\id COL - Iwal NT [kbm] -Papua New Guinea 1984 (web version -2013 bd) 
\h KOLOSI 
\toc1 Pol ane kapia gitangi amolmol Kolosi ane 
\toc2 Kolosi 
\toc3 Kl 
\mt1 Pol ane kapia gitangi amolmol Kolosi ane  
\c 1  
\p
\v 1 Kilisi Yisu ane aposel ayeu Pol, ebe Pomate ta-givin be geb ayeu ok, be tis eitit and nune Timoti,  
\v 2 eilu amei kapia etenik gitangi Pomate ane amolmol-gen be eilu amei nune-nggen ebe aplos givin Kilisi ebe imbweg nangge Kolosi ok.  
\p Ayeu tangg givin ganei Tamand Pomate atob nemb ane ta-viti be tis ane yaun bwai-bwaya nitangi yem nilek.   
\s1 Pol ges miengk ta-vie ane gitangi Pomate  
\p
\v 3 Eilu as miengk gitangi eitit and Amol Bamo Yisu Kilisi Tame Pomate be anei amei tangg-amei vie ve yem ane tis as-mate walang ok.  
\v 4 Ve eilu aute binge gikwai ve yem aplongg aim givin Kilisi Yisu be tis ebe tangg-aim givin Pomate ane amolmol-gen tepwengge ok.  
\v 5 Yem aim aplongg-aim givin tis aim tangg-aim givin ane dabe giengk gen ebe yem usge nangge gulumb ok. Pomate gipasang gen etok ve yem ane yapin. Be gen ete yem usge ok, ete nolge ute ane yaun be utpweng are gikwai givin ebe yaun ano gibielk ve yem vaku-ngge ok. Be yaun ano nok ete mateu ok.  
\v 6 Mateu givang geb taku walang ok avwut nangge nalk be ges ano ano-ngge weik ete gilgum nangge yem, givin ebe mateu gibielk ve yem vaku-ngge be utpweng Pomate ane yaun bwai-bwaya are roro-ngge ok.  
\v 7 Eitit and amol kulkul ane Epafras gibul mateu nok gitangi yem. Epafras nok ei Kilisi ane amolmol kulkul ane vie ti ebe giwel eilu be gilgum Pomate ane kulkul ok.  
\v 8 Ei ginei gitangi eilu ginei galkik ande Ngalau geb luev tas givin ane gitangi yem gikwai.   
\p
\v 9 Beti eilu aute be as miengk ve yem ane painge-ngge tis as-mate walang ok. Eilu as miengk be autani Pomate ve nemb dabas-gwet vie nitangi yem veik unatpweng gen ebe Pomate ta-givin ok ar-kare. Be ane Ngalau nemb dabas-gwet gen vevies walang ok ane be tis dabas-gwet ebe ve inatpweng mateu ane dabe are ok nitangi yem.  
\v 10 Veik unvang weik Amol Bamo ane amolmol-gen yem roro, be as-mate walang ok unalgum gen ebe ve nilgum Ei be ta-vevie ane ok ge. Kob atob aim kulkul vevies ete ulgum ulgum ok atob nes ane ano vevies ge be dabas-gwet ebe ve inatpweng Pomate are ok atob menihlang bamo-ngge nangge yem.  
\v 11 Eilu as miengk gitangi Pomate givin veik niro yem ta ve ane bogbogo ane gwangne, veik unvarkei gwangne be un-gas gen bunam walang ok tis aplongg-aim dongke-ngge.  
\v 12 Yem unei aim tangg-aim vie tis tangg-aim vevie-ngge nitangi Tamand ve ebe gilgum yem be ande gitangi ve un-gas gen ebe Pomate gipasang ve ane amolmol-gen yapin ok unvin, nangge ane taku bogbogo ane.  
\v 13 Ve Ei geb eitit ru be gigas eitit takwai gen tiate aiweng tumi ane, ane gwangne be gitak eitit tambweg tasov Natu ebe tang givin gitlek ok ane gwangne ane lu.  
\v 14 Be Amol nok ete gigas eitit takwai gen tiate ane gwangne be gisin eitit and tiate walang ok gikwai.   
