\id MIC -Jabem partial Bible [jae] -Papua New Guinea 1980 (web 2015) 
\h MIKA 
\toc1 Mika 
\toc2 Mika 
\toc3 Mik 
\mt1 Mika  
\ip Propete Mika gêmoa nom gêdêŋ propete Jesaia nê têm. Têna kêkôc eŋ aŋga gamêŋ Judaŋa ŋamalac sauŋ teŋ. Eŋ kêkêŋ gêwiŋ gebe gamêŋ Judaŋa oc êtap gêŋwapac, taŋ Amos geoc lasê kêpi gamêŋ Israelŋa naŋ, sa amboac tonaŋgeŋ. Tec Anôtô oc êmêtôc lau Juda êtu nêŋ keso kapôêŋŋa. Mago Mikanê jaeŋ kêtôm Amosnê samucgeŋ atom. Mika geoc lasê gebe lau têtôm gebe sêkêŋ mateŋ ŋanô ŋajam, taŋ gêc têm nêmŋa naŋ.  
\ip Mika gêlic ŋakatu towae ŋagêdô. Ŋakatu teŋ gebe Anôtônê wama ênam nom ŋagamêŋ samob auc (4:1-4). Teŋ gebe kiŋ kapôêŋ, taŋ êsa aŋga Dawidnê gôlôac naŋ, êkêŋ wama êndêŋ lau Juda naŋ (5:2-4). Ma ŋalô towae teŋ gêc 6:8. Ŋalô tau kêkatoŋ Israelnêŋ propete samob nêŋ biŋ sa gebe “Gêŋ taŋ Apômtau taê kêka aŋga aômnêm naŋ, tonec Ôŋgôm gêŋ samob tobiŋgêdêŋgeŋ, têmtac êwiŋ lau ôsiŋ sugeŋ ma ôsêlêŋ ômbu taômgeŋ ômoa nêm Anôtô laŋônêmŋa.”  
\c 1  
\p
\v 1 Apômtaunê biŋ gêdêŋ Mika aŋga malac Moreset gêdêŋ kiŋ Judaŋa Jotam agêc Ahas ma Hiskia nêŋ têm. Eŋ gêlic biŋ tau kêkanôŋ Samaria to Jerusalem.   
\s1 Taŋiboa kêpi Samaria to Jerusalem  
\b  
\q1
\v 2 O amac lau tomôkê-tomôkê samob, akêŋ taŋemmaŋ,  
\q1 o nom to ŋagêŋlêlôm samob, aŋômaŋ.  
\q1 Apômtau Anôtô, taŋ êsa aŋga nê lôm dabuŋ êmêŋ naŋ,  
\q1 gebe êwa amacnêm biŋ sa e ênêc awêgeŋ.   
\q1
\v 3 Gebe alic acgom, Apômtau kêsa aŋga nê gamêŋ gêmêŋ,  
\q1 eŋ oc êsêp mêŋêka nom ŋagamêŋ ŋabau.   
\q1
\v 4 Ma lôc, taŋ akaiŋ êka naŋ, oc êwê  
\q1 êtôm lêp ŋaobo, taŋ ja geŋ naŋ.  
\q1 Ma gaboaŋ oc êôc êkôc  
\q1 êtôm bu, taŋ gêboaŋ kêsêp salic naŋ.   
\q1
\v 5 Biŋ samob tonaŋ êsa êtu Jakobnê geoŋa  
\q1 ma êtu gôlôac Israel nêŋ secŋa.  
\q1 Jakobnê geo tau ŋam amboac ondoc  
\q1 Ŋam kêsêp Samaria atom me.  
\q1 Gôlôac Juda nêŋ sec tau ŋam amboac ondoc.  
\q1 Ŋam kêsêp Jerusalem atom me.   
\q1
\v 6 Kêtu tonaŋŋa aê gabe jaŋgôm Samaria êtu lênduc teŋ  
\q1 êkô awê aŋga gamêŋ tau,  
\q1 jaŋgôm êtu gamêŋ sêsê wain êsêpŋa.  
\q1 Aê jansambi ŋapoc êsêp gaboaŋ êna  
\q1 ma jakip malac tau ŋanombaŋ sa ênêc awêgeŋ.   
\q1
\v 7 Êsêac oc têtuc Samaria ŋakatu samob popoc  
\q1 ma sêkêŋ ja êniŋ ŋada awalauŋ  
\q1 ma aê oc janseŋ ŋagwam samob su.  
\q1 Gebe gêŋ samob tonaŋ ŋai ŋam kêsêp mockaiŋo ŋaôli.  
\q1 tec gêŋ tau êmu naêtu mockaiŋo ŋaôli êtiam.   
\b  
\q1
\v 8 Kêtu tonaŋŋa aê gabe japuc taŋiboa sa ma jataŋ,  
\q1 aê jasô atapa atom, jasêlêŋ ŋa ockaiŋ ŋaôma ma toôlic ŋaôma  
\q1 Aê oc jataŋ amboac kêam saleŋŋa  
\q1 ma jataŋ amboac kêcsêwa,   
\q1
\v 9 gebe kamoc, taŋ Apômtau gêjac naŋ, oc emo atom,  
\q1 ma kamoc tau jagelom Juda,  
\q1 ma gêô lasê ŋoc launêŋ katam jagêdêŋ Jerusalem.   
