\id 1TH -Jabem partial Bible [jae] -Papua New Guinea 1980 (web 2015) 
\h TESALONIKI 1 
\toc1 Paulunê papia ŋamataŋa gêdêŋ lau  TESALONIKI 
\toc2 Tesaloniki 1 
\toc3 1Te 
\mt2 Paulunê papia ŋamataŋa gêdêŋ lau  
\mt1 TESALONIKI  
\ip Tesaloniki nec Romnêŋ gamêŋ Makedonia ŋamalacsega. Paulu gêwi Pilipi siŋ su acgom, go jakêwaka gôlôac teŋ sa aŋga malac tônê. Gêmoa sauŋgeŋ ma Juda sêjam lêmuŋ eŋ, ŋam gebe lau ŋagêdô taêsam aŋga lau samuc nêŋ, taŋ nêŋ ŋalêlôm gêwiŋ lau Juda nêŋ mêtê su naŋ, sêbuc dêmôêŋ êsêac jasêŋô Ŋawae Ŋajam aŋga Paulunê. Biŋ tonaŋ gêli Juda sa e sêjanda Paulu ma gêwi Tesaloniki siŋ jagelom Berea. Malôgeŋ Paulu jagêŋgôŋ Korint acgom, go nê ŋac-gêjam-kôm-gêwiŋ-eŋwaga Timote kêdaguc eŋ jakêdôŋ gôlôac Tesalonikiŋa nêŋ biŋ gêdêŋ eŋ.  
\ip Paulunê papia ŋamataŋa gêdêŋ lau Tesaloniki nec ŋac tau keto gebe ênac to êpuc lau buŋa tônêŋa têntac tôŋ. Eŋ gêjam daŋge Anôtô kêtu gêŋô êsêac sêkêŋ gêwiŋ mêtê to têntac g wiŋ tauŋ ŋawae naŋŋa. Go gêwa nê lêŋ, taŋ eŋ kêsê gêdêŋ taŋ gêmoa gêwiŋ êsêsc naŋ, sa kêtiam gebe taêŋ ênamgeŋ. Gocgo gêjô biŋ, taŋ sêjam kênac gêdêŋ eŋ kêpi Kilisi êmu êmêŋŋa naŋ. Ŋac buŋa teŋ embe êmac êndu êndêŋ Killsi êmu êmêŋ su atomgeŋ, eŋ oc êwê kaiŋ êŋgôŋ mata jali, tê Kilisi mêŋêwaka sa êndêŋ têm ŋamuŋa tônê nê, me masi. Ma êndêŋ ondoc Kilisi êmu êmêŋ êtiam. Sêsuŋ nêŋ kênac amboac tonaŋ gêdêŋ Paulu gêja, tec keto ŋagêjô gebe sêkêŋ mateŋ Kilisi êmu êmêŋŋa ma sênam nêŋ kôm êtôm bêcgeŋŋa ŋaŋêŋgeŋ sêôŋ eŋ sêmoamaŋ.  
\iot Ŋadênaŋ  
\ili1 1. Paulu gêjac m papia tau 1:1  
\ili1 2. Paulu gêjam daŋge to êwa gêôc Anôtô 1:2–3:13  
\ili1 3. Paulu gêlêŋ biŋ gebe sêsa lêŋ buŋa sênac ŋawae e sênac dabiŋ 4:1-12  
\ili1 4. Biŋ Kilisi êmu êmêŋŋa 4:13–5:11  
\ili1 5. Paulu gêlêŋ biŋ kêtu ŋamu 5:12-22  
\ili1 6. Paulu gêjac mata papia tau 5:23-28  
\c 1  
\s1 Paulu awa gêjac lau  
\p
\v 1 Paulu agêc Silwana ma Timote ma biŋ êndêŋ gôlôac dabuŋ Tesaloniki. taŋ Tameŋi Anôtô agêc Apômtau Jesu Kilisi sêbiŋ aêac tôŋ naŋ. Moasiŋ to biŋmalô êndêŋ amac êwac.   
\s1 Lau Tesaloniki nêŋ lêŋ to nêŋ sêkêŋ gêwiŋ  
\p
\v 2 Aêac ajam daŋge Anôtô kêtu amac samobŋa gedeŋ tôŋgeŋ ma taêŋ gêjam amac kêsêp ma mec ŋalêlôm ŋapaŋ.  
