\id EPH -Yemsa New Testament
\ide UTF-8
\h Efeson
\toc1 Efesonni matsafa
\toc2 Efeson
\toc3 Efe.
\mt2 Wosi Phawulosni Wosiya
\mt1 Efesonki Asuni Meyak
\imt1 Gachgiru
\ip Phawulos Efesonuk feese asuni meyak tichina wosiyaasi tesuni alamabaas: «Ha'oosi koppo wostota feeshanak samaknawa han daastakna faase testoosikito zuuttera isa daa wolla isa Kiristoosni ha'suusi sikalosi foona wonaas yoonakwa» (1:10). Es baristan daytonon dey Kiristoosneen ane isar sinak asuni zala zuuttera isar sinanak han akama koppooson wostota feeshusonek Ha'oni asuni meyanon yaadatsukwa.
\ip Efesonni wosiya tesuni bagtoostak tichi bar isar sinni chowaason tichunak kabina safarbaason taggire Aba Ha'oos darabaasin aakkak korinamato; Nawuba Yesus Kiristoosniki kamo boor'besiisi fakiyanon aakkak danetematonawa birmadu kesar sinonekna Ha'oosi akama abdini kaamnimato Korto Ayyanaaski kamo aakkak futo sinna artenamato yaadatsonektu zagi. (Edde 1-3).
\ip Hepsani tichaasi bagtosi dey tichi bar han tichaason feretisefe baasso isarik feesete kabaasik Kiristoosnik fa isar sinobesiis futo sinanak aakkak fo chimosonematotu yaadatsife. (Edde 4-6).
\ip Asuni meya Kiristoosniki kamo fa isarbesiisik baassotna baassotna aakkak foosonemato showo tesa besoni kaamak besi. Betekiristaniis atu sinfana kabaasik Kiristoos atuusik teetwa. Betekiristaniis shu'ni keenimato sinfana kabaasik Kiristoos es shu'ni keyaasi kajjani shu'wa. Betekiristaniis keerinynyanimato sinfana kabaasik Kiristoos teegonimatowa. Tichi bar Kiristoosniki kamo ammanon kessa beste Ha'oosi otmanon akamanon diinqok dajefena kabaasik akamanon doo'o safaraba faana yaada imet feer; zuuttambaase asin biifenaas Kiristoosni keeshtanaasik; basa maa'a sinaasik; fakiya zagubaasik; barki kamo beste otmaasewa nagaase asikwa.
\iot Han Matsafaas Siruk Ephna Ephobaas
\io1 Gachgiru 1:1-2
\io1 Kiristoosnawa Betekiristaniise 1:3—3:21
\io1 Kiristoosniki kamo bestoni gaddo kaa 4:1—6:20
\io1 Koor'uba 6:21-24.
\c 1
\p
\v 1 Ha'oni fiqadik Yesus Kiristoosni wosi sina Phawulosnikin; Yesus Kiristoosnik amanamto sina Efesonuk feese kortoni meyak; 
\v 2 Aba Ha'oniiskinnawa Daam Yesus Kiristoosnikinna ottumaasewa nagaase nittok sinfawungwa.
\s1 Kiristoosniki Kamo Bestefa Ayyanani Eebba
\p
\v 3 Den samak fa Ayyanani eebba zuuttambaase asik Kiristoosniki kamo innotin eebbisi Daamni Yesus Kiristoosni aba sina Ha'oosik galata sinfawungwa. 
\v 4 Kortonawa zinaba foontona sinanik han daas testonoyfeen zeemma Kiristoosniki kamo innotin kori. 
\v 5 Ha'oni ma'a fiqadi sinin Yesus Kiristoosniki kamo bari naanggota sinanik zeemma keeshtanbaasik innotin kori. 
\v 6 Es baron dey zaginaas shunto nawubaaski kamo baak innok imna ulfinto otumbaas galatamtonakwa. 
\v 7 Es baron dey zaginaas Ha'oosi otumni arkutan kabi chowa innotin shunna Nawubaasa hannak furtera miir'aniisi fakiyanon danni. 
\v 8 Techma zuuttambaase asiknawa yaadatakna; 
\v 9 Ha'oos alamabaasik Kiristoosniki kamo zeemma koppa'enamato fiqadibaasi aacho chowanon arunik zagi. 
