\id 1PE -Jabem partial Bible [jae] -Papua New Guinea 1980 (web 2015) \h PETERE 1 \toc1 PETERENÊ papia ŋamataŋa \toc2 Petere 1 \toc3 1Pe \mt1 PETERENÊ papia ŋamataŋa \ip Peterenê papia ŋamataŋa nec gêjac lau buŋa ŋawae, taŋ eŋ kêsam êsac gebe Lau jaba, taŋ “Anôtô kêjaliŋ êsêac sa” naŋ. Lau tau sêŋgôŋ kêsi-kêsigeŋ aŋga Asia Sauŋ ŋagamêŋ gêmu kêsêpŋa (ŋanodoŋa). Ac sêŋgôo saliŋ-saliŋ sêsêp lau samuc ŋalêlôm. Keto papia tonec gebe ênac sêsamwaga têntac tôŋ gebe lau sêjanda to sêlêsu êsêac kêtu nêŋ sêkêŋ gêwiŋ Anôtôŋa. Kêtu tonaŋŋa ŋac-ketowaga gêôŋ Jesu Kilisi nê Ŋawae Ŋajam sa gêdêŋ êsêac gebe taêŋ ênam to sêkêŋ mateŋ eŋ, taŋ gêmac êndu to gêdi sa ma gêjac mata gebe êmu êmêŋ êtiam naŋ. Êsêac tec sêsô nêŋ ŋandaŋ ŋalabu ma sêôc sêpuc tauŋ tôŋgeŋ gebe sêkêŋ gêwiŋ Anôtô toŋanôgeŋ ŋasaê teŋ tonaŋ. Ac taêŋ ênam êtu tôŋ gebe êndêŋ bêc Jesu Kilisi eoc tau lasêŋa, oc têtap nêŋ ŋagêjô ŋawasi sa. \ip Ketowaga êjam daŋ lau tau gebe sêôc gêŋwapac totêntac êpa sugeŋ ma kêkêli êsêac sêsa nêŋ lêŋ têtôm lau, taŋ têtu Kilisinê gêŋgac naŋ. \iot Ŋadênaŋ \ili1 1. Gêjac m papia tau 1:1-2 \ili1 2. Taêm ênam Anôtô gêjam kêsi ŋamoasiŋ 1:3-12 \ili1 3. Gêlêŋ biŋ gebe tamoa todabuŋgeŋ 1:13–2:10 \ili1 4. Daôc ŋandaŋ tapuc Kilisi wagamaŋ 2:11–4:19 \ili1 5. Tanam nêŋ sakiŋ todambu tauŋgeŋ 5:1-11 \ili1 6. Gêjac mata nê papia 5:12-14 \c 1 \s1 Petere awa gêjac lau \p \v 1 Jesu Kilisi nê aposolo aê, Petere, ŋoc biŋ êndêŋ lau jaba, taŋ Anôtô kêjaliŋ êsêac sa sêŋgôŋ kêsi-kêsigeŋ aŋga Pontu to Galatia ma Kapadokia to Asia ma Bitunia naŋ. \v 2 Tameŋi Anôtô taê gêjam kwanaŋgeŋ, tec kêjaliŋ amac sa ma kêkêŋ Ŋalau Dabuŋ gêwê amac asa lau Dabuŋ nêŋ lêŋ ma taŋem wamu Jesu Kilisi to aliŋ ênê dec e atu selec. Moasiŋ to biŋmalô êndêŋ amac êwac e ênam amac auc. \s1 Biŋ takêŋ mateŋŋa \p \v 3 Talambiŋ aêacnêŋ Apômtau Jesu Kilisi Tama Anôtô, taŋ taê walô aêac gêjam sêga. Eŋ gêŋu Jesu Kilisi aŋga ŋacmatênêŋ sa, tec kêkôc aêac tatu wakuc ma takêŋ mateŋ eŋ endeŋ tôŋgeŋ. \v 4 Eŋ gêgôm gêŋ tonaŋ gebe tawê kaiŋ gêŋlênsêm teŋgeŋŋa to ŋawasi, naŋ ê su atom. Anôtô kêmasaŋ gêŋlênsêm tau tonaŋ gêc undambê kwanaŋgeŋ kêtu amacŋa. \v 5 Anôtônê ŋaclai gejob amac gebe