\id EPH -Jabem partial Bible [jae] -Papua New Guinea 1980 (web 2015) 
\h EPESE 
\toc1 Paulunê papia gêdêŋ lau  EPESE 
\toc2 Epese 
\toc3 Ep 
\mt2 Paulunê papia gêdêŋ lau  
\mt1 EPESE  
\ip Paulunê papia gêdêŋ lau Epese nec ŋac tau keto gebe êwaka biŋ, tê Anotôtô taê gêjam gebe êŋgômŋa nê, sa ênêc awegeŋ gebe “Êndêŋ ŋanocgeŋ ma embiŋ gêŋ samob aŋge undambê to nom tôŋ, go êkêŋ Kilisi êtu ŋamôkê” (1:10). Go keto kêtu tonecŋa gewiŋ gebe êkêli Anôtônê lau sêsa nêŋ lêŋ samob sêwaka biŋ kapôêŋ tonaŋ ŋam sa, ec sêkêŋ gewiŋ Jesu Kilisi êmbiŋ ŋamalac pebeŋ toŋ têtu gêŋ ŋanô tageŋ.  
\ip Paulu gêôŋ papia tau ŋatêna sa gec ŋasêbu ŋamataŋa keto kêpi Tameŋi Anôtô kêjaliŋ nê lau sa têtu ŋanô tageŋ ŋalêŋ. Eŋ kêsuc êsêacnêŋ biŋ ôkwi ma kêgaboac êsêac su aŋga nêŋ sec kêtu Latu Jesu Kilisiŋa, tec kêkêŋ Ŋalau Dabuŋ kêtu moasiŋ kapôêŋ tonaŋ ŋakamaclauŋ gebe gêjac êsêac ŋawae biŋŋanôgeŋ. Go kêkêli lau-sêsam-papia-tauwaga gebe sêsa nêŋ lêŋ samob amboac lau, taŋ seŋgom Kilisi gêbiŋ êsêac tôŋgac êtu anô êpi tauŋ nêŋ sêmbiŋ tauŋ tôŋ toŋanôgeŋŋa. Kilisi gêbiŋ Anôtônê lau tôŋ têtu gôlôac dabuŋ tageŋ nec, Paulu gêwa sa to gê dôŋ kêpi biŋ tonec ŋai gebe gê dôŋ gôlôac dabuŋ kêpi ôli teŋ, taŋ Kilisi kêtu ŋamôkê naŋ, me kêpi andu teŋ, taŋ Kilisi kêtu ŋaalê kêclêsuŋa naŋ, me kêpi awê teŋ, taŋ Kilisi kêtu ênê akweŋ naŋ. Paulu keto papia tau keto biŋ gêjam dani ma eŋ taê gêjam Anôtônê moasiŋ, taŋ mêŋkêtu anô kêpi Kilisi naŋgac. Ênê ŋalêlôm kêkac eŋ todim-todim, tec gêga kêtu wê ma kêpuc wê sa kêsêp ŋasawa gêwiŋ-gêwiŋ. Eŋ keto biŋ samob kepeŋ Kilisi têtac gêwiŋ ŋamalacŋa to kêkêŋ tau kêtu da gêjô ŋamalac suŋa ma kêsuc ŋamalacneŋ sec ôkwiŋa to taê labu ma kêmoasiŋ ŋamalacŋa to nê ŋalêlôm ŋawê ma nê lêŋ selecŋa.  
\iot Ŋadênaŋ  
\ili1 1. Paulu gêjac m papia tau 1:1-2  
\ili1 2. Kilisi to Gôlôac Dabuŋ 1:3–3:21  
\ili1 3. Lêŋ wakuc gêjac lau, taŋ Kilisi gêbiŋ êsêac tôŋ naŋ ŋawae 4:1–6:20  
\ili1 4. Paulu gêjac mata papia tau 6:21-24  
\c 1  
\s1 Paulu awa gêjac lau Epese  
\p
\v 1 Kilisi Jesu nê aposolo aê, Paulu, taŋ Anôtô kêkalem aê naŋ, ŋoc biŋ êndêŋ Anôtônê lau, taŋ sêkêŋ gêwiŋ Kilisi Jesu sêŋgôŋ Epese naŋ.  
\v 2 Tameŋi Anôtô agêc Apômtau Jesu Kilisi nêŋ moasiŋ to biŋmalô êndêŋ amac êwac.   
\s1 Moasiŋ taŋ tatap sa kêtu Kilisiŋa  
\p
\v 3 Aweŋ gêôc aêacnêŋ Apômtau Jesu Kilisi Tama Anôtô, taŋ kêkêŋ Kilisi ma gêjam mec aêac ŋa mec ŋalêlômŋa tokaiŋ-tokaiŋ, taŋ ŋam kêsêp undambê naŋ.  
\v 4 Anôtô kêkêŋ nom atomgeŋ, ma kêjaliŋ aêac sa tatu ênê gêŋ kêtu Kilisiŋa e tatu lau dabuŋ to ŋaŋêŋ tamoa eŋ laŋônêm. Anôtô têtac gêwiŋ aêac,  
\v 5 tec taê gêjam kêtu tôŋ gebe êkêŋ Jesu Kilisi êwê aêac dandêŋ eŋ tana natatu ênê latui. Biŋ tonaŋ eŋ têtac gêwiŋ gebe êŋgôm ŋanô êsa.  
