\id REV - Iwal NT [kbm] -Papua New Guinea 1984 (web version -2013 bd) 
\h REVELESEN 
\toc1 Revelesen 
\toc2 Revelesen 
\toc3 Re 
\mt1 Revelesen  
\c 1  
\s1 Yaun ebe Kilisi geb gitangi Jon ok  
\p
\v 1 Warik yaun etenik giengk givuaivun ate-ngge, be ande Yisu Kilisi ginei binge. Pomate ges yaun nok ru gitangi Yisu veik Yisu nes gen ebe atob menihlang ok ru nitangi ane amolmol kulkul ane. Beti Ei gilgum be eitit tatpweng gen etok are dang-eteik; Ei geb ane angela ti gitangi ane amol kulkul ane ayeu Jon ginme be ginei yaun etok binge gitangi ayeu.  
\v 2 Ayeu gali gen bambamo etok tepwengge gikwai beti ganei Pomate gabu Yisu Kilisi as yaun be ganei, Yaun etok yaun ano molge.   
\p
\v 3 Amolmol ebe ivnaui Pomate ane yaun ebe ginei gipil gen ebe atob menihlang ok, be tis eisir ebe iute yaun etok ok, be amolmol ebe isov Pomate ane yaun ete ayeu garo gisov kapia etenik ane lu ge ok, eisir etok tepwengge tas vevias ge. Ve sawa etok atob menihlang kob atob Pomate nilgum gen bambamo ete ei ginei atob nilgum ok ano nile.   
\s1 Jon ane kapia gitangi amolmol bui ane gitangi dubi 7  
\p
\v 4 Ayeu Jon gab kapia etenok gitangi yem amolmol bui ane dubi 7 ete umbweg nangge Asia nok. Pomate ebe warik gibweg, be galkik gibweg be asonge ninme nindeb mul ane ok, atob nemb ane yaun bwaibwaya be tis ane ta vie nitangi yem nilek. Be ngalau 7 ebe ivarkei Pomate na ok, sotol ok atob inemb as yaun bwaibwaya be tis as tas vie nitangi yem nivin weik etok ge.  
\v 5 Yisu Kilisi ei amol ebe ginei Pomate ane yaun walang ok roro-dongke ok. Be ei amol mate ane ebe gimdil vukuri nangge taku gimat ane ulu ok, be king nalk ane tepwengge as amol bamo ei. Ei ok atob nemb ane yaun bwaibwaya be tis ane ta vie nitangi yem nivin weik etok ge.  
\p Ei ta viti ve eitit anongge beti gisin eitit and tiate ebe talgum ok tepwengge gikwai ve ei ate ane tuerk.  
\v 6 Ei geb eitit ve ane amolmol-gen, be gilgum eitit metahlang ve Tame Pomate ane amolmol-gen ebe ivang isov Pomate be amolmol ane sawa ok. Ei Amol tis are bamo be ei ane gwang-ne atob niengk dang-etok nemb ta-ngge. Bingano.   
\p
\v 7 Be unaute kob. Nivin ebe ei ve nimbweg nisov umbim aplo be ninumul ninme ok, atob amolmol walang ok matanos nitut nipil ei. Amolmol ebe warik es ei ta ve bili gile gisa ei-givsangin be iro ei ve i ok, atob tepwengge matanos nitut nipil ei nivin weik etok ge. Be amolmol nalk ane tepwengge atob indi ei love tas bua be inteng anongge. Bingano, gen dang-etok atob menihlang bingano ge.   
\p
\v 8 Amol Bamo Pomate ei gwang-ne walang ok ane dabe ei dongke-ngge, be ei ginei: “Ayeu ate ayeu Amol mate ane be ayeu Amol mul ane.” Be Pomate nok ge ete gibweg ebe warik be galkik gibweg be mul ane atob ninme.   
\s1 Jon gili Kilisi  
\p
\v 9 Ayeu Jon angg amolmol-gen yem, be Yisu ane amolmol-gen eitit. Be eitit tepwengge tanggas bunam tis vavavne tavin it-ate, be eitit tepwengge tavang tasov Pomate ane gwang-ne ane lu. Eitit tepwe taro it-ate ta be tanggas gen bunam tavin it-ate. Be ayeu ganei Pomate ane yaun vusa, be ganei tis ebe aplongg givin Yisu ok, beti eisir itin ayeu be ile itak ayeu gabweg nusawa ti ital inei Patmos.  
\v 10 Be givin ebe Amol Bamo ane as-mate ok, Ngalau Yamar geb ayeu avwut be gaute avo ti weik ebe tavulk giteng ok.  
\v 11 Be avo nok ginei dang-eteik; “Mie nuro gen bambamo ete guli ok tepwengge nisov kapia be nomb nitangi amolmol bui ane dubi 7 eteik: Epeses, Smena, Pegamam, Taitaira, Sadis, Piladelpia, be Leodisia.   
\p
\v 12 Beti ayeu garo nangg vukir ve nali nanei amol ret ete ginei yaun gitangi ayeu ok. Ayeu garo nangg vukir love gali lam gol 7 givarkei,  
\v 13 be gali gen ti weik ebe amolmol ok givarkei gisov lam gol 7 etok luvwe. Amol nok gino kup undib bamo love gile gitak ebe va tap-tape ok be gibiti bika gol gibagi luvwe pale.  
\v 14 Be dabe tulkwe tis dabe-lan bogbogo molge be matano weik ebe yev ok.  
\v 15 Be va tap-tape ringenk molge, be gaute ei avo weik ebe bui bambamo ane konge ok.  
\v 16 Be bage mol geb viteuk-aue 7 ta, be buyag undib ti ebe mate tavlu be tavlu ok meng-gihlang nangge ei avo, be buyag nok mate tiate molge. Amol nok na ringenk molge weik ebe as giro ringenk ok.   
\p
\v 17 Ayeu gali ei love matanongg tumtumi be gabieg gale gatak be gayengk weik ebe ande gamat vunu ok gabloblo ei va. Bemem kob ei gitak bage mol giwei ayeu be ginei; “Upelk dang-etok bwaya. Ve ayeu amol mate ane be ayeu amol mul ane weik etok ge.  
\v 18 Ayeu gabweg matawangg dang-etok. Bingano, warik ayeu gamat vunu, bemem galkik ande mie ate guli gikwai ve ayeu atob nambweg matawangg dang-etok nemb ta-ngge. Be ayeu gab tanmat vunu, be tis amolmol ebe asonge inmat vunu nindeb mul ane ok as taku ane il-dabe dabin.  
\v 19 Dang-etok be mie nuro gen ete galkik guli nik be tis gen ete galkik giengk nik be gen ebe asonge menihlang ok, ane yaun nisov kapia nile.  
\v 20 Be viteuk-aue 7 ete galkik mie guli ayeu baingg mol gap ta ok be tis lam gol 7 etok, etok tuvweng gen ti ane. Be viteuk-aue 7 be tis lam gol 7 nok ane dabe dangeteik: Viteuk-aue 7 etok weik amolmol bui ane dubi 7 etok as angela. Be lam gol 7 etok weik amolmol bui ane dubi 7 etok.   
\c 2  
\s1 Yaun gitangi amolmol Epeses ane  
\p
\v 1 Mie nuro yaun eteik nisov kapia be nomb nitangi amolmol bui ane nangge Epeses as awaga-gen be nunei: Ayeu Amol ebe gab viteuk-aue 7 ta giengk baingg mol, be gavarkei gasov lam gol 7 etok luvwe ok, ete gab yaun etenik gitangi yem.   
\p
\v 2 Ayeu gali yem aim luev walang ok be tis aim kulkul bambamo ebe ulgum love ukwes aim-ate vun-kunu ok gikwai. Be gatpweng are ganei yem uvarkei gwang-ne molge, be ivkir dumangg-aim gitangi amolmol tiate ane. Eisir etok ete inei gitangi yem inei; “Amei ok amei aposel givin weik etok ge.” Bemem eisir iyo is ate ve eisir aposel ite ma. Yem ate ok utpweng eisir as luev be tis as yaun ebe inei be ilgum ok are gikwai ve eisir amolmol bingkas-kasop ane roro.  
\v 3 Amolmol ili ebe yem unggas ayeu arengg ta gwang-ne molge ok, beti ilgum yem tiate tiate. Bemem yem uro aim-ate ta be unggas gen bunam bambamo etok, be utlangg aim bua ve ebe ulgum kulkul love gisak aim vun-kunu ok ite ma. Be ayeu gali yem aim luev etok vie molge be tangg givin anongge.  
\v 4 Bemem siti-ngge eteik ete ayeu veve nanei ane yaun nitangi yem: Givin ebe yem aplongg-aim givin vaku ge ok, be givin etok ete yem tangg-aim givin ayeu anongge, bemem galkik ande ma.  
\v 5 Be warik yem os aim luev vie molge, bemem galkik ande yem ukari aim luev vevies etok gikwai be ande ulgum gen giriv be gira sin sin-ge love ande uyaing aim ate gikwai. Dang-etok be tangg aim nitung ninumul nile aim luev mate ane warik ok vukuri be unro aim ate vukir be unes aim luev nitau nile luev mate ane eteok vukuri. Be ginei yem unalgum dang-etok ite, be unro aim ate vukir ite, atob ayeu nalek be navwat lam (yev) ete giro yem ok nikwai yem.  
\v 6 Bemem gen dongke eteik ge ete yem ulgum gile gitangi ebe ayeu tangg givin ok. Ve yem bwaingg aim ve Nikolas tis ane amolmol-gen as mateu, dang-ete ayeu gali eisir tiate givin ok weik etok ge.   
\p
\v 7 Dang-etok be ginei amol ti talngavo giengk, okob niute yaun ete Ngalau Yamar ginei gitangi amolmol bui ane nik vevie. Ve amol ti ginei nimbweg Sadam ane gwang-ne vovo, okob atob ayeu yab ge ve ei be nen ei matawas ane ebe givarkei Pomate ane um nangge gulumb ok ane ano.   
\s1 Yaun gitangi amolmol bui ane ebe imbweg nangge Smena ok  
\p
\v 8 Mie nuro yaun eteik nisov kapia be nomb nitangi amolmol bui ane ebe imbweg nangge Smena ok as awaga-gen be nunei: Ayeu Amol mate ane be ayeu amol mul ane givin weik etok ge. Warik ayeu gamat vunu, bemem galkik ande ayeu gabweg matawangg. Ayeu gab yaun etenok gilek ve yem.   
\p
\v 9 Ayeu gali gen bunam tis vavavne bambamo ebe yem unggas ok be gatpweng are dang-etok ganei, amolmol ge ete ili yem inei yem gen ma ve aim. Bemem Pomate ei gili yem ginei yem amolmol ebe tis wambal walang ano ok. Be yaun bambamo ete amolmol subu inei gipil yem ok, ayeu ande gali gikwai. Be eisir etok ete inei yaun gipil is ate be inei; “Amei ok amei amolmol Juda ane. Bemem eisir nangge Juda ite ma. Etok Sadam ane amolmol-gen eisir roro.  
\v 10 Be unaute kob. Bwayage kob atob yem un-gas vavavne, bemem unpelk ve gen bunam ete atob un-gas ok bwaya. Atob Sadam nidgin yem ate aim amolmol subu ta be nili, ninei yem uvarkei gwang-ne me ma. Be atob yem un-gas vavavne sawa ebti nik-ge. Bemem un-gas aim aplongg-aim givin ta gwang-ne ge dang-etok painge love nitangi ebe ve unmat vunu ok ge, kob atob ayeu natak yem unambweg matawangg-aim ve aim aplongg-aim givin etok ane.   
\p
\v 11 Dang-etok amol ti ginei talngavo giengk, okob niute yaun ete Ngalau Yamar ginei gitangi amolmol bui ane nik ve-vie. Ve ginei amol ti gibweg giwei Sadam ane gwang-ne, okob amol nok gitangi ebe atob nimat vunu mang-mangi ok ite ma.   
\s1 Yaun gitangi amolmol bui ane nangge Pegamam  
\p
\v 12 Mie nuro yaun eteik nisov kapia be nomb nitangi amolmol bui ane nangge Pegamam nile be nunei: Ayeu amol ebe gab buyag undib ti ebe mate tavlu be tavlu ok, ete gab yaun etenik gitangi yem.   
\p
\v 13 Ayeu gali ganei Sadam ei geb amolmol dabin nangge nam dabe etenok bingano ge. Bemem yem aplongg-aim givin ayeu gwang-ne molge be unggas ayeu arengg ta gwang-ne molge, be uvuaivun aim aplongg-aim givin etok ite ma. Warik Antipas, amol ebe ginei awangg yaun binge ok, ei givang givin yem be amol nok gisov awangg yaun walang ok ane lu vie molge. Be amol nok ete amolmol es ei vunu gisov yem matanongg-aim nangge taku ete ande Sadam geb dabin nok. Be givin sawa etok ok yem os ayeu arengg ta ite weik etok ge.  
\v 14 Bemem siti eteik ete ayeu veve nanei nitangi yem: Yem aim amolmol subu ete galkik imbweg nangge Pegamam nok, eisir inggas Belam ane luev ta gwang-ne molge ete ivang nik. Belam nok ane luev dang-eteik: Warik ei ges luev bingkasop ane ru gitangi Belak ve niyo niyo amolmol Israel ane, viek eisir invang mul ve luev gen tiate ane. Beti Belak gilgum be amolmol Israel ane imdil be en wenk bambamo ebe amolmol emb ve da gitangi pomate bingkasop ane ok, be wasi tinas giriv be gira tiate.  
\v 15 Be galkik etenik ok weik etok ge, ve amolmol subu ete galkik imbweg nik eisir inggas Nikolas tis ane amolmol-gen as yaun ta gwang-ne molge ete ivang nik.  
\v 16 Dang-etok yem undi be unro aim ate vukir seukie-ngge. Be ginei ma, okob sawa etenik ge atob ayeu natangi yem nalek be nas valir nitangi amolmol ete ilgum gen dang dang-etok ok, ve buyag valir ane undib bamo ete giengk ayeu avongg ik.   
\p
\v 17 Dang-etok be amol ti ginei talngavo giengk, okob niute yaun ete Ngalau Yamar ginei gitangi amolmol bui ane nik vevie. Ve ginei amol ti nimbweg niwei Sadam ane gwang-ne, okob atob ayeu namb ben gulumb ane subu ete galkik givuaivun ete giengk nik nitangi ei. Be atob ayeu naro ares vaku ti niwei vat bogbogo ti be namb nitangi amol nok, be ares nok gitangi ebe atob amolmol ebeok sinsin inatpweng are ok ite ma. Amol ebe are giengk vat etok ok ge atob nitpweng are.   
\s1 Yaun gitangi amolmol bui ane nangge Taiataira  
\p
\v 18 Be mie nuro yaun eteik nisov kapia be nomb nitangi amolmol bui ane nangge Taiataira be nunei: Pomate Natu ayeu, be ayeu matanongg aivi weik ebe yev ok be vangg ai-tine ringenk weik gen ti. Ayeu gab yaun etenok gitangi yem gilek.   
\p
\v 19 Ayeu gatpweng gen walang ete yem ulgum ulgum ok are gikwai. Be ayeu gali ganei yem tangg-aim givin amolmol gitlek be aplongg aim givin ayeu gwang-ne molge, be ulgum kulkul walang ok ve omb amolmol ru. Ayeu gali ganei yem uro aim ate ta be unggas gen bunam walang ok tis aplongg-aim dongke-ngge, be ayeu gatpweng are ve yem aim luev mate ane eteok ete vie, be galkik atob yem unalgum aim gen walang ok vie molge.  
\v 20 Bemem ayeu gali etok tiate beti veve nanei nitangi yem: Nam-nambed be yem nangg-aim giro avie ete ital are inei Jesebel ok ta be givang givin yem painge-ngge. Avie etenok ginei dang-eteik ginei, “Ayeu Pomate ane avie kulkul ane ti ebe ganei Pomate avo ok.” Bemem ei gilgum ve giyo giyo awangg amolmol kulkul ane be gibul eisir ve luev wasi ane be tis ebe ve inen wenk ebe amolmol emb ve da gitangi pomate bingkasop ane ok.  
\v 21 Ayeu galgum ve ganei ei niro ate vukir, beti galgum gen ti gitangi ei ite be givang ane gen. Bemem ei ate ge bua ve ret niro ate vukir be nivkir dume nitangi ane luev wasi ane bambamo etok.  
\v 22 Dang-etok be unaute kob. Ayeu atob namb vavavne be tis gimat bamo ti nitangi avie nok. Be amolmol ebe es luev wasi ane gitangi ei ok, ginei iro is ate vukir be ivkir dumas gitangi luev tiate bambamo ete ei gilgum ok ite, okob atob ayeu namb vavavne nitangi eisir nivin.  
\v 23 Be amolmol ebe itau ile Jesebel ane luev ok, atob ayeu nas eisir vun-kunu nivin weik etok ge. Veik amolmol bui ane tepwengge inatpweng are inei ayeu amol ti ebe gali be gatpweng amolmol as luev be tis as tas-gitung are ok. Be atob namb gen ret-ret ete eisir ilgum ok ane den ninumul nitangi eisir ate nile vukuri.   
\p
\v 24 Bemem ayeu ve nanei nitangi yem amolmol subu ete galkik umbweg nangge Taiataira nik. Yem uvang mul ve luev dang dang-etok ite ma. Be imbul yem ve luev ete ital inei; “Sadam ane luev ebe givuaivun ete giengk aplo ge,” ok ite ma. Beti ayeu veve nanei nitangi yem dang-etok nanei; Atob ayeu namb bunam ti vukuri nitangi yem ite ma.  
