\id 1TI -Yemsa New Testament
\ide UTF-8
\h 1 ጢሞትዮስ
\toc1 ዎሲ ጳዉሎስኒ እሶንሳ ዎሲያ ጢሞትዮስኒክ
\toc2 1 ጢሞትዮስ
\toc3 1 ጢሞ.
\mt2 ዎሲ ጳዉሎስኒ እሶንሳ ዎሲያ
\mt1 ጢሞትዮስኒክ
\imt1 ጋችግሩ
\ip ጢሞትዮስ ይስቴ ናኦ ክርስታና ኮንቶባስ ሀቴ ኢስያ ስንፋና ካባሲክ እንቶባሲክ አይሁድ፤ አባባሲክ ደይ ግሪካዊዋ። ጳዉሎስኒ ዎስቶኒ ዞሞናዋ ምስራቹኒ ካማሲ ካቱክ ታእሴሬ አርጋሲት ፈር። ጳዉሎስ ጢሞትዮስኒክ ትችና ቴሱኒ ዎሲባስ ኬዝ አርክ አርክ ድምታቱ ባግቴፋ።
\ip ዙታምባሴ አሲስታን ዜምማ ዎሲያስ ቤቴክርስታኒሲ ካብራ ፋ ኤሻ አሱሲን ቴትንትሶን ኦድት ይፋርዋ። ኤስ እርባ አሱሲ እሳ ካዳሲክ አይሁድኒ ሳፋራ፤ እሳ ካድባሲክ ኦም ኦም ዳራኒ ሜኒ ሳፋራ ኤጶ ስንፋና ካባሲክ «ሀን ቢስቴፋ ዳስ ቦርአክ ኪንና ፋር ስንና ቦርአ ፋሩስ ቤስቶናክ ችማናስ ኦራ ደይ ኣቾ ስንና አሩክናዋ እሳ እሳ ሙንታንናዋ ኤጵነዋ ግሩነ አሲስታንና ቴትኒ ኦዳክዋ» ይፋ ሳፋራታ ካፕቴራ ዬሬ አሱዋ። ኦማ ኡግናክ ደይ ዎሲባስ ቤቴክርስታንኒ ሀእሱነዋ ሀኦኒ ሺጶኒ ስትርነ አሲ አሱኒ ዞንስነ፤ ኤሲስማቶ ደይ ቤቴክርስታንኒ ዞንስኒ ሜናዋ ባሶትን አርጋስሴፌ ሜና ፎሶነክ ሾልሲፋ አማላኒ ኪቶ ኤጶዋ።
\ip ኮእባስታክ ደይ ጢሞትዮስ የሱስ ክርስቶስኒ ማአ ዎስትኛ ኣካክ ስናናክ ሾልሲናማቶናዋ ሾዎ ክርስታናኒ ሜያኪክ ፋ ግድባሲክ ጳዉሎስኒ ኪቶሶንቱ ቤሲፋ
\iot ማፃፋስ ስሩክ ኤጵና ኤጶባስ
\io1 ጋችግሩ \ior 1:1-2 \ior*
\io1 ቤቴክርስታኒነዋ ዎስትኛባሳክቶና \ior 1:3—3:16 \ior*
\io1 ጢሞትዮስኒክ ዎስቶሲ ቾዋክ እምቴ አስሱ \ior 4:1—6:21 \ior*
\c 1
\p
\v 1 እንኖትን ፋቲ ሀኦሲክ፤ አብድኒ ስና የሱስ ክርስቶስኒ አጃጂሲክ የሱስ ክርስቶስኒ ዎሲ ስና ጳዉሎስኒኪን፤ 
\v 2 አማኖክ ፉቶኒ ናታ ስና ትሞትዮስኒክ አባኒ ስና ሀኦስኪን ደይ ዳምኒ የሱስ ክርስቶስኒ ኦትማሴዋ ፋክያሴ ደይ ናጋሴ ኔክ ስንፋውጝዋ።
\s1 ኤሽኒ አሱስን ቴትቤሲሶን ኦዶሶነክ ማኬ
\p
\v 3 ሜቀዶኒያ ሀምፋት ኔክ አዳራ ይናማቶ ኤስታ ፌሴ እሳ እሳ አሱኒ ሜያ ኤሻ አስሱ አሱኖይቴማቶ ዛጉታክ ኤፌሶኑክ «ዱዋ» ይጝዋ። 
\v 4 ኬእኖይ ቶቾነዋ ኮእባ ፎንቶ ስና ኮንቶኒ ፋዳሲ ዎልሴሬ ግርሶኖይቴማቶ አጃጆዋ። ኤስ ዉዛሲክቶ ክሪኪርቱ ኤጳ ያፋታኖ አማኖክ ዛግቴፋ ሀኦሲ ዎስቶክ ኣነ ኬእፋዋ። 
\v 5 ሀን አጃጅሲ አላማ ደይ ካይማ ንብስን፤ ማአ ካኑስን፥ ፉቶኒ አማንቶታን ቤስቴ ኬሽታናዋ። 
\v 6 እሳ እሳ አሱኒ ሜያ ሀን ኤፋቴና ቾዋስታን ኦር ኬሴሬ ኬእኖይ ዎላሲ ዎልሴቴ። 
