ଆଦିନ୍ ସେଙ୍ଗେ ଅଡ଼୍‌ ଇଶ୍ୱର୍‌ତିଙ୍କ୍ ଗୌରବ୍ ମାଡ଼ିତଡ଼୍ । 
\v 14 ମିଇ ମାୟ୍‍ଦିଙ୍କ୍ ଇଶ୍ୱର୍‌ତେ ନାର୍‍ଗେ ଅନୁଗ୍ରହ ସେଙ୍ଗେ ଅଡ଼୍‌ ବିଶ୍ୱାସ୍‍ତାଗ୍ ନାର୍‍ଗେ ପ୍ରେମତଡ଼୍ ପ୍ରାର୍ତନାତାଗ୍ ମିକିଂଙ୍କ୍ ହେର୍କା ମାଡ଼ିତଡ଼୍ । 
\v 15 ୱାଡ଼ାଟ୍, ଇଶ୍ୱର୍‌ତେ ବାକ୍‍ୱା ନୁ ମୁଲ୍ୟହିନ ଦାନ ସେଙ୍ଗେ ଅନ୍‌ ସେଙ୍ଗେ କୃତଜ୍ଞତା ମାଡ଼ିକାଡ଼୍ !
\c 10
\s ଅପପ୍ରଚାର୍‌ ବିରୁଦ୍ଦ୍‍ତେ ପାଉଲ୍‍ତେ ଉତ୍ତର୍
\p
\v 1 ନାନ୍ ପାଉଲ୍, ମିକିଂଙ୍କ୍ ନାୟାଦ୍ ଇଦ୍ ବ୍ୟାକ୍ତିଗତ ଦନ୍ୟବାଦ୍ ବେନ କେତିତଡ଼୍‍, “ନାନ୍ ମିଇ ପାକେ ମାନ୍ଦାନ୍ ୱେଲେ ଗାଟି ନମ୍ର ନୁ ଶାନ୍ତି, ବାତେଙ୍କ୍ ଇତ୍‍କେ ଯେକା ଆତ୍‍କେ ଅଦିକ୍‌ ସାହାସୀ ।” କ୍ରିଷ୍ଟନ୍ ନମ୍ରତା ନୁ କମଲ ନାନ୍ ମିକିଂଙ୍କ୍ ଦନ୍ୟବାଦ୍ ମାଡ଼ି କେତୁତାନ୍, 
\v 2 ମିଇ ତଡ଼୍ କାଇଲ୍‍ତେ ୱେଲେ ନାକିଂଙ୍କ୍ ବେଲାନ୍ କାରାପ୍‌ ବ୍ୟବହାର୍ ମାଡ଼ାନଙ୍କ୍ ଆୟ୍‍ୟ । ବାତେଙ୍କ୍ ଇତ୍‍କେ ବେନଡ଼୍ ହେର୍କା ମାଡ଼ିତଡ଼୍ ଯେ, ମାମ୍‍ମେ ଜାଗତିକ ରୀତିନୀତି ଲେକାମ୍ ମାନ୍‍ନ୍ତମ୍, ଅଡ଼୍‌ ବିରୁଦ୍ଦ୍‌ତେ ଦୃଡ଼ ପଦକ୍ଷେପ ଆଦାନାଦ୍ ନାର୍‍ଗେ ସାହାସ ନାୟାଦ୍ ମିନ୍ଦେ । 
\v 3 ମାମ୍‍ମେ ଇଦ୍ ଜଗତ୍‍ତାଗ୍ ବାଦ୍‍କୁତମ୍ ଇଦ୍ ସତ୍, ବାତେଙ୍କ୍ ଇତ୍‍କେ ବାତେବା ଜାଗତିକ୍ ଲେକାମ୍ ନେହେସ୍ ଯୁଦ୍‌ ମାଡ଼ମ୍, 
\v 4 ମାତର୍ ଇଶ୍ୱର୍‌ତେ ଶକ୍ତିତାୱୁ ସୁରୀଟେଙ୍ଗା ବ୍ୟବହାର୍ ମାଡ଼ି ଶତ୍ରୁଡ଼ାୱୁ ଦୃଡ଼ ଦୁର୍ଗସାରେ ଦ୍ୱଂସ ମାଡ଼ିତମ୍, ବ୍ରାନ୍ତ ଯୁକ୍ତିସାରେ କଣ୍ଡନ୍‌ ମାଡ଼ିତମ୍ । 
\v 5 ଇଶ୍ୱର୍‌ତେ ଜ୍ଞାନ୍‍ତିଙ୍କ୍ ବିରୁଦ୍ ମାଡ଼ମାନ୍ଦାନ୍ ସାରେତଡ଼୍ ଆଡାମ୍‍ ଆଦାନଡ଼୍‍କ୍ ମାମ୍‍ମେ ଉୱୁତିତମ୍ ନୁ ନାରୁଡ଼୍‍ତେ ସାରେ ଚିନ୍ତେ ଆୟତ୍ ମାଡ଼ି କ୍ରିଷ୍ଟନ୍ କାହିଲି ମାଡ଼ିକାଡ଼୍ । 
\v 6 ମିଡ଼୍ ପୁରାପୁରି ଲେକାମ୍ କ୍ରିଷ୍ଟନ୍‍ ଅନୁଗତ ସ୍ୱିକାର୍ ମାଡ଼ାନ୍ ପେର୍‍କେ ମିଇ ଲୋପେ ମେଣ୍ଡେ ବାତେବା ଅବାଦ୍ୟତା ତଅନ୍‌ଦ୍‍କେ, ତାନାଦ୍ ପ୍ରତିକାର୍ ମାଡ଼ାନଙ୍କ୍ ମାମ୍‍ମେ ତିଆର୍ ।
\p
\v 7 ମିଇ ସାରେପାକେ ବାତେଏ ସାରେ ଗଟେମ୍ ଆଦୁତ୍‍ତେ, ଉଡ଼ାଟ୍ । ମିଇୟାଗେ ବେନ କ୍ରିଷ୍ଟନ୍‍ ପେର୍‍କେ ଆଦାନଣ୍ଡ୍ ମିନ୍ଦେଣ୍ଡ୍ କି ? ଯଦି ମିନ୍ଦେନ୍, ଆଲେକେ ଅଣ୍ଡ୍‌ ମେଣ୍ଡନ୍‍ନ୍ଦାମ୍ ଇଦ୍ ଚିନ୍ତେ ମାଡ଼ୁଡ଼ିଣ୍ଡ୍ । ବାତେଙ୍କ୍ ଇତ୍‍କେ ଅନ୍‌ ଲେକାମ୍ ମାମ୍‍ମେ ମିକା କ୍ରିଷ୍ଟନ୍ ପେର୍‍କେ ଆଦାନମ୍ । 
\v 8 ମିଇକିଙ୍କ୍ ଦ୍ୱଂସ ମାଡ଼ାନଙ୍କ୍ ଆୟ୍‍ୟ, ମାତର୍ ଗଠନ୍ ମାଡ଼ାନ୍ ସେଙ୍ଗେ ଇଶ୍ୱର୍ ମାନ୍‍ ବେନ୍ ଅଦିକାର୍‌ ଇତ୍‍ତନ୍, ଆଦିନ୍ ସେଙ୍ଗେ ଯଦି ନାନ୍ ନାର୍‍ଗେ ଦର୍ପ ମାଡ଼ିମାନ୍‍ତାନ୍, ଆଲେକେ ସିଗ୍ ଆୟନ୍ । 
\v 9 ନାୟାଦ୍ ଚିଟି ତଡ଼୍ ମିକିଂଙ୍କ୍ ୱେର୍‍ସ୍ପାନଙ୍କ୍ ଆଲ୍‍ସି ମାଡ଼ାନାଦ୍ ନାୟାଦ୍ ଇଚ୍ଛା ଆୟ୍‍ୟ । 
\v 10 ବେନ କେତିତଡ଼୍‍, “ପାଉଲ୍‍ତେ ଚିଟି କି ଗାଟି ବାଦେମ୍‍ ଆତ୍‍ତେ ଲେକାମ୍ ବା ୱାୟ୍‍ୟେ ମାନ୍ଦାନ୍ ଲେକାମ୍ ବାତେଙ୍କ୍ ଇତ୍‍କେ ମା ତଡ଼୍ ମାନ୍ଦାନ୍ ୱେଲେ ଅଣ୍ଡ୍‌ ଦୁର୍ବଲ ଲେକାମ୍ ତନ୍ଦାନଣ୍ଡ୍ ନୁ ଅନ୍‌ ଗଟି ମୁଲ୍ୟ ଆୟ୍‍ୱେ ଲେକାମ୍ ହେର୍କା ଆୟ୍‍ନୁ ।” 
