\id EPH - Kutu Bible Version \ide UTF-8 \h Waefeso \toc1 Baluwa ya Paulo kwa wanhu wa ako Efeso \toc2 Waefeso \toc3 Efe \mt2 Baluwa ya Paulo kwa wanhu wa ako \mt1 Efeso \imt Ulongozi \ip Baluwa kwa Waefeso yandikigwa kipindi kimoja na baluwa kwa Wakolosai behi na mwaka wa 60 toka kuvumbuka kwa Kilisito. Mwandikaji koitambula mwenyego kamba Mtumigwa Paulo (Sula ya 1:1) Wanhu oifunza mbuli oitogolela kuwa Paulo ayo yandike baluwa kwa Waefeso hamoja hawalamuse wanhu kamba viyatendile kwa Wakolosai. Kwa kilamuso acho yogesigwa baluwa ino ilondigwa kuwavikila wanhu wamtogole Yesu mna ivibumbila vili mwiisi ayo. Vivija Paulo kolonga kakala mkifungo viyandike baluwa ino (Sula ya 3:1, 4:1, na 6:20). Paulo kaigala baluwa ino kwa makono ga Tukiko muumwanza wake wa kuwatembelela wanhu wamtogole Yesu mna ikibumbila kili ako Efeso (Sula ya 6:21-22). \ip Efeso dikala buga kulu kwa wakulu wa isi ya Lumi na mwiisi yose ya Asiya Ndodo. Buga da Efeso dijuwika ng'hani kwa ng'anda ilavigwe kwa mulungu wa kitwanzi wa Kigiliki Atemi (Sang'h 19:23-31). Wanhu wamtogole Yesu mkibumbila cha Efeso wakala wasongile goya mna ukutamanila lakini kumwande wona wavika kuuhelelo (Ugub 2:1-7). \ip Mdifungu da ichanduso da baluwa ino Paulo kosimulila Imulungu viyawasagule wanhu zake na kawakombola na nzambi zao kubitila Yesu Kilisito. Kawalinganya wanhu wamtogole Yesu na lukuli na Kilisito ayo pala na vivija kawalinganya kamba ng'anda izengigwe kwa mabwe na Kilisito ayo dibwe kulu da chandusilo. Fungu da kabili da ibaluwa Paulo kofundiza mbuli ya wanhu wamtogole Yesu viwolondigwa kukala. \iot Mbuli zili mkitabu \io Mna isula ya 1:1-2 Paulo koitambula mwenyego na kowalamusa wanhu wa ako Efeso. \io Abaho kosimulila vija wanhu wamtogole Yesu viwoilumba na Kilisito (Sula ya 1:3-3:21). \io Abaho Paulo kokwandika mbuli ya wanhu wamtogole Yesu viwolondigwa kukala (Sula ya 4:1-6:20). \io Kukimambukizo Paulo kolonga mbuli za kimambukizo (Sula ya 6:21-24). \c 1 \p \v 1 Niye Paulo, namtumigwa wa Yesu Kilisito kwa kulonda Imulungu, nowandikila mweye wanhu wa Imulungu muli ako Efeso, mweye mugangamale kumtamanila Imulungu kwa kuilumba na Yesu Kilisito. \p \v 2 Imulungu Tataetu na Mndewa wetu Yesu Kilisito wawagwee ng'hekewa na tindiwalo. \s Kumweda kiloho kwa kuilumba na Kilisito \p \v 3 Tumgwee nhogolwa Imulungu yeli Tata wa Mndewa wetu Yesu Kilisito! Kwavija kwa kuilumba na Kilisito katutenda tumwede kwa kutugwaa kila kinhu kinogile cha kiloho cha ako kuulanga. \v 4 Avo isi ing'hali hainalumbigwa, Imulungu katusagula siye kwa kuilumba na Kilisito, ili tung'ale na sikutuwe na nzambi mgameso gake. \p Mbuli ya unogelwa wake, \v 5 toka mwaka kalonda kututenda wanage kubitila Yesu Kilisito, vivo viyanogelwe na viyalondile. \v 6 Tumtogole Imulungu mbuli ya ng'hekewa yake inogile