\v 6 Lambiŋ êndêŋ Anôtô gebe kêkêŋ latu, taŋ têtac gêwiŋ eŋ naŋ, mêŋkêtu moasiŋ ŋawasi tau gêdêŋ aêac.   
\p
\v 7 Kilisi tau kêgaboac aêac su ŋa nê dec ma kêsuc tagêli biŋsu ŋabiŋ ôkwi. Biŋ tonaŋ gêwa ênê moasiŋ kapôêŋanô sa.  
\v 8 Anôtô kêsêwa moasiŋ tonaŋ mêŋkêpi aêac. Eŋ ŋac tokauc to kêjala biŋ, taŋ gêc lêlômgeŋ naŋ,  
\v 9 tec gêwa nê biŋ ŋalêlômŋa sa gêdêŋ aêac ma gebe êŋgôm biŋ taŋ taê gêjam kêtu tôŋ naŋ, ŋanô êsa gêdêŋ taŋ kêkêŋ Kilisi.  
\v 10 Anôtô ênac dabiŋ nê biŋ, taŋ kêmasaŋ naŋ, êndêŋ ŋanocgeŋ ma êmbiŋ gêŋ samob aŋga undambê to nom tôŋ, go êkêŋ Kilisi êtu ŋamôkê.   
\p
\v 11 Ŋac tau kêkêŋ aêac awê kaiŋ gêŋlênsêm kêtôm Anôtô kêmasaŋ kwanaŋgeŋ ma gêgôm biŋ, taŋ taê gêjam kêtu tôŋ naŋ, ŋanô kêsa.  
\v 12 Aêac taŋ akêŋ mateŋ Kilisi kwanaŋgeŋ naŋ, alambiŋ Anôtônê ŋawasi.   
\p
\v 13 Ma amacnêm biŋ amboac tonaŋgeŋ. Eŋ kêkêŋ amac aŋô biŋŋanô ŋamêtê, ŋawae ŋajam kêpi lêŋ Anôtô ênam amac kêsiŋa e akêŋ gêwiŋ Kilisi, ma Anôtô kêkêŋ Ŋalau Dabuŋ, taŋ gêjac mata naŋ, kêtu ŋabelo atu ênê gêŋŋa.  
\v 14 Ŋalau Dabuŋ tau kêtu aêacnêŋ gêŋlênsêm ŋakamaclauŋ, gebe ênam aêac kêsi tatu ênê gêŋ ma talambiŋ ênê ŋawasi.   
\s1 Paulunê mec  
\p
\v 15 Aê gaŋô amac akêŋ gêwiŋ Apômtau Jesu to têmtac gêwiŋ Anôtônê lau samob ŋawae,  
\v 16 tec gajam daŋge Anôtô kêtu amacŋa gedeŋ tôŋgeŋ ma taêc gêjam amac kêsêp ŋoc mec ŋalêlôm,  
\v 17 ma kateŋ aêacnêŋ Apômtau Jesu Kilisi nê Anôtô, aêac Tameŋi eŋ, taŋ kêtu ŋawasi ŋatau naŋ, gebe eŋ êkêŋ Ŋalau ênsuŋ kauc mêtêŋa to eoc biŋ lasêŋa êndêŋ amac e ajala Anôtô ŋanôgeŋ.  
\v 18 Aê kateŋ gebe Anôtô êpô nêm ŋalêlôm ŋawê êsa e ajala ênê kalem, taŋ akêŋ matem naŋ, to ajala moasiŋ ŋawasi tolêlôm-tolêlôm, taŋ gêjac mata gadêŋ nê lau naŋ,  
\v 19 to ajala ênê ŋaclai kapôêŋ kêlêlêc, taŋ gêjam kôm gêmoa aêac takêŋ-gêwiŋwaga ŋalêlôm naŋ. Ŋaclai ŋajaŋa kapôêŋ tonaŋgeŋ  
\v 20 gêjam kôm gêdêŋ taŋ Anôtô gêŋu Kilisi gêdi sa aŋga ŋacmatênêŋ ma ketoc eŋ gêŋgôŋ ênê anôŋa aŋga undambê.  
\v 21 Kilisi gêŋgôŋ tônê ma gêjam gôliŋ apômtaui to ŋaclai ma ŋactêkwa to ŋataui. Eŋ kêlêlêc ŋaê towae samob, taŋ tetoc sa aŋga nom tonec to ônêŋa naŋ su.  
\v 22 Anôtô kêkêŋ gêŋ samob kêsô Kilisi akaiŋ ŋalabu ma kêkêŋ eŋ kêtu gôlôac dabuŋ ŋamôkê gebe ênam gôliŋ gêŋ samob.  
\v 23 Gôlôac dabuŋ tau tonaŋ kêtu Kilisi ôli, ma eŋ, taŋ gêbiŋ gêŋ samob tôŋ naŋ, gêjam ôli tau auc samucgeŋ.   
\c 2  
\s1 Anôtô gêŋu aêac sa tamoa mateŋ jali  
\p
\v 1 Amac agêli biŋsu to nêm sec gêgôm amac atu matê su.  
\v 2 Gêmuŋgeŋ agôm nêm gêŋ amboac tonec, asêlêŋ kêtôm nom tonec ŋagôiiŋ to asô ŋatau, taŋ gêjam gôliŋ ŋaclai sec umboŋ ŋalabuŋa to ŋalau, taŋ gêjam kôm kêpi lau taŋeŋpêc gêdêŋ Anôtônê biŋ naŋ ŋalabu.  
