\id ACT 
\ide UTF-8
\mt1 Апостоләт Верәм Верәт
\c 1
\s Йэмәӈ Ԓыԓ йо̆хәтты вер эԓты аԉәм вер
\p
\v 1 Оԓәӈ нэпекем ма нӑӈена, Феофил, иса щит эԓты хӑшсэм, мўй Иисус верәс пӑ мўйа утәԓтәсԓы оԓӈәԓ эԓты
\p
\v 2 щи хӑтәԓ унты, хун Йэмәӈ Ԓыԓ сӑхат Ԓўв пирыйәм апостолԓаԓа партәпсайәт\f + \fr 1:2 \fr*\ft Ԓўв партәпсайԓаԓ - ванта Лука 24:47-49\ft*\f* мийман, Ԓўв турма нŏх ўйман уса.
\p
\v 3 Ԓўв шукәԓ йўпийән, ар тŏрԓы уԓты посԓаԓ пиԓән, щитԓаԓа щи Ԓўвеԓ ԓыԓӈат этәԓтәсԓы, ԋӑԓйаӈ хӑтәԓ хўват ԓыв хŏщайэԓ этыԓыйәс пӑ Турәм Хон Уԓәпса эԓты пŏтәртәс.
\p
\v 4 Щӑԓта, ԓывиԓаԓ йӑха ӑкәтман, Ԓўв ԓывиԓаԓа партсәԓԓы: «Иерусалим эԓты аԓ мӑнаты, Ащэм аԉәм ŏт ԓавԓаты, хŏты Ма эԓтэм хуԓԓысты,
\p
\v 5 Иоанн йиӈка ԓŏӈәԓтыйәс, нын пӑ, тӑми йўпийән кӑмәтса хӑтәԓ кемән Йэмәӈ Ԓыԓа ԓŏӈәԓтты питԓайты».
\s Иисус турма нŏх ўты вер
\p
\v 6 Хун ԓыв йӑха ӑктәщсәт, Ԓўвеԓ иԋщәссэԓ, пŏтәртман: «Турәм Куща, Израиль хон пеләк ӑнта мўй ин Нӑӈ нŏх йӑԓпитԓэн?»
\p
\v 7 Иисус пӑ ԓывиԓаԓа йастәс: «Ащем Ԓўв йурәԓән пŏнәм пŏрайәт мўй сысәт уйәтты, ӑнтом нын верән,
\p
\v 8 нын йур вана ўԓты, хун нын хŏщайән Йэмәӈ Ԓыԓ ŏхәԓәԓ; пӑ Иерусалимән пӑ иса Иудея пӑ Самария ԓŏватән хŏԓна пӑ мўв кимәԓ унты Мӑнэм вантәм хŏйатәта уԓты питԓәты».
\p
\v 9 Щит йастәмаԓ кемән, ԓыв ватман, Ԓўв нŏх эԓәтса, пӑ пӑԓәӈән ԓыв сэмԓаԓ эԓты лӑп ўса.
\p
\v 10 Щиӈәԋща, хун ԓыв турәм хӑр пеԓа ватмеԓән, Ԓўв нŏх эԓԓәмаԓ пŏрайән, шӑмкапан ԓыв йэԓпиԓаԓән нŏви ԓумтәмәӈ кӑт ху этсәӈән
\p
\v 11 пӑ йастәсӈән: «Галилея йох! Мўй нын ԓойԓәты пӑ турәм хӑр пеԓа ватԓәты? Тӑм Иисус, нын эԓтан турма нŏх ўйәм Ŏт, тӑм иты щи йŏхәтәԓ, хŏты нын Ԓўвеԓ турма эԓԓәтаԓ ватсәԓән».
\s Йӑԓәп апостол Иуда йўкана пирыты вер
\p
\v 12 Щиӈәԋща ԓыв Иерусалим воша, Элеона айәԓты кев пай эԓты, йŏхԓы йŏхәтсәт, ԓўв Иерусалим ԉэпән шаббат хӑтәԓ шушты хўватән\f + \fr 1:12 \fr*\ft шаббат хӑтәԓ шушты хўват - словарьән ванты;\ft*\f* уԓ.
\p
\v 13 Щӑԓта, йŏхԓы йŏхәтмеԓ йўпийән, нўм хот йӑта, хŏта уԓԓысәт, нŏх мӑтсәт: Петр пӑ Иаков, Иоанн пӑ Андрей, Филипп пӑ Фома, Варфоломей пӑ Матфей, Иаков Алфей пŏх пӑ Симон Зилот, пӑ Иуда, Иаков пŏх усәт.
\p
\v 14 Хŏԓыйэ ԓыв и йӑха пойәкщәман усәт нэӈәт пӑ Мария, Иисус аԋԏи пиԓән, пӑ Ԓўв ху апщиԓаԓ пиԓән.
\p
\v 15 Пӑ щи хӑтԓәтән Петр, утәԓтәты йŏх кўтән нŏх ԓойман, йастәс, –
\p
\v 16 сот хус кем хŏйат йӑха ӑктәщиты щир ус: «Хӑнам йох! Щита тыйты мосәс, мўй Йэмәӈ Нэпекән Йэмәӈ Ԓыԓ Давид ўӈәԓән Иуда эԓты йастәс. Иисус ԋӑрэмәм ŏтәт хŏща ԓўв ŏха ус;
\p
\v 17 Ԓўв мўӈ хŏщайэв ԓўӈәтман ус пӑ тӑм Турәм урәӈән верты верәт пеԓа пирыса»;
\p
\v 18 Туп атәм вермаԓ сӑхат ўйәм ŏхԓаԓән, мўв хӑрән ԓутса, пӑ хун оԓӈат ŏхән рӑкәнмаԓән, ԓўв пўтайәԓ пелки похәс, пӑ сӑмԓаԓ-мŏхәԓԓаԓ ким ӑркәпсәт.
\p
\v 19 Щиӈәԋща щи вер Иерусалим хŏйатәтән хŏԓ уйәтты питса, щишән щи мўв ԓыв йасӈеԓән Акелдама нэма пŏтсэԓ, щит «ўр мӑнәм мўв».
\p
\v 20 «Псалмәт нэпекән\f + \fr 1:20 \fr*\ft Псалмәт нэпекән - словарьән ванты;\ft*\f* хӑшман уԓԓа: 'Ԓўв хотәԓ таԓ ат уԓ, пӑ нэмәԓты уԓты ŏт щита ӑт ат питәԓ'; пӑ: 'Ԓўв тӑйәм верәԓ па хŏйатән ат ўԓа'.
\p
\v 21 Щишән мўӈев щи хŏйатәт эԓты ит пирыты мосәԓ, хŏй мўӈ пиԓэвән иса йӑӈхәс, хун Иисус Турәм Куща мўӈ кўтэвән ус,
\p
\v 22 Иоанн йиӈка ԓŏӈәԓтыты вер уш эԓты пӑ щи хӑтәԓ унты, хун Ԓўв мўӈ эԓтэв нŏх ўса. Ԓўв и щиты Иисус нŏх ԓыԓәӈԓәм вер хŏща мўӈ пиԓэвән ватты ŏта ат ус».
\p
\v 23 Пӑ кӑт хŏйат аԉса: Варсавайа айәԓты Иосиф, Иуста нэмтәм ŏт, пӑ Матфий;
\p
\v 24 Щӑԓта пойәкщәсәт пӑ йастәсәт: «Нӑӈ, Турәм Куща, кашәӈ хŏйат сӑм уйәтԓән, тӑм кӑтӈән эԓты итәԓ, Нӑӈ пирыйәм ŏтэн, аԉи,
\p
\v 25 тӑм Турәм урәӈән верты верәт пӑ апостола уԓты щир вана ўты кеша, хŏԓща Иуда пўӈԓа мӑнәс, ԓўв тӑхайәԓа мӑнтаԓ урәӈән».
\p
\v 26 Щӑԓта ԓын эԓтан пос вŏщкәсәт, пӑ Матфия пос питәс, пӑ ԓўв ихŏщйаӈ апостоләт пеԓа ԓўӈәтты питса.
\c 2
\s Йэмәӈ Ԓыԓ йо̆хәтты вер
\p
\v 1 Ветйаӈ хӑтԓәп хӑтәԓ\f + \fr 2:1 \fr*\ft Ветйаӈ хӑтԓәп хӑтәԓ - словарьән ванты;\ft*\f* питмаԓән ԓыв хŏԓыйэ и нŏмәсән йӑха усәт.
\p
\v 2 Щӑԓта шӑмкапан турәм эԓты сый тыйәс, ищи мӑтты такан пŏԓты вот иты, пӑ хот, хŏта ԓыв усәт, лӑп ўса.
\p
\v 3 Пӑ ԓыв хŏщайэԓ лакки ортәсты тўт ԋаԓмәт хŏрпи ŏтәт этсәт, пӑ ԓыв нўмпиԓаԓа ԓӑтәԓ щирән итән, итән вŏԓыԓысәт.
\p
\v 4 Пӑ хŏԓыйэ Йэмәӈ Ԓыԓән тэкәтсайәт, щӑԓта па йасӈәтән пŏтәртты питсәт, хŏты Ԓыԓ ԓывиԓаԓа пŏтәртты щир мӑс.
\p
\v 5 Иерусалимән пӑ иудейәт усәт, Турма эвәԓты хŏйатәт, ар сыр мир кўт эԓты турәм иԓпийән уԓты ŏтәт.
\p
\v 6 Хун щи сый тыйәс, мир ӑктәщәс пӑ нŏмәсԓаԓ ԓыԓԓәсәт, кашәӈ хŏйат ԓывиԓаԓ хуԓәс, хŏты щитәт ԓыв ўӈәԓ пўншәм йасәӈԓаԓән пŏтәртсәт, щишән.
\p
\v 7 «Пӑ хŏԓыйэ ӑԓ пакнысысәт, ԓыв кўтэԓән пŏтәртман: 'Тӑм пŏтәртты ŏтәт мўй ӑнта хŏԓ Галилея мŏхет?'
\p
\v 8 Мўй щирән мўӈ, кашәӈ хŏйат ԓўв ўӈәԓ пўншәм йасӈәԓ, хуԓԓув.
\p
\v 9 Парфия пӑ Мидия хŏйатәт, пӑ Элам хŏйатәт, Месопотамияйән, Иудеяйән пӑ Каппадокияйән, Понтән пӑ Асияйән уԓты хŏйатәт,
\p
\v 10 Фригияйән пӑ Памфилияйән, Египетән пӑ Киринея пўӈәԓән ŏԓты Ливия мўв йирәтән уԓты хŏйатәт, пӑ Рим эԓты йŏхтәм ŏтәт, иудейәт пӑ прозелитәт\f + \fr 2:10 \fr*\ft прозелитәт - словарьән ванты\ft*\f*,
\p
\v 11 Крит пӑ Аравия хŏйатәт, ԓывиԓаԓ мўӈ йасәӈԓувән Турәм вŏԓаӈ верәт эԓты пŏтәрттэԓ хуԓԓув»?
\p
\v 12 Пӑ хŏԓ ӑԓ пакнысысәт пӑ, ощатыман, кўтԓаԓән иԋщәссәт: «А мўй щит»?
\p
\v 13 Тухԓәт пӑ, ԋӑха ԋӑхман, пŏтәрсәт: «Ԓыв эпԓәӈ ўна йищсәт».
\s Петра по̆тәр
\p
\v 14 Петра пӑ, ихŏщйаӈәԓ пиԓән ԓойман, сыйәӈ тўрән ԓывиԓаԓа йастәс: «Иудей йох, пӑ хŏԓ Иерусалимән уԓты ŏтәт! Тӑм вер нын ат уйәтԓәԓән, пӑ ма йасәӈԓама хуԓәнтаты:
\p
\v 15 Ԓыв ӑнта кўтщәмәт, хŏты нын нумәсԓәты, ин хӑтәԓ хуԓмет щос ӑт уԓ;\f + \fr 2:15 \fr*\ft хӑтәԓ хуԓмет щос - щит еврей йох щирән йӑртйаӈ щос; аԓәӈсӑхат ўна ӑт йищԓәт;\ft*\f*
\p
\v 16 туп тӑми Турәм айкеԓ туты хŏйатән, Иоиԉән, йастәм айкеԓ:
\p
\v 17 'Пӑ йухәт хӑтԓәтән питәԓ, Турәм пŏтәртәԓ, Ма Ԓыԓэм эԓты хŏԓ хŏйатәта шошәмԓәм, щӑԓта нын пŏхԓән нын эвиԓән Турәм айкеԓ туты питԓәт; пӑ нын энәмты йохԓән вантәпса ватты питԓәт, пӑ нын ун икиԓән уԓмәт ватты питԓәт.
\p
\v 18 Щӑԓта Мӑнэма рупитты йохԓама, пӑ Мӑнэма рупитты нэԓама щи хӑтԓәтән Ма Ԓыԓэм эԓты шошәмԓәм, пӑ Турәм айкеԓ туты питԓәт.
\p
\v 19 Щӑԓта вантыԓԓаӈәԓ верәт нумән турәм хӑрийән пӑ йэмәӈ посәт иԓән мўвән, ўр пӑ тўт пӑ пусәӈ пŏлыйәпса этәԓтәԓәм.
\p
\v 20 Най пӑтлама йиԓ, пӑ тыԓәщ ўр иты йиԓ, йэԓпи хун Турәм Куща вŏԓаӈ пӑ вŏрԓәты хӑтәԓ йŏхәтәԓ.
\p
\v 21 Щӑԓта питәԓ: кашәӈ хŏй Турәм Куща нэм вохԓәԓԓы, нŏх пайәтԓа'.
\p
\v 22 Израиль йох! Тӑм йасӈәт хуԓәнтаԓән: Иисус, Назарет вош хŏйат, Турәм эԓты нынана йурәӈ пӑ вантыԓԓаӈәԓ верәт пӑ йэмәӈ посәт сӑхат ватәԓтәм Ху, щитәт Турәм Ԓўв мŏхтэԓ нын кўтәнән верәс, хŏты нын щи уйәтԓәԓән,
\p
\v 23 Тӑми, Турәм нŏмәс пӑ йэԓпи вантәм вер хўват мийәм Ŏт, нын ўсԓән пӑ, Турма ӑт эвәԓты хŏйатәт йошән картԓўкән пернайа сэкман, веԓсәԓән;
\p
\v 24 Туп Турәм , сŏрәм мухләт лакки мӑшман, Ԓўвеԓ нŏх ԓыԓӈатсәԓы, сŏрәм Ԓўвеԓ иԓ катәԓты ӑт верәтсәԓы, щишән.
\p
\v 25 Давид Ԓўв эԓтэԓ пŏтәртәԓ: 'Ма Турәм Куща ма йэԓпемән иса ватсәм, Ԓўв ма эԓтэм йӑм пеләк сӑхат уԓ, ма ӑт ат нŏмәнԓысәм\f + \fr 2:25 \fr*\fq нŏмәнԓысәм \fq*\ft - кӑт нŏмәс кўтән уԓты;\ft*\f*.
\p
\v 26 Щит эԓты ма сӑмем амтәс пӑ ԋаԓмем кашәӈа йис; хŏԓна пӑ эԓ ԋŏхем, щи пеԓа нŏмәс пŏнман, уԓты питәԓ:
\p
\v 27 Нӑӈ ма ԓыԓэм хӑԓайәт кўтән ӑт хӑйԓэн пӑ Нӑӈ йэмәӈ ŏтэна шимты вер шийаԓәты ӑт мӑԓэн.
\p
\v 28 Нӑӈ мӑнэм уԓәпса йуш аԉсән, ма сӑмем амәтэн тэкәнәԓ, хун Нӑӈ веншен шийаԓәԓәм'.
\p
\v 29 Хӑнам йох! Нынана Давид опращев эԓты тŏрԓы йастәты эсәԓты ат питԓа, ԓўв пӑрәс пӑ иԓ ԓэщатса, пӑ ԓўв ԓэԓтŏтәԓ мўӈ хŏщайэв тӑм хӑтәԓ унты уԓ.
\p
\v 30 Турәм айкеԓ туты хŏйата уԓмаԓән пӑ уйәтман, Турәм так йасәӈ мийман, ԓўвеԓа йастәс, ԓўв ўрәԓ-ԓантәԓ эԓты Христос хŏйата тыйәԓтԓәԓы пӑ ԓўв хон омәсты тӑхайәԓа опсәԓтԓәԓы,
\p
\v 31 ԓўв Христос нŏх ԓыԓәӈԓәты вер эԓты йэԓпи йастәс, мўй Ԓўв ԓыԓәԓ хӑԓайәт кўтән ӑт хӑйԓа, пӑ Ԓўв мотавтәԓ шимты щир ӑт ватәԓ.
\p
\v 32 Турәм Тӑм Иисус нŏх ԓыԓӈатсәԓы, щит хŏща мўӈ хŏԓ вантәм хŏйатәта усув.
\p
\v 33 Щиӈәԋща, Ԓўв, Турәм йурәӈ йошән турма нŏх пайәтман уса пӑ Ащеԓ эԓты аԉәм Йэмәӈ Ԓыԓ вана ўйман, щит шошемәс, мўй нын ин ватԓәты пӑ хуԓԓәты.
\p
\v 34 Давид опԉа нŏх ӑт мӑнәс; туп ԓўв пŏтәртәԓ: "Турәм Куща ма Турәм Кущайэма йастәс: Ма йӑм пелкема опса,
\p
\v 35 щи унты, хун Нӑӈ кўрнатэна нӑӈен нўрмәԓтты ŏтԓан иԓ ӑт пŏнԓәԓам".
\p
\v 36 Щишән Израиль хот тэԓ такан ат уйәтԓәԓы, Тӑм Иисус, Хŏй нын пернайа сэксәԓән, Турәм Ԓўвеԓ Турәм Кущайа пӑ Христоса пŏтсәԓы!»
\p
\v 37 Щит хўԓмеԓ кемән, ԓыв сӑмԓаԓән ԋŏхԓәсәт пӑ Петрайа пӑ па апостоләта йастәсәт: «Хӑнам йох, мўй мўӈева верты»?
\p
\v 38 Петра пӑ ԓывиԓаԓа йастәс: «Кӑрэкԓән эԓты шӑнша керԓаты, пӑ нын эԓтан кашәӈ ŏт Иисус Христос нэм хўватән йиӈка ат ԓŏӈәԓтыса кӑрэкәт йŏрэмәты урәӈән; пӑ Йэмәӈ Ԓыԓ мойԓәпсайа ўйаԓән.
\p
\v 39 Аԉәм вер нын йўканәна пӑ нын ԋаврэмԓән пӑ хŏԓ йэԓта мŏхет урәӈән уԓ, хŏй Турәм Кущайән мўӈ Турмевән вохԓа».
\p
\v 40 Пӑ ар па хŏрпи йасӈәтән ԓўв пŏтәртәс пӑ пойкәс, йастәман: «Тӑм атәм хŏйат рут эԓты хŏԓт пайтәсаты».
\p
\v 41 Щиӈәԋща, ԓўв йасӈәԓ вана ўйәм ŏтәт йиӈка ԓŏӈәԓтысайәт, пӑ щи хӑтәԓ эвәԓты хŏйатәт хŏща хуԓәм щŏрәс кем хŏйата арамәс.
\p
\v 42 Щӑԓта ԓыв ван кўтԓы апостоләт утәԓтәты вер хŏща хуԓәтман, ԋаԋ морәтман\f + \fr 2:42 \fr*\fq ԋаԋ морәтман \fq*\ft - Словарьән ванты;\ft*\f*, пŏтремәман пӑ пойәкщәман йӑха уԓԓысәт.
\p
\v 43 Кашәӈ сӑмән пӑԉщәм ус; щӑԓта ар вантыԓԓаӈәԓ верәт пӑ йэмәӈ посәт Иерусалимән апостоләт мŏхты тыйсәт.
\p
\v 44 Хŏԓ пӑ эвәԓты мŏхет йӑха усәт пӑ мўй иса и сура тӑйсэԓ.
\p
\v 45 Пӑ хотԓаԓ пӑ тащԓаԓ–вещԓаԓ тыныԓԓаԓ, пӑ хŏйатәта хŏԓ ортԓыԓԓаԓ, ватман, хŏйа мўй арат мосәԓ.
\p
\v 46 Щӑԓта кашәӈ хӑтәԓ, и нŏмәсән уԓман, Турәм Хотән уԓԓысәт пӑ, хотәтән ԋаԋ морәтман, амтәтԓыман пӑ вещкат сӑмән уԓман, ԓэсәт,
\p
\v 47 Турәм ишәкман пӑ мирән сӑмәӈа тӑйман. Турәм Куща пӑ кашәӈ хӑтәԓ нŏх пайтәм мŏхет эвәԓты хŏйатәт хŏща йŏхтәптысԓы.
\c 3
\s Петра нохты хŏйат тўмтака верԓәԓы
\p
\v 1 Петра пӑ Иоанн Турәм Хота йӑрәтйаӈмет\f + \fr 3:1 \fr*\ft йӑртйаӈмет щос - щит мўӈ щирэвән хӑтәԓ хуԓмет щос;\ft*\f* пойәкщәты щосән йӑха шушсәӈән.
\p
\v 2 Сэма питәм тэԓән уԓты нохты хŏйат ӑԓ аԓтԓыса пӑ кашәӈ хӑтәԓ Турәм Хот, Хŏрамәӈа айәԓтты, ов ԉэпа опсыԓыса. Турәм Хота ԓŏӈты хŏйатәт эԓты меԓащ вохты урәӈән.
\p
\v 3 Ԓўв, Петра пӑ Иоанн Турәм Хот ов йэԓпийән кащаԓәмаԓ кемән, ԓын эԓтайән меԓащ вохәс.
\p
\v 4 Петра Иоанн пиԓән, ԓўв пеԓайәԓ тŏрԓы ватман, йастәс: «Мин пеԓайэмән ӑӈкәрма».
\p
\v 5 Щӑԓта ԓўв ԓын пеԓайән хŏрат ӑӈкәрмәс, ԓын эԓтайән мŏԓты йоша пайәтты нумәсәс.
\p
\v 6 Туп Петра йастәс: «Щел ŏх пӑ сорԋи ма ӑт тӑйԓәм; мўй тӑйԓәм, щит нӑӈен мӑԓәм: Назарет эԓты уԓты Иисус Христос нэм хўватән ԓойа пӑ шушиԓыйа».
\p
\v 7 Щӑԓта, ԓўвеԓ йӑм пеләк йошәԓ эԓты катәԓман, нŏх ԓощәԓтәсԓы; пӑ ищи мŏхты ԓўв кўр пушәхԓаԓ пӑ шаншŏхԓаԓ такамәсәт,
\p
\v 8 Пӑ, нŏх ԓойәпман, ԓойәс пӑ шушиԓыты питәс, пӑ ԓын пиԓанән Турәм Хота ԓŏӈәс, шушиԓыман пӑ наврәтԓыман пӑ Турәм ишәкман.
\p
\v 9 Щӑԓта аратәԓ мир ԓўвеԓ шушиԓыман пӑ Турәм ишәкман ватсәԓы;
\p
\v 10 Пӑ ԓўвеԓ уйәтсэԓ, тӑм щит ус, хŏй Турәм Хот Хŏрамәӈ ов ԉэпән меԓащ вохты урәӈән опсәс; щӑԓта ԓўв тўмтака йўвмаԓ пӑтыйән, хŏйатәт шек пӑԓтәмәсәт пӑ пакнысысәт.
\s Петра Турәм Хотән по̆тәртты вер
\p
\v 11 Пӑ тўмтака йўвәм нохәм ху Петра пӑ Иоанн эԓты пўӈԓа ӑт мӑныԓыйәԓ, щишән мир хŏԓ, шек пакәнман, ԓын хŏщайән Соломон хот йата хухәԓсәт.
\p
\v 12 Петра щит шийаԓәмаԓ кемән мир пеԓа йастәс: «Израиль йох! Мўй тӑми эԓты пакәнԓәты, мўй мўӈ пеԓайэв ватԓәты, ищи мӑтты ки мин йурԓәмәнән мўй пӑ йӑмԓәмәнән щиты версэмән, ԓўв шушиԓыйәԓ?
\p
\v 13 Авраам пӑ Исаак пӑ Иаков Турәм, мўӈ ащиԓув Турәм, Ԓўв Иисус Пŏхәԓ вŏԓаӈ щирәԓ этәԓтәсԓы, Хŏй нын веԓты мӑсԓән пӑ Хŏй эԓты, Пилат хуԓәтман, пўӈԓа ўратсәты, хун щитэн Ԓўвеԓ хŏԓт эсәԓты ўтщисԓы.
\p
\v 14 Туп нын Йэмәӈ пӑ Вещкат Ŏт эԓты пўӈԓа ўратсәты пӑ хŏйат веԓты хорахщи нынана хŏԓт эсәԓты ўратсәты,
\p
\v 15 Уԓәпса Куща пӑ веԓсәԓән. Тӑми, Турәмән пӑрмаԓ эԓты нŏх ԓыԓӈатса, мўй хŏща мўӈ вантәм ŏтәта уԓԓув.
\p
\v 16 Пӑ Иисус нэм хўватән эвәԓты урәӈән, Ԓўв нэмәԓән тӑмен такапса, хŏй пеԓа нын ватԓәты пӑ ԓўвеԓ уйәтԓәԓән. Пӑ Иисус эԓты уԓты эвәԓты щир, хŏԓ нын ватман, тўмтака йиты вер верәс.
\p
\v 17 Пӑ хŏты, ма уйәтԓэм, хӑнам йохәт, нын пӑ куща йохԓән иты, ӑт уйәтман, тӑм версәԓән;
\p
\v 18 Турәм пӑ хŏты Ԓўв хŏԓыйэ Турәм айкеԓ туты хŏйатԓаԓ уӈәԓән Христос шукащты вер йастәс, щиты пӑ щи версәԓы.
\p
\v 19 Щиӈәԋща, кӑрэкԓән эԓты шӑнша керԓаты пӑ Турәм пеԓа ӑӈкәрматы, нын кӑрэкԓән нŏх ат ушисайәт,
\p
\v 20 йӑԓпиԓәты пŏрайәт Турәм Куща эԓты ат йŏхәтԓәт, пӑ нынана йўкантәм Иисус Христос Ԓўв ат китәԓ.
\p
\v 21 Туп Иисуса опәԉән хӑщты мосәԓ, щи пŏра унты хун Турәм иса хŏԓ йӑԓпитԓәԓы, щи пŏра эԓты Турәм хŏԓ Ԓўв йэмәӈ Турәм айкеԓ туты хŏйатԓаԓ уӈәԓән хўвән йастыԓыйәс.
\p
\v 22 Моисей ащиԓува ӑт йастыԓыйәс: 'Нын хӑнам йохԓән кўт эԓты Турәм Куща нын Турмән, ма итэма, Турәм айкеԓ туты хŏйат нŏх этәԓтәԓ; Ԓўвеԓа мўй хŏща иса хуԓәнтаты, мўй Ԓўв нынана пŏтәртты питәԓ;
\p
\v 23 Щӑԓта кашәӈ ŏт, хŏй Турәм айкеԓ туты хŏйата ӑт хуԓтмәԓ, щит мир кўт эԓты пӑратԓа'.
\p
\v 24 Щит эԓты пӑ хŏԓ Турәм айкеԓ туты хŏйатәт пŏтәртысәт, Самуил эԓты ўйман пӑ щитәт, хŏй ԓўв йўпеԓән ус, ищиты тӑм хӑтԓәт аԉсәт.
\p
\v 25 Нын – Турәм айкеԓ туты хŏйатәт пӑ йастантәм вер пŏхәт, Турәм нын ащиԓәна йастантәм вер хӑйиԓыйәс, Авраама пŏтәртман: 'Пӑ нӑӈ ԋаврэмен сӑхат мўв ԓŏватән уԓты мир йӑмән мӑԓа'.
\p
\v 26 Турәм, Ԓўв Иисус Пŏхәԓ ԓыԓӈатмаԓ кемән, оԓӈа нын хŏщайәна Ԓўвеԓ китсәԓы, нынана йӑм мӑты урәӈән пӑ кашәӈ ŏтән нын ԉикәӈ верԓән эԓты шӑшән керәтты урәӈән».
\c 4
\s Петра пӑ Иоанн синедрион йэщаԓт ԓойты вер
\p
\v 1 Хун ԓын мир пеԓа пŏтәртсәтән, Турма йир верты йох пӑ Турәм Хот шавиты куща пӑ саддукейәт ԓын хŏщайән вана йисәт,
\p
\v 2 щит пеԓа ԉикихурыйа уԓман, мўйа ԓын мир утәԓтәԓԓән пӑ пӑрәм эԓты Иисус иты нŏх ԓыԓәӈԓәты вер айәԓәтән;
\p
\v 3 Щӑԓта ԓын ԋӑрэмәсайтән пӑ аԓәӈсӑхат унты касна хот шавиты йоха мӑсайӈән; йэтән ус, щишән.
\p
\v 4 Йасәӈ хуԓәнтәм мŏхет эԓты пӑ ар пеләк эвԓәс; пӑ эвԓәм хŏйат аратәԓ вет щŏрәс кем ус.
\p
\v 5 Кимет хӑтәԓән Иерусалимән ԓыв куща йохԓаԓ, пӑ уна уԓты икет, пӑ Закона утәԓтәты икет ӑктәщсәт,
\p
\v 6 Пӑ Анна - Турма йир верты ŏх ики, пӑ Каиафа, пӑ Иоанн, пӑ Александр, пӑ па мŏхет ԓўв рутәԓ эԓты;
\p
\v 7 Щӑԓта, ԓынан кўтԓәпа ԓощәԓтәман, иԋщәссэԓ: «Мўй йурән пӑ мўй нэмән нын тӑми версәтән?»
\p
\v 8 Щиӈәԋща Петра, Йэмәӈ Ԓыԓән тэкәнман, ԓывиԓаԓа йастәс: «Мир кущайәт пӑ Израиль ун икет!
\p
\v 9 Тӑм хӑтәԓ мин эԓтэмән кӑшаӈ хŏйат йӑма вермемән урәӈән такан иԋщәсԓаймән ки, хŏты ԓўв тўмтака верса,
\p
\v 10 нын хŏԓ пӑ хŏԓ Израиль мир уйтаԓән: тӑм хŏйат ин нын йэԓпанән тўмтака ԓойәԓ Назарет эԓты уԓты Иисус Христос нэм хўват, Хŏй нын пернайа сэксәԓән пӑ Хŏй пӑрәм эԓты Турәмән нŏх ԓыԓӈатса!
\p
\v 11 Ԓўв уԓ кев шуп, нынанән, кев хот омәсты хŏйатәтән, эртәм ŏт, туп щуӈ тӑйән мет мосты кева йис. Пӑ нэмәԓтты па ŏт хŏща нŏх пайтәсты щир ӑнтом;
\p
\v 12 Турәм иԓпийән хŏйатәта мийәм па нэм ӑнтом, мўй щирән мўӈ нŏх пайтәсты верәтсув ԓуԓән».
\p
\v 13 Петра пӑ Иоанн ӑт пӑԓты вер кащаԓәмеԓ пӑ ԓын ӑнта утәԓтыйәм пӑ аԓ хŏйата уԓты вер мŏштәмеԓ кемән, ԓыв ӑԓ щи пакнысысәт. Щи кўтән ԓын ŏша пайтыԓысайтән, ԓын Иисус пиԓән уԓԓыстән;
\p
\v 14 Тўмтака йўвәм пӑ ԓын пиԓәнән ԓойәм хŏйат пеԓа ватман, нэмәԓты шŏппи йастәты ӑт верәтсәт.
\p
\v 15 Щӑԓта, синедрион\f + \fr 4:15 \fr*\fq синедрион \fq*\ft - Словарьән ванты;\ft*\f* эԓты ԓывиԓаԓ ким этты партман йўпийән, ԓыв кўтэԓән нумәссәт,
\p
\v 16 пŏтәртман: «Мўӈев тӑм хŏйатӈән пиԓән а мўй верты? Иерусалимән уԓты хŏйатәтән хŏԓ уйәтԓа, ԓын йӑна вантыԓԓаӈәԓ вер версәӈән, пӑ мўӈ тӑми хŏԓт хуләтты ӑт верәтԓэв;
\p
\v 17 туп, тӑми мир ԓŏвата лакки ӑт ат ԓӑрпиԓәс, пӑԓтаптәман, ԓывиԓаԓа тӑм нэм эԓты пŏтәртты нэмәԓты хŏйата ӑт эсәԓԓэв».
\p
\v 18 Щӑԓта, ԓынан вана вохман, ԓынана нэмәԓты щирән ӑт пŏтәртты пӑ Иисус нэм эԓты утәԓтәты такан ӑт эсәԓсэԓ.
\p
\v 19 Туп Петра пӑ Иоанн ԓывиԓаԓа йŏхԓы йастәсӈән: «Нумәсаты, Турәм йэԓпийән мўй вещкат - Турәм эԓты нынан аршәк хуԓәтты?
\p
\v 20 Мин, мўй ватсәмән пӑ мўй хуԓсәмән, щит эԓты мин ӑт пŏтәртты ӑт верәтԓәмән».
\p
\v 21 Ԓыв пӑ, ԓынан пӑԓтаптәман эсәԓсэԓ, ар хŏйат уԓәм пӑтыйән, ԓынан йŏвәртты щир ӑт уйәтсәт; тыйәм вер урәӈән хŏԓыйэ Турәм ишәксәт, щишән.
\p
\v 22 Щи хŏйата ԋӑԓйаӈ мŏԓтас тӑԓ ус, хŏй хŏща щи тўмтака йиты вантыԓԓаӈәԓ вер тыйәс.
\s Эвәԓты йох пойәкщәты вер
\p
\v 23 Эсәԓман йўпийән, ԓын пиԓԓән хŏща йŏхәтсәтән пӑ пŏтәртсәԓән, мўй Турма йир верты ŏх икет пӑ уна уԓты икет ԓынана йастәсәт.
\p
\v 24 Ԓыв пӑ, хуԓәтмеԓ йўпийән, и нŏмәсән Турәм пеԓа тўрԓаԓ сыйәӈа версәԓаԓ пӑ йастәсәт: «Тӑйтаӈ Турәм! Нӑӈ турәм хӑр пӑ мўв пӑ щарәс пӑ мўй щита уԓ иса хŏԓ тыйәԓтсэн.
\p
\v 25 Нӑӈ мўӈ Давид ащев, Нӑӈ митхуйэн, ўӈәԓән Йэмәӈ Ԓыԓэнән йастәсән: 'Мўй урәӈән па мирәт рома уԓты ӑт верәтԓәт, пӑ ԓыв таԓ нŏмәс туты ўтщиԓәт?
\p
\v 26 Мўвәӈ хонәт нŏх эԓԓәсәт, пӑ вŏс йохәт йӑха Турәм Куща йэщаԓт пӑ Ԓўв Христосәԓ\f + \fr 4:26 \fr*\fq Христос \fq*\ft - Словарьән ванты;\ft*\f* йэщаԓт ӑктәщсәт'.
\p
\v 27 Йӑна тӑм вошән Нӑӈ Йэмәӈ Пŏхен Иисус, Нӑӈ ԋŏсытәм Ŏтэн, йэщаԓт, Ирод пӑ Понтий Пилат па мир йох пӑ Израиль йох пиԓән ӑктәщсәт,
\p
\v 28 ԓыв щит версәт, мўй Нӑӈ йурэнән пӑ Нӑӈ партты щирэнән уԓты верәԓ ус.
