\id TIT -Jabem partial Bible [jae] -Papua New Guinea 1980 (web 2015) 
\h TITI 
\toc1 Paulunê papia gêdêŋ  TITI 
\toc2 Titi 
\toc3 Tit 
\mt2 Paulunê papia gêdêŋ  
\mt1 TITI  
\ip Titi tonaŋ têna kêkôc eŋ ŋac samuc. Eŋ gêŋô Mêtê aŋga Paulunê, tec gêjam tau ôkwi ma gêliŋ saŋgu, go kêtu ênê kômwaga teŋ, taŋ gêwiŋ eŋ to kêpuc eŋ tôŋ kêtu kôm mêtêŋa kêsap eŋ toŋ ŋaŋêŋ.  
\ip Paulunê papia gêdêŋ Titi nec eŋ kêsakiŋ gêdŋ nê kêpuctôŋwaga matac gêja Krete. Paulu gêwi eŋ siŋ gêŋgôŋ nuc tonaŋ gebe ênac dabiŋ koleŋ ŋagêdô-gêdô samob, taŋ agêc sêjam e gêbacnê atom tageŋ naŋ.  
\ip Papia tonec kêwaka biŋ ŋatêna kapôêŋ têlêac sa. (1) Paulu gêôŋ biŋ sa gêdêŋ Titi kepeŋ ênê kauc lasê kêpi lau Krete tau gebe taŋeŋpêc ma dansaŋtêna to ojomtêna ma lasamtêna êsêac, tec gebe Titi êjaliŋ êsêac tauŋ nêŋ lau mansaŋ ŋagêdo sa têtu iaumata, ec sejop to sênam gôliŋ êsêac sêŋgôm naêtômgeŋ. (2) Paulu gêsuŋ gôliŋ ŋagêdô gedeŋ Titi gebe êndôŋ lau tokaiŋ-tokaiŋ aŋga gôlôac buŋa ŋalêlôm amboac lau ŋanô to lauo ŋanô (taŋ eŋ gebe tauŋ têndôŋ lauo matacmaŋ naŋ), ma lau matac to sakiŋwaga. (3) Gocgo Paulu gêlêŋ biŋ Titi kêtu lêŋ lau buŋa sêsa-sêsa naŋŋa. Eŋ kêkac êsêac sê wama tauŋŋa ma sêwiŋ tauŋ sêmoa tonêŋ ŋalêlôm malôgeŋ ma tolaŋôŋanô ŋakêŋkeŋgeŋ ŋapaŋ. Eŋ ênac jao têntac sec to biŋkalom ma sêwa tauŋ ekôcŋa gebe lau buŋa dendec biŋ sec tonaŋ ŋaiŋa.  
\iot Ŋadênaŋ  
\ili1 1. Paulu gêjac m papia tonec 1:1-4  
\ili1 2. Gôlôac ŋakoleŋwaga 1:5-16  
\ili1 3. Gôliŋ gêdêŋ lauo ŋanô to ŋac ma lau matac 2:1-15  
\ili1 4. Paulu gêlêŋ biŋ to gêjam ja lau buŋa 3:1-11  
\ili1 5. Paulu gêiac mata nê papia 3:12-15  
\c 1  
\s1 Paulu gêjac m nê biŋ  
\p
\v 1 Anôtônê sakiŋwaga ma Jesu Kilisi nê aposolo aê, Paulu. Anôtô kêsakiŋ aê gebe japuc lau-sêkêŋ-gêwiŋwaga, taŋ Anôtô kêjaliŋ êsêac sa naŋ, tôŋ to jawê êsêac sêjala biŋŋanô, taŋ ŋam kêsêp Anôtônê mêtê naŋ,  
\v 2 ma sêkêŋ mateŋ daŋgôŋ mateŋ jali teŋgeŋ, taŋ Anôtô gêjac mata gêdêŋ andaŋgeŋ naŋ gêŋ samob masigeŋ. Eŋ kêsau atom,  
\v 3 go gêdêŋ ŋanoc tau Anôtô geoc nê biŋ lasê ma kêkêŋ aê kasôm ŋawae ŋajam lasê kêtôm aêacnêŋ kêsiwaga Anôtô kêjatu aê naŋ.   
\p
\v 4 Aêŋoc biŋ êndêŋ latuc ŋanô, Titi, taŋ aêagêc takêŋ gêwiŋ-ŋanô tageŋ naŋ.  
