\id RUT -Jabem partial Bible [jae] -Papua New Guinea 1980 (web 2015) 
\h RUT 
\toc1 Rut 
\toc2 Rut 
\toc3 Rut 
\mt1 Rut  
\ip Rutnê miŋ ŋajam to malô kêsa gêdêŋ taŋ Gôliŋwaga sêjam gôliŋ Israel naŋ. Awê Moabŋa Rut gêjam ŋac Israelŋa teŋ. Gêdêŋ taŋ nê akweŋ gêmac êndu naŋ, Rut kêsap lawao laŋgwa tôŋ ŋaŋêŋgeŋ ma gêjam sakiŋ lau Israel nêŋ Anôtô tonê ŋalêlôm samucgeŋ. Kêtu ŋamu eŋ gêjam nê akweŋ laŋgwa nê lasitêwai teŋ ma kêtu lau Israel nêŋ kiŋ towae Dawid nê mimio.  
\ip Gôliŋwaganêŋ miŋ gêwa sa gebe Anôtônê lau embe sêkac tauŋ su aŋga Anôtônê, naŋ têtap gêŋwapac sa ma sec êôc êsêac sa. Rutnê miŋ gêwa sa gebe Lau jaba, taŋ sêkêŋ gêwiŋ lau Israel nêŋ Anôtô naŋ, têtap moasiŋ sa e têtu Anôtônê lau ŋaŋêŋ nêŋ ŋagêdô.  
\c 1  
\s1 Rut agêc Naomi  
\p
\v 1 Gêdêŋ têm, taŋ gôliŋwaga sêjam gôliŋ gamêŋ naŋ, tôbôm teŋ kêsa. Ma ŋac teŋ aŋga Betlehem Judaiaŋa gêdi gebe naêŋgôŋ gamêŋ Moabŋa amboac ŋac jaba. Ênê awê to latuagêc sêwiŋ eŋ.  
\v 2 Ŋac tau nê ŋaê gebe Elimelek, nê awênê ŋaê Naomi ma latuagêcnêŋ ŋaê Malon agêc Kilion. Êsêac lau Epraim aŋga malac Betlehem Judaiaŋa. Êsêac jasêô lasê gamêŋ Moabŋa ma sêŋgôŋ tônê.  
\v 3 Ma Naominê akweŋ Elimelek gêmac êndu, ma awê tau to latuagêc gacgeŋ sêmoa.  
\v 4 Êsêagêc sêjam lau Moab nêŋ awê, teŋ nê ŋaê gebe Orpa ma teŋ nê ŋaê Rut. Êsêac sêŋgôŋ gamêŋ tau amboac jala 10.  
\v 5 Malon agêc Kilion sêmac êndu lulugeŋ amboac tonaŋgeŋ, tec awê tau latuagêc ma nê akweŋ sêwi eŋ siŋ su ma taugeŋ gêmoa.   
\p
\v 6 Tec Naomi ma lawaoagêc dêdi sebe sêwi gamêŋ Moabŋa siŋ sêmu sêna ênê gamêŋ, gebe eŋ gêŋô ŋawae aŋga gamêŋ Moab, gebe Apômtau taê walô nê lau ma kêkêŋ mo gêdêŋ êsêac.  
\v 7 Amboac tonaŋ eŋ gêdi aŋga malac, taŋ gêŋgôŋ naŋ, ma lawaoagêc sêwiŋ eŋ. Êsêac sêsêlêŋ sêsa intêna gamêŋ Judaiaŋa sêja.  
\v 8 Ma Naomi kêsôm gêdêŋ lawaoagêc gebe “Ajôc, agêc aêc amu andêŋ tenemiagêcnêŋ andu ana. Apômtau êmoasiŋ amagêc êtôm amagêc amoasiŋ aê to ŋoc ŋacmatê.  
\v 9 Apômtau êkêŋ amagêc atap nêm ŋaciagêc sa ma alêwaŋ taôm aŋga êsêagêcnêŋ andu.” Go eŋ kêlêsôp êsêagêc aliŋanô. Êsêagêc têtaŋ lasê  
\v 10 ma sêsôm gêdêŋ eŋ gebe “Masi, aêagêc abe awiŋ aôm tamu dandêŋ nêm lau tana.”  