\v 7 ኤስ ባሮን ዛግሴፌስ ቱማሲ አሲኛ ስናክ ሾልሴፋትዋ። ስኑንታኖ ማክሴፌ ባሮን ኣነ አርሴፌ ወደይ እንኖ ፉቶዋ ይሴፌ ዉዛሶን ኣነ ያዳቴሴፌዋ። 
\v 8 አሱ ማእሲሬ ዎስቴፋናነ ቱማስ ማአር ስንባሶን አርፌኒዋ። 
\v 9 ኤሲስማቶ ደይ ቱማስ ቱምቴናስ ማአ አሱኒ ሜያክ ስና ሻኪናማቶ አርፌኒዋ። ቱማ ቱምቴናስ ማጙኒ ሜያክናዋ ቱማሲ ፎንቶ ዉዛሶን ዛግሴፌ ባሶክ፤ ሀኦሶን ሺጶ ቤይፌ ቦርኒ ሜያክ፤ ኮርቶቤስ ፎንቶ ሀኦሲ ካምኒማቶ ፎሶን ካሺፌ ባሶክ፤ አባ እንቶሶን ዎርሴፌ ባሶክናዋ ካ ዎርሴፌ ባሶክናዋ 
\v 10 ኤሲስማቶ ደይ ጌርኬሴፌ ባሶክናዋ ኣርቃርና ኣርቃርና ዎል ኤጴፌ ባሶክና፤ አሱኒን ኡኬ ኤጴ ታሜ ዋግሴፌ ናጋደኒ ሜናዋ ኤሽቱኒ ሜናዋ። ኤሻክ ቴይፌ ባሶክናዋ ፉቶኒ አሱሶን አልዳ ዛግሴፌ ባሶክዋ። 
\v 11 ፉቶኒ አሱስ ሀኦስ ታክ አዳራክ እምና ኡልፍንቶ ምስራቹኒ ካማስኔን እሳርባ ፋርዋ።
\s1 ጳዉሎስ ሀኦሲ ፋኪኒ ቾዋክ እምና ጋላታ
\p
\v 12 ታን ዎስቶክ ኮሪሬ አማናምቶ አስሱ ዛግሬ ፋድሬ ታክ ሁግና እማ ዳምኒ የሱስ ክርስቶስኒን ጋላቴፋዉጙዋ። 
\v 13 አዉነ ፋሮኑ ዜሞ ስናክ ክርስቶስኒን ሜአሪ፤ ካብግር፤ ሳልጲሲር ስንፋናክኑ ባር ታክ ፋኪ። ባር ደይ ታክ ፋኪናስ ታ ኤስ ዉዛሲክቶኖን ዙትራ አሩኖይናዋ አማኖኖይና ዛግናር ስንና ቦርአዋ። 
\v 14 ሀኦኒሲ ኦትማ የሱስ ክርስቶስኒኪን ስና አማንቶሴዋ ኬሽታናሴ አነ ዳይስቴራ ታክ እምቴ። 
\v 15 «የሱስ ክርስቶስ ቦርኒ ሜያኖን ፋቱክቱ ሀን ዳስታ የዋ» ይፋ ካማስ ፉቶነዋ አሱ ዙቴሬ ኤጴቶናክ ሾልሱዋ። ቦርእኒ ሜያሲን አሪክሮን ቦርእባ ፌናስ ታዋ። 
\v 16 ስኑንታኖ ታክ ፋኪያ ዛግቴዋ። ፋኪያ ዛግቴናስ የሱስ ክርስቶስ ኮእባ ፎንቶ ፋኪባሶን አሱ ዙታምባሴ አሲስታን አሪክሮን ቦርእ ስና ታይስታ ቤሱባሲክዋ። ኤሲስ ደይ ባርክ አማነፌ ባሶ ኮእባ ፎንቶ ካ ዳኖሶኒ ባሶክ ቤሶ ስናናክዋ። 
\v 17 ኤስ ባሪ ቦርኣ ኮእባ ፎንቶ ታቶ፤ ክቱኖይ ባሪክ፥ ቢስቶኖይ ባሪክ፤ እሳ ሀኦሲክ ኡልፍነዋ ጋላትነ ሀውጙኔን ካብራ ሀማ ኮእባ ፎንቶኖን ስንፋውጝዋ! ኣሚን። 
\v 18 ናታ ትሞትዮስኖ! ዜሞ ስናክ ኔክ ራጅክ ማክቴናሲማቶ ሀን አጃጂሶን አዳራክ ኔክ እማናዋ። ኤስ ራጅሲክ ዞኑስቴፋት ማአ ኔቦ ኔቦዋ። 
\v 19 አማኖነዋ ማአ ካኑነ ኔክ ፋፋዉጝዋ። እሳ እሳ አሱኒ ሜያ ካኑቤሲሶን ኦዶኖይ ሜርኬቢሶን እፑዋስ ካልላ ትሽክፋናሲማቶ አማንቶቤሲሶን ትሽክሴቴ። 
\v 20 ኤስ ባሶስን ሄሜነዎስናዋ እስኪንድርና ፌሴቴርዋ። ባሶ ሀኦስታ ሜእኒ ካማ ማክሶኖይቴማቶ አርሶነክ ሴጣናሲክ ኣትራ እምጝዋ።
\c 2
\s1 ኣካክ ሀኦ ሺጶኒማቶ
\p
\v 1 ሀኦሶን ሺጶክናዋ ኡልፍንባሬ የሬ ካክና ማምሱ፥ ሺጶ፥ ናቱነዋ ጋላትነ አሱ ዙታምባሴ አሲክ ዛግቶናክ ኪትፋዉጝዋ። 
