\id 2TH - Iwal NT [kbm] -Papua New Guinea 1984 (web version -2013 bd) 
\h 2 TESALONAIKA 
\toc1 Pol ane kapia ailu (2) ane gitangi Tesalonaika 
\toc2 2 Tesalonaika 
\toc3 2Te 
\mt1 Pol ane kapia mul ane gitangi amolmol Tesalonaika ane  
\c 1  
\p
\v 1 Ayeu Pol, eilu Silivanus be Timoti, eitol aro kapia etenik gitangi Pomate gabu Amol Bamo Yisu Kilisi as amolmol-gen yem ete umbweg nangge Tesalonaika nok.  
\v 2 Ayeu tang-givin ganei Tamand Pomate gabu Amol Bamo Yisu Kilisi atob inemb as tas viti be tis as yaun bwaibwaya nilek nivang nivin yem.   
\s1 Pol ginei ane ta vie gitangi Pomate  
\p
\v 3 Angg nune-nggen, amei anei amei tangg-amei vie gitangi Pomate tis as mate walang ok ve yem ane gigas ta-ngge. Ve gisov yem aim aplongg-aim givin be tis aim tangg-aim givin aim ate ane ebe ande meng-gihlang bamo-ngge ok ane.  
\v 4 Be amei tangg-amei vevie ve yem ane be anei yem aim yaun gitangi Pomate ane amolmol-gen subu ebe imbweg nangge nam dabe subu ok be anei, yem aplongg-aim givin Pomate gwangne molge be uro aim ate ta be unggas gen bunam tis vavavne walang ano.   
\p
\v 5 Be yaun etenik ginei lavo gitangi eitit ginei Pomate ane luev ebe gilgum amolmol as yaun be gipas-pasang ok vie be roro dongke. Be gen bunam bambamo ete yem uro aim ate ta be unggas ve gisov Pomate ane kulkul ane ok, ete gilgum yem be gitangi ebe atob unambweg unvin Ei ate nangge ane taku ok.  
\v 6 Be Pomate Ei gitangi ginei atob nilgum ane gen walang ok vie-ngge. Ei atob nemb vavavne nitangi amolmol ebe warik emb vavavne gitangi yem ok.   
\s1 Pomate ane luev ebe gilgum amolmol and yaun ok vei be roro dongke  
\p
\v 7 Be nivin ebe eitit and Amol Bamo ve ninumul nangge gulumb ninme tis ane angela vevies ok, okob atob ei nihlu gen bunam bambamo etok ponge nikwai eitit tepwengge.  
\v 8 Be ei atob ninumul ninme tis yev aivi be nemb vavavne nitangi amolmol ebe ivkir dumas gitangi Pomate be bwais ve ret insov eitit and Amol Bamo Yisu ane yaun ane lu ok, nivin sawa etok.  
\v 9 Be vavavne ete atob eisir in-gas ok dang-eteik; Eisir atob inambweg aikawe-ngge inkwai Pomate ane bogbogo tis ane gwangne be ane taku vie. Be atob in-gas vavavne dangetok painge love inmat vunu sin-ge.  
\v 10 Nivin ebe Kilisi ve ninumul ninme nalk ok, okob atob ei nemb vavavne nitangi eisir etok. Be sawa etok ete atob yem ate be tis Pomate ane amolmol tepwengge atob avongg-aim nivwat ei are. Be amolmol ebe aplos givin Pomate ok be tis yem ate ok atob tangg-aim vevie anongge. Ve gisov amei ambul Pomate ane mateu gitangi yem. be yem aplongg-aim givin mateu etok ano anongge.   
\p
\v 11 Beti amei as miengk gitangi Pomate ve yem ane gigas ta-ngge. Amei as miengk gitangi Pomate be autani ei ve nilgum yem love unvang mul ve Ei ate ane tang-givin ebe tang-givin yem be gital aim ok ge. Be ayeu tang-givin ganei Pomate ane gwangne atob nilgum gen vevies ebe yem tangg-aim gitung ok, be tis aim kulkul ebe ulgum ve aplongg-aim givin Pomate ane ok tepwengge be ano nile.  
\v 12 Dangetok be avongg-aim nivwat eitit and Amol Bamo Yisu Kilisi are, kob atob ei ok avo nivwat yem arengg-aim weik etok ge. Pomate gitangi atob nilgum gen dangetok ve gabu Natu Yisu Kilisi as tas viti ane.   
\c 2  
\s1 Yaun gipil Sadam  
\p
\v 1 Angg nune-nggen. Ayeu ve nanei yaun nipil eitit and Amol Bamo Yisu Kilisi ebe atob ninumul ninme be niro eitit tepwengge sut tande tanpil dongke tanvin ei ate ok, beti gas bing be ganei yaun garwel nangg ge gitangi yem.  
