\id ROM - Kopo
\ide UTF-8
\h ରୋମିୟ
\toc3 ରୋମିୟ
\toc2 ରୋମିୟ
\toc1 ରୋମିୟ ମଣ୍ତଲିଦି ଲାକ୍‍ତୁ ପ୍ରେରିତ ପାଉଲ୍‍ତି ଆକୁ
\mt2 ରୋମୀୟ ମଣ୍ତଲି ନିକଟକୁ ପ୍ରେରିତ ପାଉଲଙ୍କ ପତ୍ର
\mt1 ରୋମିୟ ମଣ୍ତଲିଦି ଲାକ୍‌ତୁ ପ୍ରେରିତ ପାଉଲତି ଆକୁ
\imt ରୋମିୟ ବଇ ବିସୟ୍‌ତାନ୍‌ ଏସ ମାଟା
\ip ରମିୟ ଆକୁ ରାସାତା ମାନାତ୍ ପେରିତ ପାଉଲତି ମାଡ଼ାନ୍‌ ୫୪ ଦାନ୍‌ ୫୮ କ୍ରିସ୍ତଦି ମାଡ଼ାନ୍‌ ଜିସୁକ୍ରିସ୍ତଦି ଜନମ୍‍ ୱେନ୍‍କା ରାସାତାମାରାତ୍‌ ।
\ip ପାଉଲ ରୋମତୁ ସନି ଆଗ୍‍ଡ଼ି ରିଏର୍‌ ଜିହୁଦି ମାରି ଅଣଜିହୁଦି କ୍ରିସ୍ଟିଆନ୍‍ତିଙ୍ଗ୍‌ ଆଦେସ୍ ସିଦେଙ୍ଗ୍‍ ଇୟା ଆକୁ ରାସାତା ମାନାନ୍ । ୱିଜୁ ଜାତି ଏଣ୍ଡେସ୍ ଜିସୁ କ୍ରିସ୍ତଙ୍ଗ୍ ବିସ୍‌ବାସ୍‌ ମାରି ମାନାନାର୍‌ ରୋମିୟ \xt ୧୬:୨୬\xt* ଇୟାମାଡ଼ାନ୍‍କୁ ୱାନ୍ କିନାନ୍ ଗାଡ଼୍‌ତୁ ମାନି ବେଡ଼ାଦୁ ରୋମିୟ କ୍ରିସ୍ଟିୟାନ୍‌କୁ ଆଦେସ୍ ସିନି ଉଣ୍ତିଙ୍ଗ୍‌ ଇୟା ଆକୁ ରାସାତା ମାନାନ୍‌
\ip ୱିଜୁ ଜାଗାଦୁ ୱିଜୁ ବେଡ଼ାଦୁ କ୍ରିସ୍ଟିୟାନ୍‍ ଲୋକା ଉଣ୍ତିଙ୍ଗ୍‌ ରୋମିୟ ଆକୁ ଉଣ୍ତ୍ରିନେଗି ବଇ, ମାତର ମାପୁ ଏଣ୍ତେସ୍ ଜିସୁକ୍ରିସ୍ତଦି ମାଡ଼ାନ୍‌ ରକିୟା ଆଦେଙ୍ଗ୍‌ ଆଟ୍‍ନିକା ପାଉଲ ଟିକ୍ ମାରି ନେଗେନ୍‍ତାନ୍‌ ବୁଜେ କିଜିନାନ୍‌ । ପାଉଲ ପାଡ଼ିଇ ନିୟମ୍‌ତିଙ୍ଗ୍‌ ବା ଜିସୁକ୍ରିସ୍ତଦି ସୁସମାଚାର୍‌ଦି ୱାଲେ ମିସାନାର୍‌ । ବଇଦି ରୋମିୟ \xt ୧:୧୬\xt* ପଦ୍‌ଦିଙ୍ଗ୍‌ ଅସି ଏସ ଲୋକୁ ପଣ୍ତିତ୍‌କୁ ତିଆର୍‌ କିଜି ଇନାର୍‌ ଜେ, ଇକା ନେଗିକାବୁରୁତି ଆକୁ । ଆମାକା ଆବେନୁ ଇଜିନାର୍‍, “ନାନୁ ସୁସମାଚାର୍‌ ଉଣ୍ତିଙ୍ଗ୍ ସେମାର୍‍ ଆଏ ମାତର ଏମେକାର୍‌ ବିସ୍‍ବାସ୍ କିନାର୍‍ ୱିଜେରେ ଉଣ୍ତିଙ୍ଗ୍‌ ଇକା ମାପୁରୁଦି ସାକ୍ତି ମାନାତ୍ । ଆଗ୍‍ଡ଼ି ଜିହୁଦି ୱେନ୍‍କା ଅଣଜିହୁଦିରିଙ୍ଗ୍‌ ବା ।”
\ip ଆଗ୍‌ଡ଼ି ବାଗ୍‍ \xt ୧–୧୨\xt* ଲୋଇରି ପେରିବିସୟ୍‌ ମାନାତ୍ ମାରି ଦ୍ୱିତିୟ ବାଗ୍‍ \xt ୧୩–୧୫\xt* କ୍ରିସ୍ଟିୟାନ୍‍ ଜିବନ୍‌ତୁ ନାଣ୍ତ ବ୍ୟବହାର୍‌ ଆନି ଆଦେସ୍ ମାନାତ୍ ।
\iot ଇୟା ବଇଦି ଏସ ମୁକ୍ୟ ବିସୟ
\io1 ୧. ପାଉଲ ସାଧାରଣ ନିଜେଦି ପରିଚୟ ସିଜି, ଏମେୱାରିଙ୍ଗ୍‌ ଆକୁ ରାସ୍‌ସିନାନ୍ ଆକା ଇନ୍‌ଜି ଆକୁ ଆରାମ୍‍ କିତାନ୍ । \ior ୧:୧-୧୫\ior*
\io1 ୨. ଲୋକା ଜାତିଦି ଦେସ୍ ମାରି ଜିସୁକ୍ରିସ୍ତଦି ମାଡ଼ାନ୍ ରକିୟା ଆନାତ୍‍ । \ior ୧:୧୬–୧୧:୩୬\ior*
\io1 ୩. କ୍ରିସ୍ଟିୟାନ୍ ଜିବନ୍‌ତି ଉଣ୍ତିଙ୍ଗ୍‌ ପାଉଲଦି ନାଣ୍ତ ବେବହାରଦି ଆଦେସ୍ । \ior ୧୨:୧–୧୫:୧୩\ior*
\io1 ୪. ୱାନ୍ ରୋମିୟ ମଣ୍ତଲିଦି ୱିଜେରି ଲୋକାଙ୍ଗ୍‌ ନମସ୍କାର୍‌ ଜାଣେ କିଜିନାନ୍ । ରାସ୍‍ନିକା ୱିଜିତାତ୍ । \ior ୧୬\ior*
\c 1
\p
\v 1 କ୍ରିସ୍ତ ଜିସୁଦି ଦାସ୍‍ ନି ମାପୁରୁସିତିମାନି ସୁସମାଚାର୍‌ ପ୍ରଚାର୍‍ କିଦେଙ୍ଗ୍‌ ଇଜି ପ୍ରେରିତ ସିସୁ ୱାଜା କୁକାୟ୍‍ଆତିମାନି ପାଉଲ୍‍ତି ଆକୁ ।
\p
\v 2 ଦାର୍ମୁସାସ୍ତ୍ରଦୁ ରାସାତି ମାନି ଇସାବ୍‍ତାନ୍‍ ଇୟା ସୁସମାଚାର୍‌ ବିସୟ୍‍ତାନ୍‍ ମାପୁରୁ ପୁରା ପୁର୍ବେକାଡ଼ାରାନ୍‍ ୱାନି ବାବବାଦିରି ମାଣାନ୍‌ ମାଟାସିତା ମାର୍ହାନ୍‍ । 
\v 3 ତେନି ନାଡ଼୍‍ମି ଆଜିନାନ୍‍; ମାପୁରୁଦି ମାରିସି, ମା ପ୍ରବୁ ଜିସୁ କ୍ରିସ୍ତ । ଲୋକାୱାଜା ୱାନ୍‌ ଦାଉଦ୍‍ତି କୁଟୁମ୍‍ । 
\v 4 ମାତର୍‌ ୱାନି ମାପୁରୁଦି ପବିତ୍ର ଆତ୍ମା ଉଣ୍ତିଙ୍ଗ୍‌ ୱାନ୍‌ ମାପୁରୁଦି ମାରିସି ଇଜି ତରାୟ୍‍ଆତାନ୍‍ । ସାନି ମାଣାନ୍‌ ୱାନି ପେରି ସାକ୍ତିଦି ମାରିଡ଼େସି ନିଙ୍ଗିଁନି ମାଣାନ୍‌ ଇକା ମାରି ଟିକ୍‍ ଆତାତ୍‍ । ଜିସୁ କ୍ରିସ୍ତ ମା ପ୍ରବୁ । 
\v 5 କ୍ରିସ୍ତଦି ଉଣ୍ତିଙ୍ଗ୍‌ ମାପୁରୁ ନାଙ୍ଗିଁ ପେରିତ ସିସୁ ୱାଜା ବାସେକିଜି ୱିଜୁଜାତିଦି ଲୋକା ଲାକ୍‍ତୁ ପ୍ରଚାର୍‍ କିଦେଙ୍ଗ୍‌ ଆସିର୍ବାଦ୍‌ ସିତାମାନାନ୍‌, ଏଣ୍ତେସ୍‌ ୱାର୍‌ ଜିସୁମାନୁ ବିସ୍‍ବାସ୍‍ କିଜି ୱାନିଙ୍ଗ୍‍ଁ ମାନାନାର୍‌ । 
\v 6 ରୋମ୍‍ତି ଗାଡ଼୍‍ତୁ ବାସାନିଲୋକୁ ! ମିର୍‌ ବା ଜିସୁ କ୍ରିସ୍ତଦି ସାରିଦୁ ବୁଲାଦେଙ୍ଗ୍‍ ବାସେଆତିମାନିଦେର୍‍ ।
\p
\v 7 ୱେନ୍‌କା ରୋମ୍‍ ଗାଡ଼୍‍ତି ଏମେୱାରିଙ୍ଗ୍‍ ମାପୁରୁ ଲାଡ୍‍କିନାନ୍‍ ମାରି ୱାନି ନିଜେଦି ଲୋକୁ ଇଜି ଆଦେଙ୍ଗ୍‍ଁ ବାସେକିତାମାନାନ୍‍, ଆୟା ୱିଜେରିଙ୍ଗ୍‌ ନାନ୍‍ ଇୟା ଆକୁ ରାସ୍‍ସିନା ।
\p ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍‍ ।
\s ଦନ୍ୟବାଦ ପାର୍‍ତନା
\p
\v 8 ମିର୍‌ ମାପୁରୁବିସ୍‍ବାସି ଇଜି ଦୁନିଆଦୁ ୱିଜୁତରିନ୍‍ ୱେଙ୍ଗିଁତି ମାନିଦେର୍‍ । ଇୟାଉଣ୍ତିଙ୍ଗ୍‌ ପାର୍‍ତୁମ୍‍ ମି ୱିଜେରି ଉଣ୍ତିଙ୍ଗ୍‌ ଜିସୁ କ୍ରିସ୍ତଦି ଦର୍‍ତାନ୍‍ ନାନ୍‍ ମାପୁରୁଙ୍ଗ୍‍ଁ ଦନ୍ୟବାଦ୍‍ ସିଜିନା । 
\v 9 ୱିଜୁ ଜିବନ୍‍ତାନ୍‍ ନାନ୍‍ ଆମା ମାପୁରୁଦି ସେବାକିଜିନା ମାରି ଆମା ମାପୁରୁଦି ମାରିସି ବିସୟ୍‍ତାନ୍‍ ନେଗିକାବୁର୍‌ ପ୍ରଚାର୍‍ କିଜିନା, ଆୟା ମାପୁରୁ ନା ସାକି । 
\v 10 ପାର୍‍ତନା କିନିୱାଲେ ନାନୁ ସବୁୱାଲେ ମିଙ୍ଗିଁ ଏତ୍‍କିନା ମାରି ମି ଲାକ୍‍ତୁ ୱାଦେଙ୍ଗ୍ ଇଜି ନାଙ୍ଗିଁ ସୁଜୋଗ୍‌ ସିଦେଙ୍ଗ୍‍ ମାପୁରୁମାନୁ ବାତିଙ୍ଗ୍‍ମାଲ୍‍ଜି ୱାତାମାନା । 
\v 11 ମି ଲାକ୍‍ତୁ ୱାଜି ନାନୁ ପୟ୍‍ତିମାନି ଆତ୍ମିକ ଦାନ ବିସୟ୍‍ ମିଙ୍ଗିଁ ୱେର୍‌ନି ମାଣାନ୍‌ ମି ବିସ୍‍ବାସ୍‍ତିଙ୍ଗ୍‍ ଡାଟ୍‌ କିନା, ଇକା ନା ଅରେନ୍‌ୱାନି ବଦା । 
\v 12 ଇୟାବାଣାନ୍‍ ମାପ୍‌ ନିଜେନିଜେଦିମାନୁ ବିସ୍‍ବାସ୍‍ତିଙ୍ଗ୍‍ ଆଟ୍‍ୱା କିଦେଙ୍ଗ୍‌ ଆଟ୍‍ନିକା ।
\p
\v 13 ଏ ତଡ଼ାନ୍‍କୁ ନି ତାଙ୍ଗିଁକି, ମି ଲାକ୍‍ତୁ ୱାଦେଙ୍ଗ୍ ଇଜି ନାନୁ ବେସିଦେବେଙ୍ଗ୍‍ ବଦା କିତାମାନା, ମାତର୍‌ ଏସ ବାଦା ଉଣ୍ତିଙ୍ଗ୍‌, ଇୟାସାନ୍ଦି ୱାଦେଙ୍ଗ୍ ଆଟ୍‍ଏତାମାନା । ଆଇ ରାଜିଆଙ୍ଗ୍‍ଁ ଅଣଜିହୁଦି ଲୋକା ଲୋଇ ପ୍ରଚାର୍‍ କିଜି ଏଣ୍ତେସ୍‌ ଜିଣାତାମାନା, ମି ରାଜିଦୁ ବା ଆକା କିଦେଙ୍ଗ୍‌ ନା ବଦା । 
\v 14 ଗ୍ରିକ୍‌ କି ବର୍ବର, ସିକିତ୍‍ ନି ଅସିକିତ୍‍ତି ୱିଜୁଜାତିଦି ଲୋକା ଉଣ୍ତିଙ୍ଗ୍‌ ନା ଦାୟିତ୍‍ ମାନାତ୍‌ । 
\v 15 ଆଦେଙ୍ଗ୍‌ ରୋମ୍‍ ଗାଡ଼୍‍ତି ମି ଲାକ୍‍ତୁ ବା ସୁସମାଚାର୍‌ ପ୍ରଚାର୍‍ କିଦେଙ୍ଗ୍‌ ନା ବଦା ।
\s ସୁସମାଚାର୍‍ତି ସାକ୍ତି
\p
\v 16 \x + \xo ୧:୧୬ \xo*\xt ମାର୍କ ୮:୩୮.\xt*\x*ଆୟା ସୁସମାଚାର୍‌ ମୁସ୍‌କୁ ନା ପୁରା ଆସା ମାନାତ୍‌ । ଆକା ପାର୍‍ତୁମ୍‍ ଜିହୁଦି ଲୋକାମାନୁ ମାରି ୱେନ୍‌କା ଅଣଜିହୁଦି ବିସ୍‍ବାସି ଲୋକାମାନୁ ଉଦାର୍‌ ପାଣି କିଦେଙ୍ଗ୍‌ ଇଜି ମାପୁରୁଦି ସାକ୍ତି ୱାଜା । 
\v 17 ଲୋକ୍‍ ମାପୁରୁ ଲାକ୍‍ତୁ ଏଣ୍ତେସ୍‌ ଦାର୍ମୁତିକାନ୍‍ ଇଜି ୱେଙ୍ଗ୍‍ଁଦେଙ୍ଗ୍‍ ଆଟ୍‍ନାନ୍‍, ତେନି ଉପାୟ୍‌ ଆବେ ତରାୟ୍‍ ଆତାମାନାତ୍‌ । ପାର୍‍ତୁମ୍‍ତାନ୍‌ ସାରାସାରି ସାନ୍ଦି ଉଦାର୍‌ ପୟ୍‍ନି ଉନ୍‍ଣ୍ତ୍ରିମାତ୍ର ଉପାୟ୍‌ ଆଜିନାତ୍‍, ବିସ୍‍ବାସ୍‍ । ବାକ୍ୟ ଇସାବ୍‍ତାନ୍‍, “ଜେ ବିସ୍‍ବାସ୍‍ତାନ୍ ମାପୁରୁଦି ଲାକ୍‍ତୁ ଦାର୍ମୁତିକାନ୍‍ ଇଜି ୱେଙ୍ଗ୍‍ଁନାନ୍‍, ୱାନ୍‌ ଜିନାନ୍‍ ।”
\s ଲୋକ୍‍ ଜାତିଦି ପାପ୍
\p
\v 18 ଏମେ ପାପି ତାଗ୍‍ଇପାଣିକିନି ଲୋକୁ ନିଜେଦି ତାଗ୍‍ଇପାଣିଦାନ୍‍ ସତ୍‍ତି ବାଦା କିନାର୍‌, ୱାରି ମୁସ୍‌କୁ ମୁସ୍‍କୁପୁର୍‍ତାନ୍‍ ମାପୁରୁଦି ରିସା ୱାନାତ୍ । 
\v 19 ଇରିଙ୍ଗ୍‌ ମାପୁରୁ ବିସୟ୍‍ତାନ୍‍ ଆମାକା ନେସ୍‍ନି ମାଟା, ୱାର୍‌ ଆକା ନେସ୍‍ତାମାନାର୍‍ ମାପୁରୁ ନିଜେ ଆକା ନେଗେନ୍‍ ୱେର୍‍ତାମାନାନ୍‍ । 
\v 20 ମାପୁରୁ ଦୁନିଆଦିଙ୍ଗ୍‌ ତିଆର୍‍ କିନି ସମୟ୍‍ତାନ୍‍, ୱାନି ତରାୟ୍‍ଆଇ ଗୁଣ୍‍ ଅର୍ତାତ୍‍ ୱାନି କାବାଆନି ଗୁଣ୍‍ ନି ୱିଜୁଦିନ୍‍ତି ସାକ୍ତି ନେଗେନ୍‍ତାନ୍‍ ତରାୟ୍‍ଆଜି ୱାତାମାନାତ୍‍, ୱାନି ତିଆର୍‍ କିତିମାନି ମାନୁ ଆକା ବ୍ୟବହାର୍ କିଦେଙ୍ଗ୍‌ ଆନାତ୍‌ । ଆଦେଙ୍ଗ୍‌ ୱାର୍‌ ନେସ୍‍ଏର୍‍ ଇଜି ସାଲାକି ତର୍‍ତେଙ୍ଗ୍‍ ଆଟ୍‍ଏର୍‍ । 
\v 21 \x + \xo ୧:୨୧ \xo*\xt ଏପିସିୟ ୪:୧୭,୧୮.\xt*\x*ୱାର୍‌ ମାପୁରୁଙ୍ଗୁଁ ନେସ୍‍ସି ବା ୱାନିଙ୍ଗ୍‌ ଟିକ୍‍ତାନ୍‍ ମାନାଏତାର୍‍ ବା ୱାନିଙ୍ଗ୍‌ ଆମା ବିସୟ୍‍ ଉଣ୍ତିଙ୍ଗ୍‌ ଦନ୍ୟବାଦ୍‍ ସିଏଜିନାର୍‍ । ମାତର୍‌ ୱାରି ସିନ୍ତାୱିଜୁ ଅସାର୍ ନି ୱାରି ମାନାଇ ମୋନ୍‌ ପୁରାସିକାଟି । 
\v 22 ୱାର୍‌ ନିଜେଦିଙ୍ଗ୍‍ ବୁଦିମାନିକାର୍‍ ଅଡ଼୍‍ବିନାର୍‍, ମାତର୍‌ ସତ୍‌ତାନ୍‌ ୱାର୍‌ ମୁର୍କୁ ଆତାର୍‌ । 
\v 23 ୱିଜୁଦିନ୍‍ତି ମାପୁରୁଙ୍ଗୁଁ ଉପାସନା ଗୌରବ୍‍ କିଏଣ୍ତା ୱାର୍‌ ସାନି ଲୋକାଙ୍ଗ୍‍, ଜାତୁ ପଟି ନି ସାରାସ୍‍ୱାଜା ବମେଙ୍ଗ୍‍ ରସ୍‍ସି ୱାନିକାଙ୍ଗ୍‍ଁ ପୁଜାକିଜିନାର୍‍ ।
\p
\v 24 ଆଦେଙ୍ଗ୍‌ ମାପୁରୁ ୱାରି ଜିବନ୍‌ତିଙ୍ଗ୍ ଡ଼ିସ୍‍ତାମାନାନ୍‍ ମାରି ୱାର୍‌ ନିଜେ ନିଜେଦି ଆସା ଇସାବ୍‍ତାନ୍‍ ତାଗ୍‍ଇପାଣିଦୁ ମିସାଜି ତେବାଜିନାର୍‍ ୱାର୍‌ ନିଜେ ନିଜେଦି ମେନ୍ଦଲ୍‌ ଦାରିପାଣି କିନିମାନୁ ମିସାକିଜି ଇଡ୍‍ନାର୍‍ । 
\v 25 ୱାର୍‌ ମାପୁରୁଦି ବିସୟ୍‍ତାନ୍‍ ସତ୍‍ ବାଦ୍‍ଲୁ ମିଚ୍‌ତି ଆସା ଇଡ୍‍ଜିନାର୍‍ । ତିଆର୍‍କିତିୱାନିଙ୍ଗ୍‍ ଉପାସନା କିଏନ୍‍ଣ୍ତା, ୱାର୍‌ ତିଆର୍‍ଆତି ଜିନିସ୍‍କାଙ୍ଗ୍‍ ପୁଜା କିନାର୍‌ । ଜୁଗ୍‌ ଜୁଗ୍‍ ଦନ୍ୟ ଆପିତ୍‍ । ଆମେନ୍‍ ।
\p
\v 26 ୱାର୍‌ ସେମାର୍‍ତି ପାପ୍‍ ପାଣିଦୁ ମିସାତିମାନିଙ୍ଗ୍‌ ମାପୁରୁ ୱାରିଙ୍ଗ୍ ଡ଼ିସ୍‍ତା ସିତାମାନାନ୍‌, ୱାରି ଆଡ଼୍‍ସିକ୍‍ ଟିକ୍‍ତାନ୍‌ ବ୍ୟବହାର୍‌ କିନି ବାଦ୍‌ଲୁ ତାଗ୍‌ଇ ପାଣି ୱିଜୁ କିଜିନେ, 
\v 27 ମାରି ମେମାରୁଙ୍ଗୁଁ ବା ଟିକ୍‌ତାନ୍‌ ଆଡ଼୍‌ସି ୱାଲେ ତେବାଏଣ୍‌ଗା ନିଜେନିଜେଦି ଉଣ୍ତିଙ୍ଗ୍‌ ତାଗ୍‌ଇ ପାଣିଦୁ ନାସ୍ଟୁ ଆଜିନାର୍‍ । ମେମାରୁଙ୍ଗୁଁ ନିଜେନିଜେଦି ୱାଲେ କାଡ଼୍‍ନି ବ୍ୟବହାର୍‌ କିଜିନାର୍‍ ମାରି ଆବେଟ୍‍ ତାଗ୍‌ଇ ପାଣି ଉଣ୍ତିଙ୍ଗ୍‌ ଦଣ୍ତ୍‍ ପୟ୍‍ଜିନାର୍‍ ।
\p
\v 28 ଇୟା ଲୋକୁ ମାପୁରୁଦି ବିସୟ୍‍ତାନ୍‍ ଟିକ୍‍ ସିନ୍ତା ପୟ୍‍ଦେଙ୍ଗ୍‍ ବଦା ସିଲେତାର୍‍ଆକା, ମାପୁରୁ ୱାରିଙ୍ଗ୍ ଡ଼ିସ୍‍ତାମାନାନ୍‍ ମାରି ୱାର୍‌ ତାଗ୍‍ଇମନ୍‍ ଆଜି ଲୋକ୍‍ତି ୱାଜା ବୁଲାଏଜିନାର୍‍ । 
\v 29 ୱାର୍‌ ତାଗ୍‌ଇକାର୍‌, କରାପ୍‌କିନିକାର୍‌, ଆସା ମାରି ତାଗ୍‍ଇପାଣିଦୁ ପୁରାମାନାର୍‌ । ୱାର୍‌ ଆକାର୍‍, କାତ୍‍ନିକାର୍‍, ଜାଟିକିନିକାର୍‍, ଟକେକିନିକାର୍‍ ମାରି ରିସାଆନିକାର୍‌; ୱାର୍‌ ଆଇୱାରିଙ୍ଗ୍‌ ସୁରି ୱାର୍‌ଗିନାର୍‌; 
\v 30 ୱାର୍‌ ମାପୁରୁଦି ଲାକ୍‍ତୁ କାଡ଼୍‌ନିକାର୍‍; ଅମାନ୍ୟ, ଆକାର୍‍ ମାରି ନିଜେଦିଙ୍ଗ୍‌ ତରାୟ୍‌ଆନିକା; ତାଗ୍‍ଇପାଣିଦି ଇନିଇନି ଉପାୟ ୱାର୍‌ କିଜିମାନାର୍‍; ୱାର୍‌ ବୁବାୟାୟାରିଙ୍ଗ୍‍ ମାନାଏର୍‍, 
\v 31 ୱାର୍ ବୁଦିସିଲିକାର୍‍, ନିଜେଦି ସିତିମାଟାଦିଙ୍ଗ୍‍ ଇଡିଏର୍‍ । ଆଇୱାରି ଉଣ୍ତିଙ୍ଗ୍‍ଁ ୱାରି ଅଡ଼ପ୍‍ବା ଦୟା ସିଲେତ୍‍ । 
\v 32 ୱାର୍‌ ନେସ୍‍ନାର୍‍ ଜେ, ମାପୁରୁଦି ନିୟମ୍‍ ଇସାବ୍‍ତାନ୍‍ ଇୟାନାନି ଲୋକୁ ସାନିଦଣ୍ତ୍‍ ପୟ୍‍ଦେଙ୍ଗ୍‍ ଜଗ୍‌ । ଇକା ନେସ୍‍ସି ବା ୱାର୍‌ ଆୟାୱାଜା ତାଗ୍‍ଇପାଣି କିନାର୍‌ ମାରି ଆକା କିଜିମାନି ଲୋକାଙ୍ଗ୍‍ ସାରି ସିନାର୍‍ ।
\c 2
\s ମାପୁରୁଦି ନ୍ୟାୟ୍‍ ବିଚାର୍‍
\p
\v 1 ଏ ତଡ଼ାନ୍‍କୁ ନି ତାଙ୍ଗିକ୍, ମିର୍‌ ଇନିକା ଆଇୱାରି ବିଚାର୍‌ କିଜିନିଦେର୍‍ ? ମିର୍‌ ଜେ ଏମେ ଲୋକ୍‍ ଆତିଙ୍ଗ୍‌ବା, ଇକା କିନିକା ମି ଇସାବ୍‍ତାନ୍‍ ଟିକ୍‍ ସିଲେ । ଆଇୱାରି ଦୋସ୍‍ ଆସ୍‌ସି ମିର୍‌ ଜଦି ନିଜେ ଆକା କିଜିମାନିଦେର୍‍, ଆବେଣାନ୍‍ ମିର୍‌ ନିଜେଦିଙ୍ଗ୍‍ ଦସି କିଜିନିଦେର୍‍ । 
\v 2 ମାପ୍‌ ନେସ୍‍ନାପ୍‍, ମାପୁରୁ ଇୟାୱାଜା କିଜିମାନି ଲୋକ୍‍ତି ଟିକ୍‍ ବିଚାର୍‍ କିନାନ୍‍ । 
\v 3 ଏ ତଡ଼ାନ୍‍କୁ ନି ତାଙ୍ଗିକ୍, ଆମା ତାଗ୍‌ଇ ପାଣି ଉଣ୍ତିଙ୍ଗ୍‌ ମିର୍‌ ଆଇୱାରିଙ୍ଗ୍‌ ବିଚାର୍‌ କିଜିନିଦେର୍‍, ଆକା ଜଦି ମିର୍‌ ନିଜେ କିଜିମାନିଦେର୍‍, ମିର୍‌ ମାପୁରୁଦି ବିଚାର୍‍ତି ଆଏପ୍‍ ଇଜି ଇନିକା ଅଡ଼ବିଜିନିଦେର୍‍ ନ ? 
\v 4 ଆନାତ୍‌, ମିର୍‌ ମାପୁରୁଦି ୱିଜ୍‍ଇ ଦୟା, ସାସ୍‌, ମାରି ଉଦାର୍‌କିନିତାନିଙ୍ଗ୍‍ ମାନାଇଜିନିଦେର୍‍ । ମିର୍‌ ଜଦିବା ନେସ୍‍ତିମାନିଦେର୍‍ ଜେ, ମି ମନ୍‍ତୁ ଅନୁତାପ୍‍ ତାତେଙ୍ଗ୍‍ ଇଜି ମାପୁରୁ ନିସା ଦୟା କିଜିନାନ୍‍ । 
\v 5 ମାତର୍‌ ମିର୍‌ ଗର୍ବ ନି ଆଟ୍‍ୱା ମୋନ୍‌ । ଆଦେଙ୍ଗ୍‌ ସେସ୍‍ ଦିନ୍‍ତି ବିଚାର୍‍ତିୱାଲେ ମିର୍‌ ମାପୁରୁଦି ଦଣ୍ତ୍‍ତି ଲୋକ୍‍ ଆଜି ନାଣ୍ତ କାସ୍ଟୁ ଦଣ୍ତ୍‍ ପୟ୍‍ନିଦେର୍‍ । 
\v 6 ଇରିଙ୍ଗ୍‌ ମାପୁରୁ ୱିଜେରିଙ୍ଗ୍‌ ୱାନି ପାଣି ଇସାବ୍‍ତାନ୍‍ ପଲ୍‍ ସିନାନ୍‍ । 
\v 7 ଏସୋଲୋକ୍‍ ଗୌରବ୍‍, ସନ୍‌ମାନ୍‌ ନି ୱିଜୁଦିନ୍‌ ତେବାନି ଆସାଦାନ୍‍ ଦର୍ଜଦାନ୍‍ ସତ୍‍ ପାଣି କିନା ସନାନ୍‍, ୱାରିଙ୍ଗ୍ ମାପୁରୁ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ସିନାନ୍‍ । 
\v 8 ଆଇକାର୍‌ ନିଜେଦିଙ୍ଗ୍‍ ସୁଣାର୍‍, ସତ୍‍ ସାରି ଡ଼ିସ୍‍ସି, ତାଗ୍‍ଇ ସାରି ସନାର୍‍ । ୱାରି ମୁସ୍‌କୁ ମାପୁରୁଦି ନାଣ୍ତ ରିସା ଆନାନ୍‍ । 
\v 9 ଏମେକାର୍‌ ତାଗ୍‍ଇ ପାଣିଦୁ ମିସାନାର୍‍, ୱାରି ଉଣ୍ତିଙ୍ଗ୍‌ ଦୁକୁ ନି କାସ୍ଟୁଦି ଦିନ୍‍ ୱାଜିନାତ୍‍ । ପାର୍‌ତୁମ୍‍ ଜିହୁଦି ଲୋକା ମୁସ୍‌କୁ ମାରି ତାନେୱେନ୍‌କା ଗ୍ରିକ୍‌ ଲୋକା ଉଣ୍ତିଙ୍ଗ୍‌ । 
\v 10 ମାତର୍‌ ଏମେକାର୍‌ ନେଗିପାଣି କିଜିମାନାର୍‍, ୱାର୍‌ ଜିହୁଦି ଲୋକୁ ଆପିର୍‍, ଅଣଜିହୁଦି ଲୋକୁ ଆପିର୍‍, ୱାରିଙ୍ଗ୍ ମାପୁରୁ ସମ୍ମାନ୍‍, ଗୌରବ୍‍ ନି ସାନ୍ତି ସିନାନ୍‍ । 
\v 11 ଇରିଙ୍ଗ୍‌ ମାପୁରୁ ଉନ୍‍ଣ୍ତ୍ରି ସାମାନ୍‌ଇସାବ୍‍ତାନ୍‌ ବିଚାର୍‍ କିନାନ୍‍ । 
\v 12 ଅଣଜିହୁଦି ଲୋକୁ ମସା ରାସ୍‍ତି ନିୟମ୍‍ ପୟ୍‍ଏର୍‍ । ନିୟମ୍‍ ପୟ୍‍ଏନ୍‍ଣ୍ତା ପାପ୍‍ କିତାର୍‌, ୱାର୍‌ ନିୟମ୍‍ ସିଲେଣ୍‌ଗା ସାନାର୍‍ । ଆଇ ଇସାବ୍‍ତାନ୍‍ ଜିହୁଦିଲୋକୁ ନିୟମ୍‍ ନେସ୍‍ତାମାନାର୍‍ ଆକା, ୱାର୍‌ ପାପ୍‍ କିତାର୍‌, ଆୟା ନିୟମ୍‍ ଇସାବ୍‍ତାନ୍‍ ବିଚାର୍‌ ଆନାର୍‍ । 
\v 13 ଇରିଙ୍ଗ୍‌ କେବଲ ନିୟମ୍‍ ୱେନି ମାଣାନ୍‌ ଲୋକୁ ମାପୁରୁଦି ଆଗ୍‍ଡ଼ି ଦାର୍ମୁ ଇଜି ୱେଙ୍ଗ୍‍ଦେଙ୍ଗ୍‍ଁ ଆଟ୍‍ଏର୍‍, ମାତର୍‌ ନିୟମ୍‍ ମାନାନି ମାଣାନ୍‌ ଦାର୍ମିକ ଇଜି ଗଣେଆନାର୍ । 
\v 14 ଅଣଜିହୁଦି ଲୋକା ନିୟମ୍‍ ସିଲେତ୍‍, ମାତର୍‌ ଜଦି ୱାର୍‌ ସାମାନ୍‍ତାନ୍‌ ନିୟମ୍‍ତି ବିସୟ୍‍କୁ ମାନାନାର୍‌, ଆକାନେ ୱାରି ନିୟମ୍‍ତି ୱାଜା । 
\v 15 ୱାରି ପାଣିଦାନ୍‍ ଇକା ଟିକ୍‍ ଆନାତ୍‌ ଜେ, ନିୟମ୍‍ତି ରାସାତିକା ୱାରି ଜିବନ୍‍ତୁ ରାସାତା ମାନାତ୍‌ । ଇୟା ମାଟାଦି ସତ୍‍ ୱାରି ମନ୍‍ତାନ୍‍ ବା ପାର୍‍ମାଣ୍‍ ଆନାତ୍‌ ସତ୍‍ସିନ୍ତା କିନିୱାଲେ ମନ୍ ୱାରିଙ୍ଗ୍ ସାକା କିନାତ୍‍, ତାଗ୍‍ଇସିନ୍ତା ୱାଲେ ଦସି କିନାତ୍‍ । 
\v 16 ଆମା ନାଣ୍ତିଙ୍ଗ୍‍ ମାପୁରୁ ଜିସୁ କ୍ରିସ୍ତଦି ମାଣାନ୍‌ ଲୋକା ମାର୍‍ଗିତି ବିସୟ୍‍ୱିଜୁ ବିଚାର୍‌ କିନାନ୍‍, ଆୟା ନାଣ୍ତିଙ୍ଗ୍‍ ନାନୁ ପ୍ରଚାର୍‍ କିତିମାନି ସୁସମାଚାର୍‌ ଇସାବ୍‍ତାନ୍‍ ଇୟାୱିଜୁ ଗଟାନାତ୍‌ ।
\s ଜିହୁଦିଲୋକୁ ନି ନିୟମ୍‍
\p
\v 17 ମିର୍‌ ନିଜେଦିଙ୍ଗ୍‍ ଜିହୁଦି ଲୋକୁ ଇଜିନିଦେର୍‌, ମୋସାଦି ନିୟମ୍‍ ମୁସ୍‌କୁ ଆସା ଇଡ୍‍ଜି ମାରି ମାପୁରୁଦି ୱାଲେ ନିଜେ ମିସାନିକା ଅସି ଗର୍ବ କିଜିନିଦେର୍‍; 
\v 18 ମି ଉଣ୍ତିଙ୍ଗ୍‌ ମାପୁରୁଦି ବଦା ନେସ୍‍ତି ମାନିଦେର୍‍ ମାରି ନିୟମ୍‍ତି ସତ୍‍ ନି ଅସତ୍‍ ବୁଦି ପୟ୍‍ତିମାନିଦେର୍‍; 
\v 19 ସତେନେ ନେସ୍‍ତିମାନିଦେର୍‍, ଜେ ମିର୍‌ କାଣାଦିଙ୍ଗ୍‌ ସାରିତର୍‌ନିଲୋକୁ, ସିକାଟିଦୁ ମାନି ଲୋକା ଉଣ୍ତିଙ୍ଗ୍‌ ଜାୟ୍‌ ୱାଜା, 
\v 20 ବୁଦିସିଲି ଲୋକାଙ୍ଗ୍‍ ବୁଦିୱେର୍‍ନିକା, ନେସ୍‌ଇ ଲୋକାରି ଗୁରୁ । ମି ବିସ୍‍ବାସ୍‍ ଜେ, ନିୟମ୍‍ତାନ୍‍ ମିର୍‌ ପୁରା ସତ୍‍ ନି ବୁଦି ପୟ୍‍ତିମାନିଦେର୍‍ । 
\v 21 ମିର୍‌ ଆଇୱାରିଙ୍ଗ୍‌ ଅଜା କିଜିନିଦେର୍‍, ମାତର୍‌ ନିଜେ ଏନ୍ଦା ଅଜାଇଜିନିଦେର୍‍ ? “ଡଙ୍ଗାଁ କିମାଟ୍‌” ଇଜି ଅଜା କିଜି ନିଜେ ଡଙ୍ଗାଁ କିଜିନିଦେର୍‍ ? 