\v 3 Gêmuŋgeŋ aêac samob tatôm êsêac ma tasa nêŋ lêŋ kêtôm têntac ŋakalac kêkac aêacŋa. Aêac dagôm gêŋ, taŋ ôliŋ to ŋalêlôm kêkac aêacŋa naŋ, ŋanô kêsa, tec Anôtô têtac ŋandaŋ gêdêŋ aêac kêtôm têtac ŋandaŋ gêdêŋ êsêac ŋagêdô.   
\p
\v 4 Mago Anôtô taê walô aêac ŋanôgeŋ ma têtac gêwiŋ aêac kêlêlêc,  
\v 5 tec kêkêŋ aêac, taŋ tatu mêtê kêtu tagêli biŋsuŋa naŋ, tamoa mateŋ jali dawiŋ Kilisi. Anôtônê moasiŋ gêjam amac kêsi.  
\v 6 Ma eŋ gêŋu aêac sa dawiŋ Kilisi Jesu to ketoc aêac daŋgôŋ gamêŋ undambêŋa dawiŋ eŋ.  
\v 7 Anôtô gêgôm gêŋ tonaŋ gebe êtôc nê moasiŋ tolêlôm-tolêlôm êndêŋ lau êndêŋ têm samob, taŋ oc mêŋêsa naŋ. Moasiŋ tau gêwa tau sa gêdêŋ taŋ Anôtô têtac gêwiŋ aêac ma kêkêŋ Kilisi Jesu gêmêŋ naŋ.  
\v 8 Gebe Anôtô kêmoasiŋ amac, tec gêjam amac sa kêtu akêŋ gêwiŋŋa. Taôm agôm atom, Anôtô tau kêkêŋ ŋaômageŋ.  
\v 9 Ŋamalac teŋ nê koleŋ gêjam eŋ sa atom, gebe teŋ etoc tau sa atom.  
\v 10 Anôtô tau nê koleŋ ŋanô aêac. Eŋ gêwiŋ Kilisi Jesu ma kêkêŋ aêac gebe tanam koleŋ ŋajam, taŋ eŋ kêmasaŋ kwanaŋgeŋ naŋ, gebe tasa nêŋ lêŋ tapeŋ ŋanô tonaŋgeŋ.   
\s1 Anôtô gêbiŋ aêac tôŋ tatu gôlôac dabuŋ tageŋ  
\p
\v 11 Amboac tonaŋ taêm ênam gebe gêmuŋgeŋ tenemi sêkôc amac amboac tenteŋlatui, ma lau Juda, taŋ sêsa êsêac ŋa lemeŋ naŋ, tec sêsam amac gebe lau samuc.  
\v 12 Gêdêŋ ŋasawa tonaŋ amac amoa jaêc Kilisi, ma Israelwaga sêlic amac amboac êsêacnêŋ lau ŋagêdô amac atom. Amac lau jaba, tec awê kaiŋ poac ŋamoasiŋ, taŋ Anôtô gêjac mata gêdêŋ nê lau naŋ atom. Amac amoa nom tonec akêŋ matem gêŋ teŋ atom to ajam kauc Anôtô.  
\v 13 Mago galoc awiŋ Kilisi Jesu ma amac, taŋ gêmuŋgeŋ amoa jaêc naŋ, atu gasuc amêŋ kêtu Kilisi gêmac ênduŋa.   
\p
\v 14 Kilisi tau kêtu aêacnêŋ biŋmalô ŋamôkê. Eŋ gêbiŋ aêac Juda to lau samuc tôŋ tapi tageŋ to geseŋ kisa, taŋ kêtu balaŋ geŋ aêac gêŋgic naŋ, su ŋa tau ôli.  
\v 15 Eŋ geseŋ biŋsu ŋajatu to ŋagôliŋ su gebe êkêŋ toŋ luagêc têtu toŋ wakuc tageŋ êmoa eŋ tau ŋalêlôm, tec kêkêŋ biŋmalô.  
\v 16 Eŋ gêmac êndu aŋga kakesotau, tec geseŋ kisa su jagêbiŋ lulugeŋ tôŋ têtu ôli tageŋ ma gê wama gêdêŋ Anôtô.  
\v 17 Amboac tonaŋ Kilisi gêmêŋ ma gêjam mêtê kêpi biŋmalô tau ŋaŋawae ŋajam gêdêŋ amac, taŋ amoa jaêc Anôtô to êsêac, taŋ têtu gasuc eŋ naŋ  
\v 18 gebe ŋac tau tonaŋ kêkêŋ Ŋalau tageŋ gêwê aêac samob dêdêŋ Tama taja.   
\p
\v 19 Amboac tonaŋ amac atôm lau jaba to lau ŋamagêŋa kêtiam atom. Amac atu Anôtônê launêŋ ŋagêdô to atu Anôtônê gôlôac awiŋ.  
\v 20 Eŋ kêkwê amac sa atu andu akô nombaŋ aposolo to propete ŋaô. Ma Kilisi Jesu tau kêtu andu tau ŋaalê kêclêsuŋa.  
\v 21 Ŋac tonaŋ gedeŋ andu tau tôŋ ma êŋgôm êtu kapôêŋ e êtu Apômtaunê lôm dabuŋ,  
\v 22 ma kêsuŋ amac sa awiŋ atu Anôtônê andu. taŋ nê Ŋalau gêjam auc naŋ.   
