\id 1TI -Jabem partial Bible [jae] -Papua New Guinea 1980 (web 2015) 
\h TIMOTE 1 
\toc1 Paulunê papia ŋamataŋa gêdêŋ  TIMOTE 
\toc2 Timote 1 
\toc3 1Ti 
\mt2 Paulunê papia ŋamataŋa gêdêŋ  
\mt1 TIMOTE  
\ip Timote tau nec eŋ ŋac buŋa matac teŋ aŋga Asia Sauŋ. Têna Judao ma tama Helen. Eŋ gêwiŋ Paulu ma kêpuc eŋ êôŋ kêtu kom mêtêŋa samob jakêsap eŋ tôŋ ŋaŋêŋgosu.  
\ip Paulunê papia ŋamataŋa gêdêŋ Timote nec gêc tau keto kêwaka biŋ ŋatêna têlêac sa. (1) Paulu gêjam la Timote gebe ejop tau êndêŋ mêtêgeo, taŋ gêôŋ sa aŋga gôlôac buŋa tau ŋalêlom gêwiŋ naŋ. Mêtêgeo tonaŋ ŋai ŋam kêsêp lau ŋagêdô sêgaluŋ kauc jaba aŋga lau Juda to lau samuc nêŋ kêsêp taulêlôm. Lau seboc lau teŋ sênam tauŋ kêsi sêŋgôm naêtôm atom, sêjala gêŋ, tê ŋam kêsiŋ tau gêc lêlôm eŋ nê, êwiŋ acgom. Ac tec sêsôm lau sênam dabuŋ gêŋ taniŋŋa ŋagêdô ma sêjac jao lauo to ŋac sênam tauŋŋa atom. (2) Go Paulu keto biŋ tanam jaom gôlôacŋa ma om ŋasakiŋ ŋagoliŋ ŋagêdô gêwiŋ. Eŋ gêwa kômwaga gôlôacŋa nêŋ ŋalêlôm to nêŋ gam sa. (3) Gocgo gêlêŋ biŋ Timote gebe ênac dabiŋ tau êtu Jesu Kilisi nê sakiŋwaga mansaŋ ŋajam teŋ. Ma gêwa ênê kôm, taŋ gêjac eŋ ŋawae gebe ênam êndêŋ lau buŋa ŋagêdô êndêŋ-êndêŋgeŋ naŋ, ŋam sa amboac taŋ.  
\iot Ŋadênaŋ  
\ili1 1. Paulu gêjac m papia tau 1:1-2  
\ili1 2. Gôlôac dabuŋ tau to gakolegwaga nêŋ kôm ŋagôliŋ 1:3–3:16  
\ili1 3. Timote tau nê kôm to ŋagôliŋ 4:1–6:21  
\c 1  
\s1 Paulu gêjac m nê papia  
\p
\v 1 Kilisi Jesu nê aposolo aê, Paulu, tec aêacnêŋ kêsiwaga Anôtô agêc Kilisi Jesu, taŋ takêŋ mateŋ eŋ tamoa naŋ, kêjatu aê,  
\v 2 tec kato ŋoc papia tonec gêdêŋ aôm, Timote. Aôm kôtu aê latuc kêtu kôkêŋ gêwiŋŋa. Tameŋi Anôtô agêc aêacnêŋ Apômtau Kilisi Jesu nêŋ moasiŋ to taêŋ walô ma biŋmalô êndêŋ aôm êwac.   
\s1 Ojop taôm êndêŋ mêtê geo  
\p
\v 3 Gêdêŋ taŋ aê gaja Makedonia naŋ, kasakiŋ aôm gebe ôŋgôŋ Epese ma ôsôm êndêŋ lau ŋagêdô gebe sênam mêtê teŋ eo atom.  
\v 4 Ôsôm êndêŋ êsêac gebe sêwi miŋ laŋgwa ŋaôma-ŋaôma to nêŋ abeŋi to dêbuŋi nêŋ ŋaê ŋadênaŋ sêpuc tauŋ ŋamŋa siŋ. Biŋ tonaŋ oc aŋgôm biŋ êlênsôŋ elêmê ma anam lau teŋ sa êtu sêkêŋ awiŋ Anô tôŋa atom.  
\v 5 Ŋagôliŋ taŋ aôm kôkêŋ gêdêŋ êsêac naŋ, ŋamanô tau tonec gebe têmtac êwiŋ ŋanô, taŋ ŋam kêsêp ŋalêlôm ŋawa to ŋalêlôm ŋaŋêŋ ma akêŋ êwiŋ ŋakêŋkêŋ ŋajam tonêm ŋalêlôm makeŋgeŋ.  