\v 22 “ଦାରିପାଣି କିମାଟ୍‌” ଇଜି ୱେର୍‍ସି ନିଜେ ଦାରିପାଣି କିଜିନିଦେର୍‍ନୋ ? ମିର୍‌ ବମା ପୁଜାଦି କାଡ଼୍‍ଜି ମନ୍ଦିର୍‌ତିଙ୍ଗ୍‌ ଡଙ୍ଗାଁ କିଇଜିନିଦେର୍‍ ? 
\v 23 ମିର୍‌ ମାପୁରୁଦି ନିୟମ୍‍ ପୟ୍‍ତାମାନାପ୍‍ ଇଜି ଗର୍ବ କିଜିନିଦେର୍‍, ମାତର୍‌ ତାନିଙ୍ଗ୍‍ ମାନାଇଜି ମାପୁରୁଙ୍ଗୁଁ ଅପମାନ୍‍ କିଜିନିଦେର୍‍ନୋ ? 
\v 24 ସାସ୍ତ୍ରଦୁ ରାସାତା ମାନାତ୍‌, “ମି ଉଣ୍ତିଙ୍ଗ୍‍ଁ ଅଣଜିହୁଦି ଲୋକା ଲୋଇ ମାପୁରୁ ନିଦା ପାଏ ଆଜିନାନ୍‍ ।”
\p
\v 25 ଜଦି ନିୟମ୍‍ ମାନାଜିମାନିଦେର୍‍; ମି ସୁନ୍ନତ ମାଟାଦି ଇସାବ୍‌ ମାନାତ୍‌ । ମାତର୍‌ ଜଦି ନିୟମ୍‍ ଅମାନ୍ୟ କିନିଦେର୍‍, ମିର୍‌ ସୁନ୍ନତ ଆଇ ମାନି ଲୋକା ୱାଲେ ସାମାନ୍‍ । 
\v 26 ଜଦି ସୁନ୍ନତ ଆଇ ମାନି ଅରେନ୍‍ ଅଣଜିହୁଦି ଲୋକୁ ନିୟମ୍‍ତି ବିଦି ୱିଜୁ ମାନାଜିମାନାନ୍‍, ମାପୁରୁ ୱାନିଙ୍ଗ୍‌ ସୁନ୍ନତ ୱାଜା ଆସ୍‍ଏନ୍‍ ନୋ ? 
\v 27 ଆଦେଙ୍ଗ୍‌ ମେନ୍ଦଲ୍‌ତୁ ସୁନ୍ନତ ଆଇ ମାନି ଏମେ ଅଣଜିହୁଦି ଲୋକୁ ନିୟମ୍‍ ମାନାନାର୍‌, ୱାର୍‌ ମି ବିଚାର୍‌ କିନାର୍‌, ଇରିଙ୍ଗ୍‌ ମିର୍‌ ମେନ୍ଦଲ୍‌ତୁ ସୁନ୍ନତ ଆଜି ନିୟମ୍‍ ପୟ୍‍ତି ମାରିଙ୍ଗ୍‍ଁ ବା, ଆକା ଅମାନ୍ୟ କିଜିନିଦେର୍‍, 
\v 28 କେବଲ ମେନ୍ଧଲ୍‍ ଇସାବ୍‍ତାନ୍‍ ସୁନ୍ନତ ଆଜି ମୁସ୍‌କୁ ଜିହୁଦିଲୋକୁ ଇଜି ତର୍‍ଆୟ୍‍ ଆଜିମାନି ଲୋକୁ ସତ୍‌ତାନ୍‌ ଜିହୁଦି ଲୋକୁ ସିଲେ । 
\v 29 ଏନ୍‌ ଜିବନ୍‍ତୁ ଜିହୁଦି, ୱାନ୍‌ ଆଜିନାନ୍‍ ସତ୍‌ତାନ୍‌ ଜିହୁଦି । ସତ୍‍ ସୁନ୍ନତ ଜିବନ୍‍ତି ବିସୟ୍‍; ଆକା ଆତ୍ମିକ, ରାସାତିକା ଆଏତ୍‍ । ଇୟାୱାଜା ଲୋକୁ ମାଣାନ୍‌ ୱେଡ଼ିକା ପୟ୍‍ଦେଙ୍ଗ୍‌ ଆଟ୍‌ଏନ୍‍; ୱାନ୍‌ ଆକା ପୟ୍‍ନାନ୍‍ ମାପୁରୁଦିମାଣାନ୍‌ ।
\c 3
\p
\v 1 ଆର୍‌ତିଙ୍ଗ୍‌ ଅଣଜିହୁଦି ଲୋକା ମାଣାନ୍‌ ଜିହୁଦି ଲୋକା ନାଣ୍ତ ସୁବିଦା ଇନିକା ? ସୁନ୍ନତ ମାଡ଼ାନ୍‍କୁ ନେଗିକା ଇନିକା ? 
\v 2 ନାଣ୍ତ ମାନାତ୍‌ । ପାର୍‍ତୁମ୍‍, ମାପୁରୁ ୱାନି ମାଟାଦି ଦାୟିତ୍‍ ଜିହୁଦିଲୋକା ମୁସ୍‌କୁ ସିତା ମାନାନ୍‌ । 
\v 3 ଆନାତ୍‌ ଏସ ଲୋକୁ ବିସ୍‍ବାସ୍‍ତୁ ତେବାଏର୍‍ । ମାତର୍‌ ଆକା ଇଜି ଇନିକା ମାପୁରୁଦି ବିସ୍‍ବାସ୍‍ ଆରେଏ ଆନାତ୍‌ ? 
\v 4 ଏସାଙ୍ଗ୍‍ ସିଲେ । ଲୋକୁ ୱିଜେରେ ମିଚୁଆର୍‍ ଆତିଙ୍ଗ୍‌ବା, ମାପୁରୁ ସତ୍‍ । ସାସ୍ତ୍ରଦୁ ରାସାତାମାନାତ୍‌ :
\q1 “ନି ବାକ୍ୟ ଦାନ୍‌ ନିନୁ ସତ୍‌ ଇଜି ପାର୍‍ମାଣ୍‍ ଅଆୟ୍‍ଆନି,
\q2 ନିନୁ ବିସାର୍‍ ଆନିୱାଲେ ନିନୁ ଜିଣାନି ।”
\p
\v 5 ଇବେ ଉଣ୍ତ୍ରି ମାଟା ଆନାତ୍‌, ଜଦି ମା ଅଦାର୍ମୁ ମାପୁରୁଦି ଦାର୍ମୁଦିକା ପାର୍‍ମାଣ୍‍ କିନାତ୍‍, ଆର୍‌ତିଙ୍ଗ୍‌ ମାପୁରୁ ମାଙ୍ଗିଁ ଦଣ୍ତ୍‍ ସିଜି ଅନ୍ୟାୟ୍‍ କିଜିନାନ୍‍ ଇଜି ଇନ୍‌ଡ୍ରେଙ୍ଗ୍‌ ଆଟ୍‍ନିକା ନୋ ? ନାନୁ ଲୋକା ୱାଜା ଇଜିନା । 
\v 6 ଏସାଙ୍ଗ୍‍ ସିଲେ । ମାପୁରୁ ଜଦି ନିୟାୟ୍‍ କିନିକାନ୍‍ ଆଏନ୍‍, ୱାନ୍‌ ଏଣ୍ତେସ୍‌ ଦୁନିଆଦିଙ୍ଗ୍‍ ନ୍ୟାୟ୍‍ ବିସାର୍‍ କିନାନ୍‍ ?
\p
\v 7 ମାତର୍‌ ଜଦି ନା ଅସତ୍‍ଦାନ୍‍ ମାପୁରୁଦି ସତ୍‍ମାଟା ନାଣ୍ତ ନେଗେନ୍‍ତାନ୍‍ ୱେଙ୍ଗ୍‍ଁନାତ୍‍ ମାରି ୱାନ୍‌ ଗୌରବ୍‍ ପୟ୍‍ନାନ୍‍, ନାନୁ ପାପି ଇଜି ଏନ୍ଦା ବିଚାର୍‌ ଆଜିନା ? 
\v 8 ମାଡୁ ଏନ୍ଧା ୱେର୍‌ଇକା, “ରାଦୁ ତାଗ୍‌ଇପାଣି କିନାଟ୍‌, ରାଦୁ ଇବେଟ୍‌ତାନ୍‌ ନେଗି ପଲ୍‌ ଆସ୍‌ତେଙ୍ଗ୍‌ ?” ନାନୁ ଟିକ୍‍ ଇୟାୱାଜା ମାଟା ଇଜିନା ଇଜି ଦାବି କିଜି ଏସଲୋକ୍‌ ନାଙ୍ଗିଁ ନିଦା କିଜିନାର୍‍ । ୱାର୍‌ ଇୟାଉଣ୍ତିଙ୍ଗ୍‌ ଏମେ ଦଣ୍ତ୍‌ ପୟ୍‍ନି ମାଟା, ସତେନେ ପୟ୍‍ନିଦେର୍‍ ।
\s ଏନ୍‌ ଦାର୍ମୁତିକାନ୍‍ ସିଲେ
\p
\v 9 ଆର୍‌ତିଙ୍ଗ୍‌ ଇଜିନା ଜିହୁଦିଲୋକା ଅବସ୍ତା ଅଣଜିହୁଦି ଲୋକା ମାଣାନ୍‌ ନାଣ୍ତ ନେଗିକା ? ଏସାଙ୍ଗ୍‍ ସିଲେ । ନାନୁ ଆଗ୍‍ଡ଼ିରାନ୍‍ ୱେର୍‍ତାମାନା ଜେ, ରିଏର୍‌ ଜିହୁଦି ନି ଅଣଜିହୁଦି ପାପ୍‍ତି ବାଡ଼ିଦୁ ମାନାର୍‌ । 
\v 10 ଦର୍ମସାସ୍ତ୍ରଦୁ ରାସାତାମାନାତ୍‌ :
\q1 “ଦାର୍ମୁତିକାନ୍‍ ଏନ୍‌ ସିଲେନ୍‌, ଅରେନ୍‍ ବା ସିଲେନ୍‌,
\q2
\v 11 ଅରେନ୍‍ ଲୋକ୍‌ ବା ବୁଦିଦିକାନ୍‍ ନି ମାପୁରୁଦି ସତ୍‌ତାନ୍‌ ସେବାକିନିକାନ୍‍ ଏନ୍‌ ସିଲେନ୍‌ ।
\q1
\v 12 ୱାର୍‌ ୱିଜେରେ ମାପୁରୁଦି ମାଣାନ୍‌ ଆକ ସର୍ହାମାନାର୍‍;
\q2 ୱିଜେରେ ବାଣାତା ମାନାର୍‍ ।
\q2 ଏନ୍‌ ଅରେନ୍‍ ବା ସତ୍‍ପାଣି କିଏଜିନାର୍‍ ।
\q1
\v 13 ୱାରି ମାଟାଦୁ ସାପିସ୍‌କିନି ନାନି ସାଲାକି,
\q2 ୱେୟୁଦାନ୍‌ ମିସ୍‍ତି ବଲ୍‍ ସତାନେ,
\q2 ୱେୟୁଦାନ୍ କତ୍‍ନି ସାରାସ୍‍ତି ୱିସାମ୍‍ ।
\q2
\v 14 ୱାରି ମାଟା କେୟ୍‍ନାତ୍‍ ମାରି ଆନାଦୁରିଆଦୁ ବର୍ତି ।
\q1
\v 15 ୱାର୍‌ ଡାକ୍‍ତେଙ୍ଗ୍‍ ନି କାତ୍‍ତେଙ୍ଗ୍‍ ପୁରା ଆନାର୍‍;
\q2
\v 16 ୱାର୍‌ ଏମେ ତରିନ୍‌ ସନାର୍‍, ଆବେ ସାନିକା ନି କାସ୍ଟୁ ଗଟାନାତ୍‌ ।
\q1
\v 17 ୱାର୍‌ ସାନ୍ତିଦି ସାରି ନେସ୍‍ଏର୍‍,
\q2
\v 18 ୱାରି କାଣାଗାଦୁ ମାପୁରୁଙ୍ଗ୍‍ଁ ତିଲାନିକା ୱାର୍‌ ଅଜାଏର୍‍ ।”
\p
\v 19 ମାଡ୍‌ ନେସ୍‍ନିକା, ଏମେକାର୍‌ ନିୟମ୍‍ତି ଆଡ୍‍ଗି, ତାନି ନିତିନିୟମ୍‍ ୱାର୍‌ ମାନାଦେଙ୍ଗ୍‍ ଆନାତ୍‌ । ମାପୁରୁ ଏସ୍ତିୱାଲେ ୱିଜୁ ଦୁନିଆଦି ବିସାର୍‍ କିନାନ୍‍, ନିୟମ୍‍ ମାନାଇକାର୍‍ ଇନି ବାଣ୍ତିସ୍‍ କିଜି ନିଜେଦିଙ୍ଗ୍‍ ଦସ୍‍ସିଲିକାନ୍‍ ଇଜି ୱେର୍‍ତେଙ୍ଗ୍‍ ଆଟ୍‍ଏନ୍‍ । 
\v 20 \x + \xo ୩:୨୦ \xo*\xt ଗାଲାତିୟ ୨:୧୬.\xt*\x*ମାତର୍‌ ନିୟମ୍‍ତି ପାଣିୱିଜୁ କିଜି ଆମା ମାପୁରୁଦି ଆଗ୍‍ଡ଼ି ଦାର୍ମୁତିକାନ୍‍ ଇଜି ୱେଙ୍ଗ୍‍ଦେଙ୍ଗ୍‍ ଆଟ୍‍ଏନ୍‍ । ନିୟମ୍‍ତାନ୍‍ ଲୋକୁ କେବଲ ପାପ୍‍ତି ବିସୟ୍‍ ନେସ୍‍ତେଙ୍ଗ୍‍ ଆଟ୍‍ନାନ୍‍ ।
\s ବିସ୍‍ବାସ୍‍ତୁ ଦାର୍ମୁ ଆନିକା
\p
\v 21 ମାପୁରୁ ନିଜେଦି ୱାଲେ ଲୋକାଙ୍ଗ୍‍ ମିସାକିଦେଙ୍ଗ୍‍ ଇଜି ନିୟମ୍‍ ଆତ୍‌ରେ ଆମାକା କିତାମାନାନ୍‌, ଆକା ଇଲେଇ ତରାତାମାନାତ୍‍ । ଇୟା ବିସୟ୍‌ତାନ୍‌ ମସାଦି ନିୟମ୍‌ ନି ବାବବାଦିର୍‍ ବା ସାକି ସିତାମାନାର୍‍ । 
\v 22 \x + \xo ୩:୨୨ \xo*\xt ଗାଲାତିୟ ୨:୧୬.\xt*\x*କେବଲ ଜିସୁ କ୍ରିସ୍ତମାନୁ ବିସ୍‍ବାସ୍‍ କିନିମାଣାନ୍‍ ଲୋକୁ ମାପୁରୁଦି ଆଗ୍‍ଡ଼ି ଦାର୍ମୁତିକାନ୍‍ ଇଜି ୱେଙ୍ଗ୍‍ଁନାନ୍‍ । ମାପୁରୁ ଆମା ଲୋକୁତିଙ୍ଗ୍ ଆଙ୍ଗ୍‍ଏଜି କ୍ରିସ୍ତମାନୁ ବିସ୍‍ବାସ୍‍ କିଜିମାନି ୱିଜେରିଙ୍ଗ୍‌ ଇୟା ସାରି ସିନାନ୍‍ । 
\v 23 ୱିଜେରେ ପାପ୍‌ କିତାମାନାର୍‍ ମାରି ମାପୁରୁଦି ମହିମାଦି ପୁରାଆନିମାନୁ ପୟ୍‍ଏତା ମାନାର୍ । 
\v 24 ମାତର୍‌ ମାପୁରୁ କ୍ରିସ୍ତ ଜିସୁଦି ମାଣାନ୍‌ ଆର୍‍ଏନେ ଆମା ଦୟା ସିତା ମାନାନ୍‌, ଆକା ଏମେକାର୍‌ ମାନାନାର୍‌, ୱାରିଙ୍ଗ୍ ପ୍ରବୁ ଜିସୁ ଜିପିସ୍‍ନାନ୍‍ ମାରି ୱାର୍‌ ମାପୁରୁ ଆଗ୍‍ଡ଼ି ଦାର୍ମୁତିକାର୍‍ ଆନାର୍‍ । 
\v 25 ମାପୁରୁ ଜିସୁଙ୍ଗୁଁ ଦାନ କିତାନ୍‌, ଏଣ୍ତେସ୍‌ ୱାନି ସାନିକା, ୱାନି ମାନୁ ବିସ୍‍ବାସ୍‍ କିଜିମାନି ଲୋକା ପାପ୍‍ କେମାଦି ଉପାୟ୍ ଆନାତ୍‌ । ମାପୁରୁ ନିଜେଦି ଦାର୍ମୁ ତର୍‍ତେଙ୍ଗ୍‍ ଇକା କିତାନ୍‍ । ମାପୁରୁ ସାସ୍‌ ଆସ୍‌ସି ଲୋକା ଆଗ୍‍ଡ଼ିକିତି ପାପ୍‍ ଆସ୍‍ଏନ୍‍ । 
\v 26 ମାତର୍‌ ଇଲେଇ ୱାନ୍‌ ନିଜେଦି ଦାର୍ମୁ ତର୍‍ତେଙ୍ଗ୍‍ କିନି ଉଣ୍ତିଙ୍ଗ୍‌ ପାପ୍‍ କେମାଦି ନିୟମ୍‍ କିତାମାନାନ୍‌ । ଇୟାମାଣାନ୍‍ ମାପୁରୁ ତର୍‍ସି ସିତାମାନାନ୍‌ ଜେ, ୱାନ୍‌ ନିଜେ ଦାର୍ମୁତିକାନ୍‍ ମାରି ଏମେକାର୍‌ ଜିସୁମାନୁ ବିସ୍‍ବାସ୍‍ କିନାର୍‌, ଆୟା ୱିଜେରିଙ୍ଗ୍‌ ଦାର୍ମୁତିକାର୍‍ ୱାଜା ଆସ୍‍ନାନ୍‍ ।
\p
\v 27 ଆର୍‌ତିଙ୍ଗ୍‌ ଆମା ବିସୟ୍‍ତାନ୍‍ ଗର୍ବ କିନାଟ୍‍ ? ସିଲେ, ଆୟାୱାଜା ମାଟା ଇନିକା ସିଲେତ୍‍ । ଗାର୍ବୁ କିନି ଉଣ୍ତିଙ୍ଗ୍‌ ମା ଇନି ମାଟା ମାନ୍‍ଡ୍ରେଙ୍ଗ୍‍ଁ ଆଟ୍‍ନାତ୍‍ ? ଇନିକା ନିୟମ୍‍ ପୁରାପୁରି ମାନାଜିନିକା ଇଜି ? ସିଲେ, କେବଲ ବିସ୍‍ବାସ୍‍ ନେ ମା ଗାର୍ବୁ ମାଟା । 
\v 28 ମାଡ୍‌ ସତ୍‌ତାନ୍‌ ବୁଜାଦେଙ୍ଗ୍‍ ଆଟ୍‍ସିନାପ୍‍ ଜେ, ଅରେନ୍‍ କେବଲ ୱାନି ବିସ୍‍ବାସ୍‍ତାନ୍ ମାପୁରୁ ଆଗ୍‍ଡ଼ି ଦାର୍ମୁତିକାନ୍‍ ଆନାନ୍‍ ନିୟମ୍‍ ମାନାନି ମାଣାନ୍‌ ସିଲେ । 
\v 29 ମାପୁରୁ ଇନିକା କେବଲ୍‌ ଜିହୁଦିଲୋକା ମାପୁରୁ ? ୱାନ୍‌ ଇନିକା ଅଣଜିହୁଦି ଲୋକା ମାପୁରୁ ଆଏନ୍‍ ? ସତେନେ ୱାନ୍‌ ୱିଜେରି ମାପୁରୁ । 
\v 30 \x + \xo ୩:୩୦ \xo*\xt ଗାଲାତିୟ ୩:୨୦.\xt*\x*ମାପୁରୁ ଅରେନ୍‍ । ରୁଣ୍ତି ଜିହୁଦି ନି ଅଣଜିହୁଦି ଲୋକା ବିସ୍‍ବାସ୍‍ ଉଣ୍ତିଙ୍ଗ୍‌ ୱାନ୍‌ ୱାରିଙ୍ଗ୍ ଦାର୍ମୁତିକାର୍‍ ୱାଜା ଆସ୍‍ନାନ୍‍ । 
\v 31 ତେନି ଅର୍ତ ଇନିକା, ମାଡ୍‌ ବିସ୍‍ବାସ୍‍ତାନ୍ ନିୟମ୍‍ତିଙ୍ଗ୍‍ଁ ନାସ୍ଟୁ କିଦେଙ୍ଗ୍‌ ସୋଲ୍‍ସିନାପ୍‍ ନୋ ? ଏସାଙ୍ଗ୍‍ ସିଲେ । ବିସ୍‍ବାସ୍‍ ତାନ୍‍ ମାପ୍‌ ନିୟମ୍‍ତି ମୁଲ୍‌ କୁନାଦି ଆଟ୍‍ୱା କିଜିନାପ୍‍ ।
\c 4
\s ଅବ୍ରାହାମତି ଜିନିକା
\p
\v 1 ଆର୍‌ତିଙ୍ଗ୍‌ ମେନ୍ଦଲ୍‌ ଇସାବ୍‌ତାନ୍‌ ମା ପୁର୍ବେଦି ବୁବା ଅବ୍ରାହାମତି ଇନିକା ପୋଇତାମାନାନ୍‌ ଇଜି ଇନିକା ଇନାଟ୍‍ ? 
\v 2 ଜଦି ୱାନି ନିଜେଦି ପାଣି ଅବ୍ରାହାମ ୱାନ୍‌ ମାପୁରୁଦି ଆଗ୍‍ଡ଼ି ଦାର୍ମୁଦିକାନ୍‍ ୱେଙ୍ଗିଁତାନ୍‌ମାନ୍ଦି, ଗାର୍ବୁ କିଦେଙ୍ଗ୍ ଇଜି ୱାନି ମାଟା ମାର୍ହାତ୍‌ । ମାତର୍‌ ମାପୁରୁ ଆଗ୍‍ଡ଼ି ଆକା ଆଏତ୍‍ମାର୍ହାତ୍‍ । 
\v 3 \x + \xo ୪:୩ \xo*\xt ଗାଲାତିୟ ୩:୬.\xt*\x*ଦାର୍ମୁସାସ୍ତ୍ର ଇସାବ୍‍ତାନ୍‍, “ଅବ୍ରାହାମ ମାପୁରୁମାନୁ ବିସ୍‍ବାସ୍‍ କିତାନ୍‍ ମାରି ଇୟା ବିସ୍‍ବାସ୍‍ ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ଦାର୍ମୁଦିକାନ୍‍ ଆସ୍‌ତାନ୍‌ ।” 
\v 4 ଏନ୍‌ ପାଣି କିନାନ୍‍, ୱାନି କୁଲି ପଇନାନ୍‌ ଆମାୱାନିମାଣାନ୍‍ ଦାନ୍‍ ୱାଜା ୱାନ୍‌ ଆକା ପୟ୍‍ଏନ୍‍ । 
\v 5 ମାତର୍‌ ଏନ୍‌ ନିଜେଦି ମୁସ୍‌କୁ ବିସ୍‍ବାସ୍ ଇଡ୍‍ଏନ୍‍ଣ୍ତା, ମାପୁରୁମାନୁ ବିସ୍‍ବାସ୍‍ କିନାନ୍‍, ୱାନି ବିସ୍‍ବାସ୍‍ ଉଣ୍ତିଙ୍ଗ୍‌ ଦସ୍‍କିତି ୱାନିଙ୍ଗ୍‍ ଦସ୍‍ ଡ଼ିସିସ୍‍ କିଜିମାନି ମାପୁରୁ ୱାନିଙ୍ଗ୍‌ ଦାର୍ମୁତିକାନ୍‍ ୱାଜା ଆସ୍‍ନାନ୍‍ । 
\v 6 ଏମେ ଲୋକ୍‍ତି କିତିମାନି ପାଣି ଉଣ୍ତିଙ୍ଗ୍‌ ସୁଡ଼ୁଏନ୍‍ଣ୍ତା ମାପୁରୁ ମାରି ୱାନିଙ୍ଗ୍‌ ଦାର୍ମୁଦିକାନ୍‍ ୱାଜା ଆସ୍‍ନାନ୍‍, ୱାନିଙ୍ଗ୍‌ ପ୍ରସଂସା କିଜି ଦାଉଦ ଇର୍ହାମାନାନ୍‌;
\q1
\v 7 “ଆମାୱାନି ଦସ୍‍ କେମା ଆତାମାନାତ୍‌, ୱାନ୍‌ ଦନ୍ୟ,
\q2 ଏନ୍‌ ପାପ୍‍ କେମା ପୟ୍‍ତାମାନାନ୍‍, ୱାନ୍‌ ଦନ୍ୟ ।
\q1
\v 8 ମାପୁରୁ ଆମାୱାନି ପାପ୍‍ ଲେକିସ୍‍ କିଏନ୍‌, ୱାନ୍‌ ଦନ୍ୟ !”