\v 11 ଆଦ୍ ନାରୁଡ଼୍ ବୁଜେମ୍ ଆଦାନାଦ୍ ଲେକାମ୍ ଯେ, ମାମ୍‍ମେ ଯେକାଙ୍କ୍ ଚିଟିତେ ବାତ୍ ଲେକିତମ୍, ସାକ୍ଷାତେ ଆଦିଙ୍କ୍ ପାଡ଼ିୟିଦାଗ୍ ସାୟେ ମାଡ଼ିତମ୍ ।
\p
\v 12 ନିଜାମ୍ ନିଜେତିଙ୍ଗ୍ ଇଦ୍‍ଲେକାମ୍ ବେଡ଼ି ହେର୍କା ମାଡ଼ମାନ୍ଦାନ୍ ନାରୁଡ଼୍‍ତଡ଼୍ କାୟ୍‍ଲାନ୍‍ ସେଙ୍ଗେ ବା ଅଡ଼୍‌‍ତଡ଼୍ ନିଜେତିଙ୍କ୍ ସାମାନ୍ ମାଡ଼ାନାଦ୍ ସାହାସ୍ ମାୟାଦ୍‌ ଇଲ୍‍ଲେ । ଅଡ଼୍‌ ବେସର୍ ବକୁୱାଲଡ଼୍, ବାତେଙ୍କ୍ ଇତ୍‍କେ ଅଡ଼୍‌ ନିଜେତିଙ୍ଗ୍ ନିଜେ କଲ୍‍ସିତଡ଼୍, ନିଜେତ୍ ମାନଦଣ୍ଡତେ ନିଜେ ନିଜେତ୍ ବିଚାର୍ ମାଡ଼ିତଡ଼୍ । 
\v 13 ବାତେଙ୍କ୍ ଇତ୍‍କେ ମାୟାଦ୍‌ ଦର୍ପ ସୀମିତ । ଇଶ୍ୱର୍‌ ମା ସେଙ୍ଗେ ବେନ୍ କାମ୍‍ୱାୟେ ତିଆର୍ ମାଡ଼୍‍ତଣ୍ଡ୍, ତାନ୍ ଲୋପେନେ ମାମ୍‍ମେ ଦର୍ପ ମାଡ଼ିତାଡ଼୍ । ଆଦ୍ ପାଡ଼୍‍ୟି ୱାୟେତାଗ୍ ୱେଲୁମ୍‍ ଲେକାମ୍ ମୀଇଡ଼୍ ମାନ୍‍ତିଡ଼୍‍ । 
\v 14 ଆଦିନ୍ ସେଙ୍ଗେ ମାମ୍‍ମେ ମୁନେ କ୍ରିଷ୍ଟନ୍ ସୁସମାଚାର୍‌ ମିଇ ପାକେ ଆସ୍‍ମାନ୍ଦାନ୍ ସମୟ୍‍ତେ ବାତେବା ସୀମା ବାୟ୍‍ଦେତ୍‍ ପାଡ଼୍‍ୟି ମାଡ଼ମ୍ । 
\v 15 ଇଶ୍ୱର୍ ମାଡ଼ିମାନ୍ଦାନ୍ ମା କାମ୍‍ୱାୟେତେ ପରିସର ବାଇଦେ ବାଗାତଡ଼୍ ପାଡ଼ିୟିଦେ ସୁଯଗ୍ ଆସ୍ ଦର୍ପ ମାଡ଼ମ୍ । ମାମ୍‍ମେ ଆଶେ ମାଡ଼ୁତମ୍ ଯେ, ମିଡ଼୍ ବିଶ୍ୱାସ୍‍ତେ ଉନ୍ନତି ମାଡ଼ାନ୍ ସାଙ୍ଗେ ସାଙ୍ଗେ ମିୟାଗାଙ୍କ୍ ମିକା ମାୟାଦ୍‌ ପାଡ଼୍‍ୟି ୱାୟେ ମେଣ୍ଡେ ପ୍ରସାରିତ୍ ଆଦ୍‍ତେ । ବାତେଙ୍କ୍ ଇତ୍‍କେ ଇଦ୍ ଇଶ୍ୱର୍ ମାଡ଼ିମାନ୍ଦାନ୍ ସୀମାତ୍‍ ବାୟିଦେ ଆଦାନାଦ୍ ଆୟ୍‍ୟ । 
\v 16 ଆଲେକେ, ବାଗାତଡ଼୍ ପାଡ଼୍‍ୟି ୱାୟେତାଗ୍ ଆସ୍‍ମାନ୍ଦାନ୍ ପାଡ଼୍‍ୟି ସେଙ୍ଗେ ଗର୍ବ ମାଡ଼କଟ୍ ମିୟାଦ୍ ସୀମା ବାଇଦେ ମେଣ୍ଡନ୍ ଦେଶ୍‍ତାଗ୍ ମିକା ମାମ୍‍ମେ ସୁସମାଚାର୍ ପ୍ରଚାର୍ ମାଡ଼େ ପାର୍‍ଦ୍‍ତାଡ଼୍ ।
\p
\v 17 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ବେନ ଗାଇ ମାଡ଼ାନଙ୍କ୍ ଇଚ୍ଛା ମାଡ଼ିତନ୍, ଅଣ୍ଡ୍‌ ପ୍ରବୁନ୍ ପାଡ଼୍‍ୟି ସେଙ୍ଗେ ଗର୍ବ ମାଡ଼ିଣ୍ଡ୍ ।” 
\v 18 ନିଜେତ୍ ପ୍ରସଂଶା ତଡ଼୍ ବେନ ସ୍ୱୀକୃତି ଦର୍ସିକି ଆୟ୍‍ୟଣ୍ଡ୍, ବେନ ପ୍ରବୁନ୍ କଣ୍ଡେତେ ଲେକାମ୍, ଅଣ୍ଡେକେ ମାତର୍‍ ତାନ୍ ଗ୍ରହନ୍‍ଯୋଗ୍ୟ ।
\c 11
\s ପାଉଲ୍ ନୁ ବଣ୍ଡ ଶିଷ୍ୟ
\p
\v 1 ନାନ୍ ଇଚ୍ଛା ମାଡ଼ୁତାନ୍, ବାତେବା ବିଷୟ୍‍ତେ ସୁଦୁର୍‌ ମଣ୍ଡି ଆତ୍‍କେ ମିକା ମିଇଡ଼୍ ନାକିଂଙ୍କ୍ ସାରେ ମାଡ଼ିତିଡ଼୍ । 
\v 2 ମିଇ ମୁନ୍‍ନେ ୱେରଡ଼୍ ଐଶ୍ୱରିକ୍ ଇର୍ଷାତେ ନା ହୃଦୟ୍‍ତାଗ୍ ମିନ୍ଦେ । ବାତେଙ୍କ୍‍ଇତ୍‍କେ ମିଇଡ଼୍ ପବିତ୍ର କୁମାରି ପିକ୍‍ତେ ଲେକାମ୍ । ୱେରଡ଼୍ ମାତର୍ କ୍ରିଷ୍ଟନ୍‍ ତଡ଼୍ ମିୟାଦ୍ କାଲ୍‍ପିଦାନ୍‍ ସେଙ୍ଗେ ନାନ୍‍ନେ ପ୍ରତିଜ୍ଞା ମାଡ଼୍‍ତାନ୍ । 
\v 3 ନାକିଂଙ୍କ୍ ୱେର୍‌ ୱେସୁତ୍, ତାଡ଼ାମ୍‍ତେ ଚାଲାକ୍ ତଡ଼୍ ପ୍ରତାରିତ ଆଦ୍‍ଦାନ୍ ଲେକାମ୍ ମିଡ଼୍ ବେସୁଙ୍କ୍‍ କ୍ରିଷ୍ଟନ୍‍ ସେଙ୍ଗେ ମିୟାଦ୍ ସାରେ ସରଲ୍‍ ବିଶ୍ୱାସ୍‍ତେ ମାର୍‌ଙ୍ଗି ଆଦ୍‍ତିଡ଼୍ । 
\v 4 ବାତେଙ୍କ୍‍ଇତ୍କେ ବେନ ଯଦି ୱାସ୍ ମାମ୍‍ମେ ପ୍ରଚାର୍ ମାଡ଼ିମାନ୍ଦାନ୍ ଜିସୁଙ୍କ୍ ୱିଡ଼୍‍ସି ମେଣ୍ଡେ ବେନନ୍ ଜିସୁନ୍ ଗଟ୍ ପ୍ରଚାର୍ ମାଡ଼ିତନ୍ ବା ମିଇଡ଼୍ ଦର୍‍ସ୍‍କି ମାନ୍ଦାନ୍ ପବିତ୍ରଆତ୍ମା ୱିଡ଼୍‍ସି ମେଣ୍ଡନ୍ ବେନ୍ ଆତ୍ମାତେ ଗଟି କେତିତଡ଼୍‍ ବା ମିଡ଼୍ ଗ୍ରହନ୍ ମାଡ଼ିମାନ୍ଦାନ୍ ସୁସମାଚାର୍ ୱିଡ଼୍‍ସି ବେନେବା ସୁସମାଚାର୍‌ ପ୍ରଚାର୍ ମାଡ଼ିତଡ଼୍, ମିଡ଼୍ ଆଦ୍ ଗ୍ରହନ୍ ମାଡ଼ିମାନୁଟ୍ ।
