\id JAS -Yemsa New Testament
\ide UTF-8
\h Yaqob
\toc1 Yaqobni wosiya
\toc2 Yaqob
\toc3 Yaq.
\mt1 Yaqobni Wosiya
\imt1 Gachgiru
\ip Han Yaqobni wosiyaas wonna wonnati fooniisik zoonsiya sinni safaraba epho sinfaat tichchenaas han daasta siktere feese asire heppe asteserisikitokwa. Tichi bar techmaason ammanon wostota feeshuni ugnaason; kiristanani wol irbasit foonewa amalane asik zoonsiya sinni wuzasikitonon amma sina besoba faana wollak makefe. Tukam sinni chowaasewa otum sinni chowaase; fatanani chowa; ma'a amalani chowa; koonani chowa; amantonewa ma'a amalane; termani mai'newa mangune; techumni chowa; wol faassoni chowa; beegantonewa garamne asi chowa; oomiisata mangsuni kar'ni chowa; teetoni chowa, fakini chownewa shiiphone; kiristanani meya zagsonek sholsifa giddine asin isarba isarbaasik kotte tichi.
\ip Wosiyaas kiristinnani kaani amantonewa wostota feeshuni chowaason mai'sira besifa.
\iot Matsafaas Sir Ephna Ephobaas
\io1 Gachgiru \ior 1:1\ior*
\io1 Amantonewa techumne \ior 1:2-8\ior*
\io1 Tukamanewa otumne \ior 1:9-11 \ior*
\io1 Fatana \ior 1:12-18 \ior*
\io1 Ha'oosi kaamanon odonewa zagune \ior 1:19-27 \ior*
\io1 Koru zagtonoynamato imte kiito \ior 2:1-13 \ior*
\io1 Amantonewa wostone \ior 2:14-26 \ior*
\io1 Kiristananawa terumbaase \ior 3:1-18\ior*
\io1 Kiristananawa han daase \ior 4:1—5:6\ior*
\io1 Showo tesa wuza imte kiito \ior 5:7-20 \ior*
\c 1
\s1 Yaqobni Wosiya
\p
\v 1 Daasi biratota boktere feese asire heppe asteserisikitok Ha'oosirewa Daamni Yesus Kiristoosni wostinynya sina Yaqobnikin woste wosiya; naga nittok sinfawung.
\s1 Amantonewa Techumne
\p
\v 2 Aytaasakitono! Showo tesa fatana nittoosta kar'fana kabaasik nittotin girsuni wuza dantinne faar zagira faaduti. 
\v 3 Amantontiisi fattanto fakiyak chimme fooson arutikwa. 
\v 4 Fakiyak chimme foontiis isanne yo'unoynamato tuum sinna footik zagir sinungwa. 
\v 5 Nitto ganeyaassi techmaba yo'ina asu feefaanane korunoy garamak imfa Ha'ooson shiiphowowa. Bar dey imanawa. 
\v 6 Sinuntano hep safaraba feena bar siru tugaan ekna hangna shorket kuni baarini akane feer sinna boor'a ek hang unoy amantok shiiphowowa. 
\v 7-8 Hep safaraba feena bar ugunbaastak ekna hangna shorket yerefe bar Ha'ooskin isa wuzane danninne faar sinna barik bestonaatawa.
\s1 Tukam Asunawa Otum Asuna
\p
\v 9 Foobaasik tukam sinne fe ayiis Ha'oos barin den teggunir sinna boor'a girowowa. 
\v 10 Esiisimato dey foobaasik ottere fe ayiis Ha'o daa kessaanane girowowa 
\v 11 Asuni otma kuwani fur'nimato woottonir; awa kiichifana kabaasik kuwaasonnawa fur'asonna ichinsir; fur'aas dey woottera gadabaas tishir. Esiisimato otum asu wostok ek hang yifet tishifewa.
\s1 Asuniista Kar'fa Fatana
\p
\v 12 Fatanaason fakiyak chima barik Daamiis abdini kaambaasimato Ha'ooson shunefe baassok kaani akililiison imana. Es bari boor'a fatana basaasta kar'fana kabaasik chimme aatfe asus suustowa. 
\v 13 Ha'oos mangu wuzak aane fattantefa; esiisimato bar dey ooninnu mangu wuza zagunak aane fattanefa. Es bari boor'a oonu sinfaanane fattantefena kabaasik: «Ha'oos taan fattanewa» unatawa. 