\v 25 Bemem gen ret ret ete ande yem unggas gikwai nok, unemb gen etok ta gwang-ne ge love nitangi ebe ayeu ve nanumul nanme ok ge.  
\v 26 Amol ti ginei nimbweg niwei Sadam ane gwang-ne, be gisov awangg yaun walang ok ane lu tis va pale ge painge love gimat vunu sin-ge, atob ayeu namb gwang-ne nitangi ei ve nemb amolmol dabas ungglus ane dabin.  
\v 27 Be atob ei bage tis bueng be nemb eisir dabin, weik ebe amol ges ul nalk vusa be gile suk-sukus ok. Be kulkul ete ayeu gab gitangi ei ok, gitangi kulkul ebe Tamangg geb gitangi ayeu ve namb amolmol dabin ok.  
\v 28 Be atob ayeu namb viteuk-awe as bamo ane nitangi ei.   
\p
\v 29 Amol ginei talngavo giengk, okob niute yaun ete Ngalau Yamar ginei vusa gitangi amolmol bui ane ik vevie.   
\c 3  
\s1 Yaun gitangi amolmol bui ane nangge Sidas  
\p
\v 1 Mie nuro yaun eteik nisov kapia be nomb nitangi amolmol bui ane ebe imbweg Sidas ok as awaga-gen be nunei; Ayeu Amol ebe Pomate ane Ngalau 7 etok ivang ivin ayeu, be gab viteuk-awe 7 etok ta ok ete gab yaun etenik gitangi yem gilek: Ayeu gatpweng gen walang ete yem ulgum be unei ok are be ma gikwai. Be amolmol inei yaun gipil yem be inei dang-eteik; “Eisir etenik ivang matawas ete ivang nik.” Bemem ayeu nanei nitangi yem nanei; Yem uvang weik ebe gen gimat ok roro-ngge.  
\v 2 Dang-etok be unamdil, be unsov be unyengk ge bwaya. Yem aim luev vevies subu ete galkik veve unkari nikwai nik, yem unemb aim gen ta vukuri be unalgum menihlang bamo ge ma. Ve luev bambamo ete galkik os aim gen uvang nik, ayeu gali ti gitangi ebe ve nipasang awangg Pomate matano ok ite ma molge.  
\v 3 Be mateu ete warik gimungg ane yem ute be ete ande unggas ta nok, yem tangg-aim nitung mateu etok vukuri be unpasang niengk aplongg-aim be unro aim ate vukir. Be ginei yem usov be uyengk painge ge, okob atob ayeu natangi yem nalek bwaya-gege weik ebe amol vaina ane ti ok. Yem atob tangg-aim nisgil sawa ebe ayeu ve natangi yem nalek ok.  
\v 4 Bemem yem aim amolmol tavlu ete galkik imbweg nangge Sidas nok, eisir nas ili as kup vie-ngge be ilgum be tomtom ite ma. Eisir etok ete gitangi ebe ve ino gen bogbogo be invang invin ayeu ok.  
\v 5 Amol ti ginei nimbweg niwei Sadam ane gwang-ne, atob ayeu namb kup bogbogo ti weik etok ve ei nino be atob ayeu nasin ei are nikwai nangge kapia matawas ane ite ma. Atob ayeu nanei ei are nile nihlang nangge Tamangg tis ane ngalau kulkul ane nas.   
\p
\v 6 Dang-etok be ti ginei talngavo giengk, okob niute yaun ete Ngalau Yamar ginei gitangi amolmol bui ane nik vevie.   
\s1 Yaun gitangi amolmol bui ane nangge Filadelpia  
\p
\v 7 Be mie nuro yaun eteik nisov kapia be nomb nitangi amolmol bui ane nangge Filadelpia as awaga-gen be nunei: Ayeu Amol yamar, be yaun ano ane dabe ayeu. Ayeu gab Dawit ane il dabe ta, be ginei ayeu nas nam avo ponge okob amol ti gitangi ebe atob nes avwut ok ite ma. Me ginei ayeu nas avut, okob amol ti gitangi ebe ve nes ponge ok ite weik etok ge. Be ayeu nok ete gab yaun etenik gitangi yem gilek:  
\v 8 Ayeu gatpweng yem aim luev walang ok are gikwai. Be ta-undi e, ande ayeu gas nam avo ponge gikwai be amol ti gitangi ebe ve nes avut vukuri ok ite ma yapin. Ayeu gali gikwai ganei yem aim gwang-ne siti-ngge galkik giengk, bemem yem usov awangg yaun walang ok ane lu vie-ngge be os ayeu arengg ta ite ma.  
\v 9 Be Sadam ane amolmol subu ete galkik ivang be ital is ate inei “Eisir nangge Juda” nik, eisir iyo is ate. Ve eisir nangge Juda ite ma, etenok amolmol bingkas-kasop ane ge bambamo etenok. Be unaute. Atob ayeu nalgum be eisir nok inme be inro vas dubi supwe nitangi yem. Ayeu atob nalgum gen dang-etok veik eisir inatpweng are inei ayeu tangg givin yem ano anongge.  
\v 10 Yem usov awangg yaun ane lu vie molge, be uro aim ate ta be unggas gen bunam walang ok gitangi ge. Dang-etok be atob ayeu namb yem dabin vie-ngge, be gen bunam ete atob menihlang be nitpungi amolmol nalk ane tepwengge ok atob menihlang nipil yem ite ma.  
\v 11 Ayeu atob natangi yem nalek bwaya-gege, dang-etok be gen ret ret ete galkik yem omb ta nok unemb aim gen ta gwang-ne ge. Ve gilob amol ti nitlek ninggas yem aim gen ete omb ta ok ane ano.  
\v 12 Amol ti ginei nimbweg niwei Sadam ane gwang-ne, atob ayeu namb ei nivarkei weik Pomate ane nam yamar ane tuelk. Be gitangi ebe atob ei nile nihlang nikwai nam yamar etok ok ite, gitangi ite molge. Be atob ayeu naro angg Pomate are be tis angg Pomate ane nam vu are bwalbwale niengk amol nok. Be nam vu nok ital are inei Jerusalem vaku. Nam vaku nok atob ninme nangge awangg Pomate be atob nisov nangge gulumb ninme nitak. Be ayeu ate ok atob naro arengg vaku bwalbwale niengk amol etok nivin weik etok ge.   
\p
\v 13 Dang-etok be amol ti ginei talngavo giengk okob niute yaun ete Ngalau Yamar ginei vusa gitangi amolmol bui ane ik vevie.   
\s1 Yaun gitangi amolmol bui ane nangge Leodisia  
\p
\v 14 Mie nuro yaun eteik nisov kapia be nomb nitangi amolmol bui ane nangge Leodisia as awaga-gen be nunei: Ayeu Amol yaun ano ane. Be ayeu ganei Pomate ane mateu walang ok ano be roro dongke. As-mate walang ok ayeu ganei ganei yaun be ganei yaun ano ano ge. Ayeu gab gen tepwengge ete Pomate gipasang ok dabin. Be ayeu nok ete gab yaun eteik gilek ve yem:   
\p
\v 15 Ayeu gatpweng yem aim yaun be tis aim luev ebe ulgum be unei ok tepwengge are gikwai. Be ayeu gali gikwai ganei yem luvus me vavav-nangg aim ite ma. Ayeu tangg givin ve ganei yem unvang luvus me vavav-nangg aim.  
\v 16 Bemem ma. Yem vavav-nangg aim siti-ngge, be vavav-nangg aim molge me luvus molge ite ma. Beti gilgum be ayeu ve naluk yem nangge avongg nile nitak.  
\v 17 Yem unei yaun gipil aim ate be unei: “Amei tis mone bamo be amei tis wambal bamo, be amei asut amei ate ve gen ti ane ite ma.” Bemem uyo aim ate. Yem umbweg tiate molge be gitangi ebe ve amolmol indi yem be tas viti ve aim ok. Yem gen ma molge ve aim be uvang weik ebe matanongg aim bop ok, yem uvang weik ebe uvang utlangg aim ulis vuwri sin sin-ge ok. Bemem yem ate utpweng etok are ite.  
\v 18 Dang-etok be ayeu nanei nitangi yem nanei; Unavgo gol ebe ivse ve yev love ringenk molge ok, veik un-gas mone bamo ve gol nok ane. Be unavgo kup bogbogo be uno nisil utlangg aim ulis veik niro mai-mayangg aim ete amolmol ili inei uvang utlangg aim ulis vuwri sin sin-ge ok ponge. Be unavgo marasin matanos ane be untak ipil matanongg aim veik vie.  
\v 19 Ayeu ginei tangg nivin amolmol subu, atob ayeu narau is be nas bing gwang-ne ge nitangi eisir veik inalgum gen vevie. Dang-etok be yem tangg aim nitung aim luev ete ulgum ulgum ok be unro aim ate vukir subu.  
\v 20 Be unaute. Ayeu gavarkei nam avo gideb dume ane be gatal yem painge ge, be ginei amol ti niute ayeu avongg be nes nam avo ponge, atob ayeu nasov nale nambweg navin ei be atob eilu anen be anum nisov dongke anvin amei ate.  
\v 21 Amol ti ginei nimbweg niwei Sadam ane gwang-ne, atob ayeu yab-ge be ei nimbweg nimbloblo awangg lopong yaun ane nivin ayeu, dang ebe warik ayeu gabweg gawei Sadam ane gwang-ne be Tamangg Pomate gigas ayeu gale gabweg gabloblo ei ane lopong yaun ane gavin ei ate ok.   
\p
\v 22 Dang-etok, be ti talngavo ginei giengk okob niute yaun ete Ngalau Yamar ginei vusa gitangi amolmol bui ane nik vevie.   
\c 4  
\s1 Eisir avos givwat Pomate are nangge gulumb  
\p
\v 1 Gen etok ma gikwai, bekob au gali gen ti vukuri nangge gulumb be gali nam avo ti ponge be avo givkwav ge giengk. Be avo ti ebe warik ginei yaun gitangi ayeu be gaute weik ebe tavulk giteng ok, avo nok ginei yaun gitangi ayeu vukuri be ginei; “Mie ureu unme eteik be ayeu nas gen bambamo ebe asonge menihlang nindeb mul ane ok ru itangi mie be uli.”  
\v 2 Be seukie-ngge Ngalau Yamar ane gwang-ne geb ayeu avut love gali lopong king ane ti, be amol ti gibweg giwei lopong nok dobo.  
\v 3 Amol nok na ringenk molge weik vat ebe ital inei jaspa be konilien ok. Be giro asin giro gile gidbul lopong king ane nok, be au gali sangas keng-keinge weik vat ebe ital inei emeral ok.  
\v 4 Be gali lopong 24 givarkei gile gidbul lopong king ane etok, be awaga gitangi 24 imbweg iwei lopong nok. Eisir awaga nok ino gen bogbogo ge be ikuk gulu-lung gol giwei dabas tulkwe.  
\v 5 Be bilip tis walpap ges nangge ete lopong king ane givarkei ok. Be itung dau vorko 7 be aivi givarkei gideb lopong nok na ane. Dau vorko 7 nok, etok Pomate ane ngalau 7 etok.  
\v 6 Be gen bamo ti weik ebe gielk ok givuev gideb lopong king ane nok na ane, be gen nok sangas keng-keinge molge weik ebe bui-tal ane (galas) ok. Be gen matawas ane aivat weik ebe bwelk ok, ivarkei ile idbul lopong king ane nok be ivarkei. Be gen aivat etok matanos walang molge gidbwem utlas ulis tepwe-ngge avut.  
\v 7 Gen mate ane weik ebe bwelk laion ok, be gen ailu ane weik ebe bwelk bulimakao avkwan ok. Be gen aitol ane na love weik ebe amolmol nas ok, be gen aivat ane etok weik ebe manbweng bwelk be uvun ebe giluep givang givang einggoto ok.  
\v 8 Gen matawas aivat nok tepwengge bais-lan 6 gitang-tangi ge. Be matanos walang molge gidbwem utlas ulis avut gideb dume be aplo ane givin. Be givin as be tambok walang ok eisir inei dang-eteik:  
\q1 “Amol Bamo Pomate ei amol gwang-ne be tulkwe gav-gavul tiate.  
\q1 Ei amol yamar be yamar, be yamar ano molge.  
\q1 Ei gibweg ebe warik be galkik gibweg be ete asonge ninme nik.”  
\m Gen matawas aivat etok inei yaun etok painge tis as mate walang ok be sawa ma.   
\p
\v 9 Gen matawas ane aivat nok tas vevie-ngge ve Pomate ebe gibweg giwei lopong king ane, be atob nimbweg dang-etok painge ge ok. Be avos givwat Pomate are be tas vie anongge gitangi ei. Be as mate walang ok gen matawas aivat etok ilgum dang-etok painge ge.  
\v 10 Beti eisir awaga 24 ebe iro vas dubi supwe gitangi Pomate be inei uye be es miengk gitangi Pomate ebe gibweg giwei lopong king ane be asonge nimbweg dang-etok painge ge ok, ikari as gululung gol etok gile gitak gibloblo lopong king ane nok na be inei;   
\q1
\v 11 “O Amol Bamo, amei-mei Pomate mie.  
\q1 Mie gitangi ebe ve amolmol tepwengge tas vevias ve mie, be avos nivwat mie arem,  
\q1 be invang insov miam gwang-ne ane lu ge ok.  
\q1 Ve mie ge gupasang gen walang etenik.  
\q1 Mie gupasang gen walang ok gitangi ebe mie ate am tam givin ok be meng-gihlang, be galkik ande gen etok tepwengge ete giengk nik.”   
\c 5  
\s1 Jon gili kapia ti ebe idgin ta ok  
\p
\v 1 Ayeu gali kapia ti giengk Pomate ebe gibweg lopong king ane ok bage mol ane. Be iro kapia nok bwalbwale giengk aplo be dume ane givin, be emb wal ake 7 gipil kapia nok bekob idgin ta be rungwei gile.  
\v 2 Bekob gali ngalau kulkul ane (angela) ti ebe gwang-ne molge ok, gital yaun avo bamo ge be ginei; “Amol vie ret gitangi ebe atob niyati wal etenik nikwai be nemb kapia etenik ponge ok?”  
\v 3 Bemem amol ti nangge gulumb me nangge nalk, me nangge nalk aplo gitangi ebe ve nemb kapia etok ponge be nili ok ite, ma molge.  
\v 4 Be ayeu aplongg bunam be ongo-ngangg anongge ve ganei indi amol ti ebe gitangi ve nemb kapia etok ponge be nivnawu ane bwalbwale etok ok okob.  
\v 5 Bekob awaga ti ginme be ginei gitangi ayeu be ginei; “Aplom bunam be ongo-ngem iro im-ate vun-kunu bwaya. Be ute kob. Bwelk laion ti galkik ande gimdil nangge Juda, amol nok meng-gihlang nangge Dawit ane vaku-gen. Weik ebe ei ningge giro gibweg wakas ok. Amol nok gibweg valir vovo gikwai, beti ei gitangi ebe ve niyati wal ake 7 ete emb gipil kapia etok be nemb kapia nok ponge ok.”   
\s1 Jon gili bwelk Sipsip Natu  
\p
\v 6 Bekob nangg gile gali bwelk Sipsip ti givarkei, love weik ebe ande es vunu ok. Ei givarkei gisov lopong king ane tis gen matawe aivat etok be tis awaga bambamo etok luvwe butu ge. Bwelk Sipsip nok dabe tulkwe ane range gitangi 7 be matano 7. Etok weik Pomate ane ngalau 7 ebe gihlin is be ivang emb taku walang ok avut ok.  
\v 7 Bwelk Sipsip nok gile geb kapia bamo etok nangge Pomate ebe gibweg giwei lopong king ane ok bage mol.  
\v 8 Ei gile geb kapia bamo nok gikwai kob, gen matawas aivat ebok tis eisir awaga 24 ebok ile iro vas dubi supwe gitangi ei. Awaga 24 etok tepwengge ivwat gen uye ane be tis bele gol kap-kapul kap-kapul gitangi is ate ge. Be da yev ukwas ane, ane gen ukwas bambamo ete gisov bele gol bambamo etok love gituvki gipil. Be etok weik Pomate ane amolmol-gen as miengk.  
\v 9 Be eisir iru uye vaku ti be es dang-eteik inei:  
\q1 “Mie gitangi ebe ve nomb kapia etok itin be nuyati wal ake 7 etok nikwai ok.  
\q1 Ve gisov es mie vunu, be mie guvgo amolmol ve miate am tuerk, veik nomb eisir nitangi Pomate nile.  
\q1 Bingano, mie guvgo amolmol vu ti ane ti ane be avo ti avo ti, be ulis ti ulis ti, be nangge nalk walang ok tepwengge.   
\q1
\v 10 Be mie gob eisir ve invang insov Pomate be amolmol sawa veik inemb amei mei Pomate be eisir as King, ane kulkul vas pale ge. Be atob eisir inemb amolmol dabin nangge nalk.”   
\s1 Eisir avos givwat bwelk Sipsip are  
\p
\v 11 Ayeu gab nangg itin vukuri love gaute angela walang molge avos. Eisir ivarkei ile idbul lopong king ane tis gen matawe aivat ebok be awaga bambamo etok,  
\v 12 be ital yaun avos bambamo ge be inei:  
\q1 “Bwelk Sipsip etenik ebe warik es vunu ok,  
\q1 ei gitangi ebe ve ninggas gwang-ne tis gen vie walang ok, ei ane dabe gwet vie molge be ane gwang-ne gitlek gwang-ne walang ok.  