\v 6 Lau ŋagêdô sêwi lêŋ tonaŋ siŋ ma sêlênsôŋ tauŋ sêsôm biŋ agwa-agwa ŋaôma.  
\v 7 Êsêac seboc têdôŋ Anôtônê biŋsu, mago sêjam kauc biŋ, taŋ sêsôm to biŋgalôm, taŋ sêjam sêmoa naŋ ŋam.   
\p
\v 8 Aêac tec tajala gebe Anôtônê biŋsuanô embe tamansaŋ ŋapep, oc gêŋ ŋajam samucgeŋ.  
\v 9 Aêac tajala tonec gêwiŋ gebe sêmasaŋ biŋsu kêtu lau gêdêŋŋa atom. Biŋsu tau mêŋkêsa kêtu lau, taŋ sêgôm gêŋ wauc-waucgeŋ to taŋeŋpêc ma dedec Anôtô to sêgôm sec, sêlic gêŋ teŋ kêtu nêŋ gêŋ dabuŋ atom, sêsôm biŋ alôb-alôb ŋawaô, sêjac teneŋi to tameŋi ma ŋamalac êndu naŋŋa.  
\v 10 Biŋsu tonaŋ mêŋkêsa kêtu lau mockaiŋo to mockaiŋŋa ma ŋacwaga, taŋ sêkwalec tauŋŋa, ma kêtu êsêac, taŋ têtulu ŋamalac têtu gêŋômaŋa to lau dansaŋ ma êsêac, taŋ têtôc lemeŋ, mago sêsau naŋŋa, ma kêtu êsêac, taŋ sêgôm gêŋ ŋagêdô samob, taŋ geseŋ mêtê ŋajam suŋa naŋ.  
\v 11 Biŋ tonaŋ gêc ŋawae ŋajam, taŋ Anôtô kêkêŋ gêdêŋ aê gebe jasôm lasêŋa. Ŋawae ŋajam tonec gêwa Anôtô, taŋ aweŋ gêôc eŋ naŋ, nê ŋawasi sa.   
\s1 Paulu gêjam daŋge Anôtô kêtu taê walô eŋŋa  
\p
\v 12 Aê gajam daŋge aêacnêŋ Apômtau Kilisi Jesu, taŋ kêpuc aê tôŋ ma gêlic aê katôm gebe janam sakiŋ eŋ naŋ, tec kêkêŋ kôm gêdêŋ aê.  
\v 13 Gêmuŋgeŋ tec aê kasôm biŋ alôb-alôb kêpi Jesu ma kêjanda eŋ to kalêsu gôlôac dabuŋ. Mago Anôtô taê walô aê, gebe kakêŋ gêwiŋ mêtê atom tageŋ ma gajam kauc gêŋ, taŋ gagôm naŋ.  
\v 14 Aêacnêŋ Apômtau kêsêwa nê moasiŋ kêpi aê ma kêkêŋ aê kakêŋ gêwiŋ to têtac gêwiŋ ŋanô, taŋ ŋawakac kêsêp Kilisi Jesu tau naŋ.  
\v 15 Biŋ tonec tec ŋanô, ŋamalac samob sêkêŋ êwiŋ acgommaŋ, gebe Kilisi Jesu gêmêŋ nom gebe ênam lau sec kêsi. Ma aê tec katu lau sec tau nêŋ ŋac ŋamata.  
\v 16 Kêtu biŋ tonaŋŋa Anôtô taê walô aê gebe Kilisi Jesu êwa nê lêŋ ê ŋamalacnêŋ biŋ tôŋŋa sa êpi aê êtu ŋamata e jatu lau, taŋ oc sêkêŋ êwi ŋ eŋ ma sêŋgôŋ mateŋ jali teŋgeŋ naŋ, nêŋ ŋadôŋdôŋ.  
\v 17 Anôtô taugeŋ kêtu têm samob ŋakiŋ. Eŋ gêmoa teŋgeŋ ma ŋamalac teŋ mataanô gêlic eŋ atom. Eŋ taugeŋ kêtu Anôtô. Lanem to ŋawasi êndêŋ eŋ êtôm têm totêmgeŋ. Biŋŋanô.   
\p
\v 18 Latucenec Timote, aê kakêŋ ŋagôliŋ tonaŋ gêdêŋ aôm gebe ojop. Biŋ tonaŋ seoc lasê kêpi aôm gebe êpuc aôm tôŋ ma ônac siŋ ŋajam.  