\s1 Yaun gipil Yisu tis ane kulkul  
\p
\v 15 Kilisi Ei gigas Pomate ebe gitangi ve tandi Ei ite ok ane na roro-ngge. Be gen bambamo ete Pomate gipasang ok, as Amol Bamo Ei dongke-ngge.  
\v 16 Ve Pomate gipasang gen walang ok, gen ebe giengk gulumb ok be gen ebe giengk nalk ok be tis gen ebe gitangi tandi ve matanond tis gen ebe gitangi ve tandi ite ok, be tis gwangne walang ebe emb amolmol dabin ok be pomate bingkasop ane be amolmol ebe tis ares ok be tis gwangne nalk etenik ane. Gen bambamo etok Pomate gipasang ve Kilisi dongke-ngge ane gwangne. Be etok Kilisi ge ane gen bambamo etok tepwengge.  
\v 17 Gen walang etok tepwengge meng-gihlang ite nangge be Kilisi gibweg gimungg. Be gen etok tepwengge isov Ei dongke-ngge ane gwangne ane lu be geb dabin.  
\v 18 Ei weik amolmol bui ane dabas tulkwe be amolmol bui ane weik Ei utle ulis. Ei Amol mate ane ebe gimdil nangge taku gimat ane ulu ok, be gen walang ok ane dabe giengk Ei dongke-ngge, be Ei dongke-nge geb gen tepwengge dabin.  
\v 19 Ve Pomate ta-givin ginei Natu ninggas Ei ane luev gen walang ok ane nitangi ge.  
\v 20 Pomate ta-gitung ve nirwel gen tepwengge nitangi Ei ate nile, beti geb Natu be ges gen walang ok ane gwangne vun-kunu. Pomate geb Natu be gipto ane tuerk gisov ei-givsangin beti geb yaun bwai-bwaya gitangi gen tepwengge ebe ivang nalk tis gulumb ok.   
\p
\v 21 Warik yem uvang aikawe ukwai Pomate be aim tiate bambamo ebe ulgum be tangg-aim gitung gitung ok ete gilgum yem be os valir gitangi Pomate.  
\v 22 Bemem galkik gisov ebe Ei ate Natu gimat vunu ane ok ge, beti ande yem mohlang weik Pomate ane nune-nggen veik ninggas yem vie-ngge tis aplongg aim sang vie-ngge be yaun ma ge unde unambweg nindeb Ei na ane.  
\v 23 Bemem unvarkei gwangne be aplongg aim nivin mateu ete warik ute gimungg mate ge ok be unemb aim ate dabin vie-ngge, velob gen ti ninme be nirwel yem aim aplongg-aim givin etok nikwai gen ebe usge ve un-gas ok. Be mateu ete yem ute-ute ok, ane amol kulkul ane ti ete ayeu ik. Amei algum kulkul ve anei mateu nok gitangi amolmol tepwengge ebe imbweg nangge nalk ok.   
\s1 Pol geb amolmol bui ane nangge Kolosi ru  
\p
\v 24 Be galkik etenik Kilisi ane vavavne ebe gigas ok, dani ete giengk nik nangge. Be ayeu tangg vevie-ngge ve ganei nawel Kilisi be nanggas Ei ane vavavne dani etok tepwe. Kilisi utle ulis nok ete amolmol bui ane ok.  
\v 25 Pomate Ei ate geb ayeu ve yem amolmol bui ane aim amol kulkul ane. Be geb kulkul etok gitangi ayeu ve nanei ane mateu nitangi yem.  
\v 26 Warik gimungg ane yaun etenik givuaivun ate giengk aplo ge gitangi amolmol tepwengge, bemem galkik ande meng-gihlang taku gitip be Pomate ane amolmol-gen iute.  
\v 27 Pomate tang gitung ve ginei ane amolmol-gen inatpweng Ei ane yaun tis ane bogbogo vie molge ebe givuaivun ate ge ok are, love amolmol gitip ane ok inatpweng are nivin. Be yaun ebe givuaivun ate ge ok ete dangeteik: Kilisi givang givin yem beti atob yem un-gas Pomate ane bogbogo unvin.  