\c 3  
\s1 Paulu gêjam kôm kêpi lau samuc  
\p
\v 1 Kêtu tonaŋŋa aê, Paulu, tec katu Kilisi Jesu nê ŋac kapoacwalôŋa kêtu amac lau samucŋa nec, kateŋ mec gêdêŋ Anôtô.  
\v 2 Amac aŋôgac gebe ŋac moasiŋ Anôtô kêkêŋ sakiŋ gêdêŋ aê kêtu êmoasiŋ amacŋa.  
\v 3 Anôtô geoc nê biŋ, taŋ gêc lêlômgeŋ naŋ, lasê gêdêŋ aê kêtôm biŋ, taŋ kato dambêgeŋ gêc ŋamataŋa naŋ.  
\v 4 Amac embe asam biŋ tau, oc ajala ŋoc kauc kêsa kêpi Kilisinê biŋ, taŋ gêc lêlômgeŋ naŋ.  
\v 5 Gêdêŋ têm gêmuŋŋa ŋamalac sêjala biŋ, taŋ gêc lêlômgeŋ naŋ atom. Mago galoc Anôtô kêkêŋ nê Ŋalau geoc biŋ tau lasê gêdêŋ nê aposolo dabuŋ to propete.  
\v 6 Biŋ taŋ gêc lêlômgeŋ naŋ, tau tonec gebe Lau samuc sêŋô ŋawae ŋajam, tec gêgôm êsêac sêwê kaiŋ Anôtônê gêŋlênsêm to têtu Kilisinê ôli ŋagêŋlêlôm ma têtap biŋ, taŋ Anôtô gêjac mata kêtu Kilisi Jesuŋa naŋ, ŋaŋanô sa sêwiŋ.   
\p
\v 7 Anôtô taê walô aê, tec kêkêŋ aê katu ŋawae ŋajam tonaŋ ŋasakiŋwaga. Ŋaclai ŋatau eŋ, tec kêkêŋ kôm tonaŋ gêdêŋ aê.  
\v 8 Anôtônê lau samob nêŋ ŋac ŋasec aê, mago ŋac moasiŋ ketoc aê sa gebe jasôm ŋawae ŋajam lasê êpi ŋac tolêlôm Kilisinê awa teŋgeŋŋa êndêŋ lau samuc  
\v 9 to jawa Anôtônê lêŋ êŋgôm nê biŋ ŋalêlômŋa ŋanô êsaŋa sa êndêŋ lau samob. Gêdêŋ andaŋgeŋanô Anôtô, taŋ kêkêŋ gêŋ samob naŋ, kêsiŋ biŋ tonaŋ gêc lêlômgeŋ,  
\v 10 gebe galoc gôlôac dabuŋ sêwa Anôtônê kauc mêtêŋa tolêlôm-tolêlôm sa êndêŋ apômtaui to ŋaclai undambêŋa.  
\v 11 Anôtô kêsa lêŋ tonaŋ, tec gêgôm biŋ, taŋ taê gêjam kêtu tôŋ gêdêŋ andaŋgeŋanô naŋ, ŋanô kêsa kêpi aêacnêŋ Apômtau Kilisi Jesu tau.  
\v 12 Aêac tasêp eŋ tôŋ to takêŋ êwiŋ eŋ, ma tatêc tauŋ atom, ôliŋ andaŋ Anôtô to tasa eŋ ŋagala totêntac êpa sugeŋ.  
\v 13 Amboac tonaŋ aê kateŋ gebe ŋoc gêŋwapac, taŋ gaôc kêtu amacŋa naŋ, êlêc amac sa atom. Ŋoc gêŋwapac tau êŋgôm amac waem êsa.   
\s1 Kilisinê têtac gêwiŋ aêacŋa  
\p
\v 14 Kêtu tonaŋŋa aê kêpôŋ ocduc gêdêŋ aêacnêŋ Apômtau Jesu Kilisi Tama,  
\v 15 taŋ nê ŋaê kêpi gôlôac undambê to nomŋa samob kêtômgeŋ naŋ.  
\v 16 Aê kateŋ Anôtô gebe êkêŋ ŋaclai êndêŋ amac êtôm ênê ŋawasi kapôêŋ ma êkêŋ nê Ŋalau êpuc nêm ŋalêlôm tôŋ ŋajaŋa êsa.  
\v 17 Amac akêŋ gêwiŋ Kilisi tec êkêŋ nêm ŋalêlôm êtu ênê andu ma têmtac êwiŋ ŋanô ŋawakac enseleŋ naendêŋ amac taŋ.  
\v 18 Go amac to Anôtônê lau samob nêm kauc êsa e ajala gebe Kilisinê têtac gêwiŋ aêacŋa kesewec kêtu tapa to kêtu baliŋ ma kêpi gêja to kêsêp gêja  
\v 19 ma ajala Kilisinê têtac gêwiŋ tonaŋ, taŋ kêlêlêc kauc samob ŋêŋgeŋ su naŋ, gebe Anôtô tau ênam auc samucgeŋ.   
\p
\v 20 Ma ŋac tau tonaŋ, tec oc êŋgôm gêŋ samob, taŋ aêac tateŋ to taêŋ gêjam naŋ, ŋanô êsa êlêlêc ŋêŋgeŋ su êtôm ŋaclai, taŋ gêjam kôm gêmoa nêŋ ŋalêlôm naŋ,  
\v 21 gôlôac dabuŋ to Kilisi Jesu tau sêwaka ênê ŋawasi sa êtôm gôlôac to gôlôac ma têm to têm ŋêŋgeŋ êna. Biŋŋanô.   
