\id 1TH - Kopo
\ide UTF-8
\h ୧ ତେସଲନିକିୟ
\toc3 ୧ ତେସଲନିକିୟ
\toc2 ୧ ତେସଲନିକିୟ
\toc1 ତେସଲନିକିୟ ମଣ୍ତଲିଦୁ ପାଉଲଦି ପାର୍‍ତୁମ୍‍ ଆକୁ
\mt2 ତେସଲନିକୀୟମାନଙ୍କ ନିକଟକୁ ପାଉଲଙ୍କ ପ୍ରଥମ ପତ୍ର
\mt1 ତେସଲନିକିୟ ମଣ୍ତଲିଦୁ ପାଉଲଦି ପାର୍‍ତୁମ୍‍ ଆକୁ
\imt ତେସଲନିକିୟ ଆକୁ ବିସୟ୍‌ତାନ୍‌ ଏସ ମାଟା
\ip ୧ ତେସଲନିକିୟ ପ୍ରେରିତ ପାଉଲତି ମାଣାନ୍‌ ରାସାତାମାର୍ହାତ୍‌ \xt ୧:୧\xt* । ଇକା ଆନାତ୍‌ ପାଉଲତି ମାଣାନ୍‌ ପାର୍‌ତୁମ୍‌ ଆକୁ ରାସାତାମାର୍ହାତ୍‌ ମାରି ଆକା ବାଇବଲତି ଉନ୍‌ଡ୍ରି ବାଗ୍‌ ଆତାମାନାତ୍‌ । ଇକା ଜିସୁ କ୍ରିସ୍ତଦି ଜନମ୍‌ତି ପାକାପାକି ୫୧ ବାର୍ସେକ୍‌ ୱେନ୍‌କା ରାସାତାମାନାତ୍‌ । ପାଉଲ ଏସ୍ତିୱାଲେ ତେସଲନିକି ମଣ୍ତଲିଦୁ ସିଟି ରାସ୍‌ତାନ୍‌, ନାସ୍ତିୱାଲେ ୱାନ୍‌ କରନ୍ତି ମଣ୍ତଲିଦୁ ମାର୍‌ର୍ହାନ୍‌ । ଆମା ମଣ୍ତଲିକି ୱାନ୍‌ ରିଜା ସନି ୱାଲେ ଆୟା ମଣ୍ତଲି ତିଆର୍‌ କିତାମାର୍ହାନ୍‌ \xt ପ୍ରେରିତ ୧୭:୧-୧୦\xt* । ଇକା ପ୍ରେରିତ ବଇଦୁ ଇନାୟ୍‌ଆନାତ୍‌ ଜେ, ଇକା ଏସ ଜିହୁଦି ମାରି ଏସ ଗ୍ରିକ୍‌ ବାସାଦାନ୍‌ ୱାର୍‌ଗିଜିମାନି ଲୋକା ମାଣାନ୍‌ ତିଆର୍‌ଆତା ମାର୍ହାତ୍‌ ।
\ip ପାଉଲ ମଣ୍ତଲି ତିଆର୍‌ କିତିୱେନ୍‌କା ୱାନ୍‌ ନାଣ୍ତ ଦିନ୍‌ ତେସଲନିକିୟଦୁ ତେବାଦେଙ୍ଗ୍‌ ଆଟ୍‌ଏତାନ୍‌ । ଆଦେଙ୍ଗ୍‌ ସାରାସାରିୱେନ୍‌କା ଆବେନୁ ମାନି ବିସ୍‌ବାସ୍‌ସିରିଙ୍ଗ୍‌ ସାହାସ୍‌ ସିଦେଙ୍ଗ୍‌ ୱାନ୍‌ ଇୟା ସିଟି ପୋଅକ୍‌ତାନ୍‌ । ଅରେନ୍‌ କ୍ରିସ୍ଟିୟାନ୍‌ ଏଣ୍ତେସ୍‌ ଜିଦେଙ୍ଗ୍‌ ଆନାତ୍‌, ଇୟା ସିଟିଦୁ ନାଣ୍ତ ବିସୟ୍‌ ମାରି ଆଇଆଇ ସାମାନ୍‌ତି ଆଦେସ୍‌କୁ ତେବାତେମାନେ ।
\ip ପାଉଲ ଏସମାନୁ ମାରିଉନ୍‌ଡ୍ରି ଦେବା ୱାନି ବିସୟ୍‌ତାନ୍‌ ମୋନ୍‌ଦିୟାନ୍‌ ସିନାନ୍‌ । ଆନାତ୍‌ସୁଗି ତେସଲନିକୟ ମଣ୍ତଲିଦି ବିସ୍‌ବାସିର୍‌ ଟିକ୍‌ତାନ୍‌ ଇୟା ବିସୟ୍‌ତାନ୍‌ ୱେଡ଼ିକା ମାର୍ହାର୍‌ । ପାଉଲ ମାରିଉନ୍‌ଡ୍ରି ଦେବା ୱାନି ବିସୟ୍‌ତାନ୍‌ ୱେର୍‌ସି ଏଣ୍ତେସ୍‌ ମାପୁରୁଙ୍ଗୁଁ ୱେଡ଼ିକା କିନି ୱାଜା ଜିନିମାଡ଼ିନି ଉଣ୍ତିଙ୍ଗ୍‌ ଆଦେସ୍‌ ସିନାନ୍‌ \xt ୫:୬-୮\xt* ।
\iot ଇୟା ଆକୁଦୁ ମାନି ଏସ ମୁକିୟ ବିସୟ୍‌
\io1 ୧. ପାଉଲ ମଣ୍ତଲିଦିଙ୍ଗ୍‌ ନମସ୍କାର୍‌ କିଜି ମାରି ମାପୁରୁଙ୍ଗୁଁ ଦନ୍ୟବାଦ୍‌ କିଜି ଇୟା ବଇ ଆରାମ୍‌ କିନାନ୍‌ । \ior ୧\ior*
\io1 ୨. ୱେନ୍‌କା ୱାନ୍‌ ତିମତି ତାତିମାନି କାବୁର୍‌ ମାରି ୱାନି ପାଣି ବିସୟ୍‌ତାନ୍‌ ବୁଜାକିତାନ୍‌ । \ior ୨–୩\ior*
\io1 ୩. ପାଉଲ ଆଦେସ୍‌ ସିନାନ୍‌ ଜେ, କ୍ରିସ୍ଟାନ୍‌କୁ ଜିସୁ କ୍ରିସ୍ତଦି ମାରିଉନ୍‌ଡ୍ରି ଦେବା ୱାନି ଜାୟ୍‌ତୁ ଏଣ୍ତେସ୍‌ ଜିନିମାଡ଼ିନିକା ମାନାତ୍‌ । \ior ୪:୧–୫:୧୫ \ior*
\io1 ୪. ପାଉଲ ମାରିଉନ୍‌ଡ୍ରିଦେବା ମଣ୍ତଲିଦିଙ୍ଗ୍‌ ନମସ୍କାର୍‌ କିନାନ୍‌ ମାରି ୱାରିଙ୍ଗ୍‌ ଏଣ୍ତେସ୍‌ବା ସିଟି ପଡ଼ାଦେଙ୍ଗ୍‌ ୱେର୍‌ସି ୱିସ୍‌ନାନ୍‌ । \ior ୫:୧୬-୨୮\ior*
\c 1
\p
\v 1 \x + \xo ୧:୧ \xo*\xt ପ୍ରେରିତ ୧୭:୧.\xt*\x*ପାଉଲ, ସିଲା ମାରି ତିମତିଦି
\p ଲାକ୍‌ତୁ ତେସଲନିକିଆଦୁ ମାନି ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦି ବିସ୍‌ବାସ୍‌ତି ମଣ୍ତଲିଦୁ ଇୟା ଆକୁ ।
