\id HEB - Kopo
\ide UTF-8
\h ଏବ୍ରି
\toc3 ଏବ୍ରି
\toc2 ଏବ୍ରି
\toc1 ଏବ୍ରି ଲୋକାଙ୍ଗ୍‌ ରାସ୍‌ତି ଆକୁ
\mt2 ଏବ୍ରୀମାନଙ୍କୁ ଲିଖିତ ପତ୍ର
\mt1 ଏବ୍ରି ଲୋକାଙ୍ଗ୍‌ ରାସ୍‌ତିମାନି ଆକୁ
\imt ଏବ୍ରି ଆକୁ ବିସୟ୍‌ତାନ୍‌ ଏସ ମାଟା
\ip ଏବ୍ରି ଆକୁ ୱେଡ଼ିକା ସିନି ଉନ୍‌ଡ୍ରି ଆକୁ । ପାଡ଼ିଇ ନିୟମ୍‌ ଆଇଆଇ ବାବବାଣି ୱିଜୁ ପୁରା ଆତିମାନି ବିସୟ୍‌ ଇବେନୁ ମାନାତ୍‌ । ଇକା ଉନ୍‌ଡ୍ରି ଉପଦେସ୍‌ ୱାଜା । ଇବେନୁ ପୁରା ୬୦ ଦାନ୍‌ ନାଣ୍ତ ପାଡ଼ିଇ ନିୟମ୍‌ତି ବିସୟ୍‌କୁ ତେବାତେମାନେ । ଆମାକା ଜିସୁ କ୍ରିସ୍ତ ଏଣ୍ତେସ୍‌ୱାଜା ବାବବାଣି ମାରି ଜିହୁଦି ଜାଜକରି ପାଣି ପୁରା କିତାନ୍‌ ଇବେନୁ ମାପ୍‌ ପୋଇତାମାନାପ୍‌ ।
\ip ଇୟା କାରଣତାନ୍‌ ଇକା ଜିହୁଦି କ୍ରିସ୍ଟାନ୍‌ ଲୋକାଙ୍ଗ୍‌ ସାହାସ୍‌ ସିନି ବଇ । ଏବ୍ରି ଆକୁଦୁ ତର୍‌ନାତ୍‌ ଜେ, ଜିସୁ ଏଣ୍ତେସ୍‌ ନିୟମ୍‌ ୱିସ୍‌ତାନ୍‌, ଏମେ ବାଦ୍‌ଲୁ ଜାଜକ ମାରିଡ଼େସି ଏସ୍‌କାଙ୍ଗ୍‌ ବଲି ପୁଜାସିଏନ୍‌ ମାରାନ୍‌ । ଜିସୁ କ୍ରିସ୍ତ ଆଜିନାନ୍‌ ୱିଜୁ ପାପ୍‌ତି ପୁଜାସିନିକାନ୍‌, ଇକା ଉନ୍‌ଡ୍ରେ ଦେବାନେ ୱିଜୁୱାଲେ ଉଣ୍ତିଙ୍ଗ୍‌ । ଇଲେଇତି ଦୁନିଆଦି କ୍ରିସ୍ଟାନ୍‌ ଲୋକା ଉଣ୍ତିଙ୍ଗ୍‌ ଏବ୍ରି ବଇଦୁ ସାହାସ୍‌ତିକା ତର୍‌ନାତ୍‌ । କେବଲ୍‌ କ୍ରିସ୍ତ ମାଙ୍ଗିଁ ମାପୁରୁଙ୍ଗୁଁ ଆସା କିନି ଉଣ୍ତିଙ୍ଗ୍‌ ପୁରା କିଦେଙ୍ଗ୍‌ ଆଟ୍‌ନାନ୍‌ । ମାରି ବା ୱାନିମାନୁ ଆସା କିଜି ୱେନ୍‌କା ବୁଲାନାଟ୍‌ \xt ୧୨:୨\xt* ।
\ip ଏବ୍ରି ଆକୁ ଏନ୍‌ ରାସ୍‌ତାମାନାନ୍‌ ନେସ୍‌ଏର୍‌, ମାତର୍‌ ପଣ୍ତିତ୍‌କୁ ସିନ୍ତା କିନାର୍‌, ପ୍ରେରିତ ପାଉଲ, ଲୁକ, ମାରି ବର୍ଣ୍ଣବା ଆନାମାନାର୍‌ । ଇୟାତାନି ରାସାତି ବେଡ଼ା ବା ନେସ୍‌ଏର୍‌ ମାତର୍‌ ନାଣ୍ତ ଲୋକୁ ବିସ୍‌ବାସ୍‌ କିଜିନାର୍‌ ଇକା ଜିସୁ କ୍ରିସ୍ତଦି ଜନମ୍‌ ୱେନ୍‌କା ୭୦ ବାର୍ସୁଦୁ ରାସାତାମାନାତ୍‌ । ଜିରୁସାଲାମ୍‌ ମନ୍ଦିର୍‌ ୭୦ ବାର୍ସେକ୍‌ଦୁ ନାସ୍ଟୁ ଆତାତ୍‌, ମାତର୍‌ ଇୟା ଆକୁଦି ରାସ୍‌ତିକାନ୍‌ ଇକା ନାସ୍ଟୁ ଆଇ ମାନି ୱାଜା ଇନାନ୍‌ । ଏବ୍ରି ବଇ ଆନାତ୍‌ଜେ ରମୀୟ ଗାଡ଼୍‌ତୁ ରାସାତାମାରାତ୍‌ \xt ୧୩:୨୪\xt* ମାରି ଆଇଆଇ ମଣ୍ତଲିଦୁ ସିଆୟ୍‌ଆତାମାରାତ୍‌ ।
\iot ଇୟା ଆକୁଦି ଏସ ମୁକ୍ୟ ବିସୟ୍‌
\io1 ୧. ରାସ୍‌ତିକାନ୍‌ ତର୍‌ନା ସିନାନ୍‌ ଜେ, ଜିସୁ କ୍ରିସ୍ତ ଆଜିନାନ୍‌ ମାପୁରୁଦି ବାବବାଦି ମାରି ଦୁତ୍‌କା ମାଣାନ୍‌ ବା ପେରିକାନ୍‌ । \ior ୧:୧–୪:୧୩\ior*
\io1 ୨. ରାସ୍‌ତିକାନ୍‌ ତର୍‌ନା ସିନାନ୍‌ ଜିରୁସାଲମ୍‌ତୁ ସେବା କିଜିମାନି ଜାଜକରି ମାଣୁକୁ ବା ଜିସୁ ପେରିକାନ୍‌ । \ior ୪:୧୪–୭:୨୮\ior*
\io1 ୩. ମସାଦି ମାଣାନ୍‍ ଲୋକାଙ୍ଗ୍‌ ସିଆୟ୍‍ଆତିମାନି ନିୟମ୍‍ତି ପାଡ଼୍‍ଇ ନିୟମ୍‍ତି ମାଣାନ୍‍ ଜିସୁଦି ସେବା ପାଣି ପେରିକା । \ior ୮:୧–୧୦:୩୧ \ior*
\io1 ୪. ରାସ୍‌ତିକାନ୍‌ ଜିସୁଙ୍ଗୁଁ ୱିଜୁମାନୁ ପେରିକାନ୍‌ ଇକା ବୁଜାକିଜି ଗାଦି ମାଟେଙ୍ଗ୍‌ ସିନାନ୍‌ । \ior ୧୦:୩୨–୧୩:୧୭\ior*
\io1 ୫. ରାସ୍‌ତିକାନ୍‌ ଇୟା ବଇଦୁ ସାହାସ୍‌ତି ମାଟେଙ୍ଗ୍‌ ନି ସାରାସାରି ମାଟା ସିଜି ୱିସ୍‍ତାନ୍‍ । \ior ୧୩:୧୮-୨୫\ior*
\c 1
\s ମାରିସିଦି ମାଣାନ୍‌ ମାପୁରୁସିତି କାବୁର୍‌
\p
\v 1 ପୁର୍ବେଦାନ୍ ମାପୁରୁ ଆଇ ବେଡ଼ାଦୁ ମାରି ଆଇ ଆଇ ଉପାୟତାନ୍ ବାବବାଦିରି ମାଡ଼ାନ୍ ମା ଡକ୍ରାଦାଦାରିଙ୍ଗ୍‍ କାବୁର୍ ସିତାମାର୍ହାନ୍, 
\v 2 ମାତର୍‌ ଇୟା ୱିଜିନ୍‌ ଦୁନିଆଦୁ ୱାନ୍‌ ନିଜେଦି ମାରିନ୍‌ତି ମାଡ଼ାନ୍ ମା ୱାଲେ ୱାରିଗିତାମାନାନ୍ । ଆୟା ମାରିନ୍‍ତି ମାଡ଼ାନ୍ ନେ ମାପୁରୁ ସାରାଦୁନିଆଦିଙ୍ଗ୍‌ ତିଆର୍‌କିତାନ୍‌ ମାରି ସାରାସାରିୱେନ୍‌କା ୱିଜୁ ବିସୟ୍‌ତି ଅଦିକାରି ଆନି ଉଣ୍ତିଙ୍ଗ୍ ୱାନ୍‌ ୱାନିଙ୍ଗ୍‌ ବାସେକିତାନ୍ । 
\v 3 ୱାନିମାନୁ ମାପୁରୁଦି ମହିମା ଜାୟ୍‌ କିବିସ୍‍କିତାମାନାନ୍‍ ମାରି ପୁରା ମାପୁରୁଦି ନିଜେଦି ରୁପ୍‍ୱାଜା । ମାରି ୱାନ୍‌ ନିଜେଦି ସାକ୍ତି ବାକ୍ୟ ଦାନ୍ ୱିଜୁଦେସ୍‍ତିଙ୍ଗ୍ ସାଲା କିତାମାନାନ୍ । ୱାନ୍‌ ଲୋକା ଜାତି ଉଣ୍ତିଙ୍ଗ୍‌ ପାପ୍‌ କେମା କିଜି ମୁସ୍‌କୁପୁର୍‌ ମହାମହିମା ମାପୁରୁଦି ଉଣିକିୟୁ ତରିନ୍‌ ବାସ୍‍ତାମାନାନ୍ ।
\s ମାପୁରୁଦି ମାରିନ୍ ପେରିକାନ୍‌
\p
\v 4 ୱାନ୍‌ ମୁସ୍‌କୁପୁର୍‌ତି ଦୁତ୍‍କା ବାଦ୍‍ଲୁ ଏଣ୍ତେସ୍ ପେରିକାନ୍‌, ୱାନି ଦରୁ ବା ଆୟାୱାଜା ତାମେକା ଦରୁ ବାଦ୍‍ଲୁ ନାଣ୍ତ ପେରିକା । 
\v 5 ଇରିଙ୍ଗ୍‌ ଏସାଙ୍ଗ୍‍ବା ମାପୁରୁ ଏମେ ଦୁତ୍‍କାଙ୍ଗ୍‍ଁ ଇନ୍‌ଏନ୍‌ :
\q1 “ନିନୁ ନା ମାରିନ୍,
\q2 ନେର୍‍ରାନ୍ ନାନୁ ମି ବୁବା ଆତାମାନା ।”
\m ମାପୁରୁ ବା ଇର୍ହାନ୍‌,
\q1 “ନାନୁ ୱାନି ବୁବା,
\q2 ମାରି ୱାନ୍‌ ନା ମାରିନ୍ ।”
\m
\v 6 ମାତର୍‌ ମାପୁରୁ ୱାନି ଆଗ୍‌ଡ଼ିରି ମାରିନ୍‍ତିଙ୍ଗ୍ ଇୟା ଜଗତ୍‌ତୁ ପୋକ୍‍ତି ୱାଲେ ଇକା ଇର୍ହାମାର୍ହାନ୍ :
\q1 “ମାପୁରୁଦି ଦୁତ୍‍କୁ ୱିଜୁ ୱାନି ପୁଜା କିନେ ।”
\m
\v 7 ମାତର୍‌ ମୁସ୍‌କୁପୁର୍‌ତି ଦୁତ୍‍କା ବିସୟ୍‌ତାନ୍ ମାପୁରୁ ଇୟା ମାଟା ଇର୍ହାମାନାନ୍‌;
\q1 “ମାପୁରୁ ନିଜେଦି ଦୁତ୍‍କାଙ୍ଗ୍‌ ଗାଲି ୱାଜା
\q2 ମାରି ନିଜେଦି ସେବାକିନିୱାରିଙ୍ଗ୍‌ ସିସୁଡ଼ିବୁ ୱାଜା କିନାନ୍ ।”
\m
\v 8 ୱାନି ମାରିନ୍‌ତି ବିସୟ୍‌ତାନ୍ ୱାନ୍‌ ଇର୍ହାମାର୍ହାନ୍ :
\q1 “ଏ ମାପୁରୁ, ନି ରାଜି ୱିଜୁଦିନ୍‌ ମାନିତ୍ !
\q2 ନିନୁ ନ୍ୟାୟଦଣ୍ତତାନ୍‌ ନି ଲୋକାଙ୍ଗ୍‌ ସାସନ୍ କିଜିନି ।
\q1
\v 9 ନିନୁ ନେଗିତାନିଙ୍ଗ୍‌ ଜିବନ୍‌ନୋନି ମାରି ତାଗ୍‌ଇ ତାନିଙ୍ଗ୍‌ କାଡ଼୍‍ନି ।
\q1 ଆୟାଉଣ୍ତିଙ୍ଗ୍‌ ମି ମାପୁରୁ ନିଙ୍ଗିଁ ବାସେ କିତାମାନାନ୍
\q2 ମାରି ନି ସାଙ୍ଗର୍‌ ବାଦ୍‍ଲୁ ନିଙ୍ଗିଁ ଅଦିକ୍‍ନାଣ୍ତ ମାନାଜି ୱେଡ଼ିକାଦି ନିୟୁଦାନ୍‌ ଉସୁତାମାନାନ୍‌ ।”
\m
\v 10 ୱାନ୍‌ ମାରି ବା ଇର୍ହାମାନାନ୍‌ :
\q1 “ଏ ପ୍ରବୁ, ନିନୁ ଆଗ୍‍ଡ଼ିନେ ଦୁନିଆ ତିଆର୍ କିତି,
\q2 ମାରି ନିଜେଦି କିୟୁଦାନ୍‌ ବାଦଡ଼୍‍ ତିଆର୍ କିତି ।
\q1
\v 11 ଆୟାୱିଜୁ ଅର୍‍ଲେନ୍‍ ମାରାଗ୍‌ନାତ୍‌ । ମାତର୍‌ ନିନୁ ୱିଜୁଦିନ୍ ମାନି;
\q2 ୱାର୍‌ ପାଡ଼ିଇ ଆଙ୍ଗିଁ ୱାଜା ନାସ୍ଟୁ ଆନାର୍ ।
\q1
\v 12 ଆଙ୍ଗିଁପାସିୟା ରସ୍‍ତି ୱାଜା ନିନୁ ଆୟାୱିଜୁ ରସ୍‍ନି ଇଡ୍‌ନି
\q2 ମାରି ଆଙ୍ଗିଁ ବାଦେଲେକିନି ୱାଜା ବାଦ୍‍ଲେ କିନି ।
\q1 ମାତର ନିଜେ ନିନୁ ବାଦ୍‍ଲେଆଇ
\q2 ମାରି ନିନୁ ୱିଜୁଦିନ୍‌ ତେବାନି ।”
\m
\v 13 ମାପୁରୁ ୱାନି ଏମେ ଦୁତ୍‍କାଙ୍ଗ ଏସାଙ୍ଗ୍ ଇନ୍‌ଏନ୍‌,
\q1 “ନାନୁ ନି ସାତ୍ରୁରିଙ୍ଗ୍‌ ନି କାଲ୍‌କା ଆଡ୍‍ଗି କିଏତି ସାନ୍ଦି
\q2 ନିନୁ ନା ଉଣେରି କିୟୁ ତରିନ୍‌
\q2 ବାସ୍‍ସୋମାନ୍‍ଆ ।”
\p
\v 14 ଆର୍‌ତିଙ୍ଗ୍‌ ମୁସ୍‌କୁପୁର୍‌ତି ଦୁତ୍‍କୁ ଏର୍‌ ? ୱାର୍‌ ଆଜିନାର୍ ମାପୁରୁଦି ସେବାକିନିକାର୍‍, ରକିୟା ପୋଇତିମାନି ଲୋକୁଦି ସାକା ଉଣ୍ତିଙ୍ଗ୍‌ ମାପୁରୁଦି ମାଡ଼ାନ୍ ପକାତି ଆତ୍‍ମେଙ୍ଗ୍‍ ।
\c 2
\s ପେରି ରକିୟା
\p
\v 1 ମାପ୍‌ ଏଣ୍ତେସ୍ ସତ୍‌ତାନ୍‌ ୱେର୍‌ଏ ଆଏପ୍‌, ଇୟାଉଣ୍ତିଙ୍ଗ୍‌ ମାଡ୍‌ ୱେର୍‌ଇମାନି ସତ୍‌ ମାଟାଦୁ ଆଟୁୱାଆଜି ତେବାନିକା ମାନାତ୍‌ । 
\v 2 ଇରିଙ୍ଗ୍‌ ଆଗ୍‌ଡ଼ି ମାପୁରୁ ମୁସ୍‌କୁପୁର୍‌ତି ଦୁତ୍‍କାଙ୍ଗ୍‌ ଏମେ କାବୁର୍ ସିତାମାନା, ଆକା ସତ୍‍ ଇଜି ପାର୍‍ମାଣ୍‍ ଆତାମାନାତ୍, ଆମାକାର୍ ତାନିଙ୍ଗ୍‌ ଡ଼ିସ୍‌ସି ମାନାଏତାର୍, ୱାର୍‌ ସାମାନ୍‌ ଦଣ୍ତ ପୋଇତାମାନାର୍ । 
\v 3 ଆର୍‌ତିଙ୍ଗ୍‌, ଇୟା ପେରିରକିୟାଦିଙ୍ଗ୍‌ ଡ଼ିସ୍‌ତିଙ୍ଗ୍‌, ମାଡ୍‌ ଏଣ୍ତେସ୍ ରକିୟା ପୋଇନିକା ? ଇୟା ପରିତ୍ରାଣ ନିଜେ ପ୍ରବୁ ନିଜେ ଆଗ୍‍ଡ଼ିନେ ୱେର୍‍ତାମାନାନ୍ ମାରି ୱାନିମାନୁ ୱେର୍‌ଇମାନି ଲୋକୁ ୱାନି ପେରିସତ୍‍ ମା ଲାକୁତୁ ପାର୍‌ମାଣ୍‌ କିତାମାନାର୍‍ । 
\v 4 ମାରି ବା, ମାପୁରୁ ଆଇ ଆଇ ସିନେଙ୍ଗ୍‌ ନି କାବାଆନି ପାଣି ମାରି ଏସାଙ୍ଗ୍‍ ଗଟ୍‌ନାଦାନ୍‌ ଆୟାୱିଜୁ କାବୁର୍ ସତ୍‍ ଇଜି ସାକି ସିତାମାନାନ୍‌ ମାରି ନିଜେଦି ବଦାଦାନ୍ ପବିତ୍ରଆତ୍ମାଦି ଦାନ୍‍ ୱିଜୁ ବାଟା କିତାମାନାନ୍ ।
\s ରକିୟା ସାରିଦୁ ଆଗ୍‌ଡ଼ିଅନି କ୍ରିସ୍ତ
\p
\v 5 ମାପୁରୁ ଆମା ପୁନି ଦୁନିଆ ତିଆର୍‌ କିନାନ୍‌ ମାରି ଆମା ଦୁନିଆଦି କାବୁର୍ ମାପ୍‌ ଇଜିନାପ୍‍, ୱାନି ଅଦିପତି ଇସାପ୍‍ତାନ୍ ୱାନ୍‌ ମୁସ୍‌କୁପୁର୍‌ତି ଦୁତ୍‍କାଙ୍ଗ୍‌ ଆସ୍‌କିଏନ୍‌ । 
\v 6 ଦାର୍ମୁସାସ୍ତ୍ରଦୁ ମାଟା ରାସାତାମାନାତ୍‌ :
\q1 “ଏ ମାପୁରୁ, ଲୋକୁ ଏନ୍‍ ଜେ, ନିନୁ ୱାନି ଉଣ୍ତିଙ୍ଗ୍‌ ସିନ୍ତା କିଜମାନ୍‌ଆ ମାରି ମନୁଷ୍ୟପୁତ୍ର ଏସ ତାଗ୍‍ଇକାନ୍ ଆତିଙ୍ଗ୍‌ବା ମିରୁ ୱାନି ଜାତୁନ୍‍ ଅସିନି ?