\p
\v 9 ଇବେ ଦାଉଦ ଏମେୱାରିଙ୍ଗ୍‍ ଆର୍ସିବାଦ୍‍ତିକାର୍‍ ଇଜି ଇଜିନାନ୍‌, ୱାର୍‌ ଇନିକା କେବଲ ସୁନ୍ନତ ଲୋକୁ ମାର୍ହାର୍‌ ? ସିଲେ, ଅସୁନ୍ନତ ଲୋକୁ ବା ଆର୍ସିବାଦ୍‍ତି ଲୋକୁ ଆଦେଙ୍ଗ୍‌ ଆଟ୍‍ନାର୍‍ । ମାଡ୍‌ ଇଜିନିକା ଅବ୍ରାହାମ ବିସ୍‍ବାସ୍‍ ତାନ୍‍ ଦାର୍ମୁତିକାନ୍‍ ଇଜି ୱେଙ୍ଗିଁତାନ୍‍, 
\v 10 ଇକା ଆମା ୱେଡ଼ାଦୁ ଗଟାତାମାର୍ହାତ୍‍ ? ଅବ୍ରାହାମ ସୁନ୍ନତ ଆନି ୱେନ୍‌କା ନୋ, ତାନି ଆଗ୍‍ଡ଼ିରାନ୍‍ ? ୱେନ୍‌କା ସିଲେ । 
\v 11 ସୁନ୍ନତ ଆନି ଆଗ୍‍ଡ଼ିରାନ୍‍ ଅବ୍ରାହାମ୍‍ତି ବିସ୍‍ବାସ୍‍ ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ଦାର୍ମୁଦିକାନ୍‍ ୱାଜା ଆସ୍‍ତାମାର୍ହାନ୍‍ । ଇକା ୱେର୍‍ତେଙ୍ଗ୍‍ ଇଜି ଉନ୍‍ଣ୍ତ୍ରି ସିନା ୱାଜା ଅବ୍ରାହାମ ଇୟା ସୁନ୍ନତ ବିଦି ମାନାତାମାର୍‌ର୍ହାନ୍‌ । ମାରି, ଏମେକାର୍‌ ସୁନ୍ନତ ଆଏନ୍‍ଣ୍ତା ବା ମାପୁରୁ ମାଣାନ୍‌ ଦାର୍ମୁଦିକାର୍‍ ଇଜି ଆତାମାନାର୍‌, ଆତ୍ମିକ୍‍ ଇସାବ୍‍ତାନ୍‍ ଅବ୍ରାହାମ ୱାରି ବୁବାସି । 
\v 12 ବୁବା ଅବ୍ରାହାମ ସୁନ୍ନତ ଆନି ଆଗ୍‍ଡ଼ିରାନ୍‍ ଏମେ ବିସ୍‍ବାସ୍‍ତାନ୍ ଜିଜି ମାର୍ହାନ୍‍, ଜଦି ସୁନ୍ନତ ଆଇ ମାନି ଲୋକୁ ନିଜେ ଜିବନ୍‍ତୁ ଆୟାୱାଜା ବିସ୍‍ବାସ୍‍ ତର୍‍ତେଙ୍ଗ୍‍ ଆଟ୍‍ନାର୍‍, ଅବ୍ରାହାମ ୱାରି ବୁବାସି ।
\s ବିସ୍‌ବାସ୍‌ରିଙ୍ଗ୍‌ ମାପୁରୁଦି ପାର୍‌ମାଣ୍‌
\p
\v 13 \x + \xo ୪:୧୩ \xo*\xt ଗାଲାତିୟ ୩:୨୯.\xt*\x*ଅବ୍ରାହାମ ନିୟମ୍‍ ମାନାନି ମାନି ଉଣ୍ତିଙ୍ଗ୍‌ ସିଲେ । କେବଲ ୱାନି ବିସ୍‍ବାସ୍‍ ଉଣ୍ତିଙ୍ଗ୍‌ ମାପୁରୁଦି ମାଣାନ୍‌ ଦାର୍ମୁତିକାନ୍‍ ୱାଜା ୱେଙ୍ଗିଁତାମାର୍ହାନ୍‍ ମାରି ଆୟା ଉଣ୍ତିଙ୍ଗ୍‌ ୱାନ୍‌ ୱାନି କୁଟୁମ୍‌ତିକାର୍‍ ଦୁନିଆଦି ଅଦିକାରି ଆନାର୍‍ ଇଜି ମାପୁରୁ ପାର୍‌ମାଣ୍‌ କିତାମାର୍ହାନ୍ । 
\v 14 \x + \xo ୪:୧୪ \xo*\xt ଗାଲାତିୟ ୩:୧୮.\xt*\x*ଏମେକାର୍ ନିୟମ୍‍ ମାନାନାର୍‌, କେବଲ ୱାର୍‌ ଜଦି ମାପୁରୁଦି ଦାନ୍‍ ପୟ୍‍ନାର୍‍, ଆର୍‌ତିଙ୍ଗ୍‌ ଲୋକା ବିସ୍‍ବାସ୍‍ ଆର୍‍ଏ, ମାପୁରୁଦି ପାର୍‍ମାଣ୍‍ତିକା ବା ଇନି ଲାବ୍‌ ସିଲେତ୍‍ । 
\v 15 ନିୟମ୍‍ ମାନାଇ ଲୋକୁ ମାପୁରୁଦି ରିସାଦିକାର୍‍ ଆନାର୍‍ । ମାତର୍‌ ଏମେମାନୁ ନିୟମ୍ ସିଲେତ୍‍, ଆବେ ନିୟମ୍‍ ମାନାଇ ମାଟା ନିଙ୍ଗିଁଏ ଜିନାତ୍‍ ।
\p
\v 16 \x + \xo ୪:୧୬ \xo*\xt ଗାଲାତିୟ ୩:୭.\xt*\x*ଆଦେଙ୍ଗ୍‌ ମାପୁରୁଦି ପାର୍‍ମାଣ୍‍ ବିସ୍‍ବାସ୍‍ ମୁସ୍‌କୁ ମାନାତ୍‍ । ଏମେକାର୍‌ ନିୟମ୍‍ ମାନାନାର୍‌, କେବଲ ୱାରି ଉଣ୍ତିଙ୍ଗ୍‌ ମାପୁରୁଦି ପାର୍‍ମାଣ୍‍ ରାସାଏତ୍‍ ! ଅବ୍ରାହାମ୍‍ତି ୱାଜା ବିସ୍‍ବାସ୍‍ କିଜିମାନି ୱିଜେରି ଉଣ୍ତିଙ୍ଗ୍‌ ଆକା ନେଗିକା, ଇରିଙ୍ଗ୍‌ ଅବ୍ରାହାମ ୱାରି ଆତ୍ମିକ ବୁବାସି । 
\v 17 ଇୟା ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌, “ନିଙ୍ଗିଁ ମାପୁ ନାଣ୍ଡ ଜାତିଦି ବୁବାସି କିତାମାନାପ୍‍ ।” ମାପୁରୁଦି ଆଗ୍‍ଡ଼ି ଇୟା ପାର୍‍ମାଣ୍‍ ଟିକ୍‍ ମାର୍ହାତ୍‌, ଇରିଙ୍ଗ୍‌ ଏମେ ମାପୁରୁଙ୍ଗ୍‍ଁ ଅବ୍ରାହାମ ବିସ୍‍ବାସ୍‍ କିଜିମାର୍ହାନ୍‍, ୱାନି ବାକ୍ୟ ସାତିତାନିଙ୍ଗ୍‍ ଜିପିସ୍‍କିନାତ୍‍ ମାରି ୱାରିମାଣାନ୍‍ ୱିଜୁ ବିସୟ୍‍ ତିଆର୍‍ କିନାତ୍‍ । 
\v 18 ଆସା କିଦେଙ୍ଗ୍‌ ଇଜି ଇନି ମାଟା ସିଲେତିଙ୍ଗ୍‍ ବା ଅବ୍ରାହାମ ବିସ୍‍ବାସ୍‍ କିଜି ଆସା କିଜି ଇଟ୍‍ତାନ୍‍ । ଆଦେଙ୍ଗ୍‌ ୱାନ୍‌ ନାଣ୍ତ ଜାତିଦି ବୁବା ଆତାନ୍‌, ଇରିଙ୍ଗ୍‌ ସାସ୍ତ୍ର ଇସାବ୍‍ତାନ୍‍ ୱାନିଙ୍ଗ୍‌ ପାର୍‍ମାଣ୍‍ ପୁଟ୍‍ତାମାର୍ହାତ୍‍, “ନି କୁଟୁମ୍‌ତିକାର୍‍ ବାଦଡ଼୍‍ତି ସୁକେଙ୍ଗାଁ ୱାଜା ନାଣ୍ତଆଦେଙ୍ଗ୍‌ ଆଟ୍‍ନାର୍‍ ।” 
\v 19 ୱାନିଙ୍ଗ୍‌ ନାସ୍ତିୱାଲେ ସହେ ବାର୍‍ସେକ୍‍ ଆତାମାର୍ହାତ୍‍ । ମାତର୍‌ ୱାନି ସାତିୱାଜା ମେନ୍ଦଲ୍‌ତି ମାଟା ଅଡ଼୍‍ବିଜି, ମାରି ସାରା ଜେ କଡ଼ ଜନମ୍‍ କିଦେଙ୍ଗ୍‌ ଉପାୟ୍‌ ସିଲେତାତ୍‍, ଇୟା ମାଟା ନେସ୍‍ସି, ତାନିଙ୍କ୍ ବିସ୍‍ବାସ୍‍ ଆଏତ୍‍ମାର୍ହାତ୍‍ । 
\v 20 ୱାନ୍‌ ୱାନି ବିସ୍‍ବାସ୍‍ତାନ୍ ୱେର୍‌ଏ ଆଏତାନ୍‍, ନ ମାପୁରୁଦି ପାର୍‍ମାଣ୍‍ତିଙ୍ଗ୍‍ ଅଡ଼୍‌ବିଏତାନ୍‍ । ବିସ୍‍ବାସ୍‍ ୱାନିଙ୍ଗ୍‌ ବପୁଦାନ୍‌ ପୁରା କିତାତ୍‍ ମାରି ୱାନ୍‌ ମାପୁରୁଦି ପ୍ରସଂସା ପାଟା କିତାନ୍‍ । 
\v 21 ମାପୁରୁ ଏମେ ପାର୍‍ମାଣ୍‍ କିତାମାର୍ହାନ୍, ୱାନ୍‌ ଆକା ମାନାନାନ୍‍ ଇଜି ୱାନି ଆଟ୍‍ୱା ବିସ୍‍ବାସ୍‍ ମାର୍ହାତ୍‌ । 
\v 22 ଆୟା ଉଣ୍ତିଙ୍ଗ୍‌ ୱାନି ବିସ୍‍ବାସ୍‍ ଉଣ୍ତିଙ୍ଗ୍‍ଁ ଅବ୍ରାହାମ ମାପୁରୁଦି ମାଣାନ୍‌ ଦାର୍ମୁଦିକାନ୍‍ ଇଜି ୱେଙ୍ଗିଁତା ମାର୍ହାନ୍‍ । 
\v 23 “ଦାର୍ମୁଦିକାନ୍‍ ୱାଜା ଆନିକା” ସାସ୍ତ୍ର ମାଟା କେବଲ ଅବ୍ରାହାମ୍‍ତି ଉଣ୍ତିଙ୍ଗ୍‌ ଜେ ଦର୍‍କାର୍‍, ଆକା ସିଲେ । 
\v 24 ଇରିଙ୍ଗ୍‌ ମାଡ୍‌ ବା ମାପୁରୁମାନୁ ବିସ୍‍ବାସ୍‍ କିନି ମାଣାନ୍‌ ଦାର୍ମୁତିକାର୍‍ ୱାଜା ୱେଙ୍ଗିଁନିକା । ମାପୁରୁ ପ୍ରବୁ ଜିସୁଙ୍ଗୁଁ ସାତିମାଣାନ୍‍ ନିକ୍‍ତାମାନାନ୍‍ । 
\v 25 ଆୟା ପ୍ରବୁ ଜିସୁ ମା ପାପ୍‍ତି ଉଦାର୍‌ କିନି ଉଣ୍ତିଙ୍ଗ୍‌ ୱାନ୍‌ ସାତାମାର୍ହାନ୍‍ ମାରି ମାପୁରୁଦି ଲାକ୍‍ତୁ ମାଙ୍ଗିଁ ଦାର୍ମୁଦିକାର୍‍ କିବିସ୍‍ କିନି ଉଣ୍ତିଙ୍ଗ୍‌ ମାରିଡ଼େସି ନିଙ୍ଗିଁତାମାନାନ୍‌ ।
\c 5
\s ମାପୁରୁଦି ୱାଲେ ମିସାନିକା
\p
\v 1 ଇଲେଇ ବିସ୍‍ବାସ୍‍ତାନ୍ ମାଡ୍‌ ମାପୁରୁଦି ଆଗ୍‍ଡ଼ି ଦାର୍ମୁଦିକାର୍‍ ଆତିମାନିକା ମାରି ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ମାପୁରୁଦି ୱାଲେ ମା ସାନ୍ତି ପୋଇତିମାନିକା । 
\v 2 ଆୟା ଜିସୁ ମା ବିସ୍‍ବାସ୍‍ ଉଣ୍ତିଙ୍ଗ୍‌ ଇଲେଇ ମା ଜିବନ୍‍ତୁ ମାପୁରୁଦି ଦୟାଦୁ ମାନାଟ୍ । ଆଦେଙ୍ଗ୍‌ ମାପୁରୁଦି ଗୌରବ୍‍ତୁ ମିସାଦେଙ୍ଗ୍‍ ଆସା ମାଙ୍ଗିଁ ୱେଡ଼ିକାଦାନ୍‌ ଇଟ୍‍ତାମାନାତ୍‍ । 
\v 3 ୱିଜୁ ରକମ୍‍ତି ଦୁକ୍‍ କାସ୍ଟୁଦୁ ବା ମାଡ୍‌ ୱେଡ଼ିକା କିଜିନିକା, ଇରିଙ୍ଗ୍‌ ତରବର୍‍ ଆଏଣ୍ତା କାସ୍ଟୁ ବଗାନି ମାଣାନ୍‌ ମନ୍‍ତୁ ସାସ୍‌ ୱାନାତ୍ । 
\v 4 ସାସ୍‍ତାନ୍‍ ବପୁଦି ଗୁଣ୍‍ ମାରି ବପୁଦି ନେଗି ଗୁଣ୍‍ତାନ୍‍ ଆସା ୱାନାତ୍ । 
\v 5 ଆସା ମାଙ୍ଗିଁ ନିରାସ୍‍ ଆଦେଙ୍ଗ୍‌ ସିଏତ୍‍, ଇରିଙ୍ଗ୍‌ ମାପୁରୁ ମାଙ୍ଗିଁ ପବିତ୍ର ଆତ୍ମା ସିଜି ମା ଜିବନ୍‍ତୁ ୱାନି ଜିବନ୍‍ନୋନିକା ବର୍ତି କିତା ସିତାମାନାନ୍‌ ।
\p
\v 6 ମାଡ୍‌ ନିରାସ୍‌ ମାର୍‌ଇୱାଲେ ମାପୁରୁଦି ତିଆର୍‍କିତି ସମୟ୍‍ତୁ କ୍ରିସ୍ତ ପାପି ଲୋକା ଉଣ୍ତିଙ୍ଗ୍‍ ସାତାନ୍‍ । 
\v 7 ଦାର୍ମୁଲୋକା ଉଣ୍ତିଙ୍ଗ୍‌ ଆଇକାନ୍‍ ଏନ୍‌ ନିଜେଦି ଜିବନ୍‌ ସିଦେଙ୍ଗ୍‍ ବଦା କିଏନ୍‌ । ଆନାତ୍‌ ଆମା ନେଗି ଲୋକା ଉଣ୍ତିଙ୍ଗ୍‍ଁ ସାଦେଙ୍ଗ୍‍ ତିଆର୍‍ ଆନାନ୍‍ । 
\v 8 ମାତର୍‌ ମାଡ୍‌ ପାପି ମାରିଇୱାଲେ କ୍ରିସ୍ତ ମା ଉଣ୍ତିଙ୍ଗ୍‌ ନିଜେଦି ଜିବନ୍‌ ସିତାନ୍‌ । ତେନେ ମାଣାନ୍‌ ମାପୁରୁ ମାଙ୍ଗିଁ ଏସା ଜିବନ୍‍ନୋନାନ୍‍, ଆକା ୱାନ୍‌ ତର୍‍ତାମାନାନ୍‍ । 
\v 9 କ୍ରିସ୍ତଦି ଜିବନ୍‌ ସିନିମାଣାନ୍‍ ମାପୁରୁ ମାଙ୍ଗିଁ ଦାର୍ମୁଦିକାର୍‍ ୱାଜା ଆସ୍‍ତାମାନାନ୍‍ । ଆତିଙ୍ଗ୍‌ ମାପୁରୁଦି ରିସାଦାନ୍‍ ମାଙ୍ଗିଁ ରକିୟା କିଦେଙ୍ଗ୍‍ଁ କ୍ରିସ୍ତ ଏସା ନାଣ୍ତ ମନ୍‍ସିନିକାନ୍‍ ଆଏନ୍‍ । 
\v 10 ମାଡ୍‌ ମାପୁରୁଦି ସାତ୍ରୁ ମାରି ୱାଲେ ୱାନି ମାରିସି ମା ଉଣ୍ତିଙ୍ଗ୍‌ ଜିବନ୍‌ ସିତାନ୍‌, ତାନି ମାଣାନ୍‌ ମାପୁରୁଦି ୱାଲେ ମା ମିସାନିକା ଆତାତ୍‍ । ମାପୁରୁଦି ୱାଲେ ମିସାତି ୱେନ୍‌କା ଇଲେଇ କ୍ରିସ୍ତଦି ଜିବନ୍‍ତାନ୍‍ ରକିୟା ପୟ୍‍ଦେଙ୍ଗ୍‍ଁ ଇଜି ମାଡ୍ ଏସା ନାଣ୍ତ ସୁଜୋଗ ପୟ୍‍ଇକା ? 
\v 11 କେବଲ ଆକାନେ ସିଲେ, ପ୍ରବୁ ଜିସୁ କ୍ରିସ୍ତଦି ମାଣାନ୍‌ ମାପୁରୁ ଏମେ ୱିଜୁ ପାଣି କିତାମାନାନ୍‌, ଆୟାଉଣ୍ତିଙ୍ଗ୍‌ ମା ଜିବନ୍‌ ୱେଡ଼ିକାଦି ପୁରା ଆତାମାନାତ୍‌ । ଆୟା ଜିସୁ ମାପୁରୁଦି ୱାଲେ ମା ମିସାନିକା କିତାମାନାନ୍ ।
\s ଆଦମ ନି କ୍ରିସ୍ତ
\p
\v 12 ଏସ୍ତିୱାଲେ ଅରେନ୍‍ୱାନି ମାଣାନ୍‌ ଦୁନିଆଦୁ ପାପ୍‍ ୱାତାତ୍‍ ମାରି ପାପ୍‍ତାନ୍‍ ସାନିକା ୱାତାତ୍‍ । ୱିଜେରେ ପାପ୍‍ କିତାର୍‍ଆକା ସାନିକା ୱିଜୁ ଲୋକା ଜାତିଦିଙ୍ଗ୍‍ ୱାତାତ୍‍ । 
\v 13 ନିୟମ୍‍ ସିନି ଆଗ୍‍ଡ଼ିରାନ୍‍ ଦୁନିଆଦୁ ପାପ୍‍ ମାର୍ହାତ୍‌; ମାତର୍‌ ନିୟମ୍‍ ସିଲି ୱାଲେ ପାପ୍‍ତି ଇସାବ୍‌ ଆଏଜି ମାର୍ହାତ୍‌ । 
\v 14 ଆଦମ୍‍ତି ୱେଡ଼ାଦାନ୍‍ ମୋସାଦି ୱେଡ଼ା ସାନ୍ଦି ଏନ୍‌ ଆଦମ୍‍ତି ୱାଜା ମାଟା ମାନାଏଜି ପାପ୍‍ କିଏତି ମାରିଙ୍ଗ୍‍ଁ ବା, ୱିଜେରେ ସାନି ଆଡ୍‍ଗି ମାର୍ହାର୍‌ । ଆମାୱାନିଦି ୱାନିକା ମାର୍ହାତ୍‌, ଆଦମ ୱାନି ଉନ୍‍ଣ୍ତ୍ରି ନିଡ଼ିଗାୱାଜା; 
\v 15 ମାତର୍‌ ଇୟା ରିଏରି ଲୋଇ ନାଣ୍ତ ୱେର୍‍ଏ ମାନାତ୍‌ । ଆଦମ୍‍ତି ପାପ୍‍ ନି ମାପୁରୁଦି ଇସାବ୍‌ସିଲି ଦାନ୍‍ତି ବପୁ ସାମାନ୍‍ ସିଲେ । ଅରେନ୍‍ ଲୋକ୍‍ତି ପାପ୍‍ ଉଣ୍ତିଙ୍ଗ୍‍ଁ ନାଣ୍ତ ଲୋକ ସାତାର୍‍ । ମାତର୍‌ ମାପୁରୁ ୱାନି ପେରି ଦୟାଦାନ୍‍, ମାରି ଅରେନ୍‍ ଲୋକ୍‍, ପ୍ରବୁ ଜିସୁ କ୍ରିସ୍ତଦି ମାଣାନ୍‌ ଲୋକା ଉଣ୍ତିଙ୍ଗ୍‌ ଏମେ ଦାନ୍‍ତି ନିୟମ୍‍ କିତାନ୍‍, ଆକା ନାଣ୍ତ ବପୁ । 
\v 16 ଅରେନ୍‍ ଲୋକ୍‍ତି ପାପ୍‍ ଉଣ୍ତିଙ୍ଗ୍‍ଁ ଲୋକୁ ବିଚାର୍‍ତି ଆଗ୍‌ଡ଼ି ଆଜି ଦସି ଆତାର୍‌; ମାତର୍‌ ଗାଦି ଲୋକା ନାଣ୍ତ ପାପ୍‍ ଆତିଙ୍ଗ୍‌ବା ମାରି କେମା ପୟ୍‍ଦେଙ୍ଗ୍‍ଁ ଇଜି ଇନି ଜଗ୍‌ ସିଲିତିଙ୍ଗ୍‌ ବା, ମାପୁରୁ ଆୟା ଦାନ ଉଣ୍ତିଙ୍ଗ୍‍ଁ, ଇଲେଇ ଲୋକୁ ଦସ୍‍ସିଲିକାର୍‍ ଇଜି ୱେଙ୍ଗ୍‍ଁଦେଙ୍ଗ୍‍ଁ ଆଟ୍‍ନାନ୍‍ । 
\v 17 ମାରିବା ଅରେନ୍‍ ଲୋକ୍‍ତି ପାପ୍‍ ଉଣ୍ତିଙ୍ଗ୍‍ଁ, ସାନି ସାସନ୍‍ କିନିକା ୱାତାତ୍‍; ମାତର୍‌ ମାରି ଅରେନ୍‍ ଅର୍ତାତ୍‍ ଜିସୁ କ୍ରିସ୍ତ ଆମାକା କିତାମାନାନ୍‌, ଆକା ଏସା ପେରିକା । ଏମେ ୱିଜେରେ ମାପୁରୁଦି ପେରି ଦୟାଦାନ୍‍ ଆର୍‍ଏନେ ମାପୁରୁଦି ଲାକ୍‍ତୁ ଦାର୍ମୁତିକାର୍‍ ଆନାର୍‍, ୱାର୍‌ କ୍ରିସ୍ତଦି ୱାଲେ ଜିଣାନି ଜିବନ୍‌ କାଟେକିନାର୍‍ ।
\p
\v 18 ଅରେନ୍‍ୱାନି ପାପ୍‍ ଏଣ୍ତେସ୍‌ ୱିଜୁ ଲୋକା ଜାତିଦିଙ୍ଗ୍‍ ଦଣ୍ତ୍‌ କିତାତ୍‍, ଆୟାୱାଜା ଅରେନ୍‍ୱାନି ଦାର୍ମୁ ୱିଜୁ ଲୋକୁ ଜାତି ଉଣ୍ତିଙ୍ଗ୍‍ଁ ମୁକ୍‍ଡ଼ାନିକା ନି ଜିବନ୍‍ତି ସାରି ତାତା ସିତାମାନାନ୍‌ । 
\v 19 ଅରେନ୍‍ୱାନି ଅମାନ୍ୟ ଉଣ୍ତିଙ୍ଗ୍‍ଁ ଏଣ୍ତେସ୍‌ ୱିଜେରେ ପାପି ଆତାର୍‌, ଆୟାୱାଜା ଅରେନ୍‍ୱାନି ମାନାନି ଉଣ୍ତିଙ୍ଗ୍‍ଁ ୱିଜେରେ ମାପୁରୁ ଆଗ୍‍ଡ଼ି ଦାର୍ମୁତିକାର୍‍ ଆନାର୍‍ ।
\p
\v 20 ନିୟମ୍‍ତି ସାଲାନି ଉଣ୍ତିଙ୍ଗ୍‍ଁ ତାଗ୍‍ଇପାଣି ପିରିତାତ୍‍ । ମାତର୍‌ ପାପ୍‍ ପିର୍‍ନି ଦାପେ ଦାପେ ମାପୁରୁଦି ଦୟା ବା ନାଣ୍ତଦାନ୍ ନାଣ୍ତ ଆତାତ୍‍ । 
\v 21 ପାପ୍‍ ଏଣ୍ତେସ୍‌ ସାନି ମାଣାନ୍‌ ନିଜେଦି ସାସନ୍‍ କିଜିମାର୍ହାତ୍‍, ଆୟାୱାଜା ମାପୁରୁଦି ଦୟା ପ୍ରବୁ ଜିସୁ କ୍ରିସ୍ତଦି ଦୟାଦାନ୍‍ ମାଙ୍ଗିଁ ଦାର୍ମୁଦିକାର୍‍ ଲେକିସ୍‍ କିଜି ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ସିନାତ୍‍ ।
\c 6
\s ପାପ୍‍ ଉଣ୍ତିଙ୍ଗ୍‌ ସାନିକା; ମାତର୍‌ କ୍ରିସ୍ତଦି ୱାଲେ ମିସାନି ମାଣୁକୁ ପୁନି ଜିବନ୍‌
\p
\v 1 ଆର୍‌ତିଙ୍ଗ୍‌ ଇନିକା ଇନାଟ୍‍ ? ମାପୁରୁଦି ଦୟା ମାରି ନାଣ୍ତ ଆନାତ୍‌ ଇଜି ମାଡ୍‌ ଇନିକା ପାପ୍‍ତୁ ଜିନା ମାଡ଼ିନାଟ୍‍ ? 
\v 2 ଏସାଙ୍ଗ୍‍ ସିଲେ । ପାପ୍‍ ଉଣ୍ତିଙ୍ଗ୍‌ ମାଡ୍‌ ସାତି ମାନିକା ଆବେ ମାରି ଜିନାଟ୍‍ ଏଣ୍ତେସ୍‌ ? 
\v 3 ମିର୍‌ ନେସ୍‍ନିଦେର୍‍, ଡୁବନ୍‌ ଅନି ମାଣାନ୍‌ କ୍ରିସ୍ତ ଜିସୁଦି ୱାଲେ ମିସାଜି ମାଡ୍‌ ୱାନି ସାତି ମାନୁ ବା ମିସାତି ମାନିକା । 
\v 4 ଡୁବନ୍‌ ଅନି ମାଣାନ୍‌ ମାଡ୍‌ ୱାନି ସାତି ମାନୁ ମିସାଜି ୱାନି ୱାଲେ ମୁସାତି ମାନିକା । କ୍ରିସ୍ତ ଏଣ୍ତେସ୍‌ ବୁବାଦି ଗୌରବ୍‌ଦି ସାକ୍ତି ଦାନ୍‍ ମାରିଡ଼େସିଜିବନ୍‌ ଆଜି ନିଙ୍ଗିଁତାନ୍‍, ମାଡ୍‌ ବା ୱାନି ଉଣ୍ତିଙ୍ଗ୍‌ ପୁନିୱାଜା ଜିଦେଙ୍ଗ୍‌ ଆଟ୍‍ନିକା ।
\p
\v 5 ଏଣ୍ତେସ୍‍ଇରିଙ୍ଗ୍‍ ମାଡ୍‌ ସାନି ମାନୁ ମିସାଜି ୱାନି ୱାଲେ ଉନ୍‍ଡ୍ରେ ଆତିମାନିକା, ୱାନି ମାରିଡ଼େସି ନିଙ୍ଗ୍‍ଁନିମାନୁ ବା ୱାନି ୱାଲେ ଉନ୍‍ଡ୍ରେ ଆଜି ପୁନି ଜିବନ୍‌ ପୟ୍‍ନିକା । 
\v 6 ମାଡ୍‌ ନେସ୍‍ନିକା, ଜେ କ୍ରିସ୍ତଦି ୱାଲେ କ୍ରୁସ ମୁସ୍‌କୁ ମା ପାଡ଼୍‍ଇ ମେନ୍ଦଲ୍‌ତି ମୁର୍ତି ସାତାମାନାତ୍‍ । ଆବେଣାନ୍‍ ମା ପାପ୍‍ ଗୁଣ୍‍ ନାସ୍ଟୁ ଆତାମାନାତ୍‌ ମାରି ମାଡ୍‌ ପାପ୍‍ତି ଦାସ୍‍ତାନ୍‍ ଡ଼ିସାୟ୍‍ ଆତିମାନିକା, 
\v 7 ଇରିଙ୍ଗ୍‌ ଲୋକୁ ସାତିସରିଙ୍ଗ୍‍ଁ, ପାପ୍‍ ଗାଟିଦାନ୍‍ ରକିୟା ପୟ୍‍ନାନ୍‍ । 
\v 8 ମାଡ୍‌ ଜିସୁଦି ୱାଲେ ସାତିମାନିକାଆକା, ୱାନି ୱାଲେ ବା ଜିନିକା ଇଜି ବିସ୍‍ବାସ୍‍ କିଜିନିକା । 
\v 9 ମାଡ୍‌ ନେସ୍‍ନିକା, କ୍ରିସ୍ତ ସାତିମାଣାନ୍‍ ନିଙ୍ଗିଁତାମାନାନ୍‌ ଆକା, ୱାନ୍‌ ମାରି ଏସାଙ୍ଗ୍‍ଁ ସାଏନ୍‍ । ୱାନି ମୁସ୍‌କୁ ସାନିକା ମାରି ସାସନ୍‍ କିଏତ୍‍ । 
\v 10 ୱାନ୍‌ ଏମେନୁ ସାତାନ୍‍ ଆବେଣାନ୍‍ ପାପ୍‍ତି ସାକ୍ତିଦାନ୍‍ ଜିଣାତାମାନାନ୍‍ । ୱାନ୍‌ ଇଲେଇ ଆମା ଜିଜି ମାଡ଼ିଜିନାନ୍‍, ଆକା ମାପୁରୁଦି ୱାଲେ ମିସାତି ଜିବନ୍‌ । 
\v 11 ଆୟାୱାଜା ମିର୍‌ ବା ପାପ୍‍ ଉଣ୍ତିଙ୍ଗ୍‌ ସାତି ମାନିଦେର୍‍ ଇଜି ଅଡ଼୍‍ବିଦୁ । ମିର୍‌ ଇଲେଇ କ୍ରିସ୍ତ ଜିସୁଦି ମାଣାନ୍‌ ଜିବନ୍‍ତୁ ମାପୁରୁଦି ୱାଲେ ମିସାତି ମାନିଦେର୍‍ ।
\p
\v 12 ଇୟା ମି ସାତି ମେନ୍ଧଲ୍‍ ମୁସ୍‌କୁ ପାପ୍‍ ମାରି ସାସନ୍‍ କିମାକିତ୍‍; ମିର୍‌ ମାରି ଇନି ମେନ୍ଦଲ୍‍ତି ଆସା ଆଡ୍‍ଗି ତେବାମାଟ୍‍ । 
\v 13 ମିର୍‌ ନିଜେଦିଙ୍ଗ୍‍ଁ ଏମେ ଇସାବ୍‍ତାନ୍‍ ପାପ୍‍ ଲାକ୍‍ତୁ ସର୍ପେ କିଜି ତାଗ୍‌ଇ ପାଣି ୱାଜା ବ୍ୟବହାର୍ ଆମାଟ୍‌ । ମାତର୍‌ ସାନି ମାଣାନ୍‌ ରକିୟା ପୟ୍‍ଜି ଜିବନ୍‌ ପୟ୍‍ତିମାନି ଉଣ୍ତିଙ୍ଗ୍‍ଁ ମିର୍‌ ସତ୍‍ପାଣି କିଦେଙ୍ଗ୍‍ଁ ଇଜି ନିଜେ ନିଜେଦିଙ୍ଗ୍‍ଁ ସାଜୁଦାନ୍‌ ମାପୁରୁମାନୁ ସର୍ପେ କିଦୁ । 
\v 14 ମାତର ପାପ୍‍ ମି ମୁସ୍‌କୁ ସାସନ୍‍ କିମାପିତ୍‍ । ମିର୍‌ ମାରି ନିୟମ୍‍ତି ଆଡ୍‍ଗି ସିଲିଦେର୍‍ । ମାତର୍‌ ମାପୁରୁଦି ଦୟାଦି ଆଡ୍‍ଗି ମାନିଦେର୍‍ ।
\s ଦାର୍ମୁଦି ଦାସ୍‍କୁ
\p
\v 15 ଆର୍‌ତିଙ୍ଗ୍‌, ମାଡ୍‌ ନିୟମ୍‍ତି ଆଡ୍‍ଗି ତେବାଏଣ୍ତା ମାପୁରୁଦି ଦୟା ପୟ୍‍ତିମାନିକା ଇଜି ଇନିକା ପାପ୍‍ କିଜିମାନାଟ୍‍ ? ଆକା ଏସାଙ୍ଗ୍‍ ସିଲେ । 
\v 16 ମିର୍‌ ପୁରା ନେସ୍‍ତିମାନିଦେର୍‍, ଜଦି ମିର୍‌ ଆମାୱାନି ଆଡ୍‍ଗି ମାନିକା ମାନାଜି ୱାନି ପୁରା ମାଟା ମାନାନିଦେର୍‍, ଆର୍‌ତିଙ୍ଗ୍‌ ମିର୍‌ ୱାନି ଦାସ୍‍ । ଜଦି ପାପ୍‍ତି ଦାସ୍‌ ଆନିଦେର୍‌, ତେନି ଦଣ୍ତ୍‍ ଆନାତ୍‌ ସାନିକା; ଜଦି ଦାର୍ମୁଦୁ ସାଲାନିଦେର୍‍, ଆର୍‌ତିଙ୍ଗ୍‌ ଜିବନ୍‌ ପୟ୍‍ନିଦେର୍‍ । 
\v 17 ମାତର୍‌ ମାପୁରୁଙ୍ଗ୍‍ଁ ଦନ୍ୟବାଦ ସିଜିନା, ଜଦିବା ଅର୍‍ଲେନ୍‍ ମିର୍‌ ପାପ୍‍ତି ଦାସ୍‍କୁ ମାର୍ହିଦେର୍‍, ମିର୍‌ ଇଲେଇ ସୁସମାଚାର୍‍ତାନ୍‍ ଅଜାତିମାନି ସତ୍‍ମାଟେଙ୍ଗ୍‍ଁ ପୁରା ମୋନ୍‌ତାନ୍‍ ମାନାଜିନିଦେର୍‍ । 
\v 18 ମିର୍‌ ପାପ୍‍ତାନ୍‍ ମୁକ୍‍ଡ଼ାଜି ଦାର୍ମୁଦି ଦାସ୍‍କୁ ଆତିମାନିଦେର୍‍ । 