\v 19 Ôkêŋ êwiŋ tonêm ŋalêlôm ŋaŋêŋgeŋ. Lau ŋagêdô sêwê biŋ tonaŋ auc ma sêkêŋ gêwiŋ atom, tec têtu lau gêbac.  
\v 20 Lau tau nêŋ ŋagêdô tonec Humenai agêc Alesandere. Aê kakêŋ êsêagêc sêsêp Sadaŋ lêma gebe êndôŋ êsêagêc e sêsôm biŋ alôb-alôb êtiam atom.   
\c 2  
\s1 Biŋ tateŋ mecŋa  
\p
\v 1 Amboac tonaŋ aê jalêŋ biŋ amac gebe aŋgôm gêŋ tonec êtu ŋamatageŋ acgom gebe ateŋ nêm gêŋ êndêŋ Anôtô to ateŋ mec ma taêm ênam nêm lau êsap nêm mec ŋalêlôm to anam daŋge êtu ŋamalac samobŋa.  
\v 2 Ateŋ mec êtu kiŋ to gôliŋwaga samobŋa, gebe tamoa nêŋ ŋajam to daŋgôŋ tomalô, ma daŋgôm nêŋ gêŋ tasa Anôtônê lêŋ to tamansaŋ gêŋ samob ŋapep.  
\v 3 Biŋ tonaŋ gêjac aêacnêŋ kêsiwaga Anôtô mataanô ŋajam ma gêlic jagêdêŋ.  
\v 4 Ŋac tau tonaŋ gebe ênam ŋamalac samob kêsi ma gebe êkêŋ êsêac sêjala biŋŋanô tau,  
\v 5 gebe Anôtô tageŋ tec gêmoa, ma sêliŋwaga tageŋ tec gêmoa Anôtô to ŋamalac ŋasawa. Sêliŋwaga tau ŋamalac Kilisi Jesu,  
\v 6 taŋ kêkêŋ tau gêjac da lau pebeŋ. Biŋ tonaŋ gêwa sa gêdêŋ ŋanoc gebe Anôtô gebe ênam ŋamalac samob kêsi.  
\v 7 Anôtô kêkêŋ aê katu ŋacjaeŋ to aposolo ma lau samuc nêŋ kêdôŋwaga gebe jasôm lêŋ takêŋ gêwiŋŋa to biŋŋanô tau lasê êndêŋ êsêac. Aê kasôm biŋŋanô, kasau atom.   
\p
\v 8 Aê gabe ŋacwaga teteŋ mec êtôm gamêŋ samobgeŋ. Êsêac embe sêlam lemeŋ dabuŋ, go têntac ŋandaŋ to têntac lulu atom.   
\p
\v 9 Ma biŋ tonec êpi lauo amboac tonaŋgeŋ, gebe sêmansaŋ tauŋ ŋapep ma majeŋ tauŋ êtu gêŋ secŋa ma sênam gêlôŋ tauŋ tokaucgeŋ. Êsêac sêmac poac ma sêkôc gold to kêkôm ma sêsô ŋakwê toŋaôli kapôêŋ-kapôêŋ atom.  
\v 10 Êsêac sênam gêlôŋ tauŋ ŋa kôm ŋajamgeŋ, tec êwa êsêac sa gebe têtôm lauo, taŋ têtêc Anôtô naŋ.  
\v 11 Lauo sênam tauŋ tôŋgeŋ to sêkôniŋ tauŋ, go sêŋô biŋ e êtu taŋ êsêac.  
\v 12 Aê jalôc gebe lauo têndôŋ lau to têtu ŋacwaganêŋ ŋatauo nec atom. Êsêac sêmoa sênam tauŋ tôŋgeŋ.  
\v 13 Anôtô kêkêŋ Adam kêtu ŋamata acgom, go kêkêŋ Ewa kêdaguc.  
\v 14 Ma Adam kêkêŋ gêwiŋ biŋdansaŋ atom, awê tec kêkêŋ gêwiŋ e kêgêli biŋsu.  
\v 15 Lauo embe sêsap sêkêŋ gêwiŋ to têntac gêwiŋ tôŋ ma sêsa nêŋ lêŋ sênam dabuŋ tauŋ tokaucgeŋ ma embe sêkôc ŋapalê, go Anôtô ênam êsêac kêsi.   
\c 3  
\s1 Gôlôac dabuŋ nêŋ laumata nêŋ ŋagôliŋ  
\p
\v 1 Biŋ tonec biŋ ŋanô gebe ŋac teŋ embe taê êka gebe êtu gôlôac dabuŋ ŋagejobwaga, naŋ nê ŋalêlôm êkac eŋ êtu kôm ŋajam teŋŋa.  
