\id PHP Iyaa (YAK) NT en Kiyaka
\ide UTF-8
\h Mukaanda a Pawuli kwaa basi Filipi
\toc3 Flp
\toc2 Filipi
\toc1 Mukaanda a Pawuli kwaa basi Filipi
\mt2 Mukaanda kwaa basi Filipi
\mt1 Basi Filipi
\imt Kotili a mukaanda
\ip Pawuli abali libuundu la ku Filipi, mu taanga dia midieenge mia nde mia isala kia Nziaambi, mia mbala ya dioolo. Libuundu li, lili libuundu la tsiomi li Pawuli abali mu matsi ma Putu. Ngaanda a Filipi yili ku taanda a tsi ya kuumbu Eleene ku peembi ya Esete, mu itinini kia Masedwane.
\ip Mukaanda a Pawuli kwaa libuundu la Filipi, li mu umweese itwaari kia mifuri kili nha kati tumu Pawuli na libuundu. Pawuli li na matsimi ma ubwahamisa lo. Nde li mutso perese ku ngaanda a Looma. Nde li mu umono pasi bu ali utu pe usala na ubasila basi Filipi. Nde tooni uyaabisa bo mandaa ma litoono la nde mu bo. Nde li mu uleele kwaa bo ka ti, nde li na ngebe. Mundaa ti, baata bakimi bali mu uyaabisa bo Ndaa Yimbwe, mu matsimi mamabi paa badiimbisi bo (\xt 1.15-17; 2.21; 3.2,18\xt*). Pawuli li na ilimbisi kia utsinduu bambaayi ba nde ba isala kia Nziaambi ku Filipi, paa bahamisa libuundu na baholo mamvuungu ma bo (\xt 2.19-30\xt*). Basi Filipi, ali batsinduu bimbwangi kwaa Pawuli (\xt 4.10-20\xt*). Ni mu buu, mu mukaanda wu, Pawuli li mu uvutulu bo matoondo, li mu uha bo mandongi na li mu uhamisa bo mu imiini kia bo.
\ip Pawuli li mu usuusu nha kulu a misi mia basi Filipi \em moonyi na likwa la Pfumu Yiisu\em* (\xt 2.6-11\xt*). Yiisu asiisi bioosi bi nde ali na bio. Mu ndaa yii, Nziaambi abiaalisi nde nha yulu a bisii bioosi na nha yulu a baata boosi. Ni buu ka, Pawuli anyaali ndaanda yi Bayuudayo bakiha nde tsiomi (\xt 3.3-10\xt*). Mu taanga di, nde li mu usiingi umono pasi mundaa Yiisu Kristo. Nde li mu perese, ku nde amaayilimi mu uha idiingi kia nde. Ka nde li uhama mu usa ilimbisi ti, mbari nde sa asiimbuu mu babakwa. Tumu Pawuli li mu uloombo kwaa basi Filipi mu uduku ifwaani kia nde (\xt 3.17; 4.9\xt*).
\ip Kutso ndukisini a mukaanda, Pawuli li mu utsuu mu kinya yi imiini ili mu uha. Nde li mu uhamisa basi Filipi mu uba \em moonyi kutso imiini\em*. Imiini ki ili mu umonuu mu ndeeyili na mapasi, mu taanga di balibuundu bali bavuutunu itwaari na Pfumu Yiisu.
\ie
\c 1
\s Mabwee
\p
\v 1 Me Pawuli na Timoteo, bali basiali ba Yiisu Kristo. Bisi disionii mukaanda wu kwaa baata ba Nziaambi boosi mu itwaari kia bo mu Yiisu Kristo, babali ku ngaanda a Filipi, kwaa bakuutu na bakebi ba libuundu. 
\v 2 Nyaala Nziaambi Taayi a bisi na Pfumu Yiisu Kristo basieme beni na uha beni iyeenge!