\p ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦି ଦୟା ମାରି ସାନ୍ତି ମି ଉଣ୍ତିଙ୍ଗ୍‌ ଆପିତ୍‌ ।
\s ତେସଲନିକିୟରି ଜିବନ୍‌ ମାରି ବିସ୍‌ବାସ୍‌
\p
\v 2 ମାପ୍‌ ୱିଜୁଦିନ୍‌ ମି ୱିଜୁଲୋକାଙ୍ଗ୍‌ ଉଣ୍ତିଙ୍ଗ୍‌ ମାପୁରୁଙ୍ଗ୍‌ ଦନ୍ୟବାଦ୍‌ ସିଜିମାନାପ୍‌ ମାରି ମା ପାର୍‍ତନାଦୁ ମି ବିସୟ୍‌ତାନ୍‌ ୱିଜୁଦିନ୍ ୱେର୍‌ସିମାନାପ୍‌ । 
\v 3 ମା ବୁବା ମାପୁରୁଦି ଲାକ୍‌ତୁ ଏତ୍‌କିଜି ମାନାପ୍‌, ଏଣ୍ତେସ୍‌ ମିର୍‌ ନିଜେଦି ବିସ୍‌ବାସ୍‌ତିଙ୍ଗ୍‌ ପାଣିଦୁ ତର୍‍ସିନିଦେର୍‌, ଜିବନ୍‌ନୋଜି ମିସାଜି ଏଣ୍ତେସ୍‌ ଆଟ୍‌ୱା ପାଣି କିଜିନିଦେର୍‌ ମାରି ମା ପ୍ରବୁ ଜିସୁ କ୍ରିସ୍ତଦି ଲାକ୍‌ତୁ ମି ଆସା ଏଣ୍ତେସ୍‌ ଆଟ୍‌ୱା । 
\v 4 ଏ ନା ତଡ଼ାନ୍‌କୁ ନି ତାଙ୍ଗିଁକି ! ମାପ୍‌ ନେସ୍‌ନାପ୍‌ ଜେ, ମାପୁରୁ ମିଙ୍ଗିଁ ଜିବନ୍‌ନୋନାନ୍‌ ମାରି ୱାନି ନିଜେଦି ଲୋକ୍‌ ଆନି ଉଣ୍ତିଙ୍ଗ୍‌ ମିଙ୍ଗିଁ ଆସ୍‍କିତାମାନାନ୍‌ । 
\v 5 ଇରିଙ୍ଗ୍‌ କେବଲ ମାଟାଦାନ୍‌ ଆଏତ୍‍, ପବିତ୍ରଆତ୍ମାଦି ସାକାଦି ସାକ୍ତିଦି ୱାଲେ, ନେଗିକାବୁର୍‌ତି ସତ୍‌ତାନ୍‌ ୱିଜୁନେସ୍‌ନିୱାଜା ୱେର୍‍ସି ମାପ୍‌ ଆକା ମି ଲାକ୍‌ତୁ ୱେର୍‌ତାମାର୍ହାପ୍‌ । ମିର୍‌ ନେସ୍‌ନିଦେର୍‌, ମି ୱାଲେ ମାରିଇୱାଲେ ମାଡ୍‌ ଏଣ୍ତେସ୍‌ ଜିଜିମାଡ଼ିଜି ମାରିକା; ଏଣ୍ତେସ୍‌ କେବଲ ମି ସାକା ମା ଜିବନ୍‌ତୁ ବଦାମାର୍ହାତ୍‌ । 
\v 6 \x + \xo ୧:୬ \xo*\xt ପ୍ରେରିତ ୧୭:୫-୯.\xt*\x*ମିର୍‌ ମାଙ୍ଗିଁ ମାରି ମା ପ୍ରବୁଦି ୱେନ୍‌କା ସର୍‌ଇମାରିଇଦେର୍‌ ମାରି ନାଣ୍ତ୍‌ ଦୁଃକ୍‌କାସ୍ଟୁ ବୋଗାତିଙ୍ଗ୍‌ବା ପବିତ୍ର ଆତ୍ମାଦିମାଣାନ୍‌ ପୟ୍‌ତି ୱେଡ଼ିକାଦି ୱାଲେ ଆୟା ନେଗିକାବୁର୍‌ ମାନାତିମାରିଇଦେର୍‌ । 
\v 7 ଇୟାୱାଜା ମିର୍‌ ମାସିଦୋନିଆ ମାରି ଆକାୟାଦୁ ମାନି ୱିଜୁ ବିସ୍‌ବାସ୍‌ତି ଲୋକା ଉଣ୍ତିଙ୍ଗ୍‌ ନେଗିସାରି ତର୍‍ନି ଲୋକ୍‍ ୱାଜା ଆତିମାରିଇଦେର୍‌ । 
\v 8 ମି ଲାକ୍‌ତୁରାନ୍‌ ପ୍ରବୁଦି ବାକ୍ୟ ଜେ କେବଲ ମାସିଦୋନିଆ ଆକାୟାଦୁ ୱେଙ୍ଗିଁତା ମାର୍ହାତ୍‌, ଆକା ସିଲେ, ମାତର୍‌ ମାପୁରୁଦି ଉଣ୍ତିଙ୍ଗ୍‌ ମି ବିସ୍‌ବାସ୍‌ତି ବିସୟ୍‌ ୱିଜୁ ବାଡିଦୁ ଇୟାୱାଜା ୱେଙ୍ଗିଁତା ମାର୍ହାତ୍‌ ଜେ, ଆୟା ବିସୟ୍‌ତାନ୍‌ ମାଡୁ ଇନିକା ୱେର୍‍ତେଙ୍ଗ୍‍ ଦର୍‌କାର୍‌ ସିଲେତ୍‌ । 
\v 9 ମାପ୍‌ ମି ଲାକ୍‌ତୁ ସନିୱାଲେ ମିର୍‌ ଏଣ୍ତେସ୍‌ ମାଙ୍ଗିଁ ୱେଡ଼ିକାଦାନ୍‌ କୁକ୍‍ତିମାରିଇଦେର୍‌ ମାରି ଦିୟାମ୍‍ ପୁଜା ଡ଼ିସ୍‌ସି ସତ୍‌ ମାରି ଜିବନ୍‌ମାନି ମାପୁରୁଙ୍ଗ୍‌ ଉପାସନା କିଦେଙ୍ଗ୍‌ ଆଗ୍‌ଡ଼ି ୱାତିମାର୍‌ଇଦେର୍‌; 
\v 10 ମାରି ଏଣ୍ତେସ୍‌ ମାପୁରୁଦି ରିସାଦାନ୍‌ ମାଙ୍ଗିଁ ରକିୟାକିନି ଉଣ୍ତିଙ୍ଗ୍‌, ସାତିମାଣାନ୍‌ ଜିବନ୍‌ଆଜିନିଙ୍ଗିଁତାନ୍‌ ୱାନି ମାରିସି ଜିସୁ ମୁସ୍‍କୁପୁର୍‍ତାନ୍‍ ମାରିଡ଼େସିୱାନିତାନିଙ୍ଗ୍‌ ମିର୍‌ କାପ୍‌କିଜି ତେବାତିମାନିଦେର୍‌, ଇୟାୱିଜୁ ବିସୟ୍‌ତାନ୍‌ ଆବେଣି ଲୋକୁ ୱାର୍‌ଗିଜିସାଜି ମାର୍ହାର୍‌ ।
\c 2
\s ତେସଲ୍‌ନିକାଦୁ ପାଉଲତି ପାଣି
\p
\v 1 ଏ ନା ତଡ଼ାନ୍‌କୁ ନି ତାଙ୍ଗିଁକି ! ମିର୍‌ ନିଜେ ନେସ୍‌ନିଦେର୍‍ ଜେ, ମି ଲାକ୍‌ତୁ ମା ୱାନିକା ଆର୍‍ଏ ସିଲେ । 
