\id 2JN -Yemsa New Testament
\ide UTF-8
\h 2 ዮሀኒስ
\toc1 ዎሲ ዮሀኒስኒ ሄፕሳ ዎሲያ
\toc2 2 ዮሀኒስ
\toc3 2 ዮሀ.
\mt1 ዎሲ ዮሀኒስኒ ሄፕሳ ዎሲያ
\imt1 ጋችግሩ
\ip ዎሲ ዮሀኒስኒ ሄፕሳኒ ዎሲያስ ትቼናስ ኩርኡ ስና ዎሲ ዮሀኒስኒኪን ስንፋት ትቼናስ ደይ ኮርቴራ ፋ ኬርኛአሲክናዋ ናንጎትባሲክናዋ። አዉዛክነ ደይ እሳ አትብያ ቤቴክርስታኒሲክናዋ ባሪስሲ ፌሴ ባሶክና ስና ኣፋ ቤያና ዉዛ። ሀን ካዉና ዎሲያ ትቼናስ ዎል ሹኖሶነክ ካምባሶን ማኮክናዋ ኤሽ አስኛኒ ሜኒ አሱስታን ቴትቤሲሶን ኦዶሶነክዋ።
\iot ማፃፋስ ስሩክ ኤጵና ኤጶባስ
\io1 ጋችቼ ግሩ \ior 1-3 \ior*
\io1 ኬሽታና ዙታምባሴ አሲስታን ደናሎ ስንባስ \ior 4-6 \ior*
\io1 ኤሻ አሱስሲን ቴትኒ ኦዳ \ior 7-11 \ior*
\io1 ኮርኡባ \ior 12-13 \ior*
\c 1
\p
\v 1 ኮርቴራ ፋ ኬሪኛአሲክናዋ ናንጎትባሲክና ቤቴክርስታንኒ ኩርኡ ስና ታኪን ዎስቴ ዎሲያ፦ ታ ፉቶሲክ ንቶትን ሹንፋዉግዌ፤ ታ ታ ስኖይናሮን ፉቶሶን አርሴፌ ባሶ ዙቴሬ ንቶትን ሹነቴርዌ። 
\v 2 ኤስ ፉቶስ እንኖ ጋነያሲ ፋርዌ፤ ሀንኔን ደይ ኮእባ ፎንቶኖን እንኖኔን አነ ፎኒርዌ። 
\v 3 አባ ሀኦሴዋ ና የሱስ ክርስቶስኒ ኦትማ፥ ፋክያሴዋ ናጋሴ ፉቶክናዋ ኬሽታናክና እንኖኔን አነ ስንፋውጝ።
\s1 ፉቶነዋ ኬሽታንነ
\p
\v 4 ናንጎትኔሲክቶስን እሳ እሳይስ አባስ እኖትን አጃጀናሲማቶ ፉቶሲክ ችምማ የርሴፌኒ ዳንና ቦርአ አካማኖን ግሬንዌ። 
\v 5 ኬሪኛአሴ! ሀሽኑ አዳራዌ፤ ሀን ኔክ ትችፋና ትቻስ ጋድዶ አጃጅ ስንና ኔክ ቤስቶናታዌ፤ ሀን ኔክ ትችፋናስ፦ «እኖትና እኖትና ዎል ሹኖኒ» ይፋ ቴሱባስታን ካብራ እኖክ እምቴ አጃጂስዌ። 
\v 6 ፉቶኒ ኬሽታና ኡስ ሀኦሲ አጃጅኖን ዛጉስዌ። ኤስ አጃጂስ ደይ ቴሱስታን ካብግራ ኦደሴትሲማቶ «ኬሽታናክ ፎቲ» ይፋ ባርዌ። 
\v 7 የሱስ ክርስቶስ አሱ ስንነ ዮባሶን አማኖኖር ዳግስሴፌ ሾዎ ሜያ ሀን ዳስታክ ካብሴቴ። ኤስ ኤፌቴና አሱስ ኤሽኛ ደይ ክርስቶስኒን ቱጋኤፌ ባርዌ። 
\v 8 ስኑንታኖ ንቶ ቱማ ዋግኒትሶን ኤጳቶትክ ችምትዌ፤ ዎስቴቲ ዎስቶስ ትሹኖይናማቶ አሩትዌ። 
\v 9 ክርስቶስኒ አሱሲክ ችምሜ ፎኖይ ባርናዋ ባሳ አሱስታን ዎኬ ሀምፌ ባርና ሀኦባ ኣፋዌ። ስኑንታኖ ክርስቶስኒ አሱሲክ ችምሜ የሬፌ ባርኔን አነ አባስናዋ ናስና ባሪክ ፌሴቴርዌ። 
\v 10 ሀን አሱሶን ኤጵኖይ ኦኑ ንቶኪ ዬፋናነ ኬንትስሲ ኤጳቶትታዌ፤ ናጋኑ ደይ ኦሾትታ። 
\v 11 ኤስ አሱስን ናጋ ኦሸፌ ባር ባሳ ማጙ ዎስቶሶን ሃኤርቱ ስናናዌ።
\s1 ኮእኒ ናጋኒ ኦሽሾ
\p
\v 12 ንቶክ ትቹናክ ሾሌና ሾዎ ዉዛ ፋርዌ፤ ስኑንታኖ ዙታምባሴ አሲን ዳብዳቤክ ትቹናክ ኣነ ሾሎትዌ፤ ኤሴ ባርስታን ግራናስ ቱማ ስናናክ ንቶኪ ያራ ንቶኔን አነ ዎል ኡጰራ ዎሎናክ አብድ ዛግፋዉጝዌ። 
\v 13 ኮርቴራ ፋ ኤትኔሲ ናንጎታኒክቶ ናጋ ኔክ ኦሽሼድፋዌ።