\q1
\v 7 ନିନୁ ୱାନିଙ୍ଗ୍‌ ମୁସ୍‌କୁପୁର୍‌ତି ଦୁତ୍‍କା ମାଡ଼ାନ୍‍କୁ ଅଡ଼ପ୍‍ ମାତର୍‌ ଇସ୍ରିକାକିଜି ଇଟ୍‍ତିମାନି;
\q2 ନିନୁ ୱାନିଙ୍ଗ୍‌ ଗୌରବ୍‍ ମାରି ସନ୍‍ମାନ୍‍ରୁପ୍‌ତି ଟପିଦାନ୍‌ ଆରିସ୍‌କିତିମାନି,
\q2
\v 8 ମାରି ୱିଜୁ ବିସୟ୍‌ ମୁସୁକୁ ସାସନ୍ କିଦେଙ୍ଗ୍‌ ସିତିମାନି ।”
\m ମାପୁରୁ ଲୋକାଙ୍ଗ୍‌ “ୱିଜୁ ବିଷୟ ମୁସୁକୁ ସାସନ୍ କିଦେଙ୍ଗ୍‌ ସିତାମାନାନ୍‌ ।” ଇବେଟ୍‍ତାନ୍‌ ପୁରାନେସ୍‌ନିକା ଜେ, ୱିଜୁ ବିଷୟ ୱାନି ଅଦିକାର୍‍ତୁ ତେବାତେମାନେ, ଏଣ୍ତେସ୍‌ବା ମାଡ୍‌ ନେସ୍‍ନିକା, ଲୋକୁ ଇଲେଇ ୱିଜୁ ବିଷୟ ମୁସୁକୁ ଅଦିକାର୍‌ କିଏର୍‌ । 
\v 9 ମାତର୍‌ ମାପ୍‌ ସୁଡ଼ୁଜିନାପ୍‌, ଏଣ୍ତେସ୍ ଜିସୁ ମୁସ୍‌କୁପୁର୍‌ତି ଦୁତ୍‍କା ମାଣୁକୁ ଅଡ଼ପ୍‍ ଇସ୍ରିକା କିଆୟ୍‍ଆତା ମାର୍ହାନ୍‍, ଏଣ୍ତେସ୍‍କି ମାପୁରୁଦି ଦୟାଦାନ୍‍ ୱାନ୍‌ ୱିଜେରି ଉଣ୍ତିଙ୍ଗ୍‌ ସାନାନ୍‍ । ୱାନି ଆୟା ସାତିଦଣ୍ତ୍‍ ଉଣ୍ତିଙ୍ଗ୍‌ ମାଡୁ ୱାନିଙ୍ଗ୍‌ ଇଲେଇ ଗୌରବ୍‍ ମାରି ସନ୍‍ମାନ୍‍ରୁପତି ଟପିଦାନ୍‌ ଆରାତିମାନିକା ସୁଡ଼ୁଜିନିକା । 
\v 10 ୱିଜେରିଙ୍ଗ୍‌ ତିଆର୍‌କିତିକାନ୍‌ ମାରି ରକିୟାକିନିକାନ୍‍ ମାପୁରୁ ୱାନି ନାଣ୍ତ କଡ଼ରିଙ୍ଗ୍‌ ଜିସୁଦି ଗୌରବ୍‌ଦୁ ମିସା କିନି ଉଣ୍ତିଙ୍ଗ୍‌, ସାତି ମାଡ଼ାନ୍‍କୁ ଜିସୁଙ୍ଗୁଁ ପୁରାନେଗିକା କିଜି ଟିକ୍ ପାଣି କିତାମାନାନ୍ । ଇରିଙ୍ଗ୍‍ଁ ଜିସୁନେ ପରିତ୍ରାଣଦି ସାରିଦୁ ୱାରିଙ୍ଗ୍ ସାଲାକିଜି ଅନାନ୍ ।
\p
\v 11 ୱାନ୍‌ ଲୋକାଙ୍ଗ୍‌ ପାପ୍‌ତାନ୍ ପବିତ୍ର କିନାନ୍ । ମାରି, ଆମାକାର୍‌ ଜିସୁ ମାଡ଼ାନ୍ ପବିତ୍ର ଆନାର୍‌, ୱାର୍‌ ୱିଜେରେ ଅରେନ୍‌ ବୁବାଦି କଡ଼ର୍‌ । ଆୟାଉଣ୍ତିଙ୍ଗ୍‌ ଜିସୁ ୱାରିଙ୍ଗ୍ ତଡ଼ାନ୍‍ ନି ତାଙ୍ଗିଁ ଇଜି ଇନ୍‌ଡ୍ରେଙ୍ଗ୍‌ ସେମାର୍ ଆଏନ୍‍ । 
\v 12 ୱାନ୍‌ ମାପୁରୁଙ୍ଗୁଁ ଇର୍ହାମାନାନ୍‌ :
\q1 “ନାନୁ ନି ୱିଜୁ ପାଣି ନା ତଡ଼ାନ୍‍ ନି ତାଙ୍ଗିଁକାଙ୍ଗ୍‌ ୱେର୍‍ନା ।
\q2 ନାନୁ ୱାରି ମଣ୍ତଲିଦି ନାଣ୍ତଲୋକୁ ଉଣ୍ତାତିମାନୁ ନି ପ୍ରସଂସା ପାଟା କିନା ।”
\m
\v 13 ୱାନ୍‌ ଇକାବା ୱେର୍‌ତାମାନାନ୍, “ନାନୁ ମାପୁରୁଦିମାନୁ ବିସ୍‌ବାସ୍‌ ତିଆର୍‌ କିନା” ମାରି ମାପୁରୁ ନାଙ୍ଗିଁ ଏମେ କଡ଼ରିଙ୍ଗ୍‌ ସିତାମାନାନ୍‌, ୱାର୍‌ ନା ୱାଲେ ମାନାର୍ ।
\p
\v 14 ୱାନ୍‌ ଏମେୱାରିଙ୍ଗ୍‌ କଡ଼ର୍‍ ଇଜି ମାନାତାମାନାନ୍‍, ୱାର୍‌ ନେତେର୍‍କାଣ୍ତା ମେନ୍ଦଲତି ଲୋକୁ ଆତିମାନିଙ୍ଗ୍‌ ଜିସୁ ବା ନିଜେ ୱାରି ୱାଜା ଲୋକା ମୁର୍ତି ନି ଗୁଣ୍‍ ଆସ୍‌ସି ୱାତାନ୍‌ । ୱାନ୍‌ ଇକା କିନି ମାଟା ଆଜିନାତ୍, ୱାନ୍‌ ଏଣ୍ତେସ୍ ନିଜେଦି ସାନି ମାଡ଼ାନ୍‍କୁ ସୟତାନ୍‍ତିଙ୍ଗ୍‌ ବିନାସ୍ କିନାନ୍, ଇରିଙ୍ଗ୍‍ଁ ସାନି ମୁସୁକୁ ସୟତାନ୍‍ତି ଅଦିକାର୍‌ ମାର୍‌ଆତ୍ । 
\v 15 ଇବେଟ୍‍କୁ ୱିଜୁଦିନ୍‍ ଉଣ୍ତିଙ୍ଗ୍‍ ସାନି ତିଲାନି ଦାସ୍‍ତି ଗାଟିଦୁ ମାନି ଲୋକାଙ୍ଗ୍‌ ୱାନ୍‌ ମୁକ୍‍ଡ଼ା କିତାମାନାନ୍ । 
\v 16 ଇବେଟ୍‌କୁ ଟିକ୍ ନେସ୍ତେଙ୍ଗ୍ ଆନାତ୍‌ ଜେ, ୱାନ୍‌ ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ସାହାଜ୍ୟ କିଏନ୍, ମାତର୍‌ “ୱାନ୍‌ ଅବ୍ରାହାମ୍‍ଦି କୁଟୁମ୍‌ତି ଲୋକାଙ୍ଗ୍‍ଁ ସାହାଜ୍ୟ କିନାନ୍ ।” 
\v 17 ତେନି ଅର୍ତ ଆଜିନାତ୍, ୱିଜୁ ବିସୟ୍‌ତାନ୍‌ ୱାନି ତଡ଼ାନ୍‍କା ୱାଜା ଆନିକା ୱାନି ବଦା ମାର୍ହାତ୍, ଏମେ ମାଣାନ୍‌ କି ୱାନ୍‌ ୱାରି ବିସ୍‍ବାସ୍ ମାରି ଦୟାକିନି ପେରିଜାଜକ ଆଜି ମାପୁରୁଦି ସେବା କିଦେଙ୍ଗ୍‌ ଆଟ୍‌ନାନ୍‍ ମାରି ଲୋକୁ ପାପ୍‌କେମା ପୋଇନାର୍‌ । 
\v 18 ଇରିଙ୍ଗ୍‌ ୱାନ୍‌ ନିଜେ ପରିକାଦୁ ଆର୍‌ଜି କାସ୍ଟୁବଗାତି ମାନିଙ୍ଗ୍‌, ପରିକାଦୁ ଆର୍‌ତିମାନି ଲୋକାଙ୍ଗ୍‌ ସାକା କିଦେଙ୍ଗ୍‌ ଆଟ୍‍ନାନ୍ ।
\c 3
\s ଜିସୁ ମୋସାଦିମାଣୁକୁ ପେରିକାନ୍‌
\p
\v 1 କ୍ରିସ୍ତ ବିସ୍‍ବାସି ତଡ଼ାନ୍‍କୁ ନି ତାଙ୍ଗିଁକ୍‍, ମିର୍‌ ବା ମାପୁରୁଦି ମାଡ଼ାନ୍ କୁକାୟ୍‍ଆତିମାନିଦେର୍‍ ! ମିର୍‌ ଜିସୁଦି ବିଷୟ ଚିନ୍ତା କିଦୁ, ୱାନ୍‌ ମା ଦାର୍ମୁବିସ୍‍ବାସ୍‍ତି ପେରିଜାଜକ ଆନି ଉଣ୍ତିଙ୍ଗ୍‌ ମାପୁରୁଦି ମାଡ଼ାନ୍ ପୋକାଇ ଆତାମାନାନ୍‌ । 
\v 2 ମୋସା ଏଣ୍ତେସ୍ ମାପୁରୁଦି ଇଲୁତୁ ବିସ୍‍ବାସ୍‌ତାନ୍‌ ପାଣି କିତାମାର୍ହାନ୍, ମାପୁରୁଦି ମାଣୁକୁ ଆସ୍‌କିଆୟ୍‌ଆତି ଜିସୁ ଆୟାୱାଜା ଇୟା ପାଣି ଉଣ୍ତିଙ୍ଗ୍‌ ମାପୁରୁଦି ଉଣ୍ତିଙ୍ଗ୍‌ ବିସ୍‍ବାସ୍ ମାର୍‌ର୍ହାନ୍ । 
\v 3 ଇଲୁଦି ବାଦ୍‍ଲୁ ଇଲୁକୁତିଆର୍‌କିନିୱାନିଙ୍ଗ୍‍ଁ ନାଣ୍ତ ସମ୍ମାନ୍‍ ସିନାର୍‍ । ଆୟାୱାଜା ମୋସାଦି ବାଦ୍‍ଲୁ ଜିସୁଙ୍ଗୁଁ ନାଣ୍ତ ସନ୍‍ମାନ୍‍ ପୋଇଦେଙ୍ଗ୍‍ଁ ଜଗ୍‍ମାନାତ୍ । 
\v 4 ୱିଜୁ ଇଲୁକୁ ଏନ୍‌ ସିଲେତିଙ୍ଗ୍‌ ଏନ୍‌ ଲୋକା ମାଡ଼ାନ୍ ତିଆର୍‍ ଆତେମାନେ, ମାତର୍‌ ମାପୁରୁ ୱିଜୁ ବିସୟତିଙ୍ଗ୍‌ ତିଆର୍‌କିତିକାନ୍‌ । 
\v 5 ସେବକ ୱାଜା ମୋସା ମାପୁରୁଦି ଇଲୁଦୁ ବିସ୍‍ବାସ୍‍ଦାନ୍ ପାଣି କିତାମାର୍ହାନ୍ ମାରି ଆମାୱିଜୁ ବିସୟ୍‌ ମାପୁରୁ ୱାଜିନିଦିନ୍‍ତୁ ସାକ୍ୟ ୱେର୍‍ତେଙ୍ଗ୍‌ ବଦାକିତା ମାର୍ହାନ୍, ଆୟା ବିସୟ୍‍ତାନ୍‍ ମୋସା ୱେର୍‍ତା ମାର୍ହାନ୍‍ । 
\v 6 ମାତର୍‌ କ୍ରିସ୍ତ ମାରିନ୍ ୱାଜା ମାପୁରୁଦି ଇଲୁଦୁ ଜାତୁନ୍‍ ଅତେଙ୍ଗ୍‍ ବିସ୍‍ବାସ୍‍ତିକାନ୍‍ । ମାଡୁ ଜଦି ସାହାସ୍ ଆସ୍‌ସି ଆସାଦି ବିଷୟ ପୋଇନିକା ଇଜି ମା ବିସ୍‍ବାସ୍‍ଦୁ ଡାଟ୍‍ ମାନାଟ୍‍, ଆର୍‌ତିଙ୍ଗ୍‌ ମାଡୁ ୱାନି ଇଲୁୱାଜା ଆନିକା ।
\s ମାପୁରୁଦି ଲୋକା ଉଣ୍ତିଙ୍ଗ୍‌ ରମ୍‍ନିକା
\p
\v 7 ମାରି ପବିତ୍ର ଆତ୍ମା ଏଣ୍ତେସ୍ ଇଜିନାତ୍ :
\q1 “ନେରୁ ଜଦି ମିର୍‌ ମାପୁରୁଦି ବାକ୍ୟ ୱେନ୍‌ଡ୍ରୁ,
\q2
\v 8 ଆର୍‌ତିଙ୍ଗ୍‌ ମି ପୁର୍ବେଦିଡକ୍‍ରାଦାଦାରି ୱାଜା ଜିବନ୍‌ ଆଟ୍‍ୱା କିମାଟ୍ ।
\q2 ମରୁବୁମିଦୁ ୱାର୍‌ ଆୟା ନାଣ୍ତିଙ୍ଗ୍ ମାପୁରୁଙ୍ଗୁଁ ପରିକା କିଜି
\q2 ୱାନି ଉଣ୍ତିଙ୍ଗ୍‌ ବିରୁଦ୍‍ କିତାମାର୍ହାର୍‍ ।
\q1
\v 9 ମାପୁରୁ ଇନାନ୍‌, ଆବେନ୍‌ ୱାର୍‌ ନା ସାକ୍ତି ନି ସାସ୍‌ ପରିକା କିତାର୍,
\q2 ମାରିବା ଚାଲିସ୍ ବାର୍ସେକ୍ ସାନ୍ଦି ନାନୁ ଏମେ ୱିଜୁ ପାଣି କିତାମାର୍ହା, ଆକା ୱାର୍‌ ସୁଡୁତାମାର୍ହାର୍ ।
\q1
\v 10 ଆଦେଙ୍ଗ୍‌ ନାନୁ ୱାରି ଉଣ୍ତିଙ୍ଗ୍‌ ରିସାଆଜି ଇର୍ହା,
\q2 ‘ୱାର୍‌ ୱିଜୁଦିନ୍ ଅବିସ୍‍ବାସ୍‍ତିକାର୍‍
\q2 ମାରି ନା ମାଟା ମାନାଦେଙ୍ଗ୍‍ଁ ବଦା କିଏର୍ ।’
\q1
\v 11 ନାନୁ ରିସାଦାନ୍ ପାର୍‍ମାଣ୍‍ କିତା,
\q2 ନାନୁ ଏମେ ରାଜିଦୁ ୱାରିଙ୍ଗ୍ ରମ୍‍ଦେଙ୍ଗ୍‍ ସିତାମାନ୍ଦି, ଆୟା ଦେସ୍‌ତୁ ୱାର୍‌ ଏସାଙ୍ଗ୍‍ବା ସନ୍‌ଡ୍ରେଙ୍ଗ୍ ଆଟ୍‍ଏର୍‍ !”
\p
\v 12 ଏ ନା ବିସ୍‍ବାସ୍‍ତି ତଡ଼ାନ୍‍କୁ ନି ତାଙ୍ଗିଁକ୍‍, ଜାଗାର୍‌ତା, ମି ଲୋଇରାନ୍‌ ଆମାୱାନି ଜିବନ୍‌ ଏଣ୍ତେସ୍ ପାପ୍‌ ମାରି ଅବିସ୍‍ବାସ୍‌ତୁ ପୁରା ଆଜି ଜିବନ୍‌ମାନି ମାପୁରୁଦି ଉଣ୍ତିଙ୍ଗ୍‌ ୱେର୍‌ଏ ଆମାଟ୍‌ । 
\v 13 ମି ମାଡ଼ାନ୍‍କୁ ଏନ୍‍ ଏଣ୍ତେସ୍ ପାପ୍‌ଦାନ୍ ବେମ୍‌ରି ଆଜି ଆଟୁୱା ଜିବନ୍‌ କିମାଟ୍, ଇୟାଉଣ୍ତିଙ୍ଗ୍‌ ନିଜେନିଜେଦିଙ୍ଗ୍‌ ୱିଜୁଦିନ୍ ୱେଡ଼ିକା କିଦୁ । ମାରି ଦାର୍ମୁସାସ୍ତ୍ରଦୁ ରାସାତିମାନି “ନେରୁ” ବଲୁ ଜେ ଆମାସାନ୍ଦି ମା ଉଣ୍ତିଙ୍ଗ୍‌ ଦରକାର୍‍, ଆୟା ସାନ୍ଦି ଆକା କିଜିମାଡ୍ରୁ । 
\v 14 ଜଦି ମାଡୁ ସାରାସାରି ସାନ୍ଦି ମା ଆଗ୍‌ଡ଼ିରି ବିସ୍‍ବାସ୍‍ତୁ ଡାଟ୍‍ ମାନାଟ୍, ଆର୍‌ତିଙ୍ଗ୍‌ ମାଡୁ ୱିଜେରେ କ୍ରିସ୍ତଦିମାନୁ ମିସାଦେଙ୍ଗ୍ ଆଟ୍‍ନିକା ।
\p
\v 15 ଦାର୍ମୁସାସ୍ତ୍ରଦୁ ରାସାତାମାନାତ୍‌ :
\q1 “ନେରୁ ଜଦି ମିରୁ ମାପୁରୁଦି ବାକ୍ୟ ୱେନିଦେର୍‌,
\q2 ଆର୍‌ତିଙ୍ଗ୍‌ ମି ଡକ୍ରାଦାଦାର୍‍ ଜିବନ୍‌ ଆଟୁୱା କିଜି
\q2 ମାପୁରୁଦି ଉଣ୍ତିଙ୍ଗ୍‌ ଏଣ୍ତେସ୍ ବିରୁଦ୍‍ କିତାମାର୍ହାର୍, ଆୟାୱାଜା କିମାଟ୍ ।”
\p
\v 16 ମାପୁରୁଦି ବାକ୍ୟ ୱେନ୍‌ଜି ବା ଏମେକାର୍ ୱାନି ଉଣ୍ତିଙ୍ଗ୍‌ ବିରୁଦ୍‍ କିତାମାର୍ହାର୍‍, ୱାର୍‌ ଏର୍‌ ? ଏମେୱାରିଙ୍ଗ୍‌ ମୋସା ମିସର୍‍ ଦେସ୍‍ଦାନ୍ ସପ୍‍ତା ତାତା ମାର୍ହାନ୍, ଆୟାକାର୍‌ ଆଏର୍‌ନୋ । 
\v 17 ଚାଲିସ୍ ବାର୍ସେକ୍ ସାନ୍ଦି ଏମେ ମାପୁରୁଙ୍ଗୁଁ ରିସା କିତାମାର୍ହାର୍, ୱାର୍‌ ଏର୍‌ ? ଏମେକାର୍ ପାପ୍‌ ପାଣି କିଜି ମରୁବୁମିଦୁ ସାତା ମାର୍ହାର୍, ଆୟାକାର୍‌ । 
\v 18 ମାପୁରୁ ନାସ୍ତିୱାଲେ ପାର୍‍ମାଣ୍‍ କିଜି ଇର୍ହାମାର୍ହାନ୍, ୱାର୍‌ ୱାନି ରମ୍‍ନିମାନୁ ଏସାଙ୍ଗ୍‍ ବା ସନ୍‌ଡ୍ରେଙ୍ଗ୍‌ ଆଟ୍‍ଏର୍‍, ନାସ୍ତିୱାଲେ ୱାନ୍‌ ଏମେୱାରି ବିସୟତାନ୍ ଆକା ଇର୍ହାମାର୍ହାନ୍ ? ଏମେକାର୍ ବିରୁଦ୍‍ କିତାମାର୍ହାର୍‍ ୱାରି ବିସୟ୍‌ତାନ୍ ୱାନ୍‌ ଆକା ଇର୍ହାମାର୍ହାନ୍ । 
\v 19 ମାରି ମାଡୁ ସୁଡ଼ୁଜିନିକା ଜେ, ୱାରି ଅବିସ୍‍ବାସ୍‌ତି ଉଣ୍ତିଙ୍ଗ୍‌ ୱାର୍‌ ଆୟା ପାର୍‌ମାଣ୍‌ତି କିଣାନ୍‌ ଦେସ୍‌ତୁ ସନ୍‌ଡ୍ରେଙ୍ଗ୍‍ ଆଟ୍‍ଏତାର୍‍ ।
\c 4
\p
\v 1 ମାଙ୍ଗିଁ ଏମେ କିଣାନ୍‌ ଦେସ୍‌ ସିନା ଇଜି ମାପୁରୁ ଇର୍ହାମାର୍ହାନ୍‍, ଆକା ମାଡୁ ପୋଇଦେଙ୍ଗ୍ ଆଟ୍‍ନିକା ଇଜି ମାପୁରୁ ପାର୍‍ମାଣ୍‍ କିତାମାନାନ୍ । ଆୟା ପାର୍‍ମାଣ୍‍ତି ରମ୍‍ନିମାଣାନ୍‍ ଏନ୍‌ ଏଣ୍ତେସ୍ ତେବାମାକିନ୍‍, ଆୟା ଉଣ୍ତିଙ୍ଗ୍‌ ଜାଗାର୍‌ତା ତେବାଦୁ । 
\v 2 ଇରିଙ୍ଗ୍‌ ୱାରିୱାଜା ମାପ୍‌ ବା ସୁସମାଚାର୍‌ ୱେରିମାନିକା । ୱାର୍‌ ଆକା ୱେନ୍‌ଜି ବା ବିସ୍‍ବାସ୍‍ଦୁ ମାନାଏତାର୍ । ଆଦେଙ୍ଗ୍‍ଁ ୱାରି ଉଣ୍ତିଙ୍ଗ୍‌ ଆକା ନେଗିକା ଆଏତାତ୍ । 
\v 3 ମାତର୍‌ ମା ଲୋଇରାନ୍‌ ଏମେକାର୍ ବିସ୍‌ବାସ୍‌ କିନାର୍, ୱାର୍‌ ନେ ମାପୁରୁଦି ପାର୍‍ମାଣ୍‍ତି ରମ୍‍ନିକା ପୋଇନାର୍, ଇରିଙ୍ଗ୍‌ ମାପୁରୁ ଇର୍ହାମାନାନ୍‌,
\q1 ନାନୁ ରିସାଆଜି ପାର୍‍ମାଣ୍‍ କିତା :
\q2 ୱାର୍‌ ନା ରମ୍‍ନିମାନୁ ସନ୍‌ଡ୍ରେଙ୍ଗ୍‌ ଆଟ୍‌ଏର୍‍ ।
\m ମାରିବା ଇୟା ରମ୍‌ନିକା ଦୁନିଆଦି ତିଆର୍‌ ଆନି ବେଡ଼ାଦାନ୍‍ ତିଆର୍‌ଆତା ମାନାତ୍‌ । 
\v 4 ଦାର୍ମୁସାସ୍ତ୍ରଦି ଏମେ ଉନ୍‌ଡ୍ରି ବାଡିଦୁ “ସାତ୍‌ ଦିନ୍” ବିସୟତାନ୍ ଇୟାୱାଜା ରାସାତାମାନାତ୍‌, “ମାପୁରୁ ୱାନି ୱିଜୁ ପାଣି ପୁରାକିଜି ସାତ୍‍ ଦିନ୍‍ତୁ ରମିତାନ୍ ।” 
\v 5 ମାରି ଇୟା ବିସୟ୍‌ତାନ୍‌ ଆଇମାନୁ ରାସାତାମାନାତ୍‌, ମାପୁରୁ ଇର୍ହାନ୍‌, “ୱାର୍‌ ନା ରମ୍‍ନିମାନୁ ଏସାଙ୍ଗ୍‌ ବା ସନ୍‌ଡ୍ରେଙ୍ଗ୍‌ ଆଟ୍‍ଏର୍‍ ।” 
\v 6 ଏମେକାର୍ ଆଗ୍‍ଡ଼ିନେ ସୁସମାଚାର୍‌ ୱେର୍‌ଆମାର୍ହାର୍, ନିଜେଦି ଅବିସ୍‍ବାସ୍ ଉଣ୍ତିଙ୍ଗ୍‌ ଆୟା ରମ୍‍ନିକା ପୟ୍‌ଦେଙ୍ଗ୍‌ ଆଟ୍‌ଏତା ମାର୍ହାର୍ । ଇଲେଇ, ଆଇକାର୍‌ ଆୟା ରମ୍‍ନିକା ପୟ୍‌ଦେଙ୍ଗ୍‌ ସୁଜୋଗ୍‌ ପୋଇତାମାନାର୍‌; 
\v 7 ଇରିଙ୍ଗ୍‌ ୱାରି ଉଣ୍ତିଙ୍ଗ୍‌ ମାପୁରୁ ଆଇ ଉନ୍‌ଡ୍ରି ଦିନ୍ ତିଆର୍‌ କିତାମାନାନ୍ ମାରି ଆକା ଆଜିନାତ୍, “ନେରୁ ।” ନେଗି ବେଡ଼ାଦୁ ନାଣ୍ତ ବାର୍ସେକ୍ ୱେନ୍‌କା ମାପୁରୁ ରାଜା ଦାଉଦଦି ମାଡ଼ାନ୍ ଇୟା ବିସୟ୍‌ ରାସାତିମାନି ସାସ୍ତ୍ର ବାକ୍ୟଦୁ ୱେର୍‌ତା ମାର୍ହାନ୍ :
