\id 1TH 1 TH -Yemsa New Testament
\ide UTF-8
\h 1 ቴሴሎንቄ
\toc1 ዎሲ ጳዉሎስኒ እሶንሳ ዎስያ ቴሴሎንቄኪ አሱኒ ሜያክ
\toc2 1 ቴሴሎንቄ
\toc3 1 ቴሴ.
\mt2 ዎሲ ጳዉሎስኒ እሶንሳ ዎስያ
\mt1 ቴሴሎንቄኪ አሱኒ ሜያክ
\imt1 ጋችግሩ
\ip ቴሴሎንቄ ሜቀዶንያ ይስቴፋ ሮምንኒ ሀእሱሲ ፋ አሪኪ ካታማዋ። ጳዉሎስ ቴሴሎንቄኒ ቤቴክርስታኒሶን ቶክናስ ፍልጲስዩስኖን ቤየ ሀሚናኔን ኦርፎዋ። ስኑንታኖ አይሁድኒ ሀይማኖትሶን ኤጴቶሶነክ ታእሴሴሬ ፌሴ አዛብኒ ሜያ ጳዉሎስ ማኬፌና ክርስትናኒ ዎስያሲክ ዛቴሴሬ ፌሴቴር ስንና ቦርአ አይሁድኒ ሜያ ኮነሴሬ ጳዉሎስኒን ቱጋኦክ ካቡግሴት ፌሴቴር። ኤስ ባሪ ቦርኣ ጳዉሎስ ቴሴሎንቄኖን ጋፍክሬ ቤርያ ሀማክ ባሪክ ግድ ስኒ። ጋሮኖን ፌሬ ቆሮንጦስ ካርናይሴ ታእሴሬ ፌፋት ባሪን አርጋስፌ ትሞትዮስ ቴሴሎንቄ ሀሜ ዎሊናይሴ ቤቴክርስታኒሲ ፋ ቾዋሶን እሳርባ እሳርባሲክ ኮቴ ማኬ።
\ip ጳዉሎስ ቴሱኒ ዎሲያሶን ቴሴሎንቄኪ አሱኒ ሜያክ ትችናስ ክርስታናኒ ሜያኖን ችኑክናዋ ዛጉክናዋ። ባሶ አማንቶሲክናዋ ባሶ ኬሽታናሲክና ማአ ዎል ላ ኦደና ቦርአ ሀኦሶን ጋላቴ። ጳዉሎስ ደይ ባሶ ጋነያሲ ፌና ካባሲክ አሮ ካክ ፌናማቶ ባሶክ ያዳታ እሚ። ኤስታን ክርስቶስኒ ዎል ሌ ዮሶን ቢፋ ማምሱሲክ ዎልጉባ እሚ። ኤስ ማምሱሲክቶስን እሳ እሳይስ፦
\ip «ክርስቶስ ዎል ሌ ዮባስኔን ስናክ ክት አማኝ ክርስቶስኒ ዎል ሌ ዮስ እማና ኮእባ ፎንቶ ካሶን ሃኦክ ችምኒሮሶ? ክርስቶስ ዎል ሌ ዮናስ ኣጌንሶ?» ይፋርዋ። ጳዉሎስ ደይ ኤስ ያ ቾዋሲታ ካሞ ካብሬ «ክርስቶስኒ ዎል ሌ ዮባስ አሱኖን አብድክ ኦደት ኤስ ካባኔን ሻክራ ዎስቶኒትሶን ዎስቶሶት» ኡክ ባሶትን ኪት።
\iot ማፃፋሲ ስሩክ ኤጵና ኤጶባስ
\io1 ጋችግሩ \ior 1:1 \ior*
\io1 ጳዉሎስኒ ግራነዋ ጋላትነ \ior 1:2—3:13 \ior*
\io1 ክርስታናኒ ካኒ ዞንሲያ \ior 4:1-12 \ior*
