\id 1TH - Kutu Bible Version \ide UTF-8 \h 1 Wasesalonike \toc1 Baluwa ya Ichanduso ya Paulo kwa wanhu wa ako Sesalonike \toc2 1 Wasesalonike \toc3 1 Ses \mt2 Baluwa ya Ichanduso ya Paulo kwa wanhu wa ako \mt1 Sesalonike \imt Ulongozi \ip Baluwa ya ichanduso kwa Wasesalonike yandikigwa na Mtumigwa Paulo (Sula ya 1:1). Sengine ino ayo baluwa ya ichanduso iyandike Paulo na iwa mna ikitabu cha Bibilia na yandikigwa behi na mwaka wa 51 toka kuvumbuka kwa Kilisito. Paulo kakala ako Kolinto viyandike baluwa ino kwa kibumbila cha wanhu wamtogole Yesu ako Sesalonike, kibumbila acho kakisonga muumwanza wake wa kabili wa umishieni (Sang'h 17:1-10). Mna ikitabu cha Sang'hano za Iwatumigwa yolongigwa ikibumbila kikala na Wayahudi na Wagiliki wengi. \ip Paulo hadahile bule kukala ng'hani ako Sesalonike viyakisongile kibumbila acho, avo ako kumwande kawandikila baluwa wanhu wamtogole Yesu kwa kuwagela moyo. Baluwa imema mbuli nyingi na malagizo mengi mbuli ya wanhu wamtogole Yesu viwolondigwa kukala. Paulo kalonga mbuli ya kubwela kabili kwa Kilisito. Sengine wanhu wamtogole Yesu ako Sesalonike wakala olonda kujuwa vinhu avo. Paulo kubitila mbuli ya kubwela kabili kwa Kilisito kalonga mbuli ya kukala kwa kumnogeza Imulungu (Sula ya 5:6-8). \iot Mbuli zili mkitabu \io Paulo kosonga baluwa ino kwa kuwalamusa kibumbila cha wanhu wamtogole Yesu na komgwaa nhogolwa Imulungu mbuli yao (Sula ya 1). \io Abaho kosimulila mbuli ya sang'hano yake na usenga uyamgalile Timoseo (Sula ya 2-3). \io Abaho Paulo kolava malagizo mbuli ya wanhu wamtogole Yesu viwolondigwa kukala kwavija Yesu kobwela kabili (Sula ya 4:1-5:15). \io Paulo komambukiza kwa kuwalamusa wanhu wamtogole Yesu na kuwapula kila munhu mna ikibumbila yasome baluwa ino (Sula ya 5:16-28). \c 1 \p \v 1 Niye Paulo, Sila na Timoseo, tomwandikileni mweye kibumbila cha wanhu mumtogole Kilisito ako Sesalonike, wanhu wa Imulungu Tata na Mndewa Yesu Kilisito. \p Ng'hekewa na tindiwalo vikale na mweye. \s Kutamanila kwa wanhu wa ako Sesalonike \p \v 2 Siku zose tomgwaa nhogolwa Imulungu mbuli ya mweye mose na kuwatambula mweye mose twahampula Imulungu. \v 3 Avo, mgameso ga Imulungu Tataetu, tokumbuka vimulagusa kumtamanila kwenu kwa kusang'hana, na unogelwa wenu uwatendile musang'hane kwa kuwamba, na tamanilo jenu kwa Mndewa wetu Yesu Kilisito vidigangamale. \v 4 Ndugu zetu, tojuwa kuwa Imulungu kowanogela na kawasagula muwe wanhu zake. \v 5 Kwavija vituwagalileni Mbuli Inogile, hatuigalile kwa mulomo wiiyeka, lakini tuigala kwa nguvu na Loho Yang'alile, na tukala tujuwile goya mbuli ayo ikala ya ukweli. Mojuwa vitukalile hamoja na mweye, ikala mbuli ya mweye. \v 6 Mweye mukweleleza vitutendile siye na vija viyatendile Mndewa, hata kamba mugaya ng'hani, muubokela usenga awo kwa deng'ho dilawa kwa Loho Yang'alile. \v 7 Avo muwa wanhu wa kukolelezigwa na wanhu wose wamtogole Kilisito ako Makedonia na Akaya. \v 8 Siyo usenga wiiyeka mbuli ya Mndewa ubwililika kila hanhu ako Makedonia na Akaya, lakini vivija mbuli ya kumtamanila kwenu Imulungu kwenela kila hanhu. Avo hatulonda kulonga ng'hani. \v 9 Avo wanhu wose olonga mbuli ya mwanza wetu kumwenu vija vimutubokele na vija vimulekile kutambikila minyago na kumbwelela na kumsang'hanila Imulungu wa ukweli, yeli mgima, \v 10 vivija mombeta Mwanage kulawa kuulanga, heyo ayo