\v 2 ሀኦሶን ድጎክናዋ ማአ አማላክን ዞኑስቶክና፤ ናጋክናዋ ኮቾኖን ፎኒክ ደይ አርክሮን ታቶኒ ሜያክናዋ ሀእሱኒ ሁግናቤሲ ፋና ቴጋ ድማስታ ፌሴ ባሶክ ዙትራ ሺጶቲ። 
\v 3 ኤስ ኤፋ ሺጶስ እኖትን ፋቲ ሀኦሲ ስና ማአር ደይ ግርሱ ዉዛዋ 
\v 4 ሀኦሲ ሳፋራ አሱኒ ሜያ ዙቴሬ ፋርሶነክናዋ ፉቶሶን አርሶነክዋ። 
\v 5 ሀኦስ እሳርዋ፤ ጋነያሲ ፌፋት ሀኦሴዋ አሱስንና አሲን ጋንስፌስ ደይ እሳርዋ። ኤስ ባር ደይ አሱ ስና የሱስ ክርስቶስዋ። 
\v 6 አሱኒ ሜያኖን ዙትሬ ቦርቤሲስን ፉሮክ ቴትባሶን ፉሪ ዛግሬ እማስ ደይ ባርዋ። ኤሲስ ደይ ፉቶኒ ዎንባ ካርፋና ካባሲክ ሀኦሲ ፋቱኒ ዎስቶሶን ቤስፋ ዛላዋ። 
\v 7 ታ ደይ አማንቶኒ ካማሶንናዋ ፉቶኒ ካማሶንና ማኮክ ዎሲናዋ አስኛና ስንና አዛብኒ ሜያክ ዎስቴናስ ኤስ ባሪ ቦርኣዋ። ኤስ ባሮን ደይ ማኬፋና ካባሲክ ፉቶሶንቱ ማኬፋንታኖ ኤሻኖንታዋ። 
\v 8 ኤሴ ኣፍፋ ድማስታኑ ፌ ኣርቃሱኒ ሜያ ግእነዋ ፋሶነ ቤየ ቴትቤሲሶን ሀኦሲክ ኮሪሬ ኩሹብሲሶን ካቡግሴሬ ሺጶሶነክ ሾሌፋዉጙዋ። 
\v 9 ኤሲስማቶ ደይ ማሽካ ሜያ ሶምቤሲሶን ኬሹክ ወደይ ዋርቄክ ወደይ እንቁክ ወደይ ዋግባ ችማ ማምኒ ማያክ ስኖይናሮን ድጋክናዋ ቴትኒ ዳ ኤጳክና ባሶክ ሾልሱ ስና ማማ ማዮቶ። 
\v 10 ሀኦሶን ሺጴፌኒ ይሴፌ ማሽካ ሜያ ዛግሶነክ ሾልሱ ኡግናክ ማአ ዎስቶክ ቴትቤሲሶን ኬሹሶቶ። 
\v 11 ማሽካ አሱ ድጎክናዋ አጃጃሞክና አሩን። 
\v 12 ማሽካ አሱ ኣርቃሱኒን አሱናክ ወደይ ኣርቃሱሳታ ሀእሱኒ ሁግናባ ፎናክ ታ ኣፋ ማእ ኡናዉዛ። ባር ሻኩናክቱ ሾልስፋዋ። 
\v 13 ዜምሜ ቴስቴስ አዳምዋ፤ ኦርፎቱ ሄዋን ደይ ቴስቴዋ። 
\v 14 ደይ ኤሽቴስናዋ ሀኦሲ ቱማኖን ኣታስና ማሽካስታኖ አዳምቴዋ። 
\v 15 ስኑንታኖ ማሽካሱ አማኖክናዋ ኬሽታናክና ደይ ኮርቶክ ቴትባሶን ኦድዳ ፋራ ናኒ ኮጶክቱ ፋሩናዋ።
\c 3
\s1 ቤቴክርስታንኒ ዞንስኒ ሜያ
\p
\v 1 እሳ አሱ፦ «ቤቴክርስታንኒ ኩርኡ ስናናክ ሾሌፋናነ ኡልፍንቶ ዎስቶቱ ካልቴፌዋ» ይፋ ካማስ ፉቶዋ። 
\v 2 ኤስ ባሪ ቦርኣ ቤቴክርስታንንኒ ኩርኡ ስና አሱ ዝናባ ፎንቶ፥ እሳ አሱኒ ቴጎ፥ ማአሪክ ፌፌር፥ ቴትባሶን ሀእሲር፥ ሾልሱ ኡግናሲክ ዎስቴር፥ እርባኒ ኤጳር፥ አሱክ ችምባ ፌናር፤ 
\v 3 ዛዮኖር፥ ክርክር ሹንኖር፥ ጋራም፥ ቾዋ ሾሎኖር፥ ዋጋ ኬሽቶኖር፤ 
\v 4 ባሳ ኬርኪ አሱኒ ሜያኖን ማእስሬ ሀእሱክ ችማር፥ ናንጎትባሲክ ሾልሱ ኡልፍና እሜት አጃጃሜር ስናናክቱ ሾልሲፋዋ። 
\v 5 አሱ ባሳ ኬርኪ አሱኒ ሜያኖን ሀእሱክ ችምኖር ስንፋናነ ሀኦኒ ቤቴክርስታኒሶን ኣካክ ሀእሱክ ችምኒርን? 