\p
\v 29 Пӑ ин, йэшәк Турәм Куща, ԓыв пӑԓтапԓаԓ пеԓа ӑӈкәрма, пӑ Нӑӈена рупитты йохԓана иса ӑт пӑԓман, Нӑӈ йасӈен пŏтәртты мийи,
\p
\v 30 Нӑӈ йошен йэԓ ԋинши пӑ кӑшаӈ хŏйатәт тўмтака вераԓән, Нӑӈ Иисус Йэмәӈ Пŏхен нэмән йэмәӈ посәт пӑ вантыԓԓаӈәԓ верәт вера».
\p
\v 31 Щӑԓта, ԓыв пойәкщәмеԓ йўпийән, хŏта ԓыв ӑкәтман усайәт, щи тӑхайэԓ ԋŏхԓыйәс, пӑ хŏԓыйэ Йэмәӈ Ԓыԓән тэкәтсайәт, пӑ Турәм йасәӈ хурԓы пŏтәртсэԓ.
\s Эвәԓты йох хо̆ща иса и сура тӑйты ŏтәта уԓты щир
\p
\v 32 Ар эвԓәм хŏйатәт хŏща пӑ и сӑм и ԓыԓ ус; пӑ нэмәԓты хŏйат тӑйәм ŏтԓаԓ эԓты ԓывиԓаԓа ӑт айәԓԓәԓаԓ, туп иса и сура тӑйты ŏтԓаԓа усәт.
\p
\v 33 Апостоләт пӑ ун йурән Турәм Куща Иисус Христос нŏх ԓыԓәӈԓәм эԓты пŏтәртсәт; пӑ вŏԓаӈ йӑм хŏԓыйэ ԓыв пиԓԓаԓән ус.
\p
\v 34 Ԓыв кўтэԓән и нўша хŏйат ӑнтом ус; хŏԓ хŏй мўвәт мўй хотәт тӑйәс, щитԓаԓ тынымеԓ кемән, тынасәм тынԓаԓ тутԓысәт,
\p
\v 35 пӑ апостоләт кўр шŏма пŏныԓысәт; пӑ кашәӈ хŏйата, хŏй мўй хŏща мосты вер тӑйәԓ, мийԓыса.
\p
\v 36 Щиты Иосий, апостоләтән Варнавайа айәԓтәм (щит: «торамтыты пŏх»), левит, рутәԓ Кипр мўв эԓты уԓ,
\p
\v 37 хŏй ԓўв йŏра мўв тӑйәс, щитәԓ тынымаԓ йўпийән, ŏхԓаԓ тусԓы пӑ апостоләт кўрәт шŏма пŏтсәԓы.
\c 5
\s Анания пӑ Сапфира
\p
\v 1 И ху пӑ, нэмәԓ Анания, ԓўв Сапфира имеԓ пиԓән мўвәԓ тынымаԓ йўпийән,
\p
\v 2 тынәԓ эԓты и шўкәԓ, ԓўв имеԓ уйәтман, хŏԓт хӑԋатсәԓы, пӑ хӑщәм шўкәԓ тусԓы пӑ апостоләт кўр шома пŏтсәԓы.
\p
\v 3 Туп Петра йастәс: «Анания! Мўй урәӈән нӑӈ сӑмен хиԋа ўты эсәԓсэн. Мўйа нӑӈ Йэмәӈ Ԓыԓа олмащисән пӑ мўв тынэн эԓты и шупәԓ хӑԋатсэн?
\p
\v 4 Мўй нӑӈ тӑйсән, ӑнтом мўй нӑӈен ус, пӑ тыныйәм сӑхат мŏщатәм ŏтэн ӑнта мўй нӑӈ йурэнән ус? Мўй урәӈән тӑми нӑӈ сӑмена пŏтсэн? Нӑӈ ӑнта хŏйатәт, Турәм ԓэпәԓсән».
\p
\v 5 Щи йасӈәт хуԓмаԓ кемән, Анания щӑх рӑкнәс; пӑ щит хуԓәнтәм ŏтәт хŏԓ ун пӑԉщәмән йŏхәтсайәт.
\p
\v 6 Щиӈәԋща, энәмты йох ԓўвеԓ лоттәты урәӈән ԓэщатсэԓ ким этәԓтәсэԓ пӑ иԓ лоттәсэԓ.
\p
\v 7 Тӑм йўпийән хуԓәмԓэм щос хӑщәс, тыйәм вер эԓты нэмәԓты ӑт уйәтман, пӑ ԓўв имеԓ йŏхтәс.
\p
\v 8 Петра пӑ ԓўвеԓ иԋщәссәԓы: «Мӑнэм йасты, тӑм арат сӑхат нын мўвән тынысԓән?» Ԓўв йастәс: «Па хŏты, тӑм арат сӑхат».
\p
\v 9 Туп Петра ԓўвеԓа йастәс: «Мўйа нын Турәм Куща Ԓыԓ артаԓыты кашащсәтән? Тӑта щи, нӑӈ икен лоттыйәм йох ова ԓŏӈԓәт. Нӑӈ па ким туԓайән».
\p
\v 10 Ищи мŏхты ԓўв Петра кўрӈән шŏма иԓ рӑкнәс пӑ ԓыԓәԓ мӑнәс. Пӑ энәмты йох, йŏхи ԓŏӈман, ԓўвеԓ пӑрәма уйәтсэԓ пӑ, ким этәԓтәмеԓ йўпийән, ԓўв икеԓ пўӈԓа лоттәсэԓ.
\p
\v 11 Щиӈәԋща хŏԓ пойәкщәты мŏхет пӑ хŏԓ, хŏй тӑм хуԓәс, ун пӑԉщәмән йŏхәтсайәт.
\s Апостоләт ар хо̆йат тўмтака верты верәт
\p
\v 12 Апостоләт йошән мир хŏща тэԓыйэ йэмәӈ посәт пӑ вантыԓԓаӈәԓ верәт тыйәԓтысайәт; пӑ хŏԓыйэ и нŏмәсән Соломон хот йӑтән уԓԓысәт.
\p
\v 13 Пўӈәԓ хŏйатәт эԓты пӑ нэмәԓты ŏт ӑт веритәԓ ԓыв хŏщайэԓ пиԓтәщты, мир пӑ ԓывиԓаԓ ишәкәԓ.
\p
\v 14 Турәм Кущайа эвәԓты хŏйат пӑ ара па ара йиты питәс, тэԓыйэ йох пӑ нэӈәт,
\p
\v 15 щиты кӑшаӈ хŏйатԓаԓ вош хўлыйа ким тутԓысԓаԓ пӑ ŏԓты сŏхԓаԓа пӑ ŏԓтӑхайԓаԓа пŏныԓысԓаԓ, кўш кепа мŏхты шушты Петра исхŏрән ԓыв эԓтыԓаԓ мӑтты ŏт ат хойԓыса ԓуԓән.
\p
\v 16 Иерусалима ищиты ванән уԓты вошәт эԓты ар хŏйат, кӑшаӈ ŏтԓаԓ пӑ кўԉ сŏх тӑйты ŏтԓаԓ тўвман, ӑктәщисәт пӑ хŏԓ щитәт тўмтака йўвәнтысәт.
\s Апостоләт ԋӑрэмәты щирәт
\p
\v 17 Турма йир верты ŏх ики пӑ ԓўв пиԓәԓән хŏԓ, саддукейәт пеԓа уԓты мŏхет, ԓоԓәмты нŏмәсән тэкәтсайәт,
\p
\v 18 щӑԓта ԓыв апостоләт ԋӑрэмәсԓаԓ, пӑ ԓывиԓаԓ вошәӈ касна хота лӑп петсәԓаԓ.
\p
\v 19 Туп Турәм Куща ангел атәԓән касна хот овәт пелки пўшсәԓы пӑ, ԓывиԓаԓ ким тўвман, йастәс:
\p
\v 20 «Мӑнаты пӑ, Турәм Хотән, мир пеԓа хŏԓ тӑм йӑԓәп уԓәпса йасӈәт пŏтәртаԓән».
\p
\v 21 Ԓыв хуԓтмәсәт пӑ аԓәӈсӑхат Турәм Хота ԓŏксәт пӑ хŏйатәт утәԓтәсәт. Щи кўтән Турма йир верты ŏх ики пӑ ԓўв пиԓәԓән уԓәм ŏтәт йŏхәтмеԓән, синедрион пӑ Израиль пŏхәт эԓты уԓты ун икет хŏԓ вохсәԓаԓ пӑ касна хота апостоләт туты хŏйат китсәт.
\p
\v 22 Туп китыԓыйәм ŏтәт, йŏхәтмеԓән, ԓывиԓаԓ касна хотән ӑт уйәтсәԓәԓ пӑ, йŏхԓы йŏхәтмеԓән, йастәсәт,
\p
\v 23 пŏтәртман: «Касна хот мўӈ лӑп такан тухәрман уйәтсэв пӑ ов йэԓпийән ԓойты касна хот шавиты йохԓаԓ пиԓән; туп, пел пўшмевән, ԓыпийән нэмәԓты хŏйат ӑт уйәтсув».
\p
\v 24 Хун тӑм йасӈәт хуԓсәт Турма йир верты ŏх ики, Турәм Хот шавиты йох куща пӑ па Турма йир верты ŏх икет, ӑԓ щи нумәссәт: «А мўй тӑм».
\p
\v 25 А хŏй йŏхтәс пӑ ԓывиԓаԓа йастәс: «Щита щи, нын касна хота тухрыԓыйәм йохԓән, Турәм Хотән уԓԓәт пӑ мир утәԓтәԓәт».
\p
\v 26 Щиӈәԋща Турәм Хот шавиты йох куща ԓӑӈкәр йохԓаԓ пиԓән ԓынан ӑнта йур-вевән тусэԓ, мир эԓты пӑԓсәт, кевән ӑт ат сэксайәт, щишән.
\p
\v 27 Ԓывиԓаԓ тўвмеԓ йўпийән, синедрион хŏща ԓощәԓтәсԓаԓ; пӑ Турма йир верты ŏх ики ԓывиԓаԓ иԋщәссәԓы, пŏтәртман:
\p
\v 28 «Нынан мўӈ такан тӑм нэм эԓты утәԓтәты ӑт ат эсԓыԓысԓув? Тӑта щи, нын Иерусалим нын утәԓтәты щирԓәнән лӑп тэкәптәман пӑ Щи Хŏйат кӑԓы мўӈева нўра пŏнты ԓӑӈхаԓты».
\p
\v 29 Петра пӑ па апостоләт йŏхԓы йастәсәт: «Хŏйатәта пŏнман, мўӈев Турма аршәк хуԓәтты мосәԓ.
\p
\v 30 Мўӈ ащиԓув Турәм Иисус нŏх ԓыԓӈатәс, Хŏй нын, акԓа нŏх сэкман, пӑратсәԓән.
\p
\v 31 Ԓўвеԓ Турәм Ԓўв йошәԓән Кущайа пӑ Нŏх пайәтты Ŏта пŏтсәԓы Израильа кӑрэк эԓты шӑнша керԓәты щир пӑ кӑрэк йŏрэмәты щир мӑты урәӈән.
\p
\v 32 Ԓўв хŏщайәԓ иса тӑм вантәм ŏтәт мўӈ пӑ Йэмәӈ Ԓыԓ, Хŏйтаԓ Турәм щитәта мӑс, хŏй Ԓўвеԓа хуԓәтәԓ».
\p
\v 33 Тӑм хуԓман, ԓыв ԉик эԓты пелки тохты уратԓәт пӑ ԓывиԓаԓ пӑратты нумисысәт.
\p
\v 34 Мӑтты Гамалиил нэмпи фарисей, Закона утәԓтәты ху, мирән хŏԓ сӑмәӈа тӑйԓа, синедрионән нŏх ԓойман, апостоләт сора кеша ким тутԓыты партсәԓы,
\p
\v 35 ԓывиԓаԓа пӑ йастәс: «Израиль йох! Нын щирәнән тӑм хŏйатәт эԓты нумәсаты, мўй нынан ԓыв пиԓԓаԓән верты.
\p
\v 36 Тӑм йэԓпийәншәк Февда, ԓўвеԓ ԓўв а хŏй ԓӑтәӈ хŏйата, айәԓтман, ус, пӑ ԓўв хŏщайәԓ ԋӑԓсот кем хŏйат пиԓтәщәс; туп ԓўв пӑратса, пӑ хŏԓ, хŏй ԓўвеԓ хуԓәнтәс, лакки мӑтсәт пӑ сэм ўш эԓты петсәт.
\p
\v 37 Ԓўв йўпеԓән хŏйат ԓат щирән хӑншәм пŏрайән Галилея эԓты уԓты Иуда этәс пӑ йӑм арат мир ԓўв йўпеԓа хўщәс; туп ԓўв пӑрәс, пӑ хŏԓ, хŏй ԓўвеԓ хуԓәнтәс, лакки питсәт.
\p
\v 38 Ин па, нынана пŏтәртԓәм, пўӈԓа мӑнаты тӑм хŏйатәт эԓты пӑ ԓывиԓаԓ хӑйаԓән; тӑм вер – хŏйатәт эԓты ки, ԓўв лакки шўкаԓәԓ,
\p
\v 39 Турәм эԓты ки, нын ԓўвеԓ шўкатты ӑт верәтԓәԓән; шаващаты, нын Турәм йэщаԓт уԓты аԓт питԓәты».
\p
\v 40 Ԓыв ԓўвеԓа хуԓмәсәт; пӑ, апостоләт йŏхԓы вохмеԓ йўпийән, ԓывиԓаԓ сэкты партсәԓаԓ пӑ, Иисус нэм эԓты пŏтәртты ӑт эсәԓмеԓ йўпийән, ԓывиԓаԓ эсәԓсәԓаԓ.
\p
\v 41 Ԓыв пӑ синедрион эԓты мӑтсәт, амәтман, Турәм Куща Иисус нэм урәӈән нўр туты ўша питсәт.
\p
\v 42 Щӑԓта кашәӈ хӑтәԓ Турәм Хотән пӑ хотәтән Иисус Христос эԓты утәԓтәты пӑ Йӑм Айкеԓ туты ӑт вŏԓыԓысәт.
\c 6
\s Ԓапәт ԋотәп ху пирыты вер
\p
\v 1 Тӑм хӑтԓәтән, хун утәԓтыты хŏйат арамәс, грек йасәӈән пŏтәртты иудейәт йэврей йасәӈән пŏтәртты иудейәт пеԓа айәԓта ўшмащты питсәт, щи урәӈән, мўйа ԓыв шукаԓ имиԓаԓ кашәӈ хӑтәԓ ԓэтŏт орттыйән мŏхты хӑйԓайәт.
\p
\v 2 Щиӈәԋща кӑтхŏщйаӈ апостол, хŏԓ утәԓтәты йох йӑха ӑкәтман, йастәсәт: «Мўӈева йӑм хун, Турәм йасәӈ хӑйман, пӑсанәт пеԓа нумәсты.
\p
\v 3 Пӑ щӑԓта, хӑнам йох, нын кўтән эԓты ԓэрамтәм йӑм, Йэмәӈ Ԓыԓән пӑ ŏшән–щащән тэкнәм, ԓапәт хŏйат пирыйаты: ԓывиԓаԓ тӑм вер верты ԓощәԓтәԓув.
\p
\v 4 Мўӈ пӑ ивевән пойәк вер пӑ йасәӈ туты вер хŏща уԓты питԓув».
\p
\v 5 Пӑ тӑм йастәм щир хŏԓ ӑктәщәм мŏхета рӑхи ус; пӑ Стефан, эвәԓты щирән пӑ Йэмәӈ Ԓыԓән тэкнәм ху, пӑ Филипп, пӑ Прохор, пӑ Никанор, пӑ Тимон, пӑ Пармен, пӑ Антиохия вош эԓты уԓты Николай, прозелита\f + \fr 6:5 \fr*\fq прозелит \fq*\ft - словарьән ванты;\ft*\f* уԓәм ху, пирысайәт;
\p
\v 6 Ԓыв апостоләт йэщаԓт ԓощәԓтәсайәт, пӑ апостоләт пойәкщәсәт пӑ ԓыв нўмпиԓаԓа йошԓаԓ катәԓсәԓаԓ.
\p
\v 7 Пӑ Турәм йасәӈ лакки ԓӑрпиԓәс, пӑ утәԓтәты хŏйатәт Иерусалимән йӑма арамәсәт; пӑ Турма йир верты икет эԓты ар пеләк ŏтәт эвәԓты вер пеԓа пайтәссәт.
\s Стефан ԋӑрэмәты вер
\p
\v 8 Стефан пӑ, эвәԓты верән пӑ йурән тэкәнман, вŏԓаӈ вантыԓԓаӈәԓ верәт пӑ йэмәӈ посәт мир хŏща верәс.
\p
\v 9 Тухәԓ, щиты айәԓты Либертинәт, пӑ Киринейәт, пӑ Александрийәт иудейәт пойәкщәты хот эԓты уԓты мŏхет, пӑ тухәԓ Киликия пӑ Асия эԓты уԓты мŏхет, Стефан пиԓән ўра вортты питсәт;
\p
\v 10 туп ԓыв, Стефан Йэмәӈ Ԓыԓ йурән ŏшәӈа–щащәӈа пŏтәртәм щир йэщаԓт, нэмәԓты ԓощәԓтәты ӑт верәтсәт.
\p
\v 11 Щиӈәԋща ԓыв тухԓәт хӑԋайән йастәты утәԓтәсԓаԓ: «Мўӈ хуԓԓысэв, хŏты ԓўв нўрмәԓтты йасӈәт Моисей эԓты пӑ Турәм эԓты йастыԓыйәс».
\p
\v 12 Щӑԓта мир пӑ уна уԓты икет, пӑ Закона утәԓтәты икет хўщсайәт пӑ, ӑратман, ԓўвеԓ ԋӑрэмәсэԓ пӑ синедриона тусэԓ.
\p
\v 13 Щӑԓта ԋаԓмиты хŏйатәт этәԓтәсәт, хŏйтат пŏтәртсәт: «Тӑм хŏйат нўрасты йасӈәт Турәм Хот пӑ Закон пеԓа йастәты ӑт вŏԓыйәԓ.
\p
\v 14 Мўӈ хуԓԓысэв, хŏты ԓўв пŏтәртәс, мӑтты Назарет эԓты уԓты Иисус тӑм Турәм хот шўкатԓәԓы пӑ мўӈева Моисейән мийәм уԓәпса щирәт па щира верԓәԓы».
\p
\v 15 Пӑ хŏԓ, синедрионән опсәм ŏтәт, ԓўв пеԓайәԓ ватман, ԓўв вешәԓ ангел веш хŏрасән ватсэԓ.
\c 7
\s Стефан по̆тәр
\p
\v 1 Щиӈәԋща Турма йир верты ŏх ики Стефан иԋщәссәԓы: «Тӑми щиты а мўй?»
\p
\v 2 Туп ԓўв йастәс: «Хӑнам йох пӑ ащет! Хуԓәнтыйаты. Йэмәӈ нŏви Турәм мўӈ Авраам ащев хŏща Месопотамия мўвән этәс, Харран воша касәԓмаԓ йэԓпийән,
\p
\v 3 пӑ ԓўвеԓа йастәс: 'Нӑӈ мўвен эԓты пӑ нӑӈ рутэн эԓты пӑ нӑӈ ащен хот эԓты эта пӑ мӑты мўв нӑӈена аԉԓәм, щи мўва мӑна'.
\p
\v 4 Щиӈәԋща ԓўв Халдей мўв эԓты этәс пӑ Харран вошән уԓты хӑр ԓэщатәс; щиԓта пӑ, ԓўв ащеԓ пӑрмаԓ йўпийән, Турәм ԓўвеԓ тӑм мўва касԓәптәсԓы, хŏта ин нын уԓԓәты.
\p
\v 5 Пӑ ԓўвеԓа и кўр лоп арат йўкан тӑм мўвән ӑт мӑс. Туп Турәм ԓўвеԓа пӑ ԓўв ԋавремԓаԓа тӑм мўв тӑйты урәӈән мӑты йастәсԓы, щи пŏрайән хŏԓна Авраам и ԋавремийэ ӑт тӑйәс.
\p
\v 6 Щӑԓта Турәм ԓўвеԓ йастәс, ԓўв ԋавремԓаԓ па мўвән касԓәм хŏйатәта питԓәт пӑ па мўв хŏйатәта тынԓы-пелԓы рупата ԋўрты\fe + \fr 7:6 \fr*\fq рупата ԋўрты - шек такан пӑ ԓавәртан рупитты;\fq*\fe* питԓәт, щӑԓта йэрмәԓтты уԓәпсайән ԋӑԓсот кем тӑԓ уԓты питԓәт.
\p
\v 7 'Туп Ма', - Турәм йастәс, - 'щи мир хŏща сўт верԓәм, хŏй хŏща ԓыв тынԓы-пелԓы рупата ԋўрԓәт; пӑ щи йўпийән ԓыв щиԓта этԓәт пӑ тӑм уԓты тӑхайән Мӑнэма йир туты питԓәт'.
\p
\v 8 Пӑ Турәм Авраама эвәтты щир йастантәпса\f + \fr 7:8 \fr*\fq эвәтты щир йастантәпса \fq*\ft - словарьән ванты;\ft*\f* мӑс. Авраам Исаак сэма пайтәс пӑ ԋийәԓмет хӑтәԓән эвәтты верән версәԓы; Исаак Иаков сэма пайтәс, Иаков пӑ – кӑтхŏщйаӈ опращ икет.
\p
\v 9 Ун ԓӑтәӈ опращ икет, сӑмԓаԓ щариты пӑтыйән, Иосиф Египта тынысэԓ; туп Турәм ԓўв пиԓәԓән ус,
\p
\v 10 пӑ ԓўвеԓ иса кӑмән хŏрпи шук эԓты хŏԓт павәтсәԓы, пӑ ŏш–щащ пӑ фараон, Египет хон йӑм сӑм ԓўвеԓа мойԓәсԓы, щи хонән ԓўв Египет хŏща пӑ ԓўв хон хотәԓ хŏща иса кущайа пŏтса.
\p
\v 11 Щӑԓта ԓэԓԓы пŏра пӑ ун шук Египет пӑ Ханаан мўвӈән ԓŏвата иса йŏхтәс, пӑ мўӈ ащиԓув ԓэтŏт ӑт уйтыԓысәт.
\p
\v 12 Иаков пӑ, Египетән ԋаԋ ԓат сэм уԓты хуԓмаԓ кемән, мўӈ ащиԓув оԓәӈмет пўш щи китсәԓы.
\p
\v 13 Хун кимет пўш [ԓыв тŏхи йŏхәтсәт], Иосиф ԓўв йайԓаԓа аԉәсәс, пӑ Иосиф рут фараон хонән уйәтты питса.
\p
\v 14 Щи йўпийән Иосиф ԓўв Иаков ащеԓ пӑ хŏԓ ԓўв рутԓаԓ вохты партсәԓы, ԋийәԓйаӈ пеԓа вет арат хŏйат ус.
\p
\v 15 Иаков Египта ўншәс, пӑ щита пӑрәс пӑ мўӈ ащиԓув па;
\p
\v 16 Пӑ Сихем воша тўвман пӑ хŏшапәӈ кев ԓыпийа\f + \fr 7:16 \fr*\fq хŏшапәӈ кев ԓыпийа \fq*\ft - щит ԓэԓтŏт, хŏԓта пӑрәм хŏйат пŏнԓа;\ft*\f* пŏнман усайәт, щи тӑха Авраам щелŏхән Сихемән уԓты Еммор пŏхәт эԓты ԓутсәԓы.
\p
\v 17 Щи мŏртән, хун аԉәм вер тӑԓаӈа йиты пŏра ванамәты питәс, мўй эԓты Турәм Авраама так йасәӈ мийԓыйәс, мирәԓ Египетән энмәԓтыйәс пӑ арамийәс,
\p
\v 18 щи унты, хун па хон питәс, хŏй Иосиф ӑт уйәтсәԓы.
\p
\v 19 Ԓўв, мўӈ рутэв йэщаԓт ŏщмарԓыман, мўӈ ащиԓув йэрмәԓтысԓы, ԓывиԓаԓа ай ԋавремԓаԓ йовәԓты партсәԓы, ԓыԓӈа ӑт ат хӑщсәт.
\p
\v 20 Тӑм пŏрайән Моисей сэма питәс, Турәм йэԓпийән хŏрасәӈ ус. Хуԓәм тыԓәщ ԓўв ащеԓ хотән эсәмән ԓапәтман ус.
\p
\v 21 Хун вŏщкәса, фараон эвийән ўса пӑ ԓўв хŏщайәԓ, ԓўв пŏхәԓ иты, энмәԓтсәԓы.
\p
\v 22 Пӑ Моисей аратәԓ иса Египет ŏша–щаща утәԓтәма ус, йасәӈԓаԓән пӑ верԓаԓән йўрәӈ ус.
\p
\v 23 Хун пӑ ԓўв ԋӑԓйаӈ тӑԓа йис, ԓўв хӑнам йохԓаԓ, Израиль пŏхәт, хŏща йӑхты нŏмәсән йŏхәтса.
\p
\v 24 Пӑ, ԓыв эԓтыԓаԓ ит, атмащ йэшаԓәты кащаԓәмаԓ кемән, эԓт питсәԓы. Пӑ кетмәм ŏт урәӈән Египет ху пӑратсәԓы.
\p
\v 25 Моисей нумәсәс, ԓўв хӑнам йохԓаԓ ŏша пайәтԓәԓаԓ, ԓўв йошәԓ сӑхат ԓывиԓаԓа Турәм нŏх пайтәсты щир мӑԓ; тўп ԓыв ŏша ӑт пайәтсэԓ.
\p
\v 26 Кимет хӑтәԓ, хун ԓыв эԓтыԓаԓ кӑтән кўтәрмәстән, ԓўв йŏхтәс пӑ ԓынан йӑм щира уԓты пеԓа хўщиԓысԓы, пŏтәртман: «Нын – хӑнам йохӈән; мўйа кўтԓәнән йэшащԓәтән?»
\p
\v 27 Туп рутәԓ йэшаԓәты ŏт ԓўвеԓ йэԓ пŏткәсԓы, йастәман: 'Хŏйән нӑӈ мўӈ нўмпева кущайа пӑ сўт икийа пŏтсайән?
\p
\v 28 Нӑӈ мосәӈ мӑнэм па веԓты ԓӑӈхаԓән, хŏты мŏԓхатәԓ Египет ху веԓсэн?'
\p
\v 29 Тӑм йасӈәт эԓты Моисей хŏнтас пӑ Мадиам мўв хŏща йŏхтәм хŏйата йис, щита ԓўв эԓтэԓ кӑт пŏх сэма питәс.
\p
\v 30 Ԋӑԓйаӈ тӑԓәԓ тэкнәм йўпийән Синай кев таԓ хишәӈ мўвән тўтән ԓэты пеԓантыты варәс похәл кўтән Моисей йэщаԓт Турәм Куща ангел этәс.
\p
\v 31 Моисей, щит шийаԓәмаԓ кемән, щи ныты ŏт эԓты пакнысыйәс; хун йӑма вантыты урәӈән, вана шушәс, ԓўв Турәм Куща тўр сый хуԓмәс:
\p
\v 32 'Ма нӑӈ ащиԓан Турәм, Авраам Турәм пӑ Исаак Турәм пӑ Иаков Турәм'. Моисей, хŏрщәм эԓты тӑрыман, йэщаԓт ватты ӑт веритәс.
\p
\v 33 Щӑԓта Турәм Куща ԓўвеԓа йастәс: 'Нӑӈ кўрԓан эԓты ԓумтәмен хŏԓт эӈхи, щи тӑха, хŏта нӑӈ ԓойԓән - щит йэмәӈ мўв.
\p
\v 34 Ма Египетән Ма мирэм шукатты вер ватԓәм, пӑ ԓўв эӈәԓты сыйәԓ хуԓԓәм, пӑ ԓўвеԓ хŏԓт пайәтты иԓ эсԓәщсәм: Щиӈәԋща, мӑна, Ма нӑӈен Египта китԓэм'.
\p
\v 35 Тӑм Моисей, хŏй ԓыв вана ӑт ўсэԓ, йастәман: 'Хŏйән нӑӈ мўӈ нўмпева кущайа пӑ сўт икийа пŏтсайән?' Турәм кущайа пӑ хŏԓт пайәтты ŏта китсәԓы ангеләԓ сӑхат, хŏй ԓўвеԓа пеԓантыты варәс кўтән этԓыйәс.
\p
\v 36 Тӑм Моисей Египет мўвән, пӑ Ўрты щарәсән, пӑ таԓ мўвән вантыԓԓаӈәԓ верәт пӑ йэмәӈ посәт ԋӑԓйаӈ тӑԓ хўват верман, ԓывиԓаԓ Египет эԓты йэԓ тусԓы.
\p
\v 37 Тӑми щи Моисей, хŏй Израиль пŏхәта йастәс: 'Турәм айкеԓ туты хŏйат нынана Турәм Куща нын Турмән нын хӑнам йохԓән кўт эԓты ма итэмән мӑԓ; Ԓўвеԓ хуԓәнтаты'.
\p
\v 38 Тӑми щит, хŏй таԓ мўвән ӑктәщәм Израиль мир хŏща ангел пиԓән пӑ мўӈ ащиԓув пиԓән ус, ангел Синай кев ԓоӈәԓән ԓўв пеԓайәԓ пŏтәртәс, пӑ ԓўв ԓыԓәӈ йасӈәт вана ўсԓы, мўӈева мӑты урәӈән,
\p
\v 39 хŏй пеԓа мўӈ ащиԓув хуԓәтты ŏтәта уԓты ӑт ԓӑӈхасәт, ԓўвеԓ пўӈԓа хирәтсэԓ пӑ ԓўв сӑмԓаԓән Египет пеԓа керԓәсәт,
\p
\v 40 Аарона йастәман: 'Мўӈева ԓуӈхәт вера, хŏйтат мўӈ йэԓпевән ԓуԓән ат мӑтсәт ; Моисей, мўӈев Египет мўв эԓты йэԓ тувәм ŏтэв, ӑт уйәтԓэв, хŏты йис'.
\p
\v 41 Пӑ щи хӑтԓәтән мис хŏр версәт, пӑ щи ԓуӈха йир тусәт, пӑ ԓыв йошԓаԓән верәм вер йэԓпийән каш версәт.
\p
\v 42 Турәм пӑ шӑшән керԓәс пӑ ԓывиԓаԓ турәм хӑр пŏрмасәт пеԓа пойәкщәты хӑйсәԓы, хŏты Турәм айкеԓ туты хŏйатәт нэпекән хӑшман уԓԓа: 'Израиль хот! Нын мўй войәт пӑ йирәт ԋӑԓйаӈ тӑԓ сыс таԓ мўв хŏща Мӑнэма тутԓысты?
\p
\v 43 Нын Молох ԓух хӑшап пӑ Ремфан нэмпи хус ԓуӈхән\f + \fr 7:43 \fr*\fq Ремфан нэмпи хус ԓух \fq*\ft - ԓўв иԓампа Сатурн нэмпи хус хŏр тӑйәс;\ft*\f*, нын верәм хŏрԓән, пӑтән ўсԓән, ԓывиԓаԓа пойәкщәты урәӈән: пӑ Ма нынан Вавилон эԓты йэԓшәк касԓәптәԓԓам'.
\p
\v 44 Вантәм ŏт Йэмәӈ Хӑшап\f + \fr 7:44 \fr*\fq Вантәм ŏт Йэмәӈ Хӑшап \fq*\ft - словарьән ванты;\ft*\f* мўӈ ащиԓув хŏща таԓ мўвән ус, хŏты Пŏтәртәм Ŏт Моисейа ԓўвеԓ верты партсәԓы, щи ԓўв вантәм ŏтәԓ хŏрпийа.
\p
\v 45 Щи Йэмәӈ Хӑшап, йоша пайәтмеԓ йўпийән, мўӈ ащиԓув, Иисус Навин ԓыв хŏщайэԓ ŏха уԓман, мирәт тӑйты мўва ԓŏӈәԓсэԓ, Турәм, ԓыв йэԓпеԓән, мўвәӈ хŏйатәт воштәсԓы. Тӑмиты Давид хӑтԓәт унты ус.
\p
\v 46 Тӑми Турәм хŏща йӑм мŏщатәс пӑ пойәкщәс, Иаков Турма уԓты тӑха ԓэщатты урәӈән.
\p
\v 47 Соломон пӑ Ԓўвеԓа хот опсәс.
\p
\v 48 Туп Нўм Ащи ӑнтом йошән опсәм хотәтән уԓ, хŏты Турәм айкеԓ туты хŏйат пŏтәртәԓ:
\p
\v 49 'Турәм хӑр – ма хон омәсты тӑхайэм, пӑ мўв – Ма кўр иԓпем. Мўй хŏрпи хот Мӑнэма верԓәты, Турәм Куща пŏтәртәԓ, мўй хŏрпи тӑхайән Ма щўтщәты верем уԓ?
\p
\v 50 Ӑнта мўй Ма йошем тӑм иса тыйәԓтәс?'
\p
\v 51 Нын - ўрайәӈ ŏтәт! Ӑт эвтәм сӑмпи пӑ ӑт эвтәм пӑԓпи хŏйатәт\fe + \fr 7:51 \fr*\fq Ӑт эвтәм сӑмпи пӑ ӑт эвтәм пӑԓпи хŏйатәт \fq*\ft - Турма ӑт хуԓәтты, ӑт эвәԓты хŏйатәт;\ft*\fe*! Нын иса Йэмәӈ Ԓыԓ йэщаԓт уԓԓәты, хŏты нын ащиԓән, щиты нын па.
\p
\v 52 Турәм айкеԓ туты хŏйатәт эԓты нын ащиԓәнән хŏй ӑт воштәса? Ԓыв Вещкат Ŏт йŏхәтты айкеԓ йэԓпи йастәм ŏтәт веԓсәԓаԓ, Хŏй хŏща хŏйат аԉты пӑ веԓты ŏтәта ин нын верәссәты, –
\p
\v 53 нынана ангеләт сӑхат мийәм Закон вана ўйман йўпийән, нын ӑт шависԓын».
\s Стефан пӑратты вер
\p
\v 54 Тӑм хуԓәтман, ԓыв ԉикән кавәрмәсайәт пӑ ԓўв пеԓайәԓ пекԓаԓән йухрәԓсәт.
\p
\v 55 Стефан пӑ, Йэмәӈ Ԓыԓән тэкәнман уԓман, турәм хӑр пеԓа ӑӈкәрмәс, Турәм хутԓәты–вŏрԓәты щир пӑ Иисус, Турәм йӑм пеләк сӑхат ԓойтаԓ шийаԓәс,
\p
\v 56 пӑ йастәс: «Тӑм, лоӈхемәм опәԉ пӑ Хŏйат Пŏх, Турәм йӑм пеләк сӑхат ԓойтаԓ ма ватԓәм».
\p
\v 57 Туп ԓыв, сыйәӈ тўрән уваԓтман, пӑԓаԓ лӑп катәԓсәԓаԓ, пӑ и сӑмән ԓўв хŏщайәԓ ӑратсәт,
\p
\v 58 пӑ, вош ким пелка тувман, кевән ԓўвеԓ йовәԓты питсэԓ. Вантәм хŏйатәт пӑ ԓыв ԓумәтты сŏхԓаԓ Савл нэмпи, айкам ху кўрнат шŏма пŏтсәԓаԓ,
\p
\v 59 пӑ Стефан кевән йовәԓсэԓ, ԓўв пойәкщәс пӑ пŏтәртәс: «Турәм Куща Иисус! Ма ԓыԓэм ўйи».