iyatugwelele, kubitila Mwanage iyamnogele! \v 7 Kwavija kwa damu ya Kilisito siye tolekesigwa, nzambi zetu zogeligwa kumgongo kwa ukulu wa ng'hekewa ya Imulungu, \v 8 iyatugwee kwa kumema kwa nzewele na ubala wake wose. \v 9 Na katulagusila vinhu vake vifisigwe, viyalondile kutenda. Kanogelwa kutenda vivo kubitila Kilisito. \v 10 Vikivikile kipindi chake, katenda kija kiyalondile, kuvika hamoja vinhu vose vilumbigwe kuulanga na mwiisi, kavigela mmakono ga Kilisito. \p \v 11 Kwa kuilumba na Kilisito, siye tusaguligwa tuwe wanhu zake kamba viyalondile Imulungu toka mwaka. Imulungu kotenda kila kinhu kamba viyolonda mwenyego. \v 12 Imulungu katenda avo ili siye tusongile kumtamanila Kilisito, tumtogole Imulungu kwa ukulu wake! \p \v 13 Na mweye vivija muhulike usenga wa kweli wa Mbuli Inogile iwagalile ukombola, na mumtogola Kilisito. Na vivija Imulungu kawekila kinhu cha kulagusa kwa kuwagwaa Loho Yang'alile iyalongile kulagusa mwa wanhu zake, kwa kuilumba na Kilisito. \v 14 Loho Yang'alile ayo yotutenda tubokele kija kiyalongile Imulungu kwa wanhu zake, na mbuli ino yotulagusila kuwa Imulungu kowagombola wanhu zake. Avo tumtogole Imulungu kwa ukulu wake! \s Paulo kowapulila Waefeso kwa Imulungu \p \v 15 Kwa mbuli ayo, toka vinihulike mbuli ya kumtamanila kwenu Mndewa Yesu, na unogelwa wenu kwa wanhu wose wa Imulungu, \v 16 silekile bule kumgwaa nhogolwa Imulungu mbuli ya mweye. Nahampula Imulungu siwasemwa mweye bule. \v 17 Nogendelela kumpula Tata yeli mkulu, Imulungu wa Mndewa wetu Yesu Kilisito, yawagwee Loho wake, yonda yawagwee nzewele na kuwagubulila Imulungu kumwenu ili mumjuwe goya. \v 18 Nompula Imulungu yawataze mudahe kujuwa goya tamanilo diyawakemele na vinhu vingi vinogile viyawekile wanhu zake, \v 19 na mudahe kujuwa udahi wake viwili mkulu ng'hani mbuli ya siye tumtogola. Udahi awo usang'hana mgati mmwetu uigala na nguvu ibanzile ng'hani, \v 20 iyamzilibule nayo Kilisito kwa wanhu wafile, na kamwika yakale muukulu mwambu wa mkono wake wa kudila ako kuulanga. \v 21 Ako Kilisito kotawala kila ukulu na udahi na nguvu na undewa na kotawala kila twaga da loho yoyose itambuligwa mwiisi ino na isi yonda ize. \v 22 Imulungu kavika vinhu vose mmakono ga Kilisito na kamtenda Yesu yawe mkulu wa wanhu wose wamtogole. \v 23 Wanhu wose wamtogole Kilisito alo lukuli lwa Kilisito, na awo kutelela kwa Kilisito na heyo ayo yovimemeza vinhu vose kila hanhu. \c 2 \s Kulawa mkufa kwingila muugima \p \v 1 Aho umwaka mweye mukala kamba mufa mbuli ya ubananzi na nzambi zenu. \v 2 Kipindi kija mukala kwa ubananzi na kukweleleza gehile ga wanhu wa mwiisi ino, mukala momtegeleza mtawala wa gehile wa undewa wa ulanga, loho ija yowatawala wanhu iwoleka kumtegeleza Imulungu. \v 3 Na siye wose tukala kamba wao, na tukala kwa kukweleleza usulukilo