\id 2PE -Jabem partial Bible [jae] -Papua New Guinea 1980 (web 2015) 
\h PETERE 2 
\toc1 PETERENÊ papia kêtu luagêcna 
\toc2 Petere 2 
\toc3 2Pe 
\mt1 PETERENÊ papia kêtu luagêcna  
\ip Peterenê papia kêtu luagêcŋa nec gêjac lau buŋa ŋamataŋa ŋagêdô tapaôŋgeŋ ŋawae. Lau-mêtê-geowaga jasêsêli-sêsêli gôlôac Asia Sauŋŋa, tec Petere keto papia tonec gebe êmbôc êsêac auc, ec nêŋ mêtê ôliŋ ŋakalacŋa êlaiŋ tau amboac secgeŋ. Lau buŋa sênac jao tauŋ êndêŋ lêtôm amboac tonaŋ ŋalêŋ tonec gebe sênac dabiŋ nêŋ kauc e sêjala Anôtô agêc Apômtau Jesu Kilisi êpi ŋanôgeŋ, tec Petere gebe êsêac sêkêŋ taŋeŋ êndêŋ lau, taŋ tauŋ mateŋanô sêlic Jesu ma tauŋ taŋeŋsuŋ sêŋô eŋ kêsôm biŋ to kêdôŋ êsêac naŋ, sênac ŋawaegeŋ. Petere geseŋ lau, taŋ sêsôm sebe Kilisi êmu êmêŋ êtiam atom naŋ, ŋajaŋageŋ. Kilisi gêmu gêmêŋ su atom tageŋ nec ŋam kêsêp Anôtô gê biŋ tôŋgeŋ “gebe lau teŋ sênaŋa atom, gebe samob sêkac tauŋ su aŋga nêŋ sec acgommaŋ.”  
\iot Ŋadênaŋ  
\ili1 1. Petere gêjac m papia tau 1:1-2  
\ili1 2. Anôtônê kalem gêdêŋ lau buŋa 1:3-21  
\ili1 3. Mêtê-geowaga têdôŋ mêtê dansaŋ 2:1-22  
\ili1 4. Kilisi êmu êmêŋ êtu ŋamuŋa 3:1-18  
\c 1  
\s1 Petere awa gêjac lau  
\p
\v 1 Jesu Kilisi nê sakiŋwaga to aposolo aê, Simon Petere, ŋoc biŋ êndêŋ amac, taŋ aêacnêŋ Anôtô agêc kêsiwaga Jesu Kilisi nêŋ biŋgêdêŋ kêkêŋ amac akêŋ gêwiŋ ŋanô atôm aêac.  
\v 2 Ajala Anôtô agêc aêacnêŋ Apômtau Jesu êtu tôŋ e moasiŋ to biŋmalô ênam sêga aŋga amacŋa.   
\s1 Anôtô kêkalem aêac to kêjaliŋ aêac sa  
\p
\v 3 Anôtônê ŋaclai kêkêŋ gêŋ samob, taŋ kêpuc aêac tôŋ tamoa mateŋ jali to tasa Anôtônê lêŋ naŋ, gêdêŋ aêacgac. Kêkêŋ gêŋ tau kêtu tajala ŋac, taŋ kêkalem aêac tawê kaiŋ ênê ŋawasi to lêŋ ŋaŋêŋ naŋŋa.  
\v 4 Eŋ gêgôm amboac tonaŋ, tec gêjac mata gêŋ ŋanô mataêjam to kapôêŋ-kapôêŋ gêdêŋ aêac. Eŋ gêjac mata gêŋ tonaŋ gebe amac awê kaiŋ ŋanô aŋga Anôtô tau nê ma awê nom tonec ŋaŋaclai sa. Ŋaclai enseŋ amac suŋa tonaŋ ŋam kêsêp ŋamalacnêŋ têntac ŋakalacŋa.  
\v 5 Amboac tonaŋ ôlim palêgeŋ gebe nêm akêŋ gêwiŋ ênam ŋanô lêŋ ŋaŋêŋ. Lêŋ ŋaŋêŋ êkêŋ kauc ajala gêŋŋa.  
\v 6 Kauc ajala gêŋŋa êkêŋ amac atu mêtê taôm ŋapep. Atu mêtê taôm ŋapep êkêŋ amac aôc gêŋwapac totêmtac êpa sugeŋ. Aôc gêŋwapac totêmtac kêpa sugeŋ êkêŋ amac asa Anôtônê lêŋ.  
