\id HAB -Jabem partial Bible [jae] -Papua New Guinea 1980 (web 2015) 
\h HABAKUK 
\toc1 Habakuk 
\toc2 Habakuk 
\toc3 Hab 
\mt1 Habakuk  
\ip Propete Habakuk geoc biŋ lasê gêdêŋ taŋ lau Babilon sêjam gôliŋ gamêŋ gêdêŋ jala 605 gêmuŋ Kilisi gêmêŋ nomŋa naŋ. Lau Babilon sêlêsu lau ma nêŋ ŋaclai sec kêlênsôŋ Habakuk ŋasec. Tec kêtu kênac Apômtau gebe “ŋacjo seseŋ lau gêdêŋ, taŋ ŋajam kêlêlêc êsêac naŋ, su ma aôm gôjam taôm tôŋ kêtu ageŋŋa.” Apômtau gêjô eŋ awa gebe eŋ êkêŋ ŋagêjô êndêŋ ŋanoc solop. Ma êndêŋ ŋasawa, taŋ geŋ lau gêŋgic aŋga noc tau naŋ, lau gêdêŋ sêmoa mateŋ jali êtu sêsap Anôtô tôŋ ŋaŋêŋgeŋŋa.  
\ip Buku ŋabiŋ ŋagêdô geoc lasê gebe lau geo têtap mêtôc ŋajaŋa sa e sênaŋa.  
\ip Biŋ ŋamuŋa kêlambiŋ Anôtô gebe eŋ kapôêŋ kêlêlêc ma gêwa propetenê kêkêŋ gêwiŋ ŋajaŋa sa.  
\c 1  
\p
\v 1 Anôtônê biŋ, taŋ geoc lasê gêdêŋ Habakuk naŋ tonec.   
\s1 Habakuk kêtaŋ kêtu mêtôc kesoŋa  
\p
\v 2 O Apômtau, aê jamôêc êtu ônam aê saŋa e êndêŋ ondocgeŋ, mago aôm kôkêŋ taŋam atom. Aê gamôêc gêdêŋ aôm gebe sêkôniŋ aê tôŋ ŋanôgeŋ, mago aôm gôjam aê sa atom.  
\v 3 Aôm kôkêŋ aê galic gêŋ geo to kasala gêŋ keso kêtu asageŋŋa. Aê galic seseŋ gêŋ su to sêgôm gêŋ saic-saicgeŋ, galic kisa to siŋ ŋabêlêc gêjam sêga.  
\v 4 Kêtu tonaŋŋa ŋagôliŋ kêtu goloŋ ma biŋgêdêŋ kêsa awê atom. Gebe ŋac sec kêgi ŋacgêdêŋ auc, tec biŋgêdêŋ gêjam tau ôkwi kêtu meloc.   
\s1 Anôtô gêjô propete awa  
\p
\v 5 “Asala tenteŋlatu samob to alic. Alaiŋ matemanô to aŋac lemem. Gebe aê oc jaŋgôm gêŋ kaiŋ teŋ êndêŋ amacnêm têm. Lau embe sênac miŋ êndêŋ amac naŋ, oc akêŋ êwiŋ atom.  
\v 6 Alicgac me, aê oc jali lau Kaldea sa. Êsêac lau salaŋ-salaŋ to têntac ŋamakic, taŋ sêsêlêŋ sêjac laoc nom samucgeŋ gebe sêjaŋgo gamêŋ, taŋ êsêacnêŋ atom naŋ su.  
\v 7 Lau kalomtêna sec to alôb-alôb sê mêtôc launêŋ biŋ waucwaucgeŋ êtôm tauŋ taêŋ ênam.  
\v 8 Nêŋ hos sêlêti sêlêlêc bôclai Leopard su. Sêlêti ŋagaô kêlêlêc kêam-bôm gêdêŋ gêbêc. Nêŋ lau hosŋa sêmêŋ amboac momboaŋ kêpôp kêsêp gebe êtap gwada sa.  
\v 9 Êsêac samob sêmêŋ kêtu gêŋ saic-saicŋageŋ. Nêŋ wali kêtaŋ gêmuŋ êsêac. Êsêac sêboa lau kapoacwalô taêsam sa amboac gaŋac gwêcŋa.  
\v 10 Êsêac sêmajec kiŋ ma sêsu gôliŋwaga susu. Êsêac sêlic malac ŋajaŋa totuŋbôm ma sêômac. Êsêac sêboa nom sa e gêjam tuŋbôm tôŋ ma sêjaŋgo gamêŋ tau su.  
\v 11 Go êsêac sêsa amboac mu ilai sêja. Êsêac sêkêŋ tauŋ nêŋ ŋaclai kêtu nêŋ anôtô.”   