\s1 Ŋacjo têdabiŋ Jerusalem  
\b  
\q1
\v 10 Asôm biŋ tau lasê aŋga Gat atom, ataŋ atomanô.  
\q1 Ansambi taôm anêc kekop aŋga Bet-Le-Apra.   
\q1
\v 11 Amac lau Sapirŋa, andi asêlêŋ.  
\q1 Lau Sananŋa sêsa aŋga nêŋ malac sêmêŋ atom.  
\q1 Taŋiboa taŋ kêpi aŋga Bet-Esel naŋ, oc elom amac.   
\q1
\v 12 Lau Marotŋa sêkêŋ mateŋ gêŋ ŋajam elêmê,  
\q1 gebe gêŋwapac sec kêsêp aŋga Apômtaunê gêmêŋ  
\q1 mêŋgêô lasê katam Jerusalemŋa.   
\q1
\v 13 Amac lau Lakisŋa, amansaŋ hosnêŋ ômbiŋkap, gebe sê kareta.  
\q1 Aôm kôtu Sion latuonê sec ŋamôkê,  
\q1 gebe êsêac têtap Israelnêŋ geo sa aŋga aôm ŋalêlôm.   
\q1
\v 14 Amboac tonaŋ akêŋ gêŋ êndêŋ Moreset-Gat ma awi êsêac siŋ.  
\q1 Aksib ŋaandu oc êtu lakô êndêŋ Israelnêŋ kiŋ.   
\b  
\q1
\v 15 O lau Maresŋa, aê jasakiŋ lau-sêku-amac-tuluwaga êndêŋ amac êtiam,  
\q1 ma Israelnêŋ ŋawasi oc naêô lasê Adulam.   
\q1
\v 16 Ôkaliŋ taôm ma ôkapiŋ môkêmlauŋ êtu nêm gêŋenecŋa.  
\q1 Ôkaliŋ taôm pomgeŋ,  
\q1 gebe êsêac oc sêwi aôm siŋ nasêŋgôŋ kapoacwalô. \f + \fr 1:16 \ft Ŋamadiŋ 10-15 ŋam gêc awa atom. Propete gêwa malac \f* ŋagêdô nêŋ gêŋwapac, taŋ atap êsêac sa naŋ sa. \f + \fr 1:16 \ft Lau Juda sêkaliŋ tauŋ katu gêŋwapac, taŋ katap \f* êsêac sa naŋŋa.   
\c 2  
\s1 Ojae êsêac, taŋ sêkôniŋ lau ŋalêlôm sawa tôŋ naŋ  
\q1
\v 1 Ojae êsêac, taŋ sêmasaŋ lêŋ sêŋgôm secŋa  
\q1 ma sêc nêŋ mê ŋaô to taêŋ gêjam lêŋ tau naŋ.  
\q1 Embe eleŋŋa lasê, go sêŋgôm nêŋ lêŋ tau ŋanô êsa,  
\q1 gebe nêŋ ŋaclai gêc.   
\q1
\v 2 Êsêac mateŋ katu kôm, tec sêjaŋgo su.  
\q1 Êsêac mateŋ katu andu, tec sêkôc su.  
\q1 Êsêac sêkôniŋ andu ŋatau to nê andu,  
\q1 ma sêkôniŋ ŋac-gêwê-kaiŋ-gêŋlên-sêmwaga tonê gêŋlênsêm gêwiŋ   
\q1
\v 3 Kêtu tonaŋŋa Apômtau kêsôm gebe  
\q1 “Alic acgom, aê kamasaŋ lêŋ sec kêtu gôlôac tonaŋŋa.  
\q1 Amac atôm gebe andaiŋ su aŋga gêsômtêkwa atom,  
\q1 ma oc asêlêŋ totembelem aŋgeŋ atom amboac tonaŋgeŋ,  
\q1 gebe têm tônê oc têm sec.   
\q1
\v 4 Êndêŋ bêc tonaŋ êsêac oc sêŋga wê êpi amac  
\q1 to têtaŋ taŋiboa kapôêŋ ma sêsôm gebe Aêac dabacgac.  
\q1 Êsêac sêjam dôŋ ŋoc launêŋ nomlênsêm e su  
\q1 ma sêjac sam gêdêŋ tauŋ.  
\q1 Lau teŋ oc sêkêŋ nom tau êmu êndêŋ êsêac êtiam atom.  
\q1 Êsêac sênac sam nom êndêŋ lau, taŋ seseŋ aêac su naŋ.”   
\q1
\v 5 Kêtu tonaŋŋa amacnêm ŋac teŋ ênam dôŋ nom  
\q1 êndêŋ taŋ akac sa amoa Apômtaunê gôlôac ŋalêlôm naŋ atom.   
\b  
\q1
\v 6 Lau sêjam mêtê aê gebe “Ônam mêtê atom,  
\q1 ônam mêtê êpi biŋ amboac tonaŋ atom,  
\q1 ŋam gebe biŋ majeŋŋa oc êtap aêac sa atom.   
\q1
\v 7 Apômtau kêpuc boa gôlôac Jakob me.  
\q1 Apômtau lêma kêtu dambê me.  
\q1 Gêŋ tonaŋ eŋ gêgôm me.  