\q1 “ନେରୁ ଜଦି ମିର୍‌ ମାପୁରୁଦି ବାକ୍ୟ ୱେନିଦେର୍‌,
\q2 ଆର୍‌ତିଙ୍ଗ୍‌ ଜିବନ୍‌ ଆଟୁୱା କିମାଟ୍ ।”
\p
\v 8 ଜଦି ଯିହୋସୁୟ ଲୋକାଙ୍ଗ୍‌ ମାପୁରୁଦି ପାର୍‍ମାଣ୍‍ତି ରମ୍‍ନିକା ସିଦେଙ୍ଗ୍‌ ଆଟ୍‍ତାନ୍‍ମାନ୍ଦି, ଆର୍‌ତିଙ୍ଗ୍‌ ମାପୁରୁ ୱେନ୍‌କା ଆଇ ମାରିଉନ୍‌ଡ୍ରି ରମ୍‌ନିଦିନ୍ ମାଟା ରାସ୍‌ଏତାନ୍‍ମାନ୍ଦି । 
\v 9 ମାରି ଇକା ସତ୍‍ ଜେ, ସାତ୍‍ଦିନ୍‍ତୁ ମାପୁରୁ ରମ୍‍ନି ୱାଜା, ୱାନି ଲୋକା ଉଣ୍ତିଙ୍ଗ୍‌ ଉଣ୍ତ୍ରି ରମ୍‍ନି ୱେଡ଼ା ଇଡାୟ୍‍ଆତାମାନାତ୍‍ । 
\v 10 ମାପୁରୁ ଏଣ୍ତେସ୍ ନିଜେଦି ପାଣିଦାନ୍‌ ରମିତାନ୍, ଏନ୍‌ ମାପୁରୁଦି ପାର୍‍ମାଣ୍‍ତି ରମ୍‍ନିମାନୁ ଡ଼ୁଗିତା ମାନାନାନ୍‍, ୱାନ୍‌ ବା ନିଜେଦି ପାଣିଦି ୱାନ୍‍ନ୍ଦିମାଣୁକୁ ରମ୍‍ନାନ୍ । 
\v 11 ମା ଲୋଇରାନ୍‌ ଏନ୍‌ ଏଣ୍ତେସ୍ ନିଜେଦି ଅବିସ୍‍ବାସ୍ ଉଣ୍ତିଙ୍ଗ୍‌ ଆୟା ଲୋକା ୱାଜା ଇୟା ରମ୍‍ନିମାଣାନ୍‍ ତେବାଏନ୍‍, ଇୟାଉଣ୍ତିଙ୍ଗ୍‌ ଆଟ୍‌ନି ସାନ୍ଦି ସେସ୍ଟା କିନାଟ୍‍ ।
\p
\v 12 ମାପୁରୁଦି ବାକ୍ୟ ଜିବନ୍‌ ମାରି ସାକ୍ତିମାନିକା । ଆକା ରିୟାଙ୍ଗାଁଦି ଦାରା କାଣ୍ତା ବାଦ୍‍ଲୁ ନାଣ୍ତ ଦାରା; ଆମାମାନୁ ଆତ୍ମା ନି ଜିବନ୍‌ ମାରି ସିରେଙ୍ଗ୍‍ଁ ନି ପେଡେନ୍‌ରସ୍‌ ଲୋଇ, ମାରି ଲୋକା ଜିବନ୍‍ତି ଆସା ମାରି ଚିନ୍ତାଦି ବିଚାର୍ କିନିକା । 
\v 13 ମାପୁରୁଦି ମାଡ଼ାନ୍ ଇନି ବିସୟ ମାର୍‍ଗେଏତ୍‍; ୱିଜୁ ତିଆର୍‍ଆତିମାନୁ ୱିଜୁ ବିସୟ ୱାନି ୱିଜୁସୁଡ଼ୁଜିନି କାଣୁକୁ ଆଗ୍‌ଡ଼ି କେର୍‍ପାୟ୍‍ ଆଏତ୍‍ ମାରି ରେଆତାମାନାତ୍‍ । ଆୟା ମାପୁରୁଦି ଆଗ୍‍ଡ଼ି ମାଙ୍ଗିଁ ଇସାବ୍‌ ସିଦେଙ୍ଗ୍‌ ପୋଡ଼ାନାତ୍ ।
\s ୱିଜେରିଙ୍ଗ୍‌ ପେରିଜାଜକ ଜିସୁ
\p
\v 14 ଆଦେଙ୍ଗ୍‍ଁ ମାଡୁ ଏମେ ଦାର୍ମୁବିସ୍‍ବାସ୍‍ତିଙ୍ଗ୍‍ ମାନାଜିନିକା, ଆକା ଆଟ୍‍ୱାଦାନ୍‍ ଆସ୍‌ସି ଇଡ୍‍ଦେଙ୍ଗ୍‌ ଆନାତ୍‌; ଇରିଙ୍ଗ୍‍ଁ ମା ୱିଜେରିଙ୍ଗ୍‌ ପେରିଯାଜକ, ମାପୁରୁଦି ମାରିନ୍ ଜିସୁ, ମାପୁରୁଦି ଲାକ୍‍ତୁ ସର୍ହାମାନାନ୍‍ । 
\v 15 ଏନ୍‌ ମା ଦୋସ୍‌ ଦୁର୍ବଲ୍ ଚିନ୍ତା କିଦେଙ୍ଗ୍ ଆଟ୍‍ଏର୍‍, ଆୟାୱାଜା ପେରିଯାଜକ ୱାନ୍‌ ଆଏନ୍‍ । ମାତର୍‌ ମା ପେରିଜାଜକ, ମା ୱାଜା ୱିଜୁଦି ପରିକାଦୁ ଆର୍‌ତାମାର୍ହାନ୍‍, ମାତର୍‌ ୱାନ୍‌ ପାପ୍‌କିଏଣ୍‌ଗା ତେବାତାନ୍‍; 
\v 16 ଆଦେଙ୍ଗ୍‍ଁ ମାପ୍‌ ସାସ୍‌ତାନ୍‌ ମାପୁରୁଦି ଦୟା ରାଜାଗାଦି ଲାକ୍‌ତୁ ସନ୍‍ଡ୍ରେଙ୍ଗ୍ ଆଟ୍‌ନାପ୍‌ । ଆବେନ୍‌ ମା ଟିକ୍‌ ବେଡ଼ାଦୁ ମା ନେଗି ଉଣ୍ତିଙ୍ଗ୍‌ ଦୟା ନି ଦୟା ପୟ୍‌ନାପ୍‌ ।
\c 5
\p
\v 1 ୱିଜେରେ ପେରିଯାଜକ ନିଜେଜାତିଦି ଲୋକା ଲୋଇରାନ୍‌ ବାସେଆଜି ମାରି ନିଯୁକ୍ତ ଆନାର୍ । ୱାନ୍‌ ୱାରି ତରିଟାନ୍‌ ପାପ୍‌ କେମା ଉଣ୍ତିଙ୍ଗ୍‌ ବଲି ନି ପୁଜା ସିଜି ମାପୁରୁଙ୍ଗୁଁ ସେବା କିନାର୍ । 
\v 2 ୱାନ୍‌ ନିଜେ ଆଇଆଇ ଜାତିଦି ଦୋସ୍‍ ଦୁର୍ବଲତୁ ପୁରାଆଜିମାନିଙ୍ଗ୍ ଦୋସ୍‍ କିଜିମାନି ବୁଦିସିଲି ଲୋକା ଉଣ୍ତିଙ୍ଗ୍‌ ୱାନ୍‌ କାର୍ମୁ ସୁଣାନ୍‍ । 
\v 3 ମାରି, କେବଲ ଜେ ଆଇୱାରି ପାପ୍ ଉଣ୍ତିଙ୍ଗ୍‌ ୱାନିଙ୍ଗ୍‌ ପୁଜା ସିଦେଙ୍ଗ୍‌ ପୋଡ଼ାନାତ୍, ଆକା ସିଲେ, ମାତର୍‌ ୱାନି ନିଜେଦି ପାପ୍‌ ଉଣ୍ତିଙ୍ଗ୍‌ ବା ୱାନିଙ୍ଗ୍‌ ପୁଜା ସିଦେଙ୍ଗ୍‌ ପୋଡ଼ାନାତ୍ । 
\v 4 ଏନ୍‍ ନିଜେ ନିଜେଦିଙ୍ଗ୍‌ ପେରିଜାଜକଦି ସମ୍ମାନ୍‍ ପଦ୍‌ତୁ ବାସେ ଆଦେଙ୍ଗ୍‌ ଆଟ୍ଏନ୍‍ । ହାରୋଣଦି ୱାଜା ଜେ କେବଲ ମାପୁରୁଦି ମାଡ଼ାନ୍ ବାସେଆତାମାର୍ହାନ୍‍, ୱାନ୍‌ ପେରିଜାଜକ ପଦ୍‌ ପୋଇନାନ୍‌ ।
\p
\v 5 ଆୟାୱାଜା ପେରିଜାଜକ ପଦ୍‌ଦୁ ସନ୍‌ମାନ୍‌ ପୟ୍‌ଦେଙ୍ଗ୍‌ କ୍ରିସ୍ତ ନିଜେଦିଙ୍ଗ୍‌ ଆସ୍‌କିଆଏନ୍‌ ମାରାନ୍ । ମାରି ମାପୁରୁ ୱାନିଙ୍ଗ୍‌ ଆସ୍‌କିଜି ଇର୍ହାମାର୍ହାନ୍‌,
\q1 “ନିନୁ ନା ମାରିନ୍,
\q2 ନେରୁ ନାନୁ ମି ବୁବା ଆତା ।”
\m
\v 6 ଆଇ ବାଡିଦୁ ୱାନ୍‌ ଇକାବା ଇର୍ହାମାନାନ୍‌,
\q1 “ନିନୁ ଜାଜକ ପଦ୍‌ଦୁ ମଲ୍‍କିସେଦକଦି ଉତ୍ତରାଦିକାରି ୱାଜା
\q2 ୱିଜୁଦିନ୍‌ତି ଉଣ୍ତିଙ୍ଗ୍‌ ଜାଜକ ତେବାନି ।” \fig ପେରିଜାଜକ ଆଙ୍ଗିଁ ଆରାତିକା ନି ଦୁପୁଣି ଆସ୍‌ତିମାନି ପଟ୍‌ |alt="High priest with his priestly clothes and censer" src="hk00267c.tif" size="col" copy="Horace Knowles ©" ref="୫:୫"\fig*
\p
\v 7 \x + \xo ୫:୭ \xo*\xt ମାତିଉ ୨୬:୩୬-୪୬; ମାର୍କ ୧୪:୩୨-୪୨; ଲୁକ ୨୨:୩୯-୪୬.\xt*\x*ଆମା ମାପୁରୁ ୱାନି ସାନିମାଣୁକୁ ରକିୟା କିଦେଙ୍ଗ୍‌ ଆଟ୍‍ନାନ୍‍, ୱାନି ଲାକୁତୁ ମାପୁରୁ ଇୟା ଜିବନ୍‍ତୁ ଆଡ଼୍‌ବାଜି କାଣେରୁଙ୍ଗୁଁ ୱାକ୍‍ସି ବାତିଙ୍ଗ୍‍ମାଲ୍‍ଜି ପାର୍‍ତନା କିତାମାର୍ହାନ୍ । ୱାନ୍‌ ସାନ୍ତି ନି ଦାର୍ମୁ ଆତିମାନିଙ୍ଗ୍‌, ମାପୁରୁ ୱାନି ପାର୍‍ତନା ୱେର୍ହାନ୍ । 
\v 8 ଜଦିବା ୱାନ୍‌ ମାପୁରୁଦି ମାରିନ୍ ମାର୍ହାନ୍, ୱାନ୍‌ ଦୁଃକ୍‌ ବୋଗଦି ମାଡ଼ାନ୍ ମାନାଦେଙ୍ଗ୍ ଅଜାତାନ୍ । 
\v 9 ଇୟାୱାଜା ମାପୁରୁ ୱାନିଙ୍ଗ୍‌ ଅରେନ୍‌ ନେଗି ପେରି ଜାଜକ ଇଜି ଜଗ୍‌ ଆସ୍‌କିତାନ୍‍, ୱାନ୍‌ ୱାନି ମାଟାମାନାନି ଲୋକା ଉଣ୍ତିଙ୍ଗ୍‌ ୱିଜୁଦିନ୍‍ତି ରକିୟାଦି ୱେଡ଼ିକା ଆତାନ୍‍ । 
\v 10 ମାରି ୱାନ୍‌ ମଲ୍‍କିସେଦକଦି ଉତ୍ତରାଦିକାରି ୱାଜା ପେରିଜାଜକ ଆତାନ୍‍ ଇଜି ମାପୁରୁ ୱେର୍‍ତାନ୍‍ ।
\s ବିସ୍‍ବାସ୍‍ ଡ଼ିସ୍‍ନି ବିସୟ୍‍ତାନ୍‍ ଜାଗାର୍‍ତା ମାଟା
\p
\v 11 ଇୟା ବିସୟତାନ୍ ମା ନାଣ୍ତ ମାଟେଙ୍ଗ୍‌ ମିଙ୍ଗିଁ ୱେର୍‌ତେଙ୍ଗ୍‌ ବଦା କିଜିନାପ୍‌ । ମାତର୍‌ ମି ବୁଜାନି ସାକ୍ତି ଉଣା । ଆଦେଙ୍ଗ୍‌ ମିଙ୍ଗିଁ ବୁଜାକିନିକା ବେସିକାସ୍ଟୁ । ଇରିଙ୍ଗ୍‌ ମିର୍‌ ଆତ୍ମିକ ଜିବନ୍‌ତୁ ୱେନ୍‌ଡ୍ରେଙ୍ଗ୍‌ ସିତିଡ଼ି । 
\v 12 \x + \xo ୫:୧୨ \xo*\xt ୧ କରିନ୍ତିୟ ୩:୨.\xt*\x*ମିର୍‌ ଆଇୱାରିଙ୍ଗ୍‌ ସିକିୟା ସିନି ବେଡ଼ା ଆତାତ୍‍ନି, ଆତିଙ୍ଗ୍ ଇଲେ ବା ମାପୁରୁଦି ବାକ୍ୟଦି ପାର୍‍ତୁମ୍‍ ବିସୟୱିଜୁ ମିଙ୍ଗିଁ ସିକ୍‌ୟା ସିଦେଙ୍ଗ୍‌ ଗୁରୁ ଦର୍‌କାର୍‌ ଆଜିନାତ୍ । ମିର୍‌ ଆଟୁୱା କାଦି ଉଣି ବାଦ୍‍ଲୁ ଇୟାସାନ୍ଦି ପାଲୁ ଉଣିଜିନିଦେର୍‌ । 
\v 13 ଏନ୍‌ ୱାର୍‌ଇ ପାଲୁ ଉଣାନ୍‌, ୱାନ୍‌ ଇସ୍ରି କୋଡ଼ଦି ଅବସ୍ଥାଦାନ୍‌ ମାନାନ୍‌ । ନେଗି ତାଗ୍‍ଇ ବିସୟ୍‌ତାନ୍‌ ୱାନି ବୁଦି ଆଏଦେ । 
\v 14 ଆଇ ତରିଟାନ୍‍ ଆଟ୍‍ୱା କାଦି ପେରିବୟସ୍‌ତି ଲୋକା ଉଣ୍ତିଙ୍ଗ୍‌; ୱାର୍‌ ଜିବନ୍‌ତି ଆଇଆଇ ବୁଦିଦାନ୍ ନେଗିକା ନି ତାଗ୍‍ଇ ବିସୟ୍‌ତାନ୍‌ ନେସ୍‍ନାର୍‍ ।
\c 6
\p
\v 1 ମାରି ମାଡୁ ଏଣ୍ତେସ୍‌କି କ୍ରିସ୍ତଦାର୍ମୁଦି ପାର୍‍ତୁମ୍‍ ବିସୟ୍‌କୁୱିଜୁ ଡ଼ିସ୍‍ସି ସତ୍‌ତି ମାଟେଙ୍ଗ୍‍ୱିଜୁ ଅଜାଦେଙ୍ଗ୍‌ ଆଗ୍‍ଡ଼ି ସନିକା ମାନାତ୍ । ମାଡୁ ଦାର୍ମୁବିସ୍‍ବାସ୍‍ତି ପାର୍‍ତୁମ୍‍ ବିସୟ୍‌କୁୱିଜୁ ଆତାତ୍‍, ତାଗ୍‌ଇ ପାଣିଦାନ୍‌ ତେବାଜି ମାପୁରୁଦିମାନୁ ବିସ୍‍ବାସ୍ କିନାଟ୍‌ । 
\v 2 ଡୁବନ୍‌ ଅନି ବିସୟ୍‌ତାନ୍‌ ସିକ୍‌ୟା, କିୟୁ ମୁସ୍‌କୁ ପେର୍‌ନିକା, ପେରି ବିଚାର୍‍, ସାତିକାର୍‌ ମାରିଡ଼େସିନିଙ୍ଗିଁକା ମାରି ଏସ୍‌କାଙ୍ଗ୍‌ୱିଜିଇ ଦଣ୍ତ ୱିଜୁ ମାଟେଙ୍ଗାଁ ନିୟମ ମାରିଡ଼େସି ତିଆର୍‍ କିଦେଙ୍ଗ୍‌ ଦରକାର୍‍ସିଲେ । 
\v 3 ମାଙ୍ଗିଁ ଇଲେଇ ଆଗ୍‌ଡ଼ି ସନ୍‌ଡ୍ରେଙ୍ଗ୍ ଆନାତ୍‌ । ମାପୁରୁଦି ମୁସୁକୁ ଆସା ଇଡ୍‍ଜି ଇକାନେ ମାଡୁ କିନାଟ୍ ।
\p
\v 4 ଏମେକାର୍ ବିସ୍‍ବାସ୍ ଆରାକିତାମାନାର୍, ୱାର୍‌ ଏତ୍‌କିଜି ଡ଼େସି ୱାଦେଙ୍ଗ୍‌ ଆଟ୍‍ନାର୍ ନୋ ? ୱାର୍‌ ଅର୍‍ଲେନ୍‍ ମାପୁରୁଦି ଜାୟ୍‍ତୁ ବାସାଜିମାର୍ହାର୍, ମୁସ୍‌କୁପୁର୍‌ତି ଦାନତି ସାୱି ପୋୟ୍‌ଜି, ପବିତ୍ରଆତ୍ମାଦିଙ୍ଗ୍‌ ପୋଇତା ମାର୍ହାର୍‍, 
\v 5 ୱାର୍‌ ମାପୁରୁଦି ନେଗି ବାକ୍ୟଦିଙ୍ଗ୍‍ ପୟ୍‍ତା ମାର୍ହାର୍‍ ମାରି ୱାଜିନି ଜୁଗ୍‍ତି ସାକ୍ତି ଏତ୍‌ କିତାମାର୍ହାର୍‍ । 
\v 6 ମାରିବା ୱାର୍‌ ବିସ୍‍ବାସ୍ ଆରାକିତାମାନାର୍ । ଆଦେଙ୍ଗ୍‍ଁ ମାରିଡ଼େସି ଏତ୍‌କିନି ଉଣ୍ତିଙ୍ଗ୍ ୱାରିଙ୍ଗ୍ ଡ଼େସି ୱେର୍‍ତେଙ୍ଗ୍ ଆଟ୍‌ଇକା, ଇରିଙ୍ଗ୍‌ ୱାର୍‌ ମାପୁରୁଦି ମାରିନ୍‍ତିଙ୍ଗ୍ ମାରିଡ଼େସି କ୍ରୁସକାଟ୍‌ଦୁ ଡାକ୍‍ସି ୱିଜେରି ଲୋକା ଆଗ୍‍ଡ଼ି ସେମାର୍‍ କିଜିନାର୍ ।
\p
\v 7 ଇରିଙ୍ଗ୍‌ ଆମା ବୁମି ନିଜେଦି ମୁସ୍‌କୁ ଜାରିଦିଙ୍ଗ୍‌ଜାରି ମୁଜିତି ପିରୁଏରୁ ଉଣାତ୍‌, ମାରି ଆମାୱାରି ଉଣ୍ତିଙ୍ଗ୍‌ ଆକା ପାସି କିଆୟ୍‌ଆନାତ୍‌, ୱାରି ନେଗି ପାସି ସିନାତ୍‌, ଆୟା ଭୁମିଦିଙ୍ଗ୍‌ ମାପୁରୁ ଆର୍ସିବାଦ୍‌ କିନାନ୍ । 
\v 8 ମାତର୍‌ ଆୟା ବୁମିଦୁ ଜଦି ସାମ୍‌ମାରାନ୍ ମାରି ଲାଟା ନେରିସ୍‌ କିନାତ୍‌, ଆର୍‌ତିଙ୍ଗ୍‌ ଆୟାତାନି ଇନି ପାଣି ତେବାଏତ୍‍ । ଆକା ମାପୁରୁଦି ଅବିସାପ୍‍ତିକା ଆନାତ୍‍ ମାରି ସିସୁଦୁ ନାସ୍ଟୁ ଆନାତ୍‍ । 
\v 9 ମାତର୍‌ ଏ ଲାଡ୍‍ତିଲୋକୁ, ମାପ୍‌ ଜଦି ଇୟାୱାଜା ମାଟା ୱେର୍‌ସିନା, ମାରିବା ମି ଅବସ୍ଥା ଜେ ଆୟାତାନିମାଣୁକୁ ନେଗିକା ମାରି ପରିତ୍ରାଣଦି ୱାଲେ ମିସାତାମାନାତ୍‌, ଇକା ମାପ୍‌ ଆଟ୍‌ୱାଦାନ୍‌ ବିସ୍‌ବାସ୍‌ କିଜିନାପ୍‌ । 
\v 10 ମାପୁରୁ ଅନ୍ୟାୟ କିଏନ୍ । ମି ପାଣି ସେବା, ବିସେସ୍‌ କିଜି ଆଇ ବିସ୍‌ବାସ୍‌ରିଙ୍ଗ୍‌ ସାହାଜ୍ୟ କିଜି ମାପୁରୁଦି ଉଣ୍ତିଙ୍ଗ୍‍ ମିର୍‌ ଆମା ଜିବନ୍‍ନୋନିକା ତର୍‍ସି ୱାଜିନିଦେର୍‍, ଆକା ୱାନ୍‌ ବାଣାଏନ୍‍ । 
\v 11 ମା ଉନ୍‍ଣ୍ତ୍ରି ବଦା, ସାରାସାରି ସାନ୍ଦି ଆଇୱାରି ଉଣ୍ତିଙ୍ଗ୍‌ ମି ଜିବନ୍‌ନୋନିକା ୱିଜୁଦିନ୍ ମାନିତ୍ । ଆର୍‌ତିଙ୍ଗ୍‌, ମି ଆସା କିତିମାନି ୱିଜୁ ବିସୟ୍‌ ପୁରା ଆନାତ୍‌ । 
\v 12 ଆର୍‌ତିଙ୍ଗ୍‌ ମିର୍‌ ଏସାଙ୍ଗ୍‌ ଗାଡ଼ିଆ ଆଏଣ୍‌ଗା ଆଟ୍‍ୱା ବିସ୍‍ବାସ୍‌ ମାରି ସାସ୍‍ମାନି ଲୋକା ୱେନ୍‌କାସାନ୍‍ଡ୍ରୁ ମାରି ମାପୁରୁ ପାର୍‍ମାଣ୍‍ କିତିମାନି ୱିଜୁ ବିସୟ୍‌ ପୟ୍‍ଦୁ ।
\s ମାପୁରୁଦି ପାର୍‍ମାଣ୍‍ ଆଟ୍‍ୱା
\p
\v 13 ଅବ୍ରାହାମ୍‍ତିଙ୍ଗ୍‌ ମାପୁରୁ ଏସ୍ତିୱାଲେ ଆଦେସ୍ ସିତାନ୍‌, ନାସ୍ତିୱାଲେ ୱାନ୍‌ ୱାନି ଆଦେସ୍ ରକ୍‌ୟା କିନାନ୍‌ ଇଜି ପାର୍‍ମାଣ୍‍ କିତାମାନାନ୍ । ୱାନି ବାଦ୍‍ଲୁ ପେରିକାନ୍ ଏନ୍‍ ସିଲିତିଙ୍ଗ୍‌ ୱାନ୍‌ ନିଜେଦି ଦରୁଦାନ୍‍ ପାର୍‍ମାଣ୍‍ କିତାମାର୍ହାନ୍ । 
\v 14 ୱାନ୍‌ ଇର୍ହାମାର୍ହାନ୍, “ନାନ୍‌ ମିଙ୍ଗିଁ ଆର୍ସିବାଦ୍‌ କିନା, ମି କୁଟୁମ୍‌ତିଙ୍ଗ୍‌ ନାଣ୍ତଦାନ୍ ନାଣ୍ତ ପିରିସ୍‌ କିନା ।” 
\v 15 ଅବ୍ରାହାମ ସାହାସ୍‍ ଆସ୍‌ସି କାପ୍‍କିତାନ୍ । ଆଦେଙ୍ଗ୍‍ଁ ୱାନ୍‌ ମାପୁରୁଦି ପାର୍‌ମାଣ୍‌ତି ବିସୟ୍‌କୁୱିଜୁ ପୋଇତାନ୍ । 
\v 16 ଲୋକୁ ପାର୍‌ମାଣ୍‌ କିନିୱାଲେ ନିଜେଦିମାଣୁକୁ ପେରି ଲୋକ୍‌ତି ଦରୁଦାନ୍‌ ପାର୍‍ମାଣ୍‍ କିନାର୍‌, ଇୟାୱାଜା ପାର୍‍ମାଣ୍‍ କିନିମାଡ଼ାନ୍ ୱିଜୁ ଜାଟିଜଗଡ଼ା ୱିଜିନାତ୍‌ । 
