\id 1TH Iyaa (YAK) NT en Kiyaka
\ide UTF-8
\h Mukaanda wa tsiomi wa Pawuli kwaa basi Tesalonika
\toc3 1Te
\toc2 1 Tesalonika
\toc1 Mukaanda wa tsiomi wa Pawuli kwaa basi Tesalonika
\mt2 Mukaanda wa tsiomi wa Pawuli kwaa basi
\mt1 Tesalonika
\imt Kotili a mukaanda
\ip Pawuli abali libuundu la ku ngaanda a Tesalonika, mu taanga dia midieenge mia nde mia isala kia Nziaambi mia mbala ya dioolo. Nde ayeni ku ngaanda yii nha mbisi a usiisi ngaanda a Filipi. Ngaanda a Tesalonika yili ku taanda a tsi ya kuumbu Eleene, ku peembi ya Esete, mu itinini kia Masedwane. Tesalonika yili ngaanda yibubaata kaari kwalaa. Bieenyi bialaa bibaadiaala mu ngaanda yii, na vulu-vulu Bayuudayo. Bayuudayo babamosi a bakisiingi pe nziisili a Pawuli, na bo bamubingi mu ngaanda yii. Ka Pawuli asonii kwaa basi Tesalonika boosi, babakiingili mayele mu uduku Yiisu. Mu yii, nde li mu uhama mu uha nziisili a nde. Babayii mandaa ma Biibila bali mu uleele ti, mukaanda wu, li mukaanda watsiomi wu Pawuli asonii kwaa mabuundu moosi. Ni mu buu, nde ali ka mukaanda wavulu bukulu mu mikaanda mia Lilasina li Linyatii.
\ip Kiiti kia tsiomi natee kia bitata (\xt 1—3\xt*) bili mu umweese bisi buli itwaari kia Pawuli na basi Tesalonika. Pawuli ayaki mamvuungu mamabwe ma libuundu la ku ngaanda a Tesalonika. Nde li mu ulibili bo moonyi mu isala ki nde asi kwaa bo. Nde li mu uleele ka bo, mu ki iteesi nde ali na nzala ya ubwamonono na bo. Mu kiiti kia bina na kia bitaana (\xt 4—5\xt*), Pawuli li mu uhamisa basi Tesalonika mu ukulu mu idiingi kia bo mu Kristo. Nde li mu uha mamvutu, mu manduru mamali mu uviinzili mitimi mia libuundu lilinyatii. Bangaa Kristo batsiomi, bakikebe ti Kristo ayiri avutuu mawasa. Kaba, balibuundu babamosi bakwiiri, tswaamina Pfumu Yiisu uyiri avutuu. Ni mu buu, bangaa Kristo bali mu ufulusunu manduru mu uyaaba, buni babakwa baa bakaaba. Pawuli li mu uleele ti \em babakwa na babali moonyi, bo boosi itwaari bali mu Yiisu Kristo\em*. Sa iba na iluumbu ki bo boosi busiimbuu mu likwa. Uli na ndutu mu ukebe iluumbu kia Pfumu Yiisu, ka a uli na muutu pe wayaaba taanga dia iluumbu kii. Ndaa yavulu ndutu, ni uba itwaari na Pfumu, weti bu Pfumu ali mu uloombo.
\ie
\c 1
\s Mabwee
\p
\v 1 Me Pawuli, Siila na Timoteo, dili mu usonuu mukaanda wu kwaa libuundu la ku ngaanda a Tesalonika. Lo lili libuundu la Nziaambi Taayi na Pfumu Yiisu Kristo: nyaala bweese na iyeenge biba na beni.
\s Pawuli li mu uvutulu matoondo kwaa Nziaambi mu imiini kia basi Tesalonika
\p
\v 2 Taanga dioosi, bisi dili mu ubaavutulu matoondo kwaa Nziaambi mundaa beni boosi, na dili mu ubaalibilanga moonyi mu beni mu makuundu ma bisi. 