\v 11 Mago Naomi kêsôm gebe “O latucoagêc, amu anamaŋ. Amagêc abe awiŋ aê êtu asageŋŋa. Ŋapalê ŋagêdô sêc aê têtaclêlôm gebe jakôc têtu amagêcnêm ŋaciagêc me.  
\v 12 O latucoagêc, amu anamaŋ. Asa nêm lêŋ, gebe aê katu awêanô sugac, oc janam ŋac teŋ êtiam atom. Aê embe jasôm gebe aê taêc kêka ŋapalê ma aê embe jatap ŋoc akweŋ sa êndêŋ êmbêc tonec ma jakêkam ŋapalê,  
\v 13 amagêc oc aôŋ e êsêagêc têtu kapôêŋ me. Oc aŋgamiŋ taôm êndêŋ lêŋ sênam tauŋŋa me. O latucoagêc, masianô. Apômtau lêma mêŋkêtap aê sa, tec kêkêŋ wapac aê ŋanôgeŋ kêtu amagêcŋa.”  
\v 14 Go êsêagêc têtaŋ lasê kêtiam ma Orpa kêlêsôp lawao laŋgwa alianô, mago Rut kêmbôêŋ eŋ tôŋ.   
\p
\v 15 Ma Naomi kêsôm gêdêŋ eŋ gebe “Ôlic acgom, nêm boaluo gêmu gêdêŋ nê lau to nê anôtôi gêja. Ôndaŋguc nêm boaluo ômu ôna amboac tonaŋgeŋ.”  
\v 16 Mago Rut kêsôm gebe “Ôkac aê, gebe jawi aôm siŋ to jandaŋguc aôm êtiam atom nec atom.  
\q1 Gamêŋ taŋ aôm ôna naŋ, aê gabe jana.  
\q1 Gamêŋ taŋ aôm ôŋgôŋ naŋ, aê gabe jaŋgôŋ.  
\q1 Aômnêm lau têtu aêŋoc lau  
\q1 ma aômnêm Anôtô êtu aêŋoc Anôtô.   
\q1
\v 17 Gamêŋ taŋ aôm ômac êndu naŋ, aê gabe jamac êndu,  
\q1 ma sênsuŋ aê aŋga tonaŋ.  
\q1 Apômtau êwê aê êtôm eŋ taê gêjam,  
\q1 tageŋ gêmacanô taugeŋ tec êkac aê su aŋga aômnêm.”   
\m
\v 18 Gêdêŋ taŋ Naomi gêlic gebe awê tau taê gêjam kêtu tôŋ gebe êwiŋ eŋ, tec kêsôm biŋ teŋ kêtiam atom.   
\p
\v 19 Amboac tonaŋ tec agêc lulugeŋ sêsêlêŋ e jasêô lasê Betlehem. Sêô lasê Betlehem e malacm samob têtakê kêtu êsêagêcŋa ma lauo sêsôm gebe “Naomi tau tonec me.”  
\v 20 Awê tau kêsôm gêdêŋ êsêac gebe “Naomi atom, asam aê gebe Mara, gebe Ŋaniniŋ Ŋatau kêkêŋ ŋamakic taêsam kêpi aê.  
\v 21 Aê gawi ŋoc gamêŋ siŋ toawê tolêlôm, ma Apômtau gêwê aê gamu gamêŋ toŋalêlôm sawageŋ. Apômtau gêwa aê sa gebe gawê kaiŋ biŋ ma Ŋaniniŋ Ŋatau kêlêsu aê, tec asam aê Naomi kêtu asageŋŋa.”  
\v 22 Naomi agêc lawao Moabo Rut sêmu sêmêŋ aŋga gamêŋ Moabŋa ŋamiŋ tau tonaŋ. Êsêagêc jasêô lasê Betlehem gêdêŋ taŋ lau sêkôc kôm sêjac polomŋa sa. \f + \fr 1:22 \ft Naomi ŋam gebe Mataêjamo.\f* \f + \fr 1:22 \ft Mara ŋam gebe Ŋamakico.\f*   
\c 2  
\s1 Rut kejoŋ polom ŋasaliŋ-saliŋ sa aŋga Boasnê kôm  
\p
\v 1 Ma Naominê akweŋnê lasitêwa teŋ gêmoa. Eŋ ŋac tolêlôm aŋga Elimeleknê gôlôacnêŋ. Ênê ŋaê Boas.  
