\id 2CO - Iwal NT [kbm] -Papua New Guinea 1984 (web version -2013 bd) 
\h 2 KORINT 
\toc1 Pol ane kapia ailu (2) ane gitangi Korint 
\toc2 2 Korint 
\toc3 2Ko 
\mt1 Pol ane kapia bulwer ailu (2) ane gitangi amolmol bui ane nangge Korint  
\c 1  
\p
\v 1 Kilisi Yisu ane aposel ayeu Pol, ebe Pomate ta gitung be geb ok, be tis eitit and nune Timoti, eilu aro kapia etenik gitangi yem amolmol bui ane nangge Korint, be tis amolmol tepwengge ebe imbweg Akaia as taku ok.   
\p
\v 2 Tamand Pomate gabu eitit and Amol Bamo Yisu Kilisi atob inemb as tas viti be tis as yaun bwai bwaya nitangi yem.   
\s1 Pol ginei ane ta-vie gitangi Pomate  
\p
\v 3 Eitit avond nivwat and Amol Bamo Yisu Kilisi Tame Pomate are. Ve eitit Tamand bamo Ei, be tas viti be tis yaun bwai bwaya ane dabe giengk Ei.  
\v 4 Ei geb eitit ru givin ebe tanggas gen bunam walang ano ok, love ande eitit ate gitangi ebe ve tanemb amolmol subu ebe ivang tis bunam ge ok ru weik etok ge ve gwangne ebe tanggas nangge Pomate ok.  
\v 5 Amei anggas bunam walang ano weik ete Kilisi gigas ok. Bemem Pomate geb amei ru vie-ngge weik ete geb Kilisi ru ok.  
\v 6 Ginei amei anggas vavavne, okob amei mei vavavne etok atob nemb yem ru be unambweg vie-ngge. Be ginei Pomate nemb amei ru, okob atob ei nemb yem ru weik etok ge, be nemb gwangne nitangi yem nivin veik unro aim ate ta be un-gas vavavne weik ete amei ok tis aplongg aim dongke-ngge.  
\v 7 Amei ali yem gitangi ebe atob unro aim ate ta be unvarkei gwangne ok. Be atpweng etok are givin ve yem unggas vavavne uvin amei, beti atob Pomate nemb yem ru dangete geb amei ru ok nivin weik etok ge.   
\p
\v 8 Angg nune-nggen; Amei tangg amei givin ve anei gen bunam bambamo ebe amei anggas nangge Akaia as taku ok ane yaun nitangi yem be unaute kob: Amei anggas vavavne bamo molge gitlek be gilgum amei tiate molge love kasopge be anmat vunu.  
\v 9 Bingano, amei ali anei atob anmat vunu bingano ge. Amei anggas vavavne dangetok veik tangg amei niluni amei ate ite ma. Tangg amei niluni Pomate ane gwangne ebe ges ges amolmol it-kitin vukuri nangge taku gimat ane ok dongke-ngge.  
\v 10 Ei geb amei ru be gitin gen bunam bambamo etok gikwai amei, beti atob nemb amei ru nindeb mul ane ok nivin weik etok ge. Amei tangg amei giluni Ei dongke-ngge, ebe atob nemb amei ru painge-ngge ok.  
\v 11 Be yem ok unemb amei ru be unes miengk ve amei ane nivin weik etok ge, veik Pomate niute amolmol bon ge as miengk be nilgum ano nile ve nemb amei ru. Kob atob amolmol anongge indi gen vie ebe Pomate gilgum gitangi amei ok, be atob inemb avos ponge be inei as tas-vie nitangi Pomate.   
\s1 Gen ebe gilgum beti Pol ta gitung ve atob ninumul nile Korint vukuri bwaya ok  
\p
\v 12 Amei tangg amei vevie ane dabe dangeteik; Nangge amei aplongg amei, amei atpweng are roro-ngge anei amei avang avin yem nangge nalk etenik be as amei luev vie-ngge tis aplongg amei dongke-ngge weik ebe Pomate ane amolmol-gen ok. Amei avang asov amolmol as yaun ane lu ite ma! Amei avang asov Pomate dongke-ngge ane yaun bwai bwaya ane gwangne ane lu.  
\v 13 Amei aro yaun ebe gitangi ve yem ate unav-nauwi (unsam) be unatpweng are ok ge gitangi yem, be aro yaun ti ebe bunam molge ok givin ite. Ayeu gali ganei atob yem unatpweng yaun etok tepwengge are.  
\v 14 Be warik ok weik etok ge, yem utpweng amei mei kulkul are vevie ite nangge. Ve gen siti ebe yem utpweng are ok ete dangeteik; Yem gitangi ebe atob tangg aim vevie ve amei ane ok, dangete asonge amei tangg amei vevie ve yem ane nivin ebe eitit and Amol Bamo Yisu ve ninumul ninme ok.   
\p
\v 15 Ayeu gali gen bambamo ete yem tangg aim gitung ok gikwai, beti warik ayeu ganei nalek nali yem nimungg.  
\v 16 Ayeu tangg gitung ve nalek nali yem nimungg bekob namdil nale Masedonia as taku. Bekob nangge Masedonia be nanumul nambe yem ane nalek vukuri, veik yem unemb ayeu ru be nale Judaia as taku.  
\v 17 Dangetok beti givin ebe ayeu tangg gitung ve atob nas angg luev dangetok ok, ayeu tangg gitung yaun sinsin-ge me ganei yaun ailu gipil dongke weik ebe amolmol ok be ganei “Ece” be “Ma” gipil dongke ite ma yapin.  
\v 18 Pomate Ei Amol yaun ano ane be ei gitpweng are ginei ayeu ganei angg yaun be ganei “Ece,” me “Ma,” gipil dongke ite ma molge.  
\v 19 Ve Pomate Natu Yisu Kilisi ebe eilu Silvanus be Timoti, anei Ei ane yaun gitangi yem ok, Ei ginini ebe ginei yaun be ginei “Ece” be “Ma” gipil dongke ok. Kilisi etok Pomate ane yaun ano.  
\v 20 Ve Ei Amol etok ebe ginei “Ece,” gitangi Pomate ane yaun bambamo ebe gibiti ok. Beti eitit avond givwat Pomate ane bogbogo be tanei, “Bingano,” ve Yisu Kilisi are ane.  
\v 21 Pomate Ei ate ge ete giro eitit ta be tavang tavin Kilisi, be ei geb kulkul aposel ane gitangi amei.  
\v 22 Ei geb eitit be metahlang ve ane amolmol-gen gikwai be geb ane Ngalau Yamar gitangi eitit, veik nes ru ve atob eitit tan-gas gen ebe Ei gipasang yapin ve nemb nitangi eitit ok nindeb mul ane.   
\p
\v 23 Pomate gitpweng awangg tangg gitung are, dangetok be kob Ei ate ge ninei lavo nitangi yem, be ayeu bwaingg ve ret namb bunam nitangi yem beti ayeu tangg gitung ve ganei atob natangi yem nalek vukuri bwaya.  
\v 24 Dangeteik; Amei bwaingg amei ve avongg amei nirau yem be anei, “APLONGG AIM IVIN POMATE.” Amei bwaingg amei ve ret analgum gen dangetok. Ve amei ali gikwai anei yem ande aplongg aim givin gwangne molge. Bemem amei algum ve anambweg anvin yem be analgum kulkul, veik analgum be yem tangg aim vevie ninggas ta-ngge.   
\c 2  
\p
\v 1 Beti ayeu tangg gitung giengk aplongg ge ve ganei atob nanumul natangi yem nalek vukuri bwaya, velob nalgum yem be aplongg aim bunam.  
\v 2 Ve ginei ayeu nalek be nalgum be yem aplongg aim bunam, okob atob amolmol ma ebe ve inalgum ayeu be tangg-vevie ok, ve dang yem ge ete ulgum be ayeu tangg-vevie.  
\v 3 Beti ayeu garo kapia etenok gitangi yem gilek. Ve ayeu bwaingg ginei natangi yem nalek be unalgum ayeu be aplongg bunam, ve yem ge ete ulgum be ayeu tangg-vevie. Ayeu gali, gen dangetok ete galkik giengk; Ginei ayeu tangg-vevie ve gen ti ane, okob yem tepwengge ok atob tangg aim vevie ve gen etok ane nivin weik etok ge.  
\v 4 Bingano, ayeu garo kapia etenok gitangi yem be aplongg bunam anongge, be garo tis matanongg rulu-ngge. Be kapia etenok ebe ve nilgum yem be aplongg aim bunam ok ite ma. Bemem ayeu galgum veik yem unatpweng are unei ayeu tangg givin yem tepwengge gitlek molge.   
\s1 Tand nivalngan gen tiate ebe amolmol ilgum ok  
\p
\v 5 Amol ti ginei gilgum gen tiate ti, okob ei gilgum ayeu be aplongg bunam ite ma, ei gilgum yem aim amolmol subu be aplos bunam. Ayeu ganei ei gilgum yem tepwengge be aplongg aim bunam ite ma, ayeu bwaingg ve ret namb vavavne bamo molge nitangi ei, beti ayeu ganei, yem aim amolmol subu ge.  
\v 6 Ve nolge amolmol anongge emb vavavne gitangi ei gikwai be etok gitangi.  
\v 7 Dangetok be yem undi be tangg aim ivalngan ei ane tiate ete gilgum ok, be unemb bing bwai bwaya itangi ei veik aplo bunam molge bwaya. Be nivkir dume nitangi yem bwaya.  
\v 8 Ayeu tangg givin ganei yem unes aim tangg aim givin ei ru nitangi ei ate, veik nitpweng are ninei yem tangg aim givin ei gitlek molge.  
\v 9 Be kapia ete warik ayeu garo gitangi yem gilek nok ane dabe dangeteik; Ayeu galgum ve ganei nali, nanei yem usov awangg yaun walang ok ane lu ge me ma?  