\s1 Habakuk awasuŋ gêôc ka Apômtau kêtiam  
\p
\v 12 O Apômtau, ŋoc Anôtô dabuŋ, taŋ gômoa teŋgeŋ naŋ, aêac abe amac êndu atomanô. O Apômtau, aôm kôkêŋ lau tonaŋ têtu mêtôcwaga me. O ŋoc lamu, aôm kôjatu êsêac gebe sêkêŋ ŋagêjô me.  
\v 13 Nêm matamanô ŋakêŋkêŋgosu, tec godec gebe ôsala sec ma ôlic gêŋ geo. Mago kêtu ageŋŋa aôm kôsala sêjaŋgowaga ma gôjam taôm tôŋ gêdêŋ taŋ alôb-alôb têdaŋgôŋ lau, taŋ nêŋ gêdêŋ kêlêlêc êsêac tauŋ nêŋ su naŋ.  
\v 14 Aôm gôgôm ŋamalac amboac i gwêcŋa. Amboac gêŋ sêgalabŋa, taŋ nêŋ ŋatau masi naŋ.  
\v 15 Ŋacjo gêjac lau amboac gêjac i ŋa êŋpaŋ. Eŋ gêmô êsêac ŋa kata. Eŋ gêlô lau amboac sêlô i ŋa wasaŋ, tec eŋ têtac ŋajam to ôli kêpi.  
\v 16 Tec eŋ kêkêŋ da gêdêŋ nê wasaŋ ma gêsôb jadauŋ kêtu nê gamŋa gebe kêtu gêŋ tonaŋŋa eŋ kêtu ŋac tolêlôm ma gêŋgôŋ gêŋ masê ŋaô.  
\v 17 Eŋ oc iŋ i su aŋga nê wasaŋ ŋapaŋ êmoa ma enseŋ lau tenteŋlatu paliŋ-paliŋgeŋ êmoa me.   
\c 2  
\s1 Apômtau gêjô Habakuknê biŋ  
\p
\v 1 Aê gabe japi najakô ŋoc andu ŋaatêkwa baliŋ ma jalic acgom. Ma jansaê biŋ ondoc Apômtau oc êsôm êndêŋ aê, êjô ŋoc biŋ, taŋ aocsuŋ gêôc ka eŋŋa naŋ.   
\p
\v 2 Ma Apômtau gêjô aêŋoc biŋ ma kêsôm gebe “Oto gêŋ, taŋ gôlic naŋ, ŋawageŋ êsêp tapele gebe sêsam biŋ tau ênêc awêgeŋ.  
\v 3 Gêŋ taŋ aôm gôlic naŋ, oc ênêc e ŋanô êsa êndêŋ ŋanoc, go êndêŋ ŋamu êwaka tau sa gebe êtu dansaŋ atom. Embe êmêŋ sebeŋ atom, go ôŋ gêŋ tau oc mêŋêô lasê ma ênam gamêŋ tôŋ atom.  
\v 4 Ôlic acgom, ŋac alôb-alôb nê katu oc ênaŋa, mago ŋac gêdêŋ tau oc êŋgôŋ mata jali êtu kêkêŋ gêwiŋŋa.”   
\s1 Biŋ ojaeŋa kêpi lau alôb-alôb  
\p
\v 5 Wain kêjaŋiŋ lau. Ŋac taŋ ketoc tau sa oc êmoa atom. Eŋ gêŋa awa amboac lamboam. Eŋ kêtôm gêmacanô, taŋ geŋ lasamboa, tageŋ gêôc eŋ tôŋ atom. Eŋ kejoŋ lau tenteŋlatu samob sa gêdêŋ tau ma kêkatoŋ lau to-m-to-m sêsô eŋ ŋalabu.  
\v 6 Êsêac samob oc sêŋga wê kêsi-kêsigeŋŋa êpi eŋ ma sêsu eŋ susu ma sêsôm gebe “Ojae, ŋac teŋ gêboa launêŋ gêŋ sa kêtu ênê ma gêgôm keso e gêjam sêga. Eŋ oc êŋgôm e êndêŋ ondocgeŋ.”  
\v 7 Lau taŋ nêŋ tôp gêc aômŋageŋ naŋ, oc dêndi sa sebeŋ atom me. Nêm lau, taŋ sêlênsu aôm naŋ, oc mateŋ êlac ma mêŋsêjaŋgo nêm gêŋ su êtôm aôm taôm kôjaŋgo tenteŋlatu taêsam nêŋ su gêmuŋ naŋ.  
\v 8 Tec lau tenteŋlatu, taŋ gacgeŋ sêmoa naŋ, oc sêjaŋgo nêm gêŋ su êjô ŋamalacnêŋ dec, taŋ kôkêc siŋ naŋ, to gêŋ ŋaclai, taŋ gôgôm gêdêŋ nom to malac ma lau samob, taŋ sêŋgôŋ tonaŋ naŋ.   