\v 3 Bisi dili mu ulibili moonyi nha kulu a Nziaambi Taayi a bisi, mu ndaa ti tsialili a beni yili mu umweese ti beni dili na imiini mu nde. Bisi dili mu ubili beni, mu ndaa libaasila li beni dili mu uha bana mu bana. Bisi dili mu umono ilimbisi kia beni kiahama bu beni dili mu ukebe nzirili a Pfumu a bisi Yiisu Kristo.
\p
\v 4 Baana ba nguu, bisi diayaaba ti Nziaambi atoono beni na nde asiooli beni, paa beni diba baata ba nde. 
\v 5 Mu ngwanya, mu taanga di bisi diayaabisi beni Ndaa Yimbwe, a yali ndila mu bitoolo pe. Ka bisi diayaabisi yo, mu lituu na libaasila la Muheebili wa Ngira na mu ilimbisi kioosi. Beni diayaaba bwali ndiaatili a bisi nha kati a beni, mundaa mbweeyili a beni. 
\v 6 Beni diaduki ifwaani kia bisi na kia Pfumu. So bu beni diali kutso mapasi, beni diayaki Ndaa Nziaambi mu kinyi yili mu umata kwaa Muheebili wa Ngira. 
\v 7 Ni mu buu, beni dika ifwaani ki ibwe kwaa bangaa imiini bali mu bitinini bia Masedwane na Akayi. 
\v 8 Mu ngwanya, mandaa ma Nziaambi a mamati pe ndila kwaa beni mu uyene ku Masedwane na ku Akayi. Ka mo mayeni natee mu mambuu moosi ma mamvuungu ma imiini kia beni mu Nziaambi kiatsaamuu. Ni mu buu, bisi a dili na nzala a ubwatsuu mu yo pe. 
\v 9 Baata boosi bali mu utsuu mundaa nziakili yi beni diayaki bisi, mu taanga di bisi diayiri kwaa beni. Na bo bali mu utsuu ka mu ndaa yi beni diabwoongili biteyi mu ukiinguu kwaa Nziaambi mu usalila nde, nde wuli Nziaambi wa moonyi na wa ngwanya. 
\v 10 Beni dili mu ukebe ti, Yiisu mwaana nde amata ku mayula. Ni nde Nziaambi asiimbili mu babakwa. Nde li mu ukuulu bisi mu kesi a Nziaambi yika bebele.
\c 2
\s Isala kia Pawuli ku ngaanda a Tesalonika
\p
\v 1 Baana ba nguu ba me, beni bame diayiluu uyaaba ti, a mu ibuu pe bisi diayiri kwaa beni. 
\v 2 Beni diayaaba ka ti, tsiomi bakituu bisi na bamweesi bisi pasi ku ngaanda a Filipi. Ka Nziaambi aha bisi ibaala kia uyaabisa Ndaa Yimbwe kwaa beni, so bu yali ti kutso ndwaanisi.
\p
\v 3 Mu ngwanya, nziisili yidiahi kwaa beni a yili ya pia pe. Yo a yamata pe mu matsimi mamabi, na bisi a dili mu usaa pe ufutu pia kwaa muutu so mosi. 
\v 4 Ka bisi dibaatsuwanga weti buli litoono la Nziaambi. Mundaa ti, nde asa ilimbisi mu bisi, na aheeri bisi isala kia uyaabisa Ndaa a nde Yimbwe. Bisi a dili mu usaa pe umonuu bababwe nha kulu a baata, ka nha kulu a Nziaambi wuli mu ukengese matsimi mali mu umata kutso mitimi mia bisi. 
\v 5 Beni diayiluu uyaaba ti, bisi a diasialili pe tsuyili ya peluu. Bu mosi ka, bisi a diasalili pe bitoolo mu nzala ya ubaa mboongo! Nziaambi li mbaangi a bisi. 
\v 6 Bisi a diasaa pe mbilili yili mu umatuu kwaa baata, so yaba kwaa beni, so yaba kwaa baata bakimi. 