\s1 Pawuli li mu uvutulu matoondo kwaa Nziaambi mu ndaa bangaa Kristo ba ku Filipi
\p
\v 3 Me ndi mu uvutulu matoondo kwaa Nziaambi, mu pasi taanga di me ndi mu utsimi mu beni! 
\v 4 Mu pasi taanga di me ndi mu ukuundu Nziaambi mu beni boosi, me ndi mu ukuundu mu kinya. 
\v 5 Mundaa ti, beni diabaasili bisi mu uyaabisa Ndaa Yimbwe, umata iluumbu kia tsiomi, natee lolo. 
\v 6 Me ndi na imiini mu ndaa yi: Nziaambi wabaanduu isala ki ibwe kiinaki nha kati a beni, sa adukusu kio natee ku manini a kio, mu iluumbu ki Yiisu Kristo akaayiri avutuu. 
\v 7 Bwafwaana kwaa me mu uba na matsimi ma buu mu beni boosi. Mundaa ti, me natoono beni mu mutimi a me. Yaba mu taanga di me ndi kori di, so a buu pe, mu taanga di me ndi mu uhama mu ukala Ndaa Yimbwe mu uyaabisa yo kwaa baata, beni boosi dili na ikuku mu bweese ba Nziaambi aha kwaa me. 
\v 8 Ngwanya, Nziaambi li mbaangi a me: me ndi na nzala umono beni boosi. Mundaa ti, me natoono beni mu buleembi ba Yiisu Kristo.
\p
\v 9 Me ndi mu uloombo kwaa Nziaambi mu likuundu la me ti litoono la beni libaapfunanga, mu nziaabili na mbahala yakuu, 
\v 10 paa beni diyaaba usoolo miavulu tala. Ni buu, beni sa diba babatsieeme na babahele na toono mu iluumbu kia nziriri a Kristo. 
\v 11 Beni sa diluulu mu biafwaana na litoono la nde. Kii ni idiingi ki Yiisu Kristo aha beni, paa biyiluu bii biha buzitu na mbilili kwaa Nziaambi.
\s1 Ndaa Yimbwe yili mu utsaamuu
\p
\v 12 Baana banguu, me natoono ti beni diyaaba ndaa yi: mandaa mayirili me, mabaasila Ndaa Yimbwe mu uyene makukulu. 
\v 13 Ni mu buu, masodaare moosi mali mu ukebe nzo a mutumi, na mu mapeembi makimi, bayaaba ti me ndi kori mu ndaa isala kia Kristo. 
\v 14 Baana ba nguu babalayi, bu bayuyi ti me ndi mu perese, babayi ilimbisi kialaa mu Pfumu, na basi mifuri mu uyiisi Mandaa ma Nziaambi, kwahele a boomo.
\p
\v 15 Ngwanya, baata babamosi nha kati a bo bali mu uyaabisa Kristo mu muheebili wa musoyi na muheebili wa makaama. Ka bakimi bali mu uyaabisa nde mu matsimi mamabwe. 
\v 16 Babamosi bali mu uyiisi mu mutimi wu mubwe, bo bali mu uyiluu buu mu litoono. Mu ndaa ti, bo bayaaba ti ni mu ukala Ndaa Yimbwe me ndi nha. 
\v 17 Bakimi bali mu uyiisi Kristo mu muheebili wa kabini. Matsimi ma bo a mali pe mamatsieeme. Bo bali mu utsimi ti, bu bo bali mu usa buu, idiingi kia me mu perese sa ibwavulu pasi. 
\v 18 Ka yii a yili ndaa pe! So matsimi ma bo mali mamabwe, so a buu pe mamabi, ndaa yavulu tala yili ti bo bali mu uyiisi Kristo. Na mu yii, me ndi na kinya! Me sa baabaanganga na kinya. 
\v 19 Mundaa ti, me nayaaba ti mandaa maa moosi, sa masa ti Nziaambi ayobolo me, mu toono a makuundu ma beni na mu libaasila la Muheebili a Yiisu Kristo. 