\q1 Ênê biŋ kêmoasiŋ ŋac, taŋ kêsa lêŋ ŋaŋêŋ naŋ, atom me.”   
\b  
\q1
\v 8 Mago amac adi amboac ŋacjo gebe anac siŋ êndêŋ ŋoc lau.  
\q1 Amac akwalec ŋakwê su aŋga lau malô  
\q1 to aŋga êsêac, taŋ sêsêlêŋ taêŋ gêjam biŋ siŋŋa teŋ atom naŋ.   
\q1
\v 9 Amac ajanda ŋoc lau nêŋ lauo sêsa aŋga nêŋ andu ŋajam,  
\q1 ma ajaŋgo ŋoc ŋawasi su aŋga êsêacnêŋ gôlôac ŋasec-ŋasec samucgeŋ.   
\q1
\v 10 Andi ma aêc su, gebe gamêŋ tonec gamêŋ talêwaŋ tauŋŋa atom.  
\q1 Geŋeŋmôkê geseŋ gamêŋ tau su e ŋajam êsa êtôm atom.   
\b  
\q1
\v 11 Ŋac teŋ embe ênac laoc gamêŋgeŋ ma êsôm biŋ agwa-agwa to biŋdansaŋ gebe  
\q1 “Aê gabe janam mêtê amac êpi wain to bu ŋaclai,”  
\q1 ŋac amboac tonaŋ oc êtu lau tonaŋ nêŋ ŋac-ênam-mêtêwaga.   
\b  
\q1
\v 12 “O Jakob, aê gabe jajoŋ amac samob sa biŋŋanôgeŋ,  
\q1 aê oc janac Israelnêŋ ŋapopoc sa.  
\q1 Aê oc jakêŋ êsêac sêpi tageŋ amboac domba sêpi tageŋ sêmoa sapa,  
\q1 amboac domba ŋatoŋ, taŋ seŋ gêgwaŋ sêwiŋ tauŋ naŋ.  
\q1 Ma ŋamalac taêsam ŋaonda êsa.”   
\b  
\q1
\v 13 Ŋac-enseŋ-balaŋ-suwaga oc êsêlêŋ êmuŋ êsêac.  
\q1 Êsêac oc têtuc katam popoc ma sêsa sêna.  
\q1 Êsêacnêŋ kiŋ oc êmuŋ êsêac,  
\q1 Apômtau oc êsêlêŋ êtu êsêacnêŋ ŋamata. \f + \fr 2:13 \ft Lau Israel sêkac sa kêsêp ŋasawa ŋagêdô, gebe \f* sênac sam nomlênsêm, taŋ Apomtau kêkêŋ gêdêŋ êsêac naŋ êndêŋ tauŋ.   
\c 3  
\s1 Anôtô gec biŋ lau Israel nêŋ laumata  
\q1
\v 1 Ma aê kasôm gebe  
\q1 Amac Jakobnêŋ laumata to Israelnêŋ gôliŋwaga, akêŋ taŋem.   
\q1
\v 2 Amacnêm kôm, gebe ajala biŋgêdêŋ me masi.  
\q1 Amac taŋ akêŋ kisa gêdêŋ gêŋ ŋajam ma têmtac gêwiŋ sec,  
\q1 amac taŋ akwalec ŋoc launêŋ ŋaôlic su  
\q1 ma amoata nêŋ ŋamêsôm su aŋga ŋatêkwa,   
\q1
\v 3 amac taŋ aeŋ ŋoc lau amboac aeŋ gwada  
\q1 ma akwalec nêŋ ŋaôlic su ma atuc nêŋ ŋatêkwa popoc-popocgeŋ naŋ,  
\q1 amac asa êsêac amboac asa gwada kêsêp ku,  
\q1 amboac bôc ŋamêsôm kêsêp suc.   
\b  
\q1
\v 4 Êsêac oc têtaŋ êndêŋ Apômtau,  
\q1 mago eŋ oc êkêŋ taŋa êsêac atom.  
\q1 Êndêŋ bêc tonaŋ eŋ oc ênsaŋ laŋôanô auc êndêŋ êsêac,  
\q1 gebe sêŋgôm nêŋ gêŋ sec.   
\b  
\q1
\v 5 Apômtau kêsôm biŋ tonec kêkanôŋ propete, taŋ sêwê aêŋoc lau seso naŋ, gebe  
\q1 Êsêac embe têtap gêŋ taniŋŋa sa, go sêmôêc gebe “Wama,”  
\q1 mago ŋac, taŋ kêkêŋ gêŋ taniŋŋa kêsêp êsêac aweŋsuŋ atom naŋ,  
\q1 oc sênac siŋ êndêŋ eŋ.   
\q1
\v 6 Kêtu tonaŋŋa êmbêcauc êkôm amac auc, gebe alic ŋakatu êtiam atom,  
\q1 gêsuŋbôm êsa, gebe aoc biŋ lasê atom.  
\q1 Oc êsêp gebe êpô propete tonaŋ êtiam atom,  
\q1 ma êndêŋ ocsalô ŋakesec êkôm êsêac auc.   
\q1
\v 7 Go lau-sêlic-ŋakatuwaga majeŋ ê  
\q1 ma lau-seoc-biŋ-lasêwaga nêŋ kauc oc êlênsôŋ.  