\p Tameŋi Anôtô agêc aêacnêŋ kêsiwaga Kilisi Jesu nêŋ moasiŋ to biŋmalô êndêŋ aôm êwac.   
\s1 TiIinê kôm, taŋ gêjam gêmoa nuc Krete naŋ  
\p
\v 5 Aê gawi aôm siŋ gôŋgôŋ Krete gebe ônac dabiŋ kôm ŋagêdô, taŋ gacgeŋ gêcŋa naŋ, e êmbacnê acgom. Ôkêŋ laumata sêŋgôŋ êtôm malacgeŋ amboac kasakiŋ aôm.  
\v 6 Ŋac laŋônêm sawa, taŋ gêjam awê tageŋ ma nê ŋapalêo to ŋac sêkêŋ gêwiŋ ŋapep to nêŋ waeŋ wauc-wauctêna to taŋeŋpêcŋa teŋ gêc atom naŋ, ŋac amboac tonaŋ êtu lômmôkê.  
\v 7 Aôm kôjala gebe gejobwaga kêtu Anôtônê gêŋ ŋasakiŋwaga, tec êmoa laŋônêm sawageŋ. Eŋ etoc tau sa atom, ŋac têtac ŋandaŋboa atom, ênôm gêŋ anaboa atom, lêma ênac si ŋ ŋawaô atom ma êwê launêŋ gêŋ aucboa atom.  
\v 8 Eŋ êŋgôm ja lau, ŋac têtac êwiŋ biŋ ŋajamŋa, êsa nê lêŋ tokaucgeŋ, ŋac gêdêŋ, ŋac dabuŋ ma ŋac ŋalêlôm ŋawa êtu mêtê tau ŋapep.  
\v 9 Eŋ êkam mêtê ŋanô tau tôŋ êtôm taŋ têdôŋ eŋ naŋ, e tau êtôm gebe êIêŋ biŋ lau ŋa mêtê solop ma êmêtôc êsêac, taŋ sebe senseŋ mêtê tau su naŋ.   
\p
\v 10 Lau taŋeŋpêcŋa gwalêkiŋ tec sêmoa. Êsêac sêsôm biŋ agwa-agwa ma sêsau sêôc lauboa. Lau taŋ sêsa êsêac têtu Judawaga naŋ, tec sêgôm gêŋ tonaŋ sêjac ŋawaegeŋ.  
\v 11 Tanac lau amboac tonaŋ aweŋsuŋ aucmaŋ, gebe têdôŋ biŋ, taŋ kêtôm gebe têndôŋ atomŋa naŋ, e sêjam gôlôac andu ŋagêdôŋa ôkwi samucgeŋ. Sêgôm kêtu ŋam tageŋ tonecŋa gebe têtap awa saŋa.  
\v 12 Lau Krete tau nêŋ ŋac teŋ, taŋ kêtu êsêacnêŋ propete teŋ naŋ, kêsôm gebe “Lau Krete êsêac dansaŋtêna to bôclai ma ojomtêna, taŋ seŋ lasamboa naŋ, sêgôm ŋapaŋ sêmoa.”  
\v 13 Ênê biŋ tonaŋ biŋŋanô. Amboac tonaŋ ômêtôc êsêac ŋajaŋa gebe gêmac, taŋ kêtap nêŋ sêkêŋ gêwiŋ sa naŋ, ŋajam êsa êtiam,  
\v 14 ma sêsap Judanêŋ sêboaco to ŋamalac, taŋ sêkac tauŋ su aŋga biŋŋanô naŋ, nêŋ biŋsu tôŋ êtiam atom.  
\v 15 Lau tonêŋ ŋalêlôm selec sêsaê gêŋ samob gebe selec. Mago êsêac tonêŋ ŋalêlôm ŋatêmui ma sêkêŋ gêwiŋ atom naŋ nêŋ gêŋ selec teŋ gêc atom, nêŋ kauc to nêŋ ŋalêlôm ŋatêmui kêtôm taugeŋ.  
\v 16 Ac aweŋsuŋ sêsôm lasê gebe sêjala Anôtô, mago sêgôm nêŋ gêŋ sêsa eŋ aucboa. Gêŋ secsêga êsêac, taŋeŋpêcboa, ma sêgôm gêŋ ŋajam teŋ ŋapep atômanô.   