\v 19 ମି ସାକିସିଲି ଉଣ୍ତିଙ୍ଗ୍‌, ଇୟାୱିଜୁ ମାଟା ! ନାନୁ ଲୋକୁ ୱାଜା ୱିଜୁଦିନ୍‍ ୱାର୍‍ଗିନି ବାସାଦାନ୍‍ ୱେର୍‍ସିନା । ଅର୍‍ଲେନ୍‍ ମିର୍‌ ତାଗ୍‍ଇକା ନି ତାଗ୍‌ଇ ପାଣିଦୁ ନିଜେ ନିଜେଦିଙ୍ଗ୍‍ ମିସାକିଜି ଇଟ୍‍ତିମାର୍ହିଦେର୍‍ । ଆୟାୱାଜା ଇଲେଇ ପବିତ୍ର ଆଦେଙ୍ଗ୍‌ ଇଜି ଦାର୍ମୁଦି ଲାକ୍‍ତୁ ନିଜେଦିଙ୍ଗ୍‍ଁ ପୁରାଦାନ୍‌ ସିଦୁ ।
\p
\v 20 ମିର୍‌ ପାପ୍‍ତି ଦାସ୍‍ ମାର୍‌ଇୱାଲେ, ଦାର୍ମୁଦାନ୍‍ ଆକ ମାର୍ହିଦେର୍‍ । 
\v 21 ଇଲେଇ ମିଙ୍ଗିଁ ଏମେ ୱିଜୁ ପାଣି କିଦେଙ୍ଗ୍‌ ସେମାର୍‍ ଆଜିନାତ୍‍, ନାସ୍ତିୱାଲେ ଆୟାୱିଜୁ କିଜିମାର୍‌ଇଦେର୍‍ । ଆବେଣାନ୍‍ ଇନି ଲାବ୍‍ ପୟ୍‍ତିଦେର୍‍ ? ଆୟାୱିଜୁ ପାଣିଦି ଦଣ୍ତ୍‍ ସାନିକା । 
\v 22 ମାତର୍‌ ଇଲେଇ ମିର୍‌ ପାପ୍‍ତାନ୍‍ ମୁକ୍‍ଡ଼ାଜି ମାପୁରୁଦି ପବିତ୍ର ଦାସ୍‍ ଆତିମାନିଦେର୍‍ । ତେନି ଲାବ୍‍ ଆଜିନାତ୍‍, ମାପୁରୁମାନୁ ପୁରାଦାନ୍‌ ଜିବନ୍‌ ସର୍ପେ କିନିକା ମାରି ତେନି ପଲ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ । 
\v 23 ପାପ୍‍ତି ବାଦ୍‌ଲୁ ସାନିକା, ମାତର୍‌ ମାପୁରୁଦି ଦୟାଦି ଦାନ୍‍ ଆଜିନାତ୍‍, ପ୍ରବୁ ଜିସୁ କ୍ରିସ୍ତଦି ୱାଲେ ମିସାନି ମାଣାନ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ।
\c 7
\s ପେଡ଼ିଦି କାତା
\p
\v 1 ଏ ତଡ଼ାନ୍‍କୁ ନି ତାଙ୍ଗିଁକି, ଇଲେଇ ଆମାକା ଇନ୍‌ଡ୍ରେଙ୍ଗ୍‌ ସଲ୍‍ସିନା, ମିର୍‌ ଆକା ବୁଜାଦେଙ୍ଗ୍‍ ଆଟ୍‍ନିଦେର୍‍, ଇରିଙ୍ଗ୍‌ ମିର୍‌ ନେସ୍‍ତିମାନିଦେର୍‍, ନିୟମ୍‍ ଇନିକା । ଲୋକୁ କେବଲ ୱାନି ଜିନି ୱେଡ଼ାଦୁ ନିୟମ୍‍ତି ଆଡ୍‍ଗି ତେବାନାନ୍‍ । 
\v 2 କନ୍‍ଲି ଜିନିମାନି ସାନ୍ଦି ୱାନି ଆଡ଼୍‍ସି ୱାନି ୱାଲେ ପେଡ଼ିଆତିମାନୁ ତର୍‍ଆୟ୍‍ ଆନାମାନାତ୍‍ । ମାତର୍‌ କନ୍‍ଲି ସାତିଙ୍ଗ୍‍ଁ, ୱାନି ଆଡ଼୍‍ସି ଇୟା ନିୟମ୍‍ତାନ୍‍ ମୁକ୍‍ଡ଼ାନାତ୍‍ । 
\v 3 କନ୍‍ଲି ଜିତି ମାନିୱାଲେ; ଆଡ଼୍‍ସି ଜଦି ଆଇ ମେମାରି ୱାଲେ ତେବାନାତ୍‍, ତାନିଙ୍ଗ୍‍ଁ ଦାରିଣି ଇଜି ଇନାର୍‍; ମାତର୍‌ କନ୍‍ଲି ସାତି ୱେନ୍‌କା ୱାଦ୍ ମାରି ଅରେନ୍‍ ୱାନିଙ୍ଗ୍‍ଁ ପେଡ଼ି ଆତିଙ୍ଗ୍‍ଁ, ଆକା ଦାରିପାଣି ଆଏତ୍‍ । 
\v 4 ଏ ତଡ଼ାନ୍‍କୁ ନି ତାଙ୍ଗିଁକି, ମିଦି ବା ଟିକ୍‍ ଆୟା ବାଦା । ମିର୍‌ ଡୁବନ୍‍ ଅତି ମାଣାନ୍‌ କ୍ରିସ୍ତଦି ମେନ୍ଦଲ୍‌ତି ୱାଲେ ସାଜି, ୱାନି ମାରିଡ଼େସିଜିବନ୍‌ ଆଜି ନିଙ୍ଗିଁନିମାନୁ ବା ମିସାତିମାନିଦେର୍‍ ମାରି ଇଲେଇ ମିର୍‌ ମାପୁରୁଦି ନେଗି ସେବକ । ନିୟମ୍‍ ଉଣ୍ତିଙ୍ଗ୍‌ ମିର୍‌ ସାତି ମାନିଦେର୍‍ । 
\v 5 ଆମା ଦିନ୍‍ ସାନ୍ଦି ମାଡ୍‌ ମେନ୍ଦଲ୍‍ତି ଆସାଦି ଆଡ୍‍ଗି ମାର୍ରିକା, ନିୟମ୍‍ତି ମନାକିତି ମାଟା ମା ପାପ୍‍ ପାଣିଦୁ କେବଲ ଏଗ୍ରିସ୍‍ କିବିସ୍‍ କିଜିମାର୍ହାତ୍‍ ମାରି ମାଡ୍‌ ସାନି ସେବା ଉଣ୍ତିଙ୍ଗ୍‌ ଟିକ୍‍ ମାର୍‌ଇକା । 
\v 6 ଇଲେଇ ମାଡ୍‌ ନିୟମ୍‍ତି ସାସନ୍‍ତାନ୍‍ ମୁକ୍‍ଡ଼ାତି ମାନିକା, ଇରିଙ୍ଗ୍‍ଁ ଆମାକା ଅର୍‍ଲେନ୍‍ ମାଙ୍ଗିଁ ତର୍‍ତା ଇଟ୍‍ତାମାର୍ହାତ୍‍, ଆୟାଉଣ୍ତିଙ୍ଗ୍‌ ମାଡ୍‌ ଇଲେଇ ସାତିମାନିକା । ମାଡ୍‌ ମାରି ଆଗ୍‍ଡ଼ିରି ୱାଜା ରାସାତି ନିୟମ୍‍ତି ସେବା କିଇଜିନିକା, ପବିତ୍ରଆତ୍ମାଦି ପୁନି ସାରିଦୁ ଇଲେଇ ମାଡ୍‌ ବୁଲାଜିନିକା ।
\s ନିୟମ୍‍ ନି ପାପ୍‍
\p
\v 7 ଆର୍‌ତିଙ୍ଗ୍‌ ଇନିକା ଇନାଟ୍‍, ନିୟମ୍‍ ନେ ପାପ୍‍ ? ଆକା ଏସାଙ୍ଗ୍‍ ସିଲେ । ମାତର୍‌ ପାପ୍‍ ଇନିକା, ଆକା ନାଙ୍ଗିଁ ନିୟମ୍‍ ୱେର୍‍ତାସିତାମାନାତ୍‍ । “ଆଇୱାନି ଜିନିସ୍‍ତିଙ୍ଗ୍ ଆସାମାଟ୍,” ଇୟା ମାଟା ଜଦି ନିୟମ୍‍ ସିଏତାତ୍‍ ମାନ୍ଦି, ଆସାନିକା ଇନିକା, ନାନୁ ନେସ୍‍ଏତା ମାନ୍ଦି । 
\v 8 ମାତର୍‌ ମୁସ୍‍କୁରି ମାଟାଦି ସୁଜୋଗ ଅସି ପାପ୍‍ ନା ମନ୍‍ତୁ ୱିଜୁ ରକମ୍‌ତି ଲବ୍‌ ଜନମ୍‍କିତାତ୍‍ । ନିୟମ୍‌ତିଙ୍ଗ୍‌ ଡ଼ିସ୍‍ତିଙ୍ଗ୍ଁ ପାପ୍‍ ସାତି ସାମାନ୍‍ । 
\v 9 ଅର୍‍ଲେନ୍‍ ନିୟମ୍‍ ନେସ୍‍ଏଣ୍ତା ନାନୁ ଜିତା ମାର୍ହା; ନିୟମ୍‍ ନେସ୍‍ତି ୱେନ୍‌କା ପାପ୍‍ ୱାତାତ୍‍ ମାରି ନାନୁ ସାତା । 
\v 10 ଏମେ ନିୟମ୍‍ ଜିବନ୍‌ ସିଦେଙ୍ଗ୍‍ ଇଜି ଟିକ୍‍ ମାର୍ହାତ୍‌, ଆକା ନା ସାନି ମାଟା ଆତାତ୍‍ । 
\v 11 ମାତର ନିୟମ୍‍ତି ସୁଜୋଗ ଅସି ପାପ୍‍ ନାଙ୍ଗିଁ ଟକେ କିତାତ୍‍ ମାରି ନାଙ୍ଗିଁ ଡାକ୍‍ତାତ୍‍ ।
\p
\v 12 ନିୟମ୍‍ ପବିତ୍ର; ତାନି ମାଟେଙ୍ଗ୍‍ଁ ୱିଜୁ ପବିତ୍ର, ଟିକ୍‍ ମାରି ନେଗିକା । 
\v 13 ଆର୍‍ତିଙ୍ଗ୍‍ଁ, ଆମାକା ନେଗିକା, ଆକା ଇନିକା ନା ସାନି ମାଟା ଆତାମାର୍ହାତ୍‍ ? ଏସାଙ୍ଗ୍‍ ସିଲେ । ପାପ୍‌ନେ ଆକା କିତାତ୍‍ । ନେଗି ନିୟମ୍‍ତିଙ୍ଗ୍‍ଁ ବ୍ୟବହାର୍ କିଜି ପାପ୍‍ ନା ସାନିକା ଗଟାକିତାତ୍‍ । ଆବେଣାନ୍‍ ପାପ୍‍ତି ସତ୍‍ ରୁପ୍‍ ତରିତାତ୍‍ । ଆଦେଙ୍ଗ୍‍ଁ ନିୟମ୍‍ ପାପ୍‍ତି ନାଣ୍ତ ବୟଙ୍କାରିତିକା ଜାଣାପଡ଼ାତାତ୍‍ ।
\s ଲୋକ୍‍ ମନ୍‍ତୁ ଗାବ୍‌ରା
\p
\v 14 ମାଡ୍‌ ନେସ୍‍ନିକା, ନିୟମ୍ ଆତ୍ମିକ ମାଟା । ମାତର୍‌ ନା ସାତି ମେନ୍ଧଲ୍‍ ପାପ୍‍ତି ସାକର୍‌ । 
\v 15 \x + \xo ୭:୧୫ \xo*\xt ଗାଲାତିୟ ୫:୧୭.\xt*\x*ନାନୁ ଇନିକା କିନା, ଆକା ନାନୁ ବୁଜାଏ । ଆମାକା କିଦେଙ୍ଗ୍‌ ଇଜି ନାଙ୍ଗିଁ ବଦା, ଆକା ନାନୁ କିଏ; ମାତର୍‌ ଆମାକା କାଡ଼୍‍ନା, ଆକାନେ କିନା । 
\v 16 ମାତର ଆମାକା କିନା, ଆକା ସତ୍‌ତାନ୍‌ ନା ବଦା ବିରୁଦ୍‍ତାନ୍‍ କିଜିମାନିଙ୍ଗ୍‍, ନିୟମ୍‍ ଟିକ୍‍ ଇଜି ନାନୁ ମାନାଜିନା । 
\v 17 ଆଦେଙ୍ଗ୍‍ଁ ଆୟା ପାଣି ସତ୍‌ତାନ୍‌ ନାନୁ କିଏ ନା ମୋନ୍‌ ଲୋଇ ମାନି ପାପ୍‍ ନେ ଆକା କିନାତ୍‍ । 
\v 18 ନାନୁ ନେସ୍‍ନା, ନା ଲୋଇ ମାରି ନା ଲୋକ୍‍ ଗୁଣ୍‍ତୁ ଇନି ନେଗିକା ସିଲେତ୍‍, ଇରିଙ୍ଗ୍‌ ନେଗିପାଣି କିଦେଙ୍ଗ୍ଁ ନା ବଦା ମାରିଙ୍ଗ୍ଁ ବା ଆକା କିଦେଙ୍ଗ୍‍ଁ ଆଟ୍‌ଏଜିନା । 
\v 19 ଆୟାଉଣ୍ତିଙ୍ଗ୍‌ ଆମା ନେଗିପାଣି କିଦେଙ୍ଗ୍‍ଁ ନା ବଦା, ଆକା କିଏଜିନା ବଦା ବିରୁଦ୍‍ତାନ୍‍ ଅସତ୍‍ ପାଣି ନେ କିଜିମାନା । 
\v 20 ନା ବଦା ବିରୁଦ୍‍ତାନ୍ ଆମାକା କିନା, ସତ୍‌ତାନ୍‌ ନାନୁ ଆକା କିଏ ନା ଲୋଇ ମାନି ପାପ୍‍ ନେ ଆକା କିନାତ୍‍ ।
\p
\v 21 ଇକା ନା ଲୋଇ ଉନ୍‍ଣ୍ତ୍ରି ନେଗି ପାଣିକିନି ନିୟମ୍‍ ଇଜି ଅଡ଼୍‍ବିନା । ଆମାକା ସତ୍‍, ଆକା ନାନୁ କିଦେଙ୍ଗ୍ଁ ସନିୱାଲେ, କେବଲ ସତ୍‍ସିଲି ପାଣି କିନା । 
\v 22 ମାପୁରୁଦି ନିୟମ୍‍ତିଙ୍ଗ୍‌ ମାନାଦେଙ୍ଗ୍ଁ ଇଜିନା ବଦା, 
\v 23 ମାତର୍‌ ନା ମନ୍‍ତୁ ଇୟା ବଦା ବିରୁଦ୍‍ତାନ୍‍ ନା ମେନ୍ଦଲ୍‍ତିଙ୍ଗ୍‍ଁ ସାଲାକିଜିମାନି ନିୟମ୍‍ ୱିଜୁଦିନ୍ ଜୁଦ୍‌ କିଜିମାନାତ୍‍ । ନା ମେନ୍ଦଲ୍‌ତୁ ପାଣି କିଜିମାନି ଆୟା ପାପ୍‍ ପାଣି ନାଙ୍ଗିଁ ତର୍‍ତା ଇଟ୍‍ତାମାନାତ୍‍ । 
\v 24 ଏସା ୱେଡ଼ିକାସିଲିକାନ୍‍ ନାନୁ ! ସାନି ସାରିଦୁ ରେଲ୍‍ଜି ଅସିମାନି ଇୟା ମେନ୍ଦଲ୍‌ତି ପାଣିଦାନ୍‍ ନାଙ୍ଗିଁ ଏନ୍‌ ରକିୟା କିନାନ୍‍ ? 
\v 25 ମାପୁରୁ ଧନ୍ୟ ଆପିନ୍‌, ପ୍ରବୁ ଜିସୁ କ୍ରିସ୍ତଦି ମାଣାନ୍‌ ଇକା ୱାନ୍‌ କିତାମାନାନ୍‌ । ଆର୍‍ତିଙ୍ଗ୍‍ଁ, ଇୟାକା ଆଜିନାତ୍‍ ନା ଇନସ୍ତା । ମାପୁରୁଦି ନିୟମ୍‍ କେବଲ ନାନୁ ନା ମନ୍‌ତୁ ମାନାଦେଙ୍ଗ୍ଁ ଆଟ୍‍ନା । ମାତର୍‌ ନା ଲୋକ୍‍ ଗୁଣ୍‍ ନାଙ୍ଗିଁ ପାପ୍‍ତି ଦାସ୍‍ ଆଦେଙ୍ଗ୍‍ଁ ଜାସେପେଲା କିଜିନାତ୍‍ ।
\c 8
\s ଆତ୍ମାଦାନ୍‌ ଜିବନ୍‌
\p
\v 1 ଏମେକାର୍‌ କ୍ରିସ୍ତ ଜିସୁଦି ୱାଲେ ମିସାଜି ଜିନାର୍‍, ୱାରିଙ୍ଗ୍‍ଁ ମାରି ଦଣ୍ତ୍‌ ସିଲେତ୍‍ । 
\v 2 ପବିତ୍ରଆତ୍ମା ଆମା ନିୟମ୍‍ତାନ୍‍ ମାଙ୍ଗିଁ କ୍ରିସ୍ତ ଜିସୁଦି ୱାଲେ ମିସା କିଜି ନିଜେଦି ଜିବନ୍‌ ସିତାମାନାନ୍‌, ଆବେଣାନ୍‍ ମାଡ୍‌ ପାପ୍‍ ନି ସାନି ନିୟମ୍‍ତାନ୍ ମୁକ୍‍ଡ଼ାତି ମାନିକା । 
\v 3 ଇୟା ଲୋକା ଗୁଣ୍‍ ୱିଜୁ ଲିଡ଼ଲାଡ଼ା ଉଣ୍ତିଙ୍ଗ୍‍ଁ ମସା ସିତିମାନି ନିୟମ୍‍ ଆମାକା କିଦେଙ୍ଗ୍ଁ ଆଟ୍‍ଏତାତ୍‍, ମାପୁରୁ ଆକା କିତାମାନାନ୍‌ । ଲୋକା ଜିବନ୍‍ତୁ ପାପ୍‍ତିଙ୍ଗ୍‍ଁ ନାସ୍ଟୁ କିଦେଙ୍ଗ୍‍ଁ ଇଜି ୱାନ୍‌ ନିଜେଦି ମାରିସିଙ୍ଗ୍‍ଁ ପାପି ଲୋକୁ ୱାଜା ପକ୍‍ତାନ୍‍ ମାରି କ୍ରିସ୍ତ ଜିସୁ ପାପ୍‍ତି ସାକ୍ତି ନାସ୍ଟୁ କିତାମାନାନ୍‌ । 
\v 4 ଆଦେଙ୍ଗ୍‍ଁ ଇଲେଇ ମାଡ୍‌ ଲୋକ୍‍ ଗୁଣ୍‍ତି ଆଡ୍‍ଗି ତେବାଏଜି ଆତ୍ମାଦି ମାଣାନ୍‌ ସାଲାଜିନିକା ମାରି ତେନି ମାଣାନ୍‌ ମାଡ୍‌ ନିୟମ୍‍ତି ଟିକ୍‍ ଦାବି ପୁରା କିଜିନିକା । 
\v 5 ଏମେକାର୍‌ ଲୋକ୍‍ ଗୁଣ୍‍ ଇସାବ୍‍ତାନ୍‍ ପାଣି କିଜିମାନାର୍‍, ୱାରି ମନ୍ ଆୟା ଗୁଣ୍‍ତି ଆଡ୍‍ଗି ତେବାନାତ୍‍ । ମାତର୍‌ ଏମେକାର୍‌ ଆତ୍ମାଦି ମାଟା ଇସାବ୍‌ତାନ୍‌ ପାଣି କିନାର୍‌, ୱାରି ମନ୍ ଆତ୍ମାଦାନ୍‌ ସାଲାନାତ୍‍ । 
\v 6 ଲୋକ୍‍ ଗୁଣ୍‍ତି ଆଡ୍‍ଗି ତେବାତିଙ୍ଗ୍‍ଁ, ଦସ୍‍ ଆନାତ୍‌ ସାନିକା; ଆତ୍ମାଦି ଆଡ୍‍ଗି ତେବାନି ମାଣାନ୍‌ ଜିବନ୍‌ ନି ସାନ୍ତି ପୁଟ୍‍ନାତ୍‍ । 
\v 7 ନର୍‍ ଗୁଣ୍‍ତି ଆଡ୍‍ଗି ତେବାନି ମାଣାନ୍‌ ଲୋକ୍‍ ମାପୁରୁଦି ସାତ୍ରୁ ଆନାନ୍‍; ଇରିଙ୍ଗ୍‍ଁ ୱାନ୍‌ ମାପୁରୁଦି ନିୟମ୍‍ ମାନାଏନ୍‌ ୱାନ୍‌ ଆକା କିଦେଙ୍ଗ୍‍ଁ ଆଟ୍‍ଏନ୍‍ । 
\v 8 ଏମେକାର୍‌ ନର୍‍ ଗୁଣ୍‍ ଇସାବ୍‍ତାନ୍‍ ପାଣି କିନାର୍‌, ୱାର୍‌ ମାପୁରୁଙ୍ଗ୍‍ଁ ୱେଡ଼ିକା କିଦେଙ୍ଗ୍‍ଁ ଆଟ୍‍ଏର୍‍ ।
\p
\v 9 ଜଦି ସତ୍‌ତାନ୍‌ ମାପୁରୁଦି ପବିତ୍ରଆତ୍ମା ମିବାନୁ ତେବାନାତ୍‍, ମିର୍‌ ମାରି ନର୍‍ ଗୁଣ୍‍ ଇସାବ୍‍ତାନ୍‍ ଜିଇଦେର୍‍, ମାତର୍‌ ଜିବନ୍‍ତୁ ଆତ୍ମାଦି ମାଟା ମାନାଜିନିଦେର୍‍ । କ୍ରିସ୍ତଦି ଆତ୍ମା ଆମାୱାନି ଲାକ୍‍ତୁ ସିଲେତ୍‍, ୱାନ୍‌ ଏସାଙ୍ଗ୍‍ଁବା ୱାନି ଲୋକ୍‍ ଆଦେଙ୍ଗ୍‍ଁ ଆଟ୍‍ଏନ୍‍ । 
\v 10 ମାତର୍‌ ଜଦି କ୍ରିସ୍ତ ମିବାନୁ ବାସାଜି ମାନାନ୍‌, ମି ମେନ୍ଧଲ୍‍ ପାପ୍‍ତୁ ନାସ୍ଟୁ ଆଦେଙ୍ଗ୍‍ଁ ସଲ୍‌ସି ମାରିଙ୍ଗ୍‍ଁ ବା, ଆତ୍ମା ମିଙ୍ଗିଁ ଜିବନ୍‌ ସିନାତ୍‍, ଇରିଙ୍ଗ୍‌ ମାପୁରୁଦି ଲାକ୍‍ତୁ ମିର୍‌ ଦାର୍ମୁତିକାର୍‍ ଆତିମାନିଦେର୍‍ । 
\v 11 ଜଦି ଜିସୁଙ୍ଗୁଁ ସାତି ମାଣାନ୍‌ ନିକ୍‍ତିମାନି ମାପୁରୁଦି ଆତ୍ମା ମିବାନୁ ମାନାତ୍‌, ଆର୍‍ତିଙ୍ଗ୍‍ଁ ଆୟା ଆତ୍ମାଦି ସାକାଦାନ୍‍ ମାପୁରୁ ମି ସାନି ମେନ୍ଦଲ୍‌ତିଙ୍ଗ୍‍ଁ ବା ଜିବନ୍‌ କିନାନ୍‍ ।
\p
\v 12 ଆର୍‌ତିଙ୍ଗ୍‌ ଏ ତଡ଼ାନ୍‍କୁ ନି ତାଙ୍ଗିଁକି, ମା ପାଣି ଆଜିନାତ୍‍, ନର୍‍ ଗୁଣ୍‍ତି ଇସାବ୍‍ତାନ୍‍ ଜିଦେଙ୍ଗ୍‌ କେଏଟ୍‍, ଇରିଙ୍ଗ୍‍ଁ ଆକା କିତିଙ୍ଗ୍‍ଁ ମିର୍‌ ସାନିଦେର୍‍; 
\v 13 ମାତର୍‌ ଜଦି ଆତ୍ମାଦି ସାକାଦାନ୍‍ ନିଜେଦି ମେନ୍ଧଲ୍‍ତି ପାପ୍‍ ପାଣିଦିଙ୍ଗ୍‍ଁ ନାସ୍ଟୁ କିଜି ମାରି ପାପ୍‍ ପାଣି କିମାଟ୍‌, ଆତିଙ୍ଗ୍‍ଁ ମିର୍‌ ଜିନିଦେର୍‍ । 
\v 14 ଏମେକାର୍‌ ମାପୁରୁଦି ଆତ୍ମାଦାନ୍‌ ସାଲାଜିନାର୍‍, ୱାର୍‌ ମାପୁରୁଦି କଡ଼ର୍‍ । 
\v 15 \x + \xo ୮:୧୫ \xo*\xt ଗାଲାତିୟ ୪:୫-୭.\xt*\x*\x + \xo ୮:୧୫ \xo*\xt ମାର୍କ ୧୪:୩୬; ଗାଲାତିୟ ୪:୬.\xt*\x*ଇରିଙ୍ଗ୍‌ ମାପୁରୁ ସିତି ଆୟା ଆତ୍ମା ମିଙ୍ଗିଁ ଦାସ୍‍ତିମାଣାନ୍‍ ମୁକ୍‍ଡ଼ା କିତାମାନାନ୍‌, ମିର୍‌ ମାରି ତିଲାନିକା ଇନିକା ସିଲେତ୍‍ । ମାତର୍‌ ଆତ୍ମା ମିଙ୍ଗିଁ ମାପୁରୁଦି କଡ଼ର୍‍ ଆନି ସାରି ସିତାମାନାତ୍‍ । ୱାନି ସାକ୍ତି ନେସ୍‍ସି ମାଡ୍‌ ଇଲେଇ ମାପୁରୁଙ୍ଗ୍‍ଁ “ବୁବା” ଇଜି କୁକ୍‍ସିନିକା । 
\v 16 ମାପୁରୁଦି ଆତ୍ମା ମା ଲୋଇରି ଆତ୍ମାଦି ୱାଲେ ବଲୁ ମିସାକିଜି ମାଙ୍ଗିଁ ମାପୁରୁଦି କଡ଼ର୍‍ ଇଜି ୱେକ୍‍ସିନାତ୍‍ । 
\v 17 ଏନ୍ଦାଇରିଙ୍ଗ୍‍ଁ ମାଡ୍‌ ମାପୁରୁଦି କଡ଼ର୍‍, ୱାନି ଲୋକା ଉଣ୍ତିଙ୍ଗ୍‍ଁ ଟିକ୍‍ ଆର୍ସିବାଦ୍‍ତୁ ମାଡ୍‌ ମିସାନିକା । ମାରି କ୍ରିସ୍ତଦି ଉଣ୍ତିଙ୍ଗ୍‍ଁ ମାପୁରୁ ଆମାକା ଉଣ୍ତା କିଜି ଇଟ୍‌ତାମାନାନ୍‌, ଆବେନ୍‌ ବା ମା ବାଗ୍‍ ମାନାତ୍‌ । ଜଦି ମାଡ୍‌ ଜିସୁଦି ଦୁକ୍‍ବଗ୍‍ତି ବାଗ୍‍ ଆତିମାନିକା, ଆର୍‍ତିଙ୍ଗ୍‍ଁ ୱାନି ଗୌରବ୍‌ଦୁ ବା ମିସାନିକା ।
\s ୱାନିଦିନ୍‍ତି ଜାୟ୍‌
\p
\v 18 ଆମା ଗୌରବ୍‌ମୟ୍‌ତି ୱାନିଦିନ୍‍ତୁ ମାଡ୍‌ ମିସାନିକା, ଆୟା ଇସାବ୍‍ତାନ୍‍ ଇଲେଇ ଦୁକ୍‍ବଗ୍‍ ଇନିକା ସିଲେ । ଆୟା ୱେଡ଼ାଦୁ ମାପୁରୁ ୱାନି କଡ଼ରିଙ୍ଗ୍‌ ତର୍‍ନାନ୍‍ । 
\v 19 ୱିଜୁ ତିଆର୍‍ ଆତିମାନିକେଙ୍ଗ୍‍ଁ ୱେଡ଼ିକାଦାନ୍‍ ଆୟା ମାପୁରୁଦି ଦିନ୍‍ତିଙ୍ଗ୍‍ କାପ୍‌କିଜି ତେବାତେମାନେ, 
\v 20 ଇରିଙ୍ଗ୍‍ଁ ତିଆର୍‍ଆତିମାନି ମାପୁରୁଦି ମାଣାନ୍‌ ଆନାଦୁରିଆ ପୟ୍‍ଜି ତାନି ବଦାଦାନ୍‌ ୱେର୍‌ଏ ଆତାମାନାତ୍‌ । ମାତର୍‌ ତାନି ଆସା ମାନାତ୍‌, 
\v 21 ଅର୍‍ଲେନ୍‍ ମାପୁରୁଦି କଡ଼ରି ଗୌରବ୍‍ଦି ମିସାଜି ୱାଦ୍ ବା ତାନି ନାସ୍ଟୁ ଆନି ଅବସ୍ତାଦାନ୍‍ ମୁକ୍‍ଡ଼ାଦେଙ୍ଗ୍‍ଁ ଆଟ୍‍ନାନ୍‌ । 
\v 22 ମାତର୍‌ ଇୟାସାନ୍ଦି ୱିଜୁ ତିଆର୍ ଜନମ୍‍ ସିନି କାସ୍ଟୁଦି ୱିସାମ୍‍ ୱାଜା ନେସ୍‍ତେଙ୍ଗ୍‌ ଆଟ୍‌ସିନିକା । 
\v 23 \x + \xo ୮:୨୩ \xo*\xt ୨ କରିନ୍ତିୟ ୫:୨-୪.\xt*\x*ମାଡ୍‌ ମାପୁରୁଦି ପାର୍‍ତୁମ୍‍ ଦାନ୍‍ ୱାଜା ପବିତ୍ରଆତ୍ମାଦିଙ୍ଗ୍‍ଁ ପୟ୍‍ତିମାନିକା; ଆତିଙ୍ଗ୍‌ବା ମାପୁରୁଦି ଇଲୁଦିଲୋକ୍ ୱାଜା ଆଜି ପୁରାଦାନ୍‌ ମେନ୍ଦଲ୍‌ତି ମୁକ୍‍ଡ଼ାଦେଙ୍ଗ୍‍ଁ ଇଜି ମାଡ୍‌ ବା କାପ୍‌କିଜି ଜିବନ୍‍ତୁ ଆଡ଼ାବାଜିନାପ୍ । 
\v 24 ଇରିଙ୍ଗ୍‌ ଆସା ଇଡ୍‌ନି ମାଣାନ୍‌ ନେ ମାଡ୍‌ ରକିୟା ପୟ୍‍ନିକା, ମାତର୍‌ ଆମାକା ତର୍‍ନାତ୍‍, ଆୟା ଉଣ୍ତିଙ୍ଗ୍‍ଁ ଆସା ଇଡ୍‍ନିକା ସତ୍‌ତାନ୍‌ ଆସା ସିଲେ । ଏନ୍‌ ଇନିକା ତର୍‍ନି ବିସୟ୍‍ ୱିଜୁ ଉଣ୍ତିଙ୍ଗ୍‍ଁ ଆସା କିନାନ୍‍ ? 
\v 25 ମାତର୍‌ ମାଡ୍‌ ଜଦି ତରାୟ୍‍ଆଇ ବିସୟ୍‍ ଉଣ୍ତିଙ୍ଗ୍‍ଁ ଆସା କିନିକା, ଆର୍‍ତିଙ୍ଗ୍‍ଁ ମାଙ୍ଗିଁ ସାସ୍‍ତାନ୍‍ କାପ୍‌କିଦେଙ୍ଗ୍‌ ପଡ଼ାନାତ୍‍ ।
\p
\v 26 ମାରି ମାଡ୍‌ ସାକିସିଲିକାର୍‍, ମାତର୍‌ ପବିତ୍ରଆତ୍ମା ମାଙ୍ଗିଁ ସାକା କିନାତ୍‍, ଏଣ୍ତେସ୍‌ ପାର୍‌ତନା କିଦେଙ୍ଗ୍ଁ ଆନାତ୍‌, ଆକା ମାଡ୍‌ ନେସ୍‍ଇକା । ଆଦେଙ୍ଗ୍‍ଁ ପବିତ୍ରଆତ୍ମା ୱେର୍‍ତେଙ୍ଗ୍‍ଆଟ୍‍ଇ ବାସାଦାନ୍‍ ମା ଉଣ୍ତିଙ୍ଗ୍‍ଁ ମାପୁରୁଙ୍ଗ୍‍ଁ ମାଡ଼ିସ୍‍ କିନାତ୍‍ । 
\v 27 ମାପୁରୁ ଆକା ବୁଜାନାନ୍‍, ଇରିଙ୍ଗ୍‍ଁ ୱାନ୍‌ ମନ୍‍ ନେସ୍‍ନିକାନ୍‍ ମାରି ଆତ୍ମା ମାପୁରୁଦି ବଦାଦାନ୍ ୱାନି ଲୋକା ଉଣ୍ତିଙ୍ଗ୍‍ଁ ମାଡ଼ିସ୍‍ କିଜିମାନାତ୍‍ ।
\p
\v 28 ଏମେକାର୍‌ ମାପୁରୁଦି ବଦାଦିଙ୍ଗ୍‍ ପୁରା କିଦେଙ୍ଗ୍‍ଁ ଇଜି କୁକାତାମାନାର୍‍ ମାରି ମାପୁରୁଙ୍ଗ୍‍ଁ ଜିବନ୍‍ନୋନାର୍‍, ୱାରି ଉଣ୍ତିଙ୍ଗ୍‌ ୱିଜୁ ବିସୟ୍‍ ନେଗିକା ଆନାତ୍‌ ମାପୁ ଇକା ନେସ୍ତାମାନାପ୍ । 
\v 29 ଏମେୱାରିଙ୍ଗ୍‍ଁ ମାପୁରୁ ବାସେକିତାମାନାନ୍‍, ୱାରିଙ୍ଗ୍‍ଁ ୱାନି ମାରିସିଦି ବମାୱାଜା ଆଦେଙ୍ଗ୍‍ଁ ଇଜି ଆଗ୍‍ଡ଼ିରାନ୍‍ ତିଆର୍‍ କିତାମାର୍ହାନ୍ । ଆତିଙ୍ଗ୍‍ଁ, ମାପୁରୁଦି ମାରିସି ୱାରି ତଡ଼ାକାମାନୁ ପାର୍‍ତୁମ୍‍ତିକାନ୍ ଆନାନ୍‍ 
\v 30 ଏମେକାର୍‌ ଇୟାୱାଜା ବାସେ ଆଜି କୁକାୟ୍‍ ଆତାମାନାର୍‌, ୱାର୍‌ ମାପୁରୁଦି ଲାକ୍‍ତୁ ଦାର୍ମୁତିକାର୍‍ ୱେଙ୍ଗିଁଜି ଗୌରବ୍‌ତିକାର୍‍ ଆତାମାନାର୍‌ ।
\s ମାପୁରୁଦି ଜିବନ୍‍ନୋନିକା
\p
\v 31 ଇୟାୱିଜୁ ମାଣ୍‌କୁ ମାରି ଇନିକା ୱେର୍‍ନିକା ? ମାପୁରୁ ଜଦି ମା ତରିନ୍‍, ଏନ୍‌ ମା ବିରୁଦ୍‍ ଆଦେଙ୍ଗ୍‍ଁ ଆଟ୍‍ନାନ୍‍ ? 