\q1 Ei gitangi ginei amolmol tepwengge avos nivwat ei are be tas vie ve ei ane be inemb as tas vie nitangi ei.”   
\m
\v 13 Bekob gaute gen bambamo ete Pomate gipasang be giengk nangge gulumb be nangge nalk be nangge nalk aplo be nangge gielk ok, gen etok tepwengge ebe giengk geb taku avut ok eisir inei dang-eteik inei:  
\q1 “Pomate gibweg giwei lopong king ane,  
\q1 be bwelk Sipsip ok givin weik etok ge.  
\q1 Sulu tis ares bamo be amolmol atob avos nivwat sulu ares tis as mate walang ok be niengk nemb ta ge.”   
\p
\v 14 Be gen matawe aivat ebok inei, “Yaun ano.” Be eisir awaga bambamo ebok iro vas dubi supwe be inei uiye be es miengk gitangi Pomate gabu Yisu.   
\c 6  
\s1 Bwelk Sipsip giyati wal ake 6 gikwai kapia  
\p
\v 1 Bekob gali bwelk Sipsip gile geb kapia ebe iviri wal ake gitangi 7 gipil ok, be giyati wal ake mate ane gikwai. Be ayeu gaute gen matawe aivat etok as ti ginei yaun be avo weik ebe walpap ges ok, be ginei; “Unme!”  
\v 2 Be gab nangg itin vukuri love gali amol ti bage tis tunk be gibweg giwei bwelk hos bogbogo ti. Be es gululung ti weik ebe king as gululung ok gisov ei dabe. Be ei gile ve ges valir love gibweg valir vovo, be ane kulkul ve atob nimbweg valir anongge molge vovo.   
\p
\v 3 Bekob bwelk Sipsip giyati wal ake ailu ane, ebe emb gipil kapia etok ok. Be ayeu gaute gen matawe ailu ane ginei dang-eteik: “Unme!”  
\v 4 Be bwelk hos muele ti meng-gihlang. Be emb gwang-ne gitangi amol ete gibweg giwei bwelk hos etok ok, ve nemb yaun bwai-bwaya nikwai amolmol nangge nalk veik ines is ate vun-kunu niriv be nira. Beti emb buyag valir ane undib bamo ti ebe mate tavlu be tavlu ok, gitangi ei ve kulkul etok ane.   
\p
\v 5 Bwelk Sipsip giyati wal ake aitol ane gikwai kapia, be ayeu gaute gen matawe aitol ane ginei dang-eteik: “Unme!” Be ayeu gab nangg itin vukuri be gali hos tumtumi ti ginme. Be amol ebe gibweg giwei hos tumtumi etok ok, bage tis gen ebe ili ili gen ane bunam giengk ok (sigel).  
\v 6 Be au-gaute gen ti weik ebe avos ok meng-gihlang nangge gen matawe aivat etok luvue ge, be avo nok ginei dang-eteik: “Mie nurau padi nitangi 2 kina ane nisov ul natu ti. Bemem nuli ge velob nuyaing ei tui tis wain.”   
\p
\v 7 Be bwelk Sipsip giyati wal ake aivat ane, be au-gaute gen matawe aivat ane ginei dang-eteik: “Unme!”  
\v 8 Be ayeu nangg gile love gali bwelk hos maingo ti. Be amol ebe gibweg giwei hos maingo etok ok, ital are inei Tanmat vunu. Be amol ebe geb amolmol gimat ane as taku dabin ok gitau gile amol nok ve ginme. Be emb gwang-ne gitangi sulu ve atob inemb amolmol vus-vusa nile dubi aivat, be atob gabu ines amolmol dubi ti ane vun-kunu. Sulu atob ines eisir vun-kunu ane luev dang-eteik; Atob gabu ines eisir ve buyag valir ane ete ivwat ok, bekob atob marav-nes is be gimat walang ok atob nes eisir vun-kunu nivin. Be bwelk valir ane bambamo ebe ivang nalk ok atob inyaing eisir nivin weik etok ge.   
\p
\v 9 Bekob bwelk Sipsip giyati wal ake bage tavlu ane gikwai kapia, be ayeu gali amolmol subu ebe nolge imat vunu ok dalgos ivarkei taku da ane (alta) ane lu. Eisir etok ebe warik emb Pomate ane mateu ta gwang-ne molge be emb kulkul ve inei mateu gitangi amolmol ok. Beti amolmol ebe tas vavis ve eisir ok ete es eisir vun-kunu.  
\v 10 Eisir nok dalgos ital yaun avos bambamo ge dang-eteik be inei: “O Amol Bamo gen walang ok ane, Mie Amol yamar. Miam luev ano be roro dongke! Asger-ge kob mie nulgum amolmol nalk ane as yaun be nomb ameimei tuerk ane den nitangi eisir?”  
\v 11 Bekob emb kup bogbogo undib bambamo gitangi eisir ge be inei gitangi eisir be inei: “Yem unyap unambweg ge dang-etok bekob. Ve bwayage kob atob amolmol ebe tas-vavis ve yem ok, atob ines yem aim nune-nggen be aim male-nggen vun-kunu weik ete warik es yem ok. Be bwayage eisir ines sawa etok avut yapin kob atob Pomate nemb yem aim tuerk ane den nitangi eisir.”   
\p
\v 12 Bekob bwelk Sipsip giyati wal ake 6 ane ebe emb gipil kapia ok gikwai, be au gab nangg itin vukuri love gali gikuri ges bamo molge nangge nalk. Be as-matano ande meng-gihlang tumtumi gavul weik kambam tumtumi ebe avie gaptol ikuk ikuk ve muangk ve arwas-gen ane ok, be aiweng meng-gihlang muele weik ebe tuerk ok.  
\v 13 Be viteuk-aue bingbleng ile itak itak nalk weik ebe wavin ges wei-wei gal-gali ulur ok.  
\v 14 Be gulumb ok givil-kilir ate gile gikwai weik ebe ivil-kilir yemb love idgin ta ok. Be matendubi tis nu-sawa tepwengge ite is ate ru ikwai-kwai lavos.  
\v 15 Be king nalk ane tepwengge be amolmol ebe tis ares ok, be amolmol valir ane as awaga-gen be amolmol ebe tis mone bamo ok, be amolmol gwang-ne gwang-ne ane tis amolmol ebe emb kulkul sin sin-ge be mone ma ve is ok, tis amolmol ebe ivang as gen vie-ngge ok tepwengge ile imumu isov nalk tis rumbuk avo-avo imbweg matendubi dubi.  
\v 16 Be ital ve matendubi bambamo tis taku ebe rumbuk rumbuk ok be inei; “Yem unes ulur unme be unvuaivun amei, veik Pomate ebe gibweg lopong king ane ok gabu bwelk Sipsip ete ande ta vavis nik indi amei nangg amei bwaiya.  
\v 17 Ve etenik sulu as as-mate ebe gabu ve inalgum as tas-vavis ano nile be inemb vavavne nitangi amolmol ok, ete ande meng-gihlang nik. Dang-etok be amol ti gitangi ebe atob niro ate ta be ninggas gen bunam bamo etenik ok ite ma yapin.”   
\c 7  
\s1 Pomate gitak ane tuvweng gipil amolmol 144,000 nangge Israel  
\p
\v 1 Etok ma gikwai, bekob gali Pomate ane ngalau kulkul ane aivat ivarkei itangi nalk ane kuni aivat etok ge. Sotol emb wavin aivat ebe gituvki nangge nalk ok ta, veik wavin niyuki nalk me gielk me ei ti bwaya.  
\v 2 Bekob gali ngalau kulkul ane ti vukuri gile givarkei gideb as gireu ane. Ngalau kulkul ane nok givwat Pomate matawe ane, ane tuvweng be ei gital yaun avo bamo ge gitangi ngalau kulkul ane aivat ebe ande Pomate geb gwang-ne gitangi eisir ve inyaing nalk tis gielk ok,  
\v 3 be ginei: “Gaptol unyaing nalk tis gielk be ei seukie-ngge bwaya. Be amei antak amei Pomate ane tuvweng nipil ane amolmol kulkul tepwengge nas-vatu nikwai kob, be bwayage kob gaptol unyain gen bambamo etok.”  
\v 4 Bekob gaute ital amolmol Israel ane ebe ande inggas Pomate ane tuvweng ok tepwengge gipil dongke gitangi 144,000.  
\v 5 Ete Juda ane vaku-gen ebe inggas Pomate ane tuvweng ok gitangi 12,000 be Luben ane gitangi 12,000 be Gat ane gitangi 12,000,  
\v 6 be Asa ane gitangi 12,000 be Naptali ane gitangi 12,000 be Manasa ane gitangi 12,000.  
\v 7 Be Simion ane 12,000 be Liwi ane 12,000, be Isaka ane 12,000  
\v 8 be Sebulon ane 12,000 Josep ane 12,000 be Benyamin ane 12,000. Eisir etok ete tepwengge inggas Pomate ane tuvweng giengk nas-vatu.   
\s1 Amolmol dubi bamo ti avos givwat Pomate are  
\p
\v 9 Gen etok tepwengge ma gikwai bekob ayeu gab nangg itin vukuri love gali amolmol dubi bamo ti ebe gitangi ve tanav-nawi ok ite, eisir iro is-ate sut be imbweg. Eisir nok inme nangge nalk walang ok be nangge eisir vu ti ane ti ane, be nangge ulis ti ulis ti, be avo ti avo ti. Eisir iro is-ate sut ile ivarkei lopong king ane tis bwelk Sipsip na. Be ino kup bogbogo undib bambamo be bais tis niuk-lan ge.  
\v 10 Be ital yaun avos bambamo ge dang-eteik inei: “Eitit and Pomate ebe gibweg lopong king ane ok gabu bwelk Sipsip, sulu ge ete inggas eitit tanumul ta-tangi sulu tale, beti galkik ande eitit tambweg vie!”   
\p
\v 11 Be angela tepwengge ituk ge ivarkei ile idbul lopong king ane tis awaga be gen matawe aivat ebok, be inei uiye be es miengk gitangi Pomate ivarkei lopong king ane na.  
\v 12 Be inei dang-eteik inei: “Bingano! Eitit tand-vevie anongge ve and Pomate ane, be tanei ei are vusa painge ge. Ei ane dabe-gwet vie gitlek, be eitit tand-vie nitangi ei be tanemb ei are itin niengk ei-goto ge. Ei amol gwang-ne gitlek. Bingano, ei amol gwang-ne be tulkwe gavgavul tiate. Be gen bambamo etenik, etok ei ge ane gen be atob niengk dang-etok nemb ta-ngge. Bingano.”   
\p
\v 13 Bekob eisir awaga 24 ebok ti ginme be ginei gitangi ayeu dang-eteik: “Asav ete ino kup bogbogo undib bambamo etok? Be wali eisir etok inme nangge?”   
\p
\v 14 Be ayeu gawel ei avo be ganei: “Amol bamo, mie ate gutpweng are gikwai.” Beti ei ginei gitangi ayeu be ginei: “Eisir etok ebe inggas bunam be vavane bamo molge nangge amolmol ebe ili eisir tiate painge ge ok. Beti galkik ande eisir ivuk as kup ve bwelk Sipsip ane tuerk beti as gen bogbogo.  
\v 15 Beti galkik ande eisir ivarkei nangge Pomate ane lopong king ane na. Be as-mate walang ok, tambok be as, eisir inei uiye be es miengk gitangi Pomate ivang ane lum yamar gigas ta-ngge. Be Pomate ebe gibweg giwei lopong king ane etok ok, ete atob nivang nivin eisir be nemb eisir dabin.  
\v 16 Be atob eisir marav-nes is me bui nes is vukuri ite ma. Be as-gwangne wat nivse eisir vukuri ite weik etok ge.  
\v 17 Ve gisov bwelk Sipsip ete gibweg lopong king ane luvwe ge ok, ete atob nemb eisir dabin, be atob nitwem eisir inde nalk avo ebe bui gitwem meng-gihlang ok, be inum bui matawas ane. Be Pomate atob nisin eisir matanos rulu nikwai, be wat inteng vukuri ite ma.”   
\c 8  
\s1 Bwelk Sipsip Natu giati wal ake 7 ane ebe emb gipil kapia ok  
\p
\v 1 Bwelk Sipsip Natu giati wal ake 7 ane, ebe emb gipil buku bamo etok ok gikwai, be taku gulumb ane walang ok king-kinge sin-ge be gikie ma be giengk dang-etok gitangi as-matano sawa tavlu.  
\v 2 Bekob gali Pomate ane angela 7 ebe ivarkei Pomate na ok, ivwat tavulk 7 gitangi is-ate ge.  
\v 3 Bekob gali angela ti vukuri gile givarkei gibloblo taku da ane (alta). Angela nok givwat bele gol ti ebe gen ukwas ukwas gisov ok. Ei givwat gen ukwas ukwas anongge gisov bele gol nok ve nile be nemb ve da nitangi Pomate, niwei alta gol ete givarkei Pomate ane lopong king ane na ok, nivin Pomate ane amolmol-gen tepwengge as miengk.  
\v 4 Be gen ukwas ukwas nok tis Pomate ane amolmol-gen as miengk ane varvaru geb itin nangge angela nok bage be gireu love gibielk ve Pomate.  
\v 5 Bekob angela nok givwat bele ete gen ukwas ukwas gisov ok gile be gitak yev ebe giengk alta ok gisov bele nok love gituvki gipil, bekob gidawi yev nok gisov nalk gile. Love walpap tis bilip be gikuri ges geb taku avut.   
\s1 Angela aivat iyuv as tavulk  
\p
\v 6 Be angela 7 ebe galkik ivwat tavulk gitangi is-ate ge ok, ipasang is-ate veve inyuv tavulk nok be niteng.   
\p
\v 7 Angela mate ane giyuv ane tavulk be ur tis yev be tuerk gisov ate aplo be meng-gihlang be ges gisov nalk gile. Eisir es nalk tis ei walang ok vusa gile dubi aitol aitol, nalk gile ake aitol be ei gile dubi aitol. Be yev gen nalk ake ti tis ei dubi ti be taku natu natu walang ok tepwengge be ma gikwai.   
\p
\v 8 Bekob angela ailu ane giyuv ane tavulk be ikari gen bamo ti weik ebe matendubi bamo ti ok tis yev ge gisov gielk gile. Be es gielk vusa gile ake aitol, ete ake ti tepwengge meng-gihlang weik ebe tuerk ok.  
\v 9 Be es gen matawas ane tepwengge ebe ivang gielk ok vusa gile dubi aitol, be dubi ti tepwengge imat vun-kunu be ma. Be es ei-vovo bambamo ete ivang gielk ok vusa gile dubi aitol weik etok ge, ete ei-vovo nok dubi ti tepwengge tiate.   
\p
\v 10 Bekob angela aitol ane giyuv ane tavulk be viteuk-aue bamo ti aivi weik ebe dau aivi ok, be belienge nangge gulumb gile gitak nalk. Eisir es bui bambamo be natu natu walang ok vusa gile dubi aitol, ete viteuk-aue nok beleinge gile gitak bui nok dubi ti, be tis bui de-demk tepwengge.  
\v 11 Viteuk-aue nok ital are inei Miemk Vavis. Be bui walang ete galkik es vusa gile dubi aitol ok, ete dubi ti meng-gihlang weik miemk vavis ok. Be amolmol anongge inum bui nok be ges is vun-kunu.   
\p
\v 12 Bekob angela aivat ane giyuv ane tavulk be es as-matano tis aiweng be viteuk-aue tepwengge vusa gile dubi aitol. Be iyaing as-matano pakpak ti be aiweng pakpak ti, be viteuk-aue dubi ti tepwengge. Beti givin ebe eisir veve inro ok, ete tavlu ebe iyaing ok gikwai aivi ite yapin.   
\p
\v 13 Bekob gali manbweng bamo ti giluep givang gulumb ane lu, be gaute mank nok gital yaun avo bamo ge dang-eteik; “Oyo, amolmol ete ivang nalk ok is-likok e! Angela aitol ete imbweg nangge ok, ginei inyuv as tavulk be niteng, atob eisir in-gas vavavne bamo molge!”   
\c 9  
\s1 Angela bage-tavlu ane giyuv ane tavulk  
\p
\v 1 Angela bage-tavlu ane giyuv ane tavulk be giteng, be au-gali viteuk-aue ti beleinge nangge gulumb gile gitak nalk. Be emb nalk avo ebe gisov ve gininem ok ane il-dabe gitangi ei.  
\v 2 Ei gile ges nalk avo nok ane nam-avo ponge be ane varvaru love weik ebe yev bamo ti ane umkumk ok gisu gile gihlang. Gen varvaru bamo etok gisu gireu love gisil as-matano be as-matano giro taku ite ma.  
\v 3 Be gen natu natu anongge weik ebe sapauk ok, iluep nangge gen varvaru bamo etok aplo ile itak itak nalk. Eisir nivos vavavne weik gav-gaving ane, ebe geb vavavne gitang-tangi amolmol ok.  
\v 4 Be inei yaun gisov eisir be inei; “Yem unyain taku me gen natu natu walang ete givarkei nalk me ei ti bwaya. Yem unyaing amolmo, ebe inggas Pomate ane tuvweng giengk nas vatu ite ok ge.  
\v 5 Yem unemb vavavne ge nitangi eisir nitangi aiweng bage tavlu, be unes eisir vunkunu bwaya. Gen bumbumue bambamo ete weik sapauk ok, ilat amolmol be la-lalngas tiate molge weik ebe muat ta-talir ok.  
\v 6 Be sawa etok ete atob amolmol lolos ve ebe inmat vunkunu ok bemem atob inalgum be indi ma. Bingano, eisir tas givin anongge ve inei inmat vunu inkwai, bemem ilgum be gitangi ite.   