\v 17 ମାପୁରୁ ଏମେୱାରିଙ୍ଗ୍ ଆୟାୱିଜୁ ବିଷୟ ଦାନ୍ କିନାନ୍ ଇଜି ପାର୍‍ମାଣ୍‍ କିତାମାର୍ହାନ୍, ଆୟା ପାର୍‌ମାଣ୍‌ତୁ ୱାନ୍‌ ଡାଟ୍‌ ତେବାନାନ୍ ଇଜି ୱାରିଙ୍ଗ୍ ପୁରାନେସ୍‌ନିୱାଜା ୱେର୍‌ନି ଉଣ୍ତିଙ୍ଗ୍‌ ୱାନ୍‌ ୱାନି ବାଦ୍‌ତି ୱାଲେ ପାର୍‍ମାଣ୍‍ ମିସା କିତାମାର୍ହାନ୍ । 
\v 18 ୱାନି ବାଦ୍‌ ମାରି ପାର୍‍ମାଣ୍‍ ବାଦ୍‍ଲେଆଏତାତ୍‍, ଆକା ରୁକିସ୍ ମାପୁରୁ ମିସ୍‍ୱେର୍‍ନିକାନ୍‍ ଆଏନ୍ । ଆୟାମାଣୁକୁ ଆଗ୍‌ଡ଼ି ମାନି ଆସାଦିଙ୍ଗ୍‌ ଆସ୍‌ନି ଉଣ୍ତିଙ୍ଗ୍‌ ଡର୍‌ନିବାଡିଦୁ ଉରୁକ୍‌ତାପ୍‌ ଜେ ମାପ୍‌, ମାପ୍‌ ଡାଟ୍‌ ୱେଡ଼ିକା ପୋଇନାପ୍‌ । 
\v 19 ଇୟା ଆସା ମା ଜିବନ୍‌ତି ତଅକା ୱାଜା । ଇକା ଆସାସିନିକା ନି ରକିୟାକିନିକା ମାରି ମୁସ୍‌କୁପୁର୍‌ତି ମନ୍ଦିର୍‍ତି ପାର୍‌ଦାଦିଙ୍ଗ୍‌ ବରୋକିଜି ମହାପବିତ୍ର ବାଡିଦୁ ଇଦେଙ୍ଗ୍‌ ଆଟ୍‌ତାମାନାତ୍‍ । 
\v 20 ମା ପାଣିକିନିସିନି ୱାଜା ଜିସୁ ଆଗ୍‍ଡ଼ିନେ ଆବେନ୍‌ ସର୍‌ର୍ହାନ୍‍ନି । ୱାନ୍‌ ମଲ୍‍କିସେଦକତି ଉତରାଦିକାରି ୱାଜା ୱିଜୁଦିନ୍‌ତି ଉଣ୍ତିଙ୍ଗ୍ ପେରିଜାଜକ ଆତାମାନାନ୍ ।
\c 7
\s ମଲ୍‌କିସେଦକଦି ଜାଜକ ପଦ୍‌
\p
\v 1 ଇୟା ମଲ୍‍କିସେଦକ ସାଲେମତି ରାଜା ମାରି ପେରି ମାପୁରୁଦି ଜାଜକ ମାର୍ହାନ୍ । ଅବ୍ରାହାମ ନି ୱାନି ସାଙ୍ଗର୍‌ ଏସ୍ତିୱାଲେ ନାଲ୍‌ଏର୍‌ ରାଜାରିଙ୍ଗ୍ ଆରାକିଜି ଜୁଦ୍ଧଦାନ୍ ୱାଜିମାର୍‌ଇ ବେଡ଼ାଦୁ, ନାସ୍ତିୱାଲେ ମଲ୍‍କିସେଦକ ୱାନିଙ୍ଗ୍‌ ବେଟ୍ଆଜି ଆସିର୍ବାଦ୍‌ କିତାମାର୍ହାନ୍ । 
\v 2 ମାରି ଅବ୍ରାହାମ ୱାନିଙ୍ଗ୍‌ ଜୁଦ୍ଧଦୁଜିଣାତି ସମ୍ପତିଦି ଏକ ଦସମାଂସ ସିତାମାରାନ୍ । ମଲ୍‍କିସେଦକଦି ଦରୁଦି ଆଗ୍‌ଡ଼ିରି ଅର୍ତ ଆଜିନାତ୍ “ଦାର୍ମୁଦି ରାଜା” ୱାନ୍‌ ସାଲେମତି ରାଜାଦି ଅର୍ତ ଆଜିନାତ୍‌ “ସାନ୍ତି ରାଜା ।” 
\v 3 ମଲ୍‍କିସେଦକଦି ବୁବା କି ୟାୟା ମାରି କୁଟୁମ୍‌ ନି ୱାନି ଜନମ୍‌ ମାରି ଜିବନ୍‍ତି ବିସୟ୍‌ତାନ୍ ଇନିକା ବା ଜାଣା ସିଲେତ୍‌ । ୱାନ୍‌ ମାପୁରୁଦି ମାରିନ୍ ୱାଜା; ୱିଜୁଦିନ୍‍ ଜାଜକ ଆଜି ତେବାଜି ୱାତାମାନାନ୍‌ ।
\p
\v 4 ଅଡ଼୍‌ବିଜ ସୁଡ଼ୁଦୁ, ଇୟା ଲୋକ୍‌ ଏଣ୍ତେସ୍‌ ପେରିକାନ୍‌ । ମା ୱେଙ୍ଗିଁତି ପୁର୍ବେଦିଡକ୍‌ରା ଅବ୍ରାହାମ ଜୁଦ୍ଧଦୁଜିଣାତି ସମ୍ପତିଦି ଏକ ଦସମାଂସ ୱାନିଙ୍ଗ୍‌ ସିତାମାର୍‌ଆନ୍ । 
\v 5 ଲେବିରି ଆମା କୁଟୁମ୍‌ତିକାର୍‍ ଜାଜକ ପାଣି କିନାର୍, ୱାର୍‌ ମୋସାଦି ନିୟମ୍‌ତି ଇସାବ୍‌ତାନ୍‌ ଇସ୍ରାଏଲତି ତଡ଼ାନ୍‌କା ମାଣୁକୁ ଦସମାଂସ ଦାନ ଲସ୍‌ନାର୍, ଇସ୍ରାଏଲତିଲୋକୁ ଅବ୍ରାହାମଦି କୁଟୁମ୍‌ ମାରି ଲେବିରି ନିଜେ ଜାତିଆତିଙ୍ଗ୍ ବା ୱାରିମାଡ଼ାନ୍‍କୁ ଇୟା ଦସ୍‌ବାଗ୍‌ ଲସ୍‌ସିମାର୍ହାର୍‌ । 
\v 6 ମଲ୍‍କିସେଦକ ଲେବି କୁଟୁମ୍‌ତିକାନ୍‌ ଆଏତିଙ୍ଗ୍‌ ବା, ୱାନ୍‌ ମାପୁରୁଦି ପାର୍‌ମାଣ୍‌ତି ଅବ୍ରାହାମଦିମାଡ଼ାନ୍ ଏକ ଦସମାଂସ ଦାନ ପୋଇଜି ୱାନିଙ୍ଗ୍‌ ଆସିର୍ବାଦ୍‌ କିତାମାର୍ହାନ୍ । 
\v 7 ଆସିର୍ବାଦ୍‌ କିନି ଲୋକୁ ଆସିର୍ବାଦ୍‌ ପୋଇନି ଲୋକାମାଣୁକୁ ଏନ୍‌ ପେରିକାନ୍, ଇବେନୁ ଇନିକା ଅଡ଼୍‌ବିନିକା ସିଲେତ୍‌ । 
\v 8 ଏକ ଦସମାଂସ ଦାନ ଲସ୍‌ନି ଯାଜକର୍ ସାତିୱାଜା ଲୋକୁ, ମାତର୍‍ ମଲ୍‌କିସେଦକ ସାସ୍ତ୍ରଦି ବାକ୍ୟ ଇସାବ୍‍ତାନ୍‍ ୱାନ୍‌ ଇଲେଇବା ଜିବନ୍‌ମାନାନ୍‌ । 
\v 9 ମାରି ଅବ୍ରାହାମ ମଲ୍‍କିସେଦକଦିଙ୍ଗ୍‌ ଦସବାଗ୍‍ତାନ୍‍ ଉନ୍‌ଡ୍ରି ବାଗ୍ ଦାନ ସିତିୱାଲେ, ଏମେ ଲେବିଦି କୁଟୁମ୍‌ତି ଯାଜକର୍ ଇଲେଇ ଦସମାଂସ ଦାନ୍ ଲସ୍‌ସିନାର୍, ଆୟା ଲେବି ବା ମଲ୍‍କିସେଦକଦିଙ୍ଗ୍‌ ଆୟା ଦାନ୍‌ ସିତାମାରାନ୍ ଇଜି ଇନ୍‌ଡ୍ରେଙ୍ଗ୍‌ ଆଟ୍‍ନିକା । 
\v 10 ଲେବି ନାସ୍ତିୱାଲେ ଜନମ୍‌ ଆଏନ୍ ମାରାନ୍ ସତ୍‌, ମାତର୍‌ ଅବ୍ରାହାମ ମଲ୍‍କିସେଦକଦିଙ୍ଗ୍ ବେଟ୍‌ ଆତିୱାଲେ ପୁର୍ବେଦିଡକ୍‌ରାଦାଦା ଅବ୍ରାହାମଦି କୁଟୁମ୍‌ତି ୱାଜା ଲେବି ୱାନି ମେନ୍ଦଲ୍‌ତୁ ମାର୍‌ଆନ୍ ଇଜି ଇରିଙ୍ଗ୍‍ବା ବୁଲ୍‌ ଆଏତ୍‍ ।
\p
\v 11 ଇୟା ଲେବିୟରି ଜାଜକଦି ମାନାଜି ଇସ୍ରାଏଲ ଜାତିଦିଙ୍ଗ୍‍ ୱାନି ନିୟମ୍‌ ସିଆୟ୍‍ ଆତାମାର୍ହାତ୍‍ । ଲେବିୟରି ପାଣି ଜଦି ସାରାସାରି ଆତାତ୍‍ମାନ୍ଦି, ଆର୍‌ତିଙ୍ଗ୍‌ ହାରୋଣଦି ଉତରାଦିକାରି ଇୟା ଲେବିୟ ଜାଜକରିଙ୍ଗ୍ ଡ଼ିସ୍‍ସି ସିଜି, ମଲ୍‍କିସେଦକଦି ଉତରାଦିକାରି ୱାଜା ଆଇକାନ୍‍ ଅରେନ୍‌ ଜାଜକ ୱାଦେଙ୍ଗ୍‌ ଇନିକା ଦରକାର୍ ମାର୍ହାତ୍ । 
\v 12 ଜାଜକ କୁଟୁମ୍‍ତି ବାଦ୍‍ଲେ ଆତିଙ୍ଗ୍‌ ନିୟମ୍‍ତୁ ବା ବାଦ୍‍ଲେ ଆନି ଦରକାର୍ । 
\v 13 ଏମେୱାନି ବିସୟ୍‌ତାନ୍‌ ମାପ୍‍ ଇୟାୱିଜୁ ମାଟା ଇଜିନାପ୍‍, ମା ଆୟା ପ୍ରବୁ ଜିସୁ ଆଇ ଉନ୍‍ଡ୍ରି କୁଟୁମ୍‌ ମାର୍ହାନ୍; ଆୟା କୁଟୁମ୍‌ତୁ ଏନ୍‍ ଏସାଙ୍ଗ୍ ଯାଜକ ପାଣି କିଏର୍‌ । 
\v 14 ଇକା ଟିକ୍‍ ଜେ, ୱାନ୍‌ ଜିହୁଦା କୁଟୁମ୍‌ତୁ ଜନମ୍‍ ଆତା ମାର୍ହାନ୍ ମାରି ଯାଜକ ଆନି ଉଣ୍ତିଙ୍ଗ୍ ମୋସା ଇୟା କୁଟୁମ୍‌ତି ଦରୁ ରାସ୍ଏନ୍‍ ।
\s ମଲ୍‍କିସେଦକଦି ୱାଜା ଅରେନ୍‍ ଜାଜକ
\p
\v 15 ଇବେନୁ ଟିକ୍ ବୁଜାଜିନାତ୍‌ ଜେ, ମଲ୍‍କିସେଦକଦି ୱାଜା ଆଇ ଅରେନ୍ ଜାଜକ ୱାତାନ୍‌ । 
\v 16 ମାତର୍‌ ୱାନ୍‌ ଲୋକ୍‌ ତିଆର୍‌କିତି ନିୟମ୍‌ ମାରି ପଦ୍‌ତି ମାଡ଼ାନ୍ ଜାଜକ ଆଏନ୍ ମାର୍ହାନ୍; ୱିଜ୍‍ଇ ଜିବନ୍‌ତି ସାକ୍ତି ପାଣି ୱାନ୍‌ ଯାଜକ ଆତାମାର୍ହାନ୍‍ । 
\v 17 ଇରିଙ୍ଗ୍‌ ଦର୍ମସାସ୍ତ୍ରଦୁ ରାସାତା ମାନାତ୍, “ନିନୁ ମଲ୍‍କିସେଦକଦି ଉତରାଦିକାରି ୱାଜା ୱିଜୁଦିନ୍‌ତି ଯାଜକ ଆନି ।” 
\v 18 ଇବେନୁ ପାଡ଼୍‍ଇ ନିୟମ ସାକ୍ତିସିଲେତ୍ ମାରି ଦରକାର୍‌ ସିଲେତାତ୍‌ଆକା ତାନିଙ୍ଗ୍‌ ଡ଼ିସ୍‍ତା ସିତାର୍‍ । 
\v 19 ଇରିଙ୍ଗ୍‌ ମୋସା ସିତିମାନି ନିୟମ୍‍ତାନ୍‍ ଇନି ବିସୟ୍‌ ପୁରା ପୋଇଦେଙ୍ଗ୍ ଆଟ୍ଏତାର୍‌ । ଇଲେଇ ମାଙ୍ଗିଁ ଉନ୍‍ଡ୍ରି ସାହାସ୍‍ତି ଆସା ସିତାମାନାନ୍‌; ଆୟାମାଡ଼ାନ୍ ମାପୁ ମାପୁରୁଦି ଲାକୁତୁଆନି ଉଣ୍ତିଙ୍ଗ୍‌ ଆଟ୍‌ତାମାନାନ୍ ।
\p
\v 20 ନାଣ୍ତଦାନ୍ ନାଣ୍ତ ମା ଉଣ୍ତିଙ୍ଗ୍‌ ମାପୁରୁଦି ପାର୍‌ମାଣ୍‌ ବା ମାନାତ୍ । ହାରଣଦି କୁଟୁମ୍‌ତିକାର୍‍ ଯାଜକ ପଦଦୁ ଆସ୍‌କିଆୟା ଆତିୱାଲେ ଇୟାୱାଜା ଇନି ପାର୍‌ମାଣ୍‌ ସିଆୟ୍‌ଏତ୍‌ ମାରାତ୍ । 
\v 21 ମାତର୍‌ କ୍ରିସ୍ତ ଯାଜକ ଆନି ବେଡ଼ାଦୁ ମାପୁରୁ ପାର୍‌ମାଣ୍‌ କିଜି ୱାନିଙ୍ଗ୍‌ ୱେର୍‌ତାମାର୍ହାର୍‌,
\q1 “ପ୍ରବୁ ଉନ୍‍ଡ୍ରି ପାର୍‍ମାଣ୍‍ କିତାମାନାନ୍”
\q2 ୱାନ୍‌ ୱାନି ପାର୍‍ମାଣ୍‌ ବାଦ୍‍ଲେ କିଏନ୍‌ :
\q1 ନିନୁ ୱିଜୁଦିନ୍‌ତି ଜାଜକ ଆନି ।
\m
\v 22 ଇୟା ମାଟା ଉଣ୍ତିଙ୍ଗ୍ ଜିସୁ ଉଡ୍ରି ପେରି ନିୟମ୍‌ତି ପୁରା ସିତାମାନାନ୍‌ ।
\p
\v 23 କେବଲ୍‌ ପାଡ଼ିଇ ନିୟମ୍‌ତୁ ବା ଆଇ ଯାଜକର୍‌ ସାତିସରିୱାଜା ଆତିମାନିଙ୍ଗ୍‌ ୱାର୍‌ ସାତି ୱେନ୍‌କା ଆଇକାର୍‌ ଜାଜକ ଆନାର୍; ଆଦେଙ୍ଗ୍‌ ୱାର୍‌ ଇସାପ୍‍ତୁ ନାଣ୍ତ ମାନାର୍‌ । 
\v 24 ମାତର୍‌ ଜିସୁ ୱିଜୁଦିନ୍ ଜିବନ୍‌ମାନାନ୍‌ । ୱାନି ଜାଜକ ପାଣି ବା ୱିଜୁଦିନ୍‌ । 
\v 25 ଆଦେଙ୍ଗ୍‌ ଏମେକାର୍‌ ୱାନି ମାଡ଼ାନ୍ ମାପୁରୁଦି ଲାକୁତୁ ସନାର୍, ୱାରିଙ୍ଗ୍ ରକିୟା କିଦେଙ୍ଗ୍‌ ୱାନ୍‌ ଇଲେଇ ମାରି ୱିଜୁଦିନ୍ ଡାଟ୍‌ ମାନାନ୍‌, ମାତର୍‌ ୱାରି ଉଣ୍ତିଙ୍ଗ୍‌ ମାପୁରୁଦି ଲାକୁତୁ ପାର୍‌ତନା କିଦେଙ୍ଗ୍‌ ୱାନ୍‌ ୱିଜୁଦିନ୍ ଜିତାମାନାନ୍‍ ।
\p
\v 26 ଆର୍‌ତିଙ୍ଗ୍‌ ମା ୱିଜୁ ଉଣା ପୁରା କିଦେଙ୍ଗ୍‌ ଜିସୁନେ ଅରେନ୍ ମାତ୍ର ପେରିଯାଜକ । ୱାନ୍‌ ପବିତ୍ର, ପାପ୍‌ଦସ୍‍ ସିଲିକାନ୍‍, ପାପି ଲୋକାମାଣୁକୁ ଆକମାନିକାନ୍‍, ମୁସ୍‌କୁପୁର୍‌ତୁ ପରିକାନ୍‌ ଆତାନ୍‌ । 
\v 27 ୱାନ୍‌ ଆଇଆଇ ପେରିଜାଜକରି ୱାଜା ଆଏନ୍; ୱାରି ୱାଜା ୱାନିଙ୍ଗ୍‌ ଆଗ୍‍ଡ଼ି ନିଜେଦି ପାପ୍‌ ଉଣ୍ତିଙ୍ଗ୍‌ ମାରି ୱେନ୍‌କା ଆଇୱାରି ପାପ୍‌ ଉଣ୍ତିଙ୍ଗ୍‌ ୱିଜୁଦିନ୍ ପୁଜା ସିଦେଙ୍ଗ୍‌ ପୋଡ଼ାଏତ୍ । ୱାନ୍‌ ନିଜେଦିଙ୍ଗ୍ ପୁଜା ସିଜି ଉଡ୍ରେ ଦେବାନେ ଆଇ ଆଇ ବଲିସିଜି ପାଣି କିତାମାର୍ହାନ୍ । 
\v 28 ମୋସାଦି ନିୟମ୍‍ ଇସାବ୍‍ତାନ୍‍ ବାସେଆତି ପେରିଜାଜକରି ଦୋସ୍‌ ଦୁର୍ବଳ ମାନାତ୍; ମାତର୍‌ ନିୟମ୍‍ ତିଆର୍‌କିତି ୱେନ୍‍କାରି ବେଡ଼ାଦୁ ମାପୁରୁ ନିଜେଦି ବାଦ୍‌ ମାରି ପାର୍‌ମାଣ୍‌ ଇସାବ୍‌ତାନ୍‌ ୱାନି ଏମେ ମାରିନ୍‍ତିଙ୍ଗ୍‌ ପେରିଜାଜକ ୱାଜା ବାସେ କିତାନ୍, ୱାନ୍‌ ୱିଜୁଦିନ୍‌ତିଙ୍ଗ୍‌ ଉଣ୍ତିଙ୍ଗ୍‌ ପୁରା ଆତାମାନାନ୍ ।
\c 8
\s କ୍ରିସ୍ତ ମା ପେରିଜାଜକ
\p
\v 1 ମା ମାଟାଦି ଅର୍ତ ଇକା ମାଡୁ ଏମେ ପେରିଜାଜକଦିଙ୍ଗ୍‌ ପୋଇତିମାନିକା, ୱାନ୍‌ ମୁସ୍‍କୁପୁର୍‌ତୁ ମହାମହିମା ମାପୁରୁଦି ସିଂହାସନ୍‌ଦି ଉଣେରି କିୟୁ ତରିନ୍‌ ବାସ୍‌ତାମାନାନ୍ । 
\v 2 ୱାନ୍‌ ଏମେ ମହାପବିତ୍ର ବାଡିଦୁ ତିଆର୍‌ଆତିମାନି ଗୁଡ଼ା ଆଡିଗି ପେରିଜାଜକ ୱାଜା ପାଣି କିନାନ୍, ଆକା ଲୋକା ମାଡ଼ାନ୍ ତିଆର୍ ଆଏତ୍‌, ତାନିଙ୍ଗ୍ ପ୍ରବୁ ତିଆର୍ କିତାମାନାନ୍ ।
\p
\v 3 ୱିଜେରେ ପେରିଜାଜକର୍‌ ମାପୁରୁଦି ଉଦେସ୍‌ଦାନ୍‌ ପୁଜା ମାରି ଜାତୁବଲି ପୁଜା କିଦେଙ୍ଗ୍‌ ବାସେଆତା ମାନାର୍‌ । ଆଦେଙ୍ଗ୍‌ ମା ପେରିଜାଜକ ବା ଆୟାୱାଜା ଇନି ପୁଜା କିଦେଙ୍ଗ୍‌ ଦରକାର୍ ମାନାତ୍‌ । 
\v 4 ୱାନ୍‌ ଜଦି ଇୟା ଦୁନିଆଦୁ ମାରିଙ୍ଗ୍‌, ଆର୍‌ତିଙ୍ଗ୍‌ ୱାନ୍‌ ମୁଡ଼ୁକେ ଜାଜକ ଆଦେଙ୍ଗ୍‍ଁ ଆଟ୍ଏତାନ୍‌ମାନ୍ଦି, ଇରିଙ୍ଗ୍‌ ଜିହୁଦିର୍ ନିୟମ୍‍ ଇସାବ୍‌ତାନ୍‌ ପୁଜା ସିଦେଙ୍ଗ୍‌ ଜାଜକର୍‌ ମାନାର୍ । 
\v 5 ୱାରି ଜାଜକରି ସେବା ପାଣି ମୁସ୍‌କୁପୁର୍‌ତି ବିସୟ୍‌ତି କାତା ନି ନିଡ଼ିଗାମାତ୍ର । ମୋସାଦି ବେଡ଼ାଦାନ୍ ଇୟାୱାଜା ଆଜି ୱାଜିନାତ୍ । ମୋସା ଏସ୍ତିୱାଲେ ଉପାସନା ଉଣ୍ତିଙ୍ଗ୍ ଉନ୍‍ଣ୍ତ୍ରି ଗୁଡ଼ା ତିଆର୍ କିଦେଙ୍ଗ୍‌ ସୋଲ୍‍ସିମାରାନ୍‌, ମାପୁରୁ ୱାନିଙ୍ଗ୍‌ ଇର୍ହାମାର୍ହାନ୍‌, “ସୁଡୁଆ, ଗୋରନ୍‌ ମୁସୁକୁ ନିଙ୍ଗିଁ ଏମେ ବାନା ତୋର୍‍ସି ସିତାମାନା ଟିକ୍‌ ଆୟା ଇସାପ୍‍ତାନ୍ ୱିଜୁ ବିସୟ୍‌ ତିଆର୍ କିଆ ।” 
\v 6 ମାତର୍‌ ଇଲେଇ ଜିସୁଙ୍ଗୁଁ ଏମେ ଜାଜକ ପାଣି ସିଆୟ୍‍ ଆତାମାନାତ୍, ଆକା ଆଇୱାରି ଜାଜକିୟ ପାଣି ବାଦ୍‍ଲୁ ନେଗିକା । ଆୟାୱାଜା ମାପୁରୁ ମାରି ଲୋକା ଲୋଇ ୱାନ୍‌ ଏମେ ନିୟମ୍‌ ତିଆର୍‌ କିତାମାନାନ୍, ଆକା ପେରିକା, ଇରିଙ୍ଗ୍‌ ଇୟା ନିୟମ୍‌ଦୁ ନେଗି ବିସୟ୍‌ୱିଜୁ ସିଆୟ୍‍ ଆନି ଉଣ୍ତିଙ୍ଗ୍ ପାର୍‌ମାଣ୍‌ ମାନାତ୍ ।
\p
\v 7 ଆଗ୍‌ଡ଼ିରି ନିୟମ୍‍ତୁ ଜଦି ଦସ୍‌ ସିଲେତାତ୍‌ମାନ୍ଦି, ଆର୍‌ତିଙ୍ଗ୍‌ ମାରିଉନ୍‍ଡ୍ରି ନିୟମ୍‌ ଦର୍‌କାର୍ ସିଲେତାତ୍‌ମାନ୍ଦି । 
\v 8 ମାତର୍‌ ମାପୁରୁ ୱାନି ଲୋକାଙ୍ଗ୍‌ ଦୋସ୍‌ ଆସ୍‌ସି ଇର୍ହାମାନାନ୍‌,
\q1 “ପ୍ରବୁ ଇଜିନାନ୍‌, ବେଡ଼ା ୱାଜିନାତ୍,