\v 20 Ngwanya, me nasa ilimbisi kia mufuri ti, iloo so imosi pe ikaakoonoso me mu uleele mioosi mi me ndi na mio. Me li mu ukebe mu taanga di weti mu taanga dikaayira, Kristo wukaamweese bunene ba nde mu nyutu a me, so me ndi moonyi, so me kwiiri.
\p
\v 21 Mundaa ti, mu me, moonyi ni Kristo, na likwa ni ndaanda. 
\v 22 Ka so uba moonyi nha tsini a toto nha, utuu baasila me mu ubwayiluu ndaa ya ndutu, nhaa ka me a nayaaba pe, ima nafwaana usoolo. 
\v 23 Me ndi nha kati a matsimi moolo. Tsimi ya tsiomi ni yili ti, me ndi na nzala usiisi idiingi ki, mu uba na Kristo, yii ni tsimi yavulu bubwe. 
\v 24 Ka ya moolo yabwavulu ndutu, yo ni yili ti, me ba moonyi nha tsini a toto nha mu ndaa a beni. 
\v 25 Weti bu me ndi na imiini mu ndaa yi, me nayaaba ti me sa hama mu uba moonyi na beni boosi, mu ubaasila beni mu uyene makukulu na uba na kinya mu imiini. 
\v 26 Ni mubuu, bu me kaabwayiri kwaa beni, beni sa dibwayiluu uba na kinya mu itwaari kia beni na Yiisu Kristo.
\s Uduku ifwaani kia Kristo
\p
\v 27 Ka diba na ndiaatili yafwaana na Ndaa Yimbwe ya Kristo. Diyiluu buu paa ti, so me yimono beni, na so me hele uyamono beni, nyaala me yuu ti beni dili mu uyiluu uba itwaari mu muheebili mosi. Na ti beni dili mu udwaana itwaari mu mutimi mosi mundaa imiini mu Ndaa Yimbwe. 
\v 28 A dinyaala pe ti mitaata mia beni miha beni boomo. Yii sa yiba kwaa bo, iliimbi kia pfuuyili a bo. Kwaa beni, kio ili iliimbi kia liyobolo, na kio ili mu umata kwaa Nziaambi. 
\v 29 Mundaa ti, beni dimaabaa bweese ba usalila Kristo. A mu ndila usuusu imiini kia beni mu nde pe, ka na mu ubwamono pasi mu nde. 
\v 30 Mu taanga di, beni dili mu udwaana mudiingi mosi na wu beni diamoni me mu udwaana tsiomi. Na me keni mu udwaana nde, weti bu beni diayaaba.
\c 2
\s Ukuluu na bunene ba Kristo
\p
\v 1 So itwaari kia beni na Kristo ili mu uha beni mifuri, so litoono la nde lili mu uhamisa beni, na so beni dili itwaari na nde mu Muheebili, so beni dili na buleembi na ngebe bana mu bana, 
\v 2 mu yii, diluusu me mu kinyi bu beni diba itwaari, mu litoono limosi, mutimi mosi na tsimi mosi. 
\v 3 A diyiluu ndaa so mosi mu muheebili wa makaama pe, so a buu pe, mu nzala a umonuu, ka diholo bambaayi weti baata bavulu beni ndutu. 
\v 4 Muutu so mosi pe wu usaa ukuusu manzala ma nde makulu, ka nyaala pasi muutu asaa ukuusu manzala ma bambaayi. 
\v 5 Nha kati a beni, didiaata weti baata bali itwaari mu Kristo.
\q1
\v 6 Umata bele pee, nde ali weti Nziaambi mu bioosi,
\q1 ka nde a asiayi pe uba tsitsi na Nziaambi\x + \xo 2.6 \xo*\xt Mba 3.5\xt*\x*.
