\id REV - Kutu Bible Version
\ide UTF-8
\h Ugubulo
\toc1 Ugubulo uyagweleligwe Yohana
\toc2 Ugubulo
\toc3 Ugub
\mt1 Ugubulo
\mt2 uyagweleligwe Yohana
\imt Ulongozi
\ip Kitabu cha Ugubulo acho kitabu cha uhelelo mna idilagano da sambi. Vivija acho kitabu cha uhelelo kwandikigwa na mtumigwa Yohana behi na mwaka wa 95 toka kuvumbuka kwa Kilisito (Ugub 1:1). Vivija Yohana kandika Mbuli Inogile yandikigwe na Yohana na baluwa ya ichanduso ya Yohana na baluwa ya kabili ya Yohana na baluwa ya kadatu ya Yohana. Vivija Yohana kojuwika kwa twaga da, “Ija Yesu yamnogele ng'hani.” (Yoh 13:23). Kandika kitabu cha Ugubulo viyakalile yahamizigwe kukisiwa cha Patimo mbuli ya kuwapetela wanhu mbuli inogile ya Yesu Kilisito (Ugul 1:9).
\ip Kilamuso cha kwandika kitabu cha ugubulo ni kuwagela moyo wasomaji wagendelele kumtamanila Yesu Kilisito na kuwatenda watamanile kwavija Yesu kammambwega mbwega kubwela (Sula ya 1:3, 22:7). Kawandikila wanhu wose wamtogole Yesu na vibumbila saba vijuwike mna izisula za 2-3. Yohana kakikema kija kiyandike kamba ulaguzi (Ugub 1:3) na kalagusa kwa vilaguso vingi mna ikitabu kusimulila vinhu viyone. Ikitabu kiigala na hanhu hayagwe mna idilagano da umwaka, kamba vija Zakalia 6:1-8. Zimhalati saba na mabakuli saba nago gaigala na mikubulo iyagalile Imulungu kuwakoboza Wamisili (Kulawa 7-9). Ugubulo osimulila mbuli za uhelelo, kamba Yesu kohuma na wanhu wose omtamanile okuwa wagima siku zose hamoja nayo. Leka ikitabu kino kikuzume na kikutende utamanile kamba Yesu sambi kobwela.
\iot Mbuli zili mkitabu
\io Yohana kosonga kulonga heyo ayo nani na kabokelaze mbuli zino za ulaguzi ziyone (Sula ya 1:1-1:20).
\io Kolonga usenga wa Yesu kwa wanhu wamtogole Yesu mvibumbila saba (Sula ya 1:1-3:22).
\io Abaho kosimulila mbuli za fundo saba za uhota (Sula ya 4:1-8:5) na mhalati saba (Sula ya 8:6-11:19).
\io Abaho Yohana kosimulila ng'hondo ya mwana wa kimbigalo na zoka dili na mapala saba (Sula ya 12:1-14:20).
\io Abaho kokwandika mbuli za mibakuli saba ya ng'hasiliki (Sula ya 15:1-16:18).
\io Abaho Yohana kosimulila Imulungu viyawahumile wanhu wamwihile ako kuulanga (Sula ya 17:1-20:15).
\io Kukimambukizo kosimulila mbuli ya ulanga wa sambi na isi ya sambi vonda vize ako kuuhelelo (Sula ya 21:1-22:21).
\c 1
\p
\v 1 Uno awo ugubulo wa Yesu Kilisito, Imulungu kamgwaa yawalagusile wasang'hanaji zake, mbuli zija zonda zilawilile vino sambi. Kilisito kamtuma msenga wake wa kuulanga yamulongele Yohana msang'hanaji wake mbuli azo. 
\v 2 Nayo Yohana kasindila kila kinhu kiyawone. Yohana kasimulila usenga wa Imulungu na ukweli ugubuligwe na Yesu Kilisito. 
\v 3 Kamweda munhu yosoma mbuli zili mkitabu kino kili na mbuli za ulaguzi, na wamweda wanhu otegeleza na kuzigoga mbuli za ulaguzi zandikigwe mna ikitabu kino! Kwavija kipindi cha mmabehi baho zolawilila mbuli zose zino.
\s Kuwalamusa wanhu wa vibumbila wamtogole Yesu
\p
\v 4 Niye Yohana nowandikila wanhu wamtogole Yesu mna ivibumbila saba vili ako Asiya.
\p Ng'hekewa na tindiwalo kulawa kwa Imulungu, yakalile baha, yeli baha na yonda yawe baha, na kulawa kwa loho saba zili kuulongozi wa kigoda chake cha undewa, 
\v 5 na kulawa kwa Yesu Kilisito yotamaniligwa, yogubula ukweli wa mbuli ya Imulungu, yeli wa ichanduso kuzilibuka kwa wafile, vivija ayo yowatawala wandewa wa mwiisi.
\p Yesu kotunogela, na kwa damu yake katulekesa na nzambi, 
\v 6 na katutenda tuwe undewa wa walava nhosa, tumsang'hanile Imulungu, Tatake. Yesu Kilisito yagweleligwe ukulu na nguvu siku zose! Ona.
\p
\v 7 Tegelezeni, kokwiza mna gamawingu! Kila munhu komona, hata waja wamuhomile. Makabila gose geli mwiisi gomuyalalila. Ona iwe vivo!
\p
\v 8 “Niye na Alufa na Omega, wa ichanduso na wa ikimambukizo,” kolonga Mndewa Imulungu yeli na Udahi wose, yakalile baha, yeli baha, na yonda yawe baha.
\s Yohana kolagusiligwa vinhu mbuli ya Kilisito
\p
\v 9 Niye Yohana ndugu yenu, na kwa kuilumba na Yesu nina fungu hamoja na mweye mna gamagayo na nina fungu hamoja na mweye muundewa wake na kufunga umoyo. Niye ngaligwa kugodekigwa mkisiwa kikemigwa Patimo mbuli ya kuwapetela wanhu mbuli ya Imulungu na kwa mbuli ya kuwalongela wanhu ukweli ugubuligwa na Yesu. 
\v 10 Mna isiku ya Mndewa nimema Loho wa Imulungu, mhulika sauti ng'hulu, iigalile na sauti ya mhalati, inongela kuchugu changu. 
\v 11 Inongela, “Wandike mkitabu mbuli zino ziwona, abaho kigale ikitabu kwa wanhu wamtogole Yesu mvibumbila vili mna gamabuga gano saba, Efeso na Simuna na Peligamoni na Tuatila na Salide na Filadelifia na Laodikea.”
\p
\v 12 Nihinduka ndole nani yolonga na niye, nyona vinhu saba va zahabu va kwikila taa, 
\v 13 hagati yake kukala na imoja kamba Mwana wa Munhu kakala yavalile kiwalo kitali na mkwiji wa zahabu mna imhambaga. 
\v 14 Mvili zake zikala nzelu chuwee kamba pamba na meso gake gamwekamweka kamba moto ukwaka, 
\v 15 magulu gake gang'ala kamba shaba isomigwe na kusunhigwa ng'hani, sauti yake ibuma kamba mazi gokilima. 
\v 16 Mumkono wake wa kudila kakala yagogile nhondo saba, na mmulomo wake dilawa panga dikanha kuno na kuno. Kihanga chake king'ala kamba zuwa da imisi. 
\v 17 Vinimulolile nigwa mmagulu gake kamba munhu yafile, keka mkono wake wa kudila uchanha yangu kanongela, “Sikuudumbe! Niye na wa ichanduso na wa ikimambukizo. 
\v 18 Niye ayo heyo yeli mgima! Ng'hala nifile, lakini sambi na mgima siku zose. Nina luvugulo lwa ifa na kowochola wanhu wafile. 
\v 19 Avo, wandike kila kinhu kiuwona, vinhu vose viuwona sambi na vija vonda vilawilile baho kumwande.” 
\v 20 Dino dijo fambulo da nhondo saba ziuwone mumkono wangu wa kudila, na vija vinhu saba va zahabu va kwikila taa. Nhondo saba awo wasenga wa kuulanga wa vibumbila saba va wanhu wamtogole Yesu, na vija vinhu saba va zahabu va kwikila taa vivo vibumbila saba va wanhu wamtogole Yesu.
\c 2
\s Usenga kwa kibumbila cha wanhu wamtogole Yesu ako Efeso
\p
\v 1 “Kwa msenga wa kuulanga wa kibumbila cha wanhu wamtogole Yesu ako Efeso wandike vino,
\p “Usenga uno olawa kwa ayo yogoga nhondo saba mumkono wake wa kudila, heyo yotembela hagati ya vinhu saba va zahabu va kwikila taa. 
\v 2 Njuwa kila kinhu kiutendile, njuwa kuwamba kwako na kufunga umoyo kwako. Njuwa kamba hudaha kukala na wanhu osang'hana gehile, avo kuwageza waja olonga awo watumigwa lakini si watumigwa bule, na kujuwa kamba wavizi. 
\v 3 Gweye kubetela, kugaya mbuli ya kunisang'hanila na hubwelile kuchugu bule. 
\v 4 Lakini nina mbuli ya kukuzuma, gweye sambi huninogela bule kamba viuninogele aho haichanduso. 
\v 5 Gelegeza aho haugwile! Leka nzambi zako, sang'hana kamba viutendile ichanduso. Kamba huleka nzambi zako, nokwiza kukisegesa kinhu chako cha kwikila taa kulawa hanhu hake. 
\v 6 Lakini nokutogola kwa kinhu kimoja, gweye kugehila gowotenda Wanikolai\f + \fr 2:6 \fr*\ft Wanikolai wawafundiza wanhu vihile, kamba odaha kugendelela kutenda mbuli zihile na hawananga bule loho zao kwavija loho ayo ikomboligwe lakini lukuli lofa.\ft*\f* kamba vinigehila nene.
\p
\v 7 “Munhu yeli na magwiti, yategeleze gaja goyolonga Loho wa Imulungu kwa vibumbila va wanhu wamtogole Yesu!
\p “Munhu yonda yahume nomuleka yaje matunda ga biki da ugima dili mkihati cha Imulungu.
\s Usenga kwa kibumbila cha wanhu wamtogole Yesu ako Simuna
\p
\v 8 “Kwa msenga wa kuulanga wa kibumbila cha wanhu wamtogole Yesu ako Simuna wandike vino,
\p “Usenga uno olawa kwa ayo yeli wa ichanduso na wa ikimambukizo, yakalile yafile, abaho kawa mgima kabili. 
\v 9 Nigajuwa magazo gako, vivija niujuwa ukiwa wako, hamoja ukweli gweye kwa mgoli! Nijuwa vija viwakubezile waja oikema Wayahudi lakini siyo Wayahudi wao kibumbila cha Mwenembago! 
\v 10 Sikuudumbe gaja gonda gakutende ugaye. Tegeleza! Mwenembago kowageza na wanhu wayagwe kumwenu ogodekigwa mkifungo, na mogaya kwa siku longo, mukale kwa kutamaniligwa kwa chochose hata kamba kufa, na niye nowagwaa nhunza ya ugima.
\p
\v 11 “Munhu yeli na magwiti, yategeleze gaja goyolonga Loho wa Imulungu kwa vibumbila va wanhu wamtogole Yesu!
\p “Munhu yonda yahume honda yalumizigwe na ifa ya kabili.
\s Usenga kwa kibumbila cha wanhu wamtogole Yesu ako Peligamoni
\p
\v 12 “Kwa msenga wa kuulanga wa kibumbila cha wanhu wamtogole Yesu ako Peligamoni wandike vino,
\p “Usenga uno olawa kwa ayo yeli na panga dikanha kuno na kuno. 
\v 13 Nihajuwa hanhu aho houkala, aho kili kigoda cha undewa wa Mwenembago. Lakini gweye kwa mkweli kumwangu, hulekile bule kunitamanila hata mna ikipindi kija munhu wangu Antipasi yotamaniligwa mna ikila kiyolonga, viyakomigwe aho hakili kigoda cha Mwenembago. 
\v 14 Lakini ning'hali na mbuli ndodo kumwako, kuna wanhu kumwako okweleleza mafundizo ga Balaamu, yamfundize Balaki yawekile ng'hwalo wanhu wa Izilaeli watende nzambi kwa kuwasusumiza waje ndiya ilavigwe kwa vinyago va imilungu na watende ugoni. 
\v 15 Vivija kuna wanhu kumwenu okweleleza mafundizo ga Wanikolai. 
\v 16 Avo, lekeni nzambi zenu! Kamba hamuleka, sambi baha nokwiza kuitowa na wanhu awo kwa panga dilawa mmulomo wangu.
\p
\v 17 “Munhu yeli na magwiti, yategeleze gaja goyolonga Loho wa Imulungu kwa vibumbila va wanhu wamtogole Yesu!