\v 7 Ka bunu, bisi aba utuu ubamuu beni ku tsini a litumu la bisi, mundaa ti bisi dili batumu ba Kristo! Ka bisi dimweesi buleembi nha kati a beni, weti bu nguu ubaaba na buleembi mu baana ba nde. 
\v 8 Bisi diali na litoono lalaa mu beni, ni mu buu, bisi diali diayilimi a ndila mu uyaabisa beni Ndaa Yimbwe pe, ka na uha idiingi kia bisi mu beni. Beni diali ka baata ba tala kwaa bisi! 
\v 9 Baana ba nguu, beni dili mu ulibili moonyi mu mapasi ma bisi diamoni mu isala kia bisi. Bisi diasiali butsuu na nyanga mu unyaala uba mufunu kwaa muutu so ndila mosi mu beni. Ka bunu bisi diakiyiisi beni Ndaa Yimbwe ya Nziaambi. 
\v 10 Beni na Nziaambi dili bambaangi ba bisi. Ndiaatili a bisi ali yasuungunu, ya bungiri na yahele na bisieembi. 
\v 11 Beni diayaaba ti bisi diadiaati na mosi mosi mu beni, weti taayi na baana ba nde. 
\v 12 Bisi diahamisi beni na diahi beni mandoongi. Bisi dialoombi kwaa beni mu mukonono mu uba na ndiaatili yi Nziaambi atoono. Nde wuli mu uta beni mbili mu ukoto mu Ipfumu kia nde na mu buzitu ba nde.
\p
\v 13 Bisi dili mu ubaavutulanga matoondo kwaa Nziaambi mu ndaa yi: mu taanga di bisi diayaabisi beni Ndaa a Nziaambi, beni diayuyi na diayaki yo. Beni a diayaki pe yo weti ndaa a baata, ka beni diayaki yo weti Ndaa a Nziaambi, ni buu yo yili. Ni mu buu yo yili mu usala mu beni bangaa imiini. 
\v 14 Baana ba nguu, beni dimaaduku ifwaani kia mabuundu ma Nziaambi mali mu itinini kia Yuuda, mali mu usa imiini mu Yiisu Kristo. Beni diamoni pasi kwaa baata ba tsi a beni, weti bu mabuundu maa mamoni pasi kwaa Bayuudayo. 
\v 15 Bayuudayo baa, badusi Pfumu Yiisu na mibili, na bo bakwaamisi bisi. Nziaambi a ubaayaanga mu bo pe na bo bali mitaata mia baata boosi! 
\v 16 Bo bali mu ukoonoso bisi uyiisi kwaa bifuumbu bikimi ndaa yiyituu uyobolo bo. Bo bali mu ubweese masumu makimi nha yulu a masumu ma bo bubaayiluu taanga dioosi. Ka nha tsieelele, kesi a Nziaambi yimaabwiilili bo.
\s Pawuli li na nzala ya ubwayamono libuundu la ku Tesalonika
\p
\v 17 Baana ba nguu! Bisi dili diakabuu na beni mu mwaana taanga hoolo, mu musunyi ka a mu mutimi pe. Ka bisi dili na nzala yalaa ya ubwamono beni, na bisi diasi mifuri mialaa mu ukuusu nzala yii. 
\v 18 Bisi diali na nzala yalaa ya uyiri kwaa beni, na me Pawuli me nayesini uyiri kuu mbala dialaa. Ka Saatina akoonisi bisi uyiluu buu. 
\v 19 Mu ngwanya, ndila beni dili ilimbisi kia bisi, ka a muutu mukimi pe. Beni dili ilimbisi kia bisi, kinyi a bisi, na iburu kia mbiingili ki bisi dimono kinyi mu kio nha kulu a Pfumu a bisi Yiisu Kristo nha nde akaayiri avutuu. 
\v 20 Mu ngwanya, beni dili buzitu na kinyi a bisi.