\p
\v 5 ମିୟାଦ୍ ଆଦ୍ ବିଶିଷ୍ଟ ପ୍ରେରିତ ଶିଷ୍ୟଡ଼ାଗାଙ୍କ୍ ନାନ୍‍ନେ ବେନ୍ ବା ଗୁଣତେ ନିକୃଷ୍ଟ ଇଞ୍ଜ ଆଲ୍‍ସନ୍ । 
\v 6 ନାନ୍ ଅଡ଼୍‌‍ଲେକାମ୍ ବାକ୍‍ପଟୁ ଆଦେ ପାର୍ୱନ୍, ବାତେଙ୍କ୍ ଇତ୍‍କେ ନାନ୍ ବୁଦ୍‍ତେ ନିସ୍‌ଟୁର୍‌ ଆୟନ୍ । ମିକିଂଙ୍କ୍ ଇଦ୍ ଗଟ୍ ମାମ୍‍ମେ ସାରେଦାମ୍ ନୁ ସାରେ ସମୟ୍‍ତେ କେସ ୱାଦୁତମ୍‍ ।
\p
\v 7 ଇଶ୍ୱର୍‌ତେ ସୁସମାଚାର୍‌ ପ୍ରଚାର୍ ମାଡ଼ାନ୍ ୱେଲେ ନାନ୍ ମିଇୟାଗାଙ୍କ୍ ଇଦିନ୍ ମୁଲ୍ୟ ଦାବୀ ମାଡ଼ନ୍ । ମୀଇୟାଦ୍ ଉନ୍ନତି ସେଙ୍ଗେ ନାନ୍ ନିଜେତିଙ୍ଗ୍ ଅବନତ୍ ମାଡ଼୍‍ତାନ୍ । ଇଦ୍ ବାତେଏ ନାୟାଦ୍ ପାପ୍‌ ? 
\v 8 ମିଇୟାଗେ ପାଡ଼୍‍ୟି ମାଡ଼ାନ୍ ୱେଲେ ନାନ୍ ବାଗାତ୍ ମଣ୍ଡଲିନାଗାଙ୍କ୍ ଆର୍ତିକ ସାହାଯ୍ୟ ପାଏମ୍ ଆତ୍‍ତାନ୍ । କେତାଙ୍କ୍ ଆତ୍‍କେ, ମିୟାଦ୍ ଉପକାର୍ ସେଙ୍ଗେ ନାନ୍ ଅଡ଼୍‌‍କିଂଙ୍କ୍ ଲୁଣ୍ଠନ୍ ମାଡ଼୍‍ତାନ୍ । 
\v 9 \x + \xo ୧୧:୯ \xo*\xt ଫିଲିପିୟ ୪:୧୫-୧୮.\xt*\x*ମୀଇତଡ଼୍ ମାନ୍ଦାନ୍ ୱେଲେ ନାୟାଦ୍ ସାରେ ଅବାବ୍ ସେଙ୍ଗେ ନାନ୍ ବେନଙ୍କ୍ ବାରଗ୍ରସ୍ତ ମାଡ଼ନ୍ । ବାତେଙ୍କ୍‍ଇତ୍କେ ମାସିଦୋନିଆତାଗାଙ୍କ୍ ୱାସ୍‍ମାନ୍ଦାନ୍ ଦାଦାନଡ଼୍ ନାୟାଦ୍ ସାରେ ଅବାବ୍ ମେଣ୍ଟାଇ ଇସ୍‍ମାତ୍‍ତଡ଼୍ । ଅତିତି ଲେକାମ୍ ବବିଷ୍ୟତ୍‍ତେ ମିକା ନାନ୍ ବେସୁଙ୍କ୍‌ବା ମିକିଂଙ୍କ୍ ବାରଗ୍ରସ୍ତ ମାଡ଼ନ୍ । 
\v 10 ନା ହୃଦୟ୍‍ତାଗ୍ ମାନ୍ଦାନ୍ କ୍ରିଷ୍ଟନାଦ୍ ସତ୍ୟତେ ନର୍‍ସ୍‍ ମିକା ନାନ୍ ପ୍ରତିଜ୍ଞା ମାଡ଼ି କେତୁତାନ୍ ଯେ, ଆକାୟା ଦେଶ୍‍ତେ ବେନେବା ନାର୍‍ଦାଗ୍ ନାୟାଦ୍ ଇଦ୍ ଗର୍ବତିଙ୍କ୍ ବେନ କଣ୍ଡନ୍‌ ମାଡ଼େ ପାର୍‍ୱଡ଼୍ । 
\v 11 ନାନ୍ ବାତେଙ୍କ୍ ଇଦ୍‍ଲେକାମ୍ କେତୁତାନ୍ ? ନାନ୍ ବାତେଏ ମିଇକିଙ୍କ୍ ପ୍ରେମ ମାଡ଼ନ୍ ? ଇଶ୍ୱର୍ ପୁତ୍‍ତନ୍, ମିଇକିଙ୍କ୍ ନାନ୍ ବେସର୍ ପ୍ରେମ ମାଡ଼ୁତାନ୍ ।
\p
\v 12 ବାତେଙ୍କ୍ ଇତ୍‍କେ ଇଞ୍ଜେ ନାନ୍ ବାତେ ମାଡ଼ୁତାନ୍, ଆଦ୍ ମାଡ଼ ମାନ୍‍ତାନ୍ । ଆଲେକେ, ମାନ୍‍ ଲେକାମ୍ ପାଡ଼୍‍ୟି ମାଡ଼ୁତଡ଼୍ ଇଞ୍ଜ ବେନଡ଼୍ ଗର୍ବ ମାଡ଼ିତଡ଼୍, ଅଡ଼୍‌ ମେଣ୍ଡେ ଆଦ୍ ମେଣ୍ଡେ ମାଡ଼େପାର୍‍ୱଡ଼୍ । 
\v 13 ଅଡ଼୍‌ ମୁନେଙ୍କ୍ କଞ୍ଜ୍ ଶିଷ୍ୟ ଆୟ୍‍ୟଡ଼୍, ଅଡ଼୍‌ ସାରେତଡ଼୍ ଟକୁୱାନଡ଼୍‌ । ଅଡ଼୍‌ ନିଜେତ୍ ପାଡ଼୍‍ୟି ବିଷୟ୍‍ତେ ମିଚ୍‍ କେତିତଡ଼୍‍ ନୁ କ୍ରିଷ୍ଟଙ୍କ୍ ପ୍ରେରିତ୍ ଶିଷ୍ୟ ଲେକାମ୍ ଉଡ଼ାନ୍ ସେଙ୍ଗେ ସଦ୍ମଦାନ୍ କେର୍‍ତଡ଼୍ । 
\v 14 ଇଗେ ବାକ୍‍ୱା ଆଦାନାଦ୍ ବାତେଏ ଆୟ୍‍ୟ, ବାତେଙ୍କ୍ ଇତ୍‍କେ ଶୟ୍‍ତାନ୍‍ ମିକା ୱେସ୍‍ତେ ଜତିର୍ମୟ ସ୍ୱର୍ଗଦୂତନ୍ ଲେକାମ୍ ତନ୍ଦାନ୍ ସେଙ୍ଗେ ସଦ୍ମବେଶ ଲେକାମ୍ ୱାଦ୍‍ତା । 
\v 15 ଆଦିଙ୍କ୍ ତାନ୍ ପେର୍‍କେ ଆଦାନଡ଼୍ ଦାର୍ମିକ୍ ସେବାନଡ଼୍ ସଦ୍ମବେଶ ୱାତ୍‍କେ, ଆଶ୍ୱର୍ଯ୍ୟ ଆଦାନାଦ୍ ବାତେଏ ଆୟ୍‍ୟ, ବାତେଙ୍କ୍ ଇତ୍‍କେ ପେର୍‍କେ କାମ୍‍ତେ ଯୋଗ୍ୟତେ ଦଣ୍ଡ୍ ଅଡ଼୍‌ ଆଦ୍‍ତଡ଼୍ ।
\s ପ୍ରେରିତ୍ ଶିଷ୍ୟଲେକାମ୍ ପାଉଲ୍‍ତେ କଷ୍ଟ
\p