Yesu, ija Imulungu yamzilibule kulawa kwa wafile na ija yotukombola kulawa mwiing'hasiliki ya Imulungu yonda ize. \c 2 \s Sang'hano ya Paulo ako Sesalonike \p \v 1 Ndugu zetu, mweye wenyego mojuwa kuwa kwiza kwetu kumwenu hakwagile bule. \v 2 Mojuwa vija vitudununzigwe na kuligigwa ako Filipi tung'hali hatunakwiza kumwenu ako Sesalonike. Hata kamba tukala tulemigwa ng'hani, Imulungu wetu katugangamiza tuwapetele Mbuli Inogile. \v 3 Mbuli ituwalongela mweye siyo mbuli ya uvizi hebu kugesa gehile, na hatulonda kumbunyika munhu yoyose. \v 4 Lakini siye tolonga kamba viyolonda Imulungu, kwavija katona tofaya kutugwaa sang'hano ya kuwapetela wanhu Mbuli Inogile. Hatulonda kuwanogeza wanhu ila tolonda kumnogeza Imulungu, yoilola goya mizoyo yetu. \v 5 Mojuwa goya siye hatwizile kumwenu na kulonga mbuli za kubembekeza, hebu kulonga mbuli za ubala kufisa gahigahi, Imulungu ayo yazonile azo zitutendile! \v 6 Hatulondile nhogolwa kulawa kwa munhu yoyose, hebu kulawa kumwenu hebu kulawa kwa wanhu wayagwe. \v 7 Siye kamba watumigwa wa Kilisito, twahadahile kulonda vinhu kulawa kumwenu, lakini vitukalile na mweye tukala wahole kamba mama viyowalolesa wanage. \v 8 Tuwanogela ng'hani mbaka tunogelwa kuwagwaa siyo Mbuli Inogile ya Imulungu iiyeka, lakini vivija ugima wetu, kwavija mweye mwa mmizoyo! \v 9 Ndugu zetu, mweye mokumbuka siye vitugaiye! Tusang'hana imisi na ikilo ili sikutuwe mizigo kwa munhu yoyose kipindi vituwapetela Mbuli Inogile ya Imulungu. \p \v 10 Mweye wenyego muyona mbuli ino, na Imulungu vivija kaijuwa, siye vitung'alile na vitukalile goya bila kubananga kumwenu mweye mumtogole Kilisito. \v 11 Mweye wenyego mojuwa vitumtendele kila imoja wenu kamba tata viyowatendela wanage too. \v 12 Tuwagangamiza, tuwasamhusa na kuwatenda mukale viyolonda Imulungu, yowakemeni muwe na fungu Muundewa wake na ukulu wake. \p \v 13 Avo, siye togendelela kumgwaa nhogolwa Imulungu, kwavija mweye vimuihulike Mbuli Inogile kulawa kumwetu muitogola kamba usenga wa Imulungu siyo kamba usenga wa wanhu, kwavija mbuli ya Imulungu ayo isang'hana mgati mmwenu mweye mutogole. \v 14 Ndugu zetu, mweye viwalawilila vinhu vivija viwalawilile wanhu wa Imulungu ako Yudea, hewo wailumbile na Yesu Kilisito. Mweye mudununzigwa na wenekae waenu kamba hewo viwadununzigwe na Wayahudi wayao, \v 15 wamkomile Mndewa Yesu na watula ndagu wa Imulungu na kutudununza na siye vivija. Wanhu awo omgevuza Imulungu na hawailumba na munhu yoyose! \v 16 Vivija walonda kutugomesa sikutuwapetele wanhu haweli Wayahudi usenga onda uwakombole. Vino avo viwamambukize nzambi zose ziwatendile siku zose. Lakini sambi Imulungu kawagevuzikila na kuwatagusa! \s Paulo kolonda kuwatembelela kabili wanhu wa ako Sesalonike \p \v 17 Ndugu zetu, vituinegile na mweye kwa kipindi kidodo tu, tuinega na mweye kwa lukuli lwiiyeka lakini mmizoyo twa hamoja, baho tulonda ng'hani kuwona kabili! \v 18 Avo tulonda kwiza kumwenu. Niye, Paulo, nigeza kwiza kumwenu miyanza mingi, lakini Mwenembago katugomesa. \v 19 Vino, vonda twime kuulongozi wa Mndewa Yesu yaheza, deng'ho da kuhuma kwetu dokuwa choni? Tamanilo jetu dokuwa choni? Dokuwa mweye wenyego, mweye wao kilamuso cha tamanilo jetu na deng'ho jenu. \v 20 Ona, mweye wao kuigoda kwetu na deng'ho jetu! \c 3 \p \v 1 Kukimambukizo, hatudahile kuwamba ng'hani. Avo tugesa tusigala