\p “Wanhu onda wahume nowagwaa ndiya ifisigwe ikemigwa mana. Vivija nomgwaa kila munhu dibwe zelu jandikigwe twaga da sambi hadijuwigwe na munhu yoyose ila ayo yadibokele.
\s Usenga kwa kibumbila cha wanhu wamtogole Yesu ako Tuatila
\p
\v 18 “Kwa msenga wa kuulanga wa kibumbila cha wanhu wamtogole Yesu ako Tuatila wandike vino,
\p “Usenga uno olawa kwa Mwana wa Imulungu, yeli na meso gong'ala kamba moto ukwaka, na magulu gong'ala kamba shaba isomigwe. 
\v 19 Nizijuwa mbuli zose ziusang'hana. Niujuwa unogelwa wako na kutamanila kwako na vija viuwataza wayagwe na kufunga umoyo kwako. Nojuwa sambi kotenda goya ng'hani kubanza aho haichanduso. 
\v 20 Lakini nina mbuli ya kukuzuma, gweye komtogolela mtwanzi ija Yezebeli, yoikema mwenyego mtula ndagu. Kwa mafundizo gake kawalongoza vihile wasang'hanaji zangu kwa kuwatenda watende ugoni na kuja ndiya ilavigwe kwa vinyago va imilungu. 
\v 21 Nimgwaa kipindi cha kuleka nzambi zake, lakini halonda kuleka ugoni wake. 
\v 22 Avo, nomwika mulusazi baho heyo na wose watendile nayo ugoni ogaya ng'hani. Notenda avo sambi kamba hawalekile nzambi zao ziwatendile nayo. 
\v 23 Vivija nowakoma wanhu omkweleleza, abaho vibumbila vose va wanhu onhogola vojuwa kamba nene heyo nilola goya goyogesa na goyolonda kila munhu. Nomuliha kila imoja wenu kamba vimsang'hane.
\p
\v 24 “Lakini wayagwe wenu mukala kuko Tuatila hamugakweleleze mafundizo gake Yezebeli na hamuifunzile mbuli zija zikemigwa na wanhu wayagwe kamba mbuli za Mwenembago ziifisile ng'hani. Nowalongela mweye siwadikwa bule mzigo uyagwe. 
\v 25 Lakini gogeni ng'hani kija kimufunzigwe mbaka vondanize. 
\v 26 Munhu yonda yahume, ija yogendelela mbaka kuuhelelo kusang'hana gonilonda, nomgwaa udahi wa kuwatawala wanhu wa isi zose. 
\v 27 Kowatawala kwa mkongoja wa zuma na kowabena vihande vihande kamba nongo. 
\v 28 Udahi unimgwaa munhu ayo awo udahi uuja unigweleligwe na Tatangu na niye nomgwaa tondo ng'andu.
\p
\v 29 “Munhu yeli na magwiti, yategeleze gaja goyolonga Loho wa Imulungu kwa vibumbila va wanhu wamtogole Yesu!
\c 3
\s Usenga kwa kibumbila cha wanhu wamtogole Yesu ako Salide
\p
\v 1 “Kwa msenga wa kuulanga wa kibumbila cha wanhu wamtogole Yesu ako Salide wandike vino,
\p “Usenga uno olawa kwa ayo yeli na loho saba za Imulungu na nhondo saba. Nijuwa kija kiusang'hana, nojuwa kamba kujuwika kwa mgima kumbe kufa! 
\v 2 Avo, lamuka! Ukigangamize kija kiuli nacho king'hali hakina potela chose. Kwavija mbaka sambi ning'hali sinagona gaja gousang'hana kamba genela gose mgameso ga Imulungu wangu. 
\v 3 Kumbuka kija kiufunzigwe na kija kiuhulike, vigoge na uleke nzambi zako. Kamba hukala meso bule, nokwizila kamba mbavi, na honda ujuwe kipindi cha kwiza kwangu. 
\v 4 Lakini mna wanhu wadodo ako Salide hawavifitize bule viwalo vao. Wanhu awo ofaya kutembela na nene kuno wavala viwalo vizelu. 
\v 5 Munhu yonda yahume kovazigwa vivo kwa viwalo vizelu, na sidisegesa bule twaga jake mna ikitabu cha ugima. Mgameso ga Tatangu na wasenga zake nolonga kwa mulomo wangu kamba heyo munhu wangu.
\p
\v 6 “Munhu yeli na magwiti, yategeleze gaja goyolonga Loho wa Imulungu kwa vibumbila va wanhu wamtogole Yesu!
\s Usenga kwa kibumbila cha wanhu wamtogole Yesu ako Filadelifia
\p
\v 7 “Kwa msenga wa kuulanga wa kibumbila cha wanhu wamtogole Yesu ako Filadelifia wandike vino,
\p “Usenga uno olawa kwa ayo yong'ala na mkweli. Ayo yeli na luvugulo lwa Daudi, na yahavugula kuduhu yodaha kuhinda, na yahahinda kuduhu yodaha kuvugula. 
\v 8 Niijuwa kila mbuli yuusang'hana, nivugula lwivi mgameso gako na kuduhu munhu yodaha kuhinda. Njuwa goya kamba hamoja kuduhu nguvu ng'hani, lakini kuigoga mbuli yangu na hudilemile bule twaga jangu. 
\v 9 Tegeleza! Nowagala kumwako wanhu wa bumbila da Mwenembago, wanhu awo oikema Wayahudi kumbe siyo, lakini olonga uvizi. Avo, nowagala kumwako na nowatenda wakugwile kingubanguba ili wajuwe nikunogela. 
\v 10 Kwavija gweye kudigoga lagizo jangu da kufunga umoyo, na niye nokuhonya na magayo gonda geze mwiisi yose, kuwageza wanhu wose okala mwiisi. 
\v 11 Hima nokwiza. Goga ng'hani kija kiulinacho ili munhu yoyose sambiyakuboke nhunza yako ya kuhuma. 
\v 12 Ija yonda yahume nomtenda mhanda mng'anda ya Imulungu wangu, na honda yalawe bule mumo. Nokwandika kumwake twaga da Imulungu wangu na twaga da buga da Imulungu wangu, Yelusalemu ya sambi, yonda ihumuluke kuulanga kwa Imulungu wangu. Vivija nokwandika kumwake twaga jangu da sambi.
\p
\v 13 “Munhu yeli na magwiti, yategeleze gaja goyolonga Loho wa Imulungu kwa vibumbila va wanhu wamtogole Yesu!
\s Usenga kwa kibumbila cha wanhu wamtogole Yesu ako Laodikea
\p
\v 14 “Kwa msenga wa kuulanga wa kibumbila cha wanhu wamtogole Yesu ako Laodikea wandike vino,
\p “Usenga uno olawa kwa ayo yokemigwa, Ona, yotamaniligwa na yogubula ukweli, yeli chanduso cha vinhu vose viyaumbile Imulungu. 
\v 15 Njuwa kija kiusang'hane, njuwa kamba gweye huli uzizimi hebu moto. Vahanogile ng'hani gweye wahakuwile uzizimi hebu moto! 
\v 16 Lakini kwavija kwa lufufunhende, huli uzizimi hebu moto, nokudeka! 
\v 17 Gweye kolonga, ‘Niye na mgoli, ninacho kila kinhu kinonda, siswelile chochose.’ Lakini hujuwile bule viwili kwabule kinhu chochose! Gweye kunyolila na kolondigwa oneligwe bazi na kwa mkiwa kwa mwazi na kwa msuwameso. 
\v 18 Nokugwaa magesa, gula kumwangu zahabu isunhigwe kwa moto, ili uwe na ugoli. Vivija gula viwalo vizelu uvale, ugubike kinyala cha kuwa mwazi. Vivija gula dawa ya meso ugabake meso gako ili udahe kulola. 
\v 19 Niye nomkomhokela na kumkoboza munhu yoyose inimnogela. Avo, wamba kusang'hana ganogile na uleke nzambi zako. 
\v 20 Tegeleza! Nokwima hana ulwivi na kugong'onda, munhu yoyose yohulika sauti yangu na kuvugula ulwivi, nokwingila mng'anda mmwake na kuja ndiya hamoja na heyo, na heyo koja hamoja na niye. 
\v 21 Munhu yonda yahume nomtenda yakale hamoja na nene mna ikigoda cha undewa, kamba vija niye vinihumile ng'hala hamoja na Tatangu mna ikigoda chake cha undewa.
\p
\v 22 “Munhu yeli na magwiti, yategeleze gaja goyolonga Loho wa Imulungu kwa vibumbila va wanhu wamtogole Yesu!”
\c 4
\s Nhambiko ya ako kuulanga
\p
\v 1 Abaho ndagusiligwa kinhu kiyagwe, nyona lwivi luvuguligwa kuulanga. Na sauti ija imhulike ichanduso, iigalile na sauti ya mhalati, inongela, “Izo kuno uchanha, na niye nokulagusila gaja gonda galawilile aho kumwande.” 
\v 2 Bahaja nimema Loho wa Imulungu, nyona kuko kuulanga kuna kigoda cha undewa, na imoja kakala mkigoda acho. 
\v 3 Ayo yakalile mkigoda acho kang'ala kamba dibwe da yasipi na akiki, pinde da Imulungu dikalile ding'ala kamba dibwe da zumalidi dikizunguluka kigoda cha undewa mhande zose. 
\v 4 Kuzunguluka kigoda cha undewa kukala na vigoda viyagwe malongo mabili na nne, na mvigoda avo wakala wavele malongo mabili na nne wavalile viwalo vizelu na wana taji ya zahabu mmapala. 
\v 5 Lumwesa, ng'huwa na mdudumo vilawa mkigoda cha undewa. Kuulongozi wa kigoda cha undewa kukala na viwenge saba vikwaka, viwenge avo, zizo loho saba za Imulungu. 
\v 6 Vivija kuulongozi wa kigoda cha undewa kukala na kinhu kamba bahali ya kiyoo, king'ala kamba dibwe dimetameta.
\p Aho hagati ya kigoda acho cha undewa kizungulukigwa banzi zose na viumbe vine vili na ugima. Viumbe vine vili na ugima vikala vimemile meso kuulongozi na kuchugu. 
\v 7 Kiumbe kili na ugima cha ichanduso kiigala na simba, cha kabili kiigala na ng'ombe, cha kadatu kikala na kihanga kamba cha munhu, na cha ikane kiigala na mhungu yoguluka. 
\v 8 Viumbe avo vine vili na ugima vikala na mabawa sita kila kimoja, gamemile meso kunze na mgati. Kuduhu kubwihila, imisi na ikilo vokwimba,
\q “Kang'ala, kang'ala, kang'ala, Mndewa Imulungu yeli na Udahi wose,
\q yakalile baha, yeli baha, na yonda yawe baha.”
\p
\v 9 Kipindi viumbe avo vili na ugima, viwomgwaa ukulu, na kumtegeleza na kumulongela asente ayo yakalile mkigoda cha undewa ayo yeli mgima siku zose, 
\v 10 waja wavele malongo mabili na nne ogwa haulongozi wa ayo yakalile mkigoda cha undewa omgwila kingubanguba na kumtambikila ayo yeli mgima siku zose. Ozika taji zao kuulongozi wa kigoda cha undewa kuno olonga,
\q
\v 11 “Mndewa wetu na Imulungu wetu, kofaya,
\q kugweleligwa ukulu na kutegelezigwa na nguvu,
\q kwavija kulumba kila kinhu,
\q na kwa kulonda mwenyego viwa baho na vokoneka.”
\c 5
\s Kitabu na Mwanang'hondolo
\p
\v 1 Abaho nyona kinhu kamba kitabu mumkono wa kudila wa ayo yakalile mkigoda cha undewa, kikala chandikigwe banzi zose na kikala kifungigwe fundo saba za uhota.\fig Kitabu kifungigwe fundo saba za uhota|src="03 Seals.jpg" size="col" ref="5:1"\fig* 
\v 2 Abaho nimona msenga wa kuulanga yeli na udahi, kakemelela kwa sauti, “Nani yofaya kubandula zifundo za uhota na kukipumbulula ikitabu?” 
\v 3 Lakini kukala kuduhu yoyose kuulanga, hebu mwiisi, hebu hasi kowochola wanhu wafile, yodaha kukipumbulula ikitabu acho na kulola mgati yake. 
\v 4 Avo, niye nilila ng'hani kwavija kuduhu yofaya kukipumbulula kitabu acho na kulola mgati yake. 
\v 5 Abaho, imoja wa waja iwavele kanongela, “Sikuulile. Lola! Simba wa kabila da Yuda, mzukulu wa Daudi, kahuma, na kofaya kuzibandula zifundo saba za uhota na kukipumbulula ikitabu.”
