\id JON -Jabem partial Bible [jae] -Papua New Guinea 1980 (web 2015) 
\h JONA 
\toc1 Jona 
\toc2 Jona 
\toc3 Jona 
\mt1 Jona  
\ip Buku tonec kêtôm propete ŋagêdô nêŋ buku atom Buku tau gêjac miŋ propete Jona, taŋ gebe êwê Anôtônê biŋ sa naŋ, nê lêŋ ŋagêŋsêga. Anôtô kêsôm gêdêŋ eŋ gebe êna lau Israel nêŋ ŋacjosêga Asuria nêŋ malacsêga Niniwe. Mago Jona gedec. Eŋ gebe êkêŋ Anôtônê jaeŋ êndêŋ êsêac atom. Eŋ taê gêjam gebe Anôtô oc êŋgôm nê biŋ enseŋ malac suŋa ŋanô êsa atom, tec gedec gebe êkêŋ puc lau malac tônêŋa. Gêdêŋ taŋ biŋ ŋagêdô kêtap eŋ sa su naŋ, eŋ taŋa wamu Anôtônê biŋ lêna-lênageŋ. Eŋ gêja ma kêkêŋ Anôtônê jaeŋ gêdêŋ lau Niniwe, mago kêsaê gebe Anôtô geseŋ malac su atom, tec gêôc gêdô gêdêŋ eŋ.  
\ip Buku tau gêwa Anôtô sa gebe eŋ kêkêŋ gêŋ samob ma kêtu gêŋ samob ŋatau. Mago biŋ tonaŋgeŋ atom, eŋ Anôtô, taŋ têtac gêwiŋ to taê walô nê gêŋ kêlêlêc su. Eŋ gedec gebe êmêtôc to enseŋ nê launêŋ ŋacjo, eŋ têtac gêwiŋ kêlêlêc ma gebe êsuc nêŋ sec ôkwi to ênam êsêac sa.  
\c 1  
\s1 Jona gebe ec Apômtau Anôtô  
\p
\v 1 Apômtaunê biŋ gêdêŋ Amitai latu Jona gebe  
\v 2 “Ajôc, ôndi ôna malac kapôêŋ Niniwe naônam mêtê êsêac ma ôsôm êpi êsêac teŋbeleŋgeŋ gebe nêŋ sec ŋawae kêpi gêdêŋ aê gêmêŋ.”  
\v 3 Mago Jona gêdi gebe êc su aŋga Apômtau laŋônêm ma êna Tarsis. Eŋ kêsêp Jope gêja e kêtap waŋ teŋ, taŋ gebe êna Tarsis naŋ sa. Tec gêjam ôli waŋ tau ma kêpi gebe êc su aŋga Apômtau laŋônêm ma êna Tarsis.   
\p
\v 4 Mago Apômtau kêbaliŋ mu ŋaclai sec teŋ kêsêp gwêc gêjac, tec mu tau gêbuc ŋatêna ma gêgôm gwêc kêtu sec e kêdabiŋ gebe waŋ popoc.  
\v 5 Ma lau waŋŋa têtêc tauŋ ma aweŋ gêjac nêŋ anôtôi gêdêŋ-gêdêŋgeŋ. Ma sêbaliŋ waba aŋga waŋ kêsêp gwêc gêja gebe waŋ ŋagaô êsa. Mago Jona kêsêp waŋ ŋalêlôm gêja jakêsa tau sic ma gêc bêc e kêliŋ tau siŋ.  
\v 6 Go kapitai waŋŋa gêdêŋ eŋ jakêsôm gebe “Aôm gôêc bêc me. Taêm gêjam asageŋ. Ôndi samaŋ, awam ênac nêm Anôtô, oc moae taê ênam aêac, gebe dambac tanaŋa atom.”   
\p
\v 7 Go êsêac sêsôm gêdêŋ tauŋ gebe “Ajôc, tapuc kapoac, talic acgom, gêŋwapac, tec kêtap aêac sa nec, ŋam kêsêp asa.” Ma sêpuc kapoac e jakêsêp Jona.  