\c 3
\p
\v 1 Nha tsieelele, bisi a diabwituu pe ukama mutimi mu ukebe. Bisi diaholi kesili ya udiaala bisi bake ku ngaanda ya Ateene. 
\v 2 Na diatsinduu beni Timoteo, mwaana a nguu a bisi. Nde li mbaayi a bisi wa isala kia Nziaambi, mu uyaabisa Ndaa Yimbwe ya Kristo. Bisi diayilii buu, paa nde ahamisa beni na uha beni ibaala mu imiini kia beni, 
\v 3 paa muutu so mosi mu beni anyaala udee mundaa mbingisi di bisi dili mu umono. Beni bame diayiluu uyaaba ti, mbingisi di dili minhana mia Nziaambi mundaa bisi. 
\v 4 Mu ngwanya, nha bisi diali itwaari na beni, bisi diakwiyaabisi beni ti, sa babingisi bisi. Beni diayiluu uyaaba ti, maa ni mamayilimi. 
\v 5 Ni mu buu, bu nali ka utuu pe ukutu mutimi mu ubaakebanga, me natsindii Timoteo mu uholo mamvuungu ma imiini kia beni. Me ndi na boomo ti Saatina a ayawungusu beni, leeti mapasi ma bisi sa maba ma ibuu.
\p
\v 6 Ka mu taanga di, Timoteo maamata kwaa beni, na maabee bisi mamvuungu mamabwe ma imiini kia beni na litoono la beni. Nde maaleele bisi ti, beni dili mu ubaalibilanga moonyi mu bisi mu mamabwe moosi, na beni dili na nzala yalaa ya ubwamono bisi, weti bu bisi ka dili na nzala yalaa ya ubwamono beni. 
\v 7 Ni mu buu baana ba nguu, kutso mangebe na mapasi ma bisi moosi, bisi diabayi pamini mundaa imiini kia beni. 
\v 8 Mu taanga di, bisi dili mu ubwamono kinyi, mundaa ti beni dili dianambata mu itwaari na Pfumu. 
\v 9 Mu ki iteesi bisi dituu uvutulu matoondo kwaa Nziaambi mundaa beni, mundaa kinyi yoosi yi beni diaha bisi nha kulu a nde? 
\v 10 Butsuu na nyanga, bisi dili mu uloombo kwaa Nziaambi mu mifuri, paa nde aha bisi muswa wa ubwamono beni mu mamono misi. Na paa ti, bisi dibweese bibili keni biahele mu imiini kia beni.
\p
\v 11 Nyaala Nziaambi nde makulu, Taayi a bisi, na Pfumu a bisi Yiisu, baha bisi kuulu ya uyiri kwaa beni! 
\v 12 Nyaala ti Pfumu ayiluu ubwakulusu litoono li beni dili na lo bana mu bana, na mu baata boosi, mu ifwaani kia litoono li bisi dili na lo mu beni. 
\v 13 Nyaala nde ahamisa mitimi mia beni, paa beni diba bangira na bahele na bisieembi nha kulu a Nziaambi, nha Pfumu a bisi Yiisu akaayiri avuutu na baba nde boosi! Ameni.
\c 4
\s Ndiaatili yili mu uha Nziaambi kinyi
\p
\v 1 Baana ba nguu, beni diayii kwaa bisi buni beni dituu udiaata mu uha kinyi kwaa Nziaambi. Ngwanya, beni dili mu uyiluu buu. Ka mu taanga di, bisi dili mu uloombo na uhamisa beni mu kuumbu a Pfumu mu uyiluu miabwavulu mii iteesi! 
\v 2 Beni diayaaba mandoongi ma bisi diahi kwaa beni, mamati kwaa Pfumu Yiisu. 
\v 3 Dimono litoono la Nziaambi ni lili ti: beni diba na ndiaatili yatsieeme na uhele uba kutso tsoongili. 