\v 28 Beti amei algum ve anei Kilisi ane yaun binge gitangi amolmol walang ok. Amei as bing be ambul dabas-gwet vevies walang ok gitangi amolmol walang ok veik an-gas eisir antangi Pomate na ande weik amolmol ebe ivarkei gwangne be ivang ivin Kilisi ok.  
\v 29 Beti ayeu gab tulkwangg vier be galgum kulkul bamo molge, be Kilisi ane gwangne ebe geb gitangi ayeu ok ete giro ayeu ta.   
\c 2  
\p
\v 1 Ayeu tangg givin ve ganei yem unatpweng kulkul bamo ebe ayeu galgum ve yem be tis amolmol Leodisia ane be tis amolmol tepwengge ebe ili ayeu nangg ite ok are kob.  
\v 2 Ayeu galgum kulkul bamo etok veik nalgum eisir aplos bwai bwaya be tas-nivin isate be invang invin isate vie-ngge be inatpweng dabas-gwet ebe ve inatpweng yaun ane dabe ar-kare ok are tepwengge. Veik inatpweng Pomate ane yaun ebe givuaivun ate giengk aplo ge ok are. Be yaun nok ete Kilisi Ei ate.  
\v 3 Dabas-gwet mateu ane be tis yaun bambamo ebe givuaivun ate ge ok ete gingik giengk Kilisi.   
\p
\v 4 Ayeu ganei yaun etenok gitangi yem, ve ayeu bwaingg ve ret amolmol subu inyo inyo yem be inei yaun bingkas-kasop ane subu be inpasang avos love vie molge nitangi yem.  
\v 5 Bingano, ayeu gavang aikawe gakwai yem bemem awangg ngalau givang givin yem geb ta-ngge. Be ayeu tangg vevie-ngge ve ebe gaute yem ulgum aim gen walang ok vie-ngge be tis ebe aplongg aim givin Kilisi gwangne molge ok ane.   
\s1 Tanes and luev walang ok tis Kilisi painge ge  
\p
\v 6 Yem ande unggas Kilisi weik ebe aim Amol Bamo ok gikwai, dangetok be unvang unvin aim ate be un-gas Ei ta painge ge.  
\v 7 Yem unvarkei gwangne unwei Kilisi weik ebe ei-wakas gitu gisov nalk aplo gile be geb nalk ta ok, be aplongg aim nivin mateu ete amei ambul yem ok gwangne ge. Be unei aim tangg-aim vie nitangi Pomate tis as-mate walang ok.   
\p
\v 8 Yem unemb aim ate dabin nangg-aim undi ge velob amol ti niyo aim be ninei yaun bingkas-kasop nitangi aim. Amolmol dang dang-etok ete itung tumbus-gen as tumbu be inei yaun bingkas-kasop ane subu ebe ginme nangge amolmol nalk ane ge as ok. Be yaun ete eisir inei inei ok ginme nangge Kilisi ane ite ma.  
\v 9 Ve Kilisi Ei weik ebe Pomate ok roro-ngge.  
\v 10 Be gisov ebe yem aplongg-aim givin Ei ok ane ge beti Ei geb gen walang ok gitangi yem. Be Ei dongke-ngge geb gwangne walang ok, vie be tiate tepwengge dabin gipil dongke.  
\v 11 Yem aplongg-aim givin Kilisi beti etok weik ebe ande iure yem utlangg-aim ulis ok, bemem iure yem utlangg aim ulis ve bais weik ete eisir Juda as luev ok ite ma. Bemem Kilisi geb yem ru be gigas yem ukwai gen tiate ane gwangne, beti etok weik ebe ande iure yem utlangg aim ulis ok.  
\v 12 Ve bui sanggu ebe es gireu yem ok ete gidgin yem ta ule usa Kilisi be etok weik ebe ispun yem givin nangge taku gimat ane uvin Kilisi ok. Be yem aplongg aim givin unei Pomate ges Kilisi itin vukuri nangge taku gimat ane bingano ge, beti gisov bui sanggu ebe es gireu yem ane ok ge ete weik ebe Pomate ges yem itin vukuri nangge taku gimat ane uvin Kilisi ok.  