\q1 Êsêac oc sêmbôc aweŋsuŋ auc,  
\q1 gebe Anôtô gêjô êsêac aweŋ atom.   
\q1
\v 8 Mago aê amboac teŋ. Ŋaclai to Apômtaunê ŋalau  
\q1 ma biŋgêdêŋ to ŋajaŋa gêjam aê auc,  
\q1 gebe jawa Jakobnê geo to Israelnêŋ sec sa.   
\b  
\q1
\v 9 Amac gôlôac Jakob nêŋ laumata to gôlôac Israel nêŋ gôliŋwaga, akêŋ taŋem biŋ tonec.  
\q1 Amac adec biŋgêdêŋ to alênsôŋ lêŋ solop samob.   
\q1
\v 10 Amac akwê Sion sa ŋa dec  
\q1 ma Jerusalem ŋa biŋ geo.   
\q1
\v 11 Êsêacnêŋ laumata sêmêtôc biŋ gêjô awa ŋalêsiŋa su.  
\q1 Nêŋ dabuŋwaga têdôŋ lau, taŋ sêjam ôli êsêac naŋgeŋ.  
\q1 Nêŋ propete seoc biŋ lasê gêdêŋ lau, taŋ sêkêŋ mone gêdêŋ êsêac naŋ.  
\q1 Mago êsêac taêŋ kêka Apômtau ma sêsôm gebe  
\q1 “Apômtau gêmoa aêac ŋalêlôm gêwiŋ atom me.  
\q1 Gêŋwapac teŋ êtôm gebe êtap aêac sa atom.”   
\q1
\v 12 Mago êsêac oc sêkac Sion ôkwi amboac sêkac nom ôkwi aŋga kôm,  
\q1 ma Jerusalem popoc-popocgeŋ êtu lênduc,  
\q1 ma lôm dabuŋ ŋalôc ênam tau ôkwi êtu saleŋbôm êtu amacŋa.   
\c 4  
\s1 Apômtau ênam gôliŋ nom ŋagamêŋ samob towamageŋ  
\q1
\v 1 Êndêŋ bêc ŋamuŋa Apômtaunê  
\q1 andu ŋalôc oc êpi êlêlêc lôc ŋagêdô su  
\q1 ma eleŋ gamêŋ samob su.  
\q1 Ma tenteŋlatu sêwê dêndêŋ lôc tau sêna.   
\q1
\v 2 Ma lau tomôkê-tomôkê oc sêmêŋ ma sêsôm gebe  
\q1 “Ajôc, tapi Apômtaunê lôc tana,  
\q1 dandêŋ Jakobnê Anôtônê andu tanamaŋ,  
\q1 gebe êndôŋ nê lêŋ êndêŋ aêac e tasa ênê intêna.  
\q1 Gebe ŋagôliŋ êsa aŋga Sion ma Apômtaunê biŋ aŋga Jerusalem.”   
\q1
\v 3 Eŋ oc êmêtôc tenteŋlatu taêsam nêŋ biŋ  
\q1 ma ênam gôliŋ lau tomôkê-tomôkê ŋajaŋa aŋga gamêŋ jaêc.  
\q1 Êsêac sênam nêŋ siŋ ôkwi êtu kinom  
\q1 ma nêŋ kêm êtu lêŋgêc.  
\q1 Lau-m teŋ sênac siŋ êndêŋ lau-m teŋ atom  
\q1 ma têndôŋ lêŋ sênac siŋŋa êtiam atom.   
\q1
\v 4 Êsêac samob sêŋgôŋ nêŋ wain ŋalabu  
\q1 ma sêŋgôŋ nêŋ kaŋanô ŋaajuŋlabu êndêŋ-êndêŋgeŋ,  
\q1 ma lau teŋ têtakê êsêac atom,  
\q1 gebe lau siŋ undambêŋa nêŋ Apômtau kêsôm sugac.   
\b  
\q1
\v 5 Tenteŋlatu samob sêsêlêŋ sêjam nêŋ anôtôi jaba laŋôŋ,  
\q1 mago aêac oc tasêlêŋ tanam aêacnêŋ Apômtau Anôtô laŋô teŋgeŋ ma teŋgeŋ.   
\s1 Apômtau êŋgamboac lau Israel su aŋga kapoacwalô  
\b  
\q1
\v 6 Apômtau kêsôm gebe  
\q1 “Êndêŋ bêc ônê aê oc jajoŋ magiŋ kêsu sa  
\q1 ma jakatoŋ êsêac, taŋ sêjanda êsêac êliŋ-êliŋ  
\q1 to êsêac, taŋ kakêŋ ŋandaŋ gêdêŋ êsêac naŋ sa.   
\q1
\v 7 Aê oc jaŋgôm magiŋ kêsu têtu lau ŋapopoc,  
\q1 ma êsêac, taŋ sêsa êsêac êliŋ-êliŋ naŋ, têtu lau-m ŋajaŋa.  
\q1 Ma Apômtau ênam gôliŋ êsêac aŋga lôc Sion  
\q1 galoc ma endeŋ tôŋgeŋ.”   
\b  
\q1
\v 8 O andu soso, taŋ domba ŋatoŋ sêkac sa sêmoa naŋ,  
\q1 o Sion latuonê ŋabau  
\q1 gôliŋ kiŋŋa ma gamêŋ kiŋŋa, taŋ gôlôac Israel sêwê kaiŋ gêdêŋ andaŋgeŋ naŋ,  
\q1 oc êmu êndêŋ aôm êwac êtiam.   