\v 4 Nyaala pasi muutu mu beni ayaaba ukuku nyutu a nde kutso bungiri na buzitu, 
\v 5 kwahele a uba ku tsini a litumu la manzala mamabi, weti buli mu usa bangooyi babahele uyaaba Nziaambi. 
\v 6 Mu ndaa yii, muutu so mosi pe wafwaana usa bubi kwaa mwaana a nguu a nde, so a buu pe, ukwaamisa nde. Bisi diakwiyaabisa beni ndaa yii, na bisi diayilii udutu beni matswi mu ndaa yii. Pfumu sa asieembe babuyiluu mandaa mamabi maa. 
\v 7 Nziaambi a ata bisi mbili pe mu udiaata kutso tsoongili, ka mu udiaata kutso bungiri. 
\v 8 Ni mu buu, muutu wu ubisi uyuu mandoongi ma, nde a abisi muutu pe, ka nde bisi Nziaambi wuli mu uha beni muheebili wa Ngiri.
\p
\v 9 Bisi a dili pe na nzala ya ubwasonuu beni mandaa mu yatala litoono mu bambaayi. Mundaa ti, Nziaambi nde makulu ayiisi beni litoono mu bambaayi. 
\v 10 Ni litoono me lii beni dili mu umweese kwaa baana ba nguu ba ku Masedwane. Ka, baana ba nguu, bisi dili mu uhamisa beni mu uyiluu miavulu mii. 
\v 11 Disa mifuri mu uba mu iyeenge. Ditala ndila mandaa ma beni bame, na disaa idiingi kia beni mu mioo mia beni bame, weti bu bisi diakwiyaabisa beni yo. 
\v 12 Ndiaatili a beni sa yisa ti bangooyi baha beni likiinzi, na beni a diba pe mufunu kwaa muutu so mosi.
\s1 Nziriri a Pfumu
\p
\v 13 Baana ba nguu, bisi diatoono ti beni diyaaba ngwanya mu yatala baata babakwa, paa beni dinyaala umono ngebe weti baata babamosi, babahele na ilimbisi. 
\v 14 Bisi diasa imiini ti Yiisu akwi na nde asiimbii mu babakwa. Bumosi ka, bisi diasa ka imiini ti Nziaambi sa asiimbili, itwaari na Yiisu, boosi babakwa mu imiini mu nde.
\p
\v 15 Ngwanya, dimono mi bisi dili mu uyaabisa mu yatala nziisili a Pfumu: babakaaba moonyi nha kati a bisi mu taanga di Pfumu akaayiri, a bakaaba pe nha kulu a babakwa. 
\v 16 Mu taanga di dikaayuu tumini mu muniingi a mukuutu a batumu ba Nziaambi, na kele a mvura-mvuri a Nziaambi, Pfumu nde makulu sa asutuu mu umata ku yula. Baata babakwa mu imiini mu Kristo sa baba babatsiomi mu usiimbuu. 
\v 17 Tumake, bisi badiba moonyi mu taanga dii, sa badinaangila mu matuti itwaari na bo, mu ubwaanina na Pfumu, mu ingiee-ingiee. Mu yii, bisi sa dibaabaanganga itwaari na Pfumu. 
\v 18 Ni mu buu, dihamisina bana mu bana, mu nzisili yi.
\c 5
\p
\v 1 Baana ba nguu, beni a dili na nzala pe ti basonuu beni mandaa, mu yatala taanga na nguungu yi maa moosi makaayira. 
\v 2 Mundaa ti beni bame diayiluu uyaaba ti, iluumbu kia Pfumu sa iyiri weti bu muyibi ubaayiri butsuu\x + \xo 5.2 \xo*\xt Mat 24.43; Luk 12.39; 2Pe 3.10\xt*\x*. 
\v 3 Mu taanga di baata bakaaleele: «Bisi dili mutso iyeenge na izuunu», ni mu taanga dii, itsundatsundu, pfuuyili sa yibwa nha yulu a bo, weti bu mukaasa ngaa yimi ali mu ubaa misoongo. Muutu pe wu utuu uvuu!
