\id 1TH - Koya
\ide UTF-8
\h ୧ ଥେସଲନିୟ
\toc3 ୧ ଥେସଲନିୟ
\toc2 ୧ ଥେସଲନିୟ
\toc1 ଥେସଲନିୟ ବିଶ୍ୱାସୀଡ଼୍ ଗାର୍ରେ ପାଉଲ୍‌ତେ ପ୍ରତମ୍‌ ଚିଟି
\mt2 ଥେସଲନୀୟ ବିଶ୍ୱାସୀମାନଙ୍କ ନିକଟକୁ ପାଉଲଙ୍କ ପ୍ରଥମ ପତ୍ର
\mt1 ଥେସଲନିୟ ବିଶ୍ୱାସୀଡ଼୍ ଗାର୍ରେ ପାଉଲ୍‌ତେ ପ୍ରତମ୍‌ ଚିଟି
\imt ୧ ଥେସଲନିୟ୍ ବିଷୟ୍‍ତେ ଅଣ୍ଡୟ୍‌ ପଦ୍
\ip ପ୍ରତମ୍ ଥେସଲନିୟ ପ୍ରେରିତ୍ ପାଉଲ୍‍ତଡ଼୍ ଲେକ୍‍ତାଦ୍ ଆସ୍‍ମାତ୍‍ତେ \xt ୧–୧\xt* । ଇଦ୍ ଆସ୍‍ମାନ୍‍ତେ ପାଉଲ୍‍ତଡ଼୍ ମୁନେତ୍ ଚିଟି ଲେକ୍‍ତାଦ୍ ଆସ୍‍ମାତ୍‍ତେ ନୁ ଆଦ୍ ବାଇବଲ୍‍ତାଗ୍ ୱେରଡ଼୍ ଗଟ୍ ଆତ୍‍ତେ । ଇଦ୍ ଜିସୁ କ୍ରିଷ୍ଟନ୍ ଜନମ୍‍ତେ ଗାର୍‍ରେ ୫୧ ଏଣ୍ଡ୍‍କ୍ ପେର୍‍କେ ଲେକ୍‍ତାଦ୍ ଆସ୍‍ମିନ୍ଦେ । ପାଉଲ୍ ବେସୁଟ୍‌ ଥେସଲନିକିୟ ମଣ୍ଡଲିତିଙ୍କ୍ ଚିଟି ଲେକ୍‍ତଣ୍ଡ୍, ଆସୁଟେ ଅଣ୍ଡ୍‌ କରନ୍ତି ମଣ୍ଡଲିତାଗ୍ ମାତ୍‍ତଣ୍ଡ୍ । ବେନ୍ ମଣ୍ଡଲିକି ଅଣ୍ଡ୍‌ ଦ୍ୱିତିୟ ମିଶ୍‍ନାରି ଆଦ୍‍ଦାନ୍ ୱେଲେ ଆଦ୍ ମଣ୍ଡଲି ନିଲ୍‍ସ୍ପି ମାତ୍‍ତଣ୍ଡ୍ \xt ପ୍ରେରିତ ୧୭:୧-୧୦\xt* । ଇଦ୍ ପ୍ରେରିତ୍ ବଇତାଗ୍ କେତିତଡ଼୍‍ ଯେ, ଇଦ୍ ବେସ୍‍କ୍‍ତୁଡ଼୍‍ ଯିହୁଦୀ ନୁ ନାର୍‍ଗେ ଗ୍ରୀକ୍ ଗଟ୍‍ତେ କେସମାନ୍ଦାନ୍ ନାରୁଡ଼୍‍ତଡ଼୍ ତିୟାର୍ ଆସ୍‍ମାତ୍‍ତେ ।
\ip ପାଉଲ୍ ମଣ୍ଡଲି ନିଲ୍‍ସ୍ପ୍‍ତେ ପେର୍‍କେ ଅଣ୍ଡ୍‌ ନାର୍‍ଗେ ଦିନା ଥେସଲନିୟତାଗ୍ ମାନ୍ଦାନଙ୍କ୍ ପାର୍‍ୱଣ୍ଡ୍ । ଆଦିଙ୍କ୍ ମାଡ଼େଙ୍ଗ୍ ଆଗେ ମାନ୍ଦାନ୍ ବିଶ୍ୱାସୀଡ଼୍‍କିଙ୍କ୍ ସାହାସ୍ ଇଦାନଙ୍କ୍ ଅଣ୍ଡ୍‌ ଇଦ୍ ଚିଟି ରଅତଣ୍ଡ୍ । ୱେରଣ୍ଡ୍ କ୍ରିଷ୍ଟିୟାନ୍ ବେଲା ବାଦ୍‍କାନଙ୍କ୍ ଆଦ୍‍ତେ, ଇଦ୍ ଚିଟିତାଗ୍ ନାର୍‍ଗେ ବିଷୟ୍ ନୁ ବାତ୍‍ବାତ୍ ସାଦାରନ୍ ନିର୍ଦେଶନା ମିନ୍ଦେ । ପାଉଲ୍ ବେସ୍କିନାଗ୍ ଦ୍ୱିତୀୟଦାମ୍ ୱାଦାନ୍ ବିଷୟ୍‍ତେ ମନ୍ ଇତ୍‍ତନ୍ । ଆଦ୍‍ପାର୍‍ଦ୍‍ତେ ଥେସଲନିୟ ମଣ୍ଡଲିତେ ବିଶ୍ୱାସୀଡ଼୍ ସ୍ୱତନ୍ତ୍ର ଲେକାମ୍ ଇଦ୍ ବିଷୟ୍‍ତେ ତିଆର୍‍ତେ ମାତ୍‍ତଡ଼୍ । ପାଉଲ୍ ଦ୍ୱିତୀୟଦାମ୍ ୱାଦାନ୍ ବିଷୟ୍‍ତେ କେସ୍ ବେଲା ଇଶ୍ୱର୍‌ତିଙ୍କ୍ ସାର୍‍ଦେ ମାଡ଼ାନ୍ ଲେକାମ୍ ବାଦ୍‍କାନ୍ ସେଙ୍ଗେ ୱାଦାନ୍ ଇଦ୍‍ତଣ୍ଡ୍ । \xt ୫:୬-୮\xt*
\iot ବଇତ୍ ଲୋପେ ମାନ୍ଦାନ୍ ବିଷୟ୍
\io1 ୧. ପାଉଲ୍ ମଣ୍ଡଲିତିଙ୍କ୍ ନମସ୍କାର୍ ମାଡ଼ି ନୁ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇସ୍ ଇଦ୍ ଚିଟି ଆରାମ୍ ମାଡ଼୍‍ତଣ୍ଡ୍ । \ior ୧:୧-୧୦\ior*
\io ୨. ପେର୍‍କେ ଅଣ୍ଡ୍‌ ତିମତି ତାସ୍‍ମାନ୍ଦାନ୍ କାବୁର୍ ନୁ ଅନ୍‌ ପାଡ଼୍‍ୟି ବିଷୟ୍‍ତେ ବୁଜାମାଡ଼୍‍ତଣ୍ଡ୍ । \ior ୨; ୩\ior*
\io ୩. ପାଉଲ୍ ନିର୍ଦେସନା ଇଦ୍‍ତଣ୍ଡ୍ ଯେ, କ୍ରିଷ୍ଟିୟାନ୍ ନାରୁଡ଼୍ ଜିସୁ କ୍ରିଷ୍ଟନ୍ ଦ୍ୱିତୀୟଦାମ୍ ୱାଦାନ୍ ୱେସ୍‍ତଡ଼୍ ବେଲା ବାଦ୍‍କାନଡ଼ାଦ୍ ସାୟେ । \ior ୪:୧–୫:୧୫\ior*
\io ୪. ପାଉଲ୍ ମେଣ୍ଡଅନ୍‌‍ଦାମ୍ ମଣ୍ଡଲିତିଙ୍କ୍ ନମସ୍କାର୍ ମାଡ଼ୁତଣ୍ଡ୍ ନୁ ଅଡ଼୍‌‍କିଂଙ୍କ୍ ନିଜାମ୍ ଲେକେ ଚିଟି କାର୍‍ତାନଙ୍କ୍ କେସ୍ ତେର୍‍ସ୍ପିତଣ୍ଡ୍ । \ior ୫:୧୬-୨୮\ior*
\c 1
\p
\v 1 \x + \xo ୧:୧ \xo*\xt ପ୍ରେରିତ ୧୭:୧.\xt*\x*ନାନ୍ ପାଉଲ୍, ସିଲାନ୍ ନୁ ତୀମତିନ୍ ପାକେ ଥେସଲନିକୀ ତାଗ୍ ମାନ୍ଦାନ୍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନ୍ ବିଶ୍ୱାସୀ ମଣ୍ଡଲିତା ଇଦ୍ ଚିଟି । ବାବାଲ୍ ଇଶ୍ୱର୍ ନୁ ପ୍ରବୁ କ୍ରିଷ୍ଟନ୍ ସୁକାମ୍‍ତେ ନୁ ସାୟେ ମିଇ ପର୍‍ର ଆୟି ।