\io1 ክርስቶስኒ ዎል ሌ ዮኒ ቾዋሲ አስሱ \ior 4:13—5:11 \ior*
\io1 ኮእኒ ኪቶ \ior 5:12-22 \ior*
\io1 ኮርኡባ \ior 5:23-28 \ior*
\c 1
\p
\v 1 አባ ሀኦሶንናዋ ዳም የሱስ ክርስቶስኒንና አማነሬ ቴሴሎንቄኪ ቤቴክርስታኒስ ፌሴ አማኝኒ ሜያክ ጳዉሎስኒኪን፥ ስላስኒክንናዋ ጢሞትዮስኒክንና ዎስቴ ዎስያ። ሀኦሲ ኦቱምነዋ ናጋነ ንቶክ ስንፋውጝዋ።
\s1 ቴሴሎንቄኪ አሱኒ ሜኒ አማንቶሲክ ማክቴ ጋላታ
\p
\v 2 እንኖ ዎንና ዎንና ሺጶኒሲክ ንቶትን ያዳቴፋፋ ሀኦሶን ጋላቴት ፋኒር። 
\v 3 ሀኦኒሲ ስናክናዋ አባኒሳ ስናክና አማንቶኒትስ ዎስቴፋና ዎስቶስ፤ ኬሽታናክ ዛግሴፌት ባሬዋ ዳምኒ የሱስ ክርስቶስኒስታ ፋ ንቶ አብዲሶን ፋኪያክ ኦደት ፎንትሲክ ዎንና ዎንና ያዳቴት ፋኒርዋ። 
\v 4 ሀኦሲክ ሹንቶ አይኒ ሜያነ! ሀኦስ ንቶትን ኮሪናማቶ እንኖ አርፌኒዋ። 
\v 5 እንኖ ምስራቹኒ ካማሶን ንቶክ ማኬኒስ ዎል ላ ዎል ላክ ስኖይናሮን ሁግናክናዋ ኮርቶ አያናክና ደይ ምስራቹኒ ካማሲ ቾዋ ፉቶ ስንባሶን ማእስሬ አሩክዋ። ንቶኔን አነ ፋኒ ካባሲክ ንቶክዋ እያት ኣካክ ፋኒማቶ ንቶ አርሴድፌትዋ። 
\v 6 ሾዎ ሻና ንቶስታ ካርፋናክኑ ኮርቶ አያናስኪን ቤስቴ ግራሲኪ ካሞ ካምባሶን ኤጳ ታራ እኖትንናዋ ዳም የሱስ ክርስቶስኒ ኡግናሲክና ዞኑስቴር ስነትዋ። 
\v 7 ኤስ ባሪ ቦርኣ ሜቀዶንያክናዋ አኪያክና ፌሴ አማኝኒ ሜያ ዙታምቤሲሴ አሲክ ማአ ቤሶ ስነትዋ። 
\v 8 ዳሚሳ ካማ ንቶኪን ኬሳ ኦድቴናስ ሜቀዶንያክናዋ አኪያክና ኮእባ ስኖይናሮን ሀኦስታ ፋ ንቶ አማንቶስ ዳ ዙታምባሴ አሲስ አሪቴራ ፋርዋ። ኤስ ባሪ ቦርኣ ሀን ቾዋሲክ እንኖ እሳ ዉዛነ ማኮኒክ ኣነ ሾልሲፋዋ። 
\v 9 ንቶኪ ያፌኒ ካባሲክ እኖትን ኣካክ ኤጳ ታሴትማቶ፤ ሀየዋ ደይ ፉቶ ስና ሀኦሲክ ዎስቶክ ኮልኦኒ ሺጶስን ኦር ኬስሳ ሀኦስኪ ኣካክ ዎልሴትማቶ ኤስ አሱኒ ሜያ ቴትቤሲሲክ ዛላ ስኖነዋ። 
