\id JAS -Jabem partial Bible [jae] -Papua New Guinea 1980 (web 2015) 
\h JAKOBO 
\toc1 JAKOBONÊ papia 
\toc2 Jakobo 
\toc3 Jak 
\mt1 JAKOBONÊ papia  
\ip Jakobonê papia nec ŋac tau gêjac lau buŋa nêŋ kôm to nêŋ lêŋ ŋagôliŋ gwalêkiŋ sa. Eŋ keto biŋ tau gêjac gôlôac tapaôŋgeŋ ŋawae kêtôm eŋ awa gêjac Anôtônê lau, taŋ sêŋg ŋ kêsi-k sigeŋ aŋga nom ŋagamêŋ samob naŋ. Ŋac-ketowaga gebe epeŋ lau buŋa nêŋ kauc lasê êpi nêŋ ŋalêlôm to nêŋ lêŋ, taŋ gêjac êsêac ŋawae naŋ, tec kêwaka nê ŋagôliŋ sa keto ŋalô totau-totau gêjam dani ma keto biŋgôliŋ to ŋadôŋdôŋ gêwiŋ-gêwiŋ e ŋam gêc awê ŋajam. Lau buŋa nêŋ ŋagôliŋ tonaŋ kêkwa biŋ tonec ŋai gebe lau tolêlôm to lau ŋalêlôm sawa ma lêtôm to lêŋ mansaŋ ma tatu kasec to takêŋ êwiŋ ma daŋgôm ŋanô êsaŋa to tajop imbeleŋ ma mêtê tokauc to biŋkalom ma teŋbeleŋ aêgeŋ to dambu tauŋŋa ma tatoc tauŋ sa to daê biŋ tôŋ ma tapuc tauŋ tôŋŋa to tateŋ mec.  
\ip Jakobo keto papia tonec kêkac lau buŋa ŋajaŋageŋ gebe daŋgôm Mêtê ŋanô êsa, ec dawa nêŋ takêŋ gêwiŋ sa ŋa nêŋ lêŋ to nêŋ koleŋ ênêc awê êndêŋ lau sêlic êpi mateŋanô.  
\iot Ŋadênaŋ  
\ili1 1. Gêjac m nê papia 1:1  
\ili1 2. Takêŋ gêwiŋ to tajala biŋŋa 1:2-8  
\ili1 3. Lau ŋalêlôm sawa to lau tolêlôm 1:9-11  
\ili1 4. Saê to lêntôm 1:12-18  
\ili1 5. Taŋô mêtê ma gacgeŋ daŋgôm ŋanô êsa 1:19-27  
\ili1 6. Tapuc lau ŋam atom 2:1-13  
\ili1 7. Takêŋ gêwiŋ gêjac ŋakoleŋ ŋawae 2:14-26  
\ili1 8. Tajop imbeleŋ ŋapepŋa 3:1-18  
\ili1 9. Tajop tauŋ êndêŋ mateŋ katu gêŋ nomŋaŋa 4:1–5:6  
\ili1 10. Ŋagôliŋ toê-toê ŋagêdô 5:7-20  
\c 1  
\s1 Jakobo awa gêjac lau  
\p
\v 1 Anôtô agêc Apômtau Jesu Kilisi nêŋ sakiŋwaga aê, Jakobo, aoc gêjac gôlôac 12, taŋ sêŋgôŋ kêsi-kêsigeŋ aŋga nom ŋagamêŋ samob naŋ.   
\s1 Biŋ kêpi takêŋ gêwiŋ to tajala biŋŋa  
\p
\v 2 O ŋoc lasitêwaac, Iêtôm tokaiŋtokaiŋ embe êtap amac sa, go alic amboac gêŋ têmtac ŋajam ŋa teŋ.  
\v 3 Amac ajalagac gebe gêŋ, taŋ kêsaê amacnêm akêŋ gêwiŋ naŋ, gêgôm amac aôc gêŋwapac totêmtac kêpa sugeŋ.  