\v 10 Wonbaas kar'fana kabaasik wostota feeshuna koppobaas samakanawa han daastakna faase testo zuuttambaase isarik isa Kiristoosni ha'suni sikalosi sinanakwa. 
\v 11 Zuuttambaase asin fiqadibaasi kiitonimato wostefa Ha'oos zeemma innok koppa'ena kopposimato Kiristoosniki kamo basa keen sinanik innotin kori. 
\v 12 Es bar dey sinnaas Kiristoosnin abdini zaguk tesunir sina innoki kamo Ha'oosi ulfina galatamtonakwa. 
\v 13 Nitto dey futoni kaamaason; es bar dey faruni misirachchuni kaamaason odera amaneti kabaasik nittok abdi girte Korto Ayyanaasik maatama ichchetiwa. 
\v 14 Es Ayyanaas ulfinbaasik galata sinanak Ha'oos barir sina baassotin zuutira furona kabaneen dananik fa ristiniisik kabdiniwa.
\s1 Phawulos Efesonki Asuni Meyak Shiiphe
\p
\v 15 Es bari boor'a Daamni Yesusnik fa amantontiisewa kortoni meya zuuttambesiise asik fa keeshtannitiise asin odera; 
\v 16 Shiiphonaasik nittotin yaadatet nitto boor'a Ha'ooson galattoson aane beyut. 
\v 17 Ulfinni Aba Daamni Yesus Kiristoosni Ha'ooson mai'sira arusotik techumnewa amma kisire biini ayyanaase nittok imtonak shiiphefawungwa. 
\v 18 Esiisimato awune fa abdik teegtesetimatonawa kortoni meya warasonek fa ulfinto ristiis awune fa akama sinnamatona arusotik nibnitiisi aafa gachchonak shiiphefawungwa. 
\v 19-20 Hoosustonooy akama hugnabaas amanefe innok awune fa inya sinbaason arutik shiiphefawungwa; es akama hugnaason wostok besinaas kitun kabgira samaki dimaastaki oi'ta teshbaasta duusina Kiristoosniki kamowa. 
\v 21 Aba Ha'oos Kiristoosnin samaki oi'ta teshbaasta duusinaas aaffa ha'sutanawa ha'suni hugnaastana dey hugnanewa Daam sinaastan denalone dey esiisimato han daastak koi'ba sinnoynaron yooni daastak sunaneen denalo sina suna immawa. 
\v 22 Ha'oos zuuttambaase basa ha'suusi sikalosi ha'unak zagi. Betekiristaniisik dey zuuttambaase asiistan denalo sinanak teet zagi. 
\v 23 Betekiristaniis dey bar zuuttambaase asin aaffa ugnaknu zuutire tuunifena basa tuuma atubaaswa.
\c 2
\s1 Kituskin Kesse Kaaki Fina
\p
\v 1 Nitto boor'nitiisiknawa mangsuntiisikna kitira faasetir. 
\v 2 Es kabaasik han daastaki mangu ugnaasik faat faasetir; esiisimato dey samaastak faase kiina ayyanaasi hugnanon ha'sifa barik ajajamet faasetir. Bar Ha'oosik ajajamo beya asuni meyaasta wostet fa ayyanaaswa. 
\v 3 Inno zuuttamniise zeemo sinak baasso ganeyaassi ashniisi fiqadiknawa kanuniisi safarakna zoonustet ashniisi eenantok faat faanir; oom meenimato dey testoniisik Ha'oosi gi'ni sikalositu faani. 
\v 4 Sinuntano Ha'oosi fakiya akama sinna boor'anawa innok fa keeshtanbaas akama sinbaastan kabi chowa; 
\v 5 Mangsuniisik kitira faafeniknu Ha'oos Kiristoosneen ane foonik zagi; nitto dey farisetiis han Ha'oosi otmakwa. 
\v 6 Ha'oos Kiristoos Yesusniki kamo barneen ane kitun kabgira samaki dimaasta innotin duusi. 
\v 7 Es baron dey zaginaas Yesus Kiristoosniki kamo innok ammanon besina garambaasewa hoossoba foonto otumbaasi arkunon yooni neyaasik innok besunakwa. 
\v 8 Nitto farisetiis amantooski kamo Ha'oosi otmakwa. Es bar dey Ha'oni imatano nitto wostoosik bestertawa. 
\v 9 Oonu teetonoynamato faruni otmaas bestenaas wostoktawa. 