\v 2 Gejobwaga tonaŋ talic eŋ ŋac mansaŋ samucgeŋ, ênam awê tageŋ ma êmoa tokauc ŋawageŋ. Eŋ êsa nê lêŋ tokauc ma katôgeŋ. Eŋ êŋgôm ja lau samob ma eŋ êtôm gebe êndôŋ lauŋa.  
\v 3 Ênôm gêŋ anaboa atom to lêma ênac siŋ ŋawaô atom. Eŋ ŋac malô to ŋac wama. Eŋ têtac gamiŋ atom.  
\v 4 Eŋ ênam gôliŋ tau nê gôlôac ŋapep e nê ŋapalêo to ŋac tetoc eŋ sa totaŋeŋ wamugeŋ.  
\v 5 Ŋac teŋ embe ênam gôliŋ tau nê gôlôac êtôm atom, oc ejop Anôtônê gôlôac amboac ondocgeŋ.  
\v 6 Akêŋ ŋac, taŋ kêtu ŋac buŋa dambêgeŋ naŋ, êtu gejobwaga atom, gebe eŋ oc etoc tau sa e mêtôc, taŋ kêtap Sadaŋ sa naŋ, êpi eŋ amboac tonaŋ.  
\v 7 Akêŋ ŋac, taŋ lau sêmoa jaêc gôlôacŋa sêsôm eŋ wae ŋajam naŋgeŋ, gebe sêmbu eŋ atom to Sadaŋnê lip ênac eŋ atom.   
\s1 Sakiŋwaga gôlôac dabuŋŋa nêŋ ŋagôliŋ  
\p
\v 8 Sakiŋwaga gôlôac dabuŋŋa amboac tonaŋ. Êsêac lau wapac, imbeleŋ pap atom, sênôm wain anaboa atom ma sêwê launêŋ gêŋ auc atom.  
\v 9 Biŋŋanô taŋ êsêac sêkêŋ gêwiŋ naŋ, sêkam tôŋ ŋa nêŋ ŋalêlôm ŋawa.  
\v 10 Ansaê lau tonaŋ êmuŋ acgom. Embe alic êsêac têtôm, go sênam sakiŋ gôlôac.  
\v 11 Êsêacnêŋ lauo amboac tonaŋgeŋ. Êsêac lauo wapac, sêŋga biŋ atom, sêmoa tokauc ŋawageŋ ma sêŋgôm nêŋ gêŋ samob ŋaŋêŋgeŋ.  
\v 12 Sakiŋwaga gôlôac dabuŋŋa sênam awê tageŋ-tageŋ ma sênam gôliŋ nêŋ ŋapalêo to ŋac ma nêŋ gôlôac ŋapep.  
\v 13 Êsêac taŋ sêjam sakiŋ nêŋ gôlôac ŋapep naŋ, oc nêŋ sakiŋ etoc êsêac sa ma sêkêŋ êwiŋ Kilisi Jesu totêntac êpa sugeŋ.   
\s1 Anôtônê mêtê ŋabiŋ ŋalêlômŋa  
\p
\v 14 Biŋ tonaŋ kato gêdêŋ aôm ma taêc kêka gebe jandêŋ aôm jawac sebeŋ.  
\v 15 Mago gêŋ teŋ embe ênam aê tôŋ, go papia tonec êwa biŋ sa êndêŋ aôm e ôjala lêŋ ômoa Anôtônê anduŋa ŋam. Anôtônê andu tau Anôtô mata jali nê gôlôac, taŋ kêtu biŋŋanô ŋaalê to ŋaseŋeŋ.  
\v 16 Biŋŋanôgoc, Anôtônê mêtê, taŋ kêsiŋ tau kêsêp lêlômgeŋ naŋ kapôêŋanô.  
\q1 Eŋ geoc tau lasê kêtu ŋamalac.  
\q1 Ŋalau Dabuŋ gêwa eŋ sa gebe eŋ ŋac gêdêŋ.  
\q1 Aŋela sêlic eŋ.  
\q1 Sêjam ênê mêtê gêdêŋ lau samuc.  
\q1 Lau nomŋa sêkêŋ gêwiŋ eŋ.  
\q1 Anôtô kêsip eŋ sa toŋawasigeŋ.   
\c 4  
\s1 Biŋ kêpi kêdôŋwaga dansaŋ  
\p
\v 1 Ŋalau Dabuŋ gêwa sa kwanaŋgeŋ e gêc awêgeŋ gebe êndêŋ têm ŋamuŋa lau ŋagêdô oc sêkac tauŋ su aŋga sêkêŋ gêwiŋ ŋanôŋa nasêsap ŋalau dansaŋŋa tôŋ to sêkôc ŋalau sec nêŋ mêtê sa.  
\v 2 Ŋalau sec tonaŋ sêjam ŋamalac dansaŋ laŋôŋ, taŋ sêsau lau. Êsêacnêŋ ŋalêlôm kêtôm ja kêpac gêŋ kêtu matê.  
\v 3 Êsêac tonaŋ sêjac jao gebe ŋacwaga sênam awê atom ma lauo sênam ŋac atom. Ma êsêac sêkac ŋamalac gebe sêŋgamiŋ tauŋ êndêŋ gêŋ taniŋŋa ŋagêdô. Mago Anôtô kêkêŋ gêŋ taniŋŋa tonaŋ gebe aêac lau takêŋ gêwiŋ to tajala biŋŋanôŋa takôc sa todaŋgegeŋ.  
\v 4 Gêŋ totau-totau samob, taŋ Anôtô kêkêŋ naŋ, tau ŋajam. Amboac tonaŋ takôc gêŋ tonaŋ ŋai samob sa todaŋgegeŋ ma dambu teŋ atom,  
\v 5 gebe Anôtônê biŋ to mec gêgôm gêŋ tau kêtu dabuŋgac.   
\s1 Kilisi Jesu nê sakiŋwaga ŋajam  
\p
\v 6 Aôm embe ôwa biŋ tonaŋ sa êndêŋ lasitêwai, oc ôtu Kilisi Jesu nê sakiŋwaga ŋajam, gebe takêŋ gêwiŋ ŋabiŋ to mêtê ŋajam, taŋ kôdaguc naŋ, kêtu nêm mo gêlôm aômŋa.  
\v 7 Mago miŋ alôb-alôb to lauo ŋanô nêŋ biŋ ole naŋ ômasuc. Ôsa Anôtônê lêŋ ônsaê-ônsaê e êtu tôŋ aôm.  
\v 8 Embe tansaê gebe tatu mêtê ôliŋgeŋ, oc ênam aêac sa ŋanô atom. Mago embe tasa Anôtônê lêŋ, oc ênam aêac sa êtu gêŋ samobŋa. Anôtô gêjac mata gebe ênam aêac sa êndêŋ têm tamoa mateŋ jali aŋga nomŋa to êndêŋ têm daŋgôŋ mateŋ jali aŋga ônêŋa amboac tonaŋgeŋ.  
\v 9 Biŋ tonaŋ ŋanô to gêdêŋ kêtôm gebe ŋamalac samob sêkôc saŋa.  
\v 10 Kêtu mêtê tonaŋŋa aêac tajam koleŋ tosiŋgeŋ gebe aêac takêŋ mateŋ Anôtô mata jali, taŋ kêtu ŋamalac samob nêŋ kêsiwaga, mago kêtu aêac lau-takêŋ-gêwiŋwaga nêŋ kêtu ŋamata.   
\p
\v 11 Ôjatu biŋ tonaŋ ma ôndôŋ lau gebe sêmansaŋ.  
\v 12 Lau teŋ laŋôŋ elo aôm êtu aôm ŋac matacŋa atom. Aômnêm biŋ to nêm lêŋ ma têmtac gêwiŋ to kôkêŋ gêwiŋ ŋanô ma nêm ŋalêlôm ŋawa êtu ŋadôŋdôŋ êndêŋ lau-sêkêŋ-gêwiŋwaga.  
\v 13 Ôsam mêtê lasê to ôIêŋ biŋ gôlôac ma ôndôŋ lau tau ômoa e tauc jawac acgom.  
\v 14 Ôim Anôtônê moasiŋ, taŋ gêc ŋalêlôm naŋ, su atom. Moasiŋ tau gelom aôm gêdêŋ taŋ seoc Anôtônê biŋ lasê gêdêŋ aôm ma gôlôac dabuŋ nêŋ laumata sêu lemeŋ gêsac aôm naŋ.  
\v 15 Biŋ tonaŋ taêm ênam ma biŋ tonaŋ ênam gôliŋ nêm lêŋ, gebe lau samob sêlic aômnêm kôm esewec.  
\v 16 Ojop taôm to mêtê, taŋ kôdôŋ gômoa naŋ ŋapep. Ôsap tôŋgeŋ. Ôŋgôm tonaŋ, ec ênam aôm taôm to êsêac, taŋ sêŋô aômnêm biŋ naŋ sa.   