\v 10 ኤሲስማቶ ሀኦስ ክቱን ካብግና ባሪን ዮኒ ግአሲን እኖትን ፉኦኒ ናዉባ የሱስ ክርስቶስኒ ሳማን ዮሶን ኦደት ፋኒርዋ።
\c 2
\s1 ጳዉሎስኒ ዎስቶ ቴሴንቄኪ ካታማሲ
\p
\v 1 አይኒ ሜያነ! እንኖ ንቶኪ ዮስ ኬኤኖይ ዉዛ ስንና ቤይናማቶ ንቶ ቴትንትሲክ አሪሴፌትዋ። 
\v 2 ንቶ አሪሴፌትሲማቶ ዜሞ ፍልጲስዩስ ካታማሲ ፋኒ ካባሲክ ሻናነዋ ሜእነ እኖስታ ካርእዋ። ስኑንታኖ አካማ ቱጋኦ እኖስታ ካርፋናክኑ ምስራቹኒ ካማሶን ንቶክ ማኮኒክ ሀኦኒስ እኖክ ሁግና እምዋ። 
\v 3 እንኖ ንቶትን ኪትኒስ ዳግሱክ ወደይ ማጙ ኡግናክ ዞኑስቴራታዋ። ንቶትን ኤሹኒክ ዛግኒ ዉዛ እሳርነ ኣፋዋ። 
\v 4 ኤሲስታን ሀኦስ እኖክ ግሬራናዋ ምስራቹኒ ካማሶን እኖክ አዳራክ እምናስ እኖትን አማነራ ስንና ቦርአቱ ማኬፌንዋ። ኤስ ባሮን ደይ ዛግፌኒስ ንብኒሶን ፋታነራ ቢፋ ሀኦሶን ግርሱኒ ኡክታኖ አሱኒን ግርሱኒክታዋ። 
\v 5 እሳ ዎናክኑ ኤሽሹክ ወደይ ዋግኒ ኬኤሽታና እኖትን ኤጳን ማኬኒ ዎና ኣፋ ስንናማቶ ንቶ ቴትንትሲክ አሪድፌትዋ። ሀኦስ ደይ እኖክ ዛላዋ። 
\v 6 ንቶኪን ስኑን ኦምንክኑ ኡልፍና ኣኔ ሾሎዌንዋ። 
\v 7 እንኖ ክርስቶስኒ ዎሲ ስኒስማቶ እኖክ ሾልሲ ዉዛሶን ንቶኪን ማምሲራ ኤጳክ ችማኒ ካባዋ። ስኑንታኖ ናንጎትባሲክቶኖን ማእስራ ኦድፋ እንቶኒማቶቱ ጋራማክ ንቶ ጋነያስ ኩትኒዋ። 
\v 8 ኤሲስማቶ አካማኖን ንቶትን ሹንፌኒ ቦርአ ሀኦሲ ምስራቹኒ ካማኖን ንቶክ ማኮ ኮእባ ስኖይናሮን ካኒሶንኑ ንቶክ እማኒክ ሆሬራቱ ፋኒዋ፤ ንቶ እንኖ ስናክ ሹንቶ ስንና ፋትር ስንና ቦርአዋ። 
\v 9 አይኒ ሜያነ! ኣካክ ዎስቴኒማቶናዋ ኣካክ ሆፕኒማቶና ንቶ አሪሴፌትዋ። ሀኦሲ ምስራቹኒ ካማኖን ንቶክ ማኬፌኒ ካባሲክ ንቶስን ኦኒስታኑ ባአ ስኖይኒማቶ ዎነዋ ዋልነ ዎስቶክ ሆፕት ፋኒርዋ። 