\p
\v 9 Ojae ŋac, taŋ gêjam launêŋ bôlêŋ auc êtu êmboa awa sa aŋga nê andu ma ênam nê sac ênêc lôlôcgeŋ gebe ênam tau sa êndêŋ gêŋ enseŋ eŋŋa.  
\v 10 Aômnêm biŋ gêgôm nêm gôlôac majeŋ kêsa. Gêdêŋ taŋ aôm goseŋ lau-m taêsam su naŋ, aôm goseŋ taôm su amboac tonaŋgeŋ.  
\v 11 Poc sêpiŋ anduŋa oc sêmôêc lasê ma gamêŋtêkwa oc êjô biŋ.   
\p
\v 12 Ojae ŋac, taŋ kêkwê malac sa ŋa dec ma kêkajo malac ŋajaŋa ŋa biŋ geo.  
\v 13 Ôlic acgom, lau undambêŋa nêŋ Apômtau kêsôm biŋ tonec gebe “Lau sêjam koleŋ kêtu ja geseŋ suŋa ma tenteŋlatu sim tauŋ su ŋaômageŋ.” Eŋ kêsôm me masi.  
\v 14 Gebe nom ŋalau samob nêŋ kauc êsa êpi Apômtaunê ŋawasi êtôm bu gêjam gwêc auc.   
\p
\v 15 Ojae êndêŋ eŋ, taŋ êŋgôm nê lau jabaŋŋa sênôm gêŋ e êjaŋiŋ êsêac gebe êlic êsêac ôliŋgêdô.  
\v 16 Majam ênam aôm auc êjô waem su. Tec aôm taôm ônôm gêŋ tau e êjaŋiŋ aôm. Laclu taŋ kêsêp Apômtaunê lêma anôŋa naŋ, oc wacêô lasê aôm e majam êkôniŋ waem tôŋ.  
\v 17 Gebe gêŋ alôb-alôb, taŋ gôgôm gêdêŋ Lebanon naŋ, oc êku aôm tulu. Ma bôc samob, taŋ gôjac êndu naŋ, oc êtakê aôm. Gêŋ tonaŋ êtap aôm sa gebe kôkêc ŋamalacnêŋ dec siŋ to gôgôm gêŋ ŋaclai gêdêŋ nom to malac ma gêdêŋ lau, taŋ sêŋgôŋ malac tau ŋalêlôm naŋ.   
\p
\v 18 Gwam teŋ, taŋ ŋac lêma mêtêŋa kêsap naŋ, oc ênam sa amboac ondoc. Gêŋ tau ŋakatu ŋaôma teŋ ma biŋ dansaŋ ŋamgoc. Kêsapwaga kêkêŋ gêwiŋ tau nê gêŋ, taŋ kêmasaŋ gwam awamê naŋ, oc ênam eŋ sa amboac ondoc.  
\v 19 Ojae ŋac, taŋ kêsôm gêdêŋ ka gebe “Matam êlac,” gêdêŋ poc awamê gebe” Ôndi sa” naŋ. Gêŋ tonaŋ oc eoc biŋ lasê me. Alic acgom, sêkwa ŋa gold to silber, mago gêŋ tau kêsi awa atom.   
\p
\v 20 Mago Apômtau gêmoa nê lôm dabuŋ ŋalêlôm, nom ŋagamêŋ samob ŋaŋêŋ êsa sêmoa eŋ laŋônêmŋa.   
\c 3  
\s1 Habakuknê mec  
\q1
\v 1 Propete Habakuk nê mec, tateŋ ŋaawa amboac wê.   
\b  
\q1
\v 2 O Apômtau, aê gaŋô gêŋ, taŋ aôm gôgôm naŋ ŋawae.  
\q1 O Apômtau, aê katakê sauŋ atom kêtu nêm kômŋa.  
\q1 Ônam nêm kôm ŋakôniŋŋa êndêŋ tonec.  
\q1 Ôŋgôm kôm tau ŋawae êsa êndêŋ ŋasawa tonec.  
\q1 Taêm ênam nêm taêm labu êndêŋ noc têmtac ŋandaŋ êsaŋa.   
\b  
\q1
\v 3 Anôtô gêmêŋ aŋga gamêŋ Edom ma ŋac dabuŋ tau aŋga lôc Paran.  
\q1 Ênê ŋawasi gêjam undambê auc  
\q1 ma nê lambiŋ mêŋgêjam nom auc.   
\q1
\v 4 Ênê ŋawasi kêtôm oc ŋawê.  