\v 2 Ma Moabo Rut kêsôm gêdêŋ Naomi gebe “Ôlôc ma jana kôm najajoŋ polom ŋasaliŋ-saliŋ sa jandaŋguc lau, taŋ sêlic aê ŋajam ma têtiŋ aê atom naŋ.” Ma Naomi kêsôm gêdêŋ eŋ gebe “Latucoenec, ônamaŋ.”  
\v 3 Tec gêdi jakejoŋ polom ŋasaliŋ-saliŋ aŋga kôm teŋ kêdaguc lau-sêsapwaga. Ma kôm tau tonaŋ Boasnê. Eŋ Elimeleknê gôlôacnêŋ ŋac teŋ.  
\v 4 Gêdêŋ tonaŋgeŋ Boas mêŋgêô lasê kôm. Eŋ awa gêjac lau-sêsapwaga gebe “Apômtau êwiŋ amac.” Ma êsêac sêjô eŋ awa gebe “Apômtau ênam mec aôm.”  
\v 5 Go Boas kêsôm gêdêŋ nê sakiŋwaga, taŋ gejob lau-sêsapwaga naŋ, gebe “Asanê ŋapalêo tônê.”  
\v 6 Ma sakiŋwaga, taŋ gejob lau-sêsapwaga naŋ, gêjô eŋ awa gebe “Eŋ Moab ŋapalêo, taŋ gêwiŋ Naomi aŋga gamêŋ Moabŋa gêmêŋ naŋ.  
\v 7 Awê tau kêsôm gebe ‘Aê jateŋ gebe alôc gebe jajoŋ polom ŋasaliŋ-saliŋ jamoa lagic ŋasawa jandaŋguc lau-sêsapwaga.’ Amboac tonaŋ tec gêmêŋ ma gêjam kôm ŋapaŋ gêdêŋ bêbêc kanucgeŋ e mêŋgêdêŋ galoc ma kêlêwaŋ tau ŋagec atom.”   
\p
\v 8 Go Boas kêsôm gêdêŋ Rut gebe “Latucoenec, ôkêŋ taŋam aê acgom. Ojoŋ polom aŋga kôm teŋ ma ôwi tonec siŋ atom. Ôwiŋ aêŋoc sakiŋwagao baŋbaŋgeŋ.  
\v 9 Ma matam êsap kôm, taŋ êsêac sêsap sêmoa naŋ, ma ôndaŋguc êsêacgeŋ. Aê gajac biŋsu sakiŋwaga gebe sêlênsôŋ aôm atom. Bu embe êjô aôm, go ôndêŋ ku naônôm bu, taŋ sakiŋwaga têtê naŋ.”  
\v 10 Go Rut gêu tau laŋôanô jagêdêŋ nom ma kêsôm gêdêŋ Boas gebe Aê awê jabao nec gajac matamanô ŋajam ma matam gêdiŋ aêgeŋ kêtu asageŋŋa.”  
\v 11 Boas gêjô eŋ awa gebe “Gêŋ samob, taŋ aôm gôgôm gêdêŋ lawamo laŋgwa gêdêŋ taŋ nêm akweŋ gêmac êndu e mêŋgêdêŋ galoc naŋ, sêjac miŋ gêdêŋ aê tomalageŋ. Aôm gôwi tênam agêc tamam to nêm malacmôkê siŋ mêŋgô lasê gamêŋ teŋ, taŋ gêmuŋgeŋ gôjam kauc naŋ.  
\v 12 Apômtau êmoasiŋ aôm êjô gêŋ, taŋ gôgôm naŋ, ma Apômtau Israelnêŋ Anôtô, taŋ gôê lamu ênê magê gômôêŋ tonec naŋ, êkêŋ moasiŋ totau-totau êndêŋ aôm êjô.  