\c 5  
\s1 Timote ênam sakiŋ to ejop nê lau ŋapep  
\p
\v 1 Ônsaic biŋ ŋamalacanô teŋ atom, ôlêŋ biŋ eŋ amboac tamam. Ma lau wakuc naŋ ôlic êsêac amboac lasimi.  
\v 2 Lauo ŋanô naŋ ôIêŋ biŋ êsêac amboac tênami, ma lauo wakuc amboac latômio tonêm ŋalêlôm ŋawageŋ.   
\p
\v 3 Awêtuc embe awêtuc ŋanôgeŋ, naŋgo otoc êsêac sa.  
\v 4 Ma awêtuc teŋ embe nê gôlôac to dêbui sêmoa, naŋ sênam eŋ sa êjô moasiŋ taŋ teneŋi to tameŋi sêkêŋ gêdêŋ êsêac naŋ. Sêŋgôm amboac tonaŋ, ec ênac Anôtô mataanô ŋajam.  
\v 5 Ma embe awêtuc ŋanô, taŋ taugeŋ êmoa naŋ, oc êkêŋ mata Anôtôgeŋ ma êsap mec tôŋ ma eteŋ Anôtô êtôm êmbêc to eleŋgeŋ.  
\v 6 Ma awêtuc teŋ embe êsa nê lêŋ taê ênam tau ôligeŋ, naŋ talic eŋ mata jali, mago gêmac êndugac.  
\v 7 Ônac biŋsu êsêac gebe sêmoa tobiŋ masigeŋ.  
\v 8 Ŋac teŋ embe ejop tau nê lau to êmoasiŋ tau nê lasitêwai atom, oc enseŋ biŋ takêŋ gêwiŋŋa su. Eŋ êtu ŋac sec êlêlêc lau-sêkêŋ-gêwiŋ-atomwaga su.   
\p
\v 9 Oto awêtuc teŋ nê ŋaê êsêp awêtucnêŋ ŋaêmôkê paliŋ-paliŋgeŋ atom. Awêtuc taŋ nê jala kêtu 60 su ma gêjam ŋac tageŋ naŋgeŋ nê ŋaê êsêp.  
\v 10 Ênê wae gêjam kôm ŋajamŋa ênêc amboac tonaŋgeŋ. Eŋ embe êlôm nê gôlôac ŋapep, êŋgôm ja lau, êkwasiŋ Anôtônê lau eŋkaiŋ, ênam lau sêŋgôŋ jageoŋa sa to êpuc gêŋ ŋajam samob ŋam, naŋgo nê ŋaê êsêp ŋaêmôkê.   
\p
\v 11 Oto awêtuc wakuc nêŋ ŋaê êsêp ŋaêmôkê atom, gebe êsêac oc taêŋ ênam biŋ ŋacŋa ma ôliŋ ŋakam êsa êndêŋ Kilisi.  
\v 12 Lauo tonaŋ ŋai oc sêsap nêŋ biŋ, taŋ sêmoatiŋ kêtu ŋamata naŋ, tulu e sêmoa tobiŋgeŋ.  
\v 13 Lauo amboac tonaŋ têdôŋ tauŋ gebe sênam ojom ma sênac laoc launêŋ andugeŋ. Ma sêjam ojomgeŋ atom, aweŋsuŋ ŋakasop-kasop ma sêlênsôŋ lau ŋagêdô nêŋ biŋ to sêsôm biŋ, taŋ têtôm atom gebe sêsôm naŋ.  
\v 14 Amboac tonaŋ aê gabe awêtuc wakuc sênam ŋac êtiam, ec sêkôc ŋapalê ma sêmansaŋ nêŋ andu ŋapep. Sêŋgôm amboac tonaŋ, gebe ŋacjo êmbu aêac êtu lêŋ keso teŋŋa atom.  
\v 15 Awêtuc tau ŋagêdô tec sêkac tauŋ su ma sêsap Sadaŋ tôŋgac.  
\v 16 Awêtuc ŋagêdô embe sêŋgôŋ sêwiŋ nêŋ awê kêkêŋ gêwiŋŋa teŋ, go awê tau ênam êsêac sa, gebe êkêŋ wapac êndêŋ gôlôac atom. Go gôlôac dabuŋ têtôm gebe sênam awêtuc sawaanô sa.   
\p
\v 17 Atôc gôlôacnêŋ laumata, taŋ sêjam jaom nêŋ gôlôac ŋapep naŋ, sa êlêlêcmaŋ. Aê kasôm biŋ kêpi êsêac, taŋ sêjam mêtê to têdôŋ lau sim tauŋ sugeŋ naŋ.  