\c 2  
\s1 Tandôŋ mêtê ŋajamgeŋ  
\p
\v 1 Mago aôm ôsôm biŋ êtôm mêtê ŋajam.  
\v 2 Ôsôm êndêŋ lau ŋanô gebe sêmoa tokauc ŋawageŋ. Êsêac lau wapac to sêsa nêŋ lêŋ tokauc. Êsêac sêkêŋ êwiŋ tonêŋ ŋalêlôm ŋajamgeŋ ma têntac êwiŋ tauŋ ŋapep to sêôc gêŋwapac totêntac êpa sugeŋ.  
\v 3 Ôsôm bi ŋ êndêŋ lauo ŋanô amboac tonaŋ. Êsêac sêsa nêŋ lêŋ amboac lauo, taŋ sêjam sakiŋ gêŋ dabuŋ naŋ. Êsêac sêŋga biŋ atom to sênôm wain anaboa atom. Êsêac têtu kêdôŋwagao biŋ ŋajamŋa,  
\v 4 gebe sêndôŋ lauo wakuc têntac êwiŋ nêŋ ŋaci to nêŋ gôlôac ŋasec-ŋasec.  
\v 5 Êsêac sêsa nêŋ lêŋ tokauc to sêmoa tonêŋ ŋalêlôm selec. Êsêac sejop kôm andulêlômŋa ŋapep to taŋeŋ wamu êndêŋ nêŋ ŋaci. Êsêac sêŋgôm gêŋ samob tonaŋ ŋai gebe lau teŋ sêsôm biŋ alôb-alôb êpi Anôtônê biŋ atom.   
\p
\v 6 Ôlêŋ biŋ lau matac gebe sêsa nêŋ lêŋ tokauc amboac tonaŋgeŋ.  
\v 7 Aôm taôm ôsa nêm lêŋ samob e ôŋgôm nêm gêŋ ŋajam ôtu ŋadôŋ êndêŋ êsêac. Ô ŋdôŋ mêtê ŋawa êndêŋ êsêac ŋapepgeŋ, ôŋgôm wapacgeŋ.  
\v 8 Ôsôm biŋ ŋajam to solopgeŋ e aêacnêŋ soŋo-soŋo têtôm gebe sêsôm biŋ sec êpi aêac atom, sêmoa tomajeŋgeŋ.   
\p
\v 9 Ôsôm êndêŋ sakiŋwaga gebe taŋeŋ wamu êndêŋ nêŋ ŋataui êtu gêŋ samobŋa e nêŋ ŋataui sêlic ŋajam. Sakiŋwaga sêjô nêŋ ŋataunêŋ biŋ atom.  
\v 10 Êsêac sênam geŋgeŋ gêŋ teŋ atom, sêŋgôm nêŋ gêŋ samob ŋaŋêŋ to ŋajamgeŋ, gebe êsêacnêŋ lêŋ samob êtu aêacnêŋ kêsiwaga Anôtô nê mêtê ŋagêlôŋ.   
\p
\v 11 Gebe Anôtô geoc nê moasiŋ ênam ŋamalac pebeŋ kêsiŋa lasê.  
\v 12 Moasiŋ tonaŋ kêdôŋ aêac gebe takac tauŋ su aŋga lêŋ dandec Anôtôŋa to aŋga gêŋ ŋakalac nomŋa. Kêdôŋ aêac gebe tasa nbŋ lêŋ aŋga nom tonec tokaucgeŋ amboac lau gêdêŋ to mansaŋ,  
\v 13 ma aêac daôŋ bêc êjam, taŋ takêŋ mateŋ naŋ, gebe Anôtô kapôêŋ agêc aêacnêŋ kêsiwaga Jesu Kilisi nêŋ ŋawasi mêŋeoc tau lasê êndêŋ bêc tônê.  
\v 14 Ŋac tau kêkêŋ tau kêtu aêacŋa gebe êŋgamboac aêac su aŋga nêŋ geo samob ma eŋ kêsagu aêac tatu selec ma tatu ênê lau, tec tanam koleŋ ŋajam tatu dôbgeŋ.  
\v 15 Ôsôm biŋ tonaŋ ma ôlêŋ biŋ to ômêtôc lau toŋaclaigeŋ. Ŋac teŋ matapaŋa ênac aôm atom.   
\c 3  
\s1 Lau buŋa nêŋ lêŋ  
\p
\v 1 Ôjatu nêm lau gebe sêsô gôliŋwaga to ŋaclai ŋalabu ma taŋeŋ wamu êndêŋ êsêac to sêmansaŋ tauŋ gebe sênam koleŋ ŋajam samob.  