\s ଥେସଲନିୟଡ଼୍ ବିଶ୍ୱାସ୍ ସେଙ୍ଗେ ଦନ୍ୟବାଦ୍
\p
\v 2 ମାମ୍‍ମେ ସାରେଦିନା ମିଇ ସାରେତଡ଼୍ ସେଙ୍ଗେ ଇଶ୍ୱର୍‌ତିଙ୍ଗ୍ ଦନ୍ୟବାଦ୍ ଇସମାନ୍‍ତମ୍ ନୁ ମାମ୍‍ମେ ପ୍ରାର୍ତନାତାଗ୍ ମିଇ ବିଷୟ୍‍ତେ ସାରେଦାମ୍ କେସମାନ୍‍ତମ୍ । 
\v 3 ମାମ୍‍ମେ ବାବାନ୍ ଇଶ୍ୱର୍‌ତେ ପାକେ ଏର୍କା ମାଡ଼ମାନ୍‍ତମ୍, ବେଲାନ୍ ମିଡ଼୍ ନିଜେତ୍ ବିଶ୍ୱାସ୍‍ତିଙ୍କ୍ ପାଡ଼ିୟିଦାଗ୍ ମାଡ଼ୁତମ୍, ପ୍ରେମତେ ମାଡ଼ି ବେଲାନ୍ ତିପାଲ୍‍ତେ ମାଡ଼ୁତିଡ଼୍ ନୁ ମାମ୍‍ମେ ବେଲାନ୍ ଡ଼ାଟ୍‍ଟୁମ୍ । 
\v 4 ଦାଦାନଡ଼ି ନୁ ଏଲାସ୍କ୍ ! ମାମ୍‍ମେ ପୁତ୍‍ତମ୍ ଯେ, ଇଶ୍ୱର୍ ମିକିଂଙ୍କ୍ ପ୍ରେମ ମାଡ଼ୁତ୍ ନୁ ତାନ୍ ନାରୁନ୍ ଆଦାନ୍ ସେଙ୍ଗେ ମିକିଂଙ୍କ୍ ହେଞ୍ଜିମିନ୍ଦେନ୍ । 
\v 5 ମାତର୍ ବାକ୍ୟତେ ଆୟ୍‍ୟ, ପବିତ୍ରଆତ୍ମା ଲାୱୁ ତଡ଼୍, ସୁସମାଚାର୍‍ତେ ସତ୍ୟତେ ଲେକେତ୍‍ ମାଡ଼ି ମାମ୍‍ମେ ଆଦ୍ ମିଇ ପାକେ କେତୁତମ୍ । ମିଡ଼୍ ପୁତ୍‍ତିଡ଼୍, ମିଇ ତଡ଼୍ ମାନ୍ଦାନ୍ ୱେଲେ ମାମ୍‍ମେ ବେଦ୍‍ଲେକାମ୍ ଲେକେତ୍‍ ଜିୱୁନ୍‍ତେ ମାଡ଼୍‍ତମ୍; ବେଦ୍‍ଲେକାମ୍ ମିୟାଦ୍ ସାୟେ ମା ଜିୱୁନ୍‍ତେ ଆଶେ ମାତ୍‍ତେ । 
\v 6 \x + \xo ୧:୬ \xo*\xt ପ୍ରେରିତ ୧୭:୫-୯.\xt*\x*ମିଡ଼୍ ମାକିଂଙ୍କ୍ ନୁ ମାମ୍‍ମେ ପ୍ରବୁଙ୍କ୍ ପେର୍‍କେ ଆଦ୍‍ତିଡ଼୍ ନୁ ଗାଟି ତିପାଲ୍ ଆଦାନ୍ ଗାଲେ ପବିତ୍ରଆତ୍ମା ତାଗାଙ୍କ୍ ଲେକେତ୍‍ ୱେଡ଼୍‍କେତେ ଆଦ୍ ସୁସମାଚାର୍ କେତାନାଦ୍ କେଞ୍ଜ୍‍ତିଡ଼୍‍ । 
\v 7 ଇଦ୍‍ଲେକାମ୍ ମିଡ଼୍ ମାସିଦୋନିଆ ନୁ ଆକାୟା ତାଗ୍ ମାନ୍ଦେନଡ଼୍ ସାରେ ବିଶ୍ୱାସିଡ଼୍‍ ସେଙ୍ଗେ ଲେକେତ୍‍ତୋଡ଼ି ଆସ୍‍ମାତିଡ଼୍ । 
\v 8 ମିୟାଗାଙ୍କ୍ ଯେ ମାତର୍ ପ୍ରବୁନ୍ କେତ୍‍ତେ ଗଟ୍ ମାସିଦୋନିଆ ନୁ ଆକାୟାତେ ସାରେପାକେ ଆସ୍‍ମାତ୍‍ତେ, ଆଦ୍ ଆୟ୍‍ୟ, ମାତର୍ ଇଶ୍ୱର୍‌ତେ ସେଙ୍ଗେ ମିୟାଦ୍ ବିଶ୍ୱାସ୍‍ତେ ବିଷୟ ସାରେପାକେ ଇଦ୍‍ଲେକାମ୍ ଆସ୍‍ମିନ୍ଦେ, ତାନ୍ ମୁନେ ବାତ୍ କେତାନାଦ୍ ଇଲ୍‍ଲେ । 
\v 9 ମାମ୍‍ମେ ମିଇ ପାକେ ୱାଦାନ୍ ୱେଲେ ମିଡ଼୍ ବେଲାନ୍ ମାକିଂଙ୍କ୍ ସାର୍‍ଦେତେ ଆସ୍ ମାତ୍‍ତିଡ଼୍ ନୁ ସାରେ ପୁତ୍‍ଲାମ୍‍ ପୁଜେ ୱିଡ଼୍‍ସି ସତ୍ ନୁ ଜିୱେମାନ୍ଦାନ୍ ଇଶ୍ୱର୍‌ତେ ଉପବାସ୍ ମାଡ଼ାଙ୍କ୍ ମୁନେ ୱାତ୍‍ତିଡ଼୍; 
\v 10 ମେଣ୍ଡେ ବେଲାନ୍ ଇଶ୍ୱର୍‌ତେ କପାମ୍‍ତାଗାଙ୍କ୍ ମାନ୍‍ନାଅଙ୍କ୍‌ ଗେଲ୍‍ସ୍ପା ସେଙ୍ଗେ, ଡଲ୍‍ତାଗାଙ୍କ୍ ପୁନରୁତ୍‍ତାନ୍ ଅନାଦ୍‌ ମାର୍‍ ଜିସୁ ସ୍ୱର୍ଗତାଗାଙ୍କ୍ ୱାଦାନ୍ ୱେଲେ କେପି ମାନୁଟ୍, ଇୱୁସାରେ ବିଷୟ୍‍ତେ ଆଗେତ୍‍ ନାରୁଡ଼୍ ଗଟି ତିର୍‍ୟମିନ୍ଦେଡ଼୍ ।
\c 2
\s ଥେସଲନିତାଗ୍ ପାଉଲ୍‍ତେ ପାଡ଼୍‍ୟି
\p
\v 1 ହୋ ଦାଦାନଡ଼ି ନୁ ଏଲାସ୍କ୍‍ ! ମିଡ଼୍ ନିଜେ ପୁତ୍‍ତିଡ଼୍ ଯେ, ମିଇ ପାକେ ମାୟାଦ୍‌ ୱାଦାନାଦ୍ ବ୍ୟର୍ତ ଆୟ୍‍ୟ । 
\v 2 \x + \xo ୨:୨ \xo*\xt ପ୍ରେରିତ ୧୬:୧୯-୨୪; \xt*\xt ପ୍ରେରିତ ୧୭:୧-୯.\xt*\x*ଥେସଲନିତାଗ୍ ମିଇ ପାକେ ୱାଦାନ୍ ମୁନେ ଫିଲିପୀତାଗ୍ ମା ସେଙ୍ଗେ ବେଦ୍‍ଲେକାମ୍ ତିପାଲ୍ ନୁ କାରାପ୍ ପାଡ଼୍‍ୟି ମାଡ଼ମାତ୍‍ତଡ଼୍, ଆଦ୍ ମିଡ଼୍ ପୁତ୍‍ତିଡ଼୍ । ଇଶ୍ୱର୍‌ତାଗାଙ୍କ୍ ଦର୍କିମାନ୍ଦାନ୍ ସୁସମାଚାର୍ ମିକିଂଙ୍କ୍ କେଞ୍ଜ୍‍ପାଙ୍କ୍ ସେଙ୍ଗେ ଅଣ୍ଡ୍‌ ମାନ୍‍ନାଙ୍କ୍‍ ଶକ୍ତି ଇସ୍‍ମାତ୍‍ତନ୍ । 