akêŋ êwiŋ e atap moasiŋ ênam amac kêsiŋa sa, taŋ eŋ kêmasaŋ kwanaŋgeŋ gebe êtu awê êndêŋ têm ŋamuŋa naŋ. \v 6 Êndêŋ tônê oc atu samuc. Galoc tecenec oc moae gêŋ amboac tonec ênac amac ŋawae gebe lêtôm tokaiŋtokaiŋ êkêŋ wapac amac têlageŋ acgom \v 7 e Anôtô ênsaê amacnêm akêŋ gêwiŋ tau gebe ŋanô. Ŋamalac sêsaê gold, taŋ kêtôm gebe oc ênaŋa naŋ, ŋa ja. Ma amacnêm akêŋ gêwiŋ, taŋ kêlêlêc gold tonaŋ su naŋ, oc êtap saê sa amboac tonaŋ, gebe êwaka tau sa gebe gêŋ ŋanô teŋ. Ma êndêŋ taŋ Jesu Kilisi eoc tau lasê naŋ, amac atap lambiŋ to ŋawasi to waem sa. \v 8 Ŋac tau tonaŋ amac alic eŋ atom, mago têmtac gêwiŋ eŋ. Amac matemanô kêpi eŋ galoc atom, mago akêŋ gêwiŋgeŋ e atu samuc eŋ totêmtac ŋajam ma totêmtac wapigeŋ naŋ. Ŋamalac sêwa biŋ tonaŋ ŋa jakêtôm atom. \v 9 Amac atu samuc gebe atap nêm akêŋ gêwiŋ ŋaŋanô sa. Ŋanô tau moasiŋ ênam katôm kêsiŋa. \p \v 10 Moasiŋ tau tonaŋ propete sêsôm to sêkip ŋam sa ma seoc moasiŋ ênam amac kêsiŋa, taŋ amac atap sa naŋ lasê. \v 11 Kilisinê Ŋalau, taŋ gêmoa êsêacnêŋ ŋalêlôm naŋ, geoc lasê gebe Kilisi êôc ŋandaŋ e su acgom, go êmoa toŋawasigeŋ. Êsêac sebe sêkip biŋ tonaŋ ŋanoc sa gebe êmêŋ êndêŋ ondoc ma êmêŋ amboac ondoc. \v 12 Anôtô geoc lasê gêdêŋ propete tonaŋ gebe biŋ tonaŋ ênam êsêac tauŋ sa atom, ênam amac sa. Lau taŋ sêsôm ŋawae ŋajam gêdêŋ amac sêsôm bi ŋ, taŋ propete sêwa sa naŋ, lasê gêdêŋ amac. Ma Ŋalau Dabuŋ, taŋ Anôtô kêsakiŋ aŋga undambê gêmêŋ naŋ, kêpuc êsêac tôŋ. Ŋawae tonaŋ aŋela tauŋ têtu kêka-kêka ŋanô gebe sêjala sêwiŋ. \s1 Anôtô kêkalem aêac gebe tasa lêŋ dabuŋ \p \v 13 Amboac tonaŋ amansaŋ nêm kauc ŋajaŋa êsa ma nêm ŋalêlôm tekwem sakigeŋ, ec akêŋ matem moasiŋ, taŋ Jesu Kilisi eoc tau lasê ma êkêŋ êndêŋ amac naŋ. \v 14 Atôm Anôtônê ŋapalê taŋem wamuŋa, ma têmtac ŋakalac, taŋ kêkac amac gêdêŋ taŋ nêm kauc kêsa atomgeŋ naŋ, ênam gôliŋ amac êtiam atom. \v 15 Atôm ŋac dabuŋ tau, taŋ kêkalem amac naŋ, ma asêlêŋ to asa nêm lêŋ samob atôm lau dabuŋgeŋ, \v 16 gebe teto biŋ gec gebe “Amac atu lêu dabuŋ, gebe aê tauc dabuŋ.” \p \v 17 Amac embe awem ênac Anôtô, taŋ êmêtôc ŋamalac êndêŋ-êndêŋgeŋ atôm nêŋ koleŋgeŋ ma êpuc opeŋ ŋac teŋ atom naŋ, ma embe asam eŋ gebe