\v 3 Aêac akô aêacnêŋ Anôtô to Tameŋi laŋônêm ma taêŋ gêjam amacnêm akêŋ gêwiŋ ŋakôm to têmtac gêwiŋ ŋakoleŋ ma akêŋ matem aêacnêŋ Apômtau Jesu Kilisi totêmtac kêpa sugeŋ.  
\v 4 O lasitewaac, aêac ajala gebe Anôtô têtac gêwiŋ amac to kêjaliŋ amac sa atu ênê gêŋ.  
\v 5 Gebe aêac asôm ŋawae ŋajam gêdêŋ amac ŋa aweŋsuŋgeŋ atom, ajam toŋaclai ma toŊalau Dêbuŋgeŋ ma ajam mêtê toma ŋalêlôm samucgeŋ. Amac taôm ajala aêacma lêŋ, taŋ asa gêdêŋ amoa awiŋ amac naŋ. Aêac asa lêŋ tonaŋ kêtu anam amac saŋa.  
\v 6 Amac atêku aêac to Apômtau. Amac amoa gêŋwapac gwalêkiŋ ŋalêlôm, mago Ŋalau Dabuŋ kêpuc amac tôŋ, tec akôc mêtê sa totêmtac ŋajamgeŋ.  
\v 7 Amac agôm amboac tonaŋ tec atu ŋadôŋdôŋ gêdêŋ lau sêkêŋ-gêwiŋwaga samob aŋga Makedonia to Akaia,  
\v 8 tec Anôtônê mêtê kêtaŋ gelom-gelom aŋga amacnêm gêja Makedonia to Akaia tageŋ atom, masi. Amac akêŋ gêwiŋ Anôtô ŋawae gêô lasê gamêŋ samob, tec aêacma kôm anam mêtêŋa teŋ gêc kêtiam atom.  
\v 9 Lau tau tonaŋ sêjac miŋ amac akôc aêac saŋa ŋawae gêdêŋ taŋ aêac atu ŋacleŋ amac naŋ, to sêjac miŋ amac abuc dêmôêm gwam ma akac taôm ôkwi adêŋ Anôtô, abe anam sakiŋ Anôtô mata jali toŋanôgeŋ naŋ,  
\v 10 ma êsêac sêjac miŋ gebe amac êôŋ Anôtônê Latu aŋga undambê êmu êmêŋŋa. Anôtô gêŋu eŋ sa aŋga ŋacmatênêŋ ma Jesu tau oc ênam aêac sa êndêŋ Anôtônê têtac ŋandaŋ, taŋ mêŋêsa naŋ.   
\c 2  
\s1 Paulunê kom, naŋ gêjam aŋga Tesaloniki  
\p
\v 1 O lasitêwaac, amac taôm ajalagac gebe aêac adêŋ amac awac ŋaôma atom.  
\v 2 Amac ajala gebe aêac aôc ŋandaŋ to sêgôm aêac sec aŋga Pilipi gêmuŋ su acgom, go aô lasê amac. Mago aêacnêŋ Anôtô kêkêŋ aêac têntac kêpa su, tec atêc ŋacjo atom, asôm Anôtônê ŋawae ŋajam lasêgeŋ gêdêŋ amac.  
\v 3 Aêac alêŋ biŋ amac asôm biŋ keso me asôm biŋ toma ŋalêlôm ŋatêmui me asau aôc amac nec atom.  
\v 4 Mago Anôtô kêsaê aêac su, tec kêkêŋ ŋawae ŋajam gêdêŋ aêac gebe asôm lasê. Aêac ajam kôm tau kêtu ŋamalac sêlic aêac ŋajam ŋa nec atom, ajam gebe Anôtô, taŋ kêsaê ma ŋalêlôm naŋ, taugeŋ êlic ŋajam.  
\v 5 Amac ajalagac gebe aêac asôm biŋ ŋalêsi gêdêŋ amac atom ma asabaŋ mateŋ katu ŋa biŋ banac auc atom. Anôtô kêjala gebe biŋ tonaŋ biŋŋanô.  
\v 6 Aêac asôm waeŋ ŋamalacŋa aŋga amacnêm to lau ŋagêdô nêŋ atom.  
\v 7 Aêac taŋ atu Kilisinê aposolo naŋ, oc atôm gebe ajatu amac e atoc aêac sa. Mago gêdêŋ taŋ aêac amoa awiŋ amac naŋ, amoa totêntac malôgeŋ atôm jaomwagao teŋ, taŋ kêmoasiŋ gôlôac ŋasec-ŋasec naŋ.  