\v 2 \x + \xo ୨:୨ \xo*\xt ପ୍ରେରିତ ୧୬:୧୯-୨୪ \xt*\xt ପ୍ରେରିତ ୧୭:୧-୯.\xt*\x*ତେସଲ୍‌ନିକାଦୁ ମି ଲାକ୍‌ତୁ ୱାନିଆଗ୍‌ଡ଼ି ପିଲିପିତୁ ମା ଉଣ୍ତିଙ୍ଗ୍‌ ଏଣ୍ତେସ୍‌ ତାଗ୍‌ଇ ବ୍ୟବହାର୍ ମାରି ନିନ୍ଦା କିଆୟ୍‌ଆତାମାର୍ହାର୍‌, ଆକା ମିର୍‌ ନେସ୍‌ନିଦେର୍‌ । ମାରିବା ନାଣ୍ତ୍‌ ବିରୋଦ୍‌ କିତିଙ୍ଗ୍‌ବା, ମାପୁରୁଦିମାଣାନ୍‌ ପୟ୍‌ତିମାନି ସୁସମାଚାର୍‌ ମିଙ୍ଗିଁ ୱେର୍‌ନି ଉଣ୍ତିଙ୍ଗ୍‌ ୱାନ୍‌ ମାଙ୍ଗିଁ ବପୁ ସିତାମାର୍ହାନ୍‌ । 
\v 3 ଇନିକା ବାୟା ନି ଅଦାର୍ମୁଦି ୱାଜା ତାସି ମାପ୍‌ ମି ଲାକ୍‌ତୁ ମା ମାଟା ୱେର୍‌ଏପ୍‌ମାର୍ହାପ୍‌, ମାରିବା ମିଙ୍ଗିଁ ଟକେ କିଦେଙ୍ଗ୍‍ ଇନିକାବା ସାଲାକିଦି ୱାଜା କିଏପ୍‌ମାର୍ହାପ୍‌ । 
\v 4 ମାତର୍‌ ମାପୁରୁଦି ବଦାଦି ମାଟା ମାପ୍‌ ୱିଜୁଦିନ୍ ୱେର୍‌ସିମାନାପ୍‌, ଇରିଙ୍ଗ୍‌ ୱାନ୍‌ ମାଙ୍ଗିଁ ବଦାକିଜି ମା ମୁସ୍‌କୁ ନେଗିକାବୁର୍‌ ୱେର୍‍ତେଙ୍ଗ୍‍ ଦାଇତ୍‌ ସିତା ମାର୍ହାନ୍‌ । ଲୋକାଙ୍ଗ୍‌ ୱେଡ଼ିକା କିନିକା ମା ବଦା ସିଲେତ୍‌ । ଆମା ମାପୁରୁ ମା ମୋନ୍‌ତି ଅଡ଼୍‍ବିନିକା ପରିକା କିଜି ସୁଡ଼ୁନାନ୍‌, କେବଲ ୱାନିଙ୍ଗ୍‌ ୱେଡ଼ିକା କିନି ଉଣ୍ତିଙ୍ଗ୍‌ ମାପ୍‌ ସେସ୍ଟା କିଜିନାପ୍‌ । 
\v 5 ମିର୍‌ ନେଗେନ୍‌ତାନ୍‌ ନେସ୍‌ତୁ ଜେ, ସୁରିମାଟା ୱେର୍‍ସି ମି ଲାକ୍‌ତୁ ରେଏପ୍‌ ମାର୍ହାପ୍‌, ମାରି ମା ଲୋବ୍‌ତିଙ୍ଗ୍‌ ଆଡ଼ିକ୍‌ନି ଉଣ୍ତିଙ୍ଗ୍‌ ମି ଲାକ୍‌ତୁ ସାଲାକି ବ୍ୟବ୍‌ହାର୍‌ କିଏପ୍‌ ମାର୍ହାପ୍‌, ଇୟା ବିସୟ୍‌ତାନ୍‌ ମାପୁରୁ ମା ସାକି । 
\v 6 ମାପ୍‌ ମିମାଣାନ୍‌ ମାରି ଆଇୱାରିମାଣୁକୁ ପ୍ରସଂସା ପୟ୍‌ଦେଙ୍ଗ୍‌ ଇଜି ମାପ୍‌ ବଦା କିଏପ୍‌ ମାର୍ହାପ୍‌, 
\v 7 ମାରିବା କ୍ରିସ୍ତଦି ପ୍ରେରିତ ସିସୁ ୱାଜା ମାପ୍‌ ମିମାଣୁକୁ ଆକା ଦାବି କିଦେଙ୍ଗ୍‌ ଆଟ୍‌ତାପ୍‌ମାନ୍ଦି । ମାତର୍‌ ୟାୟା ଏଣ୍ତେସ୍‌ ନିଜେଦି କଡ଼କକ୍ରାରିଙ୍ଗ୍‌ ଜାତୁନ୍‍ କିନାମାନାତ୍‌, ମି ଲାକ୍‌ତୁ ମାର୍‌ଇ ୱାଲେ ମାପ୍‌ ମି ଉଣ୍ତିଙ୍ଗ୍‌ ଆୟାୱାଜା ଜିବନ୍‌ନୋତା ମାର୍ହାପ୍‌ । 
\v 8 ମି ଉଣ୍ତିଙ୍ଗ୍‌ ମା ଜିବନ୍‌ନୋନିକା ମାନିଙ୍ଗ୍‌ ମାପ୍‌ ଆୟାୱାଜା ମିଙ୍ଗିଁ ମାପୁରୁଦି ସୁସମାଚାର୍‌ କେବଲ ଆଏତ୍‍, ମାତର୍‌ ନିଜେ ନିଜେଦି ଜିବନ୍‌ ବା ସିଦେଙ୍ଗ୍‌ ବଦା ମାର୍ହାତ୍‌, ଇରିଙ୍ଗ୍‌ ମିର୍‌ ମା ଏସା ତଡ଼୍‍ ମାର୍‌ଇଦେର୍‌ । 
\v 9 ଏ ତଡ଼ାନ୍‌କୁ ନି ତାଙ୍ଗିଁକି, ମା ପାଣି ମାରି ଆଟ୍‌ୱା ପାଣି ମି ପୁରା ଏତ୍‌ ମାନାତ୍‌, ମି ଲାକ୍‌ତୁ ଏଣ୍ତେସ୍‌ ମାପୁରୁଦି ନେଗିକାବୁର୍‌ ୱେର୍‌ନି ୱାଲେ ମି ମୁସ୍‌କୁ ବୋଜୁ ଆଇ ଉଣ୍ତିଙ୍ଗ୍‌ ମାପ୍‌ ନାଡ଼ାୱେଡ଼େ କାସ୍ଟୁପାଣି କିତାମାର୍ହାପ୍‌ ।
\p
\v 10 ମିର୍‌ ମାରି ନିଜେ ମାପୁରୁ ମା ସାକି ମି ୱାଜା ବିସ୍‌ବାସ୍‌ୱାରି ଲାକ୍‌ତୁ ମା ସାଲାବୁଲାନିକା ନେଗିକା, ନ୍ୟାୟ୍‌ବିସାର୍‌ ମାରି ଦସ୍‌ ସିଲେତାତ୍‍ । 
\v 11 ମିର୍‌ ନେସ୍‌ନିଦେର୍‌, ବୁବା ଏଣ୍ତେସ୍‌ ନିଜେଦି କଡ଼କକ୍ରାରି ଉଣ୍ତିଙ୍ଗ୍‌ ବ୍ୟବ୍‌ହାର୍‌ କିତାନ୍‍ମାନ୍ଦି, ମାପ୍‌ ମି ଉଣ୍ତିଙ୍ଗ୍‌ ଟିକ୍‌ ଆୟାୱାଜା ବ୍ୟବ୍‌ହାର୍‌ କିତାମାର୍ହାପ୍‌ । 
\v 12 ମାପ୍‌ ମିଙ୍ଗିଁ ସାସ୍‌ ସିତାମାର୍ହାପ୍‌, ସାନ୍ତି ସିତା ମାର୍ହାପ୍‌, ମାରି ମିର୍‌ ଏଣ୍ତେସ୍‌ ମାପୁରୁଦି ବଦା ବ୍ୟବ୍‌ହାର୍‌ କିଜି ୱାନି ରାଜି ମାରି ଗୌରବ୍‌ଦି ବାଗ୍‍ ଆନି ଉଣ୍ତିଙ୍ଗ୍‌ ୱାନି ମାଟା ମାନାଦେଙ୍ଗ୍‌ ଆଟ୍‌ନିଦେର୍‌, ଇୟାଉଣ୍ତିଙ୍ଗ୍‌ ୱେଡ଼ିକା ସିତାମାର୍ହାପ୍‌ ।
\p