\v 7 Asa Anôtônê lêŋ êkêŋ amac têmtac êwiŋ lasitêwai. Têmtac gêwiŋ lasitêwai êkêŋ amac têmtac êwiŋ ŋanô tau.  
\v 8 Gêŋ ŋanô tau tonaŋ embe ênêc amacŋa e ênam amac auc, go êkêli amac, ec ôlim palê êsa to anam ŋanô ajala aêacnêŋ Apômtau Jesu Kilisi.  
\v 9 Ma ŋac, naŋ êtap gêŋ tau tonaŋ sa atom, eŋ mataanô kêtu wao, tec gelic gêŋ gêja baliŋ atom ma kêliŋ Anôtô kêkwasiŋ ênê sec laŋgwa su gêjaŋa naŋ siŋ.   
\p
\v 10 O lasitêwaac, Anôtô kêkalem amac to kêjaliŋ amac sa, tec ôlim palêgeŋ gebe awaka Anôtônê moasiŋ tau sa. Embe aŋgôm amboac tonaŋ, go ambeŋ anaŋa atomanô,  
\v 11 ma Anôtô êkêŋ amac asô aêacnêŋ Apômtau to kêsiwaga Jesu Kilisi nê gamêŋ teŋgeŋŋa ana.   
\p
\v 12 Amac ajala biŋŋanô, ma biŋŋanô tau gêjam amac auc akô ŋajaŋa, mago gabe jaôŋ biŋ tau sa aŋga amacnêm ŋalêlôm gebe taêm ênam ŋapaŋ.  
\v 13 Jaôŋ biŋ tau sa aŋga amacnêm nec gêjac aê ŋawae êtôm ŋoc têm jamoa bec tonec ŋalêlômŋa.  
\v 14 Aê kajalagac gebe sauŋgeŋ, go sêmbuc ŋoc bec tonec sa êtôm aêacnêŋ Apômtau Jesu Kilisi tau geoc lasê gêdêŋ aê.  
\v 15 Amboac tonaŋ tec jawaka ŋalêŋ teŋ sa e êndêŋ têm jawi nom tonec siŋ su naŋ, biŋ tonaŋ ŋai êôŋ sa aŋga nêm ŋalêlôm ŋapaŋ.   
\s1 Kilisinê ŋawasi, taŋ propete seoc lasê naŋ  
\p
\v 16 Gêdêŋ taŋ asôm aêacnêŋ Apômtau Jesu Kilisi nê ŋaclai to êmu êmêŋ ŋawae lasê gêdêŋ amac naŋ, aêac ajac sêboaco, taŋ ŋamalac sêga tokaucgeŋ naŋ atom. Aêac tauŋ mateŋanô alic ênê ŋawasi towae, tec asôm lasê.  
\v 17 Aêac alic gebe eŋ Tama Anôtô kêkêŋ wae to ŋawasi gêdêŋ eŋ ma ŋawasi ŋatau awa amboac tonec gêdêŋ eŋ gebe “Aêŋoc Latuc, taŋ têtac gêwiŋ eŋ ma galic eŋ ŋajam naŋ tonec.”  
\v 18 Awa tecenaŋ aêac aŋô kêsap aŋga undambê gêmêŋ gêdêŋ taŋ amoa lôc dabuŋ awiŋ eŋ naŋ.   
\p
\v 19 Amboac tonaŋ aêac akêŋ gêwiŋ propetenêŋ biŋ kêlêlêc. Ma amac embe akôc biŋ tau sa, oc ŋajam amboac tonaŋ, gebe biŋ tau kêtôm daweŋ kêpô gamêŋ ŋakesec e êu bôŋ acgom, go utitêna mêŋêpi aŋga nêm ŋalêlôm.  
\v 20 Ajala biŋ tonec êtu ŋamata acgom, gebe ŋac teŋ kêtôm gebe êwa propetenêŋ biŋ, taŋ teto gêc naŋ, sa ŋa tau nê kauc atom,  
\v 21 gebe ŋamalac teŋ nê ŋalêlôm kêkac eŋ tec geoc biŋ teŋ lasê nec atom. Ŋalau Dabuŋ gêôc ŋamalac, go sêsôm biŋ lasê kêtôm Anôtô gêsuŋ.   