twiiyeka ako Asene, \v 2 na tumtuma ndugu yetu Timoseo, msang'hanaji miyetu mbuli ya Imulungu kwa kuwapetela wanhu Mbuli Inogile ya Kilisito. Tumtuma yawagangamize na yawagele moyo mbuli ya kutamanila kwenu. \v 3 Avo kuduhu munhu yonda yabwele kuchugu mbuli ya madununzo gano. Mweye mojuwa kamba tolondigwa tudununzigwe. \v 4 Kwavija vitukalile hamoja na mweye, tuwalongela kuwa todununzigwa, kamba vimujuwile, ilawilila vivo, \v 5 lekaavo nimtuma Timoseo kumwenu. Sidahile kuwamba ng'hani, avo nimtuma mhate mbuli za kutamanila kwenu. Avo nidumba Mwenembago sikuyawageze na sang'hano yetu yose ipolete bule! \p \v 6 Sambi Timoseo kabwela, katugalila mbuli zinogile za tamanilo jenu na unogelwa wenu. Katulongela motugesa vinogile siku zose na molonda kutona kamba siye vitulonda kuwona mweye. \v 7 Ndugu zangu, hamoja na magayo na madununzo getu gose, mutugela moyo mbuli ya kutamanila kwenu. \v 8 Kamba mogangamala muugima wenu kwa kuilumba na Mndewa sambi tokala moyo hole. \v 9 Sambi todaha kumgwaa Imulungu wetu nhogolwa mbuli ya mweye. Tomgwaa nhogolwa kwa ndeng'helelo tulinayo haulongozi wake mbuli ya mweye. \v 10 Towamba kumpula Imulungu imisi na ikilo tudahe kuwona meso kwa meso ili kugatenda goya gahunguke mnaukutamanila kwenu. \p \v 11 Tompula Imulungu, Tataetu mwenyego na Mndewa wetu Yesu watutandile nzila ya kwiza kumwenu! \v 12 Mndewa yawatende muinogele ng'hani na unogelwa wenu kwa wanhu wose ongezeke ng'hani, kamba siye vituwanogela mweye. \v 13 Avo koigangamiza mizoyo yenu, na mweye mokuwa mduhu kitala na mong'ala mgameso ga Imulungu wetu na Tataetu kipindi Mndewa wetu Yesu vonda yeze hamoja na wose iyawasagule. \c 4 \s Kukala viyolonda Imulungu \p \v 1 Lelo, ndugu zangu, muifunza kulawa kumwetu vija vimulondigwa kumnogeza Imulungu na vivo vimukala. Na sambi towamba kuwapula kwa twaga da Mndewa Yesu mutende vinogile kubanza aho. \v 2 Kwavija mugajuwa mafundizo gatuwagwelele kwa udahi wa Mndewa Yesu. \v 3 Imulungu kolonda muwe wanhu wang'alile na sikumutende ugoni. \v 4 Kila munhu kolondigwa yalutawale lukuli lwake kwa kung'ala na kuitegeleza, \v 5 siyo kwa kusulukila vihile kamba viwotenda wanhu wa mwiisi walekile kumjuwa Imulungu. \v 6 Kwa mbuli ino, munhu yoyose sikuyamtendele vihile miyage hebu kumbunza. Tuwalongela mwaka mbuli ino na tuwazuma ng'hani kuwa Mndewa kowatagusa wose otenda mbuli azo. \v 7 Imulungu hatukemile bule tukale muugoni, ila tung'ale. \v 8 Avo munhu yoyose iyolema mafundizo gano hamulema munhu ila komulema Imulungu mwenyego yowagwaa Loho wake Yang'alile. \p \v 9 Hailondigwa kuwandikila mbuli ya kuwanogela waenu wamtogole Kilisito. Mweye wenyego mufunzigwa na Imulungu vija vimulondigwa kuinogela. \v 10 Na mukala muwatendela vivo ndugu zenu wose weli kila hanhu kuko Makedonia. Avo ndugu zangu, towapula, muwambe ng'hani kutenda vivo. \v 11 Avo kaleni goya, kila munhu yatende mbuli zake mwenyego na yasang'hane kwa makono gake mwenyego kamba vituwalongele. \v 12 Kwa kutenda vivo motegelezigwa na waja hawamtogola Kilisito na hamulonda kuwatamanila wanhu wayagwe mbuli ya kija kimulonda. \s Kubwela kwa Mndewa \p \v 13 Ndugu zetu tolonda mujuwe ukweli mbuli ya waja wafile, ili sambi munyunyuwale kamba wanhu awo hawatamanila. \v 14 Siye totogola kuwa Yesu kafa na kazilibuka kabili na totogola kuwa Imulungu kowagala hamoja na Yesu