\id 2TI 2 TI -Yemsa New Testament
\ide UTF-8
\h 2 Ximotiyos
\toc1 2 Timotiyosni matsafa
\toc2 2 Timotiyos
\toc3 2 Tim.
\mt2 Wosi Phawulosni Hepsa Wosiya
\mt1 Ximotiyosnik
\imt1 Gachgiru
\ip Phawulos Ximotiyosnik tichina han hepsa wosiyaas Pawulosnin tai'sonon argasi wostoni zoomobay sina na'o Ximotiyosnik imna kiitooson ephowa. Daysire dey kiitinaas fakiyak chinukwa. Ximotiyos kiitonewa chinuni kaama dannaas Yesus Kiristoosni chowaason amanamtok zaala makonak zaggire ephanaknawa awune faaronnu shanaasewa tugga'oose arkifanaknu assuusiknawa misirachuni kaamaasi makoni wostoosikna duudonakwa.
\ip Ximotiyos arkiron teetbaason oodanak maktenaas gowwumak zagtefa sinnooy kirikiriissin wokanakwa. Es effatena wuzaas odefe baassotin tishkutano ooma ke'fana wuzaba aafawa.
\ip Es wuza zuuttambaase asik Ximotiyos yadatonak sholsinaas Phawulosni kaasewa foose arkiron dey amantobaason; fakibaason; keeshtanbaason; chimbaasonnawa kabugtok basaasta kar'a shanaasi besok zoonustonakwa.
\iot Matsafaas Siruk Ephna Ephobaas
\io1 Gachgiru \ior 1:1-2\ior*
\io1 Ximotiyosnik imte kiito \ior 1:3—2:13\ior*
\io1 Mormoni kabaasik amanamto sinne besto \ior 2:14—4:5\ior*
\io1 Es kabaasik faase wuzaaasikkitonewa sholsu zoonsune \ior 4:6-18 \ior*
\io1 Koor'uba \ior 4:19-22 \ior*
\c 1
\p
\v 1 Yesus Kiristoosnikin beste kaani abdiisik Ha'oosi fiqadik Yesus Kiristoosni wosi sina Phawulosnikin woste wosiya; 
\v 2 Shunto naata Ximotiyosnik; aba Ha'oniiskinnawa Daamni Yesus Kiristoosnikinna otumnewa fakine dey nagane neek sinfawungwa.
\s1 Ximotiyosnik Imte Kiito
\p
\v 3 Wonna wonna wonne waalne shiiphonaasik neen safarefana kabaasik ta abani meya zagsetesimato ta dey kayma kanuk barik wostefana Ha'ooson galattefawungwa. 
\v 4 Arafneeson yaadatedifawungwa; es bari boor'a akamanon gironak neen biyanak kaltefawungwa. 
\v 5 Neekik fa futoni amantooson yaadatedifan. Effatena amantoos zeemma afane Loyidniki dey intone Ewunqekiktu fawa. Neekik dey faanamato aringwa. 
\v 6 Es bari boor'a kushunaason neyista ta'ifana kabaasik neek imte geenimato sinna neyissi fa Ha'oosi imanon hepsa wolgira geenimato saamma daysit hamanak yaadatsifawungwa. 
\v 7 Ha'o innok imna imaas hugnanir, keeshtannir, dey teetni ha'suni Korto Ayyanatano digani ayyanatawa. 
\v 8 Ese Daamniisa chowanon makooson iichchotaata. Basa boor'a taatere fe taak dey iichchotaata. Sinuntano Ha'o neek imana hugnaasik misirachchuni kaamaasi boor'a yooni shanaason ephphatowa. 
\v 9 Bar inno zagini ma'a wostok sinnoynamato teetbaasi shunaknawa otumbaasikna innotin fati. Korto sinna foonik innotin teege. Es otmaason neyaneen sinak Yesus Kiristoosniki kamo innok imi. 
\v 10 Es otmaas innotin fati Yesus Kiristoos yoobaasik ammanon beste. Bar kituusi hugnanon tishkire misirachchuni kaamaaski kamo kitunoy koi'ba foonto kaa ammanon innok besi.
\p
\v 11 Ta dey es misirachchuni kaamaason makoni wosi; assinynya sinna teegten. 
\v 12 Han rakkooson ephphataat faanaas es bari boor'awa. Sinuntano oonin amanenamato arifana boor'a aafa iichchonawuza. Ta imna adaraason Kiristoos wolle yoona kabaneen bar ooda chimanamato arifawungwa. 