\q1 Ŋawê kêsa eŋ lêma amboac ôsic kêkac. Ma eŋ kêsiŋ nê ŋaclai kêsêp gêŋ tonaŋ.   
\q1
\v 5 Gêmac sec kêsêlêŋ gêmuŋ eŋ  
\q1 ma gêmac ŋawajaôŋa kêpuc eŋ waŋa.   
\q1
\v 6 Eŋ gêdi kêkô ma nom ŋawiwic kêsa.  
\q1 Eŋ mata gê tenteŋlatu ma têtênêp.  
\q1 Go lôc teŋgeŋŋa gêôc kêkôc.  
\q1 Gamêŋ ŋabau, taŋ kêkô wanêc-wanêc naŋ, gênu kêsêp gêja. Nê mêtê gêgôm gêŋŋa gêc andaŋgeŋanô.   
\b  
\q1
\v 7 Aê galic becobo Kusaŋŋa kêtap ŋawapac sa.  
\q1 Midiannêŋ becobo kêwiwic tau.  
\v 8 O Apômtau, gêdêŋ aôm gôŋgôŋ nêm hos ŋaô  
\q1 ma nêm kareta siŋŋa kêku ŋacjo tulu naŋ,  
\q1 aôm têmtac ŋandaŋ gêdêŋ bu kapôêŋ me.  
\q1 Nêm têmtac sec gêdêŋ gwêc tau me.   
\q1
\v 9 Aôm kôka tikoc kêsêp nêm talam.  
\q1 Aôm kôkêŋ sôb kêkô tikoc. Aôm kôkêŋ bu ŋasamac kêsêli nom gêŋgic.   
\q1
\v 10 Lôc sêlic aôm e ŋawiwic kêsa.  
\q1 Kom kêsêwa kêsêp gêmêŋ.  
\q1 Gwêc ŋagêdimbob kêgasim ŋakicsêa kapôêŋ  
\q1 ma ŋadembom kêpigeŋ gêja.   
\q1
\v 11 Oc kêliŋ tau siŋ kêpi gêmêŋ atom  
\q1 ma ajôŋ kêkô ŋaŋêŋ aŋga nê mala.  
\q1 Êsêac têtêc nêm sôb ŋaja  
\q1 to nêm kêm ŋawasi ŋaôsic-ôsic.   
\q1
\v 12 Aôm kôsêlêŋ kôka nom totêmtac kêbuli aucgeŋ  
\q1 ma golo tenteŋlatu popoc totêmtac ŋandaŋgeŋ.   
\q1
\v 13 Aôm gôdi gebe ônam nêm lau sa  
\q1 gebe ônam nêm ŋac, taŋ goeŋ oso eŋ naŋ kêsi.  
\q1 Aôm kômakiŋ ŋac alôb-alôb nê andu  
\q1 ma goseŋ andu tau popoc e malamê.   
\q1
\v 14 Aômnêm sôb kêpê ênê môkêapac e palalap  
\q1 ma ênê laumata sêc êliŋ-êliŋ amboac mu gêju gêŋ saliŋ-saliŋ.  
\q1 gebe êsêac selo lau ŋalêlôm sawa popoc ma têdaŋgôŋ êsêac kelecgeŋ.   
\q1
\v 15 Aôm kôka gwêc ŋa nêm hos e bu ŋasamac kêsa.   
\b  
\q1
\v 16 Aê gaŋô e ôlic kêlênim tau  
\q1 ma ŋakicsêa gêgôm gêdôcôlic kêtênêp.  
\q1 Ŋoc ŋatêkwa kêtu palê.  
\q1 Ockaiŋ kêtu mêlê-mêlê.  
\b  
\q1 Aê gabe jamaŋgeŋ jamoa ma jaôŋ bêc Anôtô êkêŋ ŋagêjô  
\q1 êpi lau, taŋ sêkôniŋ aêac naŋ.   
\b  
\q1
\v 17 Jambô oc êôc atom  
\q1 ma wainmôkê oc ênam ŋanô atom.  
\q1 Katêkwi êŋgamiŋ nê ŋatêkwi  
\q1 ma gêŋ taniŋŋa ênam ŋanô atom.  
\q1 Domba maleŋmê aŋga nêŋ sapa  
\q1 ma bulimakao sêmoa nêŋ andu atom.   
\q1
\v 18 Mago aê jatu samuc Apômtau.  
\q1 Aê janam lasê êtu ŋoc moasiŋ ŋaAnôtô.   
\q1
\v 19 Apômtau Anôtô kêtu ŋoc ŋaclai ŋam.  
\q1 Eŋ kêkêŋ aê kalêti amboac mojawa.  
\q1 Eŋ kêkêŋ aê kasêlêŋ aŋga gamêŋ lôcŋa.