\v 6 ቤጋንቶክ ቴትባሶን ቴግሬ ዳቡሎስኒስታ ማጝሱ ካቴናሲማቶ ስንኖይናማቶ ጋድዶ አማኚስ ቤቴክርስታኒሲ ዞንሲ ስናናታዋ። 
\v 7 ዝናክናዋ ሴጣናኒ ኤሽምያሲ ግሩኖይናማቶና አማኖኖይ አሱኒ ሜኒ ስና ማአ ሱንባ ፎናክ ሾልሲፋዋ።
\s1 ዳቆኝኒ ሜያ
\p
\v 8 ኤሲስማቶ ዳቆኝኒ ሜያ ኡልፍንቶናዋ ዎሉምቤሲሲክ ዛግ፤ አካማ ዋይኒን ኡሻ ኡሽኖር፤ ዋጋ ጆሮኖር ስኖነክቱ ሾልሲፋዋ። 
\v 9 ደይ አማንቶኒ ኣቾ ቾዋሶን ካይማ ካኑክ ኦዳር ስናናክ ሾልስፋ። 
\v 10 ባሶ ደይ ዜምሜ ፋታንቶሶቶ፤ ኤስታን ዝናቤስ ፎንቶ ስነሬ ቤስቴሴፋቴነ ዳቆኝ ስንነ ዎስቶሶቶ። 
\v 11 ኤሲስማቶ አሱቤሲሲክቶ ኡልፍንቶ፤ አሱኒን ሀማቶኖር፤ ማአሪክ ፋር፤ ዙታምባሴ አሲስታክ አማናምቴር ስናናክ ሾልሲፋ። 
\v 12 ዳቆኝኒ ሜያ እሳ እሳርቤሲስ እሳ አሱኒ ቴጎ ስኖነክ ሾልሲፋ። ናንጎትቤሲሶንናዋ ኬርኪ ባሶትንና ማአሪክ ሀእሱሶነክቱ ሾልሲፋ። 
\v 13 ዳቆኝኒ ዎስቶሶን ማአሪክ ዎስቴሴፌ ባሶክ አካማ ኡልፍናቱ ሾልሲፋዋ። የሱስ ክርስቶስኒስታ ፋ አማንቶቤሲሲክ ደይ ድጋ ፎንቶኖን ማኮኒ ችማ ዳኖሶነዋ።
\s1 አካማ ኣቾ ዉዛ
\p
\v 14 ኔኪ ዮናክ አብዲ ዛግፋናክኑ ሀን አጃጂሶን ኔክ ትችፋዉጝዋ። 
\v 15 ኤስ ባሮን ደይ ትቺናስ ታ ዎክፋናክኑ አሱኒ ሜያ ሀኦሲ ኬሩክ ኣካክ ፎሶነማቶ አሩታክዋ። ኬያስ ደይ ሀየዋ ሀኦሲ ቤቴክርስታኒዋ። ባር ደይ ፉቶኒ ዬቶነዋ ካፑትነዋ። 
\v 16 ፉቶኒ ሀይማኖቲሲ ኣቾ ቾዋ ኤክ ሀጝ ኡባ ፎንቶኖን አካማዋ። ኤስ ባር ደይ ሀኦስ፦
\q1 «አሱ ስንነ አምማኖን ቤስቴ፤
\q2 ፉቶ ስንባስ አያናክ አርቴ፤
\q2 ሀኦኒ ዎሲያክ ቤስቴ፤
\q2 ዳራ ዙታምባሴ አሲክ ማክቴ፤
\q2 ሀን ዳስታኪ ፌ አሱኒ ሜያ አማነሴቴ፤
\q2 ኡልፍናክ ደን ሳማ ሀሚ» ይፋርዋ።
\c 4
\s1 ኤሽቱ አስሲኛኒ ሜያ
\p
\v 1 ኮርቶ አያናስ አምማኖን፦ «ኦርፎስታኪ ነያሲ እሳ እሳ አሱኒ ሜያ ኤሽቱ ዳግሲፋ አያናሶንናዋ ኪናስ አሱክና ዞኑስቴሴሬ ሀይማኖትቤሲሶን ሞርሞሶነዋ» ይፋዋ። 
\v 2 ኤስ ኤፋቴና አስሱሲ ኮርአ ታነ ፌ አሱ ኣፌ ኡሲ፤ ኤሻኖን ዎል ሌሴፌ ካባሲክ ኪቹ ብታክ ኪቼርነ ፋሮን ታቻ ካኑቤስ ፋና አሱኒ ሜያክጝዋ። 
\v 3 ኤስ ኤፌቴና አሱኒ ሜያ ኤጵነ ግሩነ አሲን ካለቱ ፌሴፌዋ። አማነፌ ባሶናዋ ፉቶሶን አርሴፌ ባሶና ባሮን ጋላቴሴት ሙሶነክ ሀኦስ ቴስና ሙሶን፦ «ሙትታ» ይት ካለፌ። 