\v 2-3 Veik ginei amolmol subu inme be ve inei yaun ret ret nitangi yem, okob undi velob aplongg-aim nivin eisir as yaun. Ve eisir etok atob inme be inei nitangi yem be inei, Amol Bamo ande ginme gikwai. Me atob amol ti nimdil be ninei yaun etok sin-gege gitangi ebe ei ate tang-gitung, me atob inei dangetok inei ayeu garo yaun etok gisov kapia. Dangetok, be ginei yem ute yaun avo dang dang-etok, okob undi ve unkur-kuri be tangg-aim nitung walang walang. Be undi ge velob amolmol bingkasop ane inme be inyo inyo aim. Ve sawa etok atob menihlang ite love amolmol bon ge bwais ve Pomate be inavkir dumas nitangi ei, be amol ebe gisov yaun ane lu ite ok, menihlang taku gitip bamo yapin kob. Be amol nok atob nimbweg ite ma. Atob Pomate niyaing ei nikwai.  
\v 4 Amol nok atob nes valir nitangi gen walang ebe amolmol ili inei pomate be inei uiye be es miengk gitangi ok, be atob nindang ate be nes ate ru nitangi amolmol nivin nangge Pomate ane lum yamar aplo be ninei, “Ayeu ate eteik ete Pomate.”   
\p
\v 5 Yem wat nolge tangg-aim givalngan yaun bambamo ebe warik ayeu gavang givin yem be ganei gitangi aim ok me?  
\v 6 Yem uli, Pomate givarkei amol tiate ane nok ane luev gili ve ginei menihlang seukie bwaya love sawa ebe Pomate ei ate tang-gitung be geb ok menihlang okob atob ei menihlang.  
\v 7 Be amol nok ane gwangne ebe ges valir gitangi Pomate ane luev ok, ete geb ane kulkul givang nik, bemem ei givang gimumu ate ge. Be atob nivang nimumu ate ge dangetok love amol ebe givarkei ei ane luev avwut ok nikwai kob.  
\v 8 Okob atob ei menihlang, be atob Amol Bamo Yisu nes ei vunu ve ane avo ukwas be tis ane bogbogo nivin ebe ve ninumul ninme nalk ok.  
\v 9 Amol tiate nok atob menihlang tis ane gwangne ge be atob nilgum gen bingkasop ane bambamo subu be tis gen bwalbwale subu nivin.  
\v 10 Be atob nilgum ve niyo niyo amolmol ebe asonge inmat vunu mang-mangi ok ve ane luev gen tiate ane bambamo etok. Ginei eisir etok tas nivin Pomate ane yaun ano-ngge, atob Pomate nemb eisir ru, bemem eisir bwais beti Pomate gitangi ebe atob nemb eisir ru ok ite ma.  
\v 11 Beti Pomate atob nihlin yaun bingkas-kasop ane amol ebe ve niyo niyo eisir ok be nitangi eisir nile. Kob atob eisir inaute amol nok ane yaun bingkasop etok be insov ane lu-ngge.   
\p
\v 12 Dangetok be amolmol ebe ivkir dumas gitangi yaun ano be tas givin anongge ve invang mul ve luev gen tiate ane ok, atob in-gas vavavne nangge Pomate ane.   
\s1 Pomate tang-givin ve ginei eitit tanambweg matawand beti geb eitit ru  
\p
\v 13 Angg nune-nggen, amei algum ve as miengk ve yem ane tis as mate walang ok. Ve gisov Pomate ane tang-givin yem gimungg, be geb yem ve ginei unambweg matawangg-aim be Ngalau Yamar ane gwangne gilgum yem be mohlang ve Pomate ane amolmol-gen ebe aplongg-aim givin Pomate ane yaun ano ok.  
\v 14 Pomate gital yem ve mateu ebe amei ambul gitangi yem ok ane, veik un-gas Yisu Kilisi ane bogbogo.  
\v 15 Angg nune-nggen, dangetok be unvarkei gwangne ge be unpasang mateu ete amei anei ve avongg-amei be tis ebe aro gisov kapia gitangi yem ok vevie-ngge niengk aplongg-aim.   
\p
\v 16 Ayeu tangg givin ve ganei eitit and Amol Bamo Yisu Kilisi be tis Tamand Pomate, ebe tas givin eitit ok, be tis ane ta viti ebe gilgum be eitit tavang vie-ngge geb ta-ngge, atob niro eitit ta tanvarkei gwangne ge be tanasge Pomate.  