\c 4  
\s1 Aêac tatu Kilisinê ôli tageŋ  
\p
\v 1 Amboac tonaŋ aê, tec gaŋgôŋ kapoacwalô kêtu Apômtauŋa nec, jalêŋ biŋ amac gebe asa nêm lêŋ êtôm Anôtônê kalem, taŋ kêtap amac sa naŋ.  
\v 2 Ambu taôm to amoa tonêm ŋalêlôm malôgeŋ, aê biŋ tôŋgeŋ ma asip taôm sa totêmtac êwiŋgeŋ.  
\v 3 Ôlim palê gebe Ŋalau êkêŋ biŋmalô êmbiŋ amac tôŋ atu gêŋ tageŋ.  
\v 4 Ôlim tageŋ to Ŋalau tageŋ êtôm Anôtô kêkalem amac ma akêŋ matem nêm ŋanô kalem ŋa tageŋ.  
\v 5 Apômtau tageŋ ma biŋ takêŋ gêwiŋŋa tageŋ to busaŋgu tageŋ.  
\v 6 Ŋamalac samob Tameŋi Anôtô tageŋ, taŋ kêtu gêŋ samob ŋatau ma gêjam kôm kêpi gêŋ samob naŋ, gêjam gêŋ samob auc.   
\p
\v 7 Aêac samob tonec takôc moasiŋ sa gêdêŋ-gêdêŋgeŋ kêtôm Kilisi tau gêjam dôŋ ma gêjac sam gêdêŋ aêac.  
\v 8 Kêtôm biŋ tec gêc gebe.  
\q1 “Eŋ kêpi lôlôc gêja  
\q1 ma kêkôc lau kapoacwalôŋa sêwiŋ eŋ,  
\q1 ma gêjac sam gêŋ ŋajam ŋaômageŋ gêdêŋ lau.”   
\m
\v 9 Ŋalô tonec gebe “Eŋ kapi lôlôc gêja” naŋ ŋam amboac ondoc. Ŋam tau tonec gebe kêsêp nom ŋalêlôm ŋakêlêndiŋ gêja gêmuŋ.  
\v 10 Ŋac tau, taŋ kêsêp gêja naŋ, ŋac tau tonaŋ kêpi e jakêlêlêc undambê samob su gebe ênam gêŋ samob auc.  
\v 11 Ŋac tau tonaŋgeŋ tec kêkêŋ lau ŋagêdô têtu aposolo ma ŋagêdô têtu propete to ŋagêdô têtu jaeŋwaga ma ŋagêdô têtu lausakiŋ to kêdôŋwaga.  
\v 12 Kilisi kêkêŋ lau amboac tonaŋ gebe ênac dabiŋ Anôtônê lau sênam sakiŋ ŋapep gebe sêmboa eŋ ôli sa  
\v 13 e takêŋ gêwiŋ êmbiŋ aêac samob tôŋ tapi tageŋ to tajala Anôtônê Latu êtu tôŋ ma têtôp tatu lau kapôêŋ e tatôm Kilisi tau nê dôŋ.  
\v 14 Ma tatôm ŋapalê dedec êtiam atom gebe laudansaŋnêŋ mêtê êtêliŋ to êmbam aêac êtôm gwêc to mu kêtêliŋ to gêbam waŋ nec atom. Lau amboac tonaŋ têtim to sêsau ŋamalac.  
\v 15 Aêac amboac teŋ. Aêac tasôm biŋŋanô êndêŋ tauŋ totêntac êwiŋgeŋ ma têtôp tatu kapôêŋ e nêŋ lêŋ samob esewec tatôm Kilisi, taŋ kêtu ŋamôkê naŋ.  
\v 16 Ŋac tau tonec tec gêbiŋ ôli ŋagêŋlêlôm samob tôŋ kêpi tageŋ to kêkêŋ ŋaduc gêdiŋ kêsô tau ma ŋakalôc gedeŋ ôli ŋagêŋlêlôm tôŋ. Ôli ŋagêŋlêlôm gêdêŋ-gêdêŋgeŋ embe ênam kôm, taŋ gêjac gêŋ tau ŋawae naŋ, oc ôli êtôp to êmboa tau sa ma têntac gêwiŋ êmbiŋ ŋanô tau tôŋ.   
\s1 Kilisi kêkêŋ aêac tasa lêŋ wakuc  
\p
\v 17 Amboac tonaŋ aê jasôm ŋoc biŋ tonec êndêŋ amac toaoc gêjac Apômtaugeŋ gebe Asa nêm lêŋ atôm lau samuc, taŋ taêŋ gêjam biŋ ŋaôma-ŋaôma elême naŋ atom.  
\v 18 Ŋakesec gêjam êsêacnêŋ kauc auc. Êsêacnêŋ kauc masi to nêŋ ŋalêlôm ŋadani, tec kêbalaŋ êsêac auc gêdêŋ sêŋgôŋ mateŋ jali, taŋ ŋam kêsêp Anôtôŋa naŋ.  
\v 19 Êsêac sêgôm gêŋ waucwaucgeŋ ma sêgôm gêŋ môp-môp samob gêjam auc, sêgôm kêtu mateŋ katu awaŋa tomajeŋ gêbacgeŋ.   