\v 13 ମାପ୍‌ ୱିଜୁଦିନ୍ ମାପୁରୁଙ୍ଗ୍‌ ଦନ୍ୟବାଦ୍‌ ସିଜିମାନାପ୍‌, ତାନି ଆଇ ଉନ୍‌ଡ୍ରି ମାଟା ବା ମାନାତ୍‌ । ମାପ୍‌ ଏସ୍ତିୱାଲେ ମି ଲାକ୍‌ତୁ ମାପୁରୁଦି କାବୁର୍‌ ତାତାମାର୍ହାପ୍‌, ମିର୍‌ ଆକା ଲୋକା କାବୁର୍‌ ଇଜି ଅଡ଼୍‌ବିଏଣ୍‌ଗା, ମାପୁରୁଦି କାବୁର୍‌ ୱାଜା ୱେର୍‌ଇମାର୍‌ଇଦେର୍‌ ମାରି ମାନାତିମାର୍‌ଇଦେର୍‌ । ସତ୍‌ତାନ୍‌ ଆକା ମାପୁରୁଦି କାବୁର୍‌ ମାରି ମି ୱାଜା ବିସ୍‌ବାସ୍‌ରି ଜିବନ୍‌ତୁ ଆକା ପାଣି କିଜିନାତ୍‌ । 
\v 14 \x + \xo ୨:୧୪ \xo*\xt ପ୍ରେରିତ ୧୭:୫.\xt*\x*ଏ ତଡ଼ାନ୍‌କୁ ନି ତାଙ୍ଗିଁକି, ଜିହୁଦା ଦେସ୍‌ତୁ ମାନି ଜିସୁଦି ମଣ୍ତଲିଆଙ୍ଗାଁ ମାରି ଆବେଣି କ୍ରିସ୍ତବିସ୍‌ବାସ୍‌ରି ଉଣ୍ତିଙ୍ଗ୍‌ ଆମାକା ଗଟାତାମାର୍ହାତ୍‍, ମି ଉଣ୍ତିଙ୍ଗ୍‌ ବା ଆକା ଗଟାତାମାନାତ୍‌ । ୱାର୍‌ ଜିହୁଦିରିମାଣୁକୁ ଏଣ୍ତେସ୍‌ ଦୁଃକ୍‌କାସ୍ଟୁ ବୋଗାତା ମାର୍ହାର୍‌, ମିର୍‌ ବା ନିଜେଦି ଦେସ୍‌ତି ଲୋକାମାଣୁକୁ ଦୁଃକ୍‌କାସ୍ଟୁ ବୋଗାତି ମାନିଦେର୍‌ । 
\v 15 \x + \xo ୨:୧୫ \xo*\xt ପ୍ରେରିତ ୯:୨୩,୨୯; ୧୩:୪୫,୫୦; ୧୪:୨,୫,୧୯; ୧୭:୫,୧୩; ୧୮:୧୨.\xt*\x*ଆୟା ଜିହୁଦିରି ପ୍ରବୁ ଜିସୁଙ୍ଗୁଁ ମାରି ବାବବାଦିରିଙ୍ଗ୍‌ ସାୟାମାର୍‌ଗାଡାକ୍‌ତା ମାର୍ହାର୍‌ ମାରି ମାଙ୍ଗିଁ ବା ଦୁଃକ୍‌କାସ୍ଟୁ ସିତାମାର୍ହାର୍‌ । ୱାରି ଉଣ୍ତିଙ୍ଗ୍‌ ମାପୁରୁ ୱେଡ଼ିକା ଆଏନ୍‍ ! ସାରାଦୁନିଆଦି ଲୋକୁ ଜାତିଦୁ ୱାର୍‌ ସାତ୍ରୁ । 
\v 16 ଇୟାୱାଜା ଆମା ସୁସମାଚାର୍‌ ପ୍ରସାର୍‌ଦାନ୍‌ ଅଣଜିହୁଦିରି ରକିୟା ପୁରା ଆଦେଙ୍ଗ୍‌ ଆଟ୍‍ନାତ୍‍, ଆବେଣ୍‌କୁ ୱାର୍‌ ମାଙ୍ଗିଁ ବାଦା ସିନାର୍‌ । ଇୟାୱାଜା ୱାର୍‌ ୱିଜୁଦିନ୍ ନିଜେ ନିଜେଦି ପାପ୍‌ ପୁରା କିଜିମାନାର୍‌ । ସାରାସାରିୱେନ୍‌କା ଇଲେଇ ୱାରି ବିରୁଦ୍‌ତାନ୍‌ ମାପୁରୁଦି ରିସା କାସ୍‌ସିନାତ୍‌ ।
\s ମାରିଡ଼େସି ସନି ଉଣ୍ତିଙ୍ଗ୍‌ ପାଉଲତି ବଦା
\p
\v 17 ଏ ତଡ଼ାନ୍‌କୁ ନି ତାଙ୍ଗିଁକି, ଏସ୍ତିୱାଲେ ଅଡ଼ପ୍‍ ସମୟ୍‌ ଉଣ୍ତିଙ୍ଗ୍‌ ମି ଲାକ୍‌ତୁରାନ୍‌ ମାପ୍‌ ୱେର୍‌ଏ ଆତାମାର୍ହାପ୍‌ ଏଣ୍ତେସ୍‌ବା ମେନ୍ଦଲ୍‌ତିୱାଜା, ମାତର୍‌ ମା ମନ୍‍ତୁ ମିର୍‌ ୱିଜୁଦିନ୍ ମାନିଦେର୍‌ । ମିଙ୍ଗିଁ ଏତ୍‌କିଜି ମାପ୍‌ ଏସା ସିନ୍ତା ଆତାମାର୍ହାପ୍‌ ମାରି ମାରିଡ଼େସି ମିଙ୍ଗିଁ ସୁଡ଼ୁନି ଉଣ୍ତିଙ୍ଗ୍‌ ମାପ୍‌ ଏସ ଇଚ୍ଛା କିତାମାର୍ହାପ୍‌ । 
\v 18 ମି ଲାକ୍‌ତୁ ଡ଼େସିସନି ଉଣ୍ତିଙ୍ଗ୍‌ ମାଙ୍ଗିଁ ବେସି ଇଚ୍ଛା ମାର୍ହାତ୍‌ ମାରି ନାନ୍‌ ପାଉଲ ନିଜେ ଡ଼େସିସନି ଉଣ୍ତିଙ୍ଗ୍‌ ରୁଣ୍ତି ଦେବେଙ୍ଗ୍‌ ସେସ୍ଟା କିତାମାର୍ହା, ମାତର୍‌ ସୟ୍‌ତାନ୍‌ ମାଙ୍ଗିଁ ବାଦା ସିତାତ୍‌ । 
\v 19 ୱାନ୍‌ ଆମାକାଆପିନ୍‌, ନା ଆସା, ମା ପ୍ରବୁ ଜିସୁଦି ୱାନିବେଡ଼ାଦୁ ୱାନି ଆଗ୍‌ଡ଼ି ଆଇୱାରି ୱାଜା ମିର୍‌ ବା ମା ଆସା, ୱେଡ଼ିକା ମାରି ଜିଣାନି ଗାର୍ବୁଦି ମାଟା ଆନାତ୍‌ । 
\v 20 ସତ୍‌ତାନ୍‌, ମିର୍‌ ମା ଗୌରବ୍‍ ମାରି ୱେଡ଼ିକା ।
\c 3
\p
\v 1 \x + \xo ୩:୧ \xo*\xt ପ୍ରେରିତ ୧୭:୧୫.\xt*\x*ଆୟାଉଣ୍ତିଙ୍ଗ୍‌, ମାପ୍‌ ମାରି ୱେନ୍‌ଡ୍ରେଙ୍ଗ୍‌ ଆଟ୍‌ଏଆଜି ତିର୍‌ କିତାପ୍‌ ଜେ, ମାପ୍‌ ୱେନ୍‌କା ଆତେନ୍‌ସ୍‌ଦୁ ଅରେନ୍‌ନେ ଜିଜି ମାଡ଼ିଜି ତେବାନାପ୍‌, 