wihile uli mgati mmwetu, na tusang'hana mbuli zija zinogeligwe na ng'huli zetu na nzewele zetu. Kamba vitukalile, kamba viweli wanhu wayagwe, tumgevuza Imulungu na tulondigwa kutaguswa. \p \v 4 Lakini Imulungu kana bazi ng'hani. Na katunogela kwa unogelwa mkulu, \v 5 hata vitukalile tofa kwa nzambi, katutenda wagima hamoja na Kilisito. Kwa ng'hekewa ya Imulungu mweye mukomboligwa. \v 6 Kwa kuilumba na Yesu Kilisito, Imulungu katuzilibula hamoja nayo, tukale nayo kuulanga. \v 7 Vivo viyalondile kulagusa kwa kipindi chose chonda kize ukulu wa ng'hekewa yake iyatugwee kwa unogelwa kwa kuilumba kwetu na Yesu Kilisito. \v 8 Kubitila ng'hekewa ya Imulungu mukomboligwa kwa kumtamanila. Mbuli ino hailawilile kwa udahi wenu, lakini ilawilila kwa nhunza ya Imulungu, \v 9 hailawilile kwa sang'hano zenu, avo munhu yoyose sambi yaitape. \v 10 Siye twa sang'hano ya makono ga Imulungu, na kwa kuilumba na Yesu Kilisito, Imulungu katuumba ili tukale kwa kusang'hana mbuli zinogile ziyatutandile tuzisang'hane. \s Kuilumba na Kilisito \p \v 11 Avo, mweye wanhu hamwili Wayahudi kwa kuvumbuka, mukemigwa, “Wanhu hawengile kumbi,” na Wayahudi oikema, “Wanhu wengile kumbi,” wao wengila kumbi mzing'huli zao, kulagusa kuwa wanhu wa Imulungu, kumbukeni vimukalile aho umwaka. \v 12 Vivija, kipindi kija mweye mukala hamuilumbile na Kilisito. Mukala wanhu baki na hamukalile mna iwanhu wasaguligwe na Imulungu, mukala mwabule fungu jojose mna gamalagano ga Imulungu gayawalongele wanhu zake, mukala mwabule cha kutamanila na mukala mwabule Imulungu. \v 13 Aho umwaka mukala kutali na Imulungu, lakini sambi, kwa kuilumba na Yesu Kilisito, mugaligwa behi kwa damu ya Kilisito. \v 14 Kwavija Kilisito mwenyego katugalila tindiwalo kwa kuwatenda Wayahudi na wanhu haweli Wayahudi kinhu kimoja. Kwa kulava lukuli lwake mwenyego kamba nhosa kasegesa kuihila kwao, kuigalile na senyenge ikalile yowagola. \v 15 Kagasegesa Malagizo ga Wayahudi na vihendo vake, ili kulawa mzing'holo azo mbili yatende lukolo lumoja lwa sambi kwa kuilumba nayo mwenyego na avo kugala tindiwalo. \v 16 Kwa kulava nhosa lukuli lwake mumsalaba Kilisito kasegesa kuihila kwao, kazitenda ng'holo azo ziilumbe ziwe kinhu kimoja kamba lukuli na kuzitenda zimbwelele Imulungu. \p \v 17 Avo Kilisito keza kuwapetela Mbuli Inogile igala tindiwalo kumwenu, mweye wanhu hamwili Wayahudi, mukalile kutali na Imulungu na vivija kwa Wayahudi wakalile behi na Imulungu. \v 18 Avo kubitila Kilisito siye wose, Wayahudi na wanhu haweli Wayahudi, todaha kumcholela Tata kwa Loho imoja Yang'alile. \p \v 19 Avo mweye wanhu hamwili Wayahudi sambi hamwili wanhu baki hebu wanhu wa kutali, mweye sambi mwa wenekae hamoja na wanhu wa Imulungu na mwa wanhu wa lukolo lwa Imulungu. \v 20 Na mweye vivija muzengwa mna ichandusilo kikigwe