\p
\v 7 Ayeu gali sapauk bambamo nok ivarkei be nas weik ebe mie guli bwelk hos ipasang is-ate ve valir ane ok. Be es gen ti weik ebe gulu-lung gol ok gisov dabas tulkwe, be nas weik ebe amolmol ok.  
\v 8 Be dabas-lan undib bambamo weik avie-gaptol as, be nivos weik bwelk laion ane.  
\v 9 Be gen weik ebe kup aen ok gikaiwel gideb bobos ane, be bais-lan olo-longe weik ebe bwelk hos girwel wil-kar ve valir ane be olo-longe ok.  
\v 10 Be lamis weik ebe muat ta-talir ane ok, be miemk vavis ebe ve nitpe amolmol be nemb vavavne nitangi is nitangi aiweng bage tavlu ok, ete giengk gideb lamis ane.  
\v 11 Eisir nok as king ti ete geb eisir dabin. Be king nok ete ei angela nalk avo ebe gisov ve gininem ok ane. Ital angela nok are giengk Hibru avos inei Abadon. Tantal niengk eitit ate avond tanei Amol Giyaing gen walang ok ane.   
\p
\v 12 Gen bunam mate ane ande ginme gile gikwai. Be unaute! Bunam ailu giengk nangge be atob ninme.   
\s1 Angela 6 ane giyuv ane tavulk  
\p
\v 13 Angela 6 ane giyuv ane tavulk, be ayeu gaute avo ti meng-gihlang nangge gen aivat ebe weik bwelk dabe range ebe givarkei gitangi alta gol ebe giengk Pomate na ok ane kuni aivat etok ok.  
\v 14 Avo nok ginei gitangi angela bage tavlu be ano dongke ebe geb ane tavulk ta ok be ginei; “Mie nuhlang angela aivat ete imbweg kapual-lu nangge bui bamo Yupretas ok inkwai kapual lu.”  
\v 15 Beti ei gihlang angela aivat nok ikwai kapual lu be ile, veik atob gaptol inemb amolmol tepwengge vusa nile dubi aitol be atob ines amolmol dubi ti ane tepwengge vunu be ma. Ve sotol isge sawa etok ge ebe ve inalgum kulkul etok ok.  
\v 16 Be inei gitangi ayeu dang-etok inei amolmol valir ane etok gitangi 200 milion. Ayeu gaute dang-etok ge,  
\v 17 bekob gali gen ti weik ebe gayengk mev ok be gali bwelk hos tis ane amolmol ebe imbweg iwei ok. Eisir nok as mala dang-eteik; Amolmol eisir ate ino kup aen ge, be bwalbwale muele tis sangas be maingo. Be bwelk hos bambamo etok dabas weik ebe laion ok. Be yev tis ane umkumk be vat salfa ebe yev gen be muele ok gisu meng-gihlang bwelk nok avos.  
\v 18 Gen vavavne aitol etok, yev, be yev umkumk, be vat salfa ebe yev gen love ande muele tiate, be meng-gihlang bwelk hos etok avos ok ete ges amolmol dubi ti tepwengge vun-kunu ikwai amolmol dubi ailu ge.  
\v 19 Bwelk hos nok as gwang-ne giengk godos be lamis. Lamis etok tis godo weik ebe muat ok be ilat amolmol be imat vun-kunu.   
\p
\v 20 Be amolmol tavlu tepwengge ebe gen vavavne aitol etok meng-gihlang gipil eisir ite ok, bwais ve ret inro is-ate vukir be inavkir dumas nitangi as gen bambamo ete bais ipasang ok. Bingano, eisir bwais ve ret inkari as luev ete inei uiye be es miengk gitangi ngalau tiate, be tis pomate bingkasop ane bambamo ebe ipasang ve gol tis silva be baras be ei aitine ok nikwai. Gen bambamo etok gitangi ebe ve indi taku, me inaute yaun, me tis vas invang ok ite ma.  
\v 21 Eisir nok ete nolge es amolmol subu vun-kunu be dueb tinas be wasi tinas be ivai-vaina gen gitlek. Bemem iro is-ate vukir be ivkir dumas gitangi as luev tiate bambamo etok ite weik etok ge.   
\c 10  
\s1 Angela geb kapia gitangi Jon be gen  
\p
\v 1 Etok ma gikwai bekob gali angela ti vukuri gisov nangge gulumb ginme. Ei gisum ate gisov umbim be giro asin giengk giwei ei dabe tulkwe. Be na ringenk molge weik ebe as giro ringenk ok, be va aitine aivi weik ebe yev ok.  
\v 2 Angela nok geb kapia natu ti ta, be kapia nok emb ponge yapin ge be giengk. Ei gitak va mol giwei gielk be va kase giwei nalk.  
\v 3 Be gital yaun avo bamo be gaga-gainge weik ebe bwelk laion yayai ok. Ei gital yaun avo bamo dang-etok, bekob ete walpap 7 etok gitut be inei yaun vusa.  
\v 4 Walpap 7 etok inei as yaun gikwai, bekob ayeu galgum ve ganei naro yaun ete eisir inei ok nisov kapia. Bemem kob gaute avo ti nangge gulumb ginme be ginei gitangi ayeu dang-eteik; “Yaun ete galkik walpap 7 etok inei ok, etok mie nos ta niengk aplom ge dang-etok be uli ve nuro nisov kapia nile.”   
\p
\v 5 Bekob angela ebe galkik gali ei va tavlu giwei gielk be tavlu giwei nalk ok, girusu bage mol gireu gitangi gulumb gile.  
\v 6 Be gital Pomate ebe gibweg matawe geb ta-ngge ok are be ginei Bingano. Pomate nok ete geb gulumb be tis gen gulumb ane tepwengge, be gipasang nalk tis ane gen walang ete giengk nalk nik tepwengge, be geb gielk tis ane gen walang ebe givang gielk ok givin weik etok ge. Be angela nok ginei; “Ande gibloblo gikwai, be Pomate wat nisge gen ti vukuri ite ma.  
\v 7 Ve atob nivin ebe angela bage tavlu be ano ailu (7) ane ve niyuv ane tavulk be niteng ok, okob gen ebe Pomate ta gitung ve nilgum be gitangi ebe atob amolmol inatpweng are ite ok, ete atob Pomate nilgum gen etok ano nile. Be gen etok ete binge vie ebe warik ei ginei bwaya-gege gitangi ane amolmol kulkul (profet) ane ebe inei ei avo ukwas binge ok.”   
\p
\v 8 Bekob avo ebe galkik ginei yaun gitangi ayeu nangge gulumb ok, ginei gitangi ayeu vukuri be ginei; “Ule be omb kapia ete ponge yapin ok nangge angela ete givarkei va tavlu giwei gielk be tavlu giwei nalk ok bage.”  
\v 9 Beti ayeu gatangi angela nok gale be ganei; “Omb kapia natu etenok itangi ayeu.” Be ei ginei gitangi ayeu be ginei; “E, movwat ilek be on. Atob mie non kapia etenok okob atob nilgum aplom be vavis molge. Bemem atob kav-kavse weik ebe munei tine ane rulu ok niengk avom.”  
\v 10 Ei ginei yaun etok gikwai kob ayeu gale gab kapia nok nangge ei bage ginme be gan. Ayeu gan kapia nok be gali kav-kavse molge weik ebe munei tine ane rulu ok giengk avongg, bemem gatmuli gile kob ande vavis nangge ebe aplongg ok.   
\p
\v 11 Be inei gitangi ayeu dang-eteik; “Mie nunei Pomate ane yaun binge vukuri nipil gen bambamo ete atob menihlang ok, nitangi amolmol vu ti ane ti ane be avo ti avo ti, be king tepwengge nangge taku walang ok nitangi ge.”   
\c 11  
\s1 Amol mateu ane ailu  
\p
\v 1 Bekob emb kabut ebe ve ines gen tuvweng ok ti gitangi ayeu, be kabut nok weik ebe kabut luev ane ok. Be inei gitangi ayeu be inei; “Umdil be omb tuvweng ve Pomate ane lum yamar tis taku (alta) da ane. Be nuvnauwi amolmol ebe inei uiye be es miengk gitangi Pomate ok.  
\v 2 Bemem nomb tuvweng ve simbel ete iro gitle lum yamar gili ok nivin bwaya. Etok mie nam-vier be niengk. Ve etok amolmol dabas ungglus ane as taku sawa etok, be atob eisir inavkwe nam-dabe gwang-ne bamo etok ta dang-etok painge nitangi aiweng 42.  
\v 3 Be atob ayeu nahlin amol ailu ebe inei awangg binge vie vusa ok inme. Sulu atob inro bek den-den ve kambam, be atob gabu inemb kulkul ve inei awangg binge vie vusa dang-etok invang nitangi as-mate 1,260.”   
\p
\v 4 Sulu ailu nok weik ei-oliv, be weik lam ailu ebe givarkei amolmol nalk ane tepwengge as Tivie na ok.  
\v 5 Be ginei amolmol subu ve ines sulu me ve inamdom nitangi sulu, okob yev atob menihlang nangge sulu avos be nen amolmol ete ve inalgum gen dang dang-etok nitangi sulu ok vun-kunu bingano ge.  
\v 6 Sulu as gwang-ne gitangi ebe ve inalgum be ur nisov ite nivin sawa ete gabu ve inei Pomate ane binge vie vusa ok. Be gabu as gwang-ne gitangi ebe ve inro bui walang ok vukir be menihlang weik tuerk ok givin weik etok ge. Be gitangi ebe ve inemb bunam tis vavavne walang ano nitangi amolmol nangge nalk ok. Be as-mate walang ok ginei sulu tas-givin ve inalgum gen ti, okob sulu gitangi ebe ve inalgum gen etok ano nile ok.   
\p
\v 7 Sulu nok atob inalgum as kulkul etok ve inei Pomate ane binge vie vusa invang love ma nikwai kob, atob bwelk tiate ebe givang amolmol tiate ane as taku nangge nalk avo bumue ti ebe gisov ve gininem ok, atob menihlang be nes valir nitangi sulu. Be atob nimbweg niwei sulu be nes is vunu.  
\v 8 Be gabu utlas ulis atob niriv be nira niengk nam vu bamo Jerusalem, (ebe inei ve bing ai ge be inei Sodom be Aigiptem ok) ane nam luvue. Be taku etok ge ete warik es sulu as Amol Bamo gireu ei-givsangin gile.  
\v 9 Be atob amolmol subu nangge nalk bamo nik, nangge avo ti avo ti be amolmol vu ti ane ti ane, be ulis ti ulis ti atob matanos nitut nipil sulu utlas ulis dang-etok nitangi as-mate aitol be dani ti. Be gitangi ebe atob inei be amolmol ebeok subu inde inaspun is ok ite ma.  
\v 10 Be amolmol nalk ane tepwengge atob tas-vevias ge ve ebe ande sulu imat vunu ok, be atob inalgum ben be ines uiye bamo molge be inemb gen vevies sinsin-ge nitangi is-ate. Ve gisov amol ailu ebe inei Pomate ane binge vie vusa ok, ete ande imat vunu ok ete emb bunam tis vavavne bamo molge gitangi amolmol tepwengge ebe imbweg nangge nalk ok.   
\p
\v 11 Bemem as-mate aitol be dani etok gile gikwai kob, dalgos matawas ane nangge Pomate ane gisov sulu utlas ulis gile be gabu matawas vukuri be imdil ivarkei. Be amolmol ebe ili sulu ande matawas vukuri be imdil ivarkei ok avos poke be ipelk anongge.  
\v 12 Bekob gabu iute avo ti gital yaun avo bamo ge nangge gulumb gitangi sulu be ginei; “Gabu unreu unme ebeik!” Beti umbim ti ginme be girun sulu itin gile einggoto be gigas sulu ireu gulumb ile, be amolmol ebe es valir gitangi sulu ok ivarkei be nas ginal sulu ebe ile ok.  
\v 13 Be givin sawa etok ge gikuri ges bamo molge love nam vu bamo etok ebe galkik es vus-vusa gile ake 10 ok, ane ake ti ete gikuri ges be giso-sole gikwai be ake 9 ge giengk. Be amolmol ebe imat vunu ok gitangi 7,000. Be amolmol tavlu ebe imbweg matawas ok, ipelk be ikur-kuri anongge love ili ma be avos givwat Pomate gulumb ane are.   
\p
\v 14 Gen bunam bamo ailu ane ande ginme gile gikwai. Be unaute! Kasop ge kob atob gen bunam ebe mul ane ane ok menihlang.   
\s1 Angela bage tavlu be ano ailu (7) ane giyuv ane tavulk  
\p
\v 15 Angela 7 ane giyuv ane tavulk be giteng, bekob ital yaun avos bambamo-ngge nangge gulumb gisov dang-eteik; “Eitit and Amol Bamo gabu ane Kilisi ande emb nalk tis ane amolmol tepwengge dabin gikwai. Be Atob Ei nemb amolmol dabin dang-etok ninggas ta-ngge.”  
\v 16 Be eisir awaga 24 ebe imbweg iwei as lopong nangge Pomate na ok, ivsuen vas-dubi be tepwengge ituk be es miengk gitangi Pomate be inei;   
\q1
\v 17 “Amol Bamo Pomate, Mie Amol gwangne be tulkwe gav-gavul tiate.  
\q1 Mie gubweg ebe warik be atob numbweg dang-etok.  
\q1 Mie gugas am gwang-ne be tis arem bamo gikwai, be atob nomb amolmol dabin.  
\q1 Dang-etok beti amei tangg-amei vie gitangi mie.   
\q1
\v 18 Amolmol dabas ungglus ane tas-vavis ve mie.  
\q1 Bemem miam tam vavis ane ano ande meng-gihlang gikwai.  
\q1 Be galkik as-mate etenik ebe ve amolmol ebe imat vun-kunu ok intangi Mie indek be inpasang as yaun ok.  
\q1 As-mate etenik ebe mie ve nuvgo am amolmol kulkul ane ok.  
\q1 Eisir ebe inei mie avom ukwas binge ok (profet), tis am amolmol-gen be amolmol tepwengge ebe ipelk ve mie be ivang isov miam yaun ane lu ge ok, be amolmol ebe tis ares ok be ebe are ma ok tepwengge.  
\q1 Be as-mate etenik ebe Mie ve nuyaing amolmol ebe indi-dili miam amolmol-gen nangge nalk ok.”   
\m
\v 19 Eisir inei miengk etok gikwai, bekob es Pomate ane lum yamar ebe givarkei gulumb ok ponge, be bukuel ebe Pomate ane yaun ebe gibiti ok gisov ok giengk gitip ge nangge ane lum yamar aplo. Be bilip geb geb taku avut be walpap ges tiate-ngge, be gikuri ges natu ite be ur ebe aitine natu ite bage vier gisov.   
\c 12  
\s1 Avie ti gabu muat bamo ti  
\p
\v 1 Bekob gali gen bamo ti meng-gihlang nangge gulumb. Gen bamo nok dang-eteik: Avie ti gibweg, avie nok gino as-matano gireu utle ulis weik ebe kup ok, be givarkei giwei aiweng. Be gitak viteuk-aue gitangi 12 giwei dabe-tulkwe weik ebe gulu-lung ok.  
\v 2 Avie nok tis subwe be nunus gitun gitun ei givang. Be ei gigas vavavne bamo molge ve ebe nunus gitun ei ok, beti yayai avo bamo ge givin ebe nunus gile gitak ok.  
\v 3 Bekob au-gali gen ti vukuri meng-gihlang nangge gulumb. Be gen etok dang-eteik: Muat muele bamo ti dabe 7 be dabe range gitangi 10, be gikuk gulu-lung king ane gitangi 7 giwei dabe tulkwe 7 etok.  
\v 4 Be lami gisgul viteuk-aue gulumb ane dubi aitol etok as dubi ti be gikari tepwengge gile gitak nalk gikwai viteuk-aue dubi ailu ge ete galkik giengk nangge gulumb ok. Muat bamo nok givarkei gibloblo avie ete veve nikuv nunus ok gideb na ane, be gisge ge ve avie nok vie ve nunus nile nitak be atob ei nitmuli nunus nok.  
\v 5 Avie nok vie ve nunus amol ti. Be nunus nok ete asonge mul ane atob ei bage tis kabut aen be nemb amolmol tepwengge dabin nipil dongke. Be givin ebe nunus nok gile gitak gikwai tine subwe aplo ok, be seukie-ngge inggas ei itin gile einggoto, be inggas ei itangi Pomate tis ane lopong king ane ile.  
\v 6 Be avie nok gipelk gile ve givang taku sawa ebe amolmol ti givang ite ok. Pomate ei ate gipasang taku sawa ti ve avei nok ane nangge eteok, veik inemb ei dabin be inavkwen ei nangge taku etok ge nitangi as-mate 1,260.   
\p
\v 7 Bekob valir bamo ti meng-gihlang nangge gulumb. Maikol tis ane amolmol kulkul ane es valir gitangi muat bamo galkok, be muat bamo nok tis ane amolmol kulkul ane ok es valir ginumul gitangi eisir.  
\v 8 Bemem Maikol tis ane amolmol-gen emb tulkwas vier be imbweg iwei muat bamo nok tis ane amolmol-gen be itin is ikwai gulumb.  
\v 9 Beti ikari muat bamo nok tis ane amolmol-gen gisov gile gitak nalk. Muat bamo nok, tanei dang-etok tanei muat tumbu, ebe ital inei Sadam, be “Amol ebe gitpungi amolmol tepwengge ok.” Amol nok ebe giyo giyo amolmol nalk ane tepwengge ok. Ete ande ikari ei tis ane amolmol-gen ile itak nalk ok.   