\v 32 ମାପୁରୁ ଏସାଙ୍ଗ୍‍ଁବା ମା ବିରୁଦ୍‍ ସିଲେ, ଇରିଙ୍ଗ୍‍ଁ ୱାନ୍‌ ନିଜେଦି ମାରିସିଙ୍ଗ୍‍ଁ ବା ରକିୟା କିଏନ୍‍ଣ୍ତା ମା ଉଣ୍ତିଙ୍ଗ୍‍ଁ ଦାନ୍‍ କିତାମାନାନ୍‌ । ଆର୍‍ତିଙ୍ଗ୍‍ଁ, ୱାନ୍‌ ଇନିକା ମାଙ୍ଗିଁ ୱିଜୁ ବିସୟ୍‍ଦାନ୍‍ କିଏନ୍‌ ନୋ ? 
\v 33 ମାପୁରୁଦି ବାସେ ଆତି ଲୋକା ବିରୁଦ୍‍ତାନ୍‍ ଏନ୍‌ ଦସ୍‍ ସିଦେଙ୍ଗ୍‍ ଆଟ୍‍ନାନ୍‍ ? ୱାରିଙ୍ଗ୍‍ଁ ଦସ୍‍ସିଲିକାର୍‍ ଇଜି ନିଜେ ମାପୁରୁ ୱେର୍‍ତାମାନାନ୍‍ । 
\v 34 ଆର୍‍ତିଙ୍ଗ୍‍ଁ ଏନ୍‌ ୱାରିଙ୍ଗ୍‍ଁ ମାରି ଦସି କିଦେଙ୍ଗ୍‌ ଆଟ୍‍ନାନ୍‍ ? କ୍ରିସ୍ତ ଜିସୁ ଆକା ଏସାଙ୍ଗ୍‍ କିଏନ୍‌, ଇରିଙ୍ଗ୍‍ଁ ୱାନ୍‌ ସାତି ମାଣାନ୍‌ ନିଙ୍ଗିଁଜି ମାପୁରୁଦି ଉଣେରି ତରିନ୍‌ ବାସ୍‍ତାମାନାନ୍‍ ୱାନ୍ ମା ଉଣ୍ତିଙ୍ଗ୍‌ ପ୍ରାର୍ଥନା କିଜିନାନ୍ । 
\v 35 ଆର୍‌ତିଙ୍ଗ୍‌ ଏନ୍‌ ମାଙ୍ଗିଁ କ୍ରିସ୍ତଦି ଜିବନ୍‍ନନି ମାଣାନ୍‌ ୱେର୍‌ଏ କିଦେଙ୍ଗ୍‍ଁ ଆଟ୍‍ନାନ୍‍ ? ଦୁକ୍‍, କାସ୍ଟୁ, ତାଡ଼ନା ମାରି କାକୁର୍ତି, ଏର୍‍କି, ବିପଦ୍‍ ମାରି ସାନିକା, ଏନ୍‌ ଆକା କିଦେଙ୍ଗ୍‌ ଆଟ୍‍ଏନ୍‍ । 
\v 36 ଏଣ୍ତେସ୍‌ ସାସ୍ତ୍ରଦୁ ରାସାତାମାନାତ୍‌,
\q1 “ମି ଉଣ୍ତିଙ୍ଗ୍‍ଁ ମାପ୍‌ ୱିଜୁଦିନ୍ ସାନିକା ୱାଜା,
\q2 କାତାୟ୍‍ଆଦେଙ୍ଗ୍‍ଁ ସଲ୍‍ସିମାନି ମେଣ୍ତାୱାଜା ମାପ୍‌ ୱେଙ୍ଗିତାମାନାପ୍‍ ।”
\m
\v 37 ଏନ୍‌ ମାଙ୍ଗିଁ ଜିବନ୍‍ନୋନାନ୍‍, ୱାନି ସାକାଦାନ୍‍ ମାପ୍‌ ଇୟାୱିଜୁ ମୁସ୍‌କୁ ଜିଣାତାମାନାପ୍‍ । 
\v 38 ନାନୁ ସତ୍‌ତାନ୍‌ ନେସ୍‍ତାମାନା ଜେ ୱାନି ଜିବନ୍‍ନୋନି ମାଣାନ୍‌ ଏସାଙ୍ଗ୍‍ ୱେର୍‌ଏ ଆଏଟ୍‍ । ସାନିକା ନୋ ଜିନିକା, ମୁସ୍‌କୁପୁର୍‌ତି ଦୁତ୍‍ ମାରି ମୁସ୍‌କୁପୁର୍‌ତି ଇନି ପେରିକାତ୍‍ ମାରି ସାକ୍ତି, ଇଲେଇ ମାରି ୱାନିଦିନ୍‍, 
\v 39 ମୁସ୍‍କୁରିକା କି ଆଡ୍‍ଗିରି ଇନି ବିସୟ୍‍ ୱିଜୁ ତିଆର୍‍ ଆତିମାନୁ ଇୟାୱାଜା ଇନି ବିସୟ୍‍ ସିଲେତ୍‍, ଆମାକା ପ୍ରବୁ ଜିସୁ କ୍ରିସ୍ତ ମାଣାନ୍‌ ତରାତି ମାପୁରୁଦି ଆୟା ଜିବନ୍‍ତାନ୍‌ ମାଙ୍ଗିଁ ୱେର୍‌ଏ କିଦେଙ୍ଗ୍‌ ଆଟ୍‍ଏନ୍‍ !
\c 9
\s ମାପୁରୁ ନି ୱାନି ଲୋକୁ
\p
\v 1 ନାନୁ ସତ୍‍ ଇଜିନା, କ୍ରିସ୍ତଦି ଆତାମାନାଆକା ନାନୁ ପବିତ୍ର ଆତ୍ମାଦିଙ୍ଗ୍‌ ମିସ୍‌ ୱେର୍‍ଏ । 
\v 2 ନାନୁ ଜେ ଏସା କାସ୍ଟୁ ନି ନାଣ୍ତ ଦୁକ୍‍ତୁ ନା ଜିବନ୍‌ ଆଡ଼୍‍ବାଜିନାତ୍‍, ଇୟା ମାଟା ନାନୁ ସାଲାକି କିଜି ଇନ୍‍ଏ । ପବିତ୍ର ଆତ୍ମାଦାନ୍‌ ସାଲାଜି ନା ଜିବନ୍‌ ତେନି ସାକି । 
\v 3 ନା ନିଜେଦି ଜିହୁଦି ଜାତିଦି ତଡ଼ାନ୍‍କା ଉଣ୍ତିଙ୍ଗ୍‍ଁ ନାନୁ ନିଜେ କ୍ରିସ୍ତଦି ମାଣାନ୍‌ ୱେର୍‍ଏ ଆଜି ମାପୁରୁଦି ମାଣାନ୍‌ ଆନାଦୁରିଆ ଆନି ଉଣ୍ତିଙ୍ଗ୍‌ ନାନୁ ବଦା କିଜିନା । 
\v 4 ଇରିଙ୍ଗ୍‍ଁ ୱାରୁ ମାପୁରୁଦି ଲୋକୁ । ମାପୁରୁ ୱାରିଙ୍ଗ୍ ନିଜେଦି କଡ଼ରି ୱାଜା ଆସ୍‌ସି ୱାରି ଲାକ୍‍ତୁ ନିଜେଦି ମହିମା ତର୍‍ତାମାର୍ହାନ୍‍; ୱାରି ୱାଲେ ମାଟା ଇଡ୍‍ଜି ୱାରିଙ୍ଗ୍‍ଁ ନିୟମ୍‌ ସିତାମାର୍ହାନ୍‍, ୱାର୍‌ ସତ୍‌ତାନ୍‌ ଉପାସନା କିନାର୍‌; ୱାର୍‌ ମାପୁରୁଦିମାଣାନ୍‌ ମାଟେଙ୍ଗ୍‌ ପୟ୍‍ତାମାନାର୍‍, 
\v 5 ମା ୱେଙ୍ଗିଁତି ଜିହୁଦି ଡକ୍ରାଦାଦାରି ୱାର୍‌ କୁଟୁମ୍‌ତିକାର୍‍ ମାରି ଲୋକ୍‍ ୱାଜା କ୍ରିସ୍ତ ଆୟା କୁଟୁମ୍‌ତାନ୍‌ ଜନମ୍‍ । ଆୟା ୱିଜେରିଙ୍ଗ୍‍ଁ ସାସନ୍‍କିନି ମାପୁରୁ ଜୁଗ୍‌ ଜୁଗ୍‌ ଦନ୍ୟ ଆପିନ୍‌ । ଆମେନ୍‍ ।
\p
\v 6 ମାପୁରୁଦି ପାର୍‍ମାଣ୍‍ ଆରାତାମାନାତ୍‍ ଇଜି ନାନୁ ଇନ୍‍ଏ, ଇରିଙ୍ଗ୍‌ ଇସ୍ରାଏଲ୍‌ ଲୋକୁ ୱିଜେରେ ମାପୁରୁଦି ଲୋକୁ ଆଏର୍‍, 
\v 7 ମାରି ଅବ୍ରାହାମତି କୁଟୁମ୍‌ତିକାର୍‍ ୱିଜେରେ ମାପୁରୁଦି କଡ଼ର୍‍ ସିଲେ । ମାପୁରୁ ଅବ୍ରାହାମ୍‍ତିଙ୍ଗ୍‌ ଇର୍ହାମାର୍ହାନ୍‍, “ନି ଆମା କୁଟୁମ୍‌ତିରି ବିସୟ୍‍ତାନ୍‍ ମାପ୍‌ ପାର୍‍ମାଣ୍‍ କିତାମାର୍ହାପ୍‍, ୱାର୍‌ ଇସ୍‍ହାକ୍‍ମାଣାନ୍‍ ଜନମ୍‍ ଆନାର୍‍ ।” 
\v 8 ତେନି ଅର୍ତ ଆଜିନାତ୍‍, ଲୋକୁ ଆତିମାନିଙ୍ଗ୍‌ ମାପୁରୁଦି କଡ଼ର୍‍ ଆଦେଙ୍ଗ୍‌ ଆଟ୍‍ଏର୍‍ । ମାପୁରୁଦି ପାର୍‍ମାଣ୍‍ ଇସାବ୍‍ତାନ୍‍ ଜନମ୍‍ ଆତିମାନି କଡ଼ର୍‍ ମାପୁରୁଦି ଆଗ୍‍ଡ଼ି ସତ୍‌ତାନ୍‌ କଡ଼ ୱାଜା ୱେଙ୍ଗ୍‍ଁନାର୍‍ । 
\v 9 ମାପୁରୁ ଇୟା ପାର୍‍ମାଣ୍‍ କିତାମାର୍ହାନ୍, “ଟିକ୍‍ ଇୟା କାଡ଼ାଦୁ ମାପ୍‌ ଡ଼େସି ୱାନାପ୍‍, ନାସ୍ତିୱାଲେ ସାରା କଡ଼ ପୟ୍‍ନା ମାନାତ୍‌ ।”
\p
\v 10 କେବଲ ଇୟାୱାଜା ସିଲେ । ରିବିକାଦି ରିଏର୍‌ କଡ଼ର୍‍ ଅରେନ୍‍ ବୁବା ଇସ୍‍ହାକ୍‍ତି ମାଣାନ୍‌ ଜନମ୍‍ ଆତାମାର୍ହାର୍‍, 
\v 11 ଏସ୍ତିୱାଲେ କଡ଼ର୍‍ ଜନମ୍‍ ଆଏର୍‍ ମାର୍ହାର୍‌, ମାରି ନେଗିକା ନି ସେଇକା ଇନିକା କିଏର୍‌ ମାର୍ହାର୍‌, ନାସ୍ତିୱାଲେ ପାଣି ଉଣ୍ତିଙ୍ଗ୍‍ଁ ସିଲେ, ମାତର୍‌ କୁକ୍‍ତିମାନି ୱାନି ବଦା ଉଣ୍ତିଙ୍ଗ୍‍ଁ ବାସେକିତି ଇସାବ୍‍ତାନ୍‍ ମାପୁରୁଦି ଉଦେସ୍‍ ଏଣ୍ତେସ୍‌ ତିର୍‍ ତେବାନାତ୍‍, 
\v 12 ଇୟାଉଣ୍ତିଙ୍ଗ୍‍ଁ ଇୟା ମାଟା ୱାନିଙ୍ଗ୍‍ଁ ଇନାୟ୍‍ ଆତାମାର୍ହାତ୍‍, “ପେରି ତଡ଼ାନ୍‌ ଇସ୍ରିୱାନିଙ୍ଗ୍‌ ସେବା କିନାନ୍‍ ।” 
\v 13 ଏଣ୍ତେସ୍‌ ରାସାତାମାନାତ୍‌, “ଜାକୁବଙ୍ଗ୍‍ଁ ମାପ୍‌ ଜିବନ୍‍ନୋତାପ୍‍, ମାତର୍‌ ଏସୌଙ୍ଗ୍‌ କାଡ଼ିତାପ୍‍ ।”
\p
\v 14 ଆର୍‌ତିଙ୍ଗ୍‌ ମାଡ୍‌ ଇନିକା ଇନାଟ୍‍ ? ମାପୁରୁମାନୁ ଇନି ଅନ୍ୟାୟ୍‌ ମାନାତ୍‌ ? ଆକା ଏସାଙ୍ଗ ବା ସିଲେ । 
\v 15 ଇରିଙ୍ଗ୍‌ ୱାନ୍‌ ମୋସାଦିଙ୍ଗ୍‍ ଇର୍ହାମାର୍ହାନ୍‍, ଆମାୱାନି ମୁସ୍‌କୁ ମା ଦୟା ମାନାତ୍‌, ୱାନିଙ୍ଗ୍‍ଁ ମାପ୍‌ ଦୟା କିନାପ୍‍, ମାରି ଆମାୱାନି ମୁସ୍‌କୁ ମା ଦୟା ମାନାତ୍‌, ୱାନିଙ୍ଗ୍‍ଁ ମାପ୍‌ ଦୟା କିନାପ୍‍ । 
\v 16 ଆଦେଙ୍ଗ୍‌ ଏନ୍‌ ବଦା କିନାନ୍‍ ମାରି ଏନ୍‌ ପାଣି କିନାନ୍‍, ୱାନି ମାଣାନ୍‌ ଇକା ଆଏତ୍‍, ମାତର୍‌ ମାପୁରୁଦି ଦୟାଦାନ୍‍ ଆନାତ୍‌ । 
\v 17 ଦାର୍ମୁସାସ୍ତ୍ର ଇସାବ୍‍ତାନ୍‍ ମାପୁରୁ ମିସର୍‍ତି ରାଜେଙ୍ଗ୍‍ ଇର୍ହାମାର୍ହାନ୍‍, “ନି ମାଣାନ୍‌ ମା ସାକ୍ତି ତର୍‍ତେଙ୍ଗ୍‍ଁ ଇଜି ମାରି ୱିଜୁ ଦୁନିଆଦୁ ମା ମହିମା ତର୍‍ତେଙ୍ଗ୍‍ଁ ଇଜି ମାପ୍‌ ନିଙ୍ଗିଁ ରାଜା କିତାମାନାପ୍‍ ।” 
\v 18 ଆଦେଙ୍ଗ୍‌, ମାପୁରୁ ଆମାୱାନିଙ୍ଗ୍‍ଁ ବଦା କିନାନ୍‍, ୱାନିଙ୍ଗ୍‌ ଦୟା କିନାନ୍‍, ମାରି ଆମାୱାନିଙ୍ଗ୍‍ଁ ବଦା କିନାନ୍‍, ୱାନିଙ୍ଗ୍‍ଁ ଆଟ୍‍ୱା ଲୋକ୍‍ କିନାନ୍‍ ।
\s ମାପୁରୁଦି ରିସା ନି ଦୟା
\p
\v 19 ମି ଲୋଇ ଏନ୍‌ ନାଙ୍ଗିଁ ଇନ୍‌ଡ୍ରେଙ୍ଗ୍‌ ଆଟ୍‍ନାନ୍‍ ? “ଆର୍‍ତିଙ୍ଗ୍‍ଁ ମାପୁରୁ ଏନ୍ଦା ଏଙ୍ଗ୍‍ଁ ଦସି କିନାନ୍‍ ? ଏନ୍‌ ଇନିକା ମାପୁରୁଦି ବଦା ବିରୁଦ୍‍ତାନ୍‍ ଇନିକା କିଦେଙ୍ଗ୍‍ ଆଟ୍‍ନାନ୍‍ ?” 
\v 20 ମାତର୍‌ ବନ୍ଧୁ, ମାପୁରୁଦି ମାଟାଦୁ ଡ଼େସି ୱାର୍‍ଗିଦେଙ୍ଗ୍‍ ନିନୁ ଏନ୍‌ ? “ନାଙ୍ଗିଁ ଇୟାୱାଜା ଏନ୍ଦା ରସ୍‍ତି” ଇଜି ସାଟି କୁମାର୍‍ତିଙ୍ଗ୍‍ଁ ୱେନ୍‍ବାଦେଙ୍ଗ୍‍ଁ ଆଟ୍‍ଏତ୍‍ । 
\v 21 ସିକ୍‍ଲାଦିଙ୍ଗ୍‍ଁ ନିଜେ ବଦା ଇସାବ୍‍ତାନ୍‍ ବ୍ୟବହାର୍ କିଜି ସାଟି ରସ୍‍ତେଙ୍ଗ୍‍ଁ ଇଜି କୁମାର୍‍ତି ପୁରା ଅଦିକାର୍‌ ମାନାତ୍‌ । ଇକା ସିକ୍‍ଲା ଗୁଡ଼ିଦାନ୍‍ ୱାନ୍‌ ରୁଣ୍ତି ରକମ୍‍ତି ସାଟି ରସ୍‍ତେଙ୍ଗ୍‍ଁ ଆଟ୍‍ନାନ୍‍, ଉଣ୍ତ୍ରି ବିସେସ୍‍ ଦିନ୍‍କାଙ୍ଗ୍‍ଁ ନି ମାରି ଉଣ୍ତ୍ରି ଇସ୍ରି ପାଣିଦୁ ବ୍ୟବହାର୍ ଆଦେଙ୍ଗ୍‍ଁ ଇଜି ।
\p
\v 22 ମାପୁରୁ ବା ଟିକ୍‍ ଆୟାୱାଜା କିତାମାନାନ୍‌ । ୱାନ୍‌ ବଦାକିଜିମାର୍ହାନ୍‍ ୱାନି ରିସା ତର୍‍ତେଙ୍ଗ୍‍ ମାରି ବପୁ ତର୍‍ତେଙ୍ଗ୍‍ । ମାତର୍‌ ଏମେକାର୍‌ ୱାନି ରିସାଦି ଲୋକୁ ଆଜି ନାସ୍ଟୁ ଆନିକାମାର୍ହାତ୍‍, ୱାରି ଉଣ୍ତିଙ୍ଗ୍‍ଁ ମାପୁରୁ ନାଣ୍ତ ସାସ୍‍ଆସ୍‍ସି ଦୟା କିତାନ୍‍ । 
\v 23 ମାରି ୱାନ୍‌ ୱାନି ନାଣ୍ତ ଗୌରବ୍‍ ତର୍‍ତେଙ୍ଗ୍‍ଁ ଇଜି ମାଙ୍ଗିଁ ବିସେସ୍‍ ଦୟାଦି ଲୋକ୍‍ ୱାଜା ଆଗ୍‍ଡ଼ିରାନ୍‍ ବାସେକିତା ମାର୍ହାନ୍‍ । 
\v 24 ଆୟାଉଣ୍ତିଙ୍ଗ୍‌ ତୋ ୱାନ୍‌ କେବଲ ଜିହୁଦିଲୋକା ମାଣାନ୍‌ ସିଲେ, ମାତର୍‌ ଅଣଜିହୁଦି ମାଣାନ୍‌ ବା ମାଙ୍ଗିଁ କୁକ୍‌ତାମାନାନ୍‌ । 
\v 25 ଇୟା ବିସୟ୍‌ତାନ୍‌ ହୋସେୟ ବଇଦୁ ମାପୁରୁ ଇର୍ହାମାନାନ୍‌ :
\q1 “ଏମେକାର୍‌ ମା ଲୋକୁ ସିଲେତାର୍‍;
\q2 ୱାରିଙ୍ଗ୍‍ଁ ନିଜେଦି ଲୋକୁ ୱାଜା କୁକ୍‍ନାପ୍‍ ।
\q1 ଏମେ ଜାତିଦିଙ୍ଗ୍‍ଁ ମାପ୍‌ ଜିବନ୍‍ନୋଏପ୍‌ ମାର୍ହାପ୍‍,
\q2 ୱାରିଙ୍ଗ୍ ମା ଲାଡ୍‍ତିକାନ୍‍ ଇଜି କୁକ୍‍ନାପ୍‍ ।
\q1
\v 26 ଏମେ ବାଡିଦୁ ୱାରିଙ୍ଗ୍‍ଁ ଇର୍ହାମାର୍ହାପ୍‍, ‘ମିର୍‌ ମା ଲୋକୁ ଆଇଦେର୍‍,’
\q2 ଆବେ ୱାର୍‌ ଜିବନ୍‌ମାନି ମାପୁରୁଦି କଡ଼ର୍‍ ଇଜି ଦର୍‍ପୟ୍‍ନାର୍‍ ।”
\m
\v 27 ମାରି ଇସ୍ରାଏଲ୍‌ ବିସୟ୍‍ତାନ୍‍ ଜିସାଇୟ ଇର୍ହାମାନାନ୍‌, “ଜଦିବା ଇସ୍ରାଏଲ୍‍ତିକାର୍‍ ସାମ୍‍ଦୁର୍‍ତି ବାଲି ୱାଜା ଆତିଙ୍ଗ୍‌ବା, ୱାରି ଲୋଇ ଉଣା ଏସ ମାତର୍‌ ରକିୟା ପୟ୍‍ନାର୍‍ । 
\v 28 ଇରିଙ୍ଗ୍‍ଁ ପ୍ରବୁ ପୁରା ଦାପ୍ରେ ଦୁନିଆଦୁ ପୁରା ନ୍ୟାୟ୍‍ ବିଚାର୍‍ କିନାନ୍ ।” 
\v 29 ଏଣ୍ତେସ୍‌ ଜିସାଇୟ ମାରି ବା ଇର୍ହାମାର୍ହାନ୍‍, “ପେରିମାପୁରୁ ପ୍ରବୁ ମା ଏସ ଲୋକା କୁଡ଼ାଦିୱାରିଙ୍ଗ୍‍ ରକିୟା କିଏନ୍‌ ମାର୍ହାନ୍‍, ମା ଅବସ୍ତା ସଦମ୍‍ ଗମୋରାଦି ଲୋକାୱାଜା ଆତାତ୍‍ମାନ୍ଦି ।”
\s ଇସ୍ରାଏଲ୍‌ ଉଣ୍ତିଙ୍ଗ୍‍ଁ ପାଉଲ୍‍ତି ପାର୍‍ତନା
\p
\v 30 ଆଦେଙ୍ଗ୍‌ ଅଣଜିହୁଦି ଲୋକା ବିସୟ୍‍ତାନ୍‍ ଇକା ଇନ୍‍ଡ୍ରେଙ୍ଗ୍‍ଁ ଆଟ୍‍ନିକା, ୱାର୍‌ ଦାର୍ମୁତିକାର୍‍ ଆଦେଙ୍ଗ୍‍ଁ ସେସ୍ଟା କିଏଜିମାର୍ହାର୍‍, ମାତର୍‌ ୱାରି ବିସ୍‍ବାସ୍‍ ଉଣ୍ତିଙ୍ଗ୍‍ଁ ଦାର୍ମୁତିକାର୍‍ ଇଜି ୱେଙ୍ଗିଁତାମାନାର୍‍ । 
\v 31 ମାତର୍‌ ଇସ୍ରାଏଲ୍‌ ଦାର୍ମୁଦି ଲୋକୁ ନିୟମ୍‍ତାନ୍‍ ଦାର୍ମୁତିକାର୍‍ ଆଦେଙ୍ଗ୍‍ଁ ଇଜି ସେସ୍ଟା କିଜି ଆରାତା ମାନାର୍‌ । 
\v 32 ଏନ୍ଦା ସିଲେ ? ୱାର୍‌ ନିଜେଦି ସେସ୍ଟାଦି ମୁସ୍‌କୁ ଆସା କିଜିମାର୍ହାର୍‍, ବିସ୍‍ବାସ୍‍ ମୁସ୍‌କୁ ସିଲେ । ଆୟାଉଣ୍ତିଙ୍ଗ୍‌ ୱାର୍‌ ବାଦା ସିଜିମାନି କାଲୁଦୁ ଡୁକାୟ୍‌ଆଜି ତାକାତାର୍‍ । 
\v 33 ଏଣ୍ତେସ୍‌ ସାସ୍ତ୍ରଦୁ ରାସାତାମାନାତ୍‌ :
\q1 “ସୁଡ଼୍‍ଦୁ, ନାନୁ ସିୟୋନତୁ ଉନ୍‍ଣ୍ତ୍ରି କାଲୁ ମାରି ଉନ୍‌ଡ୍ରି ପେରିକାଲୁ ତିଆର୍‌ କିତାମାନାପ୍‌ ।
\q2 ଆବେନୁ ଡୁକାୟ୍‌ ଆଜି ଲୋକୁ ତାକାୟ୍‌ ଆନାର୍‌,
\q1 ମାତର୍‌ ଏନ୍‌ ୱାନିମାନୁ ବିସ୍‍ବାସ୍‍ କିନାନ୍‍, ୱାନ୍‌ ନିରାସ୍‍ ଆଏନ୍‍ ।”
\c 10
\p
\v 1 ନା ତଡ଼ାନ୍‍କୁ, ନି ତାଙ୍ଗିକ୍ ନିଜେ ଜାତିଦି ଲୋକୁ ରକିୟା ପାଏଆପିର୍, ଇକା ନା ଜିବନ୍‍ତି ବଦା ମାରି ମାପୁରୁମାନୁ ଇକା ନା ପାର୍‍ତନା । 
\v 2 ମାପୁରୁ ଉଣ୍ତିଙ୍ଗ୍‌ ୱାରି ନାଣ୍ତ ତିଲାନିକା ମାନାତ୍‌, ମାତର୍‌ ଆୟା ମାନାନିକା ସତ୍‍ ସାକିୟ୍‌ ମୁସ୍‌କୁ ସିଲେତ୍‍ । 
\v 3 ଲୋକାଙ୍ଗ୍‍ ଦାର୍ମୁତିକାର୍‍ ୱାଜା ମାନାଦେଙ୍ଗ୍‍ଁ ଇଜି ମାପୁରୁ କିତି ଉପାୟ୍ ମାନାଏଜି ୱାର୍‌ ଦାର୍ମୁତିକାର୍‍ ଆଦେଙ୍ଗ୍‍ଁ ନିଜେଦି ସାରିଦୁ ବୁଲାତାମାନାର୍‍ । ଆଦେଙ୍ଗ୍‍ଁ ୱାର୍‌ ମାପୁରୁଦି ଆୟା ସାରି ଡ଼ିସ୍‍ତା ସିତାମାନାର୍‍ । 
\v 4 କ୍ରିସ୍ତନେ ନିୟମ୍‍ତି ସାରାସାରି, କେବଲ ୱାନିମାନୁ ବିସ୍‍ବାସ୍‍ କିନିମାଣାନ୍‍ ଲୋକ୍‍ ମାପୁରୁଦି ଲାକ୍‍ତୁ ଦାର୍ମୁତିକାର୍‍ ଆନାର୍‍ ।
\s ୱିଜେରି ଉଣ୍ତିଙ୍ଗ୍‍ଁ ରକିୟା
\p
\v 5 ଏମେକାର୍ ନିୟମ୍‍ ମାନାନି ମାଣାନ୍‌ ଦାର୍ମୁତିକାନ୍‍ ଆନି ବିସୟ୍‍ତାନ୍‍ ମୋସା ରାସ୍‌ତାମାନାନ୍‌ : “ଏମେକାର୍‌ ମାପୁରୁଦି ମାଟା ମାନାନାର୍‌, ୱାର୍‌ ଜିନାର୍‍ ।” 
\v 6 ମାତର୍‌ ବିସ୍‍ବାସ୍‍ତାନ୍ ଦାର୍ମୁଦିକାନ୍‍ ଇଜି ୱେଙ୍ଗିଁତି ବିସୟ୍‍ତାନ୍‍ ସାସ୍ତ୍ରଦୁ ରାସାତାମାନାତ୍‌, “ଏନ୍‌ ମୁସ୍‌କୁପୁର୍‌ତୁ ସନାନ୍‍ ? କ୍ରିସ୍ତଙ୍ଗ୍‌ ରେପ୍‌ସି ତାନି ଉଣ୍ତିଙ୍ଗ୍‌, ଇୟାୱାଜା ପ୍ରସ୍ନ କିନି ଦରକାର୍ ସିଲେତ୍‌ 
\v 7 ମାରି ଏନ୍‌ ପାତାଲ୍‍ତୁ ସନାନ୍‍ ? କ୍ରିସ୍ତଦିଙ୍ଗ୍‌ ମାରିଡ଼େସି ଜିବନ୍‌କିଜି ତାନି ଉଣ୍ତିଙ୍ଗ୍‌, ଇୟା ମାଟା ବା ମିର୍‌ ୱେନ୍‍ବାନିକା ଦର୍‌କାର୍‌ ସିଲେ ।” 
\v 8 ଇରିଙ୍ଗ୍‌ ସାସ୍ତ୍ର ଇସାବ୍‍ତାନ୍‍, “ମାପୁରୁଦି କାବୁର୍‌ ମି ଲାକ୍‍ତୁ, ମି ୱେୟୁଦୁ ନି ଜିବନ୍‍ତୁ ମାନାତ୍‌ ।” ବିସ୍‍ବାସ୍‍ ବିସୟ୍‍ତାନ୍‍ ଇୟା କାବୁର୍‌ ନେ ମାପ୍‌ ପ୍ରଚାର୍‌ କିଜିନାପ୍‍ । 
\v 9 ଜଦି ଜିସୁଙ୍ଗୁଁ ପ୍ରବୁ ଇଜି ୱେୟୁଦୁ ମାନାନିଦେର୍‍ ମାରି ମାପୁରୁ ୱାନିଙ୍ଗ୍‍ଁ ସାତିମାଣାନ୍‍ ନିକ୍‍ତାମାନାନ୍‍ ଇଜି ଜିବନ୍‍ତୁ ବିସ୍‍ବାସ୍‍ କିନିଦେର୍‍, ଆର୍‍ତିଙ୍ଗ୍‍ଁ, ମିର୍‌ ରକିୟା ପୟ୍‍ନିଦେର୍‍ । 
\v 10 ମାତର ବିସ୍‍ବାସ୍‍ତାନ୍ ମାଡ୍‌ ମାପୁରୁଦି ଲାକ୍‍ତୁ ଦାର୍ମୁତିକାର୍‍ ଇଜି ୱେଙ୍ଗ୍‍ଁଦେଙ୍ଗ୍‍ଁ ଆଟ୍‍ନିକା ମାରି ୱେୟୁଦୁ ମାନାନି ମାଣାନ୍‌ ମାଡ୍‌ ରକିୟା ପୟ୍‍ଦେଙ୍ଗ୍‍ଁ ଆଟ୍‍ନିକା । 
\v 11 ଦାର୍ମୁସାସ୍ତ୍ର ଇନାତ୍‍, “ଏମେକାର୍‌ ୱାନିମାନୁ ବିସ୍‍ବାସ୍‍ କିନାର୍‌, ୱାର୍‌ ନିରାସ୍‍ ଆଏର୍‍ ।” 
\v 12 ଇରିଙ୍ଗ୍‌ ଜିହୁଦିଲୋକୁ ନି ଅଣଜିହୁଦି ଲୋକା ଲୋଇ ଇନିକା ୱେର୍‌ଏ ସିଲେତ୍‍; ଆଦେଙ୍ଗ୍‍ଁ ୱିଜେରି ଅରେନ୍‍ ପ୍ରବୁ, ଏମେକାର୍‌ ୱାନି ସାକା ପାର୍‍ତନା କିନାର୍‌, ୱାରିଙ୍ଗ୍‍ଁ ୱାନ୍‌ ନାଣ୍ତ ଆର୍ସିବାଦ୍‌ କିନାନ୍‍ । 
\v 13 “ଏନ୍‌ ପ୍ରବୁଦି ଦର୍‍ତାନ୍‍ ପାର୍‍ତନା କିନାନ୍‍, ୱାନ୍‌ ରକିୟା ପୟ୍‍ନାନ୍‍ ।”
\p
\v 14 ମାତର୍‌ ୱାନିମାନୁ ବିସ୍‍ବାସ୍‍ କିଏନ୍‍ଣ୍ତା ୱାର୍‌ ଏଣ୍ତେସ୍‌ ୱାନିଙ୍ଗ୍‍ଁ ପାର୍‍ତନା କିନାର୍‌ ? ମାରି ୱାନି ବିସୟ୍‍ତାନ୍‍ ସୁସମାଚାର୍‍ ୱେନ୍‍ଏଜି ୱାର୍‌ ଏଣ୍ତେସ୍‌ ବିସ୍‍ବାସ୍‍ କିନାର୍‌ ? 
\v 15 ମାରି ପ୍ରଚାର୍‍ କିଦେଙ୍ଗ୍‌ ଇଜି ପକାୟ୍‍ଆଏତିଙ୍ଗ୍‍ଁ ଅରେନ୍‍ ପ୍ରଚାର୍‍ ଏଣ୍ତେସ୍‌ କିନାନ୍‍ ? ଇୟା ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌, “ନେଗି ସୁସମାଚାର୍‌ ପ୍ରଚାର୍‌କିନିୱାରି ୱାରି ଏସା ୱେଡ଼ିକା !” 
\v 16 ମାତର୍‍ ୱିଜେରେ ଆୟା ସୁସମାଚାର୍‍ ମାନାଏର୍‍ । ଆୟାଉଣ୍ତିଙ୍ଗ୍‌ ଜିସାଇୟ ରାସ୍‌ତାମାନାନ୍‌, “ଏ ପ୍ରବୁ, ଏନ୍‌ ମା ନେଗିକାବୁର୍‌ ମାଟା ବିସ୍‌ବାସ୍‌ କିତାମାନାନ୍‍ ?” 