\v 13 Go awê tau kêsôm gebe “O ŋoc apômtau, aôm kômoasiŋ aê ŋanô to gôjac aê têtac tôŋ. Aômnêm sakiŋwagao ŋanô teŋ aê atom, mago kôsôm biŋ ŋajamgeŋ gêdêŋ nêm sakiŋwagao aê.”   
\p
\v 14 Gêdêŋ noc sêniŋ gêŋŋa Boas kêsôm gêdêŋ awê tau gebe “Ômôêŋ mêŋôniŋ polom ma ôsac nêm polom ŋagêdô tôŋ êsêp wain.” Amboac tonaŋ Rut gêŋgôŋ gêwiŋ lau-sêsapwaga ma Boas kêkêŋ polom sigob gêdêŋ eŋ geŋ. Ma awê tau geŋ e gêôc eŋ tôŋ ma ŋagêdô gacgeŋ kêkô.  
\v 15 Gêdêŋ taŋ awê tau gêdi gebe ejoŋ polom ŋasaliŋ-saliŋ naŋ, Boas gêlêŋ biŋ nê sakiŋwaga gebe Andec eŋ ejoŋ polom êmoa lagic ŋasawa ma anac jao êndêŋ eŋ atom.  
\v 16 Ma ataiŋ ŋakaiŋ ŋagêdô su aŋga lagic ma awi siŋ ênêc, gebe eŋ ejoŋ sa ma aec biŋ eŋ atom.”   
\p
\v 17 Amboac tonaŋ tec kejoŋ gêmoa e kêtula, go kêsêlô polom, taŋ kejoŋ sa naŋ, e ŋadôŋ amboac talu tageŋ.  
\v 18 Ma eŋ kêkôc ŋanô tau sa gêja malac jakêtôc gêŋ, taŋ kejoŋ sa naŋ, gêdêŋ lawao laŋgwa ma kêkôc gêŋ, taŋ geŋ e gêôc eŋ tôŋ naŋ, ŋagêdô jakêkêŋ gêdêŋ eŋ.  
\v 19 Ma lawao laŋgwa kêsôm gêdêŋ eŋ gebe “Ocsalô tonec aôm kojoŋ polom ŋasaliŋ-saliŋ sa aŋga ondoc ma gôjam kôm gômoa ondoc. Anôtô ênam mec ŋac, taŋ mata gêdiŋ aôm naŋ.” Tec Rut gêjac ŋac, taŋ gêjam ênê kôm naŋ, nê miŋ gêdêŋ lawao laŋgwa ma kêsôm gebe “Ŋac taŋ gajam kôm gawiŋ eŋ gêdêŋ ocsalô tonec naŋ, nê ŋaê Boas.”  
\v 20 Go Naomi kêsôm gêdêŋ lawao gebe “Apômtau taŋ kêgamiŋ nê moasiŋ gêdêŋ lau mateŋ jali to ŋacmatê atom naŋ, anam mec eŋ.” Naomi kêsôm biŋ tonec gêdêŋ eŋ gêwiŋ gebe “Ŋac tau aêagêcnêŋ lasitêwainêŋ teŋ eŋ kêtu aêacnêŋ nomlênsêm ŋakêsiwaga teŋ gêwiŋ.”  
\v 21 Ma Moabo Rut kêsôm gebe “Eŋ kêsôm biŋ teŋ gêdêŋ aê gêwiŋ gebe ‘Ôsap ŋoc sakiŋwagao tôŋ ŋapaŋ e sênac ŋoc kôm ŋanô samob sa êmbacnê.’”  
\v 22 Ma Naomi kêsôm gêdêŋ lawao Rut gebe “O latucoenec, ŋajam gebe ôsêlêŋ ôwiŋ ênê sakiŋwagao, gebe teŋ êlênsôŋ aôm aŋga kôm ŋagêdô atom.” Amboac tonaŋ Rut kejoŋ polom ŋasaliŋsaliŋ sa kêsap Boasnê sakiŋwagao tôŋ ŋapaŋ e sêjac polom to polom sa gêbacnê. Ma eŋ gêŋgôŋ gêwiŋ lawao laŋgwa. \f + \fr 2:22 \ft Nomlênsêm ŋakêsiwaga êsêac lau, taŋ sejop \f* lasitêwainêŋ nomlênsêm, gebe lau jaba sêjaŋgo su atom.   