\p
\v 10 Bekob gaute avo ti ginei yaun avo bamo ge nangge gulumb dang-eteik; “Ande ma gikwai. Galkik ande eitit and Pomate gigas eitit gikwai. Ei ande ges ane gwang-ne ru giengk gitip ge, be galkik ande geb eitit dabin. Be ane Kilisi ande gigas ares bamo gikwai. Ve amol ebe givarkei Pomate na be gilgum yaun bingkas-kasop gipil eitit and nune-gen painge ge tis as be tambok ok, ete ande ikari ei gile gitak nalk gikwai.  
\v 11 Eitit and nune-gen inggas gwang-ne nangge bwelk Sipsip ane tuerk be tis ane yaun (mateu) ebe inei inei ok, beti eisir imbweg valir vovo be itin gen tiate bamo etok gikwai. Eisir tas-gitung ete ve inambweg as gen vie-ngge nangge nalk ok ite ma, eisir isu is-ate itangi gen ebe ve nes is vun-kunu ok ile be imat vunkunu ikwai.  
\v 12 Dang-etok be mie gulumb be tis amolmol ebe ares giengk gulumb ok yem tangg-aim vevie-ngge. Bemem mie nalk tis gielk, mie nuli im-ate ge. Atob mie nunggas bunam bamo molge. Ve Sadam ei gitpweng are ginei ei ane sawa tupe molge, beti ete ande gisov gilek nok be ei ta-vavis tiate molge.”   
\p
\v 13 Muat bamo nok gili ebe ande ikari ei gile gitak nalk gikwai ok, beti givin-vin avie ebe galkik vie ve nunus amol ti ok.  
\v 14 Bemem emb man-bueng buelk be uvun bage-lan ailu gitangi avie nok veik niluep nile ane nam ebe amolmol ti givang ite ok, aikawe ge nikwai muat bamo nok. Be atob inemb ei dabin be inavkwen ei vie-ngge nangge etok, nitangi Sonda bamo aitol be dani ti.  
\v 15 Beti muat nok giluk bui meng-gihlang avo, be bui nok givne tiate ge weik ebe bui-vot giriv bui bambamo ok gitau gile avie nok. Muat tang-gitung ginei bui etok nile be nitimb avie nok be nimat vunu nikwai.  
\v 16 Bemem nalk geb avie nok ru be gitmuli bui ete muat bamo etok giluk gile gihlang avo ok gikwai.  
\v 17 Muat bamo nok ande ta-vavis anongge ve avie nok, beti na-vier ve ei be gile ve nes valir nitangi avie nok ane natu-nggen. Etok amolmol tepwengge ebe isov Pomate ane yaun (bingsu) ane lu, be inei Yisu ane mateu vusa be ivang mul ve ei ok.  
\v 18 Muat bamo nok gile givarkei alus gibloblo gielk kire.   
\c 13  
\s1 Bwelkusing ailu meihlang  
\p
\v 1 Bekob gali bwelk ti meng-gihlang nangge gielk. Bwelk nok dabe tulkwe ane dabe range gitangi 10 be dabe tulkwe gitangi 7. Be gululung king ane gitangi 10 giengk giwei dabe range 10 etok, be iro ares 7 bwalbwale giengk bwelk nok dabe tulkwe 7 etok gitangi ge. Be ares nok ane dabe dang-eteik; Yaun bambamo tepwe ebe ihle Pomate ok.  
\v 2 Bwelk nok na weik ebe pisi sangas ane ok, be va weik pupkaue as bwelk ebe ital inei bea ok be godo weik ebe bwelk tiate laion godo ok. Be muat bamo galkok geb ane gwang-ne gitangi bwelk nok, be geb ei ve amol bamo (king) weik ete ei ate ok, be geb gwang-ne bamo molge gitangi ei.  
\v 3 Be gali bwelk nok ane dabe tulkwe ti weik ebe nolge iro be es vunu gikwai ok. Bemem ei dabe bid nok ande ainggwen be givin vukuri. Amolmol tepwengge ikuri vunu-ngge ve bwelk nok, be ile ivang mul ve ei.  
\v 4 Eisir inei uiye be es miengk gitangi muat bamo nok, ve ebe geb gwang-ne gitangi bwelk etok ok, be inei uiye be es miengk gitangi bwelk nok givin weik etok ge be inei; “Amol ret gitangi bwelk etenik? Be amol ret gitangi ebe atob nes valir nitangi ei ok?”   
\p
\v 5 Be Pomate ok ande yab-ge ve ginei bwelk nok nindang ate be avo bambamo be nihle Pomate dang-etok nitangi aiweng 42.  
\v 6 Bwelk nok geb avo ponge be gihle Pomate. Ei gihle Pomate are tis ane taku be tis Pomate ane amolmol-gen ebe imbweg gulumb ok.  
\v 7 Pomate yab-ge gitangi bwelk nok ve ginei ei nes valir nitangi Pomate ane amolmol-gen be nimbweg niwei eisir. Beti bwelk nok gibweg giwei eisir be geb amolmol vu ti ane ti ane nangge nalk walang ok, be avo ti avo ti be ulis ti ulis ti tepwengge dabin.  
\v 8 Be amolmol nalk ane tepwengge ebe ares gisov kapia matawas ane ite, givin ebe Pomate gipasang gulumb tis nalk ite nangge ok, eisir etok tepwengge atob inei uiye be ines miengk nitangi bwelk nok. Be kapia nok, etok bwelk Sipsip ebe warik es vunu ok ane kapia.   
\p
\v 9 Amol ti talngavo ginei giengk, okob niute yaun eteik vevie:  
\v 10 Ginei es avos bago ve inei amol etok atob nimbweg kapual-lu, okob amol nok nile nimbweg kapual-lu. Be ginei inei inro amol ti vunu ve buyag valir ane, okob inro ei vunu nitangi ete ande inei ok. Dang-etok ginei gen dang dang-etok ve menihlang, okob yem Pomate ane amolmol-gen, yem unvarkei gwang-ne be unemb aim aplongg-aim givin ta gwang-ne ge.   
\p
\v 11 Bekob gali bwelk bumue nok ti vukuri gireu nangge nalk aplo meng-gihlang. Bwelk nok dabe range ailu weik ebe bwelk sipsip natu vaku ane ok. Be ginei yaun be avo weik muat bamo galkok.  
\v 12 Be bwelk mate ane galkok geb ane gwang-ne tepwengge gitangi bwelk mul ane etenik, be gilgum kulkul givang bwelk mate ane etok na gili ge, ve gilgum amolmol tepwengge nangge nalk be inei uiye be es miengk gitangi bwelk mate ane galkok, ebe warik bid tiate ti ve nen ei vunu bekob bid nok givin be ainggwen vukuri ok.  
\v 13 Bwelk bumue mul ane etenik gilgum gen bwal-bwale bambamo walang molge. Gen bwal-bwale ebe ei gilgum ok ti eteik: Amolmol ivarkei be ili ebe ei gilgum be yev gisov nangge gulumb ginme gitak nalk ok.  
\v 14 Pomate ande yab-ge ve ginei ei nilgum gen bwal-bwale bambamo dang dang-etok niengk bwelk mate ane galkok na ge. Ei gilgum ve giyo giyo amolmol nalk ane ve ane gen bambamo ete gilgum gilgum ok, be ginei gitangi amolmol be ginei; “Yem unavku bwelk mate ane ebe warik buyag valir ane ges ei be veve nimat vunu bemem kob ete ande gibweg matawe nik, ane dalgo nireu ei be tis gen subu subu, be avongg-aim nivwat ei are be unei uiye be unes miengk nitangi.”  
\v 15 Be Pomate yab-ge ve bwelk mul ane etok be giyuv avo ukwas gisov bwelk mate ane galkok ane dalgo ete ivku bwal-bwale gireu ei be tis gen subu subu ok be ginei yaun vusa. Be ginei amolmol subu bwais be inei uiye be es miengk gitangi ei ite, okob atob ei nes eisir etok vunu.   
\p
\v 16 Be bwelk mul ane etok ginei be itak tuvweng ti giengk amolmol tepwengge nas-vatu me bais mol. Amolmol ebe tis ares ok be ebe ares ma ok, be amolmol ebe tis wambal bamo ok tis eisir ebe gen ma ve is ok, be tis amolmol ebe ivang as gen vie-ngge ok tis eisir ebe emb kulkul sinsin-ge be mone ma ve is ok tepwengge.  
\v 17 Be ginei indi amol ti tuvweng etok giengk ei bage me na-vatu ite, okob ei gitangi ebe atob nivgo gen me nemb ane gen be amolmol inavgo ok ite ma. Be tuvweng nok, etok bwelk nok ane are, me tanei dang-etok tanei are ane tuvweng.  
\v 18 Eitit tand-nitung gen etok vevie be tandi kob. Amolmol ebe itpweng gen are gile gulunge molge ok, inav-naui bwelk bumue etok are etok vevie. Ve namba etok etok amol ti ane are, be namba nok 666.   
\c 14  
\s1 Amolmol 144,000 inei uiye vaku ti  
\p
\v 1 Bekob gab nangg itin vukuri love gali bwelk Sipsip givarkei matendubi Saion, be avie be amolmol gitangi 144,000 ivarkei ivin ei. Be iro bwelk Sipsip nok gabu Tame ares bwal-bwale giengk nas-vatu gitangi ge.  
\v 2 Bekob gaute avo ti meng-gihlang nangge gulumb, be avo nok konge weik ebe bui-vot bambamo ane konge ok, be weik ebe walpap ges be olo-longe ok. Au-gaute avo nok weik ebe amolmol uiye ane es uiye tis gita be giteng ok.  
\v 3 Eisir 144,000 etok iru uiye vaku ti be es ivarkei Pomate ane lopong ebe gibweg giwei ok, be tis bwelk aivat etok be eisir awaga 24 etok nas. Amolmol 144,000 etok ebe bwelk Sipsip givgo eisir nangge nalk be gigas is gilumul ok, eisir etok ge ete itpweng uiye vaku etok are be es, be amolmol ebeok ti gitangi ebe atob nitpweng uiye etok are be nes ok ite ma yapin.  
\v 4 Eisir etok tas-gisgil ebe ilgum gen wasi ane ok ma molge, eisir emb is-ate dabin vie molge. Be taku walang ete bwelk Sipsip ve nile ok, eisir etok itau-gile ei painge ge. Pomate givgo eisir etok gikwai be gigas is nangge amolmol nalk ane tepwengge. Be tanei dang-etok tanei eisir etok weik amolmol ebe Pomate gigas is ve gabu bwelk Sipsip as gen ok, as amolmol bulwer mate ane etok.  
\v 5 Be yaun bingkasop ane ti meng-gihlang nangge eisir avos, me ilgum gen tiate ti ite ma molge.   
\s1 Angela aitol inei yaun  
\p
\v 6 Bekob gali angela ti giluep givang gulumb ane lu ve gile, angela nok givwat mateu matawas ane ebe atob niengk dang-etok nemb ta-ngge ok, be gile ve ninei nitangi amolmol nalk ane tepwengge. Amolmol avo ti avo ti be ulis ti ulis ti be vu ti ane ti ane tepwengge.  
\v 7 Ei geb avo ponge be ginei yaun avo bamo ge dang-eteik; “Sawa ebe Pomate ve nilgum amolmol tepwengge as yaun ok ande meng-gihlang gikwai. Dang-etok be avongg-aim nivwat ei are be unpelk ve ei siti ma! Yem unei uiye be unes miengk nitangi Pomate ei dongke-ngge. Ei amol ebe gipasang gulumb tis nalk be gielk, be tis bui avo natu natu walang ok.”   
\p
\v 8 Bekob angela ti vukuri gitau gile angela mate ane galkok. Angela ailu ane etenik ginei dang-eteik; “O Nam vu bamo babilon, ande tiate gikwai. Bingano, ande iyaing ei gikwai. Ei nam vu bamo etok ge, ete gilgum amolmol vu ti ane ti ane tepwengge ivang mul ve ei ane luev wasi ane gwang-ne molge. Be etok weik ebe ei geb bui gwang-ne gitangi eisir be inum ok.”   
\p
\v 9 Bekob gali angela ti vukuri meng-givin angela ailu galkok, angela aitol ane etok ginei yaun avo bamo ge be ginei; “Amol ti ginei ninei uiye be nes miengk nitangi bwelk bumue etok tis bwelk nok ane dalgo, be niro bwelk nok are bwal-bwale niengk bage me na-vatu,  
\v 10 amol etok atob ninum Pomate ane ta-vavis ane wain ebe gimsuli gisov ane kap ta-vavis ane ok. Be wain nok itak bui luvus gile givin ite ma, etok wain sin-gege be atob amol etok ninum. Be amol nok atob ninggas vavavne bamo molge nangge yev tis vat salpa etok nangge angela vevies tis bwelk Sipsip nas.  
\v 11 Be yev bamo tis vat salpa ete ve nitun amolmol dang dang-etok ok, atob ane umkumk tis var-varu atob niengk dang-etok nemb ta-ngge. Be amolmol ete inei uiye be es miengk gitangi bwelk bumue etok tis bwelk nok ane dalgo, be ivku bwelk nok are ane tuvweng bwal-bwale giengk nas-vatu ok is-likok, atob inambweg luvus ite yapin. Eisir atob in-gas vavavne dang-etok painge ge as be tambok.”   
\p
\v 12 Dang-etok be ginei gen dang dang-etok ve menihlang, okob yem Pomate ane amolmol-gen ebe usov Pomate ane yaun (bingsu) ane lu vie-ngge, be aplong-aim givin Yisu ok yem unemb aim aplongg-aim givin ta gwang-ne ge.   
\p
\v 13 Bekob gaute avo ti nangge gulumb ginme be avo nok ginei dang-eteik; “Mie nuro yaun eteik nisov kapia be nunei, ‘Amolmol ebe aplos givin Amol Bamo be ande imat vunu ikwai, be tis amolmol ebe asonge inmat vunu nindeb mul-mul ane ok, eisir tas-vevias ge.’” Be Ngalau Yamar ok ginei givin weik etok ge ginei, “Bingano, eisir atob bais vier ve kulkul bambamo ete gisak is vun-kunu ok be inde inyap inambweg. Bemem atob eisir inde tis bais apo ge inde inambweg ite ma, atob eisir in-gas as kulkul vevies bambamo ebe ilgum ilgum ok ane ano be inambweg as gen vie-ngge.”   
\s1 As-mate ebe ve inadbwen ben ano nangge nalk ok  
\p
\v 14 Bekob gab nangg itin vukuri love gali umbim bogbogo ti be gali gen ti weik ebe amolmol ok gibweg gisov umbim nok aplo. Amol nok gikuk gululung king ane ti ebe ipasang ve gol ok, be bage geb buyag undib bamo ti ta, buyag nok mate tiate molge.  
\v 15 Bekob gali angela ti meng-gihlang nangge lum yamar aplo be ginei yaun avo bamo ge gitangi amol ete gibweg gisov umbim aplo ok be ginei; “Urun am buyag itin be uspe ben gil-kili ma! Ve ben ete givarkei nalk ok, tepwengge ande gipasang ate gikwai. Beti as-mate etenik atob inadbwen ben etok nikwai.”  
\v 16 Beti amol galk gibweg gisov umbim aplo ok, bage gisov ane buyag mate etok be gidbwen ben bambamo ete givarkei nalk ok gil-kili gikwai.   
\p
\v 17 Bekob gali angela ti vukuri meng-gihlang nangge lum yamar ebe givarkei gulumb ok tis buyag undib ti weik etok ge, be buyag nok mate molge.  
\v 18 Bekob angela ti vukuri meng-gihlang nangge taku da ane (alta), etok ei amol ebe geb yev dabin ok. Be ei ginei yaun avo bamo ge gitangi angela ti ebe galkik bage tis buyag undib ti ok be ginei; “Bagem isov am buyag mate etenok be uspe wain ete givarkei nalk ok tepwengge ano ane walo gil-kili be uro ano tepwengge sut ile ipil dongke, ve ande tepwengge yus gikwai.”  
\v 19 Beti ei geb ane buyag nok be gidbwen wain tepwengge ebe givarkei nalk ok, ano ane walo gil-kili be giro wain nok ane ano sut gile gisov gen ebe inggig wain ano gisov gisov ok. Be etok weik Pomate ane ta-vavis ane ano.  
\v 20 Kob inggig wain nok gisov ane gen ebe inggig gisov-gisov ok ivarkei ebe sangas den ok love tuerk meng-gihlang. Tuerk nok gitimb taku sawa gitangi 200 mail, be gisu kaumb gitangi 5 feet.   
\c 15  
\s1 Angela ebe emb gen bunam mul ane ane ta ok  
\p
\v 1 Etok gikwai, bekob gali gen bamo ti vukuri nangge gulumb love gapelk be tangg gitung walang ano molge. Ayeu gali angela 7 ivwat gen nangglus-ungglus tepwe ebe ve niyaing amolmol ok gitangi bage tavlu be ano ailu (7). Be ginei asong nivin ebe gen nangglus-ungglus bambamo etok tepwengge ninme nile nikwai ok, okob atob gen ti vukuri dang-etok menihlang ite ma. Ve Pomate ane ta-vavis ane ano, ginme ane den gipil gen bage tavlu be ano ailu etok.   
\p
\v 2 Bekob gali gen ti weik ebe gielk ok, be gen nok weik ebe yev giengk bui-tal ane (galas) aplo ok. Be amolmol ebe es valir be imbweg iwei bwelk bumue etok tis ane dalgo be are ebe iro bwalbwale ve namba ge ok, eisir etok ivarkei gielk bamo ete weik bui-tal ane ok ane kire. Pomate ande geb gen uiye ane weik gita ok gitangi eisir be emb ta ivarkei.  