Tamemi, go asa nêm lêŋ toatêc eŋgeŋ êtôm têm amoa gamêŋ jaba tonecŋa. \v 18 Amac alicgac gebe awa, taŋ ê su amboac gold to silber naŋ, kêsi amac su aŋga lêŋ sec, taŋ gelom amac aŋga abeminêŋ naŋ, ma mêŋamoa nêm lêtêgeŋ nec atom. \v 19 Kilisinê dec kêtu awa ŋanô tau, tec kêsi amac su. Eŋ kêtôm domba ŋabiŋmê to ŋajamanô teŋ, \v 20 Anôtô kêjaliŋ eŋ sa gêdêŋ taŋ kêkêŋ undambê to nom atomgeŋ naŋ, tec kêkêŋ eŋ mêŋkêtu awê gêdêŋ têm ŋamuŋa tonec kêtu amacŋa. \v 21 Eŋ kêkêŋ amac akêŋ gêwiŋ Anôtô, taŋ gêŋu eŋ sa aŋga ŋacmatênêŋ ma kêkêŋ ŋawasi gêdêŋ eŋ naŋ. Amboac tonaŋ amac akêŋ gêwiŋ to akêŋ matem apeŋ Anôtôgeŋ. \p \v 22 Amac taŋem wamu biŋŋanô, tec gêgôm amac katôm ŋawa kêsa ma gêgôm amac têmtac gêwiŋ lasitêwai ŋanôgeŋ. Amboac tonaŋ akêŋ têmtac gêwiŋ elom tau tonêm ŋalêlôm samucgeŋ. \v 23 Amac atu wakuc ŋam kêsêp ŋawê, taŋ ênaŋa naŋ atom, kêsêp ŋawê, taŋ ênêc ŋapaŋ. Ŋawê tau Anôtônê biŋ mata jali, taŋ ênêc teŋgeŋ naŋ, \v 24 gebe \q1 “Ŋamalac samob têtôm gêgwaŋ, \q1 ma nêŋ ŋawasi samob kêtôm gêgwaŋ ŋaola. \q1 Gêgwaŋ kêmêliŋ, \q1 ma ŋaola kêsêlô. \q1 \v 25 Mago Apômtaunê biŋ oc ênêc teŋgeŋ.” \m Ma biŋ tau tonaŋ ŋawae ŋajam, naŋ sêsôm gêdêŋ amac. \c 2 \s1 Poc mata jali to lau dabuŋ \p \v 1 Amboac tonaŋ akwalec nêm biŋ sec totau-totau to biŋdansaŋ samob ma ajam biŋ auc to têmtac sec ma biŋ gêga samob su. \v 2 Atôm ŋapalê dedec, taŋ têtaŋ su naŋ, ma ataŋ su ŋanô mêtê ŋawa tau, gebe atôp atu kapôêŋ e atap moasiŋ ênam amac kêsiŋa sa. \v 3 Amac asaê sugac gebe Apômtau eŋ ŋajam. \v 4 Amac andêŋ poc mata jali, Apômtau tau, ana. Ŋamalac têtiŋ eŋ siŋ su, mago Anôtô kêjaliŋ eŋ sa ma gêlic eŋ amboac poc awamata ŋanô teŋ. \v 5 Ma Anôtô êkwê amac sa amboac poc mateŋ jali atu Ŋalau Dabuŋ nê andu to atu dabuŋwaga dabuŋ, gebe akêŋ da ŋalêlômŋa, taŋ ênac Anôtô mataanô ŋajam êtu Jesu Kilisiŋa, \v 6 êtôm teto gêc gebe \q1 “Alic acgom, aê kajaliŋ poc awamata ŋanô teŋ sa kêtu poc kêclêsuŋa \q1 ma kasuŋ kêkô Sion. \q1 Ŋac taŋ kêkêŋ gawiŋ eŋ naŋ, oc ênaŋa atom.” \m \v 7 Poc tau tonaŋ kêtu amac akêŋ-gêwiŋ-waga nêm awamata ŋanô. Mago êndêŋ êsêac, taŋ sêkêŋ gêwiŋ atom naŋ, \q1 “poc taŋ lau-sêkwêwaga sêbaliŋ siŋ naŋ, \q1 kêtu poc