\p
\v 4 Ka beni, baana ba nguu, beni a dili pe kutso pimisi, paa ti iluumbu kii iyabwiilili beni weti muyibi. 
\v 5 Mu ngwanya, beni boosi, beni dili baana ba liyalila, na ba nyanga. Bisi a dili so baana ba butsuu, so ba pimisi pe. 
\v 6 Ni mu buu, dinyaalani ula matolo weti babamosi. Ka dibaanani likanda na dikukani manyutu ma bisi. 
\v 7 Babubaala matolo, koo ula butsuu. Babubaakolo mala, koo ukolo ka butsuu. 
\v 8 Ka bisa beni badili baata ba nyanga, diafwaana ukuku manyutu ma bisi. Dilwaatanani imiini na litoono weti ikutu kia itali kia midiingi. Dilwaatani ilimbisi kia liyobolo weti iburu kia midiingi. 
\v 9 Mu ngwanya, Nziaambi a atoono pe ti bisi dimono kesi a nde, ka nde atoono ti bisi diholo liyobolo mu Pfumu Yiisu Kristo. 
\v 10 Kristo akwi mu ndaa bisi, paa bisi diba moonyi itwaari na nde mu taanga di nde akaayira, so diaba tolo, so a buu pe, bamisii. 
\v 11 Ni mu buu, dihamisina na dibaasila bana mu bana mu ukulu mu imiini, weti bu beni dili mu ukwasa.
\s1 Tumini diatsielele na mabwee matsieelele
\p
\v 12 Baana ba nguu, bisi diloombo kwaa beni mu ukiinzi babali mu usa isala kia mifuri nha kati a beni, babali mu ubiti na uha beni mandoongi mu tumini dia Pfumu. 
\v 13 Diha bo buzitu balaa na dimweese litoono mu bo, mundaa isala kia bo. Diba mu iyeenge nha kati a beni.
\p
\v 14 Baana ba nguu, bisi diloombo kwaa beni, mu usieembe babolo, dihamisa babali na boomo, dibaasila babahele na mifuri, dikama mitimi mu boosi. 
\v 15 Dikele muutu a ayavutulu mamabi mu mamabi. Ka taanga dioosi, dihama mu uba na isiaayi nha kati a beni na kwaa baata boosi.
\p
\v 16 Dibaaba na kinya taanga dioosi. 
\v 17 Dibaakuundanga taanga dioosi. 
\v 18 Dikaavutulanga matoondo kwaa Nziaambi mu mandaa moosi. Maa ni mandaa ma Nziaambi ali mu uloombo kwaa beni, mu idiingi kia beni na Kristo.
\p
\v 19 A didimisi pe Muhebili wa Ngira. 
\v 20 A dimeengele pe mandaa mamata kwaa Nziaambi. 
\v 21 Ka dikengese mandaa moosi: diholo mamabwe, 
\v 22 na dibisi mandaa moosi mamabi. 
\v 23 Nyaala Nziaambi, idia kia iyeenge, asa ti beni diba baba nde mu bioosi. Nyaala nde akebe imuutu kia beni kioosi: miwuumu na manyutu, paa beni diba babahele a bisieembi umata lolo li, natee mu iluumbu ki Pfumu a bisi Yiisu Kristo akaayiri. 
\v 24 Wuli mu uta beni mbili sa akuusu mandaa maa moosi ma nde alasina, mundaa ti nde li anambata mu mandaa ma nde.
\p
\v 25 Baana ba nguu, dikuundu ka mu bisi. 
\v 26 Dinyumbutusunu bana mu bana, weti bwafwaana kwaa baana ba nguu mu Kristo. 
\v 27 Kolokolo a beni, mu kuumbu a Pfumu, ditaanga mukaanda wu kwaa baana ba nguu boosi. 
\v 28 Nyaala bweese ba Pfumu a bisi Yiisu Kristo baba na beni!