\p
\v 6 Abaho nyona hagati ha kigoda cha undewa, kema Mwanang'hondolo kazungulukigwa banzi zose na viumbe vine vili na ugima na waja iwavele. Ayo Imwanang'hondolo koneka kamba kachinjigwa kakala na mhembe saba na meso saba, na zizo azo loho saba za Imulungu zitumigwe kila hanhu mwiisi yose. 
\v 7 Ayo Imwanang'hondolo kanyalanhuka kakisola kija ikitabu mumkono wa kudila wa ayo yakalile mkigoda cha undewa. 
\v 8 Bahaja viyakisolile acho ikitabu avo iviumbe vine vili na ugima hamoja na waja iwavele malongo mabili na nne wagwa kingubanguba kuulongozi wa Mwanang'hondolo. Kila imoja wao kakala na bango na bakuli za zahabu zimemile ubani, ubani awo ako kupula kwa wanhu wa Imulungu. 
\v 9 Wemba lwila lwa sambi,
\q “Kofaya kukisola ikitabu
\q na kuzibandula zifundo zake za uhota.
\q Kwavija kukala uchinjigwe, na kwa damu yako kumgulila wanhu Imulungu,
\q kulawa kila kabila na ulonzi na isi na lukolo.
\q
\v 10 Kuwatenda undewa na walava nhosa na wamsang'hanile Imulungu wetu,
\q nao oilongoza isi yose.”
\p
\v 11 Abaho ndola, mhulika sauti za wasenga wa kuulanga wengi ng'hani, kuduhu munhu yodaha kuwapeta! Wema kukizunguluka kigoda cha undewa, na vija viumbe vine vili na ugima na waja iwavele, 
\v 12 walonga kwa sauti ng'hulu,
\q “Mwanang'hondolo yachinjigwe kofaya kubokela nguvu, udahi, ugoli, na nzewele,
\q ukulu, kutegelezigwa na nhogolwa!”
\m
\v 13 Abaho nihulika kila kinhu kiumbigwe kuulanga, mwiisi, hasi kowochola wanhu wafile, mbahali na vose vili mumo, vilonga,
\q “Kumwake ayo yakalile mkigoda cha undewa na kwa Mwanang'hondolo,
\q wabokele nhogolwa na kutegelezigwa na ukulu na udahi,
\q siku zose!”
\m
\v 14 Viumbe vine vili na ugima vilonga, “Ona!” Na waja iwavele wagwa kingubanguba, watambika.
\c 6
\s Mwanang'hondolo kobandula fundo za uhota
\p
\v 1 Abaho nimona Mwanang'hondolo kobandula fundo ya uhota ya ichanduso mna zifundo saba, nimuhulika imoja wa viumbe wane weli na ugima kolonga kwa sauti ng'hulu kamba ya ng'huwa, “Izo!” 
\v 2 Niye ndola, kumbe kukala na falasi imoja mzelu chuwee. Ayo yamkwelile kakala yagogile upinde, na kakala yagweleligwe taji. Kalawa kamba muhumaji na kugendelela kuhuma.
\p
\v 3 Abaho Mwanang'hondolo, kabandula fundo ya kabili ya uhota, nimuhulika kiumbe yeli na ugima wa kabili kolonga, “Izo!” 
\v 4 Niye ndola, kalawilila falasi iyagwe mdung'hu yau. Ayo yamkwelile kagweleligwa ng'honde ya kusegesa tindiwalo mwiisi, wanhu waikome. Ayo kagweleligwa panga kulu.
\p
\v 5 Abaho Mwanang'hondolo kabandula fundo ya kadatu ya uhota, nimuhulika kiumbe yeli na ugima wa kadatu kolonga, “Izo!” Niye ndola, kalawilila falasi mtitu fii. Ayo yamkwelile kakala yagogile kinhu kili na vinhu vibili va kupimila vinhu vizamile. 
\v 6 Nihulika kinhu kamba sauti ilawa kwa viumbe vine vili na ugima, ilonga, “Kibaba kimoja cha usage wa ngano kwa sente ya kusang'hana kwa siku imoja, na vibaba vidatu va shaili kwa sente ya kusang'hana siku imoja. Lakini sikuunange mavuta hebu divai!”
\p
\v 7 Abaho Mwanang'hondolo kabandula fundo ya ikane ya uhota, nimuhulika kiumbe yeli na ugima wa ikane kolonga, “Izo!” 
\v 8 Ndola kalawilila falasi imoja nyaubundi. Ayo yamkwelile kakemigwa, Ifa na kowochola wanhu wafile kamkweleleza kuchugu. Wagweleligwa udahi kwa lobo imoja ya isi yose wawakome kwa kuitowa na nzala na mitamu na ming'onyo mikali.
\p
\v 9 Abaho Mwanang'hondolo kabandula fundo ya itano ya uhota. Hasi ya upango wa kulavila nhosa nyona loho za wanhu wakomigwe mbuli ya kuwapetela wanhu usenga wa Imulungu na mbuli ya kugendelela kugoga usindila wao. 
\v 10 Wakemelela ng'hani, “Go Mndewa utawalaga, ung'alile na mkweli! Lini vonda uwataguse wanhu wa mwiisi na kuwakoboza kwa kutukoma siye?” 
\v 11 Kila imoja wao kagweleligwa kiwalo kitali kizelu, walongeligwa wabete kipindi kidodo, mbaka vonda wenele wasang'hanaji wayao na wayao wamtogole Yesu onda wakomigwe kamba viwakomigwe wao.
\p
\v 12 Abaho nimona Mwanang'hondolo kobandula fundo ya sita ya uhota. Kukala na mtigisiko mkulu wa isi, zuwa dikala titu fii kamba kaniki, mbalamwezi ikala dung'hu yau kamba damu. 
\v 13 Nhondo zilagala mwiisi kamba ng'hoga vizilagalaga, kipindi vizitigisigwa na beho kulu. 
\v 14 Ulanga usegela kamba vija mkeka viukunzigwa, vigongo vose na visiwa visegesigwa. 
\v 15 Abaho, wandewa wa mwiisi, wakulu, wakulu wa wakalizi, wanhu wagoli, wanhu weli na nguvu na wanhu wose wayagwe watumwa na wakomboligwe waifisa mzimhango na mna imibwe kuvigongo. 
\v 16 Wavilongela vigongo na mibwe mikulu, “Tulagalileni mtufise kutali na meso ga ayo yakalile mkigoda cha undewa na kutali ya ng'hasiliki za Mwanang'hondolo! 
\v 17 Kwavija siku yao ya kutagusa ivika, nani yodaha kuigomesa na kwima?”
\c 7
\s Wanhu wayagwe wa Izilaeli okwikigwa vilaguso
\p
\v 1 Abaho niwona wasenga wane wa kuulanga wema kuna izibanzi nne za mwiisi, wazigoga beho nne za mwiisi ili beho sikudibume hata kidogo mwiisi, hebu mbahali hebu mmibiki. 
\v 2 Abaho nimona msenga iyagwe wa kuulanga kalawa mwambu wa kudilawila zuwa, kuno kagoga kinhu cha Imulungu yeli mgima cha kwikila kilaguso. Kakemelela kawalongela wasenga awo wane wa kuulanga wagweleligwe udahi wa kunanga isi na bahali. 
\v 3 Msenga ayo wa kuulanga kalonga, “Sikumwiinange isi hebu bahali hebu mibiki, mbaka tuwekile vilaguso mvihanga vao watumigwa wa Imulungu wetu.” 
\v 4 Abaho mhulika wingi wa wanhu wekigwe vilaguso mvihanga vao, wakala wanhu laki imoja na elufu alobaini na nne kulawa mna gamakabila longo na mabili ga Izilaeli. 
\v 5 Kabila da Yuda walawa wanhu elufu kumi na mbili wekigwa vilaguso na kabila da Lubeni wanhu elufu kumi na mbili na kabila da Gadi wanhu elufu kumi na mbili. 
\v 6 Kabila da Asheli wanhu elufu kumi na mbili na kabila da Nafutali wanhu elufu kumi na mbili na kabila da Manase wanhu elufu kumi na mbili. 
\v 7 Kabila da Simeoni wanhu elufu kumi na mbili na kabila da Lawi wanhu elufu kumi na mbili na kabila da Isakali wanhu elufu kumi na mbili. 
\v 8 Kabila da Zabuloni wanhu elufu kumi na mbili na kabila da Yusufu wanhu elufu kumi na mbili na kabila da Benjamini wanhu elufu kumi na mbili.
\s Wanhu kulawa kila kabila
\p
\v 9 Abaho ndola, nyona lunhu lwa wanhu mkulu ng'hani, kuduhu munhu yodaha kuwapeta, wanhu awo walawa kila isi na lukolo na ulonzi na kabila. Wema kuulongozi wa kigoda cha undewa na kuulongozi wa Mwanang'hondolo. Wavala viwalo vizelu na wagoga mibunho ya biki da mtende. 
\v 10 Wakemelela ng'hani, “Ukombola olawa kwa Imulungu wetu, yokala mkigoda cha undewa, na vivija olawa kwa Mwanang'hondolo!” 
\v 11 Wasenga wose wa kuulanga wema kukizunguluka kigoda cha undewa. Awo iwavele na viumbe vine vili na ugima wagwa kingubanguba kuulongozi wa kigoda cha undewa, watambika kwa Imulungu, 
\v 12 walonga, “Ona! Nhogolwa na ukulu na nzewele na kulonga asente na kutegelezigwa na nguvu na udahi, ugweleligwe gweye Imulungu wetu siku zose! Ona!”
\p
\v 13 Imoja wa waja iwavele kambuza, “Wano wavalile viwalo vizelu wanhu gani? Na olawa kwahi?”
\p
\v 14 Niye nimwidika, “Go mkulu, gweye kujuwa.”
\p Nayo kanongela, “Wano awo wahonyeke mna gamagayo makulu. Wavifuwa viwalo vao kwa damu ya Mwanang'hondolo, viwa vizelu chuwee. 
\v 15 Lekaavo wema kuulongozi wa kigoda cha undewa wa Imulungu na omsang'hanila imisi na ikilo mng'anda yake. Ayo yokala mkigoda cha undewa kokala nao na kowakaliza. 
\v 16 Honda wone nzala hebu ng'hilu hebu zuwa hebu vuke kali honda diwasome kabili, 
\v 17 kwavija Mwanang'hondolo yeli hagati ya kigoda cha undewa kokuwa msusilaji wao, nayo kowalongoza mna inzasa ya mazi gogala ugima. Nayo Imulungu kogahangusa mahozi gao mgameso gao.”
\c 8
\s Fundo ya saba ya uhota
\p
\v 1 Mwanang'hondolo viyabandule fundo ya saba ya uhota, ako kuulanga kukala tuulu, kwa kipindi cha nusu saa. 
\v 2 Abaho niwona wasenga saba wa kuulanga wema kuulongozi wa Imulungu, wagweleligwa mhalati saba.
\p
\v 3 Msenga iyagwe wa kuulanga yakalile na kiya cha zahabu cha kusomela ubani, keza kema kuulongozi wa upango wa kulavila nhosa. Kagweleligwa ubani mwingi na kupula kwa wanhu wa Imulungu, yavilave nhosa muupango wa zahabu uli kuulongozi wa kigoda cha undewa. 
\v 4 Yosi da ubani hamoja na kupula kwa wanhu wa Imulungu vichola uchanha kulawa mmakono ga msenga ayo wa kuulanga yemile kuulongozi wa Imulungu. 
\v 5 Abaho ayo imsenga wa kuulanga kasola kiya cha kwikila ubani, keka makala ga moto kulawa muupango wa kulavila nhosa, kakipigisa ikiya mwiisi. Kukala na ng'huwa, mdudumo mimwesa na mtigisiko wa isi.
\s Mhalati ya ichanduso mbaka ya ikane
\p
\v 6 Abaho awo iwasenga saba wa kuulanga wakalile na mhalati saba waitanda kuzitowa.
\p
\v 7 Msenga wa kuulanga wa ichanduso katowa mhalati yake. Mvula ya mabwe na moto, vihanganyigwe na damu vikutuligwa mwiisi. Selusi imoja ya isi ilukula na selusi imoja ya mibiki ilukula na mijani mibisi yose ilukula.
\p
\v 8 Msenga wa kabili wa kuulanga katowa mhalati yake. Kinhu kamba lugongo lukulu lukwaka moto lwasigwa mbahali. Selusi imoja ya bahali igaluka damu, 
\v 9 selusi imoja ya viumbe vili mbahali vifa na selusi imoja ya ngalawa ng'hulu zinangika.
\p
\v 10 Msenga wa kadatu wa kuulanga katowa mhalati yake. Nhondo ng'hulu, ikwaka kamba wenge da moto, igwa kulawa kuulanga na igwila selusi imoja ya mizanda ya mazi na vizanda. 