\v 16 ନାନ୍ ମେଣ୍ଡନ୍‍ନ୍ଦାମ୍ କେତୁତାନ୍, ବେନ ବେଲାନ୍ ନାକିଂଙ୍କ୍ ମଣ୍ଡି ଇଞ୍ଜ ହେର୍କା ମାଡ଼ଣ୍ଡ୍ । ଯଦି ଆଦ୍‍ଲେକାମ୍ ଏର୍କା ମାଡ଼ାଟ୍, ଆଲେକେ ନାକିଂଙ୍କ୍ ମଣ୍ଡି ଲେକାମ୍ ଗ୍ରହନ୍‍ ମାଡ଼ାଟ୍, ଆଲେକେ ନାନ୍ ଦର୍ପ ମାଡ଼ାନଙ୍କ୍ ସାମାନ୍ୟ ସୁଯୋଗ୍ ପାଏମ୍ ଆଦ୍‍ତନ୍ । 
\v 17 ନିଜାମ୍ ଇଞ୍ଜେ ନାନ୍ ବାତ୍‍କେତୁତାନ୍, ଆଦିନ୍ ସେଙ୍ଗେ ପ୍ରବୁ ନାକିଂଙ୍କ୍ ଗଟ୍ ଇୱଣ୍ଡ୍ । ବାତେଙ୍କ୍‍ଇତ୍କେ ଗର୍ବ ମାଡ଼ାନ୍ ବିଷୟ୍‍ତେ ନାନ୍ ପ୍ରକୃତ୍‍ତେ ମୁର୍କ ନାରିନ୍‍ ଲେକାମ୍ ଗଟି କେତୁତାନ୍ । 
\v 18 ବାତେଙ୍କ୍ ଇତ୍‍କେ ଜାଗତିକ୍ ବିଷୟ୍‍ତେ ନାର୍‍ଗେ ବେଲାନ୍ ଗର୍ବ ମାଡ଼ିତଡ଼୍, ନାନ୍ ମିକା ଆଦେଲେକାମ୍ ମାଡ଼େ ପାର୍‍ଦ୍‍ତାନ୍ । 
\v 19 ମୀଇଡ଼୍ ଜ୍ଞାନି ଆସ୍ ମିକା ୱେଡ଼୍‍କେତେ ମୁର୍କନଡ଼କ୍‍ ସାରେ ମାଡ଼ୁତିଡ଼୍ । 
\v 20 ବେନ୍ ମିଇ ପରୁ ଦାସ ଲେକାମ୍ ପ୍ରବୁତ୍ୱ ବିସ୍ତାର୍‍ ମାଡ଼୍‍କେ, ମୀଇୟାଦ୍ ସାରେପାକ୍ ଆଦ୍‍ପ୍ତା ମାଡ଼୍‍କେ, ମିକିଂଙ୍କ୍ ଉଡ଼ୀଇଦାଗ୍ ୱାଟ୍‍କେ, ମିକିଂଙ୍କ୍ ଗୃଣାମାଡ଼୍‍କେ, ଇଦ୍‍ଲେକାମ୍ କି ମିଇ ବୁକ୍‍ତାଗ୍ ଚାପୁଡ଼ା ରେହେକେ ମିକା ମିଡ଼୍ ଅଂକିଙ୍କ୍‌ ବର୍‍ଦାସ୍ ମାଡ଼ିତିଡ଼୍ । 
\v 21 ନାନ୍ ସିଗ୍‍ତଡ଼୍ ସ୍ୱୀକାର୍ ମାଡ଼୍‍ତାନ୍ ଯେ, ଇଦ୍‍ସାରେ ବିଷୟ୍‍ତେ ନାନ୍ ଅଦିକ୍‌ ଦୁର୍ବଲ୍‍ । ବାତେଙ୍କ୍ ଇତ୍‍କେ ମେଣ୍ଡେ ବେନ୍ ବିଷୟ୍‍ତେ ବେନ ଯଦି ଦର୍ପ ମାଡ଼ାଙ୍କ୍ ଶକ୍ତି ମାଡ଼ିତନ୍, ଆଲେକେ ମଣ୍ଡିନ୍‍ ଲେକାମ୍ ନାନ୍ କେତୁତାନ୍ ନାୟାଦ୍ ଆଦ୍‍ଲେକାମ୍ ଶକ୍ତିମିନ୍ଦେ । 
\v 22 ଅଡ଼୍‌ ବାତେଏ ଏବ୍ରିୟ ? ନାନ୍ ମିକା ଏବ୍ରିୟ । ଅଡ଼୍‌ ବାତେଏ ଇସ୍ରାଏଲିୟ ? ନାନ୍ ମିକା ଇସ୍ରାଏଲିୟ । ଅଡ଼୍‌ ବାତେଏ ଅବ୍ରାହାମ୍‍ତେ ବଂଶତଡ଼୍ ? ନାନ୍ ମିକା ଅବ୍ରାହାମ୍‍ତେ ବଂଶତନ୍ । 
\v 23 \x + \xo ୧୧:୨3 \xo*\xt ପ୍ରେରିତ ୧୬:୨3.\xt*\x*ଅଡ଼୍‌ ବାତେଏ କ୍ରିଷ୍ଟନ୍‍ ସେବାତଡ଼୍ ? ନାନ୍ ବାୟାନ୍ ଲେକାମ୍ କେତୁତାନ୍, ନାନ୍ ଅଡ଼୍‌‍ଆଗାଙ୍କ୍ ଲେକେତ୍ ଦାସ । ନାନ୍ ଅଡ଼୍‌‍ଆଗାଙ୍କ୍ ଅଦିକ୍‌ କଷ୍ଟ ମାଡ଼୍‍ତାନ୍, ଅଦିକ୍‌ ଜେଲ୍‍ଦାଗ୍ ମାତ୍‍ତାନ୍ ନୁ ବେତଦେବେ ତିତ୍‍ତାନ୍ ନୁ ନାର୍ଗେଦାମ୍ ଡଲାନ୍ ଲେକାମ୍ ଆସ୍‍ମାତାନ୍ । 
\v 24 ଏଇଙ୍ଗ୍ ଦାମ୍ ନାନ୍ ଯିହୁଦିଡ଼ାଗାଙ୍କ୍ ତିରିଶ୍‍ ନଅଟାନ୍ ବେତଦେବ୍ ତିତ୍‍ତାନ୍ । 
\v 25 \x + \xo ୧୧:୨୫ \xo*\xt ପ୍ରେରିତ ୧୬:୨୨; \xt*\xt ପ୍ରେରିତ ୧୪:୧୯.\xt*\x*ରୋମିୟ ନାରୁଡ଼ାଗାଙ୍କ୍ ମୁଣ୍ଡ୍‍ଦାମ୍ ଚାବୁକ୍‍ତେ ଦେବ୍‍ତିତ୍‍ତାନ୍ । ଅଣ୍ଡ୍‌ ଦାମ୍ କାଲ୍‍କିନ୍ ତୋଡ଼୍‍ ଦେବା ତିତ୍‍ତାନ୍ । ମୁଣ୍ଡ୍ ଦାମ୍ ଜାହାଜ୍ ଦୁର୍ଗଟନାତେ ମୁନେ ଆତ୍‍ତାନ୍ ନୁ ଅଣ୍ଡ୍‌ ଦାମ୍ ସମୁଦ୍ର ଏର୍‍ଦାଗ୍ ନାର୍‍କେତ୍ ପାୟାଲ୍ ବା ଚବିଶ୍‍ ଗାଣ୍ଟା କାଟେମ୍ ଆତ୍‍ତାନ୍ । 
\v 26 \x + \xo ୧୧:୨୬ \xo*\xt ପ୍ରେରିତ ୯:୨3; \xt*\xt ପ୍ରେରିତ ୧୪:୫.\xt*\x*ନାର୍‍ଗେ ଦାମ୍ ଆଦାନ୍ ୱେଲେ ସମୁଦ୍ର ନାଡ଼୍‍ମେ, ଦସ୍ୟୁନଡ଼୍ କାଇଦେ, ସ୍ୱଜାତି ଇହୁଦି ନୁ ବିଜାତିନଡ଼୍ କାଇଦେ, ନାର୍‍ଦାଗ୍ ନୁ ପ୍ରାନ୍ତର୍‍ତାଗ୍, ସମୁଦ୍ରତାଗ୍‍, ପଟ୍‍କାର୍ ବନ୍ଦୁନଡ଼୍‍ ତ ବିପଦ୍‍ତାଗ୍‍ ମୁନେ ଆତ୍‍ତାନ୍ । 
\v 27 ଗାଟି ତିପାଲ୍ ଆତ୍‍ତାନ୍ ନୁ ଦୁଃକାମ୍ କଷ୍ଟ ଆତ୍‍ତାନ୍, ଉସ୍କାଡ଼୍‍ତେ ନୁ କାର୍‍ୱିନ୍ ଏର୍‍ ଉନ୍‍ୱେ ନାର୍‍ଗେ ଦିନା କଟେମ୍‍ ଆତ୍‍ତାନ୍, ଲେକେତ୍‍ କାଦି, ଚକା ନୁ ମାନ୍ଦାନ୍ ପଡ଼ିୟେ ଅବାବ୍‍ତେ ନାର୍‍ଗେ କଷ୍ଟ ଆତ୍‍ତାନ୍ । 