\c 3  
\s1 Rut agêc Boas sêmoa gamêŋ sêka polomŋa  
\p
\v 1 Go Rut lawao laŋgwa Naomi kêsôm gêdêŋ eŋ gebe “Latucoenec, amboac ondoc aê oc jansom nêm malam ôŋgôŋ ŋajamŋa teŋ, gebe ômoa ŋajamgeŋ me.  
\v 2 Boas taŋ gôwiŋ ênê sakiŋwagao naŋ, aêacnêŋ lasitêwainêŋ teŋ eŋ. Ôlic acgom, êmbêc tonec eŋ oc ekoloŋ polom ŋapa aŋga gamêŋ sêka polomŋa.  
\v 3 Amboac tonaŋ ôliŋ bu to ôniŋ oso taôm ma ôsô nêm ŋakwê ŋajam tau, go ôsêp ôna gamêŋ sêka polomŋa. Mago ôtôc taôm ôndêŋ ŋac tau atom e êniŋ to ênôm gêŋ êmbacnê acgom.  
\v 4 Ma êndêŋ taŋ eŋ êsa tau sic naênêc naŋ, matam êndiŋ gamêŋ, taŋ eŋ gêc naŋ, naôkac belaŋke akaiŋŋa sa ma ôsa taôm sic. Go eŋ êsôm gêŋ, taŋ eŋ gebe êŋgôm naŋ, êndêŋ aôm.”  
\v 5 Ma awê tau gêjô Naomi awa gebe “Biŋ samob, taŋ kôsôm naŋ, oc jaŋgôm.”   
\p
\v 6 Amboac tonaŋ eŋ kêsêp gamêŋ sêka polomŋa gêja ma gêgôm kêtôm biŋ, taŋ lawao laŋgwa kêsôm gêdêŋ eŋ naŋgeŋ.  
\v 7 Boas geŋ to gênôm gêŋ su, go gêmoa totêtac ŋajamgeŋ jakêsa tau sic gêc polom totoŋ ŋamagê. Go awê tau kêsêlêŋ sacgeŋ-sacgeŋ gêdêŋ eŋ gêja ma kêkac belaŋke akaiŋŋa sa, go kêsa tau sic gêc.  
\v 8 Gêdêŋ gêbêcauc ŋaluŋ, go ŋac tau kêtakê ma kêkac tau ôkwi e gêlic awê teŋ gêc eŋ akaiŋŋa.  
\v 9 Eŋ kêtu kênac gebe “Aôm asa.” Ma awê tau gêjô eŋ awa gebe “Nêm sakiŋwagao aê Rut. Ôlam nêm obo mêŋênsaŋ nêm sakiŋwagao, gebe aôm kôtu aêacma nom lênsêm ŋakêsiwaga.”  
\v 10 Ma eŋ kêsôm gebe “O latucoenec, Apômtau ênam mec aôm, gebe aôm gôgôm gêŋlêlôm gêdêŋ lau tolêlôm me lau ŋalêlôm sawa nêŋ ŋapalê wakuc atom. Biŋ tonec kêtu aôm têmtac gêwiŋ ŋanô ŋabelo kapôêŋ kêlêlêc belo ŋamataŋa su.  
\v 11 Latucoenec, amboac tonaŋ tec ôtêc taôm atom. Aê oc jaŋgôm gêŋ samob, taŋ oteŋ naŋ, gebe aêŋoc lau Betlehemŋa samob sêlicgac, gebe aôm awê mansaŋ teŋ.  
\v 12 Ma galoc, biŋŋanô, nêm nomlênsêm ŋakêsiwaga teŋ aê, mago nom lênsêm ŋakêsiwaga ŋanô teŋ gêmoa.  
\v 13 Ômoa êmbêc tonec ma êndêŋ bêbêcgeŋ eŋ embe ênam kôm, taŋ gêjac nom lênsêm ŋakêsiwaga ŋawae naŋ, oc ŋajam, êŋgômmaŋ. Mago eŋ embe endec ma ênam kôm tau atom, naŋgo aê janam kôm, taŋ gêjac nom lênsêm ŋakêsiwaga ŋawae naŋ. Aê jasôm biŋ êtu tôŋ êtôm Apômtau gêmoa mata jali. Ônêc bêc e eleŋŋa acgom.”   