\v 3 ବାତେବା କାରାପ୍ ବା ପିନ୍ଦ ଲେକାମ୍ ଆସ୍ ମାମ୍‍ମେ ମିଇ ପାକେ ମାୟାଦ୍‌ ମାଟେ କେଲ୍‍ୱେ ମାତ୍‍ତମ୍, ମିକିଂଙ୍କ୍ ଟକାମାଡ଼ାଙ୍କ୍ ବାତେବା କାରାପ୍ ଚିନ୍ତେ ମାଡ଼ମ୍ । 
\v 4 ବାତେଙ୍କ୍‍ଇତ୍କେ ଇଶ୍ୱର୍‌ତେ ଇଚ୍ଛା ଲେକାମ୍ ଗଟ୍ ମାମ୍‍ମେ ସାରେଦାମ୍ କେତିତମ୍; ଅଣ୍ଡ୍‌ ମାକିଂଙ୍କ୍ ସାୟେ ଏର୍କା ମାଡ଼ି ମା ପର୍‍ର ସୁସମାଚାର୍ ପ୍ରଚାର୍‍ତେ ଦାୟିତ୍ୱ ୱିଡ଼୍‍ସିତ୍‍ତନ୍ । ନାରୁଡ଼୍‍କିଂଙ୍କ୍ ଶାନ୍ତି ମାଡ଼ାନାଦ୍ ମାୟାଦ୍‌ ପାଡ଼୍‍ୟି ଆୟ୍‍ୟ । ବେନ୍ ଇଶ୍ୱର୍ ମାନ୍‍ ମନ୍‍ତେ ସାରେ ପରିକ୍ଷା ମାଡ଼ି ଉଡ଼ିତନ୍, ମାତର୍ ଅଂକିଙ୍କ୍‌ ଶାନ୍ତି ମାଡ଼ାନ୍ ସେଙ୍ଗେ ମାୟାଦ୍‌ ଇଚ୍ଛା । 
\v 5 ମିଡ଼୍ ସାୟେ ପୁତ୍‍ତିଡ଼୍ ଯେ, ମାମ୍‍ମେ କାରାପ୍ ଗଟି କେସ୍ ମିଇ ବକେତ୍ ୱାଡ଼ମ୍ ବା ଆଶେତଡ଼୍‍ ମିଇ ପାକେଙ୍କ୍ ଚଲ ବ୍ୟବହାର୍‌ ମାଡ଼୍‍ୱେ ମାତ୍‍ତମ୍, ଇଦ୍ ବିଷୟ୍‍ତେ ଇଶ୍ୱର୍ ମା ସାକ୍ଷି । 
\v 6 ମାମ୍‍ମେ ବେନଡ଼ାଗାଙ୍କ୍ ସମ୍ମାନ୍ ପାଏମ୍ ଆଦ୍‍ଦାନ୍ ସେଙ୍ଗେ ଇଚ୍ଛା ମାଡ଼୍‍ୱେ ମାତ୍‍ତମ୍ । ମିୟାଗାଙ୍କ୍ ବା ବାଗାତ୍ ନାରୁଡ଼ାଗାଙ୍କ୍ ମାମ୍‍ମେ ଆଶେ ମାଡ଼୍‍ୱେ ମାତ୍‍ତମ୍, 
\v 7 ଯଦି କ୍ରିଷ୍ଟନ୍ ପ୍ରେରିତ୍ ଶିଷ୍ୟଡ଼୍ ଲେକାମ୍ ମାମ୍‍ମେ ମିୟାଗାଙ୍କ୍ ଆଦ୍ ଦାବୀ ମାଡ଼େ ପାର୍‍ୱେମ୍, ବାତେଙ୍କ୍ ଇତ୍‍କେ ୟାୟ୍‍ ବେଦ୍‍ଲେକାମ୍ ନିଜେତ୍ ପିଲାଙ୍କ୍ ଯତନ୍ ଆଦ୍‍ତେ, ମିଇ ପାକେ ମାନ୍ଦାନ୍ ୱେଲେ ମାମ୍‍ମେ ମିଇ ସେଙ୍ଗେ ଆଦେଲେକାମ୍ ଲେକେତ୍‍ ବ୍ୟବହାର୍ ମାଡ଼ିମାତ୍‍ତମ୍ । 
\v 8 ମିଇ ସେଙ୍ଗେ ମାୟାଦ୍‌ ପ୍ରେମ ମାନ୍‍ନାଙ୍କ୍ ମାମ୍‍ମେ ଆଦ୍‍ଲେକାମ୍ ମିକିଂଙ୍କ୍ ଇଶ୍ୱର୍‌ତେ ସୁସମାଚାର୍ କାଲ୍‍ପ୍‍ୱେ ମାତ୍‍ତମ୍, ନିଜେତ୍ ନିଜେତ୍ ଜିୱୁନ୍ ହିଦାଙ୍କ୍ ତିୟାର୍ ମାତ୍‍ତମ୍ । ମିଡ଼୍ ମା ଲେକେତ୍‍ ସାଙ୍ଗ ମାତ୍‍ତିଡ଼୍ । 
\v 9 ହୋ ଦାଦାନଡ଼ି ନୁ ଏଲାସ୍କ୍‍, ମିୟାଦ୍ ନିଜାମ୍ ହେର୍କା ମାନ୍‍ତେ; ମାନାଡ଼୍ ବେଲାନ୍ ଗାଟି ତିପାଲ୍‍ତେ ସ୍ୱୀକାର୍ ମାଡ଼ି ପାଡ଼୍‍ୟି ମାଡ଼ମାତ୍‍ତମ୍; ବେଲାନ୍ ମିଇ ପାକେ ଇଶ୍ୱର୍‌ତେ ସୁସମାଚାର୍ ପ୍ରଚାର୍ ମାଡ଼ାନ୍ ୱେଲେ ମିଇ ପର୍‍ର ବୋଜ୍ ଆୟ୍‍ମାକି ହିଞ୍ଜ ମାମ୍‍ମେ ନାର୍‍କେତ୍ ପାୟାଲ୍ ତିପାଲ୍ ମାଡ଼ିମାତ୍‍ତମ୍ । 
\v 10 ମିଡ଼୍ ନୁ ନିଜେ ଇଶ୍ୱର୍ ମାନ୍‍ ସାକ୍ଷି ମିଇ ଲେକାମ୍ ବିଶ୍ୱାସିନଡ଼୍‍ ପାକେ ମାୟାଦ୍‌ ବ୍ୟବହାର୍‌‌ ନିର୍ମଲ୍‍, ନ୍ୟାୟସଙ୍ଗାତେ ନୁ ନିର୍ଦୋଷ୍‍ ମାତ୍‍ତା । 
\v 11 ମିଡ଼୍ ପୁତ୍‍ତିଡ଼୍, ବାବାଲ୍ ବେଲାନ୍ ନିଜେତ୍ ପିଲାନ୍ ସେଙ୍ଗେ ବ୍ୟବହାର୍‌ ମାଡ଼ାନ୍ ମାତ୍‍ତେ, ମାମ୍‍ମେ ମିଇସେଙ୍ଗେ ଟିକ୍ ଆଦେଲେକାମ୍ ବ୍ୟବହାର୍‌ ମାଡ଼ିମାତ୍‍ତମ୍ । 
\v 12 ମାମ୍‍ମେ ମିକିଂଙ୍କ୍ ଉତ୍ସାହିତ ମାଡ଼ିମାତ୍‍ତମ୍, ସାନ୍ୱନା ଇସ୍ ମାତ୍‍ତମ୍, ମେଣ୍ଡେ ମୀଇଡ଼୍ ବେଲାନ୍ ଇଶ୍ୱର୍‌ତେ ଯୋଗ୍ୟ ଆଚରନ୍ ମାଡ଼ାନ୍ ମାୟ୍‍ଦିଙ୍କ୍ କେସ୍ ମାତ୍‍ତଣ୍ଡ୍ ।
\p