\v 2 ମାତର୍‌ ମିଙ୍ଗିଁ ତିର୍‌ କିଦେଙ୍ଗ୍‌ ମାରି ମିଙ୍ଗିଁ ବିସ୍‌ବାସ୍‌ ଡାଟ୍‌ କିନି ଉଣ୍ତିଙ୍ଗ୍‌ ମି ଲାକ୍‌ତୁ ମା ତଡ଼ାନ୍‌ ତିମତିଙ୍ଗ୍‌ ପୋକ୍‌ତାନାପ୍‌ । ୱାନ୍‌ ମା ୱାଲେ ଅର୍‍ସେପାଣି କିଜି କ୍ରିସ୍ତଦି ନେଗି କାବୁର୍‌ ପ୍ରଚାର୍‌ କିଜି ମାପୁରୁଦି ସେବା କିଜିନାନ୍‌ । 
\v 3 ମି ମୁସ୍‌କୁ ୱାଜିମାନି କାସ୍ଟୁ ଉଣ୍ତିଙ୍ଗ୍‌ ଏନ୍‌ ଏଣ୍ତେସ୍‌ ସାରି ବାଣାମାକିନ୍‌, ଇୟାଉଣ୍ତିଙ୍ଗ୍‌ ୱାନ୍‌ ମିଙ୍ଗିଁ ସାହାଜ୍ୟ କିନାନ୍‌ । ଏଣ୍ତେସ୍‌ବା ମିର୍‌ ନେସ୍‌ନିଦେର୍‌, ମାପ୍‌ ଇୟାୱାଜା କାସ୍ଟୁ ପୟ୍‌ନାପ୍‌, ଇକା ମାପୁରୁଦି ଇଚ୍ଛା । 
\v 4 ମି ୱାଲେ ମାନିୱାଲେ, ମାପ୍‌ ନାଣ୍ତ୍‌ ଆଗ୍‍ଡ଼ିରାନ୍‍ ୱେର୍‌ତା ସିତାମାର୍ହାପ୍‌, ମାଙ୍ଗିଁ ଦୁଃକ୍‌କାସ୍ଟୁ ବୋଗାଦେଙ୍ଗ୍‌ ଆନାତ୍‌ । ଇଲେଇ ମିର୍‌ ନେସ୍‌ନିଦେର୍‌, ଟିକ୍‌ ଆକାନେ ଗଟାନାତ୍‌ । 
\v 5 ଆୟାଉଣ୍ତିଙ୍ଗ୍‌ ତିମତିଙ୍ଗ୍‌ ପୋକ୍‌ତାତା । ନାନ୍‌ ମାରି ତିର୍‌ ଆଜି ମାନ୍‌ଡ୍ରେଙ୍ଗ୍‌ ଆଟ୍‌ଏତା । ମିର୍‌ ମି ବିସ୍‌ବାସ୍‌ତୁ ଡାଟ୍‌ ମାନିଦେର୍‌ ନୋ ସିଲେ, ନେସ୍‌ନି ଉଣ୍ତିଙ୍ଗ୍‌ ନାନ୍‌ ୱାନିଙ୍ଗ୍‌ ପୋକ୍‌ତାତା । ଏଣ୍ତେସାତିଙ୍ଗ୍‌ ସୟତାନ୍ ମିଙ୍ଗିଁ ପରିକା କିନାତ୍‌ ମାରି ମା ୱିଜୁ ପାଣି ଆରେଏ ଆନାମାନାତ୍‍ ? ସିଲେ, ଇକା ଏସ୍‌କାଙ୍ଗ୍‌ ପୁରା ଆଏତ୍‍ ।
\p
\v 6 \x + \xo ୩:୬ \xo*\xt ପ୍ରେରିତ ୧୮:୫.\xt*\x*ଇଲେଇ ମି ଲାକ୍‌ତୁରାନ୍‌ ଡ଼େସି ୱାଜି ତିମତି ମି ବିସ୍‌ବାସ୍‌ ମାରି ଜିବନ୍‌ନୋନି ବିସୟ୍‌ତାନ୍‌ ନେଗି ମାଟା ତାତାମାନାନ୍‌ । ୱାନ୍‌ ମାଙ୍ଗିଁ ୱେର୍‌ତା ମାନାନ୍‌ ଜେ, ମିର୍‌ ୱିଜୁଦିନ୍ ମା ନେଗି ପାଣି କିଜିନିଦେର୍‌ ମାରି ମାପ୍‌ ଏଣ୍ତେସ୍‌ ମିଙ୍ଗିଁ ସୁଡ଼ୁଦେଙ୍ଗ୍‌ ବଦା, ମିର୍‌ ବା ଆୟାୱାଜା ମାଙ୍ଗିଁ ସୁଡ଼ୁଦେଙ୍ଗ୍‌ ଇଚ୍ଛା କିଜିନିଦେର୍‌ । 
\v 7 ଇୟାଉଣ୍ତିଙ୍ଗ୍‌, ଏ ତଡ଼ାନ୍‌କୁ ନି ତାଙ୍ଗିଁକି, ମା ୱିଜୁ ଦୁଃକ୍‌କାସ୍ଟୁ ସମୟ୍‌ତୁ ମାପ୍‌ ମି ଉଣ୍ତିଙ୍ଗ୍‌ ସାସ୍‌ ଆଜିନାପ୍‌ । ମି ଡାଟ୍‌ ବିସ୍‌ବାସ୍‌ନେ ମାଙ୍ଗିଁ ସତ୍‌ତାନ୍‌ ଜିପିସ୍‌ କିତା ଇଟ୍‌ତାମାନାତ୍‌ । 
\v 8 ମାରିବା ଇଲେଇ ମାପ୍‌ ଜିତା ମାନାପ୍‌ ପ୍ରବୁଦି ମାନୁ ତିର୍‌ ଆତାମାନାପ୍‌, ମିର୍‌ ଡାଟ୍‌ତିୱାଜା ପ୍ରବୁଦି ୱାଲେ ମିସାବିଡ଼ା ଆଜି ଜିଜିମାଡ଼ିଜିନିଦେର୍‌ । 
\v 9 ଇଲେଇ ମି ଉଣ୍ତିଙ୍ଗ୍‌ ମାପୁ ଆମା ୱେଡ଼ିକାଦୁ ୱେଡ଼ିକା ଆଜିନାପ୍‌, ଆୟାଉଣ୍ତିଙ୍ଗ୍‌ ମାପୁରୁଙ୍ଗ୍‌ ଏଣ୍ତେସ୍‌ ଦନ୍ୟବାଦ୍‌ ସିନାପ୍‌, ନେସ୍‌ତେଙ୍ଗ୍‌ ଆଟ୍‌ଏଜିନାପ୍‌ । 
\v 10 ମିଙ୍ଗିଁ ବେଟ୍‌ବୁଡ଼ାଜି ମି ବିସ୍‌ବାସ୍‌ତୁ ଆମାକା ଉଣାମାନାତ୍‌, ଆକା ପୁରା କିଦେଙ୍ଗ୍‌ ଇଜି ମାଙ୍ଗିଁ ସୁଜୋଗ୍‌ ସିଦେଙ୍ଗ୍‌ ୱେଡ଼େନାଡ଼ା ମାପ୍‌ ମାପୁରୁଙ୍ଗୁଁ ପାର୍‌ତନା କିଜିନାପ୍‌ ।
\p
\v 11 ମି ଲାକ୍‌ତୁ ୱାନି ଉଣ୍ତିଙ୍ଗ୍‌ ମା ବୁବା ମାପୁରୁ ମାରି ମା ପ୍ରବୁ ଜିସୁ ମା ସାରି ତିଆର୍‌ କିଜ ସିପିନ୍‌ । 
\v 12 ମି ଉଣ୍ତିଙ୍ଗ୍‌ ମା ଜିବନ୍‌ନୋନିକା ଏଣ୍ତେସ୍‌ ନାଣ୍ତ୍‌, ଆୟାୱାଜା ନିଜେନିଜେଦି ଉଣ୍ତିଙ୍ଗ୍‌ ମାରି ୱିଜେରି ଉଣ୍ତିଙ୍ଗ୍‌ ପ୍ରବୁ ମି ଜିବନ୍‌ନୋନିକା ନାଣ୍ତ୍‌ ପିରିସ୍‌ କିପିନ୍‌ । 
\v 13 ଇୟାୱାଜା ୱାନ୍‌ ମିଙ୍ଗିଁ ତିର୍‌ କିନାନ୍‌ । ଆର୍‌ତିଙ୍ଗ୍‌, ମା ପ୍ରବୁ ଜିସୁ ଏସ୍ତିୱାଲେ ମୁସ୍‌କୁପୁର୍‌ତି ସାଦୁରି ୱାଲେ ମାରିଡ଼େସି ୱାନାନ୍, ନାସ୍ତିୱାଲେ ମିର୍‌ ବୁବା ମାପୁରୁଦି ଆଗ୍‌ଡ଼ି ଦାର୍ମୁ ମାରି ପବିତ୍ର ଆଦେଙ୍ଗ୍‌ ଆଟ୍‌ନିମାନିଦେର୍‌ ।