\q2 ଏସ୍ତିୱାଲେ ନାନୁ ଇସ୍ରାଏଲ ସିଲ୍‌ତିଙ୍ଗ୍‌ ଜିହୁଦାଦି ଲୋକାୱାଲେ ଏକ ପୁନି ନିୟମ୍‌ ତିଆର୍‌ କିନା ।
\q1
\v 9 ନାନୁ ୱାରି ପୁର୍ବେଦିଡକ୍‌ରାରିଙ୍ଗ୍‌ କିୟୁ ଆସ୍‌ସି ମିସର୍‍ ଦେସ୍‌ତାନ୍‍ ସୋପ୍‍ସି ତାନି ୱାଲେ
\q2 ଏମେ ନିୟମ କିତାମାର୍ହା, ଇୟା ନିୟମ୍‌ ଆୟାୱାଜା ଆଏତେ । ନାନୁ ୱାରିୱାଲେ ଏମେ ନିୟମ୍‌ କିତାମାର୍ହା,
\q1 ଆବେନ୍‌ ୱାର୍‌ ବିସ୍‍ବାସ୍ ତେବାଏତାର୍‌;
\q2 ଆଦେଙ୍ଗ୍‍ଁ ନାନୁ ୱାରି ଉଣ୍ତିଙ୍ଗ୍ ମୋନ୍‌ଦିୟାନ୍‌ ସିଏତା ।
\q1
\v 10 ପ୍ରବୁ ଇଜିନାନ୍‌,
\q2 ନାନୁ ବବିସତ୍‌ଦୁ ଇସ୍ରାଏଲତି ଲୋକା ୱାଲେ ଇୟା ନିୟମ୍‌ କିନା :
\q1 ନାନୁ ନା ନିୟମ୍‌ ୱାରି ମନ୍‍ପାଟାଦୁ
\q2 ମାରି ଜିବନ୍‌ତି ପାଟାଦୁ ରାସ୍‍ନା ।
\q1 ନାନୁ‍ ୱାରି ମାପୁରୁ ଆନା,
\q2 ୱାର୍‌ ନା ଲୋକ୍ ଆନାର୍ ।
\q1
\v 11 ନାସ୍ତିୱାଲେ ୱାର୍‌ ଲାକ୍‌ତୁରି ତଡ଼ାନ୍‌କାଙ୍ଗ୍ ସିକିୟା ସିଦେଙ୍ଗ୍‌ ଦର୍‌କାର୍‌ ଆଏତ୍‌ନି,
\q2 ମାରି ଦେସ୍‍ତି ଲୋକାଙ୍ଗ୍‌
\q2 ‘ପ୍ରବୁଦି ବିସୟ ୱେର୍‌ତୁ,’
\q1 ଇୟା ମାଟା ୱେର୍‌ତେଙ୍ଗ୍‌ ଦର୍‌କାର୍‌ ଆଏତ୍‌ନି,
\q2 ଇରିଙ୍ଗ୍‌ ଇସ୍ରିଲୋକା ମାଣାନ୍‌କୁ ପେରିଲୋକା ସାନ୍ଧି ୱିଜେରେ ନା ପରିଚୟ ନେସ୍‌ନାର୍ ।
\q1
\v 12 ନାନୁ ୱାରି ୱିଜୁ ପାପ୍‌ କେମା କିନା
\q2 ମାରି ୱାରିଦି ଇନି ଅନ୍ୟାୟ୍‌ ମୋନତୁ ଏତ୍‌ ଇଡେଏ ।”
\m
\v 13 ଇୟାତେନିଙ୍ଗ୍‌ ପୁନି ନିୟମ୍‌ ଇଜି ରାସ୍‌ନି ମାଡ଼ାନ୍ ମାପୁରୁ ଆଗ୍‌ଡ଼ିରିତାନିଙ୍ଗ୍‌ ପାଡ଼ିଇକା ଇଜି ଇର୍ହାମାନାନ୍‌ ମାରି ଆମାକା ପାଡ଼ିଇକା ମାରି ସାଲାଏତ୍‍, ଆକା ବେଗି ମାର୍‌ଗିନା ସନାତ୍‍ ।
\c 9
\s ଆଡ୍‍ଗିପୁର୍‍ ନି ମୁସ୍‍କୁପୁର୍‍ତି ପାର୍‍ତନା
\p
\v 1 ପାରତୁମ୍‍ତି ନିୟମ୍‍ତୁ ପାର୍‍ତନାଦି ସାରି ନି ଲୋକୁ ତିଆର୍‍କିତି ଉଣ୍ତ୍ରି ସେବା କିନି ଇଲୁ ବିସୟ୍‌ତାନ୍‍ ରାସାତା ମାର୍ହାତ୍ । 
\v 2 ଆୟାଇସାବ୍‌ତାନ୍ ଉଣ୍ତ୍ରି ପାର୍‍ତନା କିନି ଗୁଡ଼ା ତିଆର୍ ଆତାମାର୍ହାତ୍‍ । ଆବେନ୍‌ ମାନି ପାର୍‍ତୁମ୍‍ତି ବାକ୍‍ରା ପବିତ୍ର ବାଡି ଇନ୍‍ଜିମାର୍ହାର୍ । ଇୟା ଲୋଇ ଦିୱା ଇଡ୍‍ନି ବାଡି, ଉନ୍‍ଡ୍ରି ଟେବୁଲ୍‍ ମାରି ଟେବୁଲୁ ମୁସୁକୁ ମାପୁରୁଦି ଉଦେସ୍‍ତାନ୍ ପୁଜା ସିତିମାର୍‍ଇ ରୁଟି ମାର୍ହାତ୍ । 
\v 3 ପାର୍‌ଦା ୱେନ୍‍କା ଏମେ ମାରିଉଣ୍ତ୍ରି ବାକ୍‍ରା ମାର୍ହାତ୍, ତାନିଙ୍ଗ୍‌ ମହାପବିତ୍ର ବାଡି ଇନ୍‍ଜିମାର୍ହାର୍ । 
\v 4 ଆବେନ୍‌ ଉନ୍‍ଡ୍ରି ବାଙ୍ଗାଁରାମ୍‍ତି ଦୁପୁଣି ବେଦି ମାରି ବାଙ୍ଗାଁରାମ୍‍ତି ତିଆର୍‍ଆତି “ନିୟମ୍‌ ପେଡ଼ା” ମାର୍ହାତ୍ । ଇୟା ପେଡ଼ା ଲୋଇ “ମାନ୍ନା” ମାନି ଉନ୍‍ଡ୍ରି ବାଙ୍ଗାଁରାମ୍‌ତି ସାଟି, ହାରୋଣତି କାୟ୍‍ତି ବାଡିଗା ମାରି ମାପୁରୁଦି ମାଟା ରାସାତି ରୁଣ୍ତି କାଲୁକୁ ପାଟା ମାର୍ହେ । 
\v 5 ସିନ୍ଦୁକପେଡ଼ା ମୁସୁକୁ ମାପୁରୁଦି ଆବେନ୍‌ମାନ୍‌ଜି ତରାୟ୍‌ଆନି ୱାଜା ରେକେଙ୍ଗ୍‌ମାନି ରୁଣ୍ତି ଲୋକ୍‌ଦି ମୁର୍ତି ମାର୍ହାତ୍‍ । ଇୟାକାର୍‌ “ପାପ୍‍କେମା” ବାଡି ମୁସୁକୁ ରେକେଙ୍ଗ୍‌ ଅସାର୍ କିଜି ତେବାତାମାର୍ହାର୍‍, ମାତର୍‌ ଇଲେଇ ଇୟା ୱିଜୁଦି ବିସୟ୍‌ ନେଗେନ୍‌ତାନ୍ ୱେର୍‍ତେଙ୍ଗ୍‍ ଦରକାର୍‍ ସିଲେ । \fig ସମାଗମ ଇଲୁଦି ଲୋଇରି ବାଗ୍‌|alt="Interior of tabernacle" src="bk00278c.tif" size="span" copy="Horace Knowles ©" ref="୯:୨"\fig*
\p
\v 6 ଆବେନ୍‌ ଇୟାୱାଜା ନିୟମ୍‍ ମାନାତ୍ ଯାଜକର୍‌ ୱିଜୁଦିନ୍ ଗୁଡ଼ାଦି ପାର୍‍ତୁମ୍‍ ବାକ୍‍ରାଦୁ ଡ଼ୁଗ୍‌ଜି ୱାରି ସେବା ପାଣି ପୁରା କିନାର୍ । 
\v 7 ମାତର୍‌ ମାରିଉନ୍‍ଡ୍ରି ବାକ୍‍ରା ଲୋଇ କେବଲ ପେରିଜାଜକଦି ସୋନି ଅଦିକାର୍‌ ମାନାତ୍‌, ୱାନ୍‌ ଆବେ ବାର୍ସେକ୍‍ତିଙ୍ଗ୍‌ ଅରୁସୁ ମାତ୍ର ସନାନ୍‍ । ୱାନ୍‌ ନିଜେଦି ଉଣ୍ତିଙ୍ଗ୍‌ ମାରି ଲୋକୁ ନେସ୍‍ଏଣ୍ତା କିତିମାନି ପାପ ଉଣ୍ତିଙ୍ଗ୍‌ ମାପୁରୁଦି ଉଦେସ୍‌ତାନ୍ ପୁଜା ସିଦେଙ୍ଗ୍‌ ଅର୍‌ସେ ନେତେର୍‍ ଆସ୍‌ସି ସନାନ୍‍ । 
\v 8 ଇୟାୱିଜୁ ବିସୟ୍‌ତାନ୍ ପବିତ୍ର ଆତ୍ମା ଇୟା ମାଟା ନେଗେନ୍‍ତାନ୍‍ ସିକିୟା ସିତାମାନାତ୍‍ ଜେ, ପାର୍‍ତୁମ୍‍ତି ବାକ୍‍ରା ମାନି ସାନ୍ଦି, ମହାପବିତ୍ର ବାଡିଦୁ ସନି ସାରି ରେଆଏତ୍ । 
\v 9 ଇଲେଇତି ବେଡ଼ା ସୁଡ଼୍‍ଜି ଇକା ଉନ୍‍ଡ୍ରି କାତା ୱାଜା । ତେନି ଅର୍ତ ଆଜିନାତ୍, ମାପୁରୁଦି ଉଦେସ୍‍ତାନ୍ ପୁଜାସିତିମାନିକା ମାରି ପସୁବଲି ଉପାସ୍‌କିନିୱାନି ବୁଦିଦିଙ୍ଗ୍‌ ପୁରା କିଦେଙ୍ଗ୍‌ ଆଟ୍‍ଏତ୍ । 
\v 10 ଇରିଙ୍ଗ୍‌ ଆୟାୱିଜୁ କେବଲ ଉଣି କାଦି ମାରି ସୁଚିକିନି ଉଣ୍ତିଙ୍ଗ୍‌ ଆତ୍‍ରେରି ପାଣି ମାତ୍ର । ମାପୁରୁଦି ପୁନି ନିୟମ୍‍ତି ତିଆର୍‍ଆନି ସାନ୍ଦି ଆୟାୱିଜୁଦି ଦରକାର୍‍ ମାର୍ହାତ୍ ।
\p
\v 11 ମାତର୍‌ ଇଲେଇ ଏମେ ୱିଜୁ ନେଗି ବିସୟ୍‌ ମାଡ୍‍ ପୋୟ୍‍ତିମାନିକା, ଆୟାୱିଜୁଦି ପେରିଜାଜକ ୱାଜା କ୍ରିସ୍ତ ୱାତାମାନାନ୍ । ୱାନ୍‌ ଏମେ ପାର୍‍ତନା ଗୁଡ଼ାଦୁ ପାଣି କିଜିନାନ୍, ଆକା ପେରିକା ମାରି ନାଣ୍ତ ବର୍ତିଦିକା । ଆକା ଲୋକୁ ତିଆର୍ କିତିକା ଆଏତ୍‍ । ମାରି ଆକା ଇୟା ଦୁନିଆଦି ସିନା ଆଏତ୍‌ । 
\v 12 କ୍ରିସ୍ତ ଆୟା ଗୁଡ଼ା ନାଡ଼୍‍ମିସିଜି ଆୟା ମହାପବିତ୍ର ବାଡିଦୁ ଉନ୍‍ଡ୍ରେଦେବାଦି ଉଣ୍ତିଙ୍ଗ୍‌ ଡ଼ୁଗିନି ୱାଲେ ଆବେନ୍‌ ବଲିସିନି ଉଣ୍ତିଙ୍ଗ୍‌ ଗରିଏଙ୍ଗ୍‌ଁ ସିଲେତିଙ୍ଗ୍‌ ଡ଼ାକା ନେତେର୍‍ ଆସ୍‌ସି ସଲ୍‍ଏନ୍‍ ମାର୍ହାନ୍‍ । ମାତର୍‍ ୱାନ୍‌ ନିଜେଦି ନେତେର୍‌ ଅସି ମା ଉଣ୍ତିଙ୍ଗ୍ ୱିଜୁଦିନ୍‍ତିଙ୍ଗ୍ ମୁକୁଡ଼ାନି ପାଣି କିତାନ୍ । 
\v 13 ପାଡ଼ିଇ ନିୟମ୍‍ତାନ୍ ଏମେକାର୍ ରିତିନିତି ପାଣି ମାନାଇ ଉଣ୍ତିଙ୍ଗ୍‌ ଅସୁଚି, ୱାରି ମୁସୁକୁ ଗରିଏଙ୍ଗ୍‌ଁ ସିଲେତିଙ୍ଗ୍‌ ଡ଼ାକା ନେତେର୍‍ ମାରି ଡ଼ାକା ନିର୍‍ ୱାକାତିଙ୍ଗ୍‍, ୱାରି ଅସୁଚି ଆକ ଆନାସନାତ୍ । 
\v 14 ଇକା ଜଦି ସତ୍‌ ଆନାମାନାତ୍‍, ଆର୍‌ତିଙ୍ଗ୍‌ କ୍ରିସ୍ତଦି ନେତେର୍ ମାରି ଏସ ନାଣ୍ତ ପାଣି ସିନିକା ଆଏତ୍‍ ? ୱିଜୁଦିନ୍‌ତି ଆତ୍ମାଦି ସାକାଦାନ୍ ୱାନ୍‌ ନିଜେଦିଙ୍ଗ୍ ମାପୁରୁଦି ଉଦେସ୍‌ତାନ୍ ଉନ୍‍ଡ୍ରି ଦସ୍‍ସିଲି ପୁଜା ୱାଜା ସିତାମାନାନ୍‌ । ୱାନି ଆୟା ନେତେର୍‍ ଦାନ୍ ତାଗ୍‌ଇ ରିତିନିତି ପାଣିଦାନ୍ ନେଗେନ୍‍ ଆଜି ମା ବୁଦି ଟିକ୍‌ଆନାତ୍‌ ମାରି ମାପ୍‌ ଜିବନ୍‍ମାନି ମାପୁରୁଦି ଟିକ୍ ସେବା କିଦେଙ୍ଗ୍ ସୁଜୋଗ୍‌ ପୋୟ୍‍ନାପ୍‌ ।
\p
\v 15 ଇୟାଉଣ୍ତିଙ୍ଗ୍‌ କ୍ରିସ୍ତ ନେ ପୁନି ନିୟମ୍‌ ତିଆର୍‌ କିତାମାନାନ୍, ଏଣ୍ତେସ୍‍କି ଏମେକାର୍ ମାପୁରୁଦି ମାଡ଼ାନ୍ କୁକାୟ୍‍ଆତାମାନାର୍, ୱାର୍‌ ମାପୁରୁ ପାର୍‍ମାଣ୍‍ କିତିମାନି ଏସ୍‌କାଙ୍ଗ୍‌ୱିଜିଇ ଆସିର୍ବାଦ୍‌ ପୋଇନାର୍ । ପାର୍‍ତୁମ୍‍ ନିୟମ ପାଣିକିଜିମାନି ବେଡ଼ାଦୁ, ଲୋକୁ ଏମେ ୱିଜୁ ପାପ୍‌ ଦୋସ୍‌ କିତାମାର୍ହାର୍, କେବଲ କ୍ରିସ୍ତଦି ସାତିମାଡ଼ାନ୍ ୱାର୍‌ ଆବେଟ୍‌କୁ ମୁକ୍‍ଡ଼ାନିକା ପୋଇନାର୍‍ ।
\p
\v 16 ଉଣ୍ତ୍ରି ସିନି ଆକୁଦି ନିୟମ୍‍ ଇସାବ୍‍ତାନ୍‍, ଆକା ପାଣି ଆନି ଉଣ୍ତିଙ୍ଗ୍‍ ନିୟମ୍‌ କିତିମାନି ଲୋକ୍‍ଦି ସାନିକା ପାର୍‍ମାଣ୍‍ ଆନିକା ଦରକାର୍‍ । 
\v 17 ଇରିଙ୍ଗ୍‌ ନିୟମ୍‌ କିତିମାନି ଲୋକ୍ ଜିନିମାନି ସାନ୍ଦି, ନିୟମ୍‌ତି ପାଣି ସିଲେତ୍‌; କେବଲ୍‌ ୱାନି ସାତି ୱେନ୍‌କାନେ ଆକା ଡାଟ୍‍ତି ପାଣି ଆନାତ୍‌ । 
\v 18 ଆୟାଉଣ୍ତିଙ୍ଗ୍‌ ପାର୍‍ତୁମ୍‍ ନିୟମ ବା ନେତେର୍‍ସିନି ମାଡ଼ାନ୍ ପାଣି ଆତାମାର୍ହାତ୍‍ । 
\v 19 ପାର୍‍ତୁମ୍‍ ମୋସା ନିୟମ୍‍ତି ଆଦେସ୍‌କୁ ଲୋକା ଲାକୁତୁ ୱେର୍‍ତାର୍‍ । ତାନିୱେନ୍‌କା ୱାନ୍‌ ଡ଼ାକ୍‍ ନି ଗରିଏଙ୍ଗାଁ ନେତେର୍‌ ଏରୁଦି ୱାଲେ ମିସାକିଜି ଏସୋବ କମା ମାରି ଏସ ରଙ୍ଗ୍‌ତି ମେଣ୍ତା ବୁରୁବୁସେଙ୍ଗ୍ ଦାନ୍ ନିୟମ୍‌ ବଇ ମାରି ଲୋକା ମୁସୁକୁ ଲଜିତାନ୍‍ । 
\v 20 ୱାନ୍‌ ଇର୍ହାନ୍‌, “ଏମେ ନିୟମ୍‌ ମାନାଦେଙ୍ଗ୍‌ ମାପୁରୁ ମିଙ୍ଗିଁ ଆଦେସ୍ ସିତାମାନାନ୍‌, ଇୟା ନେତେର୍‌ ଆୟା ନିୟମ୍‌ତିଙ୍ଗ୍ ଟାପ୍‍ ଡ଼େୟ୍‍ଜିନାତ୍‍ ।” 
\v 21 ମୋସା ଆୟା ଇସାପ୍‍ତାନ୍ ନେତେର୍‌ ଅସି ଗୁଡ଼ା ମାରି ପାର୍‍ତନାଦୁ ବ୍ୟବ୍‌ହାର୍‌ ଆଜିମାନି ୱିଜୁ ଜିନିସ୍‍ ମୁସୁକୁ ଲଜିତାନ୍ । 
\v 22 ମାରି ମୋସାଦି, ନିୟମ୍‌ ଇସାପ୍‍ତାନ୍ ୱିଜୁ ବିସୟ୍‌ ନେତେର୍ ମାଡ଼ାନ୍ ପବିତ୍ରଆନାତ୍ ମାରି ନେତେର୍‍ସିନି ମାଡ଼ାନ୍ ନେ ପାପ କେମା ଆନାତ୍‌ ।
\s କ୍ରିସ୍ତଦି ବଲିସିନିକା ପାପ୍‍ ଆକ କିନାତ୍‍
\p
\v 23 ଆମା ବିସୟ୍‌ୱିଜୁ ମୁସ୍‌କୁପୁର୍‌ତି ମୁଲ୍‌ ବିସୟ୍‌ଦି ରୁପ୍‌ ମାତ୍ର, ଆୟାୱିଜୁ ନେତେର୍‍ତାନ୍ ପବିତ୍ର ଆନିକା ଦରକାର୍‍ ମାର୍ହାତ୍, ମାତର ମୁସ୍‍କୁପୁର୍‍ତି ବିସୟ୍‌ତି ଉଣ୍ତିଙ୍ଗ୍ ନେଗି ବଲିଦାନ୍ ଦରକାର୍‍ । 
\v 24 ଆମାକା ଲୋକା କିୟୁଦୁ ତିଆର୍‍ ଆଏତ୍‌, ଇୟାୱାଜା ଉଣ୍ତ୍ରି ପବିତ୍ର ବାଡିଦୁ କ୍ରିସ୍ତ ସୋର୍ହାମାନାନ୍ । ଆକା ଇନି ମୁଲ୍‌ ବିସୟ୍‌ଦି ରୁପ୍‌ ସିଲେ । ୱାନ୍‌ ମୁସ୍‍କୁପୁର୍‍ତୁ ନେ ସୋର୍ହାମାନାନ୍ । ଆବେନ୍‌ ୱାନ୍‌ ମା ଉଣ୍ତିଙ୍ଗ୍‌ ଇଲେଇ ମାପୁରୁଦି ଆଗ୍‍ଡ଼ି ସର୍ହାମାନାନ୍ । 
\v 25 ଜିହୁଦିରି ପେରିଯାଜକ ଏଣ୍ତେସ୍ ବାର୍ସେକ୍‍ତିଙ୍ଗ୍‌ ଅର୍‌ସୁ ଜାତୁ ନେତେର୍‌ ଅସି ମହାପବିତ୍ର ବାଡିଦୁ ସୋନାନ୍ । ଆୟାୱାଜା କ୍ରିସ୍ତ ନିଜେଦିଙ୍ଗ୍‌ ରିଜାମୁଜା ପୁଜା କିନି ଉଣ୍ତିଙ୍ଗ୍‌ ଆବେନ୍‌ ସୋଲ୍‍ଏନ୍ । 
\v 26 ଆର୍‌ତିଙ୍ଗ୍‌, ୱାନିଙ୍ଗ୍‌ ଦୁନିଆଦି ତିଆର୍‍ଆତି ବେଡ଼ାଦାନ୍‍ ନାଣ୍ତଦେବେଙ୍ଗ୍‌ ଦୁଃକ୍‌କାସ୍ଟୁ ବୋଗାଦେଙ୍ଗ୍ ପୋଡ଼ାତାତ୍‍ମାନ୍ଦି । ମାରି ୱାନ୍‌ ଜୁଗ୍‌ସେସ୍‌ଆନି ବେଡ଼ାଦୁ ନିଜେଦିଙ୍ଗ୍‌ ବଲି ୱାଜା ସିନି ମାଡ଼ାନ୍ କାଡ଼ା କାଡ଼ାଦିଙ୍ଗ୍‍ ପାପ୍‌ତି ସାକ୍ତି ମେଡ଼ିକ୍‌ନି ଉଣ୍ତିଙ୍ଗ୍‍ ୱାତାମାର୍ହାନ୍‍ । 
\v 27 ୱିଜେରେ ଉନ୍‍ଣ୍ତ୍ରେଦେବା ସାନାର୍ ମାରି ତାନିୱେନ୍‌କା ମାପୁରୁଦି ବିଚାର୍‍ଦି ଆଗ୍‍ଡ଼ି ନିନାର୍‍ । 
\v 28 ଆୟାୱାଜା ୱିଜୁଲୋକା ଉଣ୍ତିଙ୍ଗ୍‌ ପାପ୍ ଆକ କିଦେଙ୍ଗ୍ କ୍ରିସ୍ତ ଉନ୍‍ଣ୍ତ୍ରେ ଦେବାଦି ଉଣ୍ତିଙ୍ଗ୍ ବଲି ୱାଜା ସିଆୟ୍‍ ଆତାନ୍ । ୱାନ୍‌ ମାରିଉଣ୍ତ୍ରି ଦେବା ୱାନାନ୍ । ନାସ୍ତିୱାଲେ ମାରି ପାପ୍‍ତି ଜୁଦ୍‍ କିନି ଉଣ୍ତିଙ୍ଗ୍‌ ୱାନ୍‌ ରେଏନ୍‍ । ୱାନ୍‌ ୱାନାନ୍, ୱାନି ଉଣ୍ତିଙ୍ଗ୍‌ କାପ୍‍କିଜିମାନି ଲୋକାଙ୍ଗ୍ ଉଦ୍ଧାର୍‌ କିନି ଉଣ୍ତିଙ୍ଗ୍‌ ୱାନାନ୍‌ ।
\c 10
\p
\v 1 ଜିହୁଦିୟ ନିୟମ୍‌ ସତ୍‌ ବିସୟଦି ଉଣ୍ତ୍ରି ପୁରା ମାରି ଟିକ୍‌ଆୟାନାନି ମୁର୍ତି ଆଏତ୍‌, ଇକା ୱାଜିନିଦିନ୍‍ତି ନେଗି ବିସୟଦି ଉଣ୍ତ୍ରି ନେସ୍‍ନିନାନି‌ ମାଟା ମାତ୍ର । ୱିଜୁୱାଲେ ବାର୍ସେକ୍‌ତିଙ୍ଗ୍‍ ବାର୍ସେକ୍ ଆୟା ଉନ୍‍ଣ୍ତ୍ରି ରକମ୍‍ତି ପୁଜା କିଆୟ୍‍ଆଜିନାତ୍‍ । ଏମେକାର୍ ମାପୁରୁଦି ଲାକୁତୁ ୱାନାର୍, ନିୟମ୍‍ଦି ଆୟାୱିଜୁ ବଲିଦାନ୍‌ତାନ୍ ୱାର୍‌ ଇନିକା ନେଗିକା ଆଦେଙ୍ଗ୍‌ ଆଟ୍‍ସିନାର୍ ? 
