\id PHM -Yemsa New Testament
\ide UTF-8
\h Filmona
\toc1 Filmonani matsafa
\toc2 Filmona
\toc3 Fil.
\mt2 Wosi Phawulosni wosiya
\mt1 Filmonanik
\imt1 Gachgiru
\ip Filmona arto kiristana; Qolasiyasni betekiristaniissi fe baassoneen ane feenamatotu biistefa. Filmona Onesmos yiste bozba feer. Es wostinynyaas daambaaskin kesse hamna kaba taatoni keer fe Phawulosneen uphe. Phawulosniki kamo Onesmos kiristinnani amantooson ephphete. Phawulos Filmonaniki tichina wosiyaas Filmona wolle barki yeere ganonak besifar. Es baristan dey hash Onesmos kiristana sinna boor'a hawungneen ekalo kiristana aynimato ephphetoonaktano boznimato faadunoynamato make.
\iot Matsafaas Siruk Ephna Ephobaas
\io1 Gachgiru \ior 1-3\ior*
\io1 Phawulosni galata Filmonanik \ior 4-7\ior*
\io1 Phawulos Onesmosni chowaasik zaggire shiiphe \ior 8-22 \ior*
\io1 Koor'uba \ior 23-25 \ior*
\c 1
\p
\v 1 Kiristoos Yesusni chowaasik taato sina Phawulosnikinnawa ayni sina Ximotiyosnikinna; shunto aynisiknawa innoneen ane wostefe Filmonanikna: 
\v 2 Esiisimato dey neeki keer zuuttesefe amanynyini meyak eetni sina Afibiyak innoneen ane Kiristoosni meya taar'o sina Arkiphanik; 
\v 3 Aba Ha'oniiskin; Daamni Yesus Kiristoosni otmaasewa nagaase nittok sinfawung.
\s1 Filmonani Keeshtannewa Amantone
\p
\v 4 Shiiphonaasik neen safaret wonna wonna Ha'onaason galattefawungwa. 
\v 5 Daamni Yesusniista fa amantonesewa amanynyini meyak fa keeshtanneese asin odengwa. 
\v 6 Kiristoosnir sinniisik danni ma'a wuzaas zuuttera ammanon arutak amantoneeson oomni meya haa'ak chimatak shiiphefawungwa. 
\v 7 Aytaaso! Amanynyini meeni nibaas neyista beysa danna boor'a keeshtanneestan taak akama giranewa chimne daningwa.
\s1 Phawulos Onesmosni Chowaasik Wolle
\p
\v 8 Es bari boor'a wostoneeson koi'suwa yira neen ajajok Kiristoosniki kamo chima daningwa. 
\v 9 Sinfanaknu es baron zagustan Yesus Kiristoosni chowaasik taato sina ta kur'u Phawulos keeshtanak shiiphosontu sholefawungwa. 
\v 10 Ta taatoni keer faagedo danna naata sina Onesmosni chowaasik neen shiiphefawungwa. 
\v 11 Zeemo sinak Onesmos neek ke'nor sinne feer; sinuntano hash neeknen taakneen ke'nirwa.
\p
\v 12 Barin neeki wolgira wosingwa; barin neeki wosinaas ta nibaasi safaranon zaguni asunin zagiratu faadifawungwa. 
\v 13 Misirachchuni kaamaasi boor'a taatera faana kabaasik ne edde sinne taan argasunak bar taneen ane feefaanane girona kabawa. 
\v 14 Sinuntano ne zagifata ma'a wostoos shunaktano giddik sinnoynamato iyaat neneen ane merkonoy isa wuzane zaguk aane sholotwa.
\p
\v 15 Onesmos garo wonniron neyistan oor kesnaas awuzakne hawungneen ekalo neyistan oor kesnoy neneen ane foona sinanawa. 
\v 16 Sinuntano hawungneen ekalo bar neneen ane foonaas boznimato sinnoynaron boziisatan denalo shunto ay sinnewa. Bar taak shunto aytawa; sinuntano ashak feena kabaasik wostefena wostoos neek ke'nir sinna boor'a ayyanabaasik dey Kiristoosniki kamo ayne sinna boor'a neek arkiron shuntowa.
\p
\v 17 Ese taan ay zagira faaditannen barin dey tane feer zagira ephphatowa. 
\v 18 Bar neen miir'ena wuza wedey kowa faafaanane tayista faaduwa. 
\v 19 Ta Phawulos kowaason neek kaasuna yira kushunaasik neek tichingwa. Sinfanak kaaneesi chowak nenu teetneesik ta kowa neyista faanamato ta neen yaadassunak aane sholsifawa. 
\v 20 Ese aytaaso! Han ma'a wuzason taak zagutak Daamiisa sunak shiiphefawungwa. Adarawa Kiristoosniki kamo nibnaasik beysa imaywa. 
\v 21 Han baron neek tichinaas ma'i utar sinneeson amanefaatwa. Ta neen mamsinaastan denalo zagutamato arifawungwa. 
\v 22 Es baristan denalo Ha'oos shiiphontiison odera nittoki yoonak zagunak abdina faar sinna boor'a beysa ephana keya taak hoossuwa.
\s1 Koi'ni Nagani Ooshsho
\p
\v 23 Kiristoos Yesusni boor'a taneen ane taatere fe Ephphafira neek naga wosiwa. 
\v 24 Esiisimato dey taneen ane wostesefe meya: Marqos, Aristirokos, Deemasnawa Luqasna naga neek wossetewa. 
\v 25 Daamni Yesus Kiristoosni otmaas nittoneen ane sinfawungwa.