\v 13 Taakin arita amanamto kaamaason beso zagira Yesus Kiristoosnik fa amantoosiknawa keeshtanaasikna oodwa. 
\v 14 Innoossi faafa korto Ayyanaaski kamo neek imte ma'a adaraason oodwa.
\p
\v 15 Iisiyani awurajjaassi fe baasso zuuttere taan beyye hametemato arifatwa. Baasso ganeyaassin Figelusnawa Hermogenesna feeseter. 
\v 16 Daamiis Onesiforni keerki meyak fakibaason imawowa. Bar showo wona taan chini. Taatonaasiknu aane iichchowe. 
\v 17 Roomki katama yeena kabaasik dey sholefe sholefetu taan dani. 
\v 18 Mangsuni kar'ni wono Daamiis fakibaason imawowa. Efesonuk faana kabaasik awune faaron taan argasinamato ne teetneesik mai'sira arifatwa.
\c 2
\s1 Kiristoosni Amanamto Meya Taar'o
\p
\v 1 Ese naataaso! Yesus Kiristoosnikin bestefa otmaasik chimwa. 
\v 2 Showo zaalni meeni sinak taakin arita aruuson oomni meyanon assuk chimni baassoknawa amanamto asuni meyakna adara imma. 
\v 3 Ne dey Yesus Kiristoosni ma'a meya taar'o sinna taneen ane shanaason ephphatowa. 
\v 4 Taar'o sinne wostefe asu meya taar'oosa gaanynyanin girsuk hooro sinanaktu sholsifatano taar'oos teetbari wostoossi aane girife. 
\v 5 Esiisimato aato aato eelfe asu tumbaasimato eela shakaanane merere es merena bari wossuma aafa danana wuza. 
\v 6 Wostok hopife bulinynyaas wostena gaanaassin tesuniison dananak sholsifawa. 
\v 7 Daamiis zuuttambaase asik yaadata neek imana sinna boor'a ta makefana baron mai'sira yaadatowa. 
\v 8 Kitun kabi barinnawa Dawitni zalaassin sina Yesus Kiristoosnin yaadatowa. Ta makefana misirachchuni kaamaas esiiswa. 
\v 9 Es misirachchuni kaamaasi boor'a mangsi asunimato shashsharak taatera shana ephpha taadifangwa. Sinuntano Ha'oosi kaama aafawa taatona wuza. 
\v 10 Es bari boor'a baasso dey Yesus Kiristoosnik fa faruuski kamo bestefa koi'ba foonto ulfina danonek Ha'o korina asuni meyakwa iyaat zuuttambaase asin fakifaan. 
\v 11 Ekka yifa kaamaas amantowa;
\q1 «Barneen ane kitifaanine;
\q2 barneen ane dey kaak fooni.
\q1
\v 12 Fakiyak chima yerefaanine;
\q2 barneen ane taattoni;
\q2 mormefaanine bar dey;
\q2 innotin mormonawa.
\q1
\v 13 Inno amanamto asu;
\q2 sina shakaanine;
\q2 bar teetbaason;
\q2 aafa mormona wuza sinna boor'a;
\q2 aagenu amanamto sinnetu foona.»
\s1 Chim Wostinynya
\p
\v 14 Han chowaason yaadatsonek zaguwa. Kaamtan kabi chowa karakkarsonoytemato Ha'oosi sina teetbesiison oodosonek zaguwa. Es kaamni karakkaroos odesefe asuni meyanontu tishkunatano isa wuzaknu aane ke'fa. 
\v 15 Futoni Ha'oosi kaamanon likkik katife asunimatonawa wostobaasik iichchonoy wostinynya sinna teetneeson Ha'oosi sina tai'sukna dey girsi asu sinatak duudowa. 
\v 16 Han daastaki chownewa shima sina wollaastan wokwa. Es effatena wollaas asuni meyanon Ha'oostan daysire wokosonektu zagifawa. 
\v 17 Es baasso assus farunoy mazanimatotu tagit hamfa. Es baasso ganeyaassin Hemenewosnawa Filtosna feeseter. 
\v 18 Es asuni meya: «Kitun kabu zeemo sinaktu siniwa» yit karakkarok futoostan wokete. Dey isa isa asuni meeni amantooson shorkisefewa. 