\b  
\q1
\v 9 Amboac ondoc tec kôtaŋ kapôêŋ.  
\q1 Kiŋ teŋ gêmoa gêwiŋ aôm atom me.  
\b  
\q1 Me ŋac-gêwa-biŋ-sawaga gêjaŋa,  
\q1 tec ŋandaŋ kêtuŋ aôm amboac awê, taŋ ŋapalê kêtuŋ eŋ naŋ me.   
\q1
\v 10 O Sion latuo, ŋandaŋ êmônaŋ aôm ma ôtaŋ  
\q1 êtôm awê, taŋ ŋapalê kêtuŋ eŋ naŋ,  
\q1 gebe galoc oc ôwi malac siŋ ma ôsa naôŋgôŋ gamêŋ sawa.  
\q1 Aôm oc ôna Babel, ma aŋga ônê Apômtau oc ênam aôm kêsi  
\q1 ma ênam aôm sa aŋga nêm ŋacjo lemeŋ.   
\b  
\q1
\v 11 Galoc lau-m taêsam sêkac sa sebe sênac siŋ êndêŋ aôm.  
\q1 Êsêac sêsôm gebe “Daŋgôm ênê dabuŋ paliŋ  
\q1 e Sion ŋapopoc ênac mateŋanô ŋajam.”   
\q1
\v 12 Mago êsêac sêjam kauc biŋ, taŋ Apômtau taê gêjam naŋ.  
\q1 Êsêacnêŋ kauc kêsa kêpi biŋ, taŋ eŋ kêmasaŋ gebe êŋgôm ŋanô êsaŋa naŋ, atom.  
\q1 Eŋ kejoŋ êsêac sa amboac sêjac lagic polom toŋakaiŋ,  
\q1 gebe sêkôc sêna sêka polom ŋamala.   
\q1
\v 13 O Sion latuo, ôndi ma ôka polom,  
\q1 gebe aê jakêŋ jabo ki to ampoap ki joŋjoŋ êndêŋ aôm.  
\q1 Aôm oc ôka lau-m taêsam popoc  
\q1 ma ôkêŋ êsêacnêŋ waba êtu da êndêŋ Apômtau  
\q1 to êsêacnêŋ awamata êndêŋ nom samuc ŋatau.   
\c 5  
\q1
\v 1 Galoc tuŋbôm kêkwa aôm auc ma ŋacjo sêgi aôm auc.  
\q1 Êsêac si Israelnêŋ gôliŋwaga alianô ŋa tôc.   
\s1 Kêsiwaga taŋ oc êsa aŋga Betlehem naŋ, nê gôliŋ  
\b  
\q1
\v 2 Mago aôm Betlehem Eprata,  
\q1 aôm gôlôac Judaŋa nêŋ toŋ sauŋanô teŋ,  
\q1 aêŋoc ŋac, taŋ êtu Israelnêŋ gôliŋwaga naŋ, mêŋêsa aŋga aôm.  
\q1 Ênê ŋam kêsêp têm laŋgwaanô to bêc andaŋgeŋŋa.   
\q1
\v 3 Kêtu tonaŋŋa Apômtau oc êwi êsêac siŋ e êndêŋ têm,  
\q1 taŋ awê tau, taŋ ŋapalê kêtuŋ eŋ naŋ, êkôc ŋapalê su.  
\q1 Go ŋapalênê lasitêwai ŋagêdô oc sêmu dêndêŋ Israel latui sêmêŋ êtiam.   
\q1
\v 4 Go eŋ êndi êkô ma êlôm nê domba ŋatoŋ,  
\q1 gebe Apômtaunê ŋaclai ênam eŋ auc to Apômtau Anôtô nê ŋaê ŋawasi êpuc eŋ tôŋ.  
\q1 Ma êsêac oc sêŋgôŋ ŋaŋêŋ êsa,  
\q1 gebe ênê ŋaclai esewec e naêndêŋ nom ŋamadiŋ.   
\s1 Sêjam kêsi to sêkêŋ ŋagêjô  
\b  
\q1
\v 5 Êndêŋ taŋ lau Asur sêsa aêacnêŋ gamêŋ sêmêŋ  
\q1 ma eŋkaiŋ êka aêacnêŋ kôm tôŋ naŋ,  
\q1 aêac takêŋ nêŋ laugejob 7 to nêŋ kasêga 8 sêkô êsêac auc.   
\q1
\v 6 Êsêac oc sênam gôliŋ gamêŋ Asuria ŋa siŋ  
\q1 ma Nimrodnê gamêŋ ŋa siŋ ŋamata,  
\q1 ma êndêŋ taŋ lau Asur sêsa aêacnêŋ gamêŋ sêmêŋ  
\q1 ma sêŋgêli aêacnêŋ nom ŋamadiŋ naŋ,  
\q1 êsêac oc sênam aêac kêsi aŋga Asur lemeŋ.   
\b  
\q1
\v 7 Go Jakobnê lau ŋapopoc oc sêmoa lau tomôkê-tomôkê ŋalêlôm  
\q1 têtôm maniŋ, taŋ kêsêp aŋga Apômtaunê gêmêŋ naŋ,  
\q1 ma têtôm kom, taŋ kêmoasiŋ gêgwaŋ naŋ,  
\q1 gêŋ tau gêôŋ ŋamalac to kêsaê ŋamalac latui atom.   