\v 4 ሀኦስ ቴስና ሙስ ዙቴራ ማአርዋ። ጋላታክ ኤጴቴሴፋቴነ ሀእቶኒ ዉዛ እሳንነ ኣፋዋ። 
\v 5 ሀኦሲ ካማክናዋ ሺጶክና ካይማ ስናናዋ።
\s1 ክርስቶስኒክ ማአ ዎስትኛ ስና
\p
\v 6 ሀን አሩሶን አማኝኒ ሜያክ አስሳታነ የሱስ ክርስቶስኒ ማአ ዎስትኛ ስናታዋ። ኤስ ፉቶኒ ካማሲክ ዞኑስቴፋታነ ድችኔሶን አምማኖን ቤሱታዋ። 
\v 7 ሀኦሶን ሺጶ ስንኖይ ሀን ዳስታኪ ቶቾስታን ዎክዋ። ሀኦሶን ሺጶክ ቴትኔስ ዶስቶናክ ዛጉዋ። 
\v 8 አቱ ችማናክ ዛግፋ አሱሲክ ቴትኔስ ዶስቶናክ ዛጉ ኬእፋናስ ጋሮኖንጝዋ። ስኑንታኖ ሀኦሶን ሺጶክ ቴትኔስ ዶስቶናክ ዛጉስ ሀሽቲ ባሪክናዋ ዮኒ ካሲክና አብድባ ፋር ስንና ቦርአ ዙታምባሴ አሲክ ኬእአርዋ። 
\v 9 ሀን ካማስ አሱ ዙቴሬ ኤጴቶናክ ሾልሱ ደይ ፉቶ ዎላዋ። 
\v 10 እንኖ አሱ ዙታምባሴ አሲን አርክሮን ደይ አማነፌ ባሶትን ዙትራ ፋቱኒ ሀየዋ ሀኦሲክ አብድ ዛግኒር ስንና ቦርአ ዎስቶክ ሆፕፌኒ ደይ ካቤፌኒዋ። 
\v 11 ሀን ዉዛሲክቶኖን አጃጆ ደይ አስሱ። 
\v 12 ናኦ አሱ ስንታ ቦርአ ኦኑ ኔን ካሹናታ። ስኑንታኖ ዎላክ፥ ፎክ፥ ኬሽታናክ፥ አማኖክናዋ ኮርቶክና አማነሴፌ ሜያክ ቤሶ ስጝዋ። 
\v 13 ታ ዮና ካባኔን ኮርቶ ማፃፋሶን አሱኒ ሜያክ ፌሬቱክ፤ ማኮክናዋ አሱክና ችምማ። 
\v 14 ኔክ ራጅ ማክቴና ዎኖኔንናዋ ቤቴክርስታኒሲ ኩርኡኒ ሜና ነይስታ ኩሹቤሲሶን ታእሬ ሺጴሴቴ ዎኖት ኔክ እምቴ ሀኦሲ ኦቱምኒ እማኖን ዳጎታታዋ። 
\v 15 ነ ድቻሶን አሱኒ ሜያ ዙቴሬ ብዮነክ ኤስ ዉዛስታ ችምማ። ኤስ ዉዛሲክቶኖን ዎስቶታ ፌሹክ አቱኔሶን ዙትራ ባሶክ እምማ። 
\v 16 ነ ቴታሲክናዋ አሲፋታ አሱሲክና አሩዋ። ኤስ ዉዛሲክቶታ ችምማ። ኤስ ባሮን ዛጋታነ ቴትኔሶንናዋ ኦደፌ ባሶትንና ፉኦታዋ።
\c 5
\s1 አማኝኒ ሜያክ ሾልስ ኪቶ
\p
\v 1 ኩርኡ አሱስን አባ ዛግራ ኪቱታኖ ኬኡታታዋ። ናኦ ኣርቃሱኒ ሜያኖን አይኒ ሜያ ዛግራ ኤጵዋ። 
\v 2 ኤሲስማቶ ኩርኡ ሜያኖን እንቶ ዛግራ ደይ ናኦ ማሽካ ናንጎታሶን ኤት ዛግራ ማአ ካይማክ ቢዋ። 
\v 3 ቴጎቤሲ ክትፋን ፉቶክ አርጋሱ ሾልሲና ድቻ አሱሲክቶኖን ኡልፍንሱዋ። 
\v 4 ኣፋ ቴጎባ ክትና ድቻ አሱሲ ናንጎትባ ወደይ ናባሲ ናንጎትባ ፋፋናነ ኤስ ናንጎታስ ዜምማ ኬርክ ሜያኖን አርጋሱናክ፤ ኮኒ ባሶክናዋ አፖኒ ሜያክና ድችሴቴ ኮዋሶን ዎልጉናክ ሀኦኒ ካምኒማቶ ሾልሱ ስንባሶን አሩሶንዋ። ኤስ ባር ደይ ሀኦሶን ግርሱኒ ዉዛዋ። 