\v 19 Sinuntano «Daamiis basar sina baassotin arifewa» Esiisimatonu: «Daamiisa sunanon teegefe baasso zuuttere manguustan wokosoto» yistera tichchera shorkonoy Ha'oosi kaptaasta maatamak ichchewa.
\p
\v 20 Inya keyaassi warqeknawa birrikna wosuste koda koi'ba sinnoynaron i'okin wosuste kodanewa ooche kodane faaser. Es barissin isa isaas ulfinto wostok; isa isaas ulfinba foonto wostotatu feeshfa. 
\v 21 Es mangu wuzaassin kortere kesse kayim sinne feefe asus ulfinto wostota feeshfa kodaasne feer sinana. Ma'a wostok hoore bar Daamiisik korto sinne feere ke'ni koda sinana.
\p
\v 22 Na'oni meeni mangu eenantoostan wokwa. Kayma nibak Daamiisin teegsefe asuni meyaneen ane sinna ookooson, amantooson, keeshtanaason, nagaason sholowa. 
\v 23 Chowa ephpha yoonamato arira gowwa sinaastannawa ke'noy shima karakkarostan wokwa. 
\v 24 Daamni wostinynya sina asu zuuttambaase asik garam, assuk chimarnawa fakirna sinanaktu sholsifatano faassonak aane sholsifawa. 
\v 25 Bar tugga'esefe baassotin garamak kiitir sinanak sholsifa. Awuzakne futooson arsonek Ha'oos harmini ugna baassok imak chimana. 
\v 26 Esiisimato nibbesiiski wolsere Daabulos basa fiqadiison zagsonek baassotin ephni eshmiyaassin aatte kesonewa.
\c 3
\s1 Koi'ni Wonaas
\p
\v 1 Koi'ni wono rakkisuni wona yoonamato aruwa. 
\v 2 Asuni meya teetbesiison keeshter, Waagni danak joorer, ge'eser, beganter, me'eser, aba intoosik ajajamonor, galatbesi foonto, kortobesi foonto, 
\v 3 Keeshtanbesi foonto, feeshun usonor, asuni suna mangsiser, teetbesiison ha'sunor, keena budu, ma'ar sina wuzason oomteser, 
\v 4 Mormeser, teetbesi oodnor, beegantok tuumme feeser, Ha'ooson shunaastan ashbesiison girsu shunar sinone. 
\v 5 Ha'ooson shiiphediferne feer sinnetu bestesefe; sinuntano Ha'oosi shiiphoni hugnanon mormesefe. Es effetena asuni meyaastan wokwa. 
\v 6 Es asuni meya keya keyaassi aatte girifaafe showo boor'besi tuultera faana showo tesa igak zoonustesefa hopiya ayyanabesi faana mashkasuson baasso ha'suussi zagsefe asuni meyane feeseterwa. 
\v 7 Es effatena mashkasusikito wonna wonnatu arsesefe; sinuntano futooson aruta kar'ak aane chimefe. 
\v 8 Iyyanesnawa Iyyanberesna Musenin tugga'sesetemato han baasso kanubesiis mangiranawa amantoni chowaasik gandesere feeseter sinna boor'a futooson tugga'esefe. 
\v 9 Iyyanesnawa Iyyanberesna asi gowwaas ammanon bestenamato han baasso gowwaas dey asu zuuttambaase asi sina ammanon bestonir sinna boor'a aafa wostota feeshana wuza.
\s1 Koi'ni Kiito
\p
\v 10 Sinuntano ne ta assuuson, ta fooson, ta alamaason, ta amantooson, ta fakiyaason, ta keeshtanaason, ephna barik chimme yeronaason arifatwa. 
\v 11 Esiisimato dey kabugtonaasonnawa ephphataana shananaasonna arifatwa. Ansokiyaknawa Ikoniyokna, dey Listirak tayista kar'a chowaasewa fakiyak ephphataana kabugtoose arifatwa. Sinuntano Daamiis zuuttambaase asiissin taan fu'ewa. 
\v 12 Futok Kiristoos Yesusnir sinne Ha'ooson girsire fook sholsefe baasso zuuttere kabugteseterwa. 
\v 13 Sinuntano mangu asuni meenawa eshtuni meena asuni meyanon eshetnawa teetbesiisik daagesetna manguusta mangu daysiset hamefe. 
\v 14 Sinuntano ne ookin aritamato aritar sinna boor'a es arita bariknawa amaneta futoosik zaguwa. 