\v 8 Amboac tonaŋ ma ŋalêlôm kêkac aêac gebe akêŋ Anôtônê ŋawae ŋajam endeŋ amac awê kaiŋ awiŋ. Mago tonaŋgeŋ atom. Aêac têntac gêwiŋ amac ŋanôgeŋ e abe amac êndu êtu amacŋa.  
\v 9 O lasitêwaac, amac oc taêm gêjam ma koleŋ, taŋ ajam e tekweŋ gêbac naŋ. Gêdêŋ taŋ ajam mêtê Anôtônê ŋawae ŋajam gêdêŋ amac naŋ, aêac ajam kôm lemeŋŋa kêtôm bêc to geleŋgeŋ gebe amac aim tekwem su êtu aêacŋa atom.   
\p
\v 10 Amac alic ma Anôtô gêlic amboac tonaŋ gebe biŋ, taŋ aêac asôm naŋ biŋŋanô. Aêac asa ma lêŋ awiŋ amac lau-akêŋ-gêwiŋwaga amboac Anôtônê lau gêdêŋ tolaŋôŋnêm sawageŋ.  
\v 11 Amac alicgac gebe aêac amoasiŋ amac gêdêŋ-gêdêŋgeŋ amboac tama teŋ kêmoasiŋ latuio to ŋac.  
\v 12 Aêac alêŋ biŋ to ajam malô amac ma êkêli amac gebe asêlêŋ êtôm Anôtô êlic ŋajam. Eŋ kêkalem amac asô ênê gamêŋ to awê kai ŋ ênê ŋawasi.   
\p
\v 13 Kêtu biŋ tonecŋa aêac ajam daŋge Anôtô ŋapaŋ gêwiŋ gebe amac akôc Anôtônê biŋ, taŋ aŋô aŋga aêacma naŋ, sa amboac ŋamalacnêŋ biŋ atom, akôc sa amboac Anôtônê biŋŋanô tau. Ma biŋ tau tonaŋ tec gêjam kôm aŋga amac akêŋ-gêwiŋwaga nêm ŋalêlôm.  
\v 14 O lasitêwaac, amac atêku Anôtônê gôlôac Judaiaŋa, taŋ Kilisi Jesu gêbiŋ êsêac tôŋ naŋ. Gêŋwapac taŋ êsêac sêôc aŋga Judanêŋ naŋ, amac taôm nêm lau sêgôm gêdêŋ amac amboac tonaŋgeŋ.  
\v 15 Lau Juda sêjac Apômtau Jesu to propete êndu ma sêjanda aêac. Anôtô gêlic êsêac gêjac mataanô ŋajam atom. Êsêac sêkêŋ kisa gêdêŋ ŋamalac samob.  
\v 16 Êsêac sebe sêkô aêac auc gebe asôm mêtê, taŋ ênam lau samuc sa naŋ atom. Amboac tonaŋ tec sêgôm nêŋ sec sêboa sasa ŋapaŋ sêmoa e gêjam sêga. Mago Anôtônê têtac ŋandaŋ kêtap êsêac sa sugac.   
\s1 Paulu gêjam awa su gôlôac gebe êlic êsêac  
\p
\v 17 O lasitêwaac, êsêac sêkac aêac su amoa jaêc amac ŋasawa dambêgeŋ. Aêac alic amac laŋôm atom, mago ma ŋalêlôm gêmoa gêwiŋ amac ma kêkac aêac ŋanô-ŋanô gebe alic laŋôm êtiam.  
\v 18 Kêtu tonaŋŋa aêac abe andêŋ amac awac. Aê, Paulu, gabe jaŋgôm ŋanô êsa kêtu dim luagêc su. Mago Sadaŋ gêbôc aêac auc.  
\v 19 Êndêŋ noc aêacnêŋ Apômtau Jesu êmu êmêŋŋa naŋ, asa lau oc têtu aêac akêŋ mateŋ to têntac ŋajam ma waeŋ ŋagêlôŋ ŋamôkê. Lau teŋ atom, amac taômgeŋ.  
\v 20 Biŋŋanô, ma waeŋ to têntac ŋajam ŋam amac taômgeŋ.   
\c 3  
\p
\v 1 Kêtu tonaŋŋa aêac atôm gebe aôŋ têm alic amacŋa kêtiam atom, tec asôm kêtu tôŋ gebe aêagêc aŋgôŋ Aten  
\v 2 ma asakiŋ lasiŋi Timote, taŋ gêjam Anôtônê kôm gêwiŋ aêac ma kêsôm Kilisinê ŋawae ŋajam lasê gêmoa naŋ, êndêŋ amac êwac. Aêac asakiŋ eŋ gebe êpuc amac tôŋ to ênam amacnêm akêŋ gêwiŋ sa,  
\v 3 gebe gêŋwapac tonaŋ ŋai ênam amacnêm teŋ ôkwi atom. Taôm alicgac gebe gêŋwapac tonaŋ gêjac aêac ŋawae tec gêmoa.  