\v 17 Ei atob niro eitit ta be nemb eitit ru be tanalgum and kulkul be tanes and luev be and yaun walang ok vie-ngge.   
\c 3  
\s1 Yem unes miengk nitangi Pomate ve amei ane nivin  
\p
\v 1 Angg nune-nggen, ayeu ve nanei yaun ti nitangi yem. Yem unes miengk nitangi Pomate ve amei anei nivin veik Pomate ane mateu nituvki nemb taku walang ok avwut. Veik amolmol avos nivwat mateu nivin dangete warik yem ulgum ok.  
\v 2 Be unes miengk nitangi Pomate nivin veik ei nitin amolmol tiate ane be invang aikawe inkwai amei. Ve gisov amolmol tepwengge aplos givin mateu ite ma.   
\p
\v 3 Bemem Amol Bamo, ei amol ebe gilgum gen walang etenik gitangi ge ok, be ei gitangi atob niro yem ta be Sadam ane gen tiate walang ok ti gitangi ebe atob niyaing yem ok ite ma.  
\v 4 Amei aplongg-amei givin Pomate be tangg-amei givin anongge ve anei yem unalgum gen walang ete amei ane gitangi yem ok ano nile, be atpweng are anei atob yem unalgum dangetok nemb ta-ngge.  
\v 5 Ayeu tang-givin ganei eitit and Tivie Pomate atob nilgum yem be unatpweng are unei ei ane tang-givin eitit anongge. Dangetok be ei gitangi atob niro yem ta be un-gas bunam weik ete Yisu ok.   
\s1 Amolmol tepwengge inamdil be inalgum kulkul  
\p
\v 6-7 Angg nune-nggen, amei as bing be anei yaun gwangne gitangi ve eitit and Amol Bamo Yisu Kilisi ane gwangne ane be anei: Yem unvang aikawe unkwai amolmol ebe emb wayam ve is ate be bwais ve ret invang mul ve yaun ete amei amb gitangi is ok. Yem ate utpweng etok are gikwai, ve warik amei avang avin yem ge, be givin etok amei amb wayam ve amei ate be ambweg sinsin-ge ite ma. Dangetok be yem ok uvang mul ve luev dongke ete amei avang ok weik etok ge.  
\v 8 Amei tangg-amei gisgil ebe an amol ti ane ben sin-gege ok, amei avgo ben kob an. Be algum kulkul bamo molge tis as be tambok walang ok, ve amei bwaingg-amei ve ret anemb bunam nitangi yem.  
\v 9 Amei gitangi ebe atob anei be yem unemb ben nitangi amei ok. Bemem amei bwaingg-amei ve ret analgum gen dangetok, be amei algum etok veik yem undi be uvang mul ve ameimei luev.   
\p
\v 10 Warik amei avang avin yem ge be anei yaun ti gitangi yem dang-eteik; Amol ti ginei geb kulkul ite, atob ei nen ben ite ma.   
\p
\v 11 Amei anei yaun etok gitangi yem ve gisov amei aute binge dangetok inei amolmol subu ebe yem tepwe uvang uvin aim ate ok, wayam tinas tiate avo be ilgum ve iro amolmol as kulkul walang ok vuk-vukir.  
\v 12 Beti amei ve anes bing nitangi eisir nok ve Amol Bamo Yisu Kilisi ane gwangne ane, be ve anei nitangi eisir nok anei; Eisir inambweg ta subu be inemb kulkul ve is ate ane veik inen as kulkul etok ane ano.   
\p
\v 13 Bemem angg nune-nggen, yem utlangg-aim bua ve kulkul vevies ete ulgum ulgum ok ane bwaya.  
\v 14 Be ginei amol ti gisov yaun ete amei aro gisov kapia nik ane lu ite, okob yem kakie unvin ei bwaya. Okob atob ei maimae ve ane luev tiate ete gilgum gilgum ok ane.  
\v 15 Bemem yem undi ei be utlangg-aim nipelk ve ei bwaya, yem undi ei weik aim male ti be unemb bing bwaibwaya nitangi ei.   
\s1 Pol ges ane yaun vunu  
\p
\v 16 Ayeu tang-givin ganei Tivie ei ate ei Amol bwaibwaya ane be atob nemb ane yaun bwaibwaya nilek nivang nivin yem tis as mate walang ok. Pomate atob nivang nivin yem tepwengge.   
\p
\v 17 Ayeu Pol au-ate baingg garo angg yaun avongg ges yem ane etenik. Ayeu garo angg kapia walang ok gavang mul ve luev dongke etenik ge.  
\v 18 Ayeu tangg givin ganei Amol Bamo Yisu Kilisi atob nemb ane yaun bwaibwaya nilek nivang nivin yem tepwengge.