\v 13 Warik gimungg ane yem unggas Pomate ane yaun ite nangge, be givin etok ete yem uvang aikwae ukwai amei Juda be uvang weik ebe amolmol gitip ane ok. Be aim gen tiate bambamo ebe ulgum ulgum ok gisak aim vun-kunu. Bemem galkik ande Pomate ges yem itin be umbweg matawangg-aim uvin Kilisi. Pomate ande gisin eitit and tiate bambamo ebe talgum talgum ok tepwengge gikwai.  
\v 14 Be giyati kapia ebe iro eitit and tiate bambamo ebe talgum talgum ok ane yaun gisov ok gikwai be gile ges tepwengge gireu ei-givsangin gile.  
\v 15 Be nangge ei-givsangin nok ete Pomate giyaing gwangne nalk etenik ane tepwengge gikwai, be gilgum eisir love weik ebe gen bwam-bwam ti ok nangge amolmol tepwengge nas.   
\p
\v 16-17 Dangetok be amol ti gitangi ebe nili yem tiate nisov gen ebe on be unum, me luev Sonda subu ane me Sonda aiweng gile tumi ane be tis Sonda Sabat ane ok ite ma. Gen bambamo etok, etok weik gen ano roro ebe asonge menihlang ok ane dalgo ge. Bemem Kilisi ge ete gen ano roro.  
\v 18 Ginei amol ti ve ninei yaun nipil gen ebe ei giengk mev be gili ok, be ninei ei gilgum ate love weik gen bwam-bwam ti be ginei uiye be ges miengk gitangi angela, okob undi velob unsov ei ane yaun ane lu. Ve amolmol dang dang-etok ete indang is ate sinsin-ge gipil dabas-gwet nalk ane ge,  
\v 19 be ili Kilisi weik as Amol Bamo be inggas ta giengk aplos ite ma. Kilisi weik eitit daband tulkwe, be eitit tepwengge tavang tasov Ei ane gwangne ane lu ge be Ei giro eitit ta be tavarkei gwangne gitangi ebe Pomate Ei ate ane tang givin ok.   
\s1 Tanmat vunu tanvin Kilisi ma, veik tanambweg matawand tanvin Ei  
\p
\v 20 Yem ande umat vunu uvin Kilisi beti Ei gigas yem ukwai nalk etenik ane gwangne. Be nam-nambed be yem os aim luev weik ebe amolmol nalk etenik ane ok? Be gimdom beti yem usov yaun bambamo eteik ane lu ge? Yaun eteik:  
\v 21 “Uli ve nomb,” me “Uli ve non,” me “Uli ve bagem nile nomb?”  
\v 22 Yaun dang dang-etok etok ginei yaun gipil gen ebe ve tanalgum ane kulkul bokti ma nikwai ok. Be yaun etok ginme nangge amolmol ge as.  
\v 23 Bingano, eisir induel is ate love weik ebe gen bwam bwam ti ok be inei uiye be es miengk gitangi angela, be amolmol ili be inei luev ete eisir ilgum ok vie molge. Bemem gen bambamo etok gitangi ebe ve niro eitit ta be tanambweg tanwei aplond muanggane ane gwangne ok ite ma.   
\c 3  
\p
\v 1 Pomate ges yem itin nangge taku gimat ane uvin Kilisi. Dangetok be unemb kulkul gwangne ge ve un-gas gen ebe giengk gulumb ok, nangge taku ebe Kilisi gibweg ve geb amolmol dabin nangge Pomate na ok.  
\v 2 Tangg-aim nitung nile gen ebe giengk taku eteok ok ge be tangg-aim nitung gen nalk etenik ane bwaya.  
\v 3 Ve yem umat vunu gikwai be dalgongg aim mata-was ane galkik ande gile ges ate susweng gireu Kilisi gibloblo Pomate.  
\v 4 Eitit tambweg matawand gisov Kilisi dongke-ngge, dangetok be asonge nivin ebe Ei ve ninumul ninme ok, okob atob eitit tande tanahlang taku gitip tanvin Ei be tan-gas ane bogbogo tanvin.   