kêcŋsuŋa,” \m \v 8 ma \q1 “kêtu poc sêndiŋ eŋkaiŋ êpiŋa \q1 to poctêna êŋgôm lau têntac êmbôli aucŋa.” \m Êsêac taŋ sêkêŋ gêwiŋ Anôtônê biŋ atom naŋ, dêdiŋ eŋkaiŋ kêpi poc kêtôm Anôtô kêmasaŋ ŋabiŋ kwanaŋgeŋ. \p \v 9 Mago amac atu gôlôac, taŋ Anôtô kêjaliŋ sa naŋ. Amac atu kiŋnê dabuŋwaga to lau dabuŋ m teŋ. Amac atu Anôtônê lau solop, tec asôm Ŋac, taŋ kêkalem amac aŋga ŋakesec adêŋ ênê ŋawê kaiŋ teŋ aja naŋ, nê gêŋtalô ŋawae lasê. \v 10 Gêmuŋgeŋ atu Anôtônê lau atom, mago galoc atu ênê lau. Gêmuŋgeŋ amac atap Anôtônê taê walô sa atom, mago galoc eŋ taê walô amac. \s1 Tasa lêŋ êtôm Anôtônê sakiŋwaga \p \v 11 O lauace, aê jalêŋ biŋ amac, taŋ amoa amboac lau waba to lau jaba naŋ, êŋgamiŋ taôm êndêŋ têmtac ŋakalac, taŋ gêjac siŋ gebe enseŋ katôm su naŋ. \v 12 Asa nêm lêŋ amoa lau samuc ŋalêlôm tolaŋômnêm sawageŋ. Go êsêac, taŋ sêŋgôliŋ biŋ êpi amac gebe agôm secŋa naŋ, sêsala amacnêm koleŋ ŋajam ma sêlambiŋ Anôtô êndêŋ bôc eŋ êô lasêŋa. \p \v 13 Asô ŋamalacnêŋ ŋagôliŋ samob ŋalabu êtu Apômtauŋa. Asô kiŋ, taŋ kêtu ŋatau ŋamataŋa naŋ ŋalabu, \v 14 to asô gôliŋwaga, taŋ eŋ kêsakiŋ êsêac gebe sêkêŋ ŋagêjô êndêŋ lau, taŋ sêgôm sec to sêlambiŋ lau, taŋ sêjam kôm ŋajam naŋ, ŋalabu amboac tonaŋgeŋ. \v 15 Gebe Anôtô taê gêjam biŋ amboac tonec gebe amac anam kôm ŋajam gebe êmbaob lau meloc, taŋ sêjam kauc biŋ naŋ, aweŋ auc. \v 16 Asa lêŋ tau amboac lau, taŋ Kilisi kêgaboac Êsêac su naŋ. Mago kêgaboac amac su ŋamoasiŋ êtu sec ŋasabaŋ atom. Atu Anôtônê sakiŋwaga. \v 17 Atôc lau samob sa ma têmtac ôwiŋ gôlôac, taŋ têtu nêm lasitêwai naŋ. Atêc Anôtô ma atoc kiŋ sa. \s1 Kilisi gêôc ŋandaŋ êtu ŋadôŋdôŋ êndeŋ aêac \p \v 18 Amac sakiŋwaga asô nêm ŋataui ŋalabu to atoc êsêac sa. Asô ŋataui ŋajam to wapôm tauŋgeŋ ŋalabu atom, asô ŋataui keso ŋalabu êwiŋ. \v 19 Ŋac teŋ embe nê ŋalêlôm êsap Anôtô tôŋ ma êôc wapac êtu biŋ tageŋ tonaŋŋa, naŋ Anôtô oc ênam mec eŋ. \v 20 Embe têtap amac to aôc wapac êtu agôm secŋa, naŋ oc êkêŋ amac waem amboac ondoc. Mago embe sêkêŋ ŋandaŋ êndêŋ amac to aôc wapac êtu agôm ŋajamŋa, naŋgo Anôtô ênam mec amac. \v 21 Kêtu biŋ tonaŋŋa tec Anôtô kêkalem amac, gebe Kilisi gêôc ŋandaŋ kêtu amacŋa. Eŋ kêtu