\v 8 Gocgo sêsôm gêdêŋ eŋ gebe “Ôsôm acgom, aôm gôjam kôm amboac ondoc, ma aôm aŋga ondoc gômôêŋ, nêm gamêŋ ŋaê amboac ondoc ma nêm ŋam kêsêp asa lau nêŋ.”  
\v 9 Eŋ gêjô êsêac aweŋ gebe “Aê Ebolai teŋ ma katêc Apômtau, Anôtô undambêŋa tau, taŋ kêkêŋ gwêc to nom naŋ.”  
\v 10 Lau sêŋô e têtêc tauŋ secanô ma sêsôm gêdêŋ eŋ gebe “Aôm gôgôm asageŋ.” Gebe lau tonaŋ sêjala gebe eŋ gêc Apômtau su, gebe tau kêsôm gêdêŋ êsêac.   
\p
\v 11 Go sêsôm gêdêŋ eŋ gebe “Aêac aŋgôm aôm amboac ondoc, gebe gwêc êtu malô ma êpôŋ aêac êtiam atom.” Gebe gwêc kêjamuŋ êsêac secanôtêna.  
\v 12 Eŋ gêjô êsêac aweŋ gebe “Akôc aê ma ambaliŋ aê jasêp gwêc jana, ocgo bênôŋ êsêp. Aê kajalagac, gebe mu gêbuc ŋatêna nec ŋam kêsêp aêŋageŋ.”  
\v 13 Lau sêŋô biŋ tau, mago sêsaê sebe sêsô bau sêna êtiam, tec segolem ŋajaŋa, mago sêgôm elêmê, gebe gwêc kêjamuŋ êsêac secanô ma kêtiŋ êsêac su sêsa sêja.  
\v 14 Go aweŋ gêjac Apômtau ma sêsôm gebe “O Apômtau, aêac ateŋ aôm gebe ondec aêac e ambac anaŋa êtu ŋac tonecŋa nec atom ma ôkêŋ aêac awê ŋac tobiŋmê teŋ nê dec ŋakaiŋ atom, gebe aôm, Apômtau, gôgôm kêtôm gôlic gêjac matamanô.”  
\v 15 Go sêkôc Jona tôŋ ma sêbaliŋ eŋ kêsêp gwêc gêja, go gwec kêtu malô.  
\v 16 Go lau têtêc Apômtau ŋanô-ŋanô ma sêkêŋ da gêdêŋ Apômtau ma sêjac mata biŋ gêdêŋ eŋ.   
\c 2  
\s1 Jona gêjam daŋge Apômtau  
\p
\v 1 Ma Apômtau kêkêŋ i kapôêŋ teŋ gebe êndaŋgôŋ Jona. Ma Jona gêmoa i têtaclêlôm geleŋŋa têlêac ma gêbêcauc têlêac.  
\v 2 Go Jona keteŋ mec gêdêŋ nê Apômtau Anôtô gêŋgôŋ i têtaclêlôm  
\v 3 ma kêsôm gebe  
\q1 “Aê kapô lêna tau ŋanô ma aoc gêjac Apômtau,  
\q1 tec eŋ kêkêŋ taŋa aê.  
\q1 Aê gamôêc aŋga lamboam ŋalêlôm  
\q1 ma aôm gôê taŋam aê aoc.   
\q1
\v 4 Aôm kôbaliŋ aê kasêp gwêc ŋagêdimbob gaja,  
\q1 kasêp gwêc ŋaluŋgeŋ,  
\q1 ma ŋasamac gêjam aê auc,  
\q1 aômnêm dembom to ŋakôtôŋ-kôtôŋ samob kêsalê aê auc.   
\q1
\v 5 Ma aê taêc gêjam gebe ‘Aôm kôtiŋ aê su aŋga laŋômnêm,  
\q1 ma oc jaŋgôm amboac ondoc gebe matocanô êpi nêm lôm dabuŋ êtiam.’   