\p
\v 60 Пӑ, шашӈәԓаԓ иԓ морәтман, сыйәӈ тўрән ўваԓтәс: «Турәм Куща! Ԓывиԓаԓа тӑми кӑрека аԓ нуми». Щӑԓта, щит йастәмаԓ кемән, пӑрәс.
\c 8
\s Савл пойәкщәты хŏйатәт ԋухәтԓыԓԓы
\p
\v 1 Савл пӑ Стефан пӑратты вер пеԓа такан ус. Щи хӑтԓәтән Иерусалимән пойәкщәты хŏйатәт ӑктәщиты вер пеԓа вŏԓаӈ ун ԋухәтԓыты щир тыйәс; пӑ хŏԓ, апостоләт тўмпийән, Иудея пӑ Самария ԓŏвата лакки мӑтсәт.
\p
\v 2 Стефан пӑ Турма эвәԓты хŏйатәтән иԓ лоттәса пӑ ԓўв урӈәԓән вŏԓаӈ ун хоԓԓәп хоԓԓәса.
\p
\v 3 Савл пӑ пойәкщәты хŏйатәт йэшаԓәс, хотәта ԓŏӈтыман, йох пӑ нэӈәт ԋӑрэмәман, касна хота мийԓысԓы.
\s Йӑм Айкеԓ Самарияйа туты вер
\p
\v 4 Щи кўтән лакки мӑнәм ŏтәт йӑӈхиԓысәт пӑ Йӑм Айкеԓ тутԓысәт.
\p
\v 5 Щиты, Филипп Самария мўв воша йŏхтәс пӑ Христос эԓты пŏтәртәс.
\p
\v 6 Мир и сӑмән хуԓәтсәт щит пеԓа, мўй Филипп пŏтәртәс, хуԓман пӑ ватман, мўй хŏрпи вантыԓԓаӈәԓ верәт ԓўв верәс.
\p
\v 7 Катәԓман уԓәм ар хŏйат эԓты кўԉ сŏхәт такан щӑлыман, ким этыԓысәт, ар пеләк щащԓы питәм ŏтәт пӑ нохты хŏйатәт тўмтака йўвиԓысәт.
\p
\v 8 Щӑԓта щи вошән вŏԓаӈ ун амәт ус.
\p
\v 9 Щи вошән ий ики ус, нэмәԓән Симон, хŏй щи йэԓпийән щӑртыԓыйәс, ԓўвеԓ ԓўв ԓӑтәӈ хŏйата айәԓман, Самария мир пакнәптыйәс.
\p
\v 10 Ԓўвеԓа айэԓ-унэԓән хŏԓ хуԓәтсәт, йастәман: «Тӑм – Турәм вŏԓаӈ йур».
\p
\v 11 Ԓўвеԓа щи пӑтыйән хуԓәтсәт, ԓўв ԓывиԓаԓ щӑртԓаԓән мŏԓты хўват пакнәптысԓы.
\p
\v 12 Туп хун Филиппа, Турәм Хон Уԓәпса пӑ Иисус Христос нэм эԓты Йӑм Айкеԓ пŏтәртты ŏта, эвәԓсәт, йох пӑ нэӈәт кашащсәт, йиӈка ат ԓŏӈәԓтысайәт.
\p
\v 13 Симон ԓўв па эвԓәс пӑ, йиӈка ԓŏӈәԓтыйәм йўпийән, Филипп эԓты пўӈԓа ӑт мӑныԓыйәс; пӑ, ԓӑтәӈ вантыԓԓаӈәԓ йурәт пӑ йэмәӈ посәт ватман, ӑԓ пакнысыйәс.
\p
\v 14 Иерусалимән уԓты апостоләт, Самария хŏйатәт Турәм йасәӈ вана ўйәм айкеԓ хуԓмеԓ кемән, Петра пӑ Иоанн ԓыв хощайэԓ китсәт,
\p
\v 15 ԓын, йŏхәтман кемән, ԓыв урәӈԓаԓән пойәкщәсӈән, ԓыв Йэмәӈ Ԓыԓ ԓуԓән вана ат ўсәт.
\p
\v 16 Йэмәӈ Ԓыԓ хŏԓна ԓыв эԓтыԓаԓ ита нэш ӑт эсԓыщийәс, туп ԓыв Турәм Куща Иисус нэм хўватән йиӈка ԓŏӈәԓтыман усайәт.
\p
\v 17 Щишән ԓыв эԓтыԓаԓа йошԓән пŏтсәԓән, пӑ ԓыв Йэмәӈ Ԓыԓ вана ўсэԓ.
\p
\v 18 Симон пӑ, Йэмәӈ Ԓыԓ апостоләт йош пŏнты сӑхат мӑты щир шийаԓәмаԓ кемән, ԓынана ŏх тус,
\p
\v 19 щиты пŏтәртман: «Мӑнэма па тӑм йур мийатән, щи хŏйат, хŏй эԓты ма йошԓам пŏнԓәԓам, Йэмәӈ Ԓыԓ ат ўс».
\p
\v 20 Туп Петра ԓўвеԓа йастәс: «Нӑӈ щелŏхен нӑӈ пиԓэнән сŏрма ат йиԓ, нӑӈ Турәм мŏйԓәпса ŏх сӑхат мŏщатты нумәссән, щишән.
\p
\v 21 Нӑӈена тӑми хŏща нэмәԓт шўк пӑ пирыйәм вер ӑнтом, нӑӈ сӑмен Турәм пеԓа ӑнта вещкат.
\p
\v 22 Щиӈәԋща, тӑм кӑрэкен эԓты шӑнша керԓа пӑ Турма пойәкща: мосәӈ нӑӈ атәм нŏпсэн нӑӈена хŏԓт йŏрэмәԓа;
\p
\v 23 Нӑӈен вŏщрэм сыпән тэкәнман иты пӑ ӑнта вещкат щирәтән йӑрман иты ватԓэм».
\p
\v 24 Симон пӑ йŏхԓы йастәс: «Ма урӈема Турәм Кущайа пойәкщаты, ма, нын йастәм ŏтԓән щира, нэмәԓтыйән ӑт ат хойсайәм».
\p
\v 25 Ԓын пӑ, вантәм ŏтәта уԓман пӑ Турәм Куща йасӈа утәԓтәман, йŏхԓы, Иерусалима, мӑтсәтән пӑ ар Самария вошәтән–куртәтән Йӑм Айкеԓ эԓты пŏтәртсәтән.
\s Ефиопия нэ хон куща йиӈка ԓŏӈәԓтыты вер
\p
\v 26 Турәм Куща ангел пӑ Филипп пеԓа йастәс: «Ԓойа пӑ мӑна хӑтәԓ кутәп пŏра шŏма\f + \fr 8:26 \fr*\fq хӑтәԓ кутәп пŏра шŏма \fq*\ft - нўм вот пеләк пеԓа\ft*\f*, Иерусалим эԓты Газайа мӑнты таԓ йуш хŏща».
\p
\v 27 Ԓўв ԓойәс пӑ мӑнәс. Щӑԓта ин, Ефиоп мўвәӈ евнух\f + \fr 8:27 \fr*\ft евнух - Египетән пӑ Ефиопияйән тухәԓ йох хŏйатәт хŏща хоптыйәм ху\ft*\f* ики, Ефиопия нэ хон Кандакия\f + \fr 8:27 "\fr*\fq Кандакия" \fq*\ft - щи нэмән Эфиопия хон нэӈәт айәԓтсайәт, хŏты "фараон" нэмән хŏԓ Египет хонәт айәԓтсайәт.\ft*\f* куща, ԓўв сорԋиԓаԓ шавиты куща ху, Иерусалима пойәкщәты урәӈән йŏхтыԓыйәс,
\p
\v 28 йŏхԓы мӑнмаԓән пӑ, ԓўв ухԓәԓән омәсман, Турәм айкеԓ туты хŏйат Исаия хӑншәм нэпек ԓўӈтәс.
\p
\v 29 Ԓыԓ Филиппа йастәс: «Тӑм ухәԓ ԉэпа вана мӑна пӑ ԓўв пўӈԓәԓән шуша».
\p
\v 30 Филипп вана йŏхтәс пӑ, тўмеԓ Турәм айкеԓ туты хŏйат Исаия хӑншәм нэпек ԓўӈәтмаԓ, хуԓмаԓ кемән, йастәс: «Нӑӈ мўй уйәтԓэн, мўй ԓўӈәтԓән?»
\p
\v 31 Ԓўв йастәс: «Мўй щирән уйәтԓэм, мӑтты ŏтән ӑт аԉԓайәм ки?» Пӑ Филипп нŏх хухты пӑ ԓўв пўӈԓәԓа омәсты партсәԓы.
\p
\v 32 Хӑншәм Ŏт хŏща ԓўӈтәм тӑхайәԓ щит ус: «Ош иты Ԓўв хŏртыйа тўвман ус, пӑ, ош пŏшәх иты ԓўвеԓ ԓŏртты ŏтәԓ йэԓпийән тўр сыйԓы уԓ, щиты щи Ԓўв ўӈԓәԓ пелки ӑт пўшԓәԓы.
\p
\v 33 Ԓўв иԓ ԋэрәм щирән Ԓўв сўтәԓ йэтшәс. Туп Ԓўв рутәԓ хŏйән эԓпа аԉԓа? Ԓўв уԓәпсайәԓ мўв эԓты нŏх лакәптәԓа».
\p
\v 34 Евнух пӑ Филипп пеԓа йастәс: «Нӑӈ щи ԓŏват йӑм вера, йаста: хŏй эԓты Турәм айкеԓ туты хŏйат тӑми пŏтәртәԓ? Ԓўв эԓтэԓ мўй пӑ па хŏйат эԓты?»
\p
\v 35 Филипп ўӈԓәԓ пел пўшсәԓы пӑ, тӑм Хӑншәм Ŏт эԓты ўйман, ԓўвеԓа Иисус эԓты Йӑм Айкеԓ тус.
\p
\v 36 Щи кўтән, йэԓԓы мӑнтан эԓты, ԓын йик ԉэпа йŏхәтсәтән; пӑ евнух ики йастәс: «Тӑта щи йик; мӑнэма нӑӈ эԓтэн йиӈка ԓŏӈәԓтыты мўй тŏрас верәԓ?»
\p
\v 37 Филипп пӑ ԓўвеԓа йастәс: «Сӑмен ԓоватән эвәԓԓән ки, рӑхәԓ». Ԓўв йŏхԓы йастәс: «Эвәԓԓәм, Иисус Христос – щит Турәм Пŏх».
\p
\v 38 Щӑԓта ухәԓ иԓ вŏԓыты партсәԓы, пӑ , Филипп пӑ евнух ики кинәӈтак йиӈка ŏхәԓсәтән; пӑ ԓўвеԓ йиӈка ԓŏӈәԓтысԓы.
\p
\v 39 Хун пӑ ԓын йик эԓты ким этсәтән, Йэмәӈ Ԓыԓ евнух ики эԓты эсԓәщәс, Филипп пӑ Турәм Куща ангелән аԓэмәса, пӑ евнух ики ԓўвеԓ ўш ӑт ватсәԓы, пӑ, амәтман, йушәԓ йэԓԓы мӑтсәԓы.
\p
\v 40 Филипп пӑ Азотән ԉикмантәс пӑ, мŏхты шушман, вошәтән иса Йӑм Айкеԓ эԓты пŏтәртәс, Кесарияйа йŏхәтмаԓ унты.
\c 9
\s Савл Иисуса эвәԓты питты щир
\p
\v 1 Савл пӑ, Турәм Куща утәԓтәты хŏйатәт пеԓа ԉикән кавәрман пӑ веԓтатты номәсән тэкәнман, Турма йир верты ŏх ху хŏща йŏхтәс
\p
\v 2 пӑ ԓўв эԓтэԓ айкеԓ нэпек Дамаск вош иудейәт пойәкщәты хотәт урәӈән вохәс. Ԓўв хŏй, тӑм утәԓтәты вер йўпи туты хŏйат, уйәтәԓ, йохәт мўй пӑ нэӈәт мŏщатты пӑ Иерусалима йŏхтәптәты ат верәтсәԓԓы.
\p
\v 3 Хун йушән ԓўв Дамаск воша ванамәты питмаԓән, шӑмкапан турәм хӑр эԓты ԓўв нŏвийән похәтса.
\p
\v 4 Ԓўв мўва иԓ рӑкнәс пӑ тўр сый хуԓтмәс, ԓўв пеԓайәԓ пŏтәртты сый: «Савл, Савл! Мўйа Мӑнэм ԋухәԓԓэн?»
\p
\v 5 Ԓўв йастәс: «Хŏй Нӑӈ, Турәм Куща?» Турәм Куща пӑ йастәс: «Ма Иисус, Хŏйтэн нӑӈ ԋухәԓԓән. Нӑӈен карты йущәӈ йўх йэщаԓт мӑнты ԓавәрт».
\p
\v 6 Ԓўв, тӑрыман пӑ пӑԉщәмән иԉапман, йастәс: «Турәм Куща! Мўй верты мӑнэм партԓэн?» Щӑԓта Турәм Куща ԓўвеԓа йастәс: «Нŏх ԓойа пӑ воша мӑна; пӑ нӑӈена йастәԓа, мўй нӑӈен верты мосәԓ».
\p
\v 7 Ԓўв пиԓәԓән шушәм хŏйатәт пӑ сӑм мӑнман ԓойсәт, тўр сый хуԓман, пӑ нэмәԓты хŏйат ӑт шийаԓәман.
\p
\v 8 Савл мўв эԓты нŏх ԓойәс пӑ пелки сэмән ԓўвеԓа нэмәԓты ӑт ныса. Щӑԓта йош пелкәԓ эԓты катәԓман туты питса, пӑ Дамаск воша йŏхтәптәса.
\p
\v 9 Щӑԓта хуԓәм хӑтәԓ ԓўвеԓа нэмәԓт ӑт ныса, пӑ ӑт ԓэс, пӑ ӑт йиԋщәс.
\p
\v 10 Дамаскән и утәԓтәты хŏйат ус, нэмәԓән Анания; пӑ Анания вантәм верәԓ хŏща Турәм Куща ԓўвеԓа йастәс: «Анания!» Ԓўв йастәс: «Тӑм Ма, Турәм Куща».
\p
\v 11 Турәм Куща пӑ ԓўвеԓа йастәс: «Ԓойа пӑ, щиты айәԓтты Тўӈ вош хўлыйа, мӑна, пӑ Иуда хот хŏща Тарс вошәӈ ху иԋщәсы, нэмәԓән Савл; ԓўв ин пойәкщәԓ.
\p
\v 12 Пӑ вантәм верәԓ хŏща Анания нэмпи ху вантәс, ԓўв хŏйщайәԓ йŏхәтәԓ пӑ ԓўв эԓтэԓ йошәԓ пŏнԓәԓы, ԓўв сэмәӈа ат йис».
\p
\v 13 Анания йŏхԓы йастәс: «Турәм Куща! Ма ар хŏйат эԓты тӑм хŏйат эԓты хуԓԓысэм, мўй арат атәм ԓўв Нӑӈ хŏйатԓана Иерусалимән верәс;
\p
\v 14 Тӑта па Турма йир верты ŏх икет эԓты хŏԓ, Нӑӈ нэмен вохты хŏйатәт йӑрты, йур тайәԓ».
\p
\v 15 Туп Турәм Куща ԓўвеԓа йастәс: «Мӑна, ԓўв Ма пирыйәм пўтэм, Ма нэмем мир пӑ хонәт пӑ Израиль пŏхәт йэщаԓт такан йастәты урәӈән.
\p
\v 16 Пӑ Ма ԓўвеԓа этәԓтәԓэм, мўй арат Ма нэмем урәӈән ԓўвеԓа шукащты мосәԓ».
\p
\v 17 Анания мӑнәс пӑ хота ԓŏӈәс, йошӈиԓаԓ ԓўв эԓтэԓ пŏнман, йастәс: «Савл хӑнам ху! Йушән, хŏԓща нӑӈ шушсән, нӑӈ хŏщайэн этԓыйәм Турәм Куща Иисус, мӑнэм китсәԓы, нӑӈ сэмәӈа ат йисән пӑ Йэмәӈ Ԓыԓән ат тэкәтсайән».
\p
\v 18 Пӑ щи пўԉаӈ сэмӈиԓаԓ эԓты ищи мӑтты сом хŏԓт рӑкнәс, пӑ ԓўв шамкапан сэмәӈа йис; нŏх ԓойәс пӑ йиӈка ԓоӈәԓтыса,
\p
\v 19 щӑԓта, ԓэтŏт ԓэвмаԓ йўпийән, такамәс.
\s Савл Дамаск вошән Иисус эԓты Йӑм Айкеԓ туты вер
\p Пӑ Савл кӑмәтса хӑтәԓ утәԓтәты йох пиԓән Дамаскән ус.
\p
\v 20 Пӑ щи пўԉаӈ иудейәт пойәкщәты хотәтән Иисус эԓты айкеԓ туты питәс, «Ԓўв – Турәм Пŏх».
\p
\v 21 Щӑԓта хŏԓ хуԓәнтәм хŏйатәт аԓ пакнысысәт пӑ пŏтәртсәт: «Тӑм ӑнта мўй щит, хŏй Иерусалимән тӑм нэм вохты ŏтәт воштыԓыйәс? Йӑна щи пӑ щи урәӈән ты йŏхтәс, ԓывиԓаԓ мŏщатты пӑ Турма йир верты ŏх икет хŏща туты».
\p
\v 22 Савл пӑ щи киԋща па такамтыйәс пӑ Дамаскән уԓты иудей йох ԓыԓԓәты унты йŏхтәптәсԓы, такан аԉман, Тӑми – Христос\f + \fr 9:22 \fr*\fq Христос \fq*\ft -словарьән ванты;\ft*\f*.
\p
\v 23 Хун пӑ йӑм арат хӑтәԓ хӑщәм йўпийән, иудей йох ԓўвеԓ пӑратты нŏмәс версәт.
\p
\v 24 Туп Савл ԓыв тӑм нŏпсэԓ мŏштәсԓы. Ԓыв пӑ атаӈ хӑтәԓ вош пушас ов хŏща ԓавԓәссәт, ԓўвеԓ веԓты урәӈән.
\p
\v 25 Утәԓтыты йох пӑ атәԓән, ԓўвеԓ ўсэԓ пӑ вош кертәм пӑԓ пушас эԓты кураԋэк ԓыпийән иԓ эсәԓсэԓ.
\s Савл Иерусалимән
\p
\v 26 Савл Иерусалима йŏхтәс пӑ утәԓтыты хŏйатәт хŏща ԓŏӈты ўратәс; туп хŏԓ ԓўв эԓтайәԓ пӑԓсәт, ԓўв утәԓтыты хŏйата уԓтыйа, ӑт эвәԓԓа.
\p
\v 27 Варнава пӑ ԓўвеԓ ўсԓы пӑ апостоләт хŏща тусԓы пӑ ԓывиԓаԓа пŏтәртсәԓы, хŏты йуш хŏща ԓўв Турәм Куща ватсәԓы, пӑ мўй ԓўвеԓа Турәм Куща пŏтәртәс, пӑ хŏты ԓўв Дамаскән, ӑт пӑԓман, Иисус нэм урәӈән айкеԓ тус.
\p
\v 28 Щӑԓта ԓўв ԓыв пиԓԓаԓән ус, лыпаща Иерусалим ԓŏватән йӑӈхиԓыйәс пӑ Турәм Куща Иисус нэм урәӈән ӑт пӑԓман айкеԓ тус.
\p
\v 29 Ищиты грек йаcәӈән пŏтәрты иудейәт пиԓән пŏтәртәс пӑ ўра вортәс; ԓыв пӑ ԓўвеԓ веԓты ўтщисэԓ.
\p
\v 30 Хӑнам йохԓаԓ, тӑми мŏштәмеԓ кемән, Кесарияйа ԓўвеԓ тусэԓ пӑ Тарс воша китсэԓ.
\p
\v 31 Пŏйәкщәты мŏхет пӑ Иудея мўв ԓŏватән, Галилея пӑ Самария ԓŏватән рома усәт, утәԓтыман пӑ Турәм Куща эԓты пӑԓман усәт; щӑԓта Йэмәӈ Ԓыԓән такапман, арамисәт.
\s Петра Лиддайән пӑ Иоппияйән
\p
\v 32 Щиты тыйәс, Петра, хŏԓ мŏхет лӑп йӑхман, Лидда вошән уԓты эвәԓты мŏхет хŏща йŏхтәс.
\p
\v 33 Щита ԓўв Энея нэмпи и хŏйат уйтәс, хŏй ԋийәԓ тӑԓ ŏԓттӑхайәԓән, щащԓы питман, ŏԓәс.
\p
\v 34 Петра ԓўвеԓ йастәс: «Эней! Нӑӈ Иисус Христосән тўмтака верԓайән; ŏԓттӑхайэн эԓты нŏх ԓойа». Пӑ ԓўв ищи мŏхты нŏх ԓойәс.
\p
\v 35 Пӑ ԓўв Лиддайән пӑ Саронән уԓты хŏйатәтән хŏԓ ватса, пӑ Турәм Куща пеԓа ӑӈкәртсәт пӑ эвәԓсәт.
\p
\v 36 Иоппия вошән и утәԓтәты нэ ус, нэмәԓ Тавифа - щит «газель\f + \fr 9:36 \fr*\fq газель \fq*\ft - щит хошәм мўвән уԓты ўԓы;\ft*\f*»; ԓўв сӑмәӈ верәтән тэкәнман уса пӑ ар йӑм вер верәс.
\p
\v 37 Щи хӑтԓәтән вер тыйәс, ԓўв кӑшаӈа йис пӑ пӑрәс. Ԓўв ԉŏхәтса пӑ нўм хот йӑта пŏтса.
\p
\v 38 Лидда пӑ Иоппия вош ԉэпән ванән ус, утәԓтәты йох Петра щита уԓты хуԓмеԓ кемән, ԓўв хŏщайәԓ кӑт хŏйат китсайтән, ԓўвеԓ вохты, ԓыв хŏщайэԓ йŏхәтты ԓўв ӑт ат рŏнәс.
\p
\v 39 Петра ԓойәс пӑ ԓын пиԓанән мӑнәс; пӑ хун ԓўв йŏхтәс, нўм хот йӑта ԓўвеԓ тусэԓ, пӑ хŏԓ шукаԓт нэӈәт, хоԓԓәман, ԓўв йэԓпәԓа ԓойсәт, йэрнасәт аԉиԓыман, Тавифа ԓыв пиԓԓаԓән уԓмаԓән верыԓыйәм ŏтԓаԓ.
\p
\v 40 Петра мŏхет хŏԓ ким партсәԓы пӑ, шанша иԓ эсԓәщман, пойәкщәс, пӑ, мотавтәԓ пеԓа ватман, йастәс: «Тавифа! Нŏх ԓойа». Щӑԓта ԓўв сэмӈиԓаԓ пел пўшсәԓы пӑ, Петра шийаԓәмаԓ кемән, нŏх опсәс.
\p
\v 41 Ԓўв, йошәԓ ԓўвеԓа мийман, нŏх ԓощәԓтәсԓы пӑ, эвәԓты мŏхет пӑ шукаԓт нэӈәт, вана вохман, ԓыв йэщаԓтэԓ ԓўвеԓ ԓыԓӈат ԓощәԓтәсԓы.
\p
\v 42 Тӑм вер Иоппия ԓŏватән иса уйәтты питса, пӑ ар хŏйат Турәм Кущайа эвԓәс.
\p
\v 43 Пӑ йӑм арат хӑтәԓ ԓўв Иоппия вошән и мŏԓты Симон ԋўки верты ики хŏща ус.
\c 10
\s Петра пӑ Корнилий
\p
\v 1 Кесария вошән и ху ус, нэмәԓ Корнилий, Италийский когорта\f + \fr 10:1 \fr*\fq когорта (\fq*\fq италийский) \fq*\ft - щит хутсот арат ԉаԉ йох;\ft*\f* кўт эԓты уԓты сот ԉаԉ йох куща,
\p
\v 2 хот тэԓәԓ пиԓән Турма эвәԓты хŏйат пӑ Турәм эԓты пӑԓты хŏйат, мира ар йӑм верыԓыйәс пӑ иса Турәм пеԓа пойәкщәс.
\p
\v 3 Ԓўв вантәм щирәԓән хӑтԓәԓән йӑрәтйаӈ щос кемән Турәм ангел тŏрԓы ватсәԓԓы, ԓўв хŏщайәԓ ԓŏӈәс пӑ ԓўвеԓа йастәс: «Корнилий!»
\p
\v 4 Корнилий пӑ, ԓўв пеԓайәԓ аӈкәрмәмаԓ пӑ хŏԓт пӑԓтамәмаԓ кемән, йастәс: «Мўй, куща?» Ангел ԓўвеԓа йŏхԓы йастәс: «Нӑӈ пойәкԓан пӑ нӑӈ меԓащԓан Турәм хŏща нŏпса питсәт.
\p
\v 5 Щӑԓта, хŏйатәт Иоппия воша кита пӑ, Петрайа айәԓты, Симон вохи.
\p
\v 6 Ԓўв Симон ԋўки ԓэщатты ху хŏща мойԓәԓ, ԓўв хотәԓ щарәс питарән уԓ; ԓўв нӑӈен щи йасӈәт йастәԓ, мўй йурән нӑӈ нŏх пайәтԓайән пӑ нӑӈ хот тэԓэн па».
\p
\v 7 Хун, Корнилий пиԓән пŏтәртәм, ангел йэԓ мӑнәс, ԓўв митйохԓаԓ эԓты кӑтән пӑ ԓўв пўӈԓәԓән уԓәм Турма эвәԓты ԉаԉ ху вохсәԓы
\p
\v 8 пӑ ԓывиԓаԓа иса хŏԓ пŏтәрмаԓ йўпийән, ԓывиԓаԓ Иоппияйа китсәԓы.
\p
\v 9 Кимет хӑтәԓ, хун ԓыв шушсәт пӑ воша ванамәты питсәт, Петра хут щос кемән хот ԓоӈԓа нŏх хуӈхәс, пойәкщәты урәӈән.
\p
\v 10 Щӑԓта ԓўв сӑмәԓ вохты питса, пӑ ԓэты ԓӑӈхаса. Щи кўтән, ԓэтот ԓэщатты эԓты, ԓўвеԓа ватты щир ус
\p
\v 11 пӑ ваттаԓән пел пўншаԋщәм турәм хӑр пӑ ԓўв хŏщайәԓ иԓ эсԓәщты мŏԓты пўт, ищи мӑтты ун сŏх, ԋӑԓ щуӈәԓ сӑхат йӑрман уԓԓа пӑ мўва иԓ эсәԓԓа;
\p
\v 12 щи ԓыпийән кӑмән хŏрпи ԋӑԓ йоши–кўрпи войәт, иԓән мўв пӑԓатән ущиԓыты войәт пӑ турәм хӑрән йӑхты тŏхԓәӈ войәт.
\p
\v 13 Пӑ ԓўвеԓа тўр сый ус: «Петра ԓойа, веԓа пӑ ԓэва».
\p
\v 14 Петра пӑ йастәс: «Ӑнтом, Турәм Куща, ма нэмәԓты пŏрайән нэмәԓты атәм мўй пӑ ӑнта сыстам ŏт ӑт ԓавәнтысәм».
\p
\v 15 Щиӈәԋща кимет пўш ԓўвеԓа тўр сый ус: «Мўй Турәм сыстапсәԓы, щит атма мўй пӑ ӑнта сыстама нӑӈ аԓ ԓўӈты».
\p
\v 16 Щит хуԓәм пўш ус, – щӑԓта пўт турма па нŏх эԓәтса.
\p
\v 17 Хун пӑ Петра ԓўв турмәԓән ощатымаԓән, ԓўв вантәм щирәԓ, щит а мўй, – Корнилийән китәм йохәт, Симон хŏт эԓты иԋщәсман, вана йŏхәтсәт пӑ пушас овән иԓ ԓойсәт.
\p
\v 18 Ўваԓман, ищмәсэԓ: «Петрайа айәԓтты Симон мўй тӑта?»
\p
\v 19 Петра вантәм ŏтәԓ эԓты нумисытаԓ кўтән, Йэмәӈ Ԓыԓ ԓўвеԓа йастәс: «Тӑм, хуԓәм хŏйат нӑӈен кӑшԓәт;
\p
\v 20 ԓойа, иԓ ŏхԓа пӑ ԓўв пиԓԓаԓән, йэша нэш ӑт нŏмәнԓыман, мӑна; ԓывиԓаԓ Ма китсәԓам».
\p
\v 21 Петра, Корнилия эԓты ԓўв хŏщайәԓ китәм хŏйатәт хŏща иԓ ŏхԓәс пӑ йастәс: «Mа щит, хŏй нын кӑшԓәты; мўй вер урәӈән нын йŏхәтсәты?»
\p
\v 22 Ԓыв пӑ йастәсәт: «Корнилий сот ԉаԉ йох куща, йӑм сӑмпи пӑ Турәм эԓты пӑԓты ху, иудея мирән хŏԓ йӑма нумман тӑйԓа, йэмәӈ ангел эԓты ԓўв хотәԓа нӑӈен вохты партәпса йŏхтәс пӑ нӑӈ пŏтәрԓан хуԓәтты».
\p
\v 23 Щиӈәԋща Петра, ԓывиԓаԓ йŏхи вохмаԓ йўпийән, ԓапәтсәԓы. Кимет хӑтәԓ пӑ нŏх киԓмаԓ кемән, ԓыв пиԓԓаԓән мӑнәс, тухәԓ Иоппия хӑнам йох па ԓўв пиԓәԓән мӑтсәт.
\p
\v 24 Йухәт хӑтәԓ ԓыв Кесарияйа йŏхәтсәт. Корнилий пӑ, ԓўв рутԓаԓ пӑ ван пиԓ йохԓаԓ и йӑха вохман, ԓывиԓаԓ ԓавәԓсәԓы.
\p
\v 25 Хун Петра йŏхи ԓŏӈты ўтщийәс, Корнилий ԓўв хŏщайәԓ йэщаԓт этәс пӑ ԓўв кўрԓаԓ шŏма шанша керәптыман, иԓ ԋўрәс.
\p
\v 26 Петра пӑ ԓўвеԓ нŏх ԓощәԓтәсԓы, пŏтәрман: «Нŏх ԓойа; ма ищи хŏйат».
\p
\v 27 Пӑ, ԓўв пиԓәԓән пŏтрэмәман, хота йŏхи ԓŏӈәс пӑ ар ӑктәщәм хŏйат уйтәс.
\p
\v 28 Щӑԓта ԓывиԓаԓа йастәс: «Нын уйәтԓәԓән, иудея хŏйата па сыр хŏйат пиԓән пŏтрэмәты пӑ вана рӑхиԓыты ӑт рӑхәԓ; туп мӑнэма Турәм аԉәс, ма и хŏйат нэш атма мўй пӑ ӑнта сыстама ӑт ат ԓўӈәтсәм.
\p
\v 29 Щишән ма, хун вохсайәм, пӑ йŏхи ӑт ԋŏсәрщәман йŏхәтсәм. Щӑԓта, иԋщәсԓәм: Мўй вер урәӈән нын мӑнэм вохсәԓән?»
\p
\v 30 Корнилий йастәс: «Ԋӑԓмет хӑтәԓән ма тӑм щос унты вўщԓәсәм пӑ йӑрәԏйаӈ щос пеԓа мӑнәмән йŏԓән хотэмән пойәкщәсәм; щӑԓта щи, ма йэԓпемән нŏвийән ворԓәты ԓумтәӈәӈ ики этәс
\p
\v 31 пӑ пŏтәртәԓ: 'Корнилий! Нӑӈ пойкен хуԓса пӑ меԓащԓан Турәм хŏща нумәԓмәсайәт'.
\p
\v 32 Щиӈәԋща, Иоппияйа кита пӑ Петрайа айәԓты Симон вохи: ԓўв ԋўки верты ху Симон хотән щарәс питарән мойԓәԓ; ԓўв йŏхәтәԓ пӑ нӑӈена йастәԓ'.
\p
\v 33 Ищи кумат ма нӑӈ хŏщайэн китсәм, пӑ нӑӈ йӑма версэн, йŏхәтсән. Ин мўӈ хŏԓ Турәм йэԓпийән ԓойԓув, мўй нӑӈена Турәм эԓты партман уԓ, иса хŏԓ хуԓәтты урәӈән».
\s Петра Корнилий хотән пŏтәртты вер
\p
\v 34 Петра ўӈԓәԓ пўшсәԓы пӑ йастәс: «Йӑна мŏштәԓэм, Турәм веш пеԓа ӑт ватәԓ,
\p
\v 35 туп кашәӈ мир хŏща Ԓўв эԓтэԓ пӑԓты ŏт пӑ тўӈа–щира уԓты ŏт Ԓўвеԓа рӑхи.
\p
\v 36 Ԓўв Израиль пŏхәта йасәӈ китәс, пайԓы уԓәпса Иисус Христос сӑхат аԉәс; Тӑм хŏԓ хŏйатәта уԓты Турәм Куща.
\p
\v 37 Нын Иудея ԓŏватән, Галилея эԓты ўйман, Иоаннән утәԓтыйәм йиӈка ԓŏӈәԓтыты вер йўпийән, уԓәм верәт уйәтԓәԓән:
\p
\v 38 Хŏты Турәм Назарет эԓты уԓты Иисус Йэмәӈ Ԓыԓән пӑ йурән ԋŏсәтсәԓы. Пӑ Ԓўв йӑм верман пӑ хŏԓ хŏйатәт, хŏй хиԋән катәԓман усайәт, тўмтака верман, йӑӈхәс, Турәм Ԓўв пиԓәԓән ус, щишән.
\p
\v 39 Мўӈ пӑ щит хŏща иса вантәм ŏтәт, мўй Ԓўв Иудея мўвән пӑ Иерусалимән верәс, пӑ мет йухәт Ԓўв, акԓа нŏх сэкман, пӑратса.
\p
\v 40 Турәм хуԓмет хӑтәԓән Тӑмен нŏх ԓыԓӈатсәԓы, пӑ Ԓўвеԓа этԓыты щир мӑс
\p
\v 41 ӑнта хŏԓ мира, туп вантәм ŏтәта, Турәм эԓты пирыйәм хŏйатәта, мўӈева, пӑ мўӈ Ԓўв пиԓәԓән ԓэсув пӑ йищсув, щи йўпийән, хун Ԓўв пӑрмаԓ эԓты нŏх ԓыԓәӈԓәс.
\p
\v 42 Щӑԓта Ԓўв мўӈева мира пŏтәртты пӑ вантәм ŏтәта уԓты партсәԓы, Ԓўв Турәм эԓты ԓыԓәӈ пӑ пӑрәм хŏйатәта Сўта уԓты пŏнәм Ŏт.
\p
\v 43 Ԓўв эԓтэԓ хŏԓ Турәм айкеԓ туты хŏйатәт аԉԓәт, кашәӈ Ԓўвеԓа эвәԓты ŏт Ԓўв нэмәԓән кӑрэк йŏрэмәты щир мŏщатәԓ».
\p
\v 44 Хун Петра хŏԓна щи пŏтрәԓ йэԓԓы тусԓы, Йэмәӈ Ԓыԓ кашәӈ йасәӈ хуԓәнтәм хŏйата эсԓәщәс.