\p
\v 14 Go Rut gêc bêc gêc Boas akaiŋŋa e geleŋ mata, go eŋ gêdi gêdêŋ taŋ lau sêlic tauŋ sapu-sapu naŋ. Boas taê gêjam gebe awê tau gêc sêka polom ŋamala nec ŋapuc êsa atommaŋ,  
\v 15 tec kêsôm gebe “Ôkôc obo, taŋ kôgadê naŋ, mêŋôlam.” Ma Rut gêlam obo, go eŋ gêjam dôŋ polom laclu 6 jakêsêwa kêsêp obo tau ma kêkêŋ gêdêŋ awê tau gêôc sa ma gêc gêja malac.  
\v 16 Eŋ jagêô lasê andu ma lawao gêjam kênac eŋ gebe “Latucoenec, biŋ amboac ondoc.” Go Rut gêjac miŋ biŋ samob, taŋ ŋac tau gêgôm gêdêŋ eŋ naŋ,  
\v 17 ma kêsôm gebe “Polom laclu 6 tonec eŋ kêkêŋ gêdêŋ aê ma kêsôm gebe ‘Ôêc tolêmam sawageŋ ôndêŋ lawamo ôna atom.” ’  
\v 18 Rut lawao gêjô eŋ awa gebe “Latucoenec, ônsaê malôgeŋ e ôjala biŋ tau êtu katô acgom, gebe ŋac tonaŋ oc êwi biŋ tau siŋ atom, ocsalô oc êmansaŋ biŋ tau êtu solop.” \f + \fr 3:18 \ft Nomlênsêm ŋakêsiwaga nê kôm teŋ, gebe ênam nê \f* lasitêwainêŋ awêtuc.   
\c 4  
\s1 Boas gêjam Rut sa  
\p
\v 1 Ma Boas kêpi malac ŋasacgêdô gêja jagêŋgôŋ tonaŋ. Gêŋgôŋ ma gêlic nom ŋakêsiwaga, taŋ Boas kêsôm ênê biŋ naŋ, kêsêlêŋ gêmêŋ. Tec Boas kêsôm gebe “O ŋoc ŋac, ômôêŋmaŋ, mêŋôŋgôŋ sic ôŋgôŋ tonec.” Ma eŋ jagêŋgôŋ sic gêwiŋ Boas.  
\v 2 Go eŋ kêkalem lau mata 10 aŋga malac ma kêsôm gebe “Mêŋaŋgôŋ tonec.” Ma êsêac jasêŋgôŋ sic.  
\v 3 Go Boas kêsôm gêdêŋ nom ŋakêsiwaga tau gebe “Naomi taŋ aŋga Moabnêŋ gamêŋ gêmu gêmêŋ naŋ, kêkêŋ aêagêcnêŋ ŋac Elimelek nê nom ŋamakeŋ gebe lau sênam ôli.  
\v 4 Amboac tonaŋ tec taêc gêjam gebe jakêŋ ŋawae êndêŋ aôm ma jasôm gebe ‘Ônam ôli nom tau ma lau, tec sêŋgôŋ nec, to ŋoc launêŋ laumata sêlic. Aôm embe ôsi nom tau su, go ôsi su. Mago embe masi, go ôsôm biŋ katô aê gebe jajala, gebe nom ŋakêsiwaga teŋ gêmoa atom, aôm taômgeŋ, ma aê kadaguc aôm.’” Ma ŋac tau kêsôm gebe “Aê gabe jasi nom tau su.”  
\v 5 Go Boas kêsôm gebe “Êndêŋ bêc, taŋ ônam ôli nom su aŋga Naomi lêma naŋ, ônam ôli ŋac gêmac nê awêtuc Moabo Rut êwiŋ, gebe daôŋ ŋac gêmac nê ŋaê sa êpi ênê nomlênsêm êtiam.”  