\q1
\v 7 Ka, nde abisi bioosi bi nde ali na bio mu inde makulu,
\q1 mu uba weti musiali.
\q1 Nde aholi ifwaani kia muutu nha kati a baata.
\q1 Na baata bamuyaabi weti muutu.
\q1
\v 8 Nde akulii mu inde makulu,
\q1 na nde atumimi natee ku likwa,
\q1 likwa la nha muti wa kuruwa.
\q1
\v 9 Ni mu buu, Nziaambi anaangili nde nha mbuu yavulu unaanguu.
\q1 Nde wamuhi kuumbu yili nha yulu a makuumbu moosi.
\q1
\v 10 Nziaambi atooni ti mu kuumbu a Yiisu,
\q1 batumu boosi na miheebili mioosi mu mayulu,
\q1 baata boosi nha tsini a toto,
\q1 na babakwa boosi ku tsini a tsieengi batsukunu\x + \xo 2.10 \xo*\xt Yes 45.23\xt*\x*.
\q1
\v 11 Na bo boosi bayaabisa ti:
\q1 «Pfumu, ni Yiisu Kristo mu buzitu ba Nziaambi Taayi.»
\s1 Dingeyine weti liyalila nha tsi
\p
\v 12 Banduu ba me ba litoono, beni diakitumumu kwaa Nziaambi, mu taanga dioosi nha me nali nha kati a beni. Ninha, mu taanga di, diyiluu uhama mu uyiluu buu, bu me ndi nde pe nha kati a beni! Disala mu liyobolo la beni kutso ukuluu na likiinzi. 
\v 13 Mundaa ti, Nziaambi li mu usala nha kati a beni. Na nde li mu uha beni litoono na mifuri mia iyiluu mandaa weti buli minhana mia nde.
\p
\v 14 Diyiluu mandaa moosi kwahele a minhunhunyu so ubisi, 
\v 15 paa ti, beni diba baata bahele na toono na babatsieeme. Beni sa diba baana ba Nziaambi bahele na ipii, nha kati a baata ba tsi yi, babali bangaa biyiluu bibibi na muheebili wa ndiimbisi. Beni diafwaana ungeyine nha kati a bo weti liyalila lili mu ungeyine kutso pimisi. 
\v 16 Dihama mu ubiti ndaa ya moonyi kwaa bo. Ni mu buu, me sa ba na kinyi mu beni mu iluumbu kia nziriri a Kristo. Beni sa diba iliimbi ki imweese ti, me a nasala pe so umono pasi mu ibuu. 
\v 17 Imiini kia beni mu Nziaambi na isala kia beni, bili weti bungori babaha kwaa nde. Ka mbiiti bo badusu me, makili ma me sa mavuutunu na bungori baa, na me sa ba na kinyi yalaa. Na kinyi yili mu me, me natoono ti beni ka diba na yo. 
\v 18 Bumosi ka, diba na kinya, na diyaanga na me!
\s1 Isala kia Timoteo na Epafodite
\p
\v 19 Mu ilimbisi kia me mu Pfumu Yiisu, mu mwaana taanga hoolo, paa me tsinduu Timoteo kwaa beni. Paa mu mamvuungu ma me niyuu mu beni, mahamisa me. 
\v 20 Me a ndi na muutu mukimi pe, wu dili mu ukabisina matsimi na uba na tsoongo ya ngwanya mu beni. 
\v 21 Bana boosi bali na tsoongo ndila mu mandaa ma bo makulu, ka a mu toono a Yiisu Kristo pe. 
\v 22 Beni bame diayaaba buni Timoteo amweesi biliimbi bia unambita kwa nde mu me. Nde li anambita mu me, weti mwaana na taayi a nde. Nde asala na me kutso mapasi mu uyaabisa Ndaa Yimbwe. 
\v 23 Me ndi na ilimbisi kia utsinduu beni nde, nha na nha me kaayaaba bu ndaa a me yisuku. 