\p
\v 45 Пӑ Петра пиԓән йŏхтәм, иудейәт эԓты эвәԓты ŏтәт ӑԓ пакнысысәт, Йэмәӈ Ԓыԓ мойԓәпса па рут йоха па эсәԓман уса;
\p
\v 46 ԓыв хуԓсәт, хŏты щитәт па йасӈәтән пŏтәртсәт пӑ Турәм вŏԓаӈа айәԓтсәт, щишән. Щиӈәԋща Петра йастәс:
\p
\v 47 «Хŏй щитәта йиӈка ԓŏӈәԓтыты ӑт эсәԓты верәтәԓ, хŏйтат, мўӈ итэвән Йэмәӈ Ԓыԓән мойԓысайәт?»
\p
\v 48 Щӑԓта ԓывиԓаԓ Иисус Христос нэм хўватән йиӈка ԓŏӈәԓтыты партсәԓы. Щи йўпийән ԓыв ԓўвеԓа кӑмәтса хӑтәԓ ԓыв хŏщайэԓ уԓты вохсэԓ.
\c 11
\s Петра йӑӈхәпсайәԓ эԓты Иерусалим пойәкщәты хо̆йатәта по̆тәртты вер
\p
\v 1 Иудеяйән уԓәм апостоләт пӑ хӑнам йох хуԓсэԓ, мӑтты па рут йох ищи Турәм йасәӈ вана ўсэԓ.
\p
\v 2 Щӑԓта хун Петра Иерусалима йŏхтәс, иудейәт эԓты уԓты хӑнам йохԓаԓән ԓўв йэщаԓт нўрыса,
\p
\v 3 пŏтәртман: «Нӑӈ ӑт эвтәм мŏхет хŏща йӑхсән пӑ ԓыв пиԓԓаԓән ԓэсән».
\p
\v 4 Петра пӑ хŏты вер ус, щиты ԓывиԓаԓа пŏтәртты питсәԓԓы, йастыйәԓ:
\p
\v 5 «Иоппия вошән ма пойәкщәсәм пӑ щи пўԉаӈ вантәпса ватсәм: и мŏԓтты пўт иԓ эсԓәщәс, ищи мӑтты ун сŏх лопәс, ԋӑԓ щуӈәԓ сӑхат турәм хӑр эԓты иԓ эсәԓты ŏт, пӑ ма хŏщайэм иԓ эсԓәщәс.
\p
\v 6 Ма пўт ԓыпеԓа ӑӈкәрмәсәм пӑ, вантыман, ԋӑԓ йоши–кўрпи войәт, иԓән мўв пӑԓатән ущиԓыты войәт пӑ турәм хӑрән йӑхты тŏхԓәӈ войәт шийаԓәсәм.
\p
\v 7 Щӑԓта ма тўр сый хуԓтмәсәм, ма пеԓайэм пŏтәртәԓ: 'Петра, нŏх ԓойа, веԓа пӑ ԓэва'.
\p
\v 8 Ма пӑ йастәсәм: 'Ӑнта, Турәм Куща, нэмәԓты атәм мўй пӑ ӑнта сыстам ŏт нэмәԓт пŏрайән ма ўӈԓэма ӑт питыԓыйәс'.
\p
\v 9 Пӑ турәм хӑр эԓты кимет пўш тўр сый мӑнэма йŏхԓы йастәс: 'Турәм мўй сыстапсәԓы, щит ӑнта сыстама нӑӈ аԓ ԓўӈты'.
\p
\v 10 Щит хуԓәм пўш ус, пӑ па хŏԓ иса турәм хӑра нŏх эԓәтса.
\p
\v 11 Щӑԓта ин, щи пўԉаӈ Кесария эԓты, ма хŏщайэм китәм хуԓәм хŏйат, хотэм ԉэпа, хŏта ма усәм, ԓойсәт.
\p
\v 12 Йэмәӈ Ԓыԓ мӑнэма йастәс, ма ԓыв пиԓԓаԓән, йэша нэш ӑт нŏмәнԓыман, ат мӑтсәм. Ма пиԓэмән щи хут хӑнам йох па мӑтсәт, пӑ мўӈ тўм хŏйатэн хота йŏхәтсув.
\p
\v 13 Ԓўв мўӈева пŏтәртсәԓы, хŏты ԓўв йŏԓән хотәԓән [йэмәӈ] ангел ватсәԓы, пӑ ангел ԓўвеԓа йастәс: 'Хŏйатәт Иоппияйа кита пӑ Петрайа айәԓты Симон вохи;
\p
\v 14 Ԓўв нӑӈена йасӈәт йастәԓ, щи йасӈәт йурән нӑӈ нŏх пайәтԓайән пӑ нӑӈ хот тэԓэн па'.
\p
\v 15 Хун пӑ ма пŏтәртты питсәм, ԓыв эԓтыԓаԓа Йэмәӈ Ԓыԓ иԓ эсԓәщәс, оԓәӈән хŏты мўӈ эԓтэва эсԓәщәс.
\p
\v 16 Щи пŏрайән ма Турәм Куща йасәӈ нумәԓмәсәм, хŏты Ԓўв пŏтәртәс: 'Иоанн йиӈка ԓŏӈәԓтыйәс, нын пӑ Йэмәӈ Ԓыԓа ԓŏӈәԓтты питԓайты'.
\p
\v 17 Щиӈәԋща, Турәм ԓывиԓаԓа ищимәщ мойԓәпса мӑс ки, мўй хŏрпи мўӈева, Турәм Куща Иисус Христоса эвԓәм ŏтәта мӑс, ма пӑ хŏй, Турма йэртԓыты ат верәтсәм?»
\p
\v 18 Щит хуԓәтмеԓ йўпийән, ԓыв иԓ ромәпсәт пӑ Турәм ишәксэԓ, пŏтәртман: «Таӈха, па рут хŏйатәта па Турәм кӑрэк эԓты уԓәпса пеԓа керԓәты щир мӑс».
\s Пойәкщәты хŏйатәт ӑктәщиты щир Антиохия вошән
\p
\v 19 Щи кўтән Стефан йўпийән уԓәм ԋўхәтԓыты вер эԓты лакки мӑнәм ŏтәт, туп иудейәта йасәӈ тўвман, Финикия унты пӑ Кипр пӑ Антиохия унты мӑтсәт.
\p
\v 20 Ԓыв эԓтыԓаԓ тухԓәт Кипр хŏйатәт, тухԓәт пӑ Киринея хŏйатәт усәт, хŏй Антиохияйа йŏхәтман, Турәм Куща Иисус эԓты Йӑм Айкеԓ грек йохәта пŏтәртсәт.
\p
\v 21 Пӑ Турәм Куща йош ԓыв пиԓԓаԓән ус, пӑ йӑм арат ар хŏйат, эвәԓман, Турәм Куща пеԓа керԓәсәт.
\p
\v 22 Щит эԓты Иерусалимән ӑктәщиты хŏйатәт унты сый йŏхтәс, пӑ Варнава Антиохияйа мӑнты партса.
\p
\v 23 Ԓўв йŏхәтмаԓ пӑ Турәм йӑм кащаԓәмаԓ кемән, нŏх амтәс пӑ хŏԓ мŏхет Турәм Куща хŏща вещкат сӑмән катԓәсты партсәԓы;
\p
\v 24 Ԓўв йӑм сӑмпи ху ус пӑ Йэмәӈ Ԓыԓән пӑ эвәԓты щирән тэкәнман уса, щишән. Щиӈәԋща йӑм арат мир Турәм Куща пеԓа керԓәс.
\p
\v 25 Йухәт Варнава Савл кӑшты урәӈән Тарса мӑнәс пӑ, ԓўвеԓ уйәтмаԓ кемән, Антиохияйа тусԓы.
\p
\v 26 Тӑԓаӈ тӑԓ–ԓўӈ ԓын пойәкщәты хŏйатәт ӑктәщиты тӑхайән йӑм арат хŏйат утәԓтәсӈән, пӑ утәԓтыты йох Антиохияйән веԓщи щи христианәта айәԓты питсайәт.
\p
\v 27 Щи хӑтԓәтән Иерусалим эԓты Антиохияйа Турәм айкеԓ туты хŏйатәт йŏхәтсәт.
\p
\v 28 Пӑ ԓыв эԓтыԓаԓ и ху, нэмәԓән Агав, нŏх ԓоймаԓ кемән, Йэмәӈ Ԓыԓән аԉман, йастәс, мӑтты иса мўв ԓŏватән ун ԓэԓԓы щир питәԓ, Клавдия кесарь пŏрайән щи уԓәм щир.
\p
\v 29 Щиӈәԋща утәԓтәты йох, кашәӈ ԓўв тӑйтŏтәԓ эԓты Иудейән уԓты хӑнам йохԓаԓа, ԋотәпса китты пŏтсәт,
\p
\v 30 щиты щи версэԓ, ӑктәм ŏхԓаԓ Варнава па Савл мŏхты эвәԓты хŏйатәт ун икета китсәԓаԓ.
\c 12
\s Иаков аԓтты кешийән пӑратты пӑ Петра касна хота омәсты верӈән
\p
\v 1 Щи пŏрайән Ирод хон щи ӑктәщиты хŏйатәт эԓты тухәԓ хŏйатԓаԓ пеԓа йошԓаԓ нŏх аԓәпсәԓы, ԓывиԓаԓа атәм верты урәӈән,
\p
\v 2 пӑ Иаков, Иоанн йай, аԓтты кешийән пӑратты партсәԓы.
\p
\v 3 Ваттаԓән, щит иудейәта йӑм, щи йўпийән Петра па ўсԓы, – щи пŏрайән тўтәӈ ԋаԋ йэмәӈ хӑтԓәт усәт, –
\p
\v 4 пӑ, ԓўвеԓ иԓ катәԓмаԓ йўпийән, пӑтлам хота омәссәԓы, пӑ ԋӑԓ ԉаԉ йохпи ԋӑԓ похла ԓўвеԓ шавиты партсәԓы, Пасха йўпийән мир хŏща ԓўвеԓ этәԓтәты нумәсыйәс.
\p
\v 5 Петра пӑтлам хотән эԓт ԓавәԓтса, щи кўтән ӑктәщиты хŏйатәт ԓўв урӈәԓән тўӈа–щира Турма пойәкщәсәт.
\s Ангел Петра касна хот эԓты ким этәԓтәты щир
\p
\v 6 Хун пӑ Ирод ԓўвеԓ ким этәԓтәты утщисԓы, щи ат Петра кӑт ԉаԉ йŏхӈән кўтән ŏԓәс, кӑт карты кеԓән пŏнман уса, пӑ ԉаԉ йохән ов пўӈәԓән пӑтлам хот шависа.
\p
\v 7 Щӑԓта ин, Турәм Куща ангел ԓўв йэщаԓтәԓ ԓойәс, пӑ нŏвийән пӑтлам хот нŏх хутԓәптәса. Ангел, Петра пўӈԓәԓ эԓты пŏткәман, ԓўвеԓ нŏх кўрәтсәԓы пӑ йастәс: «Сора ԓойа». Щӑԓта карты кеԓԓаԓ ԓўв йошԓаԓ эԓты иԓ рӑкәтсәт.
\p
\v 8 Пӑ ангел ԓўвеԓа йастәс: «Ӑтпен йӑры пӑ кўр ԓумтәмԓан ԓумтаԓән». Ԓўв щиты версәԓы. Щӑԓта ԓўвеԓа йастәԓ: «Нӑӈ эԓты ԓумтәмен ԓумты пӑ ма йўпемән йўва».
\p
\v 9 Петра ким этәс пӑ ԓўв йўпеԓән шушәс, ӑт уйәтман, ангелән верты вер йӑна щиты ус, нумәсман, ԓўв вантәпса ватәԓ.
\p
\v 10 Оԓәӈ ԓавәԓты ԉаԉ йох пӑ кимет ԓавәԓты ԉаԉ йох мŏхты мӑнман, ԓын вош пеԓа мӑнты карты пушас ова йŏхәтсәтән. Щи ов ԓын урӈәнән ԓўв сӑхатәԓ пелки пўншантәс; ԓын ким этсәӈән пӑ и вош хулы мӑтсәԓән, щӑԓта шамкап ангел ԓўв пўӈԓәԓ эԓты хŏԓт пентәс.
\p
\v 11 Щиӈәԋща Петра, сэмәԓ этмаԓән, йастәс: «Ин манэма йӑна щи ныԓа, Турәм Куща Ԓўв ангеләԓ китмаԓ пӑ мӑнэм хŏԓт пайәтсәԓы Ирод йош эԓты пӑ иса щит эԓты, мўй иудей мир ԓавԓәс».
\p
\v 12 Щӑԓта, тыйэԓ–тохэԓ вантымаԓ йўпийән, Мария, Марка айәԓтты Иоанн аԋԏи, хот ԉэпа йохтәс, хŏта ар хŏйат ӑктәщсәт пӑ пойәкщәсәт.
\p
\v 13 Хун пӑ Петра пушас овән хŏплэмәс, Рода нэмпи митнэ хуԓәтты ким этәс.
\p
\v 14 Щӑԓта, Петра тўр сый мŏштымаԓ кемән, амәтмаԓ рўвән пушас ов ӑт пўшсәԓы, йŏхи хухәԓмәман, такан йастәс, мӑтты Петра пушас овән ԓойәԓ.
\p
\v 15 Тўмет пӑ ԓўвеԓа йастәсәт: «Нӑӈ мўй ŏшенән уԓԓән?» Туп ԓўв и йэԓԓы ўра верәԓ. Ԓыв пӑ пŏтәртсәт: «Щит Ԓўв ангеләԓ».
\p
\v 16 Щи кўтән Петра пушас ов сэкты йэԓԓы питәс. Хун пӑ ов пўшсэԓ, ԓўвеԓ кащаԓәсәт пӑ ӑԓ пакәтсәт.
\p
\v 17 Ԓўв пӑ, йошәԓән пос верман, мӑшйайән ат усәт, ԓывиԓаԓа пŏтәртсәԓы, хŏты Турәм Куща ԓўвеԓ пӑтлам хот эԓты ким этәԓтәсԓы, пӑ йастәс: «Тӑм вер эԓты Иаков пӑ хӑнам йохәт айкеԓән вераԓән». Йухәт, ким этмаԓән, па тӑха пеԓа мӑнәс.
\p
\v 18 Хӑтԓа йўвмаԓ йўпийән, ԉаԉ йох кўтән ун хурэп тыйәс, хŏты Петра йис.
\p
\v 19 Ирод пӑ, ԓўвеԓ кӑшмаԓ пӑ ӑт уйәтмаԓ йўпийән, ԓавԓәм ԉаԉ йох сўтәтсәԓы пӑ ԓывиԓаԓ пӑратты партсәԓы. Йухәт ԓўв Иудея эԓты Кесарияйа мӑнәс пӑ щита хӑщиԓыйәс.
\s Ирод хон пӑрты вер
\p
\v 20 Ирод Тир пӑ Сидон хŏйатәт пеԓа лики хуры ус; ԓыв пӑ, ԓыв кўтэԓән йастатман, ԓўв хŏщайәԓ йŏхәтсәт пӑ хон хот куща, Власт, ԓыв пеԓайэԓ керәтман, пайԓы уԓәпса вохсәт, ԓыв мўвеԓ хон мўв эԓты ԓэс, щишән.
\p
\v 21 Йастәм хӑтәԓән Ирод, хон ԓумтәма ԓумәтԓыман, пӑԓ тӑхайа опсәс пӑ ԓыв пеԓайэԓ пŏтәртәс.
\p
\v 22 Мир такан ԋухмийәԓ: «Щит ӑнта хŏйат, Турәм тўр сый».
\p
\v 23 Туп шӑмкапан Турәм Куща ангел ԓўвеԓ мушәӈа версәԓы, щи урәӈән, мўйа ԓўв Турма ишәк йасәӈ ӑт йастәс; щӑԓта Ирод ики, суԓ войәтән шӑпиман, пӑрәс.
\p
\v 24 Турәм йасәӈ пӑ арамәс пӑ лакки ԓӑрпиԓәс.
\p
\v 25 Варнава пӑ Савл, партәм верән тӑԓаӈа верман йўпийән, Марк нэма пŏнәм, Иоанн пӑтән ўйман, Иерусалим эԓты [Антиохияйа] йŏхԓы йŏхәтсәтән.
\c 13
\s Варнава пӑ Савл Йӑм Айкеԓ туты урәӈән китты вер
\p
\v 1 Антиохия вошән, щита уԓты пойәкщәты хойатәт ӑктәщиты вер хŏща тухәԓ Турәм айкеԓ туты хŏйатәт пӑ утәԓтәты йох усәт: Варнава, пӑ Нигера айәԓтты Симеон, пӑ Луций, Киринея ху, пӑ Манаил, Ирод ԋӑԓмет мўв щуӈ куща пиԓән энмәм ху, пӑ Савл.
\p
\v 2 Хун ԓыв Турәм Кущайа верәт версәт пӑ вўщԓәсәт, Йэмәӈ Ԓыԓ йастәс: «Варнава пӑ Савл Мӑнэма щи вер пеԓа мийаԓән, мўй урәӈән Ма ԓынан вохсәԓам».
\p
\v 3 Щиӈәԋща ԓыв, ўщԓәмеԓ пӑ пойәкщәмеԓ йўпийән пӑ йошԓаԓ ԓын эԓтыԓән поныԓымеԓ йўпийән, ԓынан эсәԓсэԓ.
\s Варнава пӑ Савл Кипр пухәрән
\p
\v 4 Щитӈән, Йэмәӈ Ԓыԓән китман уԓман, Селевкияйа йŏхәтсәтән, щиԓта пӑ Кипр пухра хŏпән мӑтсәӈән;
\p
\v 5 Щӑԓта Саламинән уԓман, иудейәт пойәкщәты хотәтән Турәм йасәӈ пŏтәртсәтән; ԓын ԉэпәнән Иоанн па ус, ԓынана ԋотты урәӈән.
\p
\v 6 Пухәр мўв ԓŏватәԓән Паф унты мӑнман, ԓыв и мŏԓты иудей ху, нэмәԓән Вариисус, уйәтсәтән. Ԓўв щӑртәӈ пӑ ԋаԓмәӈ ики ус, Турәм айкеԓ туты икийа верәсәс.
\p
\v 7 Ԓўв проконсул Сергий Павел, ŏшәӈ ху, пиԓән ус. Проконсул Турәм йасәӈ хуԓты ԓӑӈхас, щишән Варнава пӑ Савл вана вохсәԓы.
\p
\v 8 Елима, щӑртәӈ ики, пӑ (ԓўв кимет нэмәԓ щит айәԓԓәԓ) ԓыв пиԓԓаԓән ӑт кашащәԓ, эвәԓты вер эԓты проконсул пўӈԓа ԓавәԓԓәԓы.
\p
\v 9 Туп Савл, ԓўв хŏԓна Павел, Йэмәӈ Ԓыԓән тэкәнман пӑ сэмӈиԓаԓ ԓўв пеԓайәԓ пайәтман,
\p
\v 10 йастәс: «Йээй, кӑмән ŏщмарән пӑ кӑмән атәмән тэкнәм ŏт, хиԋ пŏх, кашәӈ вещкат вер пеԓа ԉик туты ŏт! Нӑӈ Турәм Куща тўӈ йушәт эԓты йŏвра хўщты а мўй вŏԓыԓән пеԓа?
\p
\v 11 Ин тӑм, Турәм Куща йош нӑӈ пеԓайэн нŏх аԓԓәмман уԓ: нӑӈ сэмԓы питԓән пӑ пŏра унты хӑтәԓ ӑт ватԓэн». Щӑԓта шӑмкап ԓўв эԓтэԓ тўрма пӑ пӑтлам лаӈкантәс, пӑ ԓўв, сӑм мӑнман, тыйэԓ–тохэԓ шушиԓыйәс, ватәԓтәты хŏйат кӑншәс.
\p
\v 12 Щиӈәԋща проконсул тыйәм вер кащаԓәмаԓ кемән, Турәм Куща утәԓтәпса эԓты, ощатыман, эвԓәс.
\s Павел пӑ Варнава Писидия ԉэпән уԓты Антиохия вошән
\p
\v 13 Паф эԓты нык хўвԓәмеԓ кемән, Павел пӑ ԓўв пўӈԓәԓән уԓәм ŏтӈән Памфилия мўвән уԓты Пергияйа йŏхәтсәт. Туп Иоанн, ԓын эԓтыԓән пўӈԓа йирԓәман, Иерусалима йŏхԓы мӑнәс.
\p
\v 14 Ԓын пӑ, Пергия эԓты мӑнман, Писидия ԉэпән уԓты Антиохияйа йŏхәтсәтән пӑ, иудейәт пойәкщәты хота шаббат хӑтәԓән ԓŏӈман итән, иԓ омәссәтән.
\p
\v 15 Закон пӑ Турәм айкеԓ туты хŏйатәт нэпекәт ԓўӈтәм йўпийән иудейәт пойәкщәты хот кущайәт ԓынана йастәты китсәт: «Хӑнам йохӈән! Нын мир пеԓа нŏмәс такапты йасәӈ тӑйԓәтән ки, пŏтәртатән».
\p
\v 16 Павел, нŏх ԓойман пӑ йошәԓән пос верман, йастәс: «Израиль йох пӑ Турәм эԓты пӑԓты мŏхет! Хуԓәнтаты.
\p
\v 17 Тӑм мир Турәм мўӈ ащиԓув пирысԓы пӑ тӑм рут мир Египет мўв хŏща уԓмаԓ пŏрайән ԓӑтәӈа версәԓы, пӑ йурәӈ йошәԓән щиԓта йэԓ тусԓы,
\p
\v 18 пӑ ԋӑԓйаӈ тӑԓ кем ԓывиԓаԓ таԓ мўв хŏща ԓапәтсәԓы.
\p
\v 19 Щӑԓта, ԓапәт сыр мир Ханаан мўвән пӑратмаԓ йўпийән, щитԓаԓ мўв ԓывиԓаԓа йэԓԓы тӑйты ортсәԓы.
\p
\v 20 Пӑ щи йўпийән, ԋӑԓсот ветйаӈ кем тӑԓ ԓывиԓаԓа сўт йохәт мийԓыйәс Турәм айкеԓ туты хŏйат Самуил унты».
\p
\v 21 Йухәт ԓыв хон вохсәт, пӑ Турәм ԓывиԓаԓа Саул мӑс. Кис пŏх, Вениамин рут эԓты уԓты ху. Щиты ԋӑԓйаӈ тӑԓ хӑщәс.
\p
\v 22 Ԓўвеԓ пўӈԓа пайәтмаԓ йўпийән, ԓывиԓаԓа хона Давид пŏтсәԓы. Турәм ԓўв эԓтэԓ йастәс: 'Давид, Иессей пŏх, Ма сӑмема рӑхты ху, Ма уйәтсәм щит, хŏй Ма ԓӑӈхаты ŏтԓам хŏԓ тӑԓаӈа верԓәԓы'.
\p
\v 23 Ԓўв ԋаврэмԓаԓ эԓты Турәм аԉиԓыйәм верәԓ хўват Израиль мира Нŏх пайәтты Ŏт мӑс - Иисус.
\p
\v 24 Ԓўв йӑмәс эттаԓ йэԓпийән Иоанн хŏԓ Израиль мира щит эԓты пŏтәртәс: йиӈка ԓŏӈәԓтыты вер верты урәӈән, кӑрэк эԓты шӑшән керԓәты мосәԓ.
\p
\v 25 Иоанн, ԓўв верәԓ йэтшәты питмаԓән, пŏтәртәс: 'Хŏй йўкана мӑнэм нын тӑйԓәԓән? Ма ӑнта щит; туп ин, ма йўпемән йиԓ щит, Хŏй хŏща кўр ԓумтәмәԓ эхты ма ӑт рӑхԓәм'.
\p
\v 26 Хӑнам йох, Авраам рут ԋаврэмәт, пӑ нын кўтәнән Турәм эԓты пӑԓты ŏтәт! Нынана тӑм нŏх пайтәсты йасәӈ китман уԓ.
\p
\v 27 Иерусалимән уԓты мŏхет пӑ ԓыв кущайԓаԓ, Иисус ӑт мŏштәсэԓ пӑ сўтәтсэԓ, пӑ щишән Турәм айкеԓ туты хŏйатәт йасӈәт тӑԓаӈа версәԓаԓ, щи йасӈәт кашәӈ шаббат хӑтәԓән ԓўӈәтԓайәт.
\p
\v 28 Ԓыв Ԓўв хŏщайәԓ нэмәԓты нўр ӑт уйәтсәт, мўй урәӈән Ԓўв сŏрма ат пайәтса, пӑ ищипа Пилат эԓты Ԓўвеԓ паратты щир вохсәт.
\p
\v 29 Хун пӑ хŏԓ Ԓўв эԓтэԓ хӑншәм ŏт тӑԓаӈа версэԓ, йўх эԓты иԓ ўймеԓ йўпийән, хŏшапәӈ кев ԓыпийа Ԓўвеԓ пŏтсэԓ.
\p
\v 30 Туп Турәм пӑрәм эԓты Ԓўвеԓ нŏх ԓыԓӈатсәԓы.
\p
\v 31 Ԓўв ар хӑтәԓ хўват щитәта этԓыйәс, хŏй Ԓўв пиԓәԓән Галилей эԓты Иерусалима этәс пӑ хŏй ин мир йэԓпийән Ԓўвеԓ вантәм ŏтәта уԓԓәт.
\p
\v 32 Пӑ мўӈ нынана Йӑм Айкеԓ йастәԓув: ащиԓува аԉәм вер, Турәм мўӈева тӑԓаӈа версәԓы, ԓыв ԋаврэмԓаԓа, Иисус нŏх ԓыԓӈатман,
\p
\v 33 хŏты пӑ кимет псаломән\f + \fr 13:33 \fr*\fq псалом - йэмәӈ ар Библияйән;\fq*\f* хӑшман уԓԓа: 'Нӑӈ Ма Пŏхем: Ма ин Нӑӈен сэма пайәтсэм'.
\p
\v 34 Ԓўвеԓ пӑрәм эԓты нŏх ԓыԓӈатмаԓ йўпийән, щишән Ԓўв шимты ӑт питәԓ, тӑм эԓты щиты йастәс: 'Ма нынана, Давида аԉәм йӑмԓам мӑԓәм, йӑна'.
\p
\v 35 Щишән па тӑхайән па пŏтәртәԓ: 'Йэмәӈ Нӑӈ Ŏтэна шимты щир шийаԓәты ӑт мӑԓэн'.
\p
\v 36 Давид, ԓўв пŏрайәԓән Турәм ԓӑӈхаты щир хўват вермаԓ йўпийән, пӑрәс, пӑ ԓўв ащиԓаԓ хŏща пŏтса, пӑ шимты вер шийаԓәс;
\p
\v 37 Тўми, Хŏй Турәмән нŏх ԓыԓӈатса, шимты вер ӑт шийаԓәс.
\p
\v 38 Щишән, хӑнам йох, ма ԓӑӈхаԓәм, нын ат уйәтсәԓән, Ԓўв урӈәԓән нынана кӑрэк йŏрэмәты щир такан аԉԓа;
\p
\v 39 пӑ мўй хŏща иса, нын Моисей законән вещкат щира пайтәсты ӑт верәтсәты, щит хŏща кашәӈ эвәԓты ŏт Ԓўв хўватәԓән вещката пайтәсәԓ.
\p
\v 40 Шаващаты малы, Турәм айкеԓ туты хŏйатәт хŏща йастәм ŏт нынана аԓт хойәԓ:
\p
\v 41 'Вантаты, укщәпԓәты ŏтәт, ощатыйаты пӑ хŏԓт пеԓа ушаты; Ма нын хӑтәԓԓәнын щимәщ вер верԓәм, щит мӑтты хŏйатән нынана пŏтәртса ки, нын ӑт эвәԓсәты ԓуԓән'».
\p
\v 42 Ԓын иудейәт пойәкщәты хот эԓты ким этман пŏрайән па рут йохәтән па шаббат хӑтәԓән щит эԓты пŏтәртты партсайӈән.
\p
\v 43 Хун пӑ ӑктәщийәм хŏйатәт лакки эсәԓсайәт, ар пеләк иудей йох пӑ па рут эԓты иудейәт щира эвԓәптәм Турәм пеԓа сӑмәӈ ŏтәт Павел пӑ Варнава йўпи туԓәт. Ԓын, ԓыв пиԓԓаԓән пŏтрэмәман, ԓывиԓаԓ Турәм йӑм хŏща уԓты нŏмәс такапсәтән.
\p
\v 44 Па шаббат хӑтәԓән вош тэԓ мир Турәм йасәӈ хуԓәтты хŏԓ ӑктәщәс.
\p
\v 45 Туп иудейәт, мир шийаԓәмеԓ кемән, ԓоԓәмты нŏмәсән тэкәтсайәт пӑ, кӑткўтән уԓман пӑ ўӈращтыман, Павел пŏтәртты верәт пеԓа ўра вортты питсәт.
\p
\v 46 Щиӈәԋща Павел пӑ Варнава такан йастәсӈән: «Нынана оԓәӈән Турәм йасәӈ пŏтәртты мосәс, туп хŏты нын Турәм йасәӈ пўӈԓа ушиԓԓән пӑ нынан нын и пўша уԓәпсайа ӑт рӑхтыйа верԓәԓән, щишән, мўӈ па рут йох пеԓа йастәԓув».
\p
\v 47 Тӑмиты Турәм Куща мўӈева йасәӈ хӑйәс, щишән: 'Ма Нӑӈен па рут йоха нŏви кеша пŏтсэм, Нӑӈ, нŏх пайтәсты щир урәӈән, мўв сŏхәнты унты ат усән'.
\p
\v 48 Па рут мир, щит хуԓман, амтәтԓысәт пӑ Турәм Куща йасәӈ ишәксэԓ, пӑ хŏԓыйэ, хŏй и пўша уԓты уԓәпсайа пирысайәт, эвәԓсәт.
\p
\v 49 Щӑԓта Турәм Куща йасәӈ щи мўв ԓŏватән лакки ԓӑрпиԓәс.
\p
\v 50 Туп иудейәт, Турәм пеԓа сӑмәӈ, ԓӑтәӈ нэӈәт пӑ вошән ŏха уԓты хŏйатәт хўщмәмеԓ йўпийән, Павел пӑ Варнава пеԓа воштәты нŏмәс версәт пӑ уԓты тӑхайән эԓты ԓынан воштәсэԓ.
\p
\v 51 Ԓын пӑ, кўрԓын эԓты хиш ԓывиԓаԓа пӑркатман,\f + \fr 13:51 \fr*\fq кўрԓын эԓты хиш ԓывиԓаԓа пӑркатман \fq*\ft - щит ԓывиԓаԓ атма айәԓты пос;\ft*\f* Икония воша мӑтсәӈән.
\p
\v 52 Утәԓтәты йох пӑ амәтән пӑ Йэмәӈ Ԓыԓән тэкәнман усайәт.
\c 14
\s Павел пӑ Варнава Икония вошән
\p
\v 1 Иконияйән ԓын и йӑха иудейәт пойәкщәты хота ԓŏксәӈән пӑ щиты пŏтәртсәӈән пӑ щи арат ар иудейәт пӑ грекәт эвәԓсәт.
\p
\v 2 Ԓын айкеԓәна ӑт эвәԓты иудейәт пӑ хӑнам йохәт йэщаԓт па рут йох сӑмԓаԓ йŏвра хўщсэԓ пӑ ԉикмәԓтсэԓ.
\p
\v 3 Пӑ хŏты, ԓын щита йӑм хўват усӈән. Ԓын Турәм Куща эԓты хӑрщийа пŏтәртсәӈән, Хŏй Ԓўв йӑмәԓ йасәӈ ныты урәӈән, ԓын йошԓәнән йэмәӈ посәт пӑ вантыԓԓаӈәԓ верәт верәс.
\p
\v 4 Щи кўтән вошән мир кӑтна ортәсәс: итԓаԓ иудейәт пеԓа усәт, киметԓаԓ пӑ – апостоләт пеԓа.
\p
\v 5 Хун пӑ па рут йох пӑ иудейәт ԓыв кущайԓаԓ пиԓән ԓын пеԓайән ӑратсәт, ԓынан йэԓапты пӑ кевән йовәԓты урәӈән,
\p
\v 6 ԓын, щит эԓты хуԓман, Ликаония мўв вошӈәна, Листрайа пӑ Дервияйа, пӑ щи ԉэпән уԓты куртәта мӑтсәӈән,
\p
\v 7 пӑ щита Йӑм Айкеԓ тутԓысӈән.
\s Павел пӑ Варнава Листра вошән
\p
\v 8 Листрайән и мŏԓты, вевтам кўрпи ху опсәс, пӑтлам хот уш эԓты кўрԓы питман ус, пӑ нэмәԓты пŏрайән ӑт шушиԓыйәс.
\p
\v 9 Ԓўв Павел пŏтрәпса хуԓәнтәс. Павел ԓўв пеԓайәԓ ӑӈкәрмаԓ йўпийән, кащаԓәсԓы, ԓўв тўмтака йиты кеша эвәԓты щир тӑйәԓ,
\p
\v 10 сыйәӈ тўрән йастәс: «Нӑӈена йастәԓәм Турәм Куща Иисус Христос нэм урәӈән: нӑӈ кўрӈиԓана тўӈа нŏх ԓойа». Щӑԓта ԓўв и щишән нŏх ԓойәмтәс пӑ шушиԓыты питәс.
\p
\v 11 Мир пӑ, щит шийаԓәмаԓ кемән, мўй Павел верәс, ԓўв тўр сыйәԓ сыйәӈа версәԓы, Ликаония йасәӈән пŏтәрман: «Ԓуӈхәт хŏйат хŏрасән мўӈ хŏщайэв иԓ эсԓәщсәт».
\p
\v 12 Щӑԓта Варнава Зевса айәԓтса, Павел пӑ Ермийа\f + \fr 14:12 \fr*\fq Ермий \fq*\ft - ԓўв Гермес па, йис грек мир хŏща мет ун Зевс нэмпи ԓух айкеԓ туты ŏт; \ft*\f* айәԓтса, ԓўв йасәӈ хŏща кущайа ус.
\p
\v 13 Вошеԓ йэԓпийән Зевс ԓух хот ус, пӑ ԓўвеԓа йир верты ху, пушас ова хор мисәт пӑ сэвәм хŏрамәӈ лыптәт тўвман, мир пиԓән йирасты ўтщийәс.
\p
\v 14 Туп апостолӈән Варнава пӑ Павел, щит хуԓман кемән, ԓын сŏхԓән лакки мӑншисԓән пӑ, мир хŏща ӑратман, такан сыйәӈ тўрән пŏтәртсәӈән:
\p
\v 15 «Йох! Мўй нын верԓәты? Мин па – нын хŏрпан хŏйатӈән, пӑ нынана Йӑм Айкеԓ пŏтәртԓәмән, нын тӑм йурԓы ԓуӈхәт эԓты Ԓыԓәӈ Турәм пеԓа ат керԓәсты, Хŏй турәм хӑр пӑ мўв, пӑ щарәс, пӑ хŏԓ щит, мўй ԓыпиԓаԓән уԓ тыйәԓтәс,
\p
\v 16 Хŏй хӑщәм ишән мирәта иса ԓыв йушԓаԓән йӑхты эсԓыйәс,
\p
\v 17 Ԓўв эԓтайәԓ йӑм верәтән айкеԓ мӑты щикуш ӑт вŏԓыԓыйәс, турәм хӑр эԓты мўӈева йэрт пӑ ԓэвмаӈ пŏра мийԓыман, щӑԓта ԓэтŏтән пӑ кашән мўӈ сӑмԓув вŏԓәтман, ус».