\q1
\v 6 Gwêc ŋasamac mêŋgêdêŋ ŋoc koclabeŋ,  
\q1 ŋagêdimbob kêmakop aê auc   
\q1
\v 7 aŋga lôc ŋanombaŋ tau.  
\q1 Kasêp nom ŋalêlôm gaja  
\q1 ma ŋakatam ŋajaŋa kêsa gêc gedeŋ tôŋgeŋ.  
\q1 Mago aôm, o ŋoc Apômtau Anôtô,  
\q1 gôê aê sa aŋga gêsuŋ ŋakêlêndiŋ gamoa matoc jali.   
\q1
\v 8 Gêdêŋ taŋ katuc kêpô lêna tau êndu-êndu naŋ,  
\q1 aê taêc gêjam Apômtau,  
\q1 ma ŋoc mec gêdêŋ aôm  
\q1 kêsô nêm lôm dabuŋ gêwac.   
\q1
\v 9 Êsêac taŋ sêsap gwam ŋaôma tôŋ naŋ,  
\q1 sêwi nêŋ lamuanô tau siŋ.   
\q1
\v 10 Mago aê nec jakêŋ-da êndêŋ aôm todaŋgegeŋ.  
\q1 ma biŋ, taŋ gajac mata naŋ,  
\q1 gabe jaŋgôm ŋanô êsa.  
\q1 Apômtau eŋ gêjam sa ŋamôkê.”  
\p Ma Apômtau kêjatu i jagêluc Jona kêpi bau gêja.   
\c 3  
\s1 Lau Niniwe sêjam tauŋ ôkwi  
\p
\v 1 Go Apômtaunê biŋ gêdêŋ Jona kêtu dim luagêcŋa gebe  
\v 2 “Ajôc, ôndi ôna malac kapôêŋ Niniwe ma ôsôm biŋ, naŋ oc jasôm êndêŋ aôm naŋ, lasê êndêŋ êsêac.”  
\v 3 Ma Jona gêdi gêja Niniwe kêtôm Apômtau kêsakiŋ eŋ naŋ. Ma Niniwe tau malac kapôêŋanô sec teŋ, tasêlêŋ oc samuc têlêac aŋga malacgêdô oc kêsêpŋa e tasa malacgêdô oc kêpiŋa.  
\v 4 Ma Jona kêsô malac tau kêsêlêŋ oc samuc teŋ, go gêôc awa sa ma gêmôêc gebe “Ŋabêc 40geŋ, go sêku malac Niniwe tulu ênaŋa.”  
\v 5 Ma lau Niniwe sêkêŋ gêwiŋ Anôtô, tec sêsôm gebe sênam dabuŋ gêŋŋa kêtu tapa, ma lau kapôêŋ to sauŋ sêsô talu kêtôm êsêacgeŋ.   
\p
\v 6 Ma biŋ tau ŋawae gêdêŋ Niniwenêŋ kiŋ gêŋô, tec gêdi sa aŋga nê lêpôŋ kiŋŋa ma kêkwalec nê ŋakwê su ma kêsô talu jagêŋgôŋ wao.  
\v 7 Ma eŋ kêjatu gebe sêsôm biŋ tonec lasê aŋga Niniwe samucgeŋ gebe “Kiŋ to nê kasêga nêŋ jatu tonec gebe Ŋamalac to bôc ma bulimakao to domba sêniŋ gêŋ teŋ atom, sêniŋ gêgwaŋ atom to sênôm bu atom.  
\v 8 Ŋamalac to bôc sêsô talu ma aweŋ ênac Anôtô ma têtaŋ ŋanôgeŋ. Samob sênam tauŋ ôkwi êndêŋ-êndêŋgeŋ ma sêwi nêŋ lêŋ sec to gêŋ alôb-alôb, taŋ kêsap lemeŋ tôŋ naŋ siŋ.  
\v 9 Tajam kauc, oc moae Anôtô taê ênam teŋ ma êwi nê têtac ŋandaŋ ŋalakoc siŋ ma tanaŋa atom.”   