\v 4 Aôc gêŋwapac totêmtac kêpa sugeŋ tau ênam ŋanô amboac tonec gebe ênac dabiŋ amac e atu kwalam laŋgwa ma apô lêna gêŋ teŋ atom,  
\v 5 mago amacnêm teŋ embe êpô lêna kauc mêtêŋa, naŋ eteŋ êndêŋ Anôtô ma êkêŋ êndêŋ eŋ, gebe Anôtô kêkêŋ gêŋ gêdêŋ lau samob totêtac wapômgeŋ ma kêgamiŋ teŋ atom.  
\v 6 Mago ŋac tau eteŋ toêkêŋ êwiŋgeŋ, eteŋ totêtac lulu atom, gebe ŋac-têtac-luluwaga kêtôm gwêc ŋadembom, taŋ mu gêli sa e ŋakotoŋ-kotoŋ kêsa naŋ.  
\v 7 Ŋac amboac tonaŋ taê êka gebe êkôc gêŋ teŋ aŋga Apômtaunê atom.  
\v 8 Eŋ ŋac ŋalêlôm-gêja-luwaga ma kêsa nê lêŋ samob lulusawa.   
\s1 Lau ŋalêlôm sawa to lau tolêlôm  
\p
\v 9 Lasimi ŋalêlôm sawa êlanem tau gebe Anôtô ketoc eŋ sa.  
\v 10 Ma ŋac tolêlôm êlanem tau êtu Anôtô kêkôniŋ eŋŋa, gebe eŋ oc ênaŋa êtôm gêgwaŋ ŋaola.  
\v 11 Oc kêpi toŋandaŋgeŋ ma kêsêgô gêgwaŋ e ŋaola kêsêlô ma talic ŋakatu masi. Ŋac tolêlôm amboac tonaŋ. Eŋ ênaŋa aŋga nê kôm ŋaluŋgeŋ.   
\s1 Saê to letôm  
\p
\v 12 Aê aoc êôc ŋac, taŋ gêôc saê totêtac kêpa sugeŋ. Eŋ êwaka tau sa su acgom, go êkôc êŋgôŋ mata jali ŋasunsuŋ, taŋ Anôtô gêjac mata gêdêŋ lau-têntac-gêwiŋ-eŋwaga naŋ.  
\v 13 Ŋac teŋ embe lêtôm êtap eŋ sa, naŋ êsôm gebe “Lêtôm tonec aŋga Anôtônê” nec atom. Sec kêtôm gebe êlêtôm Anôtô atom. Ma Anôtô tau kêlêtôm ŋamalac teŋ atom.  
\v 14 Lêtôm ŋam kêsêp ŋamalac tau nê têtac kalac, taŋ kêkac to kêlêtôm eŋ naŋ.  
\v 15 Têtac kalac embe taê, go êsu ŋalatu sec. Sec tau embe ênac dabiŋ tau su, go êsu ŋalatu gêmacanô.   
\p
\v 16 O ŋoc lasitêwaace, êkêli taôm atom.  
\v 17 Gêŋ ŋajam samob, taŋ sêkêŋ gêdêŋ amac to gêŋ ŋanô samob, taŋ atap sa naŋ, gêmêŋ aŋga lôlôc. Gêŋ tau kêsêp gêmêŋ aŋga ŋawê ŋataunê. Eŋ gêjam tau ôkwi atom ma eŋ gêjam kanuc atom amboac tonaŋgeŋ.  
\v 18 Eŋ taê gêjam kêtu tôŋ, tec kêkêŋ nê biŋŋanô kêka aêac lasê gebe tatu gêŋ samob, taŋ eŋ kêkêŋ naŋ ŋaŋamata.   
\s1 Taŋô mêtê to daŋgôm ŋanô êsa  
\p
\v 19 O ŋoc lasitêwaace, taêm ênam biŋ tonec gebe ŋamalac samob sêŋô biŋ ŋagaôgeŋ acgom, ma sêsôm biŋ malô-malôgeŋ to têntac ŋandaŋ sebeŋ-sebeŋ atom amboac tonaŋgeŋ,  
\v 20 gebe ŋamalacnêŋ têntac ŋandaŋ gêjam Anôtônê biŋgêdêŋ sa atom.  