\p
\v 18 Щиӈәԋща, щит пŏтәртман, ԓын ўрайән мир хŏща щимәщ нŏмәс такапсәтән: ԓынана йир ӑт ат версәт пӑ кашәӈ хŏйат йŏхи ат мӑнәс. Щи кўтән ԓын щита уԓман, хŏйатәт утәԓтәсӈән,
\p
\v 19 Антиохия пӑ Икония эԓты тухәԓ иудейәт йŏхәтсәт пӑ, хун апостолӈән хӑрщийа пŏтәртсәӈән, ԓыв мира ԓын эԓтан пўӈԓа мӑнты номәс такапсәт, пŏтәртман: «Ԓын нэмәԓтты тўӈа–щира йасәӈ ӑт пŏтәртԓәӈән, туп иса олмащиԓӈән». Щӑԓта, мир хущмеԓ йўпийән, Павел кевән щӑх йовәԓтса пӑ вош ким пелка таԓса, ԓўвеԓ пӑрәма нумәссэԓ, щишән.
\p
\v 20 Хун пӑ утәԓтәты йохәт ԓўв пўӈԓәԓән ӑктәщсәт, ԓўв нŏх ԓойәс пӑ воша мӑнәс, кимет хӑтәԓән пӑ Варнава пиԓән Дервияйа мӑнәс.
\s Павел пӑ Варнава Сирияйән уԓты Антиохияйа йŏхԓы керԓәты вер
\p
\v 21 Йӑм Айкеԓ тӑм вошән пŏтәртман пӑ йӑм арат утәԓтәты хŏйат Турәм Куща урәӈән мŏщатман йўпийән, ԓын йŏхԓы Листра, Икония пӑ Антиохия вошәт мŏхты мӑтсәӈән,
\p
\v 22 утәԓтәты йох сӑм такапман, эвәԓты щирән уԓты таӈман пӑ утәԓтәман, ар шук тўвман, мўӈева Турәм Хон Уԓәпсайа ԓŏӈты мосәԓ.
\p
\v 23 Павел пӑ Варнава кашәӈ пойәкщәты хŏйатәт ӑктәщиты щир кеша уна уԓты йох пŏтсәӈән пӑ, вўщԓыман пойәкщәсӈән пӑ Турәм Кущайа мӑсԓән, Хойа ԓыв эвәԓсәт.
\p
\v 24 Йухәт, Писидия мŏхты мӑнман, Памфилияйа йŏхәтсәтән,
\p
\v 25 пӑ, Турәм Куща йасәӈ Пергияйән пŏтәртман йўпийән, Атталияйа охәԓсәӈән;
\p
\v 26 Щиԓта пӑ Антиохияйа хопән мӑтсәӈән, хŏта Турәм йӑма щи вер пеԓа эвләптыман усайӈән, мўй тӑԓаӈа версәӈән.
\p
\v 27 Щи йŏхәтман пӑ пойәкщәты мŏхет йӑха ӑкәтман йўпийән, ԓын хŏԓ иса пŏтәртсәԓән, мўй ԓын пиԓәнән Турәм верәс пӑ мўй щирән Ԓўв эвәԓты вер ов па рут мира пел пўшсәԓы.
\p
\v 28 Пӑ щита утәԓтәты йохәт пиԓән йам арат сыс усӈән.
\c 15
\s Апостоләт Иерусалимән ӑктәщты вер
\p
\v 1 Тухԓәт, Иудея эԓты йŏхтәм ŏтәт, хӑнам йох утәԓтәсәт: «Моисей щирән ӑт эвтәсԓәты ки, нŏх пайтәсты ӑт верәтԓәты».
\p
\v 2 Хун пӑ нŏмәс ар щира пӑ мŏԓты кем ўра ворты вер ԓыв пиԓԓаԓән Павел пӑ Варнава хŏща тыйәс, Павела пӑ Варнавайа пӑ ԓыв кўтэԓ эԓты па тухәԓ йохәта Иерусалима мӑнты пŏтсайәт пӑ апостоләт пӑ уна уԓты икет пиԓән тӑм вер эԓты пŏтрэмәты.
\p
\v 3 Щиӈәԋща, пойәкщәты мŏхэтән мӑнты ԋотәм йўпийән, ԓыв Финикия пӑ Самария мŏхты мӑтсәт, па рут мир Турәм пеԓа керԓәты вер эԓты пŏтәртман, пӑ хŏԓ хӑнам йох хŏща ун амәт версәт.
\p
\v 4 Иерусалима йŏхәтмеԓ кемән, ԓыв пойәкщәты мŏхетән, апостоләтән пӑ ун икетән вана ўсайәт, пӑ Павел пӑ Варнава такан иса хŏԓыйэ йастәсԓән, Турәм мўй ԓын пиԓанән верәс пӑ хŏты па рут йоха эвәԓты вер ов пел пўншәс.
\p
\v 5 Щиӈәԋща тухәԓ фарисейәт эԓты эвԓәм мŏхет ўшмащты питсәт пӑ пŏтәртсәт, па рут йох эвтәптәты пӑ Моисей закон нŏх катәԓты партты мосәԓ.
\p
\v 6 Апостоләт пӑ ун икет щи вер ватты урәӈән ӑктәщсәт.
\p
\v 7 Хув нумәсмеԓ йўпийән Петра, нŏх ԓойман, ԓывиԓаԓа йастәс: «Хӑнам йох! Нын уйәтԓәты, Турәм оԓәӈ хӑтԓәт эԓты мўӈ эԓтэв мӑнэм пирысԓы, ма ўӈԓэм эԓты па рут мир Йӑм Айкеԓ йасәӈ ат хуԓсәт пӑ ат эвәԓсәт;
\p
\v 8 пӑ Сӑм Уйәтты Турәм ԓывиԓаԓа ныты пос мӑс, ԓывиԓаԓа Йэмәӈ Ԓыԓ мўӈ итэва мойԓәс.
\p
\v 9 Щӑԓта мўӈ пӑ ԓыв кўтэԓа нэмәԓтты кӑт сыра вантәсты щир ӑт пŏнәс, эвәԓты верән ԓыв сӑмԓаԓ сыстапсәԓы.
\p
\v 10 Мўйа пӑ нын ин Турәм хўщԓәԓән, утәԓтәты хŏйатәт сапԓа ԓавәрт пŏнман, мўй ӑнта мўӈ ащиԓув, ӑнта мўӈ туты ӑт верәтсэв?
\p
\v 11 Туп мўӈ эвәԓԓув, Турәм Куща Иисус Христос мӑты йӑмән, ԓыв итэԓән, нŏх пайәтԓайув».
\p
\v 12 Щи йўпийән ӑктәщәм мŏхет хŏԓ мӑшйайа йисәт пӑ Варнава пӑ Павел хуԓәтсәт. Ԓын пŏтәртсәтән, мўй хŏрпи йэмәӈ посәт пӑ вантыԓԓаӈәԓ верәт Турәм ԓын мŏхтан па рут мир кўтән верәс.
\p
\v 13 Щи йўпийән, хун ԓын мӑшйайа йистән, Иаков пŏтәр ўс пӑ йастәс: «Хӑнам йох! Мӑнэм хуԓәнтаты.
\p
\v 14 Симон аԉиԓысԓы, хŏты Турәм оԓәӈән па рут мир пеԓа ӑӈкәрмәс, щитԓаԓ эԓты Ԓўв нэмәԓ урәӈән мир ӑкәтты.
\p
\v 15 Тӑм эԓты Турәм айкеԓ туты хŏйатәт ищи пŏтәртысәт, хŏты хӑшман уԓԓа:
\p
\v 16 'Йухәт йŏхәтԓәм пӑ Давид иԓ питәм хот нŏх верԓэм, пӑ щита мўй шўкатман уԓԓа, нŏх верԓэм пӑ ԓўвеԓ па йӑԓпа ԓэщатԓэм,
\p
\v 17 па хŏйатәт пӑ хŏԓ мирәт Турәм Куща ат кӑшсәт, хŏйтат кўтән Ма нэмем йастәԓа. Щиты Турәм Куща, тӑм мўй иса верты Ŏт, пŏтәртәԓ'.
\p
\v 18 Турма хŏԓ Ԓўв верԓаԓ йис эԓты ԓэрәт.
\p
\v 19 Щишән ма нумәстэмән па рут мир эԓты Турәм пеԓа керԓәты ŏтәт уԓәпсайэԓ ԓавәрта верты ӑт мосәԓ,
\p
\v 20 ԓывиԓаԓа хӑшты мосәԓ, ԓыв ԓуӈхәтән шӑкатәм ԓэтŏт эԓты, пакрасԓәты вер эԓты, шакәптәм вой ԋŏхи пӑ ўр эԓты йŏхи ат ԓавԓәссәт, пӑ па хŏйатәта щит ӑт ат версәт, мўй ԓывиԓаԓа ӑт ԓӑӈхасәт.
\p
\v 21 Моисей закон йис тэԓән вошәтән иса пŏтәртԓа пӑ кашәӈ шаббат хӑтәԓән иудейәт пойәкщәты хотәтән ԓўӈәтԓа».
\s Апостоләт хӑншәм айкеԓ па рут мир эԓты уԓты эвԓәм йохәта китԓәт
\p
\v 22 Щиӈәԋща апостоләт пӑ ун икет аратәԓ пойәкщәты хŏйатԓаԓ пиԓән, ԓыв кўтԓаԓ эԓты йох пирыман, Антиохияйа Павел пӑ Варнава пиԓән китты нŏмәс версәт, щи мŏхет: Варсавайа айәԓтты Иуда, пӑ Сила, хӑнам йох кўтән кущайа уԓты кӑтӈән.
\p
\v 23 Ԓыв пиԓԓаԓән щимәщ хӑншәм айкеԓ мӑсәт: «Апостоләт пӑ ун икет пӑ хӑнам йохәт Антиохияйән, Сирияйән пӑ Киликияйән уԓты па рут мир эԓты уԓты хӑнам йохәта: ўща уԓаты.
\p
\v 24 Мўӈ хуԓтмәсэв, мӑтты тухәԓ, мўӈ эԓтэв ким этәм ŏтәт, ԓыв пŏтәрԓаԓән нынан ԓыԓәтсәԓаԓ пӑ нын сӑмԓән йэша мӑнәԓтсәԓаԓ, пŏтәртман, мӑтты эвтәсты мосәԓ пӑ закон хўват уԓты мосәԓ. Щит мўӈ ԓывиԓаԓа ӑт партыԓысув,
\p
\v 25 мўӈ, йӑха актәщман, йох пирыман, сӑмԓува мосты мўӈ Варнавайэв пӑ Павелэв пиԓән нын хŏщайән китты и нŏмәсән артаԓәсэв,
\p
\v 26 ԓын мўӈ Турәм Кущайэв Иисус Христос нэм урәӈән сӑмԓән мийәм хŏйатӈән.
\p
\v 27 Щиӈәԋща, мўӈ Иуда пӑ Сила китсув, нынана ԓын йасәӈән щит па ԓэра верԓәԓән.
\p
\v 28 Йэмәӈ Ԓыԓ пӑ мўӈ тӑм мосты вер тўмпийән нынан нэмәԓтты па вер верты ӑт мӑԓув:
\p
\v 29 ԓух йир, пӑ ўр, пӑ шакәптәм ԋŏхи, пӑ пакрасԓәты эԓты йŏхи ԓавԓәсты, пӑ па хŏйатәта щит ӑт верты, мўй нынана ӑт ԓӑӈхаԓты. Тӑм эԓт тӑйман, йӑма верԓәты. Тўмтака уԓаты».
\p
\v 30 Щӑԓта, китәм ŏтәт Антиохияйа йŏхәтсәт пӑ, хŏйатәт ӑкәтмеԓ кемән, хӑншәм нэпек мӑсэԓ.
\p
\v 31 Ԓыв пӑ, ԓўӈәтмеԓ кемән, щи утәԓтәпса эԓты нŏх амәтсәт.
\p
\v 32 Иуда пӑ Сила, Турәм айкеԓ туты хŏйатӈәна уԓман, хӑнам йоха йӑм арат йасәӈ утәԓтәты щира йастәсӈән пӑ ԓывиԓаԓ такапсәԓән.
\p
\v 33 Мŏԓкем щита уԓман йўпийән, ԓын хӑнам йохән апостоләт хŏща йӑм нŏмәсән эсәԓсайӈән.
\p
\v 34 Туп Сила щита хӑщты нŏмәсән йŏхәтса. [Иуда пӑ Иерусалима йŏхԓы йŏхтәс.]
\p
\v 35 Павел пӑ щӑԓта Варнава Антиохияйән усӈән. Щита ԓын утәԓтәсӈән пӑ Турәм Куща йасәӈ Йӑм Айкеԓа па мŏхет пиԓән тутԓысӈән.
\s Павел Йӑм Айкеԓ туты кимет пўш мӑнәԓ
\p
\v 36 Мŏԓты кем пŏра хӑщмаԓ йўпийән Павел Варнавайа йастәс: «Па мӑнԓәмән, мин хӑнам йохԓәмән хŏща йӑхԓәмән, кашәӈ вошән, хŏта мин Турәм Куща йасәӈ тутԓысмән, ватԓэмән, хŏты ԓыв уԓԓәт».
\p
\v 37 Варнава, Марка айәԓты, Иоанн пӑтән ўты ўтщисԓы.
\p
\v 38 Туп Павел щит пӑтән ўты ӑт ԓӑӈхас, хŏй Памфилияйән ԓынан хӑйсәԓы пӑ ԓынана мийәм вер тӑԓаӈа верты ӑт ԋотәс.
\p
\v 39 Тӑм эԓты нŏпса ӑт ԓэщаԓәты вер тыйәс, щишән ԓын кўтанән кӑтна мӑтсәӈән; щӑԓта Варнава, Марк ўйман, Кипр пеԓа нык хўвԓәс;
\p
\v 40 Павел пӑ, ԓўвеԓа Сила пирымаԓ йўпийән, хӑнам йохәтән Турәм йӑма эвԓәптыман, мӑнәс,
\p
\v 41 пӑ Сирия пӑ Киликия сӑхат, пойәкщәты мир такапман, йӑӈхәс.
\c 16
\s Тимофей Павел хŏща пиԓтәщты вер
\p
\v 1 Ԓўв Дервия пӑ Листра вошӈән унты йŏхтәс. Пӑ щита и мŏԓты утәԓтыты ху ус, нэмәԓән Тимофей. Ԓўв аԋԏэԓ эвԓәм иудей нэ, ащеԓ пӑ – грек ху,
\p
\v 2 пӑ ԓўв эԓтэԓ Листрайән пӑ Иконияйән уԓәм хӑнам йох йӑма йастыԓысәт.
\p
\v 3 Павел ԓўвеԓ пӑтән ўты нŏмәс верәс; пӑ, ўймаԓ кемән, щи тӑхайәтән уԓәм иудейәт урәӈән, эвәтты верән версәԓы; ԓўв ащеԓ грека уԓты вер хŏԓыйэ хŏйатәтән уйәтса, щишән.
\p
\v 4 Вошәт сӑхат мӑнман, ԓыв эвәԓты мŏхет апостоләтән пӑ ун икетән Иерусалимән ԓэщатәм мŏрт щирәт хўват уԓты партсәт.
\p
\v 5 Пӑ пойәкщәты актәщәм мŏхет кашәӈ тӑхайән эвәԓты верән такамтыԓәт пӑ кашәӈ хӑтәԓ арамәԓәт.
\s Павел атәԓән ватты щирәԓ хŏща Македония мўвәӈ ху этәԓ
\p
\v 6 Фригия пӑ Галатия мўв сӑхат мӑнман, Йэмәӈ Ԓыԓән Асия мўвән ԓыв Йӑм айкеԓ туты ӑт эсәԓсайәт.
\p
\v 7 Мисия мўв унты йŏхәтмеԓ йўпийән, Вифиния мўва мӑнты ўтщиԓысәт; туп Йэмәӈ Ԓыԓ ԓывиԓаԓ тŏхи ӑт эсәԓсәԓы.
\p
\v 8 Мисия хӑйман, пӑ ԓыв Троада воша охәԓсәт.
\p
\v 9 Щӑԓта атәԓән Павела ватты щир ус: и мŏԓтты ху, Македония мўвәӈ ху, этәс. Ԓўв ԓойәс пӑ ԓўвеԓ вохԓәԓы: «Македонияйа йŏхта пӑ мўӈева ԋоты».
\p
\v 10 Щи вантәпса йўпийән ищи пўԉаӈ мўӈ Македонияйа мӑнты нŏмәс версув, нумәсман, Турәм Куща мўӈев щита Йӑм Айкеԓ тутԓыты вохсәԓы.
\s Павел Филиппы воша йохәтты вер
\p
\v 11 Щиӈәԋща, Троада вош эԓты нык хўвԓәмеԓ йўпийән, мўӈ тŏрԓы Самофракия пухәр мўва йŏхәтсув, кимет хӑтәԓ пӑ Неаполь воша,
\p
\v 12 щиԓта пӑ Филлиппы воша йŏхәтсув: Македония мўв щуӈән мет оԓәӈ вош, Рим пеԓа питәм вош. Тӑм вошән мўӈ кӑмәтса хӑтәԓ усув.
\p
\v 13 Шаббат хӑтәԓән пӑ мўӈ вош шӑнша йŏхан пеԓа этсув, хŏта, уԓтыйән, пойәкщәты тӑха ус, пӑ, иԓ омәсман, щита ӑктәщәм имет пиԓән пŏтәртсув.
\p
\v 14 Ԓыв кўтэԓән Фиатир вош эԓты Лидия нэмпи и нэ ус, ԓўв тынәӈ питы ўрты щӑшканәт тыныйәс. Лидия Турәм пеԓа сӑмәӈа ус, пӑ Павел мўй пŏтәртәс, Турәм Кущайән ԓўв сӑмәԓ щи пеԓа пел пўшса.
\p
\v 15 Хун пӑ ԓўв йиӈка ԓŏӈәԓтыса пӑ ԓўв йŏԓән уԓты мŏхиԓаԓ па, мўӈев ԓўв хŏщайәԓ вохсәԓы, пŏтәртман: «Нын мӑнэм Турәм Куща пеԓа тŏрԓы уԓты верэм йӑнайа ԓўӈәтсәԓԓән ки, ма хотэма ԓŏӈаты пӑ ма хŏщайэм уԓаты». Пӑ мўӈев эвԓәптәсԓы.
\s Павел пӑ Сила касна хота во̆щкиты вер
\p
\v 16 Щиты ус, хун мўӈ пойәкщәты тӑхайа мӑнмевән, и митнэ пиԓән уйтатсув, ԓўв кўԉ сŏхән катәԓман уса, аԉисыты щирәԓ хўват ԓўв кущайԓаԓа ар ŏх йŏхтәптыйәс.
\p
\v 17 Павел йўпийән пӑ мўӈ йўпевән шушман, ԓўв ўвәс, пŏтәртман: «Тӑм хŏйатәт – Нўм Турма рупитты йохәт, мўӈева нŏх пайтәсты йуш аԉԓәт».
\p
\v 18 Щиты ԓўв ар хӑтәԓ верыԓыйәс. Павел, ԉикащман, кўԉ сŏх пеԓа карэмәс пӑ йастәс: «Иисус Христос нэмән нӑӈен ԓўв ԓыпеԓ эԓты ким этты партԓэм». Пӑ атәм ԓыԓ ищи кумат ким этәс.
\p
\v 19 Щиӈәԋща ԓўв кущайԓаԓ, ваттэԓән, ԓыв ŏх йиты тӑхайэԓ хŏԓас, Павел пӑ Сила ԋӑрэмәсайӈән пӑ мир кущайәт хŏща вош хӑрыйа хŏрӈәԓтсайӈән.
\p
\v 20 Щӑԓта, ԓынан рим кущайӈән хŏща тўвман, йастәсәт: «Тӑм хŏйатӈән, иудейәта уԓман, мўӈ вошев уԓәпса ԓыԓԓәты щир этәԓтәԓтән
\p
\v 21 пӑ щимәщ щирәт эԓты пŏтәртԓәтән, мўй мўӈева, Рим хŏйатәта, вана ўты пӑ верты ӑт мосәԓ».
\p
\v 22 Мир ищиты ԓын пеԓайән эԓԓәс, рим кущайӈән пӑ ԓын эԓтайән сŏхԓән хŏԓт мӑшман йўпийән, ԓынан йўхән сэкты партсәԓән
\p
\v 23 пӑ ԓын, артан йўхән кўтәртыйәмӈән йўпийән, касна хота вŏщкисайӈән, касна хот шавиты хŏйата такан шавиты партсайӈән.
\p
\v 24 Щимәщ партәпса йоша павәтмаԓ йўпийән, ԓўв ԓынан ԓыпи касна хот йӑта вŏщкәсԓы пӑ ԓын кўрԓән йўх сэсыйа сэксәԓы.
\p
\v 25 Ат кўтәп кемән Павел пӑ Сила, пойәкщәман, Турәм, арыман, ишәксәԓән; касна хота питәм ŏтәт пӑ ԓынан хуԓәтсәт.
\p
\v 26 Шӑмкап мўв такан тӑриты питәс, щиӈәԋща касна хот пӑты ԋŏхԓәс; и щишән овәт хŏԓыйэ пелки пўншатсәт, пӑ хŏԓыйэ хŏйатәт хŏща сэсэт лыԋа йисәт.
\p
\v 27 Касна хот шавиты хŏйат пӑ, нŏх верԓәмаԓән, касна хот овәт пелки пуншәм шийаԓәмаԓ кемән, аԓты кешеԓ ким лакемәсԓы пӑ ԓўвеԓ ԓўв пӑратты ўтщисԓы, ԓўв нумәсәԓ, опсәм хŏйатәт хŏнтасәт.
\p
\v 28 Туп Павел сыйәӈ тўрән такан йастәс, пŏтәртман: «Нӑӈена нэмәԓтты атәм аԓ вера, мўӈ хŏԓ тӑта уԓԓув».
\p
\v 29 Ԓўв тўт такан вохәс, касна хот ԓыпийа хухәԓмәс пӑ тӑриман Павел пӑ Сила хŏща керәптыйәс,
\p
\v 30 пӑ, ԓынан ким этәԓтәман, йастәс: «Ма кущайӈәԓам! Мўй мӑнэм верты мосәԓ, нŏх пайтәсты урәӈән?»
\p
\v 31 Ԓын пӑ йастәсӈән: «Турәм Куща Иисус Христоса эвԓа, пӑ нӑӈ нŏх пайәтԓайән, нӑӈ хот тэԓэн па».
\p
\v 32 Щӑԓта Турәм Куща йасәӈ ԓўвеԓа пӑ хŏԓ, ԓўв хотәԓән уԓәм ŏтәта, пŏтәртса.
\p
\v 33 Пӑ ԓўв, ԓынан атәԓән ўймаԓ кемән, ԓын ԋўләмԓән нŏх ԉŏхәтсәԓы пӑ ищи мŏхты ԓўв йиӈка ԓŏӈәԓтыса пӑ ԓўв хотәӈ мŏхиԓаԓ па.
\p
\v 34 Щӑԓта, ԓынан йŏхи хотәԓа тўвмаԓ йўпийән, ԓэты пӑсана вохсәԓы пӑ хŏт тэԓәԓ пиԓән амтәс, Турма эвәԓмаԓ урәӈән.
\p
\v 35 Хун пӑ хӑтԓа йис, рим кущайӈән вошәӈ мит йохӈән йастәты китсәтән: «Щи хŏйатӈән эсԓаԓән».
\p
\v 36 Касна хот шавиты хŏйат щит эԓты Павела такан йастәс: «Рим кущайӈән нынан эсәԓты партсәтән; щиӈәԋща, ин ким этатән пӑ йӑм нŏмәсән мӑнатән».
\p
\v 37 Туп Павел ԓын пеԓайәна йастәс: «Минэмән, Рим хŏйатӈән, сўт такԓы хŏԓ мир сурән сэксәԓән пӑ касна хота вŏщкәсԓән, ин пӑ хӑԋайән эсәԓԓаймән? Ӑнта, ты ат йŏхәтԓәтән пӑ минэмән ԓын ким ат этәԓтәԓԓән».
\p
\v 38 Вошәӈ мит йохӈән щи йасӈәт рим кущайӈәна йастәсԓән, пӑ щитӈән, Рим йŏха уԓты вер хуԓман кемән, хŏԓт пӑԓтәмәсӈән.
\p
\v 39 Щӑԓта, щи йŏхәтсәтән, ԓын пеԓайән пойкащсәтән пӑ, ким этәԓтәман йўпийән, вош эԓты ким мӑнты партсәԓән.
\p
\v 40 Ԓын пӑ, касна хот эԓты ким этман йўпийән, Лидия хŏща йŏхәтсәӈән пӑ, хӑнам йохԓән шийаԓәман кемән, ԓывиԓаԓ утәԓтәсԓән, пӑ йэԓԓы мӑтсәӈән.
\c 17
\s Павел пӑ Сила Фессалоника вошән
\p
\v 1 Амфиполь пӑ Аполлония мŏхты мӑнман, ԓын Фессалоника воша йŏхәтсәтән, хŏта иудейәт пойәкщәты хот ус.
\p
\v 2 Павел, ԓўв уԓԓытаԓ щирәԓән, ԓыв хŏщайэԓа ԓŏӈәс пӑ хуԓәм шаббат хӑтәԓ и йўпийән Йэмәӈ Нэпек эԓты ԓыв пиԓԓаԓән пŏтәртәс,
\p
\v 3 ԓывиԓаԓа аԉиԓыман пӑ тŏрԓы йастәман, Христоса сŏрма питты пӑ нŏх ԓыԓәӈԓәты мосәс, пӑ йастәс: «Тӑм Христос - щит Иисус, Хŏй эԓты ма нынана пŏтәртԓәм».
\p
\v 4 Щӑԓта ԓыв эԓтыԓаԓ тухәԓԓаԓ эвәԓсәт пӑ Павел пӑ Сила пеԓа пайтәссәт, хŏты грекәт эԓты, Турәм пеԓа сӑмәӈ хŏйат щи арат ар, и щиты пӑ ԓӑтәӈа уԓты нэӈәт эԓты йӑм арат.
\p
\v 5 Туп ӑт эвԓәм иудейәт, шек нŏмәсән ԉикащман пӑ вош хӑри эԓты тухәԓ ӑт рӑхты хŏйатәт ўйман, похла ӑктәщсәт пӑ вош нŏх ԋŏхаԓтты питсэԓ пӑ, Иасон хот ԉэпа ӑратмеԓ кемән, ԓынан, мир хŏща ким туты урәӈән, кӑшсэԓ.
\p
\v 6 Ԓынан ӑт уйәтмеԓ йўпийән, ԓыв Иасон пӑ па эвәԓты хӑнам йох вош кущайәт хŏща хипԉәԓтсәԓаԓ, ўвман: «Тӑм мўв ԓŏватән уԓәпса шўкатты ŏтәт ты па йŏхәтсәт,
\p
\v 7 Иасон пӑ ԓывиԓаԓ вана ўсԓы, пӑ хŏԓыйэ ԓыв, па Ŏт, Иисус, хона тӑйман, кесарь партты щира ӑт уԓԓәт».
\p
\v 8 Щиӈәԋща щит хуԓәм мир пӑ вошәӈ кущайәт хурэпа пайәтсәԓаԓ.
\p
\v 9 Туп тӑмет, Иасон пӑ па ŏтәт эԓты тын ўйман, ԓывиԓаԓ эсәԓсәԓаԓ.
\s Павел пӑ Сила Верия вошән
\p
\v 10 Хӑнам йохәт пӑ ищи мŏхты атәԓән Павел пӑ Сила Верия воша китсэԓ, хŏԓта ԓын йŏхәтман кемән, иудейәт пойәкщәты хота мӑтсәӈән.
\p
\v 11 Тӑта уԓты ŏтәт Фессалоника мŏхет эԓты йӑм нŏпсәӈшәкәт: ԓыв йасәӈ хŏԓ сӑмәӈа вана ўсэԓ, кашәӈ хӑтәԓ Йэмәӈ Нэпек ԓэрапман, тӑми а мўй тŏрԓы щиты.
\p
\v 12 Щӑԓта ԓыв эԓтыԓаԓ ар хŏйат эвԓәс, пӑ грек ԓӑтәӈ нэӈәт эԓты пӑ йох эԓты йӑм арат.
\p
\v 13 Туп хун Фессалоника иудейәт мŏштәсэԓ, Верия хŏща па Павелән Турәм йасәӈ туса, ԓыв щи па йŏхәтсәт пӑ мир нŏх кўрәтты пӑ нŏх ԋŏхаԓты питсэԓ.
\p
\v 14 Щишән хӑнам йох ищи мŏхты Павел китсэԓ, щарәс пеԓа шушты щира; Сила пӑ Тимофей щи вошән хӑщсәтән.
\p
\v 15 Павела мӑнты ԋотәм ŏтәт ԓўвеԓ Афины вош унты ԋŏтсэԓ. Ԓыв, Силайа пӑ Тимофейа мийәм партәпса йоша павәтмеԓ кемән, мӑтты ԓын сорашәк ԓўв хŏщайәԓ ат йŏхәтсәӈән, йŏхԓы мӑтсәт.
\s Павел Афины вошән
\p
\v 16 Павел мӑнты пиԓӈәԓаԓ ԓавәԓтаԓ эԓты Афины вош хуват шушиԓыйәс пӑ, тӑм вош тэԓыйэ ԓух тӑйтаԓ урәӈән, ԓўв нŏпсәԓ ўшмащәс.
\p
\v 17 Щиӈәԋща, ԓўв иудейәт пойәкщәты хотән иудейәт пиԓән пӑ Турәм сӑмәӈа тӑйты грек йох пиԓән, пӑ кашәӈ хӑтәԓ вош хӑрийән уйтантыԓыты хŏйатәт пиԓән нумәссәс.
\p
\v 18 Ԓўв пиԓәԓән тухәԓ эпикур пӑ стоик ашкуԓайәт эԓты уԓты нŏпсәӈ йох пŏтрэмәты питыԓысәт. Итԓаԓ иԋщәссәт: «Мўй пӑ щи авашты ŏт йастәты ԓӑӈхаԓ?», па ŏтәт пӑ: «Иԓампа, ԓўв па мўв хŏйатәт ԓуӈхәт эԓты утәԓтәԓ», ԓўв ԓывиԓаԓа Иисус пӑ нŏх ԓыԓәӈԓәты вер эԓты Йӑм Айкеԓ тус, щишән.
\p
\v 19 Щӑԓта, ԓўвеԓ пӑтән ўйман, Ареопаг нэмпи тӑхайа\f + \fr 17:19 \fr*\fq Ареопаг нэмпи тӑха \fq*\ft - словарьән ванты;\ft*\f* тусэԓ пӑ йастәԓәт: «Мўӈ а мўй верәтԓэв уйәтты, мўй щит щимәщ йӑԓәп утәԓтәпса, мўй эԓты нӑӈ пŏтәртсән?
\p
\v 20 Нӑӈ мŏԓты ŏшԓы-уйтԓы ŏт мўӈ паԓԓува хуԓмәԓтԓән. Щишән мўӈ уйәтты ԓӑӈхаԓув, мўй щит?»
\p
\v 21 Афины мŏхет пӑ хŏԓ пӑ ԓўв хŏщайэԓ уԓты па мўв хŏйатәт нэмәԓты щирән пŏрайэԓ ӑт хӑщәптыԓысәт, туп щиты, мŏԓты йӑԓәп вер эԓты ат хуԓәтса пӑ ат пŏтәртса.
\p
\v 22 Щӑԓта, Павел Ареопаг кўтпа ԓойман, йастәс: «Афины хŏйатәт! Ма иса ваттэмән, нын ԓўӈхәт эԓты нумәсты вер шек такан тӑйԓәԓән.
\p
\v 23 Нын йэмәӈ лотԓән вантыман йӑхман, ма и йирасты лот уйәтсәм, хŏта хӑшман уса: 'Ӑт уйәтты Турма'. Тӑман-щи, Хŏйтан нын, ӑт уйәтман, такан нумԓәԓән, ма нынана такан айәԓԓэм.
\p
\v 24 Турәм, уԓты-омәсты мир тыйәԓтәм Ŏт, Ԓўв, опәԉән пӑ мўвән Турәм Кущайа уԓман, ӑнта йошән верәм хотәтән уԓ
\p
\v 25 пӑ хŏйат йошән верты верәт ӑт вохәԓ, ищи мӑтты Ԓўвеԓ мŏԓты мосәԓ, Ԓўв кашәӈ ŏта уԓәпса пӑ ԓыԓ, пӑ мўй иса мӑԓ.
\p
\v 26 И кӑԓы эԓты Ԓўв аратәԓ хŏйат рут тыйәԓтәс, иса мўв ԓŏватән уԓты урәӈән, хŏта Ԓўв хŏԓ хŏйат рутәта мŏрт пŏра пӑ мŏрт уԓты тӑха ԓэщатәс.
\p
\v 27 Ԓыв Турәм ат кӑшсәт, Ԓўв уԓты щащәԓ ат мŏштәсәт пӑ Ԓўвеԓ ат уйәтсэԓ - щи кўш Ԓўв кашәӈ ŏтԓув пўӈәԓән ванән уԓ,
\p
\v 28 щиты ӑт уԓ, мўӈ Ԓўвеԓән уԓԓув пӑ ԋŏхаԓув, хŏты тухәԓ нын арәт верты мŏхиԓән пŏтәртысәт: 'Мўӈ Ԓўв пиԓәԓән и рут'.
\p
\v 29 Щиӈәԋща, Турәм рута уԓман, мўӈев щиты нумәсты ӑт мосәԓ, мӑтты Турәм сорԋи, мўй пӑ щелŏх, мўй пӑ хŏйат нŏмәс хўват хŏрасән верәм кев хŏрпи.
\p
\v 30 Щиӈәԋща, Турәм йӑна вер ӑт уйтәм пŏра хӑйман, Турәм ин хŏйатәта хŏԓ кашәӈ тӑхайән кӑрэк эԓты шӑнша керԓәты партәԓ,
\p
\v 31 Ԓўв хӑтәԓ ԓэщатәс, щишән, хун уԓты-омәсты турәм вещката сўтәтты питԓәԓы, Ԓўв щи кеша пŏнәм Хŏйатәԓ сӑхат, пӑрәм эԓты Ԓўвеԓ нŏх ԓыԓӈатман, мира иса, уйәтты урәӈән, ваттәԓтәсԓы».
\p
\v 32 Пӑрәм эԓты нŏх ԓыԓӈатәм вер хуԓмеԓ кемән, итԓаԓ ӑԓ хўләщсәт, киметԓаԓ пӑ йастәсәт: «Тӑм эԓты нӑӈен па ишән хуԓәтԓэв».
\p
\v 33 Щиӈәԋща, Павел ԓыв эԓтыԓаԓ мӑнәс.
\p
\v 34 Тухәԓ йох пӑ, ԓўв хŏщайәԓа рӑхәԓтысәт пӑ эвәԓсәт; ԓыв кўтэԓән Дионисий Ареопаг ху\f + \fr 17:34 \fr*\fq Ареопаг ху \fq*\ft - сут йохәт эԓты ит; \ft*\f*, Дамарь нэмпи нэ пӑ ԓыв пиԓԓаԓән па мŏхет усәт.
\c 18
\s Павел Коринф вошән
\p
\v 1 Тӑм йўпийән Павел, Афины вош хӑймаԓ йупийән, Коринф воша йŏхтәс;
\p
\v 2 Щита ԓўв и иудей ху уйтәс, нэмәԓән Акила, Понт мўв эԓты уԓты ху. Акила тӑм ванән Италия эԓты Прискилла имеԓ пиԓән йŏхтәс, - Клавдий нэмпи кесарь иудейәта хŏԓ Рим эԓты мӑнты партсәԓы, - пӑ Павел ԓын хŏщайән йŏхтәс;
\p
\v 3 Ԓын и хŏрпи верты ŏт тӑйсәӈән: ԓын пирщин хотәт ԓэщатсәӈән, пӑ щишән Павел ԓын пиԓанән рупитты хӑщәс.