\v 5 ድቻ ስንና ቴትባክ ፋፋ አሱስ አብድባሶን ሀኦስታ ዛግራ ዋላክናዋ ዎናክና ሀኦኒ አርጋሱ ዳናናክ ሺጶክ ችምማ ፎንዋ። 
\v 6 ስኑንታኖ ሀን ዳስታኪ ፎኒ ግራሶን ሾሌፋ ድቻ አሱ የሮባሴ ፋጌዶ ክቱዋ። 
\v 7 ዝና ፎንቶ ስንነ ፎሶነክ አሱኒ ሜያኖን አሱዋ። 
\v 8 እሳ አሱ ባሳ ቴትኒ ኮኒስን ወደይ አርክሮን ታእሶ ባሳ ኬርኪ አሱኒ ሜያኖን አርጋሱኖር ስንፋናነ ሀይማኖትባሶን ሞርሜ አሱዋ፤ ደይ አማኖኖይ አሱሳታን ደናሎ ማጙዋ።
\p
\v 9 ዎጋባስ እሱናስሬኔን ዳካሎ ስና ቴጎባስ ክትና አሱሶን ድቻ አሱሲክቶኒ ፋዳሲ ትቹታታዋ። ደይ እሳ ቴጎኒኪ ግርራ ፋር ስናናክ ሾልሲፋ። 
\v 10 ባር ናንጎትኒ ድቹክ፤ እርባኒን ኤጴቶክ፥ አማኝኒ ሜኒ ዎቾ ማሳክ፥ ራክኮሲ ፌሴ ባሶትን አርጋሱክናዋ ማአ አማላክና ቴትባሶን እማክና ማአ ዎስቶክ አርቶ ስናናክቱ ሾልሲፋዋ። 
\v 11 ባሶ አሽኒ ኤናንቶስ ባሶትን ሜሬራ ክርስቶስኒስታ ፋ ኬሽታንቤሲስ ዮእፋና ካባሲክ ቴጎኒኪ ግሩክ ሾልሴቴር ስንና ቦርአ ናኦ ድቻ አሱሲክቶኖን ማዝጋቢስ ትቹታታዋ። 
\v 12 ኤስ ድቻ አሱሲክቶ ዜሞቲ ግርሴቴ ቴያሶን ኦዳ ቤየቴር ስንና ቦርአ ባሶስታ ማጝሱ ካቴርዋ። 
\v 13 ኤስ ባርስታን ደይ ዎስቶኒ ኮታክ አርሴቴር፤ ኤስ ባር ኮእባ ስኖይናሮን እሳ ኬሩን እሳ ኬር ሀሜፋፌ ባሶክ ሾልሱኖይ ዎል ላ ዎል ሌሴት ሀማቴትናዋ አሱኒ ቾዉሲ ግርሴር ስነቴር። 
\v 14 ኤስ ባሪ ቦርኣ ናኦ ስንነ ፌሴቴን ቴጎቤስ ክትና ማሽካ ሜያ ግርሴሬ ናንጎታ ኮኑሶነክ፤ ኬቤሲሶን ሀእሱሶነክ ኪትፋንዋ። ኤስ ባሪክ ጉማስ ሱንኒ ማጝሱኒ ኡግና ቱርኩናዋ። 
\v 15 ዜሞ ስናክ ቴጎባ ክትና እሳ እሳ ማሽካ ሜያ ሴጣናሲክ ዞኑስቴሴሬ አማንቶኒ ኡግናስታን ሻቴሴቴዋ። 
\v 16 ክርስታና ስና እሳ አሱ ኬባሲክ ቴጎባ ክትና ድቻ አሱሲክቶ ፋሴፋናነ ቤቴክርስታኒሲክ ባአ ስኖኖይቴማቶ ኤስ አሱሲክቶኖን አርጋሱን። ኤካክ ቤቴክርስታኒስ አርጋሱኒ አሱባ ፎንቶ ድቻ አሱሲክቶኖን አርጋሱክ ችማናዋ። 
\v 17 ቤቴክርስታኒሶን ማእስሬ ሀእሲፌ ባሶ አርክሮን ደይ ካምባሶን ማኮክናዋ አሱክና ሆፕሴፌ ኩርኡኒ ሜያክ አካማ ኡልፍና ባሶክ ሾልሲርዋ። 
\v 18 ኮርቶ ማፃፋስሲ፦ «ሜያ እችፋ ጋችዋሲ ኖኖኖን ታርአታታ» ይስቴዋ። ኤሲስማቶ ደይ፦ «ዎስትኛሲክ ዳሞዛባ ካስቶናክ ሾልሲር» ይፋዋ። 