\v 2 ଇୟାୱାଜାନେ ମାପୁରୁଦି ଉପାସ୍‌କିନିକାର୍‌ ଜଦି ସତ୍‌ତାନ୍‌ ପାପ୍‌ଦାନ୍ ନେଗେନ୍‍ ଆଦେଙ୍ଗ୍‌ ଆଟ୍‍ତାର୍‍ମାନ୍ଦି, ଆର୍‌ତିଙ୍ଗ୍‌ ୱାର୍‌ ମାରି ନିଜେଦି ବୁଦିଦିଙ୍ଗ୍ ପାପି ଇଜି ଅଡ଼୍‍ବିଏତାର ମାନ୍ଦି ମାରି ୱିଜୁ ପୁଜାସିନିକା ୱିଜିତାତ୍‍ମାନ୍ଦି । 
\v 3 ମାତର, ଆୟାୱାଜା ଆଏଜି ବାର୍ସେକ୍‍ତିଙ୍ଗ୍‍ ବାର୍ସେକ୍ ପୁଜାସିନି ମାଡ଼ାନ୍ ଲୋକୁଦିଙ୍ଗ୍ କେବଲ ୱାନି ପାପ୍‌ ବିସୟ୍‌ ଏତ୍‍ କିବିସ୍‍ କିଆୟ୍‍ଆଜିନାତ୍‍ । 
\v 4 ଇରିଙ୍ଗ୍‌ ଡ଼ାନ୍‌ ନି ଗରିଏଙ୍ଗାଁ ନେତେର୍‌ ଏସାଙ୍ଗ୍‍ବା ପାପ୍‌ କେମା କିଦେଙ୍ଗ୍‌ ଆଟ୍‍ଏତ୍ ।
\p
\v 5 ଆୟା ଉଣ୍ତିଙ୍ଗ୍‌ କ୍ରିସ୍ତ ଦୁନିଆଦୁ ୱାନି ପୁର୍ବେଦାନ୍ ମାପୁରୁଙ୍ଗୁ ଇର୍ହାମାର୍ହାନ୍,
\q1 “ପୁଜା ନି ଦାନ୍‍ତୁ ନିନୁ ୱେଡ଼ିକା ସିଲେ,
\q2 ମାତର ନିନୁ ନା ଉଣ୍ତିଙ୍ଗ୍‌ ଉନ୍‍ଡ୍ରି ମେନ୍ଧଲ୍‍ ତିଆର୍‌ କିତିମାନି ।
\q1
\v 6 ପାପ୍‌କେମା ଉଣ୍ତିଙ୍ଗ୍‌ ନିନୁ ବେଦି ମୁସୁକୁ ହୋମବଲିଦୁ
\q2 ସିଲେତିଙ୍ଗ୍‌ ପସୁବଲିଦୁ ୱେଡ଼ିକା ଆଇଦେର୍‍ ।
\q1
\v 7 ଆଦେଙ୍ଗ୍‌ ନାନୁ ଇର୍ହା, ଏ ମାପୁରୁ ନା
\q2 ବିସୟ୍‌ତାନ୍‍ ନିୟମ ବଇଦୁ ଏଣ୍ତେସ୍ ରାସାତା ମାନାତ୍,
\q2 ନାନୁ ଆୟା ରକମ୍‍ତାନ୍‍ ନି ବଦା ପୁରା କିଦେଙ୍ଗ୍‌ ତିଆର୍ ମାନା ।”
\m
\v 8 ପାର୍‍ତୁମ୍‍ ୱାନ୍‌ ଇର୍ହାମାର୍ହାନ୍, “ନିନୁ ଲୋକା ପାପ୍‌ କେମା ଉଣ୍ତିଙ୍ଗ୍‌ ପୁଜା ନି ଦାନ୍‍ସିନିକା ସିଲେତିଙ୍ଗ୍‌ ବେଦି ମୁସୁକୁ ହୋମବଲି ବଦା କିଇ; ଆୟାୱିଜୁ ମିଙ୍ଗିଁ ୱେଡ଼ିକା କିଦେଙ୍ଗ୍ ଆଟ୍ଏତ୍‍ ।” ଇୟାୱିଜୁ ବଲିଦାନ୍ ନିୟମ୍‍ ଇସାବ୍‍ତାନ୍‍ କିଆୟ୍‍ଆଜିମାରିଙ୍ଗ୍‍ ବା ୱାନ୍‌ ଇୟାୱାଜା ଇର୍ହାମାର୍ହାନ୍‌ । 
\v 9 ୱେନେକା ୱାନ୍‌ ଇର୍ହାମାର୍ହାନ୍, “ଏ ମାପୁରୁ, ନାନୁ ନି ଇଛା ପୁରା କିଦେଙ୍ଗ୍‌ ତିଆର୍ ମାନା ।” ମାରି ମାପୁରୁ ଇୟାୱିଜୁ ପାଡ଼ିଇ ନିୟମ୍‌ ଡ଼ିସ୍‍ସି ତାନି ବାଦ୍‌ଲୁ କ୍ରିସ୍ତଦି ପୁନି ବଲିଦାନ୍‌ ଆସ୍‍ତି । 
\v 10 ଜିସୁ କ୍ରିସ୍ତ ଉନ୍‍ଡ୍ରେଦେବା ମାତ୍ର ମାରି ୱିଜୁଦିନ୍‌ତି ଉଣ୍ତିଙ୍ଗ୍ ନିଜେଦି ମେନ୍ଦଲ୍‌ତିଙ୍ଗ୍‌ ସିଜି ମାପୁରୁଦି ଇଛା ପୁରା କିତିମାନିଙ୍ଗ୍, ୱାନି ଆୟା ନିଜେଦିଙ୍ଗ୍‍ସିତି ଉଣ୍ତିଙ୍ଗ୍‍ ମାଡୁ ୱିଜୁ ଲୋକୁ ପାପ୍‌ଦାନ୍ ନେଗେନ୍‌ ଆତିମାନିକା । \fig ବେଦି ମୁସ୍‌କୁ ସିସୁଦାନ୍‌ ବଲି ସିନିକା|alt="Burnt offering on an altar" src="hk00256c.tif" size="col" copy="Horace Knowles ©" ref="୧୦:୧୦"\fig*
\p
\v 11 ଜିହୁଦି ଜାଜକର୍‌ ୱିଜୁଦିନ୍ ନିଜେଦି ପାଣି ପୁରାକିଜି ଆୟା ଉଣ୍ତ୍ରି ରକମ୍‍ତି ସେବା ଅର୍‌ସୁଦିଙ୍ଗ୍‌ଅର୍‌ସୁ କିଜିମାନାର୍, ମାତର୍‌ ଇୟାୱିଜୁ ବଲିଦାନ୍ ମାଡ଼ାନ୍ ଏସାଙ୍ଗ୍‍ବା ପାପ୍‌ କେମା ଆଦେଙ୍ଗ୍‌ ଆଟ୍‍ଏତ୍ । 
\v 12 ମାତର୍‌ କ୍ରିସ୍ତ ପାପ୍‌ତି ନିଜେଦିଙ୍ଗ୍‌ସିତି ୱାଜା ୱିଜୁଦିନ୍‌ତି ଉଣ୍ତିଙ୍ଗ୍‌ ଉନ୍‍ଡ୍ରି ମାତ୍ର ବଲି ସିତାମାନାନ୍‌ । ତାନିୱେନେକା ୱାନ୍‌ ସଲସି ମାପୁରୁଦି ଉଣିକିୟୁ ତରିନ୍‌ ବାସ୍‍ତା ମାନାନ୍ । 
\v 13 ମାପୁରୁ ୱାନି ସାତ୍ରୁରିଙ୍ଗ୍‌ କାଲ୍‌କା ଆଡିଗି କିଇସାନ୍ଦି ୱାନ୍‌ ଆବେନ୍‌ କାପ୍‍କିଜିନାନ୍ । 
\v 14 ଏମେକାର୍ ପାପ୍‌ଦାନ୍ ନରାଜି ସୁଚି ଆତାମାନା, ଆୟା ଉନ୍‌ଡ୍ରେମାତ୍ର ବଲିଦି ମାଡ଼ାନ୍ ୱାରିଙ୍ଗ୍ ୱାନ୍‌ ୱିଜୁଦିନ୍‌ତି ଉଣ୍ତିଙ୍ଗ୍‌ ପୁରା କିତାମାନାନ୍ ।
\p
\v 15 ପବିତ୍ରଆତ୍ମା ବା ୱାନି ସାକ୍ୟ ସିଜି ଇର୍ହାମାନାତ୍ :
\q1
\v 16 “ପ୍ରବୁ ଇଜିନାନ୍‌, ବବିସତ୍‌ଦୁ ନାନୁ ୱାରି ୱାଲେ ଇୟା ପୁନି ନିୟମ୍‌ କିନା ।
\q1 ନାନୁ ନା ନିୟମ୍‍ ୱାରି ଜିବନ୍‌ତୁ ଇଡିନା
\q2 ମାରି ୱାରି ମନ୍‍ତୁ ରାସ୍‍ନା ।”
\m
\v 17 ମାରି ବା ୱାନ୍‌ ଇଜିନାନ୍‌, “ନାନୁ ମାରି ୱାରି ପାପ୍‌ ନି ତାଗ୍‌ଇ ପାଣି ଏତ୍‍ କିଏନି ।” 
\v 18 ଆଦେଙ୍ଗ୍‌ ୱାର୍‌ ଜଦି କେମା ପୋଇତା ମାନାର୍‍, ଆର୍‌ତିଙ୍ଗ୍‌ ପାପ୍‌ କେମା ଉଣ୍ତିଙ୍ଗ୍‌ ମାରି ବଲିଦାନ୍‍ଦି ଦର୍‍କାର୍‍ ସିଲେତ୍‌ ।
\s ମାପୁରୁଦି ଲାକ୍‍ତୁ ଆନାଟ୍‍
\p
\v 19 ମାରି ଏ ତଡ଼ାନ୍‍କୁ ନି ତାଙ୍ଗିଁକ୍‍, ଜିସୁଦି ସାତି ମାଡ଼ାନ୍ ମାଡୁ ମହାପବିତ୍ର ବାଡିଦୁ ସୋନି ଉଣ୍ତିଙ୍ଗ୍‌ ପୁରା ଅଦିକାର୍ ପୋଇତିମାନିକା । 
\v 20 ୱାନ୍‌ ୱାନି ମେନ୍ଦଲ୍‍ତିୱାଜା ପାର୍‌ଦା ନାଣିମିରାନ୍ ମା ଉଣ୍ତିଙ୍ଗ୍‌ ଉଣ୍ତ୍ରି ପୁନି ଜିବନ୍‌ତି ସାରି ତର୍‌ତାମାନାନ୍ । 
\v 21 ମାପୁରୁଦି ଇଲୁ ଇଲେଇ ମା ପେରିଜାଜକଦି ଅଦିକାର୍‍ତୁ ମାନାତ୍ । 
\v 22 ମାରି ରାଦୁ, ମାଡୁ ନେଗି ମୋନ୍‌ତାନ୍ ମାରି ଆଟୁୱା ବିସ୍‍ବାସ୍‌ତି ୱାଲେ ମାପୁରୁଦି ଲାକୁତୁ ସୋନାଟ୍‍; ଇରିଙ୍ଗ୍‌ ମାଡୁ ଇଲେଇ ତାଗ୍‍ଇ ବୁଦିଦାନ୍‍ କ୍ରିସ୍ତଦି ନେତେର୍‍ତାନ୍ ନେଗେନ୍‌ ଆତିମାନିକା ମାରି ମା ମେନ୍ଦଲ୍‌ ନେଗି ଏରୁଦାନ୍ ଇବାତି ମାନିକା । 
\v 23 ଏମେ ଆସା ମାଦି ମାନାତ୍ ଇଜି ମାନାତିମାନିକା, ଆବେନ୍‌ ମାଡୁ ଡାଟ୍‌ ମାନିକା ମାନାତ୍‌, ଇରିଙ୍ଗ୍‌ ମାଡୁ ମାପୁରୁଦି ସିତିମାନିମାଟା ମୁସୁକୁ ଆସା ଇଟ୍‍ତିମାନିକା । 
\v 24 ରାଦୁ, ମାଡୁ ଆଇୱାରି ଉଣ୍ତିଙ୍ଗ୍‌ ମୋନ୍‌ଦିୟାନ୍‌ ଆଜି ୱାରି ସୁବିଦା କିନାଟ୍; ଇୟାୱାଜା ଇସାବ୍‌ତାନ୍‌ ଜିବନ୍‍ନୋନିକା ସିଜି ସତ୍‌ପାଣି କିନାଟ୍ । 
\v 25 ମାରି ଏନ୍‍ ଏନ୍‍ ଏଣ୍ତେସ୍ ପାର୍‌ତନାଦୁ ସୋନ୍‍ଡ୍ରେଙ୍ଗ୍‍ ଏଲା କିନାର୍, ମାଡୁ ଆୟାୱାଜା କିଏଟ୍ । ମାରି ପ୍ରବୁଦି ଦିନ୍‌ ଲାକୁତୁ ଆଜି ୱାଜିନାତ୍ ନେସ୍‌ସି ନିଜେନିଜେଦିଙ୍ଗ୍‌ ନାଣ୍ତ ୱେଡ଼ିକା କିନିକା ମାନାତ୍ ।
\p
\v 26 ମା ଲାକୁତୁ ସତ୍‍ ନେସ୍‌ତି ୱେନେକା ମାଡୁ ଜଦି ନେସ୍‌ସି ନେସ୍‌ସି ପାପ୍‌ତୁ ମାନିକା, ଆର୍‌ତିଙ୍ଗ୍‌ ମାରି ଇନି ବଲିଦାନ୍ ମାଙ୍ଗିଁ ପାପ୍‌ତାନ୍ ମୁକୁଡ଼ା କିଦେଙ୍ଗ୍ ଆଟ୍‍ଏତ୍ । 
\v 27 ଆର୍‌ତିଙ୍ଗ୍‌, ମାଡୁ ୱାଜିମାନି ପେରି ବିଚାର୍‍ତୁ ସାମାନ୍‌ ଆଜି ମାପୁରୁଦି ବିରୁଦ୍‍କିନିୱାରି ଉଣ୍ତିଙ୍ଗ୍‌ ନାଣ୍ତକାସ୍‍ସିମାନି ସିସୁଦୁ ଦଂସ୍‌ ପୋଇନି ଇସାପ୍‍ତି ତିଲାନି ବାଦ୍‍ଲୁ ମା ଆଇ ଇନି ଉପାୟ ସିଲେତ୍‌ । 
\v 28 ଏନ୍‍ ଜଦି ମୋସାଦି ନିୟମ୍‍ ଅମାନ୍ୟ କିନାନ୍ ମାରି ଅରେନ୍ ସିଲେତିଙ୍ଗ୍‌ ନାଣ୍ତଲୋକା ସାକିରି ସାକ୍ୟଦି ମାଡ଼ାନ୍ ୱାନ୍‌ ଦୋସି ଆନାନ୍‌, ଆର୍‌ତିଙ୍ଗ୍‌ ୱାନିଙ୍ଗ୍‌ ଦୟା କିଏଣ୍‌ଗା ସାନି ଦଣ୍ତ ସିନାର୍ । 
\v 29 ଆର୍‌ତିଙ୍ଗ୍‌, ଏନ୍‍ ମାପୁରୁଦି ମାରିନ୍‌ତିଙ୍ଗ୍ ଅମାନ୍ୟ କିନାନ୍, ମାପୁରୁଦି ପୁନି ନିୟମ୍‌ତି ନେତେର୍‍ତି ମାଡ଼ାନ୍ ପାପ୍‌ କେମାଦି ସୁଜୋଗ୍‌ ପୋଇତିମାରିଙ୍ଗ୍‍ ବା ୱାନିଙ୍ଗ୍‌ କାଡ଼ିଜିନାନ୍‌ ମାରି ଅନୁଗ୍ରହଦି ପବିତ୍ରଆତ୍ମାଦିଙ୍ଗ୍‌ ଅପମାନ୍‌ କିନାନ୍, ୱାନି ଦସ୍‌ ଇନିକା ଆଏତ୍‌ ? ଅଡ଼୍‌ବିଜ ସୁଡ଼ୁଦୁ, ୱାନ୍‌ ଏସୋ ନାଣ୍ତ ଦଣ୍ତପୋଇନାନ୍ । 
\v 30 “ନାନୁ ପ୍ରତିସଦ୍‍ ଅନା, ନାନୁ ଦଣ୍ତସିନିକିନ୍ଦା ।” ଇୟା ମାଟା ଜେ ଇର୍ହାମାନାନ୍‌, ୱାନିଙ୍ଗ୍‌ ମାପ୍‍ ନେସ୍‍ନାପ୍‍ । ୱାନ୍‌ ମାରିବା ଇର୍ହାମାନାନ୍, “ପ୍ରବୁ ୱାନି ଲୋକାଙ୍ଗ୍ ବିଚାର୍‌କିନାନ୍ ।” 
\v 31 ଜିବନ୍‌ମାନି ମାପୁରୁଦି ବିସାର୍‍ତି ଆଗ୍‍ଡ଼ିନିନିକା ଏସୋ ତିଲାନିକା ।
\p
\v 32 ମି ଆଗ୍‌ଡ଼ିରି ମାଟା ଅଡ଼୍‌ବିଦୁ । ମାପୁରୁଦି ଜାୟ୍‌ ମିଙ୍ଗିଁ ନାଣ୍ତଜାୟ୍‌ କିତି ୱେନେକା ମିର୍‌ ଆଇ ଆଇ ଦୁଃକ୍‌ କାସ୍ଟୁ ପୋଇତିଦେର୍‌, ମାତର୍‌ ଆରାଏତି ମାର୍‌ଇଦେର୍‌ । 
\v 33 ଏସାଙ୍ଗ୍ ଏସାଙ୍ଗ୍ ମିର୍‌ ୱିଜୁଲୋକାମାନୁ ନିଦା ମାରି ମାଡ୍‍ତିନ୍‍ଞ୍ଜି ମାର୍ହିଦେର୍‍ । ମାରି ଏସାଙ୍ଗ୍ ଏସାଙ୍ଗ୍‌ ମିର୍‌ ଆଇୱାରି ଦୁଃକ୍ କାସ୍ଟୁଦୁ ଦୋସ୍‌ଆଦେଙ୍ଗ୍‌ ତିଆର୍ ମାର୍ହିଦେର୍‍ । 
\v 34 ମିର୍‌ ଜଇଲ୍‍ତୁମାନି ଲୋକା ଦୁଃକ୍ କାକୁର୍ତିଦି ସାକା କିଜିମାର୍‌ଇଦେର୍‌ ମାରି ଏସ୍ତିୱାଲେ ମି ୱିଜୁ ଡଆଁ ଆତାତ୍‌, ନାସ୍ତିୱାଲେ ମିର୍‌ ୱେଡ଼ିକାଦାନ୍ ୱିଜୁ କାସ୍ଟୁ ସାସ୍‌ କିତିଦେର୍‍, ଇରିଙ୍ଗ୍‌ ମିଦି ଜେ ପେରିକା ୱିଜୁଦିନ୍‌ତି ଦନ୍‍ସମ୍ପତି ମାନାତ୍, ଆକା ମିର୍‌ ନେସ୍ତିମାରିଇଦେର୍‍ । 
\v 35 ଆଦେଙ୍ଗ୍‌ ସାହାସ୍ ଆରାକିମାଟ୍‍, ଇରିଙ୍ଗ୍‌ ସତ୍‌ ସାହାସ୍‍ତି ପେରି ପୁରସ୍କାର୍‌ ମାନାତ୍ । 
\v 36 ମାପୁରୁଦି ବଦା ପୁରା କିଜି, ଏମେକା ୱାନ୍‌ ସିନାନ୍ ଇଜି ପାର୍‌ମାଣ୍‌ କିତାମାନାନ୍, ଆକା ପୋଇନି ଆସାଦିଙ୍ଗ୍‌ ସାସ୍‌ ଆସ୍‌ସି ମାଡ୍ରୁରୁ । 
\v 37 ଦାର୍ମୁସାସ୍ତ୍ରଦୁ ରାସାତାମାନାତ୍‌ :
\q1 “ମାରି ଅଡ଼ପ୍‌ ସାଣେକ୍‌ କାପ୍‍କିଦୁ,
\q2 ଏମେୱାନି ୱାନିକା ମାନାତ୍, ୱାନ୍‌ ୱାନାନ୍,
\q2 ୱେଡ଼ା କିଏନ୍‍,
\q1
\v 38 ନା ଦାର୍ମୁଦି ଲୋକୁ ବିସ୍‍ବାସ୍‍ତାନ୍ ଆଟୁୱା ତେବାଜି ଜିନାର୍‍,
\q2 ମାତର୍‌ ଏନ୍‌ ଜଦି ୱେନ୍‌କା ଗୁସାନାନ୍,
\q2 ୱାନି ଉଣ୍ତିଙ୍ଗ୍‌ ନାନୁ ୱେଡ଼ିକା ଆଦେଙ୍ଗ୍‍ଁ ଆଟ୍ଏ ।”
\m
\v 39 ୱେନ୍‌କା ସଲସି ନାସ୍ଟୁ ଆନି ଲୋକୁ ମାପୁ ଆଏପ୍ । ମାପୁ ଆଟୁୱା ବିସ୍‍ବାସ୍ ମାରି ପରିତ୍ରାଣ୍‌ ପୋଇତାମାନାପ୍‌ ।
\c 11
\s ବିସ୍‍ବାସ୍‍
\p
\v 1 ଆସା କିନି ବିସୟ୍‌ ପୋଇନିକା ପୁରା ନେସ୍‍ନାଟ୍‍ ମାରି ତର୍‌ଇ ବିସୟ୍‍ତି ସତ୍‍ବୁଦି ଆସାନିକା ନେ ବିସ୍‍ବାସ୍‍ । 
\v 2 ପୁର୍ବେଦି ଲୋକୁ ୱାରି ବିସ୍‌ବାସ୍‍ଦାନ୍ ମାପୁରୁଦି ୱେଡ଼ିକାଦିଲୋକୁ ଆତାମାର୍ହାର୍‍ । 
\v 3 \x + \xo ୧୧:୩ \xo*\xt ଜୋହନ ୧:୩.\xt*\x*ମାପୁରୁଦି ବାକ୍ୟଦାନ୍ ସାରା ଦୁନିଆ ତିଆର୍‍ ଆତାତ୍‌ ମାରି ସୁଡ଼ିଇ ବିସୟ୍‌ଦାନ୍ ସୁଣି ବିସୟ୍‌ତି ତିଆର୍ ଆତାତ୍‌, ଇୟା ମାଟା ବିସ୍‍ବାସ୍‍ତାନ୍ ମାଡୁ ନେସ୍‌ସିନିକା । 
\v 4 ବିସ୍‍ବାସ୍‌ତାନ୍‌ ହେବଲ ମାପୁରୁଦି ଲାକ୍‌ତୁ କୟିନଦି ବାଦ୍‍ଲୁ ନେଗି ପୁଜା କିତାମାର୍ହାନ୍ । ନିଜେଦି ବିସ୍‍ବାସ୍‍ଦାନ୍ ୱାନ୍‌ ମାପୁରୁଦି ମାଡ଼ାନ୍ ଦାର୍ମୁଦିକାନ୍‌ ଇଜି ସାକ୍ୟ ପୋଇତାନ୍‌, ଇରିଙ୍ଗ୍‌ ମାପୁରୁ ନିଜେ ୱାନି ସିତିମାନିପୁଜା ମାନାତାମାରାନ୍ । ୱାନି ବିସ୍‍ବାସ୍ ଉଣ୍ତିଙ୍ଗ୍‌ ହେବଲ ସାତିସରିଙ୍ଗ୍‌ ବା ଇୟାସାନ୍ଦି ୱାର୍‌ଗିଜିନାନ୍ ।
\p
\v 5 ବିସ୍‍ବାସ୍‍ତାନ୍ ହନୋକ ସାନି ମାଡ଼ାନ୍‍କୁ ରକିୟା ପୋଇତାମାରାନ୍ । ମାପୁରୁ ୱାନିଙ୍ଗ୍‌ ନିଜେ ଲାକୁତୁ ଅତାମାରାନ୍ ମାରି ୱାନିଙ୍ଗ୍‌ ଏନ୍‌ ମାରି ସୁଡ଼ୁଦେଙ୍ଗ୍‌ ଆଟ୍‍ଏତାମାର୍ହାର୍‍ । ଦର୍ମସାସ୍ତ୍ରଦୁ ରାସାତାମାନାତ୍‌ ଜେ, ହନୋକ ମାପୁରୁଦି ଲାକୁତୁ ସନି ଆଗ୍‍ଡ଼ି ୱାନି ୱେଡ଼ିକାଦିକାନ୍‌ ଆତାମାର୍ହାନ୍‌ । 
\v 6 ବିସ୍‍ବାସ୍‌ତିଙ୍ଗ୍‌ ଡ଼ିସ୍‌ତିଙ୍ଗ୍‌ ଏନ୍‍ ମାପୁରୁଙ୍ଗୁଁ ୱେଡ଼ିକା କିଦେଙ୍ଗ୍ ଆଟ୍ଏନ୍‍, ଇରିଙ୍ଗ୍‌ ଏନ୍‌ ମାପୁରୁଦି ଲାକ୍‌ତୁ ୱାନାନ୍, ୱାନ୍‌ ମାପୁରୁଦିମାନୁ‍ ବିସ୍‌ବାସ୍‌ କିନିକା ଦରକାର୍, ମାପୁରୁ ଜେ ୱାନି ୱେନ୍‌କାସନିୱାରିଙ୍ଗ୍‌ ଆସା ପୁରା କିନାନ୍, ଆକାବା ବିସ୍‍ବାସ୍ କିନିକା ଦରକାର୍ ।
\p
\v 7 ବିସ୍‍ବାସ୍‌ତି ସାକ୍ତିଦାନ୍ ନୋହ ଇନିକା ଅଡ଼୍‌ବିଏଣ୍‌ଗା ଗଟ୍‌ନା ବିସୟ୍‌ତାନ୍‌ ମାପୁରୁଦି ଜାଗ୍‌ରାତାଦି ବାକ୍ୟ ୱେନ୍‌ଡ୍ରେଙ୍ଗ୍‌ ଆଟ୍‍ତାମାର୍‌ଆନ୍‌ । ୱାନ୍‌ ମାପୁରୁଦି ଆଦେସ୍ ମାନାଜି ଉଡ୍ରି ଜାହାଜ୍‌ ତିଆର୍ କିତାନ୍‌ । ଆବେନ୍‌ ୱାନ୍‌ ମାରି ୱାନି ଇଲୁଦିଲୋକ୍‍ ୱିଜୁ ରକ୍‌ୟା ପୋଇତାର୍ । ତାନିବାଦ୍‌ଲୁ ଦେସ୍‍ତିଲୋକୁ ଦଣ୍ତ୍‌ ଆତାର୍‌, ମାତର୍‌ ନୋହ ୱାନି ବିସ୍‍ବାସ୍ ଉଣ୍ତିଙ୍ଗ୍‌ ଦାର୍ମୁଦି ପୁରସ୍କାର୍‌ ପୋଇତାର୍ ।
\p