ŋadôŋdôŋ gêdêŋ amac gebe apuc eŋ waŋa. \v 22 Eŋ gêgôm sec teŋ atom ma têtap biŋdansaŋ teŋ sa kêsa eŋ awasuŋ atom. \v 23 Êsêac sêbu eŋ, ma eŋ gêbu êsêac ŋagêjô atom. Sêkêŋ eŋ gêôc ŋandaŋ, mago eŋ kêkôtêŋ lêma gêdêŋ êsêac atom. Eŋ gêliŋ nê biŋ samob su gêdêŋ ŋac, taŋ êmêtôc biŋ ŋaŋêŋŋa naŋgeŋ gêja. \v 24 Aêacnêŋ sec kêpi eŋ tau ôli ma eŋ kêkôc sec tau sa kêpi ka gêja, gebe tatu mêtê êndêŋ sec, ma mateŋ jali êsa êndêŋ biŋgêdêŋ. Ênê sêm ŋamala gêgôm amac ŋajam kêsa. \v 25 Gêmuŋgeŋ amac amoa amboac domba sêbôm, mago galoc Anôtô gêjam amac ôkwi adêŋ ŋacgejob, taŋ gejob amac katôm naŋ aja. \c 3 \s1 Lauo to ŋac nêŋ biŋ \p \v 1 Amac lauo asô nêm ŋaci ŋalabu amboac tonaŋgeŋ. Ŋacwaga ŋagêdô embe sêkêŋ êwiŋ Anôtônê biŋ atom, go lauo sêsôm biŋ teŋ atom, nêŋ Iêŋgeŋ êŋgom ŋacwaga sênam tauŋ ôkwi, \v 2 gebe ŋacwaga sêlic amac asa nêm lêŋ gêdêŋ to atêc Anôtôgeŋ, ec sêndaŋguc. \v 3 Anam gêlôŋ taôm ŋa gêŋ dêmôêŋa amboac môkêmlauŋ ŋapoactalô tokaiŋtokaiŋ ma anôŋ gold ŋawasi to asô ŋakwê ŋajam-ŋajam nec atom. \v 4 Anam gêlôŋ taôm ŋa gêŋ ŋalêlômŋa, taŋ ê su atom naŋ. Gêŋ tau tonec gebe amoa tonêm ŋalêlôm malô to ŋaŋêŋ gebe gêŋ tonaŋ ŋai Anôtô gêlic amboac awamata ŋanô. \v 5 Andaŋgeŋ lauo dabuŋ, taŋ sêkêŋ mateŋ Anôtô naŋ, sêjam gêlôŋ tauŋ ŋa awamata tonaŋ, ma sêsô nêŋ ŋaci ŋalabu ŋapep. \v 6 Sara kêtôm tonaŋ. Eŋ taŋa wamu Abraham ma kêsam eŋ gebe Ŋoc apômtau. Amac embe aŋgôm gêŋ ŋajam to atêc gêŋ teŋ atom, go atu Sara latuio. \p \v 7 Amac ŋacwaga amboac tonaŋ. Awiŋ nêm lauo tokaucgeŋ, gebe êsêac ôliŋwalô kêtôm amac atom. Atoc êsêac sageŋ gebe êsêac sêwê kaiŋ moasiŋ daŋgôŋ mateŋ jaliŋa amboac tonaŋ. Aŋgôm geŋ tau gebe gêŋ teŋ êkô amacnêm mec auc atom. \s1 Daôc ŋandaŋ êtu biŋgêdeŋŋa \p \v 8 Aê jakatoŋ ŋoc biŋ sa amboac tonec gebe Amac samob nêm biŋ elom tau ŋajam. Aôc gêŋwapac awiŋ taôm, têmtac êwiŋ lasitêwai to atoc taôm sa atom, êkôniŋ taômgeŋ. \v 9 Akêŋ sec êjô sec atom ma biŋ alôb-alôb êjô biŋ alôb-alôb atom, akêŋ mecgeŋ êjô. Taêm ênam gebe Anôtô kêkalem amac gebe awê kaiŋ mec êtu nêm gêŋlênsêm. \p Gebe teto gêc gebe \q1 \v 10 “Ŋac taŋ têtac gêwiŋ gebe êmoa mata jali \q1 ma gebe êmoa ŋajamgeŋ naŋ, \q1 ejop imbêla êndêŋ biŋ sec \q1 to gêdôôlic êndêŋ biŋdansaŋ. \q1 \v 11 Eŋ ênac jaê sec to êŋgôm gêŋ ŋajam. \q1 Eŋ ensom biŋmalô ma êndaŋguc e naê tôŋ, \q1 \v 12 gebe Apômtau mata kêsap lau gêdêŋ \q1 ma kêkêŋ taŋa nêŋ mec. \q1 Mago Apômtau laŋô gelo lau, taŋ sêgôm sec naŋ.” \p \v 13 Embe aŋgôm ŋajam atu dôbgeŋ, ma asa oc êŋgôm amac atu sec. \v 14 Embe aôc gêŋwapac êtu adaguc biŋ gêdêŋŋa, go aê aoc êôc amac. Ŋamalacnêŋ biŋ êtakê to êlênsôŋ amac atom. \v 15 Atôc Kilisi sa aŋga nêm ŋalêlôm ma akêŋ eŋ êtu nêm Apômtau. Amansaŋ taôm ŋapaŋ e lau teŋ embe teteŋ amac gebe awa biŋ, taŋ akêŋ matem gêc nêm ŋalêlôm naŋ sa, naŋgo gaôgeŋ asôm lasê êndêŋ êsêac. \v 16 Aŋgôm totêmtac malô ma ajop taômgeŋ, gebe nêm ŋalêlôm ŋajam, ec êŋgôm êsêac, taŋ sêgôliŋ biŋ kêpi amac to sêbu amac, taŋ asa Kilisinê lêŋ ŋajam naŋ majeŋ. \v 17 Anôtô embe taê ênam gebe aôc ŋandaŋ êtu agôm ŋajamŋa naŋ, oc ŋajam êlêlêc aôc ŋandaŋ êtu agôm secŋa su. \v 18 Kilisi amboac tonaŋ. Eŋ gêmac êndu kêtu dim tageŋ kêtu aêacnêŋ secŋa. Ŋac gêdêŋ gêjô aêac lau gêdêŋmê su, gebe êwê aêac dandêŋ Anôtô tana. Êsêac sêjac eŋ ôligeŋ êndu, mago Ŋalau kêkêŋ eŋ mata jali kêsa. \v 19 Ma toŊalaugeŋ gêja gêjam mêtê ŋalau, taŋ sêŋgôŋ kapoacwalô naŋ. \v 20 Gêdêŋ andaŋgeŋ êsêac sêkêŋ gêwiŋ Anôtônê biŋ atom. Anôtô kêsaê êsêac to gê êsêacnêŋ biŋ tôŋ gêdêŋ taŋ Noa gêsô waŋ gêmoa naŋ. Waŋ tonaŋ gêjam lau 8geŋ sa selom bu kêsuŋ ŋatêna. \v 21 Bu tonaŋ kêtu busaŋgu, taŋ galoc gêjam amac kêsi naŋ ŋadôŋdôŋ. Busaŋgu tau êkwasiŋ ŋatêmui ôliŋŋa su atom, mago êtu môêc endeŋ Anôtô gebe êmansaŋ ŋalêlôm ŋawa êsa êtu Jesu Kilisi gêdi saŋa. \v 22 Eŋ kêpi undambê gêja jagêŋgôŋ Anôtônê anôŋa, ma aŋela to ŋaclai ma ŋactêkwa sêsô eŋ ŋalabu. \c 4 \s1 Tanam tauŋ ôkwi ma tasa lêŋ wakuc \p \v 1 Kilisi gêôc ŋandaŋ kêpi tau ôli. Amboac tonaŋ amansaŋ taôm e nêm ŋalêlôm êtôm ênê acgom, gebe ŋac, taŋ gêôc ŋandaŋ kêpi tau ôli naŋ, sec kêlêwaŋ eŋ. \v 2 Tec ŋamalacnêŋ têntac ŋakalac ênam gôliŋ amac êndêŋ têm amoa nomŋa êtiam atom, Anôtônê biŋgeŋ ênam gôliŋ amac. \v 3 Gêdêŋ têm, taŋ gêjaŋa su naŋ, amac agôm lau samuc nêŋ biŋ kêtu tôŋ, tec kêtômgac. Amac asa nêm lêŋ mockaiŋo to mockaiŋŋa ma amoa totêmtac ŋakalac. Gêŋ kêjaŋiŋ amac ma aeŋ lasam to anôm anaboa aŋgôŋ awiŋ taôm to ajam sakiŋ gêdêŋ gwam aseŋ Anôtônê biŋsu su. \v 4 Ma galoc asêlêŋ awiŋ lau samuc ma asa nêŋ lêŋ wauc-waucgeŋŋa kêtiam atom, tec sêlic sec ma sêsôm biŋ alôb-alôb kêpi amac. \v 5 Mago êsêac oc sêwa nêŋ biŋ sa êndêŋ ŋac, taŋ kêmasaŋ tau su gebe êmêtôc mateŋ jali to ŋacmatê nêŋ biŋ naŋ. \v 6 Kêtu biŋ amboac tonaŋŋa eŋ kêsôm ŋawae ŋajam lasê gêdêŋ ŋacmatê gebe êsêac têtap mêtôc sa kêtôm ŋamalac têtap sa, mago ŋalau sêmoa mateŋ jali kêtôm Anôtô gêmoa mata jali. \p \v 7 Gêŋ samob ŋatêku êsuŋa ŋanoc kêdabiŋgac. Amboac tonaŋ taêm ênam taôm ma ateŋ nêm mec totekwem sakigeŋ. \v 8 Tonec tec tasôm êtu ŋamata gebe akêŋ têmtac gêwiŋ elom tau ŋanôgeŋ gebe têntac gêwiŋ êŋgênduc sec samob auc. \v 9 Aŋgôm ja lau atu môsi atom. \v 10 Anam sakiŋ taôm êndêŋ-êndêŋgeŋ êtôm moasiŋ, taŋ akôc naŋ, ma atu Anôtônê moasiŋ tokaiŋ-tokaiŋ ŋagejobwaga ŋajam. \v 11 Ŋac teŋ embe ênam mêtê, naŋ êsôm êtôm Anôtônê biŋgeŋ. Teŋ embe ênam sakiŋ, naŋ ênam êtôm ŋaclai, taŋ Anôtô kêkêŋ gêdêŋ eŋ naŋ. Aŋgôm gêŋ samob tonaŋ gebe Anôtônê ŋawasi êsa êtu Jesu Kilisiŋa. Ŋawasi to ŋajaŋa êndêŋ eŋ teŋgeŋ ma teŋgeŋ. Biŋŋanô. \s1 Daôc ŋandaŋ tatôm Kilisine lau \p \v 12 O lauace, alic ŋandaŋ, taŋ kêlêtôm amac gêmoa naŋ, amboac gêŋ kaiŋ teŋ, taŋ kêtap amac sa naŋ atom. \v 13 Têmtac ŋajam êsa gebe awê kaiŋ Kilisinê ŋandaŋ awiŋ. Ma êndêŋ noc eŋ eoc nê ŋawasi lasêŋa naŋ, amac oc atu samuc totêmtac ŋajamgeŋ. \v 14 Embe sêmbu amac êtu Kilisinê ŋaêŋa, oc aoc êôc amac, gebe Anôtônê Ŋalau ŋawasi wacêpi amac. \v 15 Amacnêm teŋ êôc ŋandaŋ amboac ŋac, taŋ gêjac ŋamalac êndu me gêjam geŋgeŋ gêŋ me gêgôm sec me kêgabec launêŋ kôm paliŋ-paliŋgeŋ naŋ atom. \v 16 Mago amac embe aôc ŋandaŋ atôm Kilisinê lau, naŋ majem atom. Alambiŋ Anôtô gebe kêkêŋ amac awê kaiŋ ŋaê tonaŋ. \p \v 17 Noc kêdabiŋ gebe Anôtô êmêtôc biŋ ênac m aŋga eŋ tau nê gôlôac. Embe êŋgôm êndêŋ aêac amboac tonaŋ, ma êsêac, taŋ taŋeŋpêc gêdêŋ Anôtônê ŋawae ŋajam naŋ, oc êŋgôm êsêac amboac ondocgeŋ. \q1 \v 18 “Anôtô embe ênam lau gêdêŋ kêsi, oc ŋalêŋ ŋawapac, \q1 ma lau geo to lau sec oc amboac ondoc.” \m \v 19 Amboac taŋ êsêac, taŋ sêôc ŋandaŋ kêtôm Anôtô taê