\s1 Luev muanggane be tis luev vaku ane yaun  
\p
\v 5 Dangetok be unkari luev gen tiate nalk etenik ane ete tangg-aim gitung gitung giengk aplongg-aim ok nikwai. Ayeu ganei yem unkari luev gen dang dang-eteik ane nikwai: Luev wasi ane tis luev gen tiate ane, be luev ebe aplos giteng giteng ve inalgum gen ungglus ungglus ok tis luev ebe irwel amolmol as gen giriv be gira ok be tis luev kaleuk ane. (Kaleuk ane dabe gisov ebe inei uiye be es miengk gitangi pomate bingkas-kasop ane ok.)  
\v 6 Pomate atob nilgum ane ta vavis ane ano nipil amolmol ebe ivang mul ve luev gen dang dang-etok ane ok.  
\v 7 Warik mate ane yem ok uvang uvin amolmol ebe ilgum gen dang dang-etok ok, be ulgum gen bambamo etok love ma.   
\p
\v 8 Bemem galkik etenik yem undi be unkari luev gen dang dang-eteik ane nikwai: Luev tas vavis ane tis luev aplos tiate ane, be tis luev ebe inei amolmol susweng be inei yaun bum-bumue ok ane nikwai.  
\v 9 Be untau ete unei yaun bingkas-kasop gitangi amolmol ok. Ve ande yem ukari aim aplongg aim muanggane ebe warik ok tis ane gen tiate walang ok gikwai,  
\v 10 be ande mohlang weik ebe amolmol vaku vaku ane gikwai. Pomate Ei ate ete gilgum yem be mohlang weik amolmol vaku vukuri. Be as-mate walang ok Ei geb dabas-gwet vevies gitangi yem, be giro yem aplongg-aim vukir be mohlang weik ete Ei ate ok roro-ngge.  
\v 11 Beti galkik gisov luev vaku etok ane ge ete ande eitit tali amolmol subu tanei Grik be Juda me tanei eisir etenik ebe iure utlas ulis ok be eisir etok ebe iure utlas ulis ite ok ite ma. Me tanei etenok amolmol taku ti ane, me amolmol ebe emb kulkul sinsin-ge be inggas mone ite ok me amolmol ebe ivang as gen vie-ngge ok ite ma. Ma molge. Kilisi gilgum gen bambamo etok love ande meng-gihlang weik gen ano dongke-ngge, be Kilisi Ei ate givang gisov amolmol walang ok aplo tepwengge.   
\p
\v 12 Pomate geb yem ve ane amolmol-gen gikwai, be Ei gimsuli ane opom gen walang ok ane gitangi yem gikwai. Dangetok be yem un-gas luev dang dang-eteik ta gwangne ge: Tangg aim viti ve amolmol walang ok nitangi ge be unpasang eisir nangg aim undi. Yem undi aim ate weik gen sin-ge ti, be godongg aim malk-malk ge nitangi amolmol. Ginei amolmol ilgum gen tiate gitangi yem, yem unamdil be unalgum eisir tiate niwel bwaya.  
\v 13 Nangg-aim undi aim ate vie-ngge, be ginei amolmol subu ilgum gen tiate gitangi yem okob undi eisir tiate bwaya bemem tangg aim nivalngan eisir as tiate ete ilgum gitangi yem ok. Amol Bamo Ei tang-givalngan eitit and tiate ebe talgum ok, dangetok be yem ok unalgum weik etok ge.  
\v 14 Yem un-gas luev tas viti ane ta gwangne ge, ve luev etok ete vie molge be gidgin amolmol walang ta ipil dongke be ivang vie-ngge tis aplos dongke-ngge.  
\v 15 Kilisi geb ane yaun bwai bwaya gitangi eitit gikwai, dangetok be Ei ane yaun bwai bwaya etok nemb yem aplongg aim dabin ma. Pomate gital yem ve monahlang weik gen ano dongke weik Kilisi utle ulis, be un-gas Ei ane yaun bwai bwaya etok unvin. Be unei aim tangg aim vie nitangi Pomate painge ge.  