\c 4
\s ମାପୁରୁଦିଙ୍ଗ୍‌ ୱେଡ଼ିକାକିନି ଜିବନ୍‌
\p
\v 1 ସାରାସାରିୱେନ୍‌କା, ତଡ଼ାନ୍‌କୁ ନି ତାଙ୍ଗିଁକି, ମାପୁରୁଙ୍ଗୁଁ ୱେଡ଼ିକା କିନି ଉଣ୍ତିଙ୍ଗ୍‌ ଏଣ୍ତେସ୍‌ ଜିଜି ମାଡ଼ିଜିଦେଙ୍ଗ୍‌ ଆନାତ୍‌, ଆୟା ମାଣାନ୍‌ ଅଜାତିମାନିଦେର୍‌ । ଏଣ୍ତେସ୍‌ବା ଆୟାୱାଜା ଦାନ୍‌ ମିର୍‌ ଜିଜି ମାଡ଼ିଜି ୱାଜିନିଦେର୍‌, ମାତର୍‌ ଇୟାମାଣାନ୍‍ ଅଡ଼ପ୍‍ ନାଣ୍ତ୍‌ କିଦେଙ୍ଗ୍‌ ମିଙ୍ଗିଁ ମାପ୍‌ ଇଲେଇ ପ୍ରବୁ ଜିସୁଦି ଦର୍‌ତାନ୍‌ ୱେଡ଼ିକା ନି ଅନୁରୋଦ୍‌ କିଜିନାପ୍‍ । 
\v 2 ମାପ୍‌ ପ୍ରବୁ ଜିସୁଦି ମାଣାନ୍‌ ଅଦିକାର୍‌ ପୟ୍‌ତାପ୍ ମିଙ୍ଗିଁ ଆମା ଆମା ଆଦେସ୍‌ ସିତାମାର୍‌ର୍ହାପ୍‌, ଆକା ମିର୍‌ ନେସ୍‌ନିଦେର୍‌ । 
\v 3 ମିର୍‌ ଏଣ୍ତେସ୍‌ ପବିତ୍ର ଆନିଦେର୍‌, ଇକାନେ ମାପୁରୁଦି ବଦା, ଅର୍ତାତ୍‍ ମିର୍‌ ଏଣ୍ତେସ୍‌ ଦାରିପାଣିଦାନ୍‌ ଆକ ତେବାନିଦେର୍‌ । 
\v 4 ୱିଜେରେ ଲୋକ୍‌ ନେସ୍‌ନିକା ମାନାତ୍‌ ଜେ ଏଣ୍ତେସ୍‌ ନିଜେ ନିଜେଦି ଆଡ଼୍‌ସିକା ୱାଲେ ପବିତ୍ର ନି ସନ୍‌ମାନ୍‌ତାନ୍‌ ଜିନିକା ମାନାତ୍‌ । 
\v 5 ମାପୁରୁଙ୍ଗ୍‍ଁ ନେସ୍‌ଇମାନି ଦୁନିଆଦି ଅଣଜିହୁଦି ଲୋକା ୱାଜା ଲାଲାୟ୍‌ ଆମାଟ୍‌ । 
\v 6 ଏମେ କ୍ରିସ୍ତ ବିସ୍‌ବାସ୍‌ତି ତଡ଼ାନ୍‌ ଉଣ୍ତିଙ୍ଗ୍‌ ଅନ୍ୟାୟ୍‌ପାଣି କିମାଟ୍‌, ମାରି ୱାନିଙ୍ଗ୍‌ ବାଣ୍ତିସ୍‍ କିମାଟ୍‌ । ଇୟା ମାଟା ମାପ୍‌ ଆଗ୍‍ଡ଼ିରାନ୍‍ନେ ୱେର୍‌ତାମାନାପ୍‌ ମାରି ଡାଟ୍‌ତାନ୍‌ ଜାଗାର୍‌ତା କିତାମାନାପ୍‌, ଆମାକାର୍‌ ଆୟାୱାଜା କିନାର୍‌, ପ୍ରବୁ ୱାରିଙ୍ଗ୍ ସାସ୍ତି ସିନାନ୍‌ । 
\v 7 ମାପୁରୁ ମାଙ୍ଗିଁ ତାଗ୍‍ଇକାର୍‍ ଆଜି ଜିନିମାଡ଼ିନି ଉଣ୍ତିଙ୍ଗ୍‌ କୁକ୍‌ଏନ୍‌, ମାତର୍‌ ପବିତ୍ର ଆଜି ମାନ୍‌ଡ୍ରେଙ୍ଗ୍‌ କୁକ୍‌ତାମାନାନ୍‌ । 
\v 8 ମାରି, ଏନ୍‌ ମା ଇୟା ମାଟାଦିଙ୍ଗ୍‌ ମାନାଏନ୍‌, ୱାନ୍‌ ଲୋକ୍‌ତିଙ୍ଗ୍‌ ମାନାଏନ୍‌, ମାତର୍‌ ଆମା ମାପୁରୁ ମିଙ୍ଗିଁ ମନ୍‌ତୁ ନିଜେଦି ପବିତ୍ରଆତ୍ମା ସିନାନ୍‌, ୱାନିଙ୍ଗ୍‌ ମାନାଏନ୍‌ ।
\p
\v 9 ଇଲେଇ କ୍ରିସ୍ତବିସ୍‌ବାସ୍‌ସିର୍‌ ମି ଜିବନ୍‌ନୋନି ବିସୟ୍‌ତାନ୍‌ ମାପ୍‌ ମାରି ନାଣ୍ତ୍‌ ରାସ୍‌ନିକା ଦର୍‌କାର୍‌ ସିଲେ । ନିଜେନିଜେଦିଙ୍ଗ୍‌ ଏଣ୍ତେସ୍‌ ଜିବନ୍‍ନୋନିକା ମାନାତ୍‌, ଇକା ନିଜେ ମାପୁରୁମାଣାନ୍‌ ଅଜାତିମାନିଦେର୍‌ । 
\v 10 ସତ୍‌ତାନ୍‌ ୱିଜୁ ମାସିଦୋନିଆଦୁ ମାନି କ୍ରିସ୍ତଦି ବିସ୍‌ବାସ୍‌ସିର୍‌ ତଡ଼ାନ୍‌କା ଉଣ୍ତିଙ୍ଗ୍‌ ମିର୍‌ ଆୟାୱାଜା ପାଣି କିତିମାନିଦେର୍‌ । ଆତିଙ୍ଗ୍‌ବା ମାରି ନାଣ୍ତ୍‌ଦାନ୍‌ ଆକା କିଦୁ, ମିଙ୍ଗିଁ ନିସନେ କେବଲ ଅନୁରୋଦ୍‌ କିଜିନାପ୍‍ । 
\v 11 ଆଗ୍‍ଡ଼ିରାନ୍‍ ଏଣ୍ତେସ୍‌ ୱେର୍‌ତାମାର୍ହାପ୍‌, ସାନ୍ତିଦାନ୍‌ ଜିନିମାଡ଼ିନିକା, ନିଜେଦି ପାଣିଦୁ ମୋନ୍‌ ସିଜି ମାରି ନିଜେ ନିଜେଦି ଜିନିକା ଉଣ୍ତାକିନିକା ମିଦି ପୁରା ଆପିତ୍‌ । 
\v 12 ଇୟାୱାଜା କିନି ମାଣ୍‌କୁ ମିର୍‌ ଅବିସ୍‍ବାସିରି ୱାରିମାଣାନ୍‌ ବା ସନ୍‌ମାନ୍‌ ପୟ୍‌ନିଦେର୍‌ ମାରି ମି ୱିଜୁ ଦର୍‌କାର୍‌ତି ଉଣ୍ତିଙ୍ଗ୍‌ ଏ ମୁସ୍‌କୁ ଆସା ଇଡ୍‌ନି ଦର୍‍କାର୍‍ ସିଲେତ୍‍ ।
\s ପ୍ରବୁଦି ୱାନିକା
\p