\v 21 Amboac tonaŋ akac ŋatêmui to sec totau-totau su ma akôc mêtê, taŋ Anôtô kêsê kêsêp amacnêm ŋalêlôm naŋ sa. Mêtê tonaŋ kêtôm gebe ênam amac katôm kêsi, tec akôc sa tonêm ŋalêlôm malôgeŋ.   
\p
\v 22 Embe aŋô mêtê ŋaômageŋ, oc ansau taôm, aŋgôm mêtê tau ŋanô êsa acgom.  
\v 23 Ŋac teŋ embe êŋô mêtê ŋaômageŋ ma êŋgôm ŋanô êsa atom, naŋ êtôm ŋac, taŋ kêsala laŋôanô kêsêp tasalakatu naŋ.  
\v 24 Eŋ kêsala tau su, go gec gêja ma kêliŋ laŋôanô ŋakatu siŋ sebeŋ.  
\v 25 Mago ŋac, taŋ êtuc kêniŋ êsêp biŋsu ŋanô tau, taŋ kêgaboac aêac su naŋ, ma êsô ŋalabu êmoa to êŋô biŋ e êliŋ siŋ êtiam atom, êŋgôm ŋanô êsa naŋ, Anôtô oc ênam mec ênê kôm samob.   
\p
\v 26 Ŋac teŋ embe taê ênam gebe ênam sakiŋ Anôtô, mago ênam gôliŋ imbêla atom, oc ênsau tau ma nê sakiŋ Anôtôŋa êtu gêŋ ŋaôma.  
\v 27 Sakiŋ ŋawa to mansaŋ, taŋ Tameŋi Anôtô gêlic gêjac mataanô ŋajam naŋ tonec gebe tanac mosêbu to awêtuc, taŋ sêmoa jageo naŋ, kêsi to taŋgamiŋ tauŋ êndêŋ geŋ ŋatêmui nomŋa.   
\c 2  
\s1 Tapuc lau ŋam atom  
\p
\v 1 O ŋoc lasitêwaac, amac akêŋ gêwiŋ aêacnêŋ ŋawasi Ŋatau Jesu Kilisi, tec apuc lau ŋam atom, alic samob têtôm tauŋgeŋ.  
\v 2 Ŋac teŋ togêlôŋ gold ma toŋakwê ŋawasi embe naêsô nêm akac saŋa êna, ma ŋac ŋalêlôm sawa teŋ toŋakwê kômŋa embe êsô êna amboac tonaŋ,  
\v 3 ma amac matem êndiŋ ŋac toŋakwê ŋawasi e asôm gebe Ôŋgôŋ lêpôŋ ŋajam tonec,” ma asôm êndêŋ ŋac ŋalêlôm sawa gebe “Naôkô ônê” me “mêŋôŋgôŋ masac êsi ockaiŋŋa,”  
\v 4 embe aŋgôm amboac tonaŋ, oc awa lau êkôc atom me. Ma atu mêtôcwaga, taŋ taêŋ gêjam biŋ keso naŋ atom me.   
\p
\v 5 O ŋoc lasitêwaace, aŋô acgom. Anôtô kêjaliŋ êsêac, taŋ lau nomŋa sêlic amboac lau ŋalêlôm sawa naŋ sa, gebe têtu lau tolêlôm sêkêŋ gêwiŋŋa ma sêwê kaiŋ gamêŋ, taŋ eŋ gêjac mata gêdêŋ lau-têntac-gêwiŋ-eŋwaga naŋ.  
\v 6 Ma amac abu ŋac ŋalêlôm sawa. Asa lau sêkôniŋ amac. Asa lau sê amac jaakô mêtôcwaga laŋôŋnêmŋa. Lau tolêlôm goc.  
\v 7 Lau tonaŋ sêsôm biŋ alôb-alôb kêpi ŋaê ŋajam, taŋ Anôtô kêkêŋ gêdêŋ amac naŋ.   
\p
\v 8 Amac embe aŋgôm biŋsu, taŋ aêacnêŋ Kiŋ kêkêŋ gêdêŋ aêac kêtôm teto gêc naŋ, ŋanô êsa, go ŋajam. Biŋsu tau tonec gebe “Têmtac êwiŋ lau wacbaŋ aôm amboac têmtac gêwiŋ taôm.”  