\v 17 ସୁସମାଚାର୍‍ ୱେନି ମାଣାନ୍‌ ବିସ୍‍ବାସ୍‍ ଜନମ୍‍ ଆନାତ୍‌ ମାରି କ୍ରିସ୍ତଙ୍ଗ୍‍ଁ ପ୍ରଚାର୍‍ କିନିକା ନେ ଆୟା ସୁସମାଚାର୍‍ ।
\p
\v 18 ମାତର ନାନୁ ୱେନ୍‍ବାନା, ୱାର୍‌ ଇନିକା ଆୟା ମାଟା ୱେନ୍‌ଏର୍‌ ? ସତେନେ ୱେର୍‍ଆମାନାର୍‍, ଇରିଙ୍ଗ୍‍ଁ ସାସ୍ତ୍ରଦୁ ରାସାତାମାନାତ୍‌,
\q1 “ୱାରି ବଲ୍‍ ଦୁନିଆ ୱିଜୁ ୱେଙ୍ଗିଁତା ସର୍ହାମାନାତ୍‍,
\q2 ୱାରି ମାଟା ଦୁନିଆଦି ଇତି ସାନ୍ଦି ୱେନାୟ୍‍ ଆତାମାନାତ୍‍ ।”
\m
\v 19 ମାରିଡ଼େସି ନାନୁ ୱେନ୍‍ବାନା, ଇସ୍ରାଏଲ୍‌ ଲୋକୁ ଇନିକା ଆକା ବୁଜାଏତାର୍‍ ନୋ ? ୱାର୍ ବୁଜାତାର୍ ନାଣ୍ତ ଆଗ୍‍ଡ଼ିରାନ୍‍ ମୋସା ତେନି ଉତର ସିଜି ରାସ୍‌ତାମାନାନ୍‌ :
\q1 “ମା ଲୋକାଙ୍ଗ୍‍ ରିସା କିବିସ୍‍ କିଦେଙ୍ଗ୍‍ଁ ଇଜି
\q2 ଉନ୍‍ଣ୍ତ୍ରି ନେସ୍‌ଇ ଜାତିଦିଙ୍ଗ୍‍ ବ୍ୟବହାର୍ କିନାପ୍‍ ।
\q1 ଆୟାୱାଜା ଉନ୍‍ଣ୍ତ୍ରି ବୁଦିସିଲି ଜାତିଦାନ୍‍
\q2 ୱାରିଙ୍ଗ୍‍ଁ ରିସା କିବିସ୍‍ କିନାନ୍ ।”
\m
\v 20 ଜିସାଇୟ ମାରି ସାସ୍‍ତାନ୍‍ ଇର୍ହାମାନାନ୍‌,
\q1 “ମାଙ୍ଗିଁ ପୟ୍‍ଏଜିମାନି ଲୋକୁ ମାଙ୍ଗିଁ ପୟ୍‍ତାର୍‍;
\q2 ଏମେକାର୍‌ ମାଙ୍ଗିଁ ପୟ୍‍ଏଜିମାର୍ହାର୍‍, ୱାରି ଲାକ୍‍ତୁ ମାପ୍‌ ତର୍‍ଆୟ୍‍ଆତାପ୍‍ ।”
\m
\v 21 ମାତର୍‌ ମାପୁରୁ ଇସ୍ରାଏଲ୍‌ତି ଲୋକା ବିସୟ୍‍ତାନ୍‍ ୱାନ୍‌ ରାସ୍‌ତାମାନାନ୍‌, “ଉନ୍‍ଣ୍ତ୍ରି ମାନାଇ ଜାଟିକିନି ଜାତିଦିଙ୍ଗ୍‍ଁ ମାପ୍‌ ୱିଜୁଦିନ୍ କିୟୁ ସାର୍‍ପ୍‍ସି କୁକ୍‍ତାମାନାପ୍‍ ।”
\c 11
\s ଇସ୍ରାଏଲ୍‌ତି ଲୋକା ଉଣ୍ତିଙ୍ଗ୍‌ ମାପୁରୁଦି ଦୟା
\p
\v 1 \x + \xo ୧୧:୧ \xo*\xt ପିଲିପିୟ ୩:୫.\xt*\x*ନାନୁ ମାରି ୱେନ୍‍ବାଦେଙ୍ଗ୍‍ ଆଟ୍‍ନା, ଆର୍‌ତିଙ୍ଗ୍‌ ଇନିକା ମାପୁରୁ ୱାନି ନିଜେଦି ଲୋକାଙ୍ଗ୍‍ଁ ଡ଼ିସ୍‍ତାମାନାନ୍‍ ? ଏସାଙ୍ଗ୍‍ଁ ସିଲେ ! ନାନୁ ନିଜେ ଅରେନ୍ ଇସ୍ରାଏଲ୍‌ ଲୋକ୍‍, ଅବ୍ରାହାମତି କୁଟୁମ୍‌ ମାରି ବିନ୍ୟାମିନ୍ ଇଲୁଦାନ୍‍ ଜନମ୍‍ ଆତାମାନା । 
\v 2 ମାପୁରୁ ଆଗ୍‍ଡ଼ିରାନ୍‍ ବାସେକିତିମାନି ୱାନି ଲୋକାଙ୍ଗ୍‍ଁ ଏସାଙ୍ଗ୍‍ଁବା ଡ଼ିସ୍‍ଏନ୍ । ମିର୍‌ ଦାର୍ମୁସାସ୍ତ୍ର ପଡ଼ାତିମାନିଦେର୍‍ ଏଣ୍ତେସ୍‌ ଏଲିୟ ମାପୁରୁ ଲାକ୍‍ତୁ ଇସ୍ରାଏଲ୍‌ ଲୋକା ବିରୁଦ୍‍ତାନ୍‍ ଇର୍ହାମାର୍ହାନ୍‍ : 
\v 3 “ପ୍ରବୁ ୱାର୍‌ ୱାରି ବାବବାଦିରିଙ୍ଗ୍‍ଁ ଡାକ୍‍ତା ମାନାର୍‌ ମାରି ମି ପୁଜାବେଦିଙ୍ଗ୍‌ଁ ୱିଜୁ ରୁକ୍‍ସି ନାସ୍ଟୁ କିତାମାନାର୍‍ । କେବଲ ନାନୁ ଅରେନ୍‍ ମାତର୍‌ ରକିୟା ପୟ୍‍ତାମାନା; ନାଙ୍ଗିଁ ବା ଡାକ୍‍ସୋ ପକ୍‍ତେଙ୍ଗ୍‍ଁ ୱାର୍‌ ସେସ୍ଟା କିଜିନାର୍‍ ।” 
\v 4 ମାପୁରୁ ଇନିକା ଇର୍ହାମାର୍ହାନ୍‍ ଏଲିୟଙ୍ଗ ? “ମିଚ୍‍ ଦିୟାମ୍‍ ବାଲ୍‍ ବମାଦିଙ୍ଗ୍‍ଁ ପୁଜା କିଇ ମାନି ସାତ୍‍ ହାଜାର୍‌ ଲୋକାଙ୍ଗ୍‍ଁ ମା ଉଣ୍ତିଙ୍ଗ୍ଁ ଇଟ୍‍ତାମାନାପ୍‍ ।” 
\v 5 ଇଲେଇ ଟିକ୍‍ ଆୟାୱାଜା ଗଟାତାତ୍‌ । ମାପୁରୁ ଦୟା କିଜି ଏମେୱାରିଙ୍ଗ୍ଁ ବାସେକିତା ମାର୍ହାନ୍, ୱାରି ଲୋଇ ଏସଲୋକ୍‍ ବାକି ମାନାର୍‌ । 
\v 6 ମାପୁରୁ ୱାରିଙ୍ଗ୍‍ଁ ବାସେକିତାମାନାନ୍‍ ନିଜେଦି ଦୟା ଉଣ୍ତିଙ୍ଗ୍‍ଁ । ଜଦି ୱାରି ସତ୍‍ପାଣି ଉଣ୍ତିଙ୍ଗ୍‍ଁ ମାପୁରୁ ୱାରିଙ୍ଗ୍‍ଁ ବାସେ କିତାନ୍‍ମାନ୍ଦି, ୱାନି ଦୟା ସତ୍‌ତାନ୍‌ ଦୟା ଆଏତାତ୍‍ମାନ୍ଦି ।
\p
\v 7 ଆର୍‍ତିଙ୍ଗ୍‍ଁ ଇନିକା ଆତାତ୍‍ ? ଇସ୍ରାଏଲ୍‌ ଲୋକୁ ଆମାକା ପୟ୍‍ଜିମାର୍ହାର୍‍, ଆକା ପୟ୍‍ଏତାର୍‍ । କେବଲ ମାପୁରୁ ବାସେକିତିମାନି ଉନ୍‍ଣ୍ତ୍ରି ନିସ୍ରି ଦଲ୍‌ ୱାନିଙ୍ଗ୍‍ଁ ପୟ୍‍ତାର୍‍ । ଆଇ ଏନ୍‌ ମାପୁରୁଦି କୁକ୍‍ତି ଉଣ୍ତିଙ୍ଗ୍‍ଁ ମନ୍ ସିଏତାର୍‍ । 
\v 8 ଏଣ୍ତେସ୍‌ ସାସ୍ତ୍ର ଇନାନ୍‌, “ସତେ ଏଣ୍ତେସ୍‌ ମାପୁରୁ ୱାରି ମନ୍ ନି ଜିବନ୍‍ତିଙ୍ଗ୍‍ଁ ଆଟୁୱା କିତାମାନାନ୍‍ । ଇୟାସାନ୍ଦି ୱାର୍‌ ସୁଡ଼୍‍ଦେଙ୍ଗ୍‍ ଆଟ୍‍ନାର୍‍ ନ ୱେନ୍‍ଡ୍ରେଙ୍ଗ୍‍ଁ ଆଟ୍‍ସିନାର୍‍ ।” 
\v 9 ମାରି ଦାଉଦ ଇନାନ୍‌,
\q1 “ୱାର୍‌ ବଜି କିନିୱାଲେ ଉରିଦୁ ସେର୍‌ଜି ।
\q2 ଆର୍‍ଜି ଦଣ୍ତ୍‍ ବଗାପିର୍‍ ।
\q1
\v 10 ୱାର୍‌ କାଣୁକୁ କାଣା ଆଜି ଇନିକା ସୁଡ଼ୁଦେଙ୍ଗ୍‌ ଆଟ୍‍ମାପିର୍‍ ।
\q2 ୱିଜୁୱାଲେ ଦୁକ୍ କାସ୍ଟୁ ବଗାଜି ବଗାଜି ୱାରି ଜୁକି କୁବ୍‌ଡ଼ା ଆପିତ୍‌ ।”
\p
\v 11 ନାନୁ ୱେନ୍‍ବାନା, ଜିହୁଦିଲୋକୁ ତାକାନି ମାଣାନ୍‌ ଇନିକା ନାସ୍ଟୁ ଆତାର୍‌ ? ଏସାଙ୍ଗ୍ଁ ସିଲେ । ପାପ୍ କିତାର୍‍ଆକା, ୱାରିଙ୍ଗ୍‍ଁ ରିସା କିଦେଙ୍ଗ୍‍ଁ ଇଜି ଅଣଜିହୁଦି ଲୋକାଙ୍ଗ୍‍ଁ ରକିୟାଦି ଅଦିକାରି କିଆୟ୍‍ ଆତାତ୍‍ । 
\v 12 ଜିହୁଦିଲୋକା ପାପ୍‍, ଦୁନିଆଦି ଆଇ ୱିଜେରି ଉଣ୍ତିଙ୍ଗ୍‍ଁ ନାଣ୍ତ ଆର୍ସିବାଦ୍‌ ତାତାମାନାତ୍‌ । ଜିହୁଦିଲୋକା ଆତ୍ମିକ ଜିବନ୍‍ତି କାକୁର୍ତି ଉଣ୍ତିଙ୍ଗ୍‍ଁ ଅଣଜିହୁଦି ଲୋକୁ ଆର୍ସିବାଦ୍‍ତି ନାଣ୍ତ ଲାବ୍‍ କିତାମାନାର୍‍ । ଜଦି ୱିଜେରେ ଜିହୁଦି ଜାତି ରକିୟା ପୟ୍‍ଦେଙ୍ଗ୍‍ଁ ଆଟ୍‍ତାର୍‍ମାନ୍ଦି, ଆତିଙ୍ଗ୍‍ଁ ଆବେଣାନ୍‍ ମାରି ଏସା ନାଣ୍ତ ଆର୍ସିବାଦ୍‌ ପୁଟ୍‌ଏତ୍‌ ନୋ ?
\s ଅଣଜିହୁଦି ଲୋକା ରକିୟା
\p
\v 13 ଅଣଜିହୁଦି ଲୋକାଙ୍ଗ୍‌ ନାନୁ ଇଜିନା, ମି ଉଣ୍ତିଙ୍ଗ୍‍ଁ ପେରିତ ସିସୁ ୱାଜା ସେବା ପାଣି କିଦେଙ୍ଗ୍‍ଁ ନାନୁ ଦନ୍ୟବାଦ ଅଡ଼୍‌ବିଜିନା । 
\v 14 ଇୟାମାଣାନ୍‍ ଜଦି ନା ନିଜେଦି ଜାତିଦି ଲୋକାଙ୍ଗ୍‍ଁ ରିସା ଆଦେଙ୍ଗ୍‍ଁ ଆଟ୍‍ନା, ଆନାତ୍‌ ୱାରି ଲୋଇ ଏସ ଲୋକାଙ୍ଗ୍‌ ରକିୟା କିଦେଙ୍ଗ୍‍ଁ ଆଟ୍‍ନା । 
\v 15 ଇରିଙ୍ଗ୍‍ଁ ୱାର୍‌ ଡ଼ିସାୟ୍‍ ଆନି ମାଣାନ୍‌ ମାପୁରୁଦି ୱାଲେ ସାରାଦୁନିଆ ଜାତିଦି ସଙ୍ଗ୍‌ ଆନିକା । ଆର୍‍ତିଙ୍ଗ୍‍ଁ, ଜଦି ମାପୁରୁ ୱିଜୁ ଜିହୁଦି ଜାତିଦିଙ୍ଗ୍‍ଁ ଆସ୍‍ନାନ୍‍, ତାନି ଦସ୍‍ ଇନିକା ଆନାତ୍‌ ? ଆକା ଆନାତ୍‌ ସାତି ଲୋକ୍‍ ମାରିଡ଼େସି ଜିବନ୍‌ ନିଙ୍ଗ୍‍ଁନି ୱାଜା ।
\p
\v 16 ରୁଟିଦାନ୍‍ କାଣ୍ତେକ୍‍ ମାପୁରୁଦି ଉଦେସ୍‍ତାନ୍‍ ସିତି ମାରିଙ୍ଗ୍‍, ୱିଜୁ ରୁଟି ବା ସିତିକା ଇଜି ଆସାୟ୍‍ଆନାତ୍‍ । ଉନ୍‍ଣ୍ତ୍ରି ମାରାତି ମଦଲ୍‍ ସିତିମାରିଙ୍ଗ୍‍ଁ, ତାନି କମେଙ୍ଗ୍‍ ବା ସିତାମାନାର୍‍ ଇଜି ଅଡ଼୍‍ବିଦେଙ୍ଗ୍‍ଁ ଆନାତ୍‌ । 
\v 17 ଡଡିଦୁ ଜାତୁନ୍‍ ଅଆୟ୍‍ଆଜିମାନି ଉନ୍‍ଣ୍ତ୍ରି ଜିତ୍‍ ମାରାତି ଏସ କମେଙ୍ଗ୍‍ ୱେର୍‌ଏ କିଜି, ବନ୍‍ତି ଜିତ୍‍ ମାରାନ୍‌ତି କମା ଆୟା ବାଡିଦୁ ଜଡ଼ିସ୍‍ କିଆୟ୍‍ଆତାମାନାତ୍‍ । ଅଣଜିହୁଦି ଲୋକୁ ଆୟା ବନ୍‍ ଜିତ୍‍ ମାରାନ୍‌ ୱାଜା । ମିର୍‌ ଇଲେଇ ଜିହୁଦିରି ବପୁ ଆତ୍ମିକ ଜିବନ୍‍ତି ବାଗ୍‍ତୁ ମିସାତିମାନିଦେର୍‍ । 
\v 18 ଆଦେଙ୍ଗ୍‍ଁ ମିର୍‌ ୱେର୍‌ଏ କିଆୟ୍‍ଆତିମାନି କମେଙ୍ଗାଁ ନିସ୍ରିବୁଦି ଅଡ଼୍‍ବିମାଟ୍‍ । ମିର୍‌ ଏନ୍ଦା ଗାର୍ବୁ କିନିଦେର୍‍ ? ମିର୍‌ କେବଲ କମା ମାରାନ୍‌ ମଦଲ୍‍ତିଙ୍ଗ୍‍ଁ ମିର୍‌ ଜାତୁନ୍‍ କିଇଦେର୍‍, ମାତର୍‌ ମଦଲ୍‍ ମିଙ୍ଗିଁ ସାକା କିଜିନାତ୍‍ ।
\p
\v 19 ଇୟାଉଣ୍ତିଙ୍ଗ୍‌ ମିର୍‌ ଇନ୍‍ଡ୍ରେଙ୍ଗ୍‍ଁ ଆଟ୍‍ନିଦେର୍‍, “ହୁଁ, ମାତର୍‌ ନାଙ୍ଗିଁ ବାଡି ସିଦେଙ୍ଗ୍‌ ଇଜି ଆୟା କମେଙ୍ଗ୍‍ ୱିଜୁ ସିନା କିଆୟ୍‍ ଆତେମାରେଏ ।” 
\v 20 ଆକା ସତ୍‍ । ୱାର୍‌ ବିସ୍‍ବାସ୍‍ କିଏତାର୍‍ଆକା ୱେର୍‌ଏ ଆତାର୍‌ । ମିର୍‌ କେବଲ ବିସ୍‍ବାସ୍‍ତାନ୍ ଆୟା ବାଡି ଅଦିକାର୍‍ କିତିମାନିଦେର୍‌ । ମାତର୍‌ ଗାର୍ବୁ କିଏନ୍‍ଣ୍ତା ତିଲାଦୁ । 
\v 21 ଜଦି ମାରାନ୍‌ତାନ୍‌ ମିସାଜିସତି କମେଙ୍ଗ୍‍ ୱାଜା ଜିହୁଦି ଲୋକାଙ୍ଗ୍‌ ମାପୁରୁ ଦଣ୍ତ୍‍ ସିଏଜି ଡ଼ିସ୍‍ସି ସିଏତାନ୍‍, ମିଙ୍ଗିଁ ଇନିକା ୱାନ୍‌ ଡ଼ିସ୍‍ନା ସିନାନ୍‍ ? 
\v 22 ଇବେ ସୁଣି ମାଟା, ମାପୁରୁ ଏଣ୍ତେସ୍‌ ଦୟାକିନିକାନ୍‍ ନି ଆଟ୍‍ୱା ବା । ଏମେୱାରି ପଦ୍‌ ଆର୍‍ତାମାନାତ୍‍, ୱାରି ଉଣ୍ତିଙ୍ଗ୍‍ଁ ୱାନ୍‌ ଆଟ୍‍ୱା; ମାତର୍‌ ମି ଉଣ୍ତିଙ୍ଗ୍‍ଁ ୱାନ୍‌ ଦୟାକିନିକାନ୍‍ ଆମା ଦିନ୍‌ ସାନ୍ଦି ମିର୍‌ ୱାନି ଦୟାଦି ଲୋକ୍‍ ଆଜି ତେବାନିଦେର୍‍ । ୱାନି ଦୟା ଆରାକିତିଙ୍ଗ୍‍ଁ, ମିର୍‌ ବା ୱେର୍‌ଏ ଆନିଦେର୍‌ । 
\v 23 ଜଦି ଜିହୁଦିଲୋକୁ ତାମେ ବିସ୍‍ବାସ୍‍ ଆକ କିଏର୍‌, ଆର୍‍ତିଙ୍ଗ୍‍ଁ ୱାର୍‌ ନିଜେଦି ବାଡିଦୁ ମାରିଡ଼େସି ତିଆର୍‌ ଆନାର୍‍ । ଇକା କିଦେଙ୍ଗ୍‍ଁ ମାପୁରୁ ଇଚ୍ଛା କିନାନ୍‌ । 
\v 24 ଅଣଜିହୁଦି ଲୋକୁ ବନ୍‍ ଜିତ୍‍ ମାରାତି କମା ୱାଜା । ଆକା ସିନା ଆଜି ନେଗେନ୍‌ତର୍‌ଇ ଇସାବ୍‍ତାନ୍‍ ଡଡିଦି ଜାତୁନ୍‍ଅତିମାନି ଜିତ ମାରାତି ୱାଲେ ଜଡ଼ିସ୍‍ କିଆୟ୍‍ଆତାମାନାତ୍‍ । ଜିହୁଦି ଜାତି ଡଡିଦି ଜାତୁନ୍‍ଅତିମାନି ଜିତ ମାରାନ୍‌ ୱାଜା । ଇୟା ମାରାତି ୱେର୍‍ଏଆତି କମେଆଙ୍ଗାଁ ମାରିଡ଼େସି ମାରାତି ୱାଲେ ଜଡ଼ିସ୍‍କିନିକା ମାପୁରୁଦି ତରିନ୍‍ ଉସାସ୍‍ ।
\s ୱିଜେରି ଉଣ୍ତିଙ୍ଗ୍‌ ମାପୁରୁଦି ଦୟା
\p
\v 25 ତଡ଼ାନ୍‍କୁ ନି ତାଙ୍ଗିଁକି, ଇୟା ବିସୟ୍‌ତାନ୍‌ ଉନ୍‍ଣ୍ତ୍ରି ମାର୍‍ଗିତି ସତ୍‌ ୱେକ୍‍ନାତ୍‍ । ଆକା ୱେରିଙ୍ଗ୍‍ଁ, ମିର୍‌ ନିଜେଦିଙ୍ଗ୍‍ଁ ମାରି ବୁଦିମାନିକାନ୍‍ ଇଜି ଅଡ଼୍‍ବିଦେଙ୍ଗ୍‍ଁ ଆଟ୍‍ଇଦେର୍‍ । ଇସ୍ରାଏଲ୍‌ ଲୋକା ଅମାନ୍ୟ ୱିଜୁଦିନ୍‍ ତେବାଏତ୍‍ । ଅଣଜିହୁଦିର୍‍ ୱିଜେରେ ମାପୁରୁଦି ଲାକ୍‍ତୁ ୱାନି ସାନ୍ଦି ୱାର୍‌ ଆୟାୱାଜା ତେବାନାର୍‍ । 
\v 26 ତାନିୱେନ୍‍କା ଇସ୍ରାଏଲ୍‌ ଲୋକୁ ୱିଜେରେ ଶାସ୍ତ୍ର ଇସାବ୍‍ତାନ୍‍ ରକିୟା ପୟ୍‍ନାର୍‍, ଏଣ୍ତେସ୍‌ ସାସ୍ତ୍ର ଇନାତ୍‍ :
\q1 “ରକିୟାକିନିକାନ୍‍ ସିୟୋନତାନ୍‍ ୱାନାନ୍,
\q2 ଜାକୁବ କୁଡ଼ାଦାନ୍‍ ୱିଜୁ ଅଦାର୍ମୁ ଆକ କିନାନ୍‍ ।
\q1
\v 27 ୱାରି ଅଦାର୍ମୁ ଆକ କିନିୱାଲେ
\q2 ୱାରି ୱାଲେ ଇୟା ନିୟମ୍‌ କିନାପ୍‍ ।”
\m
\v 28 ମି ନେଗି ଉଣ୍ତିଙ୍ଗ୍‍ଁ ସୁସମାଚାର୍‍ତିଙ୍ଗ୍‍ଁ ଡ଼ିସ୍‍ତିଙ୍ଗ୍‌ ମାପୁରୁଦି ସାତ୍ରୁ ଆତାମାନାର୍‌ । ମାତର୍‌ ମାପୁରୁଦି ଲାଡ୍‍ତାନ୍‍ ବାସେଆନି ମାଣାନ୍‌ ମାରି ୱାରି ଡକ୍ରାଦାଦାରି ଉଣ୍ତିଙ୍ଗ୍‍ଁ ୱାର୍‌ ମାପୁରୁଦି ତଡ଼୍‍ ଆତାମାନାର୍‌ । 
\v 29 ମାପୁରୁ ଏମେୱାରିଙ୍ଗ୍‍ଁ ବାସେ କିଜି ଆର୍ସିବାଦ୍‌ କିନାନ୍‍, ୱାନି ଦାନ୍‍ ସିଦେଙ୍ଗ୍‌ ବଦା ୱାନ୍‌ ଡାଟ୍‍ ତେବାନାନ୍‍ । 
\v 30 ଅଣଜିହୁଦି ଲୋକୁ ପୁର୍ବେ ମାପୁରୁଦି ମାନାଇକାର୍‍ ମାର୍ହାର୍‌; ମାତର୍‌ ଇଲେଇ ଜିହୁଦିଲୋକା ମାନାଇ ଉଣ୍ତିଙ୍ଗ୍‍ଁ ଅଣଜିହୁଦି ଲୋକୁ ମାପୁରୁଦି ଦୟା ପୟ୍‍ତାମାନାର୍‍ । 
\v 31 ଏଣ୍ତେସ୍‌ ଅଣଜିହୁଦି ଲୋକୁ ବା ଦୟା ପୟ୍‍ତାମାନାର୍‍, ଜିହୁଦିଲୋକୁ ଇଲେଇ ମାପୁରୁଦି ମାଣାନ୍‌ ଆକ ସର୍ହିମାରିଙ୍ଗ୍‍ଁ ବା, ଅର୍‍ଲେନ୍‍ ୱାର୍‌ ଡ଼େସି ୱାଜି ଉଦ୍ଧାର୍‌ ପୟ୍‍ନାର୍‍ । 
\v 32 ମାପୁରୁ ୱିଜେରିଙ୍ଗ୍‍ଁ ଅମାନ୍ୟ ଆନି ଉଣ୍ତିଙ୍ଗ୍‍ଁ ଡ଼ିସ୍‍ତା ସିତାମାନାନ୍‌; ଆବେଣାନ୍‍ ୱିଜେରେ ମାପୁରୁଦି ଦୟାଦି ଲୋକୁ ଆଦେଙ୍ଗ୍‍ଁ ଆଟ୍‍ନାର୍‍ ।
\s ମାପୁରୁଦି ଗୌରବ୍‌ ଆପିତ୍‌
\p
\v 33 ମାପୁରୁ । ୱାନି ବୁଦି ନି ଜ୍ଞାନ୍‌ ଏସା ପେରିକା । ୱାନି ବଦାଦି ଟିକ୍‍ ଏନ୍‌ ବୁଜାକିନାନ୍‍ ? ଏନ୍‌ ୱାନି ସାରିଙ୍ଗ୍‌ଁ ନେସ୍‍ତେଙ୍ଗ୍‍ଁ ଆଟ୍‍ନାନ୍‍ ? 
\v 34 ସାସ୍ତ୍ର ଇନାତ୍‍ :
\q1 “ଏନ୍‌ ମାପୁରୁଦି ମନ୍‍ତିମାଟା ବୁଜାଦେଙ୍ଗ୍‍ଁ ଆଟ୍‍ନାନ୍‍ ?
\q2 ଏନ୍‌ ମାରି ୱାନିଙ୍ଗ୍‍ଁ ସିକିୟା ସିଦେଙ୍ଗ୍‌ ଆଟ୍‍ନାନ୍‍ ?
\q1
\v 35 ଏନ୍‌ ଇନିକା ମାପୁରୁଙ୍ଗ୍‍ଁ ଇୟାୱାଜା ଇନିକା ସିଦେଙ୍ଗ୍‌ ଆଟ୍‍ତାମାନାନ୍‍,
\q2 ଆମାତାନିଙ୍ଗ୍‌ ମାପୁରୁଙ୍ଗ୍‍ଁ ଡ଼େସି ସିଦେଙ୍ଗ୍‌ ପଡ଼ାଜିନାତ୍‍ ?”