\v 16 Un-gas Kilisi ane yaun ta gwangne ge niengk aplongg-aim, be unbul be unes bing ve aim ate ve dabas-gwet gen vevies walang ok ane. Unei pesalem tis uiye mateu be uiye vevies subu ebe Ngalau geb gitangi aim ok, be unru tis tangg-aim vie-ngge nitangi Pomate nangge aplongg aim.  
\v 17 Be aim gen ret-ret ete ve unalgum me unei ok, yem unalgum gen bambamo etok ve Amol Bamo Yisu are ane ge. Be unei aim tangg aim vie nitangi Tamand Pomate ve Yisu are ane.   
\s1 Luev vaku nemb amolmol bui ane dabin  
\p
\v 18 Yem avie gaptol, unsov aim amol-gen as yaun ane lu ge ma. Ve luev etok ete Amol Bamo ta-givin.  
\v 19 Be yem amol gaptol, yem tangg-aim nivin aim avie-nggen ano-ngge be unalgum eisir be aplos tiate bwaya.   
\p
\v 20 Be yem nunus amol be nunus avie, yem unsov tamangg aim-gen tis tinangg aim-gen as yaun ane lu ge. Ve luev dang dang-etok ete Pomate gili vie molge.  
\v 21 Be yem nunus tamas-gen, yem unalgum natungg aim-gen be tas vavis bwaya velob inkari as aplos givin nikwai.   
\p
\v 22 Be yem amolmol ebe omb kulkul sinsin-ge be unggas mone ti ok. Yem unsov aim amolmol bambamo nalk etenik ane ebe emb aim dabin ok as yaun ane lu vie-ngge, be unalgum gen walang ete eisir inei yem unalgum ok. Be unalgum ve ebe amolmol indi yem vie ane ok ge ite, yem tangg-aim nitung Amol Bamo nivin be unalgum aim kulkul tis aplongg-aim dongke-ngge.  
\v 23 Be gen walang ete yem ve unalgum ok, yem unalgum vangg-aim pale-ngge be unalgum denang ebe omb amolmol nalk ane as kulkul ok ite ma. Yem unalgum weik ebe omb Amol Bamo ane kulkul ok.  
\v 24 Yem uli, bwayage kob atob Amol Bamo nemb gen vevies ge ebe Ei geb yapin ve nemb nitangi ane amolmol-gen ok nitangi yem, niwel aim kulkul ebe ulgum ulgum ok. Ve yem ulgum amolmol nalk ane as kulkul ite ma, yem ulgum aim Amol Bamo Kilisi ane kulkul.  
\v 25 Dangetok be amolmol ebe ilgum tiate ok ete atob in-gas vavavne ve as tiate ete ilgum ok ane, ve Pomate gili amol ti ginei vie molge gitlek amol ti ite ma. Ei gili amolmol tepwengge gitangi ate-ngge.   
\c 4  
\p
\v 1 Be yem amolmol ebe unggas amolmol subu ve aim amolmol kulkul ane ok, yem unpasang aim amolmol kulkul ane nangg-aim undi. Yem tangg-aim nitung dangeteik unei yem ok aim Amol Bamo ebe geb yem dabin ok, ete gibweg gulumb ok weik etok ge.   
\s1 Pol ges bing be ginei yaun kulkul ane gitangi amolmol  
\p
\v 2 Unemb luev miengk ane ta gwangne ge niengk aplongg-aim. Yem unes miengk ninggas ta-ngge be utlangg-aim bua bwaya. Unes miengk be tangg-aim nitung yaun ete ve unei nisov aim miengk aplo ok vevie-ngge be unei tis tangg-aim vie-ngge nitangi Pomate.  
\v 3 Be unes miengk nitangi Pomate ve amei ane nivin weik etok be unei: Pomate Ei ate ge atob nes ameimei luev ebe ve anei mateu nitangi amolmol ok. Be mateu nok, etok Kilisi ane yaun ebe givuaivun ate ge ok. Be gisov yaun etenik ane ge beti galkik ayeu gabweg nangge kapual-lu.  