na watumigwa na watula ndagu wa Imulungu. Nayo Yesu Kilisito mwenyego ayo dibwe kulu da chandusilo. \v 21 Avo Kilisito mwenyego ayo yogogeleza ng'anda yose na kuitenda ikule iwe ng'anda ing'alile ya Imulungu ilavigwe kwa Mndewa. \v 22 Kwa kuilumba na Kilisito, na mweye vivija mozengwa hamoja na wayagwe wose, Imulungu yakale kumwenu kubitila Loho wake Yang'alile. \c 3 \s Sang'hano ya Paulo kwa wanhu haweli Wayahudi \p \v 1 Avo, niye Paulo, namfungwa kwavija nomsang'hanila Yesu Kilisito mbuli ya mweye wanhu hamwili Wayahudi, nompula Imulungu. \v 2 Nojuwa kweli muhulika, Imulungu viyanigwelele ng'hekewa ya kusang'hana sang'hano ino mbuli ya mweye. \v 3 Imulungu kangubulila vinhu vake vifisigwe, mna ibaluwa ino niwapetela kidogo mbuli ayo, \v 4 na mwahakisoma kija kinyandike, modaha kujuwa vinhu vinjuwile niye, vifisigwe kwa mbuli ya Kilisito. \v 5 Baho umwaka wanhu wakala hawavijuwile vinhu vino vifisigwe, lakini sambi Imulungu kawagubulila vinhu avo watula ndagu na watumigwa zake wang'alile kubitila Loho Yang'alile. \v 6 Kinhu chenyego kifisigwe acho kino, kubitila Mbuli Inogile wanhu haweli Wayahudi opata fungu mna ivinhu vinogile va Imulungu hamoja na Wayahudi, wao okuwa maungo ga lukuli luluja, na obokela kikija kiyalongile Imulungu kubitila Yesu Kilisito. \p \v 7 Niye nitendigwa msang'hanaji wa Mbuli Inogile kwa ng'hekewa iyanigwelele Imulungu kwa udahi wake mkulu. \v 8 Niye na munhu mdodo kubanza wanhu wose wa Imulungu, lakini Imulungu kanigwaa ng'hekewa, ili niwapetele wanhu haweli Wayahudi Mbuli Inogile, ya vinhu vinogile va Kilisito vilibule uhelelo, \v 9 na niwatende wanhu wose wazijuwe mbuli za Imulungu zifisigwe na vizisang'hana. Imulungu yaumbile vinhu vose, kavifisa vinhu vake avo toka mwaka, \v 10 ili sambi, kubitila wanhu wamtogole Yesu, watawala na weli na ukulu wa kuulanga waijuwe nzewele ya Imulungu viili na nzila nyingi. \v 11 Imulungu kaitenda mbuli ayo, kamba viyagesile toka mwaka, na katenda kubitila Mndewa wetu Yesu Kilisito. \v 12 Kwa kuilumba na Kilisito na kumtamanila, todaha kumgendela Imulungu bila kudumba na kuno totamanila kuwa kotubokela. \v 13 Avo nowapulila kwa Imulungu, sikumubwele kuchugu, kwavija niye nogaya mbuli ya mweye, gago gose mbuli ya kuwatenda mumwede. \s Unogelwa wa Kilisito \p \v 14 Kwa kilamuso kino, nomfugamila Tata, \v 15 yeli chanduso cha ng'holo zose kuulanga na mwiisi. \v 16 Nompula Imulungu yeli na ukulu wa vinhu vingi, yawagangamize mmizoyo yenu kubitila Loho wake, \v 17 nayo Kilisito yakale mmizoyo yenu kwa kumtamanila kwenu. Nopula muwe na mizizi na chandusilo mna ukuinogela, \v 18 ili mweye hamoja na wanhu wa Imulungu mujuwe goya unogelwa wa Kilisito viwenela kwa ugazi na utali, kwa kwingila hasi na kuchola uchanha. \v 19 Ona, muujuwe unogelwa wa Kilisito ubanzile nzewele