\p
\v 20 Biŋ amboac tonaŋ têdôŋ gêdêŋ amac kêtu Kilisiŋa atom.  
\v 21 Amac aŋô ŋawae tau to têdôŋ mêtê tau gêdêŋ amacgac kêtôm biŋŋanô, taŋ gêc Jesu tauŋa naŋ.  
\v 22 Amboac tonaŋ awi nêm ŋamalac laŋgwa, nêm ŋalêlôm geo, taŋ kêsa lêŋ gêmuŋŋa naŋ siŋ. Têtac ŋakalac kêsau gêôc ŋamalac laŋgwa e geseŋ tau su gêjaŋa.  
\v 23 Amacnêm ŋalêlôm to biŋ, taŋ taêm gêjam naŋ, êtu wakuc samucgeŋ.  
\v 24 Ma asô ŋamalac wakuc, taŋ Anôtô kêkêŋ kêtôm tau nê katu naŋ sa. Eŋ êwaka tau sa ŋa lêŋ gêdêŋ to dabuŋ biŋŋanôŋa.   
\p
\v 25 Amboac tonaŋ awi biŋdansaŋ siŋ ma asôm biŋŋanô êndêŋ taôm êndêŋêndêŋgeŋ, gebe aêac tatu ôli tageŋ ŋagêŋlêlôm.  
\v 26 Embe têmtac ŋandaŋ, naŋ aŋgôm taôm sec atom ma aê têmtac ŋandaŋ tôŋ e oc naêsêp nec atom.  
\v 27 Aliŋ taôm gebe Sadaŋ êŋgôŋ amac ŋasawa atom.  
\v 28 Ŋac geŋgeŋ ênam geŋgeŋ gêŋ êtiam atom, tau lêma ênam koleŋ acgom, gebe êkôc nê koleŋ ŋanô ma ênac sam endeŋ lau, taŋ sêpô lêna tauŋŋa naŋgeŋ.  
\v 29 Biŋ agwa-agwa êsa awemsuŋ atom, asôm biŋ ŋajamgeŋ, taŋ êpuc lau-sêpô-lênawaga tôŋ to êmoasiŋ lau, taŋ sêŋô biŋ tau naŋ.  
\v 30 Ma aŋgôm Anôtônê Ŋalau Dabuŋ nê ŋalêlôm ŋawapac êsa atom, gebe eŋ kêtu ŋabelo Anôtô ênam amac kêsi endeŋ nê becŋa.  
\v 31 Biŋkalom samob to biŋ keso-keso ma têmtac ŋandaŋ to ali awem sa ma biŋ alôb-alôb to biŋ sesec tonaŋ ŋai samob naŋ, awi siŋ.  
\v 32 Amoasiŋ taôm to taêm walô taôm ma asuc nêm biŋ ôkwi êndêŋ-êndêŋgeŋ, aŋgôm êtôm Anôtô kêsuc amacnêm biŋ ôkwi kêtu Kilisiŋa.   
\c 5  
\p
\v 1 Amac atu Anôtônê ŋapalê, taŋ eŋ têtac gêwiŋ naŋ, tec atêku eŋgeŋ.  
\v 2 Ma asêlêŋ totêmtac êwiŋgeŋ amboac Kilisi gêwiŋ aêac to kêkêŋ tau kêtu aêacŋa kêtu moasiŋ to da gêdêŋ Anôtô gêŋu ŋamalu ŋajam.   
\p
\v 3 Asôm gêŋ mockaiŋo to mockaiŋŋa ma geŋ môp-môp samob to biŋ matem katu awaŋa êsêp nêm biŋgalôm atom, gebe Anôtônê lau samob dedec biŋ amboac tonaŋ ŋai.  
\v 4 Andec biŋ sesec ma biŋ meloc-meloc to biŋ agwa-agwa kêtôm amac asôm atomŋa amboac tonaŋgeŋ, anam daŋgegeŋ êjô.  
\v 5 Biŋ tonec amac ajalagac gebe Mockaiŋo to mockaiŋ teŋ me môp ŋatau teŋ me ŋac mata katuboa teŋ, taŋ talic eŋ kêtôm ŋac gêjam sakiŋ anôtô jabaŋa teŋ naŋ, nêŋ teŋ oc êwê kaiŋ gêŋlênsêm aŋga Kilisi agêc Anôtô nêŋ gamêŋ atom.   
\s1 Tasêlêŋ tamoa ŋawê ŋalêlôm  
\p
\v 6 Lau teŋ têtim amac ŋa biŋ ŋaômaŋaôma atom, gebe kêtu biŋ amboac tonaŋŋa Anôtônê têtac ŋandaŋ kêtap taŋeŋpêcwaga sa.  
\v 7 Awê kaiŋ êsêacnêŋ biŋ atom.  
\v 8 Biŋŋanô, gêmuŋgeŋ amac amoa tokesec, mago galoc amoa toŋawê gebe atu Anôtônê gêŋgac, tec asa nêm lêŋ atôm ŋapalê ŋawêŋa,  
\v 9 gebe ŋawê ŋanô tonec moasiŋ totau-totau ma biŋgêdêŋ to biŋŋanô.  
\v 10 Ansaê gêŋ, taŋ Apômtau gêlic ŋajam naŋ.  