\q1
\v 8 Ma Jakobnê lau ŋapopoc oc sêmoa lau tomôkê-tomôkê ŋalêlôm  
\q1 têtôm lewe teŋ gêmoa bôc saleŋŋa ŋalêlôm,  
\q1 têtôm lewe wakuc teŋ gêmoa domba ŋatoŋ ŋalêlôm.  
\q1 Lewe embe êô lasê, go êka tôŋ  
\q1 ma êkac êŋgic-êŋgic  
\q1 ma ŋac teŋ gebe ênam kêsiŋa gêmoa atom.   
\q1
\v 9 Amac lemem akôniŋ nêm soŋo-soŋo tôŋ  
\q1 ma nêm ŋacjo samob oc sênaŋa.   
\b  
\q1
\v 10 Apômtau kêsôm gebe  
\q1 “Êndêŋ bêc tônê aê oc janseŋ nêm hos su  
\q1 ma jatuc nêm kareta siŋŋa popoc.   
\q1
\v 11 Aê oc janseŋ malac kapôêŋ su aŋga nêm gamêŋ  
\q1 ma jaku nêm malac ŋajaŋa tulu.   
\q1
\v 12 Aê oc janseŋ nêm mectomaŋ su aŋga amac lemem  
\q1 ma nêm lau-seoc-biŋ-lasêwaga oc maleŋmê.   
\q1
\v 13 Aê oc janseŋ nêm gwam to nêm alê gwam su aŋga amac ŋalêlôm  
\q1 ma apôŋ emduc êndêŋ lemem ŋakôm êtiam atom.   
\b  
\q1
\v 14 Aê oc jambuc nêm anôtôonê ŋakatu sa  
\q1 ma janseŋ nêm malac kapôêŋ su.   
\q1
\v 15 Ma aê oc jamêtôc tenteŋlatu samob, taŋ sêkêŋ taŋeŋ aê atom naŋ,  
\q1 toŋoc têtac ŋandaŋ ma totêtac êmbôli aucgeŋ.”   
\c 6  
\s1 Apômtau kêmêtôc Israel  
\q1
\v 1 Akêŋ taŋem biŋ, taŋ Apômtau kêsôm naŋ, gebe  
\q1 Ajôc, ôkô lôc ŋalabu ma ôwa nêm biŋ samaŋ,  
\q1 ma gamêŋ ŋabau êŋô aôm awam.   
\q1
\v 2 O lôcac to amac nom ŋaalê teŋgeŋŋa,  
\q1 akêŋ taŋem Apômtaunê biŋ mêtôcŋa,  
\q1 gebe Apômtaunê biŋ teŋ gêc nê lauŋa,  
\q1 gebe êmêtôc Israel.   
\b  
\q1
\v 3 “O ŋoc lauace, aê gagôm asageŋ gêdêŋ amac,  
\q1 aê kalênsôŋ amac amboac ondoc.  
\q1 Ajô aê aocmaŋ.   
\q1
\v 4 Aê kakôc amac aŋga gamêŋ Aiguptuŋa api amêŋ  
\q1 ma gajam amac kêsi aŋga andu kapoacwalôŋa.  
\q1 Aê kasakiŋ Mose agêc Aron ma Miriam sêmuŋ amac.   
\q1
\v 5 O ŋoc lauace, taêm ênam biŋ, taŋ kiŋ Moabŋa Balak kêmasaŋ gebe êŋgômŋa naŋ,  
\q1 ma taêm ênam biŋ, taŋ Beor latu Bileam gêjô eŋ awa naŋ.  
\q1 Taêm ênam nêm lêŋ aŋga Sitim e gêdêŋ Gilgal  
\q1 ma ajala Apômtaunê gêŋsêga gêjam amac kêsiŋa.”   
\s1 Biŋ taŋ Apômtau taê kêka naŋ  
\b  
\q1
\v 6 “Aê jakôc asageŋ ma jandêŋ Apômtau najakô eŋ laŋônêmŋa  
\q1 ma japôŋ ocduc êndêŋ Anôtô lôlôcŋa.  
\q1 Aê oc jakôc bulimakao ŋalatu, taŋ ŋajala tageŋ naŋ,  
\q1 ma jakêŋ êtu daja êndêŋ eŋ me.   
\q1
\v 7 Apômtau oc êlic domba kapoac 1,000 to 1,000  
\q1 me ŋalêsi, taŋ enseleŋ amboac bu taêsam keseleŋ naŋ, ŋajam me.  
\q1 Me aê oc jakêŋ ŋoc ŋacsêga êtu da êjô ŋoc geo su,  
\q1 jakêŋ ôlic ŋamêc êjô ŋoc katucnê sec su me.”   
\q1
\v 8 O ŋac tau, eŋ gêwa gêŋ, taŋ ŋajam naŋ, sa gêdêŋ aôm,  
\q1 ma gêŋ, taŋ Apômtau taê kêka aŋga aômnêm naŋ, tonec.  