\c 2  
\s1 Propete dansaŋ  
\p
\v 1 Gêmuŋgeŋ propete dansaŋ dêdi aŋga lau Israel ŋalêlôm. Ma kêdôŋwaga dansaŋ oc mêŋsêsa aŋga amac ŋalêlôm amboac tonaŋ. Êsêac oc sêndôŋ mêtê geo, taŋ enseŋ ŋamalac su naŋ, ma sênsa Ŋatau, taŋ gêjam ôli êsêac su naŋ auc. Êsêac sêkic tauŋ nêŋ biŋ ma sênaŋa sebeŋ.  
\v 2 Ma lau taêsam sêsap êsêacnêŋ lêŋ kêli ôliŋ ŋakalacŋa tôŋ, ma kêtu tonaŋŋa lau sêsôm biŋ alôb-alôb êpi biŋŋanô ŋalêŋ.  
\v 3 Êsêac mateŋ katu gêŋ ŋawaô, tec têtulu amacnêm awa ŋa nêŋ biŋdansaŋ. Êsêacnêŋ mêtôcwaga mata gêdiŋ êsêac ŋapep wanêcgeŋ ma nêŋ ŋac enseŋ êsêac suŋa gêjac tuluc atom.   
\p
\v 4 Anôtô taê labu aŋela, taŋ sêgôm sec naŋ atom. Eŋ kêtiŋ êsêac sêsêp lamboam ŋagêsuŋbôm ŋakesec sêja ma gêsô êsêac tôŋ sêmoa e êndêŋ bêc mêtôcŋa.  
\v 5 Eŋ taê labu nom laŋgwa atom, kêkêŋ bu kêsuŋ ŋatêna geseŋ nom ŋalau, taŋ sêwi Anôtô siŋ naŋ su. Noa taŋ kêsôm biŋgêdêŋ lasê to nê lau 7 tauŋgeŋ tec Anôtô gêjam jaom êsêac.  
\v 6 Ma Anôtô kêmêtôc malac Sodom to Gomora gebe sênaŋa, tec kêkêŋ ja geŋ êsêac su sêjaŋa. Eŋ kêkêŋ dôŋ tonaŋ gebe êkêŋ puc lau, taŋ oc sêwi Anôtô siŋ êtu ŋamu naŋ.  
\v 7 Eŋ gêjam ŋac gêdêŋ Lot kêsi. Lot tau gêmoa tonê ŋalêlôm ŋawapacgeŋ kêtu lau alôb-alôb tonaŋ nêŋ lêŋ mockaiŋŋa.  
\v 8 Ŋac gêdêŋ tonaŋ gêŋgôŋ êsêac ŋalêlôm ma gêlic to gêŋô nêŋ biŋ geo kêtôm bêc to bêc ma gejoŋ ênê ŋalêlôm gêdêŋ e gêmoa jageo.  
\v 9 Apômtau kêjala ênam lau-sêkêŋ-gêwiŋwaga kêsi aŋga lêtôm ŋalêŋ ma kêjala êkôniŋ lau sec tôŋ e têtap ŋagêjô sa êndêŋ bêc mêtôcŋa ŋalêŋ amboac tonaŋgeŋ.  
\v 10 Ŋagêjô tonaŋ êtap êsêac, taŋ têntac ŋakalac kêkac êsêac e sêsa lêŋ môpŋa ma sêli biŋ sa kêpi Apômtaunê gôliŋ naŋ, sa êlêlêc su.  
\p Êsêac lau ŋaclai sec to tetoc tauŋ sa ma têtêc lau ŋawasi ôŋa atom, sêsôm biŋ alôb-alôb kêpi êsêac gêwiŋ.  
\v 11 Aŋela tonaŋ nêŋ ŋajaŋa to ŋaclai kêlêlêc lau tonaŋ nêŋ su, mago aŋela sêpuc boa êsêac to sêkêŋ êsêac têtap Apômtaunê mêtôc sa atom.  
\v 12 Lau tonaŋ nêŋ kauc masi têtôm bôc, taŋ têna kêsu gebe ŋamalac sêlô êsêac tôŋ to sêŋguŋ êsêac êndu. Lau tonaŋ sêsôm biŋ alôb-alôb kêpi gêŋ, taŋ sêjam kauc naŋ. Êsêac oc sênaŋa têtôm bôc tau.  
\v 13 Êsêac têtap ŋandaŋ sa êjô nêŋ geo, taŋ sêgôm gêdêŋ lau naŋ. Êsêac sêjam kauc gebe sêniŋ lasam to sênôm anaboa êndêŋ ocsalô êtu têntac ŋajam ŋam. Êsêac gêŋ ŋatêmui to gêŋ sec. Embe sêniŋ gêŋ sêŋgôŋ sêwiŋ amac, go sêŋgôm nêŋ sec sênac ŋawaegeŋ.  
\v 14 Êsêac mateŋ daŋgucboa ma sêgôm sec gedeŋ tôŋgeŋ. Êsêac sêwa lip lau palê-palê ma têdôŋ nêŋ ŋalêlôm e sêjala lêŋ mateŋ katu gêŋŋa kêtu tôŋ. Anôtô kêpuc boa êsêac sugac.  
\v 15 Êsêac sêwi lêŋ ŋaŋêŋ siŋ ma sêô sic sêsa Bosoro latu Balam, taŋ têtac gêwiŋ nê geo ŋaôli naŋ, nê lêŋ.  
\v 16 Balêm kêsa lêŋ tonaŋ e Anôtô kêmêtôc eŋ kêtu nê kesoŋa. Bôc wabaŋa awamê kêsôm biŋ lasê gêjam ŋamalac awa e kêkô propetenê lêŋ meloc auc.   
\p
\v 17 Lau tonaŋ ŋai têtôm bumata, taŋ kêpa naŋ, me têtôm tao, taŋ mu gêbuc ma kêdaba su naŋ. Anôtô kêmasaŋ gêsuŋbôm ŋakesec kêtu êsêacŋa.  
\v 18 Êsêac sêsôm biŋ lanem-lanem to biŋ agwa-agwa ma sêwa nêŋ lêŋ kêli ôliŋ ŋakalacŋa kêtu lip, gebe ênac lau, taŋ sêkac tauŋ su ŋasawa dambêgeŋ aŋga lau, taŋ sêsa lêŋ keso naŋ.  
\v 19 Lau-sêwalipwaga sêjac mata lêŋ sêŋgamboac ŋamalac su sêmoa nêŋ Iêtêgeŋŋa, mago êsêac tauŋ têtu ŋaclai enseŋ ŋamalac suŋa ŋasakiŋwaga, gebe gêŋ, taŋ kêku ŋamalac tulu naŋ, ŋamalac têtu gêŋ tau ŋasakiŋwaga.  
\v 20 Lau teŋ embe sêkac tauŋ su aŋga nom ŋagêŋ môpŋa êtu sêjala aêacnêŋ Apômtau to kêsiwaga Jesu Kilisiŋa, mago gêŋ tau embe êlênsôŋ êsêac êtiam e êku êsêac tulu, oc têtu sec êIêtêc gêmuŋŋa su.  
\v 21 Ijoc êsêacmêŋ, sêjala biŋgêdêŋ ŋalêŋ atommaŋ. Amboac ondoc sêjala su, mago sêjam dêmôêŋ biŋsu dabuŋ, taŋ sêkêŋ gêdêŋ êsêac naŋ kêtiam.  
\v 22 Biŋgôliŋ tonec ŋanô kêsa kêpi êsêac gebe  
\q1 “Kêam seŋ gêŋ, taŋ sêluc siŋ naŋ kêtiam.”  
\m Ma teŋ gebe  
\q1 “Bôcanô taŋ gêliŋ bu su naŋ, jagêjac wandob kêtiam.”   
\c 3  
\s1 Apômtau êmu êmêŋ biŋŋanôgeŋ  
\p
\v 1 O lauace, papia tonec kêtu papia kêtu luagêcŋa, taŋ kato gêdêŋ amac naŋ. Aê kato papia luagêc tau gebe jaôŋ biŋ ŋawa samob sa aŋga nêm ŋalêlôm gebe taêm ênam.  
\v 2 Aê gabe jaôŋ biŋ, taŋ propete dabuŋ sêsôm wanêcgeŋ su to Apômtau to kêsiwaga nê biŋsu, taŋ amacnêm aposolo sêsôm naŋ, sa aŋga nêm ŋalêlôm gebe taêm ênam êtiam.  
\v 3 Ajala biŋ tonec êtu ŋamata acgom, gebe êndêŋ têm naŋ mêŋêsa lau ŋagêdô, taŋ sêsa nêŋ lêŋ êtôm ôliŋ ŋakalac kêkac êsêac naŋ, oc mêŋsêô lasê ma sêsu amac susu  
\v 4 ma sêsêm gebe “Eŋ gêjac mata gebe êmu êmêŋ me. Ma galoc gêmoa ondoc. Aêac abeŋi sêmac sêja-sêja ma gêŋ samob gêc amboac gêc gêdêŋ taŋ Anôtô kêkêŋ undambê to nom naŋ, e mêŋgêdêŋ galoc.”  