zose, na mumemezigwe utimilifu wose wa Imulungu. \p \v 20 Kumwake Imulungu kubitila nguvu yake isang'hana mgati mmwetu, kodaha kusang'hana mbuli ng'hulu ng'hani kubanza gaja gotupula hebu kugesa. \v 21 Imulungu yatogoligwe kwa ukulu wake ukoneka kwa wanhu wose wamtogole Yesu, na kwa Yesu Kilisito, kipindi chose, kilibule uhelelo! Ona. \c 4 \s Kuilumba na Kilisito \p \v 1 Avo, niye nili mfungwa kwavija nomsang'hanila Mndewa, nowapula mukale kamba Imulungu viyawakemile. \v 2 Siku zose muwe wahole na moyo unogile, muinogele kwa kufunga umoyo. \v 3 Wambeni ng'hani sikumwagize kuilumba kwenu, kuyawagwee Loho Yang'alile kubitila tindiwalo dili kumwenu. \v 4 Kuna lukuli lumoja na Loho imoja, kamba vija vikuli na tamanilo dimoja dimukemeligwe na Imulungu. \v 5 Hana Mndewa imoja na tamanilo dimoja na ubatizo umoja, \v 6 hana Imulungu imoja nayo ayo Tata wa wanhu wose, nayo ayo Mndewa wa wanhu wose, kosang'hana kubitila gose, na kabaho mna igose. \p \v 7 Kila imoja wetu kagweleligwa ng'hekewa kamba viyalondile Kilisito kumgwaa. \v 8 Kamba Maandiko Gang'alile vigolonga, \q “Viyacholile uchanha ng'hani kuulanga, \q kawasola wanhu bwando wakalile wafungigwe, \q kawagwaa wanhu nhunza.” \m \v 9 Vino yahalonga, “kachola uchanha” kofambula choni? Kofambula kuwa tanhu kahumuluka mbaka hasi ng'hani ya isi. \v 10 Avo munhu iija yahumuluke ayo iija yacholile uchanha kuulanga na kubanza kuulanga, ili yaimemeze isi yose kila hanhu. \v 11 Heyo ayo, “yawagwelele wanhu nhunza.” Na kawasagula wanhu wayagwe wawe watumigwa na wayagwe wawe watula ndagu wa Imulungu, na wayagwe wawapetele wanhu Mbuli Inogile na wayagwe wawe wasusilaji na wafundiza. \v 12 Katenda vivo, yawatande wanhu wose wa Imulungu mbuli ya kumsang'hanila Kilisito, ili kulugangamiza lukuli lwa Kilisito. \v 13 Avo na siye wose tuwe kinhu kimoja kwa kumtamanila na kumjuwa Mwana wa Imulungu, tuwe wanhu wakangale na kuuvikila utimilifu wake Kilisito mwenyego. \v 14 Avo hondatuwe wana kabili, twahasigwa na kuhembelusigwa kuno na kuno na beho da wanhu ofundiza uvizi ili wawagize wanhu wayagwe kwa ubala. \v 15 Lakini twahalonga ukweli kwa moyo wa unogelwa, tokula mzimbuli zose kwa Kilisito, yeli mkulu. \v 16 Kwa kulongozigwa na Kilisito maungo gose ga lukuli goilumba, na lukuli lose logogelezwa kwa kutazigwa na maungo gake. Avo kila maungo gahasang'hana viilondigwa, lukuli lose lokula na kuizenga mna ukuinogela. \s Ugima kubitila Kilisito \p \v 17 Avo, nowazuma kwa twaga da Mndewa, sikumukale kabili kamba wanhu hawamjuwile Imulungu, weli na magesa gamemile ubozi wiiyeka. \v 18 Wanhu awo nzewele zao za mdiziza, wakutali na ugima ulavigwa na Imulungu mbuli ya ubozi wao na udala wao wa mizoyo. \v 19 Wanhu awo wabule kinyala, wasede na otenda mbuli zose zigela kinyala na ogendelela kulonda kutenda vivo. \p \v 20 Lakini mweye hamuifunzile avo mbuli ya Kilisito. \v 21 Mweye muhulika goya mbuli zake, na mufundizigwa ukweli uli kwa Yesu. \v 22 Uvuleni unhu wenu wa umwaka, uja ukalile onangigwa kwa kusulukila vinhu va uvizi. \v 23 Mizoyo yenu na nzewele zenu vitendigwe va sambi. \v 24 Uvaleni unhu wa sambi, uumbigwe kwa kuigala na Imulungu, uja uigubula wenyego muugima wa ukweli wa kutenda golondigwa na Imulungu na kung'ala. \p \v 25 Avo lekeni uvizi! Kila munhu kolondigwa kumulongela miyage ukweli, kwavija kila imoja wetu ni maungo ga lukuli lwa Kilisito. \v 26 Mwahagevuzika, sikumutogole kugevuzika kwenu kuwatende mutende nzambi, na sikumukale na ng'hasiliki kutwa ngima. \v 27 Sikumumgwelele mwenembago nyafasi. \v 28 Wanhu wose wakalile okwiba waleke na wasonge kusang'hana kwa makono gao, ili wakale kwa kutamaniligwa na wadahe kuwataza wakiwa. \v 29 Sikumulosoke, lakini mulonge mbuli zinogile, za kuwataza wanhu, ili mbuli zimulonga ziwataze kamba viilondigwa kwa awo ozihulika. \v 30 Sikumumtende Loho Yang'alile wa Imulungu, yanyunyuwale kwavija Loho ayo kilaguso cha Imulungu kuwa mweye mwa wanhu zake. Nayo Loho kolagusa kuwa siku yovika Imulungu kowatenda mulekesigwe. \v 31 Sikuukone usungu, sikumuding'huke na kugevuzika. Sikumuibamilile hebu kuiliga, sikumuihile kwa mbuli yoyose. \v 32 Lakini muyonele bazi na kuinogela, na kila munhu yagele kumgongo gehile ga miyage, kamba Imulungu viyazigelile kumgongo nzambi zenu, kubitila Kilisito. \c 5 \s Kukala mna umulenge \p \v 1 Avo muigale na Imulungu, kwavija mweye mwa wanage yowanogela. \v 2 Ugima wenu ulongozigwe na unogelwa, kamba Kilisito viyatunogele na mbuli yetu kailava mwenyego kamba nhunza inung'hila goya na nhosa imnogela Imulungu. \p \v 3 Kwavija mweye mwa wanhu wa Imulungu, mbuli ya ugoni, uchafu wowose hebu ugila, sikuvilongigwe kumwenu. \v 4 Sikumulonge mbuli zigela kinyala hebu mbuli za ubozi hebu utalazi wa maligo, gose gago haganogile kumwenu. Lakini mbuli za kumgwaa nhogolwa Imulungu azo zinogile. \v 5 Mujuwe goya, munhu yotenda ugoni, hebu mchafu hebu msede, ugila uigala na kuvitambikila vinyago. Wanhu otenda mbuli azo honda wawe na fungu Muundewa wa Kilisito na wa Imulungu. \p \v 6 Sikumutogole munhu yawavizile kwa mbuli za ubozi, kwavija kwa mbuli azo ng'hasiliki ya Imulungu yowezila wanhu wose oleka kumtegeleza. \v 7 Avo sikumutende nao mbuli yoyose. \v 8 Aho umwaka mweye mukala mdiziza, lakini sambi mokala kumulenge kwa kuilumba na Mndewa. Avo mukale kamba wanhu wa mulenge, \v 9 kwavija mulenge ogala kutenda mbuli zinogile, kutenda goyolonda Imulungu na ukweli. \v 10 Mugeze kugajuwa gaja gomnogela Imulungu. \v 11 Sikumutende sang'hano zihile za mdiziza, lakini zilaveni kunze kuna umulenge. \v 12 Mbuli zitendigwa kwa kinyelegezi, zogela kinyala kuzilonga. \v 13 Lakini