\v 28 ଆଦେଲେକାମ୍ ସାରେ ମଣ୍ଡଲି ସେଙ୍ଗେ ନ୍ନାୟାଦ୍ ଦାୟିତ୍ୱ ସାରେଦିନ୍ ବହନ୍ ମାଡ଼ି ଚାଲେମ୍ ଆତ୍‍ତେ । 
\v 29 ବେନ ଯଦି ଦୁର୍ବଲ୍ ଆସ୍‍ମାନ୍‍ନ୍ତନ୍, ନାନ୍ ମିକା ଅନ୍‌‍ତଡ଼୍ ଦୁର୍ବଲ୍‍ ଲେକାମ୍ ଏର୍କା ମାଡ଼ିତାନ୍ । ବେନ ପାପ୍ ମାଡ଼୍‍କେ, ନାନ୍ ଜିୱେତାଗ୍ ଦୁଃକାମ୍ ଏର୍କା ମାଡ଼ିତାନ୍ ।
\p
\v 30 ଯଦି ଦର୍ପ ମାଡ଼ାଙ୍କ୍ ଆତ୍‍କେ, ଆଲେକେ ନା ଇୱୁସାରେ ଦୁର୍ବଲ୍‍ତେ ସେଙ୍ଗେ ନାକିଂଙ୍କ୍ ଦର୍ପ ମାଡ଼ାଙ୍କ୍ ଆଦ୍‍ତେ । 
\v 31 ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଇଶ୍ୱର୍ ଯୁଗ୍‌ଯୁଗ୍‌ ଦନ୍ୟ ଆଇନା । ଅଣ୍ଡ୍‌ ପୁତ୍‍ତନ୍ ଯେ, ନାନ୍ ମିଚ୍‌ କେଲନ୍ । 
\v 32 \x + \xo ୧୧:3୨ \xo*\xt ପ୍ରେରିତ ୯:୨3-୨୫.\xt*\x*ନାନ୍ ଦାମାସ୍‍କସ୍‍ ତାଗେ ମାନ୍ଦାନ୍ ୱେଲେ ରାଜା ଆରେଟସ୍‍ତେ ଗଟ୍‍ତେ ଶାସନ୍‍କର୍ତ୍ତାଲ୍ ନାକିଂଙ୍କ୍ ଗିରାପ୍ ମାଡ଼ାନ୍ ସେଙ୍ଗେ ନଗର୍‍ତେ ସାରେପାକେ କେପାନଡ଼୍‍କିଙ୍କ୍ ଏଞ୍ଚି ମାତ୍‍ତନ୍ । 
\v 33 ବାତେଙ୍କ୍ ଇତ୍କେ ନାକିଂଙ୍କ୍ ଜୁଡ଼ି ସାହାଯ୍ୟତେ ନଗର୍‍ତେ ନେଟେତ୍‌ ଜର୍‍କା ବାଇଦେ ୱେହେସ୍‍ ମାତ୍‍ତଡ଼୍ । ଇଦ୍ ଲେକାମ୍‍ତେ ନାନ୍ ଆଦ୍ ଶାସନ୍‍କର୍ତ୍ତାନ୍ କାଇଦାଗାଙ୍କ୍ ରକ୍ଷା ପାଏମ୍ ଆତ୍‍ତାନ୍ । \fig ଟାୱୁନ୍‌ତେ ଗେଟ୍‍ ନୁ ନେଟେ|alt="Entrance to the city gate and wall" src="hk00238c.tif" size="col" copy="Horace Knowles ©" ref="୧୧:୩୨"\fig*
\c 12
\s ପାଉଲ୍‍ତାଦ୍ ଦର୍ଶନ୍
\p
\v 1 ବାତେଏ ଲାବ୍ ଆୟକ୍‍ ମିକା ନାକିଂଙ୍କ୍ ନିଜାମ୍ ଦର୍ପ ମାଡ଼ାଙ୍କ୍ ଆଦ୍‍ତେ । ବାତେଙ୍କ୍ ଇତ୍‍କେ ପ୍ରବୁ ନାକିଂଙ୍କ୍ ବେନ୍‍ସାରେ ବିଦ୍ୟା ଇତ୍‍ତନ୍ ନୁ ପ୍ରତ୍ୟାଦେଶ୍‍ ଇତ୍‍ତନ୍, ହାଉସାରେ ଇଞ୍ଜେ ନାନ୍ ଲେକିତାନ୍ । 
\v 2 କ୍ରିଷ୍ଟନ୍‍ ୱେରଣ୍ଡ୍ ନାରୁଡ଼୍ ଚଉଦ ୱାଡ଼୍‍ଷା ମୁନେଙ୍କ୍ ତୃତୀୟସ୍ୱର୍ଗ ଯାକ ଆଞ୍ଜ୍‍ମାତ୍‍ତନ୍ ଅଣ୍ଡ୍‌ ମେନ୍ଦୁଲ୍‍ତେ ଆଞ୍ଜମାତ୍‍ତଣ୍ଡ୍ ବାତେଙ୍କ୍ ଇତ୍‍କେ ଦର୍ଶନ୍ ଉଡ଼ିମାତ୍‍ତଣ୍ଡ୍, ନାନ୍ ପୁନନ୍, ଆଦ୍ ମାତର୍ ଇଶ୍ୱର୍ ପୁତ୍‍ତନ୍ । 
\v 3 ହଁ ନାନ୍ ପୁତ୍‍ତାନ୍, ଅଣ୍ଡ୍‌ ଅଂକିଙ୍କ୍‌ ସ୍ୱର୍ଗତାଗେ ଆସ୍‍ମାତ୍‍ତନ୍ ଇଦ୍ ମୁନେଙ୍କ୍ ପୁତ୍‍ତାନ୍ ଅଣ୍ଡ୍‌ ଗଟେମ୍ ଆସ୍‍ମାତ୍‍ତେ ଆଦ୍ ଦର୍ଶନ୍ ଉଡ଼ିମାତ୍‍ତନ୍, ନାନ୍ ପୁନନ୍, ମାତର୍ ଇଶ୍ୱର୍ ପୁତ୍‍ତନ୍ । 
\v 4 ଆଗେ ଅଣ୍ଡ୍‌ ଗଟି କେତ୍‍ତେ ପାର୍‍ୱାଦ୍ ନୁ ଲେଙ୍ଗ୍ ମାଡ଼୍‍ୱେ ପାର୍‍ୱାଦ୍ ଲେକାମ୍ କେଞ୍ଜାଙ୍କ୍‍ ପାର୍‍ତନ୍ । 
\v 5 ଇ ନାରିନ୍ ସେଙ୍ଗେ ନାନ୍ ଗର୍ବ ମାଡ଼ିତାନ୍ । ବାତେଙ୍କ୍ ଇତ୍‍କେ ନିଜେତ୍ ଦୁର୍ବଲ୍‍ତେ ସେଙ୍ଗେ ମେଣ୍ଡେ ବାତେଏ ବିଷୟ୍‍ତେ ନାନ୍ ଗର୍ବ ମାଡ଼ନ୍ । 
\v 6 ଗର୍ବ ମାଡ଼ାନାଦ୍ ନା ପାକେ ମୁର୍କ ଆୟନ୍‍ଣ୍ଡ୍‍, ବାତେଙ୍କ୍ ଇତ୍‍କେ ନାନ୍ ସତ୍‍ଗଟ୍ କେତିତାନ୍ । ବାତେଙ୍କ୍ ଇତ୍‍କେ ନାନ୍ ଗର୍ବ ମାଡ଼ନ୍, ବାତେଙ୍କ୍‍ଇତ୍କେ ନାନ୍ ଆଲ୍‍ସୁତାନ୍, ନାରୁଡ଼୍ ନାକିଂଙ୍କ୍ ବେଲାନ୍ ପାଡ଼୍‍ୟି ମାଡ଼ାନାଦ୍ ଉଡ଼ିତଡ଼୍ ବା ନାୟାଗ୍ କଞ୍ଜ୍ ବେଲାନ୍ ଗଟ୍ କେଞ୍ଜିତଡ଼୍, ଆଗେଙ୍କ୍ ନାକିଂଙ୍କ୍ ବେଡ଼୍‍ୟନ୍ ଇଞ୍ଜ ଏର୍କା ମାଡ଼୍‍ମାକିଡ଼୍‍ ।