\v 11 Nhondo ayo yokemigwa, “Usungu.” Avo selusi imoja ya mazi gakala usungu, wanhu wengi wafa mbuli ya mazi gago, kwavija mazi gagaluka kuwa masungu.
\p
\v 12 Abaho msenga wa ikane wa kuulanga katowa mhalati yake. Zuwa na mbalamwezi na nhondo vitowigwa na vagiza selusi imoja ya udahi wake wa kumwemwesa. Selusi imoja ya imisi ikala kuduhu mulenge wa zuwa, vivija selusi imoja ya ikilo ikala kuduhu mulenge wa mbalamwezi na nhondo.
\p
\v 13 Abaho ndola, nimuhulika mhungu koguluka uchanha ng'hani kuulanga kuno kokemelela, “Ogaya, ogaya, ogaya! Wanhu okala mwiisi, awo iwasenga wadatu wa kuulanga wasigale, wahatowa mhalati zao!”
\c 9
\s Mhalati ya tano
\p
\v 1 Abaho msenga wa tano wa kuulanga katowa mhalati yake. Nyona nhondo ikalile ilagale mwiisi, nayo igweleligwa luvugulo lwa mwina wa kolombo dilibule uhelelo. 
\v 2 Ayo inhondo ifungula umwina wa kolombo dilibule uhelelo, na yosi kulu difililika kamba yosi kulu da biwi disomigwa. Zuwa na ulanga vigeligwa ziza mbuli ya yosi dijo. 
\v 3 Nzige walawa kudiyosi dijo, wengila mwiisi, wagweleligwa nguvu kamba ya inge. 
\v 4 Walongeligwa sikuwanange mijani hebu mibiki hebu kinhu chochose kihandigwe. Lakini wawanange wanhu waja waiyeka welibule kilaguso cha Imulungu mvihanga vao. 
\v 5 Nzige awo walongeligwa sikuwawakome wanhu awo, lakini wawadununze kwa miyezi mitano. Usungu wa madununzo gago uigala na usungu wa kufuliligwa na inge. 
\v 6 Kipindi acho chose wanhu oizahila ifa, lakini honda waipate bule. Osulukila kufa, lakini ifa yokala kutali nao.
\p
\v 7 Nzige awo wakoneka kamba falasi waitandile kwa kuitowa. Mmapala gao wakala na vinhu kamba taji za zahabu, na vihanga vao vikala kamba vihanga va wanhu. 
\v 8 Mvili zao ziigala na mvili nhali za watwanzi na meno gao gaigala na meno ga simba. 
\v 9 Mhambaga zao zigubikigwa na kinhu kamba ngao ya zuma. Sauti ya mabawa gao iigala na sauti ya mwanza wa mituka ibululigwa na falasi ochola kuing'hondo. 
\v 10 Wakala na mikila na miba kamba ya inge, kwa mikila ayo wakala na nguvu ya kuwalumiza wanhu kwa kipindi cha miyezi mitano. 
\v 11 Wakala na mndewa yakalile yowalongoza, nayo ayo msenga wa Mwenembago yakalile mkulu wa kolombo dilibule uhelelo. Twaga jake kwa kiebulania Abadoni na kwa Kigiliki Apolioni, fambulo jake, “Mnangaji.”
\p
\v 12 Magayo gaichanduso gabita, lakini gang'hali gayagwe mabili gokwiza.
\s Mhalati ya sita
\p
\v 13 Abaho msenga wa sita wa kuulanga katowa mhalati yake. Mhulika sauti yolawa mna izimhembe nne za upango wa kulavila nhosa utengenezigwe kwa zahabu uli kuulongozi wa Imulungu. 
\v 14 Sauti ayo imulongela msenga wa sita wa kuulanga yakalile na mhalati, “Walekese wasenga wane wa Mwenembago wagodekigwe hana ulwanda mkulu wa Fulate!” 
\v 15 Nayo kawafungulila wasenga awo wane wakalile watandigwe mbuli ya saa ayo ya siku na mwezi awo na mwaka awo, ili wawakome selusi imoja ya wanhu. 
\v 16 Mhulika uwingi wa wakalizi okwela falasi wakala milioni magana mbili. 
\v 17 Vino vivo vinyonile vindagusiligwe, nyona falasi na waja owakwela, wakala na ngao mzimhambaga zao ndung'hu kamba moto na buluu na njano. Mapala ga falasi awo gakala kamba mapala ga simba, mumilomo yao vilawa moto na yosi na baluti ikwaka. 
\v 18 Selusi imoja ya wanhu wose mwiisi wafa mbuli ya mikubulo ayo midatu, nayo ni moto yosi na baluti ikwaka vilawile mumilomo yao. 
\v 19 Nguvu ya falasi awo ikala mna imilomo yao na mna imikila yao. Mikila yao iigala na mgendela hasi na ikala na mapala, kwa mikila ayo wawalumiza wanhu.
\p
\v 20 Wanhu wayagwe wasigale, awo hawakomigwe na mikubulo ayo, hawalekile gehile ga kutambikila vinhu viwatendile kwa makono gao. Hawalekile kuvitambikila vinyamkela na vinyago va zahabu na shaba na sente na mabwe na mibiki, vinhu havidahaga kulola hebu kuhulika hebu kugenda. 
\v 21 Hawalekile ukomaji wao na uhawi na ugoni na ubavi.
\c 10
\s Msenga wa kuulanga na kitabu kidodo
\p
\v 1 Abaho nimona msenga iyagwe wa kuulanga yeli na udahi kohumuluka kuulanga. Kakala yavazigwe wingu na pinde da Imulungu kudipala jake. Kihanga chake kikala kamba zuwa, na magulu gake kamba mhanda za moto. 
\v 2 Mumkono wake kakala yagogile kitabu kidodo kifunguligwe. Keka uchanha ya bahali mgulu wake wa mkono wa kudila na wa kumoso keka mwiisi inyalile. 
\v 3 Kakemelela ng'hani kamba simba yong'ula. Viyamambukize kukemelela, ng'huwa saba zidika kwa kubuma. 
\v 4 Bahaja vizilongile zija zing'huwa nilonda kwandika, lakini mhulika sauti kulawa kuulanga, ilonga, “Mbuli azo zilongigwe na ng'huwa saba zifise, sambiuzandike!”
\p
\v 5 Abaho msenga ayo wa kuulanga inimonile kema uchanha ya bahali na uchanha ya isi, kenula mkono wake wa kudila uchanha kuulanga, 
\v 6 kaiduwila kwa twaga da Imulungu yeli mgima siku zose, yaumbile ulanga na isi na bahali na vinhu vose vili mumo. Kalonga, “Kipindi cha kubetela kibita! 
\v 7 Lakini kipindi imsenga wa saba wa kuulanga yahatowa mhalati yake, Imulungu komambukiza mbuli zake za kifiso kamba viyawapetele watula ndagu, awo iwasang'hanaji zake.”
\p
\v 8 Abaho sauti ija imhulike aho haichanduso kulawa kuulanga, inongela kabili, “Genda kakisole kitabu kifunguligwe kili mumkono wa msenga wa kuulanga yemile mbahali na mwiisi inyalile.”
\p
\v 9 Avo nimcholela ayo imsenga wa kuulanga, nimpula yanigwee acho ikitabu kidodo. Kanongela, “Sola ukije, mmulomo wako chokuwa cha mulile kamba uki, lakini mna iinda chokuwa cha usungu!”
\p
\v 10 Nikisola kitabu acho kidodo mumkono wa msenga ayo wa kuulanga nikija, mmulomo kikala cha umulile kamba uki, lakini vinikidile mna iinda kikala usungu. 
\v 11 Abaho nongeligwa, “Kolondigwa upete kabili usenga wa Imulungu mbuli ya wanhu wa kila isi na lukolo na ulonzi na wandewa wakulu!”
\c 11
\s Wanhu wabili wavonile na kulonga
\p
\v 1 Abaho ngweleligwa ludete kamba kibiki cha kupimila, nongeligwa, “Genda kapime ng'anda ya Imulungu na upango wa kulavila nhosa na uwapete wanhu omtambikila Imulungu mumo. 
\v 2 Lakini sikuupime lubuga lwa kunze ya Ng'anda ya Imulungu, kwavija wagweleligwa wanhu haweli Wayahudi, wao odibojoga buga ding'alile kwa kipindi cha miyezi malongo mane na mbili. 
\v 3 Nowatuma wanhu zangu wabili, olonga usenga wa Imulungu kwa siku elufu moja magana mabili na malongo sita kuno wavala vikumbi.”
\p
\v 4 Wanhu awo wabili onda walonge mbuli yangu awo walongigwe kamba mibiki mibili ya mizeituni na vinhu vibili va kwikila taa vili kuulongozi wa Mndewa wa isi. 
\v 5 Munhu yoyose yahageza kuwalumiza, moto ulawa mmilomo yao owasakaza wanhu wawehile, na munhu yoyose yonda yageze kuwalumiza kokomigwa kamba vivo. 
\v 6 Kipindi vonda wapete usenga wa Imulungu, okuwa na udahi wa kufunga ulanga ili mvula sikuitowe. Wana udahi wa kugalusa mazi kuwa damu, vivija wana udahi wa kugala mikubulo mwiisi kipindi wahalonda.
\p
\v 7 Wahamambukiza kulonga usenga wao, ng'onyo dilawa kudikolombo dilibule uhelelo doitowa nao. Najo dowahuma na dowakoma. 
\v 8 Mitufi yao yokala mna zinzila za buga kulu, hanhu hayawambigwe Mndewa wao. Twaga da kugwaza da buga dijo Sodoma hebu isi ya Misili. 
\v 9 Wanhu kulawa kila isi na lukolo na ulonzi na kabila oilola mitufi yao kwa siku ndatu na nusu na honda watogole izikigwe. 
\v 10 Wanhu okala mwiisi oideng'helela ifa ya wanhu awo wabili. Otenda nyimwilinyimwili na kuigwaa nhunza, kwavija watula ndagu awo wabili wawagaza ng'hani wanhu wa mwiisi. 
\v 11 Zahamala siku azo ndatu na nusu, mhumuzi ya ugima kulawa kwa Imulungu iwezila na kuwengila, na hewo wema wima na wanhu wose wawone wengilwa bwembwe. 
\v 12 Abaho watula ndagu awo wabili wahulika sauti ng'hulu kuulanga, ilonga, “Izoni kuno!” Wachola kuulanga mna diwingu, kuno wanhu wawehile owalola. 
\v 13 Kipindi kikija kukala na mtigisiko mkulu ng'hani wa isi, hanhu ha longo ha isi inangika, na wanhu elufu saba wakomigwa kwa mtigisiko awo. Wanhu wasigale wadumba ng'hani, wamgwaa ukulu Imulungu wa kuulanga.
\p
\v 14 Magayo gakabili gabita, lakini gang'hali gakadatu gokwiza sambi.
\s Mhalati ya saba
\p
\v 15 Abaho msenga wa saba wa kuulanga katowa mhalati yake, kukala na sauti ng'hulu kuulanga, ilonga, “Sambi undewa wa mwiisi wa Mndewa Imulungu wetu na Kilisito iyamsagule. Nayo kotawala siku zose!” 
\v 16 Abaho waja iwavele malongo mabili na nne wakalile kuulongozi wa Imulungu mna ivigoda, wagwa kingubanguba, watambika kwa Imulungu, 
\v 17 walonga,
\q “Tokugwaa asente Imulungu uli na Udahi wose,
\q uli baha na ukalile baha!
\q Kwavija kwa nguvu yako ng'hulu, kusonga kutawala!
\q
\v 18 Wanhu wa isi zose wagevuzika,
\q lakini kipindi cha ng'hasiliki yako kivika,
\q kipindi cha kutagusigwa wanhu wafile.
\q Kipindi kivika cha kuwagwaa nhunza watula ndagu, awo iwasang'hanaji wako,
\q wanhu wako wose okugwaa ukulu,
\q wakulu kwa wadodo.
\q Kipindi cha kuwananga wanhu wanangile isi kivika!”
\p
\v 19 Ng'anda ya Imulungu kuulanga ivuguligwa, na sanduku da lagano joneka mumo. Kukala na mimwesa na mdudumo na ng'huwa na mtigisiko wa isi na mvula ng'hulu ya mabwe.
\c 12
\s Mtwanzi na Zoka kulu
\p
\v 1 Abaho kilaguso cha kukanganya choneka kuulanga. Kukala na mtwanzi yavalile zuwa na yakalile na mbalamwezi mmagulu gake na kudipala jake kavala taji ya nhondo longo na mbili. 
\v 2 Kakala na inda, na kalila kwa usungu kamba usungu wa kulela mwana.