mbuli zose zitendigwa mna umulenge, ukweli wake ogubuligwa goya, \v 14 kwavija kila kinhu kigubuligwe goya chokuwa mulenge. Lekaavo yolongigwa, \q “Lamuka gweye uwasile, \q zilibuka kwa wafile, \q nayo Kilisito kokumwemwesela.” \p \v 15 Avo, muiteganye vija vimukala. Sikumukale kamba wanhu wabozi, lakini kaleni kamba wanhu weli na nzewele. \v 16 Kisang'hanileni goya kipindi kino kimulinacho, kwavija siku zino ziha. \v 17 Avo sikumuwe wabozi, lakini zahileni gaja goyolonda Mndewa mweye musang'hane. \p \v 18 Sikumukoligwe, kwavija ayo yowabananga, lakini mumemezigwe Loho Yang'alile. \v 19 Longeni kwa mbuli za zabuli na nyila na tenzi za kiloho, mwimbileni Mndewa nyila na zabuli kwa kumgwaa nhogolwa mmizoyo yenu. \v 20 Siku zose mgweleleni nhogolwa Imulungu Tata, kwa twaga da Mndewa wetu Yesu Kilisito kwa kila kinhu. \s Watwanzi na Wakasano \p \v 21 Kila munhu tanhu yamgese miyage mbuli ya kumtegeleza Kilisito. \p \v 22 Watwanzi wategelezeni wakasano zenu kamba kumtegeleza Mndewa. \v 23 Kwavija mbigalo kana udahi kwa mwehe wake, kamba vija Kilisito viyali na udahi kwa wanhu wamtogole. Nayo Kilisito mwenyego ayo yowakombola wanhu wamtogole, wanhu wamtogole awo lukuli lwake. \v 24 Kamba vija wanhu wamtogole Kilisito viwomtegeleza, vivija watwanzi wategelezeni wakasano zenu mna zimbuli zose. \p \v 25 Na mweye wakasano, wanogeleni wehe zenu kamba vija Kilisito viyawanogele wanhu wamtogole, na kailava mwenyego mbuli yao. \v 26 Katenda avo ili yawalave kwa Imulungu, yahamambukiza kuwasunha kwa mazi kubitila mbuli yake, \v 27 ili wawe wanhu wang'alile na wanogile ng'hani, wanhu welibule dowa, kwiha hebu chochose kili kamba acho. \v 28 Avo, wakasano olondigwa wawanogele wehe zao kamba viwozinogela ng'huli zao wenyego. Munhu yomnogela mwehe wake koinogela mwenyego. \v 29 Kuduhu munhu yoyose yolwihila lukuli lwake, lakini kolugwaa ndiya na kululolesa. Nayo Kilisito vivija vivo viyowalolesa goya wanhu wamtogole, \v 30 kwavija siye twa maungo ga lukuli lwake. \v 31 Kamba Maandiko Gang'alile vigolonga, “Kwa mbuli ino mbigalo komuleka tatake na mamake, nayo koilumba na mwehe wake, na wanhu awo wabili okuwa kinhu kimoja.” \v 32 Kuna ukweli ufisigwe ugubuligwe mna zimbuli zino, na niye nokona kuwa zomulonga Kilisito na kanisa jake. \v 33 Lakini vivija zowalonga mweye, kila mbigalo kolondigwa yamnogele mwehe wake, kamba viyoinogela mwenyego, nayo mtwanzi kolondigwa yamtegeleze mkasano wake. \c 6 \s Wana na tata zao na mama zao \p \v 1 Mweye wana, wategelezeni tata zenu na mama zenu kamba viilondigwa kwa wanhu wa Kilisito, kwavija mbuli ayo inoga. \v 2 “Wategeleze tatako na mamako,” dino dijo lagizo da ichanduso dili na nhunza, \v 3 “Muladi ukale goya na ukale siku nyingi mwiisi.” \p \v 4 Na mweye kina tata sikumuwagevuze wanenu ila waleleni goya