\v 6 Go nom ŋakêsiwaga kêsôm gebe “Embe amboac tonaŋ, go aê oc jatôm gebe jasi nom su êtu ŋoc gêŋ atom. Embe jasi su, go jajaiŋ tauc ŋoc nomlênsêm. Aôm taôm ôsi nom tau su ôjô aê, gebe aê katôm gebe jasi su atom.”   
\p
\v 7 Gêdêŋ andaŋgeŋ lau Israel nêŋ mêtê laŋgwa teŋ amboac tonec gêc, gebe ŋac teŋ embe êsi nom su me êkên gêŋ êjô gêŋ teŋ, go ênu atapa teŋ su ma êkêŋ andêŋ nê ŋac teŋ. Mêtê tonaŋ gêwa sa gebe geŋ, taŋ sêgôm naŋ, kêtu tôŋgac.  
\v 8 Amboac tonaŋ gêdêŋ taŋ nom ŋakêsiwaga kêsôm gedeŋ Boas gebe “Aôm taôm ônam ôli nom tau naŋ,” eŋ gênu atapa teŋ su.  
\v 9 Ma Boas kêsôm gêdêŋ laumata to lau samob gebe “Ocsalô tonec amac samob alic su, gebe aê gajam ôli Elimeleknê gêŋ samob ma Kilion agêc Malon nêŋ gêŋ samob su aŋga Naomi lêma.  
\v 10 Ma gajam ôli Malonnê awêtuc Moabo Rut amboac tonaŋ, gebe êtu ŋoc awê, gebe jaôŋ ŋac gêmac tau nê ŋaê sa êpi ênê nomlênsêm, gebe sênac ŋac gêmac nê ŋaê êŋgic aŋga nê lasitêwainêŋ to aŋga nê malacmôkê ŋasacgêdô atom. Ma amac atu aêŋoc lau-awa-biŋ-sawaga.”  
\v 11 Go lau samob, taŋ sêŋgôŋ sacgêdô naŋ, to laumata sêsôm gebe “Aêac alic gêŋ tau sugac. Apômtau êkêŋ awê tau, taŋ êpi nêm andu naŋ, êtôm Rahel agêc Lea, taŋ sêboa gôlôac Israel sa sêwiŋ tauŋ naŋ. Ôtu ŋac tolêlôm aŋga Eprata ma nêm waem êsa aŋga Betlehem.  
\v 12 Ma nêm wakuc, taŋ Anôtô êkêŋ awê matac tau êkôc naŋ, sêkêŋ nêm gôlôac têtôm Peresnê, taŋ Tamar kêkôc kêtu Juda latu naŋ.”   
\p
\v 13 Amboac tonaŋ tec Boas gêjam Rut kêtu nê awê. Eŋ gêmoa gêwiŋ eŋ e Apômtau kêkêŋ eŋ taê ma kêkôc latu teŋ.  
\v 14 Go lauo sêsôm gêdêŋ Naomi gebe “Talambiŋ Apômtau, taŋ kêgamiŋ nom ŋakêsiwaga gêdêŋ aôm atom naŋ. Lau Israel sêŋgôm ênê ŋaê ŋawae êsa.  
\v 15 Eŋ oc êlau aôm têkwam saki êsa ma êndêŋ taŋ ôtu awêanô naŋ, eŋ êlôm aôm, gebe lawamo, taŋ têtac gêwiŋ aôm to gêjac matamanô ŋajam kêlêlêc latômi 7 su naŋ, kêkôc eŋ.”  
\v 16 Go Naomi kêsip ŋapalê tau sa mêŋketoc eŋ gêsac labum ma kêtu ênê jaomwagao.  
\v 17 Ma nê lauo jabaŋ eŋŋa sê ênê ŋaê teŋ gebe “Naomi kêtap latu teŋ sa.” Ma sêsam eŋ gebe Obed. Eŋ Dawid tama Isai nê tama.   
\p
\v 18 Peresnê wakuc tau tonec. Peres kêka Hesron lasê.  
\v 19 Hesron kêka Ram lasê, Ram kêka Aminadab lasê.  
\v 20 Aminadab kêka Nason lasê, Nason kêka Salmon lasê,  
\v 21 Salmon kêka Boas lasê, Boas kêka Obed lasê,  
\v 22 Obed kêka Isai lasê, ma Isai kêka Dawid lasê.