\p
\v 7 ଇଦ୍ ବାଗାତ୍ ମାନ୍ଦାନ୍ ଦେଶ୍‍କିନାଗ୍ ଲାବ୍ ମାଡ଼ି ନାନ୍ ବେଲାନ୍ ଆଂକାର୍ ଆଦାଙ୍କ୍‍ ଆୟ୍‍ୟ, ଆଦିନ୍ ସେଙ୍ଗେ ନା ମେନ୍ଦୁଲ୍‍ତାଗ୍ ୱେରଡ଼୍ ଯନ୍ତ୍ରନାଲେକାତ୍ ବ୍ୟାଦି ଇତ୍‍ତଡ଼୍, ଇଦ୍ ନାକିଂଙ୍କ୍ ଆଶେ ଆୟ୍‍ୱାଙ୍କ୍ ଶୟତାନ୍‍ତେ ଦୂତ୍‍ତିଙ୍କ୍ ରତ୍‍ତତେ । 
\v 8 ଆଦିଙ୍କ୍ ନାନ୍ ଅନାଗାଙ୍କ୍ ଯେକେ ଆଦାନ୍ ସେଙ୍ଗେ ନାନ୍‍ନେ ପ୍ରବୁନାଗେ ଆଦ୍ ବିଷୟ୍‍ତେ ମୁଣ୍ଡ୍‍ଦାମ୍ ପ୍ରାର୍ତନା ମାଡ଼ିତାନ୍, 
\v 9 ବାତେଙ୍କ୍ ଇତ୍‍କେ ଅଣ୍ଡ୍‌ ନାକିଂଙ୍କ୍ କେତ୍‍କେ, “ନାୟାଦ୍ ଅନୁଗ୍ରହ ମିଇ ସେଙ୍ଗେ ଆଦ୍‍ତେ, ବାତ୍‍ତିଙ୍କ୍‍ଇତ୍କେ ମିୟାଦ୍ ଦୁର୍ବଲତାତେ ମାୟାଦ୍‌ ଶକ୍ତି ସିଦ୍ଦ ଆଦ୍‍ତେ ।” ଆଦିଙ୍କ୍ କ୍ରିଷ୍ଟନ୍ ଶକ୍ତି ନାୟାଗେ ଅଦିଷ୍ଟାନ୍ ମାଡ଼ାନ୍ ସେଙ୍ଗେ ନାନ୍ ନାୟାଦ୍ ଦୁର୍ବଲ୍‍ତାଦ୍ ସେଙ୍ଗେ ଅଦିକ୍‌ ଗର୍ବ ମାଡ଼ିତାନ୍ ନୁ ୱେଡ଼େକେ ମାଡ଼ିତାନ୍ । 
\v 10 କ୍ରିଷ୍ଟନ୍‍ ସେଙ୍ଗେ ସାରେଲେକାମ୍ ଦୁର୍ବଲ୍‍ତେ, ଅପ୍‍ମାନ୍, କଷ୍ଟ, ଗାଟିତିପାଲ୍ ନୁ ଆପଦ୍ ବିପଦ୍ ନାନ୍ ସୁକାମ୍‍ତେ ମାନ୍‍ତାନ୍, ବାତେଙ୍କ୍‍ଇତ୍କେ ବେସୁଙ୍କ୍‍ ନାନ୍ ଦୁର୍ବଲ୍‍, ଆସୁଙ୍କ୍ ନାନ୍‍ନେ ଶକ୍ତିନଡ଼୍ ।
\s କରିନ୍ତିତେ ନାରୁଡ଼୍ ସେଙ୍ଗେ ପାଉଲ୍‍ତେ ଏର୍କା
\p
\v 11 ନାନ୍‍ନେ ମଣ୍ଡିନ୍‍ ଲେକାମ୍ ଆଚରନ୍ ମାଡ଼୍‍ତାନ୍ । ଇଦ୍ ମାଡ଼ାନ୍ ସେଙ୍ଗେ ମିଡ଼୍ ନାକିଂଙ୍କ୍ ଦାନ୍ଦେ ମାଡ଼୍‍ତିଡ଼୍, ବାତେଙ୍କ୍‍ଇତ୍‍କେ ନାୟାଦ୍ ପ୍ରସଂଶା ମାଡ଼ାନାଦ୍ ମିୟାଦ୍ ନିୟମ୍ ମାତ୍‍ତେ । ନାନ୍‍ନେ ବାତେଏ ଆୟକ୍‍ ମିକା ମିୟାଦ୍ ଆଦ୍ ମାନ୍ଦାନ୍ “ପ୍ରେରିତ୍ ଶିଷ୍ୟନଡ଼ାଗାଙ୍କ୍,” ବାତେଏ ବା ଗୁନତେ ନିକୃଷ୍ଟ ଆୟ୍‍ୟ । 
\v 12 ମିୟାଗ୍‍ ମାନ୍ଦାନ୍ ଦର୍‍ଯ୍ୟତେ ନାର୍‍ଗେ ବାକ୍‍ୱା ଆଦାନ୍ ପାଡ଼୍‍ୟି ତିଆର୍ ମାଡ଼ି ନାର୍‍ଗେ ଆଦ୍‍ବୁତ୍‌ ବିଷୟ ତଡ଼୍ ନାନ୍ ଯେ ମୁନେତ୍‍କଞ୍ଜ୍ ପ୍ରେରିତ୍ ଶିଷ୍ୟ, ଇଦିନ୍ ନିଦର୍ଶନ ଇତ୍‍ତନ୍ । 
\v 13 ମାତର୍ ୱେରଡ଼୍ ବିଷୟ୍‍ତେ ବାଗାତଡ଼୍ ମଣ୍ଡଲିନାଗାଙ୍କ୍ ମିଇ ତଡ଼୍ ନାୟାଦ୍ ବ୍ୟବହାର୍ ୱେରେ ଆତ୍‍ତେ । ଯଦି ଇଦ୍ ମିଇ ସେଙ୍ଗେ ନାୟାଦ୍ ଜିୱୁତେ ବ୍ୟବହାର୍, ଆଲେକେ ଆଦିନ୍ ସେଙ୍ଗେ ନାକିଂଙ୍କ୍ ଦୟା ମାଡ଼ି କ୍ଷମା ମାଡ଼େ । ନାନ୍ ମିକିଂଙ୍କ୍ ଡାବ୍‍କ୍ ସାହାଯ୍ୟ ତାଲାକାନ୍ ସେଙ୍ଗେ ନାନ୍ ମିଇ ପରୁ ବୋଜ୍ ଇୱନ୍ ।
\p
\v 14 ତୃତିୟ ଦାମ୍ ମିଇ ପାକେ ଆଦାନ୍ ସେଙ୍ଗେ ନାନ୍‍ନେ ତିଆର୍ ଆସମିନ୍‍ନ୍ଦେନ୍‍ । ନାନ୍ ମିୟାଗାଙ୍କ୍ ବାତେବା ବିଷୟ ଦାବୀ ମାଡ଼ନ୍ । ନାନ୍ ମିକିଂଙ୍କ୍ ଇଚ୍ଛା ମାଡ଼ୁତାନ୍ । ମିୟାଦ୍ ବୁମ୍‍ନେଲ୍ ଆୟ୍‍ୟ । ବାତେଙ୍କ୍‍ଇତ୍‍କେ ୟାୟ୍‍ ବାବାନ୍ ସେଙ୍ଗେ ପିଲାପିସ୍‍କା ଗୁଡ଼୍‍ପନ୍‍, ୟାୟ୍‍ ବାବାଲ୍ ପିଲାପିସ୍‍କାନ୍ ସେଙ୍ଗେ ଗୁଡ଼୍‍ପି ମାନ୍‍ତଡ଼୍ । 
\v 15 ମିଇକିଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ନାୟାଦ୍ ସର୍ବସ୍ୱ, ଇଦ୍‍ଲେକାମ୍ କି ନିଜେତିଙ୍ଗ୍ ୱେଡ଼୍‍କେତେ ଉସ୍ୱର୍ଗ ମାଡ଼ିଇଦାନ୍ ସେଙ୍ଗେ ନାନ୍ ତିଆର୍ । ନାନ୍ ମିକିଂଙ୍କ୍ ଇସର୍ ଅଦିକ୍‌ ପ୍ରେମ ମାଡ଼ୁତାନ୍ ଇଞ୍ଜ ମିଇଡ଼୍ ବାତେଏ ନାକିଂଙ୍କ୍ ଇସର୍ ସୁଦୁଟ୍ ପ୍ରେମ ମାଡ଼ିତିଡ଼୍ ?