\v 24 Na me nayiluu usa imiini mu Pfumu ti, mwaana taanga hoolo dimaasala, na me sa yamono beni me makulu.
\p
\v 25 Me namono ti bubwe mu uvutulu beni mwaana nguu a bisa-beni Epafodite. Nde ni mbaayi a me wa isala na wa midiingi mu Kristo. Ni nde beni diatsindii me mu uha me libaasila li me nali na nzala lo. 
\v 26 Nde na nzala yalaa ya ubwamono beni boosi. Matsimi ma nde mali mutele-mutele, mundaa ti beni diayuyi mvuungu a ubeele kwa nde. 
\v 27 Ngwanya, nde ali na ubeele na nde akeni ukwa. Ka Nziaambi a kwiilili nde ngebe. A ndila nde pe Nziaambi akwiilili ngebe, ka na me ka, paa me nyaala umono ngebe dialaa. 
\v 28 Ni mu buu, me ni tsinduu beni nde mawasa-mawasa, paa beni diba mu kinya bu beni dikaabwamono nde. Na paa ngebe dia me ka, diba didikee. 
\v 29 Ni mu buu, diyaka nde mu kinyi yalaa, weti mwaana nguu mu Pfumu. Beni diafwaana uba na likiinzi mu baata boosi babali weti nde. 
\v 30 Mundaa ti, nde akeni ukwa mu isala kia Kristo. Nde asi idiingi kia nde mu pasi, mu ndaa uha me libaasila li beni bame diakooni uha kwaa me.
\c 3
\s Libweeye la ngwanya nha misi mia Nziaambi
\p
\v 1 Mu taanga di baana ba nguu ba me, diba na kinya mu uba itwaari mu Pfumu. Me a nikoono pe mu ubwaleele beni mi me namaakwasonuu, na kwaa beni yii yavulu bubwe. 
\v 2 Disa mayele mu baata babali mu uyiluu mandaa mamabi, bambwa baa, kaba la babali na ipfu kia ukese bubaala! 
\v 3 Ka bunu, ni bisi dili babakese ba ngwanya. Mu ndaa ti, bisi dili mu ukuundu Nziaambi mu muheebili a nde, bisi dili mu usa liwaa la bisi mu Yiisu Kristo. Na bisi a dili mu usuusu pe ilimbisi kia bisi mu mandaa ma imuutu.
\p
\v 4 Ka bunu, me ka aba utuu usuusu ilimbisi kia me mu mandaa ma imuutu. Me aba ni muutu wavulu uba na buungu mu utsuu mu mandaa maa nha kulu a bana boosi. 
\v 5 Bakese me mu iluumbu kia pwoombo nha mbisi a mbutili a me. Me ndi musi Iseraeli mu mbutili, mu ifuumbu kia Bezamini. Me ndi Muebeleo, mwaana a Baebeleo. Mundaa yatala tumimi a mikele mia Bayuudayo, me ali Mufarisi. 
\v 6 Me nali na nyooto yalaa ya utumumu mikele, ni mu buu, me nakibingisi libuundu la Kristo. Mu yatala ndiaatili yafwaana na mikele, me ali aka muutu wahele na toono.
\p
\v 7 Ka, mandaa ma me nakimono ti ali na ndaanda, mu taanga di, mu toono a Kristo, me ka mu umono mo mandaa ma buu a buu. 
\v 8 Me ndi mu umono mandaa moosi ti mahele a ndutu nha kulu a ndaa yi yavulu bunene na mandaa moosi. Ndaa me yavulu bunene ni uyaaba Yiisu Kristo Pfumu a me. Ni mu nde me nasiisi bioosi bi nali na bio. Na me ndi mu umono mandaa maa moosi, weti biloo bia ubumu ku buumbu, paa me ba wa Kristo, 
\v 9 na paa me yiluu uba itwaari na nde. Me a ndi na nzala ubwamonuu muutu wa libweeye mundaa mikele pe. Ka mu imiini mu Kristo, me ndi wa libweeye. Na, mu ndaa Nziaambi, me ndi wa libweeye mu imiini. 