na wafundizeni mafundizo ga Kilisito. \s Watumwa na wakulu zao \p \v 5 Watumwa wategelezeni wakulu zenu kwa kudumba na kugwaya, tendeni avo kwa moyo unogile kamba vija momsang'hanila Kilisito. \v 6 Tendeni vivo siyo mna ikipindi wao owalola ili wawatogole, lakini sang'haneni kwa moyo umoja kamba viyolonda Imulungu kwavija mweye mwa wasang'hanaji wa Kilisito. \v 7 Mutogole kusang'hana kwa kuwamba mbuli ya Mndewa na siyo mbuli ya wanhu. \v 8 Kumbukeni kuwa, Mndewa komgwaa nhunza munhu yoyose, yawe mtumwa hebu kakomboligwa mbuli ya sang'hano yake inogile. \p \v 9 Na mweye iwakulu, vivija watendeleni ganogile watumwa zenu, sikumulonge kwa kukomhoka. Kumbukeni kuwa mweye vivija kamba wao, mnayo Mndewa iija kuulanga, nayo habagula munhu. \s Ng'hondo ya Kiloho \p \v 10 Kisigale, nowapula mugangamale kwa kuilumba na Mndewa na kwa kutazigwa na udahi wake. \v 11 Soleni silaha zose zilondigwa kwa kuitowela ziyowagwaa Imulungu mudahe kuuhuma ubala wihile wa Mwenembago. \v 12 Kwavija siye hatuitowa na wanhu ila toitowa na nguvu za loho zihile zili kuulanga, toitowa na watawala na wakulu weli na nguvu, otawala isi imemile ziza. \v 13 Kwa mbuli ayo soleni silaha zose zilondigwa kwa kuitowela ziyowagwaa Imulungu ili yahavika siku ija ya gehile mudahe kuzihuma nguvu za ija yamwihileni, mwahaitowa mbaka kuuhelelo mokuwa mung'hali na nguvu. \p \v 14 Avo muitande goya na ukweli uwe kamba mkwiji mvigudi venu, na kutenda goyolonda Imulungu kamba kiwalo cha zuma cha kukimila mmhambaga zenu, \v 15 musulukile kuwapetela wanhu Mbuli Inogile kamba vilatu mmagulu genu. \v 16 Kipindi chose acho, mumtamanile Imulungu kamba ngao, ili mudahe kuizima misale ikwaka ipigisigwa na ija Imdumuka. \v 17 Ubokeleni ukombola kamba kofiya da kuvala mdipala, na Mbuli ya Imulungu iwe kamba panga dimugweleligwe na Loho Yang'alile. \v 18 Siku zose mpuleni Imulungu yawataze. Mpuleni Imulungu kipindi chose, kwa kulongozigwa na Loho. Kwa mbuli ino muiteganye sikumubwele kuchugu, siku zose wapulileni wanhu wose wa Imulungu. \v 19 Vivija nipulileni na niye, Imulungu yanigwee mbuli ya kulonga, ili nidahe kuwalongela wanhu kinhu kifisigwe cha mna Imbuli Inogile bila kudumba. \v 20 Niye na msenga wa Mbuli ino Inogile, hamoja sambi na mkifungo. Mnipulile nidahe kulonga Mbuli Inogile inilondigwa bila kudumba. \s Kimambukizo cha kuilamusa \p \v 21 Ndugu yangu Tukiko inimnogela na msang'hanaji yomtamanila Imulungu mwiisang'hano ya Mndewa, kowalongela mbuli zangu zose, ili mujuwe kija kinhenda. \v 22 Lekaavo nomtuma kumwenu yawalongele mbuli zetu, na yawagangamize. \p \v 23 Imulungu Tata na Mndewa Yesu Kilisito wawagwee wanhu wose wamtogole Yesu tindiwalo na unogelwa kwa kutamanila. \v 24 Ng'hekewa ya Imulungu ikale na wanhu wose omnogela Mndewa wetu Yesu Kilisito kwa unogelwa wa milele.