\v 13 ମାନାଡ଼୍ ବାତ୍‍ତିଙ୍କ୍ ସାରେଦାମ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିସମାନ୍‍ତାଡ଼୍ ଆଦିନ୍ ମେଣ୍ଡନ୍ କାରନ୍ ମିନ୍ତେ । ମାମ୍‍ମେ ବେସୁଙ୍କ୍‍ ମିଇ ପାକେ ଇଶ୍ୱର୍‌ତେ ସତ୍‍ କାବୁର୍ ତାସ୍‍ମାତ୍‍ତମ୍, ମିଡ଼୍ ଆଦ୍ ନାରୁନ କାବୁର୍ ହିଞ୍ଜ ହେର୍କା ମାଡ଼କଟ୍, ଇଶ୍ୱର୍‌ତେ କାବୁର୍ ହିନା କେଞ୍ଜ୍‍ତିଡ଼୍ ନୁ ଗ୍ରହନ୍ ମାଡ଼୍‍ତିଡ଼୍ । ମୁନେଙ୍କ୍ କଞ୍ଜ୍ ଆଦ୍ ଇଶ୍ୱର୍‌ତେ କାବୁର୍ ନୁ ମିଇ ଲେକାମ୍ ବିଶ୍ୱାସୀନଡ଼୍ ମନ୍‍ଦାଗ୍ ଆଦ୍ ଗେଲ୍‍ସି ମାନ୍‍ତେ । 
\v 14 \x + \xo ୨:୧୪ \xo*\xt ପ୍ରେରିତ ୧୭:୫.\xt*\x*ହୋ ଦାଦାନଡ଼ି ନୁ ଏଲାସ୍କ୍‍, ମିଡ଼୍ ଯିହୂଦା ଦେଶ୍‍ତାଗ୍ ମାନ୍ଦାନ୍ କ୍ରିଷ୍ଟ ଜିସୁନାଗ୍ ପରମେଶ୍ୱର୍‌ ମଣ୍ଡଲିତେ ନାରୁଡ଼୍ ସେଙ୍ଗେ ବାତ୍ ଗଟେମ୍ ହାସ୍‍ମିନ୍ତେ । ଯିହୂଦା ପରମେଶ୍ୱର୍‍ତେ ନାରୁଡ଼୍ ବାଗାତ୍ ଯିହୁଦିନଡ଼ାଗ୍ ଦୁଃକାମ୍ କଷ୍ଟ ଆସ୍‍ମିନ୍ତେ । ମିଡ଼୍ ନିଜେତ୍ ଦେଶ୍‍ତେ ନାରୁଡ଼ାଗାଙ୍କ୍ ମିକା ଆଦେଲେକାମ୍ ଦୁଃକାମ୍ କଷ୍ଟ ଦର୍‍କିତ୍ । 
\v 15 \x + \xo ୨:୧୫ \xo*\xt ପ୍ରେରିତ ୯:୨3,୨୯; ୧3:୪୫,୫୦; ୧୪:୨,୫,୧୯; ୧୭:୫,୧3; ୧୮:୧୨.\xt*\x*ଆଦ୍ ଯିହୁଦିନଡ଼୍ ପ୍ରବୁ ଜିସୁଙ୍କ୍ ନୁ ବାବବାଦୀନଡ଼୍‍କ୍ ଆୱୁକି ମାତ୍‍ତଡ଼୍ ନୁ ମାନ୍‍ ମିକା ଆଦେଲେକାମ୍ ତାଡ଼୍‍ନା ମାଡ଼ିତଡ଼୍ । ଅଡ଼୍‌ ସେଙ୍ଗେ ଇଶ୍ୱର୍ ବେସର୍ ଅସନ୍ତୁଷ୍ଟ ! ସାରେ ନାରୁଡ଼୍‍ତେ ଅଡ଼୍‌ ଶତ୍ରୁଡ଼୍ । 
\v 16 ଇଦ୍ ରକମ୍ କି ବେନ୍ ସୁସମାଚାର୍ ପ୍ରଚାର୍ ତଡ଼୍ ଅଣଯିହୁଦୀଡ଼ାଦ୍ ପରିତ୍ରାଣ୍ ଆଦ୍‍ପାର୍‍ତେ, ଆଗାଙ୍କ୍ ଅଡ଼୍‌ ମାନ୍‍ ନିବୃତ ମାଡ଼ାନଙ୍କ୍ ଆଲ୍‍ସି ମାଡ଼ୁତଡ଼୍ । ଇଦ୍ ରକମ୍ ଅଡ଼୍‌ ଅନବରତ ମାଡ଼ମାନ୍ଦାନ୍ ପାପ୍‌ ମାତର୍‌ ଚରମ୍ ସୀମାତାଗ୍ ୱାସ୍ ଏୱୁତ୍‍ତେ । ସାରେ ମାଡ଼େଙ୍ଗ୍ ଅଡ଼୍‌ ବିରୁଦ୍‍ତେ ଇଶ୍ୱର୍‌ତେ କପାମ୍ ନାର୍‍ଗେ ଆତ୍‍ତେ ।
\s ମେଣ୍ଡେ ଆଦାନ୍ ସେଙ୍ଗେ ପାଉଲ୍‍ତେ ଇଚ୍ଛା
\p
\v 17 ହୋ ଦାଦାନଡ଼ି ନୁ ଏଲାସ୍କ୍, ମାମ୍‍ମେ ହୃଦୟ୍‍ତାଗ୍ ଆୟ୍‍ୟ, ମାତର୍ ମେନ୍ଦୁଲ୍ ତାଗାଙ୍କ୍ ସୁଦୁଟ୍ ଦିନାମ୍ ସେଙ୍ଗେ ମିୟାଗାଙ୍କ୍ ଯେକା ମାତ୍‍ତମ୍, ମିଇ ମୋକମ୍ ଉଡ଼ାନ୍ ସେଙ୍ଗେ ଅଦିକ୍‌ ଇଚ୍ଛା ମାଡ଼ୁତମ୍ । 
\v 18 ଆଦିଙ୍କ୍ ମିୟାଗାଙ୍କ୍ ମାଲ୍‍ସ୍ ଆଦାନ୍ ସେଙ୍ଗେ ଅଣ୍ଡୟ୍‌‍ଦାମ୍ ଆଲ୍‍ସି ମାଡ଼୍‍ତାନ୍, ନାନ୍ ନିଜେ ପାଉଲ୍ ମାଲ୍‍ସ୍ ଆଦାନ୍ ସେଙ୍ଗେ ନାର୍ଗେଦାମ୍ ଆଲ୍‍ସି ମାଡ଼ମାତ୍‍ତାନ୍, ବାତେଙ୍କ୍ ଇତ୍‍କେ ଶୟ୍‍ତାନ୍‍ ମାନ୍‍ ଇଗାଙ୍କ୍ ଆଡ଼ାମ୍ ଆତ୍‍ତେ । 
\v 19 ଆଦ୍ ବାତ୍‍ଆଇ, ନାୟାଦ୍ ବିଶ୍ୱାସ୍, ମାନ୍‍ ପ୍ରବୁ ଜିସୁ ୱାଦାନ୍ ୱେଲେ ଅନ୍‌ ମୁନେ ବାଗାତଡ଼୍ ଲେକାମ୍ ମୀଇଡ଼୍ ମିକା ମାୟାଦ୍‌ ଆଶେ, ୱେଡ଼୍‍କ୍‍ ନୁ ଗର୍ବ ମାଡ଼ାନାଦ୍ ସହଜ୍‍ ବାତେଙ୍କ୍ ଆଦ୍‍ତେ । 
\v 20 ନିଜାମ୍ ମିଡ଼୍ ମାନ୍‍ ଗୌରବ୍ ନୁ ୱେଡ଼୍‍କା ।
\c 3
\p
\v 1 \x + \xo 3:୧ \xo*\xt ପ୍ରେରିତ ୧୭:୧୫.\xt*\x*ତେର୍‍ତେ ପେର୍‍କେ ମାମ୍‍ମେ ମେଣ୍ଡେ ସାରେ ମାଡ଼୍‍ୱେ ପାର୍‍ୱକଟ ତିଆର୍ ମାଡ଼୍‍ତମ୍ ଯେ, ମାମ୍‍ମେ ପେର୍‍କେ ଆଥେନ୍‍ସ୍‍ତାଗ୍ ୱେରୱେର ବାଦ୍‍କିତମ୍, 
\v 2 ବାତେଙ୍କ୍ ଇତ୍‍କେ ନିକିଂଙ୍କ୍ ଡୁଟାଙ୍ଗ୍ ମାଡ଼ାନଙ୍କ୍ ନୁ ନିୟାଦ୍ ବିଶ୍ୱାସ୍ ଡ଼ୁଟାଙ୍କ୍ ମାଡ଼ାନ୍ ସେଙ୍ଗେ ମିଇ ପାକେ ନା ତାମୁଙ୍କ୍ ତୀମତିଙ୍କ୍ ରହତିତାନ୍ । ଅଣ୍ଡ୍‌ ମା ତଡ଼୍ କ୍ରିଷ୍ଟନ୍‍ତଡ଼୍ ଲେକେତ୍‍ କାବୁର୍ ପ୍ରଚାର୍ ମାଡ଼ି ଇଶ୍ୱର୍‌ତେ ସେବା ମାଡ଼ୁତାନ୍ । 