\q1 Ôŋgôm gêŋ samob tobiŋgêdêŋgeŋ,  
\q1 têmtac êwiŋ lêŋ moasiŋŋa  
\q1 ma ôsêlêŋ ômbu taômgeŋ ômoa nêm Anôtô laŋônêmŋa.   
\q1
\v 9 Akêŋ taŋemmaŋ. Apômtau awa gêjac malac,  
\q1 ma lau tokauc têtêc ênê ŋaê.  
\q1 “Amac gôlôac to lau malacŋa, taŋ akac sa naŋ, akêŋ taŋemmaŋ.   
\q1
\v 10 Aê katôm, gebe jaliŋ awa alôb-alôb, taŋ gêc lau alôb-alôb nêŋ andu naŋ,  
\q1 ma dôŋdansaŋ, taŋ aê kapuc boa naŋ, siŋ me.   
\q1
\v 11 Aê oc jamêtôc ŋac, taŋ gêjam dôŋ gêŋ keso  
\q1 ma kêsau lau ŋa dôŋdansaŋ naŋ, atom me.   
\b  
\q1
\v 12 Ŋaclai sec gêjam amacnêm lau tolêlôm auc,  
\q1 ma êsêac, taŋ sêŋgôŋ nêm malac ŋalêlôm naŋ, sêsau biŋdansaŋ  
\q1 ma imbeleŋ kêbêlê biŋdansaŋ.   
\q1
\v 13 Kêtu tonaŋŋa aê gadi, gebe janac aôm popoc  
\q1 ma jaŋgôm aôm ôtu gasaŋ êtu nêm secŋa.   
\q1
\v 14 Aôm oc ôniŋ gêŋ, mago êôc aôm tôŋ atom,  
\q1 ma mo êjô aôm ŋapaŋgeŋ.  
\q1 Aôm ônac waba sa, mago ônam sa atom.  
\q1 Ma gêŋ, taŋ gôjac sa naŋ, aê oc jakêŋ êndêŋ siŋ enseŋ su.   
\q1
\v 15 Aôm oc ôsê gêŋ, mago ônac ŋanô sa atom,  
\q1 aôm oc ôsac katêkwi ŋanô, mago ôniŋ oso taôm ŋa ŋalêsi tau atom.  
\q1 Aôm oc ôka wain ŋanô, mago ônôm wain tau atom,   
\q1
\v 16 gebe aôm kôdaguc Omrinê ŋagôliŋ ma gôgôm gêŋ samob, taŋ Ahabnê gôlôac sêgôm naŋ,  
\q1 ma aôm kôsa lêŋ, taŋ êsêac sêmasaŋ naŋ.  
\q1 Kêtu tonaŋŋa aê janseŋ nêm gamêŋ su êtu gasaŋ  
\q1 to jakêŋ lau sêsu nêm lau susu. Amboac tonaŋ aôm oc ôc biŋ majeŋŋa aŋga launêŋ.” \f + \fr 6:16 \ft Israelnêŋ kiŋ luagêc Omri agêc Ahab sêjatu lau, gebe \f* sênam sakiŋ anôtôi jaba.   
\c 7  
\s1 Propete kêtaŋ taŋiboa kêtu Israelnêŋ mêtê ŋajam kêtu secŋa  
\q1
\v 1 Ojae aêma, aê jatôm ŋac, taŋ  
\q1 gebe ejoŋ kaŋanô sa naŋ,  
\q1 mago sejoŋ sa su.  
\q1 Aê katôm ŋac, taŋ gebe êtap wain ŋanô sa naŋ,  
\q1 mago sejoŋ gêbacnê.  
\q1 Wain ŋanô teŋ geŋkaleŋ, gebe janiŋŋa atom.  
\q1 Jambô ŋalêwê gêjô aê, mago masi.   
\q1
\v 2 Lau mansaŋ samob maleŋmê aŋga gamêŋ tau,  
\q1 ma lau gêdêŋ sêmoa lau ŋalêlôm kêtiam atom.  
\q1 Êsêac dêdib ŋamalac, gebe sêkêc dec siŋ  
\q1 to sêkic uc, gebe sêlô nêŋ lasitêwai.   
\q1
\v 3 Êsêac lemeŋ ŋagaô kêtu sêŋgôm secŋa.  
\q1 Gôliŋwaga sêjatu mone,  
\q1 ma mêtôcwaga sêkôc awa ŋalêsiŋa.  
\q1 Lau kapôêŋ sêsa lêŋ, taŋ nêŋ ŋalêlôm kêkac êsêac naŋ,  
\q1 ma sêlênsôŋ biŋgêdêŋ.   
\q1
\v 4 Êsêacnêŋ lau ŋajam têtôm waŋganic,  
\q1 êsêacnêŋ lau gêdêŋ ŋanô têtôm gêŋ ŋatêkwa.  
\q1 Nêŋ dibwaganêŋ bêc to bêc êsêac têtap ŋagêjô saŋa mêŋkêsa,  
\q1 galoc nêŋ kauc kêlênsôŋ.   
\q1
\v 5 Ôsô nêm ŋac wacbaŋ aômŋa ŋalabu atom  
\q1 ma ôkêŋ êwiŋ nêm ŋac ôli andaŋ aômŋa atom.  
\q1 Ojop awamsuŋ êndêŋ awê, taŋ gêc gêwiŋ aôm naŋ.   