\p
\v 3 Abaho kilaguso kiyagwe cha kukanganya choneka kuulanga. Zoka kulu dung'hu yau na dikala na mapala saba na mhembe longo, na kila pala dikala na taji. 
\v 4 Zoka dijo kwa kila jake dibulula selusi imoja ya nhondo za kuulanga na dizasila mwiisi. Najo dima kuulongozi wa mtwanzi yuyo yakalile yolonda kulela, ili baho imwana yahavumbuka dimsukile. 
\v 5 Abaho, mtwanzi yuyo kalela mwana wa kimbigalo, yonda yawatawale wanhu wa isi zose kwa mkongoja wa zuma lakini imwana kasoligwa na kugaligwa kwa Imulungu kuna ikigoda chake cha undewa. 
\v 6 Mtwanzi yuyo kakimbilila kuluwala, hanhu hayamtandile Imulungu, kuko kalolesigwa kwa siku elufu moja magana mabili na malongo sita.
\p
\v 7 Abaho kulawilila ng'hondo kuulanga. Mikaeli na wasenga wayage wa kuulanga waitowa na zoka dijo, najo dizoka hamoja na wasenga zake diitowa nao, 
\v 8 lakini zoka dijo na wasenga zake wahumwa, hawakalile na hanhu hakukala kuko kuulanga. 
\v 9 Avo zoka dijo kulu jasigwa hasi, najo dijo zoka da umwaka, dikemigwa ija Imdumuka hebu Mwenembago, najo dijo diwavizila wanhu wose wa mwiisi. Jasigwa hasi mwiisi hamoja na wasenga zake.
\p
\v 10 Abaho mhulika sauti kuulanga ilonga, “Sambi Imulungu kawakombola wanhu wake na Imulungu mndewa wetu kolagusa nguvu zake! Sambi Kilisito iyamsagule kalagusa mamulaka gake! Kwavija yuyo yakalile yokwima kuulongozi wa Imulungu imisi na ikilo kuwalavila vitala ndugu zetu kasigwa hasi. 
\v 11 Ndugu zetu wadihuma kwa damu ya Mwanang'hondolo na kwa kuwalongela wayagwe mbuli ya Imulungu, kwavija hawaunogele ugima wao na waitanda hata kufa. 
\v 12 Avo deng'helela gweye ulanga na wose okala mumo! Lakini zogaya isi na bahali! Kwavija Mwenembago keza kumwenu, kuno kamema ng'hasiliki, kajuwa kamba kasigaza kipindi kidodo.”
\p
\v 13 Zoka dijo vijone jasigwa mwiisi, disonga kumsaka mtwanzi ija yalelile mwana wa ikimbigalo. 
\v 14 Mtwanzi yuyo kagweleligwa mabawa mabili ga mhungu mkulu ili yaguluke kutali na zoka dijo, mbaka hanhu hake kuko kuluwala, kuko kokala goya kwa miyaka midatu na nusu. 
\v 15 Abaho, dizoka dideka mazi mengi kamba ga lwanda mkulu, gamuwinza kuchugu mtwanzi yuyo ili gamkulule. 
\v 16 Lakini isi imtaza mtwanzi yuyo, igubuka na kugafonza mazi galawile mmulomo wa zoka dijo. 
\v 17 Avo zoka dijo digevuzika ng'hani, disegela dichola kuitowa na wana wayagwe wa mtwanzi yuyo, awo wao wanhu ogoga malagizo ga Imulungu na ogoga ukweli ugubuligwe na Yesu. 
\v 18 Abaho zoka dijo dima kumgwazo wa ibahali.
\c 13
\s Ming'onyo mibili
\p
\v 1 Abaho nijona ng'onyo dolawa mbahali. Dina mhembe longo na mapala saba, uchanha ya kila mhembe kukala na taji na uchanha ya kila pala kukala na twaga da kumuliga Imulungu. 
\v 2 Ng'onyo dijo diigala na duma, na dina mifumbi kamba ya dubu na lomo jake diigala na lomo da simba. Zoka dijo dimgwaa ajo ding'onyo nguvu yake na kigoda chake cha undewa na udahi wake. 
\v 3 Pala dimoja da ng'onyo ajo joneka na ng'hovu ya londa dilondile kumkoma, lakini londa jake dihona. Wanhu wa mwiisi yose wakanganya na kudikweleleza. 
\v 4 Wanhu wose waditambikila zoka dijo kwavija dimgwaa ajo ding'onyo udahi wake. Vivija waditambikila ajo ding'onyo walonga, “Nani yaigalile na ng'onyo dino? Nani yodaha kuitowa najo?”
\p
\v 5 Abaho ajo ding'onyo ditogoleligwa kulonga mbuli za kuitapa na kumuliga Imulungu, digweleligwa udahi kwa kipindi cha miyezi malongo mane na mbili. 
\v 6 Avo disonga kumuliga Imulungu, kadiliga twaga da Imulungu na hanhu hoyokala na wose okala kuulanga. 
\v 7 Ng'onyo ajo ditogoleligwa kuitowa na wanhu wa Imulungu na diwahuma, na digweleligwa udahi kwa wanhu wa kila isi na lukolo na ulonzi na kabila. 
\v 8 Wanhu wose okala mwiisi oditambikila ng'onyo ajo, ila waja waiyeka matwaga gao gandikigwe mna ikitabu cha ugima cha Mwanang'hondolo yachinjigwe isi ing'hali hainalumbigwa.
\p
\v 9 “Munhu yeli na magwiti yategeleze! 
\v 10 Munhu yekigwe kwa kugogigwa, kogogigwa, munhu yekigwe kwa kukomigwa kwa sime, kokomigwa kwa sime. Luno lukemo kwa wanhu wa Imulungu wafunge umoyo na watamanile.”
\p
\v 11 Abaho nijona ng'onyo diyagwe dolawa mwiisi. Dikala na mhembe mbili kamba mhembe za ng'hondolo, dilonga kamba dija dizoka. 
\v 12 Dikala na udahi wose wa ajo ding'onyo da ichanduso, na diusang'hanila udahi awo hanhu ha ajo ding'onyo. Diinanahiza isi yose na wanhu okala mumo waditambikile ng'onyo ajo da ichanduso dikalile na londa kudipala abaho dihona. 
\v 13 Avo, ng'onyo ajo da kabili ditenda unzonza mkulu, mbaka moto kulawa kuulanga uhumuluka hasi mgameso ga wanhu. 
\v 14 Diwavizila wanhu okala mwiisi kwa kubitila unzonza diutendile hanhu ha ng'onyo da ichanduso. Ajo ding'onyo diwalongela wanhu wazenge sanamu kwa kuditogola ding'onyo dikalile dilumile kwa sime lakini diwa gima kabili. 
\v 15 Ng'onyo ajo da kabili ditogoleligwa kulava mhumuzi ya ugima kwa ayo isanamu ya ding'onyo da ichanduso, ili ayo isanamu idahe kulonga na kuwakoma wanhu walekile kuitambikila. 
\v 16 Vivija ajo ding'onyo diwananahiza wanhu wose, wadodo kwa wakulu, wagoli kwa wakiwa, watumwa kwa wanhu wakomboligwe, wekigwe kilaguso mna imikono yao ya kudila hebu mvihanga. 
\v 17 Kuduhu munhu yodaha kugula hebu kuchuuza kinhu kamba kabule kilaguso acho, kilaguso acho ni twaga da ajo ding'onyo hebu namba za twaga dijo.
\p
\v 18 Hano holondigwa nzewele! Munhu yeli na nzewele kodaha kufambula namba za ng'onyo dijo, kwavija namba azo zokwima kwa twaga da munhu. Namba azo ni magana sita na malongo sita na sita.
\c 14
\s Mwanang'hondolo na wanhu zake
\p
\v 1 Abaho niluwona Lugongo lwa Sayuni na Mwanang'hondolo kema uchanha yake, kakala na wanhu laki moja na elufu alobaini na nne, mvihanga vao wakala wandikigwe twaga da Mwanang'hondolo na twaga da Tatake. 
\v 2 Mhulika sauti kulawa kuulanga, iigalile na mazi mengi vigokilima na mdudumo. Sauti imhulike ikala kamba sauti ya watowa bango viwotowa bango jao. 
\v 3 Wakala okwimba lwila lwa sambi kuulongozi wa kigoda cha undewa na kuulongozi wa viumbe vine vili na ugima na waja iwavele. Kuduhu munhu yadahile kuifunza lwila lulo ila wanhu waja waiyeka laki moja na elufu alobaini na nne wakomboligwe mwiisi. 
\v 4 Wanhu awo wakala waikile goya na hawanawasa bule na watwanzi. Wao omkweleleza Mwanang'hondolo kokose koyochola. Wakomboligwa kulawa mgati mwa wanhu, wawa wanhu wa ichanduso kulavigwa kwa Imulungu na kwa Mwanang'hondolo. 
\v 5 Wanhu awo hawana longa uvizi wowose, na wabule kinhu chochose kihile kumwao.
\s Wasenga wadatu wa kuulanga
\p
\v 6 Abaho nimona msenga iyagwe wa kuulanga kozumha kuulanga, kakala na Mbuli Inogile ilibule uhelelo kowapetela wanhu wa mwiisi, kila kabila na lukolo na ulonzi na isi. 
\v 7 Kalonga kwa sauti ng'hulu, “Mdumbeni Imulungu na mumgwee ukulu! Kwavija kipindi chake cha kuwatagusa wanhu wa mwiisi kivika. Mtambikileni yuyo yaumbile ulanga na isi na bahali na nzasa za mazi!”
\p
\v 8 Msenga wa kabili wa kuulanga kamkweleleza ayo wa ichanduso kalonga, “Digwa! Buga kulu da Babeli digwa! Diwagwelele wanhu wa isi zose divai yake kali, divai iwatenda wanhu wasulukile kutenda ugoni!”
\p
\v 9 Msenga wa kadatu wa kuulanga kawakweleleza wayage wabili walongole, kalonga kwa sauti ng'hulu, “Munhu yoyose yonda yaditambikile ding'onyo na sanamu yake na munhu yekigwe kilaguso mkihanga chake hebu mumkono wake wa kudila, 
\v 10 munhu ayo kong'wa divai ya ng'hasiliki ya Imulungu igidigwe mkikasi cha ng'hasiliki yake bila kuhanganyigwa na mazi. Munhu ayo kogaya muumoto na mabwe gokwaka mgameso ga wasenga wa kuulanga na mgameso ga Mwanang'hondolo. 
\v 11 Yosi da moto uwadununza dokwela uchanha siku zose. Wanhu waditambikile ding'onyo ajo na sanamu yake na kwa munhu yoyose yekigwe kilaguso cha twaga jake, honda wabwihile imisi na ikilo siku zose.”
\p
\v 12 Avo wanhu wa Imulungu waja ogoga malagizo ga Imulungu na omtamanila Yesu olondigwa wafunge umoyo.
\p
\v 13 Abaho mhulika sauti kulawa kuulanga yolonga, “Yandika! Wamweda wanhu waja kulawa sambi ofa kuno wailumba na Mndewa!”
\p Nayo Loho wa Imulungu kolonga, “Obwihila na magayo gao, kwavija gaja gawasang'hane gowakweleleza.”
\s Wanhu wa mwiisi okwikigwa hamoja kamba zabibu
\p
\v 14 Abaho ndola nyona kukala na wingu zelu, na ayo yakalile mdiwingu kaigala na Mwana wa Munhu. Kakala na taji da zahabu mdipala jake na sengo ikutwa mumkono wake. 
\v 15 Abaho msenga iyagwe wa kuulanga kalawa mng'anda ya Imulungu ako kuulanga, kakemelela kamulongela ayo yakalile mdiwingu, “Chonde, sola sengo yako usenge vihandigwe, kwavija kipindi cha kusenga kivika, vihandigwe mwiisi vikangala.” 
\v 16 Baho ayo yakalile mdiwingu kazungulusa sengo yake mwiisi, na vihandigwe mwiisi visengigwa.
\p
\v 17 Abaho msenga iyagwe wa kuulanga kalawa mng'anda ya Imulungu ako kuulanga, nayo vivija kakala na sengo ikutwa.
\p
\v 18 Abaho msenga iyagwe wa kuulanga, yakalile mulolesaji wa moto, kalawa muupango wa kulavila nhosa kamulongela kwa sauti ng'hulu ayo msenga wa kuulanga yakalile na sengo ikutwa, “Sola sengo yako ikutwa ukanhe vimvaba va zabibu vili mumgunda wa mizabibu uli mwiisi, kwavija zabibu zipa!” 
\v 19 Ayo imsenga wa kuulanga kazungulusa sengo yake mwiisi kakanha zabibu mvimvaba vake, kazipigisila hanhu ha kukamila zabibu, hanhu ha ng'hasiliki ya Imulungu. 