\v 14 Sinuntano asu teetbaasi mangu eenantok zatterenawa eshtefena kabaasiknatu fattantefewa. 
\v 15 Estan mangu eenantobaas naanertera boor'aason koonifa; boor'aas dey dichcha kitu teshshefa. 
\v 16 Keeshtefana aytaasakitono; eshtotiitawa. 
\v 17 Ma'a imaasewa tuuma eebbaase zuuttera den Ha'ooskingwa. Es bar dey yiraranimato shaatonoy wedey sooltoba foonto chaarefni aba Ha'ooskingwa. 
\v 18 Ha'o testo zuuttambaase asi uuzza sinanik bari fiqadiisimato futoni kaambaasik innotin tanewa.
\s1 Odeni Baron Wostota Feeshu
\p
\v 19 Keeshtefana aytaasakitono! Asu isarba isarbaas odok tapter sino. Wolloknawa gi'tokna taptonor sino.
\p
\v 20 Esiis dey asuni gi'a Ha'oos sholefana ooko sinne fooson foonik aane zagifa. 
\v 21 Es bari boor'a kiinaasonnawa tuumma fa manguusonna zuutira nittoostan woksaat Ha'oos nitto nibaassi kunsina kaantiison fatuk chimni kaambaason ma'a nibak ephphatooti.
\p
\v 22 Kaambaason odere wostota feeshir sintitano teetnitiison eshet baak oder sinatiita. 
\v 23 Kaambaason odere wostota feeshunoy asu teetbaasi gitonon inkaliissi\f + \fr 1:23 \fr*\ft Inkal uus mastodi\ft*\f* biya asune feerwa. 
\v 24 Es asus aafbaassi biire hamfaat geregere dey bar awunefeer sinnamato daagefe. 
\v 25 Sinuntano birmadumma kisuni yo'uba foonto tumaason gasasire biire barik chimme fe bar odere daager sinnoynamato wostota feeshife bar wostefena wostoosik suustowa. 
\v 26 Terumbaason oodnoy: «Ha'oosontu shiiphedifanr» yife asus teetbaasontu eshfewa. Basa Ha'oni shiiphoos dey waagba aafawa. 
\v 27 Aba Ha'oosi sina kiinba foonto shiiphoos: «Aba intobaas kitina naanggotaasikitonon; esiisimato dey teegobesi kitina mashkasusikitonon rakkobesiisik argasu; teetniison dey han daastaki fa kiina wuzaassin oodawa.»
\c 2
\s1 Asunin Koru Aane Sholsifa
\p
\v 1 Aytaasakitono! Ulfinto Daamni Yesus Kiristoosnik amaner sinfaatine asunin korutiitawa. 
\v 2 Ese hep asuni meya nitto zuuttera faatiista yoosone; isaas Warqeni gila yeettonawa gada maya mayo otum asu; hepsaas kiina maya mayo tukam asu; 
\v 3 Gada maama mayo asusin ulfinsuk: «Han tega dimaasta duwa» iyaat tukamiisin dey: «Ne Ekesta yerowa wedey da wochonaassi duwa» yifetiwa. 
\v 4 Eekin nitto ganeyaassi asunin koru faanamatotanoso besifanari? Dey asunin korire mangsu kar'fe daanynyane faatirtanoso?
\p
\v 5 Shunto aytaasakitono! Odotiwa! Ha'oos baron amanok otum sinoneknawa baron shunefe baassok abdik imna bari taatoossi girsonekna han daastaki fe tukamiisin aane teegowanoso? 
\v 6 Sinuntano nitto tukamiisin kashshitir; nittoosta rakko katifeesnawa mangsuni kar'ni keer taamefees otumni meyatenoso? 
\v 7 Nitto teegtefeti ulfinto Kiristoosni sunaason me'esefees baassotenoso? 
\v 8 Korto matsafaassik: «Asusin zuutira ne teetaason shunfataasimato shunwa» yistera tichchenaasimato Ha'oosi taatoni tumanon oodfaatine ma'aron zagitiwa. 
\v 9 Sinuntano asunin korifaatine boor'a wostetirwa. Tumaason dey aatnitiisik waqastetirwa. 
\v 10 Ha'oosi tumanon zuutire oodaat isaron yo'gaanane zuuttambaase asin oodnor sinnetu faadtona. 