\v 3 ମିଇ ପର୍‍ର ଆସମାନ୍ଦାନ୍ ତାଡ଼ନା ସେଙ୍ଗେ ବେନ ବେଲା ଆର୍‍ବୁଲ୍‍କା ଆୟ୍‍ମାକିଣ୍ଡ୍, ଆଦିନ୍ ସେଙ୍ଗେ ମିକିଂଙ୍କ୍ ସାହାଯ୍ୟ ମାଡ଼ିତନ୍ । ନିଜାମ୍ ମିଡ଼୍ ପୁତ୍‍ତିଡ଼୍ ମାମ୍‍ମେ ଇଦ୍ ରକମ୍ ଆଦିତାଡ଼୍, ଇଦ୍ ଇଶ୍ୱର୍‌ତେ ଇଚ୍ଛା । 
\v 4 ମିଇ ତଡ଼୍ ମାନ୍ଦାନ୍ ୱେଲେ, ମାମ୍‍ମେ ନାର୍‍ଗେ ମୁନେଙ୍କ୍ କେସ୍‍ମାତ୍‍ତମ୍, ମାନ୍‍ ଗାଟି କଷ୍ଟ ଆଦାଙ୍କ୍ ଆଦ୍‍ତେ, ହିଞ୍ଜେ ମିଡ଼୍ ପୁନ୍ଦୁତିଡ଼୍ ଟିକ୍ ଆଦେ କେ ଗଟେମ୍ ଆଦ୍‍ତେ । 
\v 5 ଆଦିଙ୍କ୍ ତୀମତିଙ୍କ୍ ରତ୍‍ତାନ୍ । ନାନ୍ ମେଣ୍ଡେ ସତ୍ ଆସ୍‍ମାନ୍ଦେ ପାର୍ୱନ୍ । ମିଡ଼୍ ନିଜେ ବିଶ୍ୱାସ୍‍ତେ ମିନ୍ଦେଡ଼ି କି ଇଲେ, ପୁନ୍ଦାନ୍ ସେଙ୍ଗେ ନାନ୍ ଅଂକିଙ୍କ୍‌ ରତ୍‍ତାନ୍ । ଶୟ୍‍ତାନ୍‍ ମିକିଂଙ୍କ୍ ପ୍ରଲୋବିତ୍ ମାଡ଼ିମାନ୍ତେ ନୁ ମାନାଦ୍‍ ସାରେ ପାଡ଼୍‍ୟି ଆଙ୍ଗ୍‌ଡ଼ାମ୍ ଆସ୍‍ମାନ୍ତେ ? ଇଲେ ହିଦ୍ ବେସୁଙ୍କ୍‍ ନିଜାମ୍ ଆୟ୍‍ୟ ।
\p
\v 6 \x + \xo 3:୬ \xo*\xt ପ୍ରେରିତ ୧୮:୫.\xt*\x*ବାତେଙ୍କ୍ ଇତ୍‍କେ ହିଞ୍ଜେ ତୀମତି ମିୟାଗାଙ୍କ୍ ମାଲ୍‍ସ୍ ମା ପାକେ ୱାସ୍, ମିୟାଦ୍ ବିଶ୍ୱାସ୍ ନୁ ପ୍ରେମ ବିଷୟ୍‍ତେ କେସ୍‍ମିନ୍ଦେନ୍, ମାମ୍‍ମେ ବେଦ୍‍ଲେକାମ୍ ମିକିଂଙ୍କ୍ ଉଡ଼ାନଙ୍କ୍ ଇଚ୍ଛା ମାଡ଼ୁତମ୍, ଆଦେଲେକାମ୍ ମିଡ଼୍ ମାକିଂଙ୍କ୍ ସାରେଦିନା ହେର୍କାତାଗ୍ ନେହେସ୍ ମାକିଂଙ୍କ୍ ଉଡାଙ୍କ୍ ଇଚ୍ଛା ମାଡ଼ାଟ୍, ହିଦ୍ ବିଷୟ୍‍ତେ ମାକିଂଙ୍କ୍ ଲେକେତ୍‍ କାବୁର୍ ଇସ୍‌‍ମିନ୍ଦେନ୍; 
\v 7 ଆଦିଙ୍କ୍ ଦାଦାନଡ଼ି ନୁ ଏଲାସ୍କ୍‍, ମାୟାଦ୍‌ ସାରେ ଅସୁବିଦା ନୁ ତିପାଲ୍ ଆଦାନ୍ ୱେଲେ ମାମ୍‍ମେ ମିଇ ସେଙ୍ଗେ ଉତ୍ସାହିତ ଅଦୁତମ୍ । ମିୟାଦ୍ ଗାଡ଼୍‍ସ୍‍ ବିଶ୍ୱାସିକେ ମାକିଂଙ୍କ୍ ପ୍ରକୃତ୍‍ତେ ଜିୱେମାଡ଼ି ନେହେତ୍‍ତେ । 
\v 8 ଇଞ୍ଜେ ମାମ୍‍ମେ ପୁତ୍‍ତମ୍ ଯେ, ମିଡ଼୍ ଡୁଟାଙ୍ଗ୍‍ତେ ପ୍ରବୁନ୍‍ତଡ଼୍ କାଇଲି ମିକା ବାଦ୍‍କୁତାଡ଼୍ । 
\v 9 ଇଞ୍ଜେ ମିଇ ସେଙ୍ଗେ ମାମ୍‍ମେ ବେନ୍ ଲେକେତ୍‍ ନାର୍‍ଗେ ୱେଡ଼୍‍କ୍‍ ମାଡ଼ୁତମ୍, ଆଦିନ୍ ସାରେଦାନ୍ ଲେକାମ୍ ଇଶ୍ୱର୍‌ତିଙ୍ଗ୍ ବେଲାନ୍ ଦନ୍ୟବାଦ୍ ହିଦ୍‍ତମ୍, ଆଦ୍ ପୁନ୍ଦାନଙ୍କ୍ ପାର୍‍ୱମ୍ । 
\v 10 ମିକିଂଙ୍କ୍ କାୟ୍‍ଲି ମିଇ ବିଶ୍ୱାସ୍‍ତାଗ୍ ବାତେଏ ଅବାବ୍ ମିନ୍ଦେ, ଆଦ୍ ସାରେ ମାଡ଼ାନ୍ ସେଙ୍ଗେ ମାକିଂଙ୍କ୍ ସୁଯୋଗ୍ ଇଦାନଙ୍କ୍ ନାର୍କେପାୟାଲ୍ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ୁତମ୍ ।
\p
\v 11 ମିଇ ପାକେ ୱାଦାନ୍ ସେଙ୍ଗେ ମା ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ ମାନ୍‍ ଆର୍ ତିଆର୍ ମାଡ଼ିୱିନ୍ । 
\v 12 ମିଇ ସେଙ୍ଗେ ମାୟାଦ୍‌ ପ୍ରେମ ବେଲା ଗାଟି ମିନ୍ଦେ, ଆଦ୍ ଲେକାମ୍ ନିଜର୍‍ନିଜର୍ ଲୋପେ ନୁ ବାଗାତ୍ ନାରୁଡ଼୍ ସେଙ୍ଗେ ପ୍ରବୁ ମିୟାଦ୍ ପ୍ରେମ ପେର୍‍ସ୍ପି ନାର୍‍ଗେ ମାଡ଼ିଣ୍ଡ୍ । 
\v 13 ଇଦ୍ ଲେକାମ୍ ଅଣ୍ଡ୍‌ ମିକିଂଙ୍କ୍ ଡୁଟ୍‍ଟାଙ୍କ୍ ମାଡ଼ିତନ୍ । ଆଲେକେ, ମାନ୍‍ ପ୍ରବୁ ଜିସୁ ବେସୁଙ୍କ୍‍ ଦାର୍ମାମ୍ ନାରୁଡ଼୍ ଲୋପେ ମାଲ୍‍ସ୍ ୱାଦ୍‍ତଣ୍ଡ୍, ଆସୁଙ୍କ୍ ମିଡ଼୍ ବାବାଲ୍ ଇଶ୍ୱର୍‌ତେ ମୁନେ ସତ୍‍ ନୁ ପବିତ୍ର ଆସ୍‍ ନିର୍ଦୋଷ୍‍ ମାତ୍‍ତିଡ଼୍‍ ।
\c 4
\s ଇଶ୍ୱର୍‌ତେ କଣ୍ଡେତେ ସାୟେତ୍ ଜିୱୁନ୍
\p