\v 19 ሄፕ ወደይ ኬዝ አሱኒ ሜያ ዛላ ማኮሶኖይቴሮን ቤቴክርስታንኒ ኩርኡሳታ ካእርፋ ማላታሶን ኤጳቶታታዋ። 
\v 20 ኦምኒ ሜያ ድግሶነክ ቦርአ ዎስቴ አሱስን አስሱ ዙታምባሴ አሲ ስናክ ኬእኡዋ። 
\v 21 ዛግፋታ ዉዛ ዙታምባሴ አሲስታ እሳይስን ኦሚሳታን አርክሱኖይ ወደይ ኦኒንኑ ኮሩኖይ ሀን ኪትፋና ባሮን ዛጉታክ ሀኦሲ ስናክናዋ የሱስ ክርስቶስኒክ ኮርቴ ሀኦሲ ዎስኒ ስናክና አዳራ ይፋዉጙዋ። 
\v 22 ኩሹኔሶን አሱኒስታ ታእሬ ታትሱክ ታፕቶታታዋ። ቴትኔሶን ካይማክ ኦድታኖ ኦም አሱኒ ሜያኔን ቦርኒ ዎስቶስኔን አነ እሳር ስንናታታዋ። 
\v 23 ካትኔሲ ሜሮሲክናዋ ዎንና ዎንና ሜሬፋ ሜሮኔሲክና ጋሮ ዋይኒን ኡሻ ኡሽታኖ አካ አካ ኡሻታታዋ። 
\v 24 እሳ እሳ አሱኒ ሜኒ ቦርኣስ አማ ስንባሲክ ታእኒን ማጝሱ ካቶኒር ስንባሶን ቤስፋዋ። ስኑንታኖ ኦም አሱኒ ሜኒ ቦርኣስ አምማኖን ቤስቴፋናስ ዎካዋ። 
\v 25 ኤሲስማቶ ማአ ዎስቶስ ደይ አምማዋ፤ አምማ ስንኖይ ባር ደይ ኣቸራ ኣፋ ፉእቶናዉዛ።
\c 6
\s1 ቦዝኒ ሜያክ እምቴ ኪቶ
\p
\v 1 ሀኦሲ ሱንነዋ እንኖ አስሱሴ ሜቾኖይናማቶ ቦዝኒ ሜያ ዙቴሬ ዳምቤሲሳክቶኒክ ሾልሲፋናማቶ ኡልፍንሱሶቶ። 
\v 2 ዳምቤሲስ አማኝ ስነ ቦዝኒ ሜያ ዳም የሱስኒኪ ካሞ አይ ስነቴ ቦርአ ካሹሶሶኔታዋ። ኤስ ባርስታን ዎሲቴሴፌ ዎስቶስታን ቡአ ዳነፌ ዳምኒ ሜያ አማኝ ደይ ሹንቶ አይኒ ሜያ ስነቴ ቦርአ ዜሞቲስታን አርክስሬ ባሶክ ዎስቶሶቶ። ነ ደይ አሱታክናዋ ኪቱታክና ሾልሲናስ ኤሲሶጝዋ።
\s1 ኤሽኒ አሱነዋ ፉቶኒ ኦቱምነ
\p
\v 3 ፉቶኒ ሀኦሶን ሺጶኒ አሱስነን አነ እሳር ስና ባሮን፤ ዳምኒ የሱስ ክርስቶስኒ ካይማ ካማሶን ቤይፋት ኦማ አስሱ አሲፌ ባር፤ 
\v 4 ኤስ አሱስ ቤጋንቶክ ክቴ እሳ ዉዛኑ ኣነ አርፌዋ። ስኑንታኖ ስንኖይ ካምኒ ካራካሮነዋ ፋሶነ አሲ ማጙ ኤናንቶቱ ባሳስ ፋርዋ። ኤስ ባር ደይ ማጙ ኮና፥ ፋሶ፥ ሜአ፥ ማጙ ላጰባቶነ፤ 
\v 5 ኤስ ዉዛሲክቶ ደይ ፉቶሶን ኦምቴ አሱኒ ሜኒ ጋነያሲ ዛግቴፋ ቡዱኖይ ክርክርሶንቱ ኤጳ ያፋዋ። ኤስ ኤፌቴና አሱኒ ሜያ ሀኦሶን ሺጶስ ባሶክ ኦቱምኒ ዳንኒ ኡግና ስንናቱ ቤስቴፋዋ። 
\v 6 ስኑንታኖ፦ «ፋዪስ ታክ ሆሮና» ይፌ አሱሳ ሀኦኒ ሺጶስ ባሪክ አካማ ቡአባዋ። 
\v 7 እንኖ ሀን ዳስታክ እሳ ዉዛነ ኣነ ኤጳ ዮዌኒዋ። እሳ ዉዛ ደይ ኤጴ ሀን ዳስታን ኤጳ ሀማኒር ኣፋ። 