\q1
\v 6 Gebe latu gêjac kapoac tama,  
\q1 ma latuo gêli tau sa gêdêŋ têna,  
\q1 ma lawao wakuc gêdêŋ lawao laŋgwa.  
\q1 Ma lau, taŋ sêŋgôŋ andu tageŋ naŋ, têtu soŋo-soŋo gêdêŋ tauŋ.   
\s1 Apômtaunê ŋawê êpô nê lau ma ênam êsêac sa  
\b  
\q1
\v 7 Mago aê tec oc jakêŋ matoc Apômtau,  
\q1 aê oc jaôŋ Anôtô, taŋ ênam aê kêsi naŋ.  
\q1 ŋoc Anôtô oc êkêŋ taŋa aê.   
\q1
\v 8 O ŋoc ŋacjo, ôlim êpi êtu aêŋa atom.  
\q1 Aê embe jambeŋ, oc jandi sa êtiam.  
\q1 Aê embe jaŋgôŋ gamêŋ ŋakesecŋa, Apômtau oc êtu ŋoc ja.   
\q1
\v 9 Aê gabe jaôc Apômtaunê têtac ŋandaŋ, gebe aê gagôm sec gêdêŋ eŋ  
\q1 e êkôc ŋoc biŋ sa ma êmêtôc aê.  
\q1 Eŋ oc êwê aê jasa ŋawê jana ma aê oc jalic ênê lêŋ ênam aê kêsiŋa.   
\q1
\v 10 Go ŋoc ŋacjo, taŋ kêsôm gêdêŋ aê gebe “Aômnêm Apômtau Anôtô gêmoa ondoc” naŋ,  
\q1 oc êlic ma maja êsa.  
\q1 Aê matocanô jalic biŋ tau ŋajam,  
\q1 êsêac sêka ŋacjo tau tôŋ êtôm sêka lêsap tôŋ aŋga intêna.   
\q1
\v 11 Êndêŋ bêc ônê oc sêkwê nêm tuŋbôm sa êtiam  
\q1 ma sêŋgôm nêm gamêŋ ŋamadiŋ êtu kapôêŋ.   
\q1
\v 12 Êndêŋ bêc ônê lau aŋga Asuria e êndêŋ Aiguptu  
\q1 ma aŋga Aiguptu e êndêŋ bu Euprat  
\q1 ma aŋga gwêc ŋamakeŋ e êndêŋ gwêc ŋamakeŋ  
\q1 ma aŋga lôcdênaŋ teŋ e êndêŋ lôcdênaŋ teŋ sêndêŋ aôm sêwac.   
\q1
\v 13 Mago nom tau oc êtu gasaŋ êtu lau, taŋ sêŋgôŋ nom tau naŋŋa,  
\q1 gebe êjô gêŋ, taŋ êsêac sêgôm naŋ.   
\s1 Apomtau taê walô lau Israel  
\b  
\q1
\v 14 Ojop nêm lau ŋa nêm tôc, êsêac têtu nêm dombalênsêm.  
\q1 Êsêac sêmoa tauŋgeŋ sêmoa saleŋbôm,  
\q1 mago nom toŋalêsi ŋajam kêgi êsêac auc.  
\q1 Tec ôwê êsêac acgom, gebe nasêniŋ gêgwaŋ ŋajam aŋga gamêŋ Basan to Gilead  
\q1 êtôm sêgôm gêdêŋ andaŋgeŋ.   
\b  
\q1
\v 15 Aê gabe jatôc gêŋtalô êndêŋ êsêac  
\q1 êtôm andaŋgeŋ gêdêŋ taŋ gômôêŋ aŋga Aiguptu naŋ.   
\q1
\v 16 Tenteŋlatu sêlic ma êŋgôm êsêac majeŋ êsa êtu nêŋ ŋaclai samobŋa.  
\q1 Êsêac sêmbôc aweŋsuŋ auc ma taŋeŋsuŋ êôc auc.  
\q1 Êsêac sêndamôê kekop amboac moac to gêŋ, taŋ sêgalab sêmoa nom naŋ.   
\q1
\v 17 Êsêac sêsa aŋga nêŋ malac ŋajaŋa totêtênêpgeŋ,  
\q1 êsêac têtakê êtu aêacnêŋ Apômtau Anôtôŋa ma têtêc aôm.   
\b  
\q1
\v 18 Asa anôtô kêtôm aôm, gebe êsuc sec ôkwi ma taê ênam nê gêŋlênsêm ŋapopoc nêŋ biŋ alôb-alôb êtiam atom.  
\q1 Eŋ gê nê têtac ŋandaŋ tôŋ gedeŋ tôŋgeŋ atom,  
\q1 gebe eŋ têtac gêwiŋ, gebe taê walô lau.   
\q1
\v 19 Eŋ oc taê walô aêac êtiam  
\q1 ma êka aêacnêŋ keso tôŋ.  
\q1 Aôm oc ômbaliŋ ma sec samob êsêp gwêc ŋagêdimbob êna.   
\q1
\v 20 Aôm oc ôtôc biŋ ŋaŋêŋ êndêŋ Jakob  
\q1 to têmtac gêwiŋ teŋgeŋŋa êndêŋ Abraham  
\q1 êtôm gôjac mata gêdêŋ aêac tameŋmai gêdêŋ andaŋgeŋŋa.