waja wose wafile kuno omtogola. \p \v 15 Dino dituwalongeleni ni fundizo da Mndewa, siye tuli wagima mbaka vonda yeze Mndewa, honda tuwalongolele waja wafile. \v 16 Avo sauti ng'hulu yolagiza na sauti ya msenga mkulu wa kuulanga na sauti ya mhalati ya Imulungu, nayo Mndewa mwenyego kohumuluka kulawa kuulanga. Baho waja wafile wang'hali omtogola Kilisito osonga kuzilibuligwa, \v 17 abaho siye tuli wagima kipindi acho tokwikigwa hamoja nao mna gamawingu kuiting'hana na Mndewa kuulanga. Avo siku zose tokala hamoja na Mndewa. \v 18 Avo muigangamize mmizoyo yenu kwa mbuli zino. \c 5 \s Muitande kwa kubwela kwa Mndewa \p \v 1 Ndugu, hailondigwa kuwandikila mbuli ya vipindi na msimu wa kulawilila mbuli zino, \v 2 kwavija mweye wenyego mojuwa goya siku ya kubwela Mndewa, yokwiza kwa kusinhukiza kamba mbavi viyokwiza ikilo. \v 3 Wanhu vondawalonge, “Kuna tindiwalo na kuhola,” baho ubananzi owezila kwa kusinhukiza, kamba usungu wa kulela viumwizila mtwanzi yoifungula mwana, na wanhu hawahonyeka bule. \v 4 Lakini mweye mbwiga zangu, hamuli mdiziza, avo siku ayo honda iwasinhukize kamba viyokwiza mbavi. \v 5 Mweye mose mwa wanhu mukala mdilenge, wanhu wa imisi. Siye hatuli wanhu wa ikilo hebu mdiziza. \v 6 Avo sikutuwase utulo kamba wanhu wayagwe, tukale meso na tuiteganye. \v 7 Wanhu owasa ikilo, na walevi okoligwa ikilo. \v 8 Lakini siye twa wanhu wa imisi, na tuiteganye. Tuvale kutamanila na unogelwa kamba kiwalo cha zuma cha kukimila mhambaga na tamanilo jetu da kuwa tokomboligwa kamba kofiya da zuma. \v 9 Kwavija Imulungu hatusagule yatubanange kwa ng'hasiliki yake, ila tuupate ukombola kubitila Mndewa wetu Yesu Kilisito, \v 10 yafile mbuli ya siye ili vondayabwele tukale nayo, tuwe tung'hali wagima hebu tufa. \v 11 Avo, muigele moyo na kuitaza kamba vimutenda sambi. \s Mafundizo ga kimambukizo na ndamuso \p \v 12 Ndugu, lelo towapula, muwategeleze goya waja iwosang'hana ng'hani hagati yenu, waja owalongoza na kuwafunzeni mzimbuli za Mndewa. \v 13 Muwategeleze ng'hani na kuwanogela mbuli ya sang'hano zao zootenda. Mukale na tindiwalo hagati yenu. \p \v 14 Ndugu zetu, towamba kuwapula muwazume wanhu wanyeke, muwasamhuse waliduhu nguvu, muwataze wanyolile na fungeni umoyo kwa wanhu wose. \v 15 Loleni munhu yoyose sikuyamulihe miyage gehile kwa gehile, lakini kipindi chose muwambe kuitendela ganogile mweye kwa mweye na kwa wanhu wose. \p \v 16 Mudeng'helele siku zose, \v 17 siku zose mumpule Imulungu, \v 18 mumgwee nhogolwa Imulungu kwa mbuli zose. Vino avo viyolonda Imulungu kumwenu muugima wenu kwa kuilumba na Yesu Kilisito. \p \v 19 Sikumuikimile sang'hano ya Loho Yang'alile, \v 20 sikumuubeze usenga ulawa kwa Imulungu, \v 21 lakini zigezeni mbuli zose, togoleni kinogile. \v 22 Muinege na vinhu vose vihile. \p \v 23 Imulungu mwenyego iyotugwaa tindiwalo yawatende muwe wang'alile ng'hani na kwika unhu wenu na loho na mizoyo na lukuli kutali na ubananzi wowose, mna ikipindi cha kubwela Mndewa wetu Yesu Kilisito. \v 24 Heyo iyawakemile kosang'hana avo, kwavija kotenda kiyalongile. \p \v 25 Ndugu zetu, mutupulile kwa Imulungu. \p \v 26 Walamuseni wanhu wose wamtogole Kilisito kwa nzila ilagusa unogelwa. \p \v 27 Nowalagiza kwa udahi wa Mndewa muwasomele baluwa ino wanhu wose wamtogole Kilisito. \p \v 28 Ng'hekewa ya Mndewa wetu Yesu Kilisito ikale na mweye.