\v 10 ንቶ አማኝኒ ሜኒ ጋነያሲ ፋኒ ካባሲክ እንኖ ፎስ አዉነ ፋ ኮርቶክናዋ ኦኮ ዝናባ ፎንቶ ካክና ፋኒማቶ ንቶ ዛልዋ፤ ሀኦሲ ደይ እኖክ ዛላዋ። 
\v 11 አባ ናንጎትባሲክ ዛግፌናይስማቶ እንኖ ደይ ንቶ እሳርኒት እሳርኒትሲክ ዛግኒማቶ ንቶ አሪሴትርዋ። 
\v 12 ዎንና ዎንና ንቶትን ኪትትናዋ ችኒትና፤ ሀኦሲ ታቶኖንናዋ ኡልፍንባሶንና ሃኦሶትክ ንቶትን ቴጌ ሀኦስ ግሮና ፎ ፎሶትክ አዳራ ይኒማቶ አሪሴድፌትዋ። 
\v 13 እኖኪን ኦደሴት ሀኦሲ ካማኖን ኤጳ ታፌት ካባሲክ ንቶሲ ዎስቴት ፋ ሀን ሀኦሲ ካማኖን አሱኒ ካምኒማቶ ስኖይናሮን ፉቶኒ ሀኦሲ ካማ ዛግራቱ ኤጳ ታሴትዋ። ፉቶሲክ ደይ ሀኦኒ ካማዋ፤ ኤስ ባርክ ደይ ሀኦሶን ዬቱኖይ ጋላቴፌኒዋ። 
\v 14 አይኒ ሜያነ! ንቶ ደይ ዩዳኒ ዳስታክ ፌሴ የሱስ ክርስቶስኒኪ ካሞ ሀኦሲ ቤቴክርስታኒሲክቶኒ ኡግናክ ዞኑስቴሴትዋ። ባሶ አይሁድኒ ሜያኪ ካሞ ሻና ባሶስታ ካርናሲማቶ ንቶስታ ደይ ንቶ ኬን ስና ባሶኪን ሻና ካርእዋ። 
\v 15 አይሁድኒ ሜያ ዳም የሱስኒንናዋ ራጁኒ ሜያኖንና ዎርሴቴ። እኖትን ደይ ካብግሬ ጋፉክሴስ ባሶዋ። ባሶ ሀኦሶን ግርሱኖር አሱ ዙታምባሴ አሲን ኦምቴ ሜያዋ። 
\v 16 አዛብኒ ሜያ ፋርሶነ ካማሶንኑ ማኮኖይኒማቶቱ እኖትን ካለፌዋ። ኤስ ኤፋ ዉዛ ዛግት ቦርኣስታ ኦማ ቦርአ ዳይሲት ሀሜቴር። ኤስ ባሪ ቦርኣቱ ኮእባስታክ ሀኦሲ ግኢአ ባሶስታ ያዋ።
\s1 ጳዉሎስ ቴሴሎንቄኪ አሱኒ ሜያኖን ሄፕሳ ዎል ሌ ብያናክ ሾሌ
\p
\v 17 ስኑንታኖ አይኒ ሜያነ! እንኖ አያናክ ስኖይናሮን አሻክ ጋሮ ዎና ንቶስታን ዎክፌኒክኑ ንቶክ ፋ ካልታንናስ አካማ ስንና ቦርአ ሾዎ ዎና ኣፌ ኣፌ ንቶትን ብያኒክ አካማኖን ካቤኒዋ። 
\v 18 ንቶኪ ደይ ዮኒክ ሾሌት ፋኒር፤ ኤስ ባርስታንኑ ታ ጳዉሎስ ሾዎ ዎና ንቶኪ ዮናክ ሄፓ ሄፓ ሾሌን። ስኑንታኖ ሴጣናስ ንቶኪ ዮኖይናማቶ እኖትን ካሊ። 
\v 19 ኤካን አብድኒስ ወደይ ግራኒስ ወደይ ዳምኒስ የሱስ ዬፌና ካባሲክ ባሳ ስናክ ቴቶኒ አክሊልኒስ ንቶቴኤኖሶ? 