\p
\v 4 Кашәӈ шаббат хӑтәԓән ԓўв иудейәт пойәкщәты хотән иудейәт пӑ грекәт пиԓән пŏтәртәс пӑ ԓывиԓаԓ таӈиԓысԓы\f + \fr 18:4 \fr*\fq таӈиԓыты \fq*\ft - ар пуш такан мŏԓты эԓты йастәты, нŏпса йӑма ат питәс;\ft*\f*.
\p
\v 5 Хун пӑ Македония эԓты Сила пӑ Тимофей йŏхәтсәӈән, Павел иудейәта пŏтәртты ԓыԓәԓән иԉапса, мӑтты Иисус - щит Христос.
\p
\v 6 Хун пӑ ԓыв ԓўвеԓ йэртԓыты пӑ ԓўвеԓа атма йастәты питсәт, ԓўв ԓумтәмԓаԓ иԓ пӑркатмаԓ кемән, ԓывиԓаԓа йастәс: «Нын кӑԓыԓән нын ŏх пӑтԓәнән;\f + \fr 18:6 \fr*\fq Нын кӑԓыԓән нын ŏхпӑтԓәнән - тӑм йасӈәт щит аԉԓәт: нынәԓән нын Турәм йэԓпийән накԓата пайәтсәԓән;\fq*\f* ма сыстам; тӑԓта йэԓԓы па рут мир хŏща мӑнԓәм».
\p
\v 7 Павел иудейәт пойәкщәты хот эԓты ким этәс пӑ ванән уԓты хота ԓŏӈәс, хŏта Иуст нэмпи ху, Турәм пеԓа сӑмәӈ ŏт, ус.
\p
\v 8 иудейәт пойәкщәты хот куща Крисп пӑ хŏԓ ԓўв йŏԓән тӑйты мŏхиԓаԓ пиԓән Турәм Кущайа эвԓәс, пӑ Коринф мŏхәт эԓты ар хŏйат, хуԓәтман, эвәԓсәт пӑ йиӈка ԓŏӈәԓтыԓысайәт.
\p
\v 9 Турәм Куща пӑ атәԓән Павел вантәпсайәԓ хŏща йастәс: «Аԓ пӑԓа, туп пŏтәрта пӑ шитама аԓ йўва,
\p
\v 10 Ма нӑӈ пиԓэнән уԓԓәм, пӑ нэмәԓты ŏт нӑӈена атәм ӑт верәԓ, Ма тӑм вошән ар хŏйат тӑйԓәм, щишән».
\p
\v 11 Пӑ ԓўв щита, ԓывиԓаԓ Турәм йасӈа утәԓтыман, тӑԓ-ԓўӈ пӑ хут тыԓәщ арата хӑщиԓыйәс.
\p
\v 12 Щи кўтән, Ахаия мўвән Галлион проконсул уԓәм пŏрайән, иудейәт и нŏмәсән Павел йэщаԓт эԓԓәсәт пӑ сўт верты тӑхайа тусэԓ,
\p
\v 13 пŏтәрман, мӑтты ԓўв хŏйатәт, Турәм пеԓа сӑмәӈа уԓты, ӑнтом Закон щирән утәԓтәԓԓы.
\p
\v 14 Хун пӑ Павел уӈԓәԓ пел пўшты ўтщисԓы, Галлион иудейәта йастәс: «Иудейәт! Мŏԓты атәм вер мўй пӑ ԓоԓмасты, веԓтатты вер верәс ки, ма ԓуԓән нынан хуԓәтты щир тӑйсәм,
\p
\v 15 туп хун утәԓтәты вер эԓты, пӑ нэмәт эԓты, пӑ нын законән эԓты ўра вортԓа, нын щирәнән артаԓыйаԓән; ма щита сўта уԓты ӑт ԓӑӈхаԓәм».
\p
\v 16 Щӑԓта сўт верты тӑха эԓты ԓывиԓаԓ воштәсԓы.
\p
\v 17 Грекәт хŏԓыйэ иудейәт пойәкщәты хот куща Сосфен ԋӑрэмәсэԓ пӑ ԓўвеԓ сўт верты хот йэԓпийән сэксэԓ; туп Галлион щит эԓты йэша нэш ӑт нумисыйәс.
\s Павел Антиохияйа йŏхԓы керԓәты вер
\p
\v 18 Павел йам арат хӑтәԓ Коринф вошән ус. Щи йўпийән ԓўв хӑнам йох пиԓән пайәм уԓәм верәс пӑ Акила пӑ Прискилла пиԓән Сирия мўва хŏпән мӑнәс. Мӑнтаԓ йэԓпийән Павел Кенхрей вошән ŏхәԓ ԓŏртсәԓы, Турма аԉәм вер тӑйәс, щишән.
\p
\v 19 Ефеса йŏхәтмеԓ йўпийән ԓынан щита хӑйсәԓы, ԓўв пӑ иудейәт пойәкщәты хота ԓŏӈәс пӑ иудейәт пиԓән нумәсман пŏтрэмәс.
\p
\v 20 Хун пӑ ԓыв ўратсәт, ԓўв хўвшәк ԓыв хŏщайэԓ ат ус, ԓўв ӑт кашащәс,
\p
\v 21 туп ԓыв пиԓԓаԓән пайәмуԓәм верәс, йастәман: «Мӑнэм йиты йэмәӈ хӑтәԓән мет шопәӈ Иерусалимән уԓты мосәԓ; нын хŏщайән пӑ, Турма рӑхты ки питәԓ, па йŏхԓы йŏхәтԓәм». Щӑԓта Ефес вош эԓты хопән мӑнәс. [Акила пӑ Прискилла Ефесән хӑщсәтән.]
\p
\v 22 Хоп эԓты Кесария воша ŏхәԓмаԓ йўпийән, ԓўв Иерусалима нŏх йŏхтәс, щита пойәкщәты ӑктәщиты мŏхет йӑм йасәӈән йастәсԓы пӑ Антиохия воша мӑнәс.
\p
\v 23 Щӑԓта щита мŏԓты кем сыс хӑйман, этәс, пӑ и оԓтман Галатия пӑ Фригия мўвӈән мŏхты мӑнәс, утәԓтәты йŏх такапман.
\s Аполлос Ефесән пӑ Коринфән
\p
\v 24 И мӑтты иудей, нэмәԓән Аполлос, Александрия\f + \fr 18:24 \fr*\fq Александрия \fq*\ft - Египет вош; \ft*\f* вошәӈ ху, туса пŏтәртты пӑ Йэмеӈ Нэпек уйәтты ху, Ефеса йŏхтәс.
\p
\v 25 Ԓўв Турәм Куща Йуш пеԓа утәԓтәман ус пӑ шек такан пӑ эвәԓты щира пŏтәртәс, тўӈа-щира Турәм Куща эԓты утәԓтәс, кўш туп ԓўв Иоанн йиӈка ԓŏӈәԓтыйәпса уйтәс.
\p
\v 26 Ԓўв, ӑт пӑԓман, иудейәт пойәкщәты хотән пŏтәртты питәс. Ԓўвеԓ хуԓмаԓ кемән Акила пӑ Прискилла ԓўвеԓ вана ўсԓән пӑ тўӈашәк Турәм Куща Йуш ԓўвеԓа таӈсәԓән.
\p
\v 27 Хун пӑ ԓўв Ахаия мўва мӑнты утщийәс, хӑнам йох щита уԓты утәԓтәты йохәта нэпек хӑшсәт, ԓыв ԓўвеԓ вана ўты партсэԓ; ԓўв тŏхи йŏхәтмаԓ йўпийән, ар ԋотәп щи хŏйатәта верәс, хŏй Турәм йӑм хўватән эвәԓман ус.
\p
\v 28 Ԓўв мир йэԓпийән иудейәт ԓомтәтԓыты вер шек эԓпа аԉиԓысԓы, Йэмәӈ Нэпек хўват этәԓтыман, мӑтты Иисус уԓ Христос.
\c 19
\s Павел Ефесән
\p
\v 1 Аполлос Коринфән уԓмаԓ сыс, Павел нŏхԓы уԓты мўвәт мŏхты мӑнман, Ефеса йŏхтәс пӑ щита тухәԓ утәԓтәты йох уйәтмаԓ кемән,
\p
\v 2 ԓывиԓаԓа йастәс: «Йэмәӈ Ԓыԓ нын, эвәԓман йўпийән, вана ўсԓән амўй?» Ԓыв пӑ ԓўвеԓа йастәсәт: «Мўӈ хŏԓна пӑ ӑт хуԓԓысэв, Йэмәӈ Ԓыԓ амўй щит».
\p
\v 3 Ԓўв ԓывиԓаԓа йастәс: «Мўй пеԓа нын йиӈка ԓŏӈәԓтысайты?» Ԓыв йŏхԓы йастәсәт: «Иоанн йиӈка ԓŏӈәԓтыйәпса пеԓа».
\p
\v 4 Павел йастәс: «Иоанн йиӈка ԓŏӈәԓтыйәпса ус кӑрэк эԓты шӑшән керԓәты йиӈка ԓŏӈәԓтыйәпса, хŏйатәта пŏтәртман, ԓўв йўпеԓән Йиты Ŏта, Христоса Иисуса\f + \fr 19:4 \fr*\ft Христос Иисус - щит Мессия Иисус;\ft*\f*, ат эвәԓсәт».
\p
\v 5 Щит хуԓмеԓ кемән, ԓыв Турәм Куща Иисус нэм урәӈән йиӈка ԓŏӈәԓтысайәт,
\p
\v 6 пӑ, хун Павел ԓыв ŏхпӑтԓаԓ эԓты йошӈиԓаԓ пŏтсәԓы, ԓыв эԓтыԓаԓа Йэмәӈ Ԓыԓ иԓ ŏхԓәс, пӑ ԓыв па йасӈәтән пŏтәрты пӑ Турәм эԓты айкеԓ туты питсәт.
\p
\v 7 Ԓыв аратэԓән кӑтхŏщйаӈ кем хŏйат ус.
\p
\v 8 Иудейәт пойәкщәты хота йŏхәтмаԓән, ԓўв, ӑт хурыман, хуԓәм тыԓәщ утәԓтәс, Турәм Хон Уԓәпса эԓты пŏтрэмәман пӑ эвԓәптәман.
\p
\v 9 Туп ԓыв эԓтыԓаԓ тухԓәт сӑмԓаԓ така версәԓаԓ пӑ эвәԓты ӑт ԓӑӈхасәт, Турәм Куща Йуш мир йэԓпийән ԉикәӈ йасәӈән йастәман. Щиӈәԋща Павел ԓывиԓаԓ хӑймаԓ кемән, утәԓтәты йŏх утща щира ӑкәтсәԓы пӑ и мŏԓты Тиранн ху утәԓтәты хотән кашәӈ хӑтәԓ хŏйатәт утәԓтәсԓы.
\p
\v 10 Кӑт тӑԓ-ԓўӈ кем хўват щиты ус, Асия мўвән уԓты хŏйатәт, иудейәт мўй пӑ грекәт, Турәм Куща Иисус эԓты уԓты утәԓтәпса хŏԓыйэ хуԓсэԓ.
\p
\v 11 Турәм пӑ Павел йош мŏхты мŏԓты арат вантыԓԓаӈәԓ вер верәс,
\p
\v 12 кӑшаӈ хŏйатәт ԓоӈԓа ԓўв тӑйты ŏхшамԓаԓ пӑ ӑнтәп сŏхԓаԓ пŏныԓысайәт пӑ ԓыв мушԓаԓ нŏх вŏԓысәт, пӑ ԓыв эԓтыԓаԓ кўԉ сŏхәт ким этсәт.
\p
\v 13 Хŏԓна пӑ уԉԋайа йӑхты, йасәӈән кўԉ сŏх воштәты иудей йох эԓты, тухԓәт кўԉ сŏхәӈ хŏйатәт хŏща Турәм Куща Иисус нэм йастәты питсәт, пŏтәртман: «Нынан Иисус нэмән воштәԓэв, Хŏй эԓты Павел такан йастәԓ».
\p
\v 14 Щит мӑтты мŏԓты Скева нэмпи, иудей Турма йир верты ŏх ики, ԓапәт пŏх версәт.
\p
\v 15 Туп кўԉ сŏх йŏхԓы йастәс: «Иисус уйәтԓэм, пӑ Павел ищи мӑнэма ԓэр, нын пӑ хŏйтат?»
\p
\v 16 Щӑԓта ԓыв хŏщайэԓа щи кўԉ сŏхәӈ хŏйат щи ԓŏват ун йурән ӑратәс пӑ ԓывиԓаԓ иԓ пайәтсәԓы, ԓыв ԋара питман пӑ ԋўлмәӈа йўвман, щи хŏт эԓты ким хŏнтасәт.
\p
\v 17 Щит хŏԓ Ефесән уԓты иудейәта пӑ грекәта уйәтты щира питәс, пӑ хŏԓ ԓыв пӑԉщәмән йŏхәтсайәт, пӑ Турәм Куща Иисус нэм ԓӑтәӈа айәԓтты питсэԓ.
\p
\v 18 Эвԓәм ŏтәт эԓты ар хŏйат йŏхтыԓыйәс, вещкат щирән верԓаԓ эԓпа аԉсәԓаԓ.
\p
\v 19 Мўтра верыԓыйәм мŏхет эԓты йӑм ар хŏйат, мўтра верты нэпекԓаԓ йӑха ӑкәтман, хŏйатәт йэԓпийән нŏх ўщәтсәԓаԓ, пӑ тынԓаԓ йӑха пŏтсәԓаԓ пӑ ветйаӈ щŏрәс щел ŏх арата хойәс.
\p
\v 20 Щиты такан Турәм Куща йасәӈ лакки ԓӑрпиԓәс пӑ йурамәс.
\p
\v 21 Хун пӑ щит йэтшәс, Павел, Ԓыԓән тўвман, Македония пӑ Ахаия мўв сӑхат Иерусалима мӑнты нŏмәс верәс, йастәс: «Щи йŏхтыԓытэм йўпийән, мӑ Рим ватты верэм уԓ».
\p
\v 22 Щӑԓта, кӑт ԓўвеԓ ԋотты хŏйатӈәԓаԓ, Тимофей пӑ Ераст, Македония мўва китмаԓ йўпийән, ԓўв Асия мўвән мŏԓты сыс кема хӑщиԓыйәс.
\s Йэшащты вер Ефесән
\p
\v 23 Щи пўԉаӈ Турәм Куща Йуш урәӈән ун йэшащты вер тыйәс,
\p
\v 24 и хŏйат, нэмәԓән Димитрий, щелŏх верән тус ху, щелŏх эԓты Артемида ԓух ими хŏрамәӈ хот хŏр верыԓыйәс пӑ вератты тус йохәта ŏх шитты щир мийиԓыйәс.
\p
\v 25 Ԓывиԓаԓ пӑ па вератты йохәт йӑха ӑкәтман, йастәс: «Мŏхет! Нын уйәтԓәты, тӑм вератты вер эԓты мўӈ тӑйтаӈ щирэв уԓ;
\p
\v 26 щи кўтән нын ватԓәты пӑ хуԓԓәты, ӑнта туп Ефесән, иса хӑщ Асия ԓŏватән щи Павел ар хŏйат ԓўв эвԓәптәты верәԓән йŏвра хўщәс, пŏтәртман, мӑтты хŏйат йошән верты ŏт - щит ӑнта ԓуӈхәт.
\p
\v 27 Щит пӑ мўӈева атәм верәԓ ӑнта туп вератты верэв атма айәԓтты щирән, Артемида ԓух ими йэмәӈ хот па нэмәԓтты йўкана ӑт тӑйты питԓа. Ԓух ими хŏԓна ԓўв Асия мўв ԓŏватән пӑ мирән иса ԓӑтәӈа тӑйԓа, ԓух ԓатәӈ верәԓ хŏԓт павәтԓа!»
\p
\v 28 Щит хуԓәтмеԓ кемән, ԓыв ԉикән йŏхәтсайәт пӑ ўвты питсәт, пŏтәртман: «Ефес вош Артемида ԓӑтәӈ!»
\p
\v 29 Щӑԓта вош ԓŏватәԓән нŏх ԋŏхԓәс. Ԓыв Павел пиԓән йӑӈхәм Македония кӑтӈән, Гаий пӑ Аристарх, ԋӑрэмәман, и йӑха каш ватты тӑхайа ԋŏхтәсэԓ.
\p
\v 30 Хун пӑ Павел мир хŏща этты ўтщийәс, утәԓтәты йохәтән ԓўв ӑт эсәԓса.
\p
\v 31 И щиты тухәԓ Асия кущайәт эԓты па, ԓўвеԓа ԓухса уԓман, ԓўв хŏщайәԓ айкеԓ китсәт, каш ватты тӑхайа ӑт ат йис.
\p
\v 32 Щи кўтән итԓаԓ ит ўвԓәт, киметԓаԓ пӑ кимет ŏт ўвԓәт, пŏтәртты ӑктәщәм щир и нулама ус, пӑ ар пеләк йӑха ӑктәщәм ŏтәт ӑт уйәтԓәт, мўй урәӈән ӑктәщсәт.
\p
\v 33 Иудейәт йастәм щирән, мир кўт эԓты Александр ким вохса. Йошән пос верман, Александр мир пеԓа пŏтәртты ўтщийәс.
\p
\v 34 Хун ŏша пайәтсэԓ, ԓўв иудей ху, хŏԓ и турән ўваԓтсәт пӑ кӑт щос кем увсәт: «Ефес вош Артемида ԓӑтәӈ!»
\p
\v 35 Вошәӈ хӑншатты куща пӑ, хŏйатәт иԓ роммәԓтмаԓ кемән, йастәс: «Ефес йох! Мӑты хŏйат ӑт уйәтәԓ, Ефес - щит ԓӑтәӈ ԓух ими Артемида пӑ турәм эԓты иԓ рӑкнәм хŏрәԓ шавиты вош?
\p
\v 36 Щит хŏща ўра ворты вер ӑнтом ки, нынан рома уԓты мосәԓ пӑ, ӑт нумәсман, вер верты ӑт мосәԓ.
\p
\v 37 Нын тӑм икеӈән ты тусԓән, ԓын ӑнта Артемида йэмәӈ хот ԓыпи ԓоԓәпсәтән, ӑнта нын ԓух имана атәм версәтән.
\p
\v 38 Димитрий пӑ па вератты йох ԓўв пиԓәԓән мӑтты хŏйат пеԓа пŏләщ тӑйԓәт ки, щи кеша сўт верты урәӈән ӑктәщиты щир уԓ пӑ сўт кущайәт уԓԓәт: кўтԓаԓән поләщ ат тутԓыԓәт.
\p
\v 39 Нын мŏԓтты па ŏт кӑшԓәты ки, щит закон щирән ӑктәщиты тӑхайән ватты питԓа.
\p
\v 40 Мўӈ вевтам щира питсув - ин тӑм тыйәм вер урәӈән, йэшащты щира пŏнԓайув, щи урәӈән нэмәԓты сŏнтәӈ ӑнтом, мўӈ ӑктәщәм верэв ԓуԓән нŏх пайәтты». Щит йастәмаԓ йўпийән, ԓўв ӑктәщәм мŏхет лакки эсәԓсәԓы.
\c 20
\s Павел Македонияйа пӑ Грецияйа мӑнты вер
\p
\v 1 Йэшащты вер вŏԓыйәм йўпийән, Павел утәԓтәты йох вана вохмаԓ пӑ ԓыв номәсԓаԓ такапмаԓ йўпийән, ԓыв пиԓԓаԓән пайәмуԓәм верәс, ким этәс пӑ Македония мўва мӑнәс.
\p
\v 2 Щи тӑхайәт сӑхат мӑнман пӑ эвәԓты хŏйатәт йӑм артан утәԓтәсԓы. Еллада\f + \fr 20:2 \fr*\fq Еллада \fq*\ft - щит Греция;\ft*\f* мўва йŏхәтмаԓән,
\p
\v 3 щита ԓўв хуԓәм тыԓәщ ус. Хун ԓўв Сирия мўва хопән мӑнты ӑктәщәс, иудейәт ԓўвеԓ пӑратты вер ԓэщатәм хуԓмаԓ кемән, Македония сӑхат йŏхԓы мӑнты нŏмәс верәс.
\p
\v 4 Ԓўв пиԓәԓән Асия унты Сосипатр, Верия вошәӈ ху, Пирр пŏх, Фессалоника эԓты уԓты Аристарх пӑ Секунд, щӑԓта Гаий - Дервия вошәӈ ху пӑ Тимофей, щӑԓта пӑ Асия эԓты уԓты Тихик пӑ Трофим йӑхсәт.
\p
\v 5 Ԓыв, йэԓԓы мӑнман, мўӈев Троада вошән ԓавәԓсэԓ.
\p
\v 6 Мўӈ пӑ, тўтәӈ ԋаԋ хӑтԓәт йўпийән, Филиппы эԓты хопән мӑтсув пӑ ветмет хӑтәԓән Троадайән ԓыв хŏщайэԓ йŏхәтсув, щита ԓапәт хӑтәԓ усув.
\s Пӑрәм Евтих но̆х ԓыԓӈатәм вер
\p
\v 7 Ԓапәт оԓәӈ хӑтәԓән\f + \fr 20:7 \fr*\fq Ԓапәт оԓәӈ хӑтәԓ - \fq*\ft еврейәт щирән щит шаббат йўпи хӑтәԓ, хӑнтэт щирән - щўтщәты хӑтәԓ;\ft*\f*, хун утәԓтәты йох ԋаԋ морәтты урәӈән йӑха ӑктәщсәт, Павел ԓыв пиԓԓаԓән пŏтрэмәс пӑ, кимет хӑтәԓ мӑнты нумәсмаԓ хўват, ԓўв пŏтрәԓ ат кўтәп унты тусԓы.
\p
\v 8 Нўм хот йӑтән, хŏта мўӈ ӑктәщсув, йӑм ар тўт хŏшам ус.
\p
\v 9 Павел хув пŏтрэмәмаԓ эԓты, и энәмты пŏх, нэмәԓән Евтих, ишԋи хопән опсәс, такан иԓ вŏйәпса пӑ ԋŏхԓәмаԓ сӑхат, хуԓмет хот пӑԓат эԓты иԓ рӑкнәс, пӑ нŏх аԓэмәмән, пӑрмаԓ.
\p
\v 10 Павел, иԓ эсԓәщәс, энәмты пŏх эԓт ŏԓсәԓы пӑ ԓўвеԓ ӑпәԓтман, йастәс: «Аԓ хурыйаты, ԓўв ԓыԓәӈ».
\p
\v 11 Павел нўм хŏт йӑта ԓŏӈмаԓ кемән пӑ ԋаԋ морәтмаԓ пӑ ԓэвмаԓ йўпийән, йӑм хўват, хŏԓна пӑ хутԓәты унты, пŏтрэмәс, пӑ йухәт ким этәс.
\p
\v 12 Щи кўтән энәмты ԋаврэм ԓыԓӈат йŏхи туса пӑ щит эԓты хŏԓ шек амәтсәт.
\s Троада эԓты Милита мӑнты вер
\p
\v 13 Мўӈ паршәӈ ун хопа ԓэԓсув пӑ йэԓԓы Асс вош пеԓа мӑтсув, щиԓта Павел ўты урәӈән; ԓўв мўӈева щиты партсәԓы, ԓўв кўрән шушты ўтщийәԓ.
\p
\v 14 Хун пӑ ԓўв мўӈ пиԓэвән Асс вошән уйтантәс, ԓўвеԓ пӑтән паршәӈ ун хопа ўймев кемән, мўӈ Митилина воша мӑтсув.
\p
\v 15 Щӑԓта, щи мӑнман, кимет хӑтәԓ мўӈ Хиос пухәр шŏма иԓ ԓойсув, хӑтәԓ хӑйман пӑ Самос пухра хойсув пӑ, Трогиллия воша йŏхтыԓымев йўпийән, кимет хӑтәԓ Милит воша йŏхәтсув,
\p
\v 16 Павел Ефес хӑйман мӑнты нŏмәс верәс, Асияйән ӑт ат рŏнты, щишән, ԓўв тэрматыйәс, Ветйаӈ хӑтԓәп йэмәӈ хӑтәԓ кеша Иерусалимән уԓты ԓӑӈхас.
\s Павел Ефес пŏйәкщәты хŏйатәт ун икет пиԓән пŏтәртты вер
\p
\v 17 Милит эԓты Ефеса китәсәс, Турма пŏйәкщәты хŏйатәт ун икет ԓўв хŏщайәԓа вохсәԓы,
\p
\v 18 пӑ, хун ԓыв ԓўв хŏщайәԓа йŏхәтсәт, ԓывиԓаԓа йастәс: «Нын уйәтԓәԓән, хŏты ма мет оԓәӈ хӑтәԓ эԓты, хун Асияйа йŏхәтсәм, ивевән нын пиԓанән усәм,
\p
\v 19 ма Турәм Куща пеԓа рома уԓман пӑ ар сэмйик мӑнәԓтман верәт версәм, иудейәт верәм ԉикәӈ нŏпсәт пӑтыйән кӑмән кем шук мӑнэм тўты вера йис;
\p
\v 20 Ма нэмәԓтты щит эԓты ӑт хӑйсәм, мўй эԓты нынан пŏтәртты мосәс ԓуԓән, мўйа нынан утәԓтәты мосәс ԓуԓән, мир ватман пӑ хотԓән ԓыпийән.
\p
\v 21 Ма иудейәта па, грекәта па такан йастыԓысәм, ԓыв кӑрэк эԓты шӑшән керԓәман, Турәм пеԓа ат керԓәсәт пӑ мўӈ Турәм Кущайэва Иисуса Христоса ат эвәԓсәт.
\p
\v 22 Пӑ тата щи, ин ма, Ԓыԓән хўщман, Иерусалима мӑнԓәм, ӑт уйәтԓэм, мӑнэма щита мўй питәԓ;
\p
\v 23 Туп Йэмәӈ Ԓыԓ кашәӈ вошән аԉәԓ, пŏтәртман, касна хот пӑ шукәӈ щирәт мӑнэм ԓавәԓԓәт.
\p
\v 24 Туп ма нэмәԓты пеԓа ӑт ӑӈкәртыԓәм пӑ ма ԓыԓэм ӑт шавиԓэм, туп, амәтман, ԓўԓән мӑ йушем мӑнты пӑ Турәм Кущайән Иисусән мийәм ма верэм йэтшәптәты ат верәтсэм, Йӑм Айкеԓ Турәм йӑм эԓты пŏтәртты.
\p
\v 25 Пӑ ин, тӑм, ма уйәтԓэм, хŏԓ нын, хŏй кўтән, Турәм Хон Уԓәпса эԓты пŏтәртман, ма йӑхсәм, мӑнэм па ӑт ватԓәԓән.
\p
\v 26 Щишән нынана тӑм хӑтәԓ ма такан йастәԓәм: «Нэмәԓты пӑрәм хŏйат хŏща ўнавот ӑт тӑйԓәм,
\p
\v 27 ма Турәм ԓӑӈхаты вер аратәԓ нынана такан йастәты ӑт хӑԋатысэм.
\p
\v 28 Щиӈәԋща, нынан ватман тӑйаԓән пӑ хŏйат тащ аратәԓән па, хŏта Йэмәӈ Ԓыԓ нынан ŏха пŏтсәԓы, Турәм Куща пӑ Турәм ӑктәщиты мŏхиԓаԓ нын такан ат шависԓән, Ԓўв кӑԓэԓ сӑхат мŏщатәм пойәкщәты мŏхиԓаԓ.
\p
\v 29 Ма уйәтԓэм, хун ма мӑнԓәм, нын хŏщайән ԉикәӈ йэврәт ԓŏӈԓәт, ԓыв пӑ тащ ӑт щаԉәтԓэԓ.
\p
\v 30 Щӑԓта нын эԓтыԓән хŏԓна хŏйатәт нŏх ԓойԓәт, хŏй пŏтәртаԓән вещкат вер йŏвра таԓты питԓәԓы, утәԓтәты йох ԓыв йўпиԓаԓән туты урәӈән.
\p
\v 31 Щишән нумәсман уԓаты! Нумаԓән, ма нынан тӑԓаӈ хуԓәм тӑԓ-ԓуӈ атәԓ-хӑтәԓ ивевән сэмйик сурән нын эԓтайән кашәӈ ŏт утәԓтысэм.
\p
\v 32 Пӑ ин нынан, хӑнам йох, Турма пӑ Ԓўв йӑмәԓ эԓты уԓты йасӈа эвԓәптәԓԓам, хŏй нынан утәԓтәты пӑ нынана Ԓўв йэмәӈ мирәԓ кўтән ŏх вŏԓ мӑты верәтәԓ.
\p
\v 33 Ӑнта щелŏх, ӑнта сорԋи, ӑнта ԓумтәм нэмәԓты хŏйат эԓты ма ӑт ԓӑӈхасәм:
\p
\v 34 нын уйәтԓәԓән, мӑнэм мосты ŏт пӑ ма пўӈԓэмән уԓәм хŏйатԓама мосты ŏт тӑм ма йошӈиԓамән шитәптәсәм.
\p
\v 35 Кашәӈ верән ма нынана этәԓтысԓам, щиты рупитман, вевԓы хŏйатәта ԋŏтты мосәԓ пӑ Турәм Куща Иисус йасӈәт нумты мосәԓ, Ԓўв йастәс: 'Ўты эԓты, мӑты йӑмшәк'».
\p
\v 36 Щит йастәмаԓ кемән, ԓўв шашӈиԓаԓ иԓ эсәԓсәԓы пӑ хŏԓ ԓыв пиԓԓаԓән пойәкщәс.
\p
\v 37 Щи пŏрайән хŏԓыйэ хоԓԓәсәт пӑ, Павел ӑпәԓтыман, ԓўвеԓ мосәԓтәсэԓ.
\p
\v 38 Мет шопәӈ ԓўв йастәм йасәӈԓаԓ эԓты хощсәт, мӑтты ԓыв па нэмәԓты пŏрайән ԓўв вешәԓ ӑт ватԓэԓ. Щӑԓта ԓўв пиԓәԓән паршәӈ хоп унты мӑтсәт.
\c 21
\s Иерусалима мӑнты вер
\p
\v 1 Хун пӑ мўӈ ԓыв пиԓԓаԓән кӑтна мӑнмев йўпийән, нык хўвԓәсув, тŏрԓы Кос воша йŏхәтсув, кимет хӑтәԓ Родос пухра, щиԓта пӑ Патара воша,
\p
\v 2 щӑԓта Финикия пеԓа мӑнты паршәӈ ун хоп уйәтмев кемән, нŏх хухсув пӑ нык хўвԓәсув.
\p
\v 3 Мўӈ Кипр пухәр мўв ныты ўшән усув пӑ ԓўвеԓ веш пеләк сӑхат хӑйман, Сирия мўва мӑтсув пӑ Тир вош хŏща ўты катәԓсув, тӑта хоп эԓты пŏрмасәт хӑйты моссәт.
\p
\v 4 Щӑԓта, утәԓтәты хŏйатәт мŏщатмев кемән, щита ԓапәт хӑтәԓ усув. Ԓыв, Йэмәӈ Ԓыԓән аԉман, Павел пеԓа пŏтәртԓәт, ԓўв Иерусалима ӑт ат мӑнәԓ.
\p
\v 5 Щи хӑтԓәт хӑйман, мўӈ этсув пӑ мӑтсув, пӑ ԓыв хŏԓыйэ имиԓаԓ пӑ ԋаврэмԓаԓ пиԓән мўӈев вош кимпи унты хŏԓна тусэԓ; намән питарән па, шаш иԓ эсәԓман, пойәкщәсув.
\p
\v 6 Пӑ, кўтԓувән пайәмуԓәм вермев йўпийән, мўӈ паршәӈ ун хопа ԓэԓсув, ԓыв пӑ йŏхи мӑтсәт.
\p
\v 7 Мўӈ пӑ, мӑнты верев йэԓԓы тўвман, Тир эԓты Птолемаида воша йŏхәтсув, хŏта хӑнам йохԓув ўщайән версәԓув пӑ ԓыв хŏщайэԓ и хӑтәԓ усув.
\p
\v 8 Кимет хӑтәԓ Павел пӑ мўӈ, ԓўв пиԓәԓән уԓәм ŏтәт, йэԓԓы мӑтсув пӑ Кесарияйа йŏхәтсув пӑ, Филлипп хота ԓŏӈман, ԓўв Йӑм Айкеԓ тутԓыты ху, ԓапәт ԋотәп ху\f + \fr 21:8 \fr*\fq ԓапәт ԋотәп ху \fq*\ft - щит ԓэты пасанәт ԓэщатты йох;\ft*\f* эԓты ит, ԓўв хŏщайәԓ хӑщсув.
\p
\v 9 Ԓўв ԋӑԓ икиԓы эви тӑйәс, Турәм айкеԓ туты нэӈәт.
\p
\v 10 Щи кўтән хŏты мўӈ ԓыв хŏщайэԓ ар хӑтәԓ усув, Иудея эԓты Агав нэмпи Турәм айкеԓ туты ики йŏхтәс.
\p
\v 11 Щӑԓта, мўӈ хŏщайэв ԓŏӈман, Павел ӑнтәп кеԓ ўсԓы пӑ ԓўв йошԓаԓ-курԓаԓ йӑха йӑрман, йастәс: «Щиты Йэмәӈ Ԓыԓ пŏтәртәԓ: 'Тӑм ӑнтәп кеԓәӈ ики тӑмиты Иерусалимән иудейәтән йӑрԓа пӑ па рут мир йоша мӑԓа'».
\p
\v 12 Хун пӑ мўӈ щит хуԓтмәсув, мўӈ па, щита уԓты ŏтәт па пойкащсәт, ԓўв Иерусалима ӑт ат мӑнәс.
\p
\v 13 Туп Павел йŏхԓы йастәс: «Мўй нын верԓәты? Мўйа хоԓԓәԓты пӑ ма сӑмем мӑшԓәԓән? Ма ӑнта туп йӑрәм ŏта уԓты ԓӑӈхаԓәм, Иерусалимән Турәм Куща Иисус нэм урәӈән пӑрты таща уԓԓәм».
\p
\v 14 Хун пӑ мўӈ ԓўвеԓ вŏԓәтты ӑт верәтсэв, ромәпсув, йастәман: «Турәм Куща партәпса щирән ат питәԓ!»
\s Павел Иерусалима йŏхәтты вер
\p
\v 15 Тӑм хӑтԓәт йўпийән, ԓэщатыман, Иерусалима мўӈ мӑтсув.
\p
\v 16 Мўӈ пиԓэвән тухәԓ утәԓтәты йох Кесария эԓты па шушсәт. Ԓыв мўӈев Мнасон Кипр ху, хўв тэԓән утәԓтәты ху, хота тусэԓ, хŏй хŏща мўӈев ԓуԓән уԓты рӑхәс.
\p
\v 17 Хун мўӈ Иерусалима йŏхәтсув, хӑнам йохән, амәтман, мўӈ вана ўсайув.
\p
\v 18 Кимет хатәԓ Павел мўӈ пиԓэвән Иаков хŏща йŏхтәс; ун икет па хŏԓ йŏхәтсәт.
\p
\v 19 Ԓывиԓаԓ ўщайән верман, Павел ԓӑтйан-карйан пŏтәртсәԓы, ԓўв верәм верԓаԓ мŏхты ӑт эвәԓты па рут мир кўтән Турәм мўй верәс.