\v 10 Inno Ha'oos zeemma hoossina ma'a wostooson wostonik Yesus Kiristoosniki kamo hepsa teste Ha'oosi testowa.
\s1 Kiristoosniki Kamo Bestefa Isar Sina
\p
\v 11 Es bari boor'a zeemo nitto koontontiisik Aazab sinna faasetirwa; Ayhudni meya asuni kushuk haarko kunobesiisik teetefaafe nittotin haarko kunnor yit feeseter sinnamato yaadatotiwa. 
\v 12 Nitto Israelni daraasa keen sinnor; abdini teyyani kaamaasik irba sinna han daastak dey isa abdinti foonto sinna; Ha'oosneen ane foonor; Kiristoosnistan dey oor kessa faasetir sinetimato yaadatoti. 
\v 13 Sinuntano hash nitto zeemo sinak wokka faaseti baron hash Yesus Kiristoosniki kamo basa hannaasik tai'tiwa. 
\v 14 Innotin oor kisi faassoni sawaason bogge Ayhudni meyanonnawa Aazabni meyanonna isar zagire nagani sinaas Kiristooswa. 
\v 15 Hep daraasin barneen ane isar zagire isa gaddo daranin tesunak tumaasi ajajisikitononnawa sitirisikitononna ashbaasik sharere naga zagi. 
\v 16 Masqalista kituk guma sinaason tishki. Hepobesiise asin isa billiti zagire Ha'oosneen ane gansi. 
\v 17 Yeere dey wokke fe nittoknawa tai'sere feese Ayhudni meyakna nagani misirachchuni kaamaason make. 
\v 18 Inno zuuttamniise barki kamo isa Ayyanaasik zoonustera Abaaski ta'aniwa. 
\v 19 Es bari boor'a nitto kortoni meyaneen ane isa daani asuwa. Dey Ha'oni keerki meyateno hanneen ekalok nitto irba wedey oogotewa. 
\v 20 Wosini meeni kaptaastanawa raajjuni meeni kaptaastana kaputtera yeretirwa. Kajjaasta diifa shu'aas dey Yesus Kiristooswa. 
\v 21 Shu'ni keyaas zuuttambaase es shu'aasik keetera Daamiisa betemeqdesi sinanak dichfa. 
\v 22 Ha'oos Ayyanabaasik nittoossi foona shu'ni keya sinatik nitto dey ane Kiristoosnik keetotiwa.
\c 3
\s1 Phawulosni Wosto Aazabni Meyak
\p
\v 1 Es bari boor'a ta Phawulos Yesus kiristoosnik taato sinnaas nitto Aazabni meyakwa iyaatwa. 
\v 2 Nittok ke'ungwa iyaat Ha'oos otumbaasik taak imna wostooson futok odesetiwa. 
\v 3 Zeemma kawunanon nittok tichinaasimato Ha'oos aacho chowaason ammanon kisira raa'ik taak besiwa. 
\v 4 Han nittok tichina baron feretifeti kabaasik ta yaadatena Kiristoosni aacho chowaason nitto dey yaadatotik chimatiwa. 
\v 5 Es aacho chowaas dey Ha'oosi Ayyanak korto sina wosini meyaknawa raajjuni meyakna hashti ammanon kessa bestenaasne faaron aata neyaassi feese asuni meyak aane ammanon kessa bestowa. 
\v 6 Es bar dey besifanaas Aazabni meya Ayhudni meyaneen ane ristibaason warasoneknawa isa atuni billiti sinne Ha'oos imna abdini misirachchuni kaamaaski kamo dey Yesus Kiristoosniki kamo haa'er sinobesiisongwa. 
\v 7 Ha'oos hugnabaasi wostonimato taak imna bari otmaasi imak ta dey han misirachchuni kaamaasi wostinynya siningwa. 
\v 8 Ta kortoni meya zuuttambesiise asiissin hater sinfanaknu dilba foonto Kiristoosni otum sinaason Aazabni meyak awasunak Ha'oosi otmak han wostoos taak imte. 
\v 9 Esiisimato dey aata neyaasik zuuttambaase asin tesi Ha'ooskik aachera fa aacho Ha'oosi koppo awu sinnamato asu zuuttambaase asik ammanon kisira makonakwa. 
\v 10 Es bar dey sinnaas hashti kabaasik betekiristaniiski kamo samak feese gaanynyasakitonawa ha'sinynyaasakitona Ha'oosi techmanon gito gitobaasik arsonekwa. 