\v 10 Ginei yem tangg aim nivalngan amol ti ane tiate ebe gilgum ok, okob ayeu ok atob tangg nivalngan nivin weik etok ge. Bingano, ginei gen tiate ti giengk gitangi ebe ve ayeu tangg nivalngan ok, okob atob ayeu tangg nivalngan gen tiate etok navarkei Kilisi na be wat tangg nitung vukuri ite, veik namb yem ru.  
\v 11 Velob Sadam niyo eitit be ninggas it tande tansov ane gen tiate aplo. Bingano, eitit tatpweng ei ane luev are gikwai.   
\s1 Pol gibweg Troas tis aplo bunam ge  
\p
\v 12 Givin ebe ayeu gabielk Troas ve nanei Kilisi ane Binge vie vusa nitangi amolmol nangge etok ok, be gali ganei Amol Bamo ande gipasang awangg luev ebe ve nalgum kulkul nangge etok ok yapin.  
\v 13 Bemem ayeu aplongg bunam molge be tangg gitung walang ano ve gali angg nune Timoti na ite. Beti ayeu gab (gasavi) amolmol Troas ane bais be mang mangi gale Masedonia as taku.   
\s1 Pomate giro eisir aposel ta be imbweg iwei gen bunam  
\p
\v 14 Bemem ayeu ganei angg tangg-vie gitangi Pomate, ve gisov as mate walang ok ei giro amei ta ve Kilisi ane gwangne beti amei ambweg awei gen bunam walang ok. Ei geb amei ve anei Kilisi ane Binge nemb taku walang ok avut weik gen ukwas vie molge ti ebe ginum taku pal-palali ok.  
\v 15 Ve Pomate gili amei weik Kilisi ane gen ukwas vie ti ebe avang asov amolmol ebe isov Pomate ane yaun ane lu, be tis eisir ebe ivkir dumas gitangi Pomate ok aplo ok.  
\v 16 Amolmol ebe ivkir dumas gitangi Pomate ok, ete inur gen ukwas etok be ili inei gen uve ti ebe ve nes is vunu ok. Bemem amolmol tavlu ebe Pomate geb is ru ok, ete inur gen ukwas etok be ili inei gen vie ti ebe ve nilgum eisir be inambweg matawas ok. Amol ret gitangi ebe atob nilgum kulkul dangetok ok?  
\v 17 Amei weik amolmol subu subu ebe ivang emb taku avut be iro Pomate kulkul vukir ve as kulkul mone ane ok ite. Pomate gihlin amei, beti amei algum kulkul etok tis aplongg amei dongke ge weik Kilisi ane amolmol kulkul ane avang Pomate na ge.   
\c 3  
\s1 Pomate ane yaun ebe gibiti vukuri ok, ane amolmol kulkul ane  
\p
\v 1 Amei weik amolmol subu ebe indang is ate be tas givin ve amolmol subu inro eisir as yaun lavo nitangi yem, me yem unro eisir as yaun lavo nitangi amolmol veik indi be avos nivwat eisir ares ok ite ma. Amei algum gen ve andang amei ate weik ete eisir ilgum ok ite.  
\v 2 Amei mei kapia ebe ve amolmol indi be avos nivwat amei arengg amei ok, ete yem ate. Be yaun ebe giengk kapia etok ok, ete amei aro bwal-bwale giengk aplongg amei. Amolmol tepwengge itpweng kapia nok are gikwai be isam.  
\v 3 Yem weik kapia ti ebe Kilisi giro ok, be kapia nok ane kulkul ete amei algum ok. Be Ei giro kapia nok ve kilipi ite ma, Ei giro ve Pomate matawe ane, ane Ngalau. Be giro gipil vat me gen ret ite, giro bwal-bwale giengk amolmol aplos.   
\p
\v 4 Amei aplongg amei givin Pomate ve gisov Kilisi ane ge, be anei yaun etenik.  
\v 5 Amei gitangi ebe ve andang amei ate ve kulkul etenik ane ok ite, ve amei atpweng are anei amei gitangi gen ti ite. Be etok Pomate ei ate ge ete giro amei ta be algum kulkul etenik.  
\v 6 Be ei ate ge ete giro amei ta be mahlang weik yaun vaku ebe ei gibiti ok ane amolmol kulkul ane. Be yaun vaku etok, ane dabe giengk yaun ebe iro bwal-bwale ok ite ma. Ane dabe gisov Ngalau. Ve gisov yaun ete iro bwal-bwale ok ges amolmol vunkunu, bemem Ngalau ei gilgum amolmol be imbweg matawas.   
\p
\v 7 Yaun ebe Pomate giro bwal-bwale gipil vat be geb gitangi Mose ok, yaun etok meng-gihlang tis Pomate ane bogbogo ge be giro Mose na love ringenk molge be amolmol Israel ane gitangi ebe ve indi ei na ok ite. Bemem gen bogbogo tis ringenk etok ande ma gikwai. Dangetok be ginei Mose ane yaun ebe gilgum amolmol be imat vunkunu ok meng-gihlang tis ane bogbogo be ringenk dangetok,  
\v 8 okob Ngalau ane bogbogo ane ringenk, atob nitlek molge.  
\v 9 Mose ane yaun ebe ve nes amolmol vunu ok ginmei gihlang tis ane bogbogo ge, bemem Ngalau ebe gilgum amolmol be imbweg matawas ok, ginme gihlang be ane bogbogo gitlek molge.  
\v 10 Dangetok be atob tanei dangetok tanei, Mose ane yaun ebe warik ginme gihlang tis ane bogbogo ge ok ande ma gikwai. Ve gisov kulkul Ngalau ane meng-gihlang, be ane bogbogo gitlek molge.  
\v 11 Bingano. Ve ginei kulkul ete veve ma nikwai ok ginme gihlangg tis ane bogbogo ge, okob kulkul ebe atob niengk dangetok painge ge ok, ginme gihlang tis ane bogbogo weik etok ge, be ane bogbogo nok gitlek molge ve gile.   
\p
\v 12 Amei aplongg amei givin be asge yaun gen ebe atob menihlang be niengk dangetok painge ge ok, beti avang tis aplongg amei dongke ge be apelk ite. Be anei yaun giengk gitip gitip ge.  
\v 13 Amei weik ete Mose ok ite ma. Mose gisum na ve babal den veik amolmol Israel ane indi gen bogbogo ebe ve ma nikwai, ete giengk ei na ok bwaya.  
\v 14 Be eisir aplos dadani molge tis ebe warik be giengk painge love galkik as mate etenik ok givin weik etok ge. As mate walang ok eisir ivnauwi (isam) Mose ane yaun bemem itpweng are siti ite molge, ve ginei eisir aplos nivin Kilisi kob atob inatpweng yaun are.  
\v 15 Bingano, as mate walang ok eisir ivnauwi Mose ane yaun bemem itpweng are ite painge love galkik as mate etenik ok givin weik etok ge.  
\v 16 Bemem ginei eisir inro is ate vukir intangi Amol Bamo inde, okob gitangi ebe atob inatpweng yaun arkare ok.  
\v 17 Amol Bamo Ei Ngalau, dangetok be ginei Amol Bamo ane Ngalau nivang nivin amol ti, atob amol etok nivang ane gen vie-ngge.  
\v 18 Be eitit tepwengge tanggas Amol Bamo ane bogbogo bemem tasum nand ve gen ti weik ebe kambam den ok ite. Eitit weik bui tal ane (galas) ebe tali tali nand gisov ok, ve Amol Bamo ane bogbogo giro gipil eitit be ane aivi giro amolmol. Be bogbogo ete eitit tanggas ok, etok bamo molge gitlek. Be bogbogo nok ge ete giro eitit vukir be metahlang weik ete Amol Bamo ei ate ok roro-ngge. Amol Bamo ei Ngalau beti gilgum gen dangetok.   
\c 4  
\s1 Pomate geb ane gen vevies gisov gen muai muai eitit amolmol aplond  
\p
\v 1 Pomate ta viti ve amei beti geb kulkul etok gitangi amei, beti amei utlangg amei bua ite.  
\v 2 Amei ande avkir dumangg amei gitangi gen ebe givuai-vun ate, ebe gilgum be mai mayand ok gikwai. Be avang mul ve luev bingkasop ane me aro Pomate ane yaun vukir ite ma. Amei avang mul ve luev yaun ano ane ge, be anei yaun giengk gitip gitip ge gitangi amolmol tepwengge nangge Pomate na, veik eisir inaute be inatpweng amei mei kulkul are.  
\v 3 Bingano, mateu ete amei anei anei ok, ginei givuai-vun ate, okob ei givuai-vun ate gitangi amolmol ebe ivkir dumas gitangi Pomate ok.  
\v 4 Eisir aplos givin Pomate ite, ve gisov amol tiate nalk etenik ane givarkei eisir as luev avut. Ei ginei bua ve ret Binge vie ete amei anei ok, ane bogbogo niro eisir beti gigil-gili eisir. Amol tiate nok gilgum eisir love nolge aplos tumtumi weik ebe aiweng tumi ok. Be Binge vie ete amei anei ok, ebe ginei Kilisi ebe weik Pomate roro ge ane bogbogo lavo ok.  
\v 5 Be mateu ete amei anei anei nik, etok amei ate amei yaun ite ma. Amei anei mateu be anei “Kilisi Yisu ei eitit and Amol Bamo, be amei asov ei ane yaun ane lu ge be algum kulkul ve yem ane.”  
\v 6 Ve warik Pomate ginei yaun ti dangeteik;  
\q1 “Atob yev niro taku ebe aiweng tumi ok be bogbogo.”  
\m Beti Pomate ebe ginei yaun etok ok ge, ete geb ane bogbogo ginmei giro amei aplongg amei. Be bogbogo nok dangeteik; Amei ande atpweng Pomate ane bogbogo ebe giengk Kilisi na ok are gikwai.   
\p
\v 7 Bemem amei weik ebe ul nalk ok, be Pomate gitak ane gen vie etok gisov amei aplongg amei gile giengk veik amolmol indi be inatpweng are inei etok amei ate amei gwangne ite ma. Etok Pomate ane gwangne.  
