\id PHM NT0018 Tsikimba (kdl) (Auna Kambari) 2010 
\h Filimo 
\toc1 Ukanikorongi u Bulus Ubana ara 
\toc2 Filimo 
\toc3 Flm. 
\mt2 Ukanikorongi u Bulus 
\mt2 Ubana ara 
\mt1 Filimo 
\is1 Ukukpa̱ u kadyanshi 
\ip Aꞌayin a ɗa Bulus kasuki u korongi ukanikorongi u na vi, a kuwa ku aꞌali ka wa̱ri adama a utono u Yesu. U korongu ta̱ ukanikorongi vi ubana a asu u katoni ka Yesu ka a ka isa̱ Filimo. 
\ip Bulus n Filimo aje a ɗa aꞌa̱ri kahu aꞌayin a ɗa a uka yi Bulus a kuwa ku aꞌali. Filimo uza u utsa̱ri ɗa kpam wa̱ ta̱ n agbashi. Kagbashi ka a tsu isa̱ Onisima ka sumai ara a Filimo. Pini nala, Onisima gita̱i uɓa̱nga̱ Bulus eyi pini a kuwa ku aꞌali ki, hal u tuwa̱i u wokoi katoni ka Yesu adama a kadyanshi ka Bulus. Gogo‑na Bulus wa ciga ta̱ Onisima gono a asu u uzakuwa u ne Filimo. U ciga ta̱ kpam Filimo wushi kagbashi ka ne tyoku ɗa u gain tyoku ɗa Yesu Kawauwi wa pana kayanyan. 
\ip Tagara̱da u na u yan ta̱ kadyanshi cika a kaci ka ucimbusuka̱. U wenishike ta̱ kpam tyoku ɗa uza ɗa wa tono n Atoni wa yan manyan ma ne n uvakunku u kaci, uza ɗa wa gita̱ ve uyan ili i shinga kahu u tonuko aza roku tyoku ɗa a ka rongo. 
\is1 Ili iꞌya iꞌa̱ri a tagara̱da u na vi 
\io1 Idyani ubana ara Filimo (1-3) 
\io1 Bulus dansai n Filimo ukuna u Onisima (4-22) 
\io1 Idyani i makorishi n kavasu (23-25) 
\c 1  
\s1 Idyani 
\p  
\v 1 Mpa Bulus, uza ɗa u korongi ukanikorongi u na vi. A kuwa ku aꞌali ka ma̱ri adama a kuɓari ku Kadyanshi ka Shinga ka Yesu Kirisiti Kawauwi ka ma yansa. Timoti utoku u va̱ wa̱ ta̱ kaɓolo na̱ mpa. 
\p Filimo ɗa ma koronku, utoku u manyan u tsunu u ɗa kpam tsa ciga yi wa wa.  
\v 2 Ma koronku ta̱ dem utoku u tsunu uka uza u kala Awufiya, n Arikibu eyi dem utoku u kumoɗu u tsunu u ɗa a asu u manyan mi. Ma koronku ta̱ dem Atoni a ɗa a tsu gawunsusa a kuwa ku vunu. 
\p  
\v 3 N folo ta̱ Kashila̱ Tata u tsunu n Yesu Kawauwi Asheku u na̱ka̱ ɗa̱ ukuna u shinga na̱ ndishi n shinga. 
\s1 Kavasu ka Bulus n ucikpa 
\p  
\v 4 Filimo, aꞌayin a ɗa baci dem ma yan kavasu adama a vunu, n tsu cikpa ta̱ Kashila̱.  
\v 5 Yan ɗa n tsu yan nala, kpaci n pana ta̱ kadyanshi ka shinga ka vunu ka a tonuko mu, vu wushuku ta̱ n Yesu Asheku. N pana ta̱ kpam kadyanshi a da va ciga ama a Kashila̱ wa wa.  
\v 6 Ma yanka vu ta̱ kavasu tsa̱ra̱ upityanangu u ɗa iꞌa̱ri n u ɗa kaɓolo n atoku u doku, ya wenishe baci ili i shinga iꞌya Kashila̱ ka na̱ka̱ tsu. A̱sa̱ka̱ nala gita̱ adama a tsupige tsu Kawauwi.  
\v 7 Uciga u ɗa va ciga ama a Kashila̱ wa zuwusa mu ta̱ ma pana̱sa kayanyan cika kpam n ugbamatangu u asuvu. Vangu u va̱, vu zuwa ta̱ ama a Kashila̱ ushani a rongo bawu ili iꞌya ya dambula le. 
