\id 2JN NT0024 Tsikimba (kdl) (Auna Kambari) 2010 
\h 2 Yahaya 
\toc1 Ukanikorongi u ire u Yahaya 
\toc2 2 Yahaya 
\toc3 2 Yah. 
\mt2 Ukanikorongi u ire u 
\mt1 Yahaya 
\is1 Ukukpa̱ u kadyanshi 
\ip Yahaya korongu ta̱ ikanikorongi i kenu i kenu i tatsu ubana a asu u ama kau‑kau. U na vi; wata, ire, u da uka u ɗa na̱ mmuku n ne aza ɗa Kashila̱ ka ɗanga̱sai ɗa wa koronku. Aꞌayin a nala yi, atoni a so ta̱ mavura cika, pini nala, ɗa Yahaya yankai idani i na yi manyan a una̱ u kuwa ku Atoni n ama a ɗa aꞌa̱ri pini. 
\ip Yahaya da uciga wa̱ ta̱ n kalen cika a asu u Kashila̱, nala kpam dem uciga wa̱ ta̱ n kalen a asu u Atoni. Aꞌayin a nala yi, aza roku a ka dansa ta̱ Kawauwi ka̱ vuma u maci wa, shegai kulu ku ama a ka wundya n aꞌeshi a ne koshi. Yahaya dana ta̱ ukuna u nala kaɓan ka. Ukuna u mayun vi u ɗa, Yesu Kawauwi ɗa vuma u maci. U tonuko ta̱ Atoni a ꞌyuwan awenishiki a kaɓan. 
\ip Nala dem gogo‑na, awenishiki a ɗa pini a ɗa bawu a ka wenishike ukuna u mayun. Atoni a gan ta̱ a ꞌyuwan icun i awenishiki a nala yi. U gan ta̱ Atoni a cigi ukuna u mayun, kpam a cigamgbana. 
\is1 Ili iꞌya iꞌa̱ri a tagara̱da u na vi 
\io1 Idyani n kavasu (1-3) 
\io1 Ukuna u mayun n uciga (4-11) 
\io1 Idyani i makorishi (12-13) 
\c 1  
\s1 Idyani 
\p  
\v 1 Mpa Yahaya makoshi, ma korongu ukanikorongi u na ubana a asu u uka u ɗa Kashila̱ ka ɗanga̱sai na̱ mmuku n ne.\f + \fr 1:1 \ft Makuna ma ‘Uka na̱ mmuku n ne’ pini na, kalen ka ne ka, ‘Kuwa ku Atoni n ama a ɗa aꞌa̱ri pini’.\f* Ma ciga ɗa̱ ta̱ n ukuna u mayun. Mpa ma ciga ɗa̱ utyoku u va̱ wa. Gba̱ aza ɗa a revei ukuna u mayun a ka ciga ɗa̱ ta̱ dem.  
\v 2 Tsa ciga ɗa̱ ta̱ adama a ukuna u mayun u ɗa wa̱ri a asuvu a tsunu, kpam wa rongo ta̱ a asuvu a tsunu bawu utyoku. 
\p  
\v 3 Kavasu ka va̱ ka, Kashila̱ Tata n Maku ma ne Yesu Kirisiti Kawauwi a ka woko tsu ta̱ ukuna u shinga kpam a pana tsu asuvayali! A̱sa̱ka̱ a na̱ka̱ tsu ndishi n shinga, n ukuna u mayun, n uciga. 
\s1 Ukuna u mayun n uciga 
\p  
\v 4 N pana ta̱ kayanyan cika an n panai a da mmuku n vunu n roku ma tono ta̱ ukuna u mayun, tyoku ɗa Tata u danai tsu yain.  
\v 5 Uka, n koronku vu tsa̱ra̱ n tonuko vu ili i savu i roku wa. Tonuko ɗa ma tonuko vu i cigi atoku a ɗe. Ili i kagita̱ iꞌya a tonuko tsu tsu yain iꞌya gai la vi.  
\v 6 Uciga u ɗa na: tsu pana udani u Kashila̱. Kpam tun a kagita̱ u tonuko tsu ta̱ tsu cigi atoku. 
\p  
\v 7 Awenishiki a kaɓan a ɗa pini ushani a ka kyawunsa a likimba. Ala̱pa̱nsi a na yi a ka dansa ta̱ mayun ɗa Yesu Kawauwi wa̱ri n ikyamba i vuma wa. Aza a kaɓan a ɗa, kpam atokulalu a Kawauwi.  
\v 8 Kotsu vu kirana. Vu kirana baci wa, va namba ta̱ gba̱ iꞌya vu yain manyan a kaci ka ne ki. Shegai vu kirana baci, va wusha ta̱ katsupi ka malen ma manyan ma vunu gba̱.  
\v 9 Uza ɗa baci dem u kpa̱ɗa̱i ushamgba a asuvu a uwenishike u Yesu, aku u doki ko u wuta̱i pini, wa̱ri n Kashila̱ wa. Shegai uza ɗa baci shamgbai pini a uwenishike vi, wa̱ ta̱ n Tata vi n Maku mi.  
\v 10 Uza roku tuwa̱ ɗa̱ baci wa wenishike ukuna u ɗa bawu wa̱ri u Kawauwi, kotsu i banka yi a kuwa ku ɗe ko i dana̱sa yi wa, ko kenu.  
\v 11 I yan baci nala, u woko ɗe yavu i ɓolomgbono ɗe kaci n eyi a asuvu a manyan ma cingi ma ne. 
\s1 Udani u makorishi 
\p  
\v 12 Ma̱ ta̱ n ili ushani iꞌya ma ciga n tonuko vu, shegai ma ciga n korongu iꞌya a tagara̱da wa. N zuwa ta̱ uma tsa ɓa̱ra̱kpa̱ wa tsa gawunsa ta̱. Pini nala, aku tsu dansa aꞌeshi aꞌeshi tsa̱ra̱ tsu yain maza̱nga̱. 
\p  
\v 13 Mmuku ma uma̱ku\f + \fr 1:13 \ft Uma̱ku pini na kalen ka ne ka, kuwa ku Atoni ka Yahaya wa̱ri aꞌayin a ɗa u korongi ukanikorongi u na vi. Mmuku kpam alya aza ɗa aꞌa̱ri pini a kuwa ku Atoni ki.\f* u vunu aza ɗa Kashila̱ ka ɗanga̱sai ma sukunku vu idyani.