\v 13 ଏ ତଡ଼ାନ୍‌କୁ ନି ତାଙ୍ଗିଁକି, ଆସାସିଲି ଆଇ ୱିଜେରିଲୋକା ୱାଜା ମିର୍‌ ଏଣ୍ତେସ୍‌ ଦୁକ୍‍ସିନ୍ତାକିମାଟ୍‍, ଇୟାଉଣ୍ତିଙ୍ଗ୍‌ ସାତିମାନି ଲୋକା ବିସୟତାନ୍‍ ମିର୍‌ ଜେ ସତ୍‍ ନେସ୍‍ମାଟ୍‍, ଇକା ମା ବଦା ସିଲେତ୍‍ । 
\v 14 ଆୟାଉଣ୍ତିଙ୍ଗ୍‌ ମାଡ୍‌ ବିସ୍‌ବାସ୍‌ କିନାଟ୍‍ ଜେ, ଜିସୁ ସାଜି ମାରିଡ଼େସି ନିଙ୍ଗିଁତାନ୍‌, ଆଦେଙ୍ଗ୍‌ ମାପ୍‌ ଆଟ୍‌ୱା ବିସ୍‍ବାସ୍‍ ଜେ, ଜିସୁଦିମାନୁ ବିସ୍‌ବାସ୍‌ କିଜି ଆମାକାର୍‌ ସାନାର୍‌, ଜିସୁଦି ମାରିଡ଼େସି ୱାନିୱାଲେ ମାପୁରୁ ୱାରିଙ୍ଗ୍ ଜିସୁଦି ୱାଲେଅନାନ୍‌ ।
\p
\v 15 ମାପ୍‌ ଇଲେଇ ମିଙ୍ଗିଁ ଆମା ସିକିୟା ସିଜିନାପ୍‌, ଆକା ପ୍ରବୁଦି ସିକିୟା । ପ୍ରବୁଦି ୱାନିଦିନ୍‌ତୁ ମାଡ୍‌ ଆମାକାର୍‌ ଜିବନ୍‌ମାନିକା, ପୁର୍ବେଦାନ୍‍ ସାତିମାନି ଲୋକାମାଣ୍‌କୁ ଆଗ୍‌ଡ଼ି ଆଜି ସଲ୍‌ଇକା । 
\v 16 ନାସ୍ତିୱାଲେ ପେରି ବଲ୍‌ତାନ୍‌ ଉନ୍‌ଡ୍ରି ଆଦେସ୍‌ ଆନାତ୍‌, ପେରି ମୁସ୍‌କୁପୁର୍‌ତି ଦୁତ୍‌ତି ବଲୁ ୱେନିଦେର୍‌, ମାପୁରୁଦି ମରିବାଜା ଆଉଲି ୱେନିଦେର୍‌ ମାରି ପ୍ରବୁ ମୁସ୍‌କୁପୁର୍‌ତାନ୍‌ ରେସିୱାନାନ୍‌ । କ୍ରିସ୍ତମାନୁ ବିସ୍‌ବାସ୍‌ କିଜି ଆମାକାର୍‌ ସାତାମାନାର୍‌, ୱାର୍‌ ଆଗ୍‌ଡ଼ି ଜିବନ୍‌ଆଜି ନିଙ୍ଗିଁନାର୍‌; 
\v 17 ତାନେୱେନ୍‌କା ମାଡ୍‌ ଆମାକାର୍‌ ଆୟା ସମୟ୍‌ତୁ ଜିବନ୍‌ ତେବାନାମାନାପ୍‌, ବାଦ୍‌ଡ଼ତୁ ୱାରି ୱାଲେ ନିଙ୍ଗିଁଜି ୱାର୍‌ ବାଦଡ଼୍‍ତି ଦୁରିଦୁ ପ୍ରବୁଦି ୱାଲେ ବେଟ୍‌ଆନାର୍‌, ତାନେୱେନ୍‌କା ମାଡ୍‌ ୱିଜୁଦିନ୍‌ତିଙ୍ଗ୍‌ ପ୍ରବୁଦି ୱାଲେ ମାନିକା । 
\v 18 ମାରି, ଇୟାୱିଜୁ ମାଟା ୱେର୍‍ସି ମିର୍‌ ନିଜେନିଜେଦିଙ୍ଗ୍‌ ୱେଡ଼ିକା କିଦୁ ।
\c 5
\s ପ୍ରବୁଦି ୱାନିଦିନ୍‌ତି ଉଣ୍ତିଙ୍ଗ୍‌ ତିଆର୍‌ ଆଦୁ
\p
\v 1 ଏ ତଡ଼ାନ୍‌କୁ ନି ତାଙ୍ଗିଁକି, ଇୟାୱିଜୁ ବିସୟ୍‌ତାନ୍‌ ଏସ୍‌କାଙ୍ଗ୍‌ ମାରି ଆମା ବେଡ଼ାଦୁ ଗଟାନାତ୍‌, ଆୟା ବିସୟ୍‌ତାନ୍‌ ମି ଲାକ୍‌ତୁ ନାଣ୍ତ ରାସ୍‌ନିକା ଲୋଡ଼ା ସିଲେତ୍‍, 
\v 2 \x + \xo ୫:୨ \xo*\xt ମାତିଉ ୨୪:୪୩; ଲୁକ ୧୨:୩୯; ୨ ପିତର ୩:୧୦.\xt*\x*ଇରିଙ୍ଗ୍‌ ନାଡ଼ା ଡଙ୍ଗାଁରେଏନ୍‌ ୱାନି ୱାଜା ପ୍ରବୁଦି ଦିନ୍‌ ଜେ ୱାନାତ୍, ଇକା ମିର୍‌ ନେଗେନ୍‌ତାନ୍‌ ନେସ୍‌ନିଦେର୍‌ । 
\v 3 ଏସ୍ତିୱାଲେ ଲୋକୁ ସାନ୍ତି ମାରି ନେଗିବାଡି ଇଜି ୱେର୍‍ସି ମାନି ୱେଡ଼ାଦୁ ଆୟାଦାପ୍ରେ ୱାରି ମୁସ୍‌କୁ ସାନିକା ତିଗ୍‌ଜି ୱାନାତ୍ । ପଟାଦୁମାନି ଆଇମାଦି ଜନମ୍‌କିନି କାସ୍ଟୁ ୱାଜା ଆକା ନେସ୍‌ଇୱାଜା ଦାପ୍ରେ ଇଗା ୱାନାତ୍ ମାରି ଏନ୍‌ ଆୟା ଆଗ୍‍ଡ଼ିରାନ୍‍ ଉର୍‌କୁତେଙ୍ଗ୍‌ ଆଟ୍‍ଏନ୍‍ । 
\v 4 ମାତର୍‌ ତଡ଼ାନ୍‌କୁ ନି ତାଙ୍ଗିଁକି, ମିର୍‌ ସିକାଟିଦୁ ବାସା କିଇଦେର୍‌, ଆଦେଙ୍ଗ୍‌ ଆୟା ନାଣ୍ତିଙ୍ଗ୍‌ ଡଙ୍ଗାଁର୍‌ଏନ୍‌ ୱାଜା ନେସ୍‌ଇୱାଜା ମି ଲାକ୍‌ତୁ ୱାନାନ୍ । 
\v 5 ଇରିଙ୍ଗ୍‌ ମିର୍‌ ୱିଜୁ ଜାୟ୍‌ ନି ୱେଡ଼େରି କଡ଼ର୍‌ । ମାଡ୍‌ ନାଡ଼ା ନି ସିକାଟିଦି କଡ଼ର୍‌ ଆଏପ୍‌ । 
\v 6 ମାରି ରାଦୁ, ମାଡ୍‌ ଆଇ ଲୋକା ୱାଜା ସୁଜ୍‌ଏଣ୍‌ଗା, ଜାଗାର୍‌ତା ଆଜି ସେତା ତେବାନାଟ୍‍ । 
\v 7 ଲୋକୁ ନାଡ଼ା ସମୟ୍‌ତୁ ସୁଜ୍‌ନାମାନାର୍‌, ନାଡ଼ା ୱାର୍‌ ଅଙ୍ଗୁର୍‍ରସ୍‍ ଉଣୁଜି ସୋସ୍‌ନାର୍‌ । 
\v 8 \x + \xo ୫:୮ \xo*\xt ଏପିସିୟ ୬:୧୩-୧୭.\xt*\x*ମାତର୍‌ ମାଡ୍‌ ୱେଡ଼େରି କଡ଼ର୍‌ ମାରି ୱିଜୁଦିନ୍ ଜାଗ୍‌ରାତା ମାନ୍‍ଜି । ରାଦୁ, ବିସ୍‌ବାସ୍‌ ମାରି ଜିବନ୍‌ନୋନିୱାଜା ବକାଦିସାଜୁ ଆରାଜି ମାରି ରକିୟାଦି ଆସା ଇଡ୍‌ଜି ଟପି ତାଲାଦୁ ଆରାନାଟ୍‍ । 