gêjam naŋ, sêsa nêŋ lêŋ ŋajam to sêsakiŋ katuŋ êndêŋ ŋac ŋaŋêŋ, taŋ kêkêŋ gêŋ samob naŋ. \c 5 \s1 Tajop Anôtônê domba \p \v 1 Aê jalêŋ biŋ laumata, taŋ sêmoa amac ŋalêlôm naŋ. Aê laumata teŋ katôm amac ma galic Kilisi gêôc ŋandaŋ ma oc jawê kaiŋ ŋawasi, taŋ mêŋêtu awê êtu ŋamu naŋ. \v 2 Ajop Anôtônê domba ŋatoŋ, taŋ kêkêŋ gêdêŋ amac naŋ, ma ajop êtu sêkac amacŋa atom. Taôm aŋgôm anac ŋawae êtôm Anôtônê biŋ. Aŋgôm êtu awa geoŋa atom, aŋgôm êtu nêm sakiŋ topalêgeŋŋa. \v 3 Ajop êsêac, taŋ sêsêp amac lemem naŋ amboac gôliŋwaga, taŋ sêkôniŋ nêŋ gôlôac naŋ atom. Atu ŋadôŋdôŋ ŋajam êndêŋ nêm domba ŋatoŋ. \v 4 Ma gejobsêga tau embe êô lasê, go amac akôc ŋawasi ŋasunsuŋ, taŋ ênaŋa atom naŋ. \p \v 5 Amac lau wakuc amboac tonaŋ. Asô lau ŋanô ŋalabu. Amac samob akôniŋ taôm to anam sakiŋ taôm êndêŋ-êndêŋgeŋ, êtôm teto gêc gebe \q1 “Anôtô êkô lau, taŋ tetoc tauŋ sa naŋ auc, \q1 ma êkêŋ moasiŋ êndêŋ êsêac, taŋ sêkôniŋ tauŋ naŋ.” \p \v 6 Amboac tonaŋ akôniŋ taôm asô Anôtônê lêma ŋajaŋa ŋalabugeŋ, ec etoc amac sa êndêŋ ŋanoc. \v 7 Gêŋwapac samob, taŋ kêkôniŋ amac naŋ, apô êpi eŋ êna, gebe eŋ gejob amac. \v 8 Tekwem saki ma anam jaligeŋ, gebe amacnêm ŋacjo Sadaŋ kêsêlêŋ kêtaŋ-kêtaŋ amboac lewe ma gesom nê gêŋ gebe êndaŋgôŋ. \v 9 Aŋgamiŋ taôm êndêŋ eŋ ma akêŋ êwiŋ ŋajaŋa. Ma ajala gebe amacnêm lasitêwai, taŋ sêmoa nom ŋagamêŋ samob naŋ, sêôc ŋandaŋ tau tonaŋ têtôm amac. \v 10 Moasiŋ samob ŋatau Anôtô, taŋ gêbiŋ amac to Kilisi tôŋ naŋ, kêkalem amac gebe akôc ênê ŋawasi teŋgeŋŋa. Oc akôc ŋandaŋ têlageŋ ma eŋ tau mêŋênac dabiŋ amac to êpuc amac tôŋ, ma êkêŋ ŋaclai êndêŋ amac to ênsuŋ amac sa akô ŋajaŋa. \v 11 Ŋajaŋa êndêŋ eŋ endeŋ tôŋgeŋ. Biŋŋanô. \s1 Petere gêjac mata nê biŋ \p \v 12 Aê kato papia dambê tonaŋ gêdêŋ amac ma lasic Silwana, taŋ galic eŋ amboac ŋac ŋaŋêŋ naŋ, gêjam aê sa. Aê galêŋ biŋ to gawa sa gêdêŋ amac gebe Anôtônê moasiŋ ŋanô tau tonec. Akô ŋajaŋa akô moasiŋ tau ŋalêlôm. \v 13 Gôlôac dabuŋ aŋga Babel, taŋ Anôtô kêjaliŋ êsêac sa sêwiŋ naŋ, aweŋ gêjac amac, ma latuc Marka amboac tonaŋgeŋ. \v 14 Aê moalêc taôm to akôc taôm sa totêmtac êwiŋgeŋ. \p Biŋmalô êndêŋ amac samob, taŋ Kilisi gêbiŋ amac tôŋ naŋ êwac.