\v 18 Amac ajala gebe teto gêc gebe “Ôkic bulimakao, taŋ kêka mopolom gêmoa naŋ, awasuŋ auc atom.” Ma biŋ teŋ gêc gêwiŋ gebe “Koleŋwaganê kôm ŋaôli gêjac eŋ ŋawaegoc.”  
\v 19 Biŋ teŋ embe êpi laumata teŋ, naŋ ôkêŋ taŋam sebeŋ atom. Ŋac luagêc me têlêac sêwa sa êtôm tau acgom, go ôkêŋ êwiŋ.  
\v 20 Lau taŋ sêŋgôm sec naŋ, ômêtôc êsêac aŋga lau samob laŋôŋnêm gebe lau ŋagêdô sêlic ma têtêc tauŋ.  
\v 21 Aê kakô Anôtô agêc Kilisi Jesu to aŋela, taŋ Anôtô kêjaliŋ êsêac sa naŋ, laŋôŋnêm ma aoc gêjac aôm gebe Ojop ŋagôliŋ tonaŋ ŋapep. Ômoasiŋ ŋac teŋ êlêlêc ŋac teŋ su atom to taêm labu nêm ŋac ôlim andaŋ taômŋa atom.  
\v 22 Ôkêŋ lêmam ênsac ŋac teŋ gebe ônam mec eŋ êtu sakiŋ teŋŋa sebeŋ atom. Ma ôwê lau ŋagêdô nêŋ sec ŋakaiŋ ôwiŋ atom. Ojop taôm nêm ŋalêlôm gebe ŋawageŋ.   
\p
\v 23 Ônôm bu ŋaômageŋ atom, ônôm wain ŋagec êwiŋ êtu nêm têmtacwalô to gêmac gêgôm aôm elêmêŋa.   
\p
\v 24 Lau ŋagêdô nêŋ sec kêtu awê sebeŋ ma sec tau kêsêlêŋ gêmuŋ têm sêmêtôc êsêacŋa. Mago ŋagêdô nêŋ sec oc êtu awê êndaŋgucgeŋ.  
\v 25 Ma koleŋ ŋajam kêtu awê amboac tonaŋgeŋ. Ma ŋagêdô embe êtu awê sebeŋ atom, oc êsiŋ tau êtôm atom.   
\c 6  
\p
\v 1 Sakiŋwaga samob tetoc nêŋ ŋataui sa ŋapepgeŋ, gebe bi ŋ alôb-alôb êpi Anôtônê ŋaê to mêtê atom.  
\v 2 Sakiŋwaga taŋ nêŋ ŋataui sêkêŋ gêwiŋ naŋ, taêŋ êpa êsêac su gebe êsêacnêŋ lasitêwai nec atom. Masi. Êsêac sênam sakiŋ sênac ŋawaegeŋ gebe nêŋ sakiŋ oc êmoasiŋ lau sêkêŋ gêwiŋŋa, taŋ Anôtô têtac gêwiŋ êsêac naŋ.  
\s1 Mêtê geo to awa ŋanô  
\p Biŋ tonec ôndôŋ to ôlêŋ biŋ gôlôac.  
\v 3 Ŋac teŋ embe êndôŋ mêtê teŋ eso mêtê tonaŋ ma êsap aêacnêŋ Apômtau Jesu Kilisi nê biŋ ŋajam to Anôtônê lêŋ tôŋ atom,  
\v 4 naŋ oc etoc tau sa ŋaômageŋ ma êjala biŋ teŋ atom. Lau amboac tonaŋ nêŋ ŋalêlôm kêkac êsêac keso, tec aweŋsuŋ gêôc ka tauŋ to sêsôm biŋkalom ŋawaô. Biŋ tonaŋ kêtu têntac sec to kisa ma biŋ alôb-alôb to sêga biŋ sec ŋamôkê.  
\v 5 Lau tonaŋ sêjam biŋgalôm ŋawaô, mago nêŋ kauc kêlênsôŋ ma sêkac tauŋ su aŋga biŋŋanô tau e seboc Anôtônê lêŋ kêtu intêna têtap awa saŋa teŋ.   
\p
\v 6 Biŋŋanô, lau embe sêsap Anôtônê lêŋ tôŋ to sêlic gêŋ, taŋ gêc êsêacŋa gebe kêtôm, naŋ têtap awa ŋanô tau sa su.  
\v 7 Aêac tamêŋ nom tolemeŋ sawageŋ ma oc dawi nom siŋ tolemeŋ sawageŋ amboac tonaŋ.  