\p
\v 10 Anôtô gêlic gêŋ, taŋ êsêac sêgôm naŋ, gebe sêjam tauŋ ôkwi aŋga nêŋ lêŋ sec tau, tec taê gêjam teŋ ma gêgôm gêŋwapac, taŋ gebe êŋgôm êndêŋ êsêac naŋ, ŋanô kêsa atom.   
\c 4  
\s1 Jona gêlic Anôtô sec kêtu taê walô lauŋa  
\p
\v 1 Biŋ tonaŋ kêmasê Jona sa secanô e têtac ŋandaŋ kêsa  
\v 2 jakateŋ nê mec gêdêŋ Apômtau ma kêsôm gebe “O Apômtau, gêdêŋ taŋ gamoa ŋoc gamêŋgeŋ naŋ, aê taêc gêjam kwanaŋgeŋ gebe biŋ amboac tonaŋ oc êsa. Kêtu tonaŋŋa tec gaêc gaja Tarsis. Aê kajalagac. gebe moasiŋ to taê labu ŋaAnôtô aôm. Aôm gôê biŋ tôŋ to nêm têmtac gêwiŋ teŋgeŋŋa kêlêlêc su ma taêm walô lau sec e ôŋgôm nêm taêm gêjam ŋanô êsa atom.  
\v 3 Amboac tonaŋ, Apômtau. aê galoc jateŋ aôm gebe ôkôc katuc su. Embe jamac êndu, oc êmoasiŋ aê êlêlêc jamoa matoc jaliŋa su.”  
\v 4 Ma Apômtau gêjô eŋ awa gebe “Aôm têmtac ŋandaŋ oc jagêdêŋ me masi.”  
\v 5 Go Jona kêsa aŋga malac jagêŋgôŋ ŋamagê gêmu oc kêpiŋa. Eŋ gêjam bec teŋ ma kêsô jagêŋgôŋ ŋaajuŋ, gebe ênsaê gêŋ, taŋ oc êtap malac tau sa naŋ.   
\p
\v 6 Go Apômtau kêkêŋ ka teŋ kêpoa kêpi e jakêlêlêc Jona su, gebe êkêŋ ajuŋ eŋ môkêapac ma ênam malô ênê ŋalêlôm. Ma Jona têtac ŋajam ŋanô kêtu ka tonaŋŋa.  
\v 7 ŋageleŋ gamêŋ kêtuŋ tau ma Apômtau kêkêŋ gaoc teŋ gêŋac ka tau e kêmêliŋ.  
\v 8 Go gêdêŋ oc kêpi naŋ, Anôtô kêkêŋ mu ŋandaŋ teŋ aŋga oc kêpiŋa kêsêlêŋ ma oc kêpac Jona môkêapac e mata kêlô. Go kêpuc boa tau gebe êmac êndu ma kêsôm gebe “Aê embe jamac êndu, oc êmoasiŋ aê êlêlêc jamoa matoc jaliŋa su.”  
\v 9 Mago Apômtau kêsôm gêdêŋ Jona gebe “Aôm têmtac ŋandaŋ kêtu kaŋa oc jagêdêŋ me masi.” Ma Jona gêjô eŋ awa gebe “Aec, aê têtac ŋandaŋ jagêdêŋgoc ma katu gêŋ gêbacgac.”  
\v 10 Ma Apômtau kêsôm gêdêŋ eŋ gebe “Aôm taêm walô ka, taŋ gôjam ŋakoleŋ teŋ atom to gôlôm kêtu kapôêŋ atom, ka taŋ kêpi gêdêŋ gêbêc tageŋ ma kêmêliŋ gêdêŋ gêbêc tageŋ naŋ.  
\v 11 Ma aê nec oc taêc walô malac kapôêŋ Niniwe tau, taŋ ŋamalac sêlêlêc 120,000 su sêŋgôŋ naŋ, atom me. Êsêac sêjala anô to gasê kêtu tôŋ atom tageŋ, ma bôc taêsam ŋasec sêmoa sêwiŋ.”