\v 10 Ni mu buu, ndaa yi me navulu utoono, ni mu uyaaba Kristo na lituu la tsimbilili a nde mu babakwa, mu umono pasi weti nde, na mu ufwaanina nde mu likwa la nde. 
\v 11 Na me ndi na ilimbisi ti, me ka sa siimbuu mu babakwa.
\s Udumu tiini mu ubaa musieende
\p
\v 12 Me a ndi na tsimi pe ti me namaakwabiingi, so a buu pe, me namaakwakuu. Ka me ndi mu uhama mu udumu tiini mu mifuri paa me baa musieende, mundaa ti me makulu Yiisu Kristo amaakwabaa me. 
\v 13 Ngori, baana banguu ba me, me a ndi na tsimi pe ti me namaakwabiingi. Ka me ndi mu uyiluu ndaa ndila mosi: ni udiimbili mandaa mali ku mbisi a me, na me ndi mu uduku mali nha kulu a me. 
\v 14 Ni mu buu, me ndi mu udumu tiini mu ubiingi, paa me baa musieende wu Nziaambi ata bisi mbili mu uyaka ku yulu, mu Yiisu Kristo.
\p
\v 15 Bisi boosi badili babakulu mu imiini, nyaalani diduku ndiaatili yii. Ka, so beni diduki ndiaatili kimi, Nziaambi sa wadibaasila mu uyaaba ndiaatili ya ngwanya. 
\v 16 Ka, mu iteesi kidimaato natee lolo li, nyaalani diduku yiina kuulu mosi yii.
\p
\v 17 Baana ba nguu, beni boosi diduku ndiaatili a me na dikengese baata bali mu uduku ndiaatili a bisi. 
\v 18 Me nibaakwayaabisa beni yo, na me nibwayaabisa beni yo mu taanga di kutso ilili: uli na baata babalayi bali mitaata mia kuruwa a Kristo. 
\v 19 Bo sa bamana mu udiimbili, mu ndaa ti nziaambi a bo ni mioonyo mia bo. Bo bali mu uyaanga mu mandaa ma bo ma tsionyi. Na matsimi ma bo moosi mali mu mandaa ma tsi yi. 
\v 20 Ka bisi, tsi a bisi ku yula yili, ku umata Muyobili a bisi, Pfumu Yiisu Kristo, wu bisi dili mu ukebe. 
\v 21 Nde sa akitisi nyutu a bisi yadee, mu ufwaanisa yo na nyutu a nde ya buzitu, mu ndaa litu lili mu uha nde muswa wa usuusu biloo bioosi ku tsini a litumu la nde.
\c 4
\p
\v 1 Baana ba nguu ba me ba litoono, me ndi na nzala yalaa ya ubwamono beni! Beni ni kinyi a me na iburu kia me kia ipfumu! Ni mu buu, banduu ba me ba litoono, dihama mu uba itwaari na Pfumu.
\s Tumini
\p
\v 2 Kolokolo a we Evodia, kolokolo a we Sitikia, me ndoombi kwaa beni mu uyuhusunu na uba itwaari na Pfumu. 
\v 3 Na we ka, mbaayi a me wa isala, me ndoombi kwaa we mu ubaasila bakaasa ba. Mundaa ti bo badwaana itwaari na me mu uyaabisa Ndaa Yimbwe. Yiluu bumosi kwaa Kelema na kwaa banduu ba me boosi bali mu isala kia Kristo, babali na makuumbu ma bo mu mukaanda a moonyi. 
\v 4 Diyaanga wa beni mu uba itwaari na Pfumu. Me nibwaleele beni: diyaanga wa beni! 
\v 5 Nyaala bubwe ba beni bayabina kwaa boosi. Idii pe Pfumu mu uyira ali. 