\v 20 ፉቶሲክ ኡልፍኒሴዋ ግራኒሴ እኖክ ንቶዋ።
\c 3
\p
\v 1 ኤስ ባሪ ቦርኣ ሀንኔን ኤካሎክ ፋኩክ ኣነ ችሜኒ ስንና ቦርአ አቴናኒ ካታማሲ እንኖ እንኖ ፎኒክ ማአሪ ስንና እኖክ ቤስቴ። 
\v 2 አማንቶኒትሲክ ችምማ የሮትክ ንቶትን ኪቱናክ እንኖ አይ ደይ ሀኦሲ ዎስትኛ ስንነ ክርስቶስኒ ምስራቹኒ ካማሶን ማኮክ እኖክ ዎስቶኒ ዞሞ ስና ጢሞትዮስኒን ዎስኒዋ። 
\v 3 ኤሲስ ደይ ንቶስታ ካርአ ሻናሲክ ሾርኮኖይትማቶ ንቶትን ዛጉና። ኤስ ሻናስ እኖክ ሆሬራ እምቴር ስንባሶን ንቶ ቴትንትሲክ አርሴትር። 
\v 4 ኤሲስማቶኑ እንኖ ንቶኔን አነ ፋኒ ካባሲክ ሻና እኖስታ ካርአናማቶ ዜምማ ንቶክ ማኬኒዋ። ኤስ ሻናስ አርሴፌትስማቶ እኖስታ ካርእዋ። 
\v 5 ኤስ ባሪ ቦርኣ ሀንኔን ኤካሎክ ፋኪያክ ኦዳናክ ኣነ ችሙት ስንና ቦርአ ንቶ አማንቶሲ ቾዋኖን አሩናክ ሾሌፋቱ ጢሞትዮስኒን ንቶኪ ዎስጝዋ። ኤስ ባሪን ንቶኪ ዎስናስ አዉዛክነ ሴጣና ኦማ ኡግናክ ንቶትን ፋትታነ ስናና ደይ እንኖ ዎስቶስ ደይ ኬእኖር ስንና ፉቶኒርዋ ይራ ድጌና ቦርአዋ።
\p
\v 6 ስኑንታኖ ሀሽ ጢሞትዮስ ንቶኪን ዎል ሌ እንኖኪ ዬሬ ንቶ አማንቶሲ ቾዋኖንናዋ ንቶ ኬሽታናሴ አሲክ ግሮኒ ኦዱ እኖክ ማኬ። ኤሲስማቶ ደይ ንቶ ዎንና ዎንና ማአሪክ እኖትን ሳፋሬት ፋሴቲማቶናዋ እንኖ ንቶትን ብያኒክ ካልቴት ፋኒሲማቶ ንቶ ደይ እኖትን ብያቲክ ካልቴት ፋትማቶና እኖክ ማኬ። 
\v 7 ኤስ ባሪ ቦርኣ አይኒ ሜያነ! እንኖ ፋኒስ ራክኮሲናዋ ሻናስና ስኒፋናክኑ ንቶ አማንቶሲክ እንኖ ችማ ዳንኒዋ። 
\v 8 ንቶ ዳም የሱስኒክ ችምሜ ፎስ እኖክ ካኒዋ። 
\v 9 ኤሴ ሀሽ ንቶ ቾዋሲክ ጋላታ እምፌኒ። ንቶ ቦርአ ባሳ ስና ፋ ግራኒሲክ ሀኦኒሶን ጋላቴፌኒ። 
\v 10 ዎነዋ ዋልነ አካማ ችማ ሺጶክ ሺጴት ፋኒስ ኣፌ ኣፌ ብያኒክናዋ አማንቶኒትሲ ዮእ ዉዛሶን ቱኑ ችማኒክዋ። 
\v 11 ሀሽኑ ሀኦኒሴዋ አባኒስና፤ ዳምኒ የሱስ ቴትባሲክ ንቶኪ ዮኒክ ኡጉኒሶን ካናዎዋ። 
\v 12 እንኖ ንቶትን ኬሽቴት ፋኒሲማቶ ዳሚስ ንቶትና ንቶትና ደይ ኦምኒ ሜያክኔን ፋ ኬሽታንኒቲስ ድቻናክናዋ ቱምማ ፉእቶናክና ዛጋዎዋ። 