\v 11 Ha'oos Daamni Yesus Kiristoosniki kamo han baron zaginaas koi'ba foonto koppobaasimatowa. 
\v 12 Kiristoosnir sinniisiknawa barik amanoniisikna Ha'oosi sinak diga foontononnawa barik amantokna ta'ak chima danniwa. 
\v 13 Ta nitto boor'a ephphataat faana shanaas nittok ulfinniti sinna boor'a abdi buggutiitawa yira shiiphefawungwa.
\s1 Kiristoosni Keeshtana
\p
\v 14 Ese Aba Ha'oosi sina ke'naasik kaa'nera shiiphefanaas han bari boor'awa. 
\v 15 Samaknawa han daastakna feese Ha'oni keerki meya isarbesi isarbesiis futoni suntosone sunbesiison danetees Ha'ooskingwa. 
\v 16 Ha'oos sirki atuntiison chinuni hugna Ayyanabaaski kamo ulfinbaasi otumtan nittok imanak shiiphefawungwa. 
\v 17 Esiisimato dey Kiristoos amantok nibnitiissi foonaknawa nitto dey tasa fokka keeshtanak chimme yerer sinatiknawa. 
\v 18-19 Yo'uba foonto Ha'oosi tuumta kar'a tuumtotik tagbaasewa dichbaase dey tegbaasewa doo'obaase asuni arustan denalo sina Kiristoosni keeshtanaason kortoni meyaneen ane yaadato chimatik shiiphefawungwa. 
\v 20 Es bari boor'a innoossi wostet fa hugnabaaski kamo mamsifeni baristannawa safarefeni baristanna denalonon akamanon daysira zagunak chimfa Ha'oosik; 
\v 21 Barik betekiristaniiski kamonawa Yesus Kiristoosniki kamona koonto zuuttambaase asik koi'ba foontonon ulfina sinfawungwa! Aamin!
\c 4
\s1 Kiristoosniki Kamo Isar Sina
\p
\v 1 Ese Daamiisa wostonon wostena boor'a taatere fe ta! Nitto teegteti teegtoosik sholsi fo foosotik shiiphefawungwa. 
\v 2 Keeshtanak nittotna nittotna fakiyak wonna wonna shuphak; garamak chimma foosoti. 
\v 3 Nagak zatera Ha'oni Ayyanaaskin bestefa isar sinaason oodak chimti. 
\v 4 Teegtesefeti kabaasik isa abdiisik teegtesetimato isa atunewa isa Ayyanane; 
\v 5 Isa Daam, isa amanto; isa haphukto; 
\v 6 Zuuttambaase asiistan denalo sina bar; zuuttambaase asiissi wostefa bar; zuuttambaase asiissi faafar zuuttambaase asi Aba sina isa Ha'oos faar.
\p
\v 7 Sinuntano Kiristoos imanak sholenasimato isarni isarniisik Ha'oosi otmani imanon innok imte. 
\v 8 Esiis dey:
\q1 «Den kesfena kabaasik;
\q2 showo boojo booje; asuni meyak dey ima imi»
\m yistenaysimatowa.
\p
\v 9 Eekan: «Den sama kesi» yifa kaamaas zeemma han daasta dey yeet daassi kere uu sina shakaanane awu unso? 
\v 10 Han yeet kere bar es zuuttambaase asin tuunuk samaasikito zuuttambaase asi denalo kesa barwa. 
\v 11 Bar dey isa isaasin wosi; isa isaasin raajju; isa isaasin misirachchuni kaamaason maksonir; isa isaasin amanynyini meyanon keemernawa assinynyani meena sinonek imaasikitonon baassok imi. 
\v 12 Es baron dey zaginaas Kiristoosni atu sina betekiristaniisikitonon chinuk; amanynyini meyanon dey wostok hoossukwa. 
\v 13 Esiisimato dey Ha'oosi Naanin aruk; amanok bestefa isar sinnaasta kar'a; Kiristoos tuum sinnaasne faaron inno dey tuum sinanikwa. 
\v 14 Hawungnneen ekalok asuni meeni jallinni eeshshuusiknawa eshasikkna hoore daagsifa assusi siruk ek hang shorket daaga naanggota aafa sinaniwuza. 
\v 15 Es baristan futooson keeshtanak maket wuza zuuttambaase asik teet sina Kiristoosniki dichani. 