\v 20 Zabibu zikamigwa hanhu aho hakalile kunze ya buga, na damu ikilima kulawa hanhu aho kwa ugazi wa kuvikila mmulomo wa falasi kulawa hasi na utali wa kilometa magana madatu.
\c 15
\s Mikubulo saba
\p
\v 1 Abaho ndola kuulanga nyona kilaguso kiyagwe kikulu cha kukanganya. Kukala na wasenga saba wa kuulanga wakalile na mikubulo saba ya uhelelo, kwa mikubulo ayo saba ng'hasiliki ya Imulungu yokuwa imala.
\p
\v 2 Abaho nyona kinhu kamba bahali ya kiyoo ihanganyigwe na moto. Vivija niwona wanhu waja wadihumile dija ding'onyo na sanamu yake na dijo twaga jake dolagusigwa kwa namba. Wanhu awo wema kumgwazo wa ija ibahali ya kiyoo kuno wagoga mabango gawagweleligwe na Imulungu. 
\v 3 Wemba lwila lwa Musa msang'hanaji wa Imulungu na lwila lwa Mwanang'hondolo,
\q “Gweye Mndewa Imulungu uli na Udahi wose,
\q sang'hano zako ng'hulu na za unzonza!
\q Mndewa wa isi zose,
\q nzila zako zinoga na za ukweli!
\q
\v 4 Vino nani yoleka kukudumba gweye Mndewa?
\q Vino nani yoleka kudigwaa ukulu twaga jako?
\q Gweye wiiyeka ayo ung'alile.
\q Wanhu wa isi zose okwiza kumwako na kukutambikila,
\q kwavija kulagusa kotagusa bila kubagula.”
\p
\v 5 Vigabitile gano nyona ng'anda ya Imulungu kuko kuulanga ivuguligwa, na mgati yake hema dilagusa Imulungu kabaho. 
\v 6 Avo waja iwasenga saba wa kuulanga wakalile na mikubulo saba walawa mng'anda ya Imulungu, kuno wavala viwalo vitengenezigwe kwa kitani inogile ing'ala na mikwiji ya zahabu ifungigwa kuzunguluka mhambaga zao. 
\v 7 Abaho imoja wa viumbe vine vili na ugima kawagwaa awo iwasenga saba wa kuulanga mabakuli saba ga zahabu gamemile ng'hasiliki ya Imulungu, yeli mgima siku zose. 
\v 8 Ng'anda yose ya Imulungu imema yosi da ukulu na nguvu ya Imulungu, kuduhu munhu yadahile kwingila mng'anda mbaka imale mikubulo ayo saba ya waja iwasenga saba wa kuulanga.
\c 16
\s Bakuli za ng'hasiliki ya Imulungu
\p
\v 1 Abaho mhulika sauti ng'hulu kulawa mng'anda ya Imulungu yolonga kwa waja iwasenga saba wa kuulanga, “Gendeni mkakutule mwiisi mabakuli gago saba ga ng'hasiliki ya Imulungu.”
\p
\v 2 Msenga wa ichanduso wa kuulanga kasegela kakutula bakuli jake mwiisi. Milonda iluma ng'hani ilawilila kwa wanhu wose wakalile na kilaguso cha dija ding'onyo na wanhu waitambikile sanamu yake.
\p
\v 3 Abaho msenga wa kabili wa kuulanga kakutula bakuli jake mbahali. Mazi gose gawa damu kamba damu ya munhu yafile, na kila kiumbe kili na ugima mbahali kifa.
\p
\v 4 Abaho msenga wa kadatu wa kuulanga kakutula bakuli jake mna imizanda na mna zinzasa za mazi, vose viwa damu. 
\v 5 Nimuhulika msenga wa kuulanga mulolesaji wa mazi kolonga, “Gweye ung'alile, gweye uli baha na ukalile baha. Gweye kutagusa viilondigwa! 
\v 6 Kwavija weta damu ya wanhu wa Imulungu na watula ndagu, avo gweye kuwagwaa damu wang'we. Awo opata kija kiwalondeke!” 
\v 7 Abaho mhulika sauti kulawa muupango wa kulavila nhosa ilonga, “Ona, Mndewa Imulungu uli na Udahi wose! Nhaguso zako ni za kweli na vivo viilondigwa!”
\p
\v 8 Abaho msenga wa ikane wa kuulanga kakutula bakuli jake kudizuwa, zuwa dikala na nguvu ya kuwasoma wanhu kwa ukali wake. 
\v 9 Wanhu wasomigwa na zuwa na wadiliga twaga da Imulungu, yeli na udahi kwa mikubulo ayo. Lakini hawalekile bule nzambi zao na kumgwaa ukulu Imulungu.
\p
\v 10 Abaho msenga wa tano wa kuulanga kakutula bakuli jake aho hodikala dija ding'onyo. Ziza jenela muundewa wa ajo ding'onyo, na wanhu wailuma milimi yao mbuli ya usungu, 
\v 11 wamuliga Imulungu wa kuulanga kwa usungu wao na milonda, lakini hawalekile bule nzambi zao.
\p
\v 12 Abaho msenga wa sita wa kuulanga kakutula bakuli jake hana ulwanda mkulu wa Fulate. Mazi gake ganyala, avo nzila ilawilila kwa wandewa olawa mwambu wa kudilawila zuwa. 
\v 13 Abaho niwona vinyamkela wadatu waigalile na mibulwa, imoja kalawa mudilomo da dija dizoka na iyagwe mudilomo da dija ding'onyo na iyagwe mmulomo wa ija imtula ndagu wa uvizi. 
\v 14 Zino azo loho ndatu za vinyamkela otenda unzonza. Loho azo ndatu zochola kwa wandewa wose wa mwiisi, kuweka hamoja kwa ng'hondo mna isiku ng'hulu ya Imulungu yeli na Udahi wose.
\p
\v 15 Mndewa kolonga, “Tegeleza! Niye nokwiza kamba mbavi! Kamweda munhu yokala meso, na kuvala viwalo vake ili sikuyagende mwazi na kugwa kinyala mgameso ga wanhu.”
\p
\v 16 Abaho loho azo ziwagala hamoja awo iwandewa hanhu hokemigwa kwa Kiebulania Halimagedoni.
\p
\v 17 Abaho msenga wa saba wa kuulanga kakutula bakuli jake kuulanga. Mng'anda ya Imulungu kuna ikigoda cha undewa kulawa sauti, ilonga, “Imala kutendeka!” 
\v 18 Kulawilila mimwesa na mdudumo na ng'huwa na mtigisiko wa isi. Mtigisiko awo wa isi mkulu ng'hani haunalawila toka Imulungu yaumbe munhu. 
\v 19 Buga dija kulu ditulika vihande vidatu, mabuga gose ga mwiisi ganangika. Babeli buga kulu Imulungu hadisemwile kading'weza kikasi cha divai ya ng'hasiliki yake ng'hulu. 
\v 20 Visiwa vose visegela na vigongo navo havoneke kabili. 
\v 21 Mvula ya mabwe makulu geli na uzito wa kilo hamsini kila dibwe dimoja, iwatowela wanhu. Wanhu wamuliga Imulungu mbuli ya mikubulo ayo ya mvula ya mabwe kwavija ikala mikubulo mikulu ng'hani.
\c 17
\s Mgoni mkulu na ding'onyo
\p
\v 1 Abaho imoja wa awo iwasenga saba wa kuulanga wakalile na mabakuli saba, keza kanongela, “Izo nikulagusile nhaguso ya ija imgoni mkulu, najo dijo buga kulu dizengigwe behi ya mazi mengi. 
\v 2 Wandewa wa mwiisi watenda nayo ugoni, na wanhu okala mwiisi wakoligwa kwa divai ya ugoni wake.”
\p
\v 3 Ving'halile nolongozigwa na Loho wa Imulungu, nyona nosoligwa na msenga wa kuulanga mbaka kuluwala. Kuko nimona mtwanzi kakala uchanha ya ng'onyo dung'hu. Ng'onyo ajo jandikigwa kila hanhu matwaga ga kumuliga Imulungu. Ng'onyo ajo dikala na mapala saba na mhembe longo. 
\v 4 Mtwanzi ayo kakala yavalile kiwalo cha langi ya zambalau na udung'hu, kakala yaihambile vinhu va zahabu na lulu na mabwe gayagwe ga bei ng'hulu. Mumkono wake kagoga kikasi cha zahabu kimemile mbuli zigela kinyala, zilaguse uchafu wa ugoni wake. 
\v 5 Mkihanga chake kandikigwa twaga dikalile na fambulo difisigwe, “Babeli buga kulu, mama wa wanhu wagoni na mbuli zigela kinyala ng'hani mwiisi.” 
\v 6 Nimona mtwanzi ayo kakoligwa damu ya wanhu wa Imulungu, na damu ya wanhu wakomigwe mbuli ya kugendelela kumtamanila Yesu.
\p Vinimonile ng'hanganya ng'hani. 
\v 7 Abaho ayo imsenga wa kuulanga kanongela, “Habali kokanganya? Niye nokulongela mbuli zifisigwe za mtwanzi ino na ng'onyo ajo diyakwelile dili na mapala saba na mhembe longo. 
\v 8 Ng'onyo ajo diujone, aho haichanduso dikala gima lakini sambi difa. Dolawa kudikolombo dilibule uhelelo, lakini dobanangigwa. Wanhu okala mwiisi awo matwaga gao hagandikigwe mna ikitabu cha ugima toka kulumbigwa kwa isi, okanganya kujona ng'onyo ajo dikalile gima aho haichanduso na sambi difa na dolawilila kabili!
\p
\v 9 “Aho holondigwa nzewele na ubala mkulu kujuwa mbuli zino. Gago gamapala saba ni vigongo saba viyakalile ayo imtwanzi, vivija awo wandewa saba. 
\v 10 Mna iwao wandewa saba, wandewa watano wabanangigwa mbe, imoja kogendelela kutawala na imoja yang'hali hanakwiza, na yaheza kotawala kwa kipindi kidodo. 
\v 11 Ajo ding'onyo dikalile gima aho haichanduso lakini sambi hadili gima kabili ni mndewa wa nane. Nayo vivija ni imoja wa iwaja wandewa saba na kobanangigwa.
\p
\v 12 “Zija mhembe longo ziwone awo wandewa, awo wang'hali hawanasonga kutawala. Lakini ogweleligwa udahi wa kulongoza kwa saa dimoja hamoja na ajo ding'onyo. 
\v 13 Wandewa wano wose longo ogesa dimoja, na odigwaa ajo ding'onyo nguvu zao na udahi wao. 
\v 14 Oitowa ng'hondo na Mwanang'hondolo, lakini Mwanang'hondolo hamoja na waja yawakemile na kuwasagula waja otamaniligwa, kowahuma kwavija yuyo Mndewa wa iwandewa na Mkulu wa iwakulu.”
\p
\v 15 Vivija ayo imsenga wa kuulanga kanongela, “Mazi gawone aho hayakalile ija imgoni, awo wanhu wa kila isi na lukolo na kabila na ulonzi. 
\v 16 Mhembe longo ziwone na dija ding'onyo, vomwihila ija imgoni. Omboka kila kinhu kiyali nacho na omuleka mwazi, oija nyama yake na kumsoma moto. 
\v 17 Kwavija Imulungu keka magesa gake goyolonda kusang'hana mmizoyo yao, kwa hewo kuitogolela na kudigwaa ajo ding'onyo udahi wao wa kutawala mbaka gaja gayalongile Imulungu gavikizwe.
\p
\v 18 “Mtwanzi yuumone dijo buga kulu ditawala wandewa wa mwiisi.”
\c 18
\s Kunangigwa kwa Babeli
\p
\v 1 Abaho nimona msenga iyagwe kohumuluka kuulanga. Kakala na udahi mkulu na isi imwemweselwa kwa mng'alo wake. 
\v 2 Kalonga kwa sauti ng'hulu,
\q “Kugwa! buga kulu da Babeli kugwa!
\q Sambi kawa kae ya vinyamkela
\q na loho zihile,
\q kawa kae ya ndege wehile na wanyama ogevuza.
\q
\v 3 Kwavija wanhu wa isi wakoligwa kwa divai kali ya kuwatenda wasulukile ugoni wake,
\q na wandewa wakulu wa mwiisi watenda nayo ugoni.
\q Na wachuuza vinhu wa mwiisi wapata ugoli kwa kusulukila kwake vinhu vihile.”
\p
\v 4 Abaho mhulika sauti iyagwe kulawa kuulanga ilonga,
\q “Wanhu zangu, segeleni kudibuga da Babeli,
\q ili sikumuilumbe nayo mzinzambi zake,
\q sikumupate nhaguso yake.