\v 8 Amei anggas gen bunam walang ano nangge taku walang ok be gilgum amei tiate tiate molge, bemem giyaing amei ite. Be as mate subu amei aplongg amei ailu ailu bemem ambieg ite.  
\v 9 Amolmol ivin-vin amei giriv be gira bemem Pomate givang givin amei painge ge, amolmol es amei tiate tiate bemem es amei vunkunu ite.  
\v 10 Be as mate walang ok amei anggas vavavne weik ete Kilisi gigas ok, gipil utlangg amei ulis painge ge, beti gen etok giengk gitip ge ve Kilisi ebe gibweg matawe ok, ane gwangne ete giro amei ta.  
\v 11 As mate walang ok amolmol emb vavavne bamo molge gitangi amei love kasop gege ve anmat vunkunu, ve gisov Yisu kilisi ane kulkul ane. Bingano, gen dangetok meng-gihlang gipil amei veik amolmol indi Kilisi ane gwangne ebe giro amei utlangg amei ulis muai muai etenik ta ok.  
\v 12 Yaun etenik ane dabe dangeteik; Tanmat vunu ane gwangne geb kulkul nangge amei aplongg amei, bemem tanambweg matawand ane gwangne geb kulkul nangge yem aplongg aim.   
\p
\v 13 Yaun ti ebe giengk Pomate ane kapia ok ginei dangeteik;  
\q1 “Ayeu aplongg givin beti ganei vusa.”  
\m Dangetok beti amei ok aplongg amei givin beti anei vusa.  
\v 14 Amei atpweng are anei, Pomate ebe ges Amol Bamo itin nangge taku gimat ane ok, atob nes amei itin nangge taku gimat ane weik etok ge anvin Yisu. Be atob ninggas amei be yem be tepwengge tande tanambweg tanam-bloblo Ei.  
\v 15 Be gisov yem ane ge, beti gen dang dang-etok atob manihlang veik nemb aim ru. Be ginei Pomate ane ta viti menihlang bamo ge be nemb taku avut, okob amolmol anongge molge atob inei as tas-vie nitangi Pomate be avos nvwat Pomate are.   
\s1 Tanes and luev tis aplond nivin ge  
\p
\v 16 Beti as mate walang ok amei aro amei ate ta be avarkei gwangne dangetok painge ge. Bingano, amei ande utlangg amei gisov gikwai bemem aplongg amei gigas gwangne dangetok painge ge tis as mate walang ok.  
\v 17 Ve gen bunam ebe ve ma nikwai seukie-ngge ane ete galkik amei anggas nik, atob nemb bogbogo ebe ve niengk dangetok painge ge ok nitangi amei. Be bogbogo ete amei ve an-gas ok, atob bamo molge nitlek gen bunam galkik ane.  
\v 18 Gisov amei asge gen ebe gitangi ve tandi ve matanond ok ite ma! Amei asge gen ebe gitangi tandi ve matanond ite ok. Ve gen ebe matanond gitangi nili ok, ete atob ma nikwai seukien-gge, bemem gen ebe matanond gitangi ve nili ite ok, ete atob niengk dangetok nemb ta-ngge.   
\c 5  
\p
\v 1 Gisov amei atpweng are anei, ginei amei dalgongg amei ane nam nalk etenik ane tiate nikwai, okob atob Pomate nemb nam ebe ei ate gitav nangge gulumb ok nitangi amei. Be nam nok atob niengk be niengk nemb ta-ngge.  
\v 2 Be galkik etenik amei aplongg amei giteng giteng be akuk lili tiate ve an-gas amei nam ebe givarkei gulumb ok, veik nisil utlangg amei ulis weik ebe kup ok.  
\v 3 Bingano, ginei amei an-gas amei nam etok nikwai, okob atob amei anvang utlangg amei ulis vuvri sinsin ge ite ma.  
\v 4 Givin ebe amei avang tis utlangg amei ulis nalk etenik ane ge ok, amei anggas vavavne tis bunam walang ano molge. Bemem galkik algum gen ebe ve bwaingg amei ve utlangg amei ulis nalk etenik ane ok ite ma. Amei tangg amei givin ve an-gas gen gulumb ane nile niwei utlangg amei ulis weik ebe ino kup ok, veik utlangg amei ulis nalk etenik ane ninggas matawe nivin.  
\v 5 Be Pomate Ei ate, ei amol ebe ginei amei dabangg amei gili gipil gen etok be geb ane Ngalau Yamar gitangi amei veik nes ru ve atob amei an-gas gen tepwengge ebe ei gipasang ve nemb nitangi amei ok.   
\p
\v 6 Be gisov gen etok ane ge, beti amei avang tis aplongg amei dongke-ngge tis as mate walang ok. Be ali anei sawa ete amei avang tis utlangg amei ulis nalk ane ge nik, weik ebe ambweg amolmol taku ti ane as nalk ok, be avang aikawe akwai Amol Bamo ane nam.  
\v 7 Amei ali Ei ite bemem as amei luev tis aplongg amei givin ge.  
\v 8 Be avang tis aplongg amei dongke-ngge be tangg amei givin anongge ve navang ankwai nam etenik be ande anambweg anvin Amol Bamo nangge ane nam.  
\v 9 Dangetok beti ginei amei ande ale ambweg avin Ei nangge ete ane nam ok, me amei avang aikawe ge nangge, bemem as mate walang ok amei tangg amei givin anongge ve anvang mul ve luev ebe Amol Bamo gili vie ok painge-ngge.  
\v 10 Ve gisov eitit tepwengge atob tanvarkei Kilisi na be nilgum eitit and yaun, kob atob tan-gas and kulkul vie be tis kulkul tiate ebe talgum givin ebe tavang tis utland ulis nalk ane ge ok ane ano nitang tangi ge.   
\s1 Kilisi Ei luev ebe amolmol ve mainahlang weik Pomate ane nune-nggen ok  
\p
\v 11 Amei atpweng yaun ebe ve tanpelk ve Amol Bamo ok are gikwai, beti amei algum kulkul ve anro amolmol vukir veik insov Amol Bamo ane yaun ane lu ge. Pomate gitpweng amei aplongg amei are gikwai, be ayeu gali ganei yem ok utpweng ayeu are givin weik etok ge.  
\v 12 Lob yem unei amei aro kapia etenik be algum veik yem avongg aim nivwat amei arengg amei bemem ma, amei algum veik yem tangg aim vevie ve amei ane be unwel amolmol ebe avos givwat is ate ve gen aplos ane ite, be avos givwat is ate ve gen sinsin ge ane ok as yaun.  
\v 13 Bingano, ginei amei avang weik amolmol ebe dabas-gwet ma ok, okob etok vie ve gisov Pomate ane amolmol kulkul ane amei, beti amei avang weik amolmol ebe dabas-gwet ma ok. Be ginei amei avang weik amolmol ebe tis dabas-gwet ok, okob amei avang dangetok veik anemb yem ru.  
\v 14 Amei avang asov Kilisi ane ta givin ane lu ge, beti galkik amei ali anei Amol dongke-ngge gimat vunu ve amolmol tepwengge ane, be etok weik ebe amolmol tepwengge imat vunu ok.  
\v 15 Ei giwel amolmol tepwengge be gimat vunu, veik eitit amolmol ete galkik tambweg matawand nik tanvang mul ve eitit ate and tand gitung bwaya, be tanvang mul ve Amol dongke ebe gimat vunu bekob gimdil vukuri nangge taku gimat ane ok ge ane ta givin.   
\p
\v 16 Dangetok be galkik amei algum amol ti ane yaun givang mul ve amolmol as luev ite, bingano, warik gimungg ane amei algum Kilisi ane yaun givang mul ve amolmol as luev, bemem galkik amei algum gen etok vukuri ite.  
\v 17 Dangetok be ginei amol ti aplo nivin Kilisi, okob Kilisi atob niro amol etok vukir be nes ane luev vaku vukuri. Unaute kob! Gen muanggane ande ma gikwai be gen vaku ande meng-gihlang.  
\v 18 Gen walang etok ane dabe giengk Pomate dongke-ngge. Warik amei as valir gitangi Pomate, bemem gisov Kilisi ane ge beti ei gilgum amei be mahlang ve ei ane nune-nggen. Be geb kulkul gitangi amei ve anro amolmol ebe es valir gitangi ei ok vukir be meinahlang ve ei ane nune-nggen nivin weik etok ge.  
\v 19 Be mateu bambamo ete amei anei anei ok dangeteik; Pomate gilgum amolmol tepwengge be meihlang ve ane nune-nggen ve gisov Kilisi dongke-ngge. Be ande ei ta givalngan eisir as gen tiate bambamo ebe ilgum ok gikwai, be geb kulkul gitangi amei ve anei mateu nipil luev ebe ei giro amolmol vukir be meihlang ve ane nune-nggen ok.   
\p
\v 20 Pomate ei ate geb amei ve anei Kilisi ane yaun nitangi yem, weik ebe ei ate ginei yaun gisov avo gitangi yem ok. Beti amei awel Kilisi be as bing be anei yaun gwangne gitangi yem be anei “Unemb aim ate untangi Pomate unde, veik ei nilgum yem be monahlang ve ane nune-nggen.  
\v 21 Kilisi gilgum gen tiate ti ite molge bemem Pomate gili ei ginei amol tiate ane ti, giwel eitit be gigas eitit and vavavne veik eitit ebe aplond givin Kilisi ok meta-nahlang ve Pomate ane amolmol-gen.   
\c 6  
\p
\v 1 Dangetok beti amei ebe algum Pomate ane kulkul ok, as bing be anei yaun gwangne gitangi yem ve gisov, “Yem unggas Pomate ane yaun bwai bwaya gikwai, dangetok be undi Pomate ane yaun bwai bwaya etok weik gen sin ge ti be unavkir dumangg aim nitangi bwaya.”  