\s1 Bulus folukoi Onisima 
\p  
\v 8 Adama a nala, ma ciga ta̱ n folo vu vu yain ili i roku. A asuvu a kala ka Kawauwi ma̱ ta̱ n ucira u ɗa ma fuɗa n tonuko vu iꞌya va yan, shegai ma yan nala wa.  
\v 9 Adama a nala an u wokoi tsa cigamgbana, ma folo vu ta̱ vu yain ili i na yi. Mpa Bulus uza ɗa u yain aꞌayin a re, mpa ma dansa n avu tyoku u uza n kaje ka ne. Kpam a kuwa ku aꞌali ka ma̱ri adama a Yesu Kawauwi.\fig Bulus wa tutsuku Onisima ara Filimo|src="Philemon_1_8-12.tif" size="span" loc="Philemon 1:9" ref="Filimo 1:9" \fig* 
\p  
\v 10 Ili iꞌya ma folo vu vi iꞌya, vu pana iyali i Onisima. Kpaci gogo‑na maku ma va̱ ma, an u wokoi u woko ɗe Katoni cina mpa pini na a kuwa ku aꞌali.  
\v 11 Caupa wa̱ri n kalen ara vunu wa, shegai gogo‑na wa̱ ta̱ n kalen ara tsunu cika.  
\v 12 Aya la ma tutsunku vu kpam katakasuvu ka va̱ ka̱ ta̱ ara ne. 
\p  
\v 13 Ma̱ri ma ciga ta̱ n a̱sa̱ka̱ yi pini na kaɓolo na̱ mpa. Mpa pini usiri n ikani a kuwa ku aꞌali ki adama a uyan kuɓari ku Kadyanshi ka Shinga, u yain manyan ma wa̱ri u gain vu yansa̱ka mu.  
\v 14 Shegai ma ciga n yain nala wa, she avu vu wushuku. Kpam ma ciga vu ɓa̱nga̱ mu adama a ɗa a ma̱tsa̱ vu wa, shegai adama a ɗa va ciga n uciga u vunu. 
\p  
\v 15 Gaawan ili iꞌya i zuwai u sumai ara vunu a aꞌayin a kenu a na yi iꞌya, u gono baci i rongo pini hal ubana.  
\v 16 Gogo‑na kagbashi ka kpam koshi wa, u la ta̱ kagbashi, vangu vunu ɗa uza ɗa u gain vu cigi. Ma ciga yi wa wa, avu kpam dem u gan ta̱ vu cigi yi hal uciga vi u lai u va̱. Vu cigi yi tyoku u kagbashi, n tyoku u vangu u vunu a asuvu a Asheku.  
\v 17 Vu reve baci mpa utoku u manyan u vunu u ɗa, she vu ryabusa yi tyoku ɗa va ryabusa mu n tuwa̱ baci.  
\v 18 Wa̱ri u nusuka vu baci, ko va tono yi ili i roku, ma tsupa ta̱ iꞌya.  
\v 19 Mpa Bulus, mpa kpam ma korongu ili i na yi n kaci ka va̱, “Ma tsupa ta̱ iꞌya.” Ma yan gba̱m kadyanshi ka uma u vunu u ɗa n wusuka vu wa. 
\p  
\v 20 Utoku u va̱, yan iꞌya n foloi vi, yan iꞌya yavu Asheku a ɗa va gbashika. Nala wa zuwa mu ta̱ n doku n gbama asuvu a Kawauwi.  
\v 21 Ko n gogo‑na an ma koronku vu na vi, n reve ta̱ va yan iꞌya n foloi vi, hal gba̱m i lai iꞌya n foloi. 
\p  
\v 22 Foɓusuko mu kunu, kpaci n zuwa ta̱ uma Kashila̱ ka wushuku ta̱ kavasu ka vunu, a a̱sa̱ka̱ mu n tuwa̱ a asu u vunu. 
\s1 Idyani i Bulus i makorishi 
\p  
\v 23 Abafara wa dana̱sa vu, kaɓolo ka tsa̱ri a kuwa ku aꞌali adama a Yesu Kawauwi.  
\v 24 Atoku a manyan a va̱, Marku, n Aristaraku, n Dima, n Luka a ka dana̱sa vu ta̱ dem. 
\p  
\v 25 Ukuna u shinga u Yesu Kirisiti Kawauwi u toni n uma u vunu.