\v 11 Ŋakesec ŋakoleŋ, taŋ ŋanô masi naŋ, anam awiŋ atom, akip sa ênêc awêgeŋ acgom,  
\v 12 gebe gêŋ, taŋ êsêac sêgôm kelecgeŋ naŋ, embe tasôm ênêc awêgeŋ, oc majeŋ.  
\v 13 Gêŋ samob, taŋ takip sa e ŋawê êpô naŋ, oc ênêc awê.  
\v 14 Ma gêŋ samob, taŋ gêc awê naŋ ŋawê. Tec biŋ gêc gebe  
\q1 “Aôm taŋ gôêc bêc naŋ, matam êlac  
\q1 ma ôndi sa aŋga ŋacmatênêŋ,  
\q1 go Kilisi êpô aôm.”   
\p
\v 15 Amboac tonaŋ ajop taôm êtu nêm lêŋ samobŋa ŋapep. Asêlêŋ atôm lau meloc atom, asêlêŋ atôm lau tokauc mêtêŋageŋ.  
\v 16 Ajaiŋ têm ênaŋa ŋaômageŋ atom, gebe têm tonec sec.  
\v 17 Amboac tonaŋ atu meloc atom, mago nêm kauc êsa biŋ, taŋ Apômtau taê gêjam gebe êŋgômŋa naŋ.   
\p
\v 18 Anôm wain e êjaŋiŋ amac atom, gebe gêŋ tonaŋ oc êjaiŋ amac. Ŋalau Dabuŋ ênam amac auc acgom  
\v 19 e pesalem to wê dabuŋ ma wê ŋajam-ŋajam êtu nêm biŋgalôm. Apuc wê dabuŋ sa to aôc Apômtau sa ŋa pesalem aŋga nêm ŋalêlôm.  
\v 20 Anam daŋge êndêŋ Tameŋi Anôtô endeŋ tôŋgeŋ êtu gêŋ samobŋa anam aêacnêŋ Apômtau Jesu Kilisi laŋô.   
\s1 Biŋ lauo to ŋacŋa  
\p
\v 21 Asô taôm ŋalabu êtu atêc Kilisiŋa.   
\p
\v 22 Lauo sêsô nêŋ ŋaci ŋalabu êtôm sêsô Apômtau ŋalabu,  
\v 23 gebe ŋac kêtu awênê môkêapac kêtôm Kilisi kêtu gôlôac dabuŋ môkêapac, ma kêtu gôlôac dabuŋ, taŋ kêtu eŋ ôli naŋ nê kêsiwaga.  
\v 24 Tec lauo sêsô nêŋ ŋaci ŋalabu êtu gêŋ samobŋa, têtôm taŋ gôlôac dabuŋ sêsô Kilisi ŋalabu naŋ.   
\p
\v 25 Amac ŋacwaga têmtac êwiŋ nêm lauo atôm Kilisi têtac gêwiŋ gôlôac dabuŋ ma kêkêŋ tau kêtu êsêacŋa.  
\v 26 Eŋ kêkêŋ nê mêtê ma kêsagu êsêac ŋa bu têtu selecŋa e têtu Anôtônê gêŋ,  
\v 27 gebe ênac dabiŋ gôlôac dabuŋ e ŋawasi laŋgwageŋ ma ênac eŋ mataanô ŋajam. Eŋ gebe êlic gôlôac dabuŋ ŋatêmui to mêliŋ-mêliŋ ma gêŋ ŋagêdô amboac tonaŋ ŋai êpi eŋ atom, gebe êlic eŋ êtu dabuŋ to laŋônêm sawageŋ.  
\v 28 Amboac tonaŋ êsêac ŋacwaga têntac êwiŋ nêŋ lauo êtôm têntac gêwiŋ tauŋ ôliŋ. Ŋac taŋ têtac gêwiŋ nê awê naŋ, têtac gêwiŋ tau.  
\v 29 Ŋac teŋ kêkêŋ kisa gêdêŋ tau ôli atomanô. Eŋ gêlôm to kêtu mêtê tau ôli ŋapep, kêtôm Kilisi gêgôm gêdêŋ gôlôac dabuŋ,  
\v 30 gebe aêac tatu ênê ôli ŋagêŋlêlôm.  
\v 31 “Kêtu biŋ tonaŋŋa ŋamalac êwi têna agêc tama siŋ ma êsap nê awê tôŋ, ma êsêagêc têtu ôli tageŋ.”  
\v 32 Biŋ tonec ŋam kêsêp lêlômsêga ma aê gawa sa kêkanôŋ Kilisi to gôlôac dabuŋ.  
\v 33 Mago kêkanôŋ amac gêwiŋ. Ŋacwaga samob têntac êwiŋ nêŋ lauo amboac têntac gêwiŋ tauŋ, ma lauo samob tetoc nêŋ ŋaci sa.   
\c 6  
\s1 Biŋ kêpi ŋapalê to teneŋi ma tameŋi  
\p
\v 1 Ŋapalêac, taŋem wamu êndêŋ tenemi to tamemi êtu Apômtauŋa, gebe biŋ tonec jagêdêŋ.  
\v 2 “Otoc tamam agêc tênam sa.” Anôtô kêkêŋ biŋsu tonaŋ ma gêjac mata biŋ teŋ gêwiŋ kêtu ŋamata gebe  
\v 3 “Ôŋgôm gebe ômoa ŋajam to ômoa matam jali ec ŋêŋgeŋ aŋga nom.”   