\q
\v 5 Kwavija nzambi zake nyingi ng'hani ziilundiza mbaka kuulanga,
\q nayo Imulungu kazikumbuka nzambi zake.
\q
\v 6 Mtendeleni kamba viyawatendele mweye,
\q mliheni miyanza mibili ya vija viyatendile.
\q Mhanganyileni mkikasi chake kinhu kikali cha kung'wa miyanza mibili ya vija viyawagwelele mweye.
\q
\v 7 Mgweeni usungu na magayo makulu,
\q kamba viyakalile kwa ugima wa kubwihila ng'hani na kuitapa.
\q Kwavija kalonga muumoyo wake,
\q ‘Niye nokala kamba malikia! Niye sili mgane,
\q na niye sikujuwile bule kuiyalala!’
\q
\v 8 Mbuli ya gago mikubulo impata kwa siku dimoja,
\q mitamu na kunyunyuwala na lufilili lwa nzala.
\q Kosomigwa moto,
\q kwavija Mndewa Imulungu yomtagusa kana udahi.”
\p
\v 9 Wandewa wa mwiisi watendile nayo ugoni na kukala nayo ugima wa kubwihila oiyalala na kulila vonda wone yosi da kubanangigwa kwake. 
\v 10 Okwima kutali kwa kudumba magayo gake na olonga,
\q “Kogaya! Kogaya gweye Babeli buga kulu dili na udahi!
\q Kwavija kutagusigwa kwa saa dimoja diiyeka!”
\p
\v 11 Vivija wachuuza vinhu wa mwiisi olila na kumuyalalila, kwavija kuduhu munhu kabili yogula vinhu vao. 
\v 12 Kuduhu munhu kabili yogula zahabu hebu sente hebu mabwe ga bei ng'hulu na lulu hebu kitani na viwalo va langi ya zambalau hebu nzabi zinogile hebu viwalo vidung'hu, mibiki inung'hila goya, viya va mhembe za nhembo, viya va mibiki ya bei ng'hulu ng'hani, viya va shaba na zuma na malumalu, 
\v 13 mdalasini na vinhu va kugela mwiimboga na ubani na manemane na udi na divai na mavuta na usage na ngano na ng'ombe na ng'hondolo, falasi na mituka ya kubulula, watumwa na ugima wa wanhu.
\p
\v 14 Wao wachuuza vinhu omulongela, “Vinhu vose vinogile viubetele visegela, na ugoli na ukulu ukuhonyoka, na hudaha kuvipata kabili!” 
\v 15 Wanhu ochuuza vinhu wapatile ugoli mbuli ya buga dijo, okwima kutali mbuli ya bwembwe da magayo gake, oiyalala na kulila, 
\v 16 olonga,
\q “Kugaya! Kugaya buga kulu!
\q Kuzoela kuvala viwalo va kitani na langi ya zambalau na udung'hu,
\q na kuihamba kwa vinhu va zahabu na mabwe ga bei ng'hulu na lulu!
\q
\v 17 Kwa saa dimoja diiyeka ugoli wako upotela!”
\p Abaho walosaji wose na wanhu okwela meli, na wanhu osang'hana mwiimeli na wanhu wose osang'hana mbahali, wema kutali, 
\v 18 viwajone yosi da moto ukalile udilukuza walila kwa sauti, “Hadina lawilila buga diyagwe kamba buga dino kulu!” 
\v 19 Wagoga mapala gao, walila na kuiyalala,
\q “Kugaya! Kugaya buga kulu!
\q Kwavija wanhu wose weli na meli zigenda mbahali
\q wapata ugoli kubitila ugoli wako.
\q Na kwa saa dimoja diiyeka kwagiza kila kinhu!”
\q
\v 20 Ulanga, deng'helela mbuli ya kunangika kwake.
\q Wanhu wa Imulungu na watumigwa na watula ndagu, deng'heleleni!
\q Kwavija Imulungu kaditagusa mbuli ya gaja gayasang'hane kumwenu.
\p
\v 21 Abaho, msenga imoja wa kuulanga yeli na udahi kenula dibwe diigalile na dibwe kulu da kudugila, kajasa mbahali kuno kolonga,
\q “Vino vivo vonda jasigwe kwa nguvu,
\q buga kulu da Babeli
\q na honda joneke kabili.
\q
\v 22 Sauti za bango na sauti za vilonge longe na mhalati,
\q honda zihulikigwe kabili mgati mwako!
\q Kuduhu munhu yoyose yosang'hana
\q yonda yahulikigwe kabili mgati mmwako,
\q hebu sauti za dibwe da kudugila
\q honda zihulikigwe kabili mgati mmwako.
\q
\v 23 Mulenge wa taa honda oneke kabili mgati mmwako,
\q na sauti ya munhu yosola na mtwanzi yosoligwa
\q honda zihulikigwe kabili mgati mmwako.
\q Wachuuza vinhu wako wakala wakulu mwiisi
\q na kwa uhawi wako kuwagiza wanhu wose wa mwiisi!”
\p
\v 24 Buga dijo da Babeli ditagusigwa kwavija mgati mmwake yoneka damu ya watula ndagu wa Imulungu na damu ya wanhu wa Imulungu na damu ya wanhu wose wakomigwe mwiisi.
\c 19
\s Nyila za kumtogola Imulungu ako kuulanga
\p
\v 1 Vigabitile gago mhulika kinhu kamba lunhu lwa wanhu kuulanga, olonga, “Imulungu yatogoligwe! Ukombola na ukulu na nguvu va kumwake Imulungu wetu! 
\v 2 Kwavija nhaguso yake ya kweli na vivo viilondigwa! Imulungu kamtagusa ija imgoni mkulu yakalile yowagiza wanhu wa mwiisi kwa ugoni wake. Kamkoboza kwavija kawakoma wasang'hanaji zake!” 
\v 3 Wakemelela kabili, “Imulungu yatogoligwe! Yosi da moto udisakaza buga dijo dokwela uchanha siku zose!” 
\v 4 Waja wavele malongo mabili na nne na viumbe vine vili na ugima wagwa kingubanguba wamtambikila Imulungu, yakalile mkigoda cha undewa. Walonga, “Ona! Imulungu yatogoligwe!”
\s Nyimwilinyimwili ya zengele da Mwanang'hondolo
\p
\v 5 Abaho ilawilila sauti kulawa mkigoda cha ukulu, ilonga, “Mtogoleni Imulungu, mweye mose muli wasang'hanaji zake, mweye mumdumba Imulungu, wose wakulu kwa wadodo.” 
\v 6 Abaho mhulika kinhu kamba sauti ya lunhu mkulu lwa wanhu na sauti ya mazi mengi vigokilima na mdudumo, ilonga, “Imulungu yatogoligwe! Kwavija Mndewa Imulungu wetu yeli na Udahi wose kotawala! 
\v 7 Tudeng'helele na kusekelela, tumgwee ukulu! Kwavija kipindi cha zengele da Mwanang'hondolo kivika, na mtwanzi yosoligwa katandigwa mbe. 
\v 8 Mtwanzi ayo katogoleligwa kuvala kiwalo cha kitani inogile, isunhigwe na kung'ala.” Kiwalo acho cha kitani azo sang'hano zinogile za wanhu wa Imulungu.
\p
\v 9 Abaho ayo imsenga wa kuulanga kanongela, “Yandika vino, ‘Wamweda wanhu wose wagonekigwe kuna inyimwilinyimwili ya zengele da Mwanang'hondolo!’ ” Vivija kalonga, “Mbuli zino za ukweli za Imulungu.”
\p
\v 10 Nigwa kingubanguba mmagulu gake nilonda kumtambikila, lakini kanongela, “Sikuutende vivo! Niye na msang'hanaji kamba gweye na wayago wamtogole Yesu, ogoga ukweli ugubuligwe na Yesu. Mtambikile Imulungu! Kwavija wanhu ogoga ukweli ugubuligwe na Yesu olongozigwa na loho yawalongoze watula ndagu wa Imulungu.”
\s Falasi mzelu na ija yomkwela
\p
\v 11 Abaho nyona ulanga uvuguligwa na kukala na falasi mzelu. Ayo yomkwela kakemigwa, “Yotamaniligwa” na “Kweli.” Ayo kotagusa na koitowa kwa mbuli ya gaja golondigwa. 
\v 12 Meso gake kamba lambi da moto, na kavala mataji mengi mdipala jake. Kakala yandikigwe twaga, kuduhu yoyose yadijuwile ila heyo mwenyego yaiyeka. 
\v 13 Kakala yavalile kiwalo kizovekigwe mwiidamu. Twaga jake kakemigwa, “Mbuli ya Imulungu.” 
\v 14 Wakalizi wa kuulanga wamkweleleza kuno wakwela falasi wazelu na wavala viwalo va kitani, vizelu ng'hani na ving'ala. 
\v 15 Sime dikutwa dilawa mmulomo wake, na kwa sime dijo wanhu wa isi zose ohumwa. Kowatawala kwa mkongoja wa zuma, na koikama divai hanhu ha kukamila zabibu ha ng'hasiliki ya Imulungu yeli na Udahi wose. 
\v 16 Mkiwalo chake na mdihaza jake jandikigwa twaga dino, “Mndewa wa iwandewa na Mkulu wa iwakulu.”
\p
\v 17 Abaho nimona msenga wa kuulanga kema mdizuwa. Kakemelela kwa sauti ng'hulu kawalongela ndege wose wakalile oguluka, kuna uulanga, “Izoni! Iting'hanileni hamoja mbuli ya nyimwilinyimwili ng'hulu ya Imulungu! 
\v 18 Izoni muje ng'huli za wandewa wakulu, wakulu wa wakalizi na wakalizi na muje falasi na wanhu owakwela, muje ng'huli za wanhu wose, wakomboligwe na watumwa, wakulu kwa wadodo!”
\p
\v 19 Abaho nijona dija ding'onyo hamoja na wandewa wakulu wa mwiisi na wakalizi wao, waiting'hana hamoja watende ng'hondo na ija yakwelile falasi hamoja na wakalizi zake. 
\v 20 Lakini ajo ding'onyo digogigwa hamoja na mtula ndagu wa uvizi yakalile yotenda unzonza hanhu ha ding'onyo. Kwa unzonza awo kawavizila waja wakalile na kilaguso cha ajo ding'onyo na waja waitambikile sanamu ya ding'onyo ajo. Dijo ding'onyo na mtula ndagu wa uvizi wose wabili wasigwa kuno wang'hali wagima mdilamba da moto mkulu na mabwe gokwaka. 
\v 21 Waja iwakalizi zao wakomigwa kwa sime dilawile mmulomo wa ija yakwelile falasi, na ndege wose weguta mbuli ya nyama za ng'huli zao.
\c 20
\s Miyaka elufu imoja
\p
\v 1 Abaho nimona msenga wa kuulanga kohumuluka kulawa kuulanga kuno kagoga luvugulo lwa mwina wa kolombo dilibule uhelelo na mnyololo mkulu. 
\v 2 Kadigoga dija dizoka, zoka da umwaka najo dijo ija Imdumuka, hebu Mwenembago, kadifunga kwa kipindi cha miyaka elufu imoja. 
\v 3 Msenga ayo wa kuulanga kadipigisa zoka ajo kudikolombo dilibule uhelelo, kadihindila na keka sio mmulomo wa dikolombo, ili sikudiwavizile kabili wanhu wa isi mbaka vonda imale ayo imiyaka elufu imoja. Yahamala miyaka ayo dofunguliligwa lakini kwa kipindi kidodo.
\p
\v 4 Abaho nyona vigoda va undewa, na wanhu wavikalile wagweleligwa udahi wa kutagusa. Vivija nyona loho za wanhu waja wakanhigwe mapala mbuli ya kugoga ukweli ugubuligwe na Yesu na mbuli ya kuwapetela wanhu mbuli ya Imulungu. Hawaditambikile dija ding'onyo hebu sanamu yake, vivija hawekigwe kilaguso mvihanga vao hebu mmakono gao. Wagweleligwa ugima kabili na olongoza hamoja na Kilisito kwa miyaka elufu imoja. 
\v 5 Wanhu wayagwe wafile hawazilibuke mbaka yahamala miyaka ayo elufu imoja. Uno awo uzilibuko wa ichanduso. 
\v 6 Wamweda na wang'ala wanhu onda wawe mumo muuzilibuko uno wa ichanduso. Ifa ya kabili honda iwagoge kabili, okuwa walava nhosa wa Imulungu na Kilisito, na olongoza hamoja nayo miyaka elufu imoja.