\p
\v 20 Ԓыв па, хуԓәтмеԓ йўпийән, Турәм ԓӑтәӈа айәԓтсэԓ пӑ ԓўвеԓа йастәсәт: «Хӑнам ху, ватԓэн мўй арат щŏрәс эвԓәм иудей йох, пӑ ԓыв хŏԓ Закон такан тӑйты ŏтәт.
\p
\v 21 Нӑӈ эԓтэн пӑ йӑма хуԓԓысәт, мӑтты нӑӈ хŏԓ па рут мир кўтән уԓты иудейәт Моисей эԓты пўӈԓа хӑтты утәԓтәԓԓан, пŏтәртман, мӑтты ԓыв йох ԋаврэмԓаԓ хŏща эвәтты вер ӑт ат версәт пӑ ԓыв щирԓаԓ щирән ӑт ат усәт.
\p
\v 22 Щиӈәԋща, мўй пӑ? Йӑна, мир ӑктәщәԓ; хуԓԓэԓ, нӑӈ йŏхәтсән, щишән.
\p
\v 23 Вера са, мўй мўӈ нӑӈен йастәԓув: мўӈ ԋӑԓ хŏйат, йастантәм вер тӑйты ŏтәт, тӑйԓув.
\p
\v 24 Ԓывиԓаԓ ўйман, ԓыв пиԓԓаԓән сыстамтыйа пӑ ԓыв йўкан йирԓаԓ тын нӑӈ сŏхәпты, ԓыв ŏхԓаԓ ԓŏртты ат верәтсәт. Пӑ хŏԓ кащаԓәԓәт, нӑӈ эԓтайэн хуԓԓыйәм пŏԓщәт ӑнтом вещкатәт, наӈ па Закон хуват уԓԓән.
\p
\v 25 Эвԓәм па рут йоха мўӈ верәм нŏпсэв эԓты хӑшсэв: ԓыв нэмәԓты щимәщ ӑт ат версәт, туп ԓуӈха порыԓыйәм ԓэтŏт эԓты, вой ўр пӑ шакәптәм вой ԋŏхи эԓты, пӑ пакрасԓәты вер эԓты ԓывиԓаԓ ат шависԓаԓ».
\p
\v 26 Щишән Павел, щи йох ўйман пӑ ԓыв пиԓԓаԓән сыстамтыман, йухәт хӑтәԓ Турәм Хота ԓŏӈәс пӑ сыстамтыйәм хӑтԓәт хŏԓам вер такан йастәс, хун кашәӈ ху урәӈән йир туты вер уԓ.
\s Павел ԋӑрэмәты вер
\p
\v 27 Хун пӑ ԓапәт хӑтәԓ хŏԓаты ванамәс, щи пŏрайән Асия эԓты уԓты иудейәт ԓўвеԓ Турәм Хотән шийаԓәмеԓ кемән, мир хŏԓ йэшащты хўщсэԓ пӑ ԓўвеԓ катәԓсэԓ,
\p
\v 28 ўвман: «Израиль йох, ԋотаты! Тӑм хŏйат арат тӑхайән мŏхет мирэва пӑ Закона пӑ тӑм тӑхайа ӑт рӑхты щирән утәԓтәԓ; Щи тўмпийән грекәт Турәм Хота тус пӑ тӑм йэмәӈ тӑха щопитсәԓы».
\p
\v 29 Щи йэԓпийән вошән ԓыв Трофим, Ефес ху, ԓўв пиԓәԓән ватсәт пӑ нумәссәт, Павел ԓўвеԓ Турәм Хота ԓŏӈәԓтсәԓы.
\p
\v 30 Вош ԓŏватәԓән нŏх ԋŏхԓәс, пӑ мир тŏхи хухәԓмәс. Павел, ԋӑрэмәм йўпийән, Турәм Хот эԓты ким хипԉәԓтса, пӑ овәт ищи кўрәмән лӑп петсайәт.
\p
\v 31 Хун пӑ ԓыв ԓўвеԓ пӑратты ўтщисэԓ, щŏрәс ԉаԉ йох куща унты айкеԓ йŏхтәс, Иерусалим ԓоватәԓән ўшмащты питәс.
\p
\v 32 Ԓўв ищи кўрәмән ԉаԉ йох пӑ сот ԉаԉ йох кущайәт ўйман, ԓыв хŏщайэԓ ӑратсәт. Ԓыв пӑ, щŏрәс ԉаԉ йох куща пӑ ԉаԉ йохәт кащаԓәмеԓ кемән, Павел сэкты вŏԓәтсэԓ.
\p
\v 33 Щиӈәԋща щŏрәс ԉаԉ йох куща, вана йŏхәтмаԓ кемән, ԓўвеԓ ўсԓы пӑ кӑт карты кеԓән иԓ йӑрты партсәԓы, пӑ иԋщәсәс: «Хŏй ԓўв пӑ мўй верәс».
\p
\v 34 Мир хŏща итәт ит ўвсәт, па ŏтәт па ŏт ўвсәт. Щишән щимәщ сый кўтән ԓўв нэмәԓты ԓэр вер ŏша пайәтты ӑт веритмаԓ урәӈән, Павел ԉаԉ йох уԓты тӑхайа туты партсәԓы.
\p
\v 35 Хун пӑ ԓўв ов нухләт хŏща уԓмаԓән, мир похәл щиты хӑтәԓ пӑ, ԉаԉ йохәта, нŏх аԓәмман, ԓўвеԓ туты вера йис,
\p
\v 36 мир аратәԓән ԓыв йўпеԓән шушәс пӑ ўвәс: «Ԓўвеԓа сŏрәм ат уԓ!»
\s Павел, ԓўвеԓ ӑратыман, мир пеԓа по̆тәртәԓ
\p
\v 37 Ԉаԉ йŏхәт хота ԓŏӈты тӑхайән Павел щŏрәс ԉаԉ йох кущайа йастәс: «Мӑнэма наӈен мŏԓты йастәты рӑхәԓ амўй?» Щит пӑ йщмәс: «Нӑӈ грек йасәӈ уйәтԓән?
\p
\v 38 Щишән ки, наӈ ӑнта щи Египет хŏйат, хŏй мŏԓхашәк йэшащты щир верыԓыйәс пӑ таԓ тӑхайа ԋӑԓ щŏрәс веԓтатты хŏйат тус?»
\p
\v 39 Павел пӑ йастәс: «Ма Киликия мўвән уԓты Тарс ун вошәӈ иудей ху. Нӑӈен пойәкԓәм, мӑнэм мир пеԓа йастәты эсԓы».
\p
\v 40 Хун пӑ щитән эсәԓса, Павел, ов нухәлән ԓойман, йошәԓән мира пос мӑс. Щӑԓта, хун шек шитама йис, еврей йасәӈән щиты пŏтәртты питәс:
\c 22
\p
\v 1 «Хӑнам йохәт пӑ ащет! Манэм нын йэԓпанән ӑратыты урәӈән, мӑнэм пŏтәрты эсԓаԓән».
\p
\v 2 Ԓўв пӑ ԓыв пиԓԓаԓән еврей йасәӈән пŏтәртты хуԓмеԓ кемән, мет шитама йисәт. Ԓўв йастәс:
\p
\v 3 «Ма иудей ху, Киликияйән уԓты Тарс вошән сэма питәм ŏт, тӑм вошән Гамалиил утәԓтәты ху хŏща энмәԓтәм ŏт, ащиԓув Закон щирән шек йӑма утәԓтәм ŏт, Турәм вер пеԓа такан уԓты ŏт, хŏты нын хŏԓ ин уԓԓәты.
\p
\v 4 Ма хŏԓна сŏрәм унты тӑм утәԓтәпса йўпи тўвәм хŏйатәт ԋухәтԓысԓам, иԓ йӑрман йохәт пӑ нэӈәт касна хота мийԓысԓам.
\p
\v 5 Щит вантәм ŏтәт - Турма йир верты ŏх ху пӑ йӑха актәщиты ун икет аратэԓән. Ма хŏԓна ԓыв эԓтыԓаԓ Дамаск вошәӈ хӑнам йохәта хӑншәм айкеԓ нэпекәт ўсәм пӑ щи мӑтсәм, христианәт эԓты хŏй щита ус пӑ щитәт катәԓты, пӑ ԓывиԓаԓ Иерусалима сэкты урәӈән туты.
\p
\v 6 Хун пӑ ма йушән уԓмемән пӑ Дамаск воша ванамәсәм, хӑтәԓ кўтәп кемән шӑмкап турәм хӑр эԓты щи хŏрпи нŏвийән похәтсайәм, пӑ сэм хŏԓна нŏх ӑт эԓԓәԓ.
\p
\v 7 Ма мўва иԓ рӑкәтсәм пӑ мӑ пеԓайэм пŏтәртәм тур сый хуԓмәсәм: "Савл, Савл! Мўйа нӑӈ Мӑнэм ԋухәԓԓэн?"
\p
\v 8 Ма йŏхԓы йастәԓәм: "Хŏй Нӑӈ, Турәм Куща?" Ԓўв мӑнэма йастәс: "Ма Назарет эԓты уԓты Иисус, Хŏй нӑӈ ԋухәԓԓэн".
\p
\v 9 Ма пиԓэмән уԓәм ŏтәт нŏви ватсэԓ пӑ пӑԉщәмән йŏхәтсайәт; туп ма пеԓайэма Пŏтәртәм Ŏт тўр сый ӑт хуԓсэԓ.
\p
\v 10 Щиӈәԋща ма йастәсәм: "Турәм Куща! Мӑнэм мўй верты?" Турәм Куща пӑ мӑнэма йастәс: "Нŏх ԓойа пӑ Дамаска мӑна, пӑ щита нӑӈена иса йастәԓа, мўй наӈена верты постәса".
\p
\v 11 Хŏты ма вŏԉиты нŏви эԓты сэмԓы питсәм, ма пиԓэмән йўвәм мŏхет йош пелкем эԓты Дамаска ватәԓтәсайәм.
\p
\v 12 А-хой Анания, Закон хўват уԓты Турма эвәԓты хŏйат, Дамаскән уԓты иудейәтән хŏԓ йӑма айәԓтса,
\p
\v 13 ма хŏщайэм йŏхтәс пӑ, вана шушман, мӑнэма йастәс: "Савл хӑнам ху, сэмәӈа йўва!" Пӑ ма ищи кумат ԓўвеԓ шийаԓәсэм.
\p
\v 14 Ԓўв пӑ мӑнэм йастәс: "Мўӈ ащиԓув Турәм нӑӈен пирыйәс, наӈ Ԓўв ԓӑӈхаты щирәԓ ŏша ат пайәтсэн, Вещкат Ŏт ат шийаԓәсән пӑ тўр сый Ԓўв ўӈԓәԓ эԓты ат хуԓсән.
\p
\v 15 Нӑӈ Ԓўвеԓа хŏԓ хŏйатәт йэԓпийән вантәм ŏта питԓән, щит эԓты, мўй ватсән пӑ хуԓсән.
\p
\v 16 Щиӈәԋща, мўй нӑӈ айәԓта уԓԓән? Нŏх ԓойа, Турәм Куща Иисус пеԓа пойәкща, йиӈка ат ԓŏӈәԓтыԓайән пӑ, кӑрэкԓан хŏԓт ат ԉŏхәтԓайәт".
\p
\v 17 Хун пӑ ма Иерусалима йŏхԓы йŏхәтсәм пӑ Турәм Хотән пойәкщәсәм, мӑ вантәпса ватсәм
\p
\v 18 пӑ Ԓўвеԓ шийаԓәсәм, пӑ Ԓўв мӑнэма йастәс: "Тэрматыйа пӑ Иерусалим эԓты ким эта, тӑта нӑӈ Ма эԓтайэм пŏтәртты щирэн вана ӑт ўԓа".
\p
\v 19 Ма йастәсәм: "Турәм Куща! Ԓыв уйәтԓэԓ, ма Нӑӈена эвәԓты хŏйатәт касна хота тухрыԓысԓам пӑ иудейәт пойәкщәты хотәтән сэӈкиԓысԓам,
\p
\v 20 пӑ хун Стефан, Наӈен вантәм ŏтэн, кӑԓэԓ щŏрӈәԓтәм пŏрайән, ма щита ԓойсәм, ԓўв паратты верәԓ эԓт тӑйсэм, ԓўвеԓ паратты ŏтәт ԓумтәмәт ма шависәм".
\p
\v 21 Щӑԓта ԓўв мӑнэма йастәс: "Мӑна, Ма нӑӈен хўва Турма ӑт эвәԓты па рут мир хŏща китԓэм"».
\p
\v 22 Тӑм йасәӈ унты ԓўв хуԓәтса; щи йўпийән ўвты питсәт, пŏтәртман: «Мўв сŏх эԓты ԓўвеԓ нŏх ушийи! Ԓўвеԓа уԓты ӑт рӑхәԓ».
\p
\v 23 Щи ԓыв ўвмеԓ кўтән, ԓумтәмԓаԓ йовәԓсәт пӑ кўрпӑт хиш нŏх йовәԓсәт,
\p
\v 24 щŏрәс ԉаԉ йох куща ԓўвеԓ ԉаԉ йŏх уԓты тӑхайа туты партсәԓы. Ԓўвеԓ хомщийән сэкты пӑ такан иԋщәсты партсәԓы, мўй урәӈән ԓўв пеԓайәԓ мир щиты ўвәс.
\p
\v 25 Туп хун ԓўв лаккеԓәтән йӑртсәԓәса, Павел ԓойәм сот ԉаԉ йох кущайа йастәс: «Нынан мўй Рим ху сэкты рӑхәԓ, хŏԓна пӑ сўт такԓы?»
\p
\v 26 Щит хуԓмаԓ кемән, сот ԉаԉ йох куща мӑнәс пӑ щŏрәс ԉаԉ йох кущайа щит тусԓы, пŏтәртман: «Ванта, мўй нӑӈ верты ўтщиԓән? Тӑм хŏйат - Рим ху».
\p
\v 27 Щиӈәԋща щŏрәс ԉаԉ йох куща, ԓўв хŏщайәԓ вана шушман, иԋщәсәԓ: «Йаста мӑнэма, нӑӈ Рим ху?» Ԓўв йастәс: «Па хŏты».
\p
\v 28 Щŏрәс ԉаԉ йох куща йŏхԓы йастәс: «Ма ун ŏх сӑхат щи Рим хŏйата уԓты вер ԓутсэм». Павел пӑ йастәс: «Ма пӑ щита сэма питсәм».
\p
\v 29 Щиӈәԋща ищи кумат ԓўвеԓ шукатты утщийәм ŏтәт ԓўв эԓтайәԓ пўӈԓа хӑтәмәсәт. Щŏрәс ԉаԉ йох куща пӑ, ԓўв Рим хŏйата уԓты верәԓ мŏштәмаԓ кемән, хŏԓт пӑԓтамәс, ԓўвеԓ йӑрсәԓамаԓ урәӈән.
\s Павел синедрион йэщаԓт ԓойты вер
\p
\v 30 Кимет хӑтәԓ, тŏрԓы уйәтты ԓӑӈхаман, мўй хŏща ԓўв иудейәтән ўнавота пайәтса, ԓўвеԓ кеԓԓаԓ эԓты хŏԓт пайәтсәԓы пӑ Турма йир верты ŏх икета пӑ синедриона хŏԓ ӑктәщты партсәԓы пӑ, Павел ким этәԓтәсԓы пӑ ԓыв йэԓпиԓаԓа ԓощәԓтәсԓы.
\c 23
\p
\v 1 Павел синедрион пеԓа ӑӈкәрмәс пӑ йастәс: «Хӑнам йох! Ма вещкат сӑмән иса тӑм хӑтәԓ унты Турәм йэщаԓт усәм».
\p
\v 2 Турма йир верты ŏх ху Ананий пӑ Павел ԉэпән ԓойты ŏтәта ԓўвеԓ тŏрәп эԓты сэкты партсәԓы.
\p
\v 3 Щишән Павел ԓўвеԓа йастәс: «Турәм нӑӈен секты питԓәԓы, нŏвийа нэрәм хот питар! Нӑӈ, Закон щирән сўтәтты урәӈән омәсԓән, пӑ Закон шŏппи ўшман, мӑнэм сэкты партԓэн».
\p
\v 4 Ванән ԓойәм ŏтәт пӑ йастәсәт: «Хŏты сӑхат нӑӈ Турма йир верты ŏх ху накәлты верәтԓэн?»
\p
\v 5 Павел йастәс: «Хӑнам йох, ма ӑт уйәтсэм, ԓўв Турма йир верты ŏх икийа уԓты верәԓ; хӑшман ӑт уԓԓа: 'Нӑӈ мирэн хŏща кущайа уԓты хŏйат эԓты атма аԓ йаста'».
\p
\v 6 Павел уйәтсәԓԓы, итәт саддукейа усәт, киметәт пӑ - фарисейа, щишән ԓўв синедрион йох пеԓа такан йастәс: «Хӑнам йох, ма фарисей, фарисей пŏх, пӑ ма пӑрәм ŏтәт нŏх ԓыԓәӈԓәты щир пеԓа нŏмәс пŏнмем урәӈән сўтәтԓайәм».
\p
\v 7 Хун пӑ ԓўв щит йастәс, фарисейәт пӑ саддукейәт кўтԓаԓән ўра ворты питсәт, пӑ ӑктәщәм мŏхет кӑтна ортәссәт.
\p
\v 8 Саддукейәт пŏтәртԓәт: ӑнта нŏх ԓыԓәӈԓәты щир, ӑнта ангел, ӑнта ԓыԓ ӑнтом; фарисейәт пӑ тўмеԓ па, тӑмеԓ па ванән тӑйԓыԓаԓ.
\p
\v 9 Щи ԓŏват ун ўв сый тыйәс; щӑԓта тухәԓ фарисейәт эԓты уԓты Закона утәԓтәты икет, нŏх ԓойман, ўра ворԓәт, йастәман: «Нэмәԓты атәм ŏт мўӈ тӑм хŏйат хŏща ӑт уйәтԓув; ԓыԓ мўй пӑ ангел ԓўв пеԓайәԓ пŏтәртыйәс ки, Турәм йэщаԓт уԓты мўӈ ӑт питԓув».
\p
\v 10 Туп ўра ворты верэԓ уна йис, щŏрәс ԉаԉ йох куща пӑԓман, Павел ԓыв лакки аԓ мӑшԓэԓ, ԉаԉ йохәта иԓ ŏхәԓты пӑ ԓыв кўтэԓ эԓты Павел ўты партсәԓы пӑ ԉаԉ йŏх уԓты хота туты партсәԓы.
\p
\v 11 Кимет ат Турәм Куща, ԓўв хŏщайәԓ этман, йастәс: «Павел, аԓ пӑԓа; хŏты нӑӈ Иерусалимән Ма эԓтэм пŏтәртсән, щиты Рим хŏща пŏтәртты па мосәԓ».
\s Иудейәт Павел пӑратты нŏмәс верԓәт
\p
\v 12 Аԓәӈсӑхата йўвмаԓ кемән тухәԓ иудейәт нŏмәс версәт пӑ, Павел пӑраттэԓ унты, ӑт ԓэты, ӑт йищты йастатсәт.
\p
\v 13 Йастантәм хŏйат ԋӑԓйаӈ мŏԓтас ус.
\p
\v 14 Ԓыв Турма йир верты ŏх икет пӑ уна уԓты икет хŏща йŏхәтсәт пӑ йастәсәт: «Мўӈ, Павел пӑраттэв унты, нэмәԓты ӑт ԓэты йастатсув.
\p
\v 15 Щиӈәԋща, ин щи нын синедрион пиԓән щŏрәс ԉаԉ йох кущайа хӑԓэвәт Павел нын хŏщайән туты партаԓән, ищи мӑтты нын ԓўв верәԓ йӑмашәк ватты верән уԓ. Мўӈ пӑ, ԓэщатыман уԓԓув пӑ ԓўвеԓ хŏԓна щи тӑхайа йŏхәттаԓ унты, пӑраттԓэв».
\p
\v 16 Щи йастантәм вер эԓты Павел ԓэхуйәԓ, опеԓ пŏх, хуԓәс. Ԓўв ԉаԉ йох уԓты хота йŏхтәс пӑ Павела йастәсԓы.
\p
\v 17 Павел пӑ, сот ԉаԉ йох куща эԓты ит вана вохсәԓы пӑ йастәс: «Тӑм пŏх щŏрәс ԉаԉ йох куща хŏща тўви, ԓўв щи кущайа мŏԓтты йастәты ŏт тӑйәԓ».
\p
\v 18 Щитэн ԓўвеԓ щŏрәс ԉаԉ йох куща хŏща тусԓы пӑ йастәс: «Касна хота опсәм Павел, мӑнэм вана вохман, тӑм пŏх нӑӈ хŏщайэн туты партсәԓы, ԓўв нӑӈена мŏԓтты йастәты ŏт тӑйәԓ».
\p
\v 19 Щŏрәс ԉаԉ йох куща, ԓўвеԓ йошәԓ эԓты катәԓман пӑ ԓўв пиԓәԓән пўӈԓа йирԓәман, иԋщәссәԓы: «Мӑнэм йастәты нӑӈ мўй тӑйԓән?»
\p
\v 20 Ԓўв йŏхԓы йастәс: «Иудейәт нӑӈен партты нŏмәс версәт, нӑӈ хӑԓэвәт Павел синедрион хŏща ким ат этәԓтәсэн, ищи мӑтты ԓыв йӑмашәк ԓўв эԓтэԓ ԓэрапты верэԓ уԓ.
\p
\v 21 Туп нӑӈ ԓывиԓаԓ аԓ хуԓәнта; ԓўвеԓ ԋӑԓйаӈ мŏԓтас хŏйат ԓыв эԓтыԓаԓ ԓомиԓәт, хŏй ӑт ԓэты пӑ ӑт йищты йастатсәт, ԓўвеԓ ӑт веԓтэԓ унты; пӑ ԓыв, нӑӈ йасӈен ԓавәԓман, ин ԓэщатыман уԓԓәт».
\p
\v 22 Щиӈәԋща щŏрәс ԉаԉ йох куща энмәм пŏх эсәԓсәԓы, йастәман: «Нэмәԓты хŏйата аԓ йасты, мӑнэм мўй йастәсән».
\s Павел Кесарияйа китәм вер
\p
\v 23 Щӑԓта, кӑт сот ԉаԉ йох кущайӈән вана вохман, йастәс: «Кӑт сот кўрән шушты, ԓапәтйаӈ ԓовәӈ ԉаԉ йох пӑ кӑтсот ԋоԓәӈ-йухԓәӈ ԉаԉ ху ԓэщататы, атәԓән хуԓәм щос кемән\f + \fr 23:23 \fr*\fq атәԓән хуԓәм щос кемән \fq*\ft - щит мўӈ щирэвән 9 щос йэтән;\ft*\f* Кесария воша ат мӑтсәт.
\p
\v 24 Ԓовәт и щиты ԓэщатаԓән, Павел щи опсәԓман, Феликс нэмпи куща хŏща ԓўвеԓ йӑма туты урәӈән».
\p
\v 25 Нэпека па щимәщ айкеԓ хӑншәс:
\p
\v 26 «Клавдий Лисий эԓты ԓӑтәӈ куща Феликс икийа. Ўща уԓа.
\p
\v 27 Иудейәт тӑм хŏйат ԋӑрэмәсэԓ пӑ веԓты ўтщисэԓ; ма ԉаԉ йохԓам пиԓән йŏхәтсәм пӑ ԓўвеԓ нŏх ӑратысэм, ԓўв Рим хŏйата уԓты верәԓ мŏштәмэм пӑтыйән.
\p
\v 28 Йухәт, ԓэрапты ԓӑӈхатэм урәӈән, мўй хŏща ԓўв нўрәӈа айәԓса, ԓўвеԓ ԓыв синедрионэԓа тусэм.
\p
\v 29 Ма ŏша пайәтсэм, ԓыв законэԓ хŏща ўрайа хойәм нŏпсәт урәӈән ԓўв нўрәӈа айәԓԓа, туп нэмәԓтты нўр сŏрәм пӑ касна хот кеша ԓўв хŏщайәԓ ӑт уйәтсәм.
\p
\v 30 Туп ма хŏщайэм иудейәт тӑм хŏйат пеԓа атәм нŏмәс верты айкеԓэԓ йŏхтәс, ма ԓўвеԓ мŏхты нӑӈ хŏщайэн китсэм, нўр туты ŏтәта па ԓўв пеԓайәԓа нӑӈ хŏщайэн пŏтәртты партсәԓам. Тўмтака уԓа».
\p
\v 31 Щиӈәԋща, ԉаԉ йохәт, тӑм ԓўв партәм щирәԓ хўватән, Павел ўйман, атәԓән Антипатрида воша тусэԓ.
\p
\v 32 Кимет хӑтәԓ пӑ, ԓовәӈ ԉаԉ йохәта ԓўв пиԓәԓән мӑнты миймеԓ кемән, ԉӑԉ йох уԓты хотэԓа йŏхԓы керԓәсәт.
\p
\v 33 Ԉаԉ йох пӑ, Кесария воша йŏхәтмеԓ пӑ айкеԓәӈ нэпек куща икийа миймеԓ кемән, Павел па ԓўвеԓа мӑсэԓ.
\p
\v 34 Куща ики, айкеԓәӈ нэпек ԓуӈәтмаԓ йўпийән, иԋщәссәԓы, мӑты мўв щуӈ эԓты ԓўв уԓ. Павел Киликия эԓты уԓты мŏштәмаԓ кемән, йастәс:
\p
\v 35 «Ма нӑӈен щи пŏрайән хуԓәтԓэм, хун нўр туты ŏтԓан йŏхәтԓәт». Пӑ ԓўвеԓ Ирод хŏт шикийән, ԉаԉ йохән эԓт тӑйман, уԓты партсәԓы.
\c 24
\s Павел Феликс куща хŏща ԓўвеԓ ԓўв ӑратыԓԓы
\p
\v 1 Вет хӑтәԓ хӑщәм йўпийән, Турма йир верты ŏх ху Анания ун икет пиԓән пӑ Тертулл, законәт уйәтты ху\f + \fr 24:1 \fr*\fq законәт уйәтты ху \fq*\ft - щит Рим хŏйатәт хŏща уԓәпса мŏрт (закон) уйәтты хŏйат, сўт вертыйән вер ӑратыты мўй пӑ вер кӑшты, туса пŏтәртты ху;\ft*\f*, пиԓән Кесарияйа йŏхтәс. Ԓыв куща икийа йастәсәт, мўй урәӈән Павел нўрмәԓтты питԓэԓ.
\p
\v 2 Хун пӑ Павел тŏхи ԓŏӈәԓтса, Тертулл ԓўв нўрәԓ аԉты питсәԓы, пŏтәртман:
\p
\v 3 «Иса пӑ кашәӈ тӑхайән кӑмән хŏрпи йӑм щирән мўӈ вана ўԓэв, мўӈ пайԓы уԓәпсайэв урәӈән нӑӈена, ԓӑтәӈ куща Феликс, пумащипа йастәты мўӈ верэв уԓ, пӑ тӑм мир йӑм, так уԓәпса нӑӈ ŏшәӈа парттэн хўватән уԓ.
\p
\v 4 Туп, нӑӈен шек ӑт ат тŏрастәты урәӈән, ма нӑӈен сӑмәӈ вер хўватэнән мўӈев йэша тӑхты хуԓәтты пŏйәкԓэм.
\p
\v 5 Мўӈ тӑм хŏйат рома уԓты щир ԓыԓәтты ŏта ԓўӈәтԓэв, ԓўв - иудейәт кўтән керәтман мўв ԓŏватән йэшащты вер пеԓа ŏх ху. Ԓўв Назарет эԓты уԓты Иисус ӑт рӑхты утәԓтәпса пеԓа уԓты ŏх ху,
\p
\v 6 хŏй хŏԓна Турәм Хот щопитты ўтщисԓы, мўӈ ԓўвеԓ катәԓсэв пӑ мўӈ Законэв хўватән сўтәтты ўтщисэв.
\p
\v 7 Туп щŏрәс ԉаԉ йох куща Лисий, йŏхтәс пӑ йур вевән ԓўвеԓ мўӈ йошев эԓты ўсԓы пӑ нӑӈ хŏщайэн китсәԓы,
\p
\v 8 мўӈева, ԓўвеԓ нўрәӈа айәԓтты ŏтәта, па нӑӈ хŏщайэн мӑнты партсәԓы. Хун нӑӈ ԓўвеԓ иԋщәсԓэн, наӈ щи мўй эԓты иса уйәтԓэн, мўй хŏща мўӈ ԓўвеԓ нўрәӈа тӑйԓэв».
\p
\v 9 Щӑԓта иудейәт па йастәсәт, мӑтты щит щиты.
\p
\v 10 Павел пӑ, хун куща ики ԓўвеԓа пŏтәртты щира пос аԉәс, йŏхԓы йастәс: «Уйәтԓэм, нӑӈ ар тӑԓ-ԓўӈ вещкат щирән тӑм мир сўтәтԓән, ма ԓӑрпайа ма верэм ӑратыты питԓэм.
\p
\v 11 Нӑӈ ԓэрапты верәтԓэн, ма Иерусалима Турәм ишәкты урәӈән йŏхәтмем, кӑтхŏщйаӈ кем хӑтԓа йис.
\p
\v 12 Ӑнта Турәм Хотән, ӑнта иудейәт пойәкщәты хотән, ӑнта вош ԓŏватән ԓыв мӑнэм ўра ворман мўй пӑ мир йэшащты пеԓа хущман, ӑт уйтыԓысэԓ,
\p
\v 13 пӑ щит аԉты ӑт верәтԓәт, мўй хŏща мӑнэм ин нўрмәԓԓәт.
\p
\v 14 Туп щи хŏща нӑӈен эԓпа йастәԓэм, утәԓтәпса хўват, мўй ԓыв ӑт рӑхты щира айәԓԓэԓ, йӑна ма ащиԓам Турма верәт верԓәм, иса щитәта эвәԓман, мўй Законән пӑ Турәм айкеԓ туты хŏйатәт нэпекәт хŏща хӑшман уԓԓа,
\p
\v 15 Турма нŏмәс пŏнман тӑйԓәм, пӑрәм ŏтәт, вещкат пӑ ӑнта вещкат ŏтәт нŏх ԓыԓәӈԓәты вер питәԓ, мўй ԓыв па ԓавәԓԓәт.
\p
\v 16 Щишән ма па ўратԓәм, Турәм пӑ хŏйатәт хŏща ма ԓыпем иса сыстам ат ус.
\p
\v 17 Ар тӑԓ хӑщәм йўпийән, ма мирэма меԓащ мӑты пӑ Турма йир туты урәӈән, ма Иерусалима йŏхәтсәм.
\p
\v 18 Ма Турәм Хотән уйәтсайәм, хун ма сыстамтыты верәт версәм, пӑ щита нэмәԓты мир пӑ йэшащты сый уԓмаԓ ӑнтом.
\p
\v 19 Щит тухәԓ Асия мўвәӈ иудейәт усәт, хŏйтата наӈ йэщаԓтэн ԓойты пӑ мӑнэм нўрмәԓтты мосәс, ма пеԓайэм мŏԓты тӑйԓәт ки.
\p
\v 20 Мўй пӑ щитәт ат йастәԓәт, хун ма синедрион йэщаԓт ԓоймемән, мўй хŏрпи нўр ԓыв ма хŏщайэм уйәтсәт,
\p
\v 21 мосәӈ, ма туп щита нўр тӑйԓәм, синедрион хŏща ўваԓтсәм: 'Ма тӑм хӑтәԓ нын йэщаԓтән, пӑрәм ŏтәт нŏх ԓыԓәӈԓәты вер пеԓа нŏмәс пŏнтэм урәӈән, сўтәтԓайәм?'»
\p
\v 22 Щит хуԓәтмаԓ йўпийән, Феликс, щи Йуш эԓты тŏрԓы уйәтман, ԓыв верэԓ йэԓшәк хӑтәԓтәсԓы, йастәс: «Нын верән ватԓэм, хун щŏрәс ԉаԉ йох куща Лисий йŏхәтәԓ».
\p
\v 23 Ԓўв сот ԉаԉ йох кущайа Павел эԓт тӑйты партсәԓы, туп ԓўвеԓа йэрмат щир верты пӑ ԓухәсԓаԓа ԓўвеԓа мосты верәт верты мўй пӑ йŏхтыԓыты, йэртԓыты ӑт эсәԓсәԓы.
\s Павел касна хотән
\p
\v 24 Кӑмәтса хӑтәԓ йўпийән Феликс, Друзилла ийимеԓ, иудей нэ, пиԓән йŏхәтмаԓ кемән, Павел вохсәԓы, пӑ Иисуса Христоса эвәԓты вер эԓты хуԓәнтәс.
\p
\v 25 Пӑ хун ԓўв вещкат вер эԓты, йŏхи шаващты вер эԓты пӑ йиты Турәм сўт эԓты пŏтәртәс, Феликс пӑԉщәмән йŏхәтса пӑ йастәс: «Ин мӑна, хун пӑ кум шитԓәм, нӑӈен вохԓэм».
\p
\v 26 Ԓўв ищи кўт нумәсәс, эсәԓты урәӈән, Павел ԓўвеԓа ŏх мӑԓ: щишән ван кўтԓы ԓўвеԓ вана туты партыԓысԓы пӑ ԓўв пиԓәԓән пŏтрэмәс.
\p
\v 27 Туп кӑт тӑԓ хӑщәм кемән, Феликс рупитәм тӑхайа Порций Фест йŏхтәс, иудейәта йӑм верты урәӈән, Феликс Павел касна хотән хӑйсәԓы.
\c 25
\s Павел кесарь сўт вохәԓ
\p
\v 1 Фест, щи мўв щуӈа йŏхәтмаԓ кемән, ԋӑԓмет хӑтәԓән Кесария эԓты Иерусалима мӑнәс.
\p
\v 2 Щӑԓта Турма йир верты ŏх ху пӑ иудейәт эԓты ԓӑтәӈа уԓты йох ԓўв хŏщайәԓ Павел эԓты нўр кӑшты йŏхәтсәт пӑ ԓўв пеԓайәԓ эвԓа-йŏԓа пŏтәртсәт,
\p
\v 3 щит вохман, Фест ԓывиԓаԓа йӑм ат верәс, Павел Иерусалима ат вохсәԓы; пӑ йуш хŏща ԓўвеԓ веԓты нŏмәс версәт.
\p
\v 4 Туп Фест йŏхԓы йастәс, мӑтты Павел Кесарияйән ԉаԉ йŏхән эԓт тӑйԓа пӑ йэшавәԓ ԓўв тŏхи мӑнәԓ.
\p
\v 5 «Щиӈәԋща,» ԓўв йастәс, «нын кущайԓән, ма пиԓэмән ат мӑнԓәт, пӑ мŏԓты вер тӑм хŏйат хŏща уԓ ки, ԓўвеԓ ат нўрмәԓтԓэԓ».
\p
\v 6 Ԓыв хŏщайэԓ ԋийәԓ мўй йаӈ хӑтәԓ кем уԓмаԓ йўпийән, Кесарияйа йŏхԓы йŏхтәс, пӑ кимет хӑтәԓ, сўт ху омәсты тӑхайа омасмаԓ кемән, Павел туты партсәԓы.
\p
\v 7 Хун ԓўв этәс, Иерусалим эԓты йŏхтәм иудейәт керәтман ԓойсәт, Павел артан пӑ ԓавәртан нўрмәԓтты питсэԓ, туп ԓыв щи нўрәт тŏрԓы аԉты ӑт верәтсәԓаԓ.