\p
\v 4 Tameŋiac, atu kasec nêm ŋapalê e aŋgôm êsêac têntac ŋandaŋ êsa atom. Anam jaom êsêac ma amêtôc to alêŋ biŋ êsêac ŋa Apômtaunê biŋgeŋ.   
\s1 Biŋ kêpi sakiŋwaga to nêŋ ŋataui  
\p
\v 5 Amac sakiŋwaga, taŋem wamu êndêŋ nêm ŋataui nomŋa. Atêc êsêac to anam go taôm tonêm ŋalêlôm ŋaŋêŋ êtôm ajam sakiŋ Kilisi.  
\v 6 Anac ŋamalac mateŋanô auc ŋa taŋem wamu êtu sêlic amac ŋajamŋa nec atom, aŋgôm atôm Kilisinê sakiŋwaga ma amansaŋ Anôtônê biŋ êtu tôŋ tonêm ŋalêlôm samucgeŋ.  
\v 7 Anam sakiŋ topalêgeŋ ma aŋgôm êtôm ajam sakiŋ ŋamalac atom, aŋgôm êtôm ajam sakiŋ Apômtau.  
\v 8 Taêm ênam, lau samob, sakiŋwaga to êsêac, taŋ sêmoa nêŋ lêtêgeŋ naŋ, embe sênam koleŋ ŋajam, oc Apômtau êkêŋ ŋagêjô ŋajam êndêŋ êsêac êtôm taugeŋ.   
\p
\v 9 Ma amac ŋataui, amoasiŋ nêm sakiŋwaga amboac tonaŋgeŋ. Awi biŋ saic-saic siŋ. Taêm ênam gebe êsêac to amac nêm Ŋatau gêŋgôŋ undambê. Eŋ kêpuc lau ŋam atom, gêlic samob kêtôm taugeŋ.   
\s1 Anôtônê laukasap  
\p
\v 10 Ŋoc biŋ ŋagêdô tec gêc gebe Apômtau êpuc amac tôŋ ma nê ŋaclai ênam amac auc akô ŋajaŋa.  
\v 11 Akôc Anôtônê laukasap sa tomalageŋ e akô ŋajaŋa ma aku Sadaŋnê Iêŋdansaŋ samob tulu,  
\v 12 gebe aêac tajac siŋ gêdêŋ ŋamalac nomŋa atom, tajac siŋ gêdêŋ apômtaui to ŋaclai ma nom ŋakesec tonec ŋatau to ŋalau sec, taŋ sêmoa undambê naŋ.  
\v 13 Tec akôc Anôtônê laukasap sa tomalageŋmaŋ, go atôm gebe akô ŋajaŋa êndêŋ bêc sec tau e aku ŋacjo samob tulu akôgeŋ.   
\p
\v 14 Amboac tonaŋ akôgeŋ. Ajandiŋ biŋŋanô ênêc dambêmpalê to anôŋ biŋgêdêŋ êtu nêm maluku.  
\v 15 Asô biŋmalô ŋaŋawae ŋajam êtu atapa ma anam anac ŋawaegeŋ.  
\v 16 Akêŋ gêwiŋ êtu nêm lautuc. Aja sa endeŋ tôŋgeŋ, gebe asi ŋac sec nê sôb toja samob êndu.  
\v 17 Akuc moasiŋ Anôtô gêjam amac kêsiŋa êtu nêm kululuŋ siŋŋa to aôc Anôtônê mêtê êtu siŋ, taŋ Ŋalau kêkêŋ naŋ.   
\p
\v 18 Gêŋ samob tonaŋ aŋgôm tomecgeŋ ma ateŋ Anôtô gebe ênam amac sa. Ateŋ mec êtôm têm samob êtôm Ŋalau êwê amacŋa. Kêtu tonaŋŋa anam jali to aŋgôm atu dôbgeŋ ma ateŋ êtu Anôtônê lau samobŋa.  
\v 19 Ma ateŋ êtu aêŋa êwiŋ gebe Anôtô êkêŋ mêtê êndêŋ aê êndêŋ noc jasôm biŋŋa e jawa ŋawae ŋajam ŋabiŋ kêsêp lêlômŋa sa totêtac êpa sugeŋ.  
\v 20 Kêtu ŋawae ŋajam tonaŋŋa aê katu ŋacjaeŋ gaŋgôŋ kapoacwalô. Tec ateŋ gebe jasôm biŋ, taŋ gêjac aê ŋawae naŋ, lasê totêtac êpa sugeŋ.   
\s1 Paulu gêjac mata nê biŋ  
\p
\v 21 Lasiŋi ŋajam Tukiki, taŋ gêjam sakiŋ Apômtau ŋaŋêŋgeŋ naŋ, ênac aê gamoa to gagôm ŋoc gêŋ samob ŋamiŋ êndêŋ amac gebe ajala.  
\v 22 Aê jasakiŋ ŋac tau êndêŋ amac êwac gebe ênac miŋ aêacma biŋ samob êndêŋ amac ma ênam malô amacnêm ŋalêlôm.   
\p
\v 23 Tameŋi Anôtô agêc Apômtau Jesu Kilisi nêŋ biŋmalô ma têntac gêwiŋ to takêŋ gêwiŋ ŋanô tau êndêŋ lasitêwai êwac.  
\v 24 Moasiŋ êndêŋ êsêac samob, taŋ têntac gêwiŋ aêacnêŋ Apômtau Jesu Kilisi teŋgeŋ ma teŋgeŋ.