\v 5 Êsêac taŋ gebe amboac tonaŋ naŋ, sêliŋ biŋ tonec siŋ gebe andaogeŋanô Anôtô kêsôm biŋ tec kêkêŋ undambê to nom. Nom tau kêsa aŋga bu ma bu gêjam nom sa.  
\v 6 Ma bu tau tonaŋ tec kêsuŋ ŋatêna e geseŋ nom laŋgwa su gêjaŋa.  
\v 7 Mago Anôtô nê biŋ gêjam jaom undambê to nom galocŋa gêmoa e ja enseŋ su. Undambê to nom oc sênaŋa atom, sênêc e êndêŋ bêc Anôtô êmêtôc ŋamalac to enseŋ lau sec suŋa.   
\p
\v 8 O lauace, aliŋ biŋ tageŋ tonec siŋ atom gebe Apômtau gêlic bêc tageŋ kêtôm jala 1,000 ma jala 1,000 kêtôm bêc tageŋ.  
\v 9 Apômtau gêgôm nê biŋ, taŋ gêjac mata naŋ, ŋanô kêsa kêliŋ tau siŋ-siŋ amboac lau ŋagêdô taêŋ gêjam naŋ atom. Eŋ kêliŋ tau siŋ-siŋ atom, gê amacnêm biŋ tôŋ gebe eŋ gedec gebe lau teŋ sênaŋa atom. Eŋ gebe lau samob sênam tauŋ ôkwi.   
\p
\v 10 Apômtaunê bêc oc êmêŋ êtôm geŋgeŋtêna ma undambê oc ênaŋa toŋakicsêa kaiŋ teŋ. Ma ja êniŋ gêŋ umboŋŋa e êsêlô ma nom to gêŋ nom-ŋa samob maleŋmê.  
\v 11 Gêŋ samob tonaŋ oc êsêlô amboac tonaŋ, tec amac oc amoa amboac ondoc. Asa nêm lêŋ atôm Anôtônê lau to anam sakiŋ eŋgeŋ.  
\v 12 Asa lêŋ amboac tonaŋ ma aôŋ Anôtônê bêc ma aŋgôm gêŋlêlôm gebe êô lasê sebeŋmaŋ. Endêŋ tônê ja êniŋ undambê e êsêlô ma ja êpac gêŋ undambêŋa e êwê ênaŋa.  
\v 13 Mago Anôtô gêjac mata biŋ kêpi undambê wakuc to nom wakuc, taŋ biŋgêdêŋ ênam auc, ma aêac tec daôŋ tamoa.   
\p
\v 14 O lauace, amac aôŋ gêŋ amboac tonaŋ, tec amansaŋ taôm toolim palêgeŋ gebe akô Anôtô laŋônêm tolaŋômnêm sawa to nêm ŋalêlôm ŋawageŋ ma amoa tobiŋmalôgeŋ.  
\v 15 Ma alic aêacnêŋ Apômtau gê biŋ tôŋŋa tau kêtu ênê moasiŋ ênam aêac kêsiŋa ŋamôkê, kêtôm teweŋi Paulu, taŋ têntac gêwiŋ eŋ ŋanô naŋ, keto gêdêŋ amac kêtôm kauc mêtêŋa, taŋ Anôtô kêkêŋ gêdêŋ eŋ.  
\v 16 Eŋ keto biŋ amboac tonaŋ kêsêp nê papia samob. Biŋ ŋagêdô, taŋ keto gec nê papia ŋalêlôm naŋ, ŋawapac ma lau kauc gêbôc to palê-palê sêwa biŋ tau sa kesogeŋ kêtôm sêwa biŋ ŋagêdô, taŋ teto gêc naŋ, sa kesogeŋ amboac tonaŋ. Êsêac sêgôm gêŋ tonaŋ, tec sêkic tauŋ nêŋ biŋ.   
\p
\v 17 O lauace, amac ajala biŋ tonaŋ kwanaŋgeŋ, tec ajop taôm gebe lau alôb-alôb nêŋ biŋdansaŋ êwê amac ao sic e êkac amac su aŋga nêm ŋamôkê ŋajaŋa nec atom.  
\v 18 Aêacnêŋ Apômtau to kêsiwaga Jesu Kilisi nê moasiŋ to nê kauc mêtêŋa esewec aŋga amacnêm,  
\p Ŋawasi êndêŋ eŋ galoc e naêndêŋ bêc teŋgeŋŋa. Biŋŋanô.