\v 2 Ve Pomate ginei dangetik ginei;  
\q1 “Ayeu gaute yem aim yaun givin sawa ebe tangg-viti ve yem ok.  
\m Be gab yem ru givin sawa ebe tangg givin ve nanggas yem ok.”  
\p Be Pol ginei; Unaute kob. Sawa etenik ebe Pomate ta viti ve amolmol ok. Be unaute; As mate etenik ebe Pomate ta givin ve nemb amolmol ru ok.   
\p
\v 3 Amei buaingg amei ve ret amolmo inei yaun ungglus ungglus nipil amei mei kulkul ete algum ok, beti algum ve anei analgum amolmol be aplos bunam bwaya.  
\v 4 Gen walang ebe amei algum ok ete ges ru ve Pomate ane amolmol kulkul ane amei. Amei anggas gen bunam walang ok tis aplongg amei dongke-ngge, be avang tis aplongg amei bunam ge be ambweg vie ite molge.  
\v 5 Amolmol es amei be itak amei ambweg kapual-lu be ivarkei meidbul amei be ele-leinge gidbwem amei. Amei algum kulkul bamo molge, amei ayengk matanongg amei ite be an ben ite.  
\v 6 Amei as amei luev walang ok vie-ngge, be dabangg amei gwet giengk vie-ngge. Amei tangg amei vavis seukie seukie ve amolmol ite ma, amei algum gen vie-ngge gitangi amolmol. Amei mei luev bambamo etok ete ges ru ve Pomate ane amolmol kulkul ane amei, be Ngalau Yamar ane gwangne giro amei ta be tangg amei givin amolmol tis aplongg amei dongke-ngge.  
\v 7 Pomate ge ete giro amei ta ve ane gwangne be algum kulkul. Amei anggas luev vie weik ebe amei lau valir ane ebe ve anes valir be tis ebe ve an-valval amei ate ok.  
\v 8 Amolmol subu avos givwat amei arengg amei, be subu ilgum amei be mai-mayangg amei. Be eisir subu ili amei vie, be subu ili amei tiate, amolmol subu inggo amei be inei amei amolmol yaun bingkas kasop ane, bemem amei amolmol yaun ano ane.  
\v 9 Amolmol ili amei weik gen sin ge, bemem itpweng amei are, be amei avang weik ebe ande amat vunkunu ok, bemem avang matawangg amei. Amolmol ilgum amei mei yaun bemem es amei vunkunu ite.  
\v 10 Amei avang tis aplongg amei bunam ge bemem tangg amei vevie ge tis as mate walang ok ve Amol Bamo ane. Amei wambal ma ve amei bemem amb gen vevies ge gitangi amolmol. Amei gen sawa amei, bemem amei mei gen walang ok giengk.   
\p
\v 11 Angg nune-nggen nangge Korint. Amei anei yaun giengk gitip ge gitangi yem be anei, amei amb aplongg amei tepwengge gitangi yem gilek.  
\v 12 Bemem yem ate ge ete ungil-gili aplongg aim gitangi amei.  
\v 13 Ayeu ve nanei yaun eteik nitangi yem weik ebe ganei gitangi natung-gen ok; Yem unemb aplongg aim tepwengge nitangi amei weik ete amei algum gitangi yem ok.   
\s1 Eitit weik Pomate ane lum yamar  
\p
\v 14 Amolmol gitip ane as luev ti, dangetok be yem unvang unvin eisir be unvang mul ve eisir as luev bwaya. Ve yaun ano be tis yaun bingkasop, sulu gitangi ebe atob invang invin is ate ok ite ma. Be gen aiweng tumi ane tis gen ebe giengk gitip ok gitangi ebe atob inambweg invin is ate ok ite.  
\v 15 Kilisi gabu Sadam, sulu gitangi ebe ve inbiti yaun ti invin is ate ok ite ma. Be amol ebe aplo givin ok gabu amol ebe aplo givin ite ok, gitangi ebe atob gabu in-gas gen ano dongke-ngge invin is ate ok ite.  
\v 16 Pomate matawe ane gabu pomate bingkasop ane, as lum yamar gile dongke ite ma. Be eitit tatpweng are gikwai ve eitit ate nik, ete Pomate matawe ane, ane lum yamar. Ve Pomate Ei ate ginei dangeteik;  
\q1 “Ayeu atob natav angg nam be nambweg navin angg amolmol-gen, be atob navang navin eisir.  
\m Be atob ayeu weik eisir as Pomate. Be eisir weik awangg amolmol-gen.”   
\p
\v 17 Be Amol Bamo ginei vukuri dangeteik;  
\q1 “Dangetok be yem unamdil be unde unambweg aikawe unkwai eisir.  
\m Be un-gilgili aim ate nitangi gen tomtom bambamo ebe gitangi ve tanalgum ite ok. Veik atob ayeu nanggas yem.   
\p
\v 18 Be atob ayeu weik yem Tamangg aim, be yem weik Ayeu natung-gen tis natungg avie gen.” Amol Bamo Ei Amol gwangne, ane avo ukwas etenik.   
\c 7  
\p
\v 1 Angg nune-nggen. Pomate ginei yaun etok gipil eitit bingano molge. Dangetok be eitit tandi be tankari and luev ebe gilgum utland ulis tis dalgond matawand ane tiate ok nikwai be tanes and luev vie-ngge weik ebe Pomate ane amolmol yamar ane ok. Be tanvang tis tanpelk ve Pomate ge.   
\s1 Amolmol Korint ane iro is ate vukir, beti gilgum be Pol ta vevie anongge  
\p
\v 2 Yem tangg aim nivin amei, ve amei algum yem aim amol ti tiate, me algum gen tiate gitangi amol ti, me algum gen ve an valval amol ti ane gen ite ma molge.  
\v 3 Velob yem tangg aim nitung unei ayeu ve nalgum yaun nipil yem beti ganei yaun dangetok gitangi yem, bemem ma. Ayeu ganei gitangi yem gimungg gikwai ganei, amei tangg amei givin yem anongge, be amei ali dangetok anei, ginei yem unmat vunu, atob amei ok anmat vunu anvin yem. Me ginei yem unambweg matawangg aim, okob amei ok tangg amei givin ve anambweg matawangg amei anvin yem weik etok ge.  
\v 4 Ayeu nanei roro-ngge nitangi yem nanei, ayeu tangg vevie anongge ve yem ane. Be as mate walang ok amei anggas gen bunam painge ge bemem ayeu tangg gitung ginme yem be gilgum ayeu be aplongg vie molge. Beti ayeu tak-vevie anongge ve yem ane.   
\p
\v 5 Bingano, givin sawa ebe amei ambielk Masedonia as taku ok ete amei ambweg vie ite molge ve gen bunam walang ano meng-gihlang nangge etok. Amolmol inei yaun walang ano gipil amei be gilgum be amei apelk ve amei ate ane anongge.  
\v 6 Bemem Pomate ei Amol ebe giro amolmol ebe inggas gen bunam dang dang-etok ta ok, ete gihlin Taitus be gitangi amei ginme beti gilgum be amei aplongg amei vie.  
\v 7 Amei aplongg amei gile petekie ve ebe Taitus ginme gibielk ve amei ok ane ge ite, bemem ei ginei ebe yem omb ei dabin be nangg aim uli ei vie-ngge ok gitangi amei, beti gilgum be amei tangg amei vevie anongge. Ei ginei gitangi amei ginei yem tangg aim givin anongge ve undi ayeu, be tangg aim gitung ayeu bamo molge. Be tangg aim givin anongge ve unvang unvin ayeu. Beti gilgum be ayeu tangg-vevie ano anongge ve yem ane.  
\v 8 Ayeu aplongg bunam ve angg kapia ebe garo gitangi yem gilek be gilgum yem be aplongg aim bunam ok ite ma. Bemem ayeu aplongg bunam sitingge givin ebe gali kapia etok gilgum yem be aplongg aim bunam sawa siti ge ane ok ge.  
\v 9 Bemem galkik ande ayeu tangg-vevie ge. Ayeu tangg-vevie etok gisov ebe galgum yem be aplongg aim bunam ok ite ma, bemem gisov yem aim aplongg aim bunam etok ete galkik gilgum be ande yem uro aim ate vukir. Be ayeu gali ganei yem aplongg aim bunam etok ane dabe gisov Pomate, velob yem unei bwat amei mei yaun ebe anei ok ete gilgum yem be aplongg aim bunam bemem ma.  
\v 10 Be gen bunam ete Pomate geb gitangi eitit ok ane dabe dangeteik; Ei geb gen bunam dangetok gitangi eitit veik nilgum be tanro it ate vukir, veik ei nemb eitit ru. Dangetok be eitit aplond bunam ve luev ete ve tanro it ate vukir ane ok ve ret ane? Bemem aplond bunam ve gen nalk ane ge ete atob nilgum be tanmat vunu.  
\v 11 Bingano. Pomate geb bunam etok gitangi yem beti galkik yem aplongg aim gimdil ve unalgum gen vevies walang ok. Ve gen bunam etok gilgum beti galkik yem umdil be upasang aim yaun sawa uvin aim ate, be unei yaun gitangi amolmol ebe ilgum tiate ok, be uvang tis upelk ve Pomate ge. Be tangg aim givin anongge ve undi amei, be ulgum ve unpasang amol ebe gilgum gen tiate ok ane yaun. Yem aim kulkul bambamo etok ete ges ru ve yem os aim luev gen walang ok ane gile gitangi roro-ngge be ulgum ti gitlek ite.   
\p
\v 12 Bingano, kapia ti ebe warik ayeu garo gitangi yem gilek nok, velob yem tangg aim nitung unei ayeu garo kapia etok ve amol ebe gilgum tiate ok ane, me amol ebe amol etok gilgum tiate gitangi ok ite ma. Bemem ayeu galgum ve ganei nanei lavo nitangi yem, ve Pomate gili ginei yem tangg aim givin amei gitlek molge.  