\v 13 ኤስ ባርክ ዳምኒ የሱስ ኮርቶኒ ሜያኔን አነ ዬፌና ካባሲክ ሀኦኒሲ ስናክናዋ አባኒሳ ስናክና ንብኒቲስ ሙዳባ ፎንቶ ኮርቶ ስናናክ ንቶትን ችኑናዋ።
\c 4
\s1 ሀኦሶን ግርሱኒ ፎ
\p
\v 1 ኮእባስታክ ደይ አይኒ ሜያነ! ሀኦሶን ግርሱትክ ኣካክ ፎትክ ሾልሲፋናማቶ እኖኪን አሪትዋ፤ ሀሽ ደይ ፎትስ ኤሲስማቶዋ፤ ዳም የሱስኒ ሱናሲክ ንቶትን ሺጴፌንሴዋ ኪትፌኒሴ ዜሞ ስናክ ዛግቲ ባርስታን ደናሎኖን ዳይስራ ዛጉትክዋ። 
\v 2 ዳም የሱስኒ ሱናሲክ አሮ አጃጅ ንቶክ እምኒማቶ አሪሴድፌትዋ። 
\v 3 ሀኦሲ ፍቃድ ንቶ ኮርቶትክናዋ ጌርኬሳስታን ዎካትክናዋ። 
\v 4 ንቶስን አሱ ዙታምባሴ አሱባስኔን አነ ኮርቶክናዋ ኡልፍናክና ኦዳና ባሮን አሩዎዋ። 
\v 5 ሀኦሶን አሩኖይ አሱኒ ሜኒማቶ እጉኒ ኤናንቶንቲ ፎናታዋ። 
\v 6 ሀን ዉዛሲክ ኦኑ አቴ ኦም አይባስን ሚርኦናታዋ። ዜሞ ስናክ ንቶክ ማኬኒሲማቶናዋ ቴትንትሶን ኦዳትክ ዛግኒሲማቶና ኤስ ኤፋቴና ዉዛሶን ዛግሴፌ ባሶትን ዳሚስ ኬእርዋ። 
\v 7 ሀኦስ እኖትን ቴጌናስ ኮርቶ ፎ ፎኒክታኖ ኪና ፎ ፎኒክታዋ። 
\v 8 ኤስ ባሪ ቦርኣ ሀን ኪቶሶን ቱጋኤፌ ባር ቱጋኤናስ ኮርቶ አያናባሶን ንቶክ እምኒ ሀኦሶንታኖ አሱኒንታዋ። 
\v 9 ንቶትና ንቶትና ኬሽቶኒ ቾዋሶን ንቶ ቴትኒትሲክ ሀኦስኪን አሪሴቲ ስንና ቦርአ ሀን ቾዋሲክ ኦኑ ትቹናክ ኣነ ሾልሲፋዋ። 
\v 10 ሜቀዶንያክ ዳ ዙታምባሴ አሲስታ ፌሴ አይኒ ሜያኖን ዙትራ ኬሽቴሴትር፤ ስንፋናክኑ አይኒ ሜያነ! ሀሽ ንቶትን ኪትፌኒስ ኤሲስታን ደናሎኖን ዳይስራ ኬሽቶሶትክዋ። 
\v 11 ሻክሬ ፎክ ካቦትክናዋ ንቶ ቴትኒ ቾዋሶን ሳፋሮትክ ደይ ዜሞ ስናክ ንቶትን አጃጀኒሲማቶ ንቶ ቴትኒ ኩሹሲክ ዎስቶትክዋ። 
\v 12 ኤስ ባርክ አማኖኖይ አሱኒ ሜኒ ስናክ ኡልፍንቴር ስናትዋ። ኦኒስታኑ ቴቴር ኣፋ ስናትዉዛ።
\s1 ዳሚሳ ሄፕሳ ዎል ሌ ዮ
\p
\v 13 አይኒ ሜያነ! ክቲ አሱኒ ሜኒ ቾዋሲክ አብድቤስ ፎንቶ አሱኒ ሜኒማቶ ሱሞኖይትማቶ ፉቶሶን አሩሶትክ ሾሌፌኒዋ። 