\v 9 ଇରିଙ୍ଗ୍‌ ମାପୁରୁ ମାଙ୍ଗିଁ ୱାନି ରିସାଦି ଲୋକ୍‍ ଆଦେଙ୍ଗ୍‌ ଆସ୍‌କିଏନ୍‌, ପ୍ରବୁ ଜିସୁ କ୍ରିସ୍ତଦି ମାଣ୍‌କୁ ମାଙ୍ଗିଁ ରକିୟା କିନି ଉଣ୍ତିଙ୍ଗ୍‌ ତିର୍‌ କିତାମାନାନ୍‌ । 
\v 10 କ୍ରିସ୍ତଦି ମାରିଡ଼େସି ୱାନିୱାଲେ ମାଡ୍‌ ଜିବନ୍‌ ମାନାଟ୍‍ ନୋ ସିଲେଟ୍‍, ୱାନି ୱାଲେ ଏଣ୍ତେସ୍‌ ମିସାନା ତେବାନାଟ୍‍, ଆୟାଉଣ୍ତିଙ୍ଗ୍‌ ୱାନ୍‌ ମା ଉଣ୍ତିଙ୍ଗ୍‌ ସାତାନ୍‌ । 
\v 11 ଆର୍‌ତିଙ୍ଗ୍‌ ଇଲେଇ ଏଣ୍ତେସ୍‌ କିଜିନିଦେର୍‌, ଟିକ୍‌ ଆୟାୱାଜା ନିଜେଦିଙ୍ଗ୍‌ ନି ଆଇୱାରିଙ୍ଗ୍‌ ୱେଡ଼ିକା ନି ସାହାଜ୍ୟ କିଜିମାନ୍‌ଡ୍ରୁ ।
\s ସାରାସାରି ମାଟା ନି ନମସ୍କାର୍‌
\p
\v 12 ଏ ତଡ଼ାନ୍‌କୁ ନି ତାଙ୍ଗିଁକି, ଆମାକାର୍‌ ମି ଲଇ ୱାନ୍‍ଜିପାଣି କିଜିନାର୍‌ ମାରି କ୍ରିସ୍ଟାନ୍‌ ଜିବନ୍‌ତୁ ମିଙ୍ଗିଁ ସାହାଜ୍ୟ କିଜିନାର୍‌ ମାରି ପ୍ରବୁଦି ନେଗିମାଟା ୱେର୍‍ସିନାର୍‍, ୱାରିଙ୍ଗ୍ ମାନାଦେଙ୍ଗ୍‌ ମାପ୍‌ ମିଙ୍ଗିଁ ବାତିଙ୍ଗ୍‌ମାଲ୍‍ଜିନାପ୍‌ । 
\v 13 ମାରି, ୱାରି ପାଣି ଉଣ୍ତିଙ୍ଗ୍‌ ୱାରିଙ୍ଗ୍ ଜିବନ୍‌ତାନ୍‌ ନାଣ୍ତ ଜିବନ୍‍ନୋଦୁ । ନିଜେନିଜେଦି ୱାଲେ ସାନ୍ତିଦାନ୍‌ ତେବାଦୁ ।
\p
\v 14 ଏ ତଡ଼ାନ୍‌କୁ ନି ତାଙ୍ଗିଁକି, ମାପ୍‌ ମିଙ୍ଗିଁ ମାଡ଼ିସ୍‌ କିଜିନାପ୍‌, ଗାଡ଼୍‍ୟା ପାଣି କିଜିମାନି ଲୋକାଙ୍ଗ୍‌ ଜାଗାର୍‌ତା କିଦୁ, ତିଲାନିୱାରିଙ୍ଗ୍‌ ସାହାସ୍‍ ସିଦୁ, ବପୁସିଲିୱାରିଙ୍ଗ୍‌ ଜାତୁନ୍‍ କିଦୁ ମାରି ୱିଜେରି ଉଣ୍ତିଙ୍ଗ୍‌ ସାହାସ୍‍ ଆଦୁ । 
\v 15 ଏନ୍‌ ଏନ୍ଧି ଅନ୍ୟାୟ୍‌ ବାଦ୍‌ଲୁ ଅନ୍ୟାୟ୍‌ କିମାକିନ୍‌, ମାରି ୱିଜୁଦିନ୍ ୱିଜେରି ନେଗିକା ସେସ୍ଟା କିପିନ୍‍ ।
\p
\v 16 ୱିଜୁଦିନ୍ ୱେଡ଼ିକା ଆଜି ମାନ୍‌ଡ୍ରୁ । 
\v 17 ରମ୍‍ଏଣ୍ତା ପାର୍‌ତାନା କିଦୁ । 
\v 18 ୱିଜୁ ଅବସ୍ତାଦୁ ଦନ୍ୟବାଦ୍‌ ସିଦୁ । କ୍ରିସ୍ତ ଜିସୁଦି ୱାଲେ ମିସାଜି ଜିଜି ମାଡ଼ିଜି, ମିମାଣୁକୁ ମାପୁରୁ ଇକାନେ ବଦା କିନାନ୍‍ ।
\p
\v 19 ପବିତ୍ରଆତ୍ମାଦିଙ୍ଗ୍‌ ବାଦାସିମାଟ୍‌ । 
\v 20 ପବିତ୍ର ଆତ୍ମାଦି ବାକ୍ୟଦିଙ୍ଗ୍‌ କାଡ଼୍‍ମାଟ୍‍ । 
\v 21 ୱିଜୁ ବିସୟ୍‌ତିଙ୍ଗ୍‌ ପରିକା କିଜ ସୁଡ଼୍‍ଦୁ : ଆମାକା ୱିଜୁ ସତ୍‍, ତାନିଙ୍ଗ୍‌ ମାନାଦୁ; 
\v 22 ୱିଜୁ ରକମ୍‍ତି ତାଗ୍‌ଇପାଣିଦାନ୍‌ ଆକତେବାଦୁ ।
\p
\v 23 ଆମା ମାପୁରୁ ମାଙ୍ଗିଁ ସାନ୍ତି ସିନାନ୍‌, ୱାନ୍‌ ମିଙ୍ଗିଁ ପୁରାପୁରି ପବିତ୍ର କିପିନ୍‌ ମାରି ମା ପ୍ରବୁ ଜିସୁ କ୍ରିସ୍ତଦି ୱାନିଦିନ୍‌ତି ସମୟ୍‌ତୁ ମି ଆତ୍ମା, ପୁଣ୍ତା, ମେନ୍ଦଲ୍‌ତିଙ୍ଗ୍ ପୁରାପୁରି ଦସ୍‌ ସିଲେଣ୍‌ଗା ଇଡ୍‌ଦୁ । 
\v 24 ଏନ୍‌ ମିଙ୍ଗିଁ କୁକ୍‌ତାମାନାନ୍‌, ୱାନ୍‌ ଆକା କିନାନ୍‌, ଇରିଙ୍ଗ୍‌ ୱାନ୍‌ ବିସ୍‍ବାସ୍‍ତିକାନ୍‌ ।
\p
\v 25 ତଡ଼ାନ୍‌କୁ ନି ତାଙ୍ଗିଁକି, ମା ଉଣ୍ତିଙ୍ଗ୍‌ ବା ପାର୍‌ତାନା କିଦୁ ।
\p
\v 26 ୱିଜୁ ବିସ୍‌ବାସ୍‌ଲୋକାଙ୍ଗ୍‌ ପବିତ୍ର ଚୁମାଦାନ୍‌ ମାଡ଼ିସ୍‍ କିଦୁ ।
\p
\v 27 ପ୍ରବୁଦିମାଣ୍‍କୁ ଅଦିକାର୍‌ ପୟ୍‌ଆୟ୍‍ ଆତିମାନି ଉଣ୍ତିଙ୍ଗ୍‌ ନାନ୍‌ ମିଙ୍ଗିଁ ବାତିଙ୍ଗ୍‍ମାଲ୍‍ଜିନା, ୱିଜୁ ବିସ୍‌ବାସ୍‌ଲୋକା ଲାକ୍‌ତୁ ଇୟା ଆକୁ ପଡ଼ାଦୁ । 
\v 28 ମା ପ୍ରବୁ ଜିସୁ କ୍ରିସ୍ତଦି ଦୟା ୱିଜେରି ସାକା ଆପିତ୍‌ ।