\v 9 Mago amac embe apuc lau ŋam, go aŋgôm sec ma biŋsu êmêtôc amac amboac lau-sêgêli-biŋsuwaga.  
\v 10 Ŋac taŋ kêmasaŋ biŋsu samob, mago kêgêli tageŋgeŋ naŋ, kêtôm gêgôm samob popoc.  
\v 11 Ŋac taŋ kêsôm gebe “Ôŋgôm gêŋ mockaiŋo to mockaiŋŋa atom” naŋ, kêsôm teŋ gêwiŋ gebe “Ônac ŋamalac êndu atom.” Ma aôm embe ôŋgôm mockaiŋ atom, mago embe ônac ŋamalac êndu, naŋ kôgêli biŋsugac.  
\v 12 Amboac tonaŋ asôm nêm biŋ to aŋgôm nêm gêŋ atôm lau, taŋ Anôtô oc êmêtôc êsêac êndaŋguc biŋsu, taŋ kêgaboac êsêac su naŋ.  
\v 13 Ma êndêŋ mêtôc tonaŋ Anôtô taê walô êsêac, taŋ taêŋ walô lau atom naŋ atomanô. Mago ŋac, taŋ taê walô lau naŋ, oc êtêc mêtôc tonaŋ atom.   
\s1 Takêŋ êwiŋ to ŋakoleŋ ŋabiŋ  
\p
\v 14 O ŋoc lasitêwaac, ŋac teŋ embe ôsôm gebe “Aê kakêŋ gawiŋ,” mago eŋ ŋac koleŋ atom, oc ênam eŋ sa amboac ondoc. Ênê kêkêŋ gêwiŋ oc ênam eŋ kêsi me masi.  
\v 15 Embe lasimi me lasimio teŋ nêŋ ŋakwê masi me sêpô lêna mo kêtôm bêcgeŋŋa  
\v 16 ma amacnêm teŋ embe êsôm êndêŋ êsêac gebe “Ana tobiŋmalôgeŋ, asô nêm ŋakwê sa êjandaŋ amac to aniŋ nêm gêŋ,” mago akêŋ gêŋ êôc êsêac ôliŋ tôŋŋa teŋ êndêŋ êsêac atom, oc ênam êsêac sa amboac ondoc.  
\v 17 Biŋ takêŋ gêwiŋŋa amboac tonaŋ. Embe takêŋ êwiŋ, mago tanam ŋakoleŋ êwiŋ atom, oc takêŋ gêwiŋ tau êtu gêŋ mêtê ŋaôma.   
\p
\v 18 Ma ŋac teŋ embe êsôm gebe “Aôm kôkêŋ gêwiŋ ma aê gajam koleŋ,” go jasôm gebe “Ôtôc nêm kôkêŋ gêwiŋ, taŋ ŋakoleŋ masi naŋ, êndêŋ aê, go aê jatôc ŋoc koleŋ, taŋ êwaka ŋoc kakêŋ gêwiŋ sa naŋ, êndêŋ aôm.”  
\v 19 Aôm kôkêŋ gêwiŋ gebe Anôtô tageŋ tec gêmoa me. Ŋajam. Mago ŋalau sec sêkêŋ gêwiŋ biŋ tonaŋ amboac tonaŋgeŋ ma têtêc tauŋ ŋanô.  
\v 20 O melocma, aôm gobe takêŋ gêwiŋ, taŋ ŋakoleŋ masi naŋ, gêŋ ŋanômêgoc. Aôm gobe aê jawa biŋ tau ŋam sa êndêŋ aôm me.  
\v 21 Aêac abeŋi Abraham amboac ondoc. Gêdêŋ taŋ eŋ kêkêŋ latu Isak kêtu da gêsac altar ŋaô naŋ, Anôtô gêlic eŋ ŋac gêdêŋ kêtu ênê koleŋ tonaŋŋa.  
\v 22 Kec, aôm gôlicgac gebe eŋ kêkêŋ gêwiŋ ma gêjam ŋakoleŋ ulu kêtômgeŋ, tec sêjam tauŋ sa, tec nê koleŋ gêjac dabiŋ nê kêkêŋ gêwiŋ su.  