\v 14 የሱስ ክትናማቶናዋ ክቱን ደይ ካብናማቶና አማነፌኒዋ፤ ኤስ ባሪ ቦርኣ የሱስኒክ አማነሬ ክት ባሶትን ሀኦስ ባርኔን አነ ቴሾናዋ። 
\v 15 ዳሚስኪን ኤጳታኒ ካማሲማቶ ንቶክ ማኬፌኒስ ኤሲሶጝዋ። ዳሚስ ዮና ካባኔን ሀየዉ ስንነ ፎኒ እንኖ ክት ባሶትን ኣፋዋ ዜምማኒዉዛ። 
\v 16 አጃጅኒ ካማክ፤ ሀኦሲ ዎስኒ ጋኛኒ ካማክ፤ ደይ ሀኦኒ ማርካታ ኦድቶና፤ ዳሚስ ደይ ቴትባሲክ ኤስ ባሶክ ጌፕቴሬ ሳማን ኬሮና። ክርስቶስኒን አማነሬ ክት ባሶ ዜምሜ ካብሶነ። 
\v 17 ኤሴን ኦርፎ ካክ ፌ እንኖ ዳሚስኔን አነ ስሩስታ ኡጶክ ባሶኔን አነ ሻሩስታ ደን ኦቶኒ፥ ኮእባ ፎንቶኖን ደይ ዳሚስኔን አነ ፎኒ። 
\v 18 ኤስ ባሪ ቦርኣ ሀን ካማሲክ ንቶትና ንቶትና ዎል ችሞት።
\c 5
\p
\v 1 አይኒ ሜያነ! ኤስ ባር ስናና ነያሴዋ ሳአትሴ አሲን እሳ ዉዛነ ንቶክ ትቹናክ ኣነ ሾልስፋዋ። 
\v 2 ዳሚሳ ዎና ዮናስ ዊስ ዋላክ ዬፌናይሲማቶ ስንባሶን ንቶ ቴትንትሲክ ማእስራ አርሴፌትዋ። 
\v 3 አሱኒ ሜያ፦ «ዙታምባሴ ናጋ ደይ ማአር» ይሴፌን ናኔር አሱሶን ኬክቶ ኤጵፋናሲማቶ ትሹኒ ዎናስ ዲንቆነ ባሶስታ ዮናዋ። እሳንነ ኣፋ አትቴ ኬሶነዉዛ። 
\v 4 ስኑንታኖ አይኒ ሜያነ! ንቶ ፋሴቲስ ታልማሲታዋ። ኤስ ባሪ ቦርኣ ኤስ ዎናስ ዊስኒማቶ ኣፋ ንቶስታ ዮናዉዛ። 
\v 5 ንቶ ዙታምንትሴ ቻሬፋስ ፌ አሱዋ፤ ደይ ዎን ኒ አሱዋ። እንኖ ዋላሲ ወደይ ታልማሲ ፌ አሱቴዋ። 
\v 6 ኤስ ባሪ ቦርኣ ጉዙኒዋ፥ ቴትኒሶን ሀእሱክ እኖክ ፋዪስ ሆሮና ኡክ ፎኒስታኖ ኦም አሱኒ ሜኒማቶ አፋይቶኒዉዛ ኣፋዋ። 
\v 7 አፋይቴሴፌ ባሶ ዋልንቱ አፋይቴሴፌ። ዛየሴፌ ባሶ ደይ ዋልንቱ ዛየሴፌ። 
\v 8 ስኑንታኖ እንኖ ቻሬፋሲ ፌ አሱ ስንኒ ቦርአ ቴትኒሶን ሀእሱክ እኖክ ፋዪስ ሆሮና ኡክ ፎኒ፤ አማንቶሶንናዋ ኬሽታናሶንና ጥሩርኒማቶ ዛግራ ማያኒ፤ ፋሩኒ አብዲሶን ቴታስታኪ ብትታኒ ጉፍታሲማቶ ዛግራ ጉፎኒ። 
\v 9 ሀኦስ እኖትን ቴጌናስ ባሪ ግኣሲክ ትሹኒክ ስንኖይናሮን ዳምኒ የሱስ ክርስቶስኒኪ ካሞ እንኖ ፋሩ ዳናኒክዋ። 