\v 4 Gêdêŋ taŋ aêac amoa awiŋ amac naŋ, asôm gêdêŋ amac kwanaŋgeŋ gebe aêac oc dandac gêŋwapac. Galoc amac alic gebe gêŋ tau ŋanô kêsagac.  
\v 5 Kêtu tonaŋŋa aê katôm gebe jaôŋ têm jalic amacŋa êtiam atom, tec kasakiŋ Timote gebe jaŋô amac akêŋ gêwiŋ ŋawae. Oc moae lêtômtêna kêlêtom amac e geseŋ aêacma koleŋ ŋanô su me.   
\p
\v 6 Galoc Timote gêmu gêdêŋ aêac gêmêŋ ma kêsôm amac akêŋ gêwiŋ to têmtac gêwiŋ ŋawae ŋajam gêdêŋ aêac. Eŋ gêjac miŋ gebe taêm gêjam aêac totêmtac gêwiŋgeŋ ŋapaŋ e nêm ŋalêlôm kêkac amac abe alic aêacŋa amboac aêacma ŋalêlôm kêkac aêac abe alic amacŋa.  
\v 7 O lasitêwaac, amac akêŋ gêwiŋ ŋanô ŋawae mêŋgêjam malô aêac kêtu amacŋa ma kêpuc aêac, tec amoa jageo to aôc gêŋwapac nec tôŋ.  
\v 8 Amac embe akô ŋajaŋa awiŋ Apômtau, oc êmoasiŋ aêac amoa ŋajam.  
\v 9 Amac agôm aêac têntac ŋajam samucgeŋ akô aêacnêŋ Anôtô laŋônêm, tec aêac oc atôm gebe anam daŋge Anôtô êtu amacŋa naêtôm me masi.  
\v 10 Aêac ateŋ eŋ toma ŋalêlôm samucgeŋ kêtôm bêc to geleŋgeŋ gebe alic laŋôm êtiam ma apuc amacnêm akêŋ gêwiŋ tôŋ e ŋajaŋa êsa.   
\p
\v 11 Aêac Tameŋi Anôtô agêc nêŋ Apômtau Jesu tau sênam aêacma intêna aô lasê amacŋa.  
\v 12 Apômtau êkêŋ amac têmtac gêwiŋ taôm to têmtac gêwiŋ ŋamalac samobŋa esewec ênam amac auc êtôm aêac tauŋ têntac gêwiŋ amac ŋanô.  
\v 13 Apômtau tau êpuc amacnêm ŋalêlôm tôŋ e amoa tolaŋômnêm sawageŋ ma atu dêbu ŋ akô aêac Tameŋi Anôtô laŋônêm êndêŋ noc aêacnêŋ Apômtau Jesu êmu êmêŋŋa naŋ ênê lau dabuŋ samob oc sêwiŋ eŋ.   
\c 4  
\s1 Tasa nêŋ lêŋ ênac Anôtô mataanô ŋajam  
\p
\v 1 O lasitêwaac, aêac adôŋ amac gebe asa nêm lêŋ e ênac Anôtô mataanô ŋajam tec agôm amoa. Ma galoc ateŋ to alêŋ biŋ amac, taŋ Apômtau Jesu gêbiŋ amac tôŋ naŋ, gebe asa lêŋ tonaŋ anac ŋawaegeŋ e anac dabiŋ.  
\v 2 Gôliŋ taŋ aêac akêŋ gêdêŋ amac ajam Apômtau Jesu laŋô naŋ ajalagac.  
\v 3 Anôtônê biŋ tonec êtu tôŋ gebe asa nêm lêŋ atôm ênê lau ma êŋgamiŋ taôm êndêŋ gêŋ mockaiŋo to mockaiŋŋa.  
\v 4 Ma amac samob ajala nêm lêŋ awê to ŋacŋa, tec asa Anôtônê launêŋ lêŋ tau ŋapep to êndêŋgeŋ.  
\v 5 Asa nêm lêŋ totêmtac ŋakalacboa atôm lau samuc, taŋ sêjam kauc Anôtô naŋ atom.  