\v 23 Ma biŋ, taŋ teto gêc naŋ, kêtu anô gebe “Abraham kêkêŋ gêwiŋ Anôtô, tec Anôtô gêlic eŋ ŋac gêdêŋ” ma sêsam eŋ gebe Anôtônê ŋac.  
\v 24 Kec, amac alicgac gebe ŋamalac êtu ŋac gêdêŋ êtu nê koleŋŋa, êtu eŋ kêkêŋ gêwiŋŋa tageŋ nec atom.  
\v 25 Mockaiŋo Rahab kêtôm tonaŋ. Eŋ kêkôc keleŋwaga sa ma kêkêŋ êsêac sêsa intêna teŋ sêja. Tec Anôtô gêlic eŋ awê gêdêŋ kêtu ênê koleŋŋa.  
\v 26 Aêac ôliŋ embe ŋalau masi, oc êtu mêtê. Ma aêacnêŋ takêŋ gêwiŋ embe ŋakoleŋ masi, oc êtu mêtê amboac tonaŋgeŋ.   
\c 3  
\s1 Biŋ kêpi imbeleŋ  
\p
\v 1 O ŋoc lasitêwaac, amacnêm taêsam têtu kêdôŋwaga atommaŋ. Alic acgom, aêac kêdôŋwaga oc atap mêtôc ŋajaŋa sa êlêlêc lau ŋagêdô nêŋ mêtôc su.  
\v 2 Aêac samob dagôm keso elêmê. Teŋ embe êsôm biŋ teŋ eso atom, naŋ eŋ ŋac kwalam laŋgwa teŋgoc ma êtôm gebe ênam gôliŋ nê ôli samucgeŋ ŋapep amboac tonaŋ.  
\v 3 Aêac embe takêŋ gôliŋ êsêp hos aweŋsuŋ gebe taŋeŋ wamu aêac, go tanam gôliŋ bôc tau ôliŋ samucgeŋ êwiŋ.  
\v 4 Alic waŋ acgom. Gêŋ tau kapôêŋanô ma mutêna gêŋgôŋ lac ŋajaŋa sec, mago ŋagôliŋ sauŋ ec teŋ gêjam gôliŋ waŋ tau kêtôm ŋac gôliŋŋa taê gêjam.  
\v 5 Aêac imbeleŋ amboac tonaŋ. Ôliŋ ŋagêŋlêlôm sauŋ teŋ, mago kêlanem tau gêŋ kapôêŋŋa.  
\p Alic acgom, ja ŋamôsi sauŋ teŋ kêtôm gebe êkêŋ ja êniŋ oba kapôêŋ teŋ.  
\v 6 Imbeleŋ kêtôm ja amboac tonaŋ, geŋ geo gêjam imbeleŋ auc samucgeŋ. Imbeleŋ tau ôliŋ ŋagêŋielôm teŋ, taŋ gêgôm ôliŋ samucgeŋ ŋatêmui kêsa naŋ. Lamboam ŋakêlêndiŋ tau ŋaja kêpoa aŋga imbeleŋ, tec imbeleŋ ŋaja geŋ gêŋ samob, taŋ Anôtô kêkêŋ naŋ, ma geseŋ ŋalêŋ su gêwiŋ.  
\v 7 Ŋamalac têtôm gebe seŋgeŋ gêŋ mateŋ jaliŋa tokaiŋ-tokaiŋ naŋ sêgôm su. Bôc saleŋŋa to moc ma gêŋ kêgalabŋa to i têtu malô e têtu gêŋ masiŋ.  
\v 8 Mago ŋamalac teŋ kêtôm gebe êŋgôm imbêla êtu gêŋ masiŋ atomanô. Geŋ sec tau oleb-olebboa to ŋamalic tamac ênduŋa gêjam auc.  
\v 9 Aêac talambiŋ Apômtau to Tameŋi ŋa imbeleŋ ma tapuc boa ŋamalac, taŋ Anôtô kêkêŋ kêtôm eŋ tau katu naŋ, ŋa imbeleŋ tageŋ tonaŋ amboac tonaŋgeŋ.  