\v 6 A dinyoongo mu ndaa so mosi pe! Ka mu taanga dioosi, diloombo kwaa Nziaambi mu likuundu, mandaa ma beni dili na nzala mo. Na diyiluu buu mu mutimi wa uvutulu matoondo. 
\v 7 Na iyeenge kia Nziaambi kialutu mayele moosi, sa ikebe mitimi na matsimi ma beni itwaari na Yiisu Kristo.
\p
\v 8 Mu umana, baana banguu ba me, disuusu matsimi ma beni mu mandaa moosi mamabwe na mafwaana uholo mbilili: mu mandaa moosi ma ngwanya na mafwaana uholo likiinzi, mu mandaa moosi ma libweeye na matsieeme, moosi mafwaana ubili na utoono. 
\v 9 Disalila mandaa ma beni diayii na diayaki kwaa me, mandaa ma beni diayuyi me mu uleele, na ma beni diamoni me mu uyiluu. Na Nziaambi a iyeenge sa aba na beni.
\s Pawuli li mu uvutulu matoondo kwaa basi Filipi mu bungori ba bo
\p
\v 10 Me namoni kinya yalaa mu Pfumu, mundaa ti beni dibwimweese litoono la beni mu me. Ngwanya, litoono lii, beni diakwaba na lo, ka beni a diabayi pe pwaasi ya umweese me lo. 
\v 11 A mundaa pe ti me ndi na manzala, ninha me ndi mu utsuu buu. Mu ngwanya, me nayii mu uba na kinya mu biloo bi me ndi na bio. 
\v 12 Me nayaaba uba mutso buwele na mutso busini ka. Me nayii uba na kinyi mu mambuu moosi na mu mataanga moosi: so nayuutu na so naba na nzala, so naba mutso busini so a buu pe mutso manzala. 
\v 13 Me utuu uyiluu mandaa moosi mu ndaa Kristo wuli mu uha me mifuri. 
\v 14 Ka, beni dimaayiluu bubwe bu dibaasila me mu mapasi ma me.
\p
\v 15 Beni bame basi Filipi diayiluu uyaaba bubwe: mu taanga di me namata mu itinini kia Masedwane, mu taanga di babaandii uyaabisa Ndaa Yimbwe, beni ali libuundu latsiomi labaasili me. Ndili a beni diakibaasila me mu manzala ma me. 
\v 16 Mu taanga di me nali mu ngaanda a Tesalonika, beni diatsindii me bi me nali na nzala a bio, na a ndila mbala mosi pe beni diayilii buu. 
\v 17 A yili pe ti me ndi mu usaa uyaka bungori. Ka me ndi na nzala ti, Nziaambi asieme beni mu ndaa bungori ba beni. 
\v 18 Ni mu buu, me maayaka biloo bioosi bi beni diatsinduu me. Biayiluu ukuu wa bio. Bu Epafodite amaabee me bungori ba beni, me ka na bioosi biafwaana kwaa me. Bungori baa bali weti bungori ba tsulu yimbwe, ba Nziaambi ali mu uyaka na ba nde atoono. 
\v 19 Nziaambi a me sa akuusu beni manzala ma beni moosi, weti buli bubwe ba busini ba nde, mu itwaari na Yiisu Kristo. 
\v 20 Nyaala Nziaambi Taayi a bisi, aholo buzitu mu taanga dioosi! Ameni.
\s Mabwee matsieelele
\p
\v 21 Dibii mu kuumbu a Yiisu Kristo pasi inama kia libuundu la beni. Baana banguu boosi bali itwaari na me baheeri ka beni mabwee.
\p
\v 22 Bangaa imiini boosi babali mu udiaala nha, na vulu-vulu babali mu usala mu nzo a mutini, baheeri ka beni mabwee. 
\v 23 Nyaala kolokolo a Pfumu Yiisu Kristo yiba na beni boosi!