\p
\v 16 ନାନ୍ ମିଇ ପରୁ ମପ୍‍ ଲେକାମ୍ ଆୟନ୍ । ଇଦ୍ ଗଟ୍ ମିଡ଼୍ ନିଜାମ୍ ସ୍ୱିକାର୍ ମାଡ଼ିତିଡ଼୍ । ବାତେଙ୍କ୍ ଇତ୍‍କେ ମିୟାଗାଙ୍କ୍ ବେନ କେତ୍‍ତେ ପାର୍‍ତଡ଼୍, ନାନ୍ ଦୂର୍ତ୍ତ ଆସ୍‍ମାନ୍‍ନାଙ୍କ୍ ୱିଶାମ୍ କେସ୍ ମିକିଂଙ୍କ୍ ଉଡ଼ିଇଦାଗ୍ ୱାଟ୍‍ତାନ୍ । 
\v 17 ମିଇ ପାକେ ବେନଡ଼୍ ରତ୍‍ତାନ୍, ଅଡ଼୍‌ ତାଗାଙ୍କ୍ ବେନନ୍‍ତଡ଼୍ ନାନ୍‍ନେ ବାତେଏ ମିୟାଗାଙ୍କ୍ ବାତେଏ ସୁବିଦା ହାସଲ୍‍ ମାଡ଼୍‍ତାନ୍ ? 
\v 18 ମିଇ ପାକେ ଆଦାନ୍ ସେଙ୍ଗେ ନାନ୍ ତିତସ୍‍ତିଙ୍କ୍ ଅନୁରଦ୍‌ ମାଡ଼୍‍ତାନ୍ ନୁ ଅନ୍‌ ତଡ଼୍ ବାଗାତଡ଼୍‍କ୍ ରତ୍‍ତାନ୍ । ତିତସ୍ ମିଇୟାଗାଙ୍କ୍ ବାତେଏ ସୁବିଦା ମାଡ଼୍‍ତଣ୍ଡ୍ ଇଞ୍ଜ ବେନ କେତ୍‍ତେ ପାର୍‍ଦ୍‍ତିନ୍ ? ଅଣ୍ଡ୍‌ ନୁ ନାନ୍ ସାମାନ୍‌ କାମ୍‌ ଆସ୍ ମିଇ ତଡ଼୍ ସାୟେ ବ୍ୟବହାର୍ ମାଡ଼ମ୍ ?
\p
\v 19 ବାତେଙ୍କ୍ ଇତ୍‍କେ ମିଡ଼୍ ଆଲ୍‍ସୁତିଡ଼୍, ଇଞ୍ଜେକ୍ ଆଇନା ମାମ୍‍ମେ ମାତର୍ ନିଜେତ୍ ଆଦ୍‍ମି ମିକା ୱାତ୍‍ତମ୍‍ ନା ! ଇଶ୍ୱର୍ ମାନ୍ଦାନ୍‍ୱେଲେ କ୍ରିଷ୍ଟନ୍ ଦାସ ଲେକାମ୍ ମାମ୍‍ମେ ମିକିଂଙ୍କ୍ କେତୁତମ୍ । ପ୍ରିୟ ସାଙ୍ଗନଡ଼ି, ମାମ୍‍ମେ ବାତ୍ ମାଡ଼ୁତମ୍ ଆଦ୍ ମାତର୍ ମିୟାଦ୍ ଉପକାର୍‍ଦେ ସେଙ୍ଗେ ମାଡ଼ୁତମ୍ । 
\v 20 ବାତେଙ୍କ୍‍ଇତ୍କେ ନାୟାଦ୍ ୱେରେ ଆଦୁତ୍‍ତେ, ନାନ୍ ମି ପାକେ ଆଞ୍ଜ୍ ମିକିଂଙ୍କ୍ ବେଲାନ୍ ଉଡାଙ୍କ୍ ଇଚ୍ଛା ମାଡ଼ୁତାନ୍, ଆଦ୍ ଲେକାମ୍ ଉଡ଼ାନଙ୍କ୍ ଦର୍‍କ ନୁ ମିଇଡ଼୍ ନାକିଂଙ୍କ୍ ବେଲା ଉଡ଼ାନଙ୍କ୍ ଇଚ୍ଛା ମାଡ଼୍‍ୱିଡ଼୍, ଆଦ୍‍ଲେକାମ୍ ଆଦ୍ ଉଡ଼ାନଙ୍କ୍ ଆଦ୍‍ତେ । ଆଲେନ୍ ତ ଆଗେଆଞ୍ଜ୍ ନାନ୍ ବେସ୍‍ ବେସତାଉ ବିବାଦ୍, ଇର୍ଷା, କପାମ୍, ସ୍ୱାର୍ତପରତା, ଅପବାଦ୍‌, ଗର୍ବ, ନୁ ବିଶୃକଲା ଉଡ଼ାନଙ୍କ୍ ପାଏମ୍ ଆଦ୍‍ତାନ୍ । 
\v 21 ଇଞ୍ଜେ ମିଇ ପାକେ ଆଦାନ୍ ୱେଲେ ଆଲେନ୍ ଇଶ୍ୱର୍ ମିଇ ସାକ୍ଷାତ୍‍ତେ ନାକିଂଙ୍କ୍ ଅୟିରାଣ ମାଡ଼ିତଡ଼୍, ବେନଡ଼୍ ମୁନେଙ୍କ୍‍କଞ୍ଜ ପାପ୍ ମାଡ଼୍‍ତଡ଼୍, ବାତେଙ୍କ୍ ଇତ୍‍କେ ଅଡ଼ାଦ୍‌ ଅଶୁଚି ପାଡ଼୍‍ୟି ମାଡ଼୍‍ତାଦ୍‍, ବାଣ୍ଡା ନୁ ବ୍ରଷ୍ଟାଚାର୍ ସେଙ୍ଗେ ଅନୁତାପ୍ ଆୟ୍‍ୟଡ଼୍, ଇଦ୍‍ଲେକାମ୍ ନାର୍‍ଗେ ନାରୁଡ଼୍ ସେଙ୍ଗେ ନାକିଂଙ୍କ୍ ଦୁଃକାମ୍ ମାଡ଼ାନଙ୍କ୍ ଆଦ୍‍ତେ ।
\c 13
\s ଶେଷ ଆନୁଯୋଗ୍ ନୁ ଅବିବାଦନ୍
\p
\v 1 ଇଦିନ୍ ତଡ଼୍ କାଲ୍‍ପି ତୃତୀୟଦାମ୍ ନାନ୍ ମିଇ ପାକେ ୱାଦ୍‍ତାନ୍ । ଦର୍ମଶାସ୍ତ୍ର ଲେକାମ୍, ଇର୍‍ୱୁ ବା ମୁୱୁଡ଼୍ ସାକିଙ୍କ୍ ପ୍ରମାନ୍ ତଡ଼୍ ସାରେ ଗଟି କେତାନଙ୍କ୍‍ ଆଦ୍‍ତେ । 
\v 2 ମୁନେଙ୍କ୍ ପାପ୍ ମାଡ଼ିମାନ୍ଦାନ୍ ନାରିଡ଼୍‍କ୍ ନୁ ବାଗାତଡ଼୍‍କ୍ ନାନ୍ ରେଣ୍ଡେ ଦାମ୍ ଆଗେ ଆଞ୍ଜ୍ କେସ୍‍ମାତ୍‍ତାନ୍ ନୁ ଇଞ୍ଜେ ଯେକା ମାଞ୍ଜ୍ ମିକା କେତୁତାନ୍ ଯେ, ନାନ୍‍ନେ ଇଞ୍ଜେ ଆତ୍‍କେ, ବେନ ଦଣ୍ଡତାଗାଙ୍କ୍ ୱିଡ଼୍‍ସ୍‍ ପାର୍‍ୱଡ଼୍ । 
\v 3 କ୍ରିଷ୍ଟ ଯେ ନା ଇସ୍ ଗଟ୍ କେତୁତନ୍, ଇଦ୍ ବିଷୟ୍‍ତେ ମିଡ଼୍ ଆଲ୍‍ସମାନ୍ଦାନ୍ ସାରେ ପ୍ରମାନ୍ ଦର୍‍କିତ୍ । ନୁ ମିଇ ପାକେ ଅଣ୍ଡ୍‌ ତାନ୍ ଶକ୍ତିତେ ପରିଚୟ ଇସ୍‍ମିନ୍ଦେନ୍ । ମିଇ ସେଙ୍ଗେ ଅଣ୍ଡ୍‌ ବେସୁଙ୍କ୍‍ ବା ଦୁର୍ବଲ୍ ଆୟ୍‍ୟଣ୍ଡ୍ । 