\v 8 ኤስ ባሪ ቦርኣ ሙነዋ ማምነ እኖክ ፋፋናነ ሆሮናዋ። 
\v 9 ስኑንታኖ ኦቱም አሱ ስናክ ሾልሴፌ ሜያ ፋታናሲቱ ጋንደሴፌዋ። አሱኒ ሜያኖን ማጝስራ ትሽክፋ ኬእኖይ አካማ ማጙ ኤናንቶኒ ኤሽምያሲክቱ ኦቴሴፌዋ። 
\v 10 እሳ እሳ ሜያ ኤስ ባሮን ኤናንቴሴሬ ሀይማኖትስታን ሻቴሴሬ አካማ ሻናሲ ጋንደሴቴዋ። ኤስ ባር ደይ ስንፋናስ ብርኒ ሹናስ ማጙ ዙታምባሴ አሲ ቱዛ ስንና ቦርአዋ።
\s1 ጳዉሎስ ትሞትዮስኒክ እምና ኪቶ
\p
\v 11 ሀኦኒ አሱኖ! ነ ኤስ ባር ዙታምባሴ አሲስታን ሻቶዋ። ኦኮ ስናሶን፥ ፉቶኒ ሀኦሲ ካምኒማቶ ፎሶን፥ አማንቶሶን፥ ኬሽታናሶን፥ ፋክያሶን፥ ችምሜ የሮሶንናዋ ጋራማሶንና ሾሎዋ። 
\v 12 ማአ አማንቶኒ ኔቦሶን ኔቦዋ። ሾዎ ዛልኒ ሜኒ ስና ፉቶኒ ዛላ ማኬታ ኮእባ ፎንቶ ካሶን ዛግራ ኤጵዋ። 
\v 13 ዙታምባሴ አሲክ ካ እምፋ ሀኦሲክናዋ ፐንቴናው ጵላጦስኒ ስና ማአ አማንቶክ ዛላ ማኬ የሱስ ክርስቶስኒ ስናክና ኔን አጃጀፋዉጝዋ። 
\v 14 ዳምኒ የሱስ ክርስቶስ አምማኖን ቤስቶና ካባኔን ሀን አጃጂሶን ኪናነዋ ዝንነ ፎንቶና ስንና ኦድዋ። 
\v 15 ኤስ ክርስቶስኒ አማ ቤስቶስ ሱስቶነዋ ባር ባር አእስኛ ስና ታቶኒ ሜኒ ታቶ፥ ዳምኒ ሜኒ ዳም ስና ባር ዱስና ዎናስታክ ስናናዋ። 
\v 16 ባር ባርቱ ክቱኖርዋ፤ ኦኑ ታኤ ብያክ ችምኖይና ቻሬፋሲቱ ፌፌዋ። ባሪን ብያር እሳር ኦኑ ኣፌ፤ ኦኑ ደይ ባሪን ብያናክ ኣፋ ችማናዉዛ። ኡልፍነዋ ኮእባ ፎንቶ ሁግናነ ባሪክ ስንፋውጝ፥ ኣሚን።
\p
\v 17 ሀን ዳስታኪ ኦቱምኒ ሜያ ትሹኒ ኦቱምቤሲሲክ ጌእኦኖይቴማቶ ወደይ አብድቤሲሶን ስንኖይ ኦትማስታ ዛግሶኖይቴማቶ አጃጆዋ። አብድቤሲስ እኖትን ግርሱናክ ዙታምባሴ አሲን አርክስራ እምፋ ሀኦስታ ዛግሶነክ አጃጆዋ። 
\v 18 ደይ ማአ ዎስቶ ዎስቶሶነክ ባሶክ ፋ ባሮን ደይ ሃእኤ እማክ ማእ ኡሶነክ አጃጆዋ። 
\v 19 ኤስ ባሪክ ፉቶ ስና ካሶን ዳኖነክ ዮኒ ነያሲክ ደይ ዛጋ ካፑትባ ፋና ኦትማ ባሶ ቴታሲክ ዙቱሶነዋ። 
\v 20 ትሞትዮስኖ! አዳራክ ኔክ እምቴ ባሮን ኦድዋ፤ ሀኦሶን ኡልፍንሱኖር ባክ ዎላስንናዋ ቱጋኦክ ኤሽኒ አሩ ስና ቴችማስን ዎክዋ። 
\v 21 ኤስ ኤፋቴና አሩኒ ፋር ይሴት ፌሴ እሳ እሳ አሱኒ ሜያ ኤስ ባሮን ዛጉክ አማንቶኒ ኡግናስታን ሻቴሴቴዋ። ሀኦሲ ኦትማ ንቶኔን አነ ስንፋውጝዋ።