\v 2 Êsêac sêmbu lau teŋ atom. Êsêac lau wama to lau wapôm ma sêmoa sêwiŋ lau samob tonêŋ ŋalêlôm malôgeŋ.  
\v 3 Aôm kôjala gebe gêmuŋgeŋ aêac tauŋ tamoa tokauc gêbôc ma taŋeŋpêc e dao sic. Aêac tajam sakiŋ têntac ŋakalac tokaiŋ-tokaiŋ, taŋ kêkêli ôliŋgeŋ naŋ. Aêac tamoa togeo ma totêntac secgeŋ. Lau têntac gedec aêac ma aêac têntac gedec lau.  
\v 4 Tageŋ gêdêŋ taŋ aêacnêŋ kêsiwaga Anôtô geoc nê têtac wapi to têtac gêwiŋ ŋamalacŋa lasê naŋ,  
\v 5 eŋ gêjam aêac kêsi, kêtu koleŋ gêdêŋ, taŋ aêac tajam têdaguc Anôtônê biŋsu naŋŋa atom, kêtu eŋ taê walô aêacŋageŋ. Eŋ kêsagu aêac tec kêkôc aêac kêtiam ma Ŋalau Dabuŋ kêkêŋ aêac tatu wakuc.  
\v 6 Anôtô kêkêŋ aêacnêŋ kêsiwaga Jesu Kilisi mêŋkêsêwa Ŋalau Dabuŋ kêpi aêac,  
\v 7 gebe Anôtô êmansaŋ aêacnêŋ biŋ e êlic aêac tatu lau gêdêŋ êtu moasiŋ tonaŋŋa ma aêac tawê kaiŋ daŋgôŋ mateŋ jali teŋgeŋ, taŋ takêŋ mateŋ naŋ.  
\v 8 Biŋ tonaŋ tec ŋanô.  
\p Aê gabe aôm ôwa sa ŋajaŋageŋ gebe êsêac, taŋ sêkêŋ gêwiŋ Anôtô naŋ, sênam nêŋ koleŋ ŋajam topalêgeŋ. Gêŋ tonaŋ ŋajam, oc êmoasiŋ ŋamalac.  
\v 9 Ônac jaê êsêacnêŋ biŋgalôm meloc to nêŋ abeŋi to dêbuŋi nêŋ ŋaê ŋadênaŋ sêpuc tauŋ ŋamŋa ma kisa to siŋ, taŋ sêjac kêtu biŋsuŋa naŋ. Biŋ tonaŋ ŋai ŋanô masi ma ênam aêac sa atom.  
\v 10 Ŋac taŋ êkac gôlôac êkôc naŋ, ôIêŋ biŋ eŋ êtu dim tageŋ me luagêc. Embe êkêŋ taŋa atom, go ondec eŋ êmoaŋa.  
\v 11 Aôm kôjala gebe ŋac amboac tonaŋ kêsa lêŋ keso to gêgôm sec. Ênê lêŋ kêmêtôc eŋgac.   
\s1 Paulu gêjac mata nê biŋ  
\p
\v 12 Embe jasakiŋ Arema me Tukiki êndêŋ aôm êwac, naŋ ôkac taômgeŋ ôndêŋ aê ômôêŋ Nikopoli. Aê taêc gêjam kêtu tôŋ gebe jamoa tônê êndêŋ komô.  
\v 13 Ôkêŋ biŋsutau Sêna agêc Apolo sêndi sêmuŋ aôm ma alic gebe gêŋ êjô êsêagêc aŋga intêna atom.  
\v 14 Ma ôndôŋ aêacnêŋ lau e sêjala gebe sênam koleŋ ŋajam ma sênam lau sêpô lêna tauŋŋa sa. Sêŋgôm amboac tonaŋ, go sêsa nêŋ lêŋ toŋanômêgeŋ atom.   
\p
\v 15 Lau samob, taŋ sêmoa sêwiŋ aê naŋ, aweŋ gêjac aôm. Ôsôm êndêŋ êsêac, taŋ takêŋ gêwiŋ gêbiŋ aêac tôŋ ma têntac gêwiŋ tauŋ naŋ, gebe aoc gêjac êsêac.  
\p Moasiŋ êndêŋ amac samob êwac.