\v 6 Ansau aôc taôm ma ambôli lasitêwainêŋ gêŋ auc atom. Aêac asôm to awa sa kwanaŋgeŋ gêdêŋ amac gebe Apômtau oc êkêŋ ŋagêjô êtu biŋ samob tonaŋ ŋaiŋa.  
\v 7 Anôtô kêkalem aêac gebe tasa lêŋ môpŋa atom, eŋ gebe aêac tasa lêŋ dabuŋgeŋ.  
\v 8 Ŋamalac teŋ embe taŋapêc êndêŋ biŋ tonaŋ, naŋ eŋ taŋapêc êndêŋ ŋamalac teŋ atom, eŋ taŋapêc êndêŋ Anôtô, taŋ kêkêŋ nê Ŋalau Dabuŋ kêsêp amacnêm ŋalêlôm naŋ.   
\p
\v 9 Biŋ têmtac êwiŋ lasitêwaiŋa tonaŋ aêac oc ato êndêŋ amac atom, gebe Anôtô tau kêdôŋ amac tec têmtac gêwiŋ taôm amoa.  
\v 10 Taôm agôm kêtu tôŋ kêpi lasitêwai samob, taŋ sêŋgôŋ Makedonia naŋ su. O lasitêwaac, tonec tec aêac alêŋ biŋ amac gebe aŋgôm anac ŋawaegeŋ.  
\v 11 Atu kêka-kêka gebe asa nêm lêŋ ŋaŋêŋgeŋ to ajop taôm nêm ŋêŋgeŋ ma amac taôm lemem ŋakoleŋ êlôm amac êtôm ajatu amac kwanaŋgeŋ su.  
\v 12 Asa lêŋ amboac tonaŋ, go lau-sêkêŋ-gêwiŋ-atomwaga sêlic ŋajam ma amac oc apô lêna taôm êtu gêŋ teŋŋa atom.   
\s1 Apômtau êmu êmêŋ  
\p
\v 13 O lasitêwaac, aêac abe akô lau, taŋ sêc bêc sêc naŋ, nêŋ ŋam auc êndêŋ amac atom, gebe moae nêm ŋalêlôm ŋawapac atôm lau, taŋ sêkêŋ mateŋ ŋanô teŋ atom naŋ.  
\v 14 Aêac takêŋ gêwiŋ gebe Jesu gêmac êndu ma gêdi sa. Amboac tonaŋ lau, tec sêc bêc sêc nec, Anôtô oc êkêŋ Jesu tau êwê êsêac.   
\p
\v 15 Biŋ tonaŋ aêac awa sa gêdêŋ amac adaguc Apômtau tau nê biŋ teŋ gebe Êndêŋ noc Apômtau êmu êmêŋŋa aêac, tec tamoa mateŋ jali nec, tamuŋ êsêac, taŋ sêc bêc sêc naŋ atom.  
\v 16 Êndêŋ tonaŋ Apômtau tau oc êpô awa, go nê aŋelanêŋ kasêga awa êsa ma Anôtônê dauc êtaŋ, go Ŋatau êsêp aŋga undambê êmêŋ. Ma êsêac, taŋ sêkêŋ gêwiŋ Kilisi ma sêmac êndu su naŋ, oc sêndi sa têtu ŋamata.  
\v 17 Go aêac, tec tamoa mateŋ jali nec, tao êsuŋ aêac sa dawiŋ êsêac tapuc Apômtau tôŋtôŋ natasa ŋasawa ôŋa e tamoa dawiŋ Apômtau teŋgeŋ ma teŋgeŋ.  
\v 18 Anam malô taôm ŋa biŋ tonaŋ ma apuc taôm tôn êndêŋêndêŋgeŋ.   
\c 5  
\s1 Tamansaŋ tauŋ gebe takôc Apômtau sa  
\p
\v 1 O lasitêwaac, aê jato biŋ têm to nocŋa êndêŋ amac êtu ageŋŋa.  
\v 2 Taôm ajalagac gebe Apômtaunê bêc oc mêŋêô lasê êtôm geŋgeŋtêna êmêŋ êndêŋ êmbêc.  
\v 3 Êndêŋ taŋ ŋamalac sêsôm gebe “Galoc biŋmalô gêc ma oc tamoa ŋajam” naŋ, gêŋsêga tau êtap êsêac sa gaôgeŋ amboac awê ŋapalê kêtuŋ eŋ, ma sêc su sêŋgôm naeo.  