\v 11 «Gerkesatiita» yi Daamiis: «Worutiita» yiwa. Gerkesa beyfaat worifaatine tumaason aane oodetiwa. 
\v 12 Wolumnitiisewa wostontiise birmadumma kisuni tumaas mangsu kar'ana asuni meenimato sinti. 
\v 13 Ha'oosi mangsuni kar'a fakiya zagunoy asusik fakiya aane zagifa. Fakiyaas dey mangsuni kar'aason mererwa.
\s1 Amantonewa Wostone
\p
\v 14 Aytaasakitono! Isa asu: «Amantona faar» iyaat es amantobaason wostok besu shakaanane basa amantoos awu ke'nirinso? amantobaas barin fatuk chimniroso? 
\v 15 Mayone maamnewa muusone muune turukse ay wedey eet faasefaanane; 
\v 16 Nittoossin isar: «Maar'on hamoti, nittok gumun; gawuti» iyaat muusone baron wedey atubesiista mayone baron ima shakaanane baassok awu ke'nirinso? 
\v 17 Esiisimato wosto foonto amantoos teetbaasik kituwa. 
\v 18 Sinuntano isa asu: «Ne amantone faar; ta dey wostona faar; amantoneeson wostoneestan oor kisira besuwa» yifer feefaanane ta dey: «amantonaason wostonaasik besunawa» una. 
\v 19 Ha'oos isar sinnamato amanetar; es bar dey ma'ar; kiina ayyanaas dey es baron amaner; digera korkir. 
\v 20 Ne gowwa asu! Wosto foonto amantoos ke'nirne faar sinna neek bestefawoso? 
\v 21 Abani Abraham naaba Yisaqnin maa'a zagire shoo'aasta imna kabaasik wostok Ha'oosi sinak ooko sinne aane bestowenoso? 
\v 22 Es bari boor'a amantobaasewa wostobaase isarik hamnamatonawa amantobaason dey wostok yo'uba foonto zagire besinamato aane biyenoso? 
\v 23 Matsafaassi: «Abraham Ha'ooson amane; amantobaas dey ooko sinna faadte» yiste bar ko'i. Bar dey Ha'oni koon sinne teegte. 
\v 24 Ese asu ooko sinne faadtonaas amanto bar barik sinnoynamato wostokneen sinnamato biyatawa. 
\v 25 Esiisimato gerkesa sina Rahab sinfa asus Israelni aafoni meyanon ephpha aachira ooma ugnak kofkubaasik wostok ooko sinna aane faadtowanoso? 
\v 26 Kaa sirun kesna ashaas kitu sinnamato wosto foonto amanto dey kituwa.
\c 3
\s1 Terumni Ooda
\p
\v 1 Aytaasakitono! Assinynya sina innoosta akama mangsuni kar'a yoonir sinnamato arsetir sinna boor'a nittoossin showobesiis assinynya sinoneetawa. 
\v 2 Inno zuuttamniise showo wuzak daagenirwa. Wollumbaasik tuusa'onor feefaanane termabaason dey oodak teetbaason hai'suk chima zag asuwa. 
\v 3 Fazaasikito innok ajajamtonak noonobaassi lugama gedfeni; estan fazaason sholeni daa zatfeni. 
\v 4 Merkebiisikitonon dey biitwa; awune faaron akama sinfanaknawa dey akama hugnaba faana siruk tugter sinfanakna merkebiison kalfe bar kiisku marik bar sholena daa kalfewa. 
\v 5 Esiisimato terma atuussin kiisku sinfaat showo wuza zaginar yittu ge'fa. Akama buur'us garo kiisku geyak aakkak kiichchera tishifanamato gasasutiwa. 
\v 6 Termaas dey geyane faarwa; atuniisi billitiissin bar mangu wuzak tuumma fa han daasne faarwa. Atuniison zuuttira kiinir. Geeni tir'maassin kesfa geenimato asusa foonon kiichir; bar dey kiichcher. 
\v 7 Han daasta fa gonyo, kasa, nibbaasik zayifa barewa, akaassiki fa testoose zuuttera leejjiste. Barikitonon dey leejjisiwa. 
\v 8 Sinuntano termabaason leejjisunak chimar oonu aafewa. Bar dey kiichira worifa marzi barissi tuumma faana beysaba foonto mangu wuzawa. 