\v 10 Biŋ lambiŋŋa to biŋ tapuc boaŋa kêsa aweŋsuŋ tageŋ. O lasitêwaac, biŋ amboac tonaŋ êsa atomanô.  
\v 11 Bu ŋaluc to ŋamakic kêpulu kêpi bumata tageŋ me.  
\v 12 O ŋoc lasitêwaac, jambô oc ênam aiŋ me, ma wain oc ênam jambô me. Ma gwêc oc ênam tau ôkwi êtu bu atom amboac tonaŋ.   
\s1 Kauc undambêŋa  
\p
\v 13 Asa ŋac tokauc ma ŋac mêtêŋa gêmoa gêwiŋ amac. Eŋ êwaka tau sa ŋa nê lêŋ ŋajam to nê koleŋ, taŋ gêjam tokauc mêtêŋa ma tonê ŋalêlôm malôgeŋ naŋ.  
\v 14 Mago amac embe anam lêmuŋ lau ŋawaô to asac lau ênêc lêlômgeŋ, naŋ atoc taôm sa ma ansau biŋdansaŋ e anseŋ biŋŋanô tau su atom.  
\v 15 Kauc tonaŋ kêsêp aŋga undambê gêmêŋ atom, kêsa aŋga nom to geŋ nomŋa ma ŋalau sec nêŋ.  
\v 16 Lau taŋ sêjam lêmuŋ tauŋ to sêsac tauŋ naŋ, oc semoa naeo ma sêŋgôm sec tokaiŋ-tokaiŋ.  
\v 17 Mago kauc mêtêŋa, taŋ lau sêkôc aŋga ôŋa naŋ, êŋgôm nêŋ ŋalêlôm ŋawa êsa êtu ŋamata. Go sê wama tauŋ ŋagaôgeŋ, têtu lau malô, taŋeŋ wamu, taêŋ walô lau ênam êsêac auc ma sênam ŋanô ŋajam. Êsêac têntac lulu atom ma sêka nêŋ biŋ auc atom.  
\v 18 Ŋawê taŋ lau-sê-wamawaga sêsê tobiŋmalôgeŋ naŋ, ênam ŋanô biŋgedeŋ.   
\c 4  
\s1 Tajop tauŋ êndêŋ lêŋ nomŋa  
\p
\v 1 Amac akêŋ kisa gêdêŋ taôm to ajac taôm naŋ ŋam kêsêp asageŋ. Kêsêp gêŋ têmtac ŋakalacŋa, taŋ gêjac siŋ aŋga ôlim ŋagêŋlêlôm naŋgoc.  
\v 2 Amac matem katu gêŋ, mago atôm gebe atap sa atom, tec ajac ŋamalac êndu. Amac agôm mocsac gêŋ, mago atôm gebe atap sa atom, tec ajac taôm to akêŋ kisa gêdêŋ taôm. Amac akôc gêŋ atom, gebe ateŋ mec atom.  
\v 3 Amac ateŋ mec, mago akôc ŋanô atom nec ŋam kêsêp amac ateŋ mec kesoŋa gebe ateŋ gêŋ, taŋ abe êjaiŋ êpi gêŋ têmtac ŋakalacŋageŋ.  
\v 4 Mockaiŋ ŋatêna amac. Lau taŋ sê sêlêb gêdêŋ nom naŋ, têtu Anôtônê ŋacjo. Amac ajala biŋ tonaŋ me masi. Teŋ embe ê sêlêb êndêŋ nom, oc êtu Anôtônê ŋacjo.  
\v 5 Me biŋ, taŋ teto gêc gebe “Ŋalau taŋ gêŋgôŋ aêacnêŋ ŋalêlôm naŋ, gêjam lêmuŋ to gêgôm mocsac ŋanô,” amac abe teto biŋ tonaŋ ŋaômageŋ me.  
\v 6 Ma moasiŋ, taŋ Anôtô kêkêŋ naŋ, kapôêŋ kêlêlêc. Amboac tonaŋ tec teto gêc gebe  
\q1 “Anôtô kêkôniŋ lau, taŋ tetoc tauŋ sa naŋ,  
\q1 ma kêkêŋ moasiŋ gêdêŋ lau, taŋ sêbu tauŋ naŋ.”   