\v 4 ଅଣ୍ଡ୍‌ ଦୁର୍ବଲ୍ ଆସ୍ କ୍ରୁଶତାଗ୍ ଡଲ୍‍କେ ମିକା ଇଶ୍ୱର୍‌ତେ ପରାକ୍ରମତେ ସେଙ୍ଗେ ଇଞ୍ଜେ ଜୀୱୁନ୍‌ ମିନ୍ଦେନ୍ । ଅନ୍‌ ତଡ଼୍ କାଇଲି ମିକା ଦୁର୍ବଲ୍‍ ଆତ୍‍ତମ୍, ବାତେଙ୍କ୍ ଇତ୍‍କେ ମିଇ ତଡ଼୍ ମାୟାଦ୍‌ ସମ୍ପର୍କତେ ଇଶ୍ୱର୍‌ତେ ପରାକ୍ରମତାଗ୍ ଅଂଶି ଆସ୍ କ୍ରିଷ୍ଟନ୍‍ତଡ଼୍ ମାମ୍‍ମେ ଜିୱୁନ୍ ମାନ୍‍ତମ୍ ।
\p
\v 5 ନିମ୍‍ ବିଶ୍ୱାସ୍‍ତେ ମିନ୍ଦେନି କି ଇଲ୍‍ଲେ, ଆତ୍ମ ପରିକ୍ଷା ମାଡ଼ି ଉଡ଼େ । ନି ହୃଦୟ୍‍ତାଗ୍ ଜିସୁ କ୍ରିଷ୍ଟ ମିନ୍ଦେନ୍, ଇଦ୍ ଗଟ୍ ବାତେଏ ପୁନ୍‍ୱିନ୍ ଯଦି ଇଲା ଆୟ୍‍ୟ, ଆଲେକେ ମିଡ଼୍ ଇଗେ ଅଣ୍ଡୟ୍‌‍ଦାମ୍ ବିପଲ୍ ଆଦ୍‍ତିଡ଼୍ ? 
\v 6 ନାନ୍ ଆଶେ ମାଡ଼ୁତାନ୍, ମିଡ଼୍ ବୁଜେମ୍ ଆଦ୍‍ତିଡ଼୍ ଯେ, ମାମ୍‍ମେ ବିପଲ୍ ଆୟମ୍ । 
\v 7 ମିଡ଼୍ ବାତେବା ଅନ୍‌ୟାୟ୍ ପାଡ଼ିୟିଦାଗ୍ ମାଇ ମାନ୍‍ମାଟ୍, ଆଦିନ୍ ସେଙ୍ଗେ ମାମ୍‍ମେ ଇଶ୍ୱର୍‌ତାଗେ ପ୍ରାତନା ମାଡ଼ୁତମ୍ । ମାମ୍‍ମେ ଯେ ଇଗେ ନାର୍ଗେ ଲାବ୍ ମାଡ଼୍‍ତମ୍, ଇଦ୍ ମାମ୍‍ମେ ଉଡ଼ାନଙ୍କ୍ ଆନମ୍, ବାତେଙ୍କ୍ ଇତ୍‍କେ ମାମ୍‍ମେ ବ୍ୟର୍ତ ଲେକାମ୍ ଆସ୍‍ମାତ୍‍କେ ମିକା ମିଡ଼୍ ବେଲାନ୍ କି ସତ୍‍କାମ୍ ମାଡ଼ିତିଡ଼୍, ଆଦିନ୍ ସେଙ୍ଗେ ପ୍ରାର୍ତନା ମାଡ଼ୁତମ୍‍ । 
\v 8 ସତ୍‍ତେ ବିରୁଦ୍ଦ୍‍ ଆଚରଣ ମାଡ଼ାନ୍ କ୍ଷମତା ମାୟାଦ୍‌ ଇଲ୍‍ଲେ, ମାମ୍‍ମେ ମାତର୍ ସତ୍‍ତେ ପାକେ ପାଡ଼୍‍ୟି ମାଡ଼୍‍ଡ଼େ ପାର୍‍ତମ୍ । 
\v 9 ମାମ୍‍ମେ ଦୁର୍ବଲ୍ ମାନ୍ଦାନ୍‍ୱେଲେ ମିଡ଼୍ ଡାଟୁମ୍‍ ମାନ୍‍ନାଙ୍କ୍ ମାମ୍‍ମେ ୱେଡ଼୍‍କ୍‍ ଆତ୍‍ତମ୍‍ । ଆଦିଙ୍କ୍ ମିୟାଦ୍ ମେନ୍ଦୁଲ୍‍ତେ ଉନ୍ନତି ସେଙ୍ଗେ ମାମ୍‍ମେ ପ୍ରାତନା ମାଡ଼ୁତମ୍ । 
\v 10 ଆଦିନ୍ ସେଙ୍ଗେ ଯେକ୍‌ ମାଞ୍ଜ୍ ନାନ୍ ମିଇ ପାକେ ଇୱୁ ଚିଟି ଲେକୁତାନ୍, ମିଇ ପାକେ ୱାଦାନ୍ ୱେଲେ ବେଲାନ୍ ଦୁଃକାମ୍‍ତେ ନାକିଂଙ୍କ୍ ଅଦିକାର୍‌ ପ୍ରୟଗୋ ମାଡ଼ାନଙ୍କ୍ ଆୟ୍‍ୟ । ବାତେଙ୍କ୍‍ଇତ୍କେ ମିକିଂଙ୍କ୍ ଉଃତାନଙ୍କ୍ ଆୟ୍‍ୟ, ମାତର୍ ତିଆର୍ ମାଡ଼ାନଙ୍କ୍ ପ୍ରବୁ ନାକିଂଙ୍କ୍ କ୍ଷମତା ଇତ୍‍ତନ୍ ।
\p
\v 11 ଦାଦାନଡ଼ି ନୁ ଏଲାସ୍କ୍‍, ନାୟାଦ୍ ଶେଷଗଟ୍ ଇଦ୍ ନିଜେତିଙ୍କ୍‍ ସଂଶୋଦନ୍ ମାଡ଼ାଟ୍, ନାୟାଦ୍ ପରାମର୍ଶ ଗ୍ରହନ୍‍ ମାଡ଼ାଟ୍, ସାରେତଡ଼୍ ୱେରଡ଼୍ ମନ୍ ଆୟ୍‍ମୁଟ୍ ନୁ ଶାନ୍ତିତେ ମାନୁଟ୍ । ପ୍ରେମ ନୁ ଶାନ୍ତିତେ ଇଶ୍ୱର୍ ମିଇ ତଡ଼୍ ମାନିଣ୍ଡ୍ ।
\p
\v 12 କ୍ରିଷ୍ଟିୟ ପବିତ୍ର ପ୍ରେମତଡ଼୍ ନିଜେ ନିଜେତିଙ୍କ୍ ନମସ୍କାର୍ ମାଡ଼ାଟ୍ । ଇଶ୍ୱର୍‌ତେ ନାରୁଡ଼୍ ମିକିଂଙ୍କ୍ ନମସ୍କାର୍ ମାଡ଼ୁତଡ଼୍ ।
\p
\v 13 ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ, ଇଶ୍ୱର୍‌ତେ ପ୍ରେମ ନୁ ପବିତ୍ରଆତ୍ମାତେ ସାହାଯ୍ୟ ମିଇ ସାରେତଡ଼୍ ତ ମାନୀ । 
\v 14 ପ୍ରବୁ ଜିସୁକ୍ରିଷ୍ଟନ୍ ଅନୁଗ୍ରହ, ଇଶ୍ୱର୍‌ତେ ପ୍ରେମ ନୁ ପବିତ୍ର ଆତ୍ମାନ୍‍ ସହଯୋଗ୍‍ ମି ସାରେ ନାରୁଡ଼୍‍ ତଡ଼୍‍ ମାନି ।