\v 9 Barik Daama Ha'ooson galattefeni. Dey Ha'oosi gitok teste asusin erwifeni. 
\v 10 Isa noonoossin galatnewa erwine kesfa; aytaasakitono! Es bar ekka sinanak aane sholsifawa. 
\v 11 Isa kor'aassin mangu akanewa ma'a akane kesak chimniroso? 
\v 12 aytaasakitono, Balasini i'oos bunni gaana gaananak chimniroso? Wedey wayinini i'oos balasini gaana gaanak chimniroso? Esiisimato mangu kor'aassin ma'a aka kesak aane chimfawa.
\s1 Saman Imtefa Techmaas
\p
\v 13 Nittoossin techum wedey gasasuba faana asu oonso? Ese techumaknawa shuphakna wostena wostobaason ma'a foobaasik besuwowa. 
\v 14 Sinuntano mangu koonanewa teetni shunne nibnitiissi faafaanane es techmaasik teetotiita; futoosta dey eshatiitawa. 
\v 15 Effatena techma bestefanaas han daastan; asunikinnawa; sexanaaskinnatano Ha'ooskintawa. 
\v 16 Koonanewa teetni shunne faana dimaasta nagani turkunewa mangu wostone zuuttera faarwa. 
\v 17 Sinuntano den Ha'ooskin yaafa techmaas zeemma kayma, naga shunar, garama, ajajamer, fakiya zagir, ma'a gaanba faanar, korunewa tane feer aafe uba foontowa. 
\v 18 Naga sholsefe baasso naga bukere ooko sinni gaana zuutisefe.
\c 4
\s1 Han Daastaki Mangu Wuzason Shunatiita
\p
\v 1 Nitto ganeyaassi fa neeboosewa faassoose ayin yaarinso? Nibnitiissi neebefa ashnitiisi mangu eenantooskintanoso? 
\v 2 Isa wuzni danak eenantetir; sinuntano aafa danati wuza. Dey Koonetir faassetir; es baristan denalo dey asunin woritir; aane shiiphefeti sinna boor'a aafa danati wuza. 
\v 3 Shiiphontiis mangu safarak ashnitiison girsunak sinna boor'a shiiphontiisi wolgunon aafa danati wuza. 
\v 4 Amanamtonti foonto nittono! Han daastaki wuzaaso shuna Ha'oosneen faasso sinnamato aane aruwetinoso? Ese han daastaki wuzason shunfe bar zuuttere Ha'oosi guma siniwa. 
\v 5 Eekin korto matsafaassi: «Ha'oos innoossi kunsina bari ayyanaas barik foonik mai'siratu koonefawa» yira makenaas baaknoso? 
\v 6 Esiisimato dey matsafaassi: «Ha'oos ge'fe baassotin oomter; sinuntano shuphefe baassok otumbaason imana» yifana boor'a Ha'oos imfana otmaas zuuttambaase asiistan denalowa.
\p
\v 7 Ese Ha'oosik ha'uti; sexanaason guwoti; bar dey nittoostan wokana. 
\v 8 Ha'ooski tai'soti; bar dey nittoki tai'sona. Nitto boor'ni meyane! Kushuntiison kaynuti; hep safaranti faana nitto nibnitiison kaynuti. 
\v 9 Mai'sira rakkatoti, suumoti, waasuti. Mi'nitiis waasak soolton; girantiis dey suumok soolton. 
\v 10 Daamiisa sina teetnitiison daa ephti; bar dey nittotin den tegguna.
\s1 Mangsu Kar'atiita
\p
\v 11 Aytaasakitono! Nittotna nittotna hamatotiitawa. Aybaasin me'fe bar wedey aybaasata mangsu kar'fe bar Ha'oosi tumani mangunontu makefe; dey tumaastatu mangsu kar'fe. Ne tumaasta mangsu kar'faatane tumaasta mangsu kar'artu sinatatano tumaason oodar aafa sinata wuza. 
\v 12 Tumaason imniisewa mangsu kar'niise isa Ha'ooswa. Fu'oknawa tishkukna chimniis dey bar barwa. Eekin asusata mangsu kar'fees ne oonso?
\s1 Nitto Teetni Safarantiista Teetotiita
\p
\v 13 Ese odoti: «Hash hawung wedey wono hantan kabira isa katamasi hamaniwa; isa wogga esta diira nagadera buu'suniwa» yifeti. 