\v 13 Be gisov yem aim tangg aim givin amei ane ge, ete gilgum be amei aplongg amei vie.  
\p Bemem amei aplongg amei gile petekie ve yaun etok ane ge ite, bemem gisov ebe yem ulgum Taitus be ta vevie ok beti gilgum be amei tangg amei vie-ngge.  
\v 14 Warik ayeu gadang au-ate ve yem ane gavang Taitus na, bemem yem ulgum ayeu be mai-mayangg ite ma. Be yaun bambamo ete amei anei gitangi yem ok, etok yaun ano molge. Be amei mei yaun ete anei gitangi Taitus ok weik etok ge ve yaun etok ano molge.  
\v 15 Taitus ta givin yem bamo molge ve ei ta gitung ebe yem unggas ei upil aim nam, be upelk ve ebe tangg aim gitung unei yem gitangi ebe atob un-gas ei ite ok ite, be tis ebe usov ei ane yaun ane lu vie-ngge ok.  
\v 16 Be galkik ayeu gali ganei atob yem unalgum aim gen walang ok vie-ngge, beti gilgum be ayeu tangg-vevie.   
\c 8  
\s1 Luev ebe ve tanemb Pomate ane amolmol-gen ru ok  
\p
\v 1 Angg nune-nggen, Ayeu tangg givin ve ganei yem unatpweng Pomate ane ta viti ebe geb gitangi amolmol bui ane nangge Masedonia as taku ok are okob.  
\v 2 Eisir inggas gen bunam walang ano bemem iro is ate ta be ivang tis tas vevias ge. Eisir gen ma molge ve is, bemem eisir emb as da tis as mate walang ok tis aplos givin ge.  
\v 3 Ayeu ate gali gen etok gikwai beti ganei anei ane yaun niengk nitip ge nitangi yem. Eisir ilgum gitangi ebe as tas givin ok be emb gen gitangi as gen ret ret ebe giengk givin is ate ok, bemem emb gen walang ano molge.  
\v 4 Be lolos ve amei tis as mate walang ok ve inei amei anei be eisir inemb kulkul ete ve inemb Pomate ane amolmol-gen ru nangge Judaia as taku ok invin.  
\v 5 Be amei anei bwat atob eisir inemb da nile nitangi ebe amei tangg amei gitung ok, bemem eisir emb gitlek molge. Eisir tas givin Amol Bamo gimungg, bekob ete isov Pomate ane yaun ane lu ge be tas givin amei givin weik etok ge.  
\v 6 Dangetok beti amei ahlin Taitus, amol ebe warik gilgum kulkul etok gimungg ok, be anei ei nitangi yem nilek be nilgum ane kulkul tas givin ane etok nivin yem be ma yapin kob.  
\v 7 Yem ande gitangi gen walang ok gikwai; Yem aim aplongg aim givin giengk, be yem ate ge ande unei mateu ve aim ate, be ande utpweng yaun arkare, be omb aim kulkul vangg aim pale be tangg aim givin amei anongge. Dangetok be galkik etenik ok yem un-gas kulkul ete ve unemb Pomate ane amolmol-gen ru ok nivin weik etok ge.   
\p
\v 8 Ayeu galgum gen ebe ve avongg nirau yem ok ane ite, bemem amolmol subu ilgum kulkul vas pale be tas givin anongge ve inemb amolmol ru. Beti ayeu galgum ve nali, nanei yem ok tangg aim givin ve unemb amolmol ru unvin weik etok ge me ma?  
\v 9 Yem utpweng eitit and Amol Bamo Yisu Kilisi ane ta viti are gikwai. Ei Amol tis are ti bemem gisov yem ane ge beti Ei gilgum ate love weik ebe gen bwam bwam ti ok veik nilgum be yem monahlang ve amolmol ebe tis are ok.   
\p
\v 10 Ande ma. Be eteik ayeu angg tangg gitung ebe giengk aplongg ok ete ve nanei nitangi yem nik: Givin Sonda bamo ebe nolge gile gikwai ok ete yem umdil be ulgum kulkul etenik, bemem yem ulgum sin-gege ite yem tangg aim givin kulkul etenik anongge beti ulgum.  
\v 11 Dangetok be galkik etenik unalgum aim kulkul etok vangg aim pale ge love unes vunu kob, be unalgum yaun ebe tangg aim gitung giengk aplongg aim ok ano nile nipil gen ete giengk yem ane ok.  
\v 12 Ginei yem ande tangg aim givin anongge ve unemb aim da nitangi gen ret ret ebe giengk yem ane ok, okob Pomate atob ta vie-ngge ve yem aim da etok ane. Bemem ginei mie gen ti ma be mie tam gitung ve nomb gen etok ve da nivin, okob nininem be tam nitung walang ano bwaya.   
\p
\v 13 Ayeu ganei yaun etenik be galgum veik amolmol subu inambweg vie be yem un-gas bunam ok ite ma.  
\v 14 Bemem galkik etenik yem aim gen anongge molge, dangetok be etok gen vie molge ve yem unemb amolmol ebe gen ma ve is ok ru. Be ginei mul ane yem ande umbweg tiate be eisir imbweg vie, okob atob eisir inemb yem ru weik etok ge. Yem unalgum gen dangetok nitangi aim ate veik tepwengge un-gas gen nitangi ate ge.  
\v 15 Ve yaun ebe giengk Pomate ane kapia ok ginei dangeteik;  
\q1 “Amol ebe giro ben anongge sut ok, ei ane ben anongge molge ite.  
\m Be Amol ebe giro ben ailu ge sut ok, ei marav ges vunu ite ma.”   
\s1 Taitus tis ane amolmol-gen as yaun  
\p
\v 16 Ayeu ganei angg tangg-vie gitangi Pomate ve Ei gilgum Taitus aplo love ande ta givin anongge ve ginei nemb yem ru weik ete ayeu galgum ok.  
\v 17 Bingano, ei gisov amei mei yaun ebe amb gitangi ei ok ane lu ge, bemem etok ge ite. Ei ate ok ane ta givin kulkul etok bamo molge beti gitangi yem gilek.  
\v 18 Amei ahlin eitit and nune ti ebe ginei ginei mateu gitangi amolmol ok be givang givin Taitus. Amol nok ebe amolmol bui ane nangge nam dabe walang ok ili ei vie molge ok.  
\v 19 Be amolmol nangge nam dabe walang ok ande emb amol nok gikwai ve nivang nivin amei be tepwe analgum kulkul etenik, veik analgum Amol Bamo are be menihlang bamo ge, veik nes ru nitangi amolmol ve amei tangg amei givin anongge ve anemb amolmol ru.   
\p
\v 20 Amei bwaingg amei ve ret amolmol indi amei tiate nisov kulkul ete amei algum ve amb amolmol as da dabin ok.  
\v 21 Amei algum gen veik amolmol ge indi amei vie ite, amei algum veik Amol Bamo ok nili amei vie nivin weik etok ge.   
\p
\v 22 Beti amei ahlin amei nune ti be givang givin sulu. Amei algum ve anatpweng ei are beti amb kulkul walang molge gisov ei, bemem ei gilgum kulkul bambamo etok tis va pale ge be ta givin anongge ve nemb amolmol ru. Be galkik ei gili ginei yem atob unalgum aim gen walang ok vie-ngge, beti ei ta givin ve nitangi yem nilek be nemb aim ru.  
\v 23 Weik ete Taitus gilgum gilgum ok. Taitus nok awangg nune ti ebe algum kulkul avin amei ate ve amb yem ru ok. Be eitit and nune ailu ete ivang ivin Taitus ok, etok amolmol bui ane as amolmol kulkul ane ebe emb Kilisi ane yaun gitangi amolmol ok.  
\v 24 Dangetok be yem unes aim tangg aim givin ru nitangi sotol, veik amolmol tepwengge indi be inatpweng are inei yem aim tangg aim givin ge ete gilgum amei be tangg mei vevie.   
\c 9  
\s1 Tanemb amolmol bui ane ru  
\p
\v 1 Yem utpweng da ebe tamb tamb ve nemb Pomate ane amolmol-gen ru ok are gikwai, beti ayeu atob naro da nok ane yaun nitangi yem vukuri ite.  
\v 2 Ayeu gali ganei yem aim tangg aim givin anongge ve unalgum kulkul etok. Beti ayeu avongg givwat yem arengg aim nangge amolmol Masedonia ane nas be ganei, Amolmol nangge Akaia ipasang is ate gikwai givin Sonda bamo ebe nolge gile gikwai ok ve inalgum kulkul etenik. Eisir iute ebe yem ulgum kulkul etok tis vangg aim pale ge ok binge, beti gilgum be amolmol anongge nangge Masedonia aplos gimdil ve inalgum kulkul etenik nivin weik etok ge.  
\v 3 Bemem ayeu galgum gisov yaun ete galkik ayeu ganei ve avongg givwat yem arengg aim ok ane ge, beti gahlin sotol aitol etenok be itangi yem ilek. Dangetok be yem unpasang aim ate be unemb aim da yapin ge. Velob awangg yaun ete galkik ganei ok menile ano ma.  
\v 4 Ve ginei amolmol Masedonia ane subu invin ayeu be amei andek be andi ebe yem omb aim da ite nangge ok, okob amei ebe avongg amei givwat yem arengg aim ok atob mai-mayangg amei anongge. Be yem ate ok atob mai-mayangg aim nivin weik etok ge.  
\v 5 Beti ayeu tangg gitung ve ganei nahlin sotol aitol etenok be inmungg indek be inpasang gen ebe yem unei gikwai ve atob unemb ok yapin ge. Veik ginei ayeu nambielk, okob gen ande giengk gikwai. Be etok weik yem omb da gitangi ebe yem ate aim tangg aim givin ok, be amei avongg amei girau yem beti omb ite ma.   
\p
\v 6 Tangg aim itung yaun eteik be undi kob; Amol ebe givro ben uve aitol ge ok, ei giro ane ben etok ane ano aitol ge sut. Be amol ebe givro ben uve bon ge ok, ei giro ane ben etok ane ano anongge sut.  