\v 8 ମାପୁରୁ ଅବ୍ରାହାମଦିଙ୍ଗ୍‌ ଏମେ ଦେସ୍ ସିନା ଇଜି ମାଟା ସିତାମାରାନ୍, ଆୟା ଦେସ୍‍ତୁ ସୋନି ଉଣ୍ତିଙ୍ଗ୍‌ ୱାନ୍‌ ଏସ୍ତିୱାଲେ ୱାନିଙ୍ଗ୍‌ କୁକ୍‍ତାନ୍, ନାସ୍ତିୱାଲେ ଅବ୍ରାହାମ ବିସ୍‍ବାସ୍‍ତାନ୍ ମାପୁରୁଦି ମାଟା ମାନାତା ମାର୍ହାନ୍‍ । ୱାନ୍‌ ଏମେମାନୁ ସୋନାନ୍, ଆକା ନେସ୍‍ଏଜି ବା ନିଜେଦି ଦେସ୍ ଡ଼ିସ୍‍ତା ସର୍ହାନ୍‌ । 
\v 9 ୱାନ୍‌ ବିସ୍‍ବାସ୍‍ଦୁ ମାପୁରୁଦି ସିତିମାନି ଦେସ୍‌ତୁ ଆଇଦେସ୍‍ତିକାନ୍‍ ୱାଜା ବାସା କିତାନ୍‍ । ୱାନ୍‌ ଗୁଡ଼ାଦୁ ବାସା କିତାନ୍ ମାରି ୱାନି ୱାଜା ମାପୁରୁଦିମାଡ଼ାନ୍ ପାର୍‌ମାଣ୍‌ ଆଜି ଇସ୍‍ହାକ୍‍ ନି ଜାକୁବ ବା ଆୟାୱାଜା ଗୁଡ଼ାଦୁ ବାସା କିତାମାର୍ହାର୍‌ । 
\v 10 ଏମେ ୱିଜୁଦିନ୍‍ତି ଗାଡ଼୍‌ ମାପୁରୁଦି ମାଡ଼ାନ୍ ରସ୍‌ତିକାନ୍‌ ନି ତିଆର୍‌କିତିକାନ୍‌, ଅବ୍ରାହାମ ଆୟା ଗାଡ଼୍‌ତିଙ୍ଗ୍‌ କାପ୍‍କିଜି ମାରାନ୍ ।
\p
\v 11 ଜଦିବା ସାରା କଡ଼ର୍‌ଆଇଲି ଆନିକା ସିଲେତାତ୍, ବିସ୍‌ବାସ୍‌ତି ସାକ୍ତିଦାନ୍‌ ଅବ୍ରାହାମ ଡକ୍ରା ବୟସ୍‍ତୁ ବା ବୁବା ଆଦେଙ୍ଗ୍‌ ଆଟ୍‌ତା ମାର୍ହାନ୍‌ । ମାପୁରୁ ୱାନି ମାଟା ରକିୟା କିନାନ୍ ଇଜି ଅବ୍ରାହାମତି ବିସ୍‍ବାସ୍ ମାରାତ୍ । 
\v 12 ଅବ୍ରାହାମ ସାନି ୱାଜା ଆତିମାରିଙ୍ଗ୍‌ ବା ୱାନିମାଡ଼ାନ୍‌କୁ ବାଦଡ଼ଦି ସୁକେଙ୍ଗ୍‌ ମାରି ସାମ୍‌ଦୁରୁତି ବାଲି ୱାଜା ଲେକିସ୍‍ତେଙ୍ଗ୍‍ ଆଟ୍‍ଇ କୁଟୁମ୍‌ ଜନମ୍‌ ଆତାର୍‌ ।
\p
\v 13 ଇୟାୱିଜୁ ଲୋକୁ ନିଜେଦି ବିସ୍‍ବାସ୍‍ତୁ ଆଟୁୱା ତେବାଜି ସାତାସର୍ହାର୍‌ । ମାପୁରୁ ପାର୍‌ମାଣ୍‌ କିତିମାନି ବିସୟ୍‌ୱିଜୁ ୱାର୍‌ ପୋଇଦେଙ୍ଗ୍‌ ଆଟ୍ଏତିଙ୍ଗ୍‌ ବା ଆକରାନ୍ ଆକା ସୁଡ଼ିଜି କୁକ୍‌ନିକା କିତାମାର୍ହାର୍‌ ମାରି ଇୟା ଜଗତ୍‌ଦୁ ୱାର୍‌ କେବଲ ଆଇଦେସ୍‍ତିକାର୍‍ ମାରି ଆଇମାନୁବାସାନିକାର୍‍ ଇଜି ମାନାତା ମାର୍ହାର୍‌ । 
\v 14 ଏମେକାର୍ ଇୟାୱାଜା ମାଟା ଇନାର୍, ୱାର୍‌ ମାରି ଉଣ୍ତ୍ରି ନିଜେଦିବୁମିଦିଙ୍ଗ୍‌ ପୋଇଜିନାର୍ ଇଜି ନେସ୍‍ତେଙ୍ଗ୍ ଆନାତ୍‌ । 
\v 15 ୱାର୍‌ ଏମେ ଦେସ୍ ଡ଼ିସ୍‍ତା ୱାତାର୍‍ମାରାର୍, ଆୟା ଦେସ୍‍ତିଙ୍ଗ୍ ମାରି ଏତ୍‌ କିଏଜି ମାର୍ହାର୍‌ । ଜଦି ଏତ୍‌ କିତାର୍‍ମାନ୍ଦି, ଆର୍‌ତିଙ୍ଗ୍‌ ଆବେନ୍‌ ୱାର୍‌ ଡ଼େସି ସନ୍‍ଡ୍ରେଙ୍ଗ୍‌ ସୁଜୋଗ୍‌ ପୋଇତାର୍‍ମାନ୍ଦି । 
\v 16 ମାତର୍‌ ୱାର୍‌ ଉନ୍‍ଡ୍ରି ନେଗି ଦେସ୍‍ତୁ, ଅର୍ତାତ୍ ମୁସ୍‌କୁପୁର୍‌ତି ଦେସ୍‍ତୁ ସନି ଉଣ୍ତିଙ୍ଗ୍‌ ବଦା କିଜିମାରାର୍ । ଆଦେଙ୍ଗ୍‌ ୱାର୍‌ ମାପୁରୁଙ୍ଗୁଁ ନିଜେଦି ମାପୁରୁ ଇଜି ମାନାଜିନି ମାଡ଼ାନ୍ ୱାନ୍‌ ସେମାର୍ ଆଏନ୍‌ ମାର୍‌ର୍ହାନ୍‌ । ମାପୁରୁ ୱାରି ଉଣ୍ତିଙ୍ଗ୍‌ ଉନ୍‍ଡ୍ରି ଗାଡ଼୍‌ ତିଆର୍ କିଜି ଇଟ୍‌ତାମାନାନ୍‌ ।
\p
\v 17 ମାପୁରୁ ଅବ୍ରହାମତି ବିସ୍‍ବାସ୍ ପରିକା କିନିୱାଲେ ଅବ୍ରାହାମ ନିଜେ ମାରିନ୍‍ ଇସ୍‌ହାକ୍‌ତିଙ୍ଗ୍‌ ପୁଜାୱାଜା ସିଦେଙ୍ଗ୍‌ ତିଆର୍ ଆତାନ୍‌ । ମାପୁରୁ ଅବ୍ରାହାମତିଙ୍ଗ୍ ନେ ୱାନି ପାର୍‌ମାଣ୍‌ ମାଟା ସିତାମାର୍‌ର୍ହାନ୍‌, ମାରିବା ଅବ୍ରାହାମ ନିଜେଦି ଅରେନ୍ ମାରିନ୍‌ତିଙ୍ଗ୍‌ ପୁଜାୱାଜା ସିଦେଙ୍ଗ୍‌ ତିଆର୍ ଆତାନ୍‌ । 
\v 18 ମାପୁରୁ ୱାନିଙ୍ଗ୍‌ ଇର୍ହାମାରାନ୍, “ନାନୁ ନିଙ୍ଗିଁ ଏମେ କୁଟୁମ୍‍ ସିନା ଇଜି ମାଟା ସିତାମାନାନ୍‌, ଆକା ଇସ୍‌ହାକ୍‌ଦି ମାଡ଼ାନ୍ ନେ ଜନମ୍‍ ଆନାର୍ ।” 
\v 19 ମାପୁରୁ ଜେ ଇସ୍‌ହାକତିଙ୍ଗ୍ ସାତିମାଡ଼ାନ୍ ଜିବନ୍‌ କିଦେଙ୍ଗ୍‌ ଆଟ୍‌ନାନ୍‍, ଇୟା ବିସ୍‍ବାସ୍ ଅବ୍ରାହାମଦି ମାରାତ୍ । ସତ୍‍ତାନ୍‍, ଅବ୍ରାହାମ ଇସ୍‌ହାକ ସାତିମାଡ଼ାନ୍ ଡ଼େସି ଜିବନ୍‌ ପୋଇତାମାନାନ୍‍ ଇଜି କାତାଦି ୱାଜା ୱେର୍‍ତିଙ୍ଗ୍‍ ଇକା ବୁଲ୍‍ ଆଏତ୍‍ ।
\p
\v 20 ଇସ୍‍ହାକ୍‍ ନିଜେଦି ବିସ୍‍ବାସ୍‌ତି ବପୁଦାନ୍‌ ଜାକୁବ ମାରି ଏସୌଦି ଅଡ଼୍‍ବିଜି ନେଗିତାନି ଉଣ୍ତିଙ୍ଗ୍‌ ଆସିର୍ବାଦ୍‌ କିତାନ୍ ।
\p
\v 21 ବିସ୍‍ବାସ୍‍ତାନ୍ ନେ ଜାକୁବ ସାନି ପୁର୍ବେ ଜୋସେପ୍‌ତି ରିଏରି ମାରିସିରିଙ୍ଗ୍ ଆସିର୍ବାଦ୍‌ କିତାମାରାନ୍ । ୱାନ୍‌ ନିଜେଦି ବାଡିଗାଦି ଆଡ୍‍ଗି ପାଡ଼୍‌ଗିଜି ମାପୁରୁଦି ପାର୍‌ତନା କିତାମାର୍ହାନ୍ ।
\p
\v 22 ଜୋସେପ୍‌ ସାନି ୱାଲେ ୱାନି ବିସ୍‍ବାସ୍‌ତି ବପୁଦାନ୍‌ ଇସ୍ରାଏଲ୍‌ ଲୋକାଦି ମିସର ଦେସ୍‍ତାନ୍ ସର୍‌ଇ ବବିସତ୍‍ ମାଟା ଇର୍ହାମାର୍ହାନ୍‌ ମାରି ୱାନି ମାଡ଼ା ଏଣ୍ତେସ୍‌ ନେଗେନ୍‌ ପୋକ୍‌ନାର୍‌, ଆୟାଉଣ୍ତିଙ୍ଗ୍‌ ଆଦେସ୍ ୱେର୍‌ତାମାରାନ୍ ।
\p
\v 23 ବିସ୍‍ବାସ୍‍ତାନ୍ ମୋସାଦି ବୁବା ୟାୟା ୱାନିଙ୍ଗ୍‌ ଜନମ୍‌ତାନ୍‌ ମୁଡ୍ରି ଲେଜୁକୁ ସାନ୍ଦି ଆଡ଼ାକ୍‌ତା ଇଟ୍‍ତାମାରାର୍ । ଇସ୍ରି କଡ଼ଦିଙ୍ଗ୍‌ ସୁନ୍ଦର୍‌ ସୁଡ଼ିଜି ୱାର୍‌ ରାଜେଙ୍ଗ୍ ବା ଅମାନ୍ୟ କିଦେଙ୍ଗ୍ ତିଲାଏଜି ମାର୍ହାର୍‌ ।
\p
\v 24 ମୋସା ବୟସ୍‌ ଆତି ୱେନ୍‌କା ବିସ୍‍ବାସ୍‌ତି ବପୁଦାନ୍‌ ରାଜାଦି ଗାଡ଼୍‌ସିଦି ମାରିନ୍‍ ଇଜି ପରିଚୟ୍‌ ଆଦେଙ୍ଗ୍‌ ମନା କିତାନ୍‍ । 
\v 25 ପାପ୍‌ତୁ ତେବାଜି ଏସ ବେଡ଼ା ଜିବନ୍‌ ଜିନି ବାଦ୍‍ଲୁ ମାପୁରୁଦି ଲୋକା ୱାଲେ ଦୁଃକ୍‌ବୋଗ୍‌ କିଦେଙ୍ଗ୍‌ ୱାନ୍‌ ବଦାକିତା ମାର୍ହାନ୍ । 
\v 26 ୱାନ୍‌ ମିସର୍‍ ଦେସ୍‍ତି ୱିଜୁ ଦନ୍‌ ବାଦ୍‍ଲୁ ମସିହଦି ଉଣ୍ତିଙ୍ଗ୍‌ କାଡ଼ାୟ୍‍ଆନିକା ନେଗେତ୍‌ ଇଜି ଏତ୍‌କିତାନ୍‌, ଇରିଙ୍ଗ୍‌ ୱାନ୍‌ ପୁରସ୍କାର୍‌ତି ଉଣ୍ତିଙ୍ଗ୍ ‌ୱାନି ଆସା ମାରାତ୍ ।
\p
\v 27 ବିସ୍‌ବାସ୍‌ତାନ୍‌ ମୋସା ରାଜାଦି ରିସାଦିଙ୍ଗ୍ ତିଲାଏଜି ମିସର୍‍ ଦେସ୍ ଡ଼ିସ୍‍ତା ସର୍ହାନ୍‌; ସତେ ଏଣ୍ତେସ୍ ୱାନ୍‌ ସୁଡ଼ୁଇ ମାପୁରୁଙ୍ଗୁଁ ସୁଡ଼ିଜିମାରାନ୍; ଆଦେଙ୍ଗ୍‍ଁ ଡ଼େସି ସଲ୍‌ଏଣ୍‌ଗା କେଏତା ମାର୍ହାନ୍‌ । 
\v 28 ବିସ୍‍ବାସ୍‍ତାନ୍‌ ୱାନ୍‌ ନିସ୍ତାର୍‌ ପଣ୍ତୟ୍‌ କିତାମାର୍ହାନ୍‌ ମାରି ଜୁଦ୍ଧ୍‌କିନି ଦୁତ୍‌ ଏଣ୍ତେସ୍ ଇସ୍ରାଏଲ ଲୋକାରି ପେରିମାରିନ୍‌ତିଙ୍ଗ୍ ସାପିସ୍‌ କିଏତ୍‌, ଇୟାଉଣ୍ତିଙ୍ଗ୍‌ ଦୁୱାର୍‍ବନ୍ଦ୍‌ଦୁ ନେତେର୍‌ ସିଲେକ୍‌ତେଙ୍ଗ୍‌ ଆଦେସ୍ ସିତାମାରାନ୍ ।
\p
\v 29 ବିସ୍‍ବାସ୍‍ତାନ୍ ଇସ୍ରାଏଲଦି ଲୋକୁ ୱାରିତି ବୁମି ମୁସୁକୁ ବୁଲାତି ୱାଜା ସୁଫ୍‌ ସାମ୍‌ଦୁରୁ ଲୋଇ ସିଜି ନାତାର୍‌; ମାତର୍‌ ମିସର୍‍ତିକାର୍‌ ଆୟାୱାଜା ନାତେଙ୍ଗ୍‌ ସେସ୍ଟା କିଦେଙ୍ଗ୍ ସଲ୍‌ସି ମୁଡ଼ିଗିଜି ସାତାସର୍ହାର୍‌ ।
\p
\v 30 ଇସ୍ରାଏଲତିଲୋକୁ ଜିରିହୋ ଗାଡ଼୍‍ତି ବାଉଡ୍ରି ଗଡା ସାରିବେଡ଼ିତି ବିସ୍‍ବାସ୍‍ତାନ୍‌ ସାତ୍ ଦିନ୍ ବୁଲାତି ୱେନେକା, ଆକା ଦଂସ ଆତାମାର୍ହାତ୍‌ । 
\v 31 ଦାରିପାଣିକିନି ରାହାବ ତାନି ବିସ୍‍ବାସ୍‌ତି ଉଣ୍ତିଙ୍ଗ୍ ଇସ୍ରାଏଲତି ଡଙ୍ଗାଁରିଙ୍ଗ୍‌ ବାଡି ସିତାତ୍‌ ମାରି ମାପୁରୁଦି ବିରୁଦ୍‌କିନି ଲୋକା ୱାଲେ ସାଏଣ୍‌ଗା ରକ୍ଷା ପୋଇତା ମାର୍ହାତ୍‌ ।
\p
\v 32 ନାନ୍‌ ମାରି ଏସୋ ମାଟେଙ୍ଗ୍ ବର୍ଣ୍ଣନାକିଜି ୱେର୍‌ନା ? ଗିଦିୟୋନ, ବାରାକ, ଶାମ୍‍ଶୋନ୍, ଯିପ୍ତାହ, ଦାଉଦ, ସାମୁଏଲ୍‍ ମାରି ବାବବାଦିରି ବିସୟ୍‌ତାନ୍ ୱେର୍‌ତେଙ୍ଗ୍ ସରିଙ୍ଗ୍‍ଁ ବେଡ଼ା ସିଲେତ୍‌ । 
\v 33 ବିସ୍‍ବାସ୍‍ତାନ୍‌ ଇୟାକାର୍‌ ଆଇଆଇ ଦେସ୍‌ ବିରୁଦ୍‌ତାନ୍ ଜୁଦ୍‍ କିଜି ଜିଣାତା ମାର୍ହାର୍‌ । ଇୟାକାର୍‌ ଦାର୍ମୁ ପାଣି ପୁରା କିତାର୍, ମାପୁରୁ ପାର୍‌ମାଣ୍‌ କିତିମାନି ବିସୟ୍‌କୁୱିଜୁ ପୋଇତାର୍‌; ପାର୍ଟାନରେସ୍‌ ୱେୟୁ କେରେପ୍‍ତାର୍‍, 
\v 34 ସିସୁ ନାପ୍‍ତାର୍ ମାରି କାଣ୍ତା ଦାରାଦାନ୍ ରକିୟା ପୋଇତାର୍ । ଇୟାକାର୍‌ ସାକ୍ତିସିଲେତାତ୍, ମାତର୍‌ ସାକ୍ତି ଆତାର୍‌; ଜୁଦ୍‌ଦୁ ଜିଣାତାର୍‌, ମାରି ଆଇଦେସ୍‍ତି ସାତ୍ରୁ ସନ୍ୟରିଙ୍ଗ୍‌ ଆରା କିତାର୍ । 
\v 35 ବିସ୍‍ବାସ୍‍ତାନ୍ ଆଇମେକ୍‍ ତାମେକା ସାତି ନିଜେଦି ଲୋକାଙ୍ଗ୍‌ ଜିବନ୍‌ମାନି ଅବସ୍ଥାଦାନ୍‌ ମାରିଡ଼େସି ପୋଇତେ ।
\p ଆଇକାର୍‌ ଉଣ୍ତ୍ରି ନେଗି ଜିବନ୍‌ ପୋଇନି ଉଣ୍ତିଙ୍ଗ୍‌ ରକିୟା ପୋୟ୍‌ଦେଙ୍ଗ୍‌ ବଦା କିଏଣ୍‌ଗା କାସ୍ଟୁଦାନ୍ ସାତେ ସର୍ହେ । 
\v 36 ଏନ୍‌ ଏନ୍‌ କାସ୍ଟୁ ସାସ୍‌କିତାର୍‍, କରଡାମାଡ୍‍ ପୋଇତାର୍ ମାରି ସିକିଡ଼ିଦାନ୍ ତୋରାଜି ଜଇଲ୍‍ ଦଣ୍ତ ପୋଇତାର୍ । 
\v 37 ୱାର୍‌ କାଲୁକାଣୁକୁ ଡାକ୍‍ତିଙ୍ଗ୍‌ ସାତାର୍, କରତ୍‌ଦାନ୍ ରୁଣ୍ତି ମକେଙ୍ଗ୍‌ ଆତାର୍‌ ମାରି କାଣ୍ତାଦାନ୍ ସାତାର୍ । ଏନ୍‍ ଏନ୍‍ ମେଣ୍ତା ନି ଗରିଆ ତୋଲୁ ଆରାଜି କାକୁର୍ତି ଆତାର୍‌, କାସ୍ଟୁ ନି ତାଡ଼ନା ଆଜି ଆୟାୱାଜା ବୁଲାତାର୍‍ । 
\v 38 ଇୟାୱାଜା ଲୋକା ଉଣ୍ତିଙ୍ଗ୍ ଦୁନିଆଦୁ ନେଗି ବାଡି ସିଲେତାତ୍ । ୱାର୍‌ ବୁଲାନିକାର୍‍ ୱାଜା ବାଲିବୁମିଦୁ ମାରି ଗରନ୍‌ତୁ ବୁଲାତାର୍, ସାରେଙ୍ଗ୍‌ ନି ବୁମିଦିଗୁଟେଆଙ୍ଗ୍‍ଁ ବାସାକିତାର୍ ।
\p
\v 39 ଇୟା ୱିଜେରେ ନିଜେ ନିଜେଦି ବିସ୍‍ବାସ୍‍ତାନ୍ ଏସ ସିନା ଇଟ୍‍ତା ସର୍ହା ମାନାର୍ । ମାରିବା ୱାର୍‌ ମାପୁରୁଦି ସିନି ବିସୟ୍‌ ପୋଇଏତାମାରାର୍, 
\v 40 ଇରିଙ୍ଗ୍‌ ମାପୁରୁ ମା ଉଣ୍ତିଙ୍ଗ୍ ଉନ୍‍ଡ୍ରି ନେଗି ଜଜନା କିତାମାର୍ହାନ୍ । ୱାର୍‌ ମା ୱାଲେ ଏଣ୍ତେସ୍ ପୁରା ଆନାର୍, ଇକାନେ ମାପୁରୁଦି ବଦା ମାରାତ୍ ।
\c 12
\s ମାପୁରୁ ମା ବୁବା
\p
\v 1 ଇୟାୱାଜା ସାକିଲୋକାରି ଉଣ୍ତ୍ରି ପେରି ଦଲ୍ ମା ସାରିବେଡ଼ିତି କେର୍‍ବିତାମାନାର୍ । ମାରି ରାଦୁ, ଏମେ ୱିଜୁ ବିସୟ୍‌ ମାଙ୍ଗିଁ ବାଦା କିଜିନାତ୍ ମାରି ଏମେ ୱିଜୁ ପାପ୍‌ ମାଙ୍ଗିଁ ରେଲ୍‍ଜି ଆସିନାତ୍, ୱିଜୁ ଡ଼ିସ୍‍ସି ଆଟୁୱା ଆଜି ମା ଉଣ୍ତିଙ୍ଗ୍ ତିଆର୍‌ଆତିମାନି ସାରିଦୁ ଉରୁକ୍‍ସି ଆଗ୍‍ଡ଼ି ସନାଟ୍ । 
\v 2 ଏମେୱାନି ମୁସୁକୁ ମା ଟିକ୍ ବିସ୍‍ବାସ୍ ଆସା କିଜିନିକା, ଆୟା ଜିସୁଦି ଉଣ୍ତିଙ୍ଗ୍ ମା କାଣୁକୁ ନେଗିକା ଇଡିନିକା । ୱାନ୍‌ କ୍ରୁସଦି ତିଲାଜି ନିଜେ ପାଣିଦାନ୍ ତେବାଏନ୍‍ ମାର୍ହାନ୍‌; ମାତର୍‍ ୱାନିଦିନ୍‍ତୁ ୱାନି ଉଣ୍ତିଙ୍ଗ୍ ଉଣ୍ତାତିମାନି ୱେଡ଼ିକା ଉଣ୍ତିଙ୍ଗ୍‌, କ୍ରୁସକାଟ୍‌ଦି ସାତିମାନି ଅପମାନ୍‍ତିଙ୍ଗ୍‌ ୱାନ୍‌ ମାନାଏନ୍‍ଣ୍ତା ବୁଦି କିତାନ୍; ଇଲେଇ ୱାନ୍‌ ମାପୁରୁଦି ରାଜାଗାଦିଦି ଉଣିକିୟୁ ତରିନ୍‌ ବାସ୍‌ତାମାନାନ୍ ।
\p
\v 3 ଅଡ଼୍‌ବିଜ ସୁଡ଼ୁଦୁ, ୱାନ୍‌ ଏସୋ ଦୁଃକ୍‍ ପୋଇତାମାନାନ୍ । ୱାନ୍‌ ପାପି ଲୋକାମାଡ଼ାନ୍ ଏସୋ ନିଦା ପୋଇଏତାମାନାନ୍ । ଆଦେଙ୍ଗ୍‍ଁ ମିର୍‌ ମନ୍‍ଉଣା କିଜି ନିରାସ୍‌ ଆମାଟ୍ । 
\v 4 ଇରିଙ୍ଗ୍‌ ମିଙ୍ଗିଁ ଇୟାସାନ୍ଦି ପାପ୍‌ ବିରୁଦ୍‌ତାନ୍ ସାନିନାନି ଜୁଦ୍‌ କିଦେଙ୍ଗ୍ ପୋଡ଼ାଏତ୍ । 
\v 5 ମାପୁରୁ ୱାନି ମାରିନ୍ ୱାଜା ମିଙ୍ଗିଁ ଏମେ ୱେଡ଼ିକା କାବୁର୍ ୱେନିସ୍ତା ମାନାର୍‍, ଆକା ଇନିକା ମିର୍‌ ବାଣାଜିନିଦେର୍‌ ?
\q1 “ଏ ନା ମାରିନ୍, ମାପୁରୁ ମିଙ୍ଗିଁ ସାସନ୍ କିନିୱାଲେ ମୋନଦିୟାନ୍‌ ସିଦୁ ।
\q2 ୱାନ୍‌ ମିଙ୍ଗିଁ ଲାଗାନିୱାଲେ ମନ୍‍ଉଣା କିମାଟ୍ ।
\q1
\v 6 ଇରିଙ୍ଗ୍‌ ମାପୁରୁ ଏମେୱାନିଙ୍ଗ୍ ଜିବନ୍‌ନୋନାନ୍‌, ୱାନିଙ୍ଗ୍‌ ସାସନ୍ କିନାନ୍
\q2 ମାରି ଏମେୱାନିଙ୍ଗ୍ ମାରିନ୍ ଇଜି ମାନାନାନ୍, ୱାନିଙ୍ଗ୍‌ ସାସ୍ତି ସିନାନ୍ ।”
\m
\v 7 ମି ଦୁଃକ୍‌ କାସ୍ଟୁଦିଙ୍ଗ୍‌ ବୁବାଦି ସାସନ୍ ଇଜି ଅଡ଼୍‍ବିଜି ସାସ୍‌ ଆସ୍‍ତୁ, ତେନିମାଡ଼ାନ୍ ମାପୁରୁ ମି ୱାଲେ ମାରିନ୍‌ ୱାଜା ବ୍ୟବହାର୍ କିଜିନାନ୍ ଇଜି ୱେଙ୍ଗିଁଜିନାତ୍‌ । ଇରିଙ୍ଗ୍‌ ବୁବା ଆମାୱାନିଙ୍ଗ୍‌ ସାସନ୍‌ କିଏନ୍‌, ଇୟାୱାଜା ମାରିନ୍ ଏନ୍‌ ମାନାନ୍ ? 
\v 8 ୱାରି ଆଇ ମାରିସିର୍ ୱାଜା ନିଙ୍ଗିଁ ଜଦି ମି ବୁବା ମିସା କିଏନ୍, ଆର୍‌ତିଙ୍ଗ୍‌ ନିନୁ ନିଜେଦି ମାରିନ୍ ଆଇ, ନିନୁ ଉପ୍‍କା ମାରିନ୍ । 
\v 9 ମା ଦୁନିଆଦି ବୁବାର୍ ମାଙ୍ଗିଁ ସାସ୍ତି ସିତିଙ୍ଗ୍ ବା ମାଡୁ ମେନ୍ଦଲ୍‌ତି ବୁବାରିଙ୍ଗ୍‍ ମାନାନିକା । ଆର୍‍ତିଙ୍ଗ୍‍ଁ ମା ମୁସ୍‌କୁପୁର୍‌ତି ବୁବାଦି ସାସନ୍‌ତି ଆଡ୍‍ଗି ଆଜି ତେବାନିକା ଏସ ନାଣ୍ତ ନେଗିମାଟା ! 