\v 16 Showo atuni billitiis isa barista uphefanaas Kiristoosnikwa. Atuus zuuttambaase dey isa barista zatenaas ke'oba ke'obaasikwa. Es bari boor'a atu isarba isarbaasi billiti barik imte wostooson mai'sira wostefana kabaasik atuus zuuttera dichfa; keeshtanaasik dey chimma yerefawa.
\s1 Kiristoosniki Kamo Bestefa Gaddo Kaa
\p
\v 17 Hawungneen ekalok safarabesi ke'nor sina Aazabni meenimato footiitawa yira Daamiisa sunak nittotin kiitifawungwa. 
\v 18 Baasso kanuus talme; nibbesiisi muumtan kabi chowa aru beybesiisik Ha'oosi kaastan oor kesetewa. 
\v 19 Iichchanni kanubesiis tishina boor'a kiina wuzasikitonon zuutire zaguk teetbesiison ashni eenantobesiisik aatire imete. 
\v 20 Sinuntano nitto Kiristoosni chowaason arisetiis ekkatawa. 
\v 21 Futoosik basa chowaason odetiwa; Yesusniissi fa futooson barkin aritiwa. 
\v 22 Es bari boor'a nittotin eeshshira boor'aassi zoonsifa eenantoosik mangu zeemmati faati fooson; kur'u testoni amalaason eenantobaasneen ane kisira ha'utiwa. 
\v 23 Kanuntiisi Ayyanak gaddo sinti. 
\v 24 Futoni ookoosiknawa kortoosikna Ha'oosi gitok teste gaddo atuuson mayti.
\p
\v 25 Es bari boor'a esha wolla wollotiita. Zuuttamniise isa atuusi billiti sinni boor'a innotna innotna wol futo wuzasontu wolloni. 
\v 26 Gi'toti; sinuntano es gi'aasik boor'aason wostotiita; gi'nitiis keronoyfeen awa girunaata. 
\v 27 Dabulosnik dey giruna katto besutiita. 
\v 28 Zeemo wiiset fe bar hanneen ekalok wiisonaata. Es baristan tukamni meyak imana waagba foonak bar teetbaasik ma'a wosto sina baron wostowo. 
\v 29 Odefe baassotin girsira zagguni kaamatano noonontiissin isanne mangu kaama kesanaata. 
\v 30 Furtoti wonaasik maatama ichcheti Korto Ha'oosi Ayyana suumonak zagutiita. 
\v 31 Suqaro sina, haari, gi'a, sasa mei'newa aaffa mangu wuzaas zuuttera nittoostan wokun. 
\v 32 Es baristan nittotna nittotna wol ma'ar dey asunik safarer; kenashter sinti. Ha'oos Kiristoosniki kamo nittotin feeshun yinaasimato nitto dey nittotna nittotna wol feeshun usoti.
\c 5
\s1 Chaarefaassi Fo
\p
\v 1 Ese shunto naanggotnimato nitto dey Ha'oosi ugnak zoonustoti. 
\v 2 Kiristoos innotin shunaasimatonawa Ha'ooson girsuni sawuba faana mabanewa maa'ane zagire kaabaason innok aatire imnamatona nitto dey keeshtanak footi. 
\v 3 Es effatena wuzaas kiristanani meyak aane mai'fa sinna boor'a gerkesa wedey aaffa tesa zinanu sinun wedey joortu sinaas wolumbaasnu nitto ganeyaassi odtonak aane sholsifawa. 
\v 4 Es baristan Ha'oosik galata imtitano asu giistonaknawa gowwani meeni wollakna wedey kanyni wollakna wollotik aane sholsifawa; es effatena wuzaas nittok ma'ba aafawa. 
\v 5 Gerkesa sinun wedey awune fa zina sina wosto zagit fe asu feefaanane wedey kool'oni shiiphone fa joora sinun Kiristoosnikinawa Ha'oosi taatosina ristiba aafa sinnamato arutiwa. 
\v 6 Han wuzaasikitoni boor'a ajajamonoy asuni meyaasta Ha'oni gi'a yoonir sinna boor'a oonu ke'noy wollak nittotin eshanaata. 
\v 7 Es bari boor'a ajajamonoy asuni meyaneen ane isar sinatiitawa. 
\v 8 Zeemo nitto talmasitu faafeti; sinuntano hash Daamiisar sineti boor'a nitto chaarefawa. Es bari boor'a chaarefaassi feese asuni meenimato foosotiwa. 