\s Kubanangigwa kwa Mwenembago
\p
\v 7 Yahamala miyaka ayo elufu imoja, Mwenembago kolekesigwa kulawa mkifungo chake, 
\v 8 avo kolawa kunze kosonga kuwavizila wanhu wapwililike mwiisi yose, nazo azo isi za Gogu na Magogu. Mwenembago koweka hamoja mbuli ya ng'hondo, wanhu awo okuwa wengi kamba msanga wa mwhani. 
\v 9 Wagenda mwiisi yose, wahazunguluka hanhu hawakalile wanhu wa Imulungu na buga diyadinogele Imulungu. Lakini moto uhumuluka kuulanga na kuwasakaza. 
\v 10 Nayo Mwenembago yakalile yowavizila wanhu kasigwa mdilamba da moto na mabwe gokwaka, mumo muwakalile dija ding'onyo na mtula ndagu wa uvizi, wao ogaya imisi na ikilo, siku zose.
\s Nhaguso ya uhelelo
\p
\v 11 Abaho nyona kigoda kikulu cha undewa kizelu, ayo yakikalile, isi na ulanga visegela mgameso gake, na havoneke kabili. 
\v 12 Abaho nyona wanhu wafile, wakulu kwa wadodo, wema kuulongozi wa kigoda cha undewa, na vitabu vifunguligwa. Abaho kitabu kiyagwe kifunguligwa, nacho acho kitabu cha ugima. Wanhu wafile watagusigwa kamba viwatendile, na kamba viyandikigwe mvitabu vivo. 
\v 13 Bahali iwalava kunze wanhu wafile wakalile mgati yake, ifa na kowochola wanhu wafile viwalava wanhu wakalile mumo. Kila munhu katagusigwa kamba viyatendile. 
\v 14 Abaho ifa na kowochola wanhu wafile vasigwa mdilamba da moto. Moto uno awo ifa ya kabili. 
\v 15 Munhu yoyose twaga jake hajandikigwe mna ikitabu cha ugima, kasigwa mdilamba da moto.
\c 21
\s Ulanga wa sambi na Isi ya sambi
\p
\v 1 Abaho nyona ulanga wa sambi na isi ya sambi. Ulanga wa ichanduso na isi ya ichanduso vikala visegele, nayo bahali haikalile kuko kabili. 
\v 2 Nyona buga ding'alile, Yelusalemu ya sambi, dihumuluka kulawa kuulanga. Dikala ditandigwe vinogile kamba mtwanzi yosoligwa viyohambigwa yakaiting'hane na mkasano wake. 
\v 3 Abaho mhulika sauti ng'hulu kulawa kukigoda cha undewa, “Sambi kae ya Imulungu ya hamoja na wanhu! Kokala nao, na hewo okuwa wanhu zake. Imulungu mwenyego kokuwa nao. Nayo kokuwa Imulungu wao. 
\v 4 Nayo kowahangusa mahozi gao gose. Ifa honda iwe kuko kabili hebu kunyunyuwala hebu kulila hebu usungu. Kwavija mbuli za umwaka zibita.”
\p
\v 5 Abaho ayo yokala mna ikigoda cha undewa kalonga, “Novitenda va sambi vinhu vose!” Vivija kalonga, “Yandika mbuli ino, kwavija mbuli zino za ukweli na zakutamaniligwa.” 
\v 6 Abaho kanongela, “Imala kutendeka! Niye na Alufa na Omega, wa ichanduso na wa ikimambukizo. Munhu yoyose yeli na ng'hilu nomgwaa bule yang'we mazi ga nzasa ya ugima. 
\v 7 Munhu yonda yahume kopata vinhu avo vose, na niye nokuwa Imulungu wake, nayo kokuwa mwanangu. 
\v 8 Lakini wanhu odumba na oleka kutogola na wanhu otenda mbuli zigevuza na wakomaji na wagoni na wahawi na wanhu ovitambikila vinyago na wavizi, wose hanhu hao kudilamba da moto na mabwe gokwaka, ayo iyo ifa ya kabili.”
\s Yelusalemu ya sambi
\p
\v 9 Imoja wa iwasenga saba wa kuulanga yakalile na mabakuli saba gamemile mikubulo saba yakimambukizo, keza kumwangu kanongela, “Izo, nikulagusile mtwanzi yosoligwa, mwehe wa Mwanang'hondolo.” 
\v 10 Ving'halile nolongozigwa na Loho wa Imulungu nyona nosoligwa na msenga wa kuulanga mbaka kuinhembeti ya lugongo lukulu na lutali. Kandagusila Yelusalemu, Buga ding'ala, dohumuluka kulawa kuulanga kwa Imulungu, 
\v 11 ding'ala kwa ukulu wa Imulungu. Buga dija ding'ala kamba dibwe da bei ng'hulu ng'hani kamba yasipi na kamba kiyoo. 
\v 12 Buga dijo dikala na senyenge nhali na ng'hulu, iakala na milango mikulu longo na mibili na wasenga wa kuulanga longo na wabili wakala okaliza. Uchanha ya kila mulango mkulu gandikigwa matwaga gamakabila longo na mabili ga Izilaeli. 
\v 13 Kila ubanzi kukala na milango mikulu midatu, milango mikulu midatu mwambu wa kudilawila zuwa, midatu kudihongela zuwa, midatu kusini na midatu kasikazini. 
\v 14 Senyenge ya buga dijo izengwa ha chandusilo cha mabwe longo na mabili, uchanha ya kila dibwe jandikigwa twaga dimoja da waja watumigwa longo na wabili wa Mwanang'hondolo.
\p
\v 15 Avo, ayo imsenga wa kuulanga yalongile na niye kakala na lubiki lwa zahabu lwa kupimila buga dijo na milango yake na senyenge yake. 
\v 16 Buga dijo ugazi wake na utali wake uigala. Msenga ayo wa kuulanga kadipima buga dijo kwa lubiki, dikala na ugazi na utali na utali wa kuchola uchanha kamba kilomita elufu mbili na magana mane. 
\v 17 Vivija msenga ayo wa kuulanga kaipima isenyenge ya buga dijo, ikala na ugazi wa magulu sitini na sita kwa kipimo cha wanhu. 
\v 18 Senyenge yake ikala izengigwe kwa mabwe ga bei ng'hulu gokemigwa yasipi, na dijo dibuga dizengwa kwa zahabu inogile, ing'ala kamba kiyoo. 
\v 19 Mabwe ga chandusilo ga senyenge ayo gahambigwa kwa mabwe ga bei ng'hulu. Dibwe da ichanduso da chandusilo dikala yasipi, da kabili dikala yakuti samawati, da kadatu kalikedoni, da ikane zumalidi, 
\v 20 da tano salidoniki, da sita akiki, da saba kilisolito, da nane zabalajadi, da tisa topazi, da longo kilisopilaso, da longo na imoja yasinto na da longo na mbili ametisito. 
\v 21 Ija imilango longo na mibili azo lulu longo na mbili, kila mulango uzengwa kwa lulu imoja. Nzila ng'hulu ya buga dijo izengwa kwa zahabu inogile, ing'ala kamba kiyoo.
\p
\v 22 Siyonile bule Ng'anda ya Imulungu kudibuga dijo kwavija Mndewa Imulungu yeli na Udahi wose na Mwanang'hondolo wao Ng'anda ya buga dijo. 
\v 23 Buga dijo hadilonda zuwa hebu mbalamwezi ya kudimwemwesela, kwavija ukulu wa Imulungu odimwemwesela na Mwanang'hondolo ayo taa ya buga dijo. 
\v 24 Wanhu wa isi zose okwanga mmulenge wake na wandewa wa mwiisi ogala ugoli wao mumo. 
\v 25 Milango ya buga dijo haihindigwa bule kwavija yokuwa kamba imisi, kokuwa kuduhu ikilo. 
\v 26 Ukulu na ugoli wa wanhu wa isi zose vogaligwa kudibuga dijo. 
\v 27 Kuduhu kinhu chochose kihile chonda kingile kudibuga dijo. Kuduhu munhu yotenda mbuli zigela kinyala hebu yoviza yonda yengile mumo. Wanhu waja waiyeka matwaga gao gandikigwa mna ikitabu cha ugima cha Mwanang'hondolo wao onda wengile kudibuga dijo.
\c 22
\s Lwanda lwa mazi ga ugima
\p
\v 1 Vivija ayo imsenga wa kuulanga kandagusila lwanda lwa mazi ga ugima, gong'ala kamba kiyoo, golawa mkigoda cha undewa wa Imulungu na cha Mwanang'hondolo. 
\v 2 Lwanda ulo lukilima hagati ha nzila ng'hulu ya buga. Kila mwambu wa lwanda ulo kukala na biki da ugima, dilelaga matunda miyanza longo na mibili kwa mwaka, ndiyo kulonga, dilelaga kila mwezi na majani gake dawa ya kuwahonya wanhu wa isi zose. 
\v 3 Kuduhu chochose kiduwiligwe na Imulungu chonda kikale kudibuga dijo.
\p Kigoda cha undewa wa Imulungu na cha Mwanang'hondolo chokuwa kudibuga dijo, na wasang'hanaji zake omsang'hanila. 
\v 4 Ochona kihanga chake, na twaga jake dokuwa mvihanga vao. 
\v 5 Honda kuwe na ikilo kabili, na wanhu okala mumo honda walonde taa hebu zuwa, kwavija Mndewa Imulungu kokuwa mulenge wao, na otawala kamba wandewa siku zose.
\s Kwiza kwa Yesu
\p
\v 6 Abaho ayo imsenga wa kuulanga kanongela, “Mbuli zino za ukweli na za kutamaniligwa. Mndewa Imulungu yawalongoze watula ndagu walonge usenga wake kubitila Loho wake, kamtuma msenga wake wa kuulanga yawalagusile wasang'hanaji zake mbuli zonda zilawilile sambi.”
\p
\v 7 “Tegeleza! Nokwiza hima. Kamweda munhu yozigoga mbuli za ulaguzi zili mkitabu kino.”
\p
\v 8 Niye Yohana mbonile na kuhulika mbuli zino. Vimbone na kuhulika, nigwa kingubanguba mmagulu gake ayo imsenga wa kuulanga yandagusile mbuli zino, nilonda kumtambikila. 
\v 9 Lakini heyo kanongela, “Sikuutende vivo! Niye na msang'hanaji kamba gweye na ndugu zako watula ndagu wa Imulungu na wanhu wose ozigoga mbuli za kitabu kino. Gweye mtambikile Imulungu.” 
\v 10 Abaho kanongela, “Sikuuzifise mbuli za ulaguzi zili mkitabu kino, kwavija kipindi chake cha kulawilila cha mmabehi. 
\v 11 Munhu yotenda gehile yagendelele kutenda gehile, munhu mchafu yagendelele kuwa mchafu na munhu yotenda ganogile yagendelele kutenda ganogile na munhu yong'ala yagendelele kung'ala.”
\p
\v 12 Yesu kolonga, “Tegeleza! Nokwiza hima hamoja na nhunza yonda nimgwee kila munhu kamba viyasang'hane. 
\v 13 Niye na Alufa na Omega, wa ichanduso na wa ikimambukizo, mwanduso na uhelelo wa vinhu vose.
\p
\v 14 “Wamweda wanhu ofuwa viwalo vao, wadahe kuja tunda da biki da ugima na wengile mna imilango ya buga dijo. 
\v 15 Lakini kunze ya buga dijo kuna wanhu ogevuza na wahawi na wakomaji na wagoni na wanhu ovitambikila vinyago na wanhu onogelwa kulonga uvizi.
\p
\v 16 “Niye Yesu, nimtuma msenga wangu wa kuulanga yawalongele mbuli zino mna ivibumbila va wanhu wanitogole. Niye nolawa mulukolo lwa Daudi, vivija niye na nhondo ing'ala imitondo.”
\p
\v 17 Loho wa Imulungu na Mtwanzi yosoligwa olonga, “Izo!”
\p Kila munhu yohulika gano, yalonge, “Izo!”
\p Munhu yeli na ng'hilu yeze, na munhu yolonda, yasole mazi ga ugima bila kuliha.
\s Mbuli za kimambukizo
\p
\v 18 Niye nowazuma wanhu wose ohulika mbuli za ulaguzi zili mkitabu kino, munhu yoyose yahongeza kinhu chochose muno, Imulungu nayo komongezela mikubulo yandikigwe mna ikitabu kino. 
\v 19 Na munhu yoyose yahasegesa mbuli yoyose kulawa mkitabu kino cha ulaguzi, Imulungu komsegesela hanhu ha fungu mna dibiki da ugima na mna dibuga ding'ala, vilongigwe mna ikitabu kino.
\p
\v 20 Yesu yagubule ukweli wa mbuli zose zino, kolonga, “Ona nokwiza hima!”
\p Niye nilonga, Ona. Izo, Mndewa Yesu!
\p
\v 21 Ng'hekewa ya Mndewa Yesu ikale na mweye mose. Ona.