\v 3 Be eisir nok es Pomate ane amol kulkul ane Mose ane uiye, be tis bwelk Sipsip ane uiye, be es dang-eteik inei;  
\q1 “Amol Bamo Pomate, Mie Amol gwang-ne be tulkwe gav-gavul tiate.  
\q1 Mie gulgum am gen gwang-ne gwang-ne walang ok be meng-gihlang nangglus ge ti be amei ali love tangg amei gitung gile ma molge.  
\q1 Amolmol tepwengge as Amol Bamo (King) mie, miam gen walang ok roro dongke be ano molge.   
\q1
\v 4 Amol Bamo mie dongke ge mie Amol yamar.  
\q1 Dang-etok be amol ret gitangi ebe atob nipelk ve mie ite ok?  
\q1 Be amol ret gitangi ebe atob avo nivwat mie arem ite ok?  
\q1 Amolmol vu ti ane ti ane tepwengge atob inme be inei uiye be ines miengk nitangi mie dongke-ngge. Ve miam luev roro dongke ebe gupasang amolmol as yaun love vie dongke ok, ete ande meng-gihlang be giengk gitip ge gikwai.”   
\p
\v 5 Bekob gali nam aplo ti ebe yamar molge ok, ebe giengk lum bes yamar gulumb ane aplo ok ponge. Lum bes yamar etok ebe Pomate tis amolmol kakie ivang aplo ok.  
\v 6 Be gali angela 7 ebe ivwat gen nangglus ungglus tepwe ebe ve niyaing amolmol ok gitangi 7, meihlang nangge nam aplo ebe yamar molge ok nangge lum bes yamar nok aplo. Be ino as kup vaku vaku be ringenk molge, be imbiti bika gol gibagi bobos.  
\v 7 Bekob bwelk aivat etok as ti geb bele kap-kapul ebe ipasang ve gol ok gitangi bage tavlu be ano ailu gitangi angela 7 etok. Pomate matawe ane ebe gibweg matawe dang-etok geb ta-ngge ok, ane ta-vavis ane ano ete gisov bele kap-kapul 7 etok love givwat giwei bele avo kire.  
\v 8 Be Pomate ane bogbogo tis ane gwang-ne, ane varvaru geb lum bes yamar nok ane aplo ti ebe ital inei yamar molge ok avut, be gitangi ebe amol ti nisov nam aplo yamar nok nile ok ite ma. Eisir atob inasge ge love angela 7 etok as gen tiate bambamo ete ivwat ok nile ma nikwai kob.   
\c 16  
\s1 Bele kap-kapul ebe Pomate ane ta-vavis gisov ok  
\p
\v 1 Bekob gaute avo ti meng-gihlang nangge lum bes yamar nok ane aplo ebe yamar molge ok, be avo nok gital yaun avo bamo ge gitangi angela 7 etok be ginei; “Unde be unemb Pomate ane ta-vavis ane ano ete gisov bele kap-kapul 7 etok ok, be unamsuli isov nalk ile.”   
\p
\v 2 Beti angela bage tavlu be ano ailu nok as amol mate ane gile geb ane bele kap-kapul tis Pomate ane ta-vavis ane ano etok, be gimsuli gisov nalk gile. Love bid ebe nangglus ungglus tepwe, gen amolmol ebe iro bwelk bumue etok are bwalbwale giengk nas-vatu, be inei uiye be es miengk gitangi bwelk nok ane dalgo ok, be ane viti givang gitlek.   
\p
\v 3 Bekob angela ailu ane gimsuli ane gisov gielk gile love gilgum be gielk muele weik ebe es amolmol vun-kunu be ane tuerk gisu givwev ok. Be gen matawas ane tepwe ebe givang gielk ok tepwengge imat vun-kunu be ma.  
\v 4 Be angela aitol ane gimsuli ane gisov bui bambamo be natu natu walang ok gitangi ge, love bui nok tepwengge giro ate vukir be muele weik ebe tuerk ok.  
\v 5 Be ayeu gaute angela bui nok ane ginei dang-eteik; “Mie amol yamar bingano molge. Mie gubweg ebe warik be atob numbweg dang-etok. Miam luev ebe gulgum amolmol tiate ane as yaun ok, vie be roro dongke.  
\v 6 Eisir es miam amolmol-gen tis am amolmol kulkul ane ebe inei mie avom ukwas vusa ok (profet) vun-kunu be as tuerk gisov weik ebe bui ok. Beti galkik mie gob eisir as tuerk ane den ginumul gitangi amolmol ebe ilgum gen dang dang-etok ok. Be tuerk ete mie gob gitangi eisir ok, etok gile gitangi as gen ebe ilgum ilgum ok roro-ngge.”  
\v 7 Bekob au-gaute avo ti meng-gihlang nangge taku da ane (alta), avo nok ginei dang-eteik; “Bingano, Amol Bamo Pomate. Mie amol gwang-ne be tulkwe gav-gavul tiate. Miam luev ebe gupasang amolmol as yaun ok roro be ano molge.”   
\p
\v 8 Bekob angela aivat ane geb ane bele kap-kapul tis Pomate ane ta-vavis ane ano etok be gimsuli gireu as-matano gile, love Pomate na gileni be as givse amolmol weik ebe yev ok.  
\v 9 As-gwangne giruel na be ane vavavne bamo tiate weik ebe yev ok be gitun eisir tiate molge, love ili ma be inei yaun ungglus ungglus gipil Pomate, ebe ane gwang-ne gilgum beti vavavne bamo etok meng-gihlang ok. Be bwais ve ret inro is-ate vukir be avos nivwat Pomate are.   
\p
\v 10 Kob angela bage tavlu (5) ane gimsuli ane giwei bwelk bumue galkok ane lopong king ane ebe gibweg giwei ok, be amolmol tepwengge ebe isov bwelk nok ane yaun ane lu ge ok imbweg isov aiweng tumi tiate aplo. Be inggas vavavne bamo molge, be ya-yai avos bambamo ge ve ebe lambim-puar gitun is ok,  
\v 11 love ili ma be inei yaun ungglus ungglus gipil Pomate ebe gibweg gulumb ok. Bemem eisir bwais ve ret inro is-ate vukir be inavkir dumas nitangi as luev tiate bambamo ete ilgum ilgum ok.   
\p
\v 12 Bekob angela bage tavlu be ano dongke (6) ane gimsuli ane gisov bui bamo Yupretas, love gilgum be bui bamo nok givurk love ainggwen. Ve gipasang amolmol bambamo (king) ebe emb amolmol dabin nangge as gireu ok tis as amolmol valir ane as luev ebe ve invang ok yapin.  
\v 13 Bekob gali ngalau tiate aitol weik kukuek ok vepias meihlang nangge muat bamo galkok tis bwelk bumue be profet bingkasop ane ebok avos.  
\v 14 Ngalau tomtom aitol etok ilgum gen bwalbwale walang ano. Sotol ivang itangi amolmol nalk ane tepwengge as amolmol bambamo (king) ebe emb is dabin ok ile, ve inro eisir tepwengge sut inpil dongke veik ines valir nitangi Amol Bamo, nivin as-mate ebe Amol gwang-ne Pomate ve nes ane valir ok.   
\p
\v 15 (“Unaute kob! Ayeu atob nalek weik ebe amolmol vaina ane ok. Dang-etok be ayeu avongg nivwat amolmol ebe ivang be nas-giengk ge, be ino as kup ve gisil utlas ulis veik mai-mayas bwaya ok ares!”)   
\p
\v 16 Ngalau tiate aitol etok iro eisir king tepwengge sut isov taku ebe ital giengk Hibru avos ge inei Amagedon ok ile.   
\p
\v 17 Kob angela bage tavlu be ano ailu (7) ane gidawi Pomate ane ta-vavis ane ano ebe gisov bele kap-kapul ok gireu einggoto gile, love avo bamo ti meng-gihlang nangge Amol Bamo ane lopong ebe gibweg giwei nangge lum yamar aplo ebe ital inei yamar molge ok. Be avo nok ginei dang-eteik; “Ma gikwai!”  
\v 18 Be bilip geb geb taku avut be nalk bil-bilinge be walpap ges tiate molge be gikuri ges ebe natu ite. As-mate walang ok, givin ebe warik be ginme love galkik gikuri ti ges dang-etok ite ma molge.  
\v 19 Love Babilon ane nam-vu bamo ti gipuek vusa gile ake aitol, be nam dabe tepwengge nangge nalk walang ok gihlu be gible bud-butu love ma. Pomate ta-gitung amolmol nangge nam-vu bamo Babilon as gen tiate bambamo ebe ilgum ilgum ok, beti geb wain bele kap-kapul mul ane ane etok gitangi eisir be inum. Be wain etok, etok Pomate ane ta-vavis ane ano.  
\v 20 Be nu-sawa tis matendubi walang ok ande ile ve ma sin-ge be lavos bun.  
\v 21 Be ur-aitine ebe natu ite be ano num-numbu bambamo weik vat ok, gisov nangge gulumb be ges gile giwei giwei amolmol. Ur nok ano num-numbu dongke dongke ane bunam weik ebe padi bek ailu ane bunam ok. Be gisak amolmol tiate-ngge love ili ma be inei yaun ungglus ungglus gipil Pomate, ve gen bunam etok, etok bamo be tiate molge.   
\c 17  
\s1 Avie wasi ane ti be tis bwelk  
\p
\v 1 Etok gikwai bekob angela ebe galkik ivwat Pomate ane ta-vavis ane ano gisov bele kap-kapul kap-kapul ok as ti ginme ginei gitangi ayeu be ginei; “Unme, tale be uli avie wasi ane ti ebe tis are be gibweg giwei bui walang ok nangge nalk ok, ane gen bunam ebe atob ninggas ok okob.  
\v 2 Amolmol bambamo (king) ebe emb amolmol dabin nangge nalk ok tepwengge ile ve avie nok, be ei nok ge ete geb ane wain wasi ane be amolmol nalk ane tepwengge inum love giyaing is weik ebe bui vavis ges amolmol ok.”   
\p
\v 3 Ngalau geb ayeu avut love angela nok gigas ayeu dalgongg gale taku sawa ebe amolmol ma ok. Be nangge etok ayeu gali avie ti gibweg giwei bwelk muele bamo ti, be iro ares walang ano bwalbwale geb bwelk nok utle ulis avut. Ares nok ane dabe dang-eteik; Yaun ungglus ungglus tepwe ebe inei gipil Pomate ok. Bwelk nok dabe gitangi 7 be dabe range gitangi 10.  
\v 4 Be avie galkik ayeu gali ok, ei gino kup muele ailu be gigolong ate ve gol be tis vat ebe ane mone bamo molge ok be tis gumgum. Be bage geb kap ti ebe ipasang ve gol ok ta, be luev gen tiate walang ok ane ebe Pomate gili ginei tiate be uve molge ok, be tis avie nok ane luev wasi ane gingik gisov kap gol nok aplo.  
\v 5 Be iro are ti bwalbwale ve bing ai ge giengk avie nok na-vatu. Ares nok ane dabe dang-eteik; “Avie-gaptol wasi ane be tis amolmol ebe inei uiye be es miengk gitangi pomate bingkasop ane nangge nalk ok, tepwengge tinas nam-vu bamo Babilon.”   
\p
\v 6 Au-gali avie bamo nok ebe ginum ginum Pomate ane amolmol-gen be tis amolmol ebe aplos givin Yisu, be es is vun-kunu ok as tuerk love gisov be giengk ge ok, love yaun ok ma molge.   
\p
\v 7 Be angela ginei gitangi ayeu be ginei; “Mie avom poke be gulat bagem ve-ret ane? Ute kob! Ayeu nanei avei bamo etok be tis bwelk dabe tulkwe 7 be dabe range 10 ete ei gibweg giwei ok as dabe ebe givuai-vun ate ok lavo nitangi mie be nute kob.  
\v 8 Bwelk ete galkik guli ok, bwelk etok ei givang ebe warik bemem galkik ande lavo bun, bemem mul ane kob atob ei menihlang vukuri nangge nalk avo ebe gisov ve gininem ok be ines ei vunu nikwai. Be amolmol nalk ane subu ebe Pomate giro ares bwalbwale gisov kapia matawas ane ite givin ebe geb gulumb tis nalk ite nangge ok, atob indi bwelk nok love yaun ok ma. Ve gisov bwelk etok ei givang ebe warik, bemem ande lavo bun bemem mul ane kob atob ei menihlang vukuri.   
\p
\v 9 Amolmol ebe itpweng gen are gile gulunge molge ok tas-nitung gen etok vevie be indi kob. Bwelk nok dabe tulkwe 7 etok weik matendubi 7, be avie bamo nok gibweg giwei matendubi 7 etok.  
\v 10 Be bwelk dabe tulkwe 7 etok weik king 7 ebe emb amolmol dabin ok, be nolge bage tavlu imat ikwai be dongke-ngge ete gibweg nik be ti meng-gihlang ite nangge. Bwayage kob atob ei menihlang bemem atob ninggas ane gwang-ne ebe ve nemb amolmol dabin ok be nemb amolmol dabin sawa tupe ge bok-ti ma.  
\v 11 Be bwelk ete galk guli ok, ebe warik gibweg be galkik ande lavo bun ok, ete gile givin eisir king 7 etok be 8. Bemem king 7 nok as amol ti ete ei ok, bemem atob ei nimbweg ite ma ei atob nimat vunu mang-mangi.   
\p
\v 12 Be bwelk ane dabe range 10 ete galkik guli ok, etok weik king 10 ebe meihlang ite nangge ok. Bemem bwayage kob atob eisir in-gas as gwang-ne ebe ve tis bwelk etok inemb amolmol dabin ok, be atob inemb amolmol dabin nitangi as-matano sawa dongke-ngge bok-ti ma.  
\v 13 Be king 10 etok tepwengge as tas-gitung gen gile dongke. Be eisir tis ares bamo be as gwang-ne gitlek, be atob inemb as gwang-ne etok tepwengge nitangi bwelk galkok.  
\v 14 Be atob ines valir nitangi bwelk Sipsip. Bemem atob bwelk Sipsip be tis amolmol tepwengge ebe ei geb eisir ve ane gen, be ivang ivin ei be isov ei ane yaun ane lu vie-ngge ok atob inambweg inwei eisir. Ve gisov amolmol bambamo walang ok as Amol Bamo ei dongke-ngge, be king walang ok as King Ei.   
\p
\v 15 Be angela ginei gitangi ayeu be ginei; “Bui bambamo ete galkik guli avie wasi tine bamo etok gibweg giwei ok, etok weik amolmol avo ti avo ti be ulis ti ulis ti be amolmol vu ti ane ti ane tepwengge, ebe iro is ate sut be imbweg ok.  
\v 16 Be bwelk ane dabe range 10 ete galkik guli ok, be tis bwelk nok atob bwais ve ret indi avie wasi tine bamo nok na. Be atob ines ei tiate tiate be inemb ane kup tis kambam ete giro be gino ok nikwai be nivang utle ulis vuvri sin-ge. Be atob inyat-yati ei utle ulis be inkari nireu yev be yev nen nikwai.  
\v 17 Bingano, Pomate atob nilgum be eisir inalgum gen dang-etok, veik nilgum yaun ebe Pomate ta gitung ok ano nile. Beti eisir aplos gisov dongke be emb as gwang-ne ebe ve inemb amolmol dabin ok tepwengge gitangi bwelk nok gile. Be atob eisir inalgum dang-etok painge love nitangi sawa ebe Pomate ve nilgum gen bambamo ebe ginei atob nilgum ok ano nile kob.  
\v 18 Be avie ete galkik guli ok, etok weik nam vu bamo ebe geb amolmol bambamo (king) nalk ane tepwengge dabin ok.   
\c 18  
\s1 Babilon ande tiate gikwai  
\p
\v 1 Etok gikwai bekob gali angela ti gisov nangge gulumb meng-gitak. Angela nok ane gwang-ne bamo molge be ane bogbogo giro nalk love bogbogo ge.  
\v 2 Be gital avo bamo ge be ginei;  
\q1 “Nam-vu bamo Babilon ande tiate gikwai! Bingano, ande tiate gikwai! Be galkik ande ngalau tiate isov ile imbweg ve as nam.  
\q1 Ngalau tiate be tis mank bambamo ebe amolmol bwais ok, ande ile imbweg etok ve as nam.   
\q1
\v 3 Ve gisov amolmol walang ok tepwengge es luev wasi ane gitangi ei, be etok weik ebe ei geb ane wain wasi ane gitangi eisir be inum ok.  
\q1 Be king nalk ane tepwengge ok es luev wasi ane gitangi ei givin weik etok ge.  
\q1 Be amolmol nalk ane tepwengge ebe ilgum kulkul mone ane ok, inggas mone bamo molge be meihlang amolmol tis ares ve gisov ei ane luev gidang ate ane bambamo etok.”   
\p
\v 4 Bekob gaute avo ti nangge gulumb ginme, avo nok ginei dang-eteik;  
\q1 “Awangg amolmol-gen, Yem unamdil unkwai taku etenok be monahlang.  
\q1 Velob yem unvang unvin ei be tepwe unalgum gen tiate nile dongke, be un-gas gen tiate etok ane vavavne unvin ei.   
\q1
\v 5 Ei ane tiate ebe gilgum gilgum ok, dubi bamo molge be gireu painge love gile gigas gulumb ta. Be Pomate tang-gitung ei ane gen tiate bambamo ebe gilgum gilgum ok ane den painge ete givang nik.   