\m
\v 36 \x + \xo ୧୧:୩୬ \xo*\xt ୧ କରିନ୍ତିୟ ୮:୬.\xt*\x*ୱିଜୁ ବିସୟ୍‍ ମାପୁରୁଦି ମାଣାନ୍‌ ତିଆର୍‌ ଆତାମାନାତ୍‌; ୱିଜୁ ବିସୟ୍‍ ମାନିକା ୱାନି ଉଣ୍ତିଙ୍ଗ୍‍ଁ ମାରି ୱାନିମାଡ଼ାନ୍‌ ଆତାମାନାତ୍‌ । ଜୁଗ୍‌ ଜୁଗ୍‍ ମାପୁରୁ ଗୌରବ୍‍ ପଇନି । ଆମେନ୍‍ ।
\c 12
\s ମାପୁରୁଦି ସେବାଦୁ ଜିବନ୍‌
\p
\v 1 ଆଦେଙ୍ଗ୍‍ଁ ତଡ଼ାନ୍‍କୁ ନି ତାଙ୍ଗିଁକି, ମା ଉଣ୍ତିଙ୍ଗ୍‍ଁ ମାପୁରୁଦି ନାଣ୍ତ ଦୟା ଉଣ୍ତିଙ୍ଗ୍‍ଁ ମିଙ୍ଗିଁ ନାନୁ ବାତିଙ୍ଗ୍‌ ମାଲ୍‍ଜିନା, ମାପୁରୁମାନୁ ନିଜେଦି ମେନ୍ଦଲ୍‌ତିଙ୍ଗ୍‍ଁ ପବିତ୍ର ପୁଜା ୱାଜା ସର୍‌ପେ କିଦୁ । ୱାନି ସେବାଦୁ ନିଜେଦିଙ୍ଗ୍‍ଁ ସିଜି ୱାନିମାନୁ ସର୍‌ପେ ଆଦୁ । ଇକା ମାପୁରୁଦି ସତ୍‍ ଉପାସନା କିନିକା । 
\v 2 ମିର୍‌ ଇୟା ଇଲେଇତି ଦୁନିଆଦି ଇସାବ୍‍ତାନ୍‍ ବୁଲାମାଟ୍‍ । ମାପୁରୁ ମି ମନ୍‍ତିଙ୍ଗ୍‍ ପୁରା ପୁନିକା କିପିନ୍‍ ମାରି ମି ମନ୍ ପୁରା ବାଦ୍‍ଲେ ଆପିତ୍‌ । ଆତିଙ୍ଗ୍‌, ମାପୁରୁଦି ବଦା ଇନିକା, ୱାନି ଲାକ୍‍ତୁ ଏମେ ୱିଜୁ ବିସୟ୍‍ ସତ୍‍, ୱେଡ଼ିକାଦିକା ମାରି ପୁରା ନେଗିକା, ଇକା ମିର୍‌ ନେସ୍‍ତେଙ୍ଗ୍‍ଁ ଆଟ୍‍ନିଦେର୍‍ ।
\p
\v 3 ମାପୁରୁ ନାଙ୍ଗିଁ ନାଣ୍ତ ଦୟା ସିତାମାନାନ୍‍ଆକା ମି ୱିଜେରିଙ୍ଗ୍‍ଁ ନାନୁ ଇଜିନା, ଏନ୍‌ ନିଜେଦି ଜଗ୍ୟଦି ମାଣାନ୍‌ ନିଜେଦିଙ୍ଗ୍‍ଁ ପେରିକାନ୍‌ ଇଜି ଅଡ଼୍‍ବିମାଟ୍‍ । ମାପୁରୁ ମିଙ୍ଗିଁ ସିତିମାନି ବିସ୍‍ବାସ୍‍ତି ଇସାବ୍‍ତାନ୍ ସାନ୍ତି ଆଜି ନିଜେ ବିସୟ୍‍ତାନ୍‍ ବିସାର୍‍ କିଦୁ । 
\v 4 \x + \xo ୧୨:୪ \xo*\xt ୧ କରିନ୍ତିୟ ୧୨:୧୨.\xt*\x*ମା ମେନ୍ଦଲ୍‌ତୁ ଗାଦି ଆଇ ଆଇ ଜିନିସ୍‌କୁ ମାନେ ମାରି ୱିଜେକା ପାଣି ଅଲଗା । 
\v 5 ଆୟାୱାଜା ମାଡ୍‌ ଗାଦିଲୋକ୍‍, ମାତର୍‌ ୱିଜେରେ କ୍ରିସ୍ତଦି ୱାଲେ ମିସାତି ମାନିକାଆକା, ମାଡ୍‌ ଉନ୍‍ଡ୍ରେ ମେନ୍ଧଲ୍‍ ମାରି ମେନ୍ଦଲ୍‍ତି ଜିନିସ୍‍କା ୱାଜା ମାଡୁ ଅର୍‌ସେ ୱାଲେ ମିସାତି ମାନିକା । 
\v 6 \x + \xo ୧୨:୬ \xo*\xt ୧ କରିନ୍ତିୟ ୧୨:୪-୧୧.\xt*\x*ଆଦେଙ୍ଗ୍‌ ମା ଉଣ୍ତିଙ୍ଗ୍‍ଁ ମାପୁରୁଦି ଦୟା ଇସାବ୍‍ତାନ୍‍ ୱାନିମାଣାନ୍‍ ପୟ୍‍ତି ରକମ୍‍ତି ଆଇ ଆଇ ଦାନ୍‍ ସାକ୍ତିୱିଜୁ ମାଡ୍‌ ଟିକ୍‍ ଇସାବ୍‍ତାନ୍‍ କାଟେକିଦେଙ୍ଗ୍‍ଁ ଆଟ୍‍ନିକା । ମାଡ୍‌ ଜଦି ମାପୁରୁଦି କାବୁର୍‌ ପ୍ରଚାର୍‍ କିନି ଉଣ୍ତିଙ୍ଗ୍‍ଁ ଇଜି ମାପୁରୁସିତି ସାକ୍ତି ପୟ୍‍ତିମାନିକା, ମା ବିସ୍‍ବାସ୍‍ତି ଡାଟ୍‍ ଇସାବ୍‍ତାନ୍‍ ଆୟା ପାଣି କିଦେଙ୍ଗ୍‍ଁ ଆନାତ୍‌ । 
\v 7 ଜଦି ସେବା କିନି ଉଣ୍ତିଙ୍ଗ୍‍ଁ ଆୟା ସାକ୍ତି ପୟ୍‍ତିମାନିକା, ମାଡ୍‌ ସେବା କିଦେଙ୍ଗ୍ଁ ଆନାତ୍‌; ସିକିୟା ସିଦେଙ୍ଗ୍‌ ଇଜି ସାକ୍ତି ପୟ୍‍ତିମାରିଙ୍ଗ୍‍ଁ, ସିକିୟା ସିଦେଙ୍ଗ୍‌ ଆନାତ୍‌ । 
\v 8 ଆଇୱାରିଙ୍ଗ୍‌ ୱେଡ଼ିକା କିଦେଙ୍ଗ୍‍ଁ ଇଜି ସାକ୍ତି ପୟ୍‍ତିମାରିଙ୍ଗ୍‍ଁ, ଆକା କିଦେଙ୍ଗ୍‍ଁ ଆନାତ୍‌ । ଦାନ୍‍ କିଦେଙ୍ଗ୍‍ଁ ସାକ୍ତି ପୟ୍‍ତିମାନି ଲୋକ୍‍ ରେଆତି ମନ୍‍ତାନ୍‍ ଦାନ୍‍ କିପିନ୍‍ । ଆଇୱାରି ପାଣିଦି ଜାତୁନ୍‍ କିଦେଙ୍ଗ୍‍ଁ ଅଦିକାର୍‍ ପୟ୍‍ତିମାରିଙ୍ଗ୍‍ଁ ନିଜେ କାସ୍ଟୁପାଣି କିଦେଙ୍ଗ୍ ଆନାତ୍‌ । ଦୟା କିନି ଲୋକ୍‍ ୱେଡ଼ିକା ମନ୍‍ତାନ୍‍ ଦୟା କିପିନ୍‍ ।
\p
\v 9 ଜିବନ୍ତି ୱାଲେ ଜିବନ୍‍ନୋନିକା ନେଗିକା ଆପିତ୍‌ । ଆମା ୱିଜୁ ସତ୍‍ସିଲେ; ତାନିଙ୍ଗ୍‍ଁ କାଡ଼୍‍ଦୁ, ୱିଜୁ ସତ୍‌ ବିସୟ୍‍ତୁ ଲାକ୍‍ତୁ ଆଦୁ । 
\v 10 କ୍ରିସ୍ଟିୟାନ୍‍ ତଡ଼ାନ୍‍ ନି ତାଙ୍ଗିଁକ୍‌ ୱାଜା ନିଜେନିଜେଦିଙ୍ଗ୍‍ ଜିବନ୍‍ନଦୁ ମାରି ନିଜେନିଜେଦିଙ୍ଗ୍‌ ସନ୍‌ମାନ୍‌ ତର୍‍ତେଙ୍ଗ୍‍ଁ ଇଜି ୱେଡ଼ିକା ଆଦୁ । 
\v 11 ୱେଡ଼ିକାଦାନ୍‌ ଗାଡ଼ିୟା ଆମାଟ୍‌, ଆତ୍ମାଦୁ ତେବାନିକା ଅଡ଼୍‍ବିଦୁ । ବକ୍ତିଦି ଜିବନ୍‍ତାନ୍‍ ପ୍ରବୁଦି ସେବା କିଦୁ । 
\v 12 ଡାଟ୍‍ ଆସା ଇଡ୍‌ଜି ୱେଡ଼ିକା କିଦୁ । ଦୁକ୍‍କାସ୍ଟୁଦି ବେଡ଼ାଦୁ ସାସ୍‌ ଆସ୍‌ତୁ । ୱିଜୁଦିନ୍ ପାର୍‍ତନାଦୁ ପୁରା ତେବାଦୁ । 
\v 13 କ୍ରିସ୍ତବିସ୍‍ବାସିରି ଦର୍‍କାର୍‍ ମାନିକା ସିଦୁ । ମାରି ୱାନି ଲୋକାଙ୍ଗ୍‍ଁ ସନ୍‌ମାନ୍‌ତାନ୍‌ କୁକ୍‍ତୁ ।
\p
\v 14 \x + \xo ୧୨:୧୪ \xo*\xt ମାତିଉ ୫:୪୪; ଲୁକ ୬:୨୮.\xt*\x*ମିଙ୍ଗିଁ ଏମେକାର୍‌ ତାଡ଼ନା କିନାର୍‌, ୱାରି ନେଗି ଉଣ୍ତିଙ୍ଗ୍‌ ଇଜି ମାପୁରୁମାନୁ ପାର୍‍ତନା କିଦୁ । ୱାରିଙ୍ଗ୍‍ଁ ଆର୍ସିବାଦ୍‌ କିଦୁ, ଆନାଦୁରିଆ ସିମାଟ୍‍ । 
\v 15 ସୁକ୍‍ତାନ୍‍ ମାନି ଲୋକା ୱାଲେ ୱେଡ଼ିକା କିଦୁ, ଆଡ଼୍‍ବାନି ଲୋକା ୱାଲେ ଆଡ଼୍‍ବାଦୁ । 
\v 16 ୱିଜେରି ଉଣ୍ତିଙ୍ଗ୍‍ଁ ସାମାନ୍‍ ଇସାବ୍‍ତାନ୍‍ ସୁଡ଼୍‍ଦୁ । ଆକାର୍‍ ଅଡ଼୍‍ବିନିକା ଡ଼ିସ୍‍ସି ସାନ୍ତି ଇସାବ୍‍ତାନ୍‍ ତାଗ୍‌ଇ ପାଣିୱିଜୁଦିଙ୍ଗ୍‍ଁ ବା ଆସ୍‌ତୁ । ନିଜେଦିଙ୍ଗ୍‍ଁ ବୁଦିମାନିକାନ୍‍ ଅଡ଼୍‍ବିମାଟ୍‍ ।
\p
\v 17 ଏନ୍‌ ମି ଉଣ୍ତିଙ୍ଗ୍‍ଁ ଅନ୍ୟାୟ୍‍ କିତିଙ୍ଗ୍‍ଁ, ମିର୍‌ ୱାନି ଉଣ୍ତିଙ୍ଗ୍‍ଁ ଅନ୍ୟାୟ୍‍ କିମାଟ୍‌ । ଆଇୱାରି ଲାକ୍‍ତୁ ଆମାକା ସତ୍‍ପାଣି, ଆକାନେ କିଦୁ । 
\v 18 ୱିଜେରି ୱାଲେ ସାନ୍ତିଦାନ୍‍ ବାସାଦେଙ୍ଗ୍‍ଁ ଇଜି ଏସ୍ତିୱାଲେ ଆଦେଙ୍ଗ୍‍ଁ ଆଟ୍‍ନାତ୍‍ ସେସ୍ଟା କିଦୁ । 
\v 19 ଏ ଲାଡ୍‍ତିକାର୍‍, ମିର୍‌ ନିଜେ ଆମାୱାନି ବିରୁଦ୍‍ତାନ୍‍ ବାଦ୍‌ ଅମାଟ୍‍ । ମାପୁରୁଦି ରିସାଦି ଲୋକ୍‍ ଆଦେଙ୍ଗ୍‍ଁ ୱାନିଙ୍ଗ୍‌ ଡ଼ିସ୍‍ସୋ ସିଦୁ । ଇରିଙ୍ଗ୍‌ ସାସ୍ତ୍ରଦୁ ରାସାତାମାନାତ୍‌, “ପ୍ରବୁ ଇନାନ୍‌, ମାପ୍‌ ପ୍ରତିସଦ୍‍ ଅନାପ୍‍ । ମାପ୍‌ ଦଣ୍ତ୍‍ ସିନାପ୍‍ ।” 
\v 20 ତାନିବାଦ୍‍ଲୁ ସାସ୍ତ୍ର ଏଣ୍ତେସ୍‌ ଇନାତ୍‍, “ମି ସାତ୍ରୁ ବାଙ୍ଗାଁ ମାରିଙ୍ଗ୍‍ଁ, ୱାନିଙ୍ଗ୍‍ଁ ଉଣ୍ତେଙ୍ଗ୍‍ଁ ସିଦୁ; ଏର୍‍କି ମାରିଙ୍ଗ୍‍ଁ ଉଟ୍‍ପିସ୍‍କିଦୁ । ଇବେଣାନ୍‍ ୱାନ୍‌ ସେମାର୍‍ ଆନା ସନାନ୍‍ ।” 
\v 21 ଅସତ୍‍ ତାନ୍‍ ଆରାମାଟ୍‍; ୱିଜୁ ଅସତ୍‍ ବିସୟ୍‍କୁ ନେଗିପାଣିଦାନ୍‍ ଜିଣାଦୁ ।
\c 13
\s ସାସନ୍‍କିନିୱାରି ଉଣ୍ତିଙ୍ଗ୍‌ ପାଣି
\p
\v 1 ସାସନ୍‍କିନିୱାରିଙ୍ଗ୍‍ଁ ମାନାନିକା ୱିଜେରି ପାଣି, ଇରିଙ୍ଗ୍‍ଁ ମାପୁରୁଦି ସାରି ଡ଼ିସ୍‌ତିଙ୍ଗ୍‌ ଏନ୍‌ ସାସନ୍‍ ଅଦିକାର୍‍ ପୟ୍‍ଏନ୍‍ । ଅଦିକାର୍‍ତୁ ମାନି ସାସନ୍‍କିନିକାର୍‍ ମାପୁରୁଦି ମାଣାନ୍‌ ବାସେଆତାମାନାର୍‍ । 
\v 2 ଆଦେଙ୍ଗ୍‍ଁ ଏନ୍‌ ଅଦିକାର୍‍ ପୟ୍‍ତି ସାସନ୍‍କିନିୱାରିଙ୍ଗ୍‍ଁ ବିରୁଦ୍‍ କିନାନ୍‍, ୱାନ୍‌ ମାପୁରୁଦି ମାଣାନ୍‌ ଆତିମାନି ନିୟମ୍‍ତି ବିରୁଦ୍‍କିନାନ୍‍ । ଏନ୍‌ ଇକା କିନାନ୍‍, ୱାନ୍‌ ବିଚାର୍‍ତି ଆଗ୍‍ଡ଼ି ନିନାନ୍‍ । 
\v 3 ଏମେକାର୍‌ ନେଗିପାଣି କିନାର୍‌, ୱାରି ସାସନ୍‍କିନିୱାରିଙ୍ଗ୍‍ଁ ତିଲାନି ଉଣ୍ତିଙ୍ଗ୍‍ଁ ଇନି ମାଟା ସିଲେତ୍‍ ତିଲାନି ମାଟା ତାଗ୍‍ଇପାଣିକିନିୱାରିଙ୍ଗ୍‍ଁ । ସାସନ୍‍କିନିୱାନି ଉଣ୍ତିଙ୍ଗ୍‍ଁ ତିଲାଇକା ମି ବଦା ନୋ ? ଆତିଙ୍ଗ୍‍ଁ ସତ୍‍ପାଣି କିଦୁ, ୱାନ୍‌ ମି ପ୍ରସଂସା କିନାନ୍‍ । 
\v 4 ମି ନେଗିକା କିନି ଉଣ୍ତିଙ୍ଗ୍‍ଁ ୱାନ୍‌ ମାପୁରୁଦି ମାଣାନ୍‍ ବାସେଆତାମାନାନ୍‍ । ମାତର୍‌ ମିର୍‌ ଜଦି ତାଗ୍‍ଇପାଣି କିଜିମାନିଦେର୍‍, ଆର୍‍ତିଙ୍ଗ୍‍ଁ ସାସନ୍‍କିନିୱାନିଙ୍ଗ୍‍ଁ ତିଲାଦୁ, ଇରିଙ୍ଗ୍‍ଁ ମି ଦଣ୍ତ ସିନି ଉଣ୍ତିଙ୍ଗ୍‍ଁ ସତ୍‌ତାନ୍‌ ୱାନି ଅଦିକାର୍‌ ମାନାତ୍‌ । ୱାନ୍‌ ମାପୁରୁଦି ମାଣାନ୍‌ ବାସେଆତି ସେବାକିନିକାନ୍‍ । ତାଗ୍‍ଇପାଣିକିନିୱାରିଙ୍ଗ୍‍ଁ ସାସ୍ତି ସିନି ଉଣ୍ତିଙ୍ଗ୍‍ଁ ୱାନ୍‌ ମାପୁରୁଦି ଆଦେସ୍‌ ମାନାନାନ୍‍ । 
\v 5 ଆଦେଙ୍ଗ୍‍ଁ ମିର୍‌ ସାସନ୍‍କିନିୱାରିଙ୍ଗ୍‍ଁ ମାନାନିକା ମାନାତ୍‌ କେବଲ ମାପୁରୁଦି ଦଣ୍ତ ତିଲେଇତାନ୍‍ ସିଲେ, ମାତର୍‌ ନିଜେଦି ବୁଦିଦି ନାସ୍ଟୁଦାନ୍‍ ରକିୟା ପୟ୍‍ଦେଙ୍ଗ୍‍ଁ ଇଜି ।
\p
\v 6 \x + \xo ୧୩:୬ \xo*\xt ମାତିଉ ୨୨:୨୧; ମାର୍କ ୧୨:୧୭; ଲୁକ ୨୦:୨୫.\xt*\x*ଇୟାଉଣ୍ତିଙ୍ଗ୍‌ ମିର୍‌ ସିସୁଟୁ ବା ସିଜିମାନ୍‍ଡ୍ରୁ, ଇରିଙ୍ଗ୍‍ଁ ସାସନ୍‍କିନିକାର୍‍ ଆଦେସ୍‌ ମାନାନିୱାଲେ ମାପୁରୁଦି ସେବା କିନାର୍‌ । 
\v 7 ଆଦେଙ୍ଗ୍‌ ୱାର୍‌ ଆମାକା ପୟ୍‍ନିକା ମାନାତ୍‌, ୱାନିଙ୍ଗ୍‌ ଆକା ସିଦୁ । ନିଜେଦିକା ମାରି ସିସୁଟୁ ମିଦି ଆମାକା ସିନିକା ମାନାତ୍‍, ଆକା ସିଦୁ ମାରି ୱାରିଙ୍ଗ୍ ୱେଡ଼ିକା ନି ସନ୍‌ମାନ୍‍ତାନ୍ ମାନାଦୁ ।
\s ନିଜେ ନିଜେଙ୍ଗ୍‌ ଜିବନ୍‍ନୋଦୁ
\p
\v 8 ନିଜେଦିଙ୍ଗ୍‍ଁ ନି ଆଇୱାରିଙ୍ଗ୍‌ ଜିବନ୍‍ନୋନିକା ଡ଼ିସ୍‍ସି ମାରି ଇନି ବିସୟ୍‍ତୁ ଆମାୱାନି ରୁଣୁ ଆଜି ତେବାମାଟ୍‍ । ଏନ୍‌ ଆଇୱାନିଙ୍ଗ୍‍ ଜିବନ୍‍ନୋନାନ୍‍, ୱାନ୍‌ ନିୟମ୍‌ ମାନାନାନ୍‍ । 
\v 9 “ଦାରିପାଣି କିମାଟ୍‌, ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌, ଡଙ୍ଗାଁ କିମାଟ୍‌, ଆଇୱାରି ଜିନସ୍‍ତିଙ୍ଗ୍‍ଁ ଲବ୍ରାମାଟ୍‍,” ୱିଜୁ ମାଟା ଉନ୍‌ଡ୍ରି ମାଟାଦୁ ତେବାଜିନାତ୍‍, “ମି ଲାକ୍‌ତୁରି ଲୋକାଙ୍ଗ୍‌ ନିଜେଦିଙ୍ଗ୍‍ ଜିବନ୍‌ନୋତିୱାଜା ଜିବନ୍‍ନୋଦୁ ।” 
\v 10 ମିର୍‍ ଅରେନ୍ ୱାନିଙ୍ଗ୍‌ ଜିବନ୍‌ନୋଜି ମାରିଙ୍ଗ୍‍ଁ, ୱାନି ଉଣ୍ତିଙ୍ଗ୍‌ ଏସାଙ୍ଗ୍‍ ଅନ୍ୟାୟ୍‍ କିମାଟ୍‌ । ଆଦେଙ୍ଗ୍‌ ଜିବନ୍‍ନନି ମାଣାନ୍‌ ନେ ୱିଜୁ ନିୟମ୍‍ ମାନାନିକା ଆନାତ୍‌ ।
\p
\v 11 ଇଲେଇ ଇୟାୱିଜୁ ମିଙ୍ଗିଁ ଏଣ୍ତେସ୍‍ବା କିଦେଙ୍ଗ୍‍ଁ ଆନାତ୍‌, ଇରିଙ୍ଗ୍‍ଁ ସୁଜିନି ମାଣାନ୍‌ ନିଙ୍ଗିଁନି ସମୟ ଇଗା ୱାତାତ୍‍ । ରକିୟା ପୟନି ସମୟ୍‍ ଆଗ୍‍ଡ଼ିରି ବାଦ୍‍ଲୁ ଇଲେଇ ନାଣ୍ତ ଲାକ୍‍ତୁ । 
\v 12 ନାଡ଼ା ୱିଜିତାତ୍‌ନି, ୱେଡ଼େ ୱାତାତ୍‌ନି । ରାଦୁ, ସିକାଟିଦି ୱିଜୁପାଣି ଡ଼ିସ୍‍ନାଟ୍‍ ମାରି ଜାୟ୍‍ତୁ ଜୁଦ୍‍ କିଦେଙ୍ଗ୍‍ଁ ନେଗି ସାଜୁ ଆରାନାଟ୍‍ । 
\v 13 ରଙ୍ଗ୍‍ରସ୍‍ ନି ସସ୍‍ନିମାନୁ, ଡଙ୍ଗାଁ ନି ଲାଲାୟ୍‍ଆନିକା, ରିସା ମାରି ଜାଟି ୱିଜୁଦୁ ତେବାଏଜି, ରାଦୁ ମାଡ୍‌ ଜାୟ୍‍ତୁ ପାଣିକିନି ଲୋକା ୱାଜା ନେଗେନ୍‌ତାନ୍‌ ବ୍ୟବ୍‌ହାର୍‌ କିନାଟ୍‌ । 
\v 14 ପ୍ରବୁ ଜିସୁ କ୍ରିସ୍ତଦି ଅସ୍ତ୍ରଶସ୍ତ୍ରଦାନ୍‌ ତିଆର୍‌ ଆଦୁ ପାପ୍‌ତି ଉଣ୍ତିଙ୍ଗ୍‌ ୱେର୍‌ଏ ଆଦୁ ମାରି ନିଜେଦି ଲାଲାୟ୍‍ତୁ ବ୍ୟବହାର୍ କିମାଟ୍‌ ।
\c 14
\s ତଡ଼ାନ୍‍କା ଦସ୍‍ ଆସ୍‍ମାଟ୍
\p
\v 1 \x + \xo ୧୪:୧ \xo*\xt କଲସିୟ ୨:୧୬.\xt*\x*ବିସ୍‍ବାସ୍‍ତୁ ଏନ୍‌ ସାକ୍ତି ସିଲେନ୍‌, ୱାନିଙ୍ଗ୍‌ ଆସ୍‌ତୁ, ମାତର୍‌ ୱାନି ଜିବନ୍‍ତି ବିସୟ୍‍ତାନ୍‍ ୱାର୍‍ଗିମାଟ୍‍ । 
\v 2 ଅରେନ୍‍ ବିସ୍‍ବାସ୍‍ କିନାନ୍‍, ୱାନ୍‌ ଆମା କାଦିବା ଉଣ୍ତେଙ୍ଗ୍ଁ ଆଟ୍‍ନାନ୍‍, ମାରି ଅରେନ୍‍ ଡାଟ୍‍ ସିଲି ବିସ୍‍ବାସି କେବଲ କୁସା କାଦି ଉଣାନ୍‍ । 
\v 3 ଆମା କାଦିବା ଉଣ୍ତେଙ୍ଗ୍‍ଁ ଆମାୱାନି ଇନି ବାଦା ସିଲେତ୍‍, ୱାନ୍‌ କୁସା କାଦିଦିଙ୍ଗ୍‍ଁ କାଡ଼୍‍ମାକିନ୍‍ । ମାରି କୁସା କାଦି ଉଣିକାନ୍‍ କାଣ୍ତା ତିନି ୱାନିଙ୍ଗ୍‍ଁ ଦସ୍‌ ଅଡ଼୍‍ବିମାକିନ୍‍ । ଇରିଙ୍ଗ୍‍ଁ ମାପୁରୁ ୱାନିଙ୍ଗ୍‍ଁ ବା ବାସେକିତା ମାନାନ୍‌ । 
\v 4 ମିରୁ ଆଇୱାନି ଦାସ୍‍ତିଙ୍ଗ୍‍ ବିସାର୍‍ କିଦେଙ୍ଗ୍‌ ଇଜି ମିର୍‌ ଏରୁ ? ୱାନ୍‌ ୱାନି ପାଣିଦୁ ଏସା ଆକ ଜିଣାଜିନାନ୍‍ ମାରି ଆରାଜିନାନ୍‍, ଆକା ୱାନି ମାଲିକ୍‌ ବିସାର୍‍ କିନାନ୍‍ । ୱାନ୍‌ ସତେନେ ଜିଣାନାନ୍‍, ଇରିଙ୍ଗ୍‍ଁ ପ୍ରବୁ ୱାନି ଦାସ୍‍ତିଙ୍ଗ୍‍ଁ ଜିଣାକିଦେଙ୍ଗ୍‍ଁ ଇଜି ଡାଟ୍‍ ।
\p
\v 5 ଅରେନ୍‍ୱାନି ଇସାବ୍‍ତାନ୍‍ ଆଇ ଦିନ୍‍କା ବାଦ୍‍ଲୁ ଉନ୍‍ଣ୍ତ୍ରି ଟିକ୍‍ ଦିନ୍‍ ନାଣ୍ତ ନେଗେତ୍‍ । ମାରି ଅରେନ୍‍ ଅଡ଼୍‌ବିନାନ୍‌, ୱିଜୁ ଦିନ୍‍ ସାମାନ୍‍ । ମାତର୍‌ ଏନ୍‌ ଆମା ଇସାବ୍‍ତାନ୍‍ ଟିକ୍‍ ବିସାର୍‍ କିଜି ଟିକ୍‌ ମାନାପିନ୍‌ । 
\v 6 ଏନ୍‌ ଉନ୍‍ଣ୍ତ୍ରି ଦିନ୍‍ତିଙ୍ଗ୍‍ ନେଗିକା ଇଜି ଅଡ଼ବିନାନ୍‍, କେବଲ ପ୍ରବୁଦି ଗୌରବ୍‍ ଉଣ୍ତିଙ୍ଗ୍‍ଁ ୱାନ୍‌ ଆକା କିପିନ୍‍ । ଆମାୱାନି ଇନି କାଦି ଉଣ୍ତେଙ୍ଗ୍‌ ବାଦା ସିଲେତ୍‍, ମାପୁରୁଙ୍ଗ୍‍ଁ ଦନ୍ୟବାଦ୍‍ ସିଜି ୱାନ୍‌ ଆକା ଉଣିନ୍‍; ଆବେଣାନ୍‍ ମାପୁରୁ ଗୌରବ୍‍ ପୟ୍‍ନାନ୍‍ । ଏମେ ଲୋକ୍‍ କାଦି ଉଣୁଏନ୍‌, ୱାନ୍‌ ଇକା ମାପୁରୁଦି ଗୌରବ୍‍ ଉଣ୍ତିଙ୍ଗ୍‍ଁ କିପିନ୍‍ ମାରି ଇୟାଉଣ୍ତିଙ୍ଗ୍‍ଁ ମାପୁରୁଙ୍ଗ୍‍ଁ ଦନ୍ୟବାଦ୍‍ ସିପିନ୍‍ । 
\v 7 ଏନ୍‌ କେବଲ ନିଜେଦି ଉଣ୍ତିଙ୍ଗ୍‍ଁ ଜିଏନ୍‍, ମାରି ନିଜେଦି ଉଣ୍ତିଙ୍ଗ୍ଁ ସାଏନ୍‍ । 
\v 8 ପ୍ରବୁଦି ଉଦେସ୍‍ ଜିନି ଉଣ୍ତିଙ୍ଗ୍‌ ମାଡ଼ୁ ଜିତାମାନାପ୍‍ ମାରି ସାନାପ୍‍ । ଆଦେଙ୍ଗ୍‍ଁ ଜିବନ୍‌ ନି ସାନିମାନୁ ମାପ୍‌ ପ୍ରବୁଦି ଲୋକ୍‍ । 
\v 9 ଇରିଙ୍ଗ୍‌ କ୍ରିସ୍ତ ମାରିଡ଼େସିଜିନି ମାଣାନ୍‌ ରିଏର୍‌ ଜିନିକା ନି ସାନି ଲୋକା ୱିଜେରି ୱାନ୍‌ ପ୍ରବୁ ଆତାମାନାନ୍‌ । 
\v 10 \x + \xo ୧୪:୧୦ \xo*\xt ୨ କରିନ୍ତିୟ ୫:୧୦.\xt*\x*ଆଦେଙ୍ଗ୍‍ଁ ମିର୍‌ ଏନ୍ଦା ନିଜେଦି ତଡ଼ାନ୍‍ତି ବିସାର୍‍ କିଜିନିଦେର୍‍ ? ଏନ୍ଦା ମାରି ନିଜେଦି ତଡ଼ାନ୍‍ତିଙ୍ଗ୍‍ଁ କାଡ଼୍‍ଜିନିଦେର୍‍ ? ମାଡ୍‌ ୱିଜେରେ ବିଚାର୍‍ ଆଦେଙ୍ଗ୍‍ଁ ଇଜି ମାପୁରୁଦି ଆଗ୍‍ଡ଼ି ନିନ୍‍ଡ୍ରେଙ୍ଗ୍‍ଁ ପଡ଼ାନାତ୍‍ । 
\v 11 ଏଣ୍ତେସ୍‌ ସାସ୍ତ୍ର ଇନାତ୍‍ :
\q1 “ପ୍ରବୁ ଇଜିନାନ୍‌, ଏଣ୍ତେସ୍‍କି ମାପ୍‌ ଜିବନ୍‍ତି ମାପୁରୁ,
\q2 ୱିଜେରେ ମା ଆଗ୍‍ଡ଼ି ମେଣ୍ତେଙ୍ଗ୍‍ଁ ଗଟ୍‍କିନାର୍‍ ।
\q2 ମାପ୍‌ ମାପୁରୁ ଇଜି ୱିଜେରେ ମାନାନାର୍‌ ।”
\m
\v 12 ମା ୱିଜେରିଙ୍ଗ୍‍ଁ ମାପୁରୁଦି ଲାକ୍‍ତୁ ନିଜେ ନିଜେଦି ଇସାବ୍‌ ସିଦେଙ୍ଗ୍‌ ପଡ଼ାନାତ୍‍ ।
\s ତଡ଼ାନତିଙ୍ଗ୍‍ ଆଡ୍‍ଗି ଆର୍‍ପ୍‍ମାଟ୍‍
\p
\v 13 ଆଦେଙ୍ଗ୍‍ଁ ଆଇୱାରିଙ୍ଗ୍‌ ବିସାର୍‍ କିମାଟ୍‌ । ଇୟାୱାଜା ବା ଇନିକା କିମାଟ୍‌, ଆମାମାଣାନ୍‍ କି ମି ତଡ଼ାନ୍‍ ତାକାୟ୍‌ ଆଜି ପାପ୍‍ କିନାନ୍‍ । 
\v 14 ଜିସୁଦି ମାଣାନ୍‌ ଆଦେସ୍‌ ପୟ୍‍ଜି ସତ୍‍ତାନ୍‌ ଇଜିନା, ଆମା କାଦି ତାଗ୍‍ଇକା ସିଲେ । ମାତର୍‌ ଜଦି ଏନ୍‌ ଆମା କାଦି ତାଗ୍‍ଇକା ଇଜି ବିସ୍‍ବାସ୍‍ କିନାନ୍‍, ୱାନି ଉଣ୍ତିଙ୍ଗ୍‌ ଆକା ତାଗ୍‌ଇକା ଆନାତ୍‌ । 
\v 15 ମିର୍‌ ଇନି କାଦି ଉଣି ମାଣାନ୍‌ ଜଦି ଅରେନ୍‍ ତଡ଼ାନ୍‍ତି ମନ୍‍ତୁ ଦୁକ୍‍ ସିନିଦେର୍‍, ଆର୍‍ତିଙ୍ଗ୍‍ଁ ୱାନି ଉଣ୍ତିଙ୍ଗ୍‍ଁ ମି ଜିବନ୍‍ନୋନିକା ତର୍‍ଇଜିନିଦେର୍‍ । ଆମା ତଡ଼ାନ୍‍ତି ଉଣ୍ତିଙ୍ଗ୍‍ଁ କ୍ରିସ୍ତ ସାତାନ୍‍, କାଣ୍ତେକ୍‍ କାଦି ଉଣ୍ତିଙ୍ଗ୍‍ଁ ୱାନିଙ୍ଗ୍‌ ନାସ୍ଟୁ କିମାଟ୍‌ । 
\v 16 ମିର୍‌ ଆମାୱାନିଙ୍ଗ୍‍ଁ ନେଗିକାନ୍‍ ଇଜି ଅଡ଼୍‍ବିଜିନିଦେର୍‍, ଆବେଣ୍‌କୁ ମି ତାଗ୍‍ଇକା ଆମାପିତ୍‍ । 
\v 17 ମାପୁରୁଦି ରାଜିଦି ତିନିକା ନି ଉଣିକା ସିଲେ । ଆକା ପବିତ୍ର ଆତ୍ମାଦି ମାଣାନ୍‌ ସିଆୟ୍‍ ଆତି ଦାର୍ମୁତିକା, ସାନ୍ତି ମାରି ୱେଡ଼ିକା । 
\v 18 ଏନ୍‌ଆପିନ୍‌ ଇୟାୱାଜା ଇସାବ୍‍ତାନ୍‍ କ୍ରିସ୍ତଦି ସେବା କିନାନ୍‍; ୱାନ୍‌ ମାପୁରୁଙ୍ଗ୍‍ଁ ୱେଡ଼ିକା କିବିସ୍‍କିନାନ୍‍, ଲୋକାମାନୁ ବା ଦର୍‍ ପୟ୍‍ନାନ୍‍ ।
\p
\v 19 ଆଦେଙ୍ଗ୍‍ଁ ରାଦୁ, ନିଜେ ନିଜେମାନୁ ସାନ୍ତି ତିଆର୍‌ କିଦେଙ୍ଗ୍‍ଁ ନି ପିରିସ୍‍ କିଦେଙ୍ଗ୍‍ଁ ଇଜି ଆମା ୱିଜୁ ଦର୍‍କାର୍‍ ମାନାତ୍‌, ତାନିଙ୍ଗ୍‍ଁ ସୁଣାଟ୍‍ । 
\v 20 କାଣ୍ତେକ୍‍ କାଦି ଉଣ୍ତିଙ୍ଗ୍‍ଁ ମାପୁରୁ ଆମା ପାଣି କିତାମାନାନ୍‌, ଆକା ନାସ୍ଟୁ କିମାଟ୍‌ । ଏନ୍‌ ଇନି କାଦି ଉଣି ମାଣାନ୍‌ ଜଦି ମିର୍‌ ଆଇୱାରି ତାକାନି ପାଣି ଆନାତ୍‌, ଆର୍‍ତିଙ୍ଗ୍‍ଁ ଆୟା କାଦି ଉଣିକା ନେଗେତ୍‌ ସିଲେ । 
\v 21 ମି କାଣ୍ତା ତିନିକା, କାଡ଼ୁ ଉଣିକା ୱିଜୁ ଜଦି ମି ତଡ଼ାନ୍‍ତିଙ୍ଗ୍‍ଁ ବାଦା କିନାତ୍‍, ଆର୍‍ତିଙ୍ଗ୍‍ଁ ଆୟାୱିଜୁ ମାଣାନ୍‌ ବନ୍ଦ୍‍ ଆନିକା ମିଙ୍ଗିଁ ନେଗେତ୍‌ । 
\v 22 ଇୟା ବିସୟ୍‌ତାନ୍‌ ମି ନିଜେଦି ବିସ୍‍ବାସ୍‍ କେବଲ ମାପୁରୁ ନେସିନ୍‍ । ଏମେ ଲୋକ୍‍ ନେଗିକା ବିଚାର୍‌ କିଜି ପାଣି କିନାନ୍‍, ମାରି ଆୟାଉଣ୍ତିଙ୍ଗ୍‌ ୱାନିଙ୍ଗ୍‍ଁ ୱେନ୍‌କା ଅଡ଼୍‍ବିଦେଙ୍ଗ୍‍ଁ ଆଏତ୍‍, ୱାନ୍‌ ଦନ୍ୟ । 
\v 23 ମାତର୍‌ ଇନି କାଦି ଉଣିକା ନୋ ସିଲେ, ମନ୍‍ତୁ ରୁଣ୍ତି ମନ୍ ଅଡ଼୍‌ବିଜି ଏନ୍‌ ଆକା କିନାନ୍‍; ମାପୁରୁଦି ଆଗ୍‍ଡ଼ି ୱାନ୍‌ ଦସି ଆନାନ୍‍, ଇରିଙ୍ଗ୍‍ଁ ଆକା ୱାନି ବିସ୍‍ବାସ୍‍ତି ମୁସ୍‌କୁ ପାଣି ସିଲେ । ବିସ୍‍ବାସ୍‍ ମୁସ୍‌କୁ ଆମାକା ଆଏତ୍‍, ଆକା ପାପ୍‍ ।
\c 15
\s ଆଇୱାରିଙ୍ଗ୍‌ ୱେଡ଼ିକା କିଦୁ, ନିଜେଦିଙ୍ଗ୍‍ଁ ସିଲେ
\p
\v 1 ବିସ୍‍ବାସ୍‍ତୁ ବପୁ ଜେ ମାଡ୍‌, ୱାର୍‌ ସାକିସିଲି ବିସ୍‌ବାସ୍‌ ତଡ଼ାନ୍‌ତି ଦୋସ୍‌ ସାକିସିଲି ଉଣ୍ତିଙ୍ଗ୍‌ ଲାକ୍‌ତୁ ଆଦୁ । ଏନ୍‌ ନିଜେଦିଙ୍ଗ୍‍ଁ ୱେଡ଼ିକା କିନି ଉଣ୍ତିଙ୍ଗ୍‌ ବଦା କିମାକିନ୍‌ । 
\v 2 ମାତର୍‌ ଆଇୱାରି ନେଗି ଉଣ୍ତିଙ୍ଗ୍‍ଁ ମାରି ୱାରି ବିସ୍‍ବାସ୍‍ତିଙ୍ଗ୍‍ଁ ଡାଟ୍‍ କିନି ଉଣ୍ତିଙ୍ଗ୍‍ଁ ୱାରିଙ୍ଗ୍‍ଁ ୱେଡ଼ିକା ଇଡ୍‍ଦେଙ୍ଗ୍‍ଁ ମା ପାଣି । 
\v 3 କ୍ରିସ୍ତ ନିଜେଦି ସୁକ୍‌ ଉଣ୍ତିଙ୍ଗ୍‍ଁ ଇନିକା କିଏଜିମାର୍ହାନ୍‍ । ମାତର୍‌ ସାସ୍ତ୍ର ଇସାବ୍‍ତାନ୍‍, “ୱାର୍‌ ମିଙ୍ଗିଁ ସିଜିମାନି ଅପ୍‍ମାନ୍‍ ନାନୁ ସାସ୍‌ କିଜିନା ।” 
\v 4 ମାରି, ଦାର୍ମୁସାସ୍ତ୍ରଦି ସିକିୟାୱିଜୁ ମା ନେଗି ଉଣ୍ତିଙ୍ଗ୍‍ଁ ସିଆୟ୍‍ଆତାମାନାତ୍‍ । ଆସାଦୁ ତିର୍‍ ତେବାନି ଉଣ୍ତିଙ୍ଗ୍‍ଁ ସାସ୍ତ୍ର ମାଙ୍ଗିଁ ସାସ୍‌ ନି ୱେଡ଼ିକା ସିନାତ୍‍ । 
\v 5 କ୍ରିସ୍ତ ଜିସୁଦି ୱେନ୍‌କା ସୋଲ୍‌ସି ବୁଲାନି ୱାଜା ୱିଜେରି ଆୟାୱାଜା ମନ୍‍ସିନ୍ତା ଆନି ଉଣ୍ତିଙ୍ଗ୍‍ଁ ସାସ୍‌ ନି ୱେଡ଼ିକାଦି ଇସାବ୍‍ତାନ୍‍ ମାପୁରୁ ମିଙ୍ଗିଁ ସାକା କିପିନ୍‍ । 
\v 6 ୱିଜେରେ ମିସାଜି ଉନ୍‍ଣ୍ତ୍ରେ ବଲ୍‍ତାନ୍‍ ପ୍ରବୁ ଜିସୁ କ୍ରିସ୍ତ ବୁବା ମାପୁରୁଦି ଦନ୍ୟବାଦ୍‍ କିଦୁ ।
\s ଯିହୁଦି ମାରି ଅଣଜିହୁଦି ଲୋକା ଉଣ୍ତିଙ୍ଗ୍‍ଁ ସୁସମାଚାର୍‌
\p
\v 7 କ୍ରିସ୍ତ ଏଣ୍ତେସ୍‌ ମିଙ୍ଗିଁ ଆସ୍‍ତାମାନାନ୍‍, ମାପୁରୁଦି ମହିମା ଉଣ୍ତିଙ୍ଗ୍‍ଁ ମିର୍‌ ଆୟାୱାଜା ଆପ୍‍ଣା ଆପ୍‍ଣାଦିଙ୍ଗ୍‍ଁ ଆସ୍‌ତୁ । 
\v 8 ଇରିଙ୍ଗ୍‍ଁ କ୍ରିସ୍ତଦି ସେବାଦି ଜିବନ୍‌ ଜିହୁଦିଲୋକା ଉଣ୍ତିଙ୍ଗ୍‍ଁ ଟିକ୍‍ ମାର୍ହାତ୍‌ । ୱାରିଙ୍ଗ୍‍ଁ ୱାନ୍‌ ତର୍‍ତେଙ୍ଗ୍‍ଁ ବଦାକିଜିମାର୍ହାନ୍‍ ଜେ ମାପୁରୁ ବିସ୍‌ସାସ୍‍ତିକାନ୍‍, ଜିହୁଦି ଜାତିଦି ଡକ୍ରାଦାଦାରିଙ୍ଗ୍‍ ସିତିମାନି ୱାନି ମାଟାୱିଜୁ ୱାନ୍‌ କିନାନ୍‍ । 
\v 9 ମାପୁରୁଦି ଦୟା ଉଣ୍ତିଙ୍ଗ୍‍ଁ ଅଣଜିହୁଦି ଲୋକୁ ବା ୱାନି ଦନ୍ୟବାଦ୍‍ କିନାର୍‌ । ଇୟା ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌
\q1 “ଅଣଜିହୁଦି ଲୋକା ଲୋଇ ନି ଦନ୍ୟବାଦ ନାନୁ କିନା,
\q2 ୱିଜୁଦିନ୍‍ ନି ଦନ୍ୟବାଦ୍‌ ପାଟା ପାର୍‍ନା ।”
\m
\v 10 ମାରି ବା ରାସାତାମାନାତ୍‌,
\q1 “ଅଣଜିହୁଦି ଲୋକୁ ମାପୁରୁଦି ଲୋକାୱାଲେ ୱେଡ଼ିକା କିପିର୍‍ !”