\v 10 ମା ଦୁନିଆଦି ବୁବାରି ଆଗ୍‍ଡ଼ି ଏମେକା ତାଗ୍‌ଇକା, ଆୟା ଇସାବ୍‍ତାନ୍‍ ମାଙ୍ଗିଁ ଉଣା ଦିନ୍‌ ଉଣ୍ତିଙ୍ଗ୍‌ ସାସନ୍ କିନାର୍; ମାତର୍‌ ମାଡୁ ଏଣ୍ତେସ୍ ୱାନି ପବିତ୍ରତାଦୁ ମିସାଦେଙ୍ଗ୍ ଆଟ୍‍ନିକା, ଇୟାଉଣ୍ତିଙ୍ଗ୍‌ ମାପୁରୁ ମା ନେଗି ଉଣ୍ତିଙ୍ଗ୍ ମାଙ୍ଗିଁ ସାସନ୍ କିନାନ୍ । 
\v 11 ସାସ୍ତି ପୋଇନି ୱାଲେ ମାଙ୍ଗିଁ ଆକା ଦୁଃକ୍‍ଅଡ଼୍‌ବିନିକା ମାନାତ୍‌, ମୁଡ଼ୁକେ ୱେଡ଼ିକାଦିକା ଆଏତ୍‌ । ମାତର୍‌ ସାସ୍ତିଦାନ୍ ଏମେୱାରି ଜିବନ୍‌ ସାନ୍ତି ଆନାତ୍‌, ୱାର୍‌ ୱେନ୍‍କା ସାନ୍ତିଦି ଦାର୍ମୁଦି ଜିବନ୍‌ ୱାଜା ପୁରସ୍କାର୍‌ ପୋଇନାର୍‍ ।
\s ଉପଦେସ୍‌ ନି ଜାଗାର୍‍ତାମାଟା
\p
\v 12 ଆଦେଙ୍ଗ୍‍ଁ ମି ସାକିସିଲି କିୟୁ ମୁସ୍‌କୁ ପେରୁଦୁ ମାରି ତିରିଗ୍‌ନି ମେଣ୍ତାଦିଙ୍ଗ୍‌ ସାକ୍ତି କିଦୁ । 
\v 13 ମାରି ନିଜେ ନିଜେଦି ପାଦାମ୍‌ତି ଉଣ୍ତିଙ୍ଗ୍‌ ସିଦା ସାରିଙ୍ଗାଁ ବୁଲାଦୁ; ଆର୍‌ତିଙ୍ଗ୍‌ ମି ସଟା କାଲୁ ସଟାଆଏଜି ନେଗେନ୍‍ ତେବାନାତ୍ ।
\p
\v 14 ୱିଜେରି ୱାଲେ ସାନ୍ତିଦାନ୍ ବାସାକିଦେଙ୍ଗ୍ ମାରି ପବିତ୍ରଦାନ୍‌ ଜିଦେଙ୍ଗ୍‌ ସେସ୍ଟା କିଦୁ; ଇରିଙ୍ଗ୍‌ ତାନି ବାଦୁଲୁ ଏନ୍‌ ପ୍ରବୁଦି ଦର୍ସନ ପୋଇଦେଙ୍ଗ୍‌ ଆଟ୍‌ଏନ୍‌ । 
\v 15 ଜାଗାର୍‍ତା, ଏଣ୍ତେସ୍ ମାପୁରୁଦି ଦୟାଦାନ୍ ତେବାମାଟ୍‍ । କେୟ୍‍ନି ମାରାନ୍ ୱାଜା ଆମାଟ୍ । କେୟ୍‍ନି ମାରାନ୍ ପିରିତିଙ୍ଗାଁ, ତାନି ୱିସାମ୍‍ତି ମାଡ଼ାନ୍ ନାଣ୍ତ ନାସ୍ଟୁ ଆନାତ୍‌ । 
\v 16 ଏସୌ ୱାଜା ଏନ୍‍ ତାଗ୍‍ଇକାନ୍ ମାରି ଅଦାର୍ମୁଦିକାନ୍‌ ଆମାଟ୍; ୱାନ୍‌ ତୋ ଉନ୍‌ଡ୍ରେ ଅଡିଦି କାଦି ଉଣ୍ତିଙ୍ଗ୍‌ ପେରିଅଦିକାର୍‌ ପୋର୍‍ତା ମାର୍ହାନ୍‌ । 
\v 17 ମିର୍‌ ନେସ୍‌ତିମାନିଦେର୍‌ ଜେ, ୱାନ୍‌ ବୁବାଦି ଆସିର୍ବାଦ୍‌ତି ଅଦିକାରି ଆନି ଉଣ୍ତିଙ୍ଗ୍‌ ବଦା କିତାନ୍‌, ମାତର୍‌ ଡ଼ିସାୟ୍‍ ଆତାତ୍‌ । ମାରି ଏତ୍‌କିନି ନାଣ୍ତ କାଣେର୍‍ଙ୍ଗୁଁ ୱାକ୍‍ସି ଜାତୁନ୍‌ତାନ୍‌ ସେସ୍ଟା କିତିଙ୍ଗ୍‌ବା ଆକା କିନି ଉଣ୍ତିଙ୍ଗ୍‌ ମାରି ସୁଜୋଗ୍‌ ପୋଇଏତାନ୍‌ ।
\p
\v 18 ଇସ୍ରାଏଲ୍‍ତିଲୋକୁ ୱାଜା ମିର୍‌ ସିନାଇ ଗରନ୍‌ତୁ କାସ୍‌ସିମାନି ସିସୁ, ସିର୍‌ ସିକାଟି, ନାଣ୍ତଗାଲିପିରୁ, 
\v 19 ବାଜାମରିଦି ଆଉଲି ମାରି ବାକ୍ୟଦି ବଲୁ ଲାକ୍‌ତୁ ରେଇଦେର୍‌, ଲୋକୁ ଆୟା ବଲୁ ୱେନ୍‌ଜି ଏଣ୍ତେସ୍‌ ୱାରିଙ୍ଗ୍‌ ମାରି ଆମାଇନି ବାକ୍ୟ ୱେର୍‌ଏର୍‌, ଇକା ଅନୁରଦ୍‌ କିତାମାର୍ହାର୍‌, 
\v 20 ଇରିଙ୍ଗ୍‌ ଆମାଇନି “ଜାତୁ ବା ଜଦି ଆୟା ଗରନ୍‌ତିଙ୍ଗ୍‌ ମୁଟ୍‍ତିଙ୍ଗ୍‌, ଆର୍‌ତିଙ୍ଗ୍‌ ତାନିଙ୍ଗ୍ କାଲ୍‍କାଣ୍‍କୁ ସାୟାମାର୍‌ଗା ଡାକ୍‍ନାର୍‍,” ଇୟା ଆମା ମାଟା ସିଆୟ୍‌ଆତା ମାର୍ହାତ୍‌ ଆକା ୱାର୍‌ ସାସ୍‌ କିଦେଙ୍ଗ୍‌ ଆଟ୍‌ଏତାର୍‌ । 
\v 21 ମାରି ଆୟା ସୁଡ଼ୁତିକା ଇୟାୱାଜା ତିଲାନିକା ମାରାତ୍ ଜେ, ମୋସା ଇର୍ହାମାରାନ୍, “ନାନୁ ତିଲାତା ମାରି ତିର୍‌ଗିଜିନା ।”
\p
\v 22 ମାତର୍‌ ମିର୍‌ ୱାତିମାନିଦେର୍‌ ସିୟୋନ ଗରନ୍‌ତୁ ମାରି ଜିବନ୍‌ତି ମାପୁରୁଦି ଗାଡ଼୍‌, ମୁସ୍‌କୁପୁର୍‌ତି ଜିରୁସାଲମ୍‌ତୁ, ଏମେମାନୁ ହଜାର୍‌ ହଜାର୍‌ ମୁସ୍‌କୁପୁର୍‌ତି ଦୁତ୍‍କା ଦୋଲ୍ । 
\v 23 ମାପୁରୁଦି ଏମେ ଆଗ୍‌ଡ଼ି ଜନମ୍‌ଆତି କଡ଼ର୍‌ଆଇଲିକା ଦରୁ ମୁସ୍‍କୁପୁର୍‍ତୁ ରାସାତା ମାନାତ୍, ମିର୍‌ ୱାରି ୱେଡ଼ିକାଦୁ ୱାତିମାନିଦେର୍‍ । ୱିଜୁ ଲୋକା ଜାତିଦି ବିଚାର୍‌କିନି ମାପୁରୁଦି ଲାକ୍‌ତୁ ମାରି ପୁରା ଦାର୍ମୁଦି ଲୋକାଦି ଆତ୍ମେଙ୍ଗାଁ ଲାକ୍‌ତୁ ମିର୍‌ ୱାତିମାନିଦେର୍‌ । 
\v 24 ମାରି, ପୁନି ନିୟମ୍‌ ତିଆର୍ ଆତିମାନି ଜିସୁଦି ଲାକ୍‌ତୁ ମାରି ଏମେୱାନି ନେତେର୍ ହେବଲଦି ନେତେର୍‌ ବାଦ୍‍ଲୁ ନେଗି ବାକ୍ୟ ସିନାନ୍ ଇଜି ଆସା କିଜିନା, ଆୟା ନେତେର୍ ଲାକୁତୁ ୱାତିମାନିଦେର୍‌ ।
\p
\v 25 ଆୟାଉଣ୍ତିଙ୍ଗ୍‌ ଜାଗାର୍‍ତା, ଏନ୍‌ ବାକ୍ୟ ୱେର୍‌ସିନାନ୍‌, ୱାନିଙ୍ଗ୍‌ ଡ଼ିସ୍‌ମାଟ୍ । ମୁସ୍‌କୁପୁର୍‌ତାନ୍‌ ବାକ୍ୟ ଆସ୍‌ସି ୱାଜି ଦୁନିଆଦୁ ତାନିଙ୍ଗ୍‌ ୱେର୍‍ତିମାନି ଲୋକ୍‍ତି ଉଣ୍ତିଙ୍ଗ୍‍ ଏମେକାର୍ ୱେନ୍‍ଏତାର୍, ୱାର୍‌ ଏର୍‍ବା ରକିୟା ପୋୟ୍‌ଏତାର୍ । ଆର୍‌ତିଙ୍ଗ୍‌, ଇଲେଇ ଏନ୍‍ ମୁସ୍‍କୁପୁର୍‌ତୁ ମାନ୍‌ଜି ୱାର୍‌ଗିଜିନାନ୍‍, ୱାନିଙ୍ଗ୍‌ ଡ଼ିସ୍‍ତିଙ୍ଗ୍‍ ମାଡୁ ଇନିକା ରକିୟା ପୋଇଦେଙ୍ଗ୍ ଆଟ୍‍ନିକା ? 
\v 26 ନାସ୍ତିୱାଲେ ୱାନି ବଲୁ ପୃତିବିଦିଙ୍ଗ୍‌ ଦୁକ୍‌ତା ମାର୍ହାତ୍‌ । ମାତର୍‌ ଇଲେଇ ୱାନ୍‌ ପାର୍‌ମାଣ୍‌ କିଜି ଇର୍ହାମାନାନ୍‌, “ନାନୁ ମାରିଡ଼େସି କେବଲ ପୃତିବିଦିଙ୍ଗ୍‌ ସିଲେ, ବାଦଡ଼୍‍ତିଙ୍ଗ୍‍ ବା ଦୁକ୍‌ନା ପୋକ୍‌ନା ।” 
\v 27 ଇବେଟ୍‌ତାନ୍‌ ଟିକ୍ ଜେ, ୱାନ୍‍ “ମାରିଡ଼େସି” ଆମାକା କିନାନ୍‌, ତାନିମାଡ଼ାନ୍ ତିଆର୍‍ଆତି ୱିଜୁ ବିସୟ୍‌ ଦୁଙ୍ଗୁଁଜି ମାର୍‌ଗାନାତ୍‌ । କେବଲ ଏମେ ୱିଜୁ ବିସୟ୍‌ ଦୁଙ୍ଗୁଁଦେଙ୍ଗ୍‌ ଆଟ୍‌ଉ, ଆକା ଡାଟ୍‌ ଆଜି ତେବାନାତ୍ ।
\p
\v 28 ଆଦେଙ୍ଗ୍‌ ରାଦୁ, ମାଡ୍‍ ଦନ୍ୟବାଦ୍‌ ସିନାଟ୍‍, ଇରିଙ୍ଗ୍‌ ମାଡ୍‍ ଉନ୍‍ଡ୍ରି ଆଟ୍‌ୱା ରାଜି ପୋୟ୍‍ନାଟ୍‍ । ରାଦୁ, ମା ଦନ୍ୟବାଦ୍‌ ସିଜି ମାରି ବକ୍ତି ନି ତିଏଲ୍‌ତି ୱାଲେ ମାପୁରୁଦି ୱେଡ଼ିକା ଆଜି ୱାନିଙ୍ଗ୍‌ ପୁଜା କିନାଟ୍ । 
\v 29 ଇରିଙ୍ଗ୍‌ ସତ୍‌ତାନ୍‌ ମା ମାପୁରୁ ଅରେନ୍ ଦଂସକିନି ସିସୁ ୱାଜା ।
\c 13
\s ଏଣ୍ତେସ୍‍ ମାପୁରୁଙ୍ଗୁଁ ୱେଡ଼ିକା କିନିକା
\p
\v 1 କ୍ରିସ୍ତ ବିସ୍‍ବାସି ତୋଡ଼ାନ୍‌କୁ ନି ତାଙ୍ଗିଁକ୍‍ ନିଜେନିଜେଦିଙ୍ଗ୍‌ ଜିବନ୍‍ନୋଜି ମାଣ୍ତ୍ରୁ । 
\v 2 ୱାଜିମାନି ଲୋକାଙ୍ଗ୍‌ ମି ଇଲୁତୁ କୁକ୍‍ତୁ । ଇକା କିନି ମାଡ଼ାନ୍ ଏନ୍‍ ଏନ୍‍ ନେସ୍‍ଏଣ୍‍ଗା ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ସେବାକିତାମାନାର୍‍ । 
\v 3 ଜଇଲ୍‍ତୁମାନି ଲୋକା ୱାଲେ ନିନ୍‌ ନିଜେ ଜଇଲ୍‍ତୁ ତେବାଜି ଦଣ୍ତ ପୋଇଜିନି ୱାଜା ଅଡ଼୍‍ବିଜି ୱାରିଙ୍ଗ୍ ଏତ୍‌କିଦୁ । ଦୁଃକ୍‍କାସ୍ଟୁ ବଗ୍‌ କିଜିମାନି ଲୋକା ୱାଲେ ୱିଜୁ ଦୁଃକ୍‍ ସିନ୍ତା କିଜି ୱାରିଙ୍ଗ୍ ଏତ୍‌ କିଦୁ ।
\p
\v 4 ପେଡ଼ି ୱିଜେରି ଉଣ୍ତିଙ୍ଗ୍ ନେଗିକା ଆପିତ୍‌, ମେମାରି ନି ଆଇମା ନିଜେନିଜେଦି ଉଣ୍ତିଙ୍ଗ୍ ବିସ୍‍ବାସ୍‍ତାନ୍ ତେବାପିର୍‌ । ମାପୁରୁ ଲାଲାୟ୍‍ଆନି ୱାରିଙ୍ଗ୍‍ ମାରି ଦାରିପାଣିକିନିୱାରିଙ୍ଗ୍‍ ବିଚାର୍‌ କିନାନ୍ ।
\p
\v 5 ଦନ୍‍ସମ୍ପତି ଆସାଦାନ୍‍ ଆକତେବାଦୁ ମାରି ମି ଏମେକା ମାନାତ୍, ଆବେନ୍‌ ୱେଡ଼ିକାଦାନ୍‍ ତେବାଦୁ । ଇରିଙ୍ଗ୍‌ ମାପୁରୁ ଇର୍ହାମାନାନ୍‌, “ନାନୁ ମିଙ୍ଗିଁ ଡ଼ିସ୍‍ଏ, ନାନୁ ନିଙ୍ଗିଁ ଏସାଙ୍ଗ୍ ପେର୍‍ଏ ।” 
\v 6 ମାରି ମାଡୁ ସାହାସ୍‍ତାନ୍‍ ଇନ୍‌ଡ୍ରେଙ୍ଗ୍‌ ଆଟ୍‍ନିକା,
\q1 “ପ୍ରବୁ ନା ସାକାକିନିକାନ୍‍ ।
\q2 ନାନୁ ତିଲାଏ,
\q1 ଏନ୍‍ ନା ଅନିସ୍ଟ କିଦେଙ୍ଗ୍‍ ଆଟ୍‍ନାନ୍ ?”
\p
\v 7 ଏମେ ନେତାର୍ ପୁର୍ବେ ମିଙ୍ଗିଁ ମାପୁରୁଦି ବାକ୍ୟ ୱେର୍‍ତା ମାର୍ହାର୍, ୱାରିଙ୍ଗ୍ ଏତ୍‍କିଦୁ । ୱାରି ଜିବନ୍‌ ବା ସାନିକା ଏଣ୍ତେସ୍‌ନାନିକା ମାର୍ହାତ୍, ଆକା ଏତ୍‍କିଜି ୱାରି ବିସ୍‍ବାସ୍‍ତିଙ୍ଗ୍‍ ନିଜେଦି ଜିବନ୍‍ତୁ ଆସ୍‌ତୁ । 
\v 8 ଜିସୁ କ୍ରିସ୍ତ ଇଏନ୍‍, ନେରୁ ମାରି ୱିଜୁଦିନ୍‌ ସାମାନ୍ ମାନାନ୍ । 
\v 9 ଆଇ ଆଇ ବୁଲ୍‍ ଦାର୍ମୁ ସିକ୍‌ୟା ମିଙ୍ଗିଁ ସତ୍‌ ସାରିଦାନ୍ ୱେର୍‌ଏ କିମାକିତ୍‍ । ମାପୁରୁଦି ଦୟାଦାନ୍ ଜିବନ୍‌ତି ଉଣ୍ତିଙ୍ଗ୍ ସାକ୍ତି ଉଣ୍ତାକିନିକା ନେଗିକା, କାଦି ଉଣି ବିସୟତାନ୍ ନିୟମ୍‌ ମାନାନି ମାଡ଼ାନ୍ ଇକା ଆଦେଙ୍ଗ୍‍ଁ ଆଟ୍ଏତ୍ । ଆତ୍‌ରେରି ବିଦି ୱିଜୁ ମାନାଜିମାନି ଲୋକୁ ଆବେଣାନ୍‍ ଇନି ଉପକାର୍ ପୋୟ୍‍ଏର୍‍ ।
\p
\v 10 ମା ଏମେ ଜଜ୍ଞ ବେଦି ମାନାତ୍, ଆବେନୁ ମାନି ପୁଜାସିତିମାନି କାଦି ଉଣ୍ତେଙ୍ଗ୍‌ ଜିହୁଦି ଜାଜକରି ଅଦିକାର୍ ସିଲେତ୍‌ । 
\v 11 ଜିହୁଦି ପେରିଜାଜକ ବଲି ସିତିମାନି ଜାତୁଦି ନେତେର୍‌ ପାପ୍‌ତି ବାଦ୍‍ଲୁ ୱାଜା ପୁଜାସିଦେଙ୍ଗ ମହାପବିତ୍ର ବାଡିଦୁ ଆସ୍‌ସି ସନାର୍; ମାତର୍‌ ଆୟା ଜାତୁଦି ମେନ୍ଦଲ୍‌ ନାର୍‌ତି ଆତେରେ ଆଡ଼ାକ୍‌ନା ପୋକନାର୍ । 
\v 12 ଆୟାୱାଜା ଜିସୁ ବା ନିଜେଦି ନେତେର୍‌ତାନ୍‌ ଏଣ୍ତେସ୍‌ ଲୋକାଙ୍ଗ୍ ପାପ୍‌ଦାନ୍ ପବିତ୍ର କିନି ଉଣ୍ତିଙ୍ଗ୍‌ ଗାଡ଼୍‌ତି ଆତେରେ ସାତାନ୍ । 
\v 13 ଆଦେଙ୍ଗ୍‌ ସାଦୁ, ମାଡୁ ବା ଗାଡ଼୍‌ ଆତ୍‌ରେ ୱାନି ଲାକୁତୁ ସନାଟ୍ ମାରି ୱାନି ୱାଲେ ନିନ୍ଧା, ଅପମାନ୍ ସାସ୍‌ କିନାଟ୍ । 
\v 14 ଇରିଙ୍ଗ୍‌ ମା ଉଣ୍ତିଙ୍ଗ୍‌ ଇୟା ଜଗତ୍‌ଦୁ ଆମାଇନି ୱିଜୁଦିନ୍‍ତି ତେବାନି ଗାଡ଼୍‌ ସିଲେତ୍‌, ଏମେ ଗାଡ଼୍‌ ବବିସତ୍‌ଦୁ ତିଆର୍‍ ଆନାତ୍, ମାପ୍‌ ଆୟା ଗାଡ଼୍‌ତିଙ୍ଗ୍‌ କାପ୍‍କିଜିନାପ୍‌ । 
\v 15 ମାରି ରାଦୁ, ମାପ୍‌ ଜିସୁଦି ମାଣାନ୍‌ ମାପୁରୁଙ୍ଗୁଁ ମା ପ୍ରସଂସା ନାନି ବଲି ସିନାଟ୍‍ । ଇୟା ବଲି ଜିସୁଙ୍ଗୁଁ “ପ୍ରବୁ” ଇଜି ମାନାଜିମାନି ୱେୟୁଦାନ୍‌ ପୁଜା କିନାଟ୍ । 
\v 16 ଆଇୱାରି ନେଗିପାଣି କିଦେଙ୍ଗ୍‌ ମାରି ୱାରିଙ୍ଗ୍ ସାହାଜ୍ୟ କିଦେଙ୍ଗ୍‌ ବାଣାମାଟ୍, ଇରିଙ୍ଗ୍‌ ଇୟାୱିଜୁ ନେ ମାପୁରୁଦି ୱେଡ଼ିକାଦି ବଲି ୱାଜା ।
\p
\v 17 ମି ନେତାରି ଆଡ୍‍ଗି ଆଦୁ, ୱାରି ଆଦେସ୍‍ ଆସ୍‍ତୁ । ୱାର୍‌ କାପ୍‍କିନିଲୋକ୍‍ ୱାଜା ମି ଆତ୍ମାଦି ରକ୍ଷା ଉଣ୍ତିଙ୍ଗ୍ ରମ୍‍ଏଣ୍‍ଗା କାପ୍‌କିତାମାନାର୍, ଇରିଙ୍ଗ୍‌ ୱାରିଙ୍ଗ୍ ମାପୁରୁଦି ଲାକୁତୁ ନିଜେଦି ପାଣିଦି ଇସାପ୍ ସିଦେଙ୍ଗ୍‌ ପଡ଼ାନାତ୍‌ । ମିର୍‌ ଜଦି ୱାରି ଆଡ୍‍ଗି ଆନିଦେର୍‌, ଆର୍‌ତିଙ୍ଗ୍‌ ୱାରୁ ୱେଡ଼ିକାଦି ମୋନତାନ୍ ନିଜେଦି ପାଣି କିନାର୍, ମାତର୍‌ ଜଦି ଆକା କିଇଦେର୍‌, ଆର୍‌ତିଙ୍ଗ୍‌ ୱାର୍‌ ଦୁଃକ୍‌ ମୋନତାନ୍ ଆକା କିନାର୍ ମାରି ଇକା ମି ଉଣ୍ତିଙ୍ଗ୍‌ ନେଗିକା ଆଏତ୍‍ ।
\p
\v 18 ମା ଉଣ୍ତିଙ୍ଗ୍ ପାର୍‌ତନା କିଦୁ । ମା ବୁଦି ଜେ ନେଗିକା, ଇବେନୁ ନାମ୍‌ଇକା ସିଲେତ୍‌, ଇରିଙ୍ଗ୍‌ ୱିଜୁଦିନ୍ ନେଗେନ୍‍ ଜିଦେଙ୍ଗ୍‌ ମା ଉଣ୍ତ୍ରେ ବଦା । 
\v 19 ମାରି, ମାପୁରୁ ନାଙ୍ଗିଁ ମି ଲାକ୍‌ତୁ ବେଗି ପୋକିନ୍‍, ମିର୍‌ ନା ଉଣ୍ତିଙ୍ଗ୍‌ ଇୟା ପାର୍‌ତନା କିଜିମାଣ୍ତ୍ରୁ । ଇକା ମି ଲାକ୍‌ତୁ ନା ଜିବନ୍‍ତାନ୍‍ ଅନୁରୋଦ୍‌ କିଜିନା ।
\s ସାରାସାରି ପାର୍‍ତନା
\p
\v 20 ଏନ୍‌ ନିଜେଦି ବଲିଦାନ୍‌ ମେଣ୍ତେଆଙ୍ଗାଁ “ପେରି ମେଣ୍ତେଙ୍ଗ୍‌ସାରାକିନିକାନ୍‌” ଆତାମାନାନ୍‌, ମା ଆୟା ପ୍ରବୁ ଜିସୁଙ୍ଗୁଁ ମାପୁରୁ ସାତିମାଣାନ୍‌ ମାରିଡ଼େସି ନିକ୍‌ତାମାନାନ୍‌ । ଆୟା ଜିସୁଦି ସାତି ବଲିଦି ନେତେର୍‌ତାନ୍‌ ଉଣ୍ତ୍ରି ୱିଜୁଦିନ୍‌ତି ନିୟମ୍‌ ଆତାମାନାତ୍‌ । ସାନ୍ତିସିନି ମାପୁରୁ ୱାନି ବଦା ମାନାନି ଉଣ୍ତିଙ୍ଗ୍‌ ମି ଦର୍‌କାର୍‌ତି ଇସାବ୍‌ତାନ୍‌ ୱିଜୁ ନେଗି ବିସୟ୍‌ ସିପିନ୍‌ । 
\v 21 ମାରି ଜିସୁ କ୍ରିସ୍ତଦି ମାଣାନ୍‍ ମା ଜିବନ୍‍ତୁ ୱାନି ୱେଡ଼ିକାଦି ନେଗି ପାଣି ପୁରା କିପିନ୍‍ । ଜୁଗ୍‌ ଜୁଗ୍‍ ଗୌରବ୍‍ ୱାନିନ୍ଦି ଆପିତ୍‌ । ଆମେନ୍‍ ।
\s ସାରାସାରି ମାଟା
\p
\v 22 ଏ ତଡ଼ାନ୍‌କୁ ନି ତାଙ୍ଗିଁକ୍‍, ଅନୁରୋଦ୍‌ କିଜିନା, ନା ଇୟା ଆକୁଦି ବାକ୍ୟ ଉଣ୍ତିଙ୍ଗ୍‌ ସାସ୍ତି ୱାଲେ ମୋନଦିୟାନ୍‌ ସିଦୁ । ମିଙ୍ଗିଁ ୱେଡ଼ିକା କିନି ଉଣ୍ତିଙ୍ଗ୍ ଇକା ନାନୁ ରାସ୍‍ତାମାନା । 
\v 23 ମା ତଡ଼ାନ୍ ତିମତି ଜଇଲ୍‍ତାନ୍ ମୁକ୍‍ଡ଼ାତାମାନାନ୍ ଇଜି ନେସ୍‍ନିଦେର୍‍ । ୱାନ୍‍ ଜଦି ବେଗି ୱାନାନ୍‍, ଆର୍‌ତିଙ୍ଗ୍‌ ନାନୁ ୱାନିଙ୍ଗ୍‍ ଅର୍‌ସେ ଆସ୍‌ସି ମି ଲାକ୍‌ତୁ ୱାନା ।
\p
\v 24 ମି ୱିଜେରି ପେରିୱାରିଙ୍ଗ୍ ମାରି କ୍ରିସ୍ତ ବିସ୍‍ବାସିରିଙ୍ଗ୍ ମା ନମସ୍କାର୍ ଜାଣେ କିଦୁ । ଇଟାଲି ଦେସ୍‍ତାନ୍ ୱାତିମାନି ତଡ଼ାନ୍‌କୁ ମିଙ୍ଗିଁ ନମସ୍କାର୍ କିଜିନାର୍ ।
\p
\v 25 ମି ୱିଜେରି ଲାକ୍‌ତୁ ମାପୁରୁଦି ଦୟା ୱିଜୁଦିନ୍ ମାନିତ୍ ।