\q1
\v 6 Tangg-aim nitung gen bambamo ebe avie wasi tine bamo etok gilgum gitangi aim ok, be unemb vavavne ano vie-ngge nitangi ei ve gen ete ei gilgum gitangi yem ok ane.  
\q1 Ei geb bui tis ane gwang-ne gitangi yem be unum, dang-etok be yem unemb bui ebe ane gwang-ne gitlek etok ok nitangi ei be ninum.   
\m
\v 7 Ei avo givwat ate be gidang ate ano-anongge. Dang-etok be yem unemb vavavne be tis bunam walang ano nitangi ei, ve ane gidang ate etok ane. Be unalgum ei be niteng painge love nili ma.  
\q1 Ei tang-gitung giengk aplo ge dang-eteik; “Ayeu gabweg gawei lopong kwin ane weik ebe kwin ok. Be ayeu weik avie ti ebe nolge arwe gimat gikwai ok ite ma. Be gen bunam ti gitangi ebe atob menihlang nipil ayeu, love nateng ok ite ma molge.”   
\q1
\v 8 Dang-etok be atob ei ninggas gen bunam walang ano nipil dongke tis as-mate dongke-ngge.  
\q1 Atob amolmol in-gas gimat walang ano be amolmol anongge atob inteng inriv be inra, be atob marav-nes is nemb taku avut. Be sawa etok ge atob yev nen Babilon be ma nikwai.  
\q1 Ve gisov Amol Bamo Pomate ebe gilgum ei ane yaun be geb vavavne gitangi ei ok, ei Amol tulkwe gav-gavul tiate.”   
\p
\v 9 Amolmol bambamo (king) nalk ane tepwengge ebe es luev wasi ane gitangi ei, be indang is ate ivin ei ok, atob indi ebe ande yev gen ei be ane umkumk gisu gireu ok, okob atob inteng anongge ve ei ane.  
\v 10 Atob eisir inpelk ve vavavne bamo ete ei gigas ok, be atob invarkei aikawe ge be inei; “O nam-vu bamo Babilon likok! Mie nam-vu bamo molge, be mie nam-vu ti ebe gwang-ne molge ok! Bemem galkik ande mie gugas am gen tiate ebe gulgum gulgum ok ane vavavne tupe-ngge givin as-matano sawa dongke ge!”  
\v 11 Be amolmol nalk ane ebe ilgum as kulkul mone ane ok, atob tas-nitung nile nam-vu bamo nok be atob aplos bunam be inteng anongge ve ei ane. Ve gisov amolmol ebe ve inavgo eisir as wambal ok ete ande ma gikwai.  
\v 12 Eisir as wambal etok, ete gol tis silva be vat ebe ane mone bamo molge ok, tis gumgum ebe ivgo ve mone bamo molge ok, be tis kambam bwalbwale vevies, muele be bogbogo be. Be kambam silika be, tis ei ebe ane ukwas vevies ge ok, be tis gen ebe ipasang ve bwelk elepan nivo ok tis gen ebe ipasang ve ei ebe ane mone bambamo ge ok. Be tis gen ebe ipasang ve aen be tis vat ebe ane bwal-bwale vie molge ok.  
\v 13 Be tis gen ukwas ukwas subu weik waivul be laiyamb tis wel ukwas subu subu ebe emb gireu utlas ulis ok, be wain tis wel be beret be yanggo be, bwelk bulimakao tis sipsip be hos tis ane wil-kar givin givin. Be amolmol ebe emb kulkul sinsin-ge be mone ma ve is ok, tis dalgos ge weik etok ge. Eisir as wambal bambamo etok ete atob inavgo vukuri ite, ve amolmol ebe ve inavgo gen etok ok ete ande ma gikwai.  
\v 14 Amolmol ebe emb as kulkul mone ane ok, inei gitangi ei dang-eteik inei; “Ano ebe mie aplom giteng giteng painge-ngge ve nunggas ok, ete tepwengge ande ikali is ate ikwai mie be ma gikwai. Miam ben vevies walang ano ebe ane mone bambamo ge ok tis am kup be kambam vevies tis am gen vevies walang ok ande ma gikwai. Be atob amolmol indi inei gen dang dang-etok galkik giengk mie ane vukuri ite ma!”   
\p
\v 15 Be amolmol ebe emb kulkul mone ane gipil gen bambamo etok, be inggas mone bamo molge nangge nam dabe etok ok atob inpelk ve ei ane vavavne ete gigas ok ane be atob invarkei aikawe ge. Be atob tas-bua be inteng anongge ve ei ane,  
\v 16 be inei; “O nam vu bamo etok likok! Warik ei gino kup vevies tepwe, bogbogo be muele be gigolong utle ulis ve gol tis vat be gumgum vevies ebe ane mone bambamo ge ok.  
\v 17 Be galkik ande ei ane mone tis ane gen vevies walang etok tepwengge ma gikwai seukie-ngge weik ebe bilip geb ok, givin as-matano sawa dongke-ngge.” Be amolmol ebe inggas inggas ei-vovo ok be amolmol ebe ivgo ei-vovo ve invang nam dani ok, tis eisir ebe ivang ei-vovo yapin ok, be amolmol ebe emb kulkul mone ane gipil ei-vovo gielk ane ok, eisir etok tepwengge imbweg aikawe ikwai nam bamo Babilon.  
\v 18 Be ili ebe yev gen nam nok be ane umkumk gisu gireu ok be inei; “Nam dabe ret gitangi nam dabe bamo etok?”  
\v 19 Be tas-bua be iro nalk gireu dabas tulkwe be iteng anongge ve ei ane be inei; “Opo nam dabe bamo etok likok e! Amolmol ebe tis as ei-vovo gituvki givang gielk ok, eisir inggas mone bamo molge gisov ei dongke-ngge. Bemem love-ande iyaing ei ane gen walang ok tepwengge gikwai seukie-ngge weik ebe bilip geb ok, givin as-matano sawa dongke-ngge ba!”   
\p
\v 20 Dang-etok be mie gulumb tis Pomate ane amolmol-gen, be yem aposel tis profet, yem tangg-aim vevie-ngge ve gen ete galkik meng-gihlang gipil nam-vu bamo etok ok. Galkik ande Pomate gilgum ei ane yaun be geb vavavne gitangi ei, be etok weik gen tiate bambamo ebe nam-vu bamo etok gilgum gitangi yem ok, ane den ete ande Pomate geb ginumul gitangi ei ate gile ok.   
\p
\v 21 Etok gikwai bekob angela gwang-ne ti gidbwal vat bumue bamo ebe bamo molge ok ti itin be gikari gisov gielk gile be ginei; “Atob inyaing nam-vu bamo Babilon ane luev dangete galkik vat bumue bamo etok ok, be atob amolmol indi ei vukuri ite ma.  
\v 22 Be atob amolmol inaute gita tis amb be tavulk be gasul be gen uiye ane subu subu ebe es uiye gisov gisov ok, ebe giteng nangge miam nam-luvue ok vukuri ite ma. Be atob indi amolmol ebe bais manggum manggum ok, me inaute vat bamo ebe gisak yanggo vus-vusa be giteng giteng ok nangge miam nam-luvue vukuri ite.  
\v 23 Be atob indi ebe lam aivi, me inaute ebe kakie giriv be gira ve avie gabu amol inemb bais ane ok, nangge miam nam-luvue vukuri ite ma. Miam amolmol-gen ebe ilgum kulkul mone ane ok, eisir tis are bamo nangge nalk. Be mie gulgum ve guyo guyo amolmol avo ti avo ti be ulis ti ulis ti be amolmol vu ti ane ti ane tepwengge nangge nalk ve am yaun dueb ane walang ok.”   
\p
\v 24 Pomate gili ginei nam-vu bamo ete Babilon ok, ete ges amolmol ebe inei Pomate avo ukwas vusa ok be tis Pomate ane amolmol-gen be tis amolmol walang ok vun-kunu.   
\c 19  
\s1 Amolmol tas-vevias ge ve ebe ande nam-vu bamo Babilon tiate gikwai ok  
\p
\v 1 Etok gikwai bekob gaute gen ti weik ebe amolmol anongge avos nangge gulumb ok, be avo nok ginei dang-eteik; “Avond nivwat Pomate are! Eitit and Pomate Ei dongke-ngge ete geb eitit ru. Ei Amol gwang-ne be Amol tis are bamo.  
\v 2 Ei ane luev ebe gilgum amolmol as yaun ok, vie be roro dongke. Avie (Babilon) wasi tine bamo etok ebe giyaing amolmol nalk ane tepwengge ve luev wasi ane ok, ete galkik Pomate geb vavavne gitangi ei be gile gitangi roro-ngge. Be Pomate geb vavavne gitangi ei givin ve ebe ges Pomate ane amolmol kulkul ane vun-kunu ok givin weik etok ge.”   
\p
\v 3 Be gaute ital avos bambamo ge vukuri be inei; “Avond nivwat Pomate are! Yev ebe gen nam-vu bamo etok ok, ane umkumk atob nisu nireu be niengk dang-etok painge ge!”  
\v 4 Be eisir awaga 24 tis gen matawas ane aivat ebok iro vas-dubi supwe be es miengk gitangi Pomate ebe gibweg giwei ane lopong King ane ok be inei; “Bingano! Eitit avond nivwat Pomate are!”  
\v 5 Bekob gaute avo ti meng-gihlang nangge Pomate ane lopong king ane ebe gibweg giwei ok, be avo nok ginei dang-eteik; “Yem amolmol ebe mohlang ve Pomate ane amolmol kulkul ane ok, be yem ebe upelk ve ei ok be yem ebe tis arengg-aim ok tis eisir ebe ares ma ok, yem bambamo etok tepwengge avongg-aim nivwat Pomate are!”   
\s1 Bwelk Sipsip ane ben avie ane  
\p
\v 6 Bekob gaute gen ti weik ebe amolmol kakie giriv be gira ok, be weik ebe bui bambamo ane konge ok be weik ebe walpap gitut be olo-longe ok. Avo nok ginei dang-eteik; “Eitit avond nivwat and Amol Bamo Pomate are! Ei Amol tulkwe gav-gavul tiate. Galkik ande ei meng-gihlang King.  
\v 7 Dang-etok be eitit tand-vevie anongge be avond nivwat ei are! Ve sawa ebe bwelk Sipsip ve nemb avie ok ande meng-gihlang gikwai. Be ei ane avie nok ande gipasang ate gikwai.  
\v 8 Be Pomate geb kup bogbogo vie ebe vie molge ti gitangi ei be gino, be ane ringenk givang gitlek.” (Be kup nok, etok Pomate ane amolmol-gen as luev vevies ebe ivang ivang ok).   
\p
\v 9 Bekob angela ginei gitangi ayeu dang-eteik; “Mie nuro yaun eteik bwalbwale nisov kapia be nunei, Amolmol ebe Pomate geb yaun gile ve eisir be inme be en bwelk Sipsip ane ben avie ane ok, eisir etok tas-vevias ge.” Be angela nok ginei; “Yaun etenok etok Pomate ane yaun. Be yaun nok ano molge.”  
\v 10 Bekob ayeu garo vangg-dubi supwe be veve nas miengk nitangi angela nok. Bemem ei ginei gitangi ayeu be ginei; “Mie nulgum dang-etok bwaya! Ve ayeu amol kulkul ane sin-ge ti weik ete mie ate be tis am nune-nggen ebe aplongg-aim givin Yisu be omb kulkul ve unei ei are vusa ok. Be mie nunei uiye be nos miengk nitang Pomate ei dongke-ngge. Be eitit tali gikwai tanei Ngalau Yamar geb eisir (profet) avos ru be inei Pomate ane avo ukwas vusa. Be Ngalau Yamar nok ge ete geb amolmol ebe inei Yisu are vusa ok ru.”   
\s1 Amol ebe gibweg giwei bwelk hos bogbogo ok  
\p
\v 11 Bekob gali gulumb ande ponge be bwelk hos bogbogo ti meng-gihlang be givarkei. Be amol ete gibweg giwei hos etok ok, ete ital are inei; “Yaun Ano.” Ei gilgum amolmol as yaun me ges ane valir, ane luev vie be roro dongke.  
\v 12 Amol nok matano weik ebe yev ane aivi ok, be gikuk gululung king ane anongge giwei dabe tulkwe. Be iro ares ti ebe amolmol itpweng are ite, be ei ate ge gitpweng ares etok are ok giengk utle ulis.  
\v 13 Be ei gino kup undib bamo ti ebe iro utuv gisov tuerk ok. Be ital ei are inei; “Pomate ane Yaun.”  
\v 14 Bekob amolmol valir ane ebe nangge gulumb ok, ino as kup bogbogo vaku vaku vevies ge be imbweg iwei as hos bogbogos bogbogos ge be itau ile ei.  
\v 15 Be buyag valir ane undib bamo ti giengk eisir as amol mate ane etok avo, buyag nok mate tiate molge. Be buyag etok ebe ve niro amolmol avo ti avo ti be ulis ti ulis ti be amolmol vu ti ane ti ane tepwengge vun-kunu ok. Ei atob bage tis kabut aen be nitwem amolmol. Be atob ning-gig wain nisov gen ebe ing-gig ing-gig wain gisov. Be etok weik Pomate ebe tulkwe gav-gavul tiate ok, ane ta-vavis ane ano.  
\v 16 Be iro ares ti bwalbwale giengk ei ane kup be tis va, be ares nok dang-eteik; “Amolmol bambamo walang ok as Amol Bamo. Be king walang ok as King ei.”   
\p
\v 17 Bekob gali angela ti givarkei as-matano aplo, be gital yaun avo bamo ge gitangi mank bambamo ebe iluep ivang gulumb ane lu ok be ginei; “Tepwengge unro sut untangi Pomate ane ben bamo eteik unme!  
\v 18 Be unen king be tis amolmol valir ane as amolmol mate ane ebe itwem is ok be tis eisir valir ane viros. Be unen hos tis ane amolmol ebe imbweg iwei ok, be amolmol ebe ivang as gen vie-ngge ok tis eisir ebe kulkul geb is avut painge ge ok, be amolmol ebe tis ares ok be eisir ebe gen ma ve is ok viros.”   
\p
\v 19 Bekob gali bwelk be tis king nalk ane tepwengge tis as amolmol valir ane iro is ate sut ile ve ines valir nitangi Amol ebe gibweg giwei bwelk hos ok tis ane amolmol valir ane.  
\v 20 Bemem ei gidgin bwelk nok be tis amol ebe giyo ginei ei amol ti ebe ginei Pomate avo ukwas vusa (profet bingkasop ane) ok ta. Amol nok ete gilgum gen bwalbwale walang ano nangge bwelk nok na. (Ei gilgum gen dangdang-etok beti giyo giyo amolmol be ivku bwelk etok ane tuvweng bwalbwale giengk utlas ulis, be inei uiye be es miengk gitangi bwelk nok ane dalgo). Eisir ikari bwelk nok tis profet bingkasop ane etok tis matawas ge isov nalk avo tis yev bamo ebe vavavne giengk dangetok painge ge ok aplo ile.  
\v 21 Be amol ebe gibweg giwei hos ok ges sulu as amolmol valir ane tepwengge vun-kunu ve buyag valir ane undib bamo ete giengk ei avo ok. Be mank tepwengge iro sut ile be en eisir nok viros love gibon is vie-ngge.   
\c 20  
\s1 Yaun Sonda bamo 1,000 ane  
\p
\v 1 Bekob gali angela ti gisov nangge gulumb ginme, ei givwat nalk avo ebe gisov ve gininem ok ane il-dabe be tis seng bamo ti givin.  
\v 2 Ei geb muat tine muanggane bamo (vap-rinrin) etok ta, ebe ital inei, “Amol Ebe Gibil-bil Amolmol Tepwengge Ok.” Sadam Ei ate. Be gidgin ta ve seng etok be atob niengk nitangi Sonda bamo 1,000.  
\v 3 Bekob gikari gituep nalk avo ebe gile gulunge molge ok gile be gi-gig nalk avo nok ane nam avo avut gitle gili. Veik ei nitpungi amolmol vukuri bwaya love Sonda bamo 1,000 etok ma nikwai kob. Okob atob inahlang seng nikwai ei be niriv be nira sawa-epti ok ge.   
\p
\v 4 Bekob gali lopong king ane subu giengk, be amolmol subu imbweg iwei lopong nok. Be Pomate geb kulkul ebe ve inaute be inpasang amolmol as yaun ok gitangi eisir ve inemb. Be gali amolmol bambamo ebe amolmol idbwen savualos gilkili ve gisov ebe eisir aplos givin Yisu be inei ei are vusa ok, be tis ebe emb Pomate ane yaun (mateu) ta gwang-ne molge ok dalgos. Eisir etok ebe es miengk gitangi bwelk me bwelk nok ane dalgo ite ok, be inggas bwelk nok ane tuvweng giengk nas-vatu me bais ok ite ma. Eisir nok ande matawas vukuri, be atob tis Kilisi inemb amolmol dabin nitangi Sonda bamo 1,000.  
\v 5 Amolmol ebe matawas vukuri be imdil nangge taku gimat ane ulu ok, ete eisir etok. (Be amolmol tavlu atob inamdil ite love Sonda bamo 1,000 etok ma nikwai kob).  
\v 6 Amolmol yamar yamar ane ete galkik matawas be imdil nangge taku gimat ane ulu nik, eisir tas-vevias ge! Ve gisov tanmat vunu mul ane ane, ane gwang-ne geb eisir ta ite ma. Eisir atob inambweg weik Pomate gabu Kilisi as amolmol ebe ivang Pomate be amolmol ane sawa ok. Be atob tis Kilisi inemb amolmol dabin nivin Sonda bamo 1,000 etok.   