\v 7 Dangetok be yem tepwengge unemb aim gen nitang tangi ge nitangi ebe amol ei ate ane ta givin ok. Velob amol ti ta nitung ninei, ayeu ve namb gen ite bemem inei beti gab. Unalgum dangetok bwaya. Ve Pomate ta givin amol ebe geb gen tis aplo dongke ge ok.  
\v 8 Pomate ei gitangi ebe ve nemb gen walang ebe yem tangg aim givin ve un-gas, bemem unggas ite ok nitangi yem. Veik unsak aim ate ve gen ret-ret ane tis as mate walang ok bwaya.  
\v 9 Ve yaun ebe giengk Pomate ane kapia ok ginei dangeteik;  
\q1 “Ei geb ane gen vevies walang ok gitangi amolmol ebe gen ma ve is ok.  
\q1 Ei ane opom atob niengk dangetok ninggas ta ge.”   
\p
\v 10 Pomate ei amol ebe geb ben uve gitangi amolmol be ivro ok, be ei amol ebe gilgum be ben etok ges ane ano be amolmol en ok. Be atob ei nemb gen walang ok ane uve nitangi yem, be atob nilgum gen etok tepwengge be nes ano nile. Be aim kulkul vevies ebe ulgum ok atob ei nilgum be yem aim kulkul etok nes ane ano.  
\v 11 Yem atob un-gas gen walang ano nangge Pomate ane, be atob gitangi ebe ve unemb gen anongge nitangi amolmol ok. Kob atob amolmol indi yem aim gen ete omb ve nemb eisir ru, ebe amei amb gitangi eisir gile ok okob atob inei as tas-vie nitangi Pomate.  
\v 12 Ve kulkul ete yem ulgum nik, geb Pomate ane amolmol-gen ebe gen ma ve is ok ge ru ite ma, kulkul etenik gilgum amolmol walang molge aplos be inei as tas-vie gitangi Pomate givin weik etok ge.  
\v 13 Yem aim kulkul etok atob nes ru nitangi amolmol ve yem uvang mul ve Pomate ane yaun vie-ngge, be unei Kilisi ane mateu givin givin. Be tis ebe tangg aim givin amolmol be omb is ru ok. Kob atob amolmol indi be avos nivwat Pomate are.  
\v 14 Atob eisir inatpweng are dangetok inei Pomate ta givin yem bamo molge. Be atob eisir ok tas nivin anongge ve indi yem, be atob ines miengk nitangi Pomate ve nemb ane yaun bwai bwaya nitangi yem.  
\v 15 Dangetok be eitit tanei and tat-vie nitangi Pomate ve ane gen vevies ebe geb sinsin-ge gitangi eitit ok ane. Ei ane gen vevies nok bamo molge be gitangi ebe atob tanav-nawi ok ite.   
\c 10  
\s1 Pol ginei ane kulkul lavo  
\p
\v 1 Ayeu Pol ve nanei angg yaun lavo nitangi yem okob. Ve amolmol subu inei yaun gipil ayeu be inei, “Ei gibweg givin eitit, ete gilgum ate weik gen sin-ngge. Be givin ebe gibweg aikawe gikwai eitit ok, okob giro yaun ebe gwangne gwangne ok ge gitangi eitit.” Dangetok be ayeu nanei nitangi yem nisov Kilisi ane ta givin be tis ane yaun bwai bwaya dangetok nanei;  
\v 2 Yem lolongg aim ve ayeu ve nanei yaun gwangne nitangi yem nivin ebe ve nalek nambweg navin aim ok bwaya. Bemem ayeu tangg gitung ve atob nanei yaun gwangne ge nitangi amolmol ebe inei dangetok inei amei aposel algum kulkul be atau gile luev nalk ane ge be algum veik an-gas mone ok.  
\v 3 Bingano, amei amolmol nalk ane beti as amei luev weik amolmol nalk ane, bemem amei as valir gipil gwangne nalk etenik ane ite ma.  
\v 4 Amei as valir ve Pomate ane gwangne ebe gitangi ve nihlu gen tiate ane twelk ebe givarkei giwei ok nikwai ok. Be amei as valir ve gwangne nalk etenik ane ite. Amei as amolmol as yaun bingkas kasop bambamo ebe tas gitung ge ok vunkunu,  
\v 5 be yaun bambamo ebe gilgum be amolmol indang is ate gipil ok, ebe gisil luev tanatpweng Pomate are ane ok ete amei ayaing yaun etok tepwengge gikwai. Be arwel amolmol as tas gitung gitangi Kilisi gile love algum be ivang mul ve Kilisi ane yaun ge.  
\v 6 Amei atob anpasang amei ate yapin be anambweg be anasge ge, ve ginei yem unsov amei mei yaun walang ok ane lu nikwai kob, atob amei analgum amolmol ebe isov yaun ane lu ite ok as yaun be anemb vavavne nitangi eisir.   
\p
\v 7 Yem uli gen ebe giengk matanongg aim lavo ane ok ge. Amol ti ginei gili ate ginei ei weik Kilisi ane amol ti, okob ei ta nitung niengk aplo ge be nili kob ve amei ok Kilisi ane amolmol-gen givin weik ete ei ok.  
\v 8 Amol Bamo geb gwangne gitangi amei ebe ve anyaing yem ok ite ma. Ei geb gwangne gitangi amei ve analgum kulkul nipil yem be anro yem aim aplong aim givin ta. Beti ginei ayeu avongg nivwat amei arengg amei ve kulkul etok ane, atob ayeu mai-mayangg ite.  
\v 9 Bemem ayeu bwaingg ve ret amolmol subu inei ayeu galgum ve nalgum yem be unpelk, beti garo kapia etenok gitangi yem.  
\v 10 Bingano, amolmol subu atob inei yaun dangeteik nipil ayeu be inei; “Ei ane yaun ebe giro bwal-bwale gisov kapia ok ete bunam be gwangne molge, bemem ginei ei ate nimbweg nivin eitit atob tandi ei weik gen sin-ge be ane yaun ok atob ano ma weik etok ge.”  
\v 11 Amolmol ebe inei yaun dang dang-etok ok tas nitung gen etok vevie be indi kob, amei ambweg aikawe akwai yem beti aro yaun gisov kapia ge gitangi yem. Be ginei anambweg anvin yem, atob analgum gen nitangi yaun ete aro gisov kapia ok weik etok ge.   
\p
\v 12 Amei bwaingg amei ve ret anemb kulkul anvin amolmol ete indang is ate be avos givwat is ate ok. Eisir ili is ate inei eisir amolmol vie ane be dabas-gwet vie molge. Amolmol dang dang-etok ete dabas-gwet ma molge.  
\v 13 Bemem amei wat andang amei ate nitlek molge ite ma. Amei atob andang amei ate ve kulkul ebe Pomate geb gitangi amei ok, be tis amei kulkul ebe algum gitangi yem ok ane ge.  
\v 14 Amei amb kulkul gipil yem gikwai givin ebe amei anggas Kilisi ane mateu ambielk ve yem ok.  
\v 15 Beti amei gitangi ebe atob andang amei ate ve kulkul ete amolmol subu ilgum ok, nitlek kulkul ebe Pomate geb gitangi amei ok ite ma yapin. Amei tangg amei givin ve yem aim aplongg aim givin menihlang gwangne ge, be kulkul ete Pomate geb gitangi amei ve analgum ok, atob menihlang bamo ge nangge yem ane.  
\v 16 Veik amei ankwai yem be ande anei mateu nangge amolmol gitip ane as taku nivin. Amei wat andang amei ate ve kulkul ete nolge amol ti gilgum ok ane ite.   
\p
\v 17 Ve yaun ebe giengk Pomate ane kapia ok ginei dangeteik;  
\q1 “Amol ti ginei ve nindang ate, okob ei nindang ate ve gen ebe Amol Bamo gilgum ok ane ge.”   
\p
\v 18 Eitit tatpweng etok are gikwai ve amolmol ebe indang is ate ok, ete Pomate gili eisir weik gen bwam bwam avo ti. Bemem amol ebe Amol Bamo ge avo givwat ei are ok, amol etok ete Amol Bamo ane amol kulkul ane ei roro.   
\c 11  
\s1 Pol be tis aposel bingkasop ane  
\p
\v 1 Ayeu tangg givin ve yem unaute ayeu dabangg-gwet ma eteik angg yaun bwam-bwam eteik okob.  
\v 2 Ayeu tangg vadbu ve yem ane bamo molge weik ebe Pomate ta vadbu ve ane amolmol ok, ve yem weik avie vuivuei ti ebe ges ane luev vie-ngge ok. Ayeu ganei gikwai ve atob namb yem nitangi amol dongke ge, be amol nok ete Kilisi ei ate.  
\v 3 Bemem ayeu tangg gitung yem bamo molge velob yem unemb aim ate ponge unkwai Kilisi weik ebe warik Ewa ok, ebe muwat giyo ei ve ane yaun bingkasop ane ok.  
\v 4 Ayeu gapelk gisov lob amol ti ninme be ninei mateu nipil Yisu ti ebe amei anei mateu gipil ite ok, me ginei yem un-gas ngalau ti ebe weik Ngalau ebe warik unggas ok ite, me ginei unaute mateu ti ebe weik mateu ebe amei amb gitangi yem ok ite, okob atob yem unsov amolmol dang dang-etok as yaun ane lu seukie-ngge.   
\p
\v 5 Bemem unaute kob. Ayeu gali yem aim aposel gen etok dabas-gwet vie molge gitlek ayeu ite ma yapin.  
\v 6 Bingano ayeu ganei angg yaun weik ebe amolmol dabas-gwet ma ok, bemem ayeu dabangg-gwet weik amolmol ebe dabas-gwet ma ok ite. Amei anei yaun etenik giengk gitip ge gitangi yem, be as tis ane luev walang ano tis as mate walang ok.   