\v 8 Embe tatap nêŋ mo to nêŋ ŋakwê sa naêtôm aêac, naŋ kêtôm.  
\v 9 Lau taŋ taêŋ kêka gebe têtu lau tolêlôm naŋ, sêsêp lêtôm ŋalelom ma têntac ŋakalac meloc tokaiŋ-tokaiŋ, taŋ enseŋ êsêac su naŋ, ŋalakô êkô êsêac. Gêŋ amboac tonaŋ ŋai oc êmbam ŋamalac e sêmbac sênaŋa.  
\v 10 Têntac gêwiŋ awa kêtu sec samob ŋawakac. Lau ŋagêdô mateŋ katu gêŋ tonaŋ, tec sêjac jaê sêkêŋ gêwiŋ ma têtap nêŋ kamoc to ŋandaŋ ŋalêlômŋa taêsam sa.   
\s1 Paulu kêpuc Timote tôŋ  
\p
\v 11 Anôtônê ŋac aôm ôêc gêŋ tonaŋ ŋai samob su. Ôndaŋguc biŋ gêdêŋ ma ôsa Anôtônê lêŋ to ôkêŋ êwiŋ mêtê ma têmtac êwiŋ lau to ôc gêŋwapac totêmtac êpa sugeŋ ma ômoa tonêm ŋalêlôm malôgeŋ.  
\v 12 Ônac siŋ ŋajam êtu takêŋ gêwiŋŋa ma ôkam ôŋgôŋ matam jali teŋgeŋŋa tôŋ. Gêdêŋ taŋ kôsôm kôkêŋ gêwiŋ lasê lau taêsam sêŋô naŋ, Anôtô kêkalem aôm gebe ôŋgôŋ matam jali.  
\v 13 Aê kakô Anôtô, taŋ kêkêŋ gêŋ samob sêmoa mateŋ jali naŋ, agêc Kilisi Jesu, taŋ kêsôm biŋŋanô lasê gêdêŋ Ponti Pilata naŋ, laŋôŋnêm ma jajatu aôm gebe  
\v 14 Ômansaŋ biŋsu ŋapep sawa ômoa e aêacnêŋ Apômtau Jesu Kilisi eoc tau lasê.  
\v 15 Êndêŋ ŋanoc acgom, go Ŋatau tageŋ, kiŋnêŋ Kiŋ to apômtaunêŋ Apômtau, taŋ aweŋ gêôc eŋ naŋ, êŋgôm gêŋ tonaŋ ŋanô êsa.  
\v 16 Eŋ taugeŋ êmac êndu atom, êmoa teŋgeŋ. Eŋ gêmoa ŋawê, taŋ ŋamalac teŋ êsa ŋagala atom naŋ ŋalêlôm. Ŋamalac teŋ gêlic eŋ su atom ma teŋ kêtôm gebe oc êlic eŋŋa atom. Ênê wae êsa to ênê ŋajaŋa ênêc teŋgeŋ. Biŋŋanô.   
\p
\v 17 Ôjatu lau tolêlôm awa nom tonecŋa gebe tetoc tauŋ sa atom. Êsêac sêkêŋ mateŋ awa nomŋa ŋaôma atom, sêkêŋ mateŋ Anôtô, taŋ kêkêŋ gêŋ samob e kêlêsuc aêacgeŋ gebe êŋgôm aêac têntac ŋajam êsa.  
\v 18 Ojatu êsêac gebe sêmoasiŋ lau to têtu lau tolêlôm koleŋ ŋajamŋa. Êsêac sêmoa totêntac wapômgeŋ to sênac sam nêŋ awa êndêŋ lau sêwê kaiŋ sêwiŋ.  
\v 19 Sêŋgôm amboac tonaŋ, go sênac nêŋ awa sa êtu têm, taŋ oc mêŋêsa naŋ, ŋamôkê ŋajam gebe têtap sêŋgôŋ mateŋ jali ŋanô sa.   
\p
\v 20 O Timote, ojop gêŋ samob, taŋ kêsêp aôm lêmam su naŋ. Ondec biŋ alôb-alôb ŋaôma to biŋ sêôc tauŋ aucŋa, taŋ sêsam gebe “Biŋ tokauc,” mago sêsau tauŋ, biŋ tau biŋ tokauc atom.  
\v 21 Lau ŋagêdô sêkôc biŋ tokauc tonaŋ sa, mago seso biŋ takêŋ gêwiŋŋa.  
\p Moasiŋ êndêŋ amac êwac.