\v 1 ଆଦେଲେକାମ୍ ଦାଦାନଡ଼ି ନୁ ଏଲାସ୍କ୍‍, ଇଶ୍ୱର୍‌ତିଙ୍କ୍ ଶାନ୍ତି ମାଡ଼ାନ୍ ସେଙ୍ଗେ ବେଦ୍‍ଲେକାମ୍ ବାଦ୍‍କାନଙ୍କ୍ ଆଦ୍‍ତେ, ଆଦ୍ ମାୟାଗାଙ୍କ୍ ଶିକ୍ଷା ମାଡ଼ିମିନ୍ଦେଣ୍ଡ୍ । ଆଦେଲେକାମ୍ ମୀଡ଼୍ ବାଦ୍‍କ ୱାଦୁତିଡ଼୍, ବାତେଙ୍କ୍ ଇତ୍‍କେ ହିଗାଙ୍କ୍ ବାତେଏ ଅଦିକ୍‌ ମାଡ଼ାନଙ୍କ୍ ମିକିଂଙ୍କ୍ ମାମ୍‍ମେ ହିଞ୍ଜେ ପ୍ରବୁ ଜିସୁନ୍ ପେଦେର୍‍ତେ ବିନତି ବା ସାରେଦା ମାଡ଼ୁତମ୍ । 
\v 2 ବାତେଙ୍କ୍ ଇତ୍‍କେ ପ୍ରବୁ ଜିସୁନାଗାଙ୍କ୍ ଅଦିକାର୍‌ ପାଏମ୍ ଆସ୍ ମିକିଂଙ୍କ୍ ବେନ୍‍ସାରେ ଆଦେଶ୍ କେସ୍‍ମାତ୍‍ତମ୍, ଆଦ୍ ମିଡ଼୍ ପୁତ୍‍ତିଡ଼୍ । 
\v 3 ମିଡ଼୍ ବେଲାବା ପବିତ୍ର ଜିୱା ଆୟ୍‍ମୁଟ୍, ଇଶ୍ୱର୍‌ତେ ଇଚ୍ଛା, ମିଡ଼୍ ବେଲାନ୍ ବା ଯୌନ ଲାଲସା ତାଗାଙ୍କ୍ ଦୁରାମ୍ ମାନୁଟ୍ । 
\v 4 ବେନଡ଼୍ ପର୍‍ମେଶ୍ୱର୍‍ତିଙ୍କ୍ ପୁନଡ଼୍, ଅଡ଼୍‌ ନିଜେତ୍ ମେନ୍ଦୁଲ୍‍ତିଙ୍କ୍ ହିଦ୍‍ଲେକାମ୍ ବ୍ୟବହାର୍ ମାଡ଼ିତଡ଼୍ । 
\v 5 ଇଶ୍ୱର୍‌ତିଙ୍କ୍ ପୁନ୍‍ୱେମାନ୍ଦାନ୍ ଅଣଯିହୁଦୀ ନାରୁଡ଼୍ ଲେକାମ୍ ସାରେତଡ଼୍ ନିଜେ ନିଜେତ୍ ମୁତେନ୍ ତଡ଼୍ ବେଲାନ୍ ଯୌନ ଲାଲସା ଆୟ୍‍ୟକଟ ପବିତ୍ର ନୁ ସମ୍ମାନ୍‍ତଡ଼୍ ବାଦ୍‍କାନଡ଼ାଦ୍ ସାୟେ, ଆଦ୍ ମିକିଂଙ୍କ୍ ପୁନ୍‍ନ୍ଦେ ୱେଇତିତ୍ । 
\v 6 ବେନ୍ କ୍ରିଷ୍ଟିୟାନ୍ ବିଶ୍ୱାସୀ ଦାଦାନ୍ ସେଙ୍ଗେ କାରାପ୍ କାମ୍ ମାଡ଼୍‍ମାଟ୍, ବା ଅଂକିଙ୍କ୍‌ ପାସ୍କ୍‍ମାଟ୍, ଇଦ୍ ଗଟ୍ ମାମ୍‍ମେ ମୁନେଙ୍କ୍ କେସ୍‍ମିନ୍ତେମ୍ ନୁ ଡୁଟାଙ୍ଗ୍‍ତେ ସାବ୍‍ଦାନ୍ ମାଡ଼ିତ୍‍ତମ୍ ଜେ, ବେନଡ଼୍ ଆଦ୍‍ଲେକାମ୍ ମାଡ଼ିତଡ଼୍, ପ୍ରବୁ ଅଡ଼୍‌‍କିଂଙ୍କ୍ ଦଣ୍ଡ ହିଦ୍‍ତନ୍ । 
\v 7 ଇଶ୍ୱର୍ ମାନ୍‍ ଅଶୁଚି ବାଦ୍‍କାନ୍ ସେଙ୍ଗେ କାର୍‍ଙ୍ଗାନାଦ୍‍ ମାଡ଼ନ୍, ବାତେଙ୍କ୍ ଇତ୍‍କେ ପବିତ୍ର ଜିୱାତେ ଆଶେ ମାନ୍ଦାନ୍ ସେଙ୍ଗେ ମାନାଡ଼୍ ୱାତ୍‍ତାଡ଼୍ । 
\v 8 ଆଦିଙ୍କ୍ ବେନ୍ ମାୟାଦ୍‌ ଇଦ୍ ଶିକ୍ଷାତିଙ୍କ୍‍ ଗ୍ରହନ୍ ମାଡ଼ନ୍, ଅଣ୍ଡ୍‌ ନାରୁଙ୍କ୍ ପବିତ୍ରଆତ୍ମା ଦାନ ମାଡ଼ିମାନ୍ଦାନ୍ ଇଶ୍ୱର୍‌ତିଙ୍କ୍ ଅବମାନନା ମାଡ଼ିତନ୍ ।
\p
\v 9 ସାର୍‍ରେ କ୍ରିଷ୍ଟ ବିଶ୍ୱାସୀଡ଼୍ ମିୟାଦ୍ ପ୍ରେମ ମାଡ଼ାନ୍ ବିଷୟ୍‍ତେ ମାମ୍‍ମେ ମେଣ୍ଡେ ଅଦିକ୍‌ ଲେକାନଙ୍କ୍ ଦର୍‍କାର୍ ଇଲ୍‍ଲେ । ନିଜେ ନିଜେତ୍ ଲୋପେ ବେଲାନ୍ ପ୍ରେମ ମାଡ଼ାନାଦ୍ ସାୟେ, ଆଦ୍ ନିଜେ ଇଶ୍ୱର୍ ତାଗାଙ୍କ୍ ଶିକ୍ଷା ମାଡ଼ିମିନ୍ଦେମ୍‍ । 
\v 10 ସାରେ ମାସିଦୋନିଆତେ ବିଶ୍ୱାସୀଡ଼୍ ସେଙ୍ଗେ ମିଡ଼୍ ଆଦେଲେକାମ୍ ବ୍ୟବହାର୍‌ ମାଡ଼୍‍ତିଡ଼୍ । ଆଦିଙ୍କ୍ ଅଦିକ୍‌ ମାତ୍‌ତେ ମାଡ଼ାଟ୍, ମିକିଂଙ୍କ୍ ମାତର୍ ଇସରେ ବିନତି ମାଡ଼ୁତମ୍ । 
\v 11 ମୁନେନ୍ ବେଲା କେସ୍‍ମାତ୍‍ତମ୍, ଶାନ୍ତିତେ ଜିୱୁଣ୍ଡ୍ ବାଦ୍‍କିତାଡ଼୍, ନିଜେତ୍ ପାଡ଼୍‍ୟିତାଗ୍ ମାନ୍‍ ଇଦ୍‍ତାଡ଼୍ ନୁ ନିଜେତ୍ ନିଜେତ୍ ଜିବିକା ଉପାର୍ଜନା ମାଡ଼ାନାଦ୍ ମିୟାଦ୍ ଲକ୍ଷ ଆୟି । 
\v 12 ବେଦ୍‍ଲେକାମ୍ ବାଇଦେତ୍‍ ନାରୁଡ଼୍ ସେଙ୍ଗେ ମିଡ଼୍ ସାୟେ ଆୟ୍‍ମୁଟ୍, ମେଣ୍ଡେ ମିୟାଦ୍ ବାତ୍‍ତେବା ଅବାବ୍ ଆୟ୍‍ୟ ।
\s ପ୍ରବୁନ୍ ୱାଦାନାଦ୍
\p
\v 13 ହୋ ଦାଦାନଡ଼ି ନୁ ଏଲାସ୍କ୍, ୱେରେ ନାରିଡ଼୍‍ତେ ବିଷୟ୍‍ତେ ଅଣ୍ଡୟ୍‌ ନିଜାତେ ଗଟ୍ ମିକିଂଙ୍କ୍ କେତାନଙ୍କ୍ ଇଚ୍ଛା ମାଡ଼ୁତମ୍ । ଆଲେକେ, ମିଡ଼୍ ବାଗାତଡ଼୍ ଲେକାମ୍ ଆସ୍‍ତେ ନାରିଡ଼୍ ଲେକାମ୍ ଶୋକାକୁଲ ଆୟ୍‍ମାଟ୍ । 