\v 9 Chaarefaasi gaana bestefanaas ma'aron zaguknawa ooko sina wuzasiknawa. 
\v 10 Es bari boor'a Daamiisin girsuni wuzaas awu sinnamato tu'nusoti. 
\v 11 Chaarefaasta ammanon kessa bestonak zagutitano gaanba foonto sina talmuni wostoosneen ane isar sinatiita. 
\v 12 Talmaassi feesefe asuni meya aachonon zagsefe wuzaas wollaknu iichuwa. 
\v 13 Zuuttambaase chaarefaasta kesfana kabaasik futoni gitobaas ammanon bestefa. 
\v 14 Ammanon kessa bestefa bar zuuttambaase chaarefawa. Es bari boor'a
\q1 «Afay'te ne guzuwa!
\q2 Kitun dey kabuwa!
\q2 Kiristoos dey neek chaarsunawa» yistewa.
\p
\v 15 Ese aakkak footimato mai'sira yaadatotiwa. Techumni meenimatotano gowwani meenimato footiitawa. 
\v 16 Wonaasikito mangu sinna boor'a aagene aagene wonaason wostota feeshuti. 
\v 17 Es bari boor'a Daamiisa fiqadi awu sinnamato yaadatotitano gowwa sinatiita. 
\v 18 Tishuni ugnaassi nittotin taamnir sinna boor'a waynini ushak zawotiita. Es baristan Korto Ayyanaasik tuumtoti. 
\v 19 Gaamaknawa we'sokna; Ayyanani teechok nittotna nittotna wol wollosoti; we'soknawa gaamakna tuuma nibnitiisik Daamiisin galattoti. 
\v 20 Daamni Yesus Kiristoosni sunaasik wuza zuuttambaase asik Aba sina Ha'ooson wonna wonna galattoti.
\s1 Teegoni Meeni Chownewa Keerinyani Meeni Chowne
\p
\v 21 Kiristoosni ulfinaasikwa iyaat nittoossin isaas oomiisik ajajamowo.
\p
\v 22 Keerinyani meyane! Daam Yesusnik ajajamefetiisimato teegontisakitonik ajajamoti. 
\v 23 Kiristoos betekiristaniisik teet sinnamatonawa atuba sina betekiristaniison fatunir sinnamatona teegoos dey asubaasi teetwa. 
\v 24 Betekiristaniis Kiristoosnik ajajamefanamato keerinyaasikito dey zuuttambaase asik teegobesiisik ajajamosoto. 
\v 25 Teegoni meyane! Kiristoos betekiritaniison shunnamatonawa teetbaason barikwa iyaat aatire imnamatona nitto dey keerinyatiisikitonon shunti. 
\v 26 Kiristoos es baron zaginaas betekiristniison korto zagunak sholefaatwa. Korto zaginaas dey kaambaaski kamo akak massewa. 
\v 27 Es barik kiina wedey aafsiki karawo wedey es barne fa ooma mangu wuza barista bestonoynamato korto; mudaba foonto gada zagire barki tai'sunakwa. 
\v 28 Esiisimato teegoni meya baasso teetbesiison shunefeysimato keerinyabesiisikitonon shunonek sholsuwa. Asubaason shunfe bar teetbaasontu shunfe. 
\v 29 Basa teetni atuuson oomtefe asu oonu aafe; es baristan ooma Kiristoos betekiristaniisik zagifenaysimato basa teetaason maasir; dey ferer. 
\v 30 Inno dey Kiristoosni atuni billitiwa. 
\v 31 Es bari boor'a «Asu intobaasonnawa ababaasinna beyye keerinyabaasneen ane taphtefe; hepobesiise dey isa atu sinefe» yistewa. 
\v 32 Han aacho chowaas akamanon inyawa. Es baron yinaas Kiristoosninnawa betekiristaniisonna beso zagirawa. 
\v 33 Sinuntano han wuzaas nittotin dey biyar sinna boor'a teegoos keerinyabaason basa teettason shunfenaasimato shuno; keerinyaas dey teegobaysin ulfinsun.
\c 6
\s1 Abane Intone Asi Chownewa Naanggotni Chowne
\p
\v 1 Naanggotaasikitone! Sholsir sinna boor'a Daamiisikwa iyaat kooni aba intontiisik ajajamosoti. 