\p
\v 7 Ayeu gawat mone me gen ti nangge yem giwel angg kulkul ebe galgum ve ganei Pomate ane mateu gitangi yem ok ite ma molge. Ayeu galgum au-ate weik ebe gen bwam bwam ti ok veik nalgum yem arengg aim vie. Ayeu galgum gen tiate ti ite ma.  
\v 8 Amolmol bui ane nangge nam dabe subu ivgo ayeu ve kulkul ebe ayeu galgum gitangi yem ok ane. Bemem ayeu gali gen etok weik ebe gavaina eisir as gen ok ite ma.  
\v 9 Be warik givin ebe ayeu gabweg gavin yem be gen ma ve-ngau ok, ayeu ganini ebe gautani yem ve unemb ayeu ru be unemb gen subu nitangi ayeu ok ma molge. Awangg nune-nggen ebe nangge Masedonia inme ok ete ivwat gen walang ok ve ayeu givin be inme. Ayeu tangg gisgil ebe gab bunam gisov yem ok, be atob nalgum weik etok ge, wat namb bunam nitangi yem ite molge.  
\v 10 Kilisi ane yaun ano giengk givin ayeu. Dangetok be ayeu nanei bingano ge nitangi yem nanei, amol ti gitangi ebe atob nivarkei awangg luev ebe ve nandang au-ate nipil gen ebe galgum nangge Akaia as taku walang ok avwut ok ite molge.  
\v 11 Ayeu tangg givin yem beti ganei yaun etenik. Bingano, Pomate gili ginei ayeu tangg givin yem bingano ge.   
\p
\v 12 Bemem amolmol subu irek luev ebe ve avos nivwat is ate ok, be inei eisir ok ilgum kulkul ete amei algum nik givin weik etok ge. Beti ayeu galgum kulkul ve navarkei amolmol dang dang-etok as luev avwut, be atob nalgum dangetok painge-ngge.  
\v 13 Eisir nok, eisir aposel roro ite ma, etok aposel bingkas kasop ane. Be ilgum is ate love weik ebe Kilisi ane aposel-gen roro ok.  
\v 14 Dangetok be undi velob unkuri be tangg aim nitung walang walang. Ve eitit tatpweng gen etok are gikwai ve Sadam gitangi ebe ve niro ate vukir be menihlang weik angela ok.  
\v 15-33 \f + \fr 11:15-33 \ft Lain v15 i go inap v33 no i stap long dispela buk long tok ples. Tok Pisin i go olsem: \fv \ft 15 \+fv*\ft Olsem na sapos ol wokman bilong Satan tu i senisim pasin bilong ol na i mekim olsem ol wokman bilong stretpela pasin, yumi no ken kirap nogut long dispela. Bihain ol bai i kisim pe inap tru long dispela ol pasin ol i bin mekim. Pol i bin karim planti hevi long taim em i mekim wok aposel \fv \ft 16 \+fv*\ft Mi tok pinis olsem mi laik mekim tok kranki liklik, na taim yupela i harim dispela tok, yupela i no ken ting mi wanpela longlong man. Tasol sapos yupela i ting mi longlong, em tu inap. Tasol yupela i mas larim mi, na bai mi tu mi ken litimapim nem bilong mi liklik. \fv \ft 17 \+fv*\ft Mi no bihainim laik bilong Bikpela na mi mekim dispela tok. Nogat. Mi tok olsem krankiman na mi litimapim nem bilong mi yet. \fv \ft 18 \+fv*\ft Planti man i save bihainim pasin bilong graun na ol i litimapim nem bilong ol yet. Olsem na mi tu mi bai bihainim dispela pasin na litimapim nem bilong mi yet. \fv \ft 19 \+fv*\ft Yupela ol lain i gat gutpela tingting tru, olsem na yupela i save laikim tumas long larim ol longlong man i givim tok kranki long yupela. \fv \ft 20 \+fv*\ft Tru tumas, sapos wanpela man i pulim yupela i go mekim wok kalabus bilong em, o sapos em i pinisim olgeta samting bilong yupela, o sapos em i giamanim yupela na trikim yupela, o sapos em i mekim olsem em i bikman tru, o sapos em i solapim pes bilong yupela, yupela i save larim em i mekim long laik bilong em tasol. \fv \ft 21 \+fv*\ft Sori tru, mipela i no gat strong bilong mekim ol dispela kain pasin long yupela. Mi sem tru long autim dispela rong bilong mipela. Tasol sapos wanpela man i strong long tokaut long pasin bilong em yet, orait mi tu mi ken strong na tokaut. Sori, nau mi toktok olsem longlong man. \fv \ft 22 \+fv*\ft Ol i bilong lain Hibru, a? Orait, mi tu mi bilong lain Hibru. Ol i man bilong Israel, a? Orait, mi tu mi bilong Israel. Ol i lain bilong Abraham, a? Orait, mi tu mi bilong lain bilong Abraham. \fv \ft 23 \+fv*\ft Ol i wokman bilong Krais, a? Nau mi tok olsem longlong man tru. Mi winim ol long mekim wok bilong Krais. Mi winim ol tru long hatwok mi bin mekim. Planti taim ol man i bin putim mi long kalabus na ol i paitim mi planti taim moa yet, na long ol dispela hevi mi winim tru ol dispela man. Planti taim klostu mi dai. \fv \ft 24 \+fv*\ft Ol Juda i bin paitim mi 39 taima long wip, na dispela samting i kamap long mi inap 5-pela taim olgeta. \fv \ft 25 \+fv*\ft Tripela taim mi kisim kanda. Wanpela taim ol i tromoi ston long mi. Tripela taim sip mi stap long en, em i bagarap, na wanpela nait na wanpela san mi trip i stap long solwara. \fv \ft 26-27 \+fv*\ft Planti taim mi wokabaut i go long ol longwe ples, na mi laik lus long wara, na mi laik bagarap long han bilong ol stilman i save pulim samting bilong ol man i wokabaut long rot. Ol wantok bilong mi yet ol i laik bagarapim mi, na ol man bilong ol arapela lain tu ol i laik bagarapim mi. Klostu mi laik bagarap long taim mi stap long ol taun, na long taim mi stap long graun i no gat man. \fv \ft 28 \+fv*\ft Na mi inap tok long planti arapela hevi tu i bin kamap long mi. Na tu, long olgeta de mi save tingting planti long pasin bilong lukautim gut olgeta sios, na dispela i putim bikpela hevi tru long mi. \fv \ft 29 \+fv*\ft Sapos strong bilong wanpela Kristen i pinis, orait mi pilim olsem strong bilong mi tu i pinis. Na sapos samting i kamap na i mekim wanpela Kristen i pundaun long sin, orait mi save kros tru long dispela samting. \fv \ft 30 \+fv*\ft Sapos i no gat narapela rot, na mi mas litimapim nem bilong mi yet, orait mi ken tok long ol samting i bin kamap na i soim olsem mi yet mi no gat strong, na mi ken litimapim nem bilong mi long dispela. \fv \ft 31 \+fv*\ft God, em i God na Papa bilong Bikpela Jisas, em i save olsem, mi no giaman. Yumi mas litimapim nem bilong em oltaim. \fv \ft 32 \+fv*\ft Long Damaskus, kiap bilong King Aretas i putim ol soldia bilong was long ol dua bilong banis bilong taun, long wanem, em i laik kalabusim mi. \fv \ft 33 \+fv*\ft Tasol sampela brata i putim mi long wanpela basket, na ol i putim basket ausait long windo bilong banis bilong taun na slekim basket i go daun long graun. Na long dispela pasin mi ranawe long han bilong dispela kiap. \f*   
\c 12  
\s1 Pol ane mev be tis yaun ebe Pomate ginei gitangi ei ok  
\p
\v 1 Gen etok vie ite ginei ayeu nandang au-ate, bemem ayeu gitangi ebe ve nandang au-ate ok. Bemem galkik ayeu ve nanei yaun nipil angg mev be tis yaun ebe Amol Bamo ginei gitangi ayeu ok.  
\v 2-3 Ayeu gatpweng are ganei warik sawa ti Pomate gigas amol ti gireu gulumb gile, be galkik ande Sonda bamo 14 gile gikwai. Be ayeu gali ite, ei gireu gulumb gile tis utle ulis nalk ane ge me ve ayeu gali etok siti ite. Etok Pomate ei ate ge gitpweng are. Bemem givin sawa etok ete ei gibweg nangge Paladis,  
\v 4 be giute giute yaun ebe gitangi ve amolmol inei nisov avos ite, be emb yamar ve inei amolmol inei yaun etok bwaya ok. Bemem atob ayeu nanei yaun etok nitangi amolmol subu ite.  
\v 5 Ve gen etok gen bamo molge be ayeu gitangi ebe atob nandang au-ate ve gen etok ane ok, bemem ayeu atob nalgum dangetok ite. Ayeu atob nandang au-ate nisov ebe gali au-ate ganei ayeu tul-kwangg ma ok ane ge, ve Pomate geb amolmol ebe tulkwas ma dangete ayeu ik ve inalgum Ei are be menihlang bamo.  
\v 6 Bingano, ginei ayeu tangg nitung ve nandang au-ate, atob ayeu nalgum au-ate love weik amol ti ebe dabe-gwet ma ok ite. Bemem ayeu bwaingg ve ret amolmol indi ayeu inei ayeu amol vie molge beti gab au-ate ta. Ayeu tangg givin ve angg kulkul ebe galgum ok be tis angg yaun ebe ganei ganei ok ge, ninei ayeu lavo nitangi amolmol ve ayeu amol dangetok me dangeteik.   
\p
\v 7 Pomate ginei yaun bambamo etok vusa gitangi ayeu, bemem Ei gipelk velob ayeu nandang au-ate nitlek molge, beti geb gimat vavavne tiate ti gitangi ayeu. Ayeu gali gimat vavavne nok weik Sadam ane amolmol kulkul ane ebe ve ines ayeu be invarkei awangg luev gili veik nandang au-ate bwaya ok.  