\m
\v 7 Amboac tonaŋ asô Anôtô ŋalabu. Apuc taôm tôŋ êndêŋ Sadaŋ, go êwi amac siŋ ma êc su.  
\v 8 Atu gasuc Anôtô, go êtu gasuc amac. Amac lau sec, akwasiŋ lemem êtu selec. Ma amac lau-têmtac-luluwaga, amansaŋ nêm ŋalêlôm ŋawa êsa.  
\v 9 A jala taôm gebe aŋgôŋ jageo ma nêm ŋalêlôm ŋawapac to ataŋ. Amacnêm ômac ênam tau ôkwi êtu taŋiboa ma têmtac ŋajam êtu têmtac ŋawapac.  
\v 10 Ambu taôm êndêŋ Apômtau, go etoc amac sa.   
\s1 Amêtôc nêm lasitêwai atom  
\p
\v 11 O lasitêwaac, aŋga biŋ êpi taôm atom. Ŋac taŋ êŋga biŋ êpi lasi me êmêtôc lasi naŋ, êtôm gêga biŋ kêpi biŋsu to kêmêtôc biŋsu. Aôm embe ômêtôc biŋsu, go ôtu ŋac-kêmasaŋbiŋsuwaga atom, ôtu biŋsu ŋamêtôcwaga.  
\v 12 Ŋac tageŋ kêtu ŋac-kêkêŋ-biŋsuwaga to mêtôcwaga. Eŋ kêtôm gebe ênam kêsi me enseŋ su. Mago aôm asa, tec kômêtôc ŋac wacbaŋ aômŋa.   
\s1 Atôc taôm sa atom  
\p
\v 13 Ao, amac lau, taŋ asôm gebe “Galoc me eleŋ aêac oc tana malac tônê me ônê nadaŋgôŋ jala samuc teŋ ma tatulu gêŋ e ŋamone êlêsuc aêacgeŋ.”  
\v 14 Amac ajam kauc gêŋ, taŋ oc êŋgôm amac êndêŋ eleŋ naŋ. Amac oc amoa matem jali me masi. Amac atôm bu ŋawajaô, taŋ talic dambêgeŋ ma gê su.  
\v 15 Asôm biŋ amboac tonec êjô biŋ tônê su gebe “Apômtau embe êlôc, go aêac tamoa mateŋ jali ma tanam kôm tonec me tônê.”  
\v 16 Mago galoc alanem taôm to atoc taôm sa. Lanem tokaiŋ-tokaiŋ amboac tonaŋ samob sec.  
\v 17 Ŋac taŋ kêjala êŋgôm gêŋ ŋajamŋa, mago êŋgôm atom, oc êŋgôm sec.   
\c 5  
\s1 Lau tolêlôm taêŋ ênam tauŋ  
\p
\v 1 Ajôc, amac lau tolêlôm, ataŋ to apuc taŋiboa sa êtu gêŋwapac, taŋ wackêdabiŋ amac naŋŋa.  
\v 2 Amacnêm awa kêtu manê to buleseŋ geŋ nêm ŋakwê e lasê-lasêgeŋ.  
\v 3 Da gênôm amacnêm gold to silber. Ma ŋada tau tonaŋ oc êkic amacnêm biŋ e êniŋ amac ôlim su êtôm ja geŋ gêŋ. Amac ajac awa to awa sa gêdêŋ bêc ŋamuŋa tonec.  
\v 4 Alic acgom, amac agamiŋ lau, taŋ sêjam amacnêm kôm naŋ, nêŋ ŋaôli, tec ŋaôli tau gêmôêc to lau-sejoŋ-kôm-ŋano-sawaga nêŋ taŋi jakêsô siŋwaga undambêŋa nêŋ Apômtau taŋasuŋ.  
\v 5 Amac amoasiŋ taôm toôlim kêpigeŋ amoa nom. Amac aŋgeŋ nêm ŋalêlôm e ŋadambê kêsa ma kêtôm gebe sêŋguŋ amac êndêŋ ŋanoc.  