\v 10 ክርስቶስ እንኖ ቦርአ ክትናስ ካክ ፋፌኒክ ወደይ ክትፌኒክ ባርኔን አነ ፎኒክዋ። 
\v 11 ኤስ ባሪ ቦርኣ ሀሽቲ ዛግት ፋሴትሲማቶ ንቶትና ንቶትና ችኑሶት ደይ ዛጉሶት።
\s1 ኮእኒ ኪቶነዋ ናጋኒ ኦሾሾነ
\p
\v 12 አይኒ ሜያነ! ንቶ ጋነያሲ ዳሚሳ ዎስቶክ ሆፕት ፌሴ ባሶትን፥ ዳሚሲኪ ካሞ ንቶ ጋኜ ሜያኖንናዋ ንቶትን ኪትፌ ባሶትንና ኡልፍንሱሶትክ ንቶትን ሺጴፋዉጙዋ። 
\v 13 ዎስቶቤሲስታን ካብ ቾዋ ባሶትን አካማ ኬሽታናክ ኡልፍንሱሶት። ንቶ ደይ ንቶትና ንቶትና ናጋክ ፎሶት። 
\v 14 አይኒ ሜያነ! አዉጃኒ ሜያኖን ኬኡት፤ ድጌፌ ባሶትን ችኑት፤ ሆፕኒ ሜያኖን አርጋሱት፤ አሱ ዙታምባሴ አሲን ፋኩት። 
\v 15 ኣፌ አሱኑ ስንፌናክ ማጙ ዉዛሲ ኤድደ ማጙ ዉዛ ዎልጉኖይናማቶ ቴትንትሶን ኦድት። ኤስ ባርስታን ዎንና ዎንና ንቶትና ንቶትናኑ ስንፋናክ ኦም አሱኒ ሜያክ ዙትራ ማአ ዉዛ ዛጉቲክ ካቦት። 
\v 16 ዎንና ዎንና ግሮት። 
\v 17 ዬቱኖይ ሺጶት። 
\v 18 ስና ቾዋ ዙታምባሴ አሲክ ሀኦሶን ጋላቶት፤ የሱስ ክርስቶስኒኪ ካሞ ፋ ካኒትሲክ ሀኦስ ንቶኪን ሾሌፋናስ ኤሲሶጝዋ። 
\v 19 ኮርቶ አያናሲ ጌያኖን ኡቹትታ። 
\v 20 ራጅኒ ዎሲያሶን ካሹትታ። 
\v 21 ቾዋ ዙታምባሴ አሲን ፋትታኖት፤ ማአሪ ስና ባሮን ኤጳቶት። 
\v 22 ማጙ ስና ዉዛ ዙታምባሴ አሲስታን ዎክት። 
\v 23 ናጋኒ ሀኦስ ባር ቴትባሲክ ስና ቾዋ ዙታምባሴ አሲክ ንቶትን ኮርቶ ዛጋዉጝዋ። አያናንትስ፥ ካኒትሴዋ አቱንትሴ ዙቴራ ዳምኒ የሱስ ክርስቶስ ዬፌና ዎኖ ዝናባ ፎንቶ ስንና ኦድቴራ ፎን። 
\v 24 ኤስ ንቶትን ቴጌ ባር አማንቶ ስንና ቦርአ ሀን ባሮን ዛጉናዋ። 
\v 25 አይኒ ሜያነ! እኖክ ደይ ሺጶሶት። 
\v 26 አይኒ ሜያኖን ዙትራ ኮርቶ ስንና ዳሞክ ናጋ ኦሽሾሶት። 
\v 27 ሀን ዎሲያስ አማኝኒ ሜያ ዙታምቤሲሴ አሲክ ፌሬቶናክ ዳሚሳ ሱናክ አዳራ ይፋዉጙዋ። 
\v 28 ዳምኒ የሱስ ክርስቶስኒ ኦትማስ ንቶኔን አነ ስንፋውጝዋ፤ ኣሚን!