\v 14 Sinuntano wono sinni baron aane arifeti; kaantiis aambanso? isarga biistefaat wolla tishfa furutuusne faatirwa. 
\v 15 Es baristan zeemma: «Daamiisa fiqadi sinfaanane han baron wedey ek baron zaguni» utik sholsifawa. 
\v 16 Sinuntano nitto es baron shakaattu teetnitiisik ge'feti dey teetefeti; es effatena teetoos manguwa. 
\v 17 Ese ma'aron zagunak sholsu sinbaason arifet zagu beybaas es bar barik boor'awa.
\c 5
\s1 Otumni Meyak Imte Ke'o
\p
\v 1 Ese nitto otumni meya odotiwa! Akama shana nittoosta yoonir sinna boor'a chaagga waasuti. 
\v 2 Otumnitiis zuuttera kuupana; maynitiison dey konymar muuna. 
\v 3 Warqentiisewa birrintiise shiira mangiwa. Bari shiyaas dey nittoosta zaalawa. Ashnitiison dey geenimato kiichuna. Han ko'i wonaassik otma zuutitiwa. 
\v 4 Ese odotiwa! Foshnitiison zuuti wostinynyaasa waaga nittoosta kunfaat chaagtifawa. Es baasso chaagaason zuuttambaase asiista hugnaba faana Daamiis odewa. 
\v 5 Ma'a fooknawa girakna atuntiison shuktonak hoorera yere miinimato kuulsitiwa. 
\v 6 Nittotin tugga'onoy kayim mangsubesi foonto meyanon mangsu baassosta kar'eti dey woritiwa.
\s1 Daamiisa Wolle Yoonon Fakiyak Ooda
\p
\v 7 Aytaasakitono! Daamiis yoona kabaneen fakutiwa. Bulinynyaas daabaas begani iroosewa yeeshuni iroose asin danin ma'a gaana imananneen fakiyaktu foshbaasi gaananon oodfewa. 
\v 8 Daamiis yoonak ta'i sinna boor'a nitto dey esiisimato fakira abdik chimti. 
\v 9 Aytaasakitono! Nittoosta mangsu katonoynamato nittotna nittotna unyusotiitawa. Mangsu kar'ni bar yoona wona kar'iwa. 
\v 10 Aytaasakitono! Daamiisa sunak makse raajjuni meya shanaason fakiyak ephphetook beso sina baassotin biitiwa. 
\v 11 Esiisimato dey fakiyak chimme aata baassotin: «Suustowa» yifeniwa. Iyyob dey aakkak fakinamato odetiwa. Daamiis dey koi'baasta barik zagina baron biitiwa. Daamiis fakir dey kenashter sinbaasontu besifa.
\p
\v 12 Aytaasakitono! Zuuttambaase asiistan denalo den samak wedey han daastak wedey ooma isa wuzakne tewutiita. Wolumnitiis Aa sinfaanane Aa; indaane sinfaanane indaane uti. Ekka sina shakaanane nittoosta mangsu katerwa.
\p
\v 13 Nitto ganeyaassi rakko basaasta kar'na asu feefaanane shiiphowowa. Giret fe asu feefaanane bar Ha'oosik galatni gaama gaamowowa. 
\v 14 Nitto ganeyaassin mette asu feefaanane betekiristanini kur'uni meyanon barki teegowowa. Baasso dey Daamiisa sunak zayiti woshshire barik shiiphosoto. 
\v 15 Amanere shiiphoos mettaniisin fatir. Daamiis dey es merobaassin fatuna; Boor'ba faafaanane feeshun ustona. 
\v 16 Nittotna nittotna boor'nitiison harmuti. Merontiissin farutik isaas oomiisik shiiphowo. Ooko asuni shiipho gaanba faar dey akama hugnaba faarwa. 
\v 17 Eeliyas innone fe asuwa; iro ichnoynamato zaggire shiiphen keez wogganewa issun assane daasta iro aane icha. 
\v 18 Hepsa dey wolle shiiphen saman iro kere. Daas dey meya kaygi. 
\v 19 Aytaasakitono! Nittoossin isar futoni ugnaastan shaatefaan oomiis es asusin wolgifaanane;
\p
\v 20 Boor'inynyaasin boor'baassin wolgife bar boor'inynyaasa kaanon kituussin fu'enamatonawa akama boor'baasi fakiyanon dananak zaginamatona aruwowa.