\m
\v 11 ମାରି,
\q1 “ଅଣଜିହୁଦି ୱିଜୁ ଲୋକୁ ପ୍ରବୁଙ୍ଗୁଁ ଦନ୍ୟବାଦ କିପିର୍‍; ୱାନିଙ୍ଗ୍‍ଁ ୱିଜୁ ଲୋକୁ ଦନ୍ୟବାଦ୍‍ତି ପାଟା ପାରିର୍‍ !”
\m
\v 12 ମାରି ଜିସାଇୟ ଇର୍ହାମାନାନ୍‌,
\q1 “ଜେସିଦି ଅରେନ୍‍ କୁଟୁମ୍‍ତିକାନ୍‍ ତରାଆୟ୍‍ଆନାନ୍‍,
\q2 ୱାନ୍‌ ଅଣଜିହୁଦି ଲୋକାଙ୍ଗ୍‍ଁ ସାସନ୍‍ କିନାନ୍‍
\q2 ମାରି ୱାର୍‌ ୱାନିମାନୁ ଆସା ଇଡ୍‍ନାର୍‍ ।”
\p
\v 13 ୱିଜୁ ଆସାଦି ଅଦିକାରି, ମାପୁରୁ ମି ବିସ୍‍ବାସ୍‍ ଉଣ୍ତିଙ୍ଗ୍‍ଁ ମିଙ୍ଗିଁ ୱେଡ଼ିକା ନି ସାନ୍ତିଦୁ ପୁରା କିପିନ୍‍ । ପବିତ୍ର ଆତ୍ମାଦି ସାକ୍ତିଦାନ୍‍ ମି ଆସା ପିରିତ୍‍ ।
\s ପାଉଲ ଅଣଜିହୁଦିରି ଲାକ୍‌ତୁ ଜିସୁଦି ସେବାକିନି ପାଣି
\p
\v 14 ନା ତଡ଼ାନ୍‍କୁ ନି ତାଙ୍ଗିଁକ୍‍, ନା ବିସ୍‍ବାସ୍‍, ମିର୍‌ ୱିଜୁ ନେଗିଗୁଣ୍‍ ନି ବୁଦିଦୁ ପୁରାଆଜି ମାରି ନିଜେନିଜେଦିଙ୍ଗ୍‍ଁ ସିକିୟା ସିଦେଙ୍ଗ୍‌ ଆଟ୍‌ନିଦେର୍‌ । 
\v 15 ଇୟା ଆକୁଦୁ ମିଙ୍ଗିଁ ଏସ ବିସୟ୍‍ ଉଣ୍ତିଙ୍ଗ୍‍ଁ ଜାଗାର୍‌ତା କିଦେଙ୍ଗ୍‍ଁ ଇଜି ନାନୁ ମାପୁରୁ ଲାକୁତୁ ବପୁ ଆତାମାନା, 
\v 16 ଇରିଙ୍ଗ୍‍ଁ କ୍ରିସ୍ତ ଜିସୁଦି ଦାସ୍‍ ୱାଜା ଅଣଜିହୁଦି ଲୋକାଙ୍ଗ୍‍ଁ ଉଣ୍ତିଙ୍ଗ୍‍ଁ ପାଣି କିଦେଙ୍ଗ୍‍ଁ ଇଜି ମାପୁରୁ ନାଙ୍ଗିଁ ସାରି ସିତାମାନାନ୍‌ । ମାପୁରୁଦି ସୁସମାଚାର୍‌ ୱେର୍‍ତେଙ୍ଗ୍‍ଁ ଇଜି ନାନୁ ଅରେନ୍‍ ଦାର୍ମୁଗୁରୁ ୱାଜା ପାଣି କିଜିନା । ଅଣଜିହୁଦି ଲୋକୁ ପବିତ୍ର ଆତ୍ମାଦି ମାଣାନ୍‌ ସିୟାୟ୍‍ଆତି ବିସୟ୍‌ତି ୱାଜା ମାପୁରୁଦି ଲାକ୍‍ତୁ ସର୍‌ପେ ଆପିର୍‍, ଇକା ନା ବଦା । 
\v 17 କ୍ରିସ୍ତ ଜିସୁଦି ୱାଲେ ମିସାଜି ମାପୁରୁଦି ଉଣ୍ତିଙ୍ଗ୍‍ଁ ଇୟା ସେବା ପାଣି କିଜିମାନିଙ୍ଗ୍‍ଁ ନାନୁ ନିଜେଦିଙ୍ଗ୍‌ ଗର୍ବ ଏତ୍‌ କିଜିନା । 
\v 18 ଅଣଜିହୁଦି ଲୋକାଙ୍ଗ୍‍ଁ ମାପୁରୁଦିଙ୍ଗ୍‍ଁ ମାନାଦେଙ୍ଗ୍‍ଁ ଇଜି କ୍ରିସ୍ତ ନା ମାଣାନ୍‌ ଇନିକା କିତାମାନାନ୍‌, କେବଲ ଇୟା ମାଟା ଇନ୍‍ଡ୍ରେଙ୍ଗ୍‍ଁ ନାନୁ ସାସ୍‍ତିକାନ୍‍ ଆତାମାନା । 
\v 19 ଇକା ୱାନ୍‌ କିତାମାନାନ୍‌, ବାକ୍ୟ ନି ପାଣି ଦାନ୍‍ ମାରି ମାପୁରୁଦି ଆତ୍ମାଦି ସାକ୍ତିଦାନ୍‍ । ଆଦେଙ୍ଗ୍‍ଁ ନାନୁ ଜିରୁସାଲାମ୍‍ତାନ୍‍ ଇଲିରିକମତୁ ସନି ୱାଲେ ସାରିଦୁ କ୍ରିସ୍ତଦି ସୁସମାଚାର୍‌ ୱେର୍‍ତାମାନା । 
\v 20 ଏମେ ବାଡିଆଙ୍ଗ୍‍ଁ ଲୋକୁ କ୍ରିସ୍ତଦି ବିସୟ୍‍ତାନ୍‍ ୱେନ୍‌ଏର୍‌, ଆବେ ୱାନି ମାଟା ୱେର୍‍ତେଙ୍ଗ୍‍ଁ ନା ବଦା, ଇରିଙ୍ଗ୍‍ଁ ଆଇକାର୍‌ ପକ୍‍ତିମାନି କୁନାଦି ମୁସ୍‌କୁ ଇଲୁ ତର୍‍ତେଙ୍ଗ୍‍ଁ ନାନୁ ବଦାକିଏ । 
\v 21 ସାସ୍ତ୍ର ଏଣ୍ତେସ୍‌ ରାସାତାମାନାତ୍‌ :
\q1 “ଏମେକାର୍‌ ୱାନି ମାଟା ୱେନ୍‌ଏର୍‌, ୱାର୍‌ ସୁଣାର୍‍;
\q2 ଏମେକାର୍‌ ୱେନ୍‌ଏର୍‌, ୱାର୍‌ ବୁଜାନାର୍‍ ।”
\s ରୋମ୍‍ତୁ ସନି ଉଣ୍ତିଙ୍ଗ୍‍ଁ ପାଉଲ୍‍ତି ଜଜନା
\p
\v 22 \x + \xo ୧୫:୨୨ \xo*\xt ରୋମିୟ ୧:୧୩.\xt*\x*ଏସ ଦେବେଙ୍ଗ୍‍ଁ ମି ଲାକ୍‍ତୁ ୱାନି ଉଣ୍ତିଙ୍ଗ୍‍ଁ ନା ବଦା ସିଲେତ୍‌ ଆତାମାନାତ୍‌ । 
\v 23 ମାତର୍‌ ଇୟା ରାଜିଦୁ ନା ପାଣି ୱିଜିତାମାନାତ୍‍ ମାରି ନା ଆସା, ମିଙ୍ଗିଁ ସୁଡ଼ୁଦେଙ୍ଗ୍‌ ଇଜିନା ଏସ ବାର୍‍ସେକ୍‍ତି ଆସା ଇଲେଇ ପୁରା ଆନାତ୍‌ । 
\v 24 ସ୍ପେନ୍‍ ସନି ସାରିଦୁ ମିଙ୍ଗିଁ ସୁଡ଼ୁଗା ୱାନା ଇଜି ଅଡ଼୍‌ବିଜିନା । ମି ଲାକ୍‍ତୁ ଏସ ସମୟ୍‍ ତେବାତି ୱେନ୍‌କା ମି ସାକାଦାନ୍‍ ସ୍ପେନ୍‍ତୁ ସନା । 
\v 25 \x + \xo ୧୫:୨୫ \xo*\xt ୧ କରିନ୍ତିୟ ୧୬:୧-୪.\xt*\x*ଇୟାଦାପ୍ରେ ମାପୁରୁଦି ଲୋକା ସେବା କିଦେଙ୍ଗ୍‍ଁ ନାନୁ ଜିରୁସାଲାମ୍‍ତୁ ସନ୍‍ଡ୍ରେଙ୍ଗ୍‍ଁ ସତାମାନା । 
\v 26 ଜିରୁସାଲାମ୍‍ତୁ ମାପୁରୁଦି ଏମେ ଲୋକୁ କାକୁର୍ତି ମାନାର୍‌, ୱାରି ଉଣ୍ତିଙ୍ଗ୍‍ଁ ଏସ ଡାବୁଙ୍ଗୁଁ ସାହାଜ୍ୟ ପକ୍‍ତେଙ୍ଗ୍‍ଁ ମାସିଦନିଆ ନି ଆକାୟାଦି ମଣ୍ତଲିଙ୍ଗ୍‍ଁ ବଦା କିତାମାନାର୍‌ । 
\v 27 ଇକା ୱାରି ନିଜେଦି ବଦା; ସତ୍‌ତାନ୍‌ ଇୟାୱାଜା କିନିକା ୱାରି ପାଣି । ଜିହୁଦିଲୋକୁ ନିଜେଦି ଆତ୍ମିକ ଆର୍ସିବାଦତୁ ଅଣଜିହୁଦି ଲୋକାଙ୍ଗ୍‍ଁ ମିସା କିତାମାନାର୍‌ଆକା, ଜିହୁଦିଲୋକାଙ୍ଗ୍‍ଁ ନିଜେଦି ଡାବୁଙ୍ଗୁଁ ସିଜି ଆର୍ସିବାଦ୍‍ତୁ ମିସାକିଜି ୱାରିଙ୍ଗ୍‍ଁ ସେବା କିନିକା ଅଣଜିହୁଦି ଲୋକା ପାଣି । 
\v 28 ଜିରୁସାଲାମ୍‍ତୁ ଆୟା ଡାବୁଙ୍ଗୁଁ ସିଜି ନା ପାଣି ୱିସ୍‌ତି ୱେନ୍‌କା, ନାନୁ ସ୍ପେନ୍‍ ସନ୍‍ଡ୍ରେଙ୍ଗ୍‍ଁ ସୋତା ମାରି ସାରିଦୁ ମିଙ୍ଗିଁ ସୁଡ଼ୁନା ୱାନା । 
\v 29 ନାନୁ ନେସ୍‍ନା, କ୍ରିସ୍ତଦି ମାଣାନ୍‌ ପୁରାଦାନ୍‌ ଆର୍ସିବାଦ୍‌ ଅସି ନାନୁ ମି ଲାକ୍‍ତୁ ୱାନା ।
\p
\v 30 ଏ ତଡ଼ାନ୍‌କୁ ନି ତାଙ୍ଗିକ୍ ପ୍ରବୁ ଜିସୁ କ୍ରିସ୍ତଦି ଦର୍‍ତାନ୍‍ ନି ପବିତ୍ର ଆତ୍ମାଦି ସିତିମାନି ଜିବନ୍‍ନନି ଉଣ୍ତିଙ୍ଗ୍‍ଁ ମାପୁରୁଦି ଲାକ୍‌ତୁ ନାନୁ ମିଙ୍ଗିଁ ବାତିଙ୍ଗ୍‌ ମାଲ୍‍ଜିନା, ନା ଉଣ୍ତିଙ୍ଗ୍‍ଁ ୱିଜୁଦିନ୍‍ ପାର୍‍ତନା କିଦୁ । 
\v 31 ଜିହୁଦା ଦେସ୍‌ତି ଅବିସ୍‍ବାସ୍‍ତି ଲୋକା ଲାକ୍‌ତୁରାନ୍‌ ନାନୁ ଏଣ୍ତେସ୍‌ ନେଗେନ୍‌ତାନ୍‍ ତେବାନା ମାରି ଜିରୁସାଲାମ୍‍ତୁ ନା ସେବା ପାଣି ଏଣ୍ତେସ୍‌ କିନାର୍‌, ଆୟାଉଣ୍ତିଙ୍ଗ୍‌ ପାର୍‍ତନା କିଜିମାନ୍‍ଡ୍ରୁ । 
\v 32 ମାପୁରୁଦି ବଦା ଆତିଙ୍ଗ୍‍ଁ, ନାନୁ ମି ଲାକ୍‍ତୁ ୱେଡ଼ିକାଦାନ୍‍ ୱାନା ମାରି ମି ୱାଲେ ଏସ ଦିନ୍‍ ତେବାଜି ନା ମନ୍‍ତୁ ଆରାମ୍‌ କିନା । 
\v 33 ୱିଜୁ ସାନ୍ତି ସିନି ମାପୁରୁ ମି ୱାଲେ ତେବାପିନ୍‍ । ଆମେନ୍‍ ।
\c 16
\s ନମସ୍କାର୍‌ କିଜିନା
\p
\v 1 କେଙ୍କ୍ରେୟାଦୁମାନି ମଣ୍ତଲିଦି ଅରେତ୍‍ ସେବାକିନିକାତ୍‍ ତାଙ୍ଗିଁ ପିବେଙ୍ଗ୍‍ ମି ଲାକ୍‌ତୁ ପକସିନା । 
\v 2 ପ୍ରବୁଦି ଦର୍‍ତାନ୍‍ ତାନିଙ୍ଗ୍‍ ଆସ୍‌ସି ମାପୁରୁଦି ଲୋକା ୱାଜା ସାଲାବୁଲା ଆଦୁ । ତାନି ଦର୍‍କାର୍‍ ଇସାବ୍‍ତାନ୍‍ ସାକା କିଦୁ । ନାଙ୍ଗିଁ ନି ନାଣ୍ତ ଲୋକାରି ୱାଦ୍ ଅରେତ୍‍ ନେଗି ସଙ୍ଗ୍‍ଁ ।
\p
\v 3 \x + \xo ୧୬:୩ \xo*\xt ପ୍ରେରିତ ୧୮:୨.\xt*\x*କ୍ରିସ୍ତ ଜିସୁଦି ସେବାଦୁ ନା ଅର୍‍ସେପାଣିକିନି ପ୍ରିସ୍କିଲା ନି ଆକିଲାଦି ନା ନମସ୍କାର୍‌ ଜାଣେକିଦୁ । 
\v 4 ୱାର୍‌ ନା ଉଣ୍ତିଙ୍ଗ୍‍ଁ ନିଜେଦି ଜିବନ୍‍ତିଙ୍ଗ୍‍ଁ କାସ୍ଟୁଦି କିତାମାନାର୍‍ । ମାତର୍‌ ନାନୁ ସିଲେ, ୱିଜୁ ଅଣଜିହୁଦି ମଣ୍ତଲି ୱାନିଙ୍ଗ୍‍ଁ ଧନ୍ୟବାଦ କିଜିନାର୍‍ । 
\v 5 ୱାରି ଇଲ୍‍ତୁ ଉଣ୍ତାଜି ମାନି ପାର୍‌ତନା ମଣ୍ତଲିଦିଙ୍ଗ୍‍ଁ ବା ମାଡ଼ିସ୍‍ କିଜିନା । ନା ଲାଡ୍‍ତି ତଡ଼୍‍ ଏପାଇନେତଦିଙ୍ଗ୍‍ଁ ନା ନମସ୍କାର୍‌ ୱେର୍‍ନିଦେର୍‍ । ଆସିଆ ରାଜିଦୁ ୱାନ୍‌ ଆଜିନାନ୍‍ ପାର୍‍ତୁମ୍‍ କ୍ରିସ୍ତ ବିସ୍‍ବାସି । 
\v 6 ମି ନେଗି ଉଣ୍ତିଙ୍ଗ୍‍ଁ ନାଣ୍ତ ପାଣି କିତିମାନି ମରିୟମ୍‍ତିଙ୍ଗ୍‍ଁ ନା ନମସ୍କାର୍‌ କିଦୁ । 
\v 7 ଆନ୍ଦ୍ରନିକ ନି ୟୁନିୟାଦିଙ୍ଗ୍‌ଁ ନମସ୍କାର୍‌ ଆପିତ୍‌ । ଇୟା ରିଏର୍‌ ଜିହୁଦିର୍‍ ନା ୱାଲେ ଜଇଲ୍‍ତୁ ମାର୍ହାର୍‌ । ନା ଆଗ୍‍ଡ଼ିରାନ୍‍ ୱାର୍‌ କ୍ରିସ୍ତଦର୍ମ ମାନାତା ମାର୍ହାର୍‌ ମାରି ପେରିତ ସିସୁରି ଲୋଇ ୱାର୍‌ ନେସ୍‌ତାମାର୍ହାର୍‍ ।
\p
\v 8 ନା ୱାଲେ ପ୍ରବୁଦି ମିସାନିକା ୱେଡ଼ିକା ଇତିମାନି ନା ଲାଡ୍‍ତି ତଡ଼୍‍ ଆମ୍ପ୍ଲିୟାତଦିଙ୍ଗ୍‍ଁ ନା ନମସ୍କାର୍‌ ଆପିତ୍‌ । 
\v 9 କ୍ରିସ୍ତଦି ସେବାଦୁ ନା ୱାଲେ ଅର୍‍ସେପାଣିକିନି ଉର୍ବୋନ ନି ନା ଲାଡ୍‍ତି ତଡ଼୍‍ ସ୍ତାକିୟଦିଙ୍ଗ୍‍ଁ ବା ନା ନମସ୍କାର୍‌ ଆପିତ୍‌ । 
\v 10 କ୍ରିସ୍ତଦି ବିସ୍‍ବାସ୍‍ତାନ୍ ମାନି ସେବକ ଆପେଲ ନି ଆରିସ୍ତବୁଲଦି ଇଲ୍‍ତି ୱିଜେରିଙ୍ଗ୍‍ଁ ନା ନମସ୍କାର୍‌ ୱେର୍‍ନିଦେର୍‍ । 
\v 11 ନା ଜାତିଦି ହେରୋଦିୟନ୍‍ ନି ନାରକିସତି ଇଲ୍‍ତି କ୍ରିସ୍ତଦି ତଡ଼ାନ୍‍କାଙ୍ଗ୍‍ଁ ବା ନା ନମସ୍କାର୍‌ ୱେର୍‍ନିଦେର୍‍ ।
\p
\v 12 ପ୍ରବୁଦି ସେବାଦୁ ପାଣିକିଜିମାନି କ୍ରୁଫେଣା ନି କ୍ରୁପସୋତିଙ୍ଗ୍‍ଁ ମାରି ପ୍ରବୁଦି ଉଣ୍ତିଙ୍ଗ୍‍ଁ ନାଣ୍ତ ପାଣିକିତିମାନି ନା ତଡ଼୍‍ ପର୍ସିସତିଙ୍ଗ୍‍ଁ ନା ନମସ୍କାର୍‌ ଆପିତ୍‌ । 
\v 13 \x + \xo ୧୬:୧୩ \xo*\xt ମାର୍କ ୧୫:୨୧.\xt*\x*ପ୍ରବୁଦି ବାସେଆତିମାନି ଦାସ୍‍ ରୁପସ ନି ନା ୟାୟା ୱାଜା ୱାନି ଆଇସିଙ୍ଗ୍‍ଁ ବା ନା ନମସ୍କାର୍‌ ଆପିତ୍‌ । 
\v 14 ଆସୁଙ୍କ୍ରିତ, ପ୍ଲେଗୋନ୍‍, ହର୍ମିସ୍‍, ପାତ୍ରବା, ହରମାସ୍‍ ନି ୱାରି ୱାଲେ ମାନି କ୍ରିସ୍ଟିୟାନ୍‍ ତଡ଼ାନ୍‍କାଙ୍ଗ୍‍ ନି ତାଙ୍ଗିଁକାଙ୍ଗ୍‍ଁ ନମସ୍କାର୍‌ ୱେର୍‍ତୁ । 
\v 15 ପିଲଲୋଗ ନି ଯୁଲିୟା, ନିରୁସ୍‍ ନି ୱାନି ତାଙ୍ଗିଁ ମାରି ଅଲୁମ୍ପା ନି ୱାରିୱାଲେ ମାନି ୱିଜୁ ଦାର୍ମୁଲୋକାଙ୍ଗ୍‍ଁ ନା ନମସ୍କାର୍‌ ୱେର୍‍ତୁ ।
\p
\v 16 ନିଜେନିଜେଦିଙ୍ଗ୍‍ଁ ନେଗେନ୍‌ତାନ୍‍ ନଣ୍ତ୍‍ଜି ନମସ୍କାର୍‌ କିଦୁ । କ୍ରିସ୍ତଦି ୱିଜୁ ମଣ୍ତଲି ମିଙ୍ଗିଁ ନମସ୍କାର୍‌ କିଜିନାତ୍‍ ।
\s ପାଉଲଦି ସାରାସାରି ମାଟା
\p
\v 17 ତଡ଼ାନ୍‍କୁ ନି ତାଙ୍ଗିଁକ୍‍, ବାତିଙ୍ଗ୍‌ ମାଲ୍‌ଜିନା, ମିର୍‌ ଆସ୍‍ତିମାନି ସିକିୟାଦି ବିରଦ୍‍ କିଜି ଏମେକାର୍‌ ମି ଲୋଇ ବାଗ୍‍ କିଦେଙ୍ଗ୍‍ଁ ଇଜି ବଦା କିନାର୍‌, ୱାରିମାଣାନ୍‍ ଆକତେବାଦୁ । 
\v 18 ଏମେକାର୍‌ ଇୟାୱାଜା ପାଣିଦୁ ତେବାନାର୍‍, ୱାର୍‌ ପ୍ରବୁ କ୍ରିସ୍ତ ସେବା କିଏଜିନାର୍‍, ୱାର୍‌ କେବଲ ନିଜେଦି ପଟା ପସା କିଦେଙ୍ଗ୍‍ଁ ଆଗ୍‍ଡ଼ି । ବାସାଦି ସାଲାକି ନି ସୁରି ମାଟାଦାନ୍‌ ୱାର୍‌ ସିଲିସାତି ଲୋକା ଜିବନ୍‌ତିଙ୍ଗ୍‌ ବାଣ୍ତିସ୍‍ କିନାର୍‌ । 
\v 19 ସୁସମାଚାର୍‌ ଉଣ୍ତିଙ୍ଗ୍‍ଁ ମି ବିସ୍‍ବାସ୍‍ ୱିଜେରେ ୱେର୍‌ଆମାନାର୍‌, ଇୟାଉଣ୍ତିଙ୍ଗ୍‍ଁ ନାନୁ ୱେଡ଼ିକା । ନାନୁ ବଦାକିନା, ମିର୍‌ ନେଗି ବିସୟ୍‍ତୁ ବୁଦିମାନିକାର୍‍ ଆଦୁ ମାରି ଅସତ୍‍ ବିସୟ୍‍ତୁ ମିସାମାଟ୍‍ । 
\v 20 ଆକାଆତିଙ୍ଗ୍‍ଁ ସାନ୍ତି ସିନି ମାପୁରୁ ବେଗି ସୟତାନ୍‍ତିଙ୍ଗ୍‍ଁ ମି ପାଦାମ୍‍କା ଆଡ୍‍ଗି କିନାନ୍‍ । ପ୍ରବୁ ଜିସୁଦି ଦୟା ମି ୱାଲେ ମାନିତ୍‍ ।
\p
\v 21 \x + \xo ୧୬:୨୧ \xo*\xt ପ୍ରେରିତ ୧୬:୧.\xt*\x*ନା ୱାଲେ ଅର୍‍ସେପାଣିକିନି ତିମତି ମା ଜିହୁଦି ତଡ଼ାନ୍‍କୁ ଲୁକିୟ, ଜେସନ୍‍ ମାରି ସୋସିପାତ୍ର ମିଙ୍ଗିଁ ନମସ୍କାର୍‌ କିଜିନାର୍‍ ।
\p
\v 22 ଇୟା ଆକୁଦି ରାସ୍‍ତିକାନ୍‍ ତର୍ତ୍ତୀୟ ପ୍ରବୁଦି ଦର୍‍ତାନ୍‍ ମିଙ୍ଗିଁ ନମସ୍କାର୍‌ କିଜିନାନ୍‍ ।
\p
\v 23 \x + \xo ୧୬:୨୩ \xo*\xt ପ୍ରେରିତ ୧୯:୨୯; ୧ କରିନ୍ତିୟ ୧:୧୪; \xt*\xt ୨ ତିମତି ୪:୨୦.\xt*\x*ନା ସେବାକିନି ଗାୟ, ଆମାୱାନି ଇଲ୍‍ତୁ ପାର୍‍ତନା କିନି ମଣ୍ତଲି ଉଣ୍ତାନାର୍‍ ମାରି ଇୟା ଗାଡ଼୍‍ତି ପେରିକାନ୍‌ ଏରାସ୍ଟ ନି ତଡ଼ାନ୍‍ କ୍ୱାର୍ତ୍ତ ବା ମିଙ୍ଗିଁ ମାଡ଼ିସ୍‍ କିଜିନାନ୍‍ । 
\v 24 ପ୍ରବୁ ଜିସୁ କ୍ରିସ୍ତଦି ଦୟା ମି ୱିଜେରିଙ୍ଗ୍‍ଁ ଆପିତ୍‌ ।
\s ପାର୍‍ତନା ନି ପ୍ରସଂସାଦି ୱାଲେ ଆକୁଦି ୱିଜ୍‌ନିକା
\p
\v 25 ରାଦୁ, ମାପୁରୁଦି ଗୌରବ୍‌ କିନାଟ୍‍ । ନାନୁ ପ୍ରଚାର୍‌ କିଜିମାନି ଜିସୁ କ୍ରିସ୍ତଦି ବିସୟ୍‍ତାନ୍‍ ସୁସମାଚାର୍ ନି ଜୁଗ୍‍ ଜୁଗ୍‍ ଆସ୍‌ସି ମାର୍‍ଗିଜିମାନି ମାଟା ସତ୍‍ ଇସାବ୍‍ତାନ୍‍ ମି ବିସ୍‍ବାସ୍‍ତିଙ୍ଗ୍‍ଁ ଆଟ୍‍ୱା ଇଡ୍‍ଦେଙ୍ଗ୍‍ଁ ଇଜି ମାପୁରୁ ଆଟ୍‌ନାନ୍‌ । 
\v 26 ଆୟା ମାର୍‍ଗିତି ମାଟାଦି ସତ୍‍ୱିଜୁ ବାବବାଦିରି ଦାର୍ମୁସାସ୍ତ୍ରଦୁ ତରାୟ୍‍ ଆତାମାନାତ୍‌ ମାରି ଆକା ଇଲେଇ ୱିଜୁଦିନ୍‍ତି ପ୍ରବୁ ମାପୁରୁଦି ମାଣାନ୍‌ ୱିଜୁ ଲୋକା ଲୋଇ ପ୍ରଚାର୍‍ ଆଜିନାତ୍‍ । ତେନି ମାଣାନ୍‌ ୱିଜେରେ ବିସ୍‍ବାସ୍‍ କିଜି ମାପୁରୁଦି ମାଟା ମାନାଦେଙ୍ଗ୍‍ଁ ଆଟ୍‍ନାର୍‍ ।
\p
\v 27 ପ୍ରବୁ ଜିସୁ କ୍ରିସ୍ତଦି ମାଣାନ୍‌ ୱିଜୁନେସ୍‍ନି ଅରେନ୍‌ ମାପୁରୁଦି ଜୁଗ୍‌ ଜୁଗ୍‍ ଗୌରବ୍‍ ଆପିନ୍‌ । ଆମେନ୍‍ ।