\v 15 Daagneestanneen kabira Yesus Kiristoosnik amanok faru bestefanamato techma imfa korto matsafaasikitonon aritwa. 
\v 16 Korto matsafaasikito zuuttera Ha'oosi Ayyanani zoonsiyak tichcherwa. Es bar dey futooson assuk; daage baassotin ke'uk; daaget fooson kaanuknawa ma'a fook sinni ugna imak ke'arwa. 
\v 17 Es ke'fanaas dey Ha'oni asu zag sinanaknawa aaffa ma'a wostooson dey wostok hoorer sinne bestonakwa.
\c 4
\p
\v 1 Ha'oosi sinaknawa dey taatobaason yeetifena kabaasik hayewni meyaastanawa kituni meyaastana mangsu kar'ni Yesus Kiristoosni sina adara yifan. 
\v 2 Kaambaason mako; mai'fanak mangifanak aagenu sinun chimma wostowa; assit, ke'itnawa kiititna; fakiyaknawa assukna chimwa. 
\v 3 Asuni meya kaa imfa assuuson odok oomtosone wona yoona. Sinuntano baasso sholsefe wuzason makoni assinynyabesirin zuutusone. 
\v 4 Es bari boor'a futosi chowanon odo beyefaat raajini odok sholsefe. 
\v 5 Sinuntano ne zuuttambaase asiistan teetneeson ood. Shanani ephphetook zagu; Misirachchuni kaamaasi makoni wostooson wosto. Neek imte wostooson zuutira koi'su. 
\v 6 Ta maa'a sinanak hooreratu fawa; han daastan dey oor kessa hamana wona kar'i. 
\v 7 Neebooson ma'arik neeben; aatatoni eelaason koi'ba kar'a eelin; amantonaason oodin. 
\v 8 Hanneen ekalo ookoni akilili taak hoorera faar. Es akililiison futok mangsu kar'fe Daamiis es kabaasik taak imana. Imanaas dey taak koi'ba sinnoynaron basa ammanon bestooson kaltesefe baassokneengwa.
\s1 Teetni Chowa
\p
\v 9 Taptera hang taaki yootak duudowa. 
\v 10 Deemas han daasta fa wuzason shunne tayistan oor kesse Teselonqe hami; Kerqiis Galatiya hami; Tiito dey Dilmatiya hami. 
\v 11 Taneen ane feyiis Luqas koi'ba. Marqos Ha'oni wostok ke'nir sinna boor'a sholera taak ephpha yowa. 
\v 12 Tikiqosnin Efeson wosingwa. 
\v 13 Yaafata kabaasik Tiroaddak Karpusniki esta kunsina kombortaason taak ephpha yowa. Matsafaasiktonon arkiron dey Birannani matsafaason taak ephpha yowa. 
\v 14 Bitta ki'fe Iskindir akama miir'a tayista kati. Daamiis wostobaasimato barik kaasuna. 
\v 15 Bar inno makefeni baron mai'sire tugga'er sinna boor'a nenu teetneeson basaastan oodwa.
\p
\v 16 Ta malattena chowaasik tesuni malsiison wolgifana kabaasik zuuttambesiisetu tayistan woketetano taneen ane yerere taan argasir oonu aafe. Es baron dey Ha'oos mangsu zagira baassosta faadunaata. 
\v 17 Sinuntano wosiyaas taaki kamo zuuttera maktonaknawa Aazabni meya zuuttere odosonek Daamiis taneen ane sinne taan chini. Eetoosa noonosin dey fu'ten. 
\v 18 Daamiis mangu wuza zuuttambaase asiissin taan fu'ona. Samak fa taatobaasta taan taamme katuna. Barik koi'ba foontonon ulfina sinfawungwa! Aamin.
\s1 Koi'ni Nagani Ooshsho
\p
\v 19 Prisqillaknawa Aqilakna; Onesiforimni keerki meyak naganaason mako. 
\v 20 Erastos Qoronxos katama fu'te; Trofomos mettena boor'a Milixin beyya yaan. 
\v 21 Yeeshu girunoyfen taaki taptere yook duudowa.
\p Ewubulus, Phudes, Linos, Kilawudiyanewa amanynyini meene zuuttere naga maksedife. 
\v 22 Daamiis neneen ane sino.
\p Ha'oosi otma nittoneen ane sinfawung.