\v 8 Ayeu gas miengk gitangi sawa aitol gitangi Pomate be gautani Ei ve ganei nemb gimat tiate etok nikwai ayeu.  
\v 9 Bemem Ei giwel ayeu avongg be ginei; “Awangg yaun bwai-bwaya ande gilek givang givin mie gikwai. Be etok gitangi.” Amol Bamo giwel ayeu avongg dangetok. Beti atob ayeu nandang au-ate ninggas ta ge ve ebe tul-kwangg ma ok ane, veik Kilisi ane gwangne ninme nemb ayeu avwut.  
\v 10 Beti ginei ayeu tul-kwangg ma, me amolmol inalgum ayeu tiate tiate, be ayeu wambal ma, me amolmol ilgum gen ve ines ayeu vunu, me nanggas vavavne ve Kilisi ane kulkul ane, okob atob ayeu tangg-vevie ge ve gen bambamo etok ane. Ve givin ebe ayeu tul-kwangg ma ok, ete awangg gwangne giengk.   
\s1 Pol ta givin ve niro amolmol Korint ane as aplos givin ta  
\p
\v 11 Ayeu galgum au-ate weik amol ti ebe dabe-gwet ma ok, bemem yem ate nok ete ulgum beti ayeu galgum au-ate bwam bwam dangetok. Ve etok yem aim kulkul ete ve avongg aim nivwat ayeu arengg ok roro, bemem yem ulgum ite. Bingano, ayeu gen bwam bwam, bemem yem aim aposel-gen bambamo eteok itlek ayeu ite ma yapin.  
\v 12 Ayeu garo au-ate ta be gavang givin yem be galgum gen bambamo ebe ginei lavo gitangi yem, ve ayeu Kilisi ane aposel roro ok, tis aplongg dongke ge. Be yem utpweng Pomate ane gwangne are gikwai, gipil gen bambamo be tis gen bwal bwale be gen gwangne gwangne ebe ayeu galgum galgum ok.  
\v 13 Be gen dongke eteik ge ete ayeu galgum gitangi yem weik ebe galgum gitangi amolmol bui ane nangge nam dabe subu ok ite. Ayeu tangg gisgil ebe gautani yem ve unemb mone be tis wambal nitangi ayeu ok, ma molge. Dangetok be ayeu tangg givin ve ganei tangg aim nivalngan awangg tiate etok.   
\p
\v 14 Nolge ayeu garngav yem sawa ailu gile gikwai, beti galkik etenik ayeu gapasang au-ate ve atob natangi yem nalek vukuri. Ayeu galgum ve nanggas yem aim gen ite ma, ayeu tangg givin yem aim mone ite bemem tangg givin yem amolmol ge. Nunus gitangi ebe ve inro gen sut ve tinas gen tis tamas gen ok ite ma. Tamas gen tis tinas gen atob inro gen sut ve natus gen.  
\v 15 Ayeu tangg givin anongge ve namb angg gen walang ok love tis au-ate ok nivin nitangi yem veik namb yem ru. Be gisov ebe ayeu tangg givin yem gitlek molge ok, beti yem ok atob tangg aim nivin ayeu weik etok ge.   
\p
\v 16 Bingano, yaun etenik giengk gitip ge ve ayeu tangg gisgil ebe gautani yem ve gen ti ane be gab bunam gitangi yem ok, ma molge. Bemem amolmol subu atob inei dangeteik inei; “Ei gilgum ve niyo niyo eitit veik nirwel eitit tande tanvang mul ve ei ane yaun ge.”  
\v 17 Bemem ayeu tangg gisgil ebe gahlin amolmol yaun ane subu itangi yem ilek be iyo iyo yem ok.  
\v 18 Ayeu ganei gitangi Taitus ve nitangi yem nilek, beti gahlin amol bui ane ti be givin ei be gabu ilek. Bemem Taitus gilgum ve niyo niyo yem be ginei yaun bingkas kasop ane ti gitangi yem ite. Eilu amei gabu algum kulkul gipil amol dongke ge ane gwangne, be eilu as amei luev weindongke-ngge be aplongg amei dongkeng ge.   
\p
\v 19 Yem unei bwat amei algum gen ve anei amei ate lavo nitangi yem tis as mate walang ok painge-ngge, bemem ma yapin dangetok ite. Angg nune-nggen, Kilisi ane amolmol-gen amei, be yaun ete amei anei nik, amei anei avarkei Pomate na be ei gili givin, ve gen bambamo ete amei algum ok amei algum ve yem ane.  
\v 20 Ayeu aplongg bunam molge, velob sawa ebe ayeu ve nalek nambielk ve yem ok, atob nali yem uvang weik ebe ayeu tangg gitung ve atob unvang ok ite. Be yem ok atob undi ayeu nitangi ebe yem tangg aim gitung ve atob undi ok ite weik etok ge. Ayeu gapelk velob nalek be nali yem ulgum gen dangeteik; Unggo aim ate, tangg aim vadbu ve aim ate, be tangg aim vavis ve aim ate, be undang aim ate, unei yaun ungglus ungglus, be unei amolmol subu susweng, usov yaun ane lu ite, wasi tinangg aim.  
\v 21 Ayeu aplongg bunam velob sawa ti be ayeu natangi yem nalek vukuri be mai mayangg ve amolmol subu ebe warik ilgum gen tiate, bemem iro is ate vukir ikwai as tiate etok aplo ite nangge ok.   
\c 13  
\s1 Pol ges bing ve amolmol Korint ane, be ginei ane yaun mul ane  
\p
\v 1 Ayeu garngav yem sawa ailu gikwai, beti ve nanumul nalek vukuri. Be eitit tatpweng are gikwai ve yaun ebe giengk Pomate ane kapia ok ginei dangeteik;  
\q1 “Amol ailu me aitol ginei as yaun nitangi ate ge, okob yaun etok atob ano nile.”   
\m
\v 2 Ayeu tangg givin ve nanei nitangi amolmol ebe warik ilgum gen tiate ok be tis yem ete uvang nik. Yaun etenik nolge ayeu ganei gitangi yem gikwai givin ebe galek gali yem ok, bemem ayeu ve nanei yaun nok vukuri nitangi yem, tis ete ande gavang aikawe gakwai yem nik. Ve sawa ti ginei ayeu nanumul nalek vukuri, okob amolmol ebe ilgum gen tiate ok atob tepwengge in-gas vavavne.  
\v 3 Be nivin etok atob yem unatpweng gen ebe tangg aim givin ok are roro ge, ve ayeu ganei yaun gitangi yem ve Kilisi ane gwangne me ma? Kob atob unatpweng are unei Kilisi geb kulkul gwangne molge nangge yem.  
\v 4 Bingano, ei amol muai muai beti amolmol es ei vunu gireu ei givsangin. Bemem gisov Pomate ane gwangne ane ge ete galkik ei gibweg matawe. Be amei aplongg amei givin ei, beti amei ok tul-kwangg amei ma weik ete ei ok weik etok ge, bemem gisov Pomate ane gwangne ane ge beti amei avang matawangg amei avin ei, veik amei anemb yem ru.   
\p
\v 5 Yem utpweng are gikwai unei Kilisi givang givin yem. Dangetok be tangg aim nitung aim ate vevie be undi kob ve yem aplongg aim givin ano molge me ma? Be ginei yem aplongg aim givin ano ite, okob yem ulgum gen gitangi ebe Pomate ane luev ok ite nangge.  
\v 6 Ayeu gali ganei atob yem unatpweng amei are roro-ngge unei amei anggas gen bunam walang ano molge, be etok weik Kilisi ane amolmol gen amei roro.  
\v 7 Amei as miengk gitangi Pomate veik nemb yem dabin vie-ngge be unalgum gen tiate bwaya. Amei algum etok veik ebe yem undi amei unei amei amolmol vie ane ok ite ma, bemem amei algum veik yem unavkir dumangg aim nitangi gen tiate be unvang mul ve luev gen vevies ane ge. Bemem ginei yem tangg aim givin ve undi amei unei amei gitangi ite nangge, okob etok gitangi.  
\v 8 Ve yem uli gikwai amei gitangi ebe atob anvarkei yaun ano ane luev avwut ve amolmol ok ite ma, amei tangg amei givin ve analgum yaun ano be menihlang bamo ge.  
\v 9 Be ginei yem amolmol gwangne ane be amei gen muai muai, atob amei tangg amei vie-ngge be as mate walang ok atob amei anes miengk nitangi Pomate ve yem ane veik nilgum yem aim aplongg aim givin menihlang gwangne ge.  
\v 10 Be gisov yaun etenik ane ge beti ayeu garo kapia etenik gitangi yem givin ebe gabweg aikawe gakwai yem ok. Veik ginei nivin sawa ebe ayeu ve nalek nambielk ve yem ok, okob nanei yaun gwangne molge nitangi yem ve Amol Bamo ane gwangne ebe geb gitangi ayeu ok bwaya. Be yaun gwangne etok ebe ve niro yem ta be unvarkei gwangne ok, velob yem tangg aim nitung unei yaun etok atob niyaing yem bemem ma.   
\p
\v 11 Angg nune-nggen, awangg yaun ande ma gile gipil etok, be ayeu ve nanei nitangi yem nanei; Unambweg vie-ngge be unalgum aim gen walang ok vie-ngge veik monahlang amolmol bui ane vevies. Unsov awangg yaun ane lu ge, be aplongg aim nisov dongke be unvang tis yaun bongong ge. Be Pomate Ei Amol ta viti be tis yaun bwai bwaya ane, be atob nilek nivang nivin yem.   
\p
\v 12 Un-nggas aim ate nivang mul ve amolmol bui ane as luev. Pomate ane amolmol-gen tepwengge avos ges yem be inei as mate vie gitangi yem.  
\v 13 Amol Bamo Yisu Kilisi ane yaun bwai bwaya, be Pomate ane ta viti, be Ngalau Yamar ane giro amolmol tepwengge sut, atob nilek nivang nivin yem tepwengge.