\v 14 ବେଲାନ୍ କି ମାମ୍‍ମେ ବିଶ୍ୱାସ୍ ମାଡ଼ିକାଡ଼୍ ଯେ ଜିସୁ ଡଲିମିକା ମେଣ୍ଡେ ତେଦ୍‍ତନ୍, ଆଦିଙ୍କ୍ ମାନାଡ଼୍ ଲେକାମ୍ ଗାଟି ବିଶ୍ୱାସତେ, ଜିସୁନାଗ୍ ବିଶ୍ୱାସ୍ ମାଡ଼ି ବେନଡ଼୍ ଡଲିତଡ଼୍, ଜିସୁ ମେଣ୍ଡେ ୱାଦାନ୍ ୱେଲେ ଇଶ୍ୱର୍ ଅଡ଼୍‌‍କିଂଙ୍କ୍ ଜିସୁନ୍ ତଡ଼୍ ଆଦ୍‍ତଡ଼୍ ।
\p
\v 15 \x + \xo ୪:୧୫ \xo*\xt ୧ କରନ୍ତିୟ ୧୫:୫୧,୫୨.\xt*\x*ମାମ୍‍ମେ ଇଞ୍ଜେ ମିକିଂଙ୍କ୍ ବେନ୍ ଶିକ୍ଷା ଇଦୁତମ୍, ଆଦ୍ ପ୍ରବୁନ୍ ଶିକ୍ଷା । ପ୍ରବୁନ୍ ୱାଦାନ୍ ସମୟ୍‍ତେ ମାମ୍‍ମେ ବେନଡ଼୍ ଜିୱୁନ୍ ମାନ୍‍ତମ୍, ମୁନେଙ୍କ୍ କଞ୍ଜ୍ ୱେରେନାରୁଡ଼୍ ପାକ୍ ଆସ୍‍ମାନ୍ଦାନ୍ ନାରୁଡ଼୍‍ଆଗାଙ୍କ୍ ମୁନେ ଆସ୍ ଆନ୍‌‍ମା । 
\v 16 ଆସୁଙ୍କ୍ ପ୍ରବୁ ଗଟ୍ ହିଦ୍‍ତନ୍ ମୁକ୍ୟଦୂତ୍‍ତେ ଲେଙ୍ଗ୍ ନୁ ଇଶ୍ୱର୍‌ତେ ମୟିର୍ ଲେଙ୍ଗ୍‍ତେ ଆଦ୍ ସ୍ୱର୍ଗଦୂତ ଡିଗିତା, ବେନଡ଼୍ କ୍ରିଷ୍ଟନାଗେ ମାଞ୍ଜ୍ ଡଲିମାନ୍‍ତଡ଼୍, ଅଡ଼୍‌ ମୁନେ ତେଦିତଡ଼୍ । 
\v 17 ତାନ୍ ପେର୍‍କେ ବେନଡ଼୍ ଆଦ୍ ସମୟ୍‍ତେ ଜିୱୁନ୍ ମାନ୍‍ତମ୍, ମାବ୍‍ତାଗ୍ ଅଡ଼୍‌‍ତଡ଼୍ ଉତ୍‍ତାପିତ ଆସ୍ ମୟଲ୍‍ତାଗ୍ ପ୍ରବୁନ୍‍ତଡ଼୍ ସାକ୍ଷାତ୍ ମାଡ଼ିତମ୍ । ତାନ୍ ପେର୍‍କେ ମାମ୍‍ମେ ସାରେଦିନାମ୍ ପ୍ରବୁନ୍‍ତଡ଼୍ ମାନ୍‍ତମ୍ । 
\v 18 ଇୱୁ ସାରେ ଗଟି କେଞ୍ଜ୍‍ସ୍ପି ମିଡ଼୍ ଆନ୍‌‍ତେ ନିଜେ ନିଜେତିଙ୍ଗ୍ ସାର୍‍ଦେ ଆୟ୍‍ମୁଟ୍ ।
\c 5
\s ପ୍ରବୁ ୱାଦାନାଦ୍ ଦିନାମ୍
\p
\v 1 ହୋ ଦାଦାନଡ଼ି ନୁ ଏଲାସ୍କ୍‍, ଇଦ୍ ମିଇ ବିଷୟ ବେସୁଙ୍କ୍‍ ନୁ ବେନ୍ ପରିସ୍ଥିତେ ଗଟେମ୍ ଆଦ୍‍ତେ, ଆଦ୍ ବିଷୟ୍‍ତେ ମିଇ ପାକେ ବାତେଏ ଚିଟି ଲେକାନାଲ୍‌ଦ୍ ଦର୍‍କାଡ଼୍ ଇଲ୍‍ଲେ, 
\v 2 \x + \xo ୫:୨ \xo*\xt ମାତିଉ ୨୪:୪3; ଲୁକ ୧୨:3୯; ୨ ପିତର୍‌ 3:୧୦.\xt*\x*ବାତେଙ୍କ୍‍ଇତ୍‍କେ ନାର୍‍କେତେ ନାନେ ଡଙ୍ଗାଲ୍ ୱାଦାନ୍ ଲେକାମ୍ ପ୍ରବୁନ୍ ଦିନାମ୍ ୱାଦ୍‍ତେ, ହିଦ୍ ମିଡ଼୍ ଲେକେତ୍‍ ପୁତ୍‍ତିଡ୍ । 
\v 3 “ବେସୁଙ୍କ୍‍ ନାରୁଡ଼୍ ଶାନ୍ତି ନୁ ନିରାପଦ୍,” ଇଞ୍ଜ କେସମାନ୍‍ତଡ଼୍, ଆସୁଙ୍କ୍ ଡଙ୍କେତ୍‍ତେ ମାନ୍ଦାନ୍‌ ନାଟାଡ଼୍ ନପ୍‍ତେ ୱେଲେ ହଟାତ୍ ଆୱ ତେରାନାଦ୍ ମାନ୍‍ତେ, ମେଣ୍ଡେ ଆୱ୍ ବେନ୍‍ଲେକାମ୍ ମିକା ଗେଲ୍‍ସ୍ପାନଙ୍କ୍ ଆୟ୍‍ୟ । 
\v 4 ଦାଦାନଡ଼ି ନୁ ଏଲାସ୍କ୍, ମିଡ଼୍ ଇକାଡ଼୍ ତାଗ୍ ମାନ୍‍ୱିଡ଼୍‍, ଆଦ୍ ଦିନାମ୍ ମିଇୟାଗେ ଦାଦ୍‍ରେଲାନ୍ ଲେକାମ୍ ନାନେ ଡଙ୍ଗାନ୍ ଲେକାମ୍ ୱାସ୍ ଏୱ । 
\v 5 ମିଡ଼୍ ସାରେ ୱେସ୍ ନୁ ୱେସ୍‍ତେ ପିଲାନଡ଼ି । ମାମ୍‍ମେ ନାର୍‍କେତ୍ ବା ହିକାଡ଼୍‍ତାଗ୍ ମାନ୍‍ୱମ୍ । 
\v 6 ଆଦିଙ୍କ୍ ମାନାଡ଼୍ ବାଗାତଡ଼୍ ଲେକାମ୍ ଉସ୍‍କାତେ ମାନ୍‍ୱେ କେପି ନୁ ସେତ୍‍ତେ ମାନ୍ଦିକାଡ଼ାଡ଼୍ । 
\v 7 ନାରୁଡ଼୍ ନାର୍‍କେତ୍ ଉସ୍‍କାଡ଼୍ ଉଞ୍ଜିତଡ଼୍; ନାର୍‍କେତ୍ ଅଡ଼୍‌ କାଲ୍ ଉଞ୍ଜ୍ ମାତ୍‍ୱାରି ଆଦ୍‍ତଡ଼୍ । 
\v 8 \x + \xo ୫:୮ \xo*\xt ଏଫିସିୟ ୬:୧3-୧୭.\xt*\x*ବାତେଙ୍କ୍ ଇତ୍‍କେ ମାନାଡ଼୍ ୱେସ୍‍ତେ ପିଲା ହାଇନାଙ୍କ୍ ସାରେଦାମ୍ ସେତେ ମାନ୍‍ତାଡ଼୍ । ୱାଡ଼ାଟ୍, ବିଶ୍ୱାସ୍ ନୁ ପ୍ରେମତେ ଚକାସିଲେ କେର୍‍ଦିକାଡ଼୍‍ ନୁ ପରିତ୍ରାଣତେ ଆଶେ ଲେକାମ୍‍ ସହଜ୍‍ ତାଲେତାଗ୍ ୱାଟିକାଡ଼ାଟ୍ । 
\v 9 ଇଶ୍ୱର୍ ମାନ୍‍ ଅନ୍‌ କପାମ୍‍ତେ ନାରୁଡ଼୍ ଆଦାନଙ୍କ୍ ହେଞ୍ଜନ୍; ପ୍ରବୁ ଜିସୁ କ୍ରିଷ୍ଟନ୍ ନାଡ଼୍‍ମେ ମାନ୍‍ ପରିତ୍ରାଣ୍ ମାଡ଼୍‍ତନ୍‍ ସେଙ୍ଗେ ତିଆର୍ ମାଡ଼୍‍ତଣ୍ଡ୍ । 