\p
\v 8 Ԓўв пӑ, ԓўвеԓ ӑратыман, йастәс: «Ма нэмәԓты атәм ӑнта иудейәт Закона, ӑнта Турәм Хота, ӑнта кесарьа ӑт версәм».
\p
\v 9 Фест, иудейәта йӑм верты ԓӑӈхаман, Павел пеԓа йŏхԓы йастәс: «Иерусалима мўй мӑнты ԓӑӈхаԓән, тӑм верәт урәӈән, щита ма уԓман, нӑӈ ат сўтәтсайән?»
\p
\v 10 Павел йастәс: «Ма кесарь сўт йэщаԓт ԓойԓәм, хŏта мӑ сўтәтты верэм уԓ. Иудейәта ма нэмәԓтты атәм ӑт версәм, хŏты нӑӈ па йӑма уйәтԓэн.
\p
\v 11 Ма закон шŏппи ўшсэм ки пӑ сŏрәм ԓӑта мŏԓтты версәм ки, пӑрты эԓты шӑшән ӑт ўратԓәм; нэмәԓты ки щит ӑнтом, мўй урәӈән тӑметән мӑ нўрмәԓтԓайәм, нэмәԓты хŏйат мӑнэм ԓывиԓаԓа мӑты ӑт верәтәԓ. Кесарь сўт такан вохԓәм».
\p
\v 12 Щишән Фест, нŏмәс мӑты хŏйатәт пиԓән пŏтремәмаԓ йўпийән, йастәс: «Нӑӈ кесарь сўт вŏхсән, кесарь хŏща щи мӑнԓән».
\s Павел Агриппа хон пӑ Вереника хŏща туԓа
\p
\v 13 Кӑмәтса хӑтәԓ хӑщәм йўпийән, Агриппа хон Вереника пиԓән Кесария воша Фест кущайа мойԓәпса йасәӈ йастәты йŏхтәс.
\p
\v 14 Ԓын ар хӑтәԓ щита хӑйсәтән, пӑ Фест хон пиԓән Павел вер эԓты пŏтәртәс: «Тӑта, касна хотән, Феликсән хӑйәм хŏйат уԓ.
\p
\v 15 Хун ма Иерусалимән уԓмемән, иудейәт Турма йир верты ŏх икет пӑ уна уԓты икет ԓўвеԓ нўра павәтты йŏхәтсәт. Ԓыв ԓўвеԓ сўтәтты партсэԓ.
\p
\v 16 Ма ԓывиԓаԓа йастәсәм, Рим хŏйатәт ӑԓ ишән мӑтты хŏйат сŏрма павәтты вер ӑт тӑйԓәт, щи унты хун ԓўвеԓа нўрмәԓтты ŏтԓаԓ пиԓән уйтантыты пӑ ԓўвеԓ ӑратыты щирән мӑԓа.
\p
\v 17 Хун пӑ ԓыв ты йŏхәтсәт, кимет хӑтәԓ мŏхты ма сўт ху омәсты тӑхай омәсәм пӑ щи хŏйат ты туты партсэм.
\p
\v 18 Ԓўвеԓ лӑп нӑпәтман, нўрмәԓтты ŏтәт и нўр ӑт аԉсәт, мўй хŏрпи нўрәт уԓты ма нумәссәм;
\p
\v 19 Туп ԓыв ԓўв пиԓәԓән иудейәт Турма эвәԓты верэԓ эԓты пӑ а хŏй пӑрәм Иисус эԓты ўра вортсәт, Хŏй эԓты Павел такан пŏтәртәс, мӑтты Ԓўв ԓыԓәӈ.
\p
\v 20 Ма ӑт уйәтсэм, хŏты мӑнэм щи вер ԓэрапты, пӑ ԓўвеԓ иԋщәссэм, ԓўв ԓӑӈхаԓ мўй ӑнтом Иерусалима мӑнты пӑ щита сўт йэщаԓт ԓойты.
\p
\v 21 Туп Павел такан партсәԓы, ԓўв кесарьән ватты кеша ат хӑйса, ма пӑ ԓўвеԓ кесарь киттэм унты ԉаԉ йохәта эԓт тӑйты партсэм».
\p
\v 22 Агриппа пӑ Фест пеԓа йастәс: «Ма па щи хŏйат хуԓәтты кашем ус». «Хӑԓэвәт щи хуԓԓэн» - Фест йŏхԓы йастәс.
\p
\v 23 Кимет хӑтәԓ, хун Агриппа пӑ Вереника ун ԓӑтәӈ щирән йŏхәтсәтән пӑ сўт верты тӑхайа щŏрәс ԉаԉ йŏх кущайәт пӑ ԓӑтәӈа уԓты вошәӈ хŏйатәт пиԓән ԓŏксәтән, Фест партәм хўватән Павел туса.
\p
\v 24 Щӑԓта Фест йастәс: «Агриппа хон пӑ хŏԓ тӑта уԓты йох! Нынан тўм хŏйат ныԓа, хŏй эԓты аратәԓ хŏԓ иудейәт мӑ хŏщайэм Иерусалимән пӑ тӑта, поләщ тўвман пӑ нўр кӑшман, йŏхтыԓысәт пӑ ўвсәт, ԓўвеԓа йэԓԓы уԓты ӑт мосәԓ.
\p
\v 25 Туп ма уйәтсэм, сŏрәм ԓӑта ԓўв немәԓты ӑт верәс; пӑ хŏты ԓўв Август эԓты сўт вер такан вохәс, ма ԓўв хŏщайәԓа ԓўвеԓ китты нŏмәс версәм.
\p
\v 26 Ма ԓўв эԓтэԓ нэмәԓты тŏрԓы вер кущайэма хӑшты ӑт тӑйԓәм; щишән ԓўвеԓ нын хŏщайән, мет шопәӈ Агриппа хон, нӑӈ хŏщайэна тусэм, ватты йўпийән, мӑнэм мŏԓтты хӑшты урәӈән.
\p
\v 27 Ма нумәстэмән, ŏшԓы щир щит, касна хота опсәм ŏт, ԓўв нўрәԓ ӑт аԉман, хон хŏща китты».
\c 26
\s Павел Агриппа хон хŏща ԓўвеԓ ԓўв ӑратыԓԓы
\p
\v 1 Агриппа Павела йастәс: «Нӑӈена нӑӈ эԓтайэн пŏтәртты рӑхәԓ». Щиӈәԋща Павел, йошәԓ йэԓ ԋиштәман, ԓўвеԓ ӑратыты щира пŏтәртты питәс:
\p
\v 2 «Агриппа хон! Мӑнэм ма ŏй тӑйтыйа айәԓԓэм, тӑм хӑтәԓ нӑӈ йэщаԓтэн кашәӈ вер эԓты мӑнэм ма ӑратыты верәтԓэм, мўй хŏща ма иудейәтән нўрмәԓԓайәм,
\p
\v 3 хŏԓна мет, нӑӈ иудейәт уԓәпса щирәт пӑ ўрайа питты нŏпсәт уйәтԓәԓан. Щишән нӑӈен тўӈа-щира мӑнэм хуԓәтты пойәкԓэм.
\p
\v 4 Мет оԓәӈән ма мирэм кўтән уԓәм верэм, Иерусалимән энәмты пŏх ԓŏватән уԓәм уԓәпсайэм иудейәта иса ԓэр.
\p
\v 5 Ԓыв хўв тэԓән ма эԓтэм уйәтԓәт, туп уйәтты вер аԉты ԓӑӈхамәԓәт ки, ма фарисейа усәм. Щит мўӈ эвәԓты верэв хŏща мет так утәԓтәпса.
\p
\v 6 Ин ма сўт йэщаԓт ԓойԓәм Турәм аԉәм вер пеԓа пŏнәм нŏмәс урәӈән, мўй мўӈ ащиԓува мӑса,
\p
\v 7 щи аԉәм вер тӑԓаӈа йиты вер кӑтхŏщйаӈ сыр рут мўӈ мирэв шийаԓәты нумәсԓәт, атәԓ пӑ хӑтәԓ сӑмәӈа Турма верәт верман. Щи пŏнәм нŏмәс урәӈән, Агриппа хон, ма иудейәтән нўрмәԓԓайәм.
\p
\v 8 Мўйа пӑ нын ӑт рӑхты щира ԓўӈәтԓәԓән щит, мўй Турәм пӑрәм ŏтәт нŏх ԓыԓӈатәԓ?
\p
\v 9 Йӑна, ма ищи нумәссәм, мӑнэм Назарет эԓты уԓты Иисус нэм йэщаԓт йэшащты ар мосәԓ.
\p
\v 10 Щит ма щи Иерусалимән версәм: Турма йир верты ŏх икет эԓты йур ўйман, ма ар Турәм хŏйатәт касна хотәта тухрыԓысәм, пӑ, хун ԓыв пӑратысайәт, ма щийэԓ кашащисәм;
\p
\v 11 Пӑ хŏԓ иудейәт пойәкщәты хотәтән ма ар пўш ԓывиԓаԓ шукатысԓам пӑ Иисус атма айәԓты иԉамтысԓам пӑ, ԓыв пеԓайэԓ шек ԉикащман, хŏԓна пӑ па мўв вошәтән ԋухәтԓысԓам.
\p
\v 12 Тӑм урәӈән, йур пӑ Турма йир верты ŏх икет эԓты партәм вер тӑйман, Дамаска мӑнты питсәм,
\p
\v 13 хӑтәԓ кўтәпән йушән, йэшәк хон, ма турәм хӑр эԓты щимәщ нŏви шийаԓәсәм, хӑтәԓ эԓты артан нŏвийа пŏӈхәртәс. Ԓўв мӑнэм пӑ ма пиԓэмән йўвәм мŏхет нŏх хутԓәптәсԓы.
\p
\v 14 Мўӈ хŏԓ мўва иԓ рӑкәтсув, пӑ ма тўр сый хуԓмәсәм, мӑнэма еврейәт йасәӈән пŏтәртәм тўр сый: 'Савл, Савл! Мўйа нӑӈ Мӑнэм ԋўхәԓԓэн? Нӑӈен карты йўщәӈ йўх пеԓа мӑнты ԓавәрт'.
\p
\v 15 Ма йастәсәм: 'Хŏй Нӑӈ, Турәм Куща?' Ԓўв йастәс: 'Ма - Иисус, Хŏйтэн нӑӈ ԋўхәԓԓән.
\p
\v 16 Щӑԓта нӑӈ кўрԓана нŏх ԓойа; Ма щи урәӈән нӑӈ хŏщайэна этсәм, нӑӈен Ма верԓам верты хŏйата пӑ щит вантәм ŏта пŏнты, мўй нӑӈ ватсән пӑ мўй Ма нӑӈена ватәԓтәԓәм.
\p
\v 17 Ма нӑӈен иудей мирэн эԓты хŏԓт пайәтԓэм пӑ па рут мир эԓты, хŏйтат хŏща Ма нӑӈен ин китԓэм,
\p
\v 18 ԓывиԓаԓа сэмԓаԓ пел пўшты, ԓыв пӑтлам эԓты нŏви пеԓа ат ӑӈкәрмәсәт пӑ хиԋ йур эԓты Турәм пеԓа, пӑ Мӑнэма эвәԓты верән кӑрэк йŏрэмәты щир пӑ йэмәӈа пайтәм мŏхет кўтән уԓты щир ат мŏщатсәт'.
\p
\v 19 Щишән, Агриппа хон, ма турәм хӑр вантәпса эԓты йŏвра ӑт керԓәсәм,
\p
\v 20 туп оԓәӈән Дамаск пӑ Иерусалимән уԓты мŏхета, йухәт Иудея ԓŏватән уԓты мŏхета пӑ па рут мира пŏтәртсәм, ԓыв кӑрэк эԓты шӑшән ат керԓәсәт пӑ Турәм пеԓа ат керԓәсәт, кӑрэк эԓты шӑшән керԓәты арат ԓӑт тӑйты верәт верман.
\p
\v 21 Щи урәӈән иудейәт мӑнэм Турәм Хотән ԋӑрэмәсэԓ пӑ лакки мӑншиты ўтщисэԓ.
\p
\v 22 Туп, Турәмән ԋотәпән миймем кемән, ма тӑм хӑтәԓ унты ԓойԓәм, айәта пӑ унәта вантәм ŏта уԓман, нэмәԓты ӑт пŏтәртман, щи тўмпийән мўй эԓты Турәм айкеԓ туты хŏйатәт пӑ Моисей пŏтәртысәт, мӑтты щит питәԓ,
\p
\v 23 тŏрԓы ки, мӑтты Христоса шук туты мосәс пӑ, мет оԓӈа парәм эԓты нŏх ԓыԓәӈԓәмаԓ йўпийән, мўӈ мирэва пӑ па рут мира нŏви такан айәԓтты мосәс».
\p
\v 24 Хун ԓўв щиты ԓўвеԓ ӑратысԓы, Фест сыйәӈ тўрән йастәс: «Павел, нӑӈ ŏхен атма йис! Ун утәԓтәпса нӑӈен ŏх атма йиты унты йŏхтәптәсԓы».
\p
\v 25 «Ӑнтом, йэшәк ԓӑтәӈ Фест», - ԓўв йастәс, - «Ма ŏхем атәм ӑнтом, туп тŏрԓы пӑ ошәӈ йасӈәт пŏтәрԓәм.
\p
\v 26 Хон щи верәт эԓты уйәтԓәԓы, хŏй йэщаԓт ма тŏрԓы пŏтәртԓәм. Ма йэша нэш ӑт эвәԓԓәм, ԓўв эԓтэԓ мŏԓты иса тӑм эԓты сайԓәман ат уса, тӑм ӑнта щуӈән ус.
\p
\v 27 Агриппа хон, Турәм айкеԓ туты хŏйатәта эвәԓԓән амўй? Уйәтԓэм, эвәԓԓән».
\p
\v 28 Агриппа Павела йастәс: «Нӑӈ мӑнэм йэша нэш ӑт эвԓәптәԓэн, Христиана йиты урәӈән».
\p
\v 29 Павел йастәс: «Ма Турәм пойәксэм ԓўԓән, шимәԓ мўй, ар мўй, ӑнтом туп нӑӈ, пӑ хŏԓ тӑм хӑтәԓ мӑнэм хуԓәтты ŏтәт, тӑмиты ат йисәт мўй хŏрпи ма, туп йӑрәм карты кеԓ такԓы».
\p
\v 30 Хун ԓўв щит йастәс, хон пӑ куща ики, Вереника пӑ ԓыв пиԓԓаԓән опсәм ŏтәт нŏх ԓойсәт;
\p
\v 31 пӑ пўӈԓа йирԓәман, ԓыв кўтэԓән пŏтәртсәт: «Тӑм хŏйат сŏрәм кеша пӑ касна хот кеша нэмәԓты атәм ӑт верәԓ».
\p
\v 32 Пӑ Агриппа Фест пеԓа йастәс: «Тӑм хŏйат эсәԓты кўш рӑхәс, кесарь эԓты сўт ӑт вохәс ки». Щишән куща ԓўвеԓ кесарь хŏща китты нŏмәс верәс.
\c 27
\s Павел Рим воша мӑнәԓ
\p
\v 1 Хун мўӈева Италия мўва хопән мӑнты нŏмәс верса, Павел пӑ тухәԓ па опсәм ŏтәт Август когорта эԓты Юлий нэмпи сот ԉаԉ йох кущайа мӑсайәт.
\p
\v 2 Мўӈ, Асия вошәт сӑхат мӑнты, Адрамит вош паршәӈ ун хопа ԓэԓтсув пӑ мӑтсув. Мўӈ пиԓэвән Аристарх, Македония ху, Фессалоника вош эԓты ус.
\p
\v 3 Кимет хӑтәԓ Сидон хŏща хойсув. Юлий, Павел пиԓән йӑм щира ус, ԓухәсԓаԓ хŏща ԓўвеԓ йӑхты эсәԓсәԓы пӑ ԓыв ԓўв верԓаԓ эԓты ат нумәссәт.
\p
\v 4 Щиԓта этман, йэщаԓт вот эԓты хŏнтаман, мўӈ Кипр пухәр вот сай пелкеԓ сӑхат мӑтсэв,
\p
\v 5 пӑ, Киликия пӑ Памфилия шŏма щарәс шŏппи ўшмев йўпийән, Ликия мўвән Миры воша йŏхәтсув.
\p
\v 6 Щита сот ԉаԉ йŏх куща Александрия вош эԓты уԓты, Италия мўва мӑнты, паршәӈ ун хоп уйтәс пӑ мўӈев щи ԓэԓтсәԓы.
\p
\v 7 Ар хӑтәԓ сыс мўӈ айәԓта йэԓԓы мӑтсув пӑ мет йухәт, ўрайән Книд вош шŏма йŏхәтсув. Пӑ вот мўӈев мосты тӑха пеԓа мӑнты кумән ӑт мийԓысԓы, мўӈ Крит пухәр сайа Салмона нэмпи ԋŏԓ пеләк сӑхат ванамәсув.
\p
\v 8 Ԓўв мŏхтэԓ ўрайән ўратмев йўпийән, и тӑхайа йŏхәтсув, Йӑм Каԓтнаӈәта айәԓтԓа, щи ԉэпән Ласея вош ус.
\p
\v 9 Мўӈ щи арат ар сыс уштәмев урәӈән пӑ мӑнты вер пӑԉщәма йиты питәс, иудейәт сўс вўщԓәты пŏра ўш хӑщәс, Павел ԓывиԓаԓа йастәс:
\p
\v 10 «Ма ваттэмән, мўӈ мӑнәпсайэв шек ԓавәрт питәԓ пӑ ун атәм тӑйты питәԓ ӑнта туп пŏрмасәта пӑ хопа, мўӈ уԓәпсайэва па».
\p
\v 11 Туп сот ԉаԉ йох куща Павел йасәӈ эԓты сэвәс тӑйты хŏйата пӑ хопәӈ кущайа аршәк эвԓәс.
\p
\v 12 Щи лух тӑԓ уԓты щирән атәм ус, пӑ ар хŏйат щиԓта йэԓ мӑнты нŏмәс мийԓысәт, верәтты кемән Финик вош унты мӑнты пӑ щита тӑԓ хӑщәптәты мосәԓ. Финик - щит Крит лух, нўм кев оԓәӈ пӑ ным кев оԓәӈ вот йэщаԓт ус.
\s Щарәсән так вот
\p
\v 13 Нўм вот пŏԓты питәс, пӑ ԓыв нумәссәт мосты щир мŏщатсәт, хопән рупитты мŏхет йакарэԓ нŏх аԓәпсәт пӑ Крит ԉэп эԓты мӑтсәт.
\p
\v 14 Туп йэшавуԓ пухәр эԓты ŏвәс пеԓа уԓты хӑԓэвәт пеләк так вотшики пŏԓты питәс, эвроклидона айәԓтты вот.
\p
\v 15 Паршәӈ ун хоп щиты аԓэмәса пӑ ԓўв вот йэщаԓт мӑнты ӑт веритәс, пӑ мўӈ, хумпәта мийәсман, тыйэԓ-тŏхэԓ тутԓысайув.
\p
\v 16 Мўӈ айшәк Клавда нэмпи пухәр вот сай пелкәԓа питсув. Щита мўӈ ўрайән ай хопев катәԓты верәтсэв.
\p
\v 17 Ай хопев нŏх аԓԓәммев йўпийән, паршәӈ хопән рупитты хŏйатәт щевма кеԓәт паршәӈ хоп иԓта таԓсәԓаԓ пӑ ԓўвеԓ лӑп йӑрсәԓәсэԓ. Сэй хишәӈ пана ӑт опсатты урәӈән, парәш иԓ эсәԓсэԓ пӑ щиты щи вотән тутԓысайув.
\p
\v 18 Кимет хӑтәԓән, вотән паршәӈ хоп щиты йовәԓты питса пӑ ԓэԓтәм пормасәт ԓыв йиӈка иԓ йовәԓты питсәԓаԓ.
\p
\v 19 Хуԓмет хӑтәԓән пӑ мўӈ йоша-кўра хоп кеԓәт-ԋўрәт иԓ йовәԓты питсув.
\p
\v 20 Ар хӑтәԓ ӑнта най, ӑнта хусәт ӑт нысайәт пӑ так вот щиты пŏԓәс, мет йухәт хŏԓна мўӈ нŏх питты щира уԓты нŏпсэв лўттәсэв.
\p
\v 21 Хŏйатәт хув нэмәԓтты ӑт ԓэсәт. Павел, ԓыв кўтэԓа ԓоймаԓ кемән, йастәс: «Йох! Мӑнэм хуԓәтты мосәс пӑ Крит эԓты пўӈԓа мӑнты ӑт мосәс, тӑмәщ шук пӑ накԓат нын ԓуԓән ӑт ватсәты.
\p
\v 22 Ин пӑ нынан такан йастәԓәм, нŏх тўӈмәԓтыйаты, нын эԓтан нэмәԓты хŏйат ӑт посаԓәԓ, туп паршәӈ хопев шўкаԓәԓ.
\p
\v 23 Хӑщәм атән мӑнэма Турәм ангел этәс, Хŏй пеԓа ма уԓԓәм пӑ Хŏйа ма пойәкщәԓәм
\p
\v 24 пӑ йастәс: 'Павел, аԓ пӑԓа! Нӑӈена кесарь йэщаԓт ԓойты мосәԓ, пӑ Турәм Ԓўв Йӑмәԓән нӑӈен щи ԓŏват йӑм верәс, хŏԓ нӑӈ пиԓэнән уԓәм ŏтәта уԓәпса мойԓәс'.
\p
\v 25 Щишән йох, нŏх тўӈмәԓтыйаты, ма Турма эвәԓԓәм, щиты питәԓ, хŏты мӑнэма йастаман ус:
\p
\v 26 Мўӈ мӑтты пўхра ўты йўвәтты верэв уԓ».
\s Паршәӈ ун хоп хумпәтән шўкатты вер
\p
\v 27 Ԋӑԓхŏщйаӈмет атән, хŏты мўӈ Адриа щарәс хўват тутԓысайув, ат кўтәп кемән хопән рупитты йох мўв ший мŏштәты питсәт, иԓампа мӑтты мўва ванамәты питсув,
\p
\v 28 пӑ, ԓыв йик мӑԓат артаԓәсэԓ, пӑ хус ԓӑԓ ус, щӑԓта йэша ус мӑԓатәԓ па артаԓәсэԓ, пӑ ветхŏщйаӈ ԓӑԓ арат ус.
\p
\v 29 Кевәӈ тӑхайа питты эԓты пӑԓман, ԋӑԓ йакар сэвәс эԓты иԓ вŏщкәсәт пӑ хӑтԓа йиты ԓавәԓсәт.
\p
\v 30 Хун пӑ хопәӈ мŏхет хопеԓ эԓты хŏнтаты ўтщисәт пӑ щарса ай хоп иԓ эсәԓсәт, щимәщ хŏрас верман, мӑтты хоп ԋŏԓ эԓты йакарәт иԓ эсәԓԓәт,
\p
\v 31 Павел сот ԉаԉ йох кущайа пӑ ԉаԉ йохәта йастәс: «Ԓыв паршәӈ хопән ӑт хӑщԓәт ки, нын ԓыԓԓән этәԓтәты ӑт верәтԓәты».
\p
\v 32 Щиӈәԋща ԉаԉ йохәт ай хоп кеԓәт шŏппи сэвәртсәԓаԓ, пӑ хоп иԓ рӑкнәс.
\p
\v 33 Хӑтԓа йиты йэԓпийән Павел мŏхет хŏԓ ԓэты пойәксәԓы, йастәман: «Тӑм хӑтәԓ ԋӑԓхŏщйаӈмет хатәԓ, хŏты нын, ԓавԓәсман, нэмәԓты ӑт ԓэвман, ԓэтŏтԓы уԓԓәты.
\p
\v 34 Щишән нынан ԓэтыйа пойәкԓыԓам: щиты нын уԓәпсайԓын шавиты туԓт; нэмәԓты ŏтԓән хŏща и ŏхсŏх нын ŏхԓән эԓты иԓ ӑт рӑкәнәԓ».
\p
\v 35 Щит йастәмаԓ кемән пӑ ԋаԋ ўймаԓ йўпийән, ԓўв, хŏйатәт ватман, Турма пўмащипа йастәс пӑ, кӑтна мŏртмаԓ кемән, ԓэты питәс.
\p
\v 36 Щиӈәԋща хŏԓыйэ каркама йисәт пӑ хŏԓыйэ ԓэты питсәт.
\p
\v 37 Паршәӈ хопән мўӈ аратэвән кӑтсот ԓапәтйаӈ хут хŏйат усув.
\p
\v 38 Хун хŏйатәт тӑрәмтыйа ԓэсәт, ԋаԋ ԓат сэми хирәт щарса йŏвәԓман, хоп кенапты питсэԓ.
\p
\v 39 Хун хӑтԓа йис, ԓыв этәм мўв ӑт мŏштәсэԓ, туп мŏԓтты пан тӑйты йик лух шийаԓәсәт, щи хойты нŏмәс версәт, хойты верәтԓа ки.
\p
\v 40 Щӑԓта, йакарәт нŏх ўйәм йўпийән, щарәс хўват мӑтсәт пӑ, сэвәс ԓупԓаԓ хŏԓт эхмеԓ кемән пӑ ай паршэԓ вот хўват нŏх аԓәммеԓ йўпийән, мўв питар пеԓа ԋŏхтәсэԓ.
\p
\v 41 Пан ŏха хойсәт, пӑ хопеԓ сорәм тӑхайа опсәс. Ԋŏԓәԓ иԓ ԓŏӈәс пӑ ӑт ԋŏхԓыйәԓ, сэвсәԓ пӑ хўмпәтән пелки сэкԓа.
\p
\v 42 Ԉаԉ йохәт касна хота омәсты ŏтәт веԓты кашащсәт, мӑтты ŏт ўты ущман ӑт ат хŏнтас.
\p
\v 43 Туп сот ԉаԉ йох куща, Павел ӑратыман, ԓывиԓаԓ щи верэԓ эԓты иԓ вŏԓәтсәԓы пӑ ущты хошты ŏтәта оԓӈа иԓ навәрмәты пӑ мўва ўты ущты партсәԓы,
\p
\v 44 па ŏтәта пӑ хŏйа сохәԓ сурән, хŏйа пӑ мŏԓтты паршәӈ хоп пелкәт сурән ўты йŏхтәптәты партсәԓы; щиты хŏԓыйэ йӑма питара ўшсәт.
\c 28
\s Павел Мальта пухәрән
\p
\v 1 Ўты пайтәсмеԓ йўпийән, Павел пиԓән уԓәм ŏтәт ŏша пайәтсэԓ, пухәр нэмәԓ Мальта.
\p
\v 2 Пухәрән шŏшийа уԓәм па сыр хŏйатәт мўӈева йӑм арат ԋотәп версәт. Йэрт пӑ ищки уԓәм пӑтыйән, ԓыв тўт пŏтсәт пӑ хŏԓыйэ мўӈев вана вохсәԓаԓ.
\p
\v 3 Хун пӑ Павел варәс аԓтэԓ ӑктәс пӑ тўта пŏныԓыйәс, ŏхты вой, тўт рўв эԓты хŏнтаман, ԓўв йошәԓа, пŏрэмәман, иԓԓы лўԋиты питәс.
\p
\v 4 Хун пухрәӈ хŏйатәт, Павел йош эԓты ŏхты вой иԓԓы лўԋиты шийаԓәсәт, ԓыв кўтԓаԓән пŏтәртты питсәт: «Уйәтман, тӑм хŏйат веԓтатты ŏт: ԓўв щарәс эԓты нŏх питәс, туп вещкат ԓух сўт ԓўвеԓ ԓыԓӈа уԓты ӑт хӑйԓәԓы».
\p
\v 5 Туп ԓўв, ŏхты вой тўта рӑԋкәмаԓ йўпийән, нэмәԓты атма ӑт хойәс.
\p
\v 6 Ԓыв ԓўвеԓ нŏх пўвԓәты мўй пӑ, шӑмкапан пӑрман, иԓ рӑкәнты ԓавәԓсэԓ; туп, хўв ԓавԓәсман пӑ ваттэԓән, нэмәԓт атәм сŏрта ӑт питәс, па щира нумәсты питсәт пӑ йастәԓәт, ԓўв иԓампа ԓух.
\p
\v 7 Щи тӑха ԉэпән Публий нэмпи пухәр куща хотәт усәт. Ԓўв мўӈев вана ўсԓы пӑ хуԓәм хӑтәԓ мойԓәптысув.
\p
\v 8 Публий ики ащи каврәма пӑ хŏнәԓ кӑшийа йўвман ŏԓтӑхайәԓән ŏԓәс. Павел ԓўв хŏщайәԓа ԓŏӈәс, пойәкщәс пӑ, ԓўв эԓтэԓ йошԓаԓ пŏнмаԓ кемән, ԓўвеԓ тўмтака версәԓы.
\p
\v 9 Тӑм вер йўпийән пухәрән уԓты, муш тӑйты па мŏхет йŏхтыԓысәт пӑ тўмтака верыԓысайәт,
\p
\v 10 ԓыв мўӈева ар йӑм вер версәт пӑ мӑнты питмевән мŏсты ŏтәтән мӑсайув.
\s Павел Рим воша йохәтты вер
\p
\v 11 Хуԓәм тыԓәщ хӑщәм йўпийән мўӈ Александрия эԓты уԓты, Диоскуры нэмпи паршәӈ хопән мӑтсув, щи пухәр хŏща тӑԓ хӑщәптәс,
\p
\v 12 щӑԓта Сиракузы воша йŏхәтмев йўпийән, щита хуԓәм хӑтәԓ усув.
\p
\v 13 Щиԓта мӑнмев йўпийән, Ригия воша йŏхәтсув. Йухәт хӑтәԓ нўм вот пŏԓты питәс пӑ кимет хӑтәԓән мўӈ Путеол воша йŏхәтсув,
\p
\v 14 хŏта хӑнам йохԓув уйәтсув, пӑ ԓыв хŏщайэԓ ԓапәт кем хӑтәԓ уԓты вохсайув, йухәт Рим воша мӑтсув.
\p
\v 15 Щита уԓәм хӑнам йох, мўӈ эԓтэв хуԓмеԓ кемән, мўӈ йэщаԓтэв Аппий вош хӑр лот пӑ Хуԓәм Хоԓты Хот унты этсәт. Павел ԓывиԓаԓ шийаԓәмаԓ кемән, Турма пумащипа йасӈәт йастәс пӑ нŏпсәԓ такамәс.
\p
\v 16 Хун пӑ мўӈ Рим воша йŏхәтсув, сот ԉаԉ йох куща йӑрәм ŏтәт ԉаԉ йох ун кущайа мӑсԓы, Павел пӑ атэԓ щира ԓўвеԓ ԓавәԓты и ԉаԉ ху пиԓән уԓты эсәԓса.
\s Павел Рим вошән
\p
\v 17 Хуԓәм хӑтәԓ хащәм кемән, Павел иудейәт эԓты ԓӑтәӈ йŏх йӑха вохсәԓы пӑ, хун ԓыв йӑха йŏхәтсәт, ԓывиԓаԓа пŏтәртәс: «Хӑнам йох! Мирэма мўй пӑ ащиԓув щирәта нэмәԓты атәм ӑт кўш версәм, ма йӑрман Иерусалим эԓты Рим мŏхета мӑсайәм.
\p
\v 18 Ԓыв, мӑнэм сўт вермеԓ йўпийән, эсәԓты ўтщисэԓ, ма хŏщайэм сŏрәм ԓӑта нэмәԓты нўр ӑнтом;
\p
\v 19 туп иудейәт йасәӈԓаԓ кӑтна мӑнман уԓԓәт, мӑнэм кесарь эԓты сўт вохты вера йис, туп ӑнтом ма мирэм мŏԓты хŏща нўрәӈа верты урәӈән.
\p
\v 20 Щи пӑтыйән ма нынан вохсәԓам, уйтантыты пӑ нын пиԓәнән пŏтрэмәты урәӈән, Израиль нŏмәс йэԓ пŏнты урәӈән, ма тӑмиты йӑрсайәм».
\p
\v 21 Ԓыв пӑ ԓўвеԓа йастәсәт: «Мўӈ нӑӈ эԓтэн ӑнта нэпек Иудея мўв эԓты йоша ўйԓысув, ӑнта йŏхтыԓыты хӑнам йохәт эԓты нэмәԓты хŏйат нӑӈ эԓтэн айкеԓ ӑт китыԓыйәс пӑ мŏԓты атәм йасәӈ ӑт йастыԓыйәс.
\p
\v 22 Туп мўӈева нӑӈ эԓтэн хуԓты мосәԓ, хŏты нӑӈ нумәсԓән. Мўӈ уйәтԓэв, тӑм утәԓтәты вер эԓты кашәӈ тӑхайән ўра ворԓәт».
\p
\v 23 Щӑԓта, ԓўвеԓа аԉәм хӑтәԓән, йӑм ар хŏйат ԓўв хŏщайәԓ хоԓты хотәԓа йŏхтәс; пӑ ԓўв аԓәӈсӑхат эԓты йэтән унты ԓывиԓаԓа Турәм Хон Уԓәпса эԓты пŏтәртәс. Вантәм верәт этәԓтыйәс пӑ ԓывиԓаԓ эвԓәптәман, Моисей Закон пӑ Турәм айкеԓ туты хŏйатәт нэпекәт эԓты ўйман, Иисус эԓты пŏтәртәс.
\p
\v 24 Тухԓәт ԓўв эвԓәптәсԓы, па ŏтәт пӑ ӑт эвәԓсәт.
\p
\v 25 Кўтԓаԓән ўра ворты питсәт, пӑ хун ԓыв мӑнты питсәт, Павел щимәщ йасӈәт йастәс: «Йэмәӈ Ԓыԓ Турәм айкеԓ туты хŏйат Исаия сӑхат мўӈ ащиԓува йӑма йастәс:
\p
\v 26 'Тӑм мир хŏща мӑна пӑ йасты: пӑԓԓәнән хуԓԓәԓән пӑ ӑт мŏштәԓԓән, пӑ сэмԓәнән ватты питԓәты пӑ ӑт шийаԓәԓԓән.
\p
\v 27 Тӑм мŏхет сӑм вŏйән лӑп таԓса, пӑ пӑԓԓаԓән ўрайән хуԓԓәт, пӑ сэмԓаԓ лап хӑтщәсԓаԓ, сэмән ӑт шийаԓәты щира, пӑ пӑԓԓаԓән ӑт хуԓты щира, пӑ сӑмԓаԓән ӑт мŏштәты щира, пӑ Ма пеԓайэм ӑт керԓәты щира, Ма ԓывиԓаԓ тўмтака ӑт ат версәԓам'.
\p
\v 28 Щиӈәԋща, нынана ԓэр ат питәԓ, Турәм нŏх пайәтты щир па рут мира китса: ԓыв щи хуԓԓэԓ».
\p
\v 29 Хун ԓўв тӑм йастәс, иудей йох, ԓыв кўтэԓән такан ўра ворман, мӑтсәт.
\p
\v 30 Щӑԓта Павел тӑԓаӈ кӑт тӑԓ сŏхәптәм хотәԓән ус пӑ хŏй ԓўв хŏщайәԓ йŏхтыԓыйәс, хŏԓ вана ўйԓысԓы,
\p
\v 31 ԓўв, ӑт пӑԓман пӑ ӑт йэртԓыман, Турәм Хон Уԓәпса эԓты пŏтәртәс пӑ Турәм Куща Иисус Христос эԓты утәԓтәс.