\v 6 Amac amêtôc ŋac gêdêŋ to ajac eŋ êndu ma eŋ gêjam tau ŋagêjô gêdêŋ amac atom.   
\s1 Tapuc tauŋ tôŋ to tateŋ mec  
\p
\v 7 O lasitêwaac, amboac tonaŋ apuc taôm tôŋmaŋ ma êôŋ Apômtau e mêŋêô lasê. Alic kôm ŋatau acgom, eŋ kêsaê gebe kôm ênam ŋanô ŋajam ma kêpuc tau tôŋ to gêôŋ kom gebe ênac êndêŋ ŋanoc.  
\v 8 Amac apuc taôm tôŋ amboac tonaŋgeŋ ma aôŋ anac seŋeŋ nêm ŋalêlôm gebe noc Apômtau mêŋêô lasêŋa kêdabiŋ.  
\v 9 O lasitêwaac, anac kapoac taôm e atap mêtôc sa atom. Alicgac me, mêtôcwaga tec mêŋkêkô katamdêmôê.  
\v 10 O lasitêwaac, aôc ŋandaŋ to apuc taôm tôŋgeŋ apuc propete, taŋ sêsôm biŋ sêjam Apômtau laŋô naŋ waŋeŋ.  
\v 11 Alic acgom, aêac aweŋ gêôc êsêac, naŋ sêôc gêŋwapac totêntac kêpa sugeŋ naŋ. Amac aŋô Job gêôc ŋandaŋ totêtac kêpa sugeŋ ŋawae, ma ajala Apômtau gêjac dabiŋ eŋ ŋalêŋgac. Biŋŋanô, Apômtau eŋ taê walô to taê labu ŋatau.   
\p
\v 12 O lasitêwaac, biŋ tonec ajop êtu ŋamata gebe atôc lemem atom. Atôc lemem êpi undambê to nom me gêŋ ŋagêdô teŋ atomanô. Amac embe asôm gebe “Aec,” naŋ aêc tonaŋ kêtôm. Me embe asôm gebe “Masi,” naŋ masi tonaŋ kêtôm amboac tonaŋgeŋ. Aŋgôm amboac tonaŋ, ec mêtôc êtap amac sa atom.   
\p
\v 13 Amacnêm ŋac teŋ embe gêŋwapac êtap eŋ sa, naŋ eteŋ mec. Ma teŋ embe têtac ŋajam, naŋ ênam wê dêbuŋ.  
\v 14 Amacnêm teŋ embe gêmac êŋgôm eŋ, naŋ êkêŋ biŋ gôlôac dabuŋ nêŋ laumata. Êsêac teteŋ mec êpi eŋ to sêniŋ oso eŋ ŋa niptêkwi sênam Apômtau laŋô.  
\v 15 Mec tonaŋ embe teteŋ tosêkêŋ êwiŋgeŋ, go ênam ŋac gêmac tau sa. Ma Apômtau oc êsuŋ eŋ sa êŋgôŋ êtiam, ma ŋac tau nê sec embe ênêc, oc Apômtau êsuc sec tau ôkwi.  
\v 16 Amboac tonaŋ aoc nêm sec lasê êndêŋ taôm ma ateŋ mec êjô tau êtu taômŋa gebe ôlim ŋajam êsa. Ŋac gêdêŋ nê mec gêjam ŋanô toŋaclai.  
\v 17 Elia eŋ ŋamalac kêtôm aêac. Eŋ keteŋ mec gebe kom ênac atom, tec kom gêjac atom kêtôm jala têlêac ma ajôŋ 6.  
\v 18 Go keteŋ mec kêtiam ma undambê kêkêŋ kom e nom gêjam ŋanô ŋajam.   
\p
\v 19 O lasitêwaac, amacnêm teŋ embe eo aŋga lêŋ biŋŋanôŋa ma teŋ embe ênam eŋ ôkwi êmu êmêŋ,  
\v 20 go ajala gebe ŋac, taŋ gêjam ŋac sec ôkwi aŋga ênê lêŋ keso naŋ, oc ênam ênê katu kêsi aŋga gêmacanô tau ma êŋgênduc sec taêsam auc.