\v 2 «Abanesinnawa intoneesonna ulfinsu» yifa ajajiis tesunirwa; es ajajiis dey: 
\v 3 «Zuuttambaase neek ma'ar sinana; han daastak dey wogganees dichana» yifa abdini kaamba faanarwa. 
\v 4 Nitto dey kooni abanawa intoni meyane! Daamiisa sitirinon assuk; kaanuknawa ke'ukna dichutitano naanggotnitiison haarsuk jiina'osonak zagutiita.
\s1 Bozni Meyanon Ha'sife Baassotnawa Bozni Meena
\p
\v 5 Nitto bozni meeno! Han daastak nitto daam sina baassok digaknawa korkukna ajajamosoti; Kiristoosnik ajajamefetiisne faaron ma'a nibak ajajamosoti. 
\v 6 Ajajamotiis dey Ha'oosi fiqadinon nibaassin kabi safarak wostesefe Kiristoosni wostinynyasamatotano asunin girsukwa iyaat biistok zagutiita. 
\v 7 Asunin sinnoynaron Daamiisik wostet faatimato zagira girak wostoti. 
\v 8 Boz sinfenak birmadu isa isarbaas wostena ma'a wostoosi wossumanon Daamiiskin ephphetoonamato arifetiwa. 
\v 9 Daamni meyane! Asuni sina biire teshshunoy nittor sina Daamiisnawa baassor sina Daamiisna samak feenamato yaadatok fokkorontiison beyfaat boznitiisakitonik ma'a wuza zagutiwa.
\s1 Ha'ooskin Bestoni Neeboni Meya
\p
\v 10 Ese han baristan fu'te barik Daamiisiknawa basa akama hugnaasikna chimti. 
\v 11 Dabulosni mangu wostooson tugga'o chimatik Ha'oosi neeboni meyaason zuutira mayti. 
\v 12 Inno neebefeni neeboos asuni meyaneen ane sinnoynaron han talma daasta wostet feese ha'sife baasso; ha'sinynyani meenawa han daastaki hugnaasneenna dey den samak faase kiina ayyanaasikitoni taar'osneengwa. 
\v 13 Es bari boor'a mangu wonaasik gumantiisa hugnanon wolguk chimatiknawa zuuttambaase asin wostota feeshira zagira yero chimatikna Ha'oosi neeboni meyanon zuutira kabguti. 
\v 14 Ese futooson zinnara zagira geshontiista taar'era; ookooson nibbaastaki xiruri zagira mayti. 
\v 15 Nagani misirachchuni kaamaason chaa'manimato zagira yer'a hoorera yeroti. 
\v 16 Es baristan denalo geenimato saamma wobawobtet fa Dabulosni manguni yeegason zuutira tishku chimati amantooson geebanimato zagira ephti. 
\v 17 Faruuson gufta zagira teetnitiista guufoti; esiisimato dey Korto Ayyanaaskin bestefa siifoson; es bar dey Ha'oosi kaamanon ephti. 
\v 18 Wonna wonna Korto Ayyanaasik zoonustok shiiphonewa mamsune asin tai'suti. Es barik kortoni meyak guzira chimma shiiphoti. 
\v 19 Misirachchuni kaamaasi wosi sinnaasik shashsharak taatena bari aacho chowanon diga foontonon ammanon kisira makonak kaama taak imtonak shiiphoti. 
\v 20 Es bari boor'a misirachchuni kaamaason makonak sholsinasimato diga foontonon makonak taak shiiphotiwa. \fig Roomni meya taar'oni meeni neeboni meya |alt="Roman soldier in armor" src="LB00196B.tif" size="span" ref="6:18"\fig*
\s1 Koi'baastaki Nagani Ooshsho
\p
\v 21 Shunto ayniisnawa Daam Yesusni wostoosik amanamto wostinynya sina Tikiqos ta chowaas aakka sinnamatonawa awu wostet faanamatona zuuttambaase asin nittok makonawa. 
\v 22 Es bari boor'a inno aakkak faanimato arutiknawa nittotin dey chinunakna iyaattu barin nittoki wosingwa. 
\v 23 Ha'o Abaaskinnawa Daam Yesus Kiristoosnikinna naganewa keeshtanne dey amantoosneen ane ayni meyak sinfawungwa. 
\v 24 Maajunoy wedey ko'unoy keeshtanaasik Daamni Yesus Kiristoosnin shunfe baasso zuuttambesiise asik basa otma sinfawungwa.