\v 4 Dangetok be yem unes miengk ve ayeu ane nivin, veik nanei yaun ete givuaivun ate ok ano bupwe ge nitangi ete Pomate geb gitangi ayeu ok nitangi amolmol.   
\p
\v 5 Yem unvang unvin amolmol ebe ili Pomate weik gen sin-ge ok be unes aim luev nangg aim undi tis dabangg aim-gwet ge. Be unemb wayam ve aim ate bwaya.  
\v 6 Be aim yaun ete ve unei unei ok, yem aim yaun etok nipasang amolmol walang ok aplos be nilgum eisir tas vevias ge. Kob atob yem gitangi ebe ve unwel amolmol avos vevie ok.   
\s1 Pol avo ges ane amolmol-gen  
\p
\v 7-8 Ayeu atob nahlin eitit and nune Tikikas be nitangi yem nilek okob ninei amei lavo nitangi yem, ve wali amei ambweg dang-inend ge veik nilgum be yem aplongg aim vie. Be ninei tis awangg yaun lavo nitangi yem nivin. Tikikas nok ei amol vie ti ebe aplo givin Pomate be gilgum Amol Bamo ane kulkul givin ayeu ok.  
\v 9 Be Onesimus, yem ate aim amol ti be atob ei nivin Tikikas be gabu invang intangi yem indek okob atob gabu inei gen bambamo ete meng-gihlang nangge eteik ok lavo lavo nitangi yem. Onesimus nok, ei eitit and nunei vie ti ebe aplo givin Pomate ok.   
\p
\v 10 Aristakas, amol ebe eilu amei gabu ambweg kapual-lu avin amei ate ok avo ges yem. Be Banabas ane gwade Malaka, ok avo ges yem givin. (Ayeu gab Malaka nok ane yaun gimungg gitangi yem gilek gikwai, ve ganei ginei ei gilek gibielk ve yem, okob undi weik ebe ayeu gahlin ei gilek ok be un-gas ei vie-ngge nipil aim nam nile.)  
\v 11 Be Yisu, ebe ital are ti inei Jastas ok avo ges yem givin weik etok ge. Eisir etok ete ares gisov kapia nok ge nangge Juda ete emb ayeu ru be algum kulkul avin amei ate ve anei ebe Pomate atob nemb amolmol dabin ok ane yaun gitangi amolmol.  
\v 12 Be Epafras, yem ate aim amol ti ebe gilgum Kilisi Yisu ane kulkul ok, ei ok avo ges yem givin. As-mate walang ok ei ges miengk ve yem ane gigas ta-ngge veik Pomate niro yem ta be unvarkei gwangne weik ebe amol ok, be unatpweng Pomate ane ta-givin are.  
\v 13 Ayeu ate gatpweng ei are gikwai beti ve nanei ei ane yaun nitangi yem dangetok nanei: Ei gilgum kulkul bamo molge ve yem ane, be tis amolmol Leodisia ane be amolmol Hirapolis ane givin weik etok ge.  
\v 14 Be Lukas, eitit and amol marasin ane (dokta) ebe tand givin ei ok gabu Dimas, sulu avos ges yem.   
\p
\v 15 Yem unei nitangi amolmol bui ane nangge Leodisia unei ayeu avongg ges eisir. Be unei ve Nimpa be tis amolmol ebe iro is ate sut isov ei ane nam ile ok unei ayeu avongg ges eisir givin.  
\v 16 Yem undi kapia etenik nikwai kob unemb nitangi amolmol bui ane nangge Leodisia ane nile. Be kapia ti ebe warik ayeu gab gitangi amolmol bui ane nangge Leodisia ane gile ok, yem undi (unav-nawi) kapia etok nivin.  
\v 17 Yem unei nitangi Akipas be unei; “Mie nomb kulkul ete Amol Bamo geb gitangi mie nok dabin nam nuli. Be nulgum kulkul nok vam-pale ge.”   
\p
\v 18 Ayeu Pol garo yaun avongg ges yem ane etenik ve au-ate baingg. Tangg aim nitung ayeu ebe gabweg nangge kapual-lu ok nivin. Pomate ane yaun bwai bwaya atob nilek nivang nivin yem tepwengge.