\v 10 କ୍ରିଷ୍ଟନାଦ୍ ମେଣ୍ଡନ୍‍ଦାମ୍ ୱାଦାନ୍ ସମୟ୍‍ତେ ମାମ୍‍ମେ ଇଦ୍ ଜିୱୁତେ ମାନ୍‍ତମ୍ ବା ମାନମ୍, ଅନ୍‌ ତଡ଼୍ ବେଲାନ୍ କାୟ୍‍ଲି ମିକା ମାନ୍‍ତମ୍, ଆଦିନ୍ ସେଙ୍ଗେ ଅଣ୍ଡ୍‌ ମାନ୍‍ ସେଙ୍ଗେ ଡଲ୍‍ତଣ୍ଡ୍ । 
\v 11 ଆଦିଙ୍କ୍ ଇଞ୍ଜେ ବେଦ୍‍ଲେକାମ୍ ମାଡ଼ୁତିଡ଼୍, ଟିକ୍ ଆଦେଲେକାମ୍ ନିଜେ ନିଜେ ଲୋପେ ଉତ୍ସାଇତ୍ ମାଡ଼ାଟ୍, ମେଣ୍ଡେ ନାରୁଡ଼୍‍କିଂଙ୍କ୍ ସାହାଯ୍ୟ ମାଡ଼ାଟ୍ ।
\s ଶେଷ ପରାମର୍ଶ ନୁ ଆଶିଷ
\p
\v 12 ହୋ ଦାଦାନଡ଼ି ନୁ ଏଲାସ୍କ୍, ମାମ୍‍ମେ ମିକିଂଙ୍କ୍ ଅନୁରଦ୍‌ ମାଡ଼ୁତମ୍, ବେନଡ଼ ମିଇ ସେଙ୍ଗେ କଷ୍ଟ ଅଦୁତଡ଼୍ ନୁ ପ୍ରବୁନ୍ ସେବାତେ ମିଇ ନେତାନ୍ ଲେକାମ୍ ଆସ୍ ମିକିଂଙ୍କ୍ ଚେତନା ହିଦ୍‍ତନ୍, ଅଡ଼୍‌‍କିଂଙ୍କ୍ ମିଡ଼୍ ସମ୍ମାନ୍ ମାଡ଼ାଟ୍ । 
\v 13 ଅଡ଼ାଦ୍‌ ପାଡ଼ିୟିଦେ ସେଙ୍ଗେ ମିଡ଼୍ ପ୍ରେମତେ ଲେକାମ୍ ଆଦର୍ ମାଡ଼ାଟ୍ । ନିଜେ ନିଜେତ୍ ସାଙ୍ଗତେ ଲେକେତ୍‍ ମାନୁଟ୍ ।
\p
\v 14 ଦାଦାନଡ଼ି ନୁ ଏଲାସ୍କ୍, ମିକିଂଙ୍କ୍ ମାୟାଦ୍‌ ଅନୁରଦ୍‌; ଦୁଷ୍ଟନଡ଼କ୍ ସତର୍କ ମାଡ଼ାଟ୍, ୱେର୍‍ତେ ନଡ଼୍‍କ୍ ଉତ୍ସାଇତ୍ ମାଡ଼ାଟ୍, ଦୁର୍ବଲ ନାରୁଡ଼୍‍କ୍ ସାହାଯ୍ୟ ମାଡ଼ାଟ୍ ନୁ ସାରେତଡ଼୍ ସେଙ୍ଗେ ଗାଡ଼୍‍ସ୍ ଆୟ୍‍ମୁଟ୍ । 
\v 15 ବେନ ବେନନାଦ୍ କାରାପ୍ ସେଙ୍ଗେ କାରାପ୍ ମାଡ଼୍‍ମାଟ୍, ମାତର୍ ମିଡ଼୍ ସାରେଦାମ୍ ନିଜେ ନିଜେତ୍ ନୁ ସାରେତଡ଼୍ ସେଙ୍ଗେ ସାୟେ ପାଡ଼୍‍ୟି ଆୟ୍‍ମୁଟ୍ ।
\p
\v 16 ସାରେଦାମ୍ ୱେଡ଼୍‍କ୍‍ ମାଡ଼ାଟ୍ । 
\v 17 ବେସୁଙ୍କ୍‍ ବା ପ୍ରାର୍ତନା ମାଡ଼ାନାଦ୍ ୱିଡ଼୍‍ସ୍‍ମାଟ୍ । 
\v 18 ସାରେ ସମୟ୍‍ତେ ଦନ୍ୟବାଦ୍ ହିମୁଟ୍ ମେଣ୍ଡେ ସାର୍‍ରେ ବିଷୟ୍‍ତେ ଦନ୍ୟବାଦ୍ ଇମୁଟ୍ । ଇଦ୍ ଇଶ୍ୱର୍ ଇଚ୍ଛା ଜେ କ୍ରିଷ୍ଟ ଜିସୁନ୍‍ତଡ଼୍ ବାଦ୍‍କାଟ୍ ।
\p
\v 19 ବେସୁଙ୍କ୍‌ବା ପବିତ୍ର ଆତ୍ମାତେ ବିରୁଦ୍‍ତେ ବାଦା ମାଡ଼୍‍ମାଟ୍ । 
\v 20 ଇଶ୍ୱର୍‌ତେ କାବୁର୍‍ତିଙ୍କ୍ ଆଙ୍ଗ୍‍ଡ଼ାମ୍ ହିଞ୍ଜ ଆଲ୍‍ସ୍‍ମାଟ୍ । 
\v 21 ସାରେତଡ଼୍ ଗୋଟିଙ୍କ୍ ପରିକ୍ଷା ମାଡ଼ାଟ୍, ବାତ୍ ସତ୍, ଆଦିଙ୍କ୍ ହେର୍କାନେହେସ୍‍ ମାନୁଟ୍, 
\v 22 ସାରେ ଲେକେତ୍‍ କାରାପ୍ ପାଡ଼ିୟିତାଗାଙ୍କ୍ ଯେକାମାନୁଟ୍ ।
\p
\v 23 ବେନ୍ ଇଶ୍ୱର୍ ମାନ୍‍ ଶାନ୍ତିତେ ନେହେତିତ୍, ଅଣ୍ଡ୍‌ ମାନ୍‍ ସାରେଦିନାତ୍ ସେଙ୍ଗେ ପବିତ୍ର ମାଡ଼ିତନ୍ ନୁ ସାରେଦିନାମ୍ ମାନାଡ଼୍ ଅନ୍‌ ତଡ଼୍ ମାନ୍‍ତାଡ଼୍, ମାନାଡ଼୍ ପ୍ରାର୍ତନା ମାଡ଼ିକାଡ଼୍ ଯେ, ପ୍ରବୁ ଜିସୁ କ୍ରିଷ୍ଟ ୱାଦାନ୍ ଦିନ୍ ମିୟାଦ୍ ଆତ୍ମା, ଜିୱୁନ୍, ମେନ୍ଦୁଲ୍ ସାରେତିଙ୍କ୍ ନିର୍ଦୋଷ୍‍ ମାଡ଼ି ନେଃଏମୁଟ୍ । 
\v 24 ବେନ ମିକିଂଙ୍କ୍ କାର୍‍ଙ୍ଗିତଣ୍ଡ୍ ବା ହେଞ୍ଚିମିନ୍ଦେଣ୍ଡ୍, ଅଣ୍ଡ୍‌ ବିଶ୍ୱାସ୍ତ; ଅଣ୍ଡ୍‌ ଆଦ୍‍ମିକା ସାରେ ମାଡ଼ିତନ୍ ।
\p
\v 25 ହୋ ଦାଦାନଡ଼ି ନୁ ଏଲାସ୍କ୍‍, ମା ସେଙ୍ଗେ ମିକା ପ୍ରାର୍ତନା ମାଡ଼ାଟ୍ ।
\p
\v 26 ସାରେତଡ଼୍ ଦାଦାନଡ଼ି କ୍ରିଷ୍ଟିୟାନ୍ ପ୍ରେମତଡ଼୍ ନମସ୍କାର୍ ମାଡ଼ାଟ୍ ।
\p
\v 27 ସାରେତଡ଼୍ ଦାଦାନଡ଼୍ ପାକେ ହିଦ୍ ଚିଟି କାର୍‍ତାନଙ୍କ୍ ସେଙ୍ଗେ ନାନ୍ ପ୍ରବୁନ୍ ଅଦିକାର୍‌‍ତେ ମିକିଂଙ୍କ୍ ଅନୁରଦ୍‌ ମାଡ଼ୁତାନ୍ ।
\p
\v 28 ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ସାରେତଡ଼୍ ସେଙ୍ଗେ ସହବର୍ତି ଆୟି । ଆମେନ୍‌ ।