\s1 Imbweg Sadam vovo gikwai  
\p
\v 7 Nivin ebe Sonda bamo 1,000 etok ma nikwai ok, okob atob inahlang Sadam be nile nihlang nikwai kapual-lu.  
\v 8 Be atob nile be nitpungi Gog gabu Magog as amolmol-gen ebe imbweg gitangi nalk ane kuni aivat etok ok, ve inamdil be ines valir. Eisir nok walang molge weik ebe yangawe gielk ane ok.  
\v 9 Eisir ivang emb taku walang ok avut nangge nalk be isum Pomate ane amolmol-gen as nam be tis nam-dabe ebe Pomate tang-givin gitlek ok. Bemem yev gisov nangge gulumb ginme be gen eisir nok be tepwengge imat vun-kunu be ma.  
\v 10 Bekob Pomate gikari Sadam, amol ebe gitpungi eisir etok ok gisov yev vavavne bamo tis vat salpa ebe warik ikari bwelk be tis profet bingkasop ane ebok isov aplo ile ok gile. Be sotol nok atob in-gas vavavne dangetok tambok be as niengk nemb ta-ngge.   
\s1 As-mate bamo ebe ve tanvarkei Pomate na ok  
\p
\v 11 Bekob gali lopong king ane bogbogo bamo ti, be amolmol imbweg iwei lopong nok. Gulumb tis nalk, ipelk ve amol nok na be ande ile ve ma ge be lavos bun.  
\v 12 Be gali amolmol ebe imat vun-kunu ok, amolmol ebe tis ares ok be ebe ares ma ok tepwengge ivarkei gideb lopong king ane etok na. Be amol ebe gibweg giwei lopong ok geb kapia subu ping-pong, be geb kapia matawas ane ponge givin be giengk. Bekob gilgum amolmol ebe imat vun-kunu ok tepwengge as yaun Ei gilgum eisir as yaun gitau gile as gen ebe ilgum gitang-tangi ge be ane yaun gisov kapia bambamo etok be giengk yapin ok.  
\v 13 Amolmol ebe isov gielk be imat vun-kunu ok, imdil nangge gielk aplo meihlang be eisir ebe iengk nalk aplo ok imdil nangge nalk aplo meihlang. Be amol ebe giute be gipas-pasang amolmol as yaun ok gilgum eisir as yaun gitau gile eisir ate as kulkul ebe ilgum gitang-tangi ge ok.  
\v 14 Be gikari Tanmat vunu ane gwang-ne be tis taku gimat ane, gisov nalk avo bamo ebe tis yev ok aplo gile. (Nalk avo tis yev etok, etok tanmat vunu mul ane ane).  
\v 15 Amol ti ginei are giengk kapia matawas ane etok ite, okob amol ebe giute be gipasang amolmol as yaun ok atob nikari amol etok nisov nalk avo tis yev bamo etok aplo nile.   
\c 21  
\s1 Gulumb vaku tis nalk vaku  
\p
\v 1 Bekob gali gulumb vaku be tis nalk vaku, ve gulumb tis nalk mate ane ande ma gikwai. Be gielk ok ande givuev ite weik etok ge.  
\v 2 Be gali nam-vu yamar Jerusalem vaku ebe Pomate geb nangge gulumb gisov ginme ok, inggolong love vie dongke weik ebe inggolong avie ve nemb amol ok.  
\v 3 Be gaute avo ti ginme gihlang nangge lopong king ane, be avo nok ginei dang-eteik; “Ute kob! Galkik ande Pomate ane nam givarkei gisov amolmol aplo. Atob ei nimbweg be nivang nivin eisir, be nili eisir ninei ane amolmol-gen. Pomate ei ate atob nivang nivin eisir, be eisir atob indi ei inei as Pomate.  
\v 4 Ei atob nisin eisir matanos rulu nikwai be wat inmat vunu ite ma. Be atob aplos bunam me inteng, me in-gas vavavne vukuri ite ma. Ve gisov gen mate ane bambamo etok ande ma gikwai.”   
\p
\v 5 Bekob amol ebe gibweg giwei lopong king ane ok ginei dang-eteik; “Unaute! Galkik as-mate etenik ande ayeu gab gen walang ok be meng-gihlang vaku vukuri!” Be ginei gitangi ayeu vukuri be ginei; “Uro yaun etenik bwal-bwale isov kapia ile. Ve yaun etenik yaun ano, be gitangi ginei amolmol tepwengge aplos nivin.”  
\v 6 Bekob ginei; “Gen bambamo etok ande ano gile gikwai. Ayeu Amol mate ane be mul ane. Gen walang ok ane dabe ayeu, be kulkul walang ok ayeu galgum be ma gikwai. Ayeu atob namb bui matawas ane sin-gege nitangi amolmol ebe bui ges is ok be inum.  
\v 7 Amol ti ginei geb tulkwe vier be gibweg giwei gen tiate ane gwangne, amol etok atob ninggas gen bambamo etok. Be atob ei nili ayeu ninei ane Pomate be ayeu nali ei nanei natungg.  
\v 8 Bemem amolmol ebe ipelk ipelk be ituvi is ate ok be tis amolmol ebe aplos givin ite ok, tis eisir tiate ane be amolmol ebe es amolmol vun-kunu ok be amolmol wasi tinas ane tis eisir dueb ane be amolmol ebe inei uiye be es miengk gitangi pomate bingkas-kasop ane ok be tis amolmol yaun bingkas-kasop ane, eisir etok tepwengge as taku ebe ve inambweg ok, ete nalk avo ebe tis yev be vat salpa ane vavavne giengk ok. Be etok tanmat vunu mul ane ane nok etok.”   
\s1 Jerusalem vaku  
\p
\v 9 Bekob angela 7 ebe ivwat kilkiel 7 ebe gen bunam mul ane ane gisov love gituvki gipil ok, as amol ti ginme ginei gitangi ayeu be ginei; “Unme. Tale be ayeu nas avie ebe bwelk Sipsip ve nemb ok ru nitangi mie be nuli kob.  
\v 10 Be Ngalau geb ayeu avut love gali gen weik ebe gayengk mev ok be angela nok gigas ayeu be eilu areu matendubi bamo ti ale, be ei ges nam-vu yamar Jerusalem ei ate ebe Pomate geb nangge gulumb gisov ginme ok ru gitangi ayeu.  
\v 11 Nam-vu nok gisov tis Pomate ane aivi ge ginme. Be ane ringenk weik vat ebe ane mone bamo molge ok be ringenk weik ebe bui-tal ane (galas) ok.  
\v 12 Be ane simbel undib bamo gireu love gile be ane nam avo gitangi bage-isgabu be ano ailu (12). Be angela 12 ivarkei nam avo 12 etok gitangi ge ve emb nam avo dabin. Be iro amolmol Israel ane tumbus-gen 12 ebe meihlang nangge ok ares bwal-bwale giengk gitangi nam avo 12 etok gitangi ge.  
\v 13 Nam avo aitol giengk sagin gideb as-gireu ane be aitol giengk sagin gideb as-gisov ane, be aitol giengk gideb mulasa dabe ane be aitol giengk gideb musanggu dabe ane.  
\v 14 Be itak vat bambamo gitangi 12 gile lu giengk simbel etok dabe ane ve giro ta. Be iro bwelk Sipsip ane aposolo-gen 12 ares bwal-bwale giwei vat 12 etok gitangi ge.   
\p
\v 15 Angela ete ginei yaun gitangi ayeu ok, ei givwat tuvweng gol ti ve nemb tuvweng nipil nam vu bamo nok tis ane simbel be ane nam avo.  
\v 16 Nam vu bamo etok den kwainding vie dongke be ane ebe undib ok be tis ebe gito ker ok undib gitangi ate-ng ge. Angela geb tuvweng ve nam vu bamo etok, ane ebe undib ane ok be ebe gito ker ane ok be ebe gireu einggoto ane ok, be bamo molge gitangi (2,400 kilomita).  
\v 17 Be geb tuvweng ve simbel givin, be simbel nok ane ebe gireu einggoto ok gitangi 144 mita. Be tuvweng etok, etok gitangi amolmol as tuvweng ebe emb emb gipil gen ok.   
\p
\v 18 Ipasang nam nok ane simbel ve vat jaspa ebe ane mone bamo molge ok, be ipasang nam ei ate ve gol sin-gege. Be ane nam luvue ringenk weik ebe bui-tal ane (galas) ok.  
\v 19 Be inggolong simbel nok dabe ve vat bwal-bwale vevies walang ano ebe ane mone bambamo ge ok. Vat mate ane ebe gile lu ok ete jaspa, be vat ailu ane ete sapir, be aitol ane ete agat, be aivat ane ete emeral,  
\v 20 be bage tavlu ane ete sadoni, be 6 ane ete konilian, be 7 ane ete krisolit be 8 ane ete beril be 9 ane ete topa, be 10 ane ete krisopa be 11 ane ete hiasin be 12 ane ete ametis.  
\v 21 Be itak gumgum ebe indul love taptape bambamo ok, taptape dongke dongke gitangi bage isgabu be ano ailu (12) gile ve nam avo. Gumgum nok bogbogo ge, be ane mone natu ite. Nam nok ane luev walang ok ebe gilek be ginme nangge nam luvue ok, etok gol sin-gege be ringenk weik ebe galas ok.   
\p
\v 22 Be ayeu gali lum yamar ti givarkei nangge nam-vu bamo etok ite ma. Amol Bamo Pomate ebe tulkwe gav-gavul tiate ok, gabu bwelk Sipsip sulu weik nam-vu bamo etok ane lum yamar.  
\v 23 Be amolmol nam-vu bamo etok ane irek gen weik aiweng me as-matano ebe ve aivi be niro eisir ok ite ma. Ve Pomate ane bogbogo giro eisir, be bwelk Sipsip weik ebe nam etok ane lam ok.  
\v 24 Amolmol tepwengge nangge nalk atob invang insov nam-vu dongke etok ge ane aivi aplo. Be king nalk ane tepwengge atob inro as gen vevies walang sut nitangi ei nile.  
\v 25 Be atob ines nam-vu nok ane nam-avo av-kavut ite ma, ve eisir tas-gisgil tambok na.  
\v 26 Be atob inro amolmol walang ok, amolmol ulis ti ulis ti be avo ti avo ti be amolmol vu ti ane ti ane tepwengge as wambal tis as mone be gen walang ok sut nisov nam-vu dongke etok nile.  
\v 27 Bemem gen tomtom avo ti, me amolmol tiate ane be tis amolmol ebe inei yaun bingkas-kasop ok gitangi ebe ve insov nam-vu bamo etok inde ok ite ma yapin. Amolmol ebe ares gisov bwelk Sipsip ane kapia matawas ane ok ge, ete atob insov nam etok inde.   
\c 22  
\s1 Bui matawas ane tis ei matawas ane  
\p
\v 1 Bekob angela ges bui bamo ti ru gitangi ayeu, bui nok etok bui matawas ane be sangas vie dongke be ringenk weik ebe bui-tal ane (galas) ok. Bui nok meng gihlang nangge Pomate gabu bwelk Sipsip as lopong king ane be gituvki gitau gile nam bamo nok ane nam luvue  
\v 2 gisov luvue butu ge. Be ei matawas ane giden gi-lili bui nok kire tavlu be tavlu. Ei nok ges ano gitangi bulwer bage isgabu be ano ailu (12) givin Sonda bamo walang ok. Ei etok ges ane ano givin aiweng walang ok gitangi ge, be ane lan gilgum amolmol walang ok, amolmol avo ti avo ti be ulis ti ulis ti be amolmol vu ti ane ti ane tepwengge be utlas vie.  
\v 3 Be gen bambamo ebe Pomate bua ve ret nili be veve niyaing nikwai ok, ete atob ti niengk nangge nam etok vukuri ite ma. Pomate gabu bwelk Sipsip as lopong king ane atob niengk nangge nam dabe etok. Be Pomate ane amolmol kulkul ane atob inei uiye be ines miengk nitangi ei.  
\v 4 Atob eisir indi ei be ei atob niro are bwal-bwale niengk eisir nas-vatu.  
\v 5 Be tambok wat niengk vukuri ite ma. Be eisir wat inrek yev me lam me as-gwangne ebe ve niro is ok ite ma. Ve Amol Bamo Pomate ane aivi atob niro eisir weik ebe lam ok, be eisir atob inemb amolmol dabin weik ebe king ok dangetok ninggas ta-ngge.   
\s1 Yisu atob ninumul ninme  
\p
\v 6 Be angela ginei gitangi ayeu be ginei; “Yaun etenik ano molge, be gitangi ginei amolmol aplos nivin. Amol Bamo Pomate ebe ginei yaun vusa meng-gihlang ane profet-gen avos ok, gihlin ane angela ve nes gen bambamo ebe kasop-gege menihlang ok ru nitangi ane amolmol kulkul ane tepwengge.  
\v 7 Be Ute! Yisu ginei, ‘Ayeu atob nalek nakuri yem ge.’ Amolmol ebe ipasang yaun bambamo ebe Pomate ginei vusa giengk kapia etenik ok vie-ngge ok, eisir etok tas vevias ge.”   
\p
\v 8 Ayeu Jon ebe gaute be gali gen bambamo etok gisov matanongg ok, gali be gaute gen bambamo etok gikwai bekob gakari aute gale gatak angela ebe ges gen bambamo etok ru gitangi ayeu ok na ve nas miengk nitangi ei.  
\v 9 Bemem ei ginei gitangi ayeu be ginei; “Utau ge bekob. Ve ayeu amol kulkul ane sin-ge weik ete mie ate be tis eisir profet ebe weik am kawe-nggen be am male-nggen ok. Be tis amolmol tepwengge ebe ipasang yaun ebe giengk kapia etenik ok. Be mie nunei uiye be nos miengk nitangi Pomate ei dongke-ngge.”  
\v 10 Bekob ginei gitangi ayeu be ginei; “Mie nuvuaivun me nos yaun bambamo ete Pomate ginei vusa giengk kapia etenik ok ti ta bwaya. Ve sawa ebe gen bambamo etok ve menihlang ok ande gibloblo tepwe.  
\v 11 Dang-etok be amol ret ebe gilgum gen tiate painge-ngge ok, ei nilgum ane gen nivang dang-etok, be amol ret ebe gilgum gen ungglus-ungglus ok, ei nilgum ane gen painge nivang. Be amol vie ret ebe gilgum gen vevies ge ok, me geb ate dabin vie-ngge givang ok, ei nes ane luev be nemb ate dabin vie-ngge dangetok nivang.”   
\p
\v 12 Be Yisu ane avo ukwas ebe ginei ok dang-eteik; “Unaute kob! Ayeu atob nalek nakuri yem ge. Be atob nambwas amolmol walang ok as kulkul ebe ilgum gitang-tangi ge ok ane ano nitangi eisir ana-nos ge.  
\v 13 Ayeu amol mate ane be mul ane. Gen walang ok ane dabe ayeu, be ayeu gas vu beti atob nas vunu.   
\p
\v 14 “Amolmol ebe ivuk as kup gikwai ok, eisir tas-vevias ge. Eisir gitangi atob inen ei matawas ane ane ano. Be eisir gitangi atob insov nam dabe bamo etok ane nam-avo inde.  
\v 15 Be amolmol ebe atob invarkei sagin dume ane ok, ete uvun, be amolmol dueb ane tis amolmol ebe es amolmol vunkunu ok, be tis amolmol ebe inei uiye be es miengk gitangi pomate bingkas-kasop ane ok be tis amolmol ebe tas-givin yaun bingkas-kasop be ilgum ano gile ok. Eisir bambamo etok ete atob invarkei Pomate ane nam ane sagin dume.  
\v 16 Ayeu Yisu, ete gahlin angg angela gitangi yem gilek be ginei yaun etenik lavo gitangi yem amolmol bui ane nok. Dawit ane walo, be ane vaku ayeu. Ayeu weik viteuk-aue bamo as ane.”   
\p
\v 17 Ngalau Yamar gabu avie ebe ve nemb bwelk Sipsip ok, sulu inei dang-eteik; ‘Unme Ma!’ Be amolmol ebe iute yaun etenik ok, eisir ok inei nivin be inei; ‘Unme Ma!’ Amolmol ebe bui ges is ok, inme ma. Inme be inum bui matawas ane. Inme be inum sin-gege.   
\p
\v 18 Yaun ete ayeu ve nanei nitangi amolmol tepwengge ebe iute yaun bambamo ete Pomate ginei vus-vusa giengk kapia etenik ok, atob ano nile! Amol ti ginei nivdur yaun ake subu nile nivin yaun ete giengk kapia etenik ok, atob Pomate nemb gen bunam subu nile niwei gen bunam bambamo ete inei giengk kapia etenik ok be nemb nitangi amol etok.  
\v 19 Be ginei amol ti nisin yaun ete Pomate ginei giengk kapia etenik ok ane ake subu nikwai, atob Pomate nemb amol nok ane ei ano matawas ane be tis ane sawa ebe ve nimbweg ok, ebe giengk nam-vu yamar ebe inei ane yaun giengk kapia etenik ok nikwai weik etok ge.   
\p
\v 20 Amol ebe ginei gen bambamo etok ane yaun vus-vusa ok, ei ginei dang-etik; “Bingano molge, ayeu atob nalek nakuri yem ge!”  
\p Bingano, Amol Bamo Yisu. Unme ma!   
\p
\v 21 Amol Bamo Yisu ane yaun bwai-bwaya atob nilek nivang nivin yem tepwengge.