\v 4 O lasitêwaac, aŋgôŋ tokesec atom, gebe bêc tau êtap amac sa êtôm geŋgeŋtêna atom,  
\v 5 gebe amac pebeŋ atu ŋawê latui to geleŋŋa latui. Aêac tatu gêbêcauc to ŋakesec ŋagêŋ atom.  
\v 6 Amboac tonaŋ aêac tanêc nêŋ bêc tatôm lau ŋagêdô atom, tanam jali tokauc ŋawageŋ acgom.  
\v 7 Lau, taŋ sêc bêc naŋ, sêc bêc gêdêŋ gêbêc. Ma êsêac, taŋ sênôm bu e kêjaŋiŋ êsêac naŋ, sêgôm nêŋ gêŋ gêdêŋ gêbêc.  
\v 8 Ma aêac, tec aŋga geleŋŋa nec, tamoa tonêŋ kauc ŋawageŋ acgom. Tanôŋ takêŋ gêwiŋ to têntac gêwiŋ ŋamaluku ma takuc takêŋ mateŋ moasiŋ Anôtô ênam aêac kêsiŋa ŋakululuŋ ki,  
\v 9 gebe Anôtô kêkêŋ aêac kêtu nê têtac ŋandaŋ enseŋ aêac suŋa atom. Eŋ kêkêŋ aêacnêŋ Apômtau Jesu Kilisi kêtu ênam aêac kêsi daŋgôŋ mateŋ jaliŋa.  
\v 10 Ŋac tau tonaŋ gêmac êndu kêtu aêacŋa gebe aêac tamoa mateŋ jali me tamac êndu, mago oc daŋgôŋ mateŋ jali dawiŋ eŋgeŋ.  
\v 11 Amboac tonaŋ amoasiŋ taôm to amboa taôm sa amboac agôm amoa.   
\s1 Paulu gêjac mata nê papia  
\p
\v 12 O lasitêwaac, aêac ateŋ amac gebe ajala êsêac, taŋ sêjam koleŋ aŋga amacnêm to sêjam gôliŋ amac ma sêmêtôc amac kêtu Apômtauŋa.  
\v 13 Atôc êsêac sa to têmtac êwiŋ êsêac êtu nêŋ koleŋŋa. Amoa tobiŋmalôgeŋ awiŋ taôm.   
\p
\v 14 O lasitêwaac, aêac alêŋ biŋ amac gebe amêtôc wauc-wauctêna ma aê biŋ malô sa êndêŋ lau ŋalêlôm ŋatutuc. Anam lau palê-palê sa ma aê samob nêŋ biŋ tôŋ.  
\v 15 Alic taôm gebe akêŋ sec êjô sec atom, amoasiŋ taôm to ŋamalac samob anac ŋawaegeŋ.   
\p
\v 16 Têmtac ŋajam ŋapaŋ.  
\v 17 Ateŋ mec ênêc awemgeŋ.  
\v 18 Anam daŋge êtu gêŋ samobŋa, gebe Anôtô, taŋ kêkêŋ Kilisi Jesu gêdêŋ amac naŋ, gebe nêm ŋalêlôm amboac tonaŋ.  
\v 19 Akôniŋ Ŋalau Dabuŋ atom.  
\v 20 Matempaŋa ênac biŋ, taŋ Ŋalau Nabuŋ geoc lasê naŋ atom.  
\v 21 Ansaê gêŋ samob ma ajaliŋ ŋanô sa.  
\v 22 Aŋgamiŋ taôm êndêŋ sec tokaiŋ-tokaiŋ samob.   
\p
\v 23 Biŋmalô ŋam Anôtô tau ênac dabiŋ amac atu dabuŋ ênam aucgeŋ, ma êmansaŋ nêm ŋalau to nêm ŋalêlôm ma ôlim amoa tolaŋômnêm sawageŋ e aêacnêŋ Apômtau Jesu Kilisi êmu êmêŋ.  
\v 24 Ŋac tau, taŋ kêkalem amac naŋ, eŋ ŋac ŋaŋêŋ, oc ênac dabiŋ e êmbacnê.   
\p
\v 25 O lasitêwaac, ateŋ mec êtu aêacŋa.   
\p
\v 26 Amac awem ênac lasitêwai samob ajô aêac su ma aê moalêc taôm to akôc taôm sa atôm Anôtônê launêŋ mêtê.   
\p
\v 27 Aê aoc gêjac Apômtau gebe asam papia tonec lasê êndêŋ lasitêwai samoo sêŋô.   
\p
\v 